2 Kọlintinu lẹ

2 Na yẹn ko basi nudide ma nado wá mì dè whladopo dogọ to awubla mẹ. 2 Na eyin yẹn hẹn mì blawu, mẹnu wẹ na tin to finẹ lo, he na hẹn homẹhun mi eyin e ma yin mẹhe yẹn ko hẹn blawu lọ lẹ? 3 Yẹn kàn nuhe yẹn wà lẹ, na yẹn nikaa yin hinhẹn blawu gbọn mẹhe wutu yẹn dona jaya lẹ dali to whenue yẹn na wá, na yẹn tindo jidide dọ nuhe nọ hẹn ayajẹ wá na mi wẹ nọ hẹn ayajẹ dopolọ wá na mìmẹpo. 4 Na to nukunbibia susu po awufiẹsa ahun mẹ tọn po mẹ wẹ yẹn kanwe ehe hlan mì po dasin susu po, e ma yin nado hẹn mì blawu gba,+ ṣigba na mì nido sọgan yọ́n lehe owanyi he yẹn tindo na mì siso sọ.

5 Todin, eyin mẹdepope ko hẹn awubla wá,+ e ma yin yẹn wẹ e hẹn awubla gba, ṣigba mìmẹpo wẹ e hẹnwa na jẹ obá de mẹ—yẹn ma jlo na yí hogbe he sinyẹn hugan lẹ zan. 6 Wọhẹ he yin nina gbọn suhugan mìtọn dali ehe ko pé na dawe mọnkọtọn; 7 todin, mìwlẹ dona jona ẹn sọn ojlo mẹ wá bo miọnhomẹna ẹn,+ na ewọ nikaa tlọ biọ awubla zẹjlẹgo mẹ.+ 8 Enẹwutu, yẹn dotuhomẹna mì nado hẹn ẹn deji dọ mì yiwanna ẹn.+ 9 Na ehe wutu wẹ yẹn kanwehlan mì: nado yọnẹn eyin mì na dohia dọ mì nọ setonu to nulẹpo mẹ. 10 Eyin mì jo nudepope na mẹde, yẹnlọsu wàmọ ga. Na nugbo tọn, nudepope he yẹn ko jonamẹ (eyin yẹn ko jo nudepope namẹ) be na ale mìtọn wutu wẹ to Klisti nukọn, 11 na alọ Satani tọn ma nado jẹ mí go,*+ na mí ma to wunvi mẹ gando yanwle* etọn lẹ go.+

12 Todin, to whenue yẹn jẹ Tloa+ nado lá wẹndagbe lọ gando Klisti go, bọ ohọ̀n de yin hunhundonuvo na mi to Oklunọ mẹ, 13 ayiha ṣie ma jai depope, na Titu+ mẹmẹsunnu ṣie he yẹn ma mọ wutu. Enẹwutu, yẹn dọ e yì whedenu na yé bo dedo Makedonia.+

14 Ṣigba, opẹ́ wẹ na Jiwheyẹwhe he nọ deanana mí nado zinzọnlin awhàngbigba tọn to kọndopọ mẹ hẹ Klisti to whepoponu bo nọ gbọn míwlẹ dali hẹn owán oyọnẹn etọn tọn gbayipe* gbọn filẹpo! 15 Na owán gblingblin Klisti tọn de wẹ míwlẹ yin na Jiwheyẹwhe to mẹhe to yinyin whinwhlẹngán lẹ ṣẹnṣẹn podọ to mẹhe to dindọn lẹ ṣẹnṣẹn; 16 owán okú tọn de he nọ dekọtọn do okú mẹ na mẹhe to dindọn lẹ,+ owán ogbẹ̀ tọn de he nọ dekọtọn do ogbẹ̀ mẹ na mẹhe to yinyin whinwhlẹngán lẹ. Podọ mẹnu wẹ pegan mlẹnmlẹn na onú ehelẹ? 17 Míwlẹ wẹ, na mí ma yin ohó Jiwheyẹwhe tọn sàtọ lẹ*+ dile mẹsusu nọ wà do, ṣigba po ahundoponọ-yinyin po wẹ mí to hodọ dile Jiwheyẹwhe do mí hlan do, mọwẹ, to Jiwheyẹwhe nukọn podọ to kọndopọ mẹ hẹ Klisti.