Owalọ lẹ
10 Todin, dawe de tin to Sesalea he nọ yin Kọneliọsi, yèdọ awhàngán* de to awhànfun-gbẹ́ he nọ yin yiylọdọ awhànfun-gbẹ́* Itali tọn mẹ. 2 Ewọ nọ yí ahundopo do sẹ̀n bo nọ dibusi Jiwheyẹwhe, to pọmẹ hẹ whédo etọn pete, e sọ nọ basi nunina lẹblanu tọn susu na gbẹtọ lẹ bosọ nọ basi ovẹvivẹ hlan Jiwheyẹwhe to gbesisọ mẹ. 3 To nudi gànhiho ṣinẹnẹtọ*+ azán lọ tọn mẹ, e mọ to numimọ de mẹ hezeheze bọ angẹli Jiwheyẹwhe tọn de wá e dè bo dọmọ: “Kọneliọsi!” 4 Kọneliọsi sọ pọ́n ẹn tlintlin bọ budi i, e sọ kanse e dọmọ: “Etẹwẹ, Oklunọ?” E dọna ẹn dọmọ: “Odẹ̀ towe lẹ po nunina lẹblanu tọn towe lẹ po ko hẹji bo yin finflin gbọn Jiwheyẹwhe dali.+ 5 Enẹwutu todin, domẹhlan Jọppa bo ylọ dawe de he nọ yin Simọni, mẹhe sọ nọ yin yiylọdọ Pita. 6 Dawe ehe yin jonọ to Simọni ayúzọ́nwatọ lọ dè, mẹhe owhé etọn tin to huto.” 7 Tlolo he angẹli he dọhona ẹn lọ ko yì, e ylọ awe to devizọnwatọ etọn lẹ mẹ gọna awhànfuntọ de he nọ yí ahundopo do sẹ̀n sọn mẹhe nọ wadevizọn hlan ẹn lẹ mẹ, 8 bo basi zẹẹmẹ nulẹpo tọn na yé bosọ do yé hlan Jọppa.
9 To aihọngbè, dile yé to gbejizọnlinzin bo to sisẹpọ tòdaho lọ, Pita yì họta* to nudi gànhiho ṣidopotọ* mẹ nado hodẹ̀. 10 Ṣigba, huvẹ hù i taun bọ e jlo na dùnú. Dile yé to awuwlena núdùdù, e jẹ numimọ de mọ ji+ 11 bo mọ olọn hùndonuvo, gọna nude* he taidi alavọ daho de, ehe yè hẹn tónu etọn ẹnẹ lẹ do to hinhẹn ẹn jẹte sọn olọn; 12 bọ kanlin afọ ẹnẹnọ wunmẹ lẹpo po nuhe nọ lìn to aigba ji lẹ po gọna ohẹ̀ agahomẹ tọn lẹ tin to e mẹ. 13 Ogbè de sọ dọna ẹn dọmọ: “Pita, fọ́n bo hù bosọ dù!” 14 Ṣigba, Pita dọmọ: “Paali, Oklunọ, na yẹn ma ko dù nudepope he yin hinhẹnflu bosọ yin mawé pọ́n gbede.”+ 15 Ogbè lọ sọ vọ́ dọhona ẹn whla awetọ dọmọ: “A sọ ylọ nuhe Jiwheyẹwhe ko klọ́we lẹ dọ mawé ba blo.” 16 Ogbè lọ sọ yin sisè whla atọ̀ntọ, podọ to afọdopolọji, nulọ* yin yíyí sọyi olọn mẹ.
