Ohàn Sọlomọni tọn
5 “Nọviyọnnu ṣie E, asiyọyọ ṣie,
Yẹn ko biọ jipa ṣie mẹ. +
N’ko ṣinyan zuya po nuwhẹ́nkun ṣie po. +
N’ko dù owínjá po owín ṣie po;
N’ko nù ovẹn ṣie po anọ́sin po.” +
“Họntọn vivẹ́ lẹ emi, mì dù!
Mì nù bo gbọ owanyi he yin didohia ni mú mì!” +
2 “Yẹn damlọn, amọ́ ahun ṣie to nukle. +
Mẹhe yẹn yiwanna to họ̀nhúhú!”
“Hùnhọ̀n na mi, hiẹ nọviyọnnu ṣie E, mẹyiwanna ṣie,
Apoe ṣie, hiẹ mẹhe ma tindo oblọ!
Na ahun ko yọ̀n ota ṣie,
Ahun zánmẹ tọn ko yọ̀n oda ṣie.” +
3 “‘Yẹn ko de tewu ṣie.
Be n’nasọ gọ̀ ẹ do wẹ?
Yẹn ko klọ́ afọ ṣie lẹ.
Be n’nasọ hẹn yé kudiho wẹ?’
4 Mẹyiwanna ṣie ko de alọ etọn sẹ̀ sọn odò he to ohọ̀n lọ go mẹ,
Podọ numọtolanmẹ he yẹn tindo na ẹn ko doazọ̀n mi.
5 Yẹn fọ́n nado hùnhọ̀n na mẹyiwanna ṣie;
Zuya to kùnkùn sọn alọ ṣie lẹ go,
Zuya osin-nọ to kùnkùn sọn alọvi ṣie lẹ go,
Do nuhe nọ hùn ohọ̀n lọ go.
6 Yẹn hùnhọ̀n na mẹyiwanna ṣie,
Ṣigba, mẹyiwanna ṣie ko lẹkọ dedo, e ko yì.
N’jẹflumẹ* to whenue mẹyiwanna ṣie yì.*
N’dín in, ṣigba n’ma mọ ẹn. +
N’ylọ ẹ, ṣigba e ma siọ mi.
7 Zanṣọ́tọ he to dindan gbọn tòdaho lọ mẹ lẹ mọ mi.
Yé linú mi, yé sọ gbleawu mi.
Mẹhe to adó lọ ṣọ́ lẹ yí nukunmẹṣinyọnnu ṣie sọn asi e.
8 Mì viyọnnu Jelusalẹm tọn lẹ emi, mì whlé na mi:
Eyin mì mọ mẹyiwanna ṣie,
Mì dọna ẹn dọ owanyi ko doazọ̀n mi.”
9 “Etẹwẹ hẹn mẹyiwanna towe pọnte hú mẹyiwanna devo lẹ,
Hiẹ mẹhe yọnwhanpẹ tlala hugan to yọnnu lẹ mẹ?
Etẹwẹ hẹn mẹyiwanna towe pọnte hú mẹyiwanna devo lẹ,
Bọ hiẹ do biọ to mí si nado whlé whiwhle mọnkọtọn?”
10 “Mẹyiwanna ṣie yọnwhanpẹ bo bia;
E sọ gbọnvo to omẹ fọtọ́n donu ao ṣẹnṣẹn.
11 Ota etọn taidi sika, yèdọ sika dagbedagbe.
Oda etọn lẹ taidi odéma he to whinwhàn* lẹ,
Yé sọ diyuu taidi ohọ́n.
12 Nukun etọn lẹ taidi apoe tọn lẹ to osinwhín lẹ tó,
He to awulẹ to anọ́sin mẹ,
He sinai to otọ̀ he to sisà de tó.*
13 Alaka etọn lẹ taidi owhẹ̀n he ji yè do nuwhẹ́nkun lẹ do, +
Okọ̀ amà owán gblingblinnọ lẹ tọn.
Nùflo etọn lẹ taidi vounvoun lẹ, he mẹ zuya osin-nọ to kùnkùn sọn. +
14 Alọ etọn lẹ taidi sika mimlin, he yè yí klisọlite do doaṣọ́na.
Adọ̀go etọn taidi ajinnakú-dú he to sisẹ́ he yè yí safili do bu.
15 Afọ etọn lẹ taidi dòtin mabli tọn lẹ he yin tito do oslò dodonu tọn sika dagbedagbe tọn lẹ mẹ.
Awusọhia etọn taidi Lẹbanọni, he yọnwhanpẹ tlala taidi kedali. +
Mì viyọnnu Jelusalẹm tọn lẹ emi, mẹvivẹ ṣie die, yèdọ mẹyiwanna ṣie niyẹn.”