LEVITIKU

1 Jehovah sọ ylọ Mose bo dọhlan ẹn sọn gòhọ opli tọn lọ mẹ+ dọmọ: 2 “Dọna Islaelivi* lẹ dọ, ‘Eyin mẹdepope to mì mẹ jlo na basi avọ́nunina de hlan Jehovah sọn kanlin whégbè tọn lẹ mẹ, e ni de avọ́nunina etọn sọn kanlinpa kavi lẹngbọpa etọn mẹ.+

3 “‘Eyin avọ́nunina mimẹ̀ wẹ e jlo na na sọn kanlinpa lọ mẹ, kanlin asu he to gángán de wẹ e dona na.+ E dona na ẹn sọn ojlo mẹ+ to Jehovah nukọn to họntonu gòhọ opli tọn lọ tọn. 4 E dona ze alọ etọn do ota na avọ́nunina mimẹ̀ lọ, e nasọ yin alọkẹyi nado basi ovẹsè do ota etọn mẹ.

5 “‘Enẹgodo, oyìnsú winyanwinyan lọ dona yin hùhù to Jehovah nukọn, podọ visunnu Aalọn tọn lẹ, yèdọ yẹwhenọ lọ lẹ+ na hẹn ohùn etọn wá bo húnhún in do adà agbà lọ tọn lẹpo ji,+ enẹ wẹ agbà he to họntonu gòhọ opli tọn lọ tọn. 6 Ayú na yin kinkọ́n sọn avọ́nunina mimẹ̀ lọ go bọ e nasọ yin jijá do flinflin.+ 7 Visunnu Aalọn tọn lẹ, yèdọ yẹwhenọ lọ lẹ na flọ miyọ́n do agbà lọ ji+ bo to nake lẹ do miyọ́n lọ mẹ. 8 Visunnu Aalọn tọn lẹ, yèdọ yẹwhenọ lọ lẹ nasọ to avọ́nunina he yin jijá do flinflin+ lọ po ota lọ po gọna ojó* lọ do nake lẹ ji to miyọ́n he to agbà lọ ji mẹ. 9 Adọ̀vi etọn lẹ po afọ etọn lẹ po na yin kiklọ́ po osin po, yẹwhenọ lọ nasọ hẹn ehe lẹpo nado to azọ̀ti to agbà lọ ji taidi avọ́nunina mimẹ̀ de, yèdọ avọ́nunina he yin bibasi gbọn miyọ́n dali de he yin owán gblingblin* de hlan Jehovah.+

10 “‘Eyin lẹngbọpa,+ agbò winyanwinyan kavi gbọgbọẹ lẹ mẹ wẹ e jlo na na avọ́nunina mimẹ̀ etọn sọn, e dona yin kanlin asu he to gángán de.+ 11 E na yin hùhù to agewaji agbà lọ tọn to Jehovah nukọn, podọ visunnu Aalọn tọn lẹ, yèdọ yẹwhenọ lọ lẹ na húnhún ohùn etọn do adà agbà lọ tọn lẹpo ji.+ 12 E na já ẹ do flinflin gọna ota etọn po ojó etọn* po, yẹwhenọ lọ nasọ to yé do nake lẹ ji to miyọ́n he to agbà lọ ji mẹ. 13 E na yí osin do klọ́ adọ̀vi lẹ po afọ lọ lẹ po, podọ yẹwhenọ lọ na hẹn popolẹpo wá bo hẹn ẹn nado to azọ̀ti to agbà lọ ji. Avọ́nunina mimẹ̀ de wẹ e yin, yèdọ avọ́nunina he yin bibasi gbọn miyọ́n dali de he yin owán gblingblin* de hlan Jehovah.

14 “‘Ṣigba, eyin ohẹ̀ lẹ wẹ e jlo na na taidi avọ́nunina mimẹ̀ de hlan Jehovah, e na na avọ́nunina etọn sọn owhlé kavi awhànnẹvu lẹ mẹ.+ 15 Yẹwhenọ lọ na hẹn ẹn wá agbà lọ kọ̀n bo na ṣùn vẹ́go-kàn etọn bo nasọ hẹn ẹn nado to azọ̀ti to agbà lọ ji, ṣigba ohùn etọn dona yin sinsọndai gbọn agbà lọ go. 16 E dona de adọgbo etọn po ofún etọn lẹ po bo na bẹ yé dlan do agbà lọ pá to whèzẹtẹn, yèdọ fie afín* lẹ nọ nọ̀.+ 17 E nasọ zẹ̀ ẹ gbọn fie awà etọn lẹ tin te, amọ́ e ma na yin mimá do awe. Enẹgodo, yẹwhenọ lọ na hẹn ẹn nado to azọ̀ti to agbà lọ ji, yèdọ to nake he to miyọ́n lọ mẹ lẹ ji. Avọ́nunina mimẹ̀ de wẹ e yin, yèdọ avọ́nunina he yin bibasi gbọn miyọ́n dali de he yin owán gblingblin* de hlan Jehovah.

2 “‘Todin, eyin mẹde* jlo na basi avọ́nunina jinukun-lili tọn+ hlan Jehovah, avọ́nunina etọn dona yin linfin dagbedagbe, e dona kọ̀n amì do e ji bo yí nuyọnwan gblingblin do e ji.+ 2 Enẹgodo, e na hẹn ẹn wá na visunnu Aalọn tọn lẹ, yèdọ yẹwhenọ lọ lẹ, podọ yẹwhenọ lọ na yí linfin dagbedagbe lọ alọgogo dopo po amì po gọna nuyọnwan gblingblin etọn lẹpo, e nasọ hẹn ẹn nado to azọ̀ti taidi avọ́nunina ohia tọn de*+ to agbà lọ ji, yèdọ avọ́nunina he yin bibasi gbọn miyọ́n dali de nado wleawuna owán gblingblin* de hlan Jehovah. 3 Depope he pò to avọ́nunina jinukun-lili tọn lọ mẹ na yin Aalọn po visunnu etọn lẹ po tọn+ taidi onú wiwe gbaugbau de+ sọn avọ́nunina he yin bibasi gbọn miyọ́n dali hlan Jehovah lẹ mẹ.

4 “‘Eyin akla he yin hìhì to adò mẹ de wẹ hiẹ jlo na yí do basi avọ́nunina jinukun-lili tọn, e dona yin linfin dagbedagbe tọn, yèdọ akla madotọ́n loboto he yè yí amì do yàn kavi akla madotọ́n wọ́dọ́wọ́dọ́ he ji yè húnhún amì do.+

5 “‘Eyin agbánvla+ de mẹ wẹ hiẹ jlo na basi avọ́nunina jinukun-lili tọn towe te, e dona yin linfin madotọ́n dagbedagbe he yè yí amì do yàn. 6 E dona yin winwẹ́n do flinflin, hiẹ nasọ kọ̀n amì do e ji.+ Avọ́nunina jinukun-lili tọn de wẹ.

