2 Otànnugbo lẹ
17 Visunnu etọn Jehoṣafati+ sọ lẹzun ahọlu do otẹn etọn mẹ bo hẹn otẹn etọn lodo do Islaeli ji. 2 E de awhànfuntọ lẹ do tòdaho gángán Juda tọn lẹpo mẹ bo do awhànfun-gbẹ́ delẹ ai do aigba Juda tọn ji podọ do tòdaho Eflaimi tọn he Asa otọ́ etọn ko yí lẹ+ mẹ. 3 Jehovah zindonukọn nado tin hẹ Jehoṣafati, na e zinzọnlin to aliho he ji tọgbo etọn Davidi ko gbọn wayi lẹ ji+ bo ma yì dín Baali lẹ wutu. 4 Na Jiwheyẹwhe otọ́ etọn tọn wẹ e dín+ bo hodo* gbedide etọn, kakati nido yin aṣa Islaeli tọn lẹ.+ 5 Jehovah hẹn ahọluduta lọ lodo gligli to alọ etọn mẹ;+ omẹ Juda tọn lẹpo zindonukọn nado to nunina lẹ hẹnwa na Jehoṣafati, e sọ tindo adọkun susugege po gigo daho po.+ 6 E yin nujikudonọ to ahun mẹ na nuhe dù aliho Jehovah tọn lẹ hihodo, podọ e tlẹ de ofi yiaga+ lẹ po dòtin wiwe*+ lẹ po sẹ̀ sọn Juda.
7 To owhe atọ̀ntọ gandudu etọn tọn mẹ, e dowẹn hlan ahọvi etọn lẹ, yèdọ Bẹni-haili, Obadia, Zekalia, Netanẹli po Mikaia po nado nọ plọnnumẹ to tòdaho Juda tọn lẹ mẹ. 8 Levinu lẹ sọ to yé dè: yèdọ Ṣemaia, Netania, Zebadia, Asahẹli, Ṣemilamọti, Jehonatani, Adonija, Tobija po Tobi-adonija po, to pọmẹ hẹ Eliṣama po Jeholami po he yin yẹwhenọ lẹ.+ 9 Yé jẹ nuplọnmẹ ji to Juda bo nọ hẹn owe Osẹ́n Jehovah tọn,+ yé sọ gbọn tòdaho Juda tọn lẹpo mẹ pé bo nọ to nuplọnmẹ to gbẹtọ lọ lẹ ṣẹnṣẹn.
10 Obu Jehovah tọn sọ jẹ ahọluduta aigba he lẹdo Juda pé lẹ tọn lẹpo ji bọ yé ma hoavùn hẹ Jehoṣafati. 11 Filistinu lẹ sọ hẹn nunina lẹ po akuẹ po wá na Jehoṣafati taidi takuẹ. Alabianu lẹ hẹn agbò 7 700 po gbọgbọẹ asu 7 700 po wá na ẹn sọn kanlinpa yetọn lẹ mẹ.
12 Huhlọn Jehoṣafati tọn sọ to jijideji+ bọ e zindonukọn nado to figángán+ lẹ po tòdaho agbànhọ tọn+ lẹ po gbá to Juda. 13 E wazọ́n dahodaho lẹ to tòdaho Juda tọn lẹ mẹ bosọ tindo awhànfuntọ huhlọnnọ lẹ to Jelusalẹm. 14 Omẹ ehelẹ yin mimá sọgbe hẹ whédo otọ́ yetọn lẹ tọn lẹ: ogán omẹ fọtọ́n lẹ tọn lẹ sọn hẹnnu Juda tọn mẹ wẹ Adnahi ogán lọ, bọ awhànfuntọ huhlọnnọ 300 000+ wẹ tin to e dè. 15 Jehohanani ogán lọ sọ tin to anademẹ etọn glọ bọ omẹ 280 000 tin to e dè. 16 Amasia visunnu Zikli tọn he ze ede jo na sinsẹ̀nzọn Jehovah tọn lọsu to anademẹ etọn glọ, awhànfuntọ huhlọnnọ 200 000 sọ tin to e dè. 17 Podọ sọn hẹnnu Bẹnjamini tọn mẹ,+ Eliada he yin awhànfuntọ huhlọnnọ de bọ omẹ 200 000 he nọ hẹn ogá po awọ̀yinu po tin to e dè.+ 18 Jehozabadi sọ tin to anademẹ etọn glọ bọ omẹ 180 000 he sọawhànnu tin to e dè. 19 Omẹ ehelẹ nọ yilizọn na ahọlu, gbọnvona mẹhe ahọlu bẹ do tòdaho gángán lẹ mẹ to Juda pete mẹ lẹ.+