Owalọ lẹ
17 Todin, yé zingbejizọnlin gbọn Amfipoli po Apolonia po bo wá Tẹsalonika,+ fie sinagọgu Ju lẹ tọn de te. 2 Enẹwutu, dile e ko yin aṣa Paulu tọn do,+ e biọ họmẹ yì yé dè bo to hoyijlẹdohogo hẹ yé sọn Owe-wiwe lẹ mẹ na gbọjẹzan atọ̀n,+ 3 bo to zẹẹmẹ basi bosọ to didohia gbọn alọdlẹndonu lẹ dali dọ dandan wẹ dọ Klisti ni jiya+ bo fọ́n sọn oṣiọ lẹ mẹ,+ e sọ nọ to didọna yé dọmọ: “Ehe wẹ Klisti lọ, Jesu ehe, yèdọ mẹhe yẹn to lilá na mì.” 4 Taidi kọdetọn de, delẹ to yé mẹ lẹzun yisenọ bo kọnawudopọ hẹ Paulu po Sila po,+ podọ susugege Glẹkinu lẹ tọn he nọ sẹ̀n Jiwheyẹwhe, gọna yọnnu nukundeji delẹ sọ wàmọ ga.
5 Ṣigba, na Ju lẹ jẹ awuwhàn ji wutu,+ yé bẹ mẹylankan he nọ to fuflupé to ahimẹ delẹ pli bo wleawuna gbẹtọgun zingidinọ de bosọ jẹ bẹwlu hẹnwa tòdaho lọ mẹ ji. Yé biọ owhé Jasoni tọn gbè gánnugánnu bo to Paulu po Sila po dín nado dọ̀n yé wá gbẹtọgun he to zingidi ji lọ dè. 6 To whenue yé ma mọ yé, yé dọ̀n Jasoni po mẹmẹsunnu delẹ po wá ogán tòdaho tọn lẹ dè, bo to awhádo dọmọ: “Omẹ ehelẹ he ko hẹn bẹwlu wá gbọn filẹpo tin tofi ga,+ 7 Jasoni ko sọ yí yé di jonọ. Omẹ ehe lẹpo wẹ nọ yinuwa jẹagọdo gbedide Sesali tọn lẹ bo nọ dọ dọ ahọlu devo de tin, yèdọ Jesu.”+ 8 To whenue yé sè onú ehelẹ, gbẹtọgun lọ po ogán tòdaho tọn lẹ po biọ bẹwlu mẹ; 9 podọ to whenue yé ko yí akuẹ mẹtundote tọn he pé sọn Jasoni po mẹhe pò lẹ po si godo, yé tún yé dote.
10 To afọdopolọji, mẹmẹsunnu lẹ do Paulu po Sila po hlan Belea to zánmẹ. To whenue yé jẹ dọ́n, yé biọ sinagọgu Ju lẹ tọn mẹ. 11 Podọ, omẹ ehelẹ yin ayiha dagbenọ hú omẹ Tẹsalonika tọn lẹ, na yé yí jeje daho tlala do kẹalọyi ohó lọ bo nọ yí sọwhiwhe do gbadopọnna Owe-wiwe lẹ egbesọegbesọ nado pọ́n eyin onú ehelẹ yinmọ. 12 Enẹwutu, susu to yé mẹ lẹzun yisenọ, podọ yọnnu Glẹkinu nukundeji delẹ po sunnu delẹ po sọ wàmọ ga. 13 Ṣigba, to whenue Ju Tẹsalonika tọn lẹ sè dọ Paulu ko lá ohó Jiwheyẹwhe tọn to Belea ga, yé wá finẹ nado hẹn agundaho lọ fọnadán podọ nado hẹn bẹwlu wá.+ 14 To whenẹnu, mẹmẹsunnu lẹ do Paulu hlan to afọdopolọji nado yì ohù lọ tó,+ ṣigba Sila po Timoti po gbọṣi finẹ. 15 Ṣigba, mẹhe hodo Paulu lẹ plan ẹn kaka wá Atẹni, podọ to whenue Paulu ko dowẹn yé nado do Sila po Timoti+ po dọ yé ni yawu wá e dè dile e sọgan yọnbasi do godo, yé yì.
