JENẸSISI
1 To bẹjẹeji Jiwheyẹwhe dá olọn lẹ po aigba po.+
2 Aigba sọ tin to ovọ́ bosọ to tata* bọ zinvlu sọ ṣinyọ́n dogbó osin tọn* nukunmẹ,+ huhlọn-yido-wazọ́n*+ Jiwheyẹwhe tọn sọ to yigọyigọ basi to osin nukunmẹ.+
3 Jiwheyẹwhe sọ dọmọ: “Na hinhọ́n ni tin.” Hinhọ́n sọ tin.+ 4 Enẹgodo, Jiwheyẹwhe mọdọ hinhọ́n lọ yọ́n, Jiwheyẹwhe sọ jẹ hinhọ́n klan dovo na zinvlu ji. 5 Jiwheyẹwhe sọ ylọ hinhọ́n dọ Okle, bo ylọ zinvlu dọ Ozán.+ Podọ ozán kú bọ ai sọ họ́n, azán tintan.
6 Jiwheyẹwhe sọ dọmọ: “Na dovlomẹ+ de ni tin to osin lẹ ṣẹnṣẹn podọ osin lẹ ni klan sọn yede go.”+ 7 Jiwheyẹwhe sọ basi dovlomẹ lọ bo klan osin he to odò na dovlomẹ lọ po osin he to aga na dovlomẹ lọ po do voovo.+ E sọ yinmọ. 8 Jiwheyẹwhe sọ ylọ dovlomẹ lọ dọ Agahomẹ.* Ozán kú bọ ai sọ họ́n, azán awetọ.
9 Jiwheyẹwhe sọ dọmọ: “Na osin he to olọn glọ lẹ ni hòpli do fidopo podọ na ageklo ni sọawuhia.”+ E sọ yinmọ. 10 Jiwheyẹwhe ylọ ageklo lọ dọ Aigba,+ bo ylọ hòplidopọ osin tọn lọ dọ Ohù.+ Jiwheyẹwhe sọ mọdọ e yọ́n.+ 11 Podọ Jiwheyẹwhe dọmọ: “Na aigba ni wú ogbé-mú, podọ atin he nọ de okún tọ́n lẹ, gọna atin he nọ de sinsẹ́n po okún po tọ́n lẹ sọgbe hẹ wunmẹ yetọn to aigba ji.” E sọ yinmọ. 12 Aigba sọ wú ogbé-mú, podọ atin he nọ de okún tọ́n lẹ+ gọna atin he nọ de sinsẹ́n po okún po tọ́n lẹ sọgbe hẹ wunmẹ yetọn. Jiwheyẹwhe sọ mọdọ e yọ́n. 13 Ozán kú bọ ai sọ họ́n, azán atọ̀ntọ.
14 Jiwheyẹwhe sọ dọmọ: “Na asisa hinhọ́n tọn lẹ+ ni sọawuhia to dovlomẹ olọn lẹ tọn nado klan okle sọn ozán go,+ yé nasọ yin ohia na osaa lẹ, azán lẹ po owhe lẹ po.+ 15 Yé na yin asisa hinhọ́n tọn lẹ to dovlomẹ olọn tọn nado na hinhọ́n do aigba ji.” E sọ yinmọ. 16 Jiwheyẹwhe sọ basi asisa hinhọ́n tọn daho awe lẹ, asisa hinhọ́n tọn he klohugan lọ nado dugán to okle+ podọ asisa hinhọ́n tọn he whè hugan lọ nado dugán to zánmẹ, e sọ basi sunwhlẹvu lẹ ga.+ 17 Enẹwutu, Jiwheyẹwhe ze yé do dovlomẹ olọn lẹ tọn nado na hinhọ́n do aigba ji, 18 nado dugán to okle podọ to zánmẹ podọ nado klan hinhọ́n dovo na zinvlu.+ Jiwheyẹwhe sọ mọdọ e yọ́n. 19 Ozán kú bọ ai sọ họ́n, azán ẹnẹtọ.
20 Jiwheyẹwhe sọ dọmọ: “Na nudida* gbẹ̀te lẹ ni gọ́ osin lẹ mẹ podọ na nudida he nọ zlọn lẹ ni to zinzlọn gbọn aga to dovlomẹ olọn lẹ tọn.”*+ 21 Jiwheyẹwhe sọ dá nudida* daho hùmẹ tọn lẹ po nudida* gbẹ̀te he nọ sẹtẹn bo gọ́ osin mẹ lẹpo po sọgbe hẹ wunmẹ yetọn, podọ nudida he tindo awà bo nọ zlọn lẹpo sọgbe hẹ wunmẹ yetọn. Jiwheyẹwhe sọ mọdọ e yọ́n. 22 Jiwheyẹwhe sọ dona yé dọmọ: “Mì yin sinsẹ́nnọ bo sudeji bosọ gọ́ osin ohù tọn lẹ mẹ,+ podọ na nudida he nọ zlọn lẹ ni sù to aigba ji.” 23 Ozán kú bọ ai sọ họ́n, azán atọ́ntọ.
24 Jiwheyẹwhe sọ dọmọ: “Na nudida* gbẹ̀te lẹ ni gọ́ aigba ji sọgbe hẹ wunmẹ yetọn, yèdọ kanlin whégbè tọn lẹ, kanlin he nọ lìn* lẹ po gbekanlin aigba ji tọn lẹ po sọgbe hẹ wunmẹ yetọn.”+ E sọ yinmọ. 25 Jiwheyẹwhe sọ basi gbekanlin aigba ji tọn lẹ sọgbe hẹ wunmẹ yetọn podọ kanlin whégbè tọn lẹ sọgbe hẹ wunmẹ yetọn podọ kanlin he nọ lìn to aigba ji lẹpo sọgbe hẹ wunmẹ yetọn. Jiwheyẹwhe sọ mọdọ e yọ́n.
26 Enẹgodo, Jiwheyẹwhe dọmọ: “Gbọ mí+ ni basi gbẹtọ to apajlẹ+ mítọn mẹ, he na taidi mí,+ podọ yé ni dugán do whèvi hùmẹ tọn lẹ, nudida he nọ zlọn to agahomẹ lẹ, kanlin whégbè tọn lẹ, aigba lọ blebu gọna kanlin he nọ lìn to aigba ji lẹpo ji.”+ 27 Jiwheyẹwhe sọ dá gbẹtọ to apajlẹ etọn mẹ, yèdọ to apajlẹ Jiwheyẹwhe tọn mẹ wẹ e dá yé te; e dá yé sunnu de yọnnu de.+ 28 Humọ, Jiwheyẹwhe dona yé bosọ dọna yé dọmọ: “Mì yin sinsẹ́nnọ bo sudeji bosọ gọ́ aigba ji+ bo dugán do e ji,+ podọ mì dugán+ do whèvi hùmẹ tọn lẹ, nudida he nọ zlọn to agahomẹ lẹ po nudida he nọ sẹtẹn to aigba ji lẹpo po ji.”
29 Jiwheyẹwhe sọ dọmọ: “Todin, yẹn ko yí atin he nọ de okún tọ́n to aigba blebu ji podọ atin he nọ de sinsẹ́n tọ́n lẹpo na mì. Yé ni yin núdùdù na mì.+ 30 Podọ yẹn ko yí amamú lẹpo do basi núdùdù na gbekanlin aigba ji tọn lẹpo, nudida agahomẹ tọn he nọ zlọn lẹpo gọna nutogbẹ̀* depope he nọ sẹtẹn to aigba ji.”+ E sọ yinmọ.
31 Enẹgodo, Jiwheyẹwhe mọ nuhe e ko basi lẹpo podọ pọ́n! e yọ́n tlala.+ Ozán kú bọ ai sọ họ́n, azán ṣidopotọ.
2 Todin, olọn po aigba po didá gọna nuhe tin to yé mẹ* lẹpo wá tadona kọ̀n.+ 2 Podọ to azán ṣinawetọ gbè, Jiwheyẹwhe hẹn azọ́n he wà e te lọ wá tadona kọ̀n, e sọ jẹ gbigbọjẹ ji to azán ṣinawetọ gbè sọn azọ́n nudida tọn etọn lẹpo mẹ.+ 3 Jiwheyẹwhe sọ dona azán ṣinawetọ lọ bo lá ẹ di wiwe, na to azán enẹ gbè wẹ Jiwheyẹwhe ko jẹ gbigbọjẹ ji sọn azọ́n nudida tọn etọn lẹpo mẹ, yèdọ sọn nuhe e lẹn nado dá lẹpo mẹ.
4 Ehe wẹ otàn olọn po aigba po tọn to ojlẹ he mẹ yé yin didá te, to azán he gbè Jehovah* Jiwheyẹwhe basi aigba po olọn po.+
5 Ogbé danji tọn depope ma ko tin to aigba ji to whenẹnu podọ amamú danji tọn depope ma ko wú, na Jehovah Jiwheyẹwhe ma ko ja jikun do aigba ji podọ gbẹtọ de ma ko tin nado pọ̀ aigba. 6 Ṣigba, avìvì he bẹ osin hẹn de nọ tọ́n sọn aigba yì jiwhé bo nọ wá húsinna aigba nukunmẹ pete.
7 Jehovah Jiwheyẹwhe sọ dá gbẹtọ sọn kọ́gudu+ aigba tọn mẹ bo gbọ gbọfufu ogbẹ̀ tọn+ do awọntinslo etọn lẹ mẹ, ewọ sọ lẹzun gbẹtọ* gbẹ̀te.+ 8 Humọ, Jehovah Jiwheyẹwhe wleawuna jipa de do Edẹni,+ sẹpọ whèzẹtẹn; podọ finẹ wẹ e ze gbẹtọ he e dá+ lọ do. 9 Jehovah Jiwheyẹwhe sọ hẹn atin wunmẹ lẹpo wujẹgbonu sọn aigba mẹ, yèdọ atin he yọ́n na pinpọn bosọ yọ́n na núdùdù podọ atin ogbẹ̀ tọn+ ga to ṣẹnṣẹn jipa lọ tọn gọna atin oyọnẹn dagbe po oylan po tọn.+
10 Podọ otọ̀ de tin he to sisà jẹgbonu sọn Edẹni nado húsinna jipa lọ, podọ sọn finẹ, e sọ klan zun tọ̀sisa ẹnẹ.* 11 Tintan nọ yin Piṣọni; enẹlọ wẹ nọ sà lẹdo aigba Havila tọn pete, fihe sika tin te. 12 Sika aigba enẹ tọn yọ́n taun. Podọ gọmu po zannu onizi tọn po sọ tin to finẹ ga. 13 Podọ tọ̀sisa awetọ lọ nọ yin Gihọni; enẹ wẹ lẹdo aigba Kuṣi tọn pé. 14 Tọ̀sisa atọ̀ntọ lọ nọ yin Hidekẹli;*+ enẹ wẹ nọ sà gbọn whèzẹtẹn Asilia+ tọn. Podọ tọ̀sisa ẹnẹtọ lọ wẹ Euflate.+
15 Jehovah Jiwheyẹwhe sọ ze sunnu lọ do jipa Edẹni tọn mẹ nado nọ pọ̀ ẹ podọ nado nọ penukundo e go.+ 16 Podọ Jehovah Jiwheyẹwhe degbena sunnu lọ dọmọ: “Hiẹ sọgan dù sinsẹ́n atin he tin to jipa lọ mẹ lẹpo tọn gọ́ho.+ 17 Ṣigba, na nuhe dù atin oyọnẹn dagbe po oylan po tọn, hiẹ ma dona dù sinsẹ́n etọn, na to azán he gbè hiẹ dù sọn e mẹ te, na jide tọn, hiẹ na kú.”+
18 Podọ Jehovah Jiwheyẹwhe sọ dọmọ: “E ma yọ́n na sunnu lọ nado to ninọ edeṣo. Yẹn na basi alọgọtọ de na ẹn, yèdọ mẹde he sọgbe hẹ ẹ.”+ 19 Todin, Jehovah Jiwheyẹwhe dá gbekanlin aigba ji tọn po nudida he nọ zlọn to agahomẹ lẹpo po sọn kọ́gudu mẹ, e sọ hẹn yé wá sunnu lọ dè nado pọ́n lehe ewọ na ylọ dopodopo yetọn dọ; podọ oyín depope he e do na nudida* gbẹ̀te dopodopo, enẹ wẹ nọ lẹzun oyín etọn.+ 20 Enẹwutu, sunnu lọ na oyín kanlin whégbè tọn lẹpo podọ nudida he nọ zlọn to agahomẹ lẹpo gọna gbekanlin aigba ji tọn lẹpo, ṣigba alọgọtọ he sọgbe hẹ sunnu lọ depope ma tin. 21 Enẹwutu, Jehovah Jiwheyẹwhe hẹn sunnu lọ damlọn yìkànmẹ, podọ dile e to amlọndọ, e de dopo to adàjahú etọn lẹ mẹ bosọ yí olàn do sú otẹn etọn mẹ. 22 Jehovah Jiwheyẹwhe sọ yí adàjahú he e desọn sunnu lọ go do basi yọnnu bo plan ẹn wá sunnu lọ dè.+
23 To whenẹnu, sunnu lọ dọmọ:
“Todin lo, ehe wẹ ohú sọn ohú ṣie lẹ mẹ
Podọ olàn sọn olàn ṣie mẹ.
Yọnnu wẹ e na nọ yin yiylọdọ,
na sunnu go wẹ ewọ yin didesọn wutu.”+
24 Enẹwutu wẹ sunnu na jo otọ́ etọn po onọ̀ etọn po do bo na sẹbọdo asi etọn go,* yé nasọ lẹzun agbasalan dopo.+ 25 Podọ yé omẹ awe lẹ to omẹ́,+ yèdọ sunnu lọ po asi etọn po; etomọṣo winyan ma hù yé.
3 Odàn+ wẹ yin kanlin he bí* hugan to gbekanlin danji tọn he Jehovah Jiwheyẹwhe ko basi lẹpo mẹ. Enẹwutu, e dọna yọnnu lọ dọmọ: “Be nugbo wẹ dọ Jiwheyẹwhe ko dọ dọ mì ma dona dù sọn depope to atin jipa lọ tọn lẹ mẹ ya?”+ 2 Yọnnu lọ sọ gblọnna odàn lọ dọmọ: “Mí sọgan dù sọn sinsẹ́n atin jipa lọ tọn lẹ mẹ.+ 3 Ṣigba, Jiwheyẹwhe ko dọ gando sinsẹ́n atin he tin to jipa lọ ṣẹnṣẹn+ tọn go dọ: ‘Mì ma dona dù sọn e mẹ paali, mì ma dona doalọ e go; e ma yinmọ, mì na kú.’” 4 Enẹwutu, odàn lọ gblọnna yọnnu lọ dọmọ: “Na jide tọn, mì ma na kú gba.+ 5 Na Jiwheyẹwhe yọnẹn dọ gbeegbe mì dù sọn e mẹ te, nukun mìtọn nasọ hùn bọ mìwlẹ na taidi Jiwheyẹwhe bo na nọ yọ́n dagbe po oylan po.”+
6 Enẹwutu, yọnnu lọ mọdọ sinsẹ́n atin lọ tọn yọ́n na dùdù bosọ yọ́npọ́n to nukunta, mọwẹ, atin lọ yọ́npọ́n taun. Enẹwutu, e yí sọn sinsẹ́n etọn mẹ bo dù.+ Enẹgodo, e sọ na asu etọn to whenue e tin po e po podọ ewọ lọsu dù ga.+ 7 To whenẹnu, nukun yé omẹ awe lẹ tọn sọ hùn bọ yé mọdọ omẹ́ wẹ emi tin te. Enẹwutu, yé tọ̀ amà ovòtin tọn lẹ dopọ bo yí do ṣinyọ́n omẹ́ yetọn.+
8 Enẹgodo, yé sè ogbè Jehovah Jiwheyẹwhe tọn dile ewọ to zọnlinzin to jipa lọ mẹ to jẹhọn fifá whèjai tọn whenu, podọ sunnu lọ po asi etọn po sọ họ̀n whlá sọn Jehovah Jiwheyẹwhe nukọn do atin jipa lọ tọn lẹ ṣẹnṣẹn. 9 Podọ Jehovah Jiwheyẹwhe to yiylọ sunnu lọ bo to didọmọ: “Fie wẹ hiẹ te?” 10 To godo mẹ, e dọmọ: “Yẹn sè ogbè towe to jipa lọ mẹ, obu sọ di mi, na yẹn tin to omẹ́, enẹwutu wẹ yẹn whlá dee.” 11 E sọ dọmọ: “Mẹnu wẹ dọna we dọ a tin to omẹ́?+ Be hiẹ ko dù sinsẹ́n atin lọ tọn he yẹn ko gbẹna we ma nado dù+ lọ wẹ ya?” 12 Sunnu lọ sọ dọmọ: “Yọnnu he hiẹ na mi nado nọhẹ mi lọ, ewọ wẹ na mi sinsẹ́n atin lọ tọn bọ yẹn sọ dù.” 13 Enẹwutu, Jehovah Jiwheyẹwhe dọna yọnnu lọ dọmọ: “Etẹ die he hiẹ ko wà e?” Yọnnu lọ sọ gblọn dọmọ: “Odàn lọ wẹ klọ mi bọ yẹn sọ dù.”+
14 Jehovah Jiwheyẹwhe sọ dọna odàn+ lọ dọmọ: “Na hiẹ ko wà ehe wutu, hiẹ yin dẹ̀hodo to kanlin whégbè tọn lẹpo mẹ podọ to gbekanlin danji tọn lẹpo mẹ. Hòtò towe ji wẹ hiẹ na nọ gbọn yì podọ kọ́gudu wẹ hiẹ na nọ dù to azán ogbẹ̀ towe tọn lẹpo mẹ. 15 Yẹn nasọ yí okẹ̀n*+ do hiẹ+ po yọnnu lọ+ po ṣẹnṣẹn podọ do kúnkan* towe+ po kúnkan* etọn+ po ṣẹnṣẹn. Ewọ na só ota towe+ podọ hiẹ na hẹ̀nadu afọgbẹn etọn.”+
16 Na yọnnu lọ, e dọmọ: “Yẹn na hẹn awufiẹsa hòmimọ tọn towe jideji tlala; to awufiẹsa mẹ wẹ hiẹ na nọ ji ovi lẹ te, ojlo sinsinyẹn towe nasọ yin na asu towe, podọ ewọ na dugán do ji we.”
17 Podọ na Adam,* e dọmọ: “Na hiẹ ko dotoaina ogbè asi towe tọn bo ko sọ dù sọn atin he yẹn ko gbẹna+ we dọ, ‘Hiẹ ma dona dù sọn e mẹ’ lọ mẹ, dẹ̀hodo wẹ aigba na towe tọn wutu.+ To awufiẹsa mẹ wẹ hiẹ na nọ mọ núdùdù sọn aigba mẹ te to gbẹzan towe lẹpo mẹ.+ 18 Owùn po tẹwùn po wẹ aigba na nọ wujẹgbonu na we, podọ omá danji tọn lẹ wẹ hiẹ na nọ dù. 19 Odẹ́n nukun towe tọn mẹ wẹ hiẹ na nọ dùnú te kaka hiẹ nado gọ̀ do aigba mẹ, na e mẹ wẹ hiẹ yin didesọn.+ Na kọ́gudu wẹ hiẹ podọ kọ́gudu mẹ wẹ hiẹ nasọ gọ̀ do.”+
20 Enẹgodo, Adam ylọ asi etọn dọ Evi,* na ewọ wẹ na lẹzun onọ̀ mẹhe tin togbẹ̀ lẹpo tọn.+ 21 Jehovah Jiwheyẹwhe sọ basi tewu ayú tọn lẹ na Adam po asi etọn po bosọ do tewu lọ lẹ na yé.+ 22 Jehovah Jiwheyẹwhe sọ dọmọ: “Pọ́n, gbẹtọ ko taidi míwlẹ todin gbọn yinyọ́n dagbe po oylan po dali.+ Podọ na ewọ ma nado doalọ sinsẹ́n atin ogbẹ̀ tọn+ lọ go bo dù bosọ nọgbẹ̀ kakadoi,*—” 23 Enẹwutu, Jehovah Jiwheyẹwhe yàn ẹn sọn jipa Edẹni+ tọn mẹ na e nido nọ pọ̀ aigba he mẹ ewọ yin didesọn.+ 24 Mọ wẹ e yàn gbẹtọ tọ́n do, bo ze kelubimi+ lẹ do whèzẹtẹn jipa Edẹni tọn podọ ohí he to miyọ́n-gbò bo to lilẹ́-lilẹ́ mapote de nado ṣọ́ aliho he yì atin ogbẹ̀ tọn lọ kọ̀n.
4 Adam sọ tindo kọndopọ zanhẹmẹ tọn hẹ asi etọn Evi bọ e mọhò.+ To whenue e ji Kaini,+ e dọmọ: “Yẹn ko ji visunnu de po alọgọ Jehovah tọn po.” 2 To nukọn mẹ, e sọ ji nọvisunnu etọn Abẹli.+
Abẹli sọ lẹzun kanlinyìntọ, bọ Kaini lẹzun glesi. 3 To ojlẹ de godo, Kaini hẹn sinsẹ́n glemẹ tọn delẹ wá taidi avọ́nunina de na Jehovah. 4 Abẹli lọsu hẹn delẹ to plọnji lẹ mẹ wá sọn lẹngbọpa+ etọn mẹ, gọna ojó yetọn lẹ. Enẹwutu, dile Jehovah to nukundagbe yí do pọ́n Abẹli po avọ́nunina etọn po,+ 5 e ma yí nukundagbe do pọ́n Kaini po avọ́nunina etọn po to aliho depope mẹ gba. Enẹwutu, Kaini gọ́ na adi, bosọ ylọn nukunmẹ.* 6 Whenẹnu wẹ Jehovah dọna Kaini dọmọ: “Naegbọn hiẹ do gọ́ na adi bosọ ylọn nukunmẹ? 7 Eyin hiẹ jẹ dagbewà ji, be yẹn ma na do nukundagbe hia we wẹ ya?* Ṣigba eyin hiẹ ma jẹ dagbewà ji, ylando pavava to họntonu towe, podọ ojlo sinsinyẹn etọn na duto ji we; ṣigba be hiẹ na dohuhlọn do e ji ya?”
8 Enẹgodo, Kaini dọna nọvisunnu etọn Abẹli dọmọ: “Gbọ mí ni yì danji.” Podọ, dile yé to danji wẹ Kaini linú nọvisunnu etọn Abẹli bo hù i.+ 9 To whenẹnu, Jehovah dọna Kaini dọmọ: “Fie wẹ nọvisunnu towe Abẹli te?” ewọ sọ dọmọ: “Yẹn ma yọ́n fihe e te. Be yẹn wẹ nọvisunnu ṣie ṣọ́tọ ya?” 10 Enẹwutu, Jiwheyẹwhe sọ gblọn dọmọ: “Etẹ die he hiẹ ko wà? Dotoai! Ohùn nọvisunnu towe tọn to awhádo sọn aigba wá dè e.+ 11 Podọ todin, hiẹ yin mẹhodẹ̀do bo yin yinyan dogbé sọn lẹdo aigba tọn he ko kẹ̀ onù etọn bo yí ohùn nọvisunnu towe tọn sọn alọ towe mẹ lọ ji.+ 12 Eyin hiẹ pọ̀gle, e ma na de sinsẹ́n* susu tọ́n na we. Hiẹ na nọ dánpe bo nasọ họ̀njẹgbé to aigba ji.” 13 Kaini sọ dọna Jehovah dọmọ: “Yasanamẹ nuṣiwa ṣie tọn ko sinyẹn gbau nado doakọnna. 14 Hiẹ to yinyan mi to egbé sọn lẹdo aigba lọ tọn ji,* podọ yẹn ma nasọ tin to nukọn towe ba; yẹn nasọ nọ dánpe bo nasọ họ̀njẹgbé to aigba ji, podọ e họnwun dọ mẹdepope he pé mi na hù mi.” 15 Jehovah sọ dọna Kaini dọmọ: “Na ehe wutu, mẹdepope he na hù Kaini, yè na yiahọsu to e go whla ṣinawe.”
Enẹwutu, Jehovah wleawu ohia de tọn* na Kaini, na mẹdepope he pé e ma nado hù i. 16 Kaini sọ tọ́n sọn Jehovah nukọn bo yì sawhé do aigba Gbéjininọ tọn* ji to whèzẹtẹn Edẹni+ tọn.
17 Enẹgodo, Kaini tindo kọndopọ zanhẹmẹ tọn hẹ asi+ etọn bọ ewọ sọ mọhò bo ji Enọku. E sọ do tòdaho de ai bo do oyín visunnu etọn tọn Enọku na ẹn. 18 To nukọn mẹ, Enọku ji Iladi. Iladi sọ ji Mẹhujaẹli, Mẹhujaẹli sọ ji Mẹtuṣaẹli podọ Mẹtuṣaẹli ji Lamẹki.
19 Lamẹki sọ dà asi awe. Asi tintan nọ yin Ada podọ awetọ nọ yin Zilla. 20 Ada sọ ji Jabali. Ewọ wẹ tọgbo mẹhe nọ nọ̀ gòhọ lẹ mẹ bo nọ yìn kanlin lẹ tọn. 21 Podọ oyín nọvisunnu etọn tọn wẹ Jubali. Ewọ wẹ tọgbo mẹhe nọ hò ajalẹn bo nọ kúnván lẹpo tọn. 22 Zilla sọ ji Tubali-kaini, mẹhe yin ayatọ gànvẹẹ po gànyuu wunmẹ lẹpo po tọn. Podọ nọviyọnnu Tubali-kaini tọn wẹ Naama. 23 Lamẹki sọ pà hogbe ehelẹ na asi etọn lẹ, yèdọ Ada po Zilla po dọmọ:
“Mì sè ogbè ṣie, mì asi Lamẹki tọn lẹ emi;
Mì na otó nuhe dọ yẹn te lẹ:
Yẹn ko hù dawe de he gbleawuna mi,
Mọwẹ, yèdọ dẹpẹ de, na e linú mi wutu.
24 Eyin whla 7 wẹ yè na yiahọsu to mẹhe na hù Kaini go,+
To whenẹnu, yè na yiahọsu to mẹhe na hù Lamẹki go whla 77.”
25 Adam sọ tindo kọndopọ zanhẹmẹ tọn hẹ asi etọn whladopo dogọ, bọ ewọ ji visunnu de. E* sọ ylọ oyín etọn dọ Ṣẹti,*+ bo dọmọ: “Jiwheyẹwhe ko de kúnkan* devo do otẹn Abẹli tọn mẹ na mi, na Kaini ko hù i+ wutu.” 26 Podọ visunnu de yin jiji na Ṣẹti bọ e ylọ oyín etọn dọ Enọṣi.+ To ojlẹ enẹ mẹ, gbẹtọ lẹ ko jẹ oyín Jehovah tọn ylọ ji.*
5 Ehe wẹ kandai otàn Adam tọn. To azán he gbè Jiwheyẹwhe dá Adam, e basi i to apajlẹ edetiti tọn mẹ.+ 2 E dá yé sunnu de yọnnu de.+ Podọ to gbeegbe ewọ dá yé,+ e dona yé bo ylọ yé dọ Gbẹtọ.*
3 Adam nọgbẹ̀ na owhe 130, enẹgodo e ji visunnu de he taidi ewọ, to apajlẹ etọn mẹ, bo ylọ oyín etọn dọ Ṣẹti.+ 4 To whenue e ko ji Ṣẹti godo, Adam sọ nọgbẹ̀ na owhe 800. E sọ ji visunnu lẹ po viyọnnu lẹ po. 5 Podọ ojlẹ he Adam nọgbẹ̀ na lẹpo yin owhe 930, bọ e sọ kú.+
6 Ṣẹti nọgbẹ̀ na owhe 105, enẹgodo e ji Enọṣi.+ 7 To whenue e ko ji Enọṣi godo, Ṣẹti sọ nọgbẹ̀ na owhe 807. E sọ ji visunnu lẹ po viyọnnu lẹ po. 8 Podọ ojlẹ he Ṣẹti nọgbẹ̀ na lẹpo yin owhe 912, bọ e sọ kú.
9 Enọṣi nọgbẹ̀ na owhe 90, enẹgodo e ji Kẹnani. 10 To whenue e ko ji Kẹnani godo, Enọṣi sọ nọgbẹ̀ na owhe 815. E sọ ji visunnu lẹ po viyọnnu lẹ po. 11 Podọ ojlẹ he Enọṣi nọgbẹ̀ na lẹpo yin owhe 905, bọ e sọ kú.
12 Kẹnani nọgbẹ̀ na owhe 70, enẹgodo e ji Mahalalẹli.+ 13 To whenue e ko ji Mahalalẹli godo, Kẹnani sọ nọgbẹ̀ na owhe 840. E sọ ji visunnu lẹ po viyọnnu lẹ po. 14 Podọ ojlẹ he Kẹnani nọgbẹ̀ na lẹpo yin owhe 910, bọ e sọ kú.
15 Mahalalẹli nọgbẹ̀ na owhe 65, enẹgodo e ji Jalẹdi.+ 16 To whenue e ko ji Jalẹdi godo, Mahalalẹli sọ nọgbẹ̀ na owhe 830. E sọ ji visunnu lẹ po viyọnnu lẹ po. 17 Podọ ojlẹ he Mahalalẹli nọgbẹ̀ na lẹpo yin owhe 895, bọ e sọ kú.
18 Jalẹdi nọgbẹ̀ na owhe 162, enẹgodo e ji Enọku.+ 19 To whenue e ko ji Enọku godo, Jalẹdi sọ nọgbẹ̀ na owhe 800. E sọ ji visunnu lẹ po viyọnnu lẹ po. 20 Podọ ojlẹ he Jalẹdi nọgbẹ̀ na lẹpo yin owhe 962, bọ e sọ kú.
21 Enọku nọgbẹ̀ na owhe 65, enẹgodo e ji Mẹtusela.+ 22 To whenue Enọku ko ji Mẹtusela godo, e zinzọnlin hẹ Jiwheyẹwhe nugbo lọ* madoalọte na owhe 300. E sọ ji visunnu lẹ po viyọnnu lẹ po. 23 Podọ ojlẹ he Enọku nọgbẹ̀ na lẹpo yin owhe 365. 24 Enọku sọ zinzọnlin hẹ Jiwheyẹwhe nugbo lọ madoalọte.+ Enẹgodo, yè masọ mọ ẹn ba, na Jiwheyẹwhe ko yí i+ wutu.
25 Mẹtusela nọgbẹ̀ na owhe 187, enẹgodo e ji Lamẹki.+ 26 To whenue e ko ji Lamẹki godo, Mẹtusela sọ nọgbẹ̀ na owhe 782. E sọ ji visunnu lẹ po viyọnnu lẹ po. 27 Podọ ojlẹ he Mẹtusela nọgbẹ̀ na lẹpo yin owhe 969, bọ e sọ kú.
28 Lamẹki nọgbẹ̀ na owhe 182, enẹgodo e ji visunnu de. 29 E sọ ylọ oyín etọn dọ Noa,*+ bo dọmọ: “Ewọ wẹ na hẹn homẹmiọnnamẹ* wá na mí sọn azọ́n sinsinyẹn mítọn lẹ mẹ podọ sọn tuklajijẹ alọ mítọn lẹ tọn mẹ na aigba he Jehovah ko hodẹ̀do+ lọ tọn wutu.” 30 To whenue e ko ji Noa godo, Lamẹki sọ nọgbẹ̀ na owhe 595. E sọ ji visunnu lẹ po viyọnnu lẹ po. 31 Podọ ojlẹ he Lamẹki nọgbẹ̀ na lẹpo yin owhe 777, bọ e sọ kú.
32 To whenue Noa ko tindo owhe 500 godo, e ji Ṣẹmi,+ Ham+ po Jafẹti+ po.
6 To whenue sọha gbẹtọ lẹ tọn jẹ susu ji to aigba ji bọ yé sọ to viyọnnu lẹ ji, 2 whenẹnu wẹ visunnu Jiwheyẹwhe nugbo lọ tọn lẹ*+ jẹ ayidego ji dọ viyọnnu gbẹtọ tọn lẹ yọnwhanpẹ. Enẹwutu, yé sọ plan yọnnu lẹ taidi asi, dile e jlo yé do. 3 Whenẹnu wẹ Jehovah dọmọ: “Gbigbọ ṣie ma na sinyẹnlin hẹ gbẹtọ kakadoi,+ na agbasalan poun wẹ e yin wutu.* Enẹwutu, azán etọn lẹ na yin owhe 120.”+
4 Nẹfilimi* lẹ sọ tin to aigba ji to azán enẹlẹ gbè podọ to azán enẹlẹ godo. To ojlẹ enẹ mẹ, visunnu Jiwheyẹwhe nugbo lọ tọn lẹ nọ to kọndopọ zanhẹmẹ tọn tindo hẹ viyọnnu gbẹtọ tọn lẹ bọ yé sọ ji visunnu lẹ na yé. Nẹfilimi lọ lẹ wẹ omẹ huhlọnnọ lẹ podọ mẹhe diyin to hohowhenu lẹ.
5 Jehovah sọ mọdọ kanyinylan gbẹtọ tọn sù tlala to aigba ji podọ oylan kẹdẹ wẹ ayilinlẹn ahun etọn mẹ tọn to whepoponu.+ 6 E sọ vẹna* Jehovah dọ e ko dá gbẹtọ do aigba ji, e sọ doadi na ẹn*+ to ahun etọn mẹ. 7 Enẹwutu, Jehovah dọmọ: “Yẹn na súnsún gbẹtọ he yẹn ko dá lẹ sẹ̀ sọn aigba nukunmẹ, yèdọ bẹsọn gbẹtọ ji kakajẹ kanlin whégbè tọn, kanlin he nọ sẹtẹn lẹ po nudida he nọ zlọn to agahomẹ lẹ po ji, na e vẹna mi dọ yẹn ko dá yé.” 8 Etomọṣo, Noa mọ nukundagbe Jehovah tọn.
9 Ehe wẹ otàn Noa tọn.
Noa yin dawe dodonọ de.+ E yin madoblọnọ* to mẹhe nọgbẹ̀ to ojlẹ dopolọ mẹ hẹ ẹ* lẹ ṣẹnṣẹn. Noa sọ zinzọnlin hẹ Jiwheyẹwhe nugbo lọ.+ 10 Noa sọ ji visunnu atọ̀n, yèdọ Ṣẹmi, Ham po Jafẹti+ po. 11 Aigba sọ gblezọn bosọ gọ́ na danuwiwa to nukun Jiwheyẹwhe nugbo lọ tọn mẹ. 12 Jiwheyẹwhe sọ pọ́n aigba hlan bo mọdọ e ko gblezọn;+ na agbasalan* lẹpo ko hẹn aliho yetọn gblezọn to aigba ji+ wutu.
13 To enẹgodo, Jiwheyẹwhe dọna Noa dọmọ: “Yẹn ko de nado hẹn nutogbẹ̀ lẹpo wá opodo na aigba ko gọ́ na danuwiwa na gbẹtọ lẹ tọn wutu, enẹwutu yẹn na và gbẹtọ lẹ sudo bosọ hẹn aigba jẹvọ́.+ 14 Yí atin gofa tọn* do basi aki* de.+ Hiẹ nasọ basi abò lẹ do aki lọ mẹ, bo nasọ sá osẹ̀n pinpẹn+ do ohò etọn mẹ podọ do gbonu etọn. 15 Lehe hiẹ na basi i do die: Tedidi etọn na yin awagbà* 300, gbigblo etọn na yin awagbà 50 podọ jiyiyi etọn na yin awagbà 30. 16 Hiẹ nasọ basi fleṣe* do aki lọ go, ehe na yin nùvo awagbà dopo tọn sọn aga na hinhọ́n nido tin. Hiẹ nasọ basi họntonu aki lọ tọn do adà etọn mẹ,+ podọ petlezìn atọ̀nnọ wẹ hiẹ na yí i do basi.
17 “Yẹn nasọ hẹn singigọ+ de wá aigba ji nado hù agbasalan he mẹ gbọfufu* ogbẹ̀ tọn tin te to olọn glọ lẹpo sudo. Podọ nuhe tin to aigba ji lẹpo wẹ na kú.+ 18 Yẹn sọ to alẹnu de basi hẹ we, hiẹ, visunnu towe lẹ, asi towe po asi visunnu towe lẹ tọn po nasọ biọ aki lọ mẹ.+ 19 Hiẹ nasọ de awe-awe sọn nudida gbẹ̀te wunmẹ lẹpo mẹ,+ yèdọ asu de asi de, bo na plan yé biọ aki lọ mẹ nado hẹn yé dogbẹ̀;+ 20 nudida he nọ zlọn lẹ sọgbe hẹ wunmẹ yetọn, kanlin whégbè tọn lẹ sọgbe hẹ wunmẹ yetọn, kanlin he nọ lìn to aigba ji lẹpo sọgbe hẹ wunmẹ yetọn, awe-awe yetọn wẹ na biọ e mẹ na hiẹ nido hẹn yé dogbẹ̀.+ 21 Podọ hiẹ na bẹ núdùdù wunmẹ lẹpo pli;+ yé nasọ yin núdùdù na hiẹ podọ na kanlin lọ lẹ.”
22 Noa sọ basi sọgbe hẹ nuhe Jiwheyẹwhe ko degbena ẹn lẹpo. E wà domọ pẹpẹ.+
7 Enẹgodo, Jehovah dọna Noa dọmọ: “Biọ aki lọ mẹ, hiẹ po whédo towe lẹpo po, na hiẹ wẹ yẹn mọ di dodonọ to whẹndo ehe ṣẹnṣẹn.+ 2 Hiẹ nasọ yí ṣinawe to kanlin wiwe lẹ mẹ,*+ asu de asi de; podọ awe poun to kanlin he ma wé lẹ mẹ, asu de asi de; 3 podọ ṣinawe* to nudida he nọ zlọn to agahomẹ lẹ mẹ, asu de asi de, nado pò okún yetọn dogbẹ̀ to aigba blebu ji.+ 4 Na azán ṣinawe dogọ todin, yẹn na ja jikun+ do aigba ji na okle 40 ozán 40,+ yẹn nasọ súnsún nutogbẹ̀ he yẹn ko basi lẹpo sẹ̀ sọn aigba nukunmẹ.”+ 5 Noa sọ basi sọgbe hẹ nuhe Jehovah ko degbena ẹn lẹpo.
6 Noa sọ yin owhe 600 mẹvi to whenue singigọ wá aigba ji.+ 7 Noa, visunnu etọn lẹ, asi etọn po asi visunnu etọn lẹ tọn po sọ biọ aki lọ mẹ whẹpo singigọ lọ do bẹjẹeji.+ 8 Kanlin wiwe lẹpo po kanlin he ma wé lẹpo po podọ nudida he nọ zlọn gọna nuhe nọ sẹtẹn to aigba ji lẹpo,+ 9 yé sọ biọ aki lọ mẹ yì Noa dè awe-awe, asu de asi de, kẹdẹdile Jiwheyẹwhe ko degbena Noa do. 10 Podọ to azán ṣinawe godo, singigọ lọ sọ wá aigba ji.
11 To owhe 600tọ Noa tọn mẹ, to osun awetọ, azán 17tọ osun lọ tọn mẹ, asisa osin daho-gbó* de tọn kọ̀n jẹgbonu bọ dogbó osin olọn tọn lẹ tọn sọ hùn.+ 12 Podọ jikun daho-gbó sọ ja do aigba ji na okle 40 ozán 40. 13 To azán enẹ gbè, Noa podọ visunnu etọn lẹ, yèdọ Ṣẹmi, Ham po Jafẹti+ po, gọna asi etọn po asi atọ̀n visunnu etọn lẹ tọn po sọ biọ aki lọ mẹ.+ 14 Yé sọ biọ e mẹ po gbekanlin lẹpo po sọgbe hẹ wunmẹ yetọn, podọ kanlin whégbè tọn lẹpo sọgbe hẹ wunmẹ yetọn, podọ kanlin he nọ lìn to aigba ji lẹpo sọgbe hẹ wunmẹ yetọn, podọ nudida he nọ zlọn lẹpo sọgbe hẹ wunmẹ yetọn, ohẹ̀ lẹpo, gọna nudida he tindo awà lẹpo. 15 Awe-awe yetọn sọ to Noa dè yì to aki lọ mẹ, yèdọ agbasalan wunmẹ lẹpo he mẹ gbọfufu* ogbẹ̀ tọn tin te. 16 Yé sọ to bibiọ e mẹ asu de asi de, yèdọ agbasalan wunmẹ lẹpo, kẹdẹdile Jiwheyẹwhe ko degbena ẹn do. To enẹgodo Jehovah sú ohọ̀n lọ.
17 Jikun lọ sọ to jijà do aigba ji na azán 40, bọ osin sọ to gigọ́ bo to aki lọ zedaga bọ e to dindanpe to osin nukunmẹ to aga na aigba. 18 Osin lọ sọ gọ́ tlala bo gbọṣi aigba nukunmẹ, bọ aki lọ fò to osin nukunmẹ. 19 Osin sọ gọ́ aigba ji tlala sọmọ bọ e ṣinyọ́n osó he yiaga to olọn glọ lẹpo ji.+ 20 Osin sọ yiaga zẹ̀ osó lẹ go na awagbà* 15.
21 Enẹwutu, nutogbẹ̀* he nọ sẹtẹn to aigba ji lẹpo—yèdọ nudida he nọ zlọn lẹ, kanlin whégbè tọn lẹ, gbekanlin lẹ, podọ kanlin flinflin* lẹpo he to aigba ji gọna gbẹtọvi lẹpo+ wẹ kú.+ 22 Nuhe tin to aigba-klo ji he mẹ gbọfufu* ogbẹ̀ tọn tin te lẹpo wẹ kú.+ 23 Gbọnmọ dali, Ewọ súnsún nutogbẹ̀ lẹpo sẹ̀ sọn aigba nukunmẹ, bẹsọn gbẹtọ ji kakajẹ kanlin ji, kanlin he nọ lìn lẹ, nudida he nọ zlọn to agahomẹ lẹ. Yemẹpo wẹ yin zizasẹ sọn aigba ji;+ Noa po mẹhe tin po e po to aki lọ mẹ lẹ kẹdẹ wẹ luntọ́n.+ 24 Osin sọ gbọṣi aigba ji na azán 150.+
8 Ṣigba, Jiwheyẹwhe lẹ́ ayidonugo etọn hlan* Noa po gbekanlin lẹpo po gọna kanlin whégbè tọn he tin to aki lọ mẹ hẹ ẹ lẹ,+ Jiwheyẹwhe sọ hẹn jẹhọn de yìn do aigba ji bọ osin lọ sọ jẹ doyi ji. 2 Podọ asisa osin daho-gbó po dogbó osin olọn tọn lẹ po yin alọdotena, bọ jikun he sọn olọn lọ sọ kẹ̀n.*+ 3 Osin sọ jẹ húhú ji vudevude sọn aigba ji. Podọ to vivọnu azán 150 tọn, osin lọ ko depò. 4 To osun ṣinawetọ, azán 17tọ osun lọ tọn mẹ, aki lọ wá glin do osó Alalati tọn ji. 5 Osin lọ sọ to doyi vudevude kakajẹ osun aotọ mẹ. To osun aotọ, azán tintan osun lọ tọn mẹ, aga osó lẹ tọn sọawuhia.+
6 Podọ to azán 40 godo, Noa hùn fleṣe+ he e ko basi do aki lọ go 7 e sọ do ohọ́n de hlan; bọ e nọ to zinzlọn to gbonu, bo nọ to yìyì bosọ nọ to gigọ̀, kakajẹ whenue osin hú sọn aigba ji.
8 Enẹgodo, e sọ do apoe de hlan gbonu nado yọnẹn eyin osin ko yìdo to aigba nukunmẹ. 9 Apoe lọ masọ mọ fidepope he e na jẹ do,* enẹwutu e lẹkọwa e dè na osin gbẹ́ pò to aigba blebu nukunmẹ+ wutu. E sọ dlẹnalọ etọn bo ze e bosọ gọ̀ ẹ do aki lọ mẹ. 10 E sọ nọte na azán ṣinawe dogọ, bosọ do apoe lọ hlan gbonu whladopo dogọ. 11 Enẹgodo, to nudi whèjai nkọ, apoe lọ lẹkọwa e dè, bọ ewọ mọdọ amà olivie tọn he e ṣẹṣẹ kẹ́n de tin to obẹ́ etọn nù! Enẹwutu, Noa yọnẹn dọ osin ko yìdo to aigba ji.+ 12 E sọ nọte na azán ṣinawe devo. Enẹgodo, e do apoe lọ hlan gbonu, amọ́ e masọ lẹkọwa e dè ba.
13 To owhe 601tọ,+ osun tintan, azán tintan osun lọ tọn mẹ, osin hú sọn aigba ji; Noa sọ de nùvo de gbọn họta aki lọ tọn bo mọdọ aigba nukunmẹ ko to húhú. 14 Podọ to osun awetọ, azán 27tọ osun lọ tọn mẹ, aigba ko hú pete.
15 Whenẹnu wẹ Jiwheyẹwhe dọna Noa dọmọ: 16 “Tọ́n sọn aki lọ mẹ, hiẹ, asi towe, visunnu towe lẹ po asi visunnu towe lẹ tọn po.+ 17 Nudida gbẹ̀te wunmẹ lẹpo, yèdọ nudida he nọ zlọn lẹ, kanlin lẹ podọ kanlin he nọ lìn to aigba ji lẹpo, hẹn yé jẹgbonu,+ na yé nido jideji bo yin sinsẹ́nnọ bosọ sudeji to aigba ji.”+
18 Enẹwutu, Noa tọ́njẹgbonu, to pọmẹ hẹ visunnu etọn lẹ+ po asi etọn po gọna asi visunnu etọn lẹ tọn. 19 Nudida gbẹ̀te lẹpo, kanlin he nọ lìn lẹpo, nudida he nọ zlọn lẹpo, yèdọ nuhe nọ sẹtẹn to aigba ji lẹpo sọ tọ́njẹgbonu sọn aki lọ mẹ sọgbe hẹ wunmẹ yetọn.+ 20 Whenẹnu, Noa sọ basi agbà+ de na Jehovah bo yí delẹ to kanlin wiwe lẹpo mẹ podọ to nudida wiwe he nọ zlọn lẹpo mẹ+ bo yí do na avọ́nunina mimẹ̀ to agbà lọ ji.+ 21 Jehovah sọ jẹ owán gblingblin* de sè ji. Enẹwutu, Jehovah dọ to ahun etọn mẹ dọmọ: “Yẹn ma nasọ hodẹ̀do* aigba,+ na gbẹtọ tọn wutu gbede ba, na oylan wẹ ayilinlẹn ahun gbẹtọ tọn sọn ovu whenu etọn gbọ́n;+ yẹn ma nasọ hù nutogbẹ̀ lẹpo sudo dile yẹn ko basi do gbede ba.+ 22 Bẹsọn din sọyi, jinukun dido po jibẹwawhé po, fifá po yozò po, alunlun po avivọ-whenu po podọ okle po ozán po, ma na doalọte gbede to aigba ji.”+
9 Jiwheyẹwhe sọ dona Noa po visunnu etọn lẹ po bo dọna yé dọmọ: “Mì yin sinsẹ́nnọ bo sudeji bosọ gọ́ aigba ji.+ 2 Podọ nudida gbẹ̀te he to aigba ji lẹpo, nudida he nọ zlọn to agahomẹ lẹpo, yèdọ nuhe nọ sẹtẹn to aigba ji lẹpo gọna whèvi hùmẹ tọn lẹpo na nọ dibuna mì bo nasọ nọ jọsi to nukọn mìtọn. Mì nasọ dugán do yé ji.+ 3 Kanlin he togbẹ̀ bo nọ sẹtẹn lẹpo na yin núdùdù na mì.+ Kẹdẹdile yẹn ko na mì amamú do, mọ wẹ yẹn sọ na mì ehe lẹpo do niyẹn.+ 4 Adavo olàn po ogbẹ̀* etọn po—ohùn etọn+—mì ma dona dù gba.+ 5 Gbọnvona enẹ, yẹn na yiahọsu ohùn mìtọn he yin ogbẹ̀ mìtọn tọn.* Yẹn na yiahọsu to nudida gbẹ̀te he sọ̀n ohùn gbẹtọ tọn dai lẹpo si; podọ mẹdepope he na sọ̀n ohùn nọvisunnu etọn tọn dai, yẹn nasọ yiahọsu alindọn nọvisunnu etọn tọn to e si.+ 6 Mẹdepope he sọ̀n ohùn gbẹtọ tọn dai, gbọn gbẹtọ dali wẹ ohùn ewọ lọsu tọn na yin sinsọndai,+ na Jiwheyẹwhe dá gbẹtọ to apajlẹ ede tọn mẹ+ wutu. 7 Podọ na mìwlẹ tọn, mì yin sinsẹ́nnọ bo sudeji, bosọ gọ́ aigba ji bo jideji.”+
8 Jiwheyẹwhe sọ dọna Noa po visunnu etọn lẹ po dọmọ: 9 “Yẹn to alẹnu de basi hẹ mì+ podọ hẹ kúnkan mìtọn, 10 podọ hẹ nudida* gbẹ̀te he tin hẹ mì lẹpo, yèdọ ohẹ̀ lẹ, kanlin lẹ, nudida gbẹ̀te he nọ nọ̀ aigba ji lẹpo, yemẹpo he tọ́n sọn aki lọ mẹ po okún yetọn lẹpo po.+ 11 Mọwẹ, yẹn to alẹnu de basi hẹ mì: Agbasalan* lẹpo ma nasọ yin vivasudo gbọn singigọ de dali gbede ba, podọ singigọ de ma nasọ hù aigba sudo gbede ba.”+
12 Jiwheyẹwhe sọ yidogọ dọmọ: “Ehe wẹ ohia alẹnu he yẹn to bibasi to yẹn, mìwlẹ po nudida* gbẹ̀te lẹpo po ṣẹnṣẹn tọn, yèdọ na whẹndo he na bọdego to sọgodo lẹpo. 13 Yẹn yí aidowhẹdo ṣie do aslọ mẹ, e nasọ yin ohia de na alẹnu lọ he tin to yẹn po aigba po ṣẹnṣẹn. 14 Podọ eyin e wá jọ bọ yẹn hẹn aslọ ṣinyọ́n aigba, whenẹnu wẹ aidowhẹdo na nọ sọawuhia to aslọ mẹ. 15 Yẹn nasọ flin alẹnu ṣie he yẹn basi hẹ mìwlẹ podọ hẹ nudida gbẹ̀te wunmẹ lẹpo;* podọ osin ma nasọ lẹzun singigọ nado và agbasalan lẹpo sudo gbede ba.+ 16 Aidowhẹdo lọ nasọ nọ sọawuhia to aslọ mẹ, yẹn nasọ nọ mọ ẹn bo na nọ flin alẹnu kakadoi he tin to Jiwheyẹwhe po nudida gbẹ̀te wunmẹ lẹpo* he to aigba ji po ṣẹnṣẹn.”
