2 Otànnugbo lẹ

5 Mọ wẹ Sọlomọni dotana azọ́n he e dona wà gando ohọ̀ Jehovah tọn gbigbá go lọ lẹpo do niyẹn.+ Enẹgodo, Sọlomọni bẹ nuhe Davidi otọ́ etọn ko klandowiwe lẹ+ wá bo ze fataka lọ, sika lọ po núzinzan lọ lẹpo po do adọkunnu sẹdotẹn ohọ̀ Jiwheyẹwhe nugbo lọ tọn mẹ.+ 2 To ojlẹ enẹ mẹ, Sọlomọni bẹ mẹho Islaeli tọn lẹ, nukọntọ hẹnnu lẹ tọn lẹpo po ahọvi whédo otọ́ Islaeli tọn lẹ po pli. Yé wá Jelusalẹm nado hẹn apotin alẹnu tọn Jehovah tọn hẹji wá sọn Tòdaho Davidi tọn+ mẹ, enẹ wẹ Ziọni.+ 3 Sunnu Islaeli tọn lẹpo pli do ahọlu nukọn to hùnwhẹ* he nọ yin bibasi to osun ṣinawetọ mẹ lọ whenu.+

4 Whenẹnu, mẹho Islaeli tọn lẹpo wá, bọ Levinu lẹ ze Apotin lọ.+ 5 Yé hẹn Apotin lọ, gòhọ opli tọn+ lọ po nuyizan wiwe he to gòhọ lọ mẹ lẹpo po hẹji wá. Yẹwhenọ lẹ po Levinu lẹ po* wẹ hẹn yé hẹji wá. 6 Ahọlu Sọlomọni gọna akọta Islaeli tọn pete he ko yin yiylọ wá nado pli hẹ ẹ nọte to Apotin lọ nukọn. Lẹngbọ po oyìn he yin yíyí do sanvọ́+ lẹ po sù sọmọ bọ yé ma sọgan yin hihia kavi yin sọhayina. 7 Whenẹnu wẹ yẹwhenọ lẹ hẹn apotin alẹnu tọn Jehovah tọn wá otẹn etọn mẹ to abò homẹ tọn ohọ̀ lọ tọn mẹ, yèdọ Fiwiwe Gbaugbau lọ, to awà kelubimi lẹ tọn glọ.+ 8 Gbọnmọ dali, awà kelubimi lọ lẹ tọn dlẹn do aga na fihe Apotin lọ nọ nọ̀ sọmọ bọ kelubimi lọ lẹ ṣinyọnyẹ Apotin lọ po opò etọn lẹ+ po ji sọn aga. 9 Opò lọ lẹ dite sọmọ bọ bẹ́nu yetọn sọgan yin mimọ sọn Fiwiwe he tin to abò homẹ tọn lọ nukọn, ṣigba yé ma sọgan yin mimọ sọn gbonu. Yé gbẹ́ tin to finẹ kakajẹ egbé. 10 Nudepope ma tin to Apotin lọ mẹ adavo wekan-zannu awe lọ lẹ he Mose bẹ do e mẹ to Holẹbi,+ to whenue Jehovah basi alẹnu+ hẹ omẹ Islaeli tọn lẹ dile yé tọ́n ja sọn Egipti.+

11 Whenue yẹwhenọ lọ lẹ tọ́njẹgbonu sọn ofi wiwe lọ (na yẹwhenọ he wá lẹpo wẹ ko klan yede do wiwe+ mahopọnna pipli he mẹ yé te),+ 12 hànjitọ Levinu lẹpo+ he yin Asafi+ tọn, Hemani+ tọn, Jedutuni+ tọn, visunnu yetọn lẹ tọn po nọvisunnu yetọn lẹ tọn po do awù he yè yí avọ̀ dagbedagbe do basi lẹ bo hẹn ajogàn, hànjinu okànnọ po ajalẹn lẹ po; yé to ote to whèzẹtẹn-waji agbà lọ tọn bọ yẹwhenọ 120 to apá yetọn bo to opẹ̀n lẹ kún.+ 13 To ojlẹ he mẹ opẹ̀n-kúntọ lẹ po hànjitọ lẹ po to Jehovah pà bo to pẹdona ẹn to pọmẹ, bọ nudidọ opẹ̀n lẹ, ajogàn lẹ po hànjinu okànnọ lẹ po tọn to agayi dile yé to Jehovah pà dọ, “na ewọ yọ́n; owanyi nugbo etọn na gbọṣi aimẹ kakadoi,”+ aslọ gọ́ ohọ̀ lọ mẹ,+ yèdọ ohọ̀ Jehovah tọn. 14 Na aslọ lọ wutu, yẹwhenọ lẹ ma penugo nado nọte bo wà lizọnyizọn yetọn, na gigo Jehovah tọn gọ́ ohọ̀ Jiwheyẹwhe nugbo lọ tọn mẹ.+