1 Ahọlu lẹ
14 To ojlẹ enẹ mẹ, Abija visunnu Jeloboami tọn bẹ awutu. 2 Enẹwutu, Jeloboami dọna asi etọn dọmọ: “Jaale, fọ́n bo diọ awusọhia towe na yé nikaa yọnẹn dọ asi Jeloboami tọn wẹ hiẹ, enẹgodo yì Ṣilo. Pọ́n! Ahija yẹwhegán lọ to finẹ. Ewọ wẹ dọ gando go e dọ yẹn na lẹzun ahọlu do omẹ ehelẹ ji.+ 3 Bẹ akla ao hẹn, gọna akla hìhì lẹ po owín ogo dopo po bo yì e dè. Ewọ nasọ dọ nuhe na jọ do yọpọ sunnu lọ go na we.”
4 Asi Jeloboami tọn sọ wà nuhe ewọ dọna ẹn. Yọnnu lọ fọ́n bo yì Ṣilo+ bosọ wá owhé Ahija tọn gbè. Nukun Ahija tọn lẹ to nukọn pọ́n dín in, amọ́ e ma sọgan mọnú, na owhe etọn wutu.
5 Ṣigba, Jehovah ko dọna Ahija dọmọ: “Asi Jeloboami tọn ja dè we bo na kanhose we gando visunnu etọn go, na e to awutujẹ. Yẹn na dọ nuhe a na dọna ẹn na we.* Eyin e wá, e na whlá mẹhe ewọ yin.”
6 Tlolo he Ahija sè afọgbè yọnnu lọ tọn dile e gbọn họntonu lọ ja họmẹ, e dọmọ: “Biọ họmẹ, hiẹ asi Jeloboami tọn. Naegbọn a do to mẹhe a yin whlá? N’ko yin azọ́ndena nado do owẹ̀n ylankan de na we. 7 Yì bo dọna Jeloboami dọ, ‘Nuhe Jehovah Jiwheyẹwhe Islaeli tọn dọ die: “Yẹn ko ze we daga to omẹ towe lẹ ṣẹnṣẹn nado hẹn we zun nukọntọ do Islaeli omẹ ṣie lẹ ji.+ 8 Yẹn sọ tlẹ́n ahọluduta lọ sọn alọ whédo Davidi tọn mẹ bo yí i na we.+ Amọ́, a ma yinuwa di Davidi devizọnwatọ ṣie, mẹhe yìn gbedide ṣie lẹ bo yí ahun etọn lẹpo do zinzọnlin hodo mi gbọn nuhe sọgbe to nukun ṣie mẹ lẹ kẹdẹ wiwà dali.+ 9 Ṣigba, hiẹ ko wà nuhe ylanhu mẹhe ko jẹnukọnna we lẹpo, hiẹ sọ basi yẹwhe devo po boṣiọ kinkọ̀n lẹ po na dewe nado hẹn homẹgble mi,+ podọ yẹn wẹ hiẹ dogodo.+ 10 Enẹwutu, yẹn to nugbajẹmẹji hẹnwa whédo Jeloboami tọn ji, yẹn nasọ sukúndona sunnu* lẹpo* sọn whédo Jeloboami tọn mẹ, etlẹ yin agbátọnọ po madogánnọ lẹ po to Islaeli, yẹn nasọ zà whédo Jeloboami tọn sẹ̀ mlẹnmlẹn+ kẹdẹdile mẹde nọ klọ́ omí sẹ̀ petepete do! 11 Omẹ Jeloboami tọn depope he kú to tòdaho lọ mẹ, avún lẹ wẹ na dù i; podọ mẹdepope he kú to danji, ohẹ̀ agahomẹ tọn lẹ wẹ na dù i, na Jehovah wẹ ko dọ ẹ.”’
12 “Todin fọ́n; yì owhé towe gbè. Whenue afọ towe na jẹ tòdaho lọ mẹ, ovi lọ na kú. 13 Islaeli pete nasọ nọ aluẹmẹ na ẹn bo dì i, na ewọ kẹdẹ wẹ na yin dìdì do yọdò mẹ to mẹhe to whẹndo Jeloboami tọn mẹ lẹ mẹ, na ewọ kẹdẹ mẹ wẹ Jehovah Jiwheyẹwhe Islaeli tọn ko mọ nudagbe de te to whédo Jeloboami tọn mẹ. 14 Jehovah nasọ ze ahọlu de daga na ede do Islaeli ji he na de* whédo Jeloboami tọn sẹ̀ sọn aimẹ+ sọn azán enẹ gbè sọyi, mọwẹ, etlẹ yin todin. 15 Jehovah na hò Islaeli liai di ofán he osin to yigọyigọ do na, ewọ nasọ họ̀nadọna Islaeli sọn aigba dagbe he e ko na tọgbo yetọn lẹ ji+ bo na vúnvún yé pé zẹ̀ Tọ̀sisa* lọ go,+ na yé ko basi dòtin wiwe* yetọn lẹ+ bo hẹn homẹgble Jehovah. 16 E nasọ gbẹkọ Islaeli go, na ylando he Jeloboami ko wà bosọ hẹn Islaeli nado wà lẹ wutu.”+
17 Whenẹnu, asi Jeloboami tọn fọ́n bo wleali dedo bosọ wá Tilza. Dile ewọ jẹ họntonu owhé lọ tọn, yọpọ sunnu lọ kú. 18 Yé sọ dì i, bọ Islaeli pete nọ aluẹmẹ na ẹn, sọgbe hẹ ohó he Jehovah ko dọ gbọn devizọnwatọ etọn Ahija yẹwhegán lọ gblamẹ.