7 “‘Eyin nudàzẹ́n de mẹ wẹ hiẹ jlo na basi avọ́nunina jinukun-lili tọn towe te, linfin dagbedagbe po amì po wẹ hiẹ dona yizan nado basi i. 8 Hiẹ dona hẹn avọ́nunina jinukun-lili tọn he yè yí onú enẹlẹ do basi wá na Jehovah, e na yin hinhẹnwa yẹwhenọ lọ dè bọ ewọ na hẹn ẹn wá agbà lọ kọ̀n. 9 Yẹwhenọ lọ na yí sọn avọ́nunina jinukun-lili tọn lọ mẹ taidi avọ́nunina ohia tọn de*+ bo nasọ hẹn ẹn nado to azọ̀ti to agbà lọ ji, taidi avọ́nunina he yin bibasi gbọn miyọ́n dali de nado wleawuna owán gblingblin* de hlan Jehovah.+ 10 Nuhe pò to avọ́nunina jinukun-lili tọn lọ mẹ na yin Aalọn po visunnu etọn lẹ po tọn taidi onú wiwe gbaugbau de sọn avọ́nunina he yin bibasi gbọn miyọ́n dali hlan Jehovah lẹ mẹ.+

11 “‘Depope to avọ́nunina jinukun-lili tọn he mì jlo na hẹnwa na Jehovah lẹ mẹ ma dona tindo otọ́n,+ na mì ma dona yí nuhe mẹ otọ́n yin dido depope zan kavi owín nado to azọ̀ti taidi avọ́nunina he yin bibasi gbọn miyọ́n dali de hlan Jehovah.

12 “‘Mì sọgan hẹn yé wá na Jehovah taidi avọ́nunina sinsẹ́n tintan tọn lẹ,+ ṣigba yé ma dona yin hinhẹnwa agbà lọ ji nado wleawuna owán gblingblin* de gba.

13 “‘Ojẹ̀ dona yin dido avọ́nunina jinukun-lili tọn depope he mì jlo na basi mẹ; podọ mì ma dona dike ojẹ̀ alẹnu Jiwheyẹwhe mìtọn tọn ni hán to avọ́nunina jinukun-lili tọn mìtọn mẹ. Ojẹ̀ dona nọ zọnpọ hẹ avọ́nunina mìtọn lẹpo.+

14 “‘Eyin avọ́nunina jinukun-lili sinsẹ́n bibia tintan tọn lẹ wẹ mì jlo na hẹnwa na Jehovah, jinukun yọyọ* he yin sisọ, yèdọ okún yọyọ he yin ginglin lẹ wẹ mì dona na taidi avọ́nunina jinukun-lili sinsẹ́n bibia tintan tọn lẹ.+ 15 Hiẹ dona kọ̀n amì do e ji bosọ yí nuyọnwan gblingblin do e ji. Avọ́nunina jinukun-lili tọn de wẹ. 16 Yẹwhenọ lọ na hẹn ẹn nado to azọ̀ti taidi avọ́nunina ohia tọn de,*+ enẹ wẹ delẹ sọn jinukun ginglin lọ po amì lọ po mẹ gọna nuyọnwan gblingblin etọn lẹpo, taidi avọ́nunina he yin bibasi gbọn miyọ́n dali de hlan Jehovah.

3 “‘Eyin avọ́sinsan jijọho tọn*+ wẹ e jlo na basi bọ e jlo na yí kanlin asu kavi asi de sọn kanlinpa lọ mẹ, kanlin he to gángán de wẹ e dona hẹnwa Jehovah nukọn. 2 E na ze alọ do ota na avọ́nunina etọn, e nasọ yin hùhù to họntonu gòhọ opli tọn lọ tọn; visunnu Aalọn tọn lẹ, yèdọ yẹwhenọ lọ lẹ nasọ húnhún ohùn lọ do adà agbà lọ tọn lẹpo ji. 3 Adà he e na na sọn avọ́sinsan jijọho tọn lọ mẹ taidi avọ́nunina he yin bibasi gbọn miyọ́n dali hlan Jehovah+ lẹ die: ojó+ he ṣinyọ́n adọ̀vi lẹ ji, ojó he lẹdo adọ̀vi lọ lẹpo, 4 gọna ayi awe lẹ po ojó he tin to yé ji sẹpọ alinkàn lọ po. E nasọ de ojó he tin to otù ji lọ po ayi lọ lẹ po sẹ̀.+ 5 Visunnu Aalọn tọn lẹ na hẹn ẹn nado to azọ̀ti to agbà lọ ji to aga na avọ́nunina mimẹ̀ lọ he yin zizedo nake he to miyọ́n mẹ lọ lẹ ji;+ avọ́nunina he yin bibasi gbọn miyọ́n dali de wẹ nado wleawuna owán gblingblin* de hlan Jehovah.+

6 “‘Eyin lẹngbọpa lọ mẹ wẹ e jlo na de avọ́nunina etọn sọn nado basi avọ́sinsan jijọho tọn hlan Jehovah, e dona yin kanlin asu kavi asi he to gángán de.+ 7 Eyin agbò winyanwinyan de wẹ e jlo na na taidi avọ́nunina, whenẹnu e na hẹn ẹn wá Jehovah nukọn. 8 E na ze alọ do ota na avọ́nunina etọn, e nasọ yin hùhù to gòhọ opli tọn lọ nukọn. Visunnu Aalọn tọn lẹ na húnhún ohùn etọn do adà agbà lọ tọn lẹpo ji. 9 E na hẹn ojó he yin didesọn avọ́sinsan jijọho tọn lọ mẹ wá taidi avọ́nunina he yin bibasi gbọn miyọ́n dali de hlan Jehovah.+ E na sán osi lọ pete do fie dojó sẹpọ nẹgbéhú lọ, ojó he ṣinyọ́n adọ̀vi lẹ ji, ojó he lẹdo adọ̀vi lọ lẹpo, 10 gọna ayi awe lẹ po ojó he tin to yé ji sẹpọ alinkàn lọ po. E nasọ de ojó he tin to otù ji po ayi lọ lẹ po sẹ̀.+ 11 Yẹwhenọ lọ nasọ hẹn ẹn nado to azọ̀ti to agbà lọ ji taidi núdùdù,* yèdọ avọ́nunina de he yin bibasi gbọn miyọ́n dali hlan Jehovah.+

12 “‘Eyin gbọgbọẹ de wẹ avọ́nunina etọn, whenẹnu e na hẹn ẹn wá Jehovah nukọn. 13 E na ze alọ etọn do ota na ẹn, e nasọ yin hùhù to gòhọ opli tọn lọ nukọn, visunnu Aalọn tọn lẹ nasọ húnhún ohùn etọn do adà agbà lọ tọn lẹpo ji. 14 Adà he e na hẹnwa taidi avọ́nunina he yin bibasi gbọn miyọ́n dali hlan Jehovah wẹ ojó he ṣinyọ́n adọ̀vi lẹ ji, ojó he lẹdo adọ̀vi lọ lẹpo,+ 15 gọna ayi awe lẹ po ojó he tin to yé ji sẹpọ alinkàn lọ po. E nasọ de ojó he tin to otù ji lọ po ayi lọ lẹ po sẹ̀. 16 Yẹwhenọ lọ na hẹn yé nado to azọ̀ti to agbà lọ ji taidi núdùdù,* yèdọ avọ́nunina de he yin bibasi gbọn miyọ́n dali, nado wleawuna owán gblingblin* de. Jehovah tọn wẹ ojó lọ lẹpo.+

17 “‘Osẹ́ndoai he na dẹn-to-aimẹ de wẹ ehe yin na whẹndo mìtọn lẹ to fininọ mìtọn lẹpo: Mì ma dona dù ojó kavi ohùn+ depope.’”

