2 Otànnugbo lẹ
26 Enẹgodo, omẹ Juda tọn lẹpo de Uzia+ he tindo owhe 16 bo yí i do doahọlu do otọ́ etọn Amazia tẹnmẹ.+ 2 Ewọ vọ́ Elọti+ gbá bo gọ̀ ẹ jo na Juda to whenue ahọlu lọ* ko yin hinhẹn nado mlọnai hẹ tọgbo etọn lẹ godo.+ 3 Owhe 16 wẹ Uzia+ tindo to whenue e duahọlu, e sọ dugán to Jelusalẹm na owhe 52. Oyín onọ̀ etọn tọn wẹ Jekolia Jelusalẹm tọn.+ 4 E zindonukọn nado to nuhe sọgbe to nukun Jehovah tọn mẹ lẹ wà, kẹdẹdile otọ́ etọn Amazia ko wà do.+ 5 Podọ e zindonukọn nado to Jiwheyẹwhe dín to azán Zekalia tọn lẹ gbè, yèdọ mẹhe plọn ẹn nado nọ dibusi Jiwheyẹwhe nugbo lọ. To ojlẹ he mẹ e dín Jehovah, Jiwheyẹwhe nugbo lọ hẹn ẹn tindo kọdetọn dagbe.+
6 E tọ́nyi bo hoavùn sọta Filistinu+ lẹ bosọ gbà adó biọ Gati,+ Jabnẹ+ po Aṣidọdi+ po. Enẹgodo, e gbá tòdaho lẹ do aigba Aṣidọdi tọn ji podọ to Filistinu lẹ ṣẹnṣẹn. 7 Jiwheyẹwhe nugbo lọ sọ zindonukọn nado to alọgọna ẹn sọta Filistinu lẹ, sọta Alabianu+ he nọ nọ̀ Gulibaali lẹ, podọ sọta Mẹunimi lẹ. 8 Amọninu+ lẹ jẹ takuẹ sú na Uzia ji. Yindidi etọn wá gbàpe kaka yì Egipti, na e lẹzun huhlọnnọ taun wutu. 9 Humọ, Uzia gbá atọ̀họ̀ lẹ+ do Jelusalẹm to Họngbo Lọnglọnẹnmẹ tọn kọ̀n,+ to Họngbo Agbàdo tọn lọ kọ̀n+ podọ to Azò lọ kọ̀n, e sọ hẹn yé lodo. 10 Gbọnvona enẹ, e gbá atọ̀họ̀+ lẹ do danfafa lọ ji bo kùn* osindò susu (na e tindo kanlin-yìnyìn susugege); e sọ wà nudopolọ to Ṣefela podọ to dankló* lọ ji. E tindo glesi lẹ po vẹngle-zọ́nwatọ lẹ po to osó lẹ ji podọ to Kalmẹli, na e yiwanna glelilẹ.
11 Humọ, Uzia sọ bẹ awhànfuntọ he sọawhànnu lẹ pli. Yé nọ yì funawhàn podọ yé yin mimá do pipli lẹ mẹ. Yé yin hihia bo yin titodohukanji+ gbọn Jeiẹli wekantọ lọ+ po Maaseia anademẹtọ lọ po dali, to anademẹ Hanania he yin dopo to ahọvi ahọlu tọn lẹ mẹ tọn glọ. 12 Sọha nukọntọ whédo otọ́ yetọn lẹ tọn lẹ, yèdọ mẹhe to anadena awhànfuntọ huhlọnnọ ehelẹ pete tọn wẹ 2 600. 13 Awhànfuntọ he sọawhànnu bo to anademẹ yetọn glọ lẹ wẹ sunnu 307 500 he ko wleawufo na awhàn, yèdọ awhànpa huhlọnnọ de he na nọgodona ahọlu sọta kẹntọ.+ 14 Uzia sọ wleawu awọ̀yinu, owhán,+ ogangbakun, gbaja linlọ̀n,+ ogá po akòtopẹ́+ po tọn na awhànpa lọ blebu. 15 Humọ, e yí sunnu azọ́nyọnẹntọ lẹ zan nado basi zomọ awhàn tọn lẹ to Jelusalẹm; yé yin zizedo atọ̀họ̀ lẹ ji+ podọ to agosu lẹ mẹ to adó lẹ ji bo sọgan de ogá lẹ bosọ dlan zannu daho lẹ. Enẹwutu, yindidi etọn gbàpe gbọn filẹpo, na e mọ alọgọ yí taun bo lẹzun huhlọnnọ.
