2 Ahọlu lẹ
12 To owhe ṣinawetọ Jehu tọn+ mẹ, Jehoaṣi+ duahọlu, e sọ dugán to Jelusalẹm na owhe 40. Oyín onọ̀ etọn tọn wẹ Zibia, mẹhe wá sọn Beẹli-ṣeba.+ 2 Jehoaṣi zindonukọn nado to nuhe sọgbe to nukun Jehovah tọn mẹ wà to ojlẹ he mẹ Jehoiada yẹwhenọ lọ deanana ẹn te lẹpo gblamẹ. 3 Ṣigba, ofi yiaga+ lẹ ma yin didesẹ podọ gbẹtọ lẹ gbẹsọ to avọ́sinsan po avọ́sinsan mimẹ̀ lẹ po basi to ofi yiaga lẹ.
4 Jehoaṣi dọna yẹwhenọ lẹ dọmọ: “Mì bẹ akuẹ lọ lẹpo he yin hinhẹnwa ohọ̀ Jehovah tọn mẹ na avọ́nunina wiwe lẹ,+ yèdọ akuẹ he yin gbigbò na mẹdopodopo+ po akuẹ tangan he mẹde* dona sú po, gọna akuẹ depope he ahun mẹde tọn whàn ẹn nado hẹnwa ohọ̀ Jehovah tọn mẹ.+ 5 Yẹwhenọ lẹ wẹ na yí i sọn nunatọ* lọ lẹ si bo na yí i zan nado vọ́ ohọ̀ lọ jlado to fidepope he e gble* te.”+
6 To owhe 23tọ Ahọlu Jehoaṣi tọn mẹ, yẹwhenọ lẹ ma ko jla fihe gble to ohọ̀ lọ go lẹ do janwẹ.+ 7 Ahọlu Jehoaṣi sọ ylọ Jehoiada+ yẹwhenọ lọ po yẹwhenọ devo lẹ po bo dọna yé dọmọ: “Naegbọn mì ma do to fihe gble to ohọ̀ lọ go lẹ jlado? Enẹwutu, mì sọ yí akuẹ depope sọn nunatọ lẹ si ba blo, adavo e yin yiyizan nado vọ́ ohọ̀ lọ jlado.”+ 8 To whenẹnu, yẹwhenọ lẹ kọngbedopọ dọ emi ma na yí akuẹ depope sọn gbẹtọ lọ lẹ si ba podọ emi ma nasọ penukundo ohọ̀ lọ vivọjlado go ba.
9 Jehoiada yẹwhenọ lọ sọ ze apotin+ de bo de nùvo de do nùsu etọn ji bosọ ze e do agbà lọ pá to adusiwhé na mẹhe jlo na biọ ohọ̀ Jehovah tọn mẹ. Finẹ wẹ yẹwhenọ he nọ wadevizọn taidi họ̀njinọtọ lẹ nọ bẹ akuẹ he yin hinhẹnwa ohọ̀ Jehovah tọn mẹ lẹpo do.+ 10 Whedepopenu he yé mọdọ akuẹ sù to apotin lọ mẹ, wekantọ ahọlu tọn po yẹwhenọ daho lọ po nọ hẹji wá bo nọ bẹ akuẹ he yin hinhẹnwa ohọ̀ Jehovah tọn mẹ lọ lẹ* bosọ nọ hia yé.+ 11 Yé nọ bẹ akuẹ he ko yin hihia lọ lẹ jo na mẹhe ko yin dide nado penukundo azọ́n he to yinyin wiwà to ohọ̀ Jehovah tọn mẹ lọ go lẹ. Omẹ ehelẹ nọ wá yí i do suahọ atin-zọ́nwatọ po họ̀gbátọ he to azọ́nwa to ohọ̀ Jehovah tọn mẹ lẹ po,+ 12 gọna họ̀dotọ po zannu-pàtọ lẹ po. Yé sọ nọ họ̀ owhlẹ lẹ po zannu pipà lẹ po nado vọ́ nuhe gble to ohọ̀ Jehovah tọn go lẹ jlado bo nọ yí akuẹ lọ zan na akuẹzinzan devo depope he gando ohọ̀ lọ vivọjlado go.
13 Ṣigba, akuẹ he yin hinhẹnwa ohọ̀ Jehovah tọn mẹ lẹ depope ma yin yiyizan nado basi basia fataka tọn lẹ, miyọ́n-ṣínu lẹ, agbán lẹ, opẹ̀n+ lẹ kavi núzinzan sika kavi fataka tọn wunmẹ depope na ohọ̀ Jehovah tọn.+ 14 Mẹhe to azọ́n lọ wà lẹ kẹdẹ wẹ yé nọ bẹ na, bọ yé nọ yí do vọ́ ohọ̀ Jehovah tọn jlado. 15 Yé ma nọ biọ to sunnu he yé bẹ akuẹ na dọ yé ni má na azọ́nwatọ lọ lẹ si nado dogbè gba, na omẹ dejidego lẹ wẹ yé.+ 16 Amọ́, akuẹ avọ́nunina whẹhuhu tọn+ po akuẹ avọ́nunina ylando tọn lẹ po ma nọ yin hinhẹnwa ohọ̀ Jehovah tọn mẹ; yẹwhenọ lẹ tọn wẹ.+
17 To ojlẹ enẹ mẹ, Hazaẹli+ ahọlu Silia tọn hẹji yì nado tọ́nawhàn Gati,+ e sọ gbawhàn etọn, enẹgodo e basi dide nado tọ́navùn* Jelusalẹm.+ 18 Ahọlu Jehoaṣi Juda tọn sọ bẹ avọ́nunina wiwe he tọgbo etọn Jehoṣafati, Jeholami po Ahazia po he yin ahọlu Juda tọn lẹ ko klandowiwe lẹ po avọ́nunina wiwe ewọ lọsu titi tọn lẹ po gọna sika he tin to adọkunnu sẹdotẹn ohọ̀ Jehovah tọn mẹ podọ to owhé* ahọlu tọn gbè lẹpo, e sọ bẹ yé hlan Hazaẹli ahọlu Silia tọn.+ Enẹwutu, ewọ masọ yangbé Jelusalẹm tọn ba.
19 Na nuhe dù otàn Jehoaṣi tọn he pò, yèdọ nuhe e wà lẹpo, be e ma yin kinkan do owe whenuho ahọlu Juda tọn lẹ tọn mẹ ya? 20 Ṣigba, devizọnwatọ Jehoaṣi tọn lẹ blasé do e go+ bo hù i to owhé Pópló lọ+ tọn gbè,* to aliho he jẹte yì Sila ji. 21 Devizọnwatọ etọn Jozakali visunnu Ṣimeati tọn po Jehozabadi visunnu Ṣomeli tọn po wẹ linú in hù.+ Yé dì i dopọ hẹ tọgbo etọn lẹ do Tòdaho Davidi tọn mẹ, visunnu etọn Amazia sọ lẹzun ahọlu do otẹn etọn mẹ.+