4 Jehovah sọ dọna Mose dọmọ: 2 “Dọna Islaelivi lẹ dọ, ‘Eyin mẹde* waylando to mayọnẹn mẹ+ gbọn nuhe Jehovah ko dosẹ́n etọn lẹ depope wiwà dali:

3 “‘Eyin yẹwhenọ he yin amisisayidode+ lọ waylando+ bo hẹn whẹhuhu wá mẹlọ lẹ ji, whenẹnu e dona na oyìnsú winyanwinyan he to gángán de hlan Jehovah taidi avọ́nunina ylando tọn de na ylando he e wà.+ 4 E na hẹn oyìnsú lọ wá họntonu gòhọ opli tọn lọ tọn+ to Jehovah nukọn bo na ze alọ do ota na oyìnsú lọ, e nasọ hù oyìnsú lọ to Jehovah nukọn.+ 5 Yẹwhenọ he yin amisisayidode+ lọ nasọ yí sọn ohùn oyìnsú lọ tọn mẹ bo na hẹn ẹn wá gòhọ opli tọn lọ mẹ; 6 yẹwhenọ lọ nasọ ylọn alọvi etọn do ohùn lọ mẹ+ bo mimí sọn ohùn lọ mẹ whla ṣinawe+ to Jehovah nukọn to họmẹgbòvọ̀ ofi wiwe lọ tọn nukọn. 7 Yẹwhenọ lọ nasọ yí sọn ohùn lọ mẹ do azò agbà nuyọnwan owán gblingblinnọ lọ tọn he to Jehovah nukọn to gòhọ opli tọn lọ mẹ lẹ ji;+ e nasọ kọ̀n ohùn oyìnsú lọ tọn he pò lẹpo do agbà avọ́nunina mimẹ̀ lọ tọn kọ̀n to kọmẹ+ to họntonu gòhọ opli tọn lọ tọn.

8 “‘Enẹgodo, e na de ojó oyìnsú avọ́nunina ylando tọn lọ tọn lẹpo sẹ̀, he bẹ ojó he ṣinyọ́n adọ̀vi lẹ ji po ojó he lẹdo adọ̀vi lọ lẹpo po hẹn, 9 gọna ayi awe lẹ po ojó he tin to yé ji sẹpọ alinkàn lọ po. E nasọ de ojó he tin to otù ji po ayi lọ lẹ po sẹ̀.+ 10 E na de onú ehelẹ sẹ̀ kẹdẹdile e nọ wà do na oyìnsú avọ́sinsan jijọho tọn lọ.+ Yẹwhenọ lọ nasọ hẹn yé nado to azọ̀ti to agbà avọ́nunina mimẹ̀ tọn lọ ji.

11 “‘Ṣigba, na nuhe dù ayú oyìnsú lọ tọn po olàn etọn lẹpo po gọna ota etọn, afọ etọn lẹ, adọ̀vi etọn lẹ, omí etọn lẹ+—12 yèdọ pipotọ oyìnsú lọ tọn pete—e na hẹn ẹn diun dọ e yin hinhẹn yì gbonu osla lọ tọn to fie wé de, yèdọ fie afín* lẹ nọ yin bibẹ dlan do, e nasọ fiọ ẹ to nake he tin to miyọ́n mẹ lọ lẹ ji.+ E dona yin fifiọ to fie afín lẹ nọ yin bibẹ dlan do.

13 “‘Todin, eyin akọta Islaeli tọn blebu ko hùwhẹ gbọn ylando de wiwà to mayọnẹn mẹ dali,+ ṣigba bọ gbẹtọgun lọ ma yọnẹn dọ yé ko wà nuhe Jehovah ko dosẹ́n etọn na yé,+ 14 bọ ylando lọ wá yin yinyọnẹn, whenẹnu gbẹtọgun lọ dona na oyìnsú winyanwinyan de na avọ́nunina ylando tọn bo hẹn ẹn wá gòhọ opli tọn lọ nukọn. 15 Mẹho agun pipli lọ tọn lẹ na bẹ alọ yetọn lẹ do ota na oyìnsú lọ to Jehovah nukọn, oyìnsú lọ nasọ yin hùhù to Jehovah nukọn.

16 “‘Enẹgodo, yẹwhenọ he yin amisisayidode lọ na yí sọn ohùn oyìnsú lọ tọn mẹ bo hẹn ẹn wá gòhọ opli tọn lọ mẹ. 17 Yẹwhenọ lọ nasọ ylọn alọvi etọn do ohùn lọ mẹ bo mimí in whla ṣinawe to Jehovah nukọn to họmẹgbòvọ̀ lọ nukọn.+ 18 Enẹgodo, e na yí sọn ohùn lọ mẹ do azò agbà+ he tin to Jehovah nukọn lọ tọn lẹ ji to gòhọ opli tọn lọ mẹ; e nasọ kọ̀n ohùn he pò lẹpo do agbà avọ́nunina mimẹ̀ tọn lọ kọ̀n to kọmẹ to họntonu gòhọ opli tọn lọ tọn.+ 19 E na de ojó etọn lẹpo sẹ̀ bo nasọ hẹn ẹn nado to azọ̀ti to agbà lọ ji.+ 20 Nuhe e wà na oyìnsú avọ́nunina ylando tọn tintan lọ wẹ e na wà na oyìnsú ehe lọsu. Nuhe e na wà na ẹn niyẹn, yẹwhenọ lọ nasọ basi ovẹsè do ota yetọn mẹ+ bọ e na yin jijona yé. 21 E na hẹn ẹn diun dọ oyìnsú lọ yin hinhẹn yì gbonu osla lọ tọn bo na fiọ ẹ kẹdẹdile e fiọ oyìnsú tintan lọ do.+ Avọ́nunina ylando tọn de wẹ e yin na gbẹtọgun lọ.+

22 “‘Eyin ahọvi+ de waylando to mayọnẹn mẹ gbọn dopo to nuhe Jehovah Jiwheyẹwhe etọn dosẹ́n etọn lẹpo mẹ wiwà dali bo hùwhẹ, 23 kavi eyin e wá yọnẹn dọ emi ko waylando de sọta gbedide lọ, whenẹnu e dona hẹn gbọgbọẹvu asu he to gángán de wá taidi avọ́nunina etọn. 24 E na ze alọ do ota na gbọgbọẹvu lọ bo hù i to fie avọ́nunina mimẹ̀ lẹ nọ yin hùhù te to Jehovah nukọn.+ Avọ́nunina ylando tọn de wẹ. 25 Yẹwhenọ lọ na yí sọn ohùn avọ́nunina ylando tọn lọ mẹ do alọvi etọn go bo na yí i do azò agbà avọ́nunina mimẹ̀ tọn lọ tọn lẹ ji,+ e nasọ kọ̀n ohùn etọn he pò do agbà avọ́nunina mimẹ̀ tọn lọ kọ̀n to kọmẹ.+ 26 E na hẹn ojó etọn lẹpo nado to azọ̀ti to agbà lọ ji taidi ojó avọ́sinsan jijọho tọn lọ tọn;+ yẹwhenọ lọ nasọ basi ovẹsè do ota etọn mẹ na ylando etọn bọ e na yin jijona ẹn.