17 Jiwheyẹwhe sọ dọna Noa whladopo dogọ dọmọ: “Ehe wẹ ohia alẹnu he yẹn doai to yẹn po agbasalan he tin to aigba ji lẹpo po ṣẹnṣẹn tọn.”+
18 Ṣẹmi, Ham po Jafẹti po wẹ visunnu Noa tọn he tọ́n sọn aki lọ mẹ hẹ ẹ lẹ.+ To nukọn mẹ, Ham wá ji Kenani.+ 19 Yé omẹ atọ̀n lẹ wẹ yin visunnu Noa tọn lẹ, podọ kúnkan yetọn wẹ gbàpe gbọn aigba lẹpo ji.+
20 Todin, Noa lẹzun glesi bo lẹ̀ vẹngle de. 21 E sọ wá jọ bọ e nù ovẹn-mú, bo de avọ̀ sọn ogo to gòhọ etọn mẹ. 22 Podọ Ham he yin otọ́ Kenani tọn mọ omẹ́ otọ́ etọn tọn bo yì dọna nọvisunnu etọn awe he to gbonu lẹ. 23 Ṣẹmi po Jafẹti po sọ yí awugbó de bo ze e do abọ́ yetọn lẹ ji bosọ zọ̀n agọ̀-agọ̀ yì gòhọ lọ mẹ. Yé sọ ze nukun yetọn lẹ do fidevo, bo ṣinyọnnudo omẹ́ otọ́ yetọn tọn bo masọ mọ omẹ́ etọn.
24 To whenue ovẹn lọ họ́n na Noa, bọ e wá yọ́n nuhe visunnu etọn pẹvi pete lọ ko wà na ẹn, 25 e dọmọ:
“Mẹhodẹ̀do wẹ Kenani.+
Na ewọ ni yin afanumẹ he yìdo hugan na nọvisunnu etọn lẹ.”+
26 E sọ yidogọ dọmọ:
“Opẹ́ wẹ na Jehovah, yèdọ Jiwheyẹwhe Ṣẹmi tọn,
Podọ na Kenani ni lẹzun afanumẹ de na ẹn.+
27 Na Jiwheyẹwhe ni na nọtẹn daho tlala Jafẹti,
Podọ na ewọ ni nọ nọ̀ gòhọ Ṣẹmi tọn lẹ mẹ.
Na Kenani ni lẹzun afanumẹ etọn ga.”
28 Noa sọ nọgbẹ̀ dogọ na owhe 350 to Singigọ lọ godo.+ 29 Ojlẹ he Noa nọgbẹ̀ na lẹpo yin owhe 950, bọ e sọ kú.
10 Ehe sọ wẹ otàn visunnu Noa tọn lẹ tọn, yèdọ Ṣẹmi,+ Ham po Jafẹti po.
To Singigọ lọ godo, visunnu lẹ yin jiji na yé.+ 2 Visunnu Jafẹti tọn lẹ wẹ Gomẹli,+ Magọgi,+ Madai, Javani, Tubali,+ Meṣẹki+ po Tilasi+ po.
3 Visunnu Gomẹli tọn lẹ wẹ Aṣkenazi,+ Lifati po Togalma+ po.
4 Visunnu Javani tọn lẹ wẹ Eliṣahi,+ Talṣiṣi,+ Kitimi+ po Dodanimi po.
5 Yewlẹ mẹ wẹ mẹhe nọ nọ̀ lopo lẹ ji lẹ wá sọn bo gbàpe gbọn aigba yetọn lẹ ji, sọgbe hẹ ogbè yetọn lẹ, whẹndo yetọn lẹ po akọta yetọn lẹ po.
6 Visunnu Ham tọn lẹ wẹ Kuṣi, Mizlaimi,+ Puti+ po Kenani+ po.
7 Visunnu Kuṣi tọn lẹ wẹ Seba,+ Havila, Sabta, Laama+ po Sabteka po.
Visunnu Laama tọn lẹ wẹ Ṣeba po Dedani po.
8 Kuṣi sọ ji Nimlọdi. Ewọ wẹ omẹ tintan he lẹzun gbẹtọ asuka to aigba ji. 9 E yin gbéyantọ asuka bosọ jẹagọdo Jehovah. Nuhe zọ́n niyẹn bọ aṣagbe lọ do tin dọmọ: “Kẹdẹdi Nimlọdi gbéyantọ asuka he jẹagọdo Jehovah.” 10 Bẹjẹeji ahọluduta etọn tọn wẹ* Babẹli,+ Elẹki,+ Akadi po Kalne po, to aigba Ṣinali tọn ji.+ 11 E sọ tọ́n sọn aigba enẹ ji bo yì Asilia+ bo do Nineve,+ Lehobọti-Ili po Kala po ai, 12 gọna Leseni he tin to Nineve po Kala po ṣẹnṣẹn: Ehe wẹ tòdaho-gbó lọ.*
13 Mizlaimi sọ ji Ludi,+ Anamimi, Lehabimi, Naftuhimi,+ 14 Patlusimi,+ Kasluhimi (mẹhe mẹ Filistinu lẹ+ wá sọn) po Kaftolimi po.*+
15 Kenani sọ ji Sidoni+ he yin plọnji etọn po Heti po,+ 16 gọna Jẹbusinu lẹ,+ Amolinu lẹ,+ Gilgaṣinu lẹ, 17 Hivinu lẹ,+ Alikinu lẹ, Sininu lẹ, 18 Alvadinu lẹ,+ Zemalinu lẹ po Hamatinu lẹ+ po. Enẹgodo, whẹndo Kenaninu lẹ tọn gbàpe. 19 Enẹwutu, dogbó Kenaninu lẹ tọn bẹsọn Sidoni kakajẹ Gelali,+ sẹpọ Gaza,+ podọ Sodọmi, Gomọla,+ Adma po Zeboimi+ po, sẹpọ Laṣa. 20 Yewlẹ wẹ visunnu Ham tọn lẹ sọgbe hẹ whẹndo he mẹ yé wá sọn lẹ, ogbè he yé nọ do lẹ, aigba he ji yé te lẹ podọ akọta he mẹ yé wá sọn lẹ.
21 Podọ na nuhe dù Ṣẹmi he yin ovi mẹho lọ, yèdọ tọgbo visunnu Ebeli+ tọn lẹpo tọn, mẹhe yin nọvisunnu* Jafẹti tọn, ewọ lọsu ji ovi lẹ ga. 22 Visunnu Ṣẹmi tọn lẹ wẹ Elami,+ Aṣuli,+ Alpakṣadi,+ Ludi po Alami+ po.
23 Visunnu Alami tọn lẹ wẹ Uzi, Hul, Getẹli po Maṣi po.
24 Alpakṣadi sọ ji Ṣela,+ bọ Ṣela ji Ebeli.
25 Visunnu awe wẹ yin jiji na Ebeli. Dopo nọ yin Pelẹgi,*+ na to ojlẹ etọn mẹ wẹ aigba* yin mimá te. Nọvisunnu etọn nọ yin Jọktani.+
26 Jọktani sọ ji Almodadi, Ṣelẹfi, Hazalmavẹti, Jela,+ 27 Hadolami, Uzali, Dikla, 28 Obali, Abimaẹli, Ṣeba, 29 Ofili,+ Havila po Jobabi po; omẹ ehe lẹpo wẹ yin visunnu Jọktani tọn lẹ.
30 Podọ aigba he ji yé nọ nọ̀ dlẹnkan sọn Meṣa kakajẹ Sefali, he yin lẹdo osó lẹ tọn to whèzẹtẹn.
31 Yewlẹ wẹ visunnu Ṣẹmi tọn lẹ sọgbe hẹ whẹndo he mẹ yé wá sọn lẹ, ogbè he yé nọ do lẹ, aigba he ji yé te lẹ podọ akọta he mẹ yé wá sọn lẹ.+
32 Omẹ ehelẹ wẹ whẹndo visunnu Noa tọn lẹ tọn sọgbe hẹ hukan whẹndo tọn yetọn lẹ po akọta yetọn lẹ po. Podọ gbọn yewlẹ gblamẹ wẹ akọta lẹ gbàpe gbọn aigba ji to Singigọ lọ godo.+
11 Todin, gbẹtọ he tin to aigba ji lẹpo nọ do ogbè dopolọ bosọ nọ yí hogbe dopolọ lẹ zan. 2 To whenuena yé zingbejizọnlin yì whèzẹtẹn-waji, yé mọ dankló de to aigba Ṣinali tọn ji,+ yé sọ gbọṣi finẹ. 3 Yé sọ dọna ode awetọ dọmọ: “Mì wá! Mì gbọ mí ni sún bliki lẹ bo yí miyọ́n do mẹ̀ yé.” Yé sọ yí bliki zan do zannu tẹnmẹ, bo yí osẹ̀n pinpẹn zan taidi nutlẹ́nu. 4 Yé sọ dọmọ: “Mì wá! Mì dike mí ni gbá tòdaho de na mídelẹ podọ atọ̀họ̀ de he na sọ́ olọn, podọ mí ni basi oyín ayidego tọn de na mídelẹ, na mí nikaa gbàpe gbọn aigba blebu nukunmẹ.”+
5 Whenẹnu wẹ Jehovah lẹ́ ayidonugo etọn hlan* tòdaho lọ po atọ̀họ̀ he gbẹtọvi lẹ ko gbá lọ po. 6 Jehovah sọ dọmọ: “Pọ́n! Yé yin akọta dopo bosọ nọ do ogbè dopolọ,+ podọ nuhe yé sọ jẹ wiwà ji niyẹn. Todin, nudepope ma tin he yé sọgan tindo to linlẹn mẹ he na glo yé ba. 7 Wá todin! Gbọ mí+ ni lẹ́ ayidonugo hlan yé bo wlu ogbè yetọn bọ yé ma nado mọnukunnujẹ ogbè ode awetọ tọn mẹ ba.” 8 Enẹwutu, Jehovah vúnvún yé pé sọn finẹ gbọn aigba blebu nukunmẹ,+ yé sọ doalọtena tòdaho lọ gbigbá. 9 Enẹ wẹ zọ́n bọ tòdaho lọ nọ yin yiylọdọ Babẹli,*+ na finẹ wẹ Jehovah wlu ogbè mẹhe tin to aigba lọ blebu ji lẹ tọn te, podọ Jehovah ko vúnvún yé pé sọn finẹ gbọn aigba blebu nukunmẹ.
10 Ehe wẹ otàn Ṣẹmi+ tọn.
Ṣẹmi tindo owhe 100 to whenuena e ji Alpakṣadi,+ yèdọ owhe awe to Singigọ lọ godo. 11 To whenue e ko ji Alpakṣadi godo, Ṣẹmi sọ nọgbẹ̀ na owhe 500. E sọ ji visunnu lẹ po viyọnnu lẹ po.+
12 Alpakṣadi nọgbẹ̀ na owhe 35, enẹgodo e ji Ṣela.+ 13 To whenue e ko ji Ṣela godo, Alpakṣadi sọ nọgbẹ̀ na owhe 403. E sọ ji visunnu lẹ po viyọnnu lẹ po.
14 Ṣela nọgbẹ̀ na owhe 30, enẹgodo e ji Ebeli.+ 15 To whenue e ko ji Ebeli godo, Ṣela sọ nọgbẹ̀ na owhe 403. E sọ ji visunnu lẹ po viyọnnu lẹ po.
16 Ebeli nọgbẹ̀ na owhe 34, enẹgodo e ji Pelẹgi.+ 17 To whenue e ko ji Pelẹgi godo, Ebeli sọ nọgbẹ̀ na owhe 430. E sọ ji visunnu lẹ po viyọnnu lẹ po.
18 Pelẹgi nọgbẹ̀ na owhe 30, enẹgodo e ji Leu.+ 19 To whenue e ko ji Leu godo, Pelẹgi sọ nọgbẹ̀ na owhe 209. E sọ ji visunnu lẹ po viyọnnu lẹ po.
20 Leu nọgbẹ̀ na owhe 32, enẹgodo e ji Selugi. 21 To whenue e ko ji Selugi godo, Leu sọ nọgbẹ̀ na owhe 207. E sọ ji visunnu lẹ po viyọnnu lẹ po.
22 Selugi nọgbẹ̀ na owhe 30, enẹgodo e ji Nahọli. 23 To whenue e ko ji Nahọli godo, Selugi sọ nọgbẹ̀ na owhe 200. E sọ ji visunnu lẹ po viyọnnu lẹ po.
24 Nahọli nọgbẹ̀ na owhe 29, enẹgodo e ji Tela.+ 25 To whenue e ko ji Tela godo, Nahọli sọ nọgbẹ̀ na owhe 119. E sọ ji visunnu lẹ po viyọnnu lẹ po.
26 Tela nọgbẹ̀ na owhe 70, enẹgodo e ji Ablam,+ Nahọli+ po Halani po.
27 Ehe wẹ otàn Tela tọn.
Tela ji Ablam, Nahọli po Halani po; podọ Halani sọ ji Lọti.+ 28 Halani sọ kú to otò he mẹ e yin jiji te, to Uli+ Kaldeanu+ lẹ tọn, to whenue Tela otọ́ etọn gbẹ́ pò togbẹ̀. 29 Ablam po Nahọli po sọ dà asi. Asi Ablam tọn nọ yin Salai,+ bọ asi Nahọli tọn nọ yin Milka,+ yèdọ viyọnnu Halani he yin otọ́ Milka po Iska po tọn. 30 Ṣigba, Salai yin wẹnsinọ;+ e masọ tindo ovi.
31 Tela sọ plan visunnu etọn Ablam po ovivi etọn Lọti po + he yin visunnu Halani tọn, gọna Salai ovisi etọn, yèdọ asi Ablam visunnu etọn tọn, yé sọ zọnhẹ ẹ tọ́n sọn Uli Kaldeanu lẹ tọn bo yì aigba Kenani tọn ji.+ To nukọn mẹ, yé wá Halani+ bosọ nọ nọ̀ finẹ. 32 Tela sọ nọgbẹ̀ na owhe 205. Enẹgodo, Tela kú to Halani.
12 Jehovah sọ dọna Ablam dọmọ: “Tọ́nyi sọn aigba towe ji, podọ sọn hẹnnumẹ towe lẹ dè podọ sọn owhé otọ́ towe tọn gbè bo yì aigba he yẹn na dohia we ji.+ 2 Yẹn nasọ yí we do basi akọta daho de, bo nasọ dona we bosọ hẹn oyín towe klo bọ hiẹ nasọ yin dona+ de na mẹdevo lẹ. 3 Yẹn nasọ dona mẹhe dona we lẹ, podọ ewọ he donù we wẹ yẹn na hodẹ̀do,+ podọ matin ayihaawe, whẹndo aigba ji tọn lẹpo na yin didona* gbọn hiẹ gblamẹ.”+
4 To whenẹnu wẹ Ablam tọ́nyi kẹdẹdile Jehovah ko dọna ẹn do, podọ Lọti sọ hodo e yì. Ablam sọ yin owhe 75 mẹvi to whenue e tọ́n sọn Halani.+ 5 Ablam sọ plan asi etọn Salai+ po Lọti tavẹ-ylọvi+ etọn po bosọ bẹ nutindo he yé ko bẹpli lẹpo+ gọna mẹhe* yé ko bẹpli to Halani lẹ, yé sọ wleali nado yì aigba Kenani tọn ji.+ To whenue yé jẹ aigba Kenani tọn ji, 6 Ablam sọ jugbọn aigba lọ ji kakajẹ fihe nọ yin yiylọdọ Ṣekẹmi,+ sẹpọ atin daho Molẹ tọn lẹ.+ Podọ Kenaninu lẹ wẹ nọ nọ̀ aigba lọ ji to ojlẹ enẹ mẹ. 7 To whenẹnu, Jehovah sọawuhia Ablam bo dọna ẹn dọmọ: “Kúnkan* towe+ wẹ yẹn na na aigba ehe.”+ Enẹwutu, ewọ basi agbà de do finẹ na Jehovah, yèdọ mẹhe ko sọawuhia ẹ. 8 To ojlẹ de godo, e sẹtẹn sọn finẹ yì lẹdo osó lẹ tọn de mẹ to whèzẹtẹn Bẹtẹli+ tọn bo tùn gòhọ etọn do Bẹtẹli po Ai+ po ṣẹnṣẹn, yèdọ Bẹtẹli to whèzẹtẹn podọ Ai to whèyihọ. E sọ basi agbà de do finẹ na Jehovah+ bo jẹ oyín Jehovah tọn ylọ ji.+ 9 Enẹgodo, Ablam sọ sẹtẹn bo zingbejizọnlin pànta Negẹb,*+ bosọ nọ to gòhọ tùn sọn fide jẹ fide.
10 Huvẹ de sọ wá aimẹ to aigba lọ ji bọ Ablam jẹ gbejizọnlin ji jei Egipti nado nọ finẹ na ojlẹ de,*+ na huvẹ lọ sinyẹn taun to aigba lọ ji wutu.+ 11 Podọ to whenue yé sẹpọ Egipti, e dọna Salai, asi etọn dọmọ: “Yẹn vẹ̀ we, dotoaina mi! Yẹn yọnẹn dọ yọnnu whanpẹnọ taun de wẹ hiẹ.+ 12 Enẹwutu, eyin Egiptinu lẹ mọ we, e họnwun dọ yé na dọ dọ, ‘Asi etọn die.’ Whenẹnu yé na hù mi, amọ́ yé na pò hiẹ dogbẹ̀. 13 Jaale bo dọ dọ nọviyọnnu ṣie wẹ a yin, na e nido yin dagbe na mi, na yè nido jo ogbẹ̀ ṣie do.”*+
14 Podọ tlolo he Ablam biọ Egipti wẹ Egiptinu lẹ mọdọ yọnnu lọ yọnwhanpẹ taun. 15 Ahọvi Falo tọn lẹ lọsu sọ mọ ẹn bo jẹ pipà ẹ ji to Falo dè, sọmọ bọ yọnnu lọ yin hinhẹn yì owhé Falo tọn gbè. 16 E sọ do homẹdagbe hia Ablam na yọnnu lọ tọn wutu, bosọ na ẹn lẹngbọ lẹ, oyìnsú lẹ, kẹtẹkẹtẹ asu lẹ, kẹtẹkẹtẹ asi lẹ, kanklosọ́ lẹ gọna devisunnu lẹ po deviyọnnu lẹ po.+ 17 Whenẹnu wẹ Jehovah yí azọ̀nylankan sinsinyẹn lẹ do hò Falo po whédo etọn po, na Salai asi Ablam tọn+ wutu. 18 Enẹwutu, Falo ylọ Ablam bo dọmọ: “Etẹ ka wẹ yin ehe bọ a wà do mi? Naegbọn hiẹ ma do dọna mi dọ asi towe wẹ? 19 Naegbọn hiẹ do dọ dọ, ‘Nọviyọnnu ṣie wẹ ewọ,’+ bọ yẹn ko dibla yí i taidi asi ṣie? Pọ́n, asi towe die. Plan ẹn bo yì!” 20 Falo sọ degbena devisunnu etọn lẹ nado yì do Ablam po asi etọn po gọna nutindo etọn lẹpo.+
13 Enẹgodo, Ablam hẹji yì sọn Egipti, ewọ, asi etọn, po nuhe e tindo lẹpo po gọna Lọti bo dedo Negẹb.+ 2 To whenẹnu, Ablam ko bẹ kanlinpa, fataka po sika susu tlala po pli.+ 3 E sọ to yìyì sọn fide jẹ fide, sọn Negẹb jei Bẹtẹli, kakajẹ whenue e wá fihe gòhọ etọn ko nọ dai, to Bẹtẹli po Ai+ po ṣẹnṣẹn, 4 fihe e basi agbà de do to tintan whenu. Ablam sọ ylọ oyín Jehovah tọn to finẹ.
5 Podọ Lọti he to gbejizọnlinzin hẹ Ablam lọsu tindo lẹngbọ lẹ, oyìn lẹ po gòhọ lẹ po ga. 6 Enẹwutu, aigba lọ ma pé na yemẹpo nido nọ nọ̀ fidopo lọ; na nutindo yetọn lẹ ko sù sọmọ bọ yé ma sọgan nọpọ́ ba. 7 Ehe zọ́n bọ wiwọ́ de fọ́n to kanlinyìntọ he nọ penukundo kanlinpa Ablam tọn lẹ go po kanlinyìntọ he nọ penukundo kanlinpa Lọti tọn lẹ go po ṣẹnṣẹn. (To ojlẹ enẹ mẹ, Kenaninu lẹ po Pelizinu lẹ po wẹ nọ nọ̀ aigba lọ ji.)+ 8 Enẹwutu, Ablam dọna Lọti+ dọmọ: “Yẹn vẹ̀ we, a dike wiwọ́ depope tin to yẹn po hiẹ po ṣẹnṣẹn podọ to kanlinyìntọ ṣie lẹ po kanlinyìntọ towe lẹ po ṣẹnṣẹn blo, na nọvi-nọvi wẹ míwlẹ. 9 Be e ma yin aigba lọ blebu wẹ tin-to-aimẹ na we ya? Jaale, gbọ mí ni yì awà voovo ji. Eyin hiẹ yì amiyọnwhé, yẹn na yì adusiwhé; ṣigba eyin hiẹ yì adusiwhé, yẹn na yì amiyọnwhé.” 10 Enẹwutu, Lọti ze nukun etọn lẹ daga bo mọ agbegbe Jọdani tọn*+ blebu kakajẹ Zoali.+ E mọdọ lẹdo lọ pete wẹ yin aigba he osin pé, taidi jipa Jehovah tọn,+ kẹdẹdi aigba Egipti tọn, yèdọ whẹpo Jehovah do và Sodọmi po Gomọla po sudo. 11 To whenẹnu, Lọti de agbegbe Jọdani tọn blebu na ede bo sẹtẹn yì whèzẹtẹn. Yé sọ klan. 12 Ablam nọ nọ̀ aigba Kenani tọn ji, ṣigba Lọti nọ nọ̀ tòdaho agbegbe lọ tọn lẹ ṣẹnṣẹn.+ To godo mẹ, Lọti tùn gòhọ etọn sẹpọ Sodọmi. 13 Ṣigba, sunnu Sodọmi tọn lẹ yin mẹylankan, yèdọ ylanwatọ akonka lẹ sọta Jehovah.+
14 Jehovah sọ dọna Ablam to whenue Lọti ko klan sọn ewọ go dọmọ: “Jaale, ze nukun towe lẹ daga, bo pọ́n sọn fihe hiẹ tin te yì agewaji podọ yì hùwaji podọ sọn whèzẹtẹn yì whèyihọ, 15 na aigba he hiẹ mọ lọ lẹpo wẹ yẹn na na hiẹ po kúnkan* towe po taidi nutindo de he na dẹn-to-aimẹ.+ 16 Yẹn nasọ hẹn kúnkan* towe sù taidi kọ́gudu aigba tọn, sọmọ bọ eyin mẹde sọgan penugo nado hia sọha kọ́gudu aigba tọn, to whenẹnu wẹ sọha kúnkan* towe tọn sọgan yin hihia.+ 17 Todin fọ́n, bo dlú gbọn aigba lọ ji, yèdọ gbọn tedidi etọn po gbigblo etọn po ji, na hiẹ wẹ yẹn na na aigba lọ.” 18 Enẹwutu, Ablam zindonukọn nado to gòhọ lẹ mẹ nọ. To nukọn mẹ, e wá yì nọ atin daho Mamle tọn+ he tin to Heblọni+ lẹ ṣẹnṣẹn, e sọ basi agbà de na Jehovah do finẹ.+
14 Todin, to azán Amlafẹli ahọlu Ṣinali+ tọn, Aliọki ahọlu Elasali tọn, Kẹdọlaomẹli+ ahọlu Elami+ tọn po Tidali ahọlu Goiimi tọn lẹ po tọn lẹ gbè, 2 omẹ ehelẹ wẹ funawhàn hẹ Bela ahọlu Sodọmi+ tọn, Bilṣa ahọlu Gomọla+ tọn, Ṣinabi ahọlu Adma tọn, Ṣemebẹli ahọlu Zeboimi+ tọn po ahọlu Bela tọn po, enẹ wẹ Zoali. 3 Yemẹpo* wẹ kọ̀n awhàn dopọ to Agbàdo Sidimi tọn+ mẹ, enẹ wẹ Ohù Ojẹ̀ tọn lọ.*+
4 Owhe 12 wẹ yé yí do sẹ̀n Kẹdọlaomẹli, ṣigba to owhe 13tọ mẹ, yé ṣiatẹ. 5 Enẹwutu, to owhe 14tọ mẹ, Kẹdọlaomẹli gọna ahọlu he tin po e po lẹ wá, bọ yé sọ gbawhàn Lefaimi lẹ tọn to Aṣtelọti-kalnaimi, Zuzimi lẹ tọn to Ham, Emimi lẹ+ tọn to Ṣave-kiliataimi, 6 podọ Holinu lẹ+ tọn to osó yetọn Seili+ ji, sẹpọ Ẹl-palani, ehe tin to danfafa ji. 7 Enẹgodo, yé lẹkọ bo wá Ẹn-miṣpati, yèdọ Kadẹṣi+ bo gbawhàn aigba blebu Amalẹkinu lẹ+ tọn gọna Amolinu+ he nọ nọ̀ Hazazọn-tamali+ lẹ tọn.
8 To whenẹnu, ahọlu Sodọmi tọn, to pọmẹ hẹ ahọlu Gomọla tọn, ahọlu Adma tọn, ahọlu Zeboimi tọn po ahọlu Bela tọn po, enẹ wẹ Zoali tọ́nawhàn yé to Agbàdo Sidimi tọn mẹ, 9 yèdọ sọta Kẹdọlaomẹli ahọlu Elami tọn, Tidali ahọlu Goiimi tọn, Amlafẹli ahọlu Ṣinali tọn po Aliọki ahọlu Elasali tọn+ po—enẹ wẹ, ahọlu ẹnẹ sọta atọ́n. 10 Agbàdo Sidimi tọn sọ gọ́ na odò osẹ̀n pinpẹn tọn lẹ, podọ ahọlu Sodọmi po Gomọla po tọn lẹ tẹnpọn nado họnyi, yé sọ jai jẹ yé mẹ, mẹhe pò lẹ sọ họnyi lẹdo osó tọn mẹ. 11 To whenẹnu, mẹhe gbawhàn lọ lẹ yí nutindo Sodọmi po Gomọla po tọn lẹpo gọna núdùdù yetọn lẹpo bosọ wleali dedo.+ 12 Yé sọ plan Lọti, tavẹ-ylọvi Ablam tọn he nọ nọ̀ Sodọmi+ bosọ bẹ nutindo etọn lẹ bo wleali dedo.
13 Enẹgodo, dawe de he ko họ̀ngán wá dọna Ablam Heblu lọ. To whenẹnu, ewọ nọ nọ̀* atin daho Mamle Amolinu lọ tọn+ lẹ ṣẹnṣẹn, he yin nọvisunnu Ẹṣkoli po Aneli po tọn.+ Yewlẹ wẹ kọngbedopọ hẹ Ablam. 14 Ablam sọ sè dọ tavẹ-ylọvi+ etọn ko yin wiwle di kanlinmọ. To whenẹnu wẹ e pli sunnu etọn he yin azọ́nplọn lẹ, yèdọ afanumẹ 318 he yin jiji to whédo etọn mẹ lẹ, e sọ dómọna yé kaka yì Dani.+ 15 Podọ to zánmẹ, e sọ má awhànpa etọn, bọ ewọ po devizọnwatọ etọn lẹ po funawhàn hẹ yé bo gbawhàn yetọn. E sọ dómọna yé dedo Hoba he to agewaji Damasku tọn. 16 E sọ gọ̀ nutindo lọ lẹpo yí, bosọ yí Lọti tavẹ-ylọvi etọn po nutindo etọn lẹ po, gọna yọnnu lẹ po mẹdevo lẹ po.
17 To whenue Ablam ko gbawhàn Kẹdọlaomẹli gọna ahọlu he tin po e po lẹ tọn bo lẹkọ godo, ahọlu Sodọmi tọn tọ́n nado yì pé Ablam to Agbàdo Ṣave tọn mẹ, yèdọ Agbàdo Ahọlu tọn.+ 18 Podọ Mẹlkizedẹki+ ahọlu Salẹm+ tọn de akla po ovẹn po tọ́n; yẹwhenọ Jiwheyẹwhe Gigogán lọ tọn+ wẹ ewọ yin.
19 Podọ, e sọ dona ẹn bo dọmọ:
“Donanọ wẹ Ablam to oyín Jiwheyẹwhe Gigogán lọ tọn mẹ,
Didatọ olọn po aigba po tọn;
20 Podọ opẹ́ wẹ na Jiwheyẹwhe Gigogán lọ,
Mẹhe ko jo nukunbianamẹtọ towe lẹ do alọ towe mẹ!”
Ablam sọ na ẹn mado-ao nulọ lẹpo tọn.+
21 Enẹgodo, ahọlu Sodọmi tọn dọna Ablam dọmọ: “Bẹ gbẹtọ* lẹ na mi bo hẹn nutindo lẹ go.” 22 Ṣigba, Ablam dọna ahọlu Sodọmi tọn dọmọ: “Yẹn ze alọ daga bo whlé to Jehovah Jiwheyẹwhe Gigogán lọ nukọn, yèdọ Didatọ olọn po aigba po tọn, 23 dọ yẹn ma na yí nudepope he yin towe, etlẹ yin sekan kavi afọpakàn tata, na hiẹ nikaa dọ dọ, ‘Yẹn wẹ hẹn Ablam zun adọkunnọ.’ 24 Yẹn ma na yí nudepope, adavo nuhe jọja sunnu lẹ ko dù. Na nuhe dù sunnu he yì hẹ mi lẹ, enẹ wẹ, Aneli, Ẹṣkoli po Mamle po+—dike yé ni yí mimá yetọn.”
15 To ehe godo, ohó Jehovah tọn wá Ablam dè to numimọ de mẹ dọmọ: “A dibu blo,+ Ablam. Yẹn wẹ awọ̀yinu towe.+ Ahọsumẹ towe nasọ klo taun.”+ 2 Ablam sọ gblọn dọmọ: “Oklunọ Nupojipetọ Jehovah, etẹwẹ hiẹ na na mi, mimọ dọ yẹn ma tindo ovi kakajẹ din podọ Eliezẹli+ dawe Damasku tọ́ lọ wẹ na dugu owhé ṣie tọn?” 3 Ablam sọ yidogọ dọmọ: “Hiẹ ma na mi ovi*+ depope, podọ devizọnwatọ de to whédo ṣie mẹ wẹ na jẹ otẹn ṣie mẹ di gudutọ.” 4 Podọ pọ́n! Jehovah gblọnna ẹn po hogbe ehelẹ po dọmọ: “Dawe ehe ma na jẹ otẹn towe mẹ di gudutọ gba, ṣigba ovi towe titi* wẹ na jẹ otẹn towe mẹ di gudutọ.”+
5 Todin, e plan ẹn tọ́njẹgbonu bo dọmọ: “Jaale, pọ́n aga hlan olọn bo hia sunwhlẹvu lẹ, eyin hiẹ penugo nado wàmọ.” E sọ dọna ẹn dọmọ: “Mọ wẹ kúnkan* towe na sù sọ.”+ 6 E sọ do yise hia to Jehovah mẹ,+ Ewọ sọ hia hlan ẹn di dodowiwa.+ 7 Enẹgodo, e yidogọ dọmọ: “Yẹn wẹ Jehovah, mẹhe plan we sọn Uli Kaldeanu lẹ tọn nado na we aigba ehe taidi nutindo towe.”+ 8 Na ehe wutu, Ablam dọmọ: “Oklunọ Nupojipetọ Jehovah, nawẹ yẹn na wagbọn do yọnẹn dọ yẹn wẹ na mọ ẹn yí taidi nutindo?” 9 E sọ gblọnna ẹn dọmọ: “Yí oyìn asiwhe owhe atọ̀n mẹ tọn, gbọgbọẹ asi owhe atọ̀n mẹ tọn, agbò owhe atọ̀n mẹ tọn gọna owhlé po awhànnẹvu de po.” 10 Enẹwutu, e bẹ ehe lẹpo pli bo zẹ̀ yé do awe-awe bosọ to mimá dopodopo pannukọn yede,* ṣigba e ma zẹ̀ ohẹ̀ lọ lẹ. 11 Podọ ohẹ̀ nuwledutọ lẹ to tejẹ do kanlin kúkú lọ lẹ ji, Ablam sọ to yé yàn madoalọte.
12 To whenue owhè ko dibla yihọ, Ablam biọ amlọn yìkànmẹ de mẹ, bọ zinvlu gọ́ngọ́n he dobu de sọ ṣinyọ́n ẹn to odlọ mẹ. 13 E sọ dọna Ablam dọmọ: “Hiẹ ni yọnẹn na nugbo tọn dọ kúnkan* towe na yin jonọ to aigba he ma yin yetọn titi de ji bọ akọta lọ na hẹn yé zun afanumẹ bo nasọ sayana yé họ̀ owhe 400.+ 14 Ṣigba, yẹn na dawhẹna akọta he yé na sẹ̀n lọ,+ podọ to enẹgodo, yé na tọ́n sọn finẹ po nutindo susu po.+ 15 Na hiẹ tọn, hiẹ na kú to jijọho mẹ whenue hiẹ na ko poyọnho pete godo; hiẹ nasọ yin dìdì dile tọgbo towe lẹ yin dìdì do.+ 16 Ṣigba, yé na lẹkọ wáfi+ to whẹndo ẹnẹtọ whenu, na jlẹka ylando Amolinu lẹ tọn ma ko gọ́ todin wutu.”+
17 Todin, to whenuena owhè ko yihọ bọ zinvlu gọ́ngọ́n de ko do, adògbẹ́ he mẹ miyọ́n to jiji te de sọawuhia, podọ miyọ́ngbán he to titá de jugbọn kanlin kúkú lọ lẹ ṣẹnṣẹn. 18 To azán enẹ gbè, Jehovah basi alẹnu de hẹ Ablam+ bo dọmọ: “Kúnkan* towe lẹ wẹ yẹn na na aigba ehe,+ sọn tọ̀sisa Egipti tọn kakajẹ tọ̀sisa daho lọ kọ̀n, yèdọ tọ̀sisa Euflate:+ 19 enẹ wẹ, aigba Keninu+ lẹ tọn, Kenizinu lẹ tọn, Kadmoninu lẹ tọn, 20 Hetinu+ lẹ tọn, Pelizinu+ lẹ tọn, Lefaimi+ lẹ tọn, 21 Amolinu lẹ tọn, Kenaninu lẹ tọn, Gilgaṣinu lẹ tọn po Jẹbusinu+ lẹ tọn po.”
16 Todin, Salai asi Ablam tọn ma ji ovi depope na ẹn,+ amọ́ Salai tindo deviyọnnu Egiptinu de he nọ yin Hagali.+ 2 Salai sọ dọna Ablam dọmọ: “Todin, jaale! Jehovah ko glọnalina mi nado jivi. Jaale, tindo kọndopọ zanhẹmẹ tọn hẹ deviyọnnu ṣie. E yọnbasi dọ yẹn ni tindo ovi lẹ gbọn ewọ gblamẹ.”+ Enẹwutu, Ablam dotoaina nuhe Salai dọ. 3 To whenue Ablam ko nọ aigba Kenani tọn ji na owhe ao godo, Salai asi Ablam tọn ze Hagali deviyọnnu Egiptinu etọn na Ablam asu etọn nado yin asi na ẹn. 4 Enẹwutu, e tindo kọndopọ zanhẹmẹ tọn hẹ Hagali bọ ewọ sọ mọhò. To whenue Hagali doayi e go dọ emi ko mọhò, e jẹ klunọ etọn vlẹko ji.
5 Enẹwutu, Salai dọna Ablam dọmọ: “Hiẹ wẹ hẹn yajiji ehe wá oji e. Yẹnlọsu wẹ ze deviyọnnu ṣie do alọmẹ na we,* bọ todin he ewọ mọdọ emi to ohò, e wá jẹ vivlẹ mi kò ji. Na Jehovah ni dawhẹ mí omẹ awe lẹ tọn.” 6 Ablam sọ dọna Salai dọmọ: “Pọ́n! Hiẹ wẹ paṣẹ do deviyọnnu towe ji. Wà nuhe yọ́n to nukun towe mẹ na ẹn.” Whenẹnu wẹ Salai sọ dowinyan ẹn bọ ewọ họnyi sọn e dè.
7 To nukọn mẹ, angẹli Jehovah tọn pé Hagali to asisa osin tọn de kọ̀n to danfafa ji, enẹ wẹ asisa he tin to aliho Ṣuli+ tọn ji. 8 E sọ dọna ẹn dọmọ: “Hagali, deviyọnnu Salai tọn, fie wẹ hiẹ tọ́n sọn podọ fie wẹ hiẹ jei?” E sọ gblọn dọmọ: “Klunọ ṣie Salai dè wẹ yẹn họ̀n sọn.” 9 Angẹli Jehovah tọn sọ dọna ẹn dọmọ: “Lẹkọyi klunọ towe dè bo whiwhẹ dewe na ẹn.” 10 Angẹli Jehovah tọn sọ dọmọ: “Yẹn na hẹn kúnkan* towe sudeji taun, sọmọ bọ yè ma sọgan hia ẹ, na e na sù tlala wutu.”+ 11 Angẹli Jehovah tọn sọ yidogọ dọmọ: “Hiẹ to ohò todin, podọ hiẹ na ji visunnu de bo nasọ ylọ oyín etọn dọ Iṣmaeli,* na Jehovah ko sè awhágbe yajiji tọn towe. 12 Podọ ewọ na nọ yinuwa taidi kẹtẹkẹtẹ gbémẹ tọn.* E na nọ diọnukunsọ mẹlẹpo, podọ mẹlẹpo nasọ nọ diọnukunsọ ẹ, ewọ nasọ nọ nọla na* nọvisunnu etọn lẹpo.”
13 Enẹgodo, e ylọ oyín Jehovah, mẹhe to hodọna ẹn lọ tọn bo dọmọ: “Hiẹ wẹ Jiwheyẹwhe he nọ mọ nulẹpo,”*+ na e dọmọ: “Be nugbo wẹ dọ yẹn ko mọ mẹhe mọ mi ya?” 14 Enẹ wẹ zọ́n bọ dotọ̀ lọ yin yiylọdọ Beẹli-lahai-loi.* (Ehe tin to Kadẹṣi po Belẹdi po ṣẹnṣẹn.) 15 Hagali sọ ji visunnu de na Ablam bọ Ablam ylọ oyín etọn dọ Iṣmaeli.+ 16 Owhe 86 mẹvi wẹ Ablam whenue Hagali ji Iṣmaeli na ẹn.
17 Jehovah sọawuhia Ablam to whenuena e tindo owhe 99, bo dọna ẹn dọmọ: “Yẹn wẹ Jiwheyẹwhe Ganhunupotọ lọ. Zinzọnlin sọgbe hẹ ojlo ṣie bosọ do dewe hia di mẹhe ma tindo oblọ. 2 Yẹn na hẹn alẹnu he yẹn basi hẹ we lodo,+ podọ yẹn na hẹn we sudeji tlala.”+
3 Whenẹnu wẹ Ablam ṣinyọ́n nukunmẹ etọn ai, Jiwheyẹwhe sọ zindonukọn to hodidọ mẹ hẹ ẹ dọmọ: 4 “Pọ́n! yẹn basi alẹnu de hẹ we,+ hiẹ nasọ lẹzun otọ́ akọta susu lẹ tọn.+ 5 Hiẹ ma nasọ nọ yin yiylọdọ Ablam* ba; ṣigba Ablaham* wẹ hiẹ na nọ yin, na yẹn na yí we do basi otọ́ akọta susu lẹ tọn. 6 Yẹn nasọ hẹn we yin sinsẹ́nnọ tlala bo nasọ hẹn we zun akọta susu, podọ ahọlu lẹ na wá sọn hiẹ mẹ.+
7 “Yẹn na hẹn alẹnu he yẹn basi hẹ we podọ hẹ kúnkan* towe to godo towe lodo+ kakadoi sọn whẹndo de ji jẹ devo ji, nado yin Jiwheyẹwhe towe podọ kúnkan* towe tọn to godo towe. 8 Yẹn nasọ na we aigba lọ lẹ he ji a nọ di jonọ+ bo nasọ na kúnkan* towe lẹ to godo towe—yèdọ aigba blebu Kenani tọn—taidi nutindo de he na dẹn-to-aimẹ, yẹn nasọ yin Jiwheyẹwhe yetọn.”+
9 Jiwheyẹwhe sọ zindonukọn nado dọna Ablaham dọmọ: “Setonuna alẹnu ṣie, hiẹ po kúnkan* towe lẹ po to godo towe sọn whẹndo de ji jẹ devo ji. 10 Ehe wẹ alẹnu ṣie he tin to yẹn po mìwlẹ po ṣẹnṣẹn, ehe hiẹ po kúnkan* towe lẹ po to godo towe na nọ setonuna: Sunnu he to ṣẹnṣẹn mìtọn lẹpo dona nọ gboadà.+ 11 Mì dona nọ gboadà, bọ ehe na yin ohia de na alẹnu he tin to yẹn po mìwlẹ po ṣẹnṣẹn.+ 12 Sunnu he to ṣẹnṣẹn mìtọn lẹpo he yin azán ṣinatọ̀n mẹvi dona nọ gboadà,+ sọn whẹndo de ji jẹ devo ji, yèdọ mẹdepope he yin jiji to owhé towe gbè podọ mẹdepope he yin hihọ̀ sọn jonọ he ma wá sọn kúnkan* towe mẹ de si. 13 Sunnu he yin jiji to owhé towe gbè lẹpo podọ sunnu he yè yí akuẹ towe do họ̀ lẹpo dona nọ gboadà dandan,+ podọ alẹnu ṣie he yin ohia de to agbasalan mìtọn go dona yin alẹnu de he na dẹn-to-aimẹ. 14 Podọ eyin sunnu depope tin bo ma gboadà, yèdọ omẹ* enẹ dona yin sinsánsẹ* sọn omẹ etọn lẹ ṣẹnṣẹn. E ko tùnafọ alẹnu ṣie ji.”
15 Podọ Jiwheyẹwhe sọ dọna Ablaham dọmọ: “Na nuhe dù Salai* asi towe,+ hiẹ ma nasọ ylọ oyín etọn dọ Salai ba, Sala* wẹ e na nọ yin. 16 Yẹn na dona ẹn bo nasọ na we visunnu de sọn ewọ mẹ;+ yẹn na dona ẹn bọ ewọ na lẹzun akọta susu; ahọlu akọta susu tọn lẹ nasọ wá sọn ewọ mẹ.” 17 Whenẹnu wẹ Ablaham ṣinyọ́n nukunmẹ etọn ai bo jẹ nuko ji bosọ dọ to ahun etọn mẹ+ dọmọ: “Be sunnu owhe 100 mẹvi de sọgan tindo ovi de, podọ be Sala he yin yọnnu owhe 90 mẹvi de sọgan jivi ya?”+
18 Enẹwutu, Ablaham dọna Jiwheyẹwhe nugbo lọ dọmọ: “Na Iṣmaeli ni mọ nukundagbe towe!”+ 19 Enẹwutu, Jiwheyẹwhe dọmọ: “Na nugbo tọn, Sala asi towe na ji visunnu de na we bọ hiẹ na ylọ oyín etọn dọ Isaki.*+ Yẹn nasọ hẹn alẹnu ṣie lodo hẹ ẹ kakadoi podọ na kúnkan* etọn ga to godo etọn.+ 20 Ṣigba, na nuhe dù Iṣmaeli, yẹn ko dotoaina we. Pọ́n! Yẹn na dona ẹn bo na hẹn ẹn zun sinsẹ́nnọ bo nasọ hẹn ẹn sudeji tlala. Ahọvi 12 nasọ wá sọn ewọ mẹ bọ yẹn nasọ hẹn ẹn zun akọta daho de.+ 21 Etomọṣo, Isaki wẹ yẹn na hẹn alẹnu ṣie lodo hẹ,+ yèdọ ovi he Sala na ji na we to ojlẹ dide ehe lọ mẹ to owhe he ja mẹ.”+
22 To whenue Jiwheyẹwhe dotana hodidọ hẹ Ablaham, e yì sọn e dè. 23 To whenẹnu, Ablaham plan Iṣmaeli visunnu etọn po sunnu he yin jiji to owhé etọn gbè lẹpo po gọna mẹhe e họ̀ lẹpo, yèdọ sunnu he tin to whédo Ablaham tọn mẹ lẹpo, e sọ gboadà na yé to azán enẹ gbè dile Jiwheyẹwhe ko dọna ẹn do.+ 24 Owhe 99 mẹvi wẹ Ablaham to whenue ewọ gboadà.+ 25 Podọ Iṣmaeli visunnu etọn yin owhe 13 mẹvi to whenue e gboadà.+ 26 To gbenẹgbe, Ablaham gboadà, podọ Iṣmaeli visunnu etọn lọsu ga. 27 Podọ sunnu he tin to whédo etọn mẹ lẹpo, yèdọ mẹdepope he yin jiji to owhé etọn gbè gọna mẹdepope he yin hihọ̀ sọn jonọ de si wẹ gboadà to pọmẹ hẹ ẹ.
18 Enẹgodo, Jehovah+ sọawuhia Ablaham to atin daho Mamle tọn+ lẹ ṣẹnṣẹn to whenue ewọ sinai to họntonu gòhọ etọn tọn to ojlẹ yozò sinsinyẹn azán lọ gbè tọn mẹ. 2 E sọ ze nukun etọn daga bo mọ sunnu atọ̀n to ote hlan aganu.+ To whenue e mọ yé, e dowezun sọn họntonu gòhọ etọn tọn bo yì pé yé bosọ dẹ́ do odò. 3 E sọ dọmọ: “Jehovah, eyin yẹn ko mọ nukundagbe towe, jaale a zẹ̀ devi towe go wayi blo. 4 Mì jaale bo gbọ na yè ni hẹn osin vude wá, na afọ mìtọn lẹ ni yin kiklọ́;+ enẹgodo mì na jagla do atinsá. 5 Na mìwlẹ ko zẹ̀ wá devi mìtọn dè tofi wutu, mì gbọ yẹn ni yí akla wá, na mì nido hẹn pekọ wá na mìdelẹ.* Enẹgodo, mì sọgan dedo.” To whenẹnu wẹ yé dọmọ: “Eyọn. Hiẹ sọgan wà dile a dọ do.”
6 Enẹwutu, Ablaham sọ yì Sala dè to gòhọ lọ mẹ po awuyiya po bo dọmọ: “Yawu! Yí linfin dagbe ojlẹnu* atọ̀n, bo yàn ẹn bosọ yí i do basi akla lẹ.” 7 Enẹgodo, Ablaham dowezun yì kanlinpo lọ mẹ bo yí oyìn winyanwinyan dagbe whanpẹnọ de. E sọ ze e na devizọnwatọ etọn bọ ewọ sọ yawu nado wleawu etọn. 8 Enẹgodo, e ze limu anọ́sin tọn po anọ́sin po gọna oyìn winyanwinyan he ewọ ko wleawu etọn lọ donukọnna yé. E sọ nọte to apá na yé to atin lọ sá dile yé to núdù.+
9 Yé sọ dọna ẹn dọmọ: “Fie wẹ Sala+ asi towe te?” E sọ gblọn dọmọ: “E to gòhọ lọ mẹ finẹ.” 10 Enẹwutu, dopo to yé mẹ dọmọ: “Matin ayihaawe, yẹn na lẹkọwa dè we to owhe he ja mẹ to ojlẹ ehe mẹ, podọ pọ́n! Sala asi towe na ji visunnu de.”+ Sala sọ tin to họntonu gòhọ he to godo na dawe lọ tọn bo to nuhe dọ yé te sè. 11 Ablaham po Sala po ko poyọnho, yèdọ owhe yetọn ko sẹyì taun.+ Podọ Sala ko zẹ̀ owhe vijiji tọn go.*+ 12 Enẹwutu, Sala sọ jẹ nuko ji to ohò ede tọn mẹ, dọmọ: “Todin he ayú ṣie lẹ ko wló, bọ oklunọ ṣie lọsu ko poyọnho, be yẹn na mọ homẹhunnu ehe nugbonugbo ya?”+ 13 To whenẹnu, Jehovah dọna Ablaham dọmọ: “Naegbọn Sala do konu bo dọmọ, ‘Be nugbonugbo wẹ dọ yẹn na jivi dile etlẹ yindọ yẹn ko poyọnho ya?’ 14 Be nudepope glo Jehovah wẹ ya?+ Yẹn na lẹkọwa dè we to owhe he ja mẹ, to ojlẹ dide ehe mẹ, podọ Sala na ji visunnu de.” 15 Ṣigba, Sala sọ mọ́n dọmọ, “Yẹn ma konu!” na ewọ dibu wutu. Whenẹnu wẹ e dọmọ: “A konu gbau!”
