2 Otànnugbo lẹ

32 To onú ehelẹ po azọ́n nugbonọ-yinyin tọn ehelẹ po godo,+ Ahọlu Sẹnnakelibi Asilia tọn wá tọ́nawhàn Juda. E dosla lẹdo tòdaho gángán lọ lẹ bo to linlẹn nado gbà adó biọ yé mẹ bo yí yé.+

2 Whenue Hẹzekia mọdọ Sẹnnakelibi ko wá bo to linlẹn nado funawhàn sọta Jelusalẹm, 3 e basi dide nado doalọtena osin asisa he to gbonu tòdaho lọ tọn lẹ tọn+ to whenue e ko dewé hẹ ahọvi etọn lẹ po awhànfuntọ etọn lẹ po godo, yé sọ nọgodona ẹn. 4 Gbẹtọ susu wẹ pli dopọ, bọ yé doalọtena asisa lọ lẹpo po tọ̀sisa he nọ sà gbọn aigba lọ ji po, bo dọmọ: “Naegbọn ahọlu Asilia tọn lẹ nado mọ osin susu to whenue yé na wá?”

5 Humọ, e yí gbemima do vọ́ adó he ko yin hihọliai lọ pete do bo gbá atọ̀họ̀ lẹ do e ji, e sọ do adó devo do gbonu. Podọ e vọ́ Pópló*+ Tòdaho Davidi tọn lọ jlado bo basi awhànfunnu* po awọ̀yinu susugege po. 6 Enẹgodo, e de ogán awhànfuntọ lẹ tọn lẹ do gbẹtọ lọ lẹ nù bo pli yé do tòplitẹn họngbo tòdaho lọ tọn bosọ na yé tuli,* dọmọ: 7 “Mì yin adọgbotọ bo yin huhlọnnọ. Mì dibu kavi dike ahun mìtọn gbàdo na ahọlu Asilia tọn+ po gbẹtọ susugege he tin to e dè lẹ tọn po wutu blo, na mẹhe to adà mítọn mẹ lẹ sù hú mẹhe to adà etọn mẹ lẹ.+ 8 Awà agbasalan tọn de* wẹ tin hẹ ẹ, ṣigba Jehovah Jiwheyẹwhe mítọn wẹ tin hẹ míwlẹ nado gọalọna mí bo funawhàn do ota mítọn mẹ.”+ Ohó he Ahọlu Hẹzekia Juda tọn dọ lẹ sọ hẹn gbẹtọ lọ lẹ lodo.+

9 Enẹgodo, dile Ahọlu Sẹnnakelibi Asilia tọn to Lakiṣi+ po awhànpa etọn lẹpo po,* e do devizọnwatọ etọn lẹ hlan Jelusalẹm, yèdọ hlan Ahọlu Hẹzekia Juda tọn dè podọ hlan omẹ Jude tọn he to Jelusalẹm lẹpo dè+ dọmọ:

10 “Nuhe Ahọlu Sẹnnakelibi Asilia tọn dọ die, ‘Etẹ go wẹ mì ganjẹ bo do gbọṣi Jelusalẹm to whenue osla ko yin dido lẹdo e?+ 11 Be e ma yin kiklọ mì wẹ Hẹzekia te bo to jijo mì do nado kú gbọn huvẹ po nugbla po dali, to whenue e dọmọ: “Jehovah Jiwheyẹwhe mítọn na whlẹn mí sọn alọ ahọlu Asilia tọn mẹ” ya?+ 12 Be e ma yin Hẹzekia dopolọ wẹ de ofi yiaga Jiwheyẹwhe mìtọn tọn* lẹ+ po agbà Etọn lẹ+ po sẹ̀ bo dọna Juda po Jelusalẹm po dọ: “Agbà dopo nukọn wẹ mìwlẹ dona nọ dẹ́ do odò te bo nọ basi avọ́sinsan mimẹ̀ mìtọn lẹ to e ji” ya?+ 13 Mìwlẹ ma sè nuhe yẹn po tọgbo ṣie lẹ po ko wà na mẹhe nọ nọ̀ otò lọ lẹ mẹ lẹpo wẹ?+ Be yẹwhe akọta he nọ nọ̀ otò lọ lẹ mẹ lẹ tọn lẹ penugo nado whlẹn otò yetọn sọn alọ ṣie mẹ wẹ ya?+ 14 Detẹ to yẹwhe akọta he tọgbo ṣie lẹ ko vasudo mlẹnmlẹn ehelẹ tọn lẹpo mẹ wẹ penugo nado whlẹn omẹ etọn lẹ sọn alọ ṣie mẹ, bọ Jiwheyẹwhe mìtọn nado penugo bo whlẹn mì sọn alọ ṣie mẹ?+ 15 Todin, mì dike Hẹzekia klọ mì kavi hẹn mì buali domọ blo!+ Mì yí i sè blo, na yẹwhe akọta kavi ahọluduta depope tọn ma penugo nado whlẹn omẹ etọn lẹ sọn alọ ṣie mẹ podọ sọn alọ tọgbo ṣie lẹ tọn mẹ. To whelọnu lo, e họnwun dọ Jiwheyẹwhe mìlọsu tọn ma na penugo nado whlẹn mì sọn alọ ṣie mẹ!’”+

