Yẹwhehodọtọ
11 Dlan* akla towe do osin nukunmẹ,+ na hiẹ na gọ̀ ẹ mọyi to azán susu godo.+ 2 Yí mimá de na omẹ ṣinawe, kavi etlẹ yin na omẹ ṣinatọ̀n,+ na hiẹ ma yọ́n nugbajẹmẹji he na wá aigba ji.
3 Eyin osin gọ́ aslọ lẹ mẹ, yé na ja jikun do aigba ji; podọ eyin atin de họ́jai do hùwaji kavi do agewaji, fie atin lọ họ́jai do wẹ e na gbọṣi.
4 Mẹhe nọ na ayidonugo jẹhọn ma na donú, podọ mẹhe to aslọ lẹ pọ́n ma na gbẹ̀n jinukun.+
5 Kẹdẹdile hiẹ ma yọ́n lehe huhlọn ogbẹ̀ tọn* nọ yinuwa to ohú ovi he to* ohò hohonọ de tọn mẹ do,+ mọ wẹ hiẹ ma yọ́n azọ́n Jiwheyẹwhe nugbo he nọ wà nulẹpo lọ tọn do niyẹn.+
6 Do okún towe to afọnnu, podọ a dike alọ towe gbọjẹ kakajẹ whèjai blo;+ na hiẹ ma yọ́n dehe na tindo kọdetọn dagbe, vlavo ehe kavi diẹ, kavi vlavo awe lẹ wẹ na yọ́n.
7 Hinhọ́n nọ jẹaṣọ́, podọ nudagbe wẹ e yin na nukun nado mọ owhè. 8 Na eyin mẹde na tlẹ nọgbẹ̀ na owhe susu, gbọ ewọ ni duvivi owhe lọ lẹpo tọn.+ Ṣigba, ewọ dona flindọ azán zinvlu tọn lẹ sọgan sù; nuhe ja lẹpo sọ yin ovọ́.+
9 Hiẹ jọja sunnu E, nọ jaya, dile hiẹ gbẹ́ pò to jọja yin, sọ dike ahun towe ni nọ jaya to jọja whenu towe. Nọ wà ojlo ahun towe mẹ tọn lẹ bosọ nọ yì fie nukun towe plan we yì, ṣigba yọnẹn dọ hiẹ na dogbè onú ehe lẹpo tọn na Jiwheyẹwhe nugbo lọ.*+ 10 Enẹwutu, de nuhe nọ dotuklamẹ lẹ sẹ̀ sọn ahun towe mẹ, bo gbẹ́ nuhe nọ gbleawunamẹ* lẹ dai, na ovọ́ wẹ jọja whenu po ovu whenu po yin.+