2 Ahọlu lẹ
13 To owhe 23tọ Jehoaṣi+ visunnu Ahazia+ ahọlu Juda tọn mẹ, Jehoahazi visunnu Jehu tọn+ duahọlu do Islaeli ji to Samalia, e sọ dugán na owhe 17. 2 E zindonukọn nado to nuhe ylan to nukun Jehovah tọn mẹ lẹ wà bo gbọṣi ylando he Jeloboami visunnu Nebati tọn ko hẹn Islaeli nado wà mẹ.+ E ma lẹkọ sọn e mẹ. 3 Jehovah sọ gblehomẹ+ do Islaeli go sinsinyẹn+ bo jo yé do alọ Ahọlu Hazaẹli+ Silia tọn mẹ podọ do alọ Bẹni-hadadi+ visunnu Hazaẹli tọn mẹ to azán yetọn lẹpo gbè.
4 To nukọn mẹ, Jehoahazi biọ nukundagbe Jehovah tọn,* Jehovah sọ sè etọn, na e ko mọ lehe ahọlu Silia tọn to kọgbidina Islaeli do.+ 5 Enẹwutu, Jehovah wleawu mẹwhlẹngántọ+ de tọn na Islaeli nado tún yé dote sọn alọ Silia tọn mẹ, bọ Islaelivi lẹ wá penugo nado nọ nọ̀ owhé yetọn lẹ gbè di dai.* 6 (Ṣigba, yé ma lẹkọ sọn ylando whédo Jeloboami tọn he ewọ ko hẹn Islaeli nado wà mẹ.+ Yé zindonukọn to ylando enẹ mẹ* bọ dòtin wiwe*+ lọ gbẹ́ pò to ote to Samalia.) 7 Awhànpa he bẹ osọ́nọ 50, osọ́-kẹkẹ 10 gọna awhànfuntọ he nọ zọ̀n afọ 10 000 poun hẹn wẹ pò na Jehoahazi, na ahọlu Silia tọn ko và yé sudo+ bo tùnafọ yé ji di kọ́gudu to likun-fiflé whenu wutu.+
8 Na nuhe dù otàn Jehoahazi tọn he pò, yèdọ nuhe e wà lẹpo po huhlọn he e dohia po, be e ma yin kinkan do owe whenuho ahọlu Islaeli tọn lẹ tọn mẹ ya? 9 Enẹgodo, Jehoahazi yin hinhẹn nado mlọnai hẹ tọgbo etọn lẹ, bọ yé dì i do Samalia;+ visunnu etọn Jehoaṣi sọ lẹzun ahọlu do otẹn etọn mẹ.
10 To owhe 37tọ Ahọlu Jehoaṣi Juda tọn mẹ, Jehoaṣi+ visunnu Jehoahazi tọn duahọlu do Islaeli ji to Samalia, e sọ dugán na owhe 16. 11 E zindonukọn nado to nuhe ylan to nukun Jehovah tọn mẹ lẹ wà bo ma lẹkọ sọn ylando he Jeloboami visunnu Nebati tọn ko hẹn Islaeli nado wà lẹpo mẹ.+ E zindonukọn* to ylando ehelẹ mẹ.
12 Na nuhe dù otàn Jehoaṣi tọn he pò, yèdọ nuhe e wà lẹpo po huhlọn he e dohia po gọna lehe e hoavùn hẹ Ahọlu Amazia Juda tọn do,+ be e ma yin kinkan do owe whenuho ahọlu Islaeli tọn lẹ tọn mẹ ya? 13 Enẹgodo, Jehoaṣi yin hinhẹn nado mlọnai hẹ tọgbo etọn lẹ, bọ Jeloboami*+ hẹ ofìn etọn ji. Jehoaṣi sọ yin dìdì dopọ hẹ ahọlu Islaeli tọn lẹ to Samalia.+
14 Todin, whenue Eliṣa+ bẹ azọ̀n he wá hù i to godo mẹ, Jehoaṣi ahọlu Islaeli tọn jẹte wá e dè bo viavi do e ji dọmọ: “Otọ́ ṣie, otọ́ ṣie! Osọ́-kẹkẹ Islaeli tọn po osọ́nọ etọn lẹ po!”+ 15 Whenẹnu wẹ Eliṣa dọna ẹn dọmọ: “Ze ogá po ogába lẹ po.” Ewọ sọ ze ogá po ogába lẹ po. 16 E sọ dọna ahọlu Islaeli tọn dọmọ: “Yí alọ towe do hẹn ogá lọ.” Ewọ sọ yí alọ etọn do hẹn ẹn, enẹgodo Eliṣa ze alọ etọn lẹ do alọ ahọlu lọ tọn lẹ ji. 17 E sọ dọmọ: “Hùn fleṣe lọ hlan whèzẹtẹn-waji.” Ewọ sọ hùn in. Eliṣa dọmọ: “De ogá!” Ewọ sọ de ogá. Todin, e dọmọ: “Ogába awhàngbigba* tọn Jehovah tọn, yèdọ ogába awhàngbigba tọn do Silia ji!* Hiẹ na gbawhàn Silia tọn to Afẹki+ kaka bo na sukúndona ẹn.”
18 E zindonukọn dọmọ: “Bẹ ogába lọ lẹ,” ewọ sọ bẹ yé. E sọ dọna ahọlu Islaeli tọn dọmọ: “Linú kọmẹ.” Ewọ sọ linú kọmẹ whla atọ̀n bo nọte. 19 Enẹwutu, omẹ Jiwheyẹwhe nugbo lọ tọn gblehomẹ do e go sinsinyẹn bo dọmọ: “Hiẹ na ko linú kọmẹ whla atọ́n kavi ṣidopo! Whenẹnu wẹ hiẹ na gbawhàn Silia tọn kaka bo na sukúndona ẹn, amọ́ todin whla atọ̀n poun wẹ hiẹ na gbawhàn Silia tọn.”+
20 Enẹgodo, Eliṣa kú bo yin dìdì. Todin, jaguda-gbẹ́+ Moabinu lẹ tọn lẹ nọ wá aigba lọ ji to bẹjẹeji owhe lọ tọn.* 21 Dile sunnu delẹ to dawe de dì, yé mọ jaguda-gbẹ́ lọ, yé sọ yawu ze dawe lọ dlan yọdò Eliṣa tọn mẹ bo họnyi. Whenue oṣiọ dawe lọ tọn jẹ ohú Eliṣa tọn lẹ ji, dawe lọ gọwá ogbẹ̀+ bo ṣite.
22 Ahọlu Hazaẹli+ Silia tọn gbidikọna Islaeli+ to azán Jehoahazi tọn lẹpo gbè. 23 Ṣigba, Jehovah do nukundagbe, lẹblanu po mẹtọnhopọn po hia yé,+ na alẹnu he e ko basi hẹ Ablaham,+ Isaki+ po Jakọbu+ po wutu. E ma jlo na hù yé sudo, podọ e ma ko tùn yé dlan sọn nukọn etọn kakajẹ egbé. 24 Whenue Ahọlu Hazaẹli Silia tọn kú, visunnu etọn Bẹni-hadadi lẹzun ahọlu do otẹn etọn mẹ. 25 Jehoaṣi visunnu Jehoahazi tọn sọ gọ̀ tòdaho he Bẹni-hadadi visunnu Hazaẹli tọn ko yí to awhàn whenu sọn otọ́ etọn Jehoahazi si lẹ yí sọn e si. Whla atọ̀n wẹ Jehoaṣi gbawhàn etọn+ bo gọ̀ tòdaho Islaeli tọn lọ lẹ yí.