27 “‘Eyin mẹdepope* to mẹhe tin to aigba lọ ji lẹ mẹ waylando to mayọnẹn mẹ bo hùwhẹ gbọn dopo to nuhe Jehovah dosẹ́n etọn lẹ mẹ wiwà dali,+ 28 kavi eyin e wá yọnẹn dọ emi ko waylando de, whenẹnu e na hẹn gbọgbọẹvu asi he to gángán de wá taidi avọ́nunina etọn na ylando he e ko wà lọ. 29 E na ze alọ do ota na avọ́nunina ylando tọn lọ bo na hù avọ́nunina ylando tọn lọ to fidopo lọ he avọ́nunina mimẹ̀ nọ yin hùhù te.+ 30 Yẹwhenọ lọ na yí sọn ohùn etọn mẹ do alọvi etọn go bo na yí i do azò agbà avọ́nunina mimẹ̀ lọ tọn lẹ ji bo nasọ kọ̀n ohùn etọn he pò lẹpo do agbà lọ kọ̀n to kọmẹ.+ 31 E na de ojó etọn lẹpo sẹ̀,+ kẹdẹdile ojó nọ yin didesọn avọ́sinsan jijọho tọn lọ mẹ do,+ yẹwhenọ lọ nasọ hẹn ẹn nado to azọ̀ti to agbà lọ ji taidi owán gblingblin* de hlan Jehovah; yẹwhenọ lọ na basi ovẹsè do ota etọn mẹ bọ e na yin jijona ẹn.

32 “‘Ṣigba, eyin lẹngbọvu de wẹ e jlo na na taidi avọ́nunina ylando tọn etọn, e dona yin lẹngbọvu asi he to gángán de. 33 E na ze alọ do ota na avọ́nunina ylando tọn lọ bo na hù i taidi avọ́nunina ylando tọn de to fie avọ́nunina mimẹ̀ nọ yin hùhù te.+ 34 Yẹwhenọ lọ na yí sọn ohùn avọ́nunina ylando tọn lọ tọn mẹ do alọvi etọn go bo na yí i do azò agbà avọ́nunina mimẹ̀ lọ tọn lẹ ji+ bo nasọ kọ̀n ohùn etọn he pò lẹpo do agbà lọ kọ̀n to kọmẹ. 35 E na de ojó etọn lẹpo sẹ̀ to aliho dopolọ he mẹ ojó agbò winyanwinyan avọ́sinsan jijọho tọn nọ yin didesẹ te, yẹwhenọ lọ nasọ hẹn yé nado to azọ̀ti to agbà lọ ji to aga na avọ́nunina he yin bibasi gbọn miyọ́n dali hlan Jehovah lẹ;+ yẹwhenọ lọ na basi ovẹsè do ota etọn mẹ na ylando he e ko wà bọ e na yin jijona ẹn.+

5 “‘Eyin mẹde* ko sè oylọ gbangba tọn de nado dekunnu*+ bọ ewọ yin kunnudetọ nuṣiwa lọ tọn, kavi ko mọ kavi ko sè dogbọn ylanwiwa lọ dali, ṣigba bo ma dọ ẹ, ewọ ko waylando bo nasọ jiya nuṣiwa etọn tọn.

2 “‘Kavi eyin mẹde* doalọ onú mawé de go, vlavo oṣiọ gbekanlin mawé de tọn, kanlin whégbè tọn mawé de tọn, kavi nudida flinflin mawé he nọ doawhàn zọnpọ lẹ tọn go,+ e ko yin mawé bosọ hùwhẹ eyin ewọ ma tlẹ yọnẹn. 3 Kavi eyin mẹde to mayọnẹn mẹ doalọ onú mawé he tọ́n sọn gbẹtọ go de go+—onú mawé depope he sọgan hẹn ẹn zun mawé—bọ e wá yọnẹn, whenẹnu e ko hùwhẹ.

4 “‘Kavi eyin mẹde* nọ plaplaji do whlé nado wà nude—vlavo nado wà dagbe kavi oylan, mahopọnna nudepope he e sọgan yin—ṣigba eyin e wá yọnẹn dọ emi ko nọ plaplaji do whlé to mayọnẹn mẹ, e ko hùwhẹ.*+

5 “‘Eyin e hùwhẹ dopo to onú ehelẹ mẹ tọn, whenẹnu e dona yigbe ylando etọn tọn.+ 6 E nasọ hẹn avọ́nunina whẹhuhu tọn wá na Jehovah na ylando he e ko wà,+ yèdọ kanlin asi de sọn lẹngbọpa lọ mẹ, vlavo lẹngbọvu asi kavi gbọgbọẹvu asi de na avọ́nunina ylando tọn. Yẹwhenọ lọ nasọ basi ovẹsè do ota etọn mẹ na ylando etọn.

7 “‘Ṣigba, eyin ewọ ma penugo nado na lẹngbọ de, e na hẹn owhlé awe kavi awhànnẹvu awe+ wá na Jehovah taidi avọ́nunina whẹhuhu tọn etọn na ylando lọ, yèdọ dopo na avọ́nunina ylando tọn podọ awetọ na avọ́nunina mimẹ̀.+ 8 Ewọ na hẹn yé wá na yẹwhenọ lọ, mẹhe na yí tintan do basi avọ́nunina ylando tọn bo na ṣùn vẹ́go-kàn etọn, ṣigba bo ma na sán okọ̀ etọn sẹ̀. 9 E na mimí apadewhe ohùn avọ́nunina ylando tọn lọ tọn do agbà lọ go, ṣigba e na sọ̀n ohùn he pò do agbà lọ kọ̀n to kọmẹ.+ Avọ́nunina ylando tọn de wẹ. 10 E na yí awetọ do basi avọ́nunina mimẹ̀ dile e ko nọ yin bibasi do;+ yẹwhenọ lọ nasọ basi ovẹsè do ota etọn mẹ na ylando he e ko wà bọ e na yin jijona ẹn.+