16 To whenue sunnu lọ lẹ fọ́n sọn finẹ bo pànta Sodọmi,+ Ablaham zọnhẹ yé nado yìn yé. 17 Jehovah sọ dọmọ: “Be yẹn na whlá nuhe yẹn jlo na wà do Ablaham wẹ?+ 18 Podọ na nugbo tọn, Ablaham na lẹzun akọta daho podọ huhlọnnọ de, bọ akọta aigba ji tọn lẹpo na yin didona* gbọn ewọ gblamẹ.+ 19 Na yẹn ko jihọntọn hẹ ẹ na ewọ nido sọgan degbena visunnu etọn lẹ po whédo etọn po to godo etọn na yé nido setonuna aliho Jehovah tọn nado nọ wà nuhe jlọ bo yin dodo,+ na Jehovah nido sọgan hẹn opagbe he e do gando Ablaham go lọ di.”
20 Humọ, Jehovah dọmọ: “Awhágbe lewuwu tọn gando Sodọmi po Gomọla po go sinyẹn taun+ podọ ylando yetọn sọ gọfla.+ 21 Todin, yẹn na jẹte yì nado yọnẹn eyin nugbo wẹ awhágbe he yẹn to sisè lọ kavi lala. Podọ eyin e ma yinmọ, yẹn jlo na yọ́n ẹn.”+
22 To whenẹnu, sunnu lọ lẹ lẹkọ sọn finẹ bo dedo Sodọmi; ṣigba Jehovah+ gbẹ́ pò to Ablaham dè. 23 Enẹwutu, Ablaham dọnsẹpọ bo dọmọ: “Be nugbo wẹ dọ hiẹ na và dodonọ po mẹylankan po sudo ya?+ 24 Mí ni dọ dọ dodonọ 50 tin to tòdaho lọ mẹ. Whenẹnu, be hiẹ na và yé sudo wẹ, bo ma na jona yé na dodonọ 50 he tin to e mẹ lọ lẹ tọn wutu ya? 25 E ma sọgan wá linlẹn mẹ gbede dọ hiẹ na yinuwa to aliho ehe mẹ nado hù dodonọ po mẹylankan po bọ e na yindọ nuhe jọ do dodonọ go dopolọ wẹ jọ do mẹylankan go!+ E ma sọgan yin linlẹn gando gowe gbede.+ Be Whẹdatọ aigba lẹpo tọn ma na wà nuhe jlọ wẹ ya?”+ 26 To whenẹnu, Jehovah dọmọ: “Eyin yẹn mọ dodonọ 50 to tòdaho Sodọmi tọn mẹ, yẹn na jona tòdaho lọ blebu na yetọn wutu.” 27 Ṣigba, Ablaham sọ gblọn dọmọ: “Jaale, yẹn ko wleawuna adọgbigbo todin nado dọho hẹ Jehovah dile etlẹ yindọ kọ́gudu po afín po wẹ yẹn. 28 Mí ni dọ dọ e whè atọ́n sọn dodonọ 50 lọ lẹ mẹ. Be hiẹ na và tòdaho lọ blebu sudo na atọ́n enẹlẹ tọn wutu wẹ ya?” Na ehe wutu e dọmọ: “Yẹn ma na và ẹ sudo eyin yẹn mọ 45 to finẹ.”+
29 E sọ zindonukọn to hodidọ hẹ ẹ mẹ dogọ dọmọ: “Mí ni dọ dọ 40 wẹ yin mimọ to finẹ.” E gblọnna ẹn dọmọ: “Yẹn ma na và ẹ sudo na 40 lọ lẹ tọn wutu.” 30 E sọ dọmọ: “Jehovah, jaale, a gblehomẹ blo,+ ṣigba dike yẹn ni dọho dogọ: Mí ni dọ dọ 30 wẹ yin mimọ to finẹ.” E gblọn dọmọ: “Yẹn ma na và ẹ sudo eyin yẹn mọ 30 to finẹ.” 31 Ṣigba, e sọ zindonukọn dọmọ: “Jaale, yẹn ko wleawuna adọgbigbo nado dọho hẹ Jehovah: Mí ni dọ dọ omẹ 20 poun wẹ yin mimọ to finẹ.” E gblọn dọmọ: “Yẹn ma na và ẹ sudo na omẹ 20 lọ lẹ tọn wutu.” 32 To godo mẹ, e dọmọ: “Jehovah, jaale, a gblehomẹ blo, ṣigba dike yẹn nisọ dọho whladopo gee ehe dogọ: Mí ni dọ dọ omẹ ao poun wẹ yin mimọ to finẹ.” E gblọn dọmọ: “Yẹn ma na và ẹ sudo na omẹ ao lọ lẹ tọn wutu.” 33 Jehovah sọ dedo+ to whenuena e ko dotana hodidọ hẹ Ablaham godo bọ Ablaham sọ lẹkọyi fihe e nọ nọ̀.
19 Todin, angẹli awe lọ lẹ wá Sodọmi to whèjai, Lọti sọ to aisinsin to họngbo Sodọmi tọn kọ̀n. Whenue Lọti mọ yé hlan, e fọnṣite bo yì pé yé bosọ dẹ́ do odò bo ṣinyọ́n nukunmẹ etọn ai.+ 2 E sọ dọmọ: “Yẹn vẹ̀ mì, oklunọ ṣie lẹ emi, mì jaale bo wá owhé devizọnwatọ mìtọn tọn gbè nado dọ́ finẹ podọ na afọ mìtọn lẹ ni yin kiklọ́. Enẹgodo, mì sọgan fọ́n to afọnnu bo jẹ gbejizọnlin mìtọn ji.” Yé sọ dọmọ: “Lala, tòpligbasa wẹ mí na mlọn.” 3 Ṣigba, e tẹkudo nuhe dọna yé e te lọ ji sọmọ bọ yé hodo e wá owhé etọn gbè. Whenẹnu, e basi hùnwhẹ de na yé, bosọ sọ̀ akla madotọ́n lẹ bọ yé sọ dù.
4 Whẹpo yé nado mlọnai, sunnu tòdaho lọ tọn lẹ—yèdọ sunnu Sodọmi tọn lẹ, bẹsọn omẹ pẹvi ji jẹ daho ji—lẹdo owhé etọn pé, yemẹpo sọ to adán ji. 5 Yé sọ to Lọti ylọ mapote bo to didọna ẹn dọmọ: “Fie wẹ sunnu he wá dè we to ozán ehe mẹ lọ lẹ te? Hẹn yé jẹgbonu wá mí dè na mí nido zanhẹ yé.”+
6 Whenẹnu wẹ Lọti yì yé dè to họntonu bosọ sú ohọ̀n do ede to gbonu. 7 E sọ dọmọ: “Mì jaale, nọvisunnu ṣie lẹ emi, mì yinuwa po kanyinylan po blo. 8 Mì jaale, yẹn tindo viyọnnu awe tofi he ma ko tindo kọndopọ zanhẹmẹ tọn hẹ sunnu de pọ́n gbede. Mì jaale, na yẹn ni hẹn yé jẹgbonu wá mì dè, na mì ni wà nuhe jlo mì hẹ yé. Ṣigba, mì doalọ dawe ehelẹ go blo, na yé ko wá họta ṣie* glọ.”+ 9 Enẹwutu, yé dọmọ: “Tọ́n sọn nukọnna mí!” Yé sọ yidogọ dọmọ: “Dawe jonọ ehe wá nado nọfi ṣogan bo gboadọ nado dawhẹna mí. Todin, nuhe ylanhu ehe mí jlo na wà na yé wẹ mí na wà na we.” Yé sọ doawhàn wá Lọti ji bo zindonukọn nado yì fẹ́n ohọ̀n lọ. 10 To whenẹnu, dawe lọ lẹ* dlẹnalọ yetọn bo dọ̀n Lọti biọ họmẹ bosọ sú ohọ̀n lọ. 11 Ṣigba, yé và nukun na sunnu he to ohọ̀n lọ ji lẹ, sọn omẹ pẹvi ji jẹ daho ji, yé sọ to avìdla bo to tintẹnpọn nado dín fihe họntonu te.
12 To whenẹnu, dawe lọ lẹ* dọna Lọti dọmọ: “Be hiẹ tindo mẹdevo depope tofi ya? Yèdọ ovisu, visunnu towe lẹ, viyọnnu towe lẹ po omẹ towe he tin to tòdaho lọ mẹ lẹpo po, de yé tọ́n sọn fi! 13 Na mí jlo na và tòdaho ehe sudo, na Jehovah ko sè awhágbe sinsinyẹn gando yé go,+ enẹwutu wẹ Jehovah do mí hlan nado và tòdaho lọ sudo.” 14 Whenẹnu, Lọti tọ́njẹgbonu bo jẹ hodọna ovisu etọn he na wá dà viyọnnu etọn lẹ ji, bo to didọ mapote dọmọ: “Mì yawu! Mì tọ́n sọn fi, na Jehovah jlo na và tòdaho lọ sudo!” Ṣigba, to nukun ovisu etọn lẹ tọn mẹ, e taidi dọ fànfún dọ wẹ e te.+
15 Ṣigba, to whenue ai to hinhọ́n, angẹli lọ lẹ do mizọnmizọn na Lọti bo to didọmọ: “Yawu! Plan asi towe po viyọnnu towe awe he tin tofi hẹ we lẹ po, na hiẹ nikaa yin hùhù to whenue tòdaho lọ na yin vivasudo na ylanwiwa etọn wutu!”+ 16 To whenuena e to gbàndọn, na awuvẹmẹ he Jehovah tindo na ẹn wutu,+ dawe lọ lẹ* hẹn alọ etọn, asi etọn tọn po viyọnnu etọn awe lọ lẹ tọn po bo plan ẹn tọ́n bosọ hẹn ẹn jẹgbonu tòdaho lọ tọn.+ 17 Podọ tlolo he yé ko plan yé jẹgbonu tòdaho lọ tọn, e dọna yé dọmọ: “Mì họnyi nado whlẹn ogbẹ̀* mìtọn! Mì lẹkọ pọ́n godo+ blo podọ mì sọ gbọṣi lẹdo agbegbe+ lọ tọn depope mẹ blo! Mì họnyi lẹdo osó tọn lẹ mẹ na mì nikaa yin hùhù!”
18 To whenẹnu, Lọti dọna yé dọmọ: “Yẹn vẹ̀ we, Jehovah, e ni ma yin finẹ blo! 19 Jaale, devizọnwatọ towe ko mọ nukundagbe towe todin bọ hiẹ do homẹdagbe daho* hia mi nado whlẹn mi,*+ ṣigba yẹn ma sọgan họnyi lẹdo osó tọn lẹ mẹ na nugbajẹmẹji nikaa wá oji e bo na hù mi.+ 20 Enẹwutu, yẹn vẹ̀ we, tòpẹvi de tin to yakẹ, fihe yẹn sọgan họnyi; lẹdo kleun de poun wẹ. Jaale, be yẹn sọgan họnyi finẹ ya? Lẹdo kleun de poun wẹ. To whenẹnu, yẹn na luntọ́n.”* 21 Enẹwutu, e dọna ẹn dọmọ: “Eyọn, yẹn nasọ hò towe pọ́n+ bo ma na và tòpẹvi he hodọ a te lọ sudo.+ 22 Yawu họnyi finẹ, na yẹn ma na wà nudepope kakajẹ whenue hiẹ na ko jẹ finẹ!”+ Enẹ wẹ zọ́n bọ e ylọ oyín tòpẹvi lọ tọn dọ Zoali.*+
23 Owhè ko zẹ̀ whẹpo Lọti do jẹ Zoali. 24 To whenẹnu wẹ Jehovah ja whèmi po miyọ́n he sọn Jehovah dè po, yèdọ sọn olọn mẹ, do Sodọmi po Gomọla po ji.+ 25 Enẹwutu, e và tòdaho ehelẹ sudo, yèdọ agbegbe lọ pete po mẹhe to tòdaho lọ lẹ mẹ lẹpo po gọna atin aigba tọn lẹ.+ 26 Ṣigba, asi Lọti tọn he to godona ẹn sọ lẹkọ pọ́n godo, ewọ sọ lẹzun dòtin ojẹ̀ tọn.+
27 Ablaham sọ fọ́n to afọnnu fuu bo yì fihe ewọ ko nọte to Jehovah nukọn+ te dai. 28 E sọ pọ́n Sodọmi, Gomọla gọna aigba agbegbe lọ tọn lẹpo hlan. E sọ mọ azọ̀ titli de to titi sọn otò lọ mẹ taidi azọ̀ titli zòhọ de tọn nkọ!+ 29 Podọ to whenuena Jiwheyẹwhe và tòdaho agbegbe lọ tọn lẹ sudo, Jiwheyẹwhe flin Ablaham bo de Lọti tọ́njẹgbonu sọn tòdaho he ewọ vasudo lẹ mẹ, yèdọ tòdaho he mẹ Lọti ko nọ nọ̀ lẹ.+
30 Enẹgodo, na Lọti dibu nado nọ Zoali+ wutu, ewọ po viyọnnu etọn awe lẹ po hẹji yì sọn Zoali bo nọ nọ̀ lẹdo osó tọn lẹ mẹ.+ Enẹwutu, ewọ po viyọnnu etọn awe lẹ po jẹ oslò osó tọn de mẹ nọ ji. 31 Podọ viplọnji lọ dọna yọpọ lọ dọmọ: “Otọ́ mítọn ko poyọnho, podọ sunnu depope ma tin to aigba ehe ji bọ mí na dà dile gbẹtọ lẹ nọ wà do. 32 Wá, gbọ mí ni na otọ́ mítọn ovẹn nado nù, na mí nisọ mlọnai to apá na ẹn nado sọgan wleawuna kúnkan de sọn otọ́ mítọn mẹ.”
33 Enẹwutu, yé zín ovẹn do kọ̀ji na otọ́ yetọn nado nù to ozán enẹ mẹ; podọ viplọnji lọ yì bo mlọnai to apá na otọ́ etọn, ṣigba ewọ ma yọ́n whenue viyọnnu lọ mlọnai podọ whenue e fọ́n. 34 Podọ to aihọngbè, viplọnji lọ dọna yọpọ lọ dọmọ: “Todin, yẹn ko mlọnai hẹ otọ́ ṣie to osọ zánmẹ. Gbọ mí nisọ na ẹn ovẹn nado nù to ozán ehe mẹ ga. Whenẹnu, hiẹ na yì e dè bo mlọnai hẹ ẹ bo gbọ mí ni wleawuna kúnkan de sọn otọ́ mítọn mẹ.” 35 Enẹwutu, to ozán enẹ mẹ, yé na otọ́ yetọn ovẹn pludopludo nado nù; to whenẹnu yọpọ lọ yì bo mlọnai to apá na otọ́ etọn, ṣigba ewọ ma yọ́n whenue viyọnnu lọ mlọnai podọ whenue e fọ́n. 36 Viyọnnu awe Lọti tọn lẹ sọ mọhò na otọ́ yetọn. 37 Viplọnji lọ sọ ji visunnu de bo ylọ oyín etọn dọ Moabi.+ Ewọ wẹ otọ́ Moabinu lẹpo tọn kakajẹ egbehe.+ 38 Podọ viyọnnu yọpọ lọ lọsu ji visunnu de bo ylọ oyín etọn dọ Bẹni-ami. Ewọ wẹ otọ́ Amọninu+ lẹpo tọn kakajẹ egbehe.
20 Todin, Ablaham sẹtẹn sọn finẹ+ yì aigba Negẹb tọn ji bo nọ nọ̀ Kadẹṣi+ po Ṣuli+ po ṣẹnṣẹn. To whenue e nọ nọ̀ Gelali,*+ 2 Ablaham sọ vọ́ dọ gando Sala asi etọn go dọmọ: “Nọviyọnnu ṣie wẹ e yin.”+ Enẹwutu, Abimẹlẹki ahọlu Gelali tọn domẹhlan bo yí Sala.+ 3 Enẹgodo, Jiwheyẹwhe sọawuhia Abimẹlẹki to odlọ de mẹ to zánmẹ bo dọna ẹn dọmọ: “Todin, hiẹ taidi mẹhe ko kú dote na yọnnu he hiẹ yí lọ wutu,+ na asi mẹdevo tọn wẹ ewọ yin.”+ 4 Ṣigba, Abimẹlẹki ma ko sẹpọ ẹ.* Enẹwutu, e dọmọ: “Jehovah, be hiẹ na và akọta he yin homẹvọnọ* sudo nugbonugbo wẹ? 5 Be e ma yin ewọ lọsu wẹ dọna mi dọ, ‘Nọviyọnnu ṣie wẹ ewọ yin,’ podọ be yọnnu lọ lọsu ma dọ dọ, ‘Nọvisunnu ṣie wẹ ewọ yin ya’? Ahundopo po homẹvọ po wẹ yẹn yí do wà ehe.” 6 To whenẹnu, Jiwheyẹwhe nugbo lọ dọna ẹn to odlọ mẹ dọmọ: “Yẹn yọnẹn dọ ahundopo wẹ hiẹ yí do wà ehe, enẹwutu wẹ yẹn ko glọnalina we ma nado waylando sọta mi. Enẹ wẹ zọ́n bọ yẹn ma na we dotẹnmẹ nado doalọ ewọ go. 7 Todin, gọ̀ asi dawe lọ tọn jo, na yẹwhegán de wẹ ewọ yin,+ e nasọ basi ovẹvivẹ do ota towe mẹ+ bọ hiẹ na nọgbẹ̀. Ṣigba, eyin hiẹ ma gọ̀ ẹ jo, yọnẹn dọ hiẹ na kú dandan, yèdọ hiẹ po omẹ towe lẹpo po.”
8 Abimẹlẹki sọ fọ́n to afọnnu fuu bo ylọ devizọnwatọ etọn lẹpo bo dọ onú ehe lẹpo na yé, obu daho de sọ jẹ yé ji. 9 To whenẹnu, Abimẹlẹki ylọ Ablaham bo dọna ẹn dọmọ: “Etẹwẹ yin ehe he hiẹ wà do mí, podọ ylando tẹwẹ yẹn wà do we, bọ hiẹ jlo na hẹn oylan daho ehe wá yẹn po ahọluduta ṣie po ji? Aliho he mẹ hiẹ yinuwa hẹ mi te ma sọgbe.” 10 Abimẹlẹki sọ dọna Ablaham dọmọ: “Linlẹn tẹ mẹ wẹ hiẹ desọn nado wà onú ehe?”+ 11 Ablaham sọ dọmọ: “Na yẹn dọ to ohò ṣie mẹ dọ, ‘E họnwun dọ obu Jiwheyẹwhe tọn ma tin tofi, podọ yé na hù mi na asi ṣie wutu.’+ 12 Podọ gbọnvona enẹ, nọviyọnnu ṣie wẹ ewọ yin nugbonugbo, yèdọ viyọnnu otọ́ ṣie tọn, ṣigba e ma yin viyọnnu onọ̀ ṣie tọn, ewọ sọ wá lẹzun asi ṣie.+ 13 Podọ to whenuena Jiwheyẹwhe dọna mi nado tọ́n sọn owhé otọ́ ṣie tọn gbè+ nado to yìyì sọn fide jẹ fide, whenẹnu wẹ yẹn dọna ẹn dọ: ‘Ehe wẹ owanyi nugbo he hiẹ na dohia mi: Fidepope he mí na jẹ nọ dọ gando go e dọ, “Nọvisunnu ṣie wẹ ewọ yin.”’”+
14 Whenẹnu wẹ Abimẹlẹki yí lẹngbọ lẹ, oyìn lẹ, devisunnu lẹ po deviyọnnu lẹ po bo na Ablaham bosọ gọ̀ Sala asi etọn jo na ẹn. 15 Humọ, Abimẹlẹki dọmọ: “Todin, aigba ṣie tin-to-aimẹ na we. A sọgan nọ fidepope he jlo we.” 16 E sọ dọna Sala dọmọ: “Yẹn to fataka-kuẹ 1 000 yí na nọvisunnu towe.+ Ehe wẹ nado do homẹvọnọ-yinyin towe hia* mẹhe tin to dè we lẹpo podọ to mẹlẹpo nukọn, bọ hiẹ nasọ vò sọn vlẹko lẹpo mẹ.” 17 Ablaham sọ vẹ̀ Jiwheyẹwhe nugbo lọ, Jiwheyẹwhe sọ hẹn Abimẹlẹki, asi etọn po afanumẹ yọnnu etọn lẹ po jẹgangan, yé sọ jẹ viji ji; 18 na Jehovah ko hẹn yọnnu he to owhé Abimẹlẹki tọn gbè lẹpo zun wẹnsinọ,* na Sala asi Ablaham tọn wutu.+
21 Todin, Jehovah lẹ́ ayidonugo etọn hlan Sala kẹdẹdile e dọ do, Jehovah sọ wà nuhe e ko dopagbe etọn lọ na Sala.+ 2 Sala sọ mọhò+ to yọnhowhe Ablaham tọn mẹ bo ji visunnu de na ẹn, yèdọ to ojlẹ dide he Jiwheyẹwhe ko dopagbe etọn na Ablaham lọ mẹ.+ 3 Ablaham sọ ylọ oyín viyẹyẹ he Sala ko ji na ẹn lọ tọn dọ Isaki.+ 4 Podọ Ablaham gboadà na visunnu etọn Isaki to whenue e yin azán ṣinatọ̀n mẹvi, kẹdẹdile Jiwheyẹwhe ko degbena ẹn do.+ 5 Ablaham yin owhe 100 mẹvi to whenue visunnu etọn Isaki yin jiji na ẹn. 6 To whenẹnu, Sala dọmọ: “Jiwheyẹwhe ko na mi whẹwhinwhẹ́n nado konu; mẹdepope he sè ehe na konu hẹ mi.”* 7 E sọ yidogọ dọmọ: “Mẹnu wẹ sọgan ko dọna Ablaham dọ, ‘Sala na do anọ́ na ovi’? Etomọṣo, yẹn ko ji visunnu de na ẹn to yọnhowhe etọn mẹ.”
8 Todin, ovi lọ whẹ́n bọ yè deanọ́na ẹn, Ablaham sọ wleawuna hùnwhẹ daho de to azán he gbè Isaki yin anọ́ dena. 9 Sala sọ doayi e go dọ visunnu Hagali+ Egiptinu lọ tọn, he e ji na Ablaham nọ to Isaki vlẹko.+ 10 Enẹwutu, e dọna Ablaham dọmọ: “De afanumẹ yọnnu ehe po visunnu etọn po tọ́n, na visunnu afanumẹ yọnnu ehe tọn ma na yin gudutọ hẹ visunnu ṣie Isaki!”+ 11 Ṣigba, homẹ Ablaham tọn ma hùn paali do nuhe Sala dọ gando visunnu etọn go.+ 12 Whenẹnu, Jiwheyẹwhe dọna Ablaham dọmọ: “A dike nuhe Sala to didọ gando ovi lọ go podọ gando afanumẹ yọnnu towe go hẹn homẹgble we blo. Dotoaina ogbè etọn, na mẹhe na yin yiylọdọ kúnkan towe na wá gbọn Isaki gblamẹ.+ 13 Podọ na nuhe dù visunnu afanumẹ yọnnu lọ tọn,+ yẹn nasọ hẹn ewọ zun akọta de,+ na kúnkan* towe wẹ e yin wutu.”
14 Enẹwutu, Ablaham fọ́n to afọnnu fuu bo yí akla po ayúgò osin tọn de po na Hagali. E sọ ze yé do abọ́ etọn ji, enẹgodo, e do ewọ po ovi lọ po hlan.+ E sọ dedo bo to dindanpe gbọn danfafa Beẹli-ṣeba tọn ji.+ 15 To godo mẹ, osin vọ̀ sọn ayúgò lọ mẹ bọ e ze ovi lọ do atin pẹvi de sá. 16 E sọ yì bo sinai edeṣo dẹnsọ nudi tedidi ogá yinyin dopo tọn, na e dọmọ: “Yẹn ma jlo na mọ whenue ovi lọ na kú.” Enẹwutu, e sinai to olá bo jẹ avivi ji po ogbè lélé po.
17 Whenẹnu, Jiwheyẹwhe sè ogbè ovi lọ tọn,+ angẹli Jiwheyẹwhe tọn sọ ylọ Hagali sọn olọn mẹ bo dọna ẹn+ dọmọ: “Hagali, etẹwẹ to wiwà we? A dibu blo, na Jiwheyẹwhe ko dotoaina ogbè ovi lọ tọn sọn fihe e mlọn. 18 Fọ́n, bo yì ze e ṣite, na yẹn na hẹn ẹn zun akọta daho de.”+ 19 Whenẹnu, Jiwheyẹwhe hùn nukun etọn bọ e mọ dotọ̀ osin tọn de, ewọ sọ yì bo do osin gọ́ ayúgò lọ mẹ bo na osin ovi lọ. 20 Jiwheyẹwhe sọ tin po ovi+ lọ po dile e to whinwhẹ́n. E nọ nọ̀ danfafa ji bo lẹzun ogádetọ. 21 Podọ danfafa Palani+ tọn ji wẹ e nọ, onọ̀ etọn sọ dín asi de na ẹn sọn aigba Egipti tọn ji.
22 To ojlẹ enẹ mẹ, Abimẹlẹki po Fikoli he yin ogán awhànpa etọn tọn po wá dọna Ablaham dọmọ: “Jiwheyẹwhe nọ tin hẹ we to nudepope he hiẹ to wiwà mẹ.+ 23 Enẹwutu todin, yí Jiwheyẹwhe do whlé na mi dọ hiẹ ma na yí oklọ do yinuwa hẹ mi, podọ hẹ ovi ṣie lẹ po kúnkan ṣie lẹ po, podọ dọ hiẹ na yinuwa hẹ mi podọ hẹ mẹhe nọ nọ̀ aigba he ji hiẹ to ninọ lọ lẹ dile yẹn ko yinuwa hẹ we po owanyi nugbo po do.”+ 24 Ablaham sọ dọmọ: “Yẹn whlé.”
25 Ṣigba, Ablaham dọ̀n ayidonugo Abimẹlẹki tọn wá whẹho he gando dotọ̀ osin tọn he devizọnwatọ Abimẹlẹki tọn lẹ ko hòyí gbọn danuwiwa dali go ji.+ 26 Abimẹlẹki sọ gblọn dọmọ: “Yẹn ma yọ́n mẹhe wà ehe; podọ hiẹ ma dọho de na mi gandego, yẹnlọsu masọ sè nudepope gandego kakajẹ egbé.” 27 Enẹwutu, Ablaham yí lẹngbọ po oyìn po bo na Abimẹlẹki, yé omẹ awe lẹ sọ basi alẹnu de. 28 To whenue Ablaham de lẹngbọ asi ṣinawe dovo sọn lẹngbọpa etọn mẹ, 29 Abimẹlẹki dọna Ablaham dọmọ: “Naegbọn hiẹ do de lẹngbọ asi ṣinawe ehelẹ dovo?” 30 To whenẹnu, e dọna ẹn dọmọ: “Hiẹ dona kẹalọyi lẹngbọ asi ṣinawe lọ lẹ sọn alọ ṣie mẹ, na e nido yin kunnudenu de dọ yẹn wẹ kùn dotọ̀ ehe.” 31 Enẹ wẹ zọ́n bọ e do ylọ nọtẹn enẹ dọ Beẹli-ṣeba,*+ na finẹ wẹ yé omẹ awe lẹ whlé te. 32 Enẹwutu, yé basi alẹnu+ de to Beẹli-ṣeba, podọ Abimẹlẹki po Fikoli he yin ogán awhànpa etọn tọn po fọ́n bo lẹkọyi aigba Filistinu+ lẹ tọn ji. 33 Enẹgodo, e do atin tamaliski* tọn de do Beẹli-ṣeba bo pà oyín Jehovah+ Jiwheyẹwhe madopodo+ lọ tọn to finẹ. 34 Ablaham sọ gbọṣi aigba Filistinu lẹ tọn ji* na ojlẹ dindẹn.*+
22 Enẹgodo, Jiwheyẹwhe nugbo lọ tẹ́n Ablaham pọ́n,+ bo dọna ẹn dọmọ: “Ablaham!” ewọ sọ gblọn dọmọ: “Yẹn die!” 2 E sọ dọna ẹn dọmọ: “Yẹn vẹ̀ we, plan Isaki+ visunnu towe dopo gee lọ, mẹhe hiẹ yiwanna tlala,+ bo zingbejizọnlin yì aigba Molia+ tọn ji bosọ yí i do sanvọ́ to finẹ taidi avọ́nunina mimẹ̀ de to dopo to osó he yẹn na dohia we lọ lẹ mẹ ji.”
3 Enẹwutu, Ablaham fọ́n to afọnnu fuu bo wleawuna kẹtẹkẹtẹ etọn bo plan awe to devizọnwatọ etọn lẹ mẹ gọna Isaki visunnu etọn. E sọ zẹ̀ nake avọ́nunina mimẹ̀ lọ tọn, enẹgodo, e fọ́n bo zingbejizọnlin dedo fihe Jiwheyẹwhe nugbo lọ ko dohia ẹ. 4 To azán atọ̀ntọ gbè, Ablaham ze nukun etọn lẹ daga bo mọ filọ hlan olá. 5 Todin, Ablaham dọna devizọnwatọ etọn lẹ dọmọ: “Mìwlẹ po kẹtẹkẹtẹ lọ po ni nọfi, ṣigba yẹn po yọpọ sunnu lọ po jlo na hẹji yì dọ́n nado basi sinsẹ̀n bo nasọ lẹkọwa mì dè.”
6 Enẹwutu, Ablaham didá nake avọ́nunina mimẹ̀ lọ tọn Isaki visunnu etọn. Podọ ewọ lọsu hẹn miyọ́n po ohí* po to alọ etọn lẹ mẹ, yé omẹ awe lẹ sọ zọnpọ bo to yìyì. 7 Isaki sọ kanse Ablaham otọ́ etọn dọmọ: “Otọ́ ṣie!” Ewọ sọ gblọn dọmọ: “Yẹn die, visunnu ṣie!” To whenẹnu, e sọ dọmọ: “Miyọ́n po nake po tin tofi, ṣigba fie wẹ lẹngbọ he mí na yí do basi avọ́nunina mimẹ̀ lọ te?” 8 Ablaham sọ gblọn dọmọ: “Visunnu ṣie, Jiwheyẹwhe lọsu na wleawuna lẹngbọ he mí na yí do basi avọ́nunina mimẹ̀ lọ.”+ Yé omẹ awe lẹ sọ to yìyì afọsu-afọsi.
9 To godo mẹ, yé jẹ fihe Jiwheyẹwhe nugbo lọ ko dọna ẹn nado yì, Ablaham sọ tùn agbà de do finẹ bo to nake lẹ do e ji. E sọ blá alọ po afọ Isaki visunnu etọn tọn po bo ze e do nake lẹ ji to agbà lọ ji.+ 10 Ablaham sọ dlẹnalọ bo ze ohí* lọ nado hù visunnu etọn.+ 11 Ṣigba, angẹli Jehovah tọn ylọ ẹ sọn olọn mẹ bo dọmọ: “Ablaham, Ablaham!” ewọ sọ gblọn dọmọ: “Yẹn tin tofi!” 12 E sọ dọmọ: “A gbleawuna yọpọ sunnu lọ blo podọ a sọ wà nudepope na ẹn blo, na todin yẹn yọnẹn dọ hiẹ dibusi Jiwheyẹwhe, na hiẹ ma gbẹ́ nado na mi visunnu towe, yèdọ ovi towe dopo gee lọ wutu.”+ 13 Ablaham sọ ze okọ̀ daga bo mọ agbò de he azò etọn lẹ plá do nukan go to nukọn etọn. Enẹwutu, Ablaham yì bo ze agbò lọ bo yí i do basi avọ́nunina mimẹ̀ de do otẹn visunnu etọn tọn mẹ. 14 Ablaham sọ ylọ oyín filọ tọn dọ Jehovah-jile.* Nuhe zọ́n niyẹn bọ e gbẹ́ nọ yin didọ kakajẹ egbehe dọmọ: “E na yin awú etọn wle to osó Jehovah tọn ji.”+
15 Angẹli Jehovah tọn sọ ylọ Ablaham sọn olọn mẹ whla awetọ 16 bo dọmọ: “‘Yẹn yí dee do whlé,’ wẹ Jehovah dọ,+ ‘na hiẹ ko wà ehe bo ma whlá visunnu towe dopo gee lọ do mi wutu,+ 17 yẹn na dona we dandan podọ yẹn nasọ hẹn kúnkan* towe sudeji dandan taidi sunwhlẹvu olọn tọn lẹ podọ taidi tọkẹ́n huto tọn lẹ,+ podọ kúnkan* towe nasọ yí họngbo* kẹntọ etọn lẹ tọn.+ 18 Podọ akọta aigba ji tọn lẹpo na mọ dona de yí na yede gbọn kúnkan* towe+ gblamẹ na hiẹ ko dotoaina ogbè ṣie wutu.’”+
19 Enẹgodo, Ablaham lẹkọwa devizọnwatọ etọn lẹ dè, yé sọ lẹkọ dedo Beẹli-ṣeba;+ Ablaham sọ zindonukọn nado nọ nọ̀ Beẹli-ṣeba.
20 Enẹgodo wẹ linlin wá na Ablaham dọmọ: “Milka lọsu ko ji visunnu lẹ na Nahọli nọvisunnu towe:+ 21 Enẹ wẹ Uzi plọnji etọn, gọna Buz nọvisunnu etọn po Kemuẹli otọ́ Alami tọn po, 22 podọ Kẹsẹdi, Hazo, Pilidaṣi, Jidlafi gọna Bẹtuẹli.”+ 23 Bẹtuẹli sọ ji Lebeka.+ Omẹ ṣinatọ̀n ehelẹ wẹ Milka ji na Nahọli nọvisunnu Ablaham tọn. 24 Podọ Nahọli tindo asimọwhlá de he nọ yin Lehuma, ewọ lọsu ji visunnu lẹ: Enẹ wẹ Teba, Gahami, Tahaṣi po Maaka po.
23 Sala nọgbẹ̀ na owhe 127; owhe he Sala nọgbẹ̀ na lẹ niyẹn.+ 2 Sala sọ kú to Kiliati-alba,+ enẹ wẹ Heblọni,+ to aigba Kenani tọn ji,+ Ablaham sọ nọ aluẹmẹ bo viavi na okú Sala tọn wutu. 3 Enẹgodo, Ablaham fọ́n sọn oṣiọ asi etọn tọn kọ̀n bo dọna visunnu Heti+ tọn lẹ dọmọ: 4 “Jonọ podọ gbéjinọtọ de wẹ yẹn yin to ṣẹnṣẹn mìtọn.+ Mì sà aigba de na mi, na yẹn nido yí i do basi ṣiọditẹn de to ṣẹnṣẹn mìtọn, bọ yẹn nado diṣiọ asi ṣie tọn.” 5 Enẹwutu, visunnu Heti tọn lẹ gblọnna Ablaham dọmọ: 6 “Dotoaina mí, oklunọ ṣie. Ahọvi dide Jiwheyẹwhe tọn* de wẹ hiẹ yin to ṣẹnṣẹn mítọn.+ Fihe yọ́n hugan to ṣiọditẹn mítọn lẹ mẹ wẹ hiẹ ni diṣiọ asi towe tọn do. Depope to mí mẹ ma na gbẹna we dọ a ni ma diṣiọ asi towe tọn do ṣiọditẹn etọn blo.”
7 To whenẹnu, Ablaham fọnṣite bo dẹ́ do odò na tòvi lọ lẹ, yèdọ na visunnu Heti+ tọn lẹ, 8 bo dọna yé dọmọ: “Eyin mì* yigbe dọ ma diṣiọ asi ṣie tọn, mì dotoaina mi bo vẹ̀ Eflọni visunnu Zohali tọn hẹ mi, 9 na ewọ nido sà oslò Makpela tọn etọn he tin to tónu aigba etọn tọn na mi. Mì dike e ni sà ẹ na mi to nukun mìtọn mẹ yin fataka he jẹna aigba lọ,+ na yẹn nido sọgan yí i zan taidi ṣiọditẹn de.”+
10 Eflọni sọ to aisinsin to visunnu Heti tọn lẹ ṣẹnṣẹn. Enẹwutu, Eflọni Hetinu lọ gblọnna Ablaham do otó visunnu Heti tọn lẹ tọn mẹ podọ do otó mẹhe to họngbo tòdaho etọn tọn mẹ+ biọ lẹpo tọn mẹ, dọmọ: 11 “Lala, oklunọ ṣie! Dotoaina mi. Yẹn na na we aigba lọ po oslò he tin to e ji lọ po. To nukun visunnu omẹ ṣie lẹ tọn mẹ wẹ yẹn to aigba lọ na we te. Diṣiọ asi towe tọn.” 12 To whenẹnu, Ablaham dẹ́ do odò to tòvi lọ lẹ nukọn 13 bo dọna Eflọni do otó tòvi lọ lẹ tọn mẹ, dọmọ: “Yẹn vẹ̀ we, dotoaina mi! Yẹn na suahọ pipé we na aigba lọ. Kẹalọyi i sọn asi e, na yẹn nido diṣiọ asi ṣie tọn do finẹ.”
14 To whenẹnu, Eflọni sọ gblọnna Ablaham dọmọ: 15 “Oklunọ ṣie, dotoaina mi. Ṣekẹli* fataka tọn 400 poun wẹ aigba ehe na họ̀, ṣigba etẹwẹ enẹ yin na mí omẹ awe lẹ? Enẹwutu, yì diṣiọ asi towe tọn.” 16 Ablaham dotoaina Eflọni, Ablaham sọ jlẹ sọha fataka tọn he Eflọni ko dọ do otó visunnu Heti tọn lẹ tọn mẹ lọ na ẹn, yèdọ ṣekẹli* fataka tọn 400 sọgbe hẹ nujlẹnu he ajọwatọ lẹ kẹalọyi.+ 17 Gbọnmọ dali, aigba Eflọni tọn he tin to Makpela bo to nukọnna Mamle, yèdọ aigba lọ po oslò he tin to e ji po gọna atin he tin to aigba lọ ji lẹpo, lẹzun nutindo 18 Ablaham tọn, yèdọ aigba he e họ̀ to nukun visunnu Heti tọn lẹ gọna mẹhe to họngbo tòdaho etọn tọn mẹ biọ lẹpo tọn mẹ. 19 Enẹgodo, Ablaham diṣiọ Sala asi etọn tọn do oslò aigba Makpela tọn he tin to nukọnna Mamle mẹ, enẹ wẹ Heblọni, to aigba Kenani tọn ji. 20 Enẹwutu, visunnu Heti tọn lẹ jo aigba lọ po oslò he tin to e ji po na Ablaham taidi ṣiọditẹn de.+
24 Todin, Ablaham ko poyọnho, bọ owhe etọn ko sẹyì taun, podọ Jehovah ko dona ẹn to nulẹpo mẹ.+ 2 Ablaham sọ dọna devizọnwatọ etọn he yin mẹho hugan to whédo etọn mẹ, mẹhe to anadena nutindo etọn lẹpo+ dọmọ: “Jaale, ze alọ towe do asapada ṣie glọ, 3 na yẹn jlo dọ hiẹ ni yí Jehovah, Jiwheyẹwhe olọn po aigba po tọn do whlé na mi, dọ hiẹ ma na mọ asi na visunnu ṣie sọn viyọnnu Kenaninu lẹ tọn mẹ, yèdọ mẹhe ṣẹnṣẹn yẹn to ninọ lẹ.+ 4 Kakatimọ, hiẹ dona yì otò ṣie mẹ podọ yì hẹnnumẹ+ ṣie lẹ mẹ, bo na mọ asi de na visunnu ṣie Isaki.”
5 To whenẹnu, devizọnwatọ lọ dọna ẹn dọmọ: “Eyin yọnnu lọ ma jlo na hodo mi wá aigba ehe ji ka lo? Be yẹn dona lẹkọna visunnu towe yì aigba he ji hiẹ tọ́n sọn+ lọ wẹ ya?” 6 Ablaham sọ dọna ẹn dọmọ: “Hẹn diun dọ a lẹkọna visunnu ṣie yì dọ́n blo.+ 7 Jehovah Jiwheyẹwhe olọn tọn, he hẹn mi tọ́n sọn owhé otọ́ ṣie tọn gbè podọ sọn aigba hẹnnumẹ+ ṣie lẹ tọn ji podọ mẹhe dọho hẹ mi bosọ whlé na mi+ dọmọ: ‘Kúnkan* towe+ wẹ yẹn na na aigba ehe,’+ ewọ na do angẹli etọn hlan jẹnukọnna we,+ bọ hiẹ na mọ asi na visunnu ṣie sọn dọ́n dandan.+ 8 Ṣigba, eyin e wá jọ bọ yọnnu lọ ma jlo na hodo we, whenẹnu, hiẹ na vò sọn whiwhle he a whlé lọ mẹ. E ni họnwun na we poun dọ a lẹkọna visunnu ṣie yì dọ́n blo.” 9 Enẹwutu, devizọnwatọ lọ ze alọ etọn do asapada Ablaham klunọ etọn tọn glọ bo whlé na ẹn gando whẹho ehe go.+
10 Whenẹnu, devizọnwatọ lọ bẹ kanklosọ́ klunọ etọn tọn ao gọna nudagbe wunmẹ lẹpo sọn klunọ etọn dè bo dedo. E sọ wleali dedo Mẹsopotamia yì tòdaho Nahọli tọn mẹ. 11 To whenue e jẹ dotọ̀ osin tọn he to gbonu tòdaho lọ tọn kọ̀n, e nọte na kanklosọ́ lọ lẹ nido sọgan gbọjẹ. E yin nudi whèjai, whenue yọnnu he nọ wá dọ̀n osin lẹ nọ saba tọ́njẹgbonu wá sọn tòdaho lọ mẹ. 12 Ewọ sọ dọmọ: “Jehovah Jiwheyẹwhe klunọ ṣie Ablaham tọn E, jaale dike nulẹ ni yì do ganji na mi to egbé bo do owanyi nugbo hia klunọ ṣie Ablaham. 13 Yẹn to ote to asisa osin tọn de kọ̀n tofi, bọ viyọnnu tòdaho lọ mẹ tọn lẹ to tintọ́njẹgbonu nado wá dọ̀n osin. 14 Dike e ni yindọ jọja yọnnu he yẹn na dọna dọ, ‘Jaale, zlọn osinzẹ́n towe, na yẹn nido nùsin,’ bọ e na dọna mi dọ, ‘Nùsin, podọ yẹn nasọ na kanklosọ́ towe lẹ lọsu ga,’ ewọ lọ wẹ hiẹ ni de na devizọnwatọ towe Isaki; podọ gbọn ehe dali dike yẹn ni yọnẹn dọ hiẹ ko do owanyi nugbo hia klunọ ṣie.”
15 Podọ whẹpo e nado dotana hodidọ etọn, Lebeka, he yin viyọnnu Bẹtuẹli,+ yèdọ visunnu Milka+ asi Nahọli+ tọn, he yin nọvisunnu Ablaham tọn tọ́njẹgbonu, bọ osinzẹ́n etọn sọ tin to abọ́ etọn ji. 16 Jọja yọnnu lọ yọnwhanpẹ taun, yèdọ awhli de; podọ sunnu depope ma ko tindo kọndopọ zanhẹmẹ tọn hẹ ẹ. Ewọ sọ wle ali yì dotọ̀ lọ kọ̀n bosọ dọ̀n osin gọ́ osinzẹ́n etọn podọ to enẹgodo e lẹkọ. 17 To afọdopolọji, devizọnwatọ lọ dowezun yì pé e bo dọmọ: “Jaale na mi osin vude sọn ozẹ́n towe mẹ.” 18 E sọ gblọn dọmọ: “Oklunọ ṣie, nù.” E sọ zlọn ozẹ́n lọ po awuyiya po doalọ mẹ bo na ẹn osin. 19 To whenue e ko na ẹn osin nù godo, to whenẹnu, e dọmọ: “Yẹn nasọ dọ̀n osin bo na na kanklosọ́ towe lẹ kaka bọ e na pé yé.” 20 Enẹwutu, e kọ̀n osin he to ozẹ́n etọn mẹ po awuyiya po do dozẹn osin tọn he to kọmẹ de mẹ bo dowezun pludopludo yì dotọ̀ lọ kọ̀n nado dọ̀n osin, bosọ to osin dọ̀n mapote na kanklosọ́ etọn lẹpo. 21 To ojlẹ enẹ lẹpo mẹ, dawe lọ gbọṣi abọẹ bo to pinpọn ẹn po nupaṣamẹ po nado yọnẹn eyin vlavo Jehovah ko hẹn gbejizọnlin etọn tindo kọdetọn dagbe kavi lala.
22 Whenue kanklosọ́ lọ lẹ ko nùsin pó godo, dawe lọ de alọkẹ sika tọn he yin awọntin tọn de he pẹ̀n sọ ṣekẹli* daa de tọ́n na ẹn gọna alọgàn sika tọn awe he pinpẹn yetọn sọ ṣekẹli* ao, 23 dawe lọ sọ dọmọ: “Jaale, dọna mi, viyọnnu mẹnu tọn wẹ a yin? Be abò de tin to owhé otọ́ towe tọn gbè bọ mí na nọ to ozán ehe mẹ ya?” 24 Viyọnnu lọ sọ gblọnna ẹn dọmọ: “Viyọnnu Bẹtuẹli,+ visunnu Milka tọn he e ji na Nahọli+ wẹ yẹn yin.” 25 E sọ yidogọ dọmọ: “Núyọ po kanlin sin núdùdù susu po tin to mí si, podọ fihe mì na nọ to ozán lọ mẹ ga.” 26 Dawe lọ sọ dẹ́ do odò bo ṣinyọ́n nukunmẹ etọn ai to Jehovah nukọn 27 bo dọmọ: “Opẹ́ wẹ na Jehovah, yèdọ Jiwheyẹwhe klunọ ṣie Ablaham tọn, na ewọ ma ko doalọtena owanyi nugbo etọn po nugbonọ-yinyin etọn po hlan klunọ ṣie. Jehovah ko deanana mi wá owhé nọvisunnu klunọ ṣie tọn lẹ tọn gbè.”
28 Jọja yọnnu lọ sọ dowezun yì bo dọ onú ehelẹ na whédo onọ̀ etọn tọn. 29 Lebeka sọ tindo nọvisunnu de bọ oyín etọn nọ yin Labani.+ Labani sọ dowezun yì dawe he to gbonu lọ dè to asisa osin tọn lọ kọ̀n. 30 Whenue e mọ alọkẹ awọntin tọn lọ to e go podọ alọgàn lọ lẹ to alọkọ na nọviyọnnu etọn bo ko sọ sè nuhe Lebeka nọviyọnnu etọn dọ lẹ dọmọ: “Aliho he mẹ dawe lọ dọhona mi te die,” whenẹnu e wá dawe lọ dè, mẹhe gbẹ́ pò to ote to apá na kanklosọ́ lọ lẹ to asisa osin tọn lọ kọ̀n. 31 To afọdopolọji e dọmọ: “Wá hiẹ donanọ Jehovah tọn. Naegbọn hiẹ do gbọṣi ote to gbonu fi? Yẹn ko wleawu ohọ̀ tọn podọ nọtẹn de na kanklosọ́ lẹ.” 32 Enẹwutu, dawe lọ wá whégbè, e* sọ tún nuhe to kanklosọ́ lọ lẹ go bosọ na núyọ po núdùdù kanlin tọn po kanklosọ́ lọ lẹ podọ osin nado klọ́ afọ etọn gọna afọ sunnu he zọnhẹ ẹ lẹ tọn. 33 Ṣigba, to whenue núdùdù yin hinhẹnwa nukọn etọn, e dọmọ: “Yẹn ma sọgan dùnú adavo yẹn dọhodo nuhe hẹn mi wá ji whẹ́.” Enẹwutu, Labani dọmọ: “Dọho!”
