Owalọ lẹ
22 “Mì gbẹtọ lẹ, mẹmẹsunnu lẹ po otọ́ lẹ po emi, todin, mì sè avùnlọyiyi ṣie to nukọn mìtọn.”+ 2 Podọ to whenue yé sè bọ e to hodọna yé to Heblugbe mẹ, yemẹpo sọ vọ́ nabọẹ dogọ, ewọ sọ dọmọ: 3 “Ju de wẹ yẹn+ bo yin jiji to Talsu Silisia tọn,+ ṣigba yẹn plọnwe to tòdaho ehe mẹ to Gamalieli+ lọsu titi dè bosọ yin pinplọn nado nọ payi Osẹ́n tọgbo lẹ tọn lọ go mlẹnmlẹn+ bo yin zohunhunnọ na Jiwheyẹwhe kẹdẹdile mìmẹpo te do to egbé.+ 4 Yẹn dohomẹkẹn mẹhe yin Aliho* ehe tọn lẹ jẹ okú bo nọ blá sunnu po yọnnu po bosọ nọ ze yé jo nado yin zizedo gànpamẹ,+ 5 dile yẹwhenọ daho lọ gọna pipli mẹho lẹpo tọn sọgan dekunnu etọn gando go e do. Yewlẹ dè wẹ yẹn sọ mọ wekanhlanmẹ lẹ yí sọn ga na Ju hatọ mítọn he tin to Damasku lẹ, podọ yẹn sọ tin to aliji nado yì hẹn mẹhe tin to dọ́n lẹ wá Jelusalẹm biblá nado yin yasana.
6 “Ṣigba, dile yẹn to gbejizọnlinzin bo to dindọnsẹpọ Damasku, to owhè ṣádada mẹ, hinhọ́n daho de họ́n lẹdo mi pé sọn olọn to ajiji mẹ,+ 7 n’sọ jai do kọmẹ bo sè ogbè de dọna mi dọ, ‘Saulu, Saulu, naegbọn hiẹ do to homẹkẹndo mi?’ 8 Yẹn gblọn dọ: ‘Hiẹ mẹnu wẹ, Oklunọ?’ Ewọ sọ dọna mi dọ: ‘Yẹn Jesu Nazalẹti tọn wẹ, mẹhe hiẹ to homẹkẹndo.’ 9 Mẹhe zọnhẹ mi lẹ mọ hinhọ́n lọ, ṣigba yé ma sè nuhe mẹhe to hodọna mi lọ to didọ. 10 To whenẹnu, yẹn dọmọ: ‘Etẹwẹ yẹn dona wà, Oklunọ?’ Oklunọ sọ dọna mi dọ: ‘Fọ́n bo yì Damasku, podọ nuhe hiẹ dona wà lẹpo na yin didọna we to dọ́n.’+ 11 Ṣigba, to whenuena e yindọ yẹn ma sọgan mọ nudepope na hinhọ́n lọ họ́n taun wutu, mẹhe zọnhẹ mi lọ lẹ wẹ hẹn alọ na mi yì Damasku.
