1 Ahọlu lẹ

19 Enẹgodo, Ahabi+ dọ nuhe Elija ko wà lẹpo na Jezebẹli+ gọna lehe ewọ ko yí ohí do hù yẹwhegán lọ lẹpo do.+ 2 Jezebẹli sọ do wẹnsagun de hlan Elija dọmọ: “Na yẹwhe lẹ ni sayana mi sinsinyẹn eyin n’ma hẹn hiẹ lọsu tin taidi dopodopo yetọn* to ojlẹ ehe nkọ mẹ to osọ!” 3 Obu sọ jẹ Elija ji, enẹwutu e fọ́n bo họnyi nado whlẹn ogbẹ̀* ede tọn.+ E sọ wá Beẹli-ṣeba+ he yin Juda tọn+ bo jo devizọnwatọ etọn do finẹ. 4 E bẹ gbejizọnlin azán dopo tọn jẹeji dedo danfafa ji bo wá sinai do atin zunmẹ tọn de sá bosọ jẹ okú biọ na ede* ji. E dọmọ: “E pé! Todin, Jehovah E, gbọ bo yí ogbẹ̀* ṣie,+ na yẹn ma pọnte hú tọgbo ṣie lẹ.”

5 Enẹgodo, e mlọnai bo bẹ amlọn to atin zunmẹ tọn lọ sá. Ṣigba to ajiji mẹ, angẹli de doalọ e go+ bo dọna ẹn dọmọ: “Fọ́n bo dùnú.”+ 6 Ewọ sọ pọ́n bo mọdọ akla plẹ́bẹ́ de tin to zannu miyọ́nawu lẹ ji to taligbé etọn gọna osingo de. E sọ dù bo nù bosọ gọ̀ aimlọn. 7 To ojlẹ de godo, angẹli Jehovah tọn lọ lẹkọwa whla awetọ bo doalọ e go bosọ dọmọ: “Fọ́n bo dùnú, na gbejizọnlin gaa wẹ to tepọn we.” 8 Enẹwutu, e fọ́n bo dù bosọ nù, podọ po huhlọn he e mọyi sọn núdùdù enẹ mẹ po, e to yìyì na okle 40 ozán 40 kaka e do jẹ Holẹbi, yèdọ osó Jiwheyẹwhe nugbo lọ tọn+ kọ̀n.

9 E sọ biọ oslò de mẹ+ to finẹ bo dọ́ e mẹ; podọ pọ́n! ohó Jehovah tọn wá e dè dọmọ: “Elija, etẹ wà wẹ a te tofi?” 10 E sọ gblọn dọmọ: “Yẹn ko do zohunhun daho hia na Jehovah Jiwheyẹwhe awhànpa lẹ tọn;+ na omẹ Islaeli tọn lẹ ko gbẹ́ alẹnu towe+ dai bo họ́ agbà towe lẹ liai bosọ yí ohí do hù yẹwhegán towe lẹ,+ bọ e wá pò yẹn ṣo. Todin, yé sọ to okú* ṣie dín.”+ 11 Ṣigba, Ewọ dọmọ: “Tọ́njẹgbonu bo ṣite to osó lọ ji to Jehovah nukọn.” Podọ pọ́n! Jehovah juwajei+ bọ jẹhọn sinsinyẹn de yìn po huhlọn po bo to osó lẹ zẹ̀ bosọ to osé lẹ gbà hányán to Jehovah nukọn,+ amọ́ Jehovah ma to jẹhọn lọ mẹ. To jẹhọn lọ godo, aigba sisọsisọ de wá aimẹ,+ amọ́ Jehovah ma to aigba sisọsisọ lọ mẹ. 12 To aigba sisọsisọ lọ godo, miyọ́n de jẹ jiji ji,+ amọ́ Jehovah ma to miyọ́n lọ mẹ. To miyọ́n lọ godo, ogbè fifá de dọho do odò.+ 13 Tlolo he Elija sè ogbè lọ, e yí awugbó vonọtaun+ etọn do ṣinyọ́n nukunmẹ bo tọ́njẹgbonu bosọ ṣite to nùvo oslò lọ tọn kọ̀n. Whenẹnu wẹ ogbè de kanse e dọmọ: “Elija, etẹ wà wẹ a te tofi?” 14 E sọ gblọn dọmọ: “Yẹn ko do zohunhun daho hia na Jehovah Jiwheyẹwhe awhànpa lẹ tọn; na omẹ Islaeli tọn lẹ ko gbẹ́ alẹnu towe+ dai bo họ́ agbà towe lẹ liai bosọ yí ohí do hù yẹwhegán towe lẹ, bọ e wá pò yẹn ṣo. Todin, yé sọ to okú* ṣie dín.”+

15 Jehovah sọ dọna ẹn dọmọ: “Lẹkọ bo yì danfafa Damasku tọn ji. Eyin a jẹ dọ́n, yiamisisadode Hazaẹli+ taidi ahọlu do Silia ji. 16 Hiẹ sọ dona yiamisisadode Jehu+ ovivi Nimṣi tọn taidi ahọlu do Islaeli ji, podọ hiẹ ni yiamisisadode Eliṣa* visunnu Ṣafati tọn he wá sọn Abẹli-mẹhola taidi yẹwhegán he na diọtẹnna we.+ 17 Mẹdepope he họ̀ngán sọn ohí Hazaẹli tọn+ nù, Jehu na hù i;+ podọ mẹdepope he họ̀ngán sọn ohí Jehu tọn nù, Eliṣa na hù i.+ 18 Humọ, yẹn gbẹsọ tindo omẹ 7 000 delẹ he pò to Islaeli,+ yèdọ mẹhe kligonu yetọn ma ko dẹ́ do odò na Baali+ bọ onù yetọn ma ko sọ donùnùgo na ẹn.”+

19 Ewọ sọ yì sọn finẹ bo mọ Eliṣa visunnu Ṣafati tọn dile e to aigba-jlo po oyìnsú awe-awe donu 12 po to nukọn etọn, bọ ewọ lọsu to 12tọ kọ̀n. Elija sọ sẹyì e dè bo yìn awugbó vonọtaun+ etọn dokọna ẹn. 20 Ewọ sọ jo oyìnsú lọ lẹ do bo họ̀nwezun to godona Elija bosọ dọna ẹn dọmọ: “Jaale, gbọ ma donùnùgo na otọ́ ṣie po onọ̀ ṣie po. Enẹgodo, n’na hodo we yì.” Elija sọ gblọnna ẹn dọmọ: “Lẹkọyi, na etẹwẹ n’wà do glọnalina we?” 21 Ewọ sọ lẹkọyi bo bẹ oyìnsú awe bo yí yé do sanvọ́, e sọ yí atin glepọnu lọ tọn do dà olàn oyìnsú lọ lẹ tọn bo na gbẹtọ lẹ bọ yé dù. Enẹgodo, e fọ́n bo hodo Elija bosọ jẹ lizọnyina ẹn ji.+