34 Whenẹnu, e dọmọ: “Devizọnwatọ Ablaham tọn wẹ yẹn yin.+ 35 Podọ Jehovah ko dona klunọ ṣie susu tlala bo ko hẹn ẹn zun adọkunnọ taun gbọn lẹngbọ lẹ, oyìn lẹ, fataka, sika, devisunnu lẹ, deviyọnnu lẹ, kanklosọ́ lẹ po kẹtẹkẹtẹ lẹ po nina ẹn dali.+ 36 Humọ, Sala asi klunọ ṣie tọn ji visunnu de na klunọ ṣie to yọnhowhe mẹ,+ klunọ ṣie nasọ na visunnu etọn nuhe e tindo lẹpo.+ 37 Enẹwutu, klunọ ṣie hẹn mi nado whlé, dọmọ: ‘Hiẹ ma dona mọ asi na visunnu ṣie sọn viyọnnu Kenaninu lẹ tọn mẹ, yèdọ mẹhe tindo aigba he ji yẹn to ninọ lẹ.+ 38 Lala, ṣigba hiẹ na yì owhé otọ́ ṣie tọn gbè podọ yì whẹndo ṣie mẹ,+ bo na mọ asi na visunnu ṣie.’+ 39 Ṣigba, yẹn dọna klunọ ṣie dọmọ: ‘Eyin e wá jọ bọ yọnnu lọ gbẹ́ ma nado hodo mi lo?’+ 40 E sọ dọna mi dọmọ: ‘Jehovah, mẹhe nukọn yẹn ko zinzọnlin te,+ na do angẹli+ etọn hlan we bo na hẹn we tindo kọdetọn dagbe to gbejizọnlin towe mẹ bọ hiẹ na mọ asi na visunnu ṣie sọn whẹndo ṣie mẹ podọ sọn owhé otọ́ ṣie tọn gbè.+ 41 Hiẹ na vò sọn whiwhle lọ mẹ eyin hiẹ yì whẹndo ṣie mẹ bọ yé ma yí viyọnnu lọ na we. Ehe na hẹn we vò sọn whiwhle he a basi lọ mẹ.’+
42 “Whenue yẹn jẹ asisa osin tọn lọ kọ̀n to egbé, whenẹnu yẹn dọmọ: ‘Jehovah Jiwheyẹwhe klunọ ṣie Ablaham tọn E, eyin hiẹ na hẹn gbejizọnlin ṣie tindo kọdetọn dagbe, 43 todin, yẹn to ote to asisa osin tọn de kọ̀n tofi. Dike e ni yindọ awhli+ he tọ́n nado wá dọ̀n osin he yẹn na dọna dọ, “Jaale, dike yẹn ni nùsin vude sọn ozẹ́n towe mẹ,” 44 bọ e na dọna mi dọ, “Nù, podọ yẹn nasọ dọ̀n osin na kanklosọ́ towe lẹ ga.” Ewọ wẹ ni yin yọnnu he Jehovah de na visunnu klunọ ṣie tọn.’+
45 “Whẹpo yẹn nado dotana hodidọ to ahun ṣie mẹ, yẹn mọ Lebeka tọ́njẹgbonu ja, bọ ozẹ́n etọn to abọ́ etọn ji, e sọ wleali jẹte yì asisa osin tọn lọ kọ̀n bo jẹ osin dọ̀n ji. To whenẹnu yẹn dọna ẹn dọmọ: ‘Jaale, na mi osin ma nù.’+ 46 E sọ zlọn ozẹ́n etọn sọn abọ́ etọn ji po awuyiya po bo dọmọ: ‘Nùsin,+ podọ yẹn nasọ na kanklosọ́ towe lẹ ga.’ Yẹn sọ nùsin, e sọ na osin kanklosọ́ lọ lẹ bọ yé nù. 47 Enẹgodo, yẹn kanse e dọmọ, ‘Viyọnnu mẹnu tọn wẹ hiẹ yin?’ e sọ dọ dọ, ‘Viyọnnu Bẹtuẹli visunnu Nahọli tọn he Milka ji na ẹn.’ Enẹwutu, yẹn do alọkẹ awọntin tọn do awọntin etọn go podọ alọgàn lẹ do alọ etọn lẹ go.+ 48 Yẹn sọ dẹ́ do odò bo ṣinyọ́n nukunmẹ ṣie ai to Jehovah nukọn bo pà Jehovah Jiwheyẹwhe klunọ ṣie Ablaham tọn,+ he ko deanana mi to aliho dagbe mẹ nado mọ viyọnnu nọvisunnu klunọ ṣie tọn nado hẹn ẹn yì na visunnu etọn. 49 Todin, eyin mìwlẹ jlo na do owanyi nugbo po nugbonọ-yinyin po hia klunọ ṣie nugbonugbo, mì dọna mi; ṣigba, eyin e ma yinmọ, mì dọna mi, na yẹn nido dedo fidevo.”*+
50 Whenẹnu, Labani po Bẹtuẹli po gblọn dọmọ: “Jehovah dè wẹ whẹho ehe wá sọn. E ma yin míwlẹ tọn nado dọ mọwẹ kavi lala* na we gba. 51 Lebeka die to nukọn towe e. Plan ẹn bo yì, podọ ewọ ni yin asi visunnu klunọ towe tọn, kẹdẹdile Jehovah ko dọ do.” 52 To whenuena devizọnwatọ Ablaham tọn ko sè nuhe yé dọ, to afọdopolọji e ṣinyọ́n nukunmẹ ai to Jehovah nukọn. 53 Devizọnwatọ lọ sọ de nuyizan fataka tọn lẹ po sika tọn lẹ po gọna tewu lẹ tọ́n bo na Lebeka, podọ e sọ na nunina dagbedagbe lẹ nọvisunnu etọn po onọ̀ etọn po. 54 Enẹgodo, ewọ po mẹhe zọnhẹ ẹ lẹ po dù bo nù, yé sọ dọ́ finẹ to ozán lọ mẹ.
To whenue e fọ́n to afọnnu, e dọmọ: “Mì jo mi ma dedo klunọ ṣie dè.” 55 Nọvisunnu etọn po onọ̀ etọn po sọ dọmọ: “Dike jọja yọnnu lọ ni nọ mí dè e whè gbau na azán ao. Enẹgodo, e sọgan yì.” 56 Ṣigba, dawe lọ dọna yé dọmọ: “Mì hẹn mi dẹn blo, na Jehovah ko hẹn gbejizọnlin ṣie tindo kọdetọn dagbe. Mì jo mi, na yẹn nido yì klunọ ṣie dè.” 57 Enẹwutu, yé dọmọ: “Dike mí ni ylọ jọja yọnnu lọ bo sè sọn onù etọn mẹ.” 58 Yé sọ ylọ Lebeka bo dọna ẹn dọmọ: “Be hiẹ jlo na yì po dawe ehe po ya?” Ewọ sọ gblọn dọmọ: “E jlo mi nado yì.”
59 Enẹwutu, yé do Lebeka+ nọviyọnnu yetọn po yọnnu nukunpedomẹgotọ etọn*+ po podọ devizọnwatọ Ablaham tọn gọna sunnu he zọnhẹ ẹ lẹ hlan. 60 Yé sọ dona Lebeka bo dọna ẹn dọmọ: “Hiẹ nọviyọnnu mítọn E, na hiẹ ni lẹzun fọtọ́n donu fọtọ́n ao lẹ,* podọ na kúnkan* towe ni yí họngbo* mẹhe gbẹwanna ẹn lẹ tọn.”+ 61 Enẹgodo, Lebeka po devizọnwatọ etọn yọnnu lẹ po fọ́n bo hẹ kanklosọ́ lẹ ji bosọ hodo dawe lọ. Enẹwutu, dawe lọ sọ plan Lebeka bo wleali dedo.
62 Todin, Isaki ko lẹkọ sọn aliho he yì Beẹli-lahai-loi+ lọ ji, na aigba Negẹb+ tọn ji wẹ e nọ nọ̀. 63 Isaki sọ tọ́n nado lẹnayihamẹpọn+ to danji to whèjai gblamẹ. Whenue e ze nukun etọn lẹ daga, etẹ nkọ, e mọ bọ kanklosọ́ lẹ ja! 64 Whenue Lebeka ze nukun etọn lẹ daga, e mọ Isaki dohlan bo jẹte po awuyiya po sọn kanklosọ́ ji. 65 E sọ kanse devizọnwatọ lọ dọmọ: “Mẹnu wẹ dawe he to zọnlinzin to danji bo jlo na wá pé mí ehe yin?” Devizọnwatọ lọ sọ dọmọ: “Klunọ ṣie wẹ.” E sọ yí nukunmẹṣinyọnnu etọn bo ṣinyọ́n ota etọn. 66 Devizọnwatọ lọ sọ na linlin nuhe jọ lẹpo tọn Isaki. 67 Enẹgodo, Isaki hẹn Lebeka biọ gòhọ Sala onọ̀ etọn tọn mẹ.+ Gbọnmọ dali, e plan Lebeka bọ e lẹzun asi etọn; e sọ yiwanna ẹn,+ Isaki sọ yin homẹmiọnna to okú onọ̀ etọn tọn+ godo.
25 Ablaham sọ dà asi devo he nọ yin Ketula. 2 To nukọn mẹ, yọnnu lọ ji Zimlani, Jọkṣani, Mẹdani, Midiani,+ Iṣbaki po Ṣuahi+ po na ẹn.
3 Jọkṣani sọ ji Ṣeba po Dedani po.
Visunnu Dedani tọn lẹ wẹ Aṣulimi, Letuṣimi po Leumimi po.
4 Visunnu Midiani tọn lẹ wẹ Efa, Efẹli, Hanọki, Abida po Ẹldaa po.
Omẹ ehe lẹpo wẹ yin ovivi Ketula tọn lẹ.
5 To godo mẹ, Ablaham na nuhe e tindo lẹpo Isaki,+ 6 ṣigba na nuhe dù visunnu asimọwhlá* etọn lẹ tọn, nunina lẹ wẹ Ablaham na yé. Enẹgodo, to whenue e gbẹ́ pò togbẹ̀ e do yé hlan whèzẹtẹn-waji sọn Isaki visunnu etọn dè,+ yì aigba Whèzẹtẹn tọn ji. 7 Ablaham sọ nọgbẹ̀ na owhe 175. 8 Ablaham sọ kú to whenue e ko poyọnho pete, bo whẹ́n mẹho bo ko sọ tindo pekọ to gbẹninọ mẹ, e sọ yin dìdì taidi omẹ etọn lẹ.* 9 Isaki po Iṣmaeli visunnu etọn lẹ po dì i do oslò Makpela tọn mẹ to aigba Eflọni visunnu Zohali Hetinu lọ tọn ji he tin to Mamle nukọn,+ 10 yèdọ aigba he Ablaham ko họ̀ sọn visunnu Heti tọn lẹ si. Finẹ wẹ Ablaham yin dìdì do, kẹdẹdi Sala asi etọn.+ 11 To okú Ablaham tọn godo, Jiwheyẹwhe zindonukọn nado to didona Isaki visunnu etọn,+ podọ fihe Isaki nọ nọ̀ madẹn do Beẹli-lahai-loi.+
12 Ehe wẹ otàn Iṣmaeli+ visunnu Ablaham tọn he Hagali+ Egiptinu he yin deviyọnnu Sala tọn ji na Ablaham.
13 Oyín visunnu Iṣmaeli tọn lẹ tọn sọgbe hẹ dodonu whẹndo yetọn lẹ tọn die: Plọnji Iṣmaeli tọn wẹ Nebaiọti,+ enẹgodo Kẹdali,+ Adbeẹli, Mibsami,+ 14 Miṣma, Duma, Masa, 15 Hadadi, Tema, Jẹtuli, Nafiṣi po Kedẹma po. 16 Omẹ ehelẹ wẹ visunnu Iṣmaeli tọn lẹ podọ ahọvi 12 akọ̀ lọ lẹ tọn.+ Avàtẹn yetọn lẹ gọna nọtẹn he yé lẹ́ adó zannu tọn do lẹ sọ tindo yinkọ yetọn lẹ ga. 17 Iṣmaeli sọ nọgbẹ̀ na owhe 137. To whenẹnu wẹ e kú bo yin dìdì taidi omẹ etọn lẹ.* 18 Yé sọ nọ nọ̀ Havila+ he sẹpọ Ṣuli,+ he madẹn do Egipti, kakajẹ Asilia. Yé sọ sawhé do fihe madẹn do nọvisunnu yetọn lẹpo.*+
19 Ehe wẹ otàn Isaki visunnu Ablaham tọn.+
Ablaham ji Isaki. 20 Isaki sọ yin owhe 40 mẹvi to whenue e dà Lebeka viyọnnu Bẹtuẹli+ Alaminu Padani-alami tọn lọ, nọviyọnnu Labani Alaminu lọ tọn. 21 Isaki sọ nọ to Jehovah vẹ̀ mapote do asi etọn tamẹ, na e yin wẹnsinọ wutu; enẹwutu Jehovah dotoaina ovẹvivẹ etọn, bọ Lebeka asi etọn sọ mọhò. 22 Podọ visunnu he to ohò etọn mẹ lẹ to ahidi hẹ yede+ sọmọ bọ e dọmọ: “Eyin yẹn dona jiya sọle e na pọnte na mi nado kú.” Enẹwutu, e kanhose Jehovah. 23 Jehovah sọ dọna ẹn dọmọ: “Akọta awe wẹ to ohò towe mẹ,+ podọ akọta voovo awe wẹ na yin jiji sọn hiẹ mẹ;+ akọta dopo na dohuhlọn hú akọta awetọ,+ mẹho lọ nasọ sẹ̀n yọpọ lọ.”+
24 To whenue azán etọn lẹ pé nado jivi, pọ́n! ahoho wẹ to ohò etọn mẹ. 25 Tintan sọ tọ́n bo tindo ofún vẹẹ to agbasa go bọ agbasa etọn pete taidi tewu ofúnnọ de,+ enẹwutu yé ylọ oyín etọn dọ Esau.*+ 26 Enẹgodo, nọvisunnu etọn tọ́n bọ alọ etọn hẹn afọgbẹn Esau tọn go,+ e sọ ylọ oyín etọn dọ Jakọbu.*+ Isaki sọ yin owhe 60 mẹvi to whenue Lebeka ji yé.
27 Whenue visunnu lọ lẹ whẹ́n, Esau lẹzun gbéyantọ azọ́nyọnẹntọ de,+ bo nọ saba to gbéyàn to gbonu, ṣigba Jakọbu nọ saba nọ gòhọ mẹ;+ podọ ewọ ma tindo oblọ. 28 Isaki sọ yiwanna Esau, na e nọ hẹn gbélàn wá na ẹn nado dù, to whenue e yindọ Jakọbu wẹ Lebeka yiwanna.+ 29 To gbèdopo, Jakọbu to ayàn dà, Esau sọ gọ̀ sọn gbémẹ bọ onú ko ṣikọna ẹn pete. 30 Enẹwutu, Esau dọna Jakọbu dọmọ: “Jaale, yawu na mi ayàn vẹẹ towe enẹ* vude,* na onú ko ṣikọna mi pete!”* Enẹ wẹ zọ́n bọ ewọ nọ yin yiylọdọ Edomi.*+ 31 Enẹwutu, Jakọbu dọmọ: “Jẹnukọn whẹ́, sà jlọjẹ viplọnji tọn towe na mi!”+ 32 Esau sọ dọmọ: “Todin he yẹn to kúkú jei! Ale tẹwẹ jlọjẹ plọnji tọn tindo na mi?” 33 Jakọbu sọ yidogọ dọmọ: “Whlé na mi jẹnukọn whẹ́!” Ewọ sọ whlé na ẹn bo sà jlọjẹ etọn taidi viplọnji na Jakọbu.+ 34 Jakọbu sọ na akla po ayàn apàkún lẹntile tọn de po Esau, e sọ dù bo nù, ewọ sọ fọ́n bo wleali dedo. Gbọnmọ dali, Esau vlẹ jlọjẹ plọnji tọn etọn.
26 Todin, huvẹ de tọ́n to aigba lọ ji, he gbọnvona ehe wá aimẹ to azán Ablaham tọn lẹ gbè,+ bọ Isaki yì Abimẹlẹki ahọlu Filistinu lẹ tọn dè to Gelali. 2 Whenẹnu, Jehovah sọawuhia ẹ bo dọmọ: “A yì Egipti blo. Nọ aigba he yẹn dohia we ji. 3 Nọ nọ̀ aigba ehe ji taidi jonọ,+ yẹn nasọ nọhẹ we bo na dona we, na hiẹ podọ na kúnkan* towe wẹ yẹn na na aigba ehe lẹpo,+ yẹn nasọ hẹn whiwhle he yẹn whlé na Ablaham otọ́ towe lọ di+ dọmọ: 4 ‘Yẹn na hẹn kúnkan* towe sudeji taidi sunwhlẹvu olọn tọn lẹ;+ yẹn nasọ na aigba ehe lẹpo+ kúnkan* towe podọ akọta aigba tọn lẹpo na mọ dona de yí na yede gbọn kúnkan* towe gblamẹ,’+ 5 na Ablaham ko dotoaina ogbè ṣie bo ko setonuna nubiọtomẹsi ṣie lẹ, gbedide ṣie lẹ, osẹ́ndoai ṣie lẹ po osẹ́n ṣie lẹ po wutu.”+ 6 Enẹwutu, Isaki gbọṣi Gelali.+
7 Eyin sunnu he nọ nọ̀ finẹ lẹ kanhose gando asi etọn go, e nọ dọmọ: “Nọviyọnnu ṣie wẹ ewọ yin.”+ E dibu nado dọ, “Asi ṣie wẹ,” na e dọ dọ, “Sunnu finẹ tọn lẹ nikaa hù mi na Lebeka tọn wutu,” na yọnnu whanpẹnọ de wẹ ewọ yin.+ 8 To ojlẹ delẹ godo, Abimẹlẹki ahọlu Filistinu lẹ tọn to nupọn gbọn fleṣe nù bo mọ bọ Isaki to aihun owanyi tọn dà hẹ Lebeka asi etọn.*+ 9 To afọdopolọji, Abimẹlẹki ylọ Isaki bo dọmọ: “E họnwun dọ asi towe wẹ! Enẹwutu, naegbọn hiẹ do dọ dọ, ‘Nọviyọnnu ṣie wẹ ewọ yin’?” Isaki sọ dọna ẹn dọmọ: “Yẹn dọ mọ na yẹn nikaa kú na ewọ tọn wutu.”+ 10 Ṣigba, Abimẹlẹki zindonukọn dọmọ: “Etẹwẹ yin ehe bọ hiẹ wà do mí?+ E pò pẹẹde bọ dopo to omẹ mítọn lẹ mẹ na ko dọ́ asi towe dè, bọ hiẹ na ko hẹn mí hùwhẹ!”+ 11 To whenẹnu, Abimẹlẹki dosẹ́n na mẹlọ lẹpo dọmọ: “Mẹdepope he doalọ dawe ehe po asi etọn po go na yin hùhù dandan!”
12 Isaki sọ jẹ jinukun do ji to aigba enẹ ji, podọ to owhe enẹ mẹ e gbẹ̀n donu 100 nuhe e do tọn, na Jehovah to didona ẹn+ wutu. 13 E lẹzun adọkunnọ bọ adọkun etọn to susudeji kaka bọ e lẹzun adọkunnọ daho tlala. 14 Ewọ sọ tindo lẹngbọpa lẹngbọ lẹ tọn po kanlinpa oyìn lẹ tọn po gọna devizọnwatọ susu+ sọmọ bọ onú etọn vẹunna Filistinu lẹ.
15 To whenẹnu, Filistinu lẹ sọ yí okọ́ do sú dotọ̀ he devizọnwatọ otọ́ etọn tọn lẹ ko kùn to azán Ablaham otọ́ etọn tọn gbè lẹpo.+ 16 Abimẹlẹki sọ dọna Isaki dọmọ: “Tọ́n sọn lẹdo mítọn mẹ, na hiẹ ko dohuhlọn tlala hugan mí.” 17 Enẹwutu, Isaki sẹtẹn sọn finẹ bo sawhé do agbàdo* Gelali+ tọn mẹ bo nọ nọ̀ finẹ. 18 Isaki sọ vọ́ kùn dotọ̀ he ko yin kùnkùn to azán Ablaham otọ́ etọn tọn lẹ gbè, ehe Filistinu lẹ ko sú to okú Ablaham tọn godo,+ e sọ na oyín yé sọgbe hẹ oyín he otọ́ etọn ko do na yé dai.+
19 To whenue devizọnwatọ Isaki tọn lẹ to odò kùn to agbàdo* lọ mẹ, yé mọ dotọ̀ osin he wé tọn de. 20 Podọ lẹngbọhọtọ Gelali tọn lẹ jẹ nudọn ji hẹ lẹngbọhọtọ Isaki tọn lẹ bo dọmọ: “Osin mítọn wẹ!” Enẹwutu, e ylọ dotọ̀ lọ dọ Esẹki,* na yé ko dọnnu hẹ ẹ wutu. 21 Podọ yé jẹ dotọ̀ devo kùn ji, yé sọ tindo wiwọ́ gando enẹ lọsu go ga. Enẹwutu, e ylọ ẹ dọ Sitna.* 22 Enẹgodo, e sẹtẹn sọn finẹ bo kùn dotọ̀ devo, ṣigba yé ma tindo wiwọ́ gando enẹ go. Enẹwutu, e ylọ ẹ dọ Lehobọti* bo dọmọ: “Todin, Jehovah ko na mí nọtẹn he gblo de bọ mí sọgan jideji to aigba lọ ji.”+
23 Enẹgodo, e hẹji yì sọn finẹ bo yì Beẹli-ṣeba.+ 24 Jehovah sọ sọawuhia ẹ to ozán enẹ mẹ bo dọmọ: “Yẹn wẹ Jiwheyẹwhe Ablaham otọ́ towe tọn.+ A dibu blo,+ na yẹn tin po hiẹ po, yẹn nasọ dona we bo nasọ hẹn kúnkan* towe sudeji na Ablaham devizọnwatọ ṣie tọn wutu.”+ 25 Enẹwutu, Isaki basi agbà de do finẹ bo jẹ oyín Jehovah tọn pà* ji.+ E sọ tùn gòhọ etọn do finẹ+ bọ devizọnwatọ etọn lẹ kùn dotọ̀ de do finẹ.
26 Enẹgodo, Abimẹlẹki wá e dè sọn Gelali po Ahuzati ayinamẹtọ etọn po gọna Fikoli ogán awhànpa etọn tọn.+ 27 To whenẹnu, Isaki dọna yé dọmọ: “Naegbọn mì do wá dè e, to whenue e yindọ mì gbẹwanna mi bo yàn mi sọn lẹdo mìtọn mẹ?” 28 Yé sọ dọmọ: “Matin ayihaawe, míwlẹ ko mọdọ Jehovah tin po hiẹ po.+ Enẹ wẹ zọ́n bọ mí do basi nudide nado wá dọna we dọ, ‘Jaale, dike whiwhle de ni tin to míwlẹ po hiẹ po ṣẹnṣẹn, podọ dike mí ni basi alẹnu de hẹ we,+ 29 bọ hiẹ ma nado wà nuylankan de na mí kẹdẹdile míwlẹ ma wà nuylankan de na we do, ṣigba bo wà nudagbe kẹdẹ na we gbọn dido we hlan to jijọho mẹ dali. Podọ Jehovah ko dona we todin.’” 30 Whenẹnu, e basi hùnwhẹ de na yé, yé sọ dù bo nù. 31 To aihọngbè, yé fọ́n to afọnnu fuu bosọ whlé na ode awetọ.+ Enẹgodo, Isaki do yé hlan, yé sọ yì sọn e dè to jijọho mẹ.
32 Podọ to azán enẹ gbè, devizọnwatọ Isaki tọn lẹ wá bo dọna ẹn gando dotọ̀ he yé kùn+ lọ go dọmọ: “Mí ko mọ osin!” 33 Enẹwutu, e ylọ dotọ̀ lọ dọ Ṣiba. Enẹ wẹ zọ́n bọ tòdaho lọ nọ yin yiylọdọ Beẹli-ṣeba+ kakajẹ egbé.
34 To whenue Esau tindo owhe 40, e dà Juditi viyọnnu Beẹli Hetinu lọ tọn po Basemati viyọnnu Elọni Hetinu lọ tọn+ po. 35 Yé sọ yin asisa awubla sinsinyẹn tọn* na Isaki po Lebeka+ po.
27 Whenue Isaki ko poyọnho bọ nukun etọn lẹ masọ to numọ ba, e ylọ Esau+ visunnu etọn mẹho bo dọna ẹn dọmọ: “Visunnu ṣie!” Ewọ sọ dọmọ: “Yẹn die!” 2 E sọ dọna ẹn dọmọ: “Yẹn ko poyọnho todin. Yẹn masọ yọ́n gbeegbe yẹn na kú. 3 Enẹwutu, jaale, ze nuyizan towe lẹ todin, ogá-hẹnnu towe po ogá towe po bo yì gbémẹ bosọ yangbé bo hẹn gbélàn delẹ wá na mi.+ 4 Enẹgodo, dà núdùdù vivi he yẹn yiwanna de bo ze wá na mi, na yẹn* nido dù, nado sọgan dona we whẹpo do kú.”
5 Ṣigba, Lebeka sè whenue Isaki to hodọna Esau visunnu etọn. Esau sọ tọ́nyi gbémẹ nado yì hù gbélàn wá.+ 6 Lebeka sọ dọna Jakọbu visunnu etọn+ dọmọ: “Yẹn sè todin bọ otọ́ towe to hodọna Esau nọvisunnu towe, dọ, 7 ‘Hẹn gbélàn delẹ wá na mi bo dà núdùdù vivi de na mi na yẹn ni dù, na yẹn nido sọgan dona we to Jehovah nukọn jẹnukọnna okú ṣie.’+ 8 Podọ todin, visunnu ṣie, dotoaina mi po sọwhiwhe po bo wà nuhe yẹn jlo na dọna we.+ 9 Jaale, yì kanlinpa lọ mẹ bo hẹn gbọgbọẹ winyanwinyan dagbedagbe awe wá na mi, na yẹn ni yí yé do dà núdùdù vivi de na otọ́ towe, yèdọ ehe ewọ yiwanna. 10 Enẹgodo, hiẹ na hẹn ẹn yì otọ́ towe dè bọ ewọ na dù i, na ewọ nido sọgan dona we whẹpo do kú.”
11 Jakọbu sọ dọna Lebeka onọ̀ etọn dọmọ: “Ṣigba, Esau nọvisunnu ṣie tindo ofún to agbasa go+ bọ agbasa yẹn tọn ka dídí. 12 Eyin otọ́ ṣie ka doalọ go e lo?+ To whenẹnu e na taidi dọ yẹn to otọ́ ṣie yí do davlẹ, bọ yẹn nasọ hẹn dẹ̀hodo wá dee ji kakati nido yin dona.” 13 Enẹwutu, onọ̀ etọn dọna ẹn dọmọ: “Visunnu ṣie, na dẹ̀hodo he dona wá hiẹ ji ni wá oji e. Saa wà nuhe yẹn dọna we poun, bo yì hẹn kanlin lọ lẹ wá na mi.”+ 14 Enẹwutu, e yì bo hẹn yé wá na onọ̀ etọn, bọ onọ̀ etọn sọ dà núdùdù vivi he otọ́ etọn yiwanna de. 15 To enẹgodo, Lebeka yí awù dagbe hugan Esau visunnu etọn mẹho tọn lẹ, he ewọ tindo to họmẹ bo ze yé do na Jakọbu visunnu etọn yọpọ.+ 16 E sọ yí ayú gbọgbọẹ winyanwinyan lọ lẹ tọn do alọ etọn lẹ go podọ do fihe ofún ma te to okọ̀ etọn go.+ 17 To whenẹnu, Lebeka ze núdùdù vivi po akla he e ko wleawuna lọ po do alọmẹ na Jakọbu visunnu etọn.+
18 Ewọ sọ biọ họmẹ yì otọ́ etọn dè bo dọmọ: “Otọ́ ṣie!” e sọ dọmọ: “Yẹn tin tofi! Hiẹ mẹnu wẹ, visunnu ṣie?” 19 Jakọbu sọ dọna otọ́ etọn dọmọ: “Yẹn Esau viplọnji+ towe wẹ. Yẹn ko basi kẹdẹdile hiẹ dọna mi do. Jaale bo fọ́n sinai bo dù sọn gbélàn ṣie mẹ, na hiẹ* nido sọgan dona mi.”+ 20 Enẹwutu, Isaki dọna visunnu etọn dọmọ: “Visunnu ṣie, nawẹ a wagbọn do yawu dín in mọ domọ?” Ewọ sọ gblọn dọmọ: “Jehovah Jiwheyẹwhe towe wẹ gọalọna mi bọ yẹn do mọ ẹn.” 21 Whenẹnu, Isaki dọna Jakọbu dọmọ: “Jaale visunnu ṣie, sẹpọ mi, na yẹn nido sọgan doalọ gowe nado yọnẹn eyin hiẹ wẹ visunnu ṣie Esau nugbonugbo kavi lala.”+ 22 Enẹwutu, Jakọbu dọnsẹpọ Isaki otọ́ etọn, ewọ sọ doalọ e go, enẹgodo e dọmọ: “Ogbè lọ yin ogbè Jakọbu tọn, ṣigba alọ lọ lẹ yin alọ Esau tọn.”+ 23 Ewọ masọ yọ́n ẹn, na alọ etọn lẹ tindo ofún taidi alọ Esau nọvisunnu etọn tọn lẹ. Enẹwutu, e dona ẹn.+
24 E sọ kanse dọmọ: “Be visunnu ṣie Esau wẹ hiẹ yin nugbonugbo ya?” ewọ sọ gblọn dọmọ: “Yẹn wẹ.” 25 Whenẹnu, e dọmọ: “Visunnu ṣie, ze núdùdù lọ sẹpọ mi, na yẹn* nido dù sọn gbélàn lọ mẹ bosọ dona we.” Enẹwutu, e ze núdùdù lọ sẹpọ ẹ bọ ewọ dù, e sọ hẹn ovẹn wá na ẹn bọ e nù. 26 Enẹgodo, Isaki otọ́ etọn dọna ẹn dọmọ: “Jaale visunnu ṣie, sẹpọ mi bo donùnùgo na mi.”+ 27 Enẹwutu, e sẹpọ ẹ bo donùnùgo na ẹn, na Isaki nido sè owán awù etọn lẹ tọn.+ Ewọ sọ dona ẹn bo dọmọ:
“Pọ́n, owán visunnu ṣie tọn taidi owán danji he Jehovah ko dona tọn. 28 Na Jiwheyẹwhe nugbo lọ ni na we ahun olọn tọn+ lẹ podọ aigba he yọ́n na jinukun+ gọna okún susugege po ovẹn yọyọ po.+ 29 Na gbẹtọ lẹ ni nọ sẹ̀n we podọ na akọta lẹ ni nọ dẹ́ do odò na we. Dugán do nọvisunnu towe lẹ ji, podọ na visunnu onọ̀ towe tọn lẹ ni nọ dẹ́ do odò na we.+ Na mẹdepope he hodẹ̀do we ni yin dẹ̀hodo podọ na mẹdepope he dona we ni yin didona.”+
30 Podọ tlolo he Isaki ko dotana didona Jakọbu, bọ e ko tọ́n sọn Isaki otọ́ etọn nukọn wẹ Esau nọvisunnu etọn lẹkọ sọn gbéyàn gbé.+ 31 Ewọ lọsu sọ wleawuna núdùdù vivi de bo ze wá na otọ́ etọn, bosọ dọna ẹn dọmọ: “Na otọ́ ṣie ni fọ́n bo dù sọn gbélàn visunnu etọn tọn mẹ, na hiẹ* nido sọgan dona mi.” 32 Podọ Isaki otọ́ etọn dọna ẹn dọmọ: “Hiẹ mẹnu wẹ?” e sọ dọna ẹn dọmọ: “Yẹn Esau, visunnu towe plọnji lọ wẹ.”+ 33 Isaki sọ jẹ sisọsisọ ji sinsinyẹn, e sọ dọmọ: “Mẹnu ka wẹ hù gbélàn bo hẹn ẹn wá na mi dai? Yẹn ko dù whẹpo hiẹ do wá, bọ yẹn ko sọ dona ẹn—ewọ nasọ yin didona nugbonugbo!”
34 To whenue Esau sè nuhe otọ́ etọn dọ lẹ, e jẹ avivi ji po ogbè lélé po podọ po adi po bo dọna otọ́ etọn dọmọ: “Otọ́ ṣie, dona yẹnlọsu ga!”+ 35 Ṣigba, e gblọnna ẹn dọmọ: “Nọvisunnu towe ko wá po oklọ po na ewọ nido sọgan mọ dona he yin towe lọ yí.” 36 Enẹwutu, e dọmọ: “Be e ma yin ehe wutu wẹ oyín etọn do yin yiylọdọ Jakọbu,* na ewọ nido sọgan yí otẹn ṣie whla awe ehelẹ ya?+ E ko yí jlọjẹ plọnji tọn sọn asi e,+ podọ e ko sọ yí dona ṣie todin!”+ E sọ yidogọ dọmọ: “Be hiẹ ma pò dona de dai na mi wẹ ya?” 37 Ṣigba, Isaki gblọnna Esau dọmọ: “Pọ́n, yẹn ko de e di ogán do ji we,+ podọ nọvisunnu etọn lẹpo wẹ yẹn ko na ẹn taidi devizọnwatọ, podọ okún po ovẹn yọyọ po wẹ yẹn ko yí do dona ẹn.+ Etẹwẹ gbẹ́ sọ pò bọ yẹn na wà na we, visunnu ṣie?”
38 Whenẹnu wẹ Esau dọna otọ́ etọn dọmọ: “Otọ́ ṣie, be dona dopo enẹ kẹdẹ wẹ hiẹ tindo ya? Otọ́ ṣie, dona yẹnlọsu ga!” Esau sọ ze ogbè daga bo bẹ avi.+ 39 Enẹwutu, Isaki otọ́ etọn sọ gblọnna ẹn dọmọ:
“Pọ́n, hiẹ ma na nọ aigba he yọ́n na jinukun de ji podọ ahun ma na nọ ja sọn olọn mẹ na we.+ 40 Hiẹ nasọ nọ nọgbẹ̀ gbọn ohí towe dali,+ nọvisunnu towe wẹ hiẹ nasọ nọ sẹ̀n.+ Amọ́, eyin hiẹ biọ tukla mẹ, hiẹ na de dewe sọn zẹgẹ etọn glọ.”+
41 Ṣigba, na dona he Jakọbu ko mọyi sọn otọ́ etọn dè wutu, Esau hẹn ẹn do homẹ sinsinyẹn,+ podọ Esau sọ to didọ to ahun ede tọn mẹ dọmọ: “Ojlẹ aluẹmẹninọ tọn na otọ́ ṣie ko sẹpọ.+ Enẹgodo, yẹn na hù Jakọbu nọvisunnu ṣie.” 42 To whenue ohó Esau visunnu etọn mẹho lọ tọn yin didọna Lebeka, to afọdopolọji e ylọ Jakọbu visunnu etọn yọpọ lọ bo dọna ẹn dọmọ: “Pọ́n! Esau nọvisunnu towe jlo na víhlọ̀n bo to linlẹn nado hù we.* 43 Todin pọ́n, visunnu ṣie, dotoaina ogbè ṣie. Fọ́n bo họnyi Labani nọvisunnu ṣie dè to Halani.+ 44 Hiẹ nasọ nọ e dè na ojlẹ de kakajẹ whenue adi nọvisunnu towe tọn na ko yìdo, 45 yèdọ kakajẹ whenue homẹgble nọvisunnu towe tọn na wayi bọ ewọ na ko wọn nuhe a wà na ẹn. Yẹn nasọ domẹhlan bo na plan we sọn finẹ. Naegbọn yẹn nado hẹn mì omẹ awe lẹ bu to gbèdopo?”
46 Enẹgodo, Lebeka to didọna Isaki mapote dọmọ: “Yẹn gbẹwanna ogbẹ̀ ṣie na viyọnnu Heti tọn lẹ wutu.+ Eyin Jakọbu lọsu na dà asi sọn viyọnnu Heti tọn lẹ mẹ taidi ehelẹ, yèdọ sọn viyọnnu aigba lọ tọn lẹ mẹ, e na pọnte na mi nado kú hugan nado togbẹ̀.”+
28 Enẹwutu, Isaki ylọ Jakọbu bo dona ẹn bosọ dọna ẹn dọmọ: “Hiẹ ma dona dà asi sọn viyọnnu Kenaninu lẹ tọn mẹ.+ 2 Fọ́n bo yì Padani-alami to owhé Bẹtuẹli tọn gbè, yèdọ mẹhe yin otọ́ onọ̀ towe tọn bo dà asi sọn viyọnnu Labani+ nọvisunnu onọ̀ towe tọn lẹ mẹ. 3 Jiwheyẹwhe Ganhunupotọ nasọ dona we bo na hẹn we yin sinsẹ́nnọ bo nasọ hẹn we sudeji, bọ hiẹ na lẹzun gbẹtọgun susu.+ 4 Hiẹ po kúnkan* towe po wẹ ewọ na na dona Ablaham tọn,+ bọ hiẹ na mọ aigba he ji a to ninọ di jonọ yí taidi nutindo, enẹ wẹ aigba he Jiwheyẹwhe ko na Ablaham.”+
5 Enẹwutu, Isaki do Jakọbu hlan, ewọ sọ dedo Padani-alami, nado yì Labani he yin visunnu Bẹtuẹli Alaminu lọ tọn,+ yèdọ nọvisunnu Lebeka+ onọ̀ Jakọbu po Esau po tọn lọ dè.
6 Esau mọdọ Isaki ko dona Jakọbu bo ko do e hlan Padani-alami nado yì dà asi sọn finẹ, podọ to whenue ewọ dona ẹn e sọ dosẹ́n na ẹn dọ, “A dà viyọnnu Kenaninu lẹ tọn blo,”+ 7 Jakọbu sọ setonuna otọ́ etọn po onọ̀ etọn po bosọ dedo Padani-alami.+ 8 Whenẹnu Esau mọdọ viyọnnu Kenaninu lẹ tọn ma hẹn homẹhun Isaki otọ́ etọn,+ 9 enẹwutu, Esau yì Iṣmaeli dè bo dà Mahalati viyọnnu Iṣmaeli tọn, mẹhe yin visunnu Ablaham tọn, yèdọ nọviyọnnu Nebaiọti tọn dogọ asi etọn lẹ.+
10 Jakọbu sọ tọ́n sọn Beẹli-ṣeba bo pànta Halani.+ 11 To ojlẹ vude godo, e jẹ nọtẹn de bo wleawu nado nọ finẹ to ozán lọ mẹ, na owhè ko yihọ wutu. Enẹwutu, e yí dopo to zannu he tin to finẹ lẹ mẹ bo yí do basi kọ̀donu bo mlọnai do finẹ.+ 12 E sọ jẹ odlọ kú ji, podọ pọ́n! pèkán* de yin tùntùnte do aigba ji bo dite sọ́ olọn; angẹli Jiwheyẹwhe tọn lẹ sọ to jihẹ bo to tejẹ gbọn e ji.+ 13 Pọ́n! Jehovah sọ tin to e ji to aga, e sọ dọmọ:
“Yẹn wẹ Jehovah Jiwheyẹwhe Ablaham otọ́ towe tọn podọ Jiwheyẹwhe Isaki tọn.+ Hiẹ po kúnkan* towe+ po wẹ yẹn na na aigba he ji a mlọnai do lọ. 14 Kúnkan* towe nasọ sù taidi kọ́gudu aigba tọn,+ hiẹ nasọ gbàpe sọn whèyihọ yì whèzẹtẹn podọ sọn agewaji yì hùwaji, podọ whẹndo aigba ji tọn lẹpo na yin didona* gbọn hiẹ po kúnkan* towe po gblamẹ.+ 15 Podọ yẹn tin hẹ we, yẹn na basi hihọ́na we to fidepope he hiẹ yì bo nasọ hẹn we lẹkọwa aigba ehe ji.+ Yẹn ma na jo we do podọ yẹn na hẹn nuhe yẹn ko dopagbe etọn na we lọ di.”+
16 Enẹgodo, Jakọbu fọ́n sọn amlọn mẹ bo dọmọ: “Na nugbo tọn, Jehovah tin to nọtẹn ehe bọ yẹn ma yọnẹn.” 17 E sọ dibu bo yidogọ dọmọ: “Lehe nọtẹn ehe dobu do sọ! Nọtẹn ehe ma yin fidevo de hugan owhé Jiwheyẹwhe tọn+ podọ ehe sọ wẹ họngbo olọn tọn.”+ 18 Enẹwutu, Jakọbu fọ́n to afọnnu fuu bo ze zannu he ewọ yí do basi kọ̀donu lọ bosọ tùnte taidi dòtin de bo kọ̀n amì do e ji.+ 19 E sọ ylọ oyín nọtẹn lọ tọn dọ Bẹtẹli,* ṣigba Luzi wẹ tòdaho lọ nọ yin dai.+
20 Jakọbu sọ dopà, dọmọ: “Eyin Jiwheyẹwhe na tin po yẹn po bo basi hihọ́na mi to gbejizọnlin ṣie ji bosọ na mi akla nado dù podọ awù nado do 21 bọ yẹn sọ lẹkọ to jijọho mẹ wá owhé otọ́ ṣie tọn gbè, whenẹnu Jehovah na dohia dọ ewọ wẹ Jiwheyẹwhe ṣie nugbonugbo. 22 Zannu ehe, he yẹn ko tùnte taidi dòtin de nasọ lẹzun owhé Jiwheyẹwhe tọn,+ podọ nuhe hiẹ na na mi lẹpo wẹ yẹn na yí mado-ao etọn na we.”
29 Enẹgodo, Jakọbu jẹ gbejizọnlin etọn ji bo yì aigba omẹ Whèzẹtẹn tọn lẹ tọn ji. 2 E sọ mọ dotọ̀ de to danji, podọ pipli lẹngbọ lẹ tọn atọ̀n mlọnai to apá na ẹn, na dotọ̀ enẹ wẹ lẹngbọhọtọ lẹ nọ saba yizan nado na osin lẹngbọ lẹ. Zannu daho de sọ tin to dotọ̀ lọ nù. 3 To whenuena lẹngbọ lẹpo ko yin pipli dopọ do finẹ, yé nọ bli zannu lọ sẹ̀ sọn dotọ̀ lọ nù, bo nọ na osin lẹngbọpa lọ lẹ, to enẹgodo, yé nọ gọ̀ zannu lọ do otẹn etọn mẹ to dotọ̀ lọ nù.
4 Enẹwutu, Jakọbu dọna yé dọmọ: “Nọvisunnu ṣie lẹ emi, fie wẹ mì wá sọn?” yé sọ gblọnna ẹn dọmọ: “Halani wẹ mí tọ́n sọn.”+ 5 E sọ dọna yé dọmọ: “Be mì yọ́n Labani+ ovivi Nahọli+ tọn ya?” yé sọ dọna ẹn dọmọ: “Mí yọ́n ẹn.” 6 Whenẹnu wẹ e dọna yé dọmọ: “Be ewọ to kẹdẹ ya?” Yé sọ gblọnna ẹn dọmọ: “E to kẹdẹ. Podọ pọ́n Laheli+ viyọnnu etọn wẹ plan lẹngbọ lẹ ja niyẹn!” 7 Ewọ sọ dọmọ: “Ṣigba, owhè ṣádada mẹ wẹ mí te. Ojlẹ lọ ma die nado bẹ lẹngbọ lẹ pli. Mì na osin lẹngbọ lẹ, podọ to enẹgodo, mì plan yé nado yì dù amà.” 8 Whenẹnu wẹ yé dọmọ: “Dotẹnmẹ ma yin nina mí nado wàmọ kakajẹ whenue lẹngbọ lẹpo na yin bibẹpli bọ zannu lọ na ko yin bibli sẹ̀ sọn dotọ̀ lọ nù. Enẹgodo wẹ mí sọgan na osin lẹngbọ lẹ.”
9 Whenue e gbẹsọ pò to hodọ hẹ yé, Laheli plan lẹngbọ otọ́ etọn tọn lẹ wá, na lẹngbọyìntọ de wẹ ewọ yin wutu. 10 Podọ whenue Jakọbu mọ Laheli viyọnnu Labani he yin nọvisunnu onọ̀ etọn tọn po lẹngbọ Labani tọn lẹ po, Jakọbu yì dotọ̀ lọ kọ̀n to afọdopolọji bo bli zannu lọ sẹ̀ sọn e nù bo na osin lẹngbọ Labani tọn lẹ, mẹhe yin nọvisunnu onọ̀ etọn tọn. 11 Jakọbu sọ donùnùgo na Laheli bo bẹ avi po ogbè lélé po. 12 Jakọbu sọ dọna Laheli dọ ylọnẹn-ylọvi* otọ́ etọn tọn podọ visunnu Lebeka tọn wẹ emi yin. Laheli sọ dowezun nado yì dọna otọ́ etọn.
13 Tlolo he Labani+ sè linlin lọ gando Jakọbu visunnu nọviyọnnu etọn tọn go, e yawu nado yì pé e. E sọ gbò e fán bo donùnùgo na ẹn bosọ plan ẹn wá owhé etọn gbè. E sọ jẹ nuhe jọ do e go lẹpo dọna Labani ji. 14 Labani sọ dọna ẹn dọmọ: “Ohùn po agbasalan dopolọ po* wẹ mí yin nugbonugbo.” Enẹwutu, e nọ e dè na osun dopo blebu.
15 Whenẹnu wẹ Labani kanse Jakọbu dọmọ: “Be hiẹ yin ylọnẹn-ylọvi*+ ṣie wutu wẹ a dona sẹ̀n mi vọnu ya? Dọna mi, etẹwẹ yẹn na yí do suahọ we?”+ 16 Labani tindo viyọnnu awe. Mẹho lọ nọ yin Lea bọ yọpọ lọ nọ yin Laheli.+ 17 Ṣigba, nukunmẹ Lea tọn ma dọnmẹdogo, to whenue e yindọ Laheli yọnwhanpẹ tlala bọ nukunmẹ etọn dọnmẹdogo. 18 Jakọbu sọ yiwanna Laheli, enẹwutu e dọmọ: “Yẹn na sẹ̀n we na owhe ṣinawe na Laheli viyọnnu towe yọpọ lọ.”+ 19 Whenẹnu, Labani dọmọ: “E pọnte na mi nado yí i na we hú nado yí i na sunnu devo. Gbọṣi dè e.” 20 Podọ Jakọbu yí owhe ṣinawe do sẹ̀n ẹn na Laheli wutu,+ ṣigba owhe lọ lẹ di azán vude poun to nukun etọn mẹ na e yiwanna Laheli.
21 Enẹgodo, Jakọbu dọna Labani dọmọ: “Yí asi ṣie na mi, na azán lọ lẹ ko vọ̀, bo gbọ yẹn ni tindo kọndopọ zanhẹmẹ tọn hẹ ẹ.” 22 Enẹwutu, Labani pli mẹhe nọ nọ̀ finẹ lẹpo bo basi hùnwhẹ de. 23 Ṣigba to whèjai, Labani plan Lea viyọnnu etọn wá na ẹn na ewọ nido tindo kọndopọ zanhẹmẹ tọn hẹ ẹ. 24 Humọ, Labani yí Zilpa deviyọnnu etọn na Lea viyọnnu etọn taidi devizọnwatọ de.+ 25 To whenue ai họ́n, Jakọbu wá mọdọ Lea wẹ! Enẹwutu, e dọna Labani dọmọ: “Etẹwẹ yin ehe he hiẹ wà do mi? Be e ma yin Laheli wẹ yẹn sẹ̀n we na ya? Todin, naegbọn hiẹ do klọ mi?”+ 26 Labani sọ dọmọ: “E ma yin aṣa mítọn to file nado na asu nọvi jẹnukọnna mẹdaho. 27 Duvivi osẹ lọ tọn hẹ yọnnu ehe. Enẹgodo, hiẹ na yí yọnnu awetọ lọ ga na devizọn he a na wà na mi na owhe ṣinawe dogọ.”+ 28 Jakọbu sọ wàmọ bo yí osẹ lọ zan hẹ yọnnu ehe podọ to enẹgodo ewọ yí Laheli viyọnnu etọn na ẹn taidi asi. 29 Labani sọ yí Bilha+ deviyọnnu etọn na Laheli taidi devizọnwatọ de.+
30 Podọ Jakọbu tindo kọndopọ zanhẹmẹ tọn hẹ Laheli bosọ do owanyi hia Laheli hú Lea, e sọ sẹ̀n ẹn na owhe ṣinawe devo.+ 31 Whenue Jehovah mọdọ Lea yin wangbẹna, e dike bọ e mọhò,*+ ṣigba Laheli yin wẹnsinọ.+ 32 Lea sọ mọhò bo ji visunnu de bosọ ylọ oyín etọn dọ Leubẹni,*+ na e dọmọ: “Na Jehovah mọ awufiẹsa ṣie wutu,+ bọ asu ṣie na jẹ wanyina mi ji todin.” 33 E sọ mọhò devo bo ji visunnu de bosọ dọmọ: “Na Jehovah ko mọdọ yè ma yiwanna mi, enẹwutu e na mi ehe ga.” E sọ ylọ oyín etọn dọ Simeoni.*+ 34 E sọ vọ́ mọhò bo ji visunnu de bosọ dọmọ: “Todin, asu ṣie na dọnsẹpọ mi, na yẹn ko ji visunnu atọ̀n na ẹn.” Enẹwutu wẹ oyín etọn nọ yin yiylọdọ Levi.*+ 35 Ewọ sọ mọhò whladopo dogọ bo ji visunnu de bosọ dọmọ: “Todin yẹn na pà Jehovah.” Enẹwutu, e ylọ oyín etọn dọ Juda.*+ Enẹgodo, e masọ mọ viji.
30 Whenue Laheli mọdọ emi ma jivi depope na Jakọbu, e jẹ awuwhàn nọviyọnnu etọn ji bo jẹ didọna Jakọbu ji dọmọ: “Na mi ovi, e ma yinmọ yẹn na kú.” 2 Whenẹnu, Jakọbu gblehomẹ do Laheli go bo dọmọ: “Be yẹn wẹ Jiwheyẹwhe he glọnalina we nado jivi ya?”* 3 E sọ gblọn dọmọ: “Deviyọnnu ṣie Bilha+ tin tofi. Tindo kọndopọ zanhẹmẹ tọn hẹ ẹ na ewọ nido jivi na mi* bọ yẹnlọsu nado tindo ovi gbọn ewọ dali.” 4 Enẹwutu, e ze Bilha deviyọnnu etọn na ẹn taidi asi, Jakọbu sọ tindo kọndopọ zanhẹmẹ tọn hẹ ẹ.+ 5 Bilha mọhò, podọ to ojlẹ vude godo e ji visunnu de na Jakọbu. 6 To whenẹnu Laheli dọmọ: “Jiwheyẹwhe ko yinuwa taidi whẹdatọ ṣie bo ko sọ dotoaina ogbè ṣie, enẹwutu wẹ e na mi visunnu de.” E sọ ylọ oyín etọn dọ Dani.*+ 7 Bilha, deviyọnnu Laheli tọn sọ mọhò whladopo dogọ podọ to ojlẹ vude godo, e ji visunnu awetọ na Jakọbu. 8 Laheli sọ dọmọ: “Yẹn ko whlẹnagbà hẹ nọviyọnnu ṣie sinsinyẹn. Yẹn ko sọ dudeji!” Enẹwutu, e ylọ oyín etọn dọ Naftali.*+
9 Whenue Lea mọdọ emi masọ jivi ba, e ze deviyọnnu etọn Zilpa na Jakọbu taidi asi.+ 10 Podọ Zilpa deviyọnnu Lea tọn ji visunnu de na Jakọbu. 11 Lea sọ dọmọ: “Kosọ dagbe nankọ die!” Enẹwutu wẹ e ylọ oyín etọn dọ Gad.*+ 12 Enẹgodo Zilpa, deviyọnnu Lea tọn ji visunnu awetọ na Jakọbu. 13 To whenẹnu, Lea dọmọ: “Lehe yẹn yin ayajẹnọ do sọ! Na viyọnnu lẹ na ylọ mi dọ ayajẹnọ todin.”+ Enẹwutu, e ylọ oyín etọn dọ Aṣeli.*+
14 Leubẹni+ sọ to sadi to ojlẹ jibẹwawhé likun tọn whenu bo mọ sinsẹ́n mandlaki* tọn lẹ to danji. E sọ hẹn sinsẹ́n lọ lẹ wá na Lea onọ̀ etọn. Laheli sọ dọna Lea dọmọ: “Jaale, na mi delẹ to mandlaki visunnu towe tọn lẹ mẹ.” 15 To whenẹnu, e gblọnna ẹn dọmọ: “Be asu ṣie he a ko hòyí ma ko pé we wẹ?+ Be hiẹ nasọ yí mandlaki visunnu ṣie tọn lẹ lọsu ga wẹ ya?” Enẹwutu, Laheli dọmọ: “Eyọn. Ewọ na mlọnai hẹ we to ozán ehe mẹ do otẹn mandlaki visunnu towe tọn lẹ tọn mẹ.”
