Jobu
8 Enẹgodo, Bildadi+ Ṣuahinu+ lọ dọna ẹn dọmọ:
2 “Nawẹ e na dẹnsọ bọ hiẹ na to hodọ dole?+
Ohó he to tintọ́n sọn onù towe mẹ lẹ ma yin nudevo hú jẹhọn sinsinyẹn de poun!
3 Be Jiwheyẹwhe na gada whẹdida wẹ,
Kavi be Ganhunupotọ lọ na sọtadona dodowiwa wẹ?
4 Eyin visunnu towe lẹ ko waylando do e,
Be atẹṣiṣi yetọn wutu wẹ ewọ do dike bọ yé yin yasana;*
5 Ṣigba, eyin hiẹ kúkú gbọ bo lẹhlan Jiwheyẹwhe+
Bo biọ nukundagbe Ganhunupotọ lọ tọn vẹkuvẹku,
6 Podọ eyin hiẹ yin omẹ wiwe po nugbonọ de po nugbonugbo,+
Ewọ na dotoaina we*
Bo na gọ̀ we do otẹn towe hoho lọ mẹ.
7 Podọ mahopọnna dọ hiẹ ma tindo nude to bẹjẹeji,
Hiẹ na lẹzun adọkunnọ taun to sọgodo.+
8 Jaale, kanhose whẹndo he wayi lẹ,
Bo na ayidonugo dodinnanu otọ́ yetọn lẹ tọn.+
9 Na osọ fi poun wẹ míwlẹ yin jiji, bọ mí ma yọ́n nude,
Na azán mítọn lẹ to aigba ji taidi oyẹ̀ de.
10 Be yewlẹ ma na plọn we
Bo dọ nuhe yé yọnẹn na we ya?*
11 Be ofán papilus tọn sọgan whẹ́n yiaga to fihe ogbà ma tin te ya?
Be ofán sọgan whẹ́n yiaga matin osin ya?
12 To whenue e ṣẹṣẹ jọ amà, bo ma ko yin winwẹ́n sẹ̀,
E na fiọ jẹnukọnna atin devo depope.
13 Nuhe nọ wá jọ do* mẹhe wọn Jiwheyẹwhe lẹpo go niyẹn,
Na todido omẹ jijọ-madi-Jiwheyẹwhe* lẹpo tọn wẹ na sudo,
14 Yèdọ mẹhe todido yetọn yin to ovọ́ mẹ lẹ
Podọ mẹhe jidide yetọn ma lodo bo taidi adọ́* ayẹyẹ de tọn.
15 Ewọ na ganjẹ ohọ̀ etọn go, ṣigba e na họ́jai;
E na tẹnpọn nado tẹdo e go, ṣigba e ma na dẹn-to-aimẹ.
16 Ewọ taidi atin-mú de to owhè nù,
Bọ alà etọn lẹ sọ vùn to jipa mẹ.+
17 Okiti zannu lẹ tọn mẹ wẹ e yìn adọ̀ etọn lẹ do;
E nọ to owhé de dín to zannu lẹ ṣẹnṣẹn.*
18 Ṣigba, eyin adọ̀ etọn yin hinhọ̀nsẹ* sọn otẹn etọn mẹ,
Filọ na gbẹ́ ẹ dai bo na dọ dọ, ‘Yẹn ma ko mọ we pọ́n.’+
20 E họnwun dọ Jiwheyẹwhe ma na gbẹ́ mẹhe gbọṣi tenọgli mẹ* lẹ dai;
Mọjanwẹ e ma na nọgodona* ylanwatọ lẹ do niyẹn,
21 Na e na gbẹ́ yí nukiko do gọ́ onù towe mẹ
Bọ nùflo towe lẹ na dawhá ayajẹ tọn.
22 Mẹhe gbẹwanna we lẹ na gọ́ na winyan,
Gòhọ mẹylankan lẹ tọn nasọ busẹ sọn aimẹ.”