11 “‘Todin, eyin ewọ ma penugo nado na owhlé awe kavi awhànnẹvu awe, e dona hẹn linfin dagbedagbe mado-ao efa dopo tọn*+ wá taidi avọ́nunina ylando tọn na ylando etọn. E ma dona yí amì do e mẹ kavi yí nuyọnwan gblingblin do e ji, na avọ́nunina ylando tọn de wẹ. 12 E na hẹn ẹn wá yẹwhenọ lọ dè, yẹwhenọ lọ nasọ ba alọgogo dopo sọn e mẹ taidi avọ́nunina ohia tọn de,* e nasọ hẹn ẹn nado to azọ̀ti to agbà lọ ji to aga na avọ́nunina he yin bibasi gbọn miyọ́n dali hlan Jehovah lẹ. Avọ́nunina ylando tọn de wẹ. 13 Yẹwhenọ lọ na basi ovẹsè do ota etọn mẹ na ylando he e ko wà, yèdọ depope to ylando ehelẹ mẹ bọ e na yin jijona ẹn.+ Nuhe pò to avọ́nunina lọ mẹ na lẹzun yẹwhenọ lọ tọn,+ kẹdẹdi avọ́nunina jinukun-lili tọn.’”+

14 Jehovah sọ dọna Mose dọmọ: 15 “Eyin mẹde* yinuwa po nugbonọ-mayin po gbọn ylando wiwà to mayọnẹn mẹ sọta onú wiwe Jehovah tọn lẹ dali,+ e dona hẹn agbò he to gángán de wá na Jehovah sọn lẹngbọpa lọ mẹ taidi avọ́nunina whẹhuhu tọn de;+ akuẹ etọn he yin ṣekẹli* fataka tọn dona sọgbe hẹ ojlẹnu ṣekẹli tọn he yin ofi wiwe lọ* tọn.+ 16 E nasọ suahọ na ylando he e ko wà sọta ofi wiwe lọ bo nasọ sú mado-atọ́n akuẹ lọ tọn dogọ.+ E na yí i na yẹwhenọ lọ, na ewọ nido yí agbò avọ́nunina whẹhuhu tọn lọ do basi ovẹsè+ do ota etọn mẹ bọ e na yin jijona ẹn.+

17 “Eyin mẹde* waylando gbọn depope to nuhe Jehovah dosẹ́n etọn lẹ mẹ wiwà dali, eyin ewọ ma tlẹ yọnẹn, e ko hùwhẹ bo nasọ jiya nuṣiwa etọn tọn.+ 18 E na hẹn agbò he to gángán de wá na yẹwhenọ lọ sọn lẹngbọpa lọ mẹ sọgbe hẹ nuhe yin bibiọ na avọ́nunina whẹhuhu tọn.+ Yẹwhenọ lọ na basi ovẹsè do ota etọn mẹ na nuṣiwa he ma yin sọn ojlo mẹ lọ he e wà to mayọnẹn mẹ bọ e na yin jijona ẹn. 19 Avọ́nunina whẹhuhu tọn de wẹ. E họnwun dọ ewọ ko hùwhẹ ylanwiwa do Jehovah go tọn.”

6 Jehovah sọ dọna Mose dọmọ: 2 “Eyin mẹde* waylando bo yinuwa po nugbonọ-mayin po hlan Jehovah+ gbọn kọmẹnu etọn kiklọ dali gando nude he yin zizedo alọmẹ na ẹn,+ kavi he yin zizedo e dè go, kavi eyin e jẹajo do kọmẹnu etọn kavi hò e dù, 3 kavi eyin e mọ nuhe bu de bo yinuwa po oklọ po, bosọ whlé whiwhle lalo tọn gando ylando mọnkọtọn depope he ewọ ko wà go,+ nuhe e dona wà die: 4 Eyin ewọ waylando bo ko hùwhẹ, e dona gọ̀jó, yèdọ nuhe e fìn, nuhe e hòyí, nuhe e yí oklọ do yí, nuhe yin zizedo alọmẹ na ẹn, kavi nuhe bu bọ e mọ lọ, 5 kavi nudepope he go e whlé whiwhle lalo tọn gando, e dona suahọ etọn pipé,+ podọ e na sú mado-atọ́n akuẹ lọ tọn dogọ. E na yí i na núnọ lọ to azán he gbè whẹhuhu etọn yin didehia. 6 E nasọ hẹn agbò he to gángán de wá na yẹwhenọ lọ sọn lẹngbọpa lọ mẹ taidi avọ́nunina whẹhuhu tọn hlan Jehovah sọgbe hẹ nuhe yin gbigbò na ẹn na avọ́nunina whẹhuhu tọn.+ 7 Yẹwhenọ lọ na basi ovẹsè do ota etọn mẹ to Jehovah nukọn, podọ nudepope he e sọgan ko wà he zọ́n bọ e hùwhẹ na yin jijona ẹn.”+

8 Jehovah sọ dọna Mose whladopo dogọ dọmọ: 9 “Degbena Aalọn po visunnu etọn lẹ po dọ, ‘Osẹ́n avọ́nunina mimẹ̀ tọn die:+ Avọ́nunina mimẹ̀ lọ na gbọṣi agbà lọ ji to ozán lọ blebu mẹ kakajẹ afọnnu, miyọ́n nasọ to jiji to agbà lọ ji mapote. 10 Yẹwhenọ lọ na do azọ́nvọ̀+ etọn bo nasọ do ṣokoto gli* alavọ tọn lọ lẹ.+ Enẹgodo, e na bẹ afín+ avọ́nunina mimẹ̀ lọ tọn* he miyọ́n ko dù to agbà lọ ji do agbà lọ pá. 11 Enẹgodo, e na de awù etọn lẹ+ bo na do awù devo lẹ bo nasọ bẹ afín lọ lẹ yì fie wé de to gbonu osla lọ tọn.+ 12 Miyọ́n lọ na to jiji to agbà lọ ji mapote. E ma dona ṣí. Yẹwhenọ lọ dona nọ bẹ nake+ do e mẹ to afọnnu lẹpo bo na nọ to avọ́nunina mimẹ̀ do e ji bo nasọ nọ hẹn ojó avọ́sinsan jijọho tọn lẹ tọn nado to azọ̀ti to e ji.+ 13 Miyọ́n na nọ to jiji mapote to agbà lọ ji. E ma dona ṣí.