17 Dile Pita gbẹ́ pò to bẹwlu mẹ gando nuhe numimọ he e mọ lọ sọgan zẹẹmẹdo go, whenẹnu pẹẹ wẹ mẹhe Kọneliọsi dohlan lọ lẹ ko kàn owhé Simọni tọn gbè biọ bo ṣite to họngbo ji.+ 18 Yé sọ yí ogbè lélé do kanbiọ eyin jonọ de tin to finẹ bo nọ yin Simọni, mẹhe sọ nọ yin yiylọdọ Pita. 19 Dile Pita gbẹ́ pò to nulẹnpọn do numimọ lọ ji, gbigbọ lọ+ dọmọ: “Pọ́n! Dawe atọ̀n to dindin we. 20 Enẹwutu, fọ́n bo jẹte bosọ yì po yé po matin ayihaawe depope, na yẹn wẹ do yé hlan.” 21 Whenẹnu, Pita jẹte yì dawe lọ lẹ dè bo dọmọ: “Yẹn mẹhe mì to dindin lọ die. Etẹwẹ hẹn mì wáfi?” 22 Yé dọmọ: “Kọneliọsi+ he yin awhàngán de, yèdọ dawe dodonọ de he dibusi Jiwheyẹwhe bọ akọta Ju lẹ tọn pete nọ dekunnu etọn dagbe wẹ angẹli wiwe de dowẹn sọn Jiwheyẹwhe dè nado domẹhlan we nado wá owhé etọn gbè podọ na ewọ nido sè nuhe hiẹ tindo nado dọ.” 23 Enẹwutu, e basi oylọna yé biọ họmẹ bo yí yé taidi jonọ.
To aihọngbè, e fọ́n bo tọ́nyi po yé po, delẹ to mẹmẹsunnu Jọppa tọn lẹ mẹ sọ yì hẹ ẹ. 24 To wunkẹngbe, e biọ Sesalea. Na nugbo tọn, Kọneliọsi ko to nukundo yé bo ko ylọ hẹnnumẹ po họntọn vivẹ́ etọn lẹ po pli dopọ. 25 Dile Pita biọ họmẹ, Kọneliọsi pé e, bo jẹklo to afọ etọn lẹ kọ̀n bosọ litaina ẹn.* 26 Ṣigba, Pita jlọ ẹ ṣite bo dọmọ: “Fọ́n; gbẹtọ tata de wẹ yẹnlọsu ga.”+ 27 Dile e to hodọ hẹ ẹ, e biọ họmẹ bo mọ mẹsusu he ko pli dopọ lọ lẹ. 28 E sọ dọna yé dọmọ: “Mìwlẹ yọnẹn ganji lehe e ma sọgbe hẹ osẹ́n na Ju de nado kọnawudopọ kavi dọnsẹpọ omẹ akọ̀ devo tọn do,+ ṣogan Jiwheyẹwhe ko dohia mi dọ yẹn ni masọ ylọ mẹdepope dọ hẹnflu kavi mawé ba blo.+ 29 Enẹ wẹ zọ́n bọ yẹn do wá, na taun tọn, matin nudindọn depope, to whenue yè dowẹn hlan mi. Enẹwutu, yẹn jlo na yọ́n nuhewutu mì dowẹn hlan mi.”30 Kọneliọsi sọ dọmọ: “To ogàn ehe mẹ to azán ẹnẹ die, yẹn to dẹ̀ho to ohọ̀ ṣie mẹ to gànhiho ṣinẹnẹtọ* mẹ; whenẹnu pẹẹ wẹ dawe de he do avọ̀ he to sisẹ́ de ṣite to nukọnna mi 31 bo dọmọ: ‘Kọneliọsi, Jiwheyẹwhe ko sè odẹ̀ towe bo ko sọ flin nunina lẹblanu tọn towe lẹ. 32 Enẹwutu, domẹhlan Jọppa nado ylọ Simọni, mẹhe sọ nọ yin yiylọdọ Pita. Dawe ehe yin jonọ de to owhé Simọni ayúzọ́nwatọ lọ tọn gbè to huto.’+ 33 Yẹn sọ domẹhlan we to afọdopolọji, podọ hiẹ wà dagbe nado wáfi. Todin, mímẹpo tin to Jiwheyẹwhe nukọn nado sè nuhe Jehovah* ko degbe etọn na we nado dọ lẹpo.”
