Owalọ lẹ

18 To ehe godo, Paulu tọ́n sọn Atẹni bo wá Kọlinti. 2 E sọ mọ Ju de he nọ yin Akuila,+ he yin Pọntu-vi jiji he wá sọn Itali to agọe po Pliskila asi etọn po, na Klaudiu ko degbena Ju lẹpo nado tọ́n sọn Lomu wutu. Enẹwutu, e yì yé dè, 3 podọ na yé yin azọ́n dopolọ watọ wutu, e nọ owhé yetọn gbè bo wazọ́n hẹ yé,+ na gòhọ-gbátọ lẹ wẹ yé. 4 E nọ dọ togunmẹho* to sinagọgu mẹ+ to gbọjẹzangbe lẹpo+ bo nọ diọlinlẹnna Ju lẹ po Glẹkinu lẹ po.

5 Todin, to whenue Sila+ po Timoti+ po jẹte wá sọn Makedonia, Paulu jẹ alọnu etọn hẹn ján ji petepete to ohó lọ didọ mẹ bo to kunnude na Ju lẹ nado dohia dọ Jesu wẹ Klisti lọ.+ 6 Ṣigba, to whenue yé zindonukọn nado to nukundiọsọ ẹ bo to zunzun in, e húnhún awù etọn lẹ+ bo dọna yé dọmọ: “Ohùn mìtọn ni nọ okọ̀ na mì.+ Okọ̀ ṣie wé.+ Sọn din sọyi, yẹn na yì omẹ akọta lẹ tọn dè.”+ 7 Enẹwutu, e sẹtẹn sọn finẹ* bo yì owhé dawe de he nọ yin Titiu Justu tọn gbè, yèdọ Jiwheyẹwhe sẹ̀ntọ de, mẹhe owhé etọn bọdo sinagọgu lọ go. 8 Ṣigba, Klispu+ he yin ogán sinagọgu tọn lẹzun yisenọ to Oklunọ mẹ gọna whédo etọn lẹpo. Susu Kọlintinu lẹ tọn he sè sọ yise bo yin bibaptizi. 9 Humọ, Oklunọ dọna Paulu to numimọ de mẹ to zánmẹ dọmọ: “A dibu blo, ṣigba zindonukọn nado to hodọ, a sọ nabọẹ blo, 10 na yẹn tin hẹ we+ podọ mẹdepope ma na yangbé towe nado gbleawuna we; na yẹn gbẹ́ tindo mẹsusu to tòdaho ehe mẹ.” 11 Enẹwutu, e gbọṣi finẹ na owhe dopo po osun ṣidopo po bo to ohó Jiwheyẹwhe tọn plọnmẹ to ṣẹnṣẹn yetọn.

12 To ojlẹ he mẹ Galio yin ayimatẹn-gán* Akaia tọn, Ju lẹ fọ́n do Paulu ji to pọmẹ bo plan ẹn yì whẹdaján nukọn 13 bo dọmọ: “Dawe ehe to linlẹndiọna gbẹtọ lẹ nado sẹ̀n Jiwheyẹwhe to aliho he jẹagọdo osẹ́n otò lọ tọn mẹ.” 14 Ṣigba, dile Paulu jlo na dọho, Galio dọna Ju lẹ dọmọ: “Mì Ju lẹ emi, na nugbo tọn, eyin oylan de kavi sẹ́nhẹngba sinsinyẹn de wẹ, e na ko sọgbe hẹ lẹnpọn dagbe nado dotoaina mì po sọwhiwhe po. 15 Ṣigba, eyin nudindọn lẹ gando hodidọ, oyín lẹ po osẹ́n mìtọn titi po go wẹ,+ mìlọsu ni penukundego. Yẹn ma jlo na yin whẹdatọ onú ehelẹ tọn gba.” 16 Enẹwutu, e yàn yé sọn whẹdaján lọ nukọn. 17 To whenẹnu, yemẹpo wle Sọstene,+ ogán sinagọgu tọn lọ bo jẹ hihò e ji to whẹdaján lọ nukọn. Amọ́, Galio ma kẹnù do onú ehelẹ mẹ paali.

18 Ṣigba, to whenue Paulu ko nọ finẹ na azán delẹ dogọ, e dọ e yì whedenu na mẹmẹsunnu lẹ bo do tọjihun dedo Silia, Pliskila po Akuila po sọ zọnhẹ ẹ. E sọ pà oda etọn yìdo to Kẹnklea,+ na ewọ ko dopà de wutu. 19 Enẹwutu, to whenue yé jẹ Efesu, e jo yé do finẹ bo biọ sinagọgu mẹ bosọ yihojlẹdohogo hẹ Ju lẹ.+ 20 Dile yé tlẹ to bibiọ to e si mapote nado gbọṣi finẹ hugan mọ, e ma yigbe, 21 ṣigba e dọ e yì whedenu bo dọna yé dọmọ: “Yẹn na vọ́ lẹkọwa mì dè, eyin Jehovah* jlo.” E sọ súnhún sọn Efesu 22 bo jẹte wá Sesalea. E sọ hẹji yì Jelusalẹm bo dọnudo agun lọ, bosọ jẹte yì Antioku.+

23 To whenue e ko nọ finẹ na ojlẹ de, e tọ́n sọn finẹ bo nọ yì sọn fide jẹ fide to otò Galatia po Fligia po tọn mẹ+ bosọ nọ to devi lẹpo hẹn lodo.+

24 Todin, Ju de he nọ yin Apolo,+ Alẹkzandli-vi jiji de, wá Efesu; e didẹ́ bosọ yọ́n Owe-wiwe lẹ ganji. 25 Aliho Jehovah* tọn ko yin pinplọn dawe ehe,* podọ na e ‘hunzo to gbigbọ-liho’ wutu, e to hodọ bo to mẹplọn to aliho he sọgbe mẹ gando Jesu go, ṣigba baptẹm Johanu tọn kẹdẹ wẹ e jẹakọ hẹ. 26 E sọ jẹ hodọ ji po adọgbigbo po to sinagọgu mẹ, podọ to whenue Pliskila po Akuila po+ sè ohó etọn, yé dọ̀n ẹn do ogbẹ́ mẹ bo hẹn aliho Jiwheyẹwhe tọn họnwun na ẹn to aliho he sọgbe mẹ dogọ. 27 Humọ, na e jlo nado yì Akaia wutu, mẹmẹsunnu lẹ kanwehlan devi lẹ bo dotuhomẹna yé nado yí i po homẹdagbe po. Enẹwutu, to whenue e jẹ dọ́n, e gọalọ tlala na mẹhe ko lẹzun yisenọ gbọn nukundagbe majẹhẹ Jiwheyẹwhe tọn dali lẹ; 28 na e yí zohunhun tlala do dohia hezeheze to gbangba dọ owhẹ̀ Ju lẹ tọn ma whẹ́n, dile e nọ to didohia yé sọn Owe-wiwe lẹ mẹ dọ Jesu wẹ Klisti lọ.+