2 Otànnugbo lẹ

15 Todin, gbigbọ Jiwheyẹwhe tọn wá Azalia visunnu Odẹdi tọn ji. 2 Enẹwutu, e tọ́nyi pé Asa bo dọna ẹn dọmọ: “Asa po omẹ Juda gọna Bẹnjamini tọn lẹpo po emi, mì dotó! Jehovah tin hẹ mì dile e na dẹnsọ bọ mìwlẹ na gbọṣi e dè;+ podọ eyin mì dín in, ewọ na dike bọ mì na mọ ẹn,+ ṣigba eyin mì gbẹ́ ẹ dai, ewọ lọsu na gbẹ́ mì dai.+ 3 Na ojlẹ dindẹn,* Islaeli ko nọ na ede matin Jiwheyẹwhe nugbo lọ, matin yẹwhenọ he nọ plọnnumẹ de, podọ matin osẹ́n.+ 4 Ṣigba, whenue yé lẹkọwa Jehovah Jiwheyẹwhe Islaeli tọn dè to ayimajai yetọn mẹ bo dín in, ewọ dike bọ yé mọ ẹn.+ 5 To ojlẹ enẹlẹ mẹ, mẹde ma sọgan tọ́nwhẹ̀n yì fide awuyẹyẹ-afọyẹyẹ,* na hunyanhunyan sù to mẹhe nọ nọ̀ aigba lọ lẹ ji lẹpo ṣẹnṣẹn. 6 Akọta to akọta gídí podọ tòdaho de to devo gídí, na Jiwheyẹwhe ko yí ayimajai wunmẹ lẹpo do hẹn yé tin to bẹwlu mẹ wutu.+ 7 Ṣigba na mìwlẹ tọn, mì yin huhlọnnọ bo ma gbọjọ blo,+ na azọ́n mìtọn na yin ahọsuna.”

8 Tlolo he Asa sè hogbe ehelẹ po dọdai Odẹdi yẹwhegán lọ tọn po, e wleawuna adọgbigbo bo de boṣiọ hiọawu lẹ sẹ̀ sọn aigba Juda+ po Bẹnjamini po tọn pete ji podọ sọn tòdaho he e ko yí to lẹdo osó tọn Eflaimi tọn mẹ lẹ mẹ, e sọ vọ́ agbà Jehovah tọn he to atọ̀họ̀ Jehovah tọn nukọn lọ jlado.+ 9 Humọ, e bẹ omẹ Juda po Bẹnjamini po tọn lẹpo pli gọna mẹhe to jonọ-gbéji he topọ hẹ yé lẹ, yèdọ sọn Eflaimi, Manasse po Simeoni po,+ na susu to mẹhe to jonọ-gbéji ehelẹ mẹ wẹ ko họ̀n sọn Islaeli wá e dè to whenue yé mọdọ Jehovah Jiwheyẹwhe etọn tin hẹ ẹ. 10 Yé sọ bẹ yede pli dopọ do Jelusalẹm to osun atọ̀ntọ owhe 15tọ gandudu Asa tọn mẹ. 11 To gbenẹgbe, yé yí oyìn 700 po lẹngbọ 7 000 po do sanvọ́ hlan Jehovah sọn ogblànnu he yé ko bẹ lẹ mẹ. 12 Humọ, yé biọ alẹnu de mẹ nado nọ yí ahun yetọn lẹpo po alindọn* yetọn lẹpo po do dín Jehovah Jiwheyẹwhe tọgbo yetọn lẹ tọn.+ 13 Mẹdepope he ma na dín Jehovah Jiwheyẹwhe Islaeli tọn dona yin hùhù, vlavo yọpọ kavi mẹho, sunnu kavi yọnnu.+ 14 Enẹwutu, yé yí ogbè lélé, awhágbe ayajẹ tọn gọna nudidọ opẹ̀n po azò lẹ po tọn do whlé hlan Jehovah. 15 Omẹ Juda tọn lẹpo sọ jaya na whiwhle lọ tọn wutu, na ahun yetọn lẹpo wẹ yé yí do basi whiwhle lọ podọ yé dín in vẹkuvẹku bọ ewọ dike bọ yé mọ ẹn,+ Jehovah sọ zindonukọn nado to gbọjẹ na yé sọn awà lẹpo ji.+

16 Asa ahọlu lọ tlẹ sọ de Maaka+ onọ̀-daho etọn sẹ̀ sọn otẹn ahọsi daho tọn mẹ, na ewọ ko basi boṣiọ gblezọn de na sinsẹ̀n-bibasi na dòtin wiwe* lọ.+ Asa sán boṣiọ gblezọn etọn liai bo gbà ẹ hányán bosọ mẹ̀ ẹn to Agbàdo Kidlọni tọn mẹ.+ 17 Ṣigba, ofi yiaga lẹ ma yin didesẹ+ sọn Islaeli.+ Etomọṣo, ahun Asa tọn yin pipé* to gbẹzan* etọn lẹpo mẹ.+ 18 E sọ bẹ nuhe ewọ po otọ́ etọn po ko klandowiwe lẹ wá ohọ̀ Jiwheyẹwhe nugbo lọ tọn mẹ—yèdọ fataka, sika po nuyizan voovo lẹ po.+ 19 Awhàn depope masọ yin fùnfùn kakajẹ owhe 35tọ gandudu Asa tọn mẹ.+