1 Kọlintinu lẹ
16 Todin, gando akuẹjọ he tin na omẹ wiwe lẹ go,+ mì sọgan hodo anademẹ he yẹn na agun Galatia tọn lẹ. 2 To azán tintan* osẹ lẹpo tọn gbè, dopodopo mìtọn ni nọ de nude dovo sọgbe hẹ nuhe e tindo, bọ e ma na yin to whenue yẹn wá wẹ akuẹjọ lẹ na yin bibasi. 3 Ṣigba, to whenue yẹn na wá, sunnu he mìwlẹ pà to wekanhlanmẹ mìtọn lẹ mẹ+ lẹ wẹ yẹn na dohlan nado hẹn nunina homẹdagbe tọn mìtọn yì Jelusalẹm. 4 Etomọṣo, eyin e biọ dọ yẹnlọsu ni yì dọ́n ga, be yé na yì hẹ mi.
5 Ṣigba, yẹn na wá mì dè to whenue yẹn na ko zẹ̀ Makedonia godo, na Makedonia wẹ yẹn na gbọn;+ 6 podọ vlavo yẹn na nọ mì dè kavi tlẹ yí ojlẹ avivọ-whenu tọn zan hẹ mì, na mìwlẹ nido sọgan yìn mi vude jẹ aliji to whenue yẹn na dedo fihe yẹn jei. 7 Na yẹn ma jlo na wá pọ́n mì todin he yẹn na juwajei poun gba, to whenuena e yindọ yẹn gbẹ́ jlo nado wá nọ mì dè na ojlẹ de,+ eyin Jehovah* jlo. 8 Ṣigba, yẹn na gbọṣi Efesu+ kakajẹ Hùnwhẹ Pẹntikọsti tọn whenu, 9 na ohọ̀n daho de he nọ planmẹ jẹ nuwiwa kọ̀n ko yin hunhundonuvo na mi,+ ṣigba nukundiọsọmẹtọ susu wẹ tin.
10 Todin, eyin Timoti+ wá, mì hẹn ẹn diun dọ ewọ dibu to ṣẹnṣẹn mìtọn blo, na azọ́n Jehovah* tọn wà wẹ e te,+ kẹdẹdi yẹnlọsu. 11 Enẹwutu, mì gbọ mẹdepope yí nukunpẹvi do pọ́n ẹn blo. Mì yìn in vude jẹ aliji to jijọho mẹ, na ewọ nido sọgan wá dè e, na yẹn to tenọpọn ẹn to pọmẹ hẹ mẹmẹsunnu lẹ.
12 Todin, gando Apolo+ mẹmẹsunnu mítọn go, yẹn dotuhomẹna ẹn tlala nado wá mì dè po mẹmẹsunnu lẹ po. E ma to linlẹn nado wá mì dè todin, ṣigba e na wá to whenue dotẹnmẹ na hundote na ẹn.
13 Mì nọ nukle,+ mì lodo to yise mẹ,+ mì nọ hẹn mìde di sunnu,*+ mì yin huhlọnnọ.+ 14 Mì gbọ nuhe mì to wiwà lẹpo ni nọ yin to owanyi mẹ.+
15 Todin, mẹmẹsunnu lẹ emi, yẹn dotuhomẹna mì dọ: Mì yọnẹn dọ whédo Stefana tọn wẹ yin sinsẹ́n tintan Akaia tọn lẹ podọ yé ko ze yede jo nado yilizọn na omẹ wiwe lẹ. 16 Na mìlọsu lẹ ga ni zindonukọn nado nọ litaina omẹ mọnkọtọn lẹ podọ na mẹhe to azọ́nwa to kọndopọ mẹ bo to azọ́n sinsinyẹn wà lẹpo.+ 17 Ṣigba, yẹn jaya na tintin tofi Stefana,+ Fọltunatu po Akaiku po tọn, na yé ko nọ otẹn mìtọn mẹ to whenue mì ma tin tofi. 18 Na yé ko fakọna gbigbọ ṣie po mìtọn po. Enẹwutu, mì yọ́n pinpẹn omẹ mọnkọtọn lẹ tọn.
19 Agun he to Asia lẹ yí nudọdomẹ yetọn hlan mì. Akuila po Pliska po gọna agun he to owhé yetọn gbè+ dọnudo mì sọn ahun mẹ wá to Oklunọ mẹ. 20 Mẹmẹsunnu lẹpo dọnudo mì. Mì yí nùdonùgo wiwe do dọnudo ode awetọ.
21 Nudọdomẹ ṣie die, he yẹn Paulu yí alọ ṣie titi do kàn.
22 Eyin mẹdepope ma tindo owanyi na Oklunọ, mì gbọ ewọ ni yin mẹhodẹ̀do. Oklunọ mítọn E, wá! 23 Na nukundagbe majẹhẹ Oklunọ Jesu tọn ni tin hẹ mì. 24 Na owanyi ṣie ni tin hẹ mìmẹpo to kọndopọ mẹ hẹ Klisti Jesu.