2 Otànnugbo lẹ
8 To owhe 20 godo, ehe gblamẹ Sọlomọni gbá ohọ̀ Jehovah tọn po owhé* etọn titi po,+ 2 Sọlomọni vọ́ tòdaho he Hilami+ ko na Sọlomọni lẹ gbá bo bẹ Islaelivi* lẹ do yé mẹ. 3 Humọ, Sọlomọni yì Hamati-zoba bo gbawhàn etọn. 4 Enẹgodo, e do Tadmoli* to danfafa ji, gọna tòdaho agbànhọ tọn+ he e ko do dó Hamati lẹpo.+ 5 E sọ do Agawaji Bẹti-holọni tọn+ po Dòwaji Bẹti-holọni tọn+ po, yèdọ tòdaho gángán lẹ he tindo adó, họngbo po dòtin lẹ po, 6 podọ Baalati,+ gọna tòdaho agbànhọ tọn Sọlomọni tọn lẹpo, tòdaho osọ́-kẹkẹ lẹ tọn lẹpo,+ tòdaho osọ́nọ lẹ tọn lẹ podọ nudepope he Sọlomọni jlo nado gbá do Jelusalẹm, Lẹbanọni po aigba he to aṣẹ etọn glọ lẹpo po.
7 Na nuhe dù omẹ Hetinu lẹ, Amolinu lẹ, Pelizinu lẹ, Hivinu lẹ po Jẹbusinu+ lẹ po tọn he pò lẹ he ma yin apadewhe omẹ Islaeli tọn lẹ tọn,+ 8 yèdọ kúnkan yetọn he pò to aigba lọ ji lẹ—mẹhe Islaelivi lẹ ma ko sukúndona lẹ+—Sọlomọni de yé nado nọ wazọ́n sinsinyẹn kakajẹ egbé.+ 9 Ṣigba, Sọlomọni ma hẹn Islaelivi depope nado wazọ́n na ẹn di afanumẹ,+ na yewlẹ wẹ awhànfuntọ, ogán ahọluzọnwatọ alọgọtọ etọn lẹ tọn lẹ gọna ogán osọ́-kẹkẹ kùntọ po osọ́nọ etọn lẹ po tọn.+ 10 Ogán nukunpedonugotọ lẹ tọn 250 wẹ Ahọlu Sọlomọni tindo, yèdọ azọ́ngán he yin dide do gbẹtọ lọ lẹ ji.+
11 Sọlomọni sọ hẹn viyọnnu Falo tọn+ hẹji sọn Tòdaho Davidi tọn mẹ wá owhé he e ko gbá na ẹn lọ gbè,+ na e dọmọ: “Dile etlẹ yindọ asi ṣie wẹ, e ma dona nọ owhé Ahọlu Davidi Islaeli tọn gbè, na wiwe wẹ fie Apotin Jehovah tọn ko nọ lẹ.”+
12 Enẹgodo, Sọlomọni basi avọ́sinsan mimẹ̀ lẹ+ hlan Jehovah to agbà Jehovah tọn+ he e ko doai do atọ̀họ̀ lọ nukọn ji.+ 13 E nọ hodo aṣa egbesọegbesọ tọn lọ bo nọ basi avọ́nunina lẹ sọgbe hẹ gbedide Mose tọn na nuhe dù Gbọjẹzan+ lẹ, osun yọyọ+ lẹ, podọ hùnwhẹ dide he nọ wá aimẹ whla atọ̀n to whemẹwhemẹ lẹ+—enẹ wẹ Hùnwhẹ Akla Madotọ́n tọn,+ Hùnwhẹ Osẹ lẹ tọn+ po Hùnwhẹ Gòhọtúntún* lẹ tọn+ po. 14 Humọ, e de pipli yẹwhenọ lẹ tọn+ lẹ nado nọ wadevizọn yetọn lẹ sọgbe hẹ anademẹ Davidi otọ́ etọn tọn, podọ Levinu lẹ do otẹn azọngban tọn yetọn lẹ mẹ, nado nọ na pipà+ bo nọ yilizọn to yẹwhenọ lẹ nukọn sọgbe hẹ aṣa egbesọegbesọ tọn lọ, podọ họ̀njinọtọ lẹ do pipli yetọn lẹ mẹ to họngbo voovo lẹ ji,+ na enẹ wẹ gbedide Davidi, omẹ Jiwheyẹwhe nugbo lọ tọn. 15 Yé masọ lẹ́ sọn gbedide ahọlu tọn kọ̀n, ehe e ko na yẹwhenọ lẹ po Levinu lẹ po gando whẹho depope kavi agbànhọ lẹ go. 16 Gbọnmọ dali, azọ́n Sọlomọni tọn lẹpo nọ titoji,* sọn azán he gbè dodonu ohọ̀ Jehovah tọn yin didoai+ kakajẹ whenue e fó. Mọ wẹ ohọ̀ Jehovah tọn yin gbigbá fó do.+
17 Whenẹnu wẹ Sọlomọni yì Ezioni-gebeli+ po Elọti+ po he to huto to aigba Edomi tọn ji.+ 18 Hilami+ sọ do tọjihun lẹ po azọ́nwatọ hùji tọn numimọnọ lẹ po hlan ẹn gbọn devizọnwatọ etọn titi lẹ gblamẹ. Yé hodo devizọnwatọ Sọlomọni tọn lẹ yì Ofili+ bo bẹ talẹnti* sika tọn 450+ sọn finẹ bosọ hẹn yé wá na Ahọlu Sọlomọni.+