2 Kọlintinu lẹ
4 Enẹwutu, to whenuena e yindọ míwlẹ tindo lizọnyizọn ehe gbọn lẹblanu he yin didohia mí lọ gblamẹ, mí ma gbọjọ. 2 Ṣigba, mí ko gbẹ́ onú whiwhla he huwinyan lẹ dai bo ma nọ yí ayiha gigẹdẹ do zinzọnlin, kavi hẹn ohó Jiwheyẹwhe tọn flusọ́;+ ṣigba to Jiwheyẹwhe nukọn, mí nọ do mídelẹ hia gbẹtọ lẹpo to aliho he na dọ̀n ayihadawhẹnamẹnu yetọn dogo de mẹ gbọn nugbo lọ hinhẹn họnwun dali.+ 3 Na nugbo tọn, eyin wẹndagbe he lá mí te whlá, be to mẹhe to dindọn lẹ ṣẹnṣẹn wẹ e whlá te, 4 yèdọ to mayisenọ lẹ ṣẹnṣẹn, ayiha mẹhe tọn yẹwhe titonu* ehe tọn+ ko tọ́nnukunna lẹ,+ na hinhọ́n wẹndagbe gigonọ he gando Klisti go, mẹhe tin to apajlẹ Jiwheyẹwhe tọn mẹ lọ tọn+ ma nado họnwun do yé ji.+ 5 Na mí ma to yẹwhehodọ gando mídetiti go gba, ṣigba gando Jesu Klisti go taidi Oklunọ, podọ míwlẹ yin afanumẹ mìtọn na Jesu tọn wutu. 6 Na Jiwheyẹwhe wẹ mẹlọ he dọmọ: “Gbọ hinhọ́n ni họnwun sọn zinvlu mẹ,”+ podọ ewọ ko họnwun do ahun mítọn lẹ ji nado yí oyọnẹn gigonọ Jiwheyẹwhe tọn do họ́n do yé ji+ gbọn nukunmẹ Klisti tọn dali.
7 Ṣigba, míwlẹ tindo adọkunnu ehe+ to núzinzan okọ́ tọn* lẹ mẹ,+ na huhlọn he hú jọwamọ tọn nido sọgan yin Jiwheyẹwhe tọn bọ e ma yin mítọn titi gba.+ 8 Mí yin finfinyọ́n sinsinyẹn to aliho lẹpo mẹ, ṣigba mí ma yin ginglọn mlẹnmlẹn ma nado sẹtẹn gba; mí jẹflumẹ, ṣigba e ma yindọ mí ma tindo ali họ̀ngán tọn depope* wẹ gba;+ 9 mí yin homẹkẹndo, ṣigba mí ma yin gbigbẹdai;+ mí yin zinzindai, ṣigba mí ma yin huhusudo.+ 10 To whepoponu wẹ mí nọ doakọnna nuyiwahẹmẹ he nọ hẹn okú wá he Jesu jiya etọn to agbasa mítọn mẹ,+ na ogbẹ̀ Jesu tọn nido sọgan yin hinhẹn sọawuhia to agbasa mítọn mẹ ga. 11 Na míwlẹ he to ogbẹ̀, nọ to yinyin hinhẹn pannukọn okú to whepoponu+ na Jesu tọn wutu, na ogbẹ̀ Jesu tọn nido sọgan yin hinhẹn sọawuhia to agbasalan mítọn he nọ kú lọ mẹ ga. 12 Enẹwutu, míwlẹ nọ pehẹ okú, na mìwlẹ nido tindo ogbẹ̀.
13 Todin, na mí tindo gbigbọ yise tọn dopolọ taidi enẹ he go e yin kinkan gando dọmọ: “N’do yise hia, enẹwutu wẹ n’do dọho”;+ mílọsu do yise hia podọ enẹwutu wẹ mí dọho, 14 to yinyọnẹn mẹ dọ Mẹlọ he fọ́n Jesu na fọ́n mí hẹ Jesu ga bo nasọ hẹn míwlẹ to pọmẹ po mìwlẹ po wá nukọn etọn.+ 15 Na onú ehe lẹpo wẹ yin na mìtọn wutu, na nukundagbe majẹhẹ he yin hinhẹn jideji lọ nido sọgan sudeji dogọ, na mẹsusu dogọ wẹ to pẹdo, na gigo Jiwheyẹwhe tọn wutu.+
16 Enẹwutu, mí ma gbọjọ, ṣigba eyin gbẹtọ he mí yin to gbonu tlẹ to kukupẹ́, e họnwun dọ gbẹtọ he mí yin to homẹ to yinyin hinhẹn jẹ yọyọ egbesọegbesọ. 17 Na dile etlẹ yindọ ojlẹ gli wẹ nukunbibia* tin na bosọ fua, gigo daho* he mayọnjlẹ mẹ wẹ e nọ dekọtọn do na mí bosọ yin madopodo;+ 18 dile mí ze nukun mítọn lẹ, e ma yin do nuhe nọ yin mimọ lẹ ji, ṣigba do nuhe ma nọ yin mimọ lẹ ji.+ Na nuhe nọ yin mimọ lẹ yin ojlẹ gli tọn, ṣigba nuhe ma nọ yin mimọ lẹ yin madopodo.