Galatianu lẹ

2 Enẹgodo, to owhe 14 godo, yẹn hẹji yì Jelusalẹm po Balnaba+ po bosọ plan Titu hẹn ga.+ 2 Yẹn hẹji yì na osọhia de he yin didohia mi wutu, yẹn sọ ze wẹndagbe he yẹn to yẹwheho etọn dọ to akọta lẹ ṣẹnṣẹn lọ donukọnna yé. Ṣigba sunnu he yin nukundeji lẹ kẹdẹ wẹ yẹn zedonukọnna nado hẹn ẹn diun dọ yẹn ma to wezundo kavi ko dowezun to ovọ́ mẹ. 3 Etomọṣo, Titu,+ mẹhe tin po yẹn po ma tlẹ yin hinhẹn nado gboadà+ dile etlẹ yindọ Glẹkinu de wẹ ewọ. 4 Ṣigba, whẹho enẹ yin finfọndote na mẹmẹsunnu lalo he yin hinhẹnwa to nuglọ lẹ wutu,+ yèdọ mẹhe lìn wá nado bẹ̀ mẹdekannujẹ+ he mí to vivi etọn dù to kọndopọ mẹ hẹ Klisti Jesu pọ́n lẹ, na yé nido sọgan hẹn mí zun afanumẹ mlẹnmlẹn;+ 5 mí ma na dotẹnmẹ omẹ ehelẹ gbọn taliliaina yé dali,+ lala, e ma tlẹ yin na whenu vude,* na nugbo wẹndagbe lọ tọn nido sọgan gbọṣi mì dè.

6 Ṣigba, na nuhe dù mẹhe nọ yin pinpọn taidi mẹjọmẹ lẹ+—mahopọnna mẹhe nkọ yé yin dai, enẹ ma dù mi, na Jiwheyẹwhe ma nọ pọ́n awusọhia gbonu tọn gbẹtọ tọn—omẹ nukundeji enẹlẹ ma plọn mi onú yọyọ depope. 7 To vogbingbọn mẹ, to whenue yé mọdọ wẹndagbe mẹhe ma gboadà lẹ tọn ko yin zizedo alọmẹ na mi,+ kẹdẹdile mẹhe gboadà lẹ tọn yin zize na Pita do— 8 na mẹlọ he na Pita nugopipe apọsteli-zọ́n tọn gando mẹhe gboadà lẹ go dopolọ wẹ na yẹnlọsu nugopipe lọ gando omẹ akọta lẹ tọn go+— 9 podọ to whenuena yé wá yọ́n nukundagbe majẹhẹ lọ he yin nina mi,+ Jakọbu+ po Kefa* po gọna Johanu, yèdọ mẹlọ lẹ he taidi dòtin lẹ, na adusilọ yẹn po Balnaba po+ taidi ohia gbekọndopọ* tọn, na míwlẹ nido sọgan yì akọta lẹ dè, ṣigba yewlẹ yì mẹhe gboadà lẹ dè. 10 Yé biọ to mí si poun dọ mí ni nọ hẹn wamọnọ lẹ do ayiha mẹ, podọ ehe lọ wẹ yẹn to vivẹnudo vẹkuvẹku nado wà.+

11 Ṣigba, to whenue Kefa*+ wá Antioku,+ yẹn dọhona ẹn* tlọlọ madoadúdẹji, na e họnwun dọ ewọ ṣinuwa.* 12 Na jẹnukọnna wiwá sunnu delẹ tọn sọn Jakọbu+ dè, ewọ ko nọ dùnú hẹ omẹ akọta lẹ tọn;+ ṣigba to whenuena yé wá, e doalọte bo klan ede dovo, na e to budina mẹhe gboadà lẹ wutu.+ 13 Ju he pò lẹ sọ kọnawudopọ hẹ ẹ to yẹnuwiwa etọn mẹ, sọmọ bọ Balnaba lọsu tlẹ yin dindọn biọ yẹnuwiwa yetọn mẹ ga. 14 Ṣigba, to whenue yẹn mọdọ yé ma to zọnlinzin sọgbe hẹ nugbo wẹndagbe tọn,+ yẹn dọna Kefa* to yemẹpo nukọn dọmọ: “Eyin hiẹ, mahopọnna dọ hiẹ yin Ju de, to gbẹnọ dile akọta lẹ nọ wà do, bọ e ma yin dile Ju lẹ nọ wà do, nawẹ hiẹ sọgan hẹn omẹ akọta lẹ tọn nado nọgbẹ̀ sọgbe hẹ aṣa Ju lẹ tọn gbọn?”+

15 Míwlẹ he yin Ju jọnun lẹ, bọ e ma yin ylandonọ lẹ sọn akọta lẹ mẹ, 16 míwlẹ yọnẹn dọ e ma yin gbọn azọ́n osẹ́n tọn lẹ dali wẹ gbẹtọ nọ yin lilá di dodonọ, ṣigba gbọn yise+ to Klisti Jesu mẹ kẹdẹ gblamẹ.+ Enẹwutu, mí ko tindo yise to Klisti Jesu mẹ, na mí nido sọgan yin lilá di dodonọ gbọn yise to Klisti mẹ dali, bọ e ma yin gbọn azọ́n osẹ́n tọn lẹ gblamẹ, na mẹdepope* ma na yin lilá di dodonọ gbọn azọ́n osẹ́n tọn lẹ dali.+ 17 Todin, dile míwlẹ to dindin nado yin lilá di dodonọ gbọn Klisti gblamẹ, eyin mílọsu lẹ yin mimọ nado yin ylandonọ lẹ, be enẹ ma dohia dọ Klisti nọ na tuli mí nado waylando ya? Gbede pọ́n! 18 Eyin yẹn to nuhe yẹn ko họliai to ojlẹ de mẹ wayi lẹ vọ́ jlọ dote, be yẹn do dee hia nado yin sẹ́nhẹngbatọ. 19 Na gbọn osẹ́n gblamẹ, yẹn kú na osẹ́n wutu,+ na yẹn nido sọgan gọwá ogbẹ̀ na Jiwheyẹwhe wutu. 20 Todin, yẹn yin whiwhè do núgo hẹ Klisti.+ E masọ yin yẹn wẹ to gbẹnọ ba,+ ṣigba Klisti wẹ to gbẹnọ to kọndopọ mẹ hẹ mi. Na nugbo tọn, ogbẹ̀ he yẹn to ninọ to agbasalan mẹ todin, yẹn to ninọ gbọn yise he yẹn tindo to Visunnu Jiwheyẹwhe tọn mẹ dali,+ yèdọ mẹhe yiwanna mi bo ze ede jo do ota ṣie mẹ.+ 21 Yẹn ma gbẹkọ nukundagbe majẹhẹ Jiwheyẹwhe tọn go,*+ na eyin gbọn osẹ́n gblamẹ wẹ dodowiwa nọ wá, be na taun tọn, ovọ́ mẹ wẹ Klisti kú do.+