1 Kọlintinu lẹ
11 Mì nọ hodo apajlẹ ṣie, kẹdẹdile yẹn nọ hodo Klisti tọn do.+
2 Yẹn pà mì, na mì nọ flin mi to nulẹpo mẹ podọ mì nọ tẹdo aṣa lẹ go gligli kẹdẹdile yẹn ze yé do alọmẹ na mì do. 3 Ṣigba, yẹn jlo dọ mì ni yọnẹn dọ Klisti wẹ ota sunnu dopodopo tọn;+ podọ sunnu wẹ ota yọnnu tọn;+ podọ Jiwheyẹwhe wẹ ota Klisti tọn.+ 4 Sunnu depope he to dẹ̀ho kavi to dọdai dọ bo ṣinyọnnudo ota, dowinyan ota etọn; 5 ṣigba yọnnu depope he to dẹ̀ho kavi to dọdai dọ+ bo ma ṣinyọnnudo ota, dowinyan ota etọn, na e yin nudopolọ taidi eyin yọnnu de whlẹ́ ota. 6 Na eyin yọnnu de ma nọ ṣinyọnnudo ota, ewọ ni bo pà oda etọn; ṣigba eyin winyannu wẹ e yin na yọnnu de nado pà oda kavi whlẹ́ ota, ewọ ni bo ṣinyọnnudo ota.
7 Na e ma jẹ dọ sunnu ni ṣinyọnnudo ota, na apajlẹ po gigo Jiwheyẹwhe tọn+ po wẹ ewọ yin wutu, ṣigba yọnnu wẹ gigo sunnu tọn. 8 Na sunnu ma wá sọn yọnnu mẹ, ṣigba yọnnu wẹ wá sọn sunnu mẹ.+ 9 Podọ humọ, sunnu ma yin didá na yọnnu wutu, ṣigba yọnnu na sunnu.+ 10 Enẹwutu wẹ e jẹ dọ yọnnu ni tindo ohia mẹmẹglọ tọn de to ota, na angẹli lẹ wutu.+
11 Etomọṣo, to kọndopọ mẹ hẹ Oklunọ, yọnnu ma tin matin sunnu, mọjanwẹ sunnu ma tin matin yọnnu do niyẹn. 12 Na kẹdẹdile yọnnu wá sọn sunnu mẹ do,+ mọdopolọ wẹ sunnu wá gbọn yọnnu gblamẹ do; ṣigba Jiwheyẹwhe dè wẹ nulẹpo wá sọn.+ 13 Mìlọsu lẹ ni lẹnpọn: Be e jẹ dọ yọnnu ni hodẹ̀ hlan Jiwheyẹwhe matin nuṣinyọndo ota ya? 14 Be mì ma ko plọn to jọwamọ-liho dọ winyan wẹ e yin na sunnu nado tindo oda gaa, 15 ṣigba eyin yọnnu tindo oda gaa, gigo wẹ e yin na ẹn ya? Na oda wẹ yin nina ẹn do otẹn tabla tọn mẹ. 16 Ṣigba, eyin mẹde jlo na dọnnu nado nọgodona aṣa devo lẹ, míwlẹ ma tindo devo, mọjanwẹ agun Jiwheyẹwhe tọn lẹ lọsu ga.
17 Ṣigba, dile yẹn to anademẹ ehelẹ na, yẹn ma pà mì, na pipli dopọ mìtọn nọ hẹnnugble hú nado jla onú do. 18 Na jẹnukọn whẹ́, yẹn sè dọ eyin mì pli dopọ to agun de mẹ, kinklan lẹ nọ tin to ṣẹnṣẹn mìtọn; yẹn sọ yí i sè jẹ obá de mẹ. 19 Na e họnwun dọ hagbẹ klandovo lẹ na tin to ṣẹnṣẹn mìtọn,+ na mẹhe yin alọkẹyi to mì mẹ lẹ nido sọgan họnwun to ṣẹnṣẹn mìtọn ga.
20 Eyin mì pli dopọ do fidopo, e ma nọ yin nado dù Tenu-Núdùdù Oklunọ tọn na taun tọn gba.+ 21 Na to whenue mì to dùdù i, mẹdopodopo nọ dù núdùdù whèjai tọn etọn titi jẹnukọn, bọ huvẹ nọ to mẹde hù ṣigba mẹdevo ko nọ nùmú. 22 Be mì ma tindo owhé mìtọn lẹ he gbè mì sọgan dù bo nù te wẹ? Kavi agun Jiwheyẹwhe tọn vlẹ wẹ mì te bo to winyando mẹhe ma tindo nude lẹ ya? Etẹwẹ yẹn na dọna mì? Be yẹn ni pà mì wẹ? Yẹn ma pà mì to ehe mẹ gba.
23 Na nuhe yẹn mọyi sọn Oklunọ lọ dè wẹ yẹn ko sọ zedo alọmẹ na mì, dọ to ozán+ he mẹ Oklunọ Jesu na yin didehia, e yí akla de, 24 podọ to whenue e ko dopẹ́ godo, e wẹ́n ẹn bo dọmọ: “Ehe nọtena agbasa ṣie+ he yin nina do ota mìtọn mẹ. Mì nọ wà ehe to oflin ṣie mẹ.”+ 25 E wà nudopolọ gando kọfo+ lọ go ga, to whenue yé ko dù tenu-núdùdù lọ godo bo dọmọ: “Kọfo ehe nọtena alẹnu yọyọ lọ+ to dodonu ohùn ṣie tọn ji.+ Mì nọ wà ehe, to whedepopenu he mì to nùnù in, to oflin ṣie mẹ.”+ 26 Na whedepopenu he mì to akla ehe dù bo to kọfo ehe nù, mì to okú Oklunọ tọn lá kaka e nado wá.
27 Enẹwutu, mẹdepope he nọ dù akla lọ kavi nọ nù kọfo Oklunọ tọn lọ to aliho agọ̀ mẹ na hùwhẹ gando agbasa po ohùn Oklunọ tọn po go. 28 Jẹnukọn whẹ́, mì gbọ ewọ ni gbeje ede pọ́n kitokito eyin e jẹ,+ podọ to whenẹnu kẹdẹ wẹ ewọ ni dù akla lọ bo nù kọfo lọ. 29 Na mẹhe nọ dù bo nọ nù ṣigba bo ma yọ́n nuhe agbasa lọ nọtena, ewọ dù bosọ nù whẹgbledo sọta ede. 30 Enẹwutu wẹ mẹsusu to mì mẹ yin madogánnọ bo to azọ̀njẹ, bọ omẹ vude to amlọndọ to okú mẹ.*+ 31 Ṣigba, eyin mí yọ́n mẹhe nkọ mílọsu lẹ yin, mí ma na yin whẹdana. 32 Etomọṣo, eyin mí yin whẹdana, Jehovah* wẹ domẹplọnlọ mí go,+ na mí nikaa yin whẹgbledo hẹ aihọn lọ.+ 33 Enẹwutu, mẹmẹsunnu ṣie lẹ emi, to whenue mì pli dopọ nado dù i, mì nọ nọtepọn ode awetọ. 34 Eyin huvẹ to mẹde hù, mì gbọ ewọ ni dùnú to whégbè, bọ to whenue mì pli dopọ, mì ma nado yin whẹgbledo.+ Ṣigba, na nuhe dù whẹho he pò lẹ, yẹn na didẹ yé to whenue yẹn na wá.