1 Otànnugbo lẹ
10 Todin, Filistinu lẹ to avùnho hẹ Islaeli. Sunnu Islaeli tọn lẹ sọ họ̀n sọn Filistinu lẹ nukọn, bọ mẹsusu yin hùhù to Osó Gilboa ji.+ 2 Filistinu lẹ dowezun plá Sauli po visunnu etọn lẹ po, Filistinu lẹ sọ hù visunnu Sauli tọn lẹ, yèdọ Jonatani, Abinadabi po Malki-ṣua po.+ 3 Awhàn lọ sọ sinyẹn do Sauli ji, bọ ogádetọ lẹ de ogá do e, ewọ sọ yin awugblena gbọn ogádetọ lọ lẹ dali.+ 4 Whenẹnu, Sauli dọna gbaja hẹntọ etọn dọmọ: “Dọ̀n ohí towe sún bo sọ́ mi luntọ́n, na sunnu he ma gboadà ehelẹ nikaa wá bo yinuwa hẹ mi po kanyinylan* po.”+ Ṣigba, gbaja hẹntọ etọn ma jlo, na e to budi tlala wutu. Enẹwutu, Sauli yí ohí lọ bo họ́ jẹ e ji.+ 5 To whenue gbaja hẹntọ etọn mọdọ Sauli ko kú, ewọ lọsu họ́ jẹ ohí etọn titi ji bo kú. 6 Gbọnmọ dali, Sauli po visunnu etọn atọ̀n lẹ po gọna mẹhe tin to whédo etọn mẹ lẹpo kú dopọ.+ 7 To whenue omẹ Islaeli tọn he to agbàdo lọ mẹ lẹpo mọdọ mẹlẹpo ko họnyi bọ Sauli po visunnu etọn lẹ po ko sọ kú, yé jẹ hinhọnyi sọn tòdaho lọ lẹ mẹ ji; enẹgodo Filistinu lẹ wá bo nọ nọ̀ tòdaho lọ lẹ mẹ.
8 To wunkẹngbe, whenue Filistinu lẹ wá nado de nuhe tin to mẹhe ko yin hùhù lọ lẹ go, yé mọ oṣiọ Sauli po visunnu etọn lẹ po tọn to Osó Gilboa ji.+ 9 Enẹwutu, yé gbòta na ẹn bo de gbaja etọn bosọ dowẹn hlan aigba Filistinu lẹ tọn lẹpo ji nado lá linlin lọ pé na boṣiọ yetọn lẹ+ podọ na gbẹtọ lẹ. 10 Enẹgodo, yé ze gbaja etọn do ohọ̀* yẹwhe yetọn tọn mẹ bo ze taká etọn plá do ohọ̀ Dagọni tọn mẹ.+
11 Whenue mẹhe nọ nọ̀ Jabẹṣi+ to Giliadi lẹpo sè nuhe Filistinu lẹ ko wà na Sauli lẹpo,+ 12 yé mẹhe yin awhànfuntọ lẹpo fọ́n bo yì ze oṣiọ Sauli po visunnu etọn lẹ po tọn sẹ̀. Yé hẹn yé wá Jabẹṣi bo dì ohú yetọn lẹ do atin daho lọ sá to Jabẹṣi,+ bosọ blanù na azán ṣinawe.
13 Gbọnmọ dali, Sauli kú na nugbonọ-mayin etọn hlan Jehovah wutu, na e ma setonuna ohó Jehovah tọn+ bosọ kannubiọ afinyọnnọ de+ 14 kakati nado kanhose Jehovah. Enẹwutu, E hù i bo ze gánzinpo lọ jo na Davidi visunnu Jẹsse tọn.+