16 Todin, dile Paulu to tenọpọn yé to Atẹni, adi do e to whenue e mọdọ tòdaho lọ gọ́ na boṣiọ lẹ. 17 Enẹwutu, e jẹ hoyijlẹdohogo ji to sinagọgu mẹ hẹ Ju lẹ po mẹdevo lẹ po he nọ sẹ̀n Jiwheyẹwhe podọ egbesọegbesọ to ahimẹ hẹ mẹhe e mọ to finẹ lẹ. 18 Ṣigba, delẹ to tamẹnuplọnmẹtọ Epikule* tọn lẹ po Stoiki* tọn lẹ po mẹ jẹ nudọn hẹ ẹ ji, mẹdelẹ sọ to didọ dọ: “Etẹwẹ hówladọtọ ehe jlo na dọ?” Mẹdevo lẹ nọ dọ dọ: “E taidi dọ lilátọ yẹwhe jonọ lẹ tọn de wẹ ewọ.” Ehe yinmọ, na e to wẹndagbe Jesu tọn po fọnsọnku po lá wutu.+ 19 Enẹwutu, yé wle e bo plan ẹn yì Aleopagu,* bo dọmọ: “Be mí sọgan yọ́n nuhe nuplọnmẹ yọyọ he hiẹ to ohó etọn dọ ehe yin ya? 20 Na hiẹ to nuhe otó mítọn lẹ ma ko sè pọ́n lẹ dọ, mí sọ jlo na yọ́n nuhe onú ehelẹ zẹẹmẹdo.” 21 Na nugbo tọn, Atẹninu po jonọ he to finẹ* lẹpo po ma nọ yí whenu he vò na yé lẹ zan na nudevo depope adavo nado nọ to didọ kavi to todoaina onú yọyọ lẹ. 22 Todin, Paulu ṣite to Aleopagu+ lọ ṣẹnṣẹn bo dọmọ:
“Mì omẹ Atẹni tọn lẹ emi, yẹn doayi e go dọ to nulẹpo mẹ, e taidi dọ mì nọ dibusi yẹwhe lẹ* hú lehe mẹdevo lẹ nọ basi do.+ 23 Di apajlẹ, dile yẹn juwajei bo yí sọwhiwhe do to numẹsẹ̀n mìtọn lẹ pọ́n, yẹn tlẹ sọ doayi agbà de go ehe ji yè kàn do dọ ‘Hlan Jiwheyẹwhe Mayọnẹn de.’ Enẹwutu, nuhe mìwlẹ to sinsẹ̀n to mayọnẹn mẹ, ehe wẹ yẹn to lilá na mì. 24 Jiwheyẹwhe he basi aihọn po nuhe tin to e mẹ lẹpo po, yèdọ ewọ lọ he yin Oklunọ olọn po aigba po tọn+ ma nọ nọ̀ tẹmpli he yè yí alọ do basi lẹ mẹ gba;+ 25 mọdopolọ, alọ gbẹtọvi tọn lẹ ma nọ wadevizọn na ẹn taidi dọ e tindo nuhudo nudepope tọn,+ na ewọ lọsu wẹ nọ na gbẹtọ lẹpo ogbẹ̀, gbọfufu+ po nulẹpo po. 26 Ewọ sọ hẹn akọta gbẹtọ tọn lẹpo wá sọn mẹdopo mẹ,+ nado nọ nọ̀ nukunmẹ aigba tọn pete ji,+ ewọ sọ de ojlẹ dide lẹ bosọ na dogbó fie gbẹtọ lẹ na nọ nọ̀ tọn,+ 27 na yé nido dín Jiwheyẹwhe, eyin yé sọgan dín in vẹkuvẹku bo mọ ẹn nugbonugbo,+ dile etlẹ yindọ, na nugbo tọn, ewọ ma dẹn do dopodopo mítọn. 28 Na gbọn ewọ dali wẹ mí tindo ogbẹ̀ bo nọ yì bosọ tin, yèdọ kẹdẹdile delẹ to ohó milomilo-kantọ mìtọn titi lẹ mẹ ko dọ do dọ, ‘Na ovi* etọn wẹ míwlẹ yin ga.’
29 “Enẹwutu, to whenue e yindọ ovi* Jiwheyẹwhe tọn wẹ mí,+ mí ma dona lẹndọ Jiwheyẹwhe taidi sika kavi fataka kavi zannu, yèdọ taidi nude he yè yí alọ do basi gbọn anazọ́n po ayikinkan gbẹtọ tọn po dali gba.+ 30 Na nugbo tọn, Jiwheyẹwhe ko de nukun sọn ojlẹ wunvi tọn enẹlẹ go;+ ṣigba todin, ewọ to lilá na gbẹtọ lẹpo to filẹpo dọ yé dona lẹnvọjọ. 31 Na e ko de azán de he gbè e lẹn nado dawhẹna+ mẹhe nọ nọ̀ aigba ji lẹ to dodo mẹ gbọn dawe de he e ko de dali, e ko sọ na jide gbẹtọ lẹpo gbọn finfọn ẹn sọn oṣiọ lẹ mẹ dali.”+
32 Todin, to whenue yé sè dogbọn fọnsọnku oṣiọ lẹ tọn dali, delẹ to yé mẹ jẹ mẹṣanko ji,+ bọ mẹdevo lẹ sọ to didọmọ: “Mí nasọ vọ́ sè ehe sọn dè we to whedevonu.” 33 Enẹwutu, Paulu jo yé do, 34 ṣigba sunnu delẹ kọnawudopọ hẹ ẹ bo lẹzun yisenọ. Delẹ to yé mẹ wẹ Dionisiu, he yin whẹdatọ de to whẹdatẹn Aleopagu tọn, podọ yọnnu de he nọ yin Damali, mẹdevo lẹ sọ gọna yé.