16 Whenue Jakọbu lẹkọ sọn danji to whèjai, Lea tọ́njẹgbonu yì pé e bo dọmọ: “Yẹn wẹ hiẹ na tindo kọndopọ zanhẹmẹ tọn hẹ, na yẹn ko yí mandlaki visunnu ṣie tọn lẹ do haya we asábu-awàbu.” Enẹwutu, e mlọnai hẹ ẹ to ozán enẹ mẹ. 17 Jiwheyẹwhe sọ dotoaina Lea bọ ewọ mọhò podọ to ojlẹ vude godo, e ji visunnu atọ́ntọ na Jakọbu. 18 Lea sọ dọmọ: “Jiwheyẹwhe ko suahọ* mi, na yẹn ko yí deviyọnnu ṣie na asu ṣie.” Enẹwutu wẹ e ylọ oyín etọn dọ Isakali.*+ 19 Lea sọ mọhò whladopo dogọ podọ to ojlẹ vude godo, e ji visunnu ṣidopotọ na Jakọbu.+ 20 Whenẹnu, Lea dọmọ: “Jiwheyẹwhe ko hẹn onú ṣie yọ́n. Asu ṣie na hùnhomẹ do go e todin,+ na yẹn ko ji visunnu ṣidopo na ẹn wutu.”+ Enẹwutu wẹ e do ylọ oyín etọn dọ Zebuluni.*+ 21 Enẹgodo, e ji viyọnnu de bo ylọ ẹ dọ Dina.+
22 To godo mẹ, Jiwheyẹwhe flin Laheli, Jiwheyẹwhe sọ dotoaina ẹn bo dike bọ e mọhò.*+ 23 E sọ mọhò bo ji visunnu de. Enẹwutu, e dọmọ: “Jiwheyẹwhe ko de vlẹko ṣie sẹ̀!”+ 24 Enẹ wẹ zọ́n bọ e ylọ oyín etọn dọ Josẹfu,*+ bo dọmọ: “Jehovah sọ na mi visunnu devo dogọ.”
25 Whenue Laheli ko ji Josẹfu godo, Jakọbu dọna Labani to afọdopolọji dọmọ: “Jo mi ma yì otò ṣie mẹ.+ 26 Podọ yí asi ṣie lẹ po ovi ṣie lẹ po na mi, mẹhe wutu yẹn ko sẹ̀n we lẹ, na yẹn nido sọgan dedo, na hiẹ yọ́n obá he mẹ yẹn ko sẹ̀n we jẹ ganji.”+ 27 Whenẹnu wẹ Labani dọna ẹn dọmọ: “Eyin yẹn ko mọ nukundagbe towe, yẹn vẹ̀ we, gbọṣi dè e. Na yẹn ko dindona bo mọdọ Jehovah to didona mi na hiẹ tọn wutu.” 28 E sọ yidogọ dọmọ: “Dọ azọ́nkuẹ towe na mi, yẹn nasọ sú we.”+ 29 Enẹwutu, Jakọbu dọna ẹn dọmọ: “Hiẹ yọ́n lehe yẹn ko sẹ̀n we do podọ lehe lẹngbọpa towe ko jideji to alọ ṣie mẹ do;+ 30 lẹngbọ vude poun wẹ hiẹ tindo whẹpo yẹn do wá, ṣigba lẹngbọpa towe ko jideji taun todin, podọ Jehovah ko to didona we sọn whenue gbọ́n yẹn wá. Ṣigba, whetẹnu wẹ yẹnlọsu na wleawu nude tọn na whédo ṣie titi?”+
31 Enẹgodo, Labani gblọn dọmọ: “Etẹwẹ yẹn na na we?” Jakọbu sọ dọmọ: “Hiẹ ma na na mi nudevo depope! Eyin hiẹ yigbe nado wà onú dopo gee ehe na mi, yẹn na zindonukọn nado nọ yìn lẹngbọpa towe bo nasọ nọ penukundego.+ 32 Gbọ mí ni dlú gbọn lẹngbọpa towe blebu mẹ to egbé. Na hiẹ ni de lẹngbọ wlanwlan po dehe tindo sinmẹ voovo to agbasa go lẹpo po dovo, podọ agbò winyanwinyan yuu towe lẹpo gọna dehe tindo sinmẹ voovo po dehe yin wlanwlan to gbọgbọẹ asi lẹ mẹ po dovo. Enẹlẹ wẹ na yin azọ́nkuẹ+ ṣie bẹsọn din. 33 Podọ to nukọn mẹ, dodowiwa* ṣie na dekunnuna mi to whenue hiẹ na wá nado gbeje azọ́nkuẹ ṣie pọ́n; gbọgbọẹ asi depope he ma yin wlanwlan po dehe ma tindo sinmẹ voovo to agbasa go po gọna agbò winyanwinyan depope he ma yin yuu na yin pinpọnhlan taidi nuhe yin finfin, eyin hiẹ mọ yé to dè e.”
34 Whenẹnu, Labani dọmọ: “E yọ́n taun! Dike mí ni wà dile hiẹ dọ do.”+ 35 Enẹwutu to gbenẹgbe, e de gbọgbọẹ asu wlanwlan po dehe tindo sinmẹ voovo to agbasa go gọna gbọgbọẹ asi wlanwlan po dehe tindo sinmẹ voovo to agbasa go lẹpo po dovo, e sọ de agbò winyanwinyan depope he tindo sinmẹ wewe to agbasa etọn go podọ dehe tindo sinmẹ yuu lẹ bo ze yé do alọmẹ na visunnu etọn lẹ. 36 Enẹgodo, e sẹyì olá na Jakọbu na nudi gbejizọnlin azán atọ̀n tọn, bọ Jakọbu sọ jẹ lẹngbọ Labani tọn he pò lẹ yìn ji.
37 Jakọbu sọ sán opò delẹ sọn atin stolasi, almọndi po planẹ po tọn lẹ go bo pà opò lọ lẹ sọn ofi voovo nado de sinmẹ wewe lẹ tọ́n to opò lọ lẹ go. 38 Enẹgodo, e tùn opò he e ko pà lọ lẹ donukọnna osindò lẹ, yèdọ otò he mẹ lẹngbọ lẹ nọ wá nùsin te lẹ, na kanlin lọ lẹ nido nọ hẹ yede to opò lọ lẹ nukọn eyin yé wá nado nùsin.
39 Enẹwutu, lẹngbọ lọ lẹ nọ hẹ yede to opò lọ lẹ nukọn, bo nọ ji lẹngbọ whẹkànnọ, wlanwlan po dehe tindo sinmẹ voovo to agbasa go lẹ po. 40 To whenẹnu, Jakọbu ṣinyan agbò winyanwinyan lẹ dovo podọ to enẹgodo, e lẹ́ lẹngbọpa lọ pannukọn lẹngbọ whẹkànnọ gọna dehe yin yuu lẹpo he tin to lẹngbọpa Labani tọn mẹ. E sọ de lẹngbọ etọn titi lẹ dovo, bo ma dike lẹngbọ etọn lẹ ni biọ lẹngbọ Labani tọn lẹ mẹ. 41 Podọ to whedepopenu he kanlin he tọ́nalùn lọ lẹ jlo na hẹ yede, Jakọbu nọ tùn opò lọ lẹ do osindò lọ lẹ mẹ to nukọnna lẹngbọ lọ lẹ na yé nido hẹ yede to opò lọ lẹ nukọn. 42 Ṣigba, eyin kanlin lọ lẹ gblekàn, e ma nọ plan yé yì opò lọ lẹ nukọn. Enẹwutu, Labani tọn wẹ dehe gblekàn lẹ nọ yin to whepoponu bọ dehe tọ́nalùn lẹ nọ yin Jakọbu tọn.+
43 Dawe lọ sọ lẹzun adọkunnọ taun bo tindo lẹngbọpa daho gọna devisunnu lẹ, deviyọnnu lẹ, kanklosọ́ lẹ po kẹtẹkẹtẹ lẹ po.+
31 Whenẹnu, Jakọbu sè bọ visunnu Labani tọn lẹ to didọmọ: “Jakọbu ko yí nuhe yin otọ́ mítọn tọn lẹpo, podọ nuhe yin otọ́ mítọn tọn lẹ wẹ e yí do jẹ adọkun.”+ 2 Eyin Jakọbu pọ́n nukun Labani tọn lẹ ji, e nọ mọdọ nuyiwa etọn gando ewọ go ko diọ.+ 3 Enẹgodo, Jehovah dọna Jakọbu dọmọ: “Lẹkọyi aigba tọgbo towe lẹ tọn ji, to hẹnnumẹ+ towe lẹ dè, podọ yẹn nasọ tin hẹ we.” 4 Jakọbu sọ dowẹn hlan Laheli po Lea po nado wá danji to lẹngbọ etọn lẹ dè, 5 e sọ dọna yé dọmọ:
“Yẹn mọdọ nuyiwa otọ́ mìtọn tọn gando go e ko diọ,+ ṣigba Jiwheyẹwhe otọ́ ṣie tọn ko tin hẹ mi.+ 6 Mìlọsu lẹ yọnẹn ganji dọ huhlọn ṣie lẹpo wẹ yẹn yí do sẹ̀n otọ́ mìtọn.+ 7 Podọ otọ́ mìtọn ko tafu mi bo ko sọ diọ azọ́nkuẹ ṣie whla ao; ṣigba Jiwheyẹwhe ma na ẹn dotẹnmẹ nado wà danú do mi. 8 Eyin ewọ dọ dọ, ‘Lẹngbọ wlanwlan lẹ wẹ na yin azọ́nkuẹ towe,’ whenẹnu lẹngbọpa lọ blebu nọ ji lẹngbọ wlanwlan lẹ; ṣigba eyin e dọ, ‘Lẹngbọ whẹkànnọ lẹ wẹ na yin azọ́nkuẹ towe,’ whenẹnu lẹngbọpa lọ blebu sọ nọ ji lẹngbọ whẹkànnọ lẹ.+ 9 Gbọnmọ dali, Jiwheyẹwhe to kanlin-yìnyìn otọ́ mìtọn tọn lẹ yí bo to nina mi. 10 To ojlẹ de mẹ, whenue lẹngbọ lẹ hẹ yede, yẹn mọ to numimọ de mẹ dọ lẹngbọ asu he to lẹngbọ lẹ hẹ lẹpo wẹ yin whẹkànnọ, wlanwlan podọ ehe tindo sinmẹ voovo to agbasa go.+ 11 Whenẹnu wẹ angẹli Jiwheyẹwhe nugbo lọ tọn dọna mi to numimọ lọ mẹ dọ, ‘Jakọbu!’ yẹn sọ gblọn dọ, ‘Yẹn tin tofi.’ 12 E sọ zindonukọn dọmọ, ‘Jaale, ze nukun towe lẹ daga bo pọ́n, lẹngbọ asu he to lẹngbọ lẹ hẹ lẹpo wẹ yin whẹkànnọ, wlanwlan podọ ehe tindo sinmẹ voovo to agbasa go, na yẹn ko mọ nuhe Labani to wiwà na we lẹpo.+ 13 Yẹn wẹ Jiwheyẹwhe nugbo Bẹtẹli+ tọn lọ, fie hiẹ kọ̀n amì do* dòtin de ji bo dopà de na mi te.+ Todin, fọ́n bo tọ́n sọn aigba ehe ji bosọ lẹkọyi aigba he ji hiẹ yin jiji te.’”+
14 Whenẹnu, Laheli po Lea po gblọnna ẹn dọmọ: “Be míwlẹ gbẹ́ tindo mimá de he mí na dugu etọn to owhé otọ́ mítọn tọn gbè wẹ? 15 Be ewọ ma nọ pọ́n mí hlan taidi jonọ sọn whenue gbọ́n e ko sà mí bo ko to akuẹ he e mọyi do ota mítọn mẹ lọ zan ya?+ 16 Míwlẹ po ovi mítọn lẹ po wẹ Jiwheyẹwhe ko na adọkun he e yí sọn otọ́ mítọn si.+ Enẹwutu, wà nudepope he Jiwheyẹwhe dọna we.”+
17 Whenẹnu, Jakọbu fọ́n bo bẹ ovi etọn lẹ po asi etọn lẹ po do kanklosọ́ lẹ ji,+ 18 e sọ wleali po kanlinpa etọn blebu po gọna nuhe e ko bẹpli lẹpo,+ yèdọ kanlin he e ko bẹpli to Padani-alami lẹ, nado yì Isaki otọ́ etọn dè to aigba Kenani tọn ji.+
19 Todin, Labani ko tọ́nyi nado yì pà ofún na lẹngbọ etọn lẹ, Laheli sọ fìn boṣiọ tẹlafimi tọn*+ he yin otọ́ etọn tọn lẹ.+ 20 Podọ Jakọbu yí bibi do yinuwa hẹ Labani Alaminu lọ, na Jakọbu ma dọna ẹn dọ emi jei wutu. 21 E sọ họnyi po nuhe e tindo lẹpo po bo dasá Tọ̀sisa.*+ Enẹgodo, e pànta lẹdo osó tọn Giliadi tọn.+ 22 To azán atọ̀ntọ gbè, e yin didọna Labani dọ Jakọbu ko họnyi. 23 Enẹwutu, e plan nọvisunnu* etọn lẹ bo dómọna ẹn na nudi gbejizọnlin azán ṣinawe tọn bosọ plá ẹ to lẹdo osó tọn Giliadi tọn mẹ. 24 Jiwheyẹwhe sọ sọawuhia Labani Alaminu+ lọ to odlọ mẹ to zánmẹ+ bo dọna ẹn dọmọ: “Payi nuhe hiẹ na dọna Jakọbu go, vlavo e yin dagbe kavi oylan.”*+
25 Enẹwutu, Labani dọnsẹpọ Jakọbu dile Jakọbu tùn gòhọ etọn do osó lẹ ṣẹnṣẹn podọ Labani po omẹ etọn lẹ po whèsla do lẹdo osó tọn Giliadi tọn mẹ. 26 Labani sọ dọna Jakọbu dọmọ: “Etẹwẹ yin ehe bọ hiẹ wà? Naegbọn hiẹ do blu mi bo plan viyọnnu ṣie lẹ taidi kanlinmọ he yin wiwle to awhàngbenu lẹ? 27 Naegbọn hiẹ do họnyi bo blu mi bo masọ dọna mi? Eyin hiẹ ko dọna mi wẹ, yẹn na ko yí ayajẹ, hàngbe, húnhiho po ajalẹn po do dó we hlan. 28 Ṣigba, hiẹ ma na mi dotẹnmẹ nado donùnùgo na ovivi* ṣie lẹ po viyọnnu ṣie lẹ po. Nulunu wẹ hiẹ wà. 29 Yẹn penugo nado wà danú do mì, ṣigba Jiwheyẹwhe otọ́ mìtọn tọn dọhona mi to osọ zánmẹ dọmọ, ‘Payi nuhe hiẹ na dọna Jakọbu go, vlavo e yin dagbe kavi oylan.’+ 30 Dile etlẹ yindọ hiẹ yì na ajlù owhé otọ́ towe tọn wle we wutu, naegbọn hiẹ do fìn yẹwhe ṣie lẹ?”+
31 Jakọbu sọ gblọnna Labani dọmọ: “Na yẹn dibu wutu wẹ, na yẹn lẹn to ohò ṣie mẹ dọ, ‘Hiẹ sọgan yí viyọnnu towe lẹ sọn asi e gánnugánnu.’ 32 Mẹdepope he si hiẹ na mọ yẹwhe towe lẹ te ma na nọgbẹ̀. Keje nuhe yẹn tindo lẹpo pọ́n to omẹ mítọn lẹ nukọn, bosọ yí ehe yin towe lẹ.” Ṣigba, Jakọbu ma yọnẹn dọ Laheli wẹ fìn tẹlafimi lọ lẹ. 33 Enẹwutu, Labani biọ gòhọ Jakọbu tọn mẹ podọ e sọ biọ gòhọ Lea tọn mẹ gọna gòhọ deviyọnnu awe+ lọ lẹ tọn, ṣigba e ma mọ yẹwhe lọ lẹ. E sọ tọ́n sọn gòhọ Lea tọn mẹ bo biọ gòhọ Laheli tọn mẹ. 34 To whenẹnu, Laheli ko bẹ boṣiọ tẹlafimi tọn lọ lẹ do agbànhẹnnu yọnnu lẹ tọn he nọ yin pipla do kanklosọ́ go lọ mẹ, bosọ sinai do yé ji. Labani sọ keje gòhọ lọ pete mẹ pọ́n, ṣigba e ma mọ yé. 35 Whenẹnu wẹ Laheli dọna otọ́ etọn dọmọ: “Oklunọ ṣie, a gblehomẹ do go e na yẹn ma penugo nado fọnṣite to nukọn towe wutu blo, na ojlẹ lajijẹ ṣie tọn mẹ wẹ yẹn te.”+ E sọ yí sọwhiwhe do dín boṣiọ tẹlafimi tọn+ lọ lẹ, ṣigba e ma mọ yé.
36 Enẹ hẹn Jakọbu gblehomẹ bọ e sọ gblewhẹdo Labani. E sọ dọna Labani dọmọ: “Etẹwẹ yẹn ṣì wà, podọ ylando tẹ wutu wẹ hiẹ do dómọna mi po adi po? 37 Todin he hiẹ ko keje nutindo ṣie lẹpo, etẹwẹ hiẹ ko mọ he yin owhé towe tọn? De e tọ́njẹgbonu to omẹ towe lẹ po omẹ ṣie lẹ po nukọn, na yé ni pọ́n hẹ mí. 38 To owhe 20 he yẹn yizan hẹ we lẹ gblamẹ, ohò ma gbledo lẹngbọ towe lẹ po gbọgbọẹ towe lẹ po pọ́n,+ podọ yẹn ma dù sọn kanlin towe lẹ mẹ pọ́n. 39 Yẹn ma nọ hẹn kanlin depope he yin tintlẹ́n gbọn gbekanlin+ lẹ dali wá na we. Yẹnlọsu wẹ nọ suahọ etọn. Eyin kanlin lọ tlẹ yin finfin to okle kavi to zánmẹ, hiẹ nọ biọ ahọ́ etọn to asi e. 40 Yozò nù wẹ yẹn nọ nọ̀ to okle, podọ fifá nù to zánmẹ, bọ amlọn nọ họ́n sọn nukun ṣie lẹ ji.+ 41 Owhe 20 wẹ yẹn yizan to owhé towe gbè. Yẹn yí owhe 14 do wadevizọn na we na viyọnnu towe awe lẹ wutu, podọ owhe 6 na lẹngbọpa towe, hiẹ sọ diọ azọ́nkuẹ ṣie whla ao.+ 42 Eyin Jiwheyẹwhe otọ́ ṣie tọn,+ yèdọ Jiwheyẹwhe Ablaham tọn po Mẹhe Isaki nọ dibusi+ lọ* po ma ko tin hẹ mi wẹ, hiẹ na ko do mi hlan agbá. Jiwheyẹwhe ko mọ awufiẹsa po tuklajijẹ ṣie po, enẹwutu wẹ e do wọhẹ we to osọ zánmẹ.”+
43 Labani sọ gblọnna Jakọbu dọmọ: “Viyọnnu ṣie lẹ wẹ viyọnnu lọ lẹ, ovivi ṣie lẹ sọ wẹ ovi lọ lẹ, podọ ṣie wẹ lẹngbọpa lọ, humọ yẹn po viyọnnu ṣie lẹ po tọn wẹ nuhe hiẹ to mimọ ehe lẹpo. Etẹwẹ yẹn sọgan wà to egbé do omẹ ehelẹ kavi do ovi he yé ko ji lẹ? 44 Todin, wá bo gbọ mí ni basi alẹnu de he na tin taidi kunnudenu de to mí omẹ awe lẹ ṣẹnṣẹn.” 45 Enẹwutu, Jakọbu yí zannu de bo tùnte taidi dòtin de.+ 46 Jakọbu sọ dọna omẹ etọn lẹ dọmọ: “Mì bẹ zannu lẹ pli!” Yé sọ bẹ zannu lẹ bo hò yé pli. Enẹgodo, yé dùnú to zannu he yin hihopli lọ lẹ ji. 47 Labani sọ ylọ bẹplidopọ zannu lọ lẹ tọn dọ Jẹgali-sahaduta,* ṣigba Jakọbu ylọ ẹ dọ Galeẹdi.*
48 To whenẹnu, Labani dọmọ: “Bẹplidopọ zannu tọn ehe na yin kunnudenu de to yẹn po hiẹ po ṣẹnṣẹn to egbé.” Enẹwutu wẹ e do yin yiylọdọ Galeẹdi,+ 49 podọ Atọ̀họ̀-Nuhihọ́ lọ Tọn, na Labani dọmọ: “Jehovah ni to yẹn po hiẹ po ṣọ́ to whenue mí dẹn do míde. 50 Eyin hiẹ sayana viyọnnu ṣie lẹ bo dà asi devo lẹ do viyọnnu ṣie lẹ ji, eyin kunnudetọ depope ma tlẹ tin to finẹ, flindọ Jiwheyẹwhe na dekunnu to yẹn po hiẹ po ṣẹnṣẹn.” 51 Labani sọ dọna Jakọbu dọmọ: “Ehe wẹ bẹplidopọ zannu tọn lọ podọ dòtin lọ he yẹn ko tùnte to yẹn po hiẹ po ṣẹnṣẹn. 52 Bẹplidopọ zannu tọn ehe po dòtin lọ po yin kunnudenu+ de dọ yẹn ma na dasá bẹplidopọ zannu tọn lọ nado wà danú do we, podọ hiẹ lọsu ma na dasá bẹplidopọ zannu tọn ehe po dòtin ehe po nado wà danú do mi. 53 Na Jiwheyẹwhe Ablaham tọn+ podọ Jiwheyẹwhe Nahọli tọn, enẹ wẹ Jiwheyẹwhe otọ́ yetọn tọn, ni yin whẹdatọ to mí omẹ awe lẹ ṣẹnṣẹn.” Jakọbu sọ whlé gbọn Mẹhe otọ́ etọn Isaki nọ dibusi+ lọ dali.*
54 Enẹgodo, Jakọbu basi avọ́sinsan de to osó lẹ ṣẹnṣẹn bo ylọ omẹ etọn lẹ nado wá dùnú. Yé sọ dùnú bo dọ́ finẹ to ozán lọ mẹ. 55 Labani sọ fọ́n to afọnnu fuu bo donùnùgo na ovivi*+ etọn lẹ po viyọnnu etọn lẹ po bosọ dona yé.+ Enẹgodo, Labani wleali bo lẹkọyi whé.+
32 Jakọbu sọ wleali dedo bọ angẹli Jiwheyẹwhe tọn lẹ wá pé e. 2 Tlolo he Jakọbu mọ yé, e dọmọ: “Osla awhànpa Jiwheyẹwhe tọn tọn die!” Enẹwutu, e ylọ finẹ dọ Mahanaimi.*
3 Jakọbu sọ do wẹnsagun lẹ hlan nado jẹnukọnna ẹn yì Esau nọvisunnu etọn dè to aigba Seili tọn ji+ to lẹdo Edomi tọn mẹ,+ 4 e sọ degbena yé dọmọ: “Nuhe mì na dọna oklunọ ṣie Esau die, ‘Devizọnwatọ towe Jakọbu dọmọ: “Yẹn ko nọ Labani dè* na ojlẹ dindẹn.+ 5 Yẹn ko sọ tindo oyìnsú lẹ, kẹtẹkẹtẹ lẹ, lẹngbọ lẹ, devisunnu lẹ po deviyọnnu lẹ po,+ podọ yẹn dowẹn hlan oklunọ ṣie nado hẹn ehe zun yinyọnẹn na ẹn, na yẹn nido sọgan mọ nukundagbe towe.”’”
6 To ojlẹ vude godo, wẹnsagun lọ lẹ lẹkọwa Jakọbu dè bo dọmọ: “Mí pé nọvisunnu towe Esau, podọ ewọ ko to aliji ja nado wá pé we po sunnu 400 po.”+ 7 Jakọbu sọ dibu tlala bo jẹflumẹ.+ Enẹwutu, e má mẹhe tin to e dè lẹ, gọna lẹngbọ lẹ, oyìn lẹ po kanklosọ́ lẹ po do ogbẹ́ awe ji. 8 E sọ dọmọ: “Eyin Esau tọ́nawhàn ogbẹ́ tintan, ogbẹ́ awetọ lọ sọgan họ̀ngán.”
9 Enẹgodo, Jakọbu dọmọ: “Jehovah E, yèdọ Jiwheyẹwhe otọ́ ṣie Ablaham tọn po Jiwheyẹwhe otọ́ ṣie Isaki tọn po E, hiẹ mẹhe dọna mi dọ, ‘Lẹkọyi aigba towe ji podọ to hẹnnumẹ towe lẹ dè bọ yẹn nasọ wà dagbe na we,’+ 10 yẹn ma jẹna owanyi nugbo podọ nugbonọ-yinyin ehe lẹpo he hiẹ to didohia devizọnwatọ towe gba,+ na opò ṣie kẹdẹ wẹ yẹn hẹn do dasá Jọdani, ṣigba yẹn ko lẹzun awhànpa awe todin.+ 11 Yẹn vẹ̀ we,+ whlẹn mi sọn alọ nọvisunnu ṣie Esau tọn mẹ, na yẹn to budina ẹn dọ ewọ sọgan wá tọ́nawhàn mi+ bosọ tọ́nawhàn onọ̀ lẹ po ovi yetọn lẹ po. 12 Podọ hiẹ ko dọ dọ: ‘Matin ayihaawe, yẹn na wà dagbe na we bọ yẹn nasọ hẹn kúnkan* towe lẹ jideji taidi tọkẹ́n ohù tọn lẹ sọmọ bọ yè ma sọgan hia.’”+
13 Ewọ sọ dọ́ finẹ to ozán enẹ mẹ. Enẹgodo, e yí delẹ to nutindo etọn lẹ mẹ nado na Esau nọvisunnu etọn:+ 14 e na ẹn gbọgbọẹ asi 200 po gbọgbọẹ asu 20 po, lẹngbọ asi 200 po agbò 20 po, 15 kanklosọ́ 30 he tindo ovi to anọ́nù, oyìnsi 40 po oyìnsú 10 po, gọna kẹtẹkẹtẹ asi 20 po kẹtẹkẹtẹ asu 10 he ko whẹ́n ganji lẹ po.+
16 E sọ ze pipli kanlin lọ lẹ tọn dopodopo do alọmẹ na devizọnwatọ etọn lẹ bo dọna yé dọmọ: “Mì jẹnukọnna mi bo dasá tọ̀sisa lọ, podọ mì dike tẹnmẹ ni tin to pipli kanlin lọ lẹ tọn dopodopo ṣẹnṣẹn.” 17 Humọ, e degbena devizọnwatọ tintan dọmọ: “Eyin nọvisunnu ṣie Esau pé we bo kanse we dọ, ‘Devizọnwatọ mẹnu tọn wẹ hiẹ yin, fie wẹ a jei, podọ mẹnu tọn wẹ kanlin he tin to nukọn towe ehelẹ?’ 18 whenẹnu wẹ hiẹ na dọ dọ, ‘Devizọnwatọ towe Jakọbu tọn wẹ. Nunina de wẹ ehelẹ yin hlan oklunọ ṣie Esau,+ podọ pọ́n! ewọ lọsu to godo ja.’” 19 E sọ degbena devizọnwatọ awetọ podọ atọ̀ntọ gọna mẹhe hodo pipli kanlin lọ lẹ tọn lẹpo dọmọ: “Nuhe mì na dọna Esau to whenuena mì na pé e niyẹn. 20 Mìwlẹ nasọ dọ dọ, ‘Devizọnwatọ towe Jakọbu to godo mítọn ja.’” Na Jakọbu dọ to ohò ede tọn mẹ dọ: ‘Eyin yẹn hòhuwhẹ ẹ gbọn nunina de didohlan ẹn jẹnukọn dali,+ whenẹnu e sọgan yí mi po homẹdagbe po to whenue yẹn na wá mọ ẹn.’ 21 Enẹwutu, devizọnwatọ etọn lẹ jẹnukọnna ẹn bo dasá tọ̀sisa lọ po nunina lọ lẹ po, ṣigba ewọ dọ́ osla lọ mẹ to ozán enẹ mẹ.
22 To ozán lọ mẹ, ewọ fọ́n bo plan asi etọn awe+ lẹ po deviyọnnu etọn awe+ lọ lẹ po gọna visunnu etọn 11 lẹ bosọ dasá tọ̀sisa Jabọki tọn gbọn fie e ma siso te.+ 23 Gbọnmọ dali, e plan yé bo dasá tọ̀sisa* lọ po nuhe e tindo lẹpo po.
24 Enẹgodo, Jakọbu wá tin edeṣo. Whenẹnu wẹ dawe de jẹ ahidi hẹ ẹ ji kakajẹ whenue ai jlo na họ́n.+ 25 Whenue dawe lọ mọdọ emi ma duto Jakọbu ji, e doalọ hupetẹn asapada po alìn po tọn etọn go; alìn Jakọbu tọn sọ sẹ̀ to ahididi hẹ dawe lọ whenu.+ 26 Enẹgodo, dawe lọ dọmọ: “Gbọ ma yì na ai ko to hinhọ́n.” E sọ gblọn dọmọ: “Yẹn ma na jo we do kakajẹ whenue hiẹ dona mi.”+ 27 Enẹwutu, dawe lọ kanse e dọmọ: “Nawẹ a nọ yin?” ewọ sọ gblọnna ẹn dọmọ: “Jakọbu.” 28 Whenẹnu wẹ e dọmọ: “Hiẹ ma nasọ nọ yin Jakọbu ba, ṣigba Islaeli*+ wẹ hiẹ na nọ yin, na hiẹ ko diahi hẹ Jiwheyẹwhe+ po gbẹtọ lẹ po, hiẹ ko sọ dudeji to godo mẹ.” 29 Jakọbu sọ kanse e dọmọ: “Jaale, dọ yinkọ towe na mi.” Ṣigba, ewọ dọmọ: “Naegbọn hiẹ do to yinkọ ṣie kanse?”+ E sọ dona ẹn to finẹ. 30 Jakọbu sọ ylọ nọtẹn lọ dọ Peniẹli,*+ na e dọ dọ, “Yẹn ko mọ Jiwheyẹwhe nukun sọ nukun, ṣogan yẹn* yin pipò dogbẹ̀.”+
31 Owhè sọ hùn do e ji tlolo he e zẹ̀ Penuẹli* go, ṣigba ewọ to ṣinṣọ̀n na alìn etọn he sẹ̀ wutu.+ 32 Enẹwutu wẹ ovi Islaeli tọn lẹ ma nọ dù okàn he tin to hupetẹn asapada po alinmẹ po tọn kakajẹ egbehe, na alinmẹ-kàn Jakọbu tọn go wẹ dawe lọ doalọ wutu.
33 Jakọbu sọ ze nukun etọn lẹ daga, bo mọ Esau ja po sunnu 400 po.+ Enẹwutu, e má ovi lọ lẹ na Lea, Laheli po deviyọnnu awe lẹ po.+ 2 E sọ ze deviyọnnu awe lọ lẹ po ovi yetọn lẹ po do nukọn,+ Lea po ovi etọn lẹ po sọ bọdo yé go+ bọ Laheli+ po Josẹfu po to godo na yé. 3 Jakọbu lọsu sọ jẹnukọnna yemẹpo bo dẹ́ do odò whla ṣinawe to whenue e dọnsẹpọ nọvisunnu etọn.
4 Ṣigba, Esau dowezun wá pé e bo gbò e fán bosọ donùnùgo na ẹn, yé sọ bẹ avi. 5 Whenue Esau ze nukun etọn lẹ daga bo mọ yọnnu lọ lẹ po ovi lọ lẹ po, e kanse dọmọ: “Mẹnu wẹ mẹhe zọnhẹ we ehelẹ?” e sọ gblọn dọmọ: “Ovi ehelẹ wẹ Jiwheyẹwhe yí do dó nukundagbe hia devizọnwatọ towe.”+ 6 To whenẹnu, deviyọnnu lọ lẹ po ovi yetọn lẹ po sẹwá nukọn bo dẹ́ do odò, 7 Lea lọsu po ovi etọn lẹ po sẹwá nukọn bo dẹ́ do odò. Enẹgodo Josẹfu po Laheli po sẹwá nukọn bosọ dẹ́ do odò.+
8 Esau sọ dọmọ: “Naegbọn hiẹ do dó gbẹtọ po kanlin planplan he yẹn pé ehe lẹpo hlan?”+ E sọ gblọn dọmọ: “Na yẹn jlo na mọ nukundagbe oklunọ ṣie tọn wutu wẹ.”+ 9 Whenẹnu, Esau dọmọ: “Nọvisunnu ṣie, nutindo susugege wẹ yẹn tindo.+ Hẹn nuhe yin towe lẹ go.” 10 Ṣigba, Jakọbu dọmọ: “Jaale, a wàmọ blo. Eyin yẹn ko mọ nukundagbe towe, kẹalọyi nunina ṣie, na yẹn jlo na mọ we wutu wẹ zọ́n bọ yẹn do hẹn nunina lọ lẹ wá. Podọ yẹn ko mọ nukunmẹ towe taidi mẹhe ko mọ nukunmẹ Jiwheyẹwhe tọn wẹ nkọ na hiẹ yí mi po homẹhunhun po wutu.+ 11 Jaale, kẹalọyi nunina ojlo dagbe tọn ṣie he yẹn hẹnwa na we,+ na Jiwheyẹwhe ko do nukundagbe hia mi podọ yẹn ma jẹdò nudepope tọn.”+ E sọ to vivẹ̀ ẹ mapote, sọmọ bọ Esau kẹalọyi nunina lọ lẹ.
12 Enẹgodo, Esau dọmọ: “Dike mí ni wleali dedo, bo gbọ yẹn ni jẹnukọn.” 13 Ṣigba, e gblọn na ẹn dọmọ: “Oklunọ ṣie yọnẹn dọ ovi lọ lẹ gbẹ́ pò to ovu+ podọ yẹn sọ dona penukundo lẹngbọ lẹ po oyìn he tindo ovi to anọ́nù lẹ po go. Eyin yè yí azán dopo poun do plan yé gánnugánnu, lẹngbọpa lọ blebu na kú. 14 Jaale, na oklunọ ṣie ni yì jẹnukọnna devizọnwatọ etọn, ṣigba yẹn na zọ̀n dẹẹdẹ afọsu-afọsi to gbejizọnlin lọ mẹ sọgbe hẹ afọdide lẹngbọpa lọ po ovi lọ lẹ po tọn kaka yẹn nado wá oklunọ ṣie dè to Seili.”+ 15 To whenẹnu, Esau dọmọ: “Jaale, gbọ yẹn ni jo delẹ to omẹ ṣie lẹ mẹ do dè we.” Jakọbu sọ dọmọ: “Naegbọn hiẹ nado wàmọ? Dike yẹn ni mọ nukundagbe oklunọ ṣie tọn poun.” 16 Enẹwutu, Esau lẹkọ dedo Seili to gbenẹgbe.
17 Jakọbu sọ zingbejizọnlin yì Sukoti+ bo gbá ohọ̀ de na ede bosọ wleawuna adọtẹn lẹ na kanlinpa etọn. Enẹ wẹ zọ́n bọ e do ylọ filọ dọ Sukoti.*
18 Whenue Jakọbu ko zingbejizọnlin sọn Padani-alami+ wá tòdaho Ṣekẹmi+ tọn mẹ to aigba Kenani+ tọn ji awuyẹyẹ-afọyẹyẹ, e whèsla sẹpọ tòdaho lọ. 19 E sọ họ̀ aigba he ji e tùn gòhọ etọn do sọn visunnu Hamọli tọn lẹ si yin fataka-kuẹ 100, yèdọ Hamọli he yin otọ́ Ṣekẹmi tọn.+ 20 E sọ basi agbà de do finẹ bo ylọ ẹ dọ Jiwheyẹwhe wẹ Jiwheyẹwhe Islaeli tọn.+
34 Todin, Dina viyọnnu Lea tọn,+ he ewọ ji na Jakọbu nọ saba tọ́nyi nado yì nọwhẹ̀ do* awhli otò lọ tọn lẹ.+ 2 Whenue Ṣekẹmi, visunnu Hamọli Hivinu+ lọ tọn, yèdọ ahọvi otò lọ tọn mọ ẹn, e plan ẹn bo zanhẹ ẹ gánnugánnu. 3 E* sọ tindo ojlo na Dina viyọnnu Jakọbu tọn taun, e yiwanna viyọnnu jọja lọ bo tẹnpọn nado diọlinlẹnna ẹn.* 4 Enẹgodo, Ṣekẹmi dọna Hamọli+ otọ́ etọn dọmọ: “Mọ viyọnnu jọja ehe na mi taidi asi.”
5 Visunnu Jakọbu tọn lẹ to kanlin etọn lẹ yìn to danji, to whenue ewọ sè dọ visunnu lọ ko hẹn Dina viyọnnu etọn gble. Enẹwutu, Jakọbu nabọẹ kakajẹ whenue yé lẹkọwa. 6 Enẹgodo, Hamọli otọ́ Ṣekẹmi tọn tọ́nyi nado dọho hẹ Jakọbu. 7 Visunnu Jakọbu tọn lẹ sọ sè nujijọ lọ bo lẹkọwa sọn danji to afọdopolọji. Yé sọ gblehomẹ bo to adi ji na Ṣekẹmi ko dowinyan Islaeli gbọn zinzanhẹ viyọnnu Jakọbu tọn dali wutu,+ yèdọ nude he ma dona jọ.+
8 Hamọli sọ dọho hẹ yé dọmọ: “Ṣekẹmi visunnu ṣie tindo ojlo vẹkuvẹku na* viyọnnu mìtọn. Mì jaale bo yí i na ẹn taidi asi, 9 mì biọ kanṣiṣa alọwle tọn mẹ hẹ mí. Mì nọ yí viyọnnu mìtọn lẹ na mí, na mìwlẹ nisọ nọ yí mítọn lẹ.+ 10 Mì sọgan gbọṣi mí dè, aigba lọ nasọ tin-to-aimẹ na mì. Mì nọ mí dè bo wàjọ bosọ jẹ adọkun to aigba lọ ji.” 11 Ṣekẹmi sọ dọna otọ́ Dina tọn po nọvisunnu etọn lẹ po dọmọ: “Mì dike yẹn ni mọ nukundagbe mìtọn, nudepope he mìwlẹ nasọ biọ to asi e wẹ yẹn na na mì. 12 Mì sọgan biọ asigbàn he sù taun po nunina lẹ po.+ Yẹn ko wleawufo nado na nudepope he mì na biọ. Nulọ poun wẹ yindọ mì ni saa na mi viyọnnu jọja lọ taidi asi.”
13 Na Ṣekẹmi ko hẹn Dina nọviyọnnu yetọn gble wutu, visunnu Jakọbu tọn lẹ na gblọndo oklọ tọn Ṣekẹmi po otọ́ etọn Hamọli po. 14 Yé dọna yé dọmọ: “Mí ma sọgan wà onú mọnkọtọn bo yí nọviyọnnu mítọn na sunnu he ma gboadà,*+ na winyan de wẹ enẹ yin na mí. 15 Mí sọgan yigbe kiki eyin mì jẹ nubiọtomẹsi ehe kọ̀n: enẹ wẹ yindọ mì na yinuwa taidi míwlẹ bo gboadà na sunnu mìtọn lẹpo.+ 16 To whenẹnu, mí na nọ yí viyọnnu mítọn lẹ na mì bo na nọ yí mìtọn lẹ, podọ míwlẹ nasọ nọ mì dè bo na lẹzun akọta dopo hẹ mì. 17 Amọ́, eyin mìwlẹ ma kọngbedopọ hẹ mí bo gboadà, whenẹnu mí na yí viyọnnu mítọn bosọ yì.”
18 Nuhe yé dọ sọ yọ́n to nukun Hamọli+ po Ṣekẹmi visunnu etọn+ po tọn mẹ. 19 Visunnu jọja lọ ma dọngbàn nado wà nuhe yé biọ to e si,+ na e tindo ojlo na viyọnnu Jakọbu tọn wutu, humọ ewọ wẹ tindo yẹyi hugan to whédo otọ́ etọn tọn lẹpo mẹ.
20 Enẹwutu, Hamọli po Ṣekẹmi visunnu etọn po yì họngbo tòdaho lọ tọn kọ̀n bo dọhona sunnu he tin to tòdaho yetọn mẹ lẹ+ dọmọ: 21 “Dawe ehelẹ jlo na nọ jijọho mẹ hẹ mí. Mì dike yé ni nọ aigba lọ ji bo wàjọ, na aigba lọ gblo bo pé nado hẹn yé. Mí sọgan dà viyọnnu yetọn lẹ podọ mí sọgan na yé mítọn lẹ.+ 22 Ṣigba, nubiọtomẹsi ehe kẹdẹ wẹ na zọ́n bọ dawe lọ lẹ na yigbe nado nọ mí dè bo lẹzun akọta dopo hẹ mí: enẹ wẹ yindọ sunnu he to ṣẹnṣẹn mítọn lẹpo dona gboadà kẹdẹdi yelọsu.+ 23 To whenẹnu, be nutindo, adọkun po kanlinpa yetọn lẹpo po ma na lẹzun mítọn ya? Enẹwutu, mì dike mí ni kọngbedopọ hẹ yé na yé nido gbọṣi mí dè.” 24 Mẹhe to pipli do họngbo tòdaho etọn tọn kọ̀n lẹpo sọ dotoaina Hamọli po visunnu etọn Ṣekẹmi po, sunnu lọ lẹpo sọ gboadà, yèdọ mẹhe to pipli do họngbo tòdaho lọ tọn kọ̀n lẹpo.
25 Ṣigba, to azán atọ̀ntọ gbè, whenue yé gbẹ́ pò to awufiẹsa mẹ, visunnu Jakọbu tọn awe, yèdọ Simeoni po Levi po he yin nọvisunnu Dina tọn lẹ+ ze ohí yetọn lẹ bo yì tòdaho lọ mẹ to ajiji mẹ bosọ hù sunnu lẹpo.+ 26 Yé yí ohí do hù Hamọli po Ṣekẹmi visunnu etọn po bo plan Dina wayi sọn owhé Ṣekẹmi tọn gbè. 27 Visunnu Jakọbu tọn he pò lẹ sọ jẹ sunnu he ko to kúdaa-gbẹ̀daa lọ lẹ ji bo bẹ ogblànnu tòdaho lọ tọn lẹ na nọviyọnnu yetọn ko yin hinhẹngble+ wutu. 28 Yé bẹ lẹngbọ, kanlin po kẹtẹkẹtẹ yetọn lẹ po gọna nudepope he tin to tòdaho lọ mẹ podọ to danji. 29 Yé sọ bẹ nutindo yetọn lẹpo, bo wle ovi pẹvi po asi yetọn lẹ po bosọ bẹ nuhe tin to owhé yetọn gbè lẹpo.
30 Whenẹnu, Jakọbu dọna Simeoni po Levi po+ dọmọ: “Mì ko hẹn tukla sinsinyẹn* wá ji e gbọn hinhẹn mi zun awuhiọnu na mẹhe nọ nọ̀ aigba lọ ji lẹ dali, yèdọ Kenaninu lẹ po Pelizinu lẹ po. Yẹn whè to sọha mẹ, podọ e họnwun dọ yé na plidopọ bo fọ́n awhàn do oji e bọ yẹn nasọ yin vivasudo, yèdọ yẹn po whédo ṣie po.” 31 Yé sọ gblọn dọmọ: “Be nọviyọnnu mítọn dona yin nuyiwa hẹ taidi galọtọ de wẹ?”
35 Enẹgodo, Jiwheyẹwhe dọna Jakọbu dọmọ: “Fọ́n bo yì Bẹtẹli+ bosọ nọ nọ̀ finẹ, podọ basi agbà de do finẹ na Jiwheyẹwhe nugbo he sọawuhia we to whenue hiẹ to hinhọ̀nna nọvisunnu towe Esau.”+
2 Whenẹnu wẹ Jakọbu dọna whédo etọn po mẹhe tin to e dè lẹpo po dọmọ: “Mì de yẹwhe jonọ he tin to ṣẹnṣẹn mìtọn lẹpo sẹ̀+ bo klọ́ mìde wé bosọ diọ awugbó mìtọn lẹ, 3 podọ mì dike mí ni fọ́n bo yì Bẹtẹli. Yẹn na basi agbà de do finẹ na Jiwheyẹwhe nugbo lọ he ko dotoaina ovẹvivẹ ṣie lẹ to ojlẹ ayimajai ṣie tọn lẹ whenu bo ko sọ tin hẹ mi to fihe* yẹn gbọn lẹpo.”+ 4 Enẹwutu, yé bẹ yẹwhe jonọ he yé tindo lẹpo gọna tómẹnu he tin to otó yetọn mẹ lẹ na Jakọbu, ewọ sọ dì* yé do dòglọ to atin daho he ma dẹn do Ṣekẹmi lọ sá.
5 To whenue yé wleali dedo, obu Jiwheyẹwhe tọn sọ jẹ tòdaho he lẹdo yé lẹ ji, ehe zọ́n bọ yé ma dómọna visunnu Jakọbu tọn lẹ. 6 Jakọbu po mẹhe tin to e dè lẹpo po sọ wá jẹ Luzi,+ to aigba Kenani tọn ji, enẹ wẹ Bẹtẹli. 7 E sọ basi agbà de do finẹ bo ylọ filọ dọ Ẹl-bẹtẹli,* na finẹ wẹ Jiwheyẹwhe nugbo lọ ko sọawuhia ẹ te to whenue e to hinhọ̀nna nọvisunnu etọn.+ 8 To nukọn mẹ, Debola+ he yin yọnnu nukunpedomẹgotọ Lebeka tọn kú bo yin dìdì sẹpọ Bẹtẹli to atin oaki tọn de sá. Enẹwutu, e ylọ filọ dọ Alọni-bakuti.*
9 Jiwheyẹwhe sọ sọawuhia Jakọbu whladopo dogọ to whenue e ja sọn Padani-alami bo dona ẹn. 10 Jiwheyẹwhe sọ dọna ẹn dọmọ: “Jakọbu wẹ hiẹ nọ yin.+ Hiẹ ma na nọ yin Jakọbu ba, ṣigba Islaeli wẹ hiẹ na nọ yin.” E sọ jẹ yiylọ ẹ ji dọ Islaeli.+ 11 Jiwheyẹwhe sọ zindonukọn nado dọna ẹn dọmọ: “Yẹn wẹ Jiwheyẹwhe Ganhunupotọ lọ.+ Yin sinsẹ́nnọ bo sudeji. Akọta lẹ po pipli akọta lẹ tọn po na wá sọn hiẹ mẹ,+ podọ ahọlu lẹ na tọ́n sọn hiẹ mẹ.*+ 12 Na nuhe dù aigba he yẹn ko na Ablaham po Isaki po, hiẹ wẹ yẹn na yí i na podọ na kúnkan* towe lẹ ga to godo towe.”+ 13 Enẹgodo, Jiwheyẹwhe yì sọn e dè.
14 Jakọbu sọ tùn dòtin zannu tọn de dote do fihe Jiwheyẹwhe ko dọho hẹ ẹ te, e sọ kọ̀n avọ́nunina nùnù po amì po do e ji.+ 15 Jakọbu sọ nọ ylọ fihe Jiwheyẹwhe dọho hẹ ẹ te lọ dọ Bẹtẹli.+
16 Enẹgodo, yé tọ́n sọn Bẹtẹli. Podọ dile yé ma ko jẹ Eflati, vinú jẹ Laheli wà ji, e sọ mọ awufiẹsa sinsinyẹn to ajipanu. 17 Ṣigba, dile e to vivẹnudo nado jivi lọ, yọnnu vijinamẹtọ lọ dọna ẹn dọmọ: “A dibu blo, na hiẹ nasọ tindo visunnu ehe ga.”+ 18 To whenue Laheli mọdọ emi to emide mẹ bapò* (na e to kúkú jei wutu), e ylọ oyín visunnu lọ tọn dọ Bẹni-oni,* ṣigba otọ́ etọn ylọ ẹ dọ Bẹnjamini.*+ 19 Laheli sọ kú bo yin dìdì do aliho he yì Eflati ji, enẹ wẹ Bẹtlẹhẹm.+ 20 Jakọbu sọ tùn zannu daho de dote do yọdò etọn ji; enẹ wẹ dòtin yọdò Laheli tọn kakajẹ egbé.
