2 Otànnugbo lẹ
31 Whenue yé ko dotana ehe lẹpo godo tlolo, Islaelivi he to otẹn lọ mẹ lẹpo tọ́njẹgbonu yì tòdaho Juda tọn lẹ mẹ, yé sọ gbà dòtin wiwe zannu tọn+ lẹ hányán bo sán dòtin wiwe*+ lẹ liai bosọ họ́ ofi yiaga+ po agbà+ lẹ po liai to Juda po Bẹnjamini po pete, podọ to Eflaimi po Manasse+ po, kakajẹ whenue yé gbà yé hányán pete, enẹgodo Islaelivi lẹpo lẹkọyi tòdaho yetọn lẹ mẹ, yèdọ mẹdopodopo do nutindo etọn titi lẹ kọ̀n.
2 Hẹzekia sọ de yẹwhenọ lẹ do pipli yetọn lẹ+ mẹ podọ Levinu lẹ do pipli yetọn lẹ+ mẹ, dopodopo yẹwhenọ po Levinu lọ lẹ po tọn do sinsẹ̀nzọn yetọn kọ̀n,+ na avọ́nunina mimẹ̀ lẹ po avọ́sinsan jijọho tọn lẹ po, nado nọ yilizọn bo nọ dopẹ́ bosọ nọ na pipà to họngbo awánu* Jehovah tọn lẹ tọn mẹ.+ 3 Apadewhe nutindo ahọlu lọsu titi tọn lẹ tọn yin nina taidi avọ́nunina mimẹ̀ lẹ,+ yèdọ avọ́nunina afọnnu po whèjai po tọn lẹ,+ gọna avọ́nunina mimẹ̀ Gbọjẹzangbe lẹ tọn,+ osun yọyọ lẹ+ tọn po hùnwhẹ lẹ tọn+ po, sọgbe hẹ nuhe yin kinkan do Osẹ́n Jehovah tọn mẹ.
4 Humọ, e degbena mẹhe nọ nọ̀ Jelusalẹm lẹ nado nọ na mimá he yin didena yẹwhenọ lẹ po Levinu lẹ po,+ na yé nido nọ yìn* osẹ́n Jehovah tọn po sọwhiwhe po. 5 Tlolo he gbedide lọ yin nina, Islaelivi lẹ na sinsẹ́n tintan jinukun, ovẹn yọyọ, amì+ po owín po tọn susugege gọna sinsẹ́n aigba tọn lẹpo;+ yé hẹn mado-ao nulẹpo tọn wá susugege.+ 6 Podọ omẹ Islaeli po Juda po tọn he nọ nọ̀ tòdaho Juda tọn lẹ mẹ lẹ sọ hẹn mado-ao oyìn po lẹngbọ po tọn wá gọna mado-ao onú wiwe+ he ko yin kinklandowiwe na Jehovah Jiwheyẹwhe yetọn lẹ tọn. Yé hẹn yé wá bo pli yé do gọnu-gọnu. 7 To osun atọ̀ntọ mẹ,+ yé jẹ nunina yetọn lẹ bẹpli do gọnu-gọnu ji; podọ yé dotana to osun ṣinawetọ mẹ.+ 8 Whenue Hẹzekia po ahọvi lẹ po wá bo mọ nuhe yin bibẹpli do gọnu-gọnu lọ lẹ, yé pà Jehovah bo dona omẹ Islaeli tọn lẹ.