14 “‘Todin, osẹ́n avọ́nunina jinukun-lili tọn die:+ Visunnu Aalọn tọn lẹ wẹ na nọ hẹn ẹn wá Jehovah nukọn to agbà lọ nukọn. 15 Dopo to yé mẹ na ba linfin dagbedagbe avọ́nunina jinukun-lili tọn alọgogo dopo podọ vude sọn amì lọ mẹ gọna nuyọnwan gblingblin lẹpo he to avọ́nunina jinukun-lili tọn lọ ji, e nasọ hẹn ẹn nado to azọ̀ti to agbà lọ ji taidi owán gblingblin* de na avọ́nunina ohia tọn de* hlan Jehovah.+ 16 Aalọn po visunnu etọn lẹ po na dù nuhe pò lẹ.+ E na yin dùdù taidi akla madotọ́n to ofi wiwe de. Yé na dù i to awánu gòhọ opli tọn lọ tọn mẹ.+ 17 E ma dona yin hìhì dopọ po nudepope he mẹ otọ́n yin dido po.+ Yẹn ko yí i na yé taidi mimá yetọn sọn avọ́nunina he yin bibasi gbọn miyọ́n dali hlan mi lẹ mẹ.+ Onú wiwe gbaugbau de wẹ e yin,+ taidi avọ́nunina ylando tọn lọ podọ taidi avọ́nunina whẹhuhu tọn lọ. 18 Visunnu Aalọn tọn lẹpo wẹ na dù.+ Enẹ wẹ yin mimá tẹgbẹ tọn yetọn sọn whẹndo de ji jẹ whẹndo de ji to avọ́nunina he nọ yin bibasi gbọn miyọ́n dali hlan Jehovah lẹ mẹ.+ Nudepope he jẹ yé* go na lẹzun wiwe.’”

19 Jehovah sọ dọna Mose whladopo dogọ dọmọ: 20 “Avọ́nunina he Aalọn po visunnu etọn lẹ po na na hlan Jehovah to azán he gbè yé yin amisisayidode+ die: linfin dagbedagbe mado-ao efa dopo tọn*+ taidi avọ́nunina jinukun-lili tọn gbesisọ tọn de,+ yèdọ odaa to afọnnu podọ odaa to whèjai. 21 E na yin bibasi po amì po to agbánvla de mẹ.+ Hiẹ na yí amì do yàn ẹn ganji bo na hẹn ẹn wá taidi akla hìhì flinflin avọ́nunina jinukun-lili tọn he yin owán gblingblin* de hlan Jehovah. 22 Yẹwhenọ he yin amisisayidode he na jẹ otẹn etọn mẹ sọn visunnu etọn lẹ mẹ+ wẹ na basi i. Aṣẹdai he na dẹn-to-aimẹ de wẹ e yin: E na yin hinhẹn nado to azọ̀ti hlan Jehovah taidi avọ́nunina blebu de. 23 Avọ́nunina jinukun-lili tọn he yin yẹwhenọ tọn depope dona nọ yin nina taidi avọ́nunina blebu de. E ma dona yin dùdù.”

24 Jehovah sọ dọhona Mose whladopo dogọ dọmọ: 25 “Dọna Aalọn po visunnu etọn lẹ po dọ, ‘Osẹ́n avọ́nunina ylando tọn+ die: Fie avọ́nunina mimẹ̀ nọ yin hùhù te+ wẹ avọ́nunina ylando tọn lọsu na nọ yin hùhù te to Jehovah nukọn. Onú wiwe gbaugbau de wẹ. 26 Yẹwhenọ he yí i do sanvọ́ na ylando na dù i.+ E na yin dùdù to ofi wiwe de, yèdọ to awánu gòhọ opli tọn lọ tọn mẹ.+

27 “‘Nudepope he jẹ agbasa etọn go na lẹzun wiwe podọ eyin ohùn etọn jẹ awù mẹde tọn go, hiẹ dona klọ́ nuhe go ohùn jẹ lọ to ofi wiwe de. 28 Núzinzan okọ́ tọn he mẹ yè sọakusìn in te dona yin gbigbà hányán. Ṣigba, eyin núzinzan gànvẹẹ tọn mẹ wẹ yè sọakusìn in te, whenẹnu yè dona súnsún núzinzan lọ bosọ yí osin do klọ́ ẹ.

29 “‘Yẹwhenọ he yin sunnu lẹpo wẹ na dù i.+ Onú wiwe gbaugbau de wẹ.+ 30 Ṣigba, avọ́nunina ylando tọn depope he apadewhe ohùn etọn tọn yin hinhẹnwa gòhọ opli tọn lọ mẹ nado basi ovẹsè to ofi wiwe lọ ma dona yin dùdù.+ E dona yin fifiọ.

7 “‘Osẹ́n avọ́nunina whẹhuhu tọn+ die: Onú wiwe gbaugbau de wẹ. 2 Yé na hù avọ́nunina whẹhuhu tọn lọ to fie avọ́nunina mimẹ̀ lẹ nọ yin hùhù te, ohùn+ etọn nasọ yin húnhúnhún do adà agbà lọ tọn lẹpo ji.+ 3 E na na ojó etọn lẹpo,+ he bẹ osi he dojó po ojó he ṣinyọ́n adọ̀vi lẹ ji po hẹn, 4 gọna ayi awe lẹ po ojó yetọn he sẹpọ alinkàn lọ po. E nasọ de ojó he tin to otù ji lọ po ayi lọ lẹ po sẹ̀.+ 5 Yẹwhenọ lọ na hẹn yé nado to azọ̀ti to agbà lọ ji taidi avọ́nunina he yin bibasi gbọn miyọ́n dali hlan Jehovah.+ Avọ́nunina whẹhuhu tọn de wẹ. 6 Yẹwhenọ he yin sunnu lẹpo wẹ na dù i,+ e na yin dùdù to ofi wiwe de. Onú wiwe gbaugbau de wẹ.+ 7 Osẹ́n he gando avọ́nunina ylando tọn go lọ wẹ sọ gando avọ́nunina whẹhuhu tọn go; yẹwhenọ he yí i do basi ovẹsè tọn wẹ.+

8 “‘Eyin yẹwhenọ lọ na avọ́nunina mimẹ̀ de do ota mẹde tọn mẹ, ayú+ avọ́nunina mimẹ̀ he yin hinhẹnwa yẹwhenọ lọ dè tọn na yin etọn.

9 “‘Avọ́nunina jinukun-lili tọn depope he yin hìhì to adò mẹ kavi yin bibasi to nudàzẹ́n de mẹ kavi to agbánvla+ de mẹ na yin yẹwhenọ he na ẹn lọ tọn. Ewọ tọn wẹ e na yin.+ 10 Ṣigba, avọ́nunina jinukun-lili tọn depope he yè yí amì do yàn+ kavi he yin húhú+ na yin visunnu Aalọn tọn lẹpo tọn; yé na má ẹn do zẹnzẹn to yede ṣẹnṣẹn.