12 “To whenẹnu, Ananias, dawe de he dibusi Jiwheyẹwhe sọgbe hẹ Osẹ́n lọ, mẹhe Ju he nọ nọ̀ finẹ lẹpo nọ dekunnu etọn dagbe, 13 wá dè e. E sọ ṣite to apá na mi bo dọna mi dọ: ‘Mẹmẹsunnu Saulu, nukun towe ni mọnú whladopo dogọ!’ To afọdopolọji, yẹn ze nukun daga bo mọ ẹn.+ 14 Ewọ dọmọ: ‘Jiwheyẹwhe tọgbo mítọn lẹ tọn ko de we nado wá yọ́n ojlo etọn bo mọ omẹ dodonọ lọ+ podọ nado sè ogbè etọn, 15 na hiẹ na yin kunnudetọ etọn na gbẹtọ lẹpo gando nuhe hiẹ ko mọ bosọ sè lẹ go.+ 16 Todin, naegbọn hiẹ gbẹ́ to gbàndọn? Fọ́n bo yin bibaptizi bosọ klọ́ ylando towe lẹ sẹ̀+ gbọn oyín etọn yiylọ dali.’+
17 “Ṣigba, to whenue yẹn ko lẹkọwa Jelusalẹm+ bo to dẹ̀ho to tẹmpli mẹ, yẹn jẹ numimọ de mọ ji 18 bosọ mọ bọ e to didọna mi dọ: ‘Yawu bo tọ́n sọn Jelusalẹm to niyaniya mẹ, na yé ma na kẹalọyi kunnudide towe gando go e.’+ 19 Yẹn sọ dọmọ: ‘Oklunọ, yelọsu yọnẹn ganji dọ yẹn ko nọ wle mẹhe yise to hiẹ mẹ lẹ do gànmẹ dai bosọ nọ hò yé to sinagọgu de mẹ jẹ devo mẹ;+ 20 podọ to whenue ohùn Stefani kunnudetọ towe tọn to yinyin sinsọndai, yẹn ṣite to finẹ bo kọngbedopọ bosọ to awugbó mẹhe to hùhù i lẹ tọn ṣọ́.’+ 21 Ṣogan, ewọ dọna mi dọ: ‘Yì, na yẹn na do we hlan akọta he to fidindẹn lẹ dè.’”+
22 Yé sọ to todoaina ẹn kakajẹ ohó ehe ji. Enẹgodo, yé ze ogbè daga bo to didọmọ: “De omẹ mọnkọtọn sẹ̀ sọn aimẹ, na ewọ ma jẹ nado nọgbẹ̀!” 23 Na yé to awhádo bo to awugbó yetọn lẹ mimí bosọ to kọ́gudu yìn do jẹhọn mẹ wutu,+ 24 awhàngán daho lọ degbe dọ Paulu ni yin hinhẹnwa opá awhànfuntọ lẹ tọn mẹ podọ dọ yè ni yí hihò do kanhose e, na emi nido yọ́n nuhewutu yé do to awhádo sọta Paulu to aliho ehe mẹ taun. 25 Ṣigba, to whenue yé ko tẹ́ ẹ nado hò e, Paulu dọna awhàngán* he to ote to finẹ dọmọ: “Be e sọgbe hẹ osẹ́n na mì nado hò Lomunu* de he ma ko yin whẹgbledo* ya?”+ 26 Todin, to whenue awhàngán* lọ sè ehe, e yì awhàngán daho lọ dè bo na linlin dọmọ: “Etẹwẹ hiẹ to linlẹn nado wà? Na Lomunu de wẹ dawe ehe.” 27 Enẹwutu, awhàngán daho lọ dọnsẹpọ bo dọna ẹn dọmọ: “Dọna mi, Lomunu de wẹ hiẹ ya?” E dọmọ: “Mọwẹ.” 28 Awhàngán daho lọ gblọn dọmọ: “Yẹn họ̀ jlọjẹ tòvi-yinyin tọn ehelẹ po akuẹ daho de po.” Paulu dọmọ: “Ṣigba, yẹn yin jiji po jlọjẹ lọ lẹ po wẹ.”+
29 Enẹwutu, mẹhe jlo na yí yasanamẹ do kanhose e lẹ joagọyigodo sọn e dè to afọdopolọji; awhàngán daho lọ sọ dibu to whenue e wá yọnẹn dọ Lomunu de wẹ bọ ewọ ko yí gẹdẹ lẹ do blá ẹ.+
30 Enẹwutu to aihọngbè, na e jlo na yọ́n nuhewutu Ju lẹ do to whẹsadokọna ẹn taun wutu, e tún in dote bo degbena yẹwhenọgán lẹ podọ hagbẹ Whẹdatẹn Daho Ju lẹ tọn* lẹpo nado pli. E sọ hẹn Paulu jẹte wá bo hẹn ẹn ṣite to ṣẹnṣẹn yetọn.+