Owalọ lẹ
16 Enẹwutu, e wá Delbe podọ Listla ga.+ Devi de sọ tin to finẹ he nọ yin Timoti,+ yèdọ visunnu nawe Juvi yisenọ de tọn, ṣigba otọ́ etọn yin Glẹkinu de, 2 podọ mẹmẹsunnu he to Listla po Ikonioni po lẹ nọ dekunnu etọn dagbe. 3 Paulu do ojlo hia nado hẹn Timoti sọyi, e sọ plan ẹn bo gboadà na ẹn na Ju he tin to ofi enẹlẹ wutu,+ na yemẹpo wẹ yọnẹn dọ Glẹkinu de wẹ otọ́ etọn. 4 Dile yé to gbejizọnlinzin gbọn tòdaho lọ lẹ mẹ, yé nọ dọ gbèta he kọ̀n apọsteli lẹ po mẹho he to Jelusalẹm lẹ po ko wá lẹ na yé, na yé nido nọ setonuna.+ 5 Enẹwutu, na nugbo tọn, agun lẹ to yinyin hinhẹn lodo zọnmii bo to jijideji to sọha mẹ egbesọegbesọ.
6 Humọ, yé zingbejizọnlin gbọn Fligia po otò Galatia tọn po mẹ,+ na gbigbọ wiwe gbẹ́ na yé ma nado dọ ohó lọ to ayimatẹn Asia tọn ji. 7 Mọdopolọ, to whenue yé wá Misia, yé dovivẹnu nado yì Bitinia,+ ṣigba gbigbọ Jesu tọn ma dike na yé. 8 Enẹwutu, yé jugbọn Misia bo wá Tloa. 9 Paulu sọ mọ numimọ de to zánmẹ—dawe Makedonianu de tin to ote to finẹ bo to vivẹ̀ ẹ bosọ to didọmọ: “Wá Makedonia bo gọalọna mí.” 10 Tlolo he e mọ numimọ lọ, mí tẹnpọn nado yì Makedonia, na mí mọdọ Jiwheyẹwhe wẹ ko ylọ mí nado lá wẹndagbe lọ na yé.
11 Enẹwutu, mí súnhún sọn Tloa bo zọ̀n tlọlọ wá Samotlaki, ṣigba to aihọngbè, mí yì Neapoli; 12 podọ sọn finẹ mí yì Filipi,+ yèdọ tòdaho he tin to Lomu glọ de, he yin tòdaho nukundeji agbegbe Makedonia tọn. Mí gbọṣi tòdaho enẹ mẹ na azán delẹ. 13 Podọ to Gbọjẹzangbe, mí tọ́nyi gbonu họngbo lọ tọn to tọ̀sisa de tó, fihe mí lẹndọ e yin nọtẹn dẹ̀hiho tọn de, mí sọ sinai bo jẹ hodọna yọnnu he ko pli do finẹ lẹ ji. 14 Podọ yọnnu de he nọ yin Lidia, sopẹ́-vọ̀ sàtọ de, he wá sọn tòdaho Tiatila+ tọn mẹ bo nọ sẹ̀n Jiwheyẹwhe to todoai, Jehovah* sọ hùn ahun etọn nado na ayidonugo nuhe dọ Paulu te lẹ. 15 Todin, to whenue ewọ po whédo etọn po ko yin bibaptizi,+ e vẹ̀ mí dọmọ: “Eyin mìwlẹ mọdọ yẹn yin nugbonọ na Jehovah,* mì wá nọ owhé ṣie gbè.” E sọ vẹ̀ mí nado wá.
16 Todin, to whenue mí jei fie yè nọ hodẹ̀ te, deviyọnnu de he tindo gbigbọ aovi dọṣẹdidọ tọn+ de pé mí. E ko nọ hẹn ale susu wá na ogán etọn lẹ gbọn dọṣẹdidọ* dali. 17 Viyọnnu ehe to hihodo míwlẹ po Paulu po mapote bo nọ to awhádo dọmọ: “Afanumẹ Jiwheyẹwhe Gigogán lọ tọn lẹ wẹ dawe ehelẹ,+ yé sọ to aliho whlẹngán tọn lọ lá na mì.” 18 E to ehe wà na azán susu. To godo mẹ, agbọ́ etọn pé Paulu bọ e lẹ́ bo dọna gbigbọ lọ dọmọ: “Yẹn degbedo we to oyín Jesu Klisti tọn mẹ nado tọ́njẹgbonu sọn ewọ mẹ.” E sọ tọ́njẹgbonu to gànhiho enẹ mẹ.+
19 Todin, to whenue ogán etọn lẹ mọdọ todido ale yetọn tọn ko yì,+ yé wle Paulu po Sila po bo dọ̀n yé yì ogán lẹ dè to ahimẹ.+ 20 To whenue yé dọ̀n yé yì ogán otò tọn lẹ dè, yé dọmọ: “Dawe ehelẹ to bẹwlu hẹnwa tòdaho mítọn mẹ taun.+ Ju lẹ wẹ yé, 21 bọ yé sọ to aṣa delẹ lá, ehe e ma sọgbe hẹ osẹ́n dọ míwlẹ ni kẹalọyi kavi hodo, to whenuena e yindọ Lomunu lẹ wẹ mí.” 22 Gbẹtọgun lọ sọ fọ́n do yé ji to pọmẹ, podọ to whenue ogán otò tọn lẹ ko tlẹ́n awù yetọn lẹ sọn yé go, yé degbe dọ yè ni yí opò do hò yé.+ 23 To whenue yé ko linú yé whlasusu godo, yé ze yé dlan gànpamẹ bo degbena gàntọ-ṣọ́tọ lọ nado nọ ṣọ́ yé ganji.+ 24 Na e mọ gbedide mọnkọtọn yí wutu, e ze yé dlan gànpa ṣẹnṣẹn tọn lọ mẹ bo bẹ afọ yetọn lẹ do osópò lẹ mẹ.