19 Otàn Jeloboami tọn he pò, yèdọ lehe e funawhàn do+ po lehe e duahọlu do po yin kinkan do owe whenuho ahọlu Islaeli tọn lẹ tọn mẹ. 20 Owhe 22 wẹ Jeloboami do duahọlu, enẹgodo e yin hinhẹn nado mlọnai hẹ tọgbo etọn lẹ;+ visunnu etọn Nadabi sọ lẹzun ahọlu do otẹn etọn mẹ.+
21 To ojlẹ enẹlẹ gblamẹ, Lehoboami visunnu Sọlomọni tọn ko lẹzun ahọlu to Juda. Owhe 41 wẹ Lehoboami tindo to whenue e lẹzun ahọlu, e sọ dugán na owhe 17 to Jelusalẹm, yèdọ tòdaho he Jehovah ko de+ to hẹnnu Islaeli tọn lẹpo mẹ nado ze oyín etọn do e ji.+ Oyín onọ̀ Lehoboami tọn wẹ Naama Amọninu lọ.+ 22 Juda sọ to nuhe ylan to nukun Jehovah tọn mẹ lẹ wà,+ podọ gbọn ylando he yé wà lọ lẹ dali, yé hẹn homẹgble e hugan lehe tọgbo yetọn lẹ ko wà do.+ 23 Yelọsu jẹ ofi yiaga lẹ do na yede ji, gọna dòtin wiwe zannu tọn lẹ po dòtin wiwe* lẹ po+ to okọ́ta yiaga lẹpo ji+ podọ to atin he vùn ganji lẹpo sá.+ 24 Sunnu galọtọ tẹmpli mẹ tọn lẹ sọ tin to aigba lọ ji ga.+ Yé yinuwa sọgbe hẹ osùnú lọ lẹpo he akọta he Jehovah ko yàn sọn Islaelivi lẹ nukọn lẹ nọ wà.
25 To owhe atọ́ntọ Ahọlu Lehoboami tọn mẹ, Ahọlu Ṣiṣaki+ Egipti tọn hẹji wá nado hoavùn hẹ Jelusalẹm.+ 26 E bẹ adọkunnu he to ohọ̀ Jehovah tọn mẹ lẹ po adọkunnu he to owhé* ahọlu tọn gbè lẹ po.+ Nulẹpo wẹ e bẹ yì, kakajẹ awọ̀yinu sika tọn he Sọlomọni ko basi lẹ ji.+ 27 Enẹwutu, Ahọlu Lehoboami basi awọ̀yinu gànvẹẹ tọn lẹ do otẹn yetọn mẹ bo bẹ yé do alọmẹ na ogán nuhọ́tọ* lẹ tọn lẹ he nọ ṣọ́ họntonu owhé ahọlu tọn. 28 Nuhọ́tọ lọ lẹ nọ hẹn yé wá to whedepopenu he ahọlu wá ohọ̀ Jehovah tọn mẹ, bosọ nọ gọ̀ yé do abò nuhọ́tọ lẹ tọn mẹ to enẹgodo.
29 Otàn Lehoboami tọn he pò, yèdọ nuhe e wà lẹpo, be e ma yin kinkan do owe whenuho ahọlu Juda tọn lẹ tọn mẹ ya?+ 30 Awhàn sọ gbọṣi aimẹ to Lehoboami po Jeloboami po ṣẹnṣẹn.+ 31 Enẹgodo, Lehoboami yin hinhẹn nado mlọnai hẹ tọgbo etọn lẹ bo yin dìdì dopọ hẹ tọgbo etọn lẹ do Tòdaho Davidi tọn mẹ.+ Oyín onọ̀ etọn tọn wẹ Naama Amọninu lọ.+ Visunnu etọn Abijami*+ sọ lẹzun ahọlu do otẹn etọn mẹ.