11 “‘Todin, osẹ́n avọ́sinsan jijọho tọn+ he mẹde sọgan hẹnwa Jehovah nukọn die: 12 Eyin e na ẹn taidi dohia pẹdido tọn+ wẹ, e na yí akla madotọ́n loboto he yè yí amì do yàn, akla madotọ́n wọ́dọ́wọ́dọ́ he ji yè húnhún amì do gọna akla madotọ́n loboto he yè yí linfin dagbedagbe do basi bo yí amì do yàn dopọ ganji dogọna avọ́sinsan pẹdido tọn lọ. 13 E na hẹn avọ́nunina etọn wá po akla loboto he mẹ otọ́n yin dido po gọna avọ́sinsan pẹdido tọn he yin avọ́sinsan jijọho tọn etọn. 14 E na na avọ́nunina lọ dopodopo taidi mimá wiwe de hlan Jehovah; e nasọ lẹzun yẹwhenọ he húnhún ohùn avọ́sinsan jijọho tọn lọ tọn.+ 15 Olàn avọ́sinsan pẹdido tọn he yin avọ́sinsan jijọho tọn lọ tọn dona yin dùdù to azán he gbè e yí i do sanvọ́ te. E ma dona pò depope dai kakajẹ afọnnu.+

16 “‘Eyin opà+ kavi avọ́nunina sọn ojlo mẹ+ de wẹ avọ́sinsan etọn yin, e dona yin dùdù to azán he gbè avọ́sinsan lọ yin bibasi te, podọ to wunkẹngbe nuhe pò to e mẹ sọgan yin dùdù ga. 17 Amọ́, olàn avọ́sinsan lọ tọn depope he pò jẹ azán atọ̀ntọ gbè dona yin fifiọ.+ 18 Ṣigba, eyin olàn avọ́sinsan jijọho tọn lọ tọn depope yin dùdù to azán atọ̀ntọ gbè, mẹhe na ẹn lọ ma na yin alọkẹyi. E ma na hẹn ale de wá na ẹn; whẹhuhu de wẹ e yin, mẹhe* sọ dù sọn e mẹ na jiya nuṣiwa etọn tọn.+ 19 Olàn he jẹ onú mawé depope go ma dona yin dùdù. E dona yin fifiọ. Mẹdepope he wé wẹ sọgan dù olàn wiwe.

20 “‘Ṣigba, eyin mẹde* yin mawé bo dù olàn avọ́sinsan jijọho tọn he yin Jehovah tọn, omẹ* enẹ dona yin sinsánsẹ* sọn omẹ etọn lẹ mẹ.+ 21 Eyin mẹde* doalọ onú mawé depope go, vlavo onú mawé he tọ́n sọn gbẹtọ go de+ kavi kanlin mawé de+ kavi onú mawé depope he yin awuhiọnu de,+ bo wá dù sọn olàn avọ́sinsan jijọho tọn he yin Jehovah tọn lọ mẹ, omẹ* enẹ dona yin sinsánsẹ* sọn omẹ etọn lẹ mẹ.’”

22 Jehovah zindonukọn nado dọhona Mose dọmọ: 23 “Dọna Islaelivi lẹ dọ, ‘Mì ma dona dù ojó+ oyìnsú kavi agbò winyanwinyan kavi gbọgbọẹ depope tọn. 24 Ojó kanlin kúkú he yin mimọ de tọn po kanlin he yin hùhù gbọn kanlin devo dali tọn po sọgan yin yiyizan na nudevo depope, ṣigba mì ma dona dù i gbede.+ 25 Na mẹdepope he dù sọn ojó kanlin he e hẹnwa taidi avọ́nunina he yin bibasi gbọn miyọ́n dali hlan Jehovah tọn de mẹ dona yin sinsánsẹ* sọn omẹ etọn lẹ mẹ.

26 “‘Mì ma dona dù ohùn+ depope to fidepope he mì nọ nọ̀, vlavo ohùn ohẹ̀ lẹ tọn kavi kanlin lẹ tọn. 27 Mẹdepope* he dù ohùn depope dona yin sinsánsẹ*+ sọn omẹ etọn lẹ mẹ.’”

28 Jehovah zindonukọn nado dọhona Mose dọmọ: 29 “Dọna Islaelivi lẹ dọ, ‘Mẹdepope he na na avọ́sinsan jijọho tọn etọn hlan Jehovah dona hẹn adà de sọn avọ́sinsan jijọho tọn lọ mẹ wá na Jehovah.+ 30 Alọ edetiti tọn wẹ e na yí do hẹn ojó + lọ po akọ́nnu lọ po wá taidi avọ́nunina he yin bibasi gbọn miyọ́n dali hlan Jehovah, e nasọ mimí i yigodo yinukọn taidi avọ́nunina he yè mimí de+ to Jehovah nukọn. 31 Yẹwhenọ lọ na hẹn ojó lọ nado to azọ̀ti to agbà lọ ji,+ ṣigba akọ́nnu lọ na yin Aalọn po visunnu etọn lẹ po tọn.+

32 “‘Mì na yí asá adusi tọn na yẹwhenọ lọ taidi mimá wiwe de sọn avọ́sinsan jijọho tọn mìtọn lẹ mẹ.+ 33 Visunnu Aalọn tọn he yí ohùn avọ́sinsan jijọho tọn po ojó lọ po do sanvọ́ wẹ na yí asá adusi tọn lọ taidi mimá etọn.+ 34 Na yẹn yí akọ́nnu avọ́nunina he yè mimí lọ tọn po asá mimá wiwe lọ tọn po sọn avọ́sinsan jijọho tọn Islaelivi lẹ tọn mẹ, yẹn sọ yí yé na Aalọn yẹwhenọ lọ po visunnu etọn lẹ po taidi aṣẹdai he na dẹn-to-aimẹ de na Islaelivi lẹ.+

35 “‘Mimá enẹ wẹ yin didedovo sọn avọ́nunina he yin bibasi gbọn miyọ́n dali hlan Jehovah lẹ mẹ na yẹwhenọ lẹ, yèdọ na Aalọn po visunnu etọn lẹ po to azán he gbè yé yin hinhẹnwa nado sẹ̀n taidi yẹwhenọ lẹ hlan Jehovah.+ 36 Jehovah degbe dọ Islaelivi lẹ ni nọ na yé mimá ehe to azán he gbè e yí amisisadode yé.+ Osẹ́ndoai tẹgbẹ tọn de wẹ e yin sọn whẹndo de ji jẹ whẹndo de ji.’”

37 Osẹ́n he yin nina gando avọ́nunina mimẹ̀,+ avọ́nunina jinukun-lili tọn,+ avọ́nunina ylando tọn,+ avọ́nunina whẹhuhu tọn,+ avọ́sinsan aṣẹ-ninamẹ tọn+ po avọ́sinsan jijọho tọn+ po go niyẹn, 38 kẹdẹdile Jehovah ko degbe etọn na Mose do to Osó Sinai tọn ji+ to azán he gbè e degbena Islaelivi lẹ nado nọ hẹn avọ́nunina yetọn lẹ wá na Jehovah to danfafa Sinai tọn ji.+

8 Jehovah sọ zindonukọn nado dọhona Mose dọmọ: 2 “Plan Aalọn po visunnu etọn lẹ po+ bo ze awù lọ lẹ,+ amì mẹdide tọn lọ,+ oyìnsú avọ́nunina ylando tọn lọ, agbò awe lẹ po ohà akla madotọ́n tọn lọ po,+ 3 bo pli mẹlọ lẹpo do họntonu gòhọ opli tọn lọ tọn.”