9 Hẹzekia kanhose yẹwhenọ lẹ po Levinu lẹ po gando nuhe yin bibẹpli do gọnu-gọnu lọ lẹ go, 10 bọ Azalia yẹwhenọgán whédo Zadọki tọn dọna ẹn dọmọ: “Sọn ojlẹ he mẹ yé jẹ nunina lẹ hẹnwa ohọ̀ Jehovah tọn mẹ ji,+ gbẹtọ lọ lẹ ko to núdù gọ́ho podọ lánkan susugege wẹ sọ tin, na Jehovah ko dona omẹ etọn lẹ, podọ onú planplan ehelẹ wẹ pò.”+
11 Whenẹnu, Hẹzekia dọna yé nado wleawuna agbànhọ*+ lẹ to ohọ̀ Jehovah tọn mẹ, yé sọ wleawuna yé. 12 Podọ yé to nunina lọ lẹ bẹ do e mẹ po nugbonọ-yinyin po, gọna mado-ao lọ lẹ+ po onú wiwe lọ lẹ po; Konania he yin Levinu de wẹ yin dide nado deanana ehe lẹpo taidi nukunpedonugotọ, podọ nọvisunnu etọn Ṣimei wẹ bọdego. 13 Jehiẹli, Azazia, Nahati, Asahẹli, Jelimọti, Jozabadi, Eliẹli, Ismakia, Mahati po Bẹnaia po wẹ yin anadenanutọ lẹ he nọ gọalọna Konania po nọvisunnu etọn Ṣimei po, sọgbe hẹ gbedide Ahọlu Hẹzekia tọn, podọ Azalia wẹ nọ penukundo ohọ̀ Jiwheyẹwhe nugbo lọ tọn go. 14 Kole visunnu Imna tọn, yèdọ Levinu he yin họ̀njinọtọ to whèzẹtẹn-waji lọ,+ wẹ nọ penukundo nunina sọn ojlo mẹ wá+ Jiwheyẹwhe nugbo lọ tọn lẹ go, e sọ nọ má nunina he yin bibasi na Jehovah lẹ+ po onú wiwe gbaugbau lẹ po.+ 15 Mẹhe tin to anademẹ etọn glọ lẹ wẹ Edẹni, Miniamini, Jeṣua, Ṣemaia, Amalia po Ṣekania po to tòdaho yẹwhenọ lẹ tọn lẹ mẹ,+ to azọ́ntẹn omẹ dejidego lẹ tọn yetọn mẹ, nado nọ má na nọvisunnu yetọn lẹ to pipli lọ lẹ mẹ do zẹnzẹn,+ yèdọ na omẹ daho po omẹ pẹvi po do zẹnzẹn. 16 Ehe gbọnvona nuhe nọ yin mimá na sunnu he tindo owhe atọ̀n podọ humọ bo tin to todohukanji kúnkan lẹ tọn lọ mẹ lẹ, yèdọ mẹhe nọ wá egbesọegbesọ nado wà sinsẹ̀nzọn to ohọ̀ Jehovah tọn mẹ podọ nado hẹn azọ́ndenamẹ pipli yetọn lẹ tọn lẹ di.
17 Todohukanji kúnkan yẹwhenọ lẹ tọn yin bibasi sọgbe hẹ whédo otọ́ yetọn lẹ tọn,+ kẹdẹdile e yin do na Levinu he tindo owhe 20 podọ humọ lẹ,+ sọgbe hẹ azọ́ndenamẹ pipli yetọn lẹ tọn lẹ.+ 18 Todohukanji kúnkan lẹ tọn lọ bẹ ovi yetọn, asi yetọn, visunnu yetọn po viyọnnu yetọn lẹpo po hẹn, yèdọ agun yetọn pete—na yé nọ klan yede do wiwe na nuhe yin wiwe lẹ, na azọ́ntẹn omẹ dejidego lẹ tọn yetọn wutu— 19 gọna kúnkan Aalọn tọn lẹ, yẹwhenọ he nọ nọ̀ danji he lẹdo tòdaho yetọn lẹ.+ To tòdaho lọ lẹpo mẹ, sunnu lẹ ko yin dide sọgbe hẹ yinkọ yetọn lẹ nado nọ na mimá lẹ sunnu he yin yẹwhenọ lẹpo gọna mẹdepope he to todohukanji kúnkan Levinu lẹ tọn lọ mẹ.
20 Hẹzekia wà ehe gbọn Juda pete, e sọ zindonukọn nado to nuhe yọ́n bo sọgbe wà bosọ yin nugbonọ to Jehovah Jiwheyẹwhe etọn nukọn. 21 Podọ azọ́n depope he e de nado wà nado sọgan dín Jiwheyẹwhe etọn, vlavo to kọndopọ mẹ hẹ sinsẹ̀nzọn ohọ̀ Jiwheyẹwhe nugbo lọ tọn+ kavi to kọndopọ mẹ hẹ Osẹ́n lọ po gbedide lọ po, e nọ wà ẹ po ahun lẹpo po bo nọ tindo kọdetọn dagbe.