16 Ṣigba, tlolo he ewọ yin huhlọnnọ, e lẹzun saklanọ to ahun mẹ na vasudo edetiti tọn bo yinuwa po nugbonọ-mayin po sọta Jehovah Jiwheyẹwhe etọn gbọn tẹmpli Jehovah tọn mẹ bibiọ nado mẹ̀ nuyọnwan to agbà nuyọnwan tọn+ ji dali. 17 To afọdopolọji, Azalia yẹwhenọ lọ po yẹwhenọ Jehovah tọn adọgbotọ 80 devo lẹ po dómọna ẹn biọ họmẹ. 18 Yé gbẹnuna Ahọlu Uzia bo dọna ẹn dọmọ: “E ma jẹ dọ hiẹ Uzia ni mẹ̀ nuyọnwan na Jehovah!+ Yẹwhenọ lẹ kẹdẹ wẹ dona nọ mẹ̀ nuyọnwan, na yewlẹ wẹ yin kúnkan Aalọn tọn lẹ,+ yèdọ mẹhe ko yin kinklandowiwe lẹ. Tọ́n sọn fiwiwe lọ, na hiẹ ko yinuwa po nugbonọ-mayin po, podọ hiẹ ma na mọ gigo depope sọn Jehovah Jiwheyẹwhe dè na ehe.”
19 Ṣigba, Uzia he hẹn nuwhẹ́nwan-gbán de do alọmẹ nado mẹ̀ nuyọnwan biọ adi mẹ;+ podọ dile e gbẹ́ to adidu sọta yẹwhenọ lẹ wẹ e bẹ pòzọ̀n+ do ota etọn nukọn to yẹwhenọ lọ lẹ nukọn to ohọ̀ Jehovah tọn mẹ to agbà nuyọnwan tọn lọ pá. 20 Whenue Azalia yẹwhenọgán lọ po yẹwhenọ lọ lẹpo po lẹkọ pọ́n ẹn, yé mọdọ e ko yin hihò gbọn pòzọ̀n dali to ota etọn nukọn! Enẹwutu, yé sisẹ́ ẹ sọn finẹ bọ ewọ lọsu yawu tọ́n, na Jehovah ko hò e wutu.
21 Ahọlu Uzia sọ yin pòtọnọ kakajẹ okú zangbe etọn, e sọ nọ nọ̀ ohọ̀ he yin kinklandovo de mẹ taidi pòtọnọ,+ na e ko yin yinyan sọn ohọ̀ Jehovah tọn mẹ. Jotami visunnu etọn wẹ nọ penukundo owhé* ahọlu tọn go bo nọ dawhẹna mẹhe to aigba lọ ji lẹ.+
22 Otàn Uzia tọn he pò, sọn bẹjẹeji kakajẹ vivọnu, yin kinkandai gbọn yẹwhegán Isaia+ visunnu Amọzi tọn dali. 23 Uzia sọ yin hinhẹn nado mlọnai hẹ tọgbo etọn lẹ, yé sọ dì i dopọ hẹ tọgbo etọn lẹ, ṣigba to aigba ṣiọdidi tọn ahọlu lẹ tọn ji, na yé dọ dọ: “Pòtọnọ de wẹ.” Visunnu etọn Jotami+ sọ lẹzun ahọlu do otẹn etọn mẹ.