34 Pita sọ yihó bo dọmọ: “Todin, yẹn ko mọ nugbonugbo dọ Jiwheyẹwhe ma yin mẹnukuntahopọntọ gba,+ 35 ṣigba to akọta lẹpo mẹ, mẹhe nọ dibusi i bo nọ wà dodo wẹ e nọ kẹalọyi.+ 36 E dowẹn hlan ovi Islaeli tọn lẹ nado lá wẹndagbe jijọho tọn+ gbọn Jesu Klisti gblamẹ na yé—dọ omẹ ehe wẹ Oklunọ mẹlẹpo tọn.+ 37 Mìwlẹ yọ́n nuhe yin hodọdeji lẹdo Jude lẹpo pé, yèdọ bẹsọn Galili+ to baptẹm he Johanu dọyẹwheho etọn lọ godo: 38 gando lehe Jiwheyẹwhe yí gbigbọ wiwe+ po huhlọn po do yiamisisadode Jesu he wá sọn Nazalẹti lọ do go, bọ ewọ jugbọn aigba lọ ji bo to dagbe wà bosọ to azọ̀nhẹngbọna mẹhe Lẹgba ko gbidikọna lẹpo,+ na Jiwheyẹwhe tin hẹ ẹ wutu.+ 39 Míwlẹ sọ yin kunnudetọ nulẹpo he e wà to otò Ju lẹ tọn mẹ podọ to Jelusalẹm lẹ tọn; ṣigba yé hù i gbọn zize e plá do pòtin* de go dali. 40 Jiwheyẹwhe fọ́n ewọ to azán atọ̀ntọ gbè+ bo hẹn yọnbasi na ẹn nado sọawuhia gbẹtọ lẹ,* 41 e ma yin hlan gbẹtọ lẹpo, ṣigba hlan kunnudetọ lẹ he ko yin dide jẹnukọn gbọn Jiwheyẹwhe dali, yèdọ hlan míwlẹ, mẹhe dù bo nù dopọ hẹ ẹ to whenue e ko fọ́n sọn oṣiọ lẹ mẹ godo.+ 42 Humọ, e degbena mí nado dọyẹwheho na gbẹtọ lẹ podọ nado dekunnu mlẹnmlẹn+ dọ ewọ wẹ mẹlọ he Jiwheyẹwhe ko de nado yin whẹdatọ mẹhe to ogbẹ̀ po oṣiọ lẹ po tọn.+ 43 Ewọ go wẹ yẹwhegán lẹpo dekunnu gando,+ dọ mẹdepope he tindo yise to ewọ mẹ na mọ jona ylando lẹ tọn yí gbọn oyín etọn gblamẹ.”+
44 Dile Pita gbẹ́ to hodọ gando onú ehelẹ go, gbigbọ wiwe jẹ mẹhe to ohó lọ sè lẹpo ji.+ 45 Awú sọ ji yisenọ* he ko gboadà bo hodo Pita wá lẹ, na nunina vọnu he yin gbigbọ wiwe ko yin kinkọnjẹgbonu do omẹ akọta lẹ tọn lẹ ji ga. 46 Na yé sè bọ yé yí jonọgbè* lẹ do to hodọ bo to gigopana Jiwheyẹwhe wutu.+ To whenẹnu, Pita dọmọ: 47 “Be mẹdepope sọgan gbẹ́ dọ omẹ ehelẹ he ko mọ gbigbọ wiwe yí, yèdọ dile míwlẹ mọyi do, ni ma yin bibaptizi po osin po+ ya?” 48 Enẹwutu, e degbe dọ yé ni yin bibaptizi to oyín Jesu Klisti tọn mẹ.+ Enẹgodo, yé biọ to e si nado gbọṣi yé dè na azán delẹ.