2 Tẹsalonikanu lẹ

2 Ṣigba, mẹmẹsunnu lẹ emi, na nuhe dù tintin tofi Oklunọ mítọn Jesu Klisti tọn+ podọ yinyin bibẹpli dopọ míwlẹ tọn nado tin po ewọ po,+ mí to bibiọ to mì si 2 ma nado yawu hẹn lẹnpọn dagbe mìtọn bu kavi yin tuklado gbọn ohó gbọdo de dali*+ kavi gbọn owẹ̀n nùmẹ tọn de dali kavi gbọn wekanhlanmẹ de he taidi nuhe wá sọn míwlẹ dè dali, he to didohia dọ azán Jehovah tọn+ ko wá.

3 Mì dike mẹde hẹn mì danbú* to aliho depope mẹ blo, na e ma na wá adavo atẹṣiṣi*+ lọ wá whẹ́ bọ dawe sẹ́nhẹngbatọ+ lọ yin didehia, yèdọ ovi vasudo tọn.+ 4 Agọjẹdomẹtọ de wẹ ewọ bo nọ ze ede daga do mẹdepope he nọ yin yiylọdọ yẹwhe kavi nudepope he yin numẹsẹ̀n* ji, bo gbọnmọ dali sinai to tẹmpli Jiwheyẹwhe tọn mẹ, bosọ to ede lá di yẹwhe de. 5 Be mì ma flindọ, to whenue yẹn gbẹ́ pò to mì dè, yẹn nọ saba dọ onú ehelẹ na mì ya?

6 Podọ todin, mìwlẹ yọ́n nuhe to nuyiwa taidi aliglọnnamẹnu de, na e nido yin didehia to ojlẹ sisọ etọn mẹ. 7 Nugbo wẹ dọ nudabla sẹ́nhẹngba ehe tọn ko to azọ́nwa to alọnu,+ ṣigba kiki kakajẹ whenue mẹlọ he to nuyiwa to alọnu din taidi aliglọnnamẹnu de na tọ́n sọn aimẹ. 8 Na nugbo tọn, to whenẹnu wẹ sẹ́nhẹngbatọ lọ na yin didehia, mẹhe Oklunọ Jesu na yí gbigbọ onù etọn mẹ tọn+ do husudo bo na yí awusọhia+ tintin tofi etọn tọn do hẹn zun ovọ́. 9 Ṣigba, tintin tofi sẹ́nhẹngbatọ lọ tọn yin gbọn nuyiwa Satani tọn+ dali, yèdọ gbọn azọ́n huhlọnnọ lẹpo gọna ohia po nujiawu* lalo lẹ po dali+ 10 podọ gbọn oklọ mawadodo tọn lẹpo+ dali na mẹhe to dindọn lẹ taidi ahọsumẹ de, na yé ma kẹalọyi owanyi nugbo lọ tọn nado sọgan yin whinwhlẹngán wutu. 11 Enẹ wẹ zọ́n bọ Jiwheyẹwhe do dike nuyiwadomẹji oklọ tọn ni hẹn yé buali, na yé nido sọgan yí lalo sè,+ 12 na yemẹpo nido yin whẹdana, na yé ma yí nugbo lọ sè wutu, ṣigba nọ hùnhomẹ to mawadodo mẹ.

13 Ṣigba, mì mẹmẹsunnu he Jehovah* yiwanna lẹ emi, dandannu wẹ e yin na mí nado nọ dopẹna Jiwheyẹwhe do ota mìtọn mẹ to whepoponu, na sọn bẹjẹeji wẹ Jiwheyẹwhe ko de mì+ na whlẹngán gbọn gbigbọ etọn yíyí do hẹn mì zun wiwe+ dali podọ gbọn yise mìtọn to nugbo lọ mẹ dali. 14 Ehe kọ̀n wẹ ewọ ylọ mì do gbọn wẹndagbe he mí lá na mì lọ gblamẹ, na mìwlẹ nido mọ gigo Oklunọ mítọn Jesu Klisti tọn yí.+ 15 Enẹwutu, to whelọnu lo, mẹmẹsunnu lẹ emi, mì nọtegli+ bo tẹdo aṣa he mì ko yin pinplọn lẹ go,+ vlavo e yin gbọn owẹ̀n nùmẹ tọn gblamẹ kavi gbọn wekanhlanmẹ he wá sọn mí dè lẹ gblamẹ. 16 Humọ, na Oklunọ mítọn Jesu Klisti lọsu podọ Jiwheyẹwhe Otọ́ mítọn, yèdọ mẹhe yiwanna mí+ bo na mí homẹmimiọn madopodo po todido dagbe+ po gbọn nukundagbe majẹhẹ dali, 17 ni miọnhomẹna mì bo hẹn mì lodo* to walọ po ohó dagbe lẹpo po mẹ.