21 Enẹgodo, Islaeli wleali dedo bo yì tùn gòhọ etọn to whenue e ko zẹ̀ atọ̀họ̀ Edeli tọn go. 22 To gbèdopo, whenue Islaeli to aigba enẹ ji, Leubẹni yì dọ́ Bilha asimọwhlá otọ́ etọn tọn dè, bọ Islaeli sọ sè nujijọ lọ.+
Visunnu 12 wẹ Jakọbu tindo. 23 Visunnu he Lea ji na ẹn lẹ wẹ Leubẹni he yin plọnji+ lọ gọna Simeoni, Levi, Juda, Isakali, po Zebuluni po. 24 Visunnu he Laheli ji na ẹn lẹ wẹ Josẹfu po Bẹnjamini po. 25 Podọ visunnu he Bilha, deviyọnnu Laheli tọn ji na ẹn lẹ wẹ Dani po Naftali po. 26 Visunnu he Zilpa, deviyọnnu Lea tọn ji na ẹn lẹ wẹ Gad po Aṣeli po. Visunnu Jakọbu tọn he yin jiji na ẹn to Padani-alami lẹ niyẹn.
27 Enẹgodo, Jakọbu wá fihe Isaki otọ́ etọn tin te to Mamle,+ he yin Kiliati-alba, enẹ wẹ Heblọni, fihe Ablaham po Isaki po ko nọ taidi jonọ+ wayi. 28 Isaki sọ nọgbẹ̀ na owhe 180.+ 29 Enẹgodo, Isaki gbọ gbigbọ etọn godo tọn bo kú to whenue e ko whẹ́n mẹho taun bo tindo pekọ to gbẹninọ mẹ;* e sọ yin dìdì taidi omẹ etọn lẹ* gbọn visunnu etọn Esau po Jakọbu po dali.+
36 Ehe wẹ otàn Esau, yèdọ Edomi+ tọn.
2 Esau dà asi etọn lẹ sọn viyọnnu Kenani tọn lẹ mẹ: Ada+ viyọnnu Elọni Hetinu+ lọ tọn; Oholibama+ viyọnnu Ana tọn, yèdọ ovivi Zibeọni Hivinu lọ tọn; 3 po Basemati+ viyọnnu Iṣmaeli tọn po, he yin nọviyọnnu Nebaiọti+ tọn.
4 Ada ji Elifazi na Esau, podọ Basemati ji Leuẹli, 5 Oholibama sọ ji Jeuṣi, Jalami po Kola+ po.
Visunnu he yin jiji na Esau to aigba Kenani tọn ji lẹ niyẹn. 6 Enẹgodo, Esau plan asi etọn lẹ, visunnu etọn lẹ, viyọnnu etọn lẹ, po mẹhe* to owhé etọn gbè lẹpo po, bosọ bẹ lẹngbọ po kanlin etọn he pò lẹpo po, gọna adọkun he e bẹpli+ to aigba Kenani tọn ji lẹpo bo yì aigba devo he dẹn do Jakọbu nọvisunnu etọn ji.+ 7 Na nutindo yetọn lẹ ko sù sọmọ bọ yé ma sọgan nọpọ́ ba, podọ aigba he ji yé to ninọ* lọ ma sọgan hẹn yé ba na kanlinpa yetọn lẹ wutu. 8 Enẹwutu, Esau yì sawhé do lẹdo osó tọn Seili+ tọn mẹ. Esau sọ nọ yin yiylọdọ Edomi.+
9 Ehe wẹ otàn Esau tọgbo Edominu lẹ tọn to lẹdo osó tọn Seili+ tọn mẹ.
10 Oyín visunnu Esau tọn lẹ tọn die: Elifazi he Ada ji na ẹn; Leuẹli he Basemati ji na ẹn.+
11 Visunnu Elifazi tọn lẹ wẹ Temani,+ Omali, Zẹfo, Gatami po Kenazi+ po. 12 Timna lẹzun asimọwhlá Elifazi visunnu Esau tọn. To ojlẹ vude godo, e ji Amalẹki+ na Elifazi. Yewlẹ wẹ yin visunnu* Ada, asi Esau tọn lẹ.
13 Visunnu Leuẹli tọn lẹ die: Nahati, Zela, Ṣammahi, po Miza po. Yewlẹ wẹ yin visunnu* Basemati,+ asi Esau tọn lẹ.
14 Visunnu Oholibama, asi Esau tọn he yin viyọnnu Ana tọn, yèdọ ovivi Zibeọni tọn he e ji na Esau lẹ die: Jeuṣi, Jalami po Kola po.
15 Omẹ ehelẹ wẹ yin ṣeiki* lẹ sọn visunnu Esau tọn lẹ mẹ:+ Visunnu Elifazi plọnji Esau tọn lẹ die: Ṣeiki Temani, Ṣeiki Omali, Ṣeiki Zẹfo, Ṣeiki Kenazi,+ 16 Ṣeiki Kola, Ṣeiki Gatami, po Ṣeiki Amalẹki po. Visunnu Elifazi+ tọn ehelẹ wẹ yin ṣeiki lẹ to aigba Edomi tọn ji. Yewlẹ wẹ visunnu* Ada tọn lẹ.
17 Visunnu Leuẹli he yin visunnu Esau tọn lẹ die: Ṣeiki Nahati, Ṣeiki Zela, Ṣeiki Ṣammahi, po Ṣeiki Miza po. Visunnu Leuẹli tọn ehelẹ wẹ yin ṣeiki lẹ to aigba Edomi tọn ji.+ Visunnu* Basemati he yin asi Esau tọn lẹ niyẹn.
18 Visunnu Oholibama he yin asi Esau tọn lẹ die: Ṣeiki Jeuṣi, Ṣeiki Jalami po Ṣeiki Kola po. Yewlẹ wẹ ṣeiki he yin visunnu Oholibama asi Esau tọn, yèdọ viyọnnu Ana tọn.
19 Visunnu Esau, he nọ yin yiylọdọ Edomi+ tọn lẹ po ṣeiki yetọn lẹ po niyẹn.
20 Visunnu Seili Holinu lọ tọn he nọ nọ̀ aigba lọ ji lẹ die:+ Lotani, Ṣobali, Zibeọni, Ana,+ 21 Diṣọni, Ezeli, po Diṣani po.+ Yewlẹ wẹ ṣeiki Holinu lẹ tọn lẹ he yin visunnu Seili tọn lẹ to aigba Edomi tọn ji.
22 Visunnu Lotani tọn lẹ wẹ Holi po Hemami po, podọ nọviyọnnu Lotani tọn wẹ Timna.+
23 Visunnu Ṣobali tọn lẹ die: Alvani, Manahati, Ebali, Ṣefo po Onami po.
24 Visunnu Zibeọni+ tọn lẹ die: Aia po Ana po. Ana ehe wẹ mọ asisa osin miyọ́nawu tọn to danfafa ji to whenue e to kẹtẹkẹtẹ Zibeọni otọ́ etọn tọn lẹ yìn.
25 Ovi Ana tọn lẹ die: Diṣọni podọ Oholibama viyọnnu etọn.
26 Visunnu Diṣọni tọn lẹ die: Hẹmdani, Ẹṣbani, Itlani po Kẹlani po.+
27 Visunnu Ezeli tọn lẹ die: Bilhani, Zaavani po Akani po.
28 Visunnu Diṣani tọn lẹ die: Uzi po Alani po.+
29 Ṣeiki Holinu lẹ tọn lẹ die: Ṣeiki Lotani, Ṣeiki Ṣobali, Ṣeiki Zibeọni, Ṣeiki Ana, 30 Ṣeiki Diṣọni, Ṣeiki Ezeli po Ṣeiki Diṣani po.+ Yewlẹ wẹ ṣeiki Holinu lẹ tọn lẹ to aigba Seili tọn ji.
31 Todin, omẹ ehelẹ wẹ yin ahọlu he dugán to aigba Edomi tọn ji+ whẹpo Islaelivi* lẹ do wá tindo ahọlu lẹ.+ 32 Bela visunnu Beoli tọn dugán to Edomi, podọ oyín tòdaho etọn tọn wẹ Dinhaba. 33 Whenue Bela kú, Jobabi visunnu Zela tọn he wá sọn Bozla jẹ gandu ji do otẹn etọn mẹ. 34 Whenue Jobabi kú, Huṣami he wá sọn aigba Temaninu lẹ tọn ji jẹ gandu ji do otẹn etọn mẹ. 35 Whenue Huṣami kú, Hadadi visunnu Bedadi tọn he gbawhàn Midianinu+ lẹ tọn to aigba* Moabi tọn ji jẹ gandu ji do otẹn etọn mẹ, podọ oyín tòdaho etọn tọn wẹ Aviti. 36 Whenue Hadadi kú, Samla he wá sọn Masleka jẹ gandu ji do otẹn etọn mẹ. 37 Whenue Samla kú, Ṣauli he wá sọn Lehobọti to Tọ̀sisa lọ waji jẹ gandu ji do otẹn etọn mẹ. 38 Whenue Ṣauli kú, Baali-hanani visunnu Akbọli tọn jẹ gandu ji do otẹn etọn mẹ. 39 Whenue Baali-hanani visunnu Akbọli tọn kú, Hadali jẹ gandu ji do otẹn etọn mẹ. Oyín tòdaho etọn tọn wẹ Pau, oyín asi etọn tọn sọ wẹ Mẹhetabeli, viyọnnu Matlẹdi tọn he yin viyọnnu Mezahabi tọn.
40 Enẹwutu, oyín ṣeiki he wá sọn kúnkan Esau tọn mẹ lẹ tọn sọgbe hẹ whẹndo yetọn lẹ po nọtẹn yetọn lẹ po die: Ṣeiki Timna, Ṣeiki Alva, Ṣeiki Jetẹti,+ 41 Ṣeiki Oholibama, Ṣeiki Elahi, Ṣeiki Pinọni, 42 Ṣeiki Kenazi, Ṣeiki Temani, Ṣeiki Mibzali, 43 Ṣeiki Magdiẹli po Ṣeiki Ilami po. Omẹ ehelẹ wẹ ṣeiki Edomi tọn lẹ he yin sislẹ sọgbe hẹ nọtẹn yetọn lẹ to aigba lọ ji.+ Yewlẹ wẹ yin kúnkan Esau tọgbo Edominu lẹ tọn.+
37 Jakọbu sọ gbọṣi aigba Kenani tọn ji, yèdọ fihe otọ́ etọn ko nọ taidi jonọ.+
2 Ehe wẹ otàn Jakọbu tọn.
To whenue Josẹfu+ tindo owhe 17, e to lẹngbọ lẹ yìn+ hẹ visunnu Bilha tọn lẹ+ po visunnu Zilpa tọn lẹ+ po, mẹhe yin asi otọ́ etọn tọn lẹ. Podọ Josẹfu wá jẹwhẹ yetọn na otọ́ yetọn. 3 Islaeli sọ yiwanna Josẹfu hugan nọvisunnu etọn he pò lẹpo,+ na visunnu yọnhowhe mẹ tọn etọn wẹ, e sọ basi tewu vonọtaun* de na ẹn. 4 Whenue nọvisunnu etọn lẹ mọdọ otọ́ yetọn yiwanna Josẹfu hugan yemẹpo, yé jẹ wangbẹna ẹn ji, bo masọ nọ mọ ẹn gbọ ba.
5 Enẹgodo, Josẹfu kudlọ de bo dọ ẹ na nọvisunnu etọn lẹ,+ enẹ zọ́n bọ yé sọ gbẹwanna ẹn dogọ. 6 E sọ dọna yé dọmọ: “Mì jaale bo dotoaina odlọ ṣie. 7 To gbèdopo, mí to likun lẹ blá do gọnu-gọnu to ogle ṣẹnṣẹn bọ okọ̀ likun tọn ṣie jlọ nọte podọ okọ̀ likun tọn mìtọn lẹ sọ lẹdo e bo dẹ́ do odò na ẹn.”+ 8 Nọvisunnu etọn lẹ sọ dọna ẹn dọmọ: “Be hiẹ na nugbo tọn na yí dewe do basi ahọlu bo dugán do mí ji wẹ?”+ Enẹ zọ́n bọ yé sọ gbẹwanna ẹn dogọ na odlọ etọn lẹ po nuhe e dọ lẹ po wutu.
9 Enẹgodo, e sọ kudlọ devo bo dọ ẹ na nọvisunnu etọn lẹ dọmọ: “Yẹn sọ kudlọ devo. To odlọ ehe mẹ, osun, owhè po sunwhlẹvu 11 po to didẹ́ do odò na mi.”+ 10 E sọ dọ odlọ lọ na otọ́ etọn po nọvisunnu etọn lẹ po, otọ́ etọn sọ gbẹnuna ẹn bo dọna ẹn dọmọ: “Etẹwẹ odlọ he a kú ehe zẹẹmẹdo? Be nuhe dọ a te wẹ yindọ yẹn po onọ̀ towe po gọna nọvisunnu towe lẹ na wá dẹ́ do odò na we wẹ ya?” 11 Nọvisunnu etọn lẹ sọ jẹ awuwhàn ẹn ji,+ ṣigba otọ́ etọn hẹn ohó lọ do ayiha mẹ.
12 Todin, nọvisunnu etọn lẹ yì nado yì na núdùdù lẹngbọ otọ́ yetọn tọn lẹ sẹpọ Ṣekẹmi.+ 13 To ojlẹ vude godo, Islaeli dọna Josẹfu dọmọ: “Be e ma yin sẹpọ Ṣekẹmi wẹ nọvisunnu towe lẹ to lẹngbọ lẹ yìn te ya? Wá bo gbọ yẹn ni do we hlan yé dè.” E sọ gblọnna ẹn dọmọ: “Yẹn die!” 14 Enẹwutu, e dọna ẹn dọmọ: “Jaale, yì pọ́n eyin nọvisunnu towe lẹ to ganji. Sọ pọ́n lehe lẹngbọpa lọ te do bo wá dọna mi.” Whenẹnu wẹ e do e hlan sọn agbàdo Heblọni+ tọn mẹ bọ ewọ sọ dedo Ṣekẹmi waji. 15 Dawe de sọ mọ ẹn bọ e to fuflupé to danji. Dawe lọ sọ kanse e dọmọ: “Etẹ dín wẹ a te?” 16 E sọ gblọn dọmọ: “Nọvisunnu ṣie lẹ dín wẹ yẹn te. Jaale dọna mi, fie wẹ yé to lẹngbọ lẹ yìn te?” 17 Dawe lọ sọ dọna ẹn dọmọ: “Yé ko sẹtẹn sọn fi, na yẹn sè bọ yé to didọ dọ, ‘Mì dike mí ni yì Dotani.’” Enẹwutu, Josẹfu doafọna nọvisunnu etọn lẹ bo mọ yé to Dotani.
18 Yé sọ mọ ẹn sọn olá, bọ whẹpo e nado wá yé dè, yé ko jẹ wede ji nado hù i. 19 Yé sọ dọna ode awetọ dọmọ: “Mì pọ́n! Odlọ-gán+ lọ ko ja. 20 Todin, mì dike mí ni hù i bo dlan ẹn do dopo to osindò lọ lẹ mẹ, mí nasọ dọ dọ gbekanlin ylankan de wẹ tlẹ́n ẹn dù. Whenẹnu, mí na pọ́n lehe odlọ etọn lẹ na wá yì do.” 21 Whenue Leubẹni+ sè ehe, e tẹnpọn nado whlẹn ẹn sọn alọ yetọn mẹ. Enẹwutu, e dọmọ: “Mì dike mí yí ogbẹ̀ etọn* blo.”+ 22 Leubẹni sọ dọna yé dọmọ: “Mì sọ̀n ohùn dai blo.+ Mì dlan ẹn do osindò he to danfafa ji ehe mẹ, mì sọ gbleawuna ẹn blo.”+ Yanwle etọn wẹ nado whlẹn ẹn sọn alọ yetọn mẹ bo hẹn ẹn lẹkọyi na otọ́ etọn.
23 Enẹwutu, tlolo he Josẹfu wá nọvisunnu etọn lẹ dè, yé de tewu etọn sọn e go, enẹ wẹ tewu vonọtaun he e nọ do,+ 24 yé sọ plan ẹn bo dlan ẹn do osindò lọ mẹ. To ojlẹ enẹ mẹ, osindò lọ ko hú; osin depope ma tin to e mẹ.
25 Yé sọ sinai nado dùnú. To whenue yé pọ́n nukọn hlan, yé mọ ogbẹ́ ajọwatọ Iṣmaelinu+ lẹ tọn de ja sọn Giliadi. Podọ kanklosọ́ yetọn lẹ bẹ gọmu owán gblingblinnọ,* balsami* po atin-gotò gọmunọ lẹ po+ jei Egipti. 26 To whenẹnu, Juda dọna nọvisunnu etọn lẹ dọmọ: “Ale tẹwẹ tin to e mẹ na mí eyin mí hù nọvisunnu mítọn bo whlá nuhe mí wà?+ 27 Mì gbọ mí ni sà ẹ+ na Iṣmaelinu lẹ, podọ mì dike mí doalọ ewọ go blo. To popolẹpo mẹ, nọvisunnu mítọn wẹ e yin, yèdọ agbasalan mítọn.” Enẹwutu, yé sè ohó nọvisunnu yetọn tọn. 28 To whenue ajọwatọ Midianinu+ lọ lẹ juwajei, yé dọ̀n Josẹfu tọ́n sọn osindò lọ mẹ bo sà ẹ na Iṣmaelinu lọ lẹ yin fataka-kuẹ 20.+ Dawe lọ lẹ sọ plan Josẹfu yì Egipti.
29 Enẹgodo, whenue Leubẹni lẹkọyi osindò lọ kọ̀n bo mọdọ Josẹfu ma tin to e mẹ ba, e tlẹ́n awugbó etọn lẹ. 30 To whenue e lẹkọyi nọvisunnu etọn lẹ dè, e dọ po ogbè lélé po dọmọ: “Ovi lọ ko yì! Fie wẹ yẹn na gbọn?”
31 Enẹwutu, yé hù gbọgbọẹ asu de bo ylọn tewu Josẹfu tọn do ohùn etọn mẹ. 32 Enẹgodo, yé hẹn tewu vonọtaun lọ wá na otọ́ yetọn bo dọmọ: “Nuhe mí mọ die. Jaale bo pọ́n ẹn tlintlin eyin tewu visunnu towe tọn wẹ kavi lala.”+ 33 E sọ blẹ ẹ pọ́n bo dawhá dọmọ: “Tewu visunnu ṣie tọn wẹ! Gbekanlin ylankan de wẹ dona ko tlẹ́n ẹn dù! E họnwun dọ Josẹfu ko yin tintlẹ́n do flinflin!” 34 Enẹwutu, Jakọbu tlẹ́n awugbó etọn lẹ bo gbá odẹ́vọ̀ bosọ nọ aluẹmẹ na visunnu etọn na azán susu. 35 Visunnu etọn lẹpo po viyọnnu etọn lẹpo po sọ to tintẹnpọn nado miọnhomẹna ẹn, ṣigba ewọ gbẹ́ nado yin homẹmiọnna bo to didọmọ: “Yẹn na nọ aluẹmẹ na visunnu ṣie kaka do yì Yọdò* mẹ!”+ Otọ́ etọn sọ to vivi i mapote.
36 Midianinu lọ lẹ sọ sà ẹ to Egipti na Pọtifali he yin ahọluzọnwatọ de to họ̀nmẹ Falo tọn+ podọ ogán nuhọ́tọ lẹ tọn.+
38 To ojlẹ enẹ mẹ, Juda sẹtẹn sọn nọvisunnu etọn lẹ dè bo tùn gòhọ etọn sẹpọ dawe Adulaminu de he nọ yin Hila. 2 To finẹ, Juda mọ viyọnnu dawe Kenaninu+ de he nọ yin Ṣua tọn. E sọ dà ẹ bo tindo kọndopọ zanhẹmẹ tọn hẹ ẹ, 3 ewọ sọ mọhò. Enẹgodo, e ji visunnu de bọ Juda ylọ oyín etọn dọ Ẹẹli.+ 4 E sọ mọhò devo bo ji visunnu de bosọ ylọ oyín etọn dọ Onani. 5 Enẹgodo, e sọ ji visunnu de bo ylọ oyín etọn dọ Ṣela. Podọ Akzibi+ wẹ ewọ* tin te to whenue yọnnu lọ ji visunnu ehe.
6 Enẹgodo, Juda dà asi de he nọ yin Tamali+ na plọnji etọn Ẹẹli. 7 Ṣigba, Ẹẹli plọnji Juda tọn ma hẹn homẹhun Jehovah; enẹwutu, Jehovah hù i. 8 Enẹ wẹ zọ́n bọ Juda dọna Onani dọmọ: “Sọ́n asi nọvisunnu towe tọn bo tindo kọndopọ zanhẹmẹ tọn hẹ ẹ bosọ wleawuna kúnkan de na nọvisunnu towe.”+ 9 Ṣigba, Onani yọnẹn dọ kúnkan lọ ma na yin emitọn.+ Enẹwutu, eyin e to kọndopọ zanhẹmẹ tọn tindo hẹ asi nọvisunnu etọn tọn, e nọ kọ̀n vísin etọn do kọmẹ na e ma jlo na wleawuna kúnkan de dai na nọvisunnu etọn.+ 10 Nuhe e wà ylan to nukun Jehovah tọn mẹ, enẹwutu e hù ewọ lọsu ga.+ 11 Whenẹnu, Juda dọna Tamali ovisi etọn dọmọ: “Yì nọ owhé otọ́ towe tọn gbè taidi asuṣiọsi de kakajẹ whenue Ṣela visunnu ṣie na whẹ́n,” na e lẹn to ohò ede tọn mẹ dọ: ‘Ewọ lọsu sọgan kú dile nọvisunnu etọn lẹ kú do.’+ Enẹwutu, Tamali yì owhé otọ́ etọn tọn gbè bosọ gbọṣi finẹ.
12 To ojlẹ delẹ godo, viyọnnu Ṣua+ tọn he yin asi Juda tọn kú. To whenue Juda ko dotana ojlẹ aluẹmẹninọ tọn etọn, ewọ po họntọn etọn Hila Adulaminu+ lọ po yì mẹhe nọ pà ofún na lẹngbọ etọn lẹ dè to Timna.+ 13 E sọ yin didọna Tamali dọmọ: “Pọ́n, asu-tọ́ towe jei Timna nado yì pà ofún na lẹngbọ etọn lẹ.” 14 Enẹwutu, e de aluẹmẹ-vọ̀ etọn bo yí tabla de ṣinyọ́n nukunmẹ bosọ yí avọ̀ de ṣinyọ́n nado whlá ede, e sọ sinai do họntonu Enaimi tọn, ehe tin to aliho Timna tọn ji, na e mọdọ Ṣela ko whẹ́n, ṣogan asu-tọ́ etọn ma ko yí ewọ na ẹn taidi asi.+
15 To whenue Juda mọ ẹn, e lẹn to afọdopolọji dọ galọtọ de wẹ, na Tamali ṣinyọnnudo nukunmẹ wutu. 16 Enẹwutu, e zẹ̀ yì e dè bo dọmọ: “Jaale, gbọ yẹn ni tindo kọndopọ zanhẹmẹ tọn hẹ we,” na ewọ ma yọnẹn dọ ovisi etọn wẹ wutu.+ Ṣigba, yọnnu lọ dọmọ: “Etẹwẹ hiẹ na na mi whẹpo do tindo kọndopọ zanhẹmẹ tọn hẹ mi?” 17 E gblọnna ẹn dọmọ: “Yẹn na do gbọgbọẹ winyanwinyan de hlan we sọn kanlinpa ṣie mẹ.” Ṣigba, ewọ dọmọ: “Be hiẹ na yí nude do súafà kakajẹ whenue hiẹ na do gbọgbọẹ lọ hlan ya?” 18 Ewọ sọ gblọnna ẹn dọmọ: “Etẹwẹ hiẹ jlo dọ yẹn ni yí do súafà?” yọnnu lọ sọ dọmọ: “Alọkẹ hiadonugo tọn+ towe po okàn etọn po gọna opò towe he tin to alọ towe mẹ.” E sọ bẹ yé na ẹn bo tindo kọndopọ zanhẹmẹ tọn hẹ ẹ, yọnnu lọ sọ mọhò na ẹn. 19 Enẹgodo, e fọ́n dedo bo de nukunmẹṣinyọnnu etọn sẹ̀ bosọ gọ̀ aluẹmẹ-vọ̀ etọn do.
20 Juda sọ do gbọgbọẹ winyanwinyan lọ hlan gbọn họntọn etọn Adulaminu+ lọ ji nado gọ̀ nuhe ewọ súafà lẹ yí sọn nawe lọ si, ṣigba e ma mọ ẹn. 21 E sọ kanse sunnu he nọ nọ̀ finẹ lẹ dọmọ: “Fie wẹ galọtọ tẹmpli mẹ tọn he nọ nọ̀ Enaimi to alitó lọ te?” Ṣigba, yé gblọnna ẹn dọmọ: “Galọtọ tẹmpli mẹ tọn de ma nọfi pọ́n.” 22 Enẹgodo, e lẹkọyi Juda dè bo dọmọ: “Yẹn ma mọ ẹn podọ, gbọnvona enẹ, sunnu he nọ nọ̀ finẹ lẹ dọ dọ, ‘Galọtọ tẹmpli mẹ tọn de ma nọfi pọ́n.’” 23 Enẹwutu, Juda dọmọ: “Jo nulọ lẹ do na ẹn, na mí nikaa mọ winyan. To popolẹpo mẹ, yẹn ko do gbọgbọẹ winyanwinyan lọ hlan, ṣigba hiẹ ma mọ ẹn.”
24 Ṣigba, to osun atọ̀n godo, e yin didọna Juda dọmọ: “Tamali ovisi towe ko lọga, bosọ mọhò gbọn galilọ etọn dali.” Whenẹnu Juda dọmọ: “Mì hẹn ẹn tọ́njẹgbonu na e ni yin fifiọ.”+ 25 Dile ewọ to yinyin hinhẹn jẹgbonu, e dowẹn hlan asu-tọ́ etọn dọmọ: “Dawe he tọn onú ehelẹ yin wẹ yẹn mọhò na.” E sọ yidogọ dọmọ: “Jaale, blẹ yé pọ́n nado yọ́n mẹhe tọn wẹ onú ehelẹ, yèdọ alọkẹ hiadonugo tọn po okàn etọn po gọna opò lọ.”+ 26 Juda sọ blẹ yé pọ́n bo dọmọ: “Ewọ yin dodonọ hú mi, na yẹn ma yí i na Ṣela visunnu ṣie wutu.”+ Enẹgodo, Juda masọ tindo kọndopọ zanhẹmẹ tọn hẹ ẹ ba.
27 Whenue ojlẹ vijiji tọn etọn sọ̀, ahoho wẹ tin to ohò etọn mẹ. 28 Whenue ewọ to viji, dopo to ovi lọ lẹ mẹ dealọ tọ́njẹgbonu bọ to afọdopolọji, yọnnu vijinamẹtọ lọ yí okàn vẹẹ ṣẹ́ṣẹ́ de bo blá do alọ etọn go bosọ dọmọ: “Omẹ ehe wẹ tọ́n jẹnukọn.” 29 Ṣigba, tlolo he e gọ̀ alọ do onọ̀ etọn homẹ, nọvisunnu etọn tọ́njẹgbonu, bọ yọnnu vijinamẹtọ lọ sọ dọmọ: “Hiẹ ko yí zingidi do hùn alìn onọ̀ towe tọn na dewe!” Yé sọ ylọ oyín etọn dọ Pelẹzi.*+ 30 Enẹgodo, nọvisunnu etọn he okàn vẹẹ ṣẹ́ṣẹ́ yin sìnsìn do alọ go na lọ tọ́njẹgbonu bọ yé sọ ylọ oyín etọn dọ Zela.+
39 Josẹfu sọ yin hinhẹn yì Egipti+ bọ Pọtifali+ Egiptinu de, he yin ahọluzọnwatọ de to họ̀nmẹ Falo tọn podọ ogán nuhọ́tọ lẹ tọn họ̀ ẹ sọn Iṣmaelinu+ he hẹn ẹn wá finẹ lẹ si. 2 Ṣigba, Jehovah tin po Josẹfu po.+ Enẹwutu, e tindo kọdetọn dagbe bosọ yin dide do whédo klunọ etọn Egiptinu lọ tọn ji. 3 Klunọ etọn sọ mọdọ Jehovah tin po e po podọ Jehovah nọ hẹn nuhe wà e te lẹpo tindo kọdetọn dagbe.
4 Josẹfu nọ mọ nukundagbe klunọ etọn tọn bosọ lẹzun devizọnwatọ whégbè tọn etọn. E sọ de e do whédo etọn ji, bo ze nuhe e tindo lẹpo do alọ etọn mẹ. 5 Podọ sọn whenue e ko de e do whédo po nutindo etọn lẹpo po ji, Jehovah to didona whédo Egiptinu lọ tọn na Josẹfu tọn wutu, Jehovah sọ dona nuhe e tindo to whégbè podọ to glemẹ lẹpo.+ 6 Enẹwutu, e de Josẹfu nado nọ penukundo nutindo etọn lẹpo go, podọ e masọ nọ jlo na mọdona nudepope he to yìyì to owhé etọn gbè adavo núdùdù etọn kẹdẹ. Humọ, Josẹfu sọ whẹ́n bo lẹzun sunnu glegbenu bosọ yọ́ndẹpẹ.
7 To onú ehelẹ godo, asi klunọ etọn tọn jẹ ojlo tindo na Josẹfu ji, bo nọ dọmọ: “Wá dọ́ dè e.” 8 Ṣigba, ewọ nọ gbẹ́ bo nọ dọna asi klunọ etọn tọn dọmọ: “Pọ́n, klunọ ṣie ma nọ jlo na mọdona nudepope he tin to alọ ṣie mẹ to owhé lọ gbè, podọ nuhe e tindo lẹpo wẹ e ko zedo alọ ṣie mẹ. 9 Mẹdepope ma hugan mi to owhé ehe gbè, podọ e masọ ze nudepope whlá do mi adavo hiẹ, na asi etọn wẹ hiẹ wutu. Enẹwutu, nawẹ yẹn sọgan waylan daho ehe do bo gbọnmọ dali waylando do Jiwheyẹwhe?”+
10 Podọ egbesọegbesọ wẹ e nọ to ohó dopolọ dọna Josẹfu, amọ́ ewọ ma kọngbedopọ hẹ ẹ nado dọ́ e dè kavi nado nọ yí whenu zan hẹ ẹ. 11 Ṣigba to gbèdopo, whenue ewọ yì họmẹ nado yì wazọ́n etọn lẹ, depope to devizọnwatọ whégbè tọn lẹ mẹ ma tin to ohọ̀ lọ mẹ. 12 Yọnnu lọ sọ tẹdo awù etọn go bo dọmọ: “Wá dọ́ dè e!” Ṣigba, e jo awù etọn do alọ etọn mẹ bo họ̀n jẹgbonu. 13 Whenue ewọ mọdọ Josẹfu jo awù etọn do alọ etọn mẹ bo họ̀n tọ́n, 14 yọnnu lọ sọ jẹ awhádo ji hlan mẹhe tin to owhé etọn gbè lẹ dọmọ: “Mì pọ́n! E hẹn dawe Heblu ehe wá na mí nado hẹn mí zun aṣagbọ́nu. Ewọ wá nado dọ́ dè e, ṣigba yẹn dawhá po ogbè lélé po. 15 Podọ dile e mọdọ yẹn ze ogbè daga bo to awhádo, e jo awù etọn do apá ṣie bo họ̀n tọ́n.” 16 Yọnnu lọ sọ jo awù lọ do apá ede tọn kakajẹ whenue klunọ Josẹfu tọn wá whégbè.
17 Whenẹnu, e dọ nudopolọ na asu etọn dọmọ: “Devizọnwatọ Heblu he hiẹ hẹnwa na mí lọ, wá dè e nado hẹn mi zun aṣagbọ́nu. 18 Ṣigba, tlolo he yẹn ze ogbè daga bo jẹ awhádo ji, e jo awù etọn do apá ṣie bo họ̀n tọ́n.” 19 To afọdopolọji he klunọ etọn sè nuhe asi etọn dọna ẹn lẹ dọmọ: “Nuhe devizọnwatọ towe wà na mi lẹ niyẹn,” e gblehomẹ sinsinyẹn. 20 Klunọ etọn sọ ze e do gànpamẹ, yèdọ fihe mẹhe ahọlu wle lẹ nọ yin zizedo, ewọ sọ gbọṣi finẹ.+
21 Ṣigba, Jehovah sọ tin hẹ Josẹfu bo nọ do owanyi nugbo hia ẹ bosọ hẹn ẹn nado tindo nukundagbe ogán gànpa lọ tọn.+ 22 Enẹwutu, ogán gànpa lọ tọn yí Josẹfu do basi ogán do gàntọ he to gànpa lọ mẹ lẹpo ji, podọ ewọ wẹ nọ deanana nuhe nọ yin wiwà to finẹ lẹpo.+ 23 Ogán gànpa lọ tọn masọ nọ na ayidonugo nuhe tin to anademẹ Josẹfu tọn glọ lẹ depope, na Jehovah tin hẹ Josẹfu podọ Jehovah nọ hẹn nuhe wà e te lẹpo tindo kọdetọn dagbe wutu.+
40 To onú ehelẹ godo, ahànjinọtọ-gán+ ahọlu Egipti tọn po akladatọ-gán po waylando do oklunọ yetọn, he yin ahọlu Egipti tọn. 2 Enẹwutu, Falo gblehomẹ do azọ́nwatọ etọn awe he yin ahànjinọtọ-gán po akladatọ-gán po go,+ 3 e sọ ze yé do gànpamẹ to owhé ogán nuhọ́tọ lẹ tọn gbè,+ yèdọ fihe Josẹfu yin gàntọ te.+ 4 Podọ ogán nuhọ́tọ lẹ tọn de Josẹfu nado nọ nọ̀ yé dè bo nọ penukundo yé go,+ yé sọ gbọṣi gànpamẹ na ojlẹ de.*
5 Ahànjinọtọ po akladatọ ahọlu Egipti tọn lọ tọn po he tin to gànpamẹ kudlọ to ozán dopolọ mẹ, podọ odlọ lọ lẹ dopodopo sọ tindo tadena etọn. 6 To wunkẹngbe, whenuena Josẹfu wá bo mọ yé, e mọdọ nukunmẹ yetọn kúṣiọ. 7 Enẹwutu, e kanse azọ́nwatọ Falo tọn he tin to gànpamẹ hẹ ẹ to owhé klunọ etọn tọn gbè lọ lẹ dọmọ: “Naegbọn nukunmẹ mìtọn lẹ do kúṣiọ to egbé?” 8 Yé sọ gblọnna ẹn dọmọ: “Mí omẹ awe lẹ kudlọ, ṣigba mẹhe na detana ẹn de ma tin tofi.” Josẹfu sọ dọna yé dọmọ: “Be e ma yin Jiwheyẹwhe wẹ yin asisa tadenanu lẹ tọn ya?+ Mì jaale bo dọ ẹ na mi.”
9 Enẹwutu, ahànjinọtọ-gán lọ dọ odlọ etọn na Josẹfu dọmọ: “To odlọ ṣie mẹ, yẹn mọ vẹntin de to nukọn ṣie. 10 Podọ vẹntin lọ zẹ̀alà atọ̀n, bọ dile alà lọ lẹ to tintọ́n, e gbàsẹ́ bọ ovẹn sinsẹ́n he tin to ohín etọn go lẹ sọ bia. 11 Kọfo Falo tọn sọ tin to alọ ṣie mẹ, bọ yẹn yí ovẹn sinsẹ́n lọ lẹ bo finyọ́n yé do kọfo lọ mẹ. Enẹgodo, yẹn ze kọfo lọ do alọmẹ na Falo.” 12 Whenẹnu, Josẹfu dọna ẹn dọmọ: “Ehe wẹ tadena etọn: Alà atọ̀n lọ lẹ nọtena azán atọ̀n. 13 To azán atọ̀n godo bẹsọn egbé, Falo na de we tọ́n* bo na gọ̀ we do otẹn towe mẹ,+ hiẹ nasọ nọ ze kọfo do alọmẹ na ẹn dile hiẹ ko nọ wà do dai to whenue hiẹ yin ahànjinọtọ etọn.+ 14 Ṣigba, hiẹ ni flin mi whenuena nulẹ na to yìyì do ganji na we. Jaale bo do owanyi nugbo hia mi bosọ dọho ṣie na Falo, na yẹn nido yin didetọn sọn fi. 15 Nugbo lọ wẹ yindọ gánnugánnu wẹ n’yin wiwle sọn aigba Heblu lẹ tọn ji,+ n’ma ka sọ hùwhẹ de tofi, ehe wutu yé dona ze mi do gànmẹ.”*+
16 To whenue akladatọ-gán lọ mọdọ Josẹfu ko basi tadena dagbe de, ewọ lọsu dọna ẹn dọmọ: “Yẹnlọsu kudlọ bọ to odlọ ṣie mẹ, ohà atọ̀n he mẹ akla wewe te lẹ tin to ota ṣie, 17 podọ akla didà dagbe voovo wunmẹ lẹpo wẹ tin to ohà he tin to aga pete lọ mẹ na Falo, bọ ohẹ̀ lẹ jẹ akla lọ lẹ dù ji to ota ṣie sọn ohà he tin to aga pete lọ mẹ.” 18 Josẹfu sọ gblọn dọ, “Ehe wẹ tadena etọn: Ohà atọ̀n lọ lẹ nọtena azán atọ̀n. 19 To azán atọ̀n godo bẹsọn egbé, Falo na gbòta na we* bo nasọ ze we plá do atin go, bọ ohẹ̀ lẹ na dù olàn towe.”+
20 Todin, azán atọ̀ntọ gbè wẹ yin jijizan+ Falo tọn, ewọ sọ basi hùnwhẹ de na devizọnwatọ etọn lẹpo, bo de ahànjinọtọ-gán lọ po akladatọ-gán lọ po tọ́n* to devizọnwatọ etọn lẹ nukọn. 21 E sọ gọ̀ ahànjinọtọ-gán lọ do otẹn etọn mẹ, bọ ewọ sọ jẹ kọfo zedo alọmẹ na Falo ji. 22 Amọ́, e ze akladatọ-gán lọ plá do núgo, kẹdẹdile Josẹfu ko basi tadena lọ lẹ na yé do.+ 23 Ṣigba, ahànjinọtọ-gán lọ masọ flin Josẹfu; e ko wọn ẹn pete.+
41 To owhe awe godo, Falo kudlọ+ bo mọ ede to ote to Tọ̀sisa Nile tọn tó. 2 To finẹ, e mọ oyìnsi ṣinawe he dojó bo yọnwhanpẹ to tintọ́n sọn tọ̀sisa lọ mẹ, yé sọ to amà Nile tọn lẹ dù.+ 3 E sọ mọ oyìnsi ṣinawe devo lẹ he to tintọ́n sọn tọ̀sisa lọ mẹ bọdo tintan lẹ go, yé gblekàn bo húgo bosọ nọte to apá na oyìnsi dojó lọ lẹ to Nile lọ tó. 4 Oyìnsi he gblekàn bo húgo lọ lẹ sọ jẹ oyìnsi ṣinawe he dojó bo yọnwhanpẹ lọ lẹ fọ̀ dù ji. Whenẹnu wẹ Falo fọ́n sọn amlọn mẹ.
5 E sọ gọ̀ amlọndọ bo kudlọ awetọ. To odlọ lọ mẹ, e mọ getin dopo he go okọ̀ jinukun tọn ṣinawe he whán bosọ yọ́npọ́n lẹ tin te.+ 6 E sọ mọ okọ̀ jinukun tọn tófo ṣinawe he jẹhọn whèzẹtẹn tọn ko hẹn hú lẹ to tintọ́n bọdo tintan lẹ go. 7 Podọ okọ̀ jinukun tọn tófo lọ lẹ jẹ okọ̀ jinukun tọn ṣinawe he whán bosọ yọ́npọ́n lọ lẹ ze mì ji. Whenẹnu wẹ Falo fọ́n sọn amlọn mẹ bo mọdọ odlọ de wẹ.
8 Ṣigba, to whenue ai họ́n, ayiha etọn ma jai. Enẹwutu, e dowẹn hlan yẹwhenọ nujlẹtọ Egipti tọn lẹpo po sunnu nuyọnẹntọ lẹpo po. Falo sọ dọ odlọ etọn lẹ na yé, ṣigba mẹdepope ma tin he sọgan detana odlọ lọ lẹ na Falo.
9 Whenẹnu, ahànjinọtọ-gán lọ dọna Falo dọmọ: “Yẹn jlo na yigbe ylando ṣie lẹ tọn to egbé. 10 Falo gblehomẹ do devi etọn lẹ go to ojlẹ de mẹ wayi. Enẹwutu, e ze mi do gànpamẹ to owhé ogán nuhọ́tọ lẹ tọn gbè, yèdọ yẹn po akladatọ-gán lọ po.+ 11 Whenẹnu, mí omẹ awe lẹ kudlọ to ozán dopolọ mẹ. Odlọ dopodopo mítọn lẹ tọn sọ tindo tadena etọn.+ 12 Dẹpẹ Heblu de he yin devizọnwatọ ogán nuhọ́tọ lẹ tọn lọ tọn+ sọ nọ nọ̀ finẹ hẹ mí to whenẹnu. Whenuena mí dọ odlọ mítọn lẹ na ẹn,+ ewọ dọ tadena odlọ dopodopo tọn na mí. 13 Nulẹ sọ jọ pẹpẹ dile ewọ ko dọna mí do. Yẹn yin gigọ̀ do otẹn ṣie mẹ, ṣigba omẹ diẹ yin zizepla do núgo.”+
14 Enẹwutu, Falo domẹhlan Josẹfu+ bọ yé plan ẹn wá sọn gànpamẹ*+ po awuyiya po. Josẹfu sọ whlẹ́ atán etọn* bo diọ awù etọn lẹ bosọ yì Falo dè. 15 Whenẹnu wẹ Falo dọna Josẹfu dọmọ: “Yẹn kudlọ, ṣigba mẹdepope ma tin he sọgan detana ẹn. Amọ́, yẹn sè dọ eyin yè dọ odlọ de na we, hiẹ sọgan dọ tadena etọn.”+ 16 Josẹfu sọ gblọnna Falo dọmọ: “Nugopipe lọ ma yin ṣie gba! Amọ́, Jiwheyẹwhe wẹ na dọho gando dagbemẹninọ Falo tọn go.”+
17 Falo sọ zindonukọn bo dọna Josẹfu dọmọ: “To odlọ ṣie mẹ, yẹn to ote to Tọ̀sisa Nile tọn tó. 18 To finẹ, yẹn sọ mọ oyìnsi ṣinawe he dojó bo yọnwhanpẹ to tintọ́n sọn Nile mẹ, yé sọ jẹ amà Nile tọn lẹ dù ji.+ 19 Yẹn sọ mọ oyìnsi ṣinawe devo lẹ to tintọ́njẹgbonu bọdo yé go, yé gblekàn bo ma yọ́npọ́n bosọ húgo. Yẹn ma ko mọ oyìnsi he ma yọ́npọ́n mọnkọtọn lẹ to aigba Egipti tọn blebu ji pọ́n. 20 Oyìnsi he húgo bo gblekàn lọ lẹ sọ jẹ oyìnsi he dojó ṣinawe tintan lọ lẹ fọ̀ dù ji. 21 Ṣigba, whenue yé tlẹ ko dù yé godo, mẹdepope ma sọgan mọ to yé go, na awusọhia yetọn ma diọ gbọnvona bẹjẹeji tọn wutu. Whenẹnu wẹ yẹn fọ́n sọn amlọn mẹ.
22 “Enẹgodo, to odlọ ṣie mẹ, yẹn mọ getin dopo he go okọ̀ jinukun tọn ṣinawe he whán bosọ yọ́npọ́n lẹ tin te.+ 23 Yẹn sọ mọ okọ̀ jinukun tọn tófo ṣinawe he jẹhọn whèzẹtẹn tọn ko hẹn hú lẹ to tintọ́n bọdo tintan lẹ go. 24 Podọ okọ̀ jinukun tọn tófo lọ lẹ sọ jẹ okọ̀ jinukun tọn ṣinawe he whán bosọ yọ́npọ́n lọ lẹ ze mì ji. Yẹn sọ dọna yẹwhenọ nujlẹtọ lẹ,+ ṣigba depope to yé mẹ ma penugo nado basi zẹẹmẹ etọn na mi.”+
25 Whenẹnu wẹ Josẹfu dọna Falo dọmọ: “Nudopolọ wẹ odlọ Falo tọn awe lẹ zẹẹmẹdo. Jiwheyẹwhe nugbo lọ ko do nuhe Ewọ jlo na wà hia Falo.+ 26 Oyìnsi dagbe ṣinawe lọ lẹ nọtena owhe ṣinawe. Mọdopolọ wẹ okọ̀ jinukun tọn dagbe ṣinawe lọ lẹ nọtena owhe ṣinawe do niyẹn. Nudopolọ wẹ odlọ awe lọ lẹ yin. 27 Oyìnsi ṣinawe he húgo bosọ gblekàn lọ lẹ, he tọ́njẹgbonu bọdo tintan lẹ go nọtena owhe ṣinawe, okọ̀ jinukun tọn tófo ṣinawe he jẹhọn whèzẹtẹn tọn ko hẹn hú lọ lẹ nasọ yin owhe ṣinawe huvẹ tọn lẹ. 28 Dile yẹn ko dọna Falo do: Jiwheyẹwhe nugbo lọ ko do nuhe E jlo na wà hia Falo.
29 “Owhe ṣinawe jibẹwawhé susugege tọn lẹ na tin to aigba Egipti tọn lẹpo ji. 30 Ṣigba, na nugbo tọn, owhe ṣinawe huvẹ tọn lẹ wẹ na bọdo ehelẹ go, podọ e họnwun dọ jibẹwawhé susugege he tin to aigba Egipti tọn ji lọ na yin winwọn, podọ huvẹ lọ na hẹnnugble gbọn aigba lọ pete ji.+ 31 Jibẹwawhé susugege he tin to aigba lọ ji wayi ma nasọ yin finflin ba, na huvẹ he bọdego na sinyẹn taun wutu. 32 Odlọ lọ yin didohia Falo whla awe, na Jiwheyẹwhe nugbo lọ ko hẹn whẹho lọ hẹnai mlẹnmlẹn wutu, podọ Jiwheyẹwhe nugbo lọ nasọ hẹn ẹn di to madẹnmẹ.
33 “Enẹwutu, Falo ni dín dawe wuntuntunnọ podọ nuyọnẹntọ de bo de e do aigba Egipti tọn ji. 34 Na Falo nisọ de nugopọntọ lẹ to aigba lọ ji, na ewọ nido nọ yí mado-atọ́n jibẹwawhé Egipti tọn to owhe ṣinawe sinsẹ́n susugege tọn lọ lẹ gblamẹ.+ 35 Podọ na yé nisọ nọ hlá núdùdù lẹpo dai to owhe dagbe he ja ehelẹ gblamẹ, yé nisọ bẹ jinukun lẹ pli to anademẹ Falo tọn glọ bo hlá yé dai do tòdaho lọ lẹ mẹ bosọ basi hihọ́na yé.+ 36 Núdùdù lọ wẹ na yin yiyizan to aigba lọ ji na owhe ṣinawe huvẹ tọn lẹ he na wá aigba Egipti tọn ji, na mẹhe tin to aigba lọ ji lẹ nikaa dọ̀n gbọn huvẹ lọ dali.”+
37 Ayinamẹ lọ sọ yọ́n to Falo po devizọnwatọ etọn lẹpo po nukunmẹ. 38 Enẹwutu, Falo dọna devizọnwatọ etọn lẹ dọmọ: “Be mẹdevo de he ji gbigbọ Jiwheyẹwhe tọn tin te taidi omẹ ehe nkọ sọ sọgan yin mimọ ya?” 39 Falo sọ dọna Josẹfu dọmọ: “To whenuena e yindọ Jiwheyẹwhe ko hẹn onú ehe lẹpo zun yinyọnẹn na we, mẹdevo de ma tin he yin wuntuntunnọ podọ nuyọnẹntọ sọ hiẹ gba. 40 Hiẹ na nọ deanana whédo ṣie, podọ omẹ ṣie lẹpo na nọ setonuna we mlẹnmlẹn.+ Yẹn mẹhe yin ahọlu lọ kẹdẹ wẹ na* hugan we.” 41 Falo sọ yidogọna Josẹfu dọmọ: “Pọ́n, yẹn de we taidi ogán do aigba Egipti tọn lẹpo ji.”+ 42 Whenẹnu, Falo de alọkẹ hiadonugo tọn etọn sọn alọ bo zedo alọ na Josẹfu podọ e do alavọ dagbedagbe de na ẹn bosọ ze kọnú sika tọn de do okọ̀ na ẹn. 43 Humọ, e degbe dọ ewọ ni hẹ osọ́-kẹkẹ ahọlu tọn awetọ ji, bọ gbẹtọ lẹ na to nukọnna ẹn bo to awhádo dọ “Avlekh!”* Gbọnmọ dali, e de e taidi ogán do aigba Egipti tọn lẹpo ji.
44 Falo sọ dọna Josẹfu dọmọ: “Yẹn wẹ Falo, ṣigba eyin hiẹ ma nagbè, mẹdepope ma sọgan wà nudepope* to aigba Egipti tọn blebu ji.”+ 45 Enẹgodo, Falo do oyín lọ Zafenati-panea* na Josẹfu bo yí Asẹnati+ viyọnnu Pọtifela yẹwhenọ Oni* tọn na ẹn taidi asi. Josẹfu sọ jẹ anadena* aigba Egipti tọn ji.+ 46 Owhe 30 wẹ Josẹfu tindo+ to whenue e yì* Falo ahọlu Egipti tọn dè.
