2 Otànnugbo lẹ

7 Tlolo he Sọlomọni dotana dẹ̀hiho,+ miyọ́n jẹte sọn olọn mẹ+ bo fiọ avọ́nunina mimẹ̀ lọ po avọ́sinsan lọ lẹ po, bọ gigo Jehovah tọn gọ́ ohọ̀ lọ mẹ.+ 2 Yẹwhenọ lọ lẹ ma penugo nado biọ ohọ̀ Jehovah tọn mẹ, na gigo Jehovah tọn ko gọ́ ohọ̀ Jehovah tọn mẹ wutu.+ 3 Omẹ Islaeli tọn lẹpo sọ to nupọn to whenue miyọ́n jẹte bọ gigo Jehovah tọn to ohọ̀ lọ ji, yé sọ dẹ́ do odò pete bo ṣinyọ́n nukunmẹ ai do zannu titẹ́ lọ lẹ ji bo dopẹna Jehovah dọ, “na ewọ yọ́n; owanyi nugbo etọn na gbọṣi aimẹ kakadoi.”

4 Todin, ahọlu po gbẹtọ lọ lẹpo po basi avọ́sinsan lẹ to Jehovah nukọn.+ 5 Ahọlu Sọlomọni yí oyìn 22 000 po lẹngbọ 120 000 po do sanvọ́. Mọ wẹ ahọlu po gbẹtọ lọ lẹpo po klan ohọ̀ Jiwheyẹwhe nugbo lọ tọn do wiwe do.+ 6 Yẹwhenọ lẹ to ote to azọ́ntẹn yetọn lẹ, kẹdẹdi Levinu he hẹn hànjinu he nọ yin yiyizan nado jihàn hlan Jehovah lẹ.+ (Ahọlu Davidi ko basi hànjinu ehelẹ nado na pipà Jehovah—“na owanyi nugbo etọn na gbọṣi aimẹ kakadoi”—to whenue Davidi nọ na pipà po yé* po.) Yẹwhenọ lẹ sọ to opẹ̀n lọ lẹ kún po ogbé lélé po+ to nukọn yetọn to whenuena Islaelivi lẹpo to ote.

7 To whenẹnu, Sọlomọni klan ṣẹnṣẹn awánu he tin to ohọ̀ Jehovah tọn nukọn lọ tọn do wiwe, na ewọ dona basi avọ́nunina mimẹ̀+ lẹ bo mẹ̀ adà dojó avọ́sinsan jijọho tọn lẹ tọn to finẹ, na agbà gànvẹẹ tọn+ he Sọlomọni ko basi lọ ma sọgan hẹn avọ́sinsan mimẹ̀, avọ́nunina jinukun-lili tọn+ po adà dojó+ lọ lẹ po wutu. 8 To ojlẹ enẹ mẹ, Sọlomọni basi hùnwhẹ lọ na azán ṣinawe+ to pọmẹ hẹ omẹ Islaeli tọn lẹpo, yèdọ agun daho tlala de sọn Lebo-hamati* kaka yì Agbàdo Tọ̀sisa tọn* Egipti tọn mẹ.+ 9 Ṣigba, to azán ṣinatọ̀ntọ gbè,* yé basi opli vonọtaun de,+ na yé ko basi klandowiwe agbà lọ tọn na azán ṣinawe podọ hùnwhẹ lọ na azán ṣinawe. 10 Enẹgodo, to azán 23tọ gbè to osun ṣinawetọ lọ mẹ, e do gbẹtọ lọ lẹ hlan owhé yetọn lẹ gbè po homẹhunhun+ po bọ yé to ayajẹ to ahun yetọn mẹ, na dagbewà he Jehovah ko dohia Davidi, Sọlomọni po Islaeli omẹ etọn lẹ po wutu.+