25 Ṣigba, to nudi zángbodawe mẹ, Paulu po Sila po to dẹ̀ho bo yí ohàn do to Jiwheyẹwhe pà;+ gàntọ lẹ sọ to todoaina ogbè yetọn. 26 To ajiji mẹ, aigba sisọsisọ daho de jọ, sọmọ bọ dodonu gànpa lọ tọn lẹ whàn. Humọ, ohọ̀n lọ lẹpo hùn to afọdopolọji, gẹdẹ yemẹpo tọn sọ wẹ́n.+ 27 To whenue gàntọ-ṣọ́tọ lọ fọ́n sọn amlọn mẹ bo mọ ohọ̀n gànpa lọ tọn lẹ to hùnhùn, e dọ̀n ohí etọn sún bo jlo na hù ede, na e lẹndọ gàntọ lọ lẹ ko họnyi.+ 28 Ṣigba, Paulu yí ogbè lélé do dawhá dọmọ: “A gbleawuna dewe blo, na mímẹpo tofi!” 29 Enẹwutu, e biọ miyọ́ngbán bo họ̀nwezun biọ ohọ̀ lọ mẹ podọ, na obu jẹ e ji wutu, e jẹklo to Paulu po Sila po nukọn. 30 E sọ plan yé jẹgbonu bo dọmọ: “Mẹdaho lẹ emi, etẹwẹ yẹn dona wà nado yin whinwhlẹngán?” 31 Yé dọmọ: “Yise to Oklunọ Jesu mẹ, podọ hiẹ na yin whinwhlẹngán, hiẹ po whédo towe po.”+ 32 Yé sọ dọ ohó Jehovah* tọn na ewọ po mẹhe tin to owhé etọn gbè lẹpo po. 33 Ewọ sọ plan yé to gànhiho ozán lọ tọn enẹ mẹ bo klọ́ apà yetọn lẹ. Enẹgodo, ewọ po whédo etọn blebu po sọ yin bibaptizi matin gbàndindọn.+ 34 E sọ plan yé wá owhé etọn gbè bo bẹ núdùdù do tafo ji na yé, ewọ sọ jaya tlala hẹ whédo etọn pete todin he e ko yise to Jiwheyẹwhe mẹ.
35 To aihọngbè, ogán otò tọn lẹ do ponọ-zọ́nwatọ lẹ hlan nado yì bo dọ: “Tún dawe enẹlẹ dote.” 36 Gàntọ-ṣọ́tọ lọ dọ nuhe yé dọ lẹ na Paulu dọmọ: “Ogán otò tọn lẹ ko domẹhlan dọ mì omẹ awe lẹ ni yin tuntundote. Enẹwutu, todin, mì tọ́n bo yì to jijọho mẹ.” 37 Ṣigba, Paulu dọna yé dọmọ: “Yé hò mí to gbangba matin whẹgbledomẹ,* dile etlẹ yindọ míwlẹ yin Lomunu lẹ,+ podọ yé sọ ze mí dlan gànpamẹ. Todin be túntún mí dote to nuglọ wẹ yé te ya? Gbede pọ́n! Mì gbọ yelọsu ni wá bo plan mí tọ́n.” 38 Ponọ-zọ́nwatọ lọ lẹ dọ onú ehelẹ na ogán otò tọn lẹ. Obu sọ di yé to whenue yé sè dọ dawe lọ lẹ yin Lomunu lẹ.+ 39 Enẹwutu, yé wá bo vẹ̀ yé, podọ to whenue yé ko plan yé tọ́n, yé biọ to yé si nado tọ́n sọn tòdaho lọ mẹ. 40 To whenue yé tọ́n sọn gànpa lọ mẹ, yé yì owhé Lidia tọn gbè; podọ to whenue yé mọ mẹmẹsunnu lẹ, yé na tuli yé+ bosọ yì.