Josẹfu sọ tọ́n sọn Falo nukọn bo dlú gbọn aigba Egipti tọn lẹpo ji. 47 Podọ to owhe ṣinawe jibẹwawhé susugege tọn lọ lẹ gblamẹ, aigba lọ de sinsẹ́n susu tọ́n. 48 E sọ to núdùdù lẹpo bẹpli to aigba Egipti tọn ji na owhe ṣinawe bo nọ hlá yé dai to tòdaho lọ lẹ mẹ. To tòdaho dopodopo mẹ, e nọ bẹ núdùdù lẹ pli sọn ogle he lẹdo tòdaho lọ lẹ mẹ. 49 Josẹfu sọ to jinukun susugege bẹpli taidi tọkẹ́n ohù tọn lẹ jẹ obá he mẹ yé ma sọgan sọ yí sọha na yé ba, na yé ko sù taun wutu.
50 Jẹnukọnna owhe huvẹ tọn lọ lẹ, visunnu awe wẹ Asẹnati viyọnnu Pọtifela yẹwhenọ Oni* tọn ji na Josẹfu.+ 51 Josẹfu sọ ylọ oyín plọnji lọ tọn dọ Manasse,*+ na e dọ dọ, “Jiwheyẹwhe ko hẹn mi wọn tukla ṣie lẹpo po owhé otọ́ ṣie tọn lẹpo po.” 52 Podọ e ylọ oyín awetọ tọn dọ Eflaimi,*+ na e dọ dọ, “Jiwheyẹwhe ko hẹn mi yin sinsẹ́nnọ to aigba nukunbibia ṣie tọn ji.”+
53 Enẹgodo, owhe ṣinawe jibẹwawhé susugege tọn to aigba Egipti tọn ji lọ lẹ wá vivọnu,+ 54 bọ owhe ṣinawe huvẹ tọn lẹ bẹjẹeji, kẹdẹdile Josẹfu ko dọ do.+ Huvẹ lọ sọ gbayipe gbọn aigba lẹpo ji, ṣigba núdùdù tin to aigba Egipti tọn blebu ji.+ 55 Whenẹnu, huvẹ sọ jẹ mẹhe tin to aigba Egipti tọn ji lẹpo hù ji bọ yé jẹ awhádo hlan Falo ji.+ Falo sọ dọna Egiptinu lẹpo dọmọ: “Mì yì Josẹfu dè, bo wà nudepope he ewọ na dọna mì.”+ 56 Huvẹ lọ sọ zindonukọn to aigba lẹpo ji.+ Whenẹnu wẹ Josẹfu jẹ agbànhọ he tin to finẹ lẹpo hùn ji bo jẹ núdùdù sà na Egiptinu lẹ ji,+ na huvẹ lọ sinyẹn taun to aigba Egipti tọn ji wutu. 57 Humọ, mẹhe tin to aigba ji lẹpo wẹ nọ wá Egipti nado wá họ̀nú to Josẹfu si, na huvẹ lọ sinyẹn taun to aigba lẹpo ji wutu.+
42 Whenue Jakọbu sè dọ núdùdù tin to Egipti,+ e dọna visunnu etọn lẹ dọmọ: “Naegbọn mì do to mìdelẹ pọ́n poun?” 2 E sọ yidogọ dọmọ: “Yẹn ko sè dọ núdùdù tin to Egipti. Mì jẹte yì họ̀ wá, na mí nido nọgbẹ̀ bo ma na kú huvẹ.”+ 3 Enẹwutu, ao to nọvisunnu Josẹfu tọn lẹ+ mẹ jẹte yì Egipti nado yì họ̀ núdùdù. 4 Ṣigba, Jakọbu ma dike Bẹnjamini+ nọvisunnu Josẹfu tọn ni yì hẹ nọvisunnu etọn he pò lẹ, na e dọmọ: “Vlavo owùnu ylankan de sọgan jọ do e go.”+
5 Enẹwutu, visunnu Islaeli tọn lẹ gọna mẹdevo lẹ wá Egipti nado họ̀nú, na huvẹ ko gbayipe gbọn aigba Kenani tọn blebu ji wutu.+ 6 Josẹfu wẹ to anadenanu to aigba lọ ji,+ podọ ewọ wẹ nọ sà núdùdù na mẹhe wá sọn adà aigba tọn lẹpo ji.+ Nọvisunnu Josẹfu tọn lẹ sọ wá bo ṣinyọ́n nukunmẹ ai to nukọn etọn.+ 7 Whenuena Josẹfu mọ nọvisunnu etọn lẹ, e yọ́n yé to afọdopolọji, ṣigba e ma do ede hia yé.+ E sọ dọhona yé po ogbè sinsinyẹn po dọmọ: “Fie wẹ mì wá sọn?” yé sọ gblọn dọmọ: “Sọn aigba Kenani tọn ji nado wá họ̀ núdùdù.”+
8 Josẹfu sọ yọ́n nọvisunnu etọn lẹ, ṣigba yewlẹ ma yọ́n ẹn. 9 To afọdopolọji, Josẹfu flin odlọ he ewọ ko kú gando yé go lẹ,+ bo dọna yé dọmọ: “Amẹ́ wẹ mìwlẹ! Mì wá nado bẹ̀ fie ma tindo hihọ́* to aigba lọ ji lẹ pọ́n wẹ!” 10 Whenẹnu, yé gblọn dọmọ: “Lala, oklunọ ṣie, ṣigba devizọnwatọ towe lẹ wá nado họ̀ núdùdù wẹ. 11 Visunnu otọ́ dopolọ tọn wẹ mímẹpo yin. Nugbonọ wẹ míwlẹ. Devizọnwatọ towe lẹ ma yin amẹ́ lẹ gba.” 12 Ṣigba, e dọna yé dọmọ: “Paali! Mì wá nado bẹ̀ fie ma tindo hihọ́ to aigba lọ ji lẹ pọ́n wẹ!” 13 Whenẹnu wẹ yé dọmọ: “Nọvisunnu 12 wẹ devizọnwatọ towe lẹ.+ Mímẹpo wẹ yin visunnu otọ́ dopolọ tọn+ to aigba Kenani tọn ji, podọ nọvisunnu mítọn pẹvi pete lọ to otọ́ mítọn dè to alọnu din,+ ṣigba mẹdopo he pò masọ tin ba.”+
14 Josẹfu sọ dọna yé dọmọ: “Kẹdẹdile yẹn ko dọna mì do—‘Amẹ́ wẹ mìwlẹ!’ 15 Todin, yẹn na tẹ́n mì pọ́n nado yọnẹn eyin nugbo dọ wẹ mì te: Na nugbo tọn, dile e na dẹnsọ bọ Falo togbẹ̀, mìwlẹ ma na sẹtẹn sọn fi kakajẹ whenue nọvisunnu mìtọn pẹvi pete lọ na wá.+ 16 Mì do dopo to mì mẹ hlan na ewọ ni yì hẹn nọvisunnu mìtọn lọ wá to whenue mìwlẹ na tin to gànmẹ. Gbọn ehe dali, yẹn na yọnẹn eyin nugbo dọ wẹ mì te. Ṣigba, eyin e ma yinmọ, na nugbo tọn dile e na dẹnsọ bọ Falo togbẹ̀, amẹ́ wẹ mìwlẹ.” 17 Enẹwutu, e bẹ yemẹpo do gànmẹ na azán atọ̀n.
18 Josẹfu sọ dọna yé to azán atọ̀ntọ gbè dọmọ: “Mì wà ehe bo nọgbẹ̀, na yẹn nọ dibusi Jiwheyẹwhe. 19 Eyin nugbo dọ wẹ mì te, mì dike dopo to mì mẹ ni gbọṣi gànmẹ, ṣigba mì mẹhe pò lẹ sọgan hẹn núdùdù yì, na huvẹ he to whédo mìtọn lẹ mẹ nido depò.+ 20 Enẹgodo, mìwlẹ ni hẹn nọvisunnu mìtọn pẹvi pete lọ wá na mi, na yẹn nido mọdọ nugbo dọ wẹ mì te bọ mì ma na kú.” Yé sọ wàmọ.
21 Yé sọ dọna ode awetọ dọmọ: “E họnwun dọ nọvisunnu mítọn wutu wẹ mí to yaji,+ na míwlẹ mọ awufiẹsa etọn* to whenue ewọ vẹ̀ mí nado do awuvẹmẹ hia, ṣigba mí ma dotoai. Enẹwutu wẹ mí do to oyà ehe ji.” 22 Whenẹnu, Leubẹni dọna yé dọmọ: “Be yẹn ma ko dọna mì dọ, ‘Mì wà danú do ovi lọ go blo,’ bọ mìwlẹ ma dotoai ya?+ E họnwun dọ ohùn etọn wẹ to ahọ́ biọ mí todin.”+ 23 Ṣigba, yé ma yọnẹn dọ Josẹfu mọnukunnujẹ nuhe dọ yé te mẹ, na gbesetọ de yizan wẹ Josẹfu te wutu. 24 E sọ tọ́n sọn nukọn yetọn bo jẹ avivi ji.+ To whenuena e lẹkọwa bo dọho hẹ yé whladopo dogọ, e de Simeoni+ sọn yé mẹ bosọ blá ẹ to nukun yetọn mẹ.+ 25 Enẹgodo, Josẹfu degbe dọ jinukun ni yin dido gọ́ saki* yetọn lẹ mẹ podọ dọ akuẹ dopodopo yetọn tọn ni yin gigọ̀ do saki yetọn mẹ bọ nuhe yé na dù to gbejizọnlin lọ whenu lẹ ni yin nina yé. Yé sọ wàmọ na yé.
26 Enẹwutu, yé do jinukun-gbàn yetọn lẹ do kẹtẹkẹtẹ yetọn lẹ ji bo dedo. 27 To whenue dopo to yé mẹ hùn saki etọn nado na núdùdù kẹtẹkẹtẹ etọn to gbọjẹtẹn de, e mọ akuẹ etọn to saki mẹ. 28 E sọ dọna nọvisunnu etọn lẹ dọmọ: “Akuẹ ṣie yin gigọjo na mi podọ e die to saki ṣie mẹ!” Ahun yetọn sọ gbàdo bọ yé jẹ sisọsisọ ji, bo lẹ́ pannukọn ode awetọ bosọ dọmọ: “Etẹ die he Jiwheyẹwhe wà do mí?”
29 To whenue yé wá Jakọbu otọ́ yetọn dè to aigba Kenani tọn ji, yé dọ nuhe ko jọ do yé go lẹpo na ẹn dọmọ: 30 “Dawe he yin ogán to otò lọ mẹ vannukundo mí+ bo sawhẹdokọna mí dọ mí wá bẹ̀ otò lọ pọ́n wẹ. 31 Ṣigba, mí dọna ẹn dọ, ‘Nugbonọ wẹ míwlẹ. Podọ mí ma yin amẹ́ lẹ gba.+ 32 Nọvisunnu 12 wẹ mí,+ yèdọ visunnu otọ́ dopolọ tọn lẹ. Dopo to mí mẹ masọ tin ba,+ podọ omẹ pẹvi pete lọ tin to otọ́ mítọn dè to aigba Kenani tọn ji to alọnu din.’+ 33 Ṣigba, dawe he yin ogán to otò lọ mẹ dọna mí dọ, ‘Gbọn ehe dali wẹ yẹn na yọnẹn dọ nugbonọ wẹ mìwlẹ: Mì jo dopo to mì mẹ do dè e.+ Whenẹnu, mìwlẹ sọgan hẹn nude yì, na huvẹ he to whédo mìtọn lẹ mẹ nido depò.+ 34 Mì sọ hẹn nọvisunnu mìtọn pẹvi pete lọ wá, na yẹn nido yọnẹn dọ mì ma yin amẹ́ lẹ, ṣigba dọ nugbonọ wẹ mì. Yẹn nasọ gọ̀ nọvisunnu mìtọn jo na mì, bọ mìwlẹ sọgan wàjọ to aigba lọ ji.’”
35 Whenue yé to nuhe to saki yetọn mẹ lẹ kọ̀n, yé mọ akuẹ mẹdopodopo tọn to saki etọn mẹ. Whenue visunnu lọ lẹ po otọ́ yetọn po mọ akuẹ lọ lẹ, obu jẹ yé ji. 36 Jakọbu otọ́ yetọn sọ dọna yé dọmọ: “Mì ko hẹn mi biọ aluẹmẹ!+ Josẹfu masọ tin ba,+ Simeoni lọsu masọ tin ba,+ mì sọ jlo na yí Bẹnjamini! Naegbọn onú ehe lẹpo nado jọ do go e?” 37 Ṣigba, Leubẹni dọna otọ́ etọn dọmọ: “Hiẹ sọgan hù visunnu ṣie awe lẹ eyin yẹn ma hẹn Bẹnjamini gọwá na we.+ Ze e do alọmẹ na mi, yẹn nasọ hẹn ẹn gọwá na we.”+ 38 Ṣigba, e dọmọ: “Visunnu ṣie ma na jẹte yì hẹ mì, na nọvisunnu etọn ko kú bọ ewọ ṣo wẹ pò.+ Eyin owùnu ylankan de jọ do e go to gbejizọnlin he mì na basi lọ whenu, e họnwun dọ mì na hẹn mi nado hẹn owhà ṣie lẹ yì Yọdò*+ mẹ to aluẹmẹ.”+
43 Huvẹ sọ sinyẹn taun to aigba lọ ji.+ 2 Enẹwutu, to whenue yé ko dù nuhe yé hẹnwa sọn Egipti lọ vọ̀,+ otọ́ yetọn dọna yé dọmọ: “Mì lẹkọyi bo yì họ̀ núdùdù vude wá na mí.” 3 Juda sọ dọna ẹn dọmọ: “Dawe lọ na mí avase to aliho he họnwun mẹ dọmọ, ‘Mì ma hà bo mọ nukunmẹ ṣie ba adavo nọvisunnu mìtọn zọnhẹ mì.’+ 4 Eyin hiẹ dike bọ nọvisunnu mítọn zọnhẹ mí, mí na yì bo yì họ̀ núdùdù wá. 5 Ṣigba, eyin hiẹ ma dike bọ e zọnhẹ mí, míwlẹ ma na yì, na dawe lọ dọna mí dọ, ‘Mì ma hà bo mọ nukunmẹ ṣie ba adavo nọvisunnu mìtọn zọnhẹ mì.’”+ 6 Islaeli+ sọ dọmọ: “Naegbọn mìwlẹ do hẹn tukla ehe wá ji e gbọn didọna dawe lọ dọ mì tindo nọvisunnu devo dali?” 7 Yé sọ gblọn dọmọ: “Dawe lọ kanse mí tlọlọ gando míwlẹ po hẹnnumẹ mítọn lẹ po go dọmọ, ‘Be otọ́ mìtọn gbẹ́ pò togbẹ̀ ya? Be mì tindo nọvisunnu devo ya?’ enẹ wẹ zọ́n bọ míwlẹ do dọ onú ehelẹ na ẹn.+ Nawẹ míwlẹ na wagbọn do yọnẹn dọ ewọ na dọ dọ, ‘Mì plan nọvisunnu mìtọn wá’?”+
8 Whenẹnu, Juda vẹ̀ Islaeli otọ́ etọn dọmọ: “Jo visunnu lọ do alọ ṣie mẹ,+ bo gbọ mí ni yì, na mí nikaa kú huvẹ+—míwlẹ, hiẹ gọna ovi mítọn lẹ.+ 9 Yẹn whlé nado basi hihọ́na ẹn.*+ Hiẹ sọgan kàn ẹn biọ to asi e. Eyin yẹn gboawupo nado hẹn ẹn wá bo gọ̀ ẹ jo na we, be yẹn ko hùwhẹ do we kakadoi. 10 Ṣigba, eyin mí ma ko dọngbàn wẹ, mí na ko yì dọ́n bo ko sọ lẹkọwa whla awe.”
11 Enẹwutu, Islaeli otọ́ yetọn dọna yé dọmọ: “Eyin mọ wẹ, mì bo basi dole: Mì yí nudagbe hugan aigba lọ tọn lẹ do saki* mìtọn lẹ mẹ bo hẹn yé yì na dawe lọ taidi nunina de:+ balsami*+ vude, owín vude, gọmu owán gblingblinnọ, atin-gotò gọmunọ,+ sinsẹ́n pistaṣi tọn po sinsẹ́n almọndi tọn po. 12 Mì sọ yí donu awe akuẹ he mì dona hẹn tọn; mì sọ gọ̀ akuẹ he yin zizedo saki mìtọn lẹ mẹ lọ lẹ yì jo.+ E sọgan ko yindọ nuṣiwa de wẹ. 13 Mì plan nọvisunnu mìtọn bo lẹkọyi dawe lọ dè. 14 Na Jiwheyẹwhe Ganhunupotọ ni wàlẹblanuna mì to dawe lọ dè, na ewọ nido jo nọvisunnu mìtọn diẹ po Bẹnjamini po na mì. Amọ́, eyin n’dona hẹn ovi ṣie lẹ bu janwẹ, ni gbọ bo yinmọ!”+
15 Whenẹnu, dawe lọ lẹ yí nunina lọ bosọ yí donu awe akuẹ he yé dona hẹn tọn gọna Bẹnjamini. Yé sọ wleali dedo Egipti bo yì Josẹfu dè whladopo dogọ.+ 16 Whenue Josẹfu mọ Bẹnjamini po yé po, e dọna dawe he to nukunpedo whédo etọn go to afọdopolọji dọmọ: “Plan dawe lọ lẹ yì whégbè bo hù kanlin bosọ wleawuna núdùdù, na dawe lọ lẹ na dù núdùdù whèmẹ tọn hẹ mi.” 17 To afọdopolọji, dawe lọ basi pẹpẹ dile Josẹfu ko dọ do+ bo plan yé yì owhé Josẹfu tọn gbè. 18 Ṣigba, yé jẹ budi ji to whenue yé yin pinplan yì owhé Josẹfu tọn gbè, bosọ jẹ didọ ji dọmọ: “Akuẹ he yin gigọ̀ do saki mítọn lẹ mẹ wayi lọ wutu wẹ mí do yin hinhẹnwa fi. Todin, yé na wle mí bo hẹn mí zun afanumẹ lẹ bosọ yí kẹtẹkẹtẹ mítọn lẹ!”+
19 Enẹwutu, yé dọnsẹpọ dawe lọ he to nukunpedo whédo Josẹfu tọn go bo dọhona ẹn to họntonu owhé lọ tọn. 20 Yé sọ dọmọ: “Jaale, oklunọ ṣie! Mí wá họ̀ núdùdù to ojlẹ de mẹ wayi.+ 21 Ṣigba, whenue mí jẹ gbọjẹtẹn mítọn bo jẹ saki mítọn lẹ hùn ji, pọ́n, mí mọ akuẹ mítọn lẹ to saki mítọn lẹ mẹ bọ e sọ yin akuẹ lọ pipé.+ Enẹwutu wẹ mí jlo na yí alọ mítọn titi do gọ̀ ẹ jo na we. 22 Mí ko sọ hẹn akuẹ wá dogọ nado họ̀ núdùdù. Míwlẹ ma yọ́n mẹhe ze akuẹ mítọn do saki mítọn lẹ mẹ.”+ 23 E sọ gblọn dọmọ: “Mì vò. Mì dibu blo. Yẹn yọnẹn dọ mì ko sú akuẹ mìtọn to tintan whenu. Amọ́, Jiwheyẹwhe mìtọn podọ Jiwheyẹwhe otọ́ mìtọn tọn wẹ yí akuẹ lọ lẹ do saki mìtọn lẹ mẹ.” Enẹgodo, e de Simeoni tọ́n na yé.+
24 Dawe lọ sọ plan yé biọ owhé Josẹfu tọn gbè bo na yé osin nado klọ́ afọ bosọ wleawu núdùdù tọn na kẹtẹkẹtẹ yetọn lẹ. 25 Yé sọ wleawu nunina+ lọ tọn dai whẹpo Josẹfu nado wá to whèmẹ, na yé ko sè dọ yé na dù núdùdù whèmẹ tọn to finẹ+ wutu. 26 Whenue Josẹfu biọ whégbè, yé ze nunina yetọn wá na ẹn bo ṣinyọ́n nukunmẹ ai to nukọn etọn.+ 27 Enẹgodo, e kanhose gando dagbemẹninọ yetọn go, bosọ dọmọ: “Nawẹ otọ́ mìtọn yọnhonọ lọ he mì dọho etọn na mi te do? Be e gbẹ́ pò togbẹ̀ ya?”+ 28 Yé sọ gblọn dọmọ: “Devizọnwatọ towe, otọ́ mítọn to ganji. E gbẹ́ pò togbẹ̀.” Yé sọ vọ́ dẹ́ do odò na ẹn.+
29 Whenuena e ze nukun etọn lẹ daga bo mọ Bẹnjamini nọvisunnu etọn, yèdọ visunnu onọ̀ etọn tọn,+ e dọmọ: “Nọvisunnu mìtọn pẹvi pete he mì dọho etọn na mi lọ die ya?”+ E sọ yidogọ dọmọ: “Na Jiwheyẹwhe ni do nukundagbe hia we, visunnu ṣie.” 30 Na onú nọvisunnu etọn tọn biọlanmẹna ẹn taun wutu, Josẹfu yawu tọ́nyi nado dín fihe e na viavi te. Enẹwutu, e yì abò nuglọ tọn de mẹ bo yì viavi.+ 31 Enẹgodo, e fún nukunmẹ etọn bo tọ́n, todin he e ko dava ede, e dọmọ: “Mì má núdùdù.” 32 Yé sọ na ẹn núdùdù etọn dovo, bosọ na dawe lọ lẹ tọn yé dovo, bọ Egiptinu he tin po e po lẹ sọ dùnú dovo, na Egiptinu lẹ ma nọ dùnú hẹ Heblu lẹ, na osùnú de wẹ enẹ yin na Egiptinu lẹ wutu.+
33 Nọvisunnu etọn lẹ* sọ sinai to nukọn etọn, bẹsọn plọnji lọ ji sọgbe hẹ jlọjẹ etọn taidi viplọnji+ kakajẹ omẹ pẹvi pete lọ ji, yé sọ to yedelẹ pọ́n po nupaṣamẹ po. 34 Josẹfu sọ to núdùdù dohlan sọn tafo etọn ji yì yetọn ji, ṣigba Bẹnjamini tọn nọ hú mẹhe pò lẹpo tọn whla atọ́n.+ Yé sọ to dùdù bo to nùnù hẹ ẹ kaka bo gọ́ho.
44 Enẹgodo, e degbena dawe he to nukunpedo whédo etọn go dọmọ: “Do núdùdù do saki dawe lọ lẹ tọn mẹ jẹ obá he mẹ yé sọgan hẹn jẹ, bo ze akuẹ yetọn lẹ do saki yetọn lẹ mẹ.+ 2 Ṣigba, hiẹ na yí kọfo fataka tọn ṣie do saki omẹ pẹvi pete lọ tọn mẹ po akuẹ he e yí do họ̀ jinukun po.” E sọ wà dile Josẹfu ko dọ do.
3 To afọnnu, whenue ai ko họ́n, dawe lọ lẹ dedo po kẹtẹkẹtẹ yetọn lẹ po. 4 Yé ma ko yì fidindẹn do tòdaho lọ, bọ Josẹfu dọna dawe he to nukunpedo whédo etọn go lọ dọmọ: “Fọ́n! Dómọna dawe lọ lẹ! Eyin a plá yé, dọna yé dọ, ‘Naegbọn mìwlẹ do yí oylan do sú dagbe họ́? 5 Be e ma yin kọfo ehe mẹ wẹ ogán ṣie nọ nù sọn bosọ nọ yí do dọ dọṣẹ he ma nọ gblá ya? Nuhe mì wà ylan taun.’”
6 E sọ plá yé bo dọ ohó enẹlẹ na yé. 7 Ṣigba, yé dọna ẹn dọmọ: “Naegbọn oklunọ ṣie do dọ onú mọnkọtọn? E họnwun dọ devizọnwatọ towe lẹ ma sọgan wà onú mọnkọtọn gbede. 8 Pọ́n, sọn aigba Kenani tọn ji gbọ́n wẹ mí mọ akuẹ to saki mítọn lẹ mẹ te bosọ gọ̀ ẹ wá jo na we.+ Nawẹ míwlẹ na wá fìn fataka kavi sika sọn owhé ogán towe tọn gbè gbọn? 9 Eyin e yin mimọ to onú dopo to afanumẹ towe lẹ tọn mẹ, gbọ e ni kú, bọ mí mẹhe pò lẹ nasọ lẹzun afanumẹ ogán towe tọn.” 10 E sọ gblọn dọmọ: “Mì gbọ e ni yin dile mì dọ do: Mẹhe si e yin mimọ te na lẹzun afanumẹ ṣie, bọ homẹvọnọ-yinyin mì mẹhe pò lẹ tọn na họnwun.” 11 Enẹwutu, dopodopo yetọn yawu de saki etọn jẹte bo hùn in. 12 Dawe lọ sọ yí sọwhiwhe do keje onú yetọn lẹ mẹ pọ́n bẹsọn mẹdaho lọ ji jẹ omẹ pẹvi pete lọ ji. To godo mẹ, kọfo lọ wá yin mimọ to saki Bẹnjamini tọn mẹ.+
13 Yé sọ tlẹ́n awù yetọn lẹ bọ dopodopo yetọn sọ gọ̀ agbàn yetọn lẹ do kẹtẹkẹtẹ yetọn lẹ ji bo lẹkọyi tòdaho lọ mẹ. 14 Whenue Juda+ po nọvisunnu etọn lẹ po yì owhé Josẹfu tọn gbè, ewọ gbẹ́ pò to finẹ; yé sọ ṣinyọ́n nukunmẹ ai to nukọnna ẹn.+ 15 Josẹfu sọ dọna yé dọmọ: “Etẹwẹ yin ehe bọ mì wà? Be mìwlẹ ma yọnẹn dọ gbẹtọ taidi yẹn nkọ sọgan dọ dọṣẹ he ma nọ gblá wẹ ya?”+ 16 Juda sọ gblọn dọmọ: “Etẹwẹ míwlẹ sọ sọgan dọna ogán ṣie? Etẹwẹ mí na dọ din? Podọ nawẹ mí sọgan lẹ̀ mídelẹ wé gbọn? Jiwheyẹwhe nugbo lọ ko de nuṣiwa afanumẹ towe lẹ tọn gbà.+ Todin mí ko lẹzun afanumẹ ogán ṣie tọn, yèdọ míwlẹ po alọ mẹhe tọn mẹ kọfo lọ yin mimọ te po!” 17 Ṣigba, e gblọn dọmọ: “E ma sọgan wá linlẹn ṣie mẹ gbede nado wàmọ! Alọ mẹhe tọn mẹ kọfo lọ yin mimọ te wẹ na lẹzun afanumẹ ṣie.+ Na nuhe dù mì mẹhe pò lẹ, mì yì otọ́ mìtọn dè to jijọho mẹ.”
18 Todin, Juda dọnsẹpọ ẹ bo dọmọ: “Ogán ṣie, yẹn vẹ̀ we, jaale gbọ na afanumẹ towe ni dọ ohó dopo do otó towe mẹ, podọ a gblehomẹ do afanumẹ towe go blo, na hiẹ tin taidi Falo.+ 19 Ogán ṣie kanse afanumẹ etọn lẹ dọ, ‘Be mì tindo otọ́ kavi nọvisunnu de ya?’ 20 Mí sọ gblọnna ogán ṣie dọ, ‘Mí tindo otọ́ yọnhonọ de po ovi yọnhowhe mẹ tọn etọn de po, yèdọ omẹ pẹvi pete lọ.+ Ṣigba, mẹdaho etọn ko kú+ bọ ewọ ṣokẹdẹ wẹ yin visunnu onọ̀ etọn tọn he pò,+ otọ́ etọn sọ yiwanna ẹn.’ 21 Hiẹ sọ dọna afanumẹ towe lẹ dọ, ‘Mì plan ẹn wá na mi, na yẹn nido sọgan mọ ẹn.’+ 22 Ṣigba, mí dọna ogán ṣie dọ, ‘Visunnu lọ ma sọgan jo otọ́ etọn do. Eyin ewọ jo otọ́ etọn do, e họnwun dọ otọ́ lọ na kú.’+ 23 Hiẹ sọ dọna afanumẹ towe lẹ dọ, ‘Mìwlẹ ma sọgan mọ nukunmẹ ṣie ba adavo nọvisunnu pẹvi pete mìtọn zọnhẹ mì.’+
24 “Enẹwutu, mí hẹji yì afanumẹ towe, yèdọ otọ́ ṣie dè bo dọ nuhe ogán ṣie dọ lẹ na ẹn. 25 Enẹgodo, otọ́ mítọn dọmọ, ‘Mì lẹkọyi họ̀ núdùdù vude wá na mí.’+ 26 Ṣigba, mí dọ, ‘Mí ma sọgan yì. Eyin nọvisunnu pẹvi pete mítọn zọnhẹ mí, mí na yì, na mí ma sọgan mọ nukunmẹ dawe lọ tọn ba, adavo nọvisunnu pẹvi pete mítọn zọnhẹ mí.’+ 27 Whenẹnu wẹ afanumẹ towe otọ́ ṣie dọna mí dọ, ‘Mì yọnẹn ganji dọ visunnu awe poun wẹ asi ṣie ji na mi.+ 28 Ṣigba, dopo to yé mẹ sọ jo mi do bọ yẹn dọmọ: “E họnwun dọ e dona ko yin tintlẹ́n do flinflin!”+ bọ yẹn ma ko mọ ẹn kakajẹ din. 29 Eyin mì sọ plan omẹ ehe lọsu sọn dè e bọ owùnu ylankan de wá jọ do e go, e họnwun dọ mì na hẹn mi nado hẹn owhà ṣie lẹ yì Yọdò*+ mẹ to awufiẹsa mẹ.’+
30 “Todin, eyin yẹn na lẹkọyi afanumẹ towe otọ́ ṣie dè matin visunnu lọ, dile e yindọ ewọ yiwanna ẹn taidi alindọn etọn titi, 31 tlolo he e na mọdọ visunnu lọ ma lẹkọwa, e na kú, podọ e họnwun dọ afanumẹ towe lẹ na zọ́n bọ afanumẹ towe otọ́ mítọn na hẹn owhà etọn lẹ yì Yọdò* mẹ to aluẹmẹ. 32 Afanumẹ towe ko whlé na otọ́ ṣie nado basi hihọ́na visunnu lọ, bo dọmọ, ‘Eyin yẹn gboawupo nado hẹn ẹn lẹkọwa na we, be yẹn ko hùwhẹ do otọ́ ṣie kakadoi.’+ 33 Enẹwutu, jaale gbọ afanumẹ towe ni nọ otẹn visunnu lọ tọn mẹ taidi afanumẹ ogán ṣie tọn, na visunnu lọ nido lẹkọyi po nọvisunnu etọn lẹ po. 34 Nawẹ yẹn sọgan lẹkọyi otọ́ ṣie dè matin visunnu lọ do? Yẹn ma sọgan to mimọ bọ nugbajẹmẹji ehe na wá otọ́ ṣie ji!”
45 Todin, Josẹfu masọ sọgan dava ede to devizọnwatọ etọn lẹ nukọn ba.+ Enẹwutu, e dawhá dọmọ: “Mẹlẹpo ni tọ́n sọn dè e!” Mẹdevo depope masọ tin to finẹ to whenue Josẹfu do ede hia nọvisunnu etọn lẹ.+
2 E sọ ze ogbè etọn daga bo viavi, sọmọ bọ Egiptinu lẹ po mẹhe to owhé Falo tọn gbè lẹ po sè avigbè etọn. 3 Enẹgodo, Josẹfu dọna nọvisunnu etọn lẹ dọmọ: “Yẹn Josẹfu wẹ. Be otọ́ ṣie gbẹ́ pò togbẹ̀ ya?” Ṣigba, nọvisunnu etọn lẹ ma penugo nado gblọnho depope na ẹn, na yé biọ bẹwlu mẹ na ewọ tọn wutu. 4 Whenẹnu wẹ Josẹfu dọna nọvisunnu etọn lẹ dọmọ: “Mì jaale bo dọnsẹpọ mi.” Yé sọ dọnsẹpọ ẹ.
E sọ dọmọ: “Yẹn Josẹfu nọvisunnu mìtọn he mì sà do Egipti wẹ.+ 5 Ṣigba, mì jẹflumẹ blo, mì sọ gblewhẹdo ode awetọ mìtọn na mì sà mi dofi wutu blo; na ogbẹ̀ lẹ whinwhlẹngán wutu wẹ Jiwheyẹwhe do dó mi hlan jẹnukọnna mì.+ 6 Owhe awetọ huvẹ tọn die to aigba lọ ji,+ podọ owhe atọ́n devo lẹ gbẹ́ pò ja, ehe whenu glepipọ kavi jibẹwawhé ma na tin. 7 Ṣigba, Jiwheyẹwhe wẹ do mi hlan fi jẹnukọnna mì, na pipotọ+ de nido yin jijodai na mì to aigba ji* podọ nado pò mì dogbẹ̀ to aliho jiawu de mẹ. 8 Enẹwutu, e ma yin mìwlẹ wẹ do mi hlan fi gba, ṣigba Jiwheyẹwhe nugbo lọ wẹ, na ewọ nido yí mi do basi ayinamẹtọ-gán* de na Falo podọ oklunọ de do whédo etọn lẹpo ji podọ ogán de do aigba Egipti tọn blebu ji.+
9 “Mì yawu lẹkọyi otọ́ ṣie dè, bo dọna ẹn dọ, ‘Nuhe visunnu towe Josẹfu dọ die: “Jiwheyẹwhe ko yí mi do basi ogán do aigba Egipti tọn blebu ji.+ Wá dè e. A dọngbàn blo.+ 10 Hiẹ nasọ nọ nọ̀ aigba Goṣẹni+ tọn ji, fie hiẹ ma na dẹn do mi te—yèdọ hiẹ, visunnu towe lẹ, ovivi towe lẹ, kanlinpa towe lẹ po nuhe hiẹ tindo lẹpo po. 11 Yẹn nasọ nọ na núdùdù we to finẹ, na owhe atọ́n huvẹ tọn lẹ gbẹ́ pò to nukọn ja.+ E ma yinmọ, hiẹ po whédo towe po na jẹhẹ́n bọ nuhe hiẹ tindo lẹpo nasọ sudo.”’ 12 Mìwlẹ po nọvisunnu ṣie Bẹnjamini po sọgan mọ po nukun mìtọn lẹ po todin dọ yẹnlọsu wẹ to hodọ hẹ mì.+ 13 Enẹwutu, mì dọ gigo he yẹn tindo to aigba Egipti tọn ji lẹpo na otọ́ ṣie gọna nuhe mì ko mọ lẹpo. Todin, mì yawu yì plan otọ́ ṣie jẹte wáfi.”
14 E sọ gbò* Bẹnjamini nọvisunnu etọn fán bo viavi, bọ Bẹnjamini plá alọ okọ̀ na ẹn bo viavi.+ 15 E sọ donùnùgo na nọvisunnu etọn lẹpo bo viavi, podọ enẹgodo nọvisunnu etọn lẹ dọho hẹ ẹ.
16 Linlin lọ sọ jẹ owhé Falo tọn gbè dọmọ: “Nọvisunnu Josẹfu tọn lẹ wá!” Homẹ Falo po devizọnwatọ etọn lẹ po tọn sọ hùn. 17 Enẹwutu, Falo dọna Josẹfu dọmọ: “Dọna nọvisunnu towe lẹ dọ, ‘Nuhe mì na basi die: Mì doagbanna kanlin mìtọn lẹ bo yì aigba Kenani tọn ji, 18 podọ mì plan otọ́ mìtọn po whédo mìtọn lẹ po wá dè e tofi. Yẹn nasọ na mì nudagbe Egipti tọn lẹ, bọ mìwlẹ nasọ nọ dù* sinsẹ́n dagbe hugan* aigba lọ tọn lẹ.’+ 19 Podọ hiẹ nisọ dọna yé dọmọ:+ ‘Nuhe mì na basi die: Mì yí agbàn-kẹkẹ+ lẹ sọn aigba Egipti tọn ji nado yì plan ovi mìtọn lẹ po asi mìtọn lẹ po, bosọ ze otọ́ mìtọn do dopo to agbàn-kẹkẹ lọ lẹ mẹ ji bo wáfi.+ 20 Mì sọ hanú gando nutindo mìtọn lẹ go blo,+ na adà dagbe hugan aigba Egipti tọn lẹpo tọn na yin mìtọn wutu.’”
21 Visunnu Islaeli tọn lẹ sọ wàmọ, Josẹfu sọ yí agbàn-kẹkẹ lẹ na yé sọgbe hẹ gbedide Falo tọn bosọ na yé núdùdù lẹ na gbejizọnlin lọ. 22 E na dopodopo yetọn lẹ awù yọyọ dopodopo, ṣigba na nuhe dù Bẹnjamini, e na ẹn fataka-kuẹ 300 gọna awù yọyọ atọ́n.+ 23 Podọ nuhe e dohlan otọ́ etọn lẹ die: kẹtẹkẹtẹ ao he hẹn nudagbe Egipti tọn lẹ, kẹtẹkẹtẹ asi ao he hẹn jinukun lẹ po akla lẹ po gọna nuhe otọ́ etọn tindo nuhudo etọn na gbejizọnlin lọ lẹ. 24 Ewọ sọ jo nọvisunnu etọn lẹ bọ dile yé dedo, e dọna yé dọmọ: “Mì duadi do mìdelẹ go to aliji blo.”+
25 Yé sọ hẹji dedo sọn Egipti bo wá otọ́ yetọn Jakọbu dè to aigba Kenani tọn ji. 26 Yé sọ dọna ẹn dọmọ: “Josẹfu gbẹ́ pò togbẹ̀, podọ ewọ wẹ to gandu do aigba Egipti tọn lẹpo ji!”+ Ṣigba, ayiha etọn kúṣiọ, na ewọ ma yí ohó yetọn sè wutu.+ 27 Whenue yé zindonukọn bo to nuhe Josẹfu dọna yé lẹpo dọna otọ́ yetọn Jakọbu bọ ewọ sọ mọ agbàn-kẹkẹ he Josẹfu ko dohlan nado wá ze e lẹ, e gọ̀ wá ede mẹ. 28 Islaeli sọ dọmọ: “E pé domọ! Josẹfu visunnu ṣie gbẹ́ pò togbẹ̀! Yẹn dona yì mọ ẹn whẹpo do kú!”+
46 Enẹwutu, Islaeli bẹ nuhe e tindo* lẹpo bo dedo. To whenue e jẹ Beẹli-ṣeba,+ e sanvọ́ hlan Jiwheyẹwhe Isaki otọ́ etọn tọn.+ 2 Jiwheyẹwhe sọ dọhona Islaeli to numimọ mẹ to zánmẹ dọmọ: “Jakọbu, Jakọbu!” e sọ gblọn dọmọ: “Yẹn die!” 3 E sọ dọmọ: “Yẹn wẹ Jiwheyẹwhe nugbo lọ, yèdọ Jiwheyẹwhe otọ́ towe tọn.+ A dibu nado yì Egipti blo, na yẹn na hẹn we zun akọta daho de to finẹ.+ 4 Yẹnlọsu na yì Egipti hẹ we, yẹn nasọ hẹn we lẹkọwa sọn finẹ,+ podọ Josẹfu wẹ na bọ nukun towe lẹ do.”*+
5 Enẹgodo, Jakọbu tọ́n sọn Beẹli-ṣeba bọ visunnu Islaeli tọn lẹ sọ yí agbàn-kẹkẹ he Falo dohlan na yé nido yí do plan otọ́ yetọn wá lọ lẹ do bẹ Jakọbu otọ́ yetọn, ovi yetọn lẹ po asi yetọn lẹ po. 6 Yé bẹ kanlinpa po nutindo he yé ko bẹpli to aigba Kenani tọn ji lẹ po hẹn. Mọ wẹ Jakọbu po ovi etọn lẹpo po wá jẹ Egipti do. 7 E sọ plan visunnu, viyọnnu po ovivi etọn lẹpo po—yèdọ kúnkan etọn lẹpo, wá Egipti.
8 Oyín visunnu Islaeli tọn he wá Egipti,+ yèdọ oyín visunnu Jakọbu tọn lẹ tọn die: Leubẹni wẹ plọnji Jakọbu tọn.+
9 Visunnu Leubẹni tọn lẹ wẹ Hanọki, Palu, Hẹzloni po Kalmi po.+
10 Visunnu Simeoni+ tọn lẹ wẹ Jẹmuẹli, Jamini, Ohadi, Jakini, Zohali po Ṣauli visunnu he yọnnu Kenaninu de ji na ẹn po.+
11 Visunnu Levi+ tọn lẹ wẹ Gẹlṣọni, Kohati po Melali po.+
12 Visunnu Juda+ tọn lẹ wẹ Ẹẹli, Onani, Ṣela,+ Pelẹzi+ po Zela+ po. Ṣigba, Ẹẹli po Onani po kú to aigba Kenani tọn ji.+
Visunnu Pelẹzi tọn lẹ wẹ Hẹzloni po Hamuli po.+
13 Visunnu Isakali tọn lẹ wẹ Tola, Puva, Iobi po Ṣimloni po.+
14 Visunnu Zebuluni+ tọn lẹ wẹ Sẹlẹdi, Elọni po Jaleẹli po.+
15 Yewlẹ wẹ visunnu he Lea ji na Jakọbu to Padani-alami gọna viyọnnu etọn Dina.+ Sọha* visunnu po viyọnnu etọn lẹpo po tọn yin 33.
16 Visunnu Gad+ tọn lẹ wẹ Zifiọni, Hagi, Ṣuni, Ẹzbọni, Ẹli, Alodi po Aleli po.+
17 Visunnu Aṣeli+ tọn lẹ wẹ Imna, Iṣva, Iṣvi po Belia po, gọna nọviyọnnu yetọn Sela.
Visunnu Belia tọn lẹ wẹ Hebeli po Malkiẹli po.+
18 Yewlẹ wẹ visunnu Zilpa+ tọn lẹ, yèdọ deviyọnnu he Labani na viyọnnu etọn Lea. Ovi he ewọ ji na Jakọbu lẹ yin: omẹ* 16 to pọmẹ.
19 Visunnu he Laheli, asi Jakọbu tọn ji na ẹn lẹ wẹ Josẹfu+ po Bẹnjamini+ po.
20 Manasse+ po Eflaimi*+ po wẹ Asẹnati+ viyọnnu Pọtifela yẹwhenọ Oni* tọn ji na Josẹfu to Egipti.
21 Visunnu Bẹnjamini+ tọn lẹ wẹ Bela, Bekẹli, Aṣbeli, Gela,+ Naamani, Ehi, Loṣi, Mupimi, Hupimi+ po Aldi po.+
22 Visunnu he Jakọbu tindo gbọn Laheli dali lẹ niyẹn: omẹ* 14 to pọmẹ.
23 Visunnu Dani+ tọn* wẹ Huṣimi.+
24 Visunnu Naftali+ tọn lẹ wẹ Jazeẹli, Guni, Jezẹli po Ṣilemi po.+
25 Yewlẹ wẹ visunnu Bilha tọn lẹ, yèdọ deviyọnnu he Labani na viyọnnu etọn Laheli. Ovi he ewọ ji na Jakọbu lẹ yin: omẹ* ṣinawe to pọmẹ.
26 Mẹhe* yin kúnkan Jakọbu tọn bo yì Egipti hẹ ẹ lẹpo gbọnvona ovisi Jakọbu tọn lẹ yin 66.+ 27 Visunnu* awe wẹ yin jiji na Josẹfu to Egipti. Sọn whédo Jakọbu tọn mẹ, mẹhe* wá Egipti lẹpo yin 70.*+
28 Jakọbu sọ do Juda+ hlan nado jẹnukọn bo yì dọna Josẹfu dọ emi ko to aliji ja Goṣẹni. To whenue yé wá aigba Goṣẹni+ tọn ji, 29 Josẹfu wleawuna osọ́-kẹkẹ etọn bo wleali nado hẹji yì pé Islaeli otọ́ etọn to Goṣẹni. Whenue e do ede hia ẹ, e gbò e fán* to afọdopolọji bosọ viavi na ojlẹ de.* 30 Whenẹnu, Islaeli dọna Josẹfu dọmọ: “Todin, yẹn sọgan kú; na yẹn ko mọ we bo mọdọ a gbẹ́ pò togbẹ̀.”
31 Josẹfu sọ dọna nọvisunnu etọn lẹ po whédo otọ́ etọn tọn po dọmọ: “Mì gbọ yẹn ni yì dọna Falo+ dọ, ‘Nọvisunnu ṣie lẹ po whédo otọ́ ṣie tọn he tin to Kenani po ko wá dè e tofi.+ 32 Lẹngbọhọtọ lẹ wẹ dawe lọ lẹ,+ bo nọ yìn kanlin lẹ,+ yé ko sọ hẹn kanlinpa yetọn lẹ gọna nuhe yé tindo lẹpo wá.’+ 33 To whenue Falo na basi oylọna mì bo na kanse mì dọ, ‘Azọ́n tẹwẹ mì nọ wà?’ 34 Mì dọna ẹn dọ, ‘Kanlin wẹ devizọnwatọ towe lẹ nọ yìn sọn ovu whenu mítọn gbọ́n kakajẹ din, yèdọ míwlẹ po tọgbo mítọn lẹ po,’+ na mì nido sọgan nọ aigba Goṣẹni tọn ji,+ na osùnú de wẹ lẹngbọyìntọ lẹ yin na Egiptinu lẹ.”+
47 Enẹwutu, Josẹfu yì bo dọna Falo+ dọmọ: “Otọ́ ṣie po nọvisunnu ṣie lẹ po ko wá sọn aigba Kenani tọn ji po kanlinpa yetọn lẹ po gọna nuhe yé tindo lẹpo bo ko tin to aigba Goṣẹni tọn ji.”+ 2 E sọ plan atọ́n to nọvisunnu etọn lẹ mẹ bo yì do yé hia Falo.+
3 Falo sọ dọna nọvisunnu Josẹfu tọn lẹ dọmọ: “Azọ́n tẹwẹ mì nọ wà?” Yé sọ gblọnna Falo dọmọ: “Lẹngbọ wẹ devizọnwatọ towe lẹ nọ yìn, yèdọ míwlẹ po tọgbo mítọn lẹ po.”+ 4 Enẹgodo, yé dọna Falo dọmọ: “Míwlẹ wá nado nọfi taidi jonọ,+ na kanlindugbo ma tin na kanlin devizọnwatọ towe lẹ tọn, na huvẹ lọ sinyẹn to aigba Kenani tọn ji wutu.+ Enẹwutu, jaale, dike devizọnwatọ towe lẹ ni nọ nọ̀ aigba Goṣẹni tọn ji.”+ 5 Falo sọ gblọnna Josẹfu dọmọ: “Otọ́ towe po nọvisunnu towe lẹ po ko wá dè we tofi. 6 Alọ towe mẹ wẹ aigba Egipti tọn tin te. Gbọ otọ́ towe po nọvisunnu towe lẹ po ni nọ nọ̀ adà dagbe hugan aigba lọ tọn ji.+ Gbọ yé ni nọ aigba Goṣẹni tọn ji, podọ eyin hiẹ mọdọ depope to yé mẹ pegan, de yé nado nọ penukundo kanlinpa ṣie go.”
7 Enẹgodo, Josẹfu plan Jakọbu otọ́ etọn wá bo do e hia Falo, Jakọbu sọ dona Falo. 8 Falo sọ kanse Jakọbu dọmọ: “Owhe nẹmu wẹ hiẹ tindo?” 9 Jakọbu sọ gblọnna ẹn dọmọ: “Owhe he yẹn yí do dánpe gbọn gbéji lẹ* yin owhe 130. Owhe he yẹn ko nọgbẹ̀ na lẹ ma sù bosọ gọ́ na tukla,+ podọ yé ma sọ̀ owhe he tọgbo ṣie lẹ yí do dánpe gbọn gbéji.”*+ 10 Enẹgodo, Jakọbu dona Falo bo yì sọn nukọn etọn.
11 Enẹwutu, Josẹfu na tẹnmẹ otọ́ etọn po nọvisunnu etọn lẹ po do aigba Egipti tọn ji, to adà dagbe hugan aigba lọ tọn ji, yèdọ to aigba Lamesesi tọn ji,+ kẹdẹdile Falo ko degbe etọn do. 12 Josẹfu sọ to núdùdù* na otọ́ etọn po nọvisunnu etọn lẹ po gọna whédo otọ́ etọn tọn lẹpo sọgbe hẹ sọha ovi yetọn lẹ tọn.
13 Núdùdù* sọ hán to aigba lọ lẹpo ji na huvẹ lọ sinyẹn taun wutu, akú sọ do tlala to aigba Egipti tọn po aigba Kenani tọn po ji na huvẹ lọ wutu.+ 14 Josẹfu sọ to akuẹ he tin to aigba Egipti po Kenani po tọn ji lẹpo bẹpli, yèdọ akuẹ he gbẹtọ lẹ to hinhẹnwa nado wá họ̀ núdùdù lẹ,+ Josẹfu sọ nọ bẹ akuẹ lọ lẹ wá owhé Falo tọn gbè. 15 To godo mẹ, akuẹ mẹhe nọ nọ̀ aigba Egipti po Kenani po tọn ji lẹ tọn vọ̀ bọ Egiptinu lẹpo sọ jẹ Josẹfu dè wá ji, bo nọ dọmọ: “Na mí núdùdù! Naegbọn hiẹ nado to pinpọn mí kaka bọ mí na kú na akuẹ mítọn lẹ ko vọ̀ wutu?” 16 Josẹfu sọ dọna yé dọmọ: “Eyin akuẹ mìtọn ko vọ̀, mì hẹn kanlin mìtọn lẹ wá, yẹn nasọ yí yé do diọ núdùdù na mì.” 17 Enẹwutu, yé jẹ kanlin yetọn lẹ hẹnwa na Josẹfu ji, bọ Josẹfu nọ yí núdùdù na yé do otẹn kanlin yetọn lẹ tọn mẹ, yèdọ osọ́ yetọn lẹ, lẹngbọpa yetọn lẹ, kanlinpa yetọn lẹ po kẹtẹkẹtẹ yetọn lẹ po, e sọ zindonukọn nado nọ yí kanlin yetọn lẹpo do diọ núdùdù na yé to owhe enẹ gblamẹ.