11 Mọ wẹ Sọlomọni dotana ohọ̀ Jehovah tọn po owhé* ahọlu tọn+ po gbigbá do niyẹn; podọ nuhe Sọlomọni lẹn to ahun etọn mẹ nado basi gando ohọ̀ Jehovah tọn po owhé etọn titi po gbigbá go lẹpo wẹ e wadotana po kọdetọn dagbe po.+ 12 Jehovah sọ sọawuhia Sọlomọni+ to zánmẹ bo dọna ẹn dọmọ: “Yẹn ko sè odẹ̀ towe, podọ yẹn ko de ohọ̀ ehe na dee taidi ohọ̀ avọ́sinsan tọn de.+ 13 Eyin yẹn sú ovẹ́sẹ olọn tọn lẹ bọ jikun ma ja, podọ eyin yẹn degbena obọ̀ lẹ nado dù jinukun he to aigba lọ ji lẹ sudo, podọ eyin yẹn do azọ̀nylankan de hlan omẹ ṣie lẹ ṣẹnṣẹn, 14 eyin omẹ ṣie he ji oyín ṣie ko yin yiylọ do+ lẹ whiwhẹ yede+ bo hodẹ̀ bosọ dín nukundagbe ṣie bo lẹ́ sọn aliho ylankan yetọn lẹ ji,+ whenẹnu yẹn na sè sọn olọn mẹ bo na jo ylando yetọn na yé bo nasọ hẹnazọ̀ngbọna aigba yetọn.+ 15 Nukun ṣie nasọ to ote bọ otó ṣie na lẹhlan odẹ̀ he na nọ yin hihò to nọtẹn ehe mẹ lẹ.+ 16 Podọ todin, yẹn ko de ohọ̀ ehe bosọ klan ẹn do wiwe, na oyín ṣie nido tin to e ji kakadoi,+ nukun ṣie po ahun ṣie po nasọ tin to finẹ tẹgbẹ.+

17 “Podọ hiẹ, eyin a nọ zinzọnlin to nukọn ṣie dile Davidi otọ́ towe wà do, gbọn nuhe yẹn degbena we lẹpo wiwà dali, bọ hiẹ nọ setonuna aṣẹdai ṣie lẹ po whẹdida ṣie lẹ po,+ 18 whenẹnu yẹn na hẹn ofìn gandudu towe tọn lodo,+ kẹdẹdile yẹn ko basi alẹnu de hẹ Davidi otọ́ towe do+ dọ, ‘Sunnu he na wá sọn kúnkan towe mẹ nado dugán do Islaeli ji de ma na hán gbede.’+ 19 Ṣigba, eyin mìwlẹ lẹkọ bo gbẹkọ osẹ́ndoai ṣie lẹ po gbedide ṣie lẹ po he yẹn zedo nukọn mìtọn go, bọ mì yì sẹ̀n yẹwhe devo lẹ bo dẹ́ do odò na yé,+ 20 yẹn na họ̀n adọ̀ Islaeli tọn sẹ̀ sọn aigba ṣie he yẹn ko na yé lọ ji,+ yẹn nasọ de ohọ̀ he n’ko klandowiwe na oyín ṣie ehe sẹ̀ sọn nukọn ṣie bo na hẹn ẹn zun aṣagbọ́nu* bo na nọ yin ṣinṣanko to akọta lẹpo ṣẹnṣẹn.+ 21 Ohọ̀ ehe nasọ lẹzun okiti gbakija tọn lẹ. Aligbọntọ lẹpo wẹ na nọ pọ́n ẹn po nupaṣamẹ+ po bo na nọ dọmọ, ‘Naegbọn Jehovah do wàmọ na aigba ehe po ohọ̀ ehe po?’+ 22 Whenẹnu, yé na nọ dọmọ, ‘Na yé gbẹ́ Jehovah+ Jiwheyẹwhe tọgbo yetọn lẹ tọn dai wutu wẹ, yèdọ mẹhe ko plan yé tọ́njẹgbonu sọn aigba Egipti tọn ji,+ yé sọ kẹalọyi yẹwhe devo lẹ bo nọ dẹ́ do odò na yé bosọ nọ sẹ̀n yé.+ Enẹ wẹ zọ́n bọ ewọ do hẹn nugbajẹmẹji ehe lẹpo wá yé ji.’”+