1 Otànnugbo lẹ
23 Whenue Davidi ko poyọnho bo ko sẹpọ kúdonu,* e yí visunnu etọn Sọlomọni do doahọlu do Islaeli ji.+ 2 E sọ bẹ ahọvi Islaeli tọn lẹpo pli, gọna yẹwhenọ lẹ+ po Levinu lẹ+ po. 3 Levinu he tindo owhe 30 podọ humọ lẹ yin hihia;+ whenue dopodopo yetọn yin hihia, sọha yetọn wẹ 38 000. 4 To omẹ ehelẹ mẹ, omẹ 24 000 wẹ nọ nọ̀ nukọnna azọ́n lọ to ohọ̀ Jehovah tọn mẹ, podọ omẹ 6 000 wẹ yin anademẹtọ po whẹdatọ po,+ 5 omẹ 4 000 yin họ̀njinọtọ+ bọ omẹ 4 000 nọ yí hànjinu lẹ do na pipà+ Jehovah, yèdọ hànjinu he go Davidi ko dọ gando dọ, “Yẹn basi yé na ohàn pipà tọn jiji.”
6 Davidi sọ má yé do pipli voovo lẹ mẹ+ sọgbe hẹ visunnu Levi tọn lẹ: yèdọ Gẹlṣọni, Kohati po Melali po.+ 7 Sọn Gẹlṣọninu lẹ mẹ, Ladani po Ṣimei po. 8 Visunnu Ladani tọn lẹ wẹ Jehiẹli he yin nukọntọ lọ, gọna Zetami po Joẹli po,+ yèdọ yé omẹ atọ̀n. 9 Visunnu Ṣimei tọn lẹ wẹ Ṣelomọti, Haziẹli po Halani po, yèdọ yé omẹ atọ̀n. Ehelẹ wẹ nukọntọ whédo otọ́ lẹ tọn lẹ sọn kúnkan Ladani tọn mẹ. 10 Podọ visunnu Ṣimei tọn lẹ wẹ Jahati, Zina, Jeuṣi po Belia po. Omẹ ẹnẹ ehelẹ wẹ yin visunnu Ṣimei tọn lẹ. 11 Jahati wẹ yin nukọntọ, bọ Zizahi yin omẹ awetọ. Ṣigba, to whenuena e yindọ Jeuṣi po Belia po ma tindo visunnu susu, yé yin hihia di whédo otọ́ lẹ tọn dopo bo tindo azọngban tangan dopo.
12 Visunnu Kohati tọn lẹ wẹ Amlami, Izhali,+ Heblọni po Uziẹli po,+ yèdọ yé omẹ ẹnẹ. 13 Visunnu Amlami tọn lẹ wẹ Aalọn+ po Mose po.+ Ṣigba, Aalọn yin didedovo pete+ nado nọ klan Fiwiwe Gbaugbau lọ do wiwe, yèdọ ewọ po visunnu etọn lẹ po, podọ nado nọ basi avọ́sinsan lẹ to Jehovah nukọn bo nọ yilizọn na ẹn bosọ nọ dona gbẹtọ lẹ to oyín etọn mẹ to whepoponu.+ 14 Na nuhe dù Mose, yèdọ omẹ Jiwheyẹwhe nugbo lọ tọn, visunnu etọn lẹ yin sislẹ dopọ hẹ hẹnnu Levinu lẹ tọn. 15 Visunnu Mose tọn lẹ wẹ Gẹlṣọmi+ po Eliezẹli+ po. 16 Sọn visunnu Gẹlṣọmi tọn lẹ mẹ, Ṣẹbueli+ wẹ yin nukọntọ. 17 Sọn kúnkan* Eliezẹli tọn lẹ mẹ, Lehabia+ wẹ yin nukọntọ; Eliezẹli masọ tindo visunnu devo lẹ, amọ́ visunnu Lehabia tọn lẹ sù taun. 18 Sọn visunnu Izhali+ tọn lẹ mẹ, Ṣelomiti+ wẹ yin nukọntọ. 19 Visunnu Heblọni tọn lẹ wẹ Jelia he yin nukọntọ lọ, Amalia omẹ awetọ, Jahaziẹli omẹ atọ̀ntọ, podọ Jekameami+ omẹ ẹnẹtọ. 20 Visunnu Uziẹli+ tọn lẹ wẹ Mika he yin nukọntọ po Iṣia omẹ awetọ lọ po.
