1 Otànnugbo lẹ

13 Davidi dewé hẹ ogán omẹ fọtọ́n lẹ tọn lẹ po omẹ kanweko lẹ tọn lẹ po gọna nukọntọ lẹpo.+ 2 Davidi sọ dọna agun Islaeli tọn blebu dọmọ: “Eyin e yọ́n to nukun mìtọn mẹ podọ eyin e sọgbe to nukun Jehovah Jiwheyẹwhe mítọn tọn mẹ, mì gbọ mí ni dowẹn hlan nọvisunnu mítọn he pò to lẹdo Islaeli tọn lẹpo mẹ lẹ po yẹwhenọ lẹ po gọna Levinu he to tòdaho yetọn lẹ+ po kanlindugbo yetọn lẹ po mẹ lẹ nado wá kọnawudopọ hẹ mí. 3 Podọ mì gbọ mí ni hẹn Apotin+ Jiwheyẹwhe mítọn tọn gọwá.” Na yé ko dovọ́na ẹn to azán Sauli tọn lẹ gbè.+ 4 Agun lọ blebu sọ yigbe nado wàmọ, na e yọ́n to nukun mẹlẹpo tọn mẹ. 5 Enẹwutu, Davidi bẹ Islaeli pete pli, sọn tọ̀sisa* Egipti tọn kọ̀n kaka yì Lebo-hamati,*+ nado ze Apotin Jiwheyẹwhe nugbo lọ tọn wá sọn Kiliati-jealimi.+

6 Davidi po Islaeli pete po hẹji yì Baala+ to Kiliati-jealimi Juda tọn, nado ze Apotin Jiwheyẹwhe nugbo lọ tọn he kọ̀n gbẹtọ lẹ nọ dawhá ylọ oyín etọn te lọ hẹji wá sọn finẹ, yèdọ Apotin Jehovah tọn, mẹhe sinai to ofìn ji to aga* kelubimi lẹ tọn.+ 7 Ṣigba, yé ze Apotin Jiwheyẹwhe nugbo lọ tọn do agbàn-kẹkẹ yọyọ de ji+ bo ze e sọn owhé Abinadabi tọn gbè, Uza po Ahio po sọ to anadena agbàn-kẹkẹ lọ.+ 8 Davidi po Islaeli pete po yí huhlọn yetọn lẹpo do to hùnwhẹ basi to Jiwheyẹwhe nugbo lọ nukọn po ohàn po, gọna ajalẹn lẹ, hànjinu okànnọ devo lẹ, ohún lẹ,+ ajogàn+ lẹ po opẹ̀n+ lẹ po. 9 Ṣigba, whenue yé jẹ likun-flétẹn Kidọni tọn, Uza dlẹnalọ etọn bo hẹn Apotin lọ go, na oyìn lọ lẹ dibla fli i jai wutu. 10 To whenẹnu, Jehovah gblehomẹ do Uza go sinsinyẹn, bọ E hù i to finẹ, na ewọ ko dlẹnalọ etọn hlan Apotin lọ wutu,+ e sọ kú do finẹ to Jiwheyẹwhe nukọn.+ 11 Ṣigba, Davidi gblehomẹ,* na adi Jehovah tọn ko jizò do Uza ji wutu; ofi enẹ sọ nọ yin yiylọdọ Pelẹzi-uza* kakajẹ egbé.

12 Enẹwutu, Davidi dibuna Jiwheyẹwhe nugbo lọ to azán enẹ gbè bo dọmọ: “Nawẹ yẹn sọgan ze Apotin Jiwheyẹwhe nugbo lọ tọn wá dè e gbọn?”+ 13 Davidi masọ hẹn Apotin lọ wá fie ewọ nọ nọ̀ to Tòdaho Davidi tọn mẹ, ṣigba e biọ dọ e ni yin zize yì owhé Obẹdi-edomi Gatinu lọ tọn gbè. 14 Apotin Jiwheyẹwhe nugbo lọ tọn sọ gbọṣi whédo Obẹdi-edomi tọn mẹ bo nọ owhé etọn gbè na osun atọ̀n, bọ Jehovah to didona whédo Obẹdi-edomi tọn po nutindo etọn lẹpo po mapote.+