16 Devizọnwatọ etọn lẹ sọ dọ nususu humọ sọta Jehovah Jiwheyẹwhe nugbo lọ podọ sọta Hẹzekia devizọnwatọ etọn. 17 E sọ kàn wekanhlanmẹ+ lẹ nado zun Jehovah Jiwheyẹwhe Islaeli tọn+ bo dọho sọta ẹ dọmọ: “Kẹdẹdi yẹwhe akọta he nọ nọ̀ otò lọ lẹ mẹ lẹ tọn lẹ he ma penugo nado whlẹn omẹ yetọn lẹ sọn alọ ṣie mẹ,+ mọ wẹ Jiwheyẹwhe Hẹzekia tọn ma na whlẹn omẹ etọn lẹ sọn alọ ṣie mẹ do niyẹn.” 18 Yé yí ogbè lélé do to hodọ mapote na omẹ Jelusalẹm tọn he to adó lọ ji lẹ to ogbè Ju lẹ tọn mẹ, nado dobuna yé bo gbàhundona yé, nado sọgan yí tòdaho lọ.+ 19 Yé dọho sọta Jiwheyẹwhe Jelusalẹm tọn kẹdẹdile yé ko dọho sọta yẹwhe akọta he to aigba ji lẹ tọn lẹ do, ehe yin alọnuzọ́n gbẹtọ tọn lẹ. 20 Ṣigba, Ahọlu Hẹzekia po yẹwhegán Isaia+ he yin visunnu Amọzi tọn po to dẹ̀ho mapote gando ehe go bo to awhádo hlan olọn nado biọ alọgọ.+

21 Whenẹnu, Jehovah do angẹli de hlan bo hù awhànfuntọ huhlọnnọ,+ nukọntọ podọ mẹhe yin ogán to osla ahọlu Asilia tọn mẹ lẹpo sọmọ bọ ewọ lẹkọyi otò etọn titi mẹ po winyan po. To godo mẹ, e biọ ohọ̀* yẹwhe etọn tọn mẹ, visunnu etọn titi delẹ sọ yí ohí do hù i to finẹ.+ 22 Gbọnmọ dali, Jehovah whlẹn Hẹzekia po mẹhe nọ nọ̀ Jelusalẹm lẹ po sọn alọ Ahọlu Sẹnnakelibi Asilia tọn mẹ podọ sọn alọ mẹhe pò lẹpo tọn mẹ bo na yé gbọjẹ to awà lẹpo ji. 23 Mẹsusu sọ hẹn nunina lẹ wá na Jehovah to Jelusalẹm gọna onú dagbedagbe lẹ na Ahọlu Hẹzekia Juda tọn,+ akọta lẹpo sọ nọ na ẹn sisi taun to ehelẹ godo.

24 To azán enẹlẹ gbè, Hẹzekia jẹazọ̀n kakajẹ kúdonu, ewọ sọ hodẹ̀ hlan Jehovah,+ mẹhe siọ ẹ bo na ẹn ohia* de.+ 25 Ṣigba, Hẹzekia ma do pinpẹn-nutọn-yinyọnẹn hia na dagbe he yin wiwà na ẹn lẹ, na ahun etọn lẹzun saklanọ bo hẹn homẹgble wá e ji podọ wá Juda po Jelusalẹm po ji. 26 Amọ́, Hẹzekia whiwhẹ ahun saklanọ etọn,+ yèdọ ewọ po mẹhe nọ nọ̀ Jelusalẹm lẹ po, bọ homẹgble Jehovah tọn masọ wá yé ji to azán Hẹzekia tọn lẹ gbè ba.+

27 Hẹzekia wá tindo adọkun susugege po gigo daho po;+ e sọ gbá agbànhọ+ lẹ na ede na fataka, sika, zannu akuẹgegenu tọn lẹ, amì balsami* tọn, awọ̀yinu lẹ po núzinzan dagbedagbe lẹpo po. 28 E sọ gbá zínhọ lẹ na sinsẹ́n jinukun tọn lẹ, ovẹn yọyọ po amì po gọna apó lẹ na kanlin-yìnyìn wunmẹ voovo lẹ podọ apó lẹ na lẹngbọ lẹ. 29 E sọ gbá tòdaho lẹ na ede bo tindo kanlin-yìnyìn susugege, lẹngbọpa lẹ po kanlinpa lẹ po, na Jiwheyẹwhe na ẹn nutindo susu tlala. 30 Hẹzekia wẹ doalọtena asisa osin+ Gihọni+ tọn he nọ sà sọn agawaji bo deanana ẹn hlan whèyihọ-waji yì Tòdaho Davidi tọn mẹ,+ podọ Hẹzekia tindo kọdetọn dagbe to azọ́n etọn lẹpo mẹ. 31 Etomọṣo, whenue ahọvi Babilọni tọn lẹ sin hoyidọtọ lẹ yin didohlan nado kàn ohia*+ he wá aimẹ to aigba lọ ji sè e,+ Jiwheyẹwhe nugbo lọ jo e do ewọ ṣo nado tẹ́n ẹn pọ́n,+ nado yọ́n nuhe to ahun etọn mẹ lẹpo.+

32 Na nuhe dù otàn Hẹzekia tọn he pò po nuyiwa owanyi nugbo tọn etọn+ lẹ po, yé yin kinkan do numimọ Isaia+ yẹwhegán lọ he yin visunnu Amọzi tọn mẹ to Owe Ahọlu Juda po Islaeli po tọn lẹ tọn mẹ.+ 33 Hẹzekia sọ yin hinhẹn nado mlọnai hẹ tọgbo etọn lẹ, bọ yé dì i do agawaji yọdò visunnu Davidi tọn lẹ tọn;+ Juda po mẹhe nọ nọ̀ Jelusalẹm lẹpo po sọ doyẹyigona ẹn to whenue e kú. Visunnu etọn Manasse sọ lẹzun ahọlu do otẹn etọn mẹ.