21 Visunnu Melali tọn lẹ wẹ Mahli po Muṣi po.+ Visunnu Mahli tọn lẹ wẹ Eleazali po Kiṣi po. 22 Eleazali kú, amọ́ e ma tindo visunnu depope, adavo viyọnnu lẹ kẹdẹ. Enẹwutu, visunnu Kiṣi tọn lẹ, yèdọ hẹnnumẹ* yetọn lẹ, dà yé di asi. 23 Visunnu Muṣi tọn lẹ wẹ Mahli, Edeli po Jelemọti po, yèdọ yé omẹ atọ̀n.
24 Ehelẹ wẹ visunnu Levi tọn lẹ sọgbe hẹ whédo otọ́ yetọn lẹ tọn lẹ, enẹ wẹ nukọntọ whédo otọ́ yetọn lẹ tọn lẹ, mẹhe yin titodohukanji bo yin hihia bosọ yin sislẹ sọgbe hẹ yinkọ yetọn lẹ, yèdọ mẹhe nọ penukundo sinsẹ̀nzọn lọ go to ohọ̀ Jehovah tọn mẹ lẹ, sọn owhe 20 mẹho podọ humọ. 25 Na Davidi ko dọ dọ: “Jehovah Jiwheyẹwhe Islaeli tọn ko na gbọjẹ omẹ etọn lẹ,+ podọ ewọ na nọ nọ̀ Jelusalẹm kakadoi.+ 26 Humọ, Levinu lẹ ma na to dandannu glọ nado nọ ze gòhọtúntún lọ kavi nuyizan devizọnwiwa tọn etọn lẹ depope.”+ 27 Na, to kọndopọ mẹ hẹ anademẹ godo tọn Davidi tọn lẹ, Levinu he tindo owhe 20 podọ humọ lẹ yin hihia. 28 Azọ́ndenamẹ yetọn wẹ nado nọ gọalọna visunnu Aalọn tọn lẹ+ na nuhe dù sinsẹ̀nzọnwiwa to ohọ̀ Jehovah tọn mẹ, yèdọ nukunpipedo awánu lọ lẹ,+ abò núdùdù tọn lẹ po onú wiwe lẹpo kiklọ́we po go, gọna azọ́n depope he nuhudo etọn tin to sinsẹ̀nzọn ohọ̀ Jiwheyẹwhe nugbo lọ tọn mẹ. 29 Yé nọ gọalọ nado penukundo akla he yin tito do gọnu-gọnu* lẹ,+ linfin dagbedagbe avọ́nunina jinukun-lili tọn, akla madotọ́n wọ́dọ́wọ́dọ́ lẹ,+ akla hìhì agbánvla mẹ tọn lẹ po linfin yinyan+ lọ po go, podọ nado jlẹ kavi dà nudepope pọ́n. 30 Yewlẹ dona nọ nọte afọnnu-afọnnu+ nado dopẹna Jehovah bo pà ẹ, yé sọ dona nọ wàmọ to whèjai.+ 31 Yé nọ gọalọ to whedepopenu he avọ́sinsan mimẹ̀ lẹ yin bibasi hlan Jehovah to Gbọjẹzangbe lẹ,+ to osun yọyọ lẹ whenu+ podọ to hùnwhẹ lẹ whenu,+ yèdọ yé omẹ sọha he nuhudo etọn tin sọgbe hẹ osẹ́n, yé sọ nọ wàmọ to gbesisọ mẹ to Jehovah nukọn. 32 Yé sọ nọ hẹn azọngban yetọn lẹ di gando gòhọ opli tọn lọ po ofi wiwe lọ po go, podọ gando nọvisunnu yetọn lẹ he yin visunnu Aalọn tọn lẹ go na nuhe dù sinsẹ̀nzọnwiwa to ohọ̀ Jehovah tọn mẹ.