18 Whenue owhe enẹ wá vivọnu, yé jẹ Josẹfu dè wá ji to owhe he bọdego mẹ bo nọ dọmọ: “Mí ma na whlá do oklunọ ṣie dọ akuẹ po kanlin whégbè tọn mítọn lẹ po ko yin yiyina oklunọ ṣie. Mí masọ tindo nudevo depope he mí na yí na oklunọ ṣie adavo mídelẹ po aigba mítọn lẹ po. 19 Naegbọn hiẹ nado to pinpọn mí kaka bọ mí na kú bọ aigba mítọn lẹ nasọ gú mí? Họ̀ míwlẹ po aigba mítọn lẹ po bo yí núdùdù na mí do otẹn etọn mẹ, podọ míwlẹ na lẹzun afanumẹ Falo tọn bọ aigba mítọn lẹ nasọ lẹzun etọn. Na mí jinukun lẹ, na mí nido sọgan nọgbẹ̀ bọ aigba mítọn lẹ ma nado gbọgbé.” 20 Josẹfu sọ họ̀ aigba Egiptinu lẹpo tọn na Falo, na yemẹpo wẹ sà ogle yetọn lẹ, na huvẹ lọ sinyẹn taun wutu; aigba lọ lẹ sọ lẹzun Falo tọn.
21 To whenẹnu, Josẹfu degbe dọ Egiptinu lẹpo—sọn awà Egipti tọn lẹpo ji—ni sẹtẹn yì tòdaho lẹ mẹ.+ 22 Aigba yẹwhenọ lẹ tọn kẹdẹ wẹ e ma họ̀,+ na owhé Falo tọn gbè wẹ núdùdù yẹwhenọ lẹ tọn nọ wá sọn, enẹwutu wẹ yewlẹ ma sà aigba yetọn. 23 Whenẹnu wẹ Josẹfu dọna mẹlọ lẹ dọmọ: “Mì pọ́n, yẹn ko họ̀ mìwlẹ po aigba mìtọn lẹ po to egbehe na Falo. Jinukun lẹ die, mì nọ do yé do ogle lẹ mẹ. 24 Eyin yé de sinsẹ́n tọ́n, mì na nọ yí mado-atọ́n hlan Falo,+ ṣigba mado-ẹnẹ na nọ yin mìtọn titi na mì nido sọgan nọ do sọn e mẹ bosọ nọ dù sọn e mẹ, yèdọ mìwlẹ po mẹhe tin to whédo mìtọn mẹ lẹ po gọna ovi mìtọn lẹ.” 25 Enẹwutu, yé gblọn dọmọ: “Hiẹ ko whlẹn mí gán.+ Gbọ mí ni mọ nukundagbe oklunọ ṣie tọn, podọ míwlẹ nasọ lẹzun afanumẹ Falo tọn lẹ.”+ 26 Josẹfu sọ yí i do basi gbedide de he gbẹ́ hẹnai to aigba Egipti tọn lẹpo ji kakajẹ egbehe, dọ mado-atọ́n jinukun tọn lẹ na nọ yin Falo tọn. Aigba yẹwhenọ lẹ tọn kẹdẹ wẹ ma lẹzun Falo tọn.+
27 Islaeli sọ gbọṣi Goṣẹni to aigba Egipti tọn ji,+ yé sọ sawhé do finẹ bo lẹzun sinsẹ́nnọ bosọ sudeji taun.+ 28 Podọ Jakọbu nọ aigba Egipti tọn ji na owhe 17, owhe he Jakọbu nọgbẹ̀ na lẹpo sọ yin owhe 147.+
29 Ojlẹ okú Islaeli tọn sọ to dindọnsẹpọ,+ enẹwutu e ylọ visunnu etọn Josẹfu bo dọmọ: “Todin, eyin yẹn ko mọ nukundagbe towe, jaale ze alọ towe do asapada ṣie glọ bo do owanyi nugbo po nugbonọ-yinyin po hia mi. Jaale, a dì mi do Egipti blo.+ 30 Eyin n’kú,* hiẹ dona ze mi sọn Egipti bo yì dì mi do yọdò tọgbo ṣie lẹ tọn mẹ.”+ Ewọ sọ gblọn dọmọ: “Yẹn na wà pẹpẹ dile hiẹ dọ do.” 31 Jakọbu sọ dọna ẹn dọmọ: “Whlé na mi.” Ewọ sọ whlé na ẹn.+ Islaeli sọ ṣinyọ́n nukunmẹ ai do adọzan etọn ji to taligbé etọn.+
48 To onú ehelẹ godo, e yin didọna Josẹfu dọmọ: “Pọ́n, agbọ́ ko to otọ́ towe pé.” Enẹwutu, e plan visunnu etọn awe lẹ Manasse po Eflaimi po yì otọ́ etọn dè.+ 2 Whenẹnu, e yin didọna Jakọbu dọmọ: “Visunnu towe Josẹfu ko wá dè we.” Islaeli sọ dogán bo sinai do adọzan etọn ji. 3 Jakọbu sọ dọna Josẹfu dọmọ:
“Jiwheyẹwhe Ganhunupotọ lọ sọawuhia mi to Luzi to aigba Kenani tọn ji bo dona mi.+ 4 E sọ dọna mi dọ, ‘Yẹn na hẹn we zun sinsẹ́nnọ podọ yẹn na hẹn we sudeji bọ yẹn nasọ yí we do basi pipli akọta lẹ tọn+ podọ yẹn na yí aigba ehe na kúnkan* towe to godo towe taidi nutindo de he na dẹn-to-aimẹ.’+ 5 Todin, visunnu towe awe he yin jiji na we to aigba Egipti tọn ji whẹpo yẹn do wá Egipti lẹ na yin ṣie.+ Eflaimi po Manasse po na lẹzun visunnu ṣie lẹ kẹdẹdile Leubẹni po Simeoni po yin visunnu ṣie lẹ do.+ 6 Ṣigba, ovi he na yin jiji na we to godo yetọn lẹ na yin towe. Oyín nọvisunnu awe ehelẹ tọn wẹ na nọ yin yíyí do ylọ yé, yé nasọ mọ ogú yetọn yí sọn aigba he yin mimá na nọvisunnu yetọn lẹ mẹ.+ 7 To whenue yẹn ja sọn Padani, Laheli kú+ to apá ṣie to aigba Kenani tọn ji, to whenue yẹn ma ko jẹ Eflati.+ Enẹwutu, yẹn dì i do aliho he yì Eflati ji, enẹ wẹ Bẹtlẹhẹm.”+
8 Islaeli sọ mọ visunnu Josẹfu tọn lẹ bo kanse dọmọ: “Mẹnu lẹ die?” 9 Josẹfu sọ gblọnna otọ́ etọn dọmọ: “Visunnu he Jiwheyẹwhe ko na mi tofi lẹ wẹ.”+ E sọ dọna ẹn dọmọ: “Jaale, hẹn yé sẹpọ mi, na yẹn nido dona yé.”+ 10 Nukun Islaeli tọn lẹ masọ nọ mọnú ganji ba, na yọnhowhe etọn wutu. Josẹfu sọ hẹn visunnu lọ lẹ sẹpọ ẹ bọ e donùnùgo na yé bo gbò yé fán. 11 Islaeli sọ dọna Josẹfu dọmọ: “Yẹn ma lẹn gbede dọ yẹn nasọ mọ we ba,+ ṣigba Jiwheyẹwhe tlẹ ko sọ hẹn mi nado mọ kúnkan* towe lọsu ga.” 12 Enẹgodo, Josẹfu de yé sẹ̀ sọn akọ̀n ji na Islaeli, bọ ewọ ṣinyọ́n nukunmẹ ai.
13 Todin, Josẹfu plan yé omẹ awe lẹ, bo ze Eflaimi+ he tin to adusilọ etọn mẹ do amiyọnwhé Islaeli tọn, podọ Manasse+ he tin amiyọnlọ etọn mẹ do adusiwhé Islaeli tọn bosọ hẹn yé sẹpọ ẹ. 14 Ṣigba, Islaeli dlẹn adusilọ etọn bo zedo ota na Eflaimi, dile etlẹ yindọ ewọ wẹ yin yọpọ lọ, bosọ ze amiyọnlọ etọn do ota na Manasse. Ewọ wàmọ sọn ojlo mẹ wá, dile ewọ tlẹ yọnẹn dọ Manasse wẹ yin plọnji lọ.+ 15 Whenẹnu wẹ e dona Josẹfu bo dọmọ:+
“Jiwheyẹwhe nugbo, mẹhe nukọn otọ́ ṣie Ablaham po Isaki po zinzọnlin te,+
Jiwheyẹwhe nugbo he yìn mi to gbẹzan ṣie lẹpo mẹ kakajẹ egbehe,+
16 Angẹli he ko nọ whlẹn mi* sọn nuhahun ṣie lẹpo mẹ,+ dona yọpọ sunnu lọ lẹ.+
Gbọ yè ni nọ yí oyín ṣie podọ oyín otọ́ ṣie Ablaham po Isaki po tọn do ylọ yé,
Gbọ yé ni lẹzun susugege to aigba ji.”+
17 Homẹ Josẹfu tọn ma hùn to whenue e mọdọ otọ́ etọn ze adusilọ etọn do ota na Eflaimi, enẹwutu e tẹnpọn nado dealọ otọ́ etọn tọn sẹ̀ sọn ota na Eflaimi nado zedo ota na Manasse. 18 Josẹfu sọ dọna otọ́ etọn dọmọ: “Otọ́ ṣie, e ma yinmọ, na viplọnji lọ die.+ Ze adusilọ towe do ota na ẹn.” 19 Ṣigba, otọ́ etọn gbẹ́ bo dọmọ: “Yẹn yọ́n nuhe wà n’te, visunnu ṣie, yẹn yọnẹn. Ewọ lọsu na lẹzun akọta de podọ e na lẹzun susugege. Etomọṣo, nọvisunnu etọn pẹvi lọ na hugan ẹn+ podọ kúnkan* ewọ lọsu tọn na sù sọmọ bọ e na lẹzun akọta blebu lẹ.”+ 20 E sọ zindonukọn bo to didona yé to gbenẹgbe+ dọmọ:
“Gbọn oyín towe yiyizan dali, Islaelivi lẹ na nọ dona ode awetọ po hogbe ehelẹ po dọ,
‘Na Jiwheyẹwhe ni dona we dile e dona Eflaimi po Manasse po do.’”
Gbọnmọ dali, e to Eflaimi zedaga hú Manasse.
21 Enẹgodo, Islaeli dọna Josẹfu dọmọ: “Pọ́n, yẹn to kúkú jei,+ ṣigba e họnwun dọ Jiwheyẹwhe na tin hẹ mì bo nasọ hẹn mì lẹkọyi aigba tọgbo mìtọn lẹ tọn ji.+ 22 Ṣigba, yẹn ko na we mimá aigba tọn* dopo hugan nọvisunnu towe lẹ tọn, ehe yẹn yí sọn alọ Amolinu lẹ tọn mẹ gbọn ohí ṣie po ogá ṣie po dali.”
49 Jakọbu sọ ylọ visunnu etọn lẹ bo dọmọ: “Mì pli mìdelẹ dopọ na yẹn nido sọgan dọ nuhe na jọ do mì go to azán he to nukọn ja lẹ mẹ na mì. 2 Mì pli mìde bo dotoai, mì visunnu Jakọbu tọn lẹ, mọwẹ mì dotoaina Islaeli otọ́ mìtọn.
3 “Leubẹni,+ hiẹ wẹ plọnji ṣie,+ huhlọn ṣie po bẹjẹeji huhlọn vijiji ṣie tọn po, mẹhe sinyẹn hugan to yẹyi daho po huhlọn po mẹ. 4 Na hiẹ yinuwa to aliho jlòkoko tọn mẹ taidi osin he to adán ji lẹ wutu, hiẹ ma na tindo kọdetọn dagbe, na hiẹ ko hẹ adọzan otọ́ towe tọn ji wutu.+ Hiẹ sọ hẹn adọzan ṣie flu to ojlẹ enẹ mẹ. Na nugbo tọn, ewọ hẹji yì e ji!
5 “Nọvi-nọvi wẹ Simeoni po Levi po.+ Adánwanu mẹhuhu tọn wẹ adánwanu yetọn lẹ.+ 6 Alindọn* ṣie e, a kọnawudopọ hẹ yé blo. Hiẹ gbégbò* ṣie E, a kọnawudopọ hẹ pipli yetọn blo, na yé hùmẹ to homẹgble yetọn mẹ,+ na awuvivi yetọn wutu yé sọ sán dọ̀nklanmẹ na oyìnsú lẹ. 7 Dẹ̀hodo wẹ homẹgble yetọn, na e gọ́ na kanyinylan podọ dẹ̀hodo sọ wẹ adi yetọn na e gọ́ na okà.+ Gbọ yẹn ni gbà yé pé gbọn Jakọbu mẹ podọ gbọ yẹn ni vúnvún yé pé gbọn Islaeli mẹ.+
8 “Na nuhe dù hiẹ Juda,+ nọvisunnu towe lẹ na nọ pà we.+ Hiẹ na gbawhàn kẹntọ towe lẹ tọn.*+ Visunnu otọ́ towe tọn lẹ na nọ dẹ́ do odò to nukọn towe.+ 9 Kinnikinni-vu de wẹ Juda yin.+ Hiẹ visunnu ṣie, e họnwun dọ hiẹ na nọ fọ́n sọn nuhe a wle bo to dùdù lẹ kọ̀n. Ewọ fẹ̀ yìdo bo ṣinyọ́n akọ́n ai taidi kinnikinni de, podọ taidi kinnikinni de, mẹnu wẹ na gboadọ bo na fọ́n ẹn? 10 Ogánpò ma na yì sọn Juda,+ mọjanwẹ opò gbedide tọn ma na yì sọn afọ etọn lẹ go do niyẹn kaka Ṣilo* nado wá,+ podọ ewọ wẹ gbẹtọ lẹ na nọ setonuna.+ 11 Ewọ na nọ blá kẹtẹkẹtẹ etọn do vẹntin go podọ kẹtẹkẹtẹvu etọn do vẹntin dagbedagbe de go, e nasọ nọ yàn avọ̀ etọn to ovẹn mẹ podọ awù etọn to vẹnhàn lẹ mẹ. 12 Ovẹn hẹn nukun etọn lẹ divẹẹ, podọ anọ́sin hẹn adú etọn lẹ wé.
13 “Zebuluni+ na nọ nọ̀ huto, yèdọ agé fie tọjihun lẹ nọ glin do,+ podọ dogbó etọn nasọ dlẹnkan jẹ Sidoni waji.+
14 “Kẹtẹkẹtẹ huhlọnnọ de wẹ Isakali,+ he mlọnai to agbànhẹnnu he nọ nọ̀ kẹtẹkẹtẹ go awe ṣẹnṣẹn. 15 Ewọ nasọ mọdọ gbọjẹtẹn lọ yọ́n bọ aigba lọ sọ dọnmẹdogo. E na dẹ́ abọ́ etọn nado hẹn agbàn bo na ze ede jo nado wazọ́n sinsinyẹn.
16 “Dani,+ he yin dopo to hẹnnu Islaeli tọn lẹ mẹ, na dawhẹna omẹ etọn lẹ.+ 17 Gbọ Dani ni yin odàn de to alitó, yèdọ odàn azònọ de to alipá, ehe hẹ̀nadu afọgbẹn osọ́ lẹ tọn sọmọ bọ kùnkùntọ yetọn lẹ bli jai.+ 18 Yẹn na nọtepọn whlẹngán ṣie sọn dè we, Jehovah E.
19 “Na nuhe dù Gad,+ ogbẹ́ jaguda tọn de na tọ́nawhàn ẹn, ṣigba ewọ na yàn yé dogbé bo nasọ dómọna yé.+
20 “Aṣeli+ na tindo akla* susugege,* ewọ nasọ wleawuna núdùdù he jẹna ahọlu.+
21 “Agbanlin asi jlẹmẹ de wẹ Naftali.+ E na nọ dọho nuyọnẹn tọn lẹ.+
22 “Alà atin sinsẹ́nnọ de tọn wẹ Josẹfu,+ yèdọ atin he nọ de sinsẹ́n tọ́n to asisa osin tọn tó de, ehe zẹ̀alà dasá adó. 23 Ogádetọ lẹ nọ to ogbé etọn yàn mapote bo nọ to ogá de do e bosọ nọ to adidu do e go.+ 24 Etomọṣo, ogá etọn ma sẹtẹn,+ podọ alọ etọn sinyẹn bosọ bí.+ Omẹ Huhlọnnọ Jakọbu tọn wẹ na Lẹngbọhọtọ lọ po Zannu lọ po Islaeli. 25 Ewọ* wá sọn Jiwheyẹwhe otọ́ towe tọn dè, podọ e na gọalọna we, ewọ tin to adà Ganhunupotọ lọ tọn mẹ, Jiwheyẹwhe nasọ kọ̀n dona olọn mẹ tọn lẹ do ji we po dona asisa daho-gbó dòglọ tọn lẹ po+ gọna ovi susugege lẹ po kanlin susugege lẹ po. 26 Dona otọ́ towe tọn lẹ na sù hugan nudagbe osó madopodo lẹ tọn podọ hugan whanpẹ okọ́ta he na gbọṣi aimẹ kakadoi lẹ tọn.+ Josẹfu, mẹhe yin didedovo sọn nọvisunnu etọn lẹ mẹ, na to dona lọ lẹ mọyi zọnmii.*+
27 “Bẹnjamini+ na nọ to onú tlẹ́n taidi ohla.+ To afọnnu, e na nọ dù nuhe e wle podọ to whèjai, e na nọ má ogblànnu.”+
28 Omẹ ehe lẹpo wẹ yin hẹnnu 12 Islaeli tọn lẹ, podọ nuhe otọ́ yetọn dọna yé to whenue e to didona yé lẹ niyẹn. E dona mẹdopodopo sọgbe hẹ dona he e jẹna.+
29 Enẹgodo, e na yé gbedide ehelẹ dọmọ: “Yẹn na yin dìdì taidi omẹ ṣie lẹ.*+ Mì dì mi dopọ hẹ tọgbo ṣie lẹ do oslò he tin to aigba Eflọni Hetinu lọ tọn ji mẹ,+ 30 enẹ wẹ oslò he to aigba Makpela tọn ji to Mamle nukọn, to aigba Kenani tọn ji, yèdọ aigba he Ablaham họ̀ sọn Eflọni, Hetinu lọ si taidi ṣiọditẹn de. 31 Finẹ wẹ Ablaham po asi etọn Sala po yin dìdì do.+ Finẹ wẹ Isaki po asi etọn Lebeka po yin dìdì do,+ podọ finẹ wẹ yẹn dì Lea do. 32 Aigba lọ po oslò he tin to e ji po ko yin hihọ̀ sọn visunnu Heti tọn lẹ si.”+
33 Jakọbu sọ dotana anademẹ nina visunnu etọn lẹ. E sọ gọ̀ afọ etọn lẹ do adọzan etọn ji bo gbọ gbigbọ etọn godo tọn bosọ yin dìdì taidi omẹ etọn lẹ.*+
50 Whenẹnu, Josẹfu họ́ jẹ otọ́ etọn ji bo viavi do e ji+ bosọ donùnùgo na ẹn. 2 Enẹgodo, Josẹfu degbe dọ devizọnwatọ etọn he yin amasinzọ́nwatọ lẹ ni và oṣiọ*+ otọ́ etọn tọn. Enẹwutu, amasinzọ́nwatọ lọ lẹ và oṣiọ Islaeli tọn, 3 yé yí azán 40 pipé zan na ẹn, na ojlẹ he nọ yin yiyizan nado và oṣiọ niyẹn, podọ Egiptinu lẹ sọ to avivi na ẹn na azán 70.
4 Whenue azán he yin yíyí do nọ aluẹmẹ na ẹn lẹ ko juwayi, Josẹfu dọna mẹhe nọ wazọ́n to họ̀nmẹ* Falo tọn lẹ dọmọ: “Eyin yẹn ko mọ nukundagbe mìtọn, mì dowẹn ehe na Falo dọmọ: 5 ‘Otọ́ ṣie ko hẹn mi nado whlé+ dọmọ: “Pọ́n! Yẹn to kúkú jei.+ Hiẹ ni dì mi do ṣiọditẹn ṣie+ he yẹn ko kùn do aigba Kenani tọn ji.”+ Enẹwutu, jaale gbọ yẹn ni hẹji yì nado yì dì otọ́ ṣie, enẹgodo yẹn na lẹkọwa.’” 6 Falo sọ dọmọ: “Yì dì otọ́ towe kẹdẹdile e ko hẹn we nado whlé do.”+
7 Josẹfu sọ hẹji yì nado yì dì otọ́ etọn, devizọnwatọ Falo tọn lẹpo sọ hodo e, gọna mẹho + he to họ̀nmẹ Falo tọn lẹ po mẹho he to aigba Egipti tọn ji lẹpo po 8 mẹhe tin to whédo Josẹfu tọn mẹ lẹpo, nọvisunnu etọn lẹ po whédo otọ́ etọn tọn+ po sọ yì ga. Ovi pẹvi yetọn lẹ po kanlin yetọn lẹ po kẹdẹ wẹ yé jodo aigba Goṣẹni tọn ji. 9 Osọ́-kẹkẹ+ lẹ po osọ́nọ lẹ po sọ hẹji yì hẹ ẹ ga bọ awhànpa lọ sù taun. 10 Yé sọ wá jẹ likun-flétẹn Atadi tọn he tin to lẹdo Jọdani tọn mẹ podọ to finẹ yé doavihàn daho de bo nọ aluẹmẹ sinsinyẹn, e sọ nọ aluẹmẹ na otọ́ etọn na azán ṣinawe. 11 Mẹhe nọ nọ̀ aigba lọ ji lẹ, yèdọ Kenaninu lẹ, sọ mọ yé to aluẹmẹ to likun-flétẹn Atadi tọn, yé sọ dọmọ: “Aluẹmẹninọ daho de wẹ ehe yin na Egiptinu lẹ!” Enẹwutu wẹ finẹ do nọ yin yiylọdọ Abẹli-mizlaimi,* he tin to lẹdo Jọdani tọn mẹ.
12 Visunnu Jakọbu tọn lẹ sọ basi pẹpẹ sọgbe hẹ anadenamẹ etọn lẹ.+ 13 Visunnu etọn lẹ sọ ze e yì aigba Kenani tọn ji bo dì i do oslò Makpela tọn mẹ, yèdọ aigba he tin to Mamle nukọn, ehe Ablaham ko họ̀ sọn Eflọni Hetinu lọ si taidi ṣiọditẹn de.+ 14 To whenue Josẹfu ko dì otọ́ etọn godo, e lẹkọwa Egipti po nọvisunnu etọn lẹ po gọna mẹhe hodo e nado yì dì otọ́ etọn lẹpo.
15 Whenue nọvisunnu Josẹfu tọn lẹ mọdọ otọ́ yetọn ko kú, yé dọmọ: “Vlavo Josẹfu hẹn mí do homẹ bọ ewọ nasọ yiahọsu oylan he mí wà do e lẹpo tọn.”+ 16 Enẹwutu, yé dowẹn hlan Josẹfu dọmọ: “Otọ́ towe degbe whẹpo do kú dọmọ: 17 ‘Nuhe mìwlẹ na dọna Josẹfu die: “Jaale, yẹn vẹ̀ we, jo ylando nọvisunnu towe lẹ tọn na yé gọna oylan he yé wà gbọn danú mọnkọtọn wiwà do we dali.”’ Todin, jaale jo ylando he devizọnwatọ Jiwheyẹwhe otọ́ towe tọn lẹ ko wà do we lẹ na yé.” Josẹfu sọ viavi to whenue yé dọ onú ehelẹ na ẹn. 18 Nọvisunnu etọn lẹ lọsu sọ wá bo dẹ́ do odò to nukọnna ẹn bosọ dọmọ: “Pọ́n, afanumẹ towe lẹ wẹ míwlẹ!”+ 19 Josẹfu gblọnna yé dọmọ: “Mì dibu blo. Be otẹn Jiwheyẹwhe tọn mẹ wẹ n’tin te ya? 20 Dile etlẹ yindọ danú wẹ mìwlẹ jlo na wà do mi,+ Jiwheyẹwhe ko diọ ẹ zun dagbe nado whlẹn mẹsusu lẹ gán, dile ewọ to wiwà do to alọnu din.+ 21 Enẹwutu, mì dibu blo. Yẹn na to núdùdù na mìwlẹ po ovi pẹvi mìtọn lẹ po.”+ E sọ miọnhomẹna yé bosọ vọ́ jide na yé.
22 Josẹfu sọ gbọṣi Egipti, yèdọ ewọ po whédo otọ́ etọn tọn po, Josẹfu sọ nọgbẹ̀ na owhe 110. 23 Josẹfu sọ mọ whẹndo atọ̀ntọ visunnu Eflaimi tọn lẹ tọn,+ gọna visunnu Makili tọn lẹ, yèdọ Makili+ he yin visunnu Manasse tọn. Akọ̀n Josẹfu tọn ji wẹ yé yin pinpọn e go whẹ́n te.* 24 To godo mẹ, Josẹfu dọna nọvisunnu etọn lẹ dọmọ: “Yẹn to kúkú jei, ṣigba matin ayihaawe, Jiwheyẹwhe na lẹ́ ayidonugo etọn hlan mì,+ podọ e họnwun dọ e na hẹn mì sọn aigba ehe ji yì aigba he ewọ ko whlé na Ablaham, na Isaki podọ na Jakọbu ji.”+ 25 Josẹfu sọ hẹn visunnu Islaeli tọn lẹ nado whlé dọmọ: “Matin ayihaawe, Jiwheyẹwhe na lẹ́ ayidonugo etọn hlan mì. Mìwlẹ dona bẹ ohú ṣie lẹ yì sọn fi.”+ 26 Josẹfu sọ kú to whenue e tindo owhe 110, yé sọ và oṣiọ+ etọn bo ze e do ṣiọpotin de mẹ to Egipti.
Kavi “agbá.”
Kavi “agbówhẹn osin tọn.”
Kavi “gbigbọ.”
Kavi “Jiwhé.”
Kavi “alindọn.”
Kavi “jiwhé.”
Kavi “nudazi.”
Kavi “alindọn.”
Kavi “alindọn.”
Kavi “kanlin he nọ sẹtẹn lẹ,” ehe na ko bẹ nuhe nọ lìn lẹ po kanlin wunmẹ devo lẹ po hẹn.
Kavi “ogbẹ̀ taidi alindọn; alindọn gbẹ̀te.”
To paa mẹ, “gọna awhànpa yetọn.”
Whla tintan he oyín mẹdetiti tọn Jiwheyẹwhe tọn he hẹn ẹn gbọnvo sọawuhia die, yèdọ יהוה (YHWH). Pọ́n Nud. A4.
Kavi “alindọn.” Nefeṣ to Heblugbe mẹ, to paa mẹ, zẹẹmẹdo “nudida he to gbigbọ.” Pọ́n Zẹm.
To paa mẹ, “e sọ lẹzun ota ẹnẹ.”
Kavi “Tiglis.”
Kavi “alindọn.”
Kavi “gbọṣi asi etọn dè.”
Kavi “zìn; bikan.”
Kavi “wangbẹna.”
To paa mẹ, “okún.”
To paa mẹ, “okún.”
Zẹẹmẹdo “Omẹ Aigba ji Tọn; Gbẹtọ; Gbẹtọvi.”
Zẹẹmẹdo “Mẹhe to Ogbẹ̀.”
Kavi “na ojlẹ madopodo.”
To paa mẹ, “bọ nukunmẹ etọn kúṣiọ.”
Kavi “be yẹn ma na kẹalọyi we wẹ ya?”
To paa mẹ, “huhlọn etọn.”
To paa mẹ, “sọn aigba nukunmẹ.”
Kavi “ze ohia de dai.”
Kavi “aigba Nodi tọn.”
Kavi “Evi.”
Zẹẹmẹdo “Yin Dide; Yin Zizedai; Yin Awuwlena.”
To paa mẹ, “okún.”
Kavi “gbẹtọ lẹ ko jẹ masin kọ̀n do oyín Jehovah tọn go ji.”
Kavi “Adam; Gbẹtọvi.”
To paa mẹ, “Jiwheyẹwhe lọ.” Pọ́n Zẹm.
Vlavo zẹẹmẹdo “Gbọjẹ; Homẹmimiọn.”
Kavi “kọgbọ.”
Hogbe yẹhiadonu tọn Heblugbe tọn he nọ dlẹnalọdo visunnu Jiwheyẹwhe tọn he yin angẹli lẹ.
Kavi “na e nọ yinuwa sọgbe hẹ agbasalan wutu.”
Vlavo zẹẹmẹdo “Mẹhọliaitọ,” enẹ wẹ, mẹhe nọ zìn mẹdevo lẹ dai. Pọ́n Zẹm.
Kavi “gblehomẹna.”
Kavi “sọ hẹn awugblena ẹn.”
Kavi “E ma tindo owhẹ̀ to okọ̀.”
To paa mẹ, “to hatọ etọn.”
Kavi “gbẹtọ.”
Vlavo agbeligbe-tin.
To paa mẹ, “ogbá”; apotin daho.
Awagbà dopo sọzẹn hẹ cm 44,5. Pọ́n Nud. B14.
To Heblugbe mẹ, sohali. Sohali sọgan dlẹnalọdo họta de he gblo sọ awagbà dopo, kakati nido yin nùvo de na hinhọ́n kavi na fleṣe.
Kavi “gbigbọ.”
Kavi vlavo, “ṣinawe ṣinawe kanlin wiwe wunmẹ lẹpo tọn.”
Kavi vlavo, “ṣinawe ṣinawe.”
Osin ehe to alọdlẹndo pipli osin tọn he to aga na dovlomẹ to lẹdo aigba tọn, he yin nùdego to Jen 1:6, 7 mẹ.
Kavi “gbigbọ.”
Awagbà dopo sọzẹn hẹ cm 44,5. Pọ́n Nud. B14.
To paa mẹ, “agbasalan.”
Hogbe ehe sọgan to alọdlẹndo wánvú po kanlin he nọ lìn lẹ po.
Kavi “gbọfufu gbigbọ.”
To paa mẹ, “flin.”
Kavi “sọ yin alọdotena.”
Kavi “na ofẹ̀n afọ etọn tọn.”
Kavi “owán dagbe; owán he yọ́nsè.” To paa mẹ, “owán vivi.”
Kavi “hẹn oylan wá na.”
Kavi “alindọn.”
Kavi “ohùn alindọn mìtọn tọn.”
Kavi “alindọn.”
Kavi “Nutogbẹ̀.”
Kavi “alindọn.”
Kavi “alindọn gbẹ̀te agbasalan lẹpo tọn.”
Kavi “alindọn gbẹ̀te agbasalan lẹpo tọn.”
Kavi “Tòdaho tintan ahọluduta etọn tọn lẹ wẹ.”
Vlavo ehe to alọdlẹndo Nineve po tòdaho atọ̀n devo lẹ po.
Vlavo oyín ehelẹ nọtena hẹnnu kavi gbẹtọ lẹ he tọgbo yetọn yin Mizlaimi.
Kavi vlavo, “mẹdaho.”
Zẹẹmẹdo “Mimá.”
Kavi “mẹhe to aigba ji lẹ.”
To paa mẹ, “Jehovah jẹte nado pọ́n.”
Zẹẹmẹdo “Bẹwlu.”
Kavi “na mọ dona de yí na yede.”
Kavi “alindọn he.”
To paa mẹ, “Okún.”
Kavi “hùwaji,” enẹ wẹ, hùwaji Aigba Pagbe tọn.
Kavi “nado nọ finẹ taidi jonọ.”
Kavi “na alindọn ṣie nido nọgbẹ̀.”
Enẹ wẹ, “dòwaji agbàdo Jọdani tọn.”
To paa mẹ, “okún.”
To paa mẹ, “okún.”
To paa mẹ, “okún.”
E họnwun dọ ehe to alọdlẹndo ahọlu he yin nùdego to wf 1 mẹ lẹ.
Enẹ wẹ, Ohù Kúkú.
Kavi “nọ nọ̀ gòhọ lẹ mẹ to.”
Kavi “alindọn.”
To paa mẹ, “okún.”
To paa mẹ, “mẹde he na tọ́n sọn ohò towe mẹ.”
To paa mẹ, “okún.”
Kavi “to dopodopo yetọn, na yé nido sọgbe hẹ yede.”
To paa mẹ, “okún.”
To paa mẹ, “Okún.”
To paa mẹ, “do akọ́n towe nù.”
To paa mẹ, “okún.”
Zẹẹmẹdo “Jiwheyẹwhe Nọ Sè.”
Kavi “kẹtẹkẹtẹ gbémẹ tọn wunmẹ de; mẹdelẹ lẹndọ e dlẹnalọdo agbanlin wunmẹ de. Vlavo nado do lehe e nọ nọ̀ edeṣo do hia.”
Kavi vlavo, “nọ okẹ̀n mẹ hẹ.”
Kavi “he nọ mọ mi” kavi “he nọ hẹn ede nado yin mimọ.”
Zẹẹmẹdo “Dotọ̀ Ogbẹ̀nọ He Nọ Mọ Mi lọ Tọn.”
Zẹẹmẹdo “Otọ́ Yiaga (Yin Gigonọ).”
Zẹẹmẹdo “Otọ́ Gbẹtọgun de Tọn; Otọ́ Mẹsusu Tọn.”
To paa mẹ, “okún.”
To paa mẹ, “okún.”
To paa mẹ, “okún.”
To paa mẹ, “okún.”
To paa mẹ, “okún.”
To paa mẹ, “okún.”
Kavi “alindọn.”
Kavi “hùhù.”
Vlavo zẹẹmẹdo “Lewutọ.”
Zẹẹmẹdo “Ahọvi-yọnnu.”
Zẹẹmẹdo “Nukiko.”
To paa mẹ, “okún.”
To paa mẹ, “na huhlọn ahun mìtọn.”
To paa mẹ, “ojlẹnu sea tọn.” Ojlẹnu sea tọn dopo sọzẹn hẹ L 7,33. Pọ́n Nud. B14.
To paa mẹ, “Sala masọ nọ jẹla ba.”
Kavi “na mọ dona de yí na yede.”
Kavi “hihọ́ ohọ̀ ṣie tọn.” To paa mẹ, “yẹtẹn ohọ̀ ṣie tọn.”
Tofi “dawe lọ lẹ” dlẹnalọdo angẹli he ze agbasa gbẹtọ tọn do lọ lẹ.
Tofi “dawe lọ lẹ” dlẹnalọdo angẹli he ze agbasa gbẹtọ tọn do lọ lẹ.
Tofi “dawe lọ lẹ” dlẹnalọdo angẹli he ze agbasa gbẹtọ tọn do lọ lẹ.
Kavi “alindọn.”
Kavi “owanyi nugbo.”
Kavi “alindọn ṣie.”
Kavi “alindọn ṣie na gbọṣi ogbẹ̀.”
Zẹẹmẹdo “Pẹvi.”
Kavi “nọ nọ̀ Gelali taidi jonọ.”
Enẹ wẹ, e ma ko tindo kọndopọ zanhẹmẹ tọn hẹ ẹ.
Kavi “dodonọ.”
To paa mẹ, “Pọ́n, nukunmẹṣinyọnnu de wẹ ehe yin na we na.”
Kavi “ko sú vidọ̀ yọnnu he to owhé Abimẹlẹki tọn gbè lẹpo tọn mlẹnmlẹn.”
Kavi vlavo, “na kò mi.”
To paa mẹ, “okún.”
Vlavo zẹẹmẹdo “Dotọ̀ Whiwhle Tọn” kavi “Dotọ̀ Ṣinawe Tọn.”
Atin tamaliski tọn nọ wú to lẹdo he mẹ akú nọ do te taun lẹ mẹ.
Kavi “nọ aigba Filistinu lẹ tọn ji taidi jonọ.”
To paa mẹ, “azán susu.”
Kavi “olàn-hù-hí.”
Kavi “olàn-hù-hí.”
Zẹẹmẹdo “Jehovah Na Wleawu Etọn; Jehovah Na Penukundego.”
To paa mẹ, “okún.”
To paa mẹ, “okún.”
Kavi “tòdaho.”
To paa mẹ, “okún.”
Kavi vlavo, “Ahọvi daho.”
Kavi “alindọn mìtọn.”
Ṣekẹli dopo sọzẹn hẹ g 11,4. Pọ́n Nud. B14.
Ṣekẹli dopo sọzẹn hẹ g 11,4. Pọ́n Nud. B14.
To paa mẹ, “Okún.”
Ṣekẹli dopo sọzẹn hẹ g 11,4. Pọ́n Nud. B14.
Ṣekẹli dopo sọzẹn hẹ g 11,4. Pọ́n Nud. B14.
Vlavo to alọdlẹndo Labani.
To paa mẹ, “pànta adusiwhé kavi amiyọnwhé.”
Kavi “nado dọ e ylan kavi e yọ́n.”
Enẹ wẹ, yọnnu nukunpedomẹgotọ etọn he yin devi etọn todin.
Kavi “lẹzun onọ̀ fọtọ́n donu fọtọ́n ao lẹ tọn.”
To paa mẹ, “okún.”
Kavi “tòdaho.”
Enẹ wẹ, yọnnu he sunnu de dà gbọnvona asi etọn tintan, he ma tindo jlọjẹ sọ asi tintan.
Hogbe milomilo wẹ hogbe ehelẹ yin na okú.
Hogbe milomilo wẹ hogbe ehelẹ yin na okú.
Kavi vlavo, “Yé nọ nọ̀ okẹ̀n mẹ hẹ nọvisunnu yetọn lẹpo.”
Zẹẹmẹdo “Ofúnnọ.”
Zẹẹmẹdo “Ewọ He Hẹn Afọgbẹn Namẹ; Mẹhe Yí Tẹnmẹ to Mẹsi.”
To paa mẹ, “onú vẹẹ, yèdọ onú vẹẹ ehe.”
Kavi “nùdo dopo.”
Kavi “huvẹ to hùhù mi.”
Zẹẹmẹdo “Vẹẹ.”
To paa mẹ, “okún.”
To paa mẹ, “okún.”
To paa mẹ, “okún.”
To paa mẹ, “okún.”
Kavi “to Lebeka asi etọn gbò fán.”
Kavi “agbàdo tọ̀sisa tọn.” Pọ́n Zẹm.
Kavi “agbàdo tọ̀sisa tọn.” Pọ́n Zẹm.
Zẹẹmẹdo “Nudindọn.”
Zẹẹmẹdo “Whẹsadokọnamẹ.”
Zẹẹmẹdo “Nọtẹn He Gblo lẹ.”
To paa mẹ, “okún.”
To paa mẹ, “jẹ oyín Jehovah tọn ylọ.”
To paa mẹ, “awuvẹ sisè ayiha mẹ tọn.”
Kavi “alindọn ṣie.”
Kavi “alindọn towe.”
Kavi “alindọn ṣie.”
Kavi “alindọn towe.”
Zẹẹmẹdo “Ewọ He Hẹn Afọgbẹn Na Omẹ; Mẹhe Yí Tẹnmẹ to Mẹsi.”
Kavi “bo to homẹmiọnna ede po linlẹn lọ po dọ emi na hù we.”
To paa mẹ, “okún.”
Kavi “aliyá.”
To paa mẹ, “okún.”
To paa mẹ, “Okún.”
Kavi “na mọ dona de yí na yede.”
To paa mẹ, “okún.”
Zẹẹmẹdo “Owhé Jiwheyẹwhe tọn.”
To paa mẹ, “nọvisunnu.”
Kavi “Hẹnnumẹ tlọlọ.”
To paa mẹ, “nọvisunnu.”
To paa mẹ, “e hùn vidọ̀ etọn.”
Zẹẹmẹdo “Pọ́n, Visunnu de!”
Zẹẹmẹdo “Sisè.”
Zẹẹmẹdo “Sẹbọdo; Kọnawudopọ.”
Zẹẹmẹdo “Nado Pà; Whẹwhinwhẹ́n Nado Pà.”
Kavi “he ko whlá sinsẹ́n adọ̀mẹ tọn do we ya?”
To paa mẹ, “jivi do kligonu ṣie lẹ ji.”
Zẹẹmẹdo “Whẹdatọ.”
Zẹẹmẹdo “Agbàwhinwhlẹn Ṣie lẹ.”
Zẹẹmẹdo “Kosọ Dagbe.”
Zẹẹmẹdo “Ayajẹnọ; Ayajẹ.”
E yin atin-sinsẹ́n de he tindo sinmẹ yovozẹn tọn bo nọ taidi sinsẹ́n gbómá tọn.
Kavi “sú azọ́nkuẹ mẹhe yin hihaya tọn.”
Zẹẹmẹdo “Azọ́nkuẹ Wẹ Ewọ.”
Zẹẹmẹdo “Alọkikẹyi.”
To paa mẹ, “bo hùn vidọ̀ etọn.”
Sándogli Josifia tọn, ehe zẹẹmẹdo “Na Jah Ni Yidogọ (Hẹn Sudeji).”
Kavi “nugbodidọ.”
To paa mẹ, “hiẹ yiamisisadode.”
Kavi “yẹwhe whédo tọn.”
Enẹ wẹ, Euflate.
Kavi “hẹnnumẹ.”
To paa mẹ, “Họ́ dewe eyin nudagbe kavi nuylankan wẹ hiẹ jlo na dọna Jakọbu.”
To paa mẹ, “visunnu.”
To paa mẹ, “obu Isaki tọn.”
Hogbe Alamaikigbe tọn he zẹẹmẹdo “Okiti Kunnudide Tọn.”
Hogbe Heblugbe tọn he zẹẹmẹdo “Okiti Kunnudide Tọn.”
To paa mẹ, “gbọn obu otọ́ etọn Isaki tọn dali.”
To paa mẹ, “visunnu.”
Zẹẹmẹdo “Osla Awe.”
Kavi “nọ Labani dè taidi jonọ.”
To paa mẹ, “okún.”
Kavi “agbàdo tọ̀sisa tọn.”
Zẹẹmẹdo “Ahiditọ (Linsinyẹntọ) hẹ Jiwheyẹwhe” kavi “Jiwheyẹwhe Diahi.”
Zẹẹmẹdo “Nukunmẹ Jiwheyẹwhe Tọn.”
Kavi “alindọn ṣie.”
Kavi “Peniẹli.”
Zẹẹmẹdo “Azava; Adọtẹn.”
Kavi “nado yì pọ́n.”
Kavi “Alindọn etọn.”
To paa mẹ, “nado dọhona ahun awhli lọ tọn.”
Kavi “Alindọn Ṣekẹmi visunnu ṣie tọn dọ̀n do.”
To paa mẹ, “he tindo ayú tintan.”
Kavi “hẹn nugbajẹmẹji.”
Kavi “to ali he ji.”
Kavi “whlá.”
Zẹẹmẹdo “Jiwheyẹwhe Bẹtẹli tọn.”
Zẹẹmẹdo “Oaki Avi Tọn.”
To paa mẹ, “na wá sọn alinkàn towe.”
To paa mẹ, “okún.”
Kavi “alindọn emitọn to kúkú.”
Zẹẹmẹdo “Visunnu Aluẹmẹninọ Ṣie Tọn.”
Zẹẹmẹdo “Visunnu Adusilọ Tọn.”
To paa mẹ, “to whenue ewọ ko poyọnho bo gọ́ na azán lẹ.”
Hogbe milomilo wẹ hogbe ehelẹ yin na okú.
Kavi “alindọn he.”
Kavi “ninọ taidi jonọ lẹ.”
Kavi “ovivi.”
Kavi “ovivi.”
Ṣeiki yin nukọntọ hẹnnu tọn.
Kavi “ovivi.”
Kavi “Ovivi.”
To paa mẹ, “visunnu Islaeli tọn.”
To paa mẹ, “ogle.”
Kavi “awù gaa whanpẹnọ.”
Kavi “linú alindọn etọn.”
To paa mẹ, “Labdanum.”
Pọ́n Zẹm.
Kavi “Ṣeol,” enẹ wẹ, yọdò paa gbẹtọvi lẹ tọn. Pọ́n Zẹm.
Enẹ wẹ, Juda.
Zẹẹmẹdo “Awugble,” vlavo dlẹnalọdo awugbigblena alinhú.
To paa mẹ, “azán lẹ.”
To paa mẹ, “ze ota towe daga.”
To paa mẹ, “osindò mẹ; odò mẹ.”
To paa mẹ, “na de ota towe sẹ̀.”
To paa mẹ, “bo ze ota ahànjinọtọ-gán lọ po akladatọ-gán lọ po tọn daga.”
To paa mẹ, “osindò mẹ; odò mẹ.”
Hogbe Heblugbe tọn lọ sọgan sọ zẹẹmẹdo dọ e whlẹ́ atán po ota etọn po.
Kavi “Ofìn lọ kẹdẹ wẹ yẹn na yí do.”
Ehe na ko to alọdlẹndo hogbe de he nọ biọ dọ gbégbò po gigo po ni yin didohia mẹlọ.
To paa mẹ, “sọgan ze alọ kavi afọ etọn.”
Oyín ehe zẹẹmẹdo “Mẹhe Nọ De Onú Whiwhla lẹ Hia.”
Enẹ wẹ, Heliopolisi.
Kavi “gbejizọnlinzin ji gbọn.”
Kavi “biọ sinsẹ̀nzọn mẹ to.”
Enẹ wẹ, Heliopolisi.
Zẹẹmẹdo “Mẹhe Nọ Hẹnmẹ Nado Wọn.”
Zẹẹmẹdo “Sinsẹ́nnọ Donu Awe.”
Kavi “fie madogán.”
Kavi “awufiẹsa alindọn etọn tọn.”
Kavi “agbànhẹnnu.”
Kavi “Ṣeol,” enẹ wẹ, yọdò paa gbẹtọvi lẹ tọn. Pọ́n Zẹm.
Kavi “yin alọyitọ na ẹn.”
Kavi “agbànhẹnnu.”
Pọ́n Zẹm.
To paa mẹ, “Yé.”
Kavi “Ṣeol,” enẹ wẹ, yọdò paa gbẹtọvi lẹ tọn. Pọ́n Zẹm.
Kavi “Ṣeol,” enẹ wẹ, yọdò paa gbẹtọvi lẹ tọn. Pọ́n Zẹm.
Kavi “to otò lọ mẹ.”
To paa mẹ, “otọ́.”
To paa mẹ, “họ́ jẹ okọ̀ ji na.”
Kavi “nọgbẹ̀ gbọn.”
Kavi “dojó.”
Kavi “omẹ etọn.”
Enẹ wẹ, nado bọ nukun Jakọbu tọn lẹ do to okú etọn whenu.
Kavi “Alindọn.”
Kavi “alindọn.”
Septante slẹ oyín atọ́n dogọ. Ehe sọgan gọalọnamẹ nado mọnukunnujẹ nuhewutu Stefani donù alindọn 75 go mẹ to Ow 7:14 mẹ kakati nido yin alindọn 70, na e yọnbasi dọ ewọ na ko yihodọ sọn Septante mẹ wutu.
Enẹ wẹ, Heliopolisi.
Kavi “alindọn.”
To paa mẹ, “Visunnu Dani tọn lẹ.” Vlavo visunnu devo lẹ tin he oyín yetọn ma yin sislẹ.
Kavi “alindọn.”
Kavi “Alindọn he.”
Kavi “Alindọn.”
Kavi “alindọn he.”
Kavi “kandegbàn-atọ́n,” sọgbe hẹ Septante. Pọ́n Jen 46:20 Odò.
To paa mẹ, “họ́ jẹ okọ̀ ji na ẹn.”
Kavi “viavi do okọ́ ji na ẹn pludopludo.”
Kavi “do nọ gbéji na ojlẹ gli; do nọ gbéji taidi jonọ.”
Kavi “do nọ gbéji na ojlẹ gli; do nọ gbéji taidi jonọ.”
To paa mẹ, “akla.”
To paa mẹ, “Akla.”
To paa mẹ, “mlọnai hẹ otọ́ ṣie lẹ.”
To paa mẹ, “okún.”
To paa mẹ, “okún.”
Kavi “fli mi gọ̀.”
To paa mẹ, “okún.”
Kavi “dòdòmẹ aigba tọn.” To paa mẹ, “abọ́.”
Pọ́n Zẹm.
Kavi vlavo, “ayilinlẹn.”
To paa mẹ, “Alọ towe na tin to kọ̀godo na kẹntọ towe lẹ.”
Zẹẹmẹdo “Mẹhe Tọn E Yin; Ewọ Mẹhe Tọn E Yin.”
Kavi “núdùdù.”
To paa mẹ, “dojó.”
Enẹ wẹ, Josẹfu.
To paa mẹ, “Yé na gbọṣi ota na Josẹfu.”
Hogbe milomilo wẹ hogbe ehelẹ yin na okú.
Hogbe milomilo wẹ hogbe ehelẹ yin na okú.
Ehe yin aliho de he mẹ oṣiọ lẹ nọ yin nukunpedego te po nuyizan delẹ po taidi amì owán gblingblinnọ lẹ nado hẹn oṣiọ lọ gbọṣi aimẹ na e nikaa yọ̀n.
Kavi “whédo.”
Zẹẹmẹdo “Aluẹmẹninọ Egiptinu lẹ Tọn.”
Enẹ wẹ, yé yin nuyiwa hẹ taidi visunnu lẹ bo yin nukundagbe vonọtaun dohia.