4 Enẹwutu, Mose wà kẹdẹdile Jehovah ko degbe etọn na ẹn do, mẹlọ lẹ sọ pli dopọ do họntonu gòhọ opli tọn lọ tọn. 5 Todin, Mose dọna agun pipli lọ dọmọ: “Nuhe Jehovah ko degbe etọn na mí nado wà lẹ die.” 6 Mose sọ plan Aalọn po visunnu etọn lẹ po wá bo degbena yé nado lawu.+ 7 Enẹgodo, e do tewu+ lọ na ẹn bo sìn homẹblanu+ lọ na ẹn bosọ do awù he ma tindo awà+ lọ na ẹn, e sọ ze efọdi*+ lọ do Aalọn go bo yí homẹblanu linlọ̀n*+ efọdi lọ tọn do sìn efọdi lọ do Aalọn go gbanun-gbanun. 8 E sọ ze apò akọ́nnu tọn*+ lọ do e go bo ze Ulimi po Tumimi* po+ do apò akọ́nnu tọn lọ mẹ. 9 Enẹgodo, e ze tabla vonọtaun+ lọ do ota na ẹn bo ze ogàn sisẹ́ plẹ́bẹ́ sika tọn lọ, yèdọ ohia wiwe klandowiwe tọn*+ lọ do tabla lọ nukọn, kẹdẹdile Jehovah ko degbe etọn na Mose do.

10 Mose sọ ze amì mẹdide tọn lọ bo kọ̀n ẹn do* gòhọtúntún lọ po nuhe tin to e mẹ lẹpo po ji+ bosọ hẹn yé zun wiwe. 11 Enẹgodo, e yí sọn amì lọ mẹ bo húnhún in whla ṣinawe do agbà lọ ji bosọ kọ̀n amì do agbà lọ po nuyizan etọn lẹpo po ji podọ do basia lọ po nuhe ji e yin zizedo po ji nado hẹn yé zun wiwe. 12 E sọ kọ̀n vude sọn amì mẹdide tọn lọ mẹ do ota na Aalọn bo yiamisisadode e nado hẹn ẹn zun wiwe.+

13 Enẹgodo, Mose hẹn visunnu Aalọn tọn lẹ sẹpọ bo do tewu lẹ na yé bosọ sìn homẹblanu lọ lẹ na yé bo ze* tabla yetọn lẹ do ota na yé,+ kẹdẹdile Jehovah ko degbe etọn na Mose do.

14 Enẹgodo, e hẹn oyìnsú avọ́nunina ylando tọn lọ wá bọ Aalọn po visunnu etọn lẹ po bẹ alọ yetọn lẹ do ota na oyìnsú avọ́nunina ylando tọn lọ.+ 15 Mose sọ hù i bo yí ohùn+ lọ do alọvi etọn go bosọ yí i do azò agbà lọ tọn lẹ ji gbọn filẹpo bo klan agbà lọ do wiwe sọn ylando mẹ, ṣigba ohùn he pò wẹ e kọ̀n do agbà lọ kọ̀n to kọmẹ nado hẹn ẹn zun wiwe na e nido basi ovẹsè to e ji. 16 Enẹgodo, e yí ojó he tin to adọ̀vi ji lọ lẹpo, ojó he to otù ji, ayi awe lẹ po ojó he tin to yé ji lẹ po, Mose sọ hẹn yé nado to azọ̀ti to agbà lọ ji.+ 17 Mose sọ fiọ pipotọ oyìnsú lọ tọn, ayú etọn, olàn etọn po omí etọn po to gbonu osla lọ tọn,+ kẹdẹdile Jehovah ko degbe etọn na ẹn do.

18 Todin, e hẹn agbò avọ́nunina mimẹ̀ tọn lọ sẹpọ bọ Aalọn po visunnu etọn lẹ po sọ bẹ alọ yetọn lẹ do ota na agbò lọ.+ 19 Enẹgodo, Mose hù i bo húnhún ohùn lọ do adà agbà lọ tọn lẹpo ji. 20 E sọ já agbò lọ do flinflin, Mose sọ hẹn ota lọ, jijá lọ lẹ po ojó* lọ po nado to azọ̀ti. 21 E yí osin do klọ́ adọ̀vi lọ lẹ po afọ lọ lẹ po, Mose sọ hẹn agbò lọ blebu nado to azọ̀ti to agbà lọ ji. Avọ́nunina mimẹ̀ de wẹ e yin nado wleawuna owán gblingblin* de. Avọ́nunina he yin bibasi gbọn miyọ́n dali hlan Jehovah de wẹ e yin, kẹdẹdile Jehovah ko degbe etọn na Mose do.

22 Enẹgodo, e hẹn agbò awetọ lọ wá, yèdọ agbò aṣẹ-ninamẹ tọn lọ,+ Aalọn po visunnu etọn lẹ po sọ bẹ alọ yetọn lẹ do ota na agbò lọ.+ 23 Mose sọ hù i bo yí sọn ohùn etọn mẹ bosọ yí i do otó adusi tọn Aalọn tọn go podọ do alọsu adusi tọn etọn ji podọ do afọsu adusi tọn etọn ji. 24 Mose sọ hẹn visunnu Aalọn tọn lẹ wá bo yí sọn ohùn lọ mẹ bosọ yí i do otó adusi tọn yetọn go podọ do alọsu adusi tọn yetọn ji podọ do afọsu adusi tọn yetọn ji; ṣigba ohùn he pò wẹ e húnhún do adà agbà lọ tọn lẹpo ji.+

25 Enẹgodo, e yí ojó lọ, osi he dojó lọ, ojó he tin to adọ̀vi lọ ji lẹpo, ojó he to otù ji, ayi awe lẹ po ojó yetọn po gọna asá adusi tọn lọ.+ 26 E sọ yí akla madotọ́n loboto dopo,+ akla loboto he yè yí amì do yàn dopo+ po akla wọ́dọ́wọ́dọ́ dopo po sọn ohà akla madotọ́n tọn he tin to Jehovah nukọn lọ mẹ. E sọ ze yé do ojó lọ lẹ po asá adusi tọn lọ po ji. 27 Enẹgodo, e bẹ popolẹpo do alọ Aalọn po visunnu etọn lẹ po tọn mẹ bosọ jẹ yé mimí ji yigodo yinukọn taidi avọ́nunina he yè mimí de to Jehovah nukọn. 28 Mose sọ yí yé sọn alọ yetọn mẹ bo hẹn yé nado to azọ̀ti to agbà lọ ji to aga na avọ́nunina mimẹ̀ lọ. Avọ́sinsan aṣẹ-ninamẹ tọn de wẹ yé yin nado wleawuna owán gblingblin* de. Avọ́nunina he yin bibasi gbọn miyọ́n dali hlan Jehovah de wẹ.

29 Mose sọ yí akọ́nnu lọ bo mimí i yigodo yinukọn taidi avọ́nunina he yè mimí de to Jehovah nukọn.+ Enẹ wẹ yin mimá Mose tọn sọn agbò aṣẹ-ninamẹ tọn lọ mẹ, kẹdẹdile Jehovah ko degbe etọn na Mose do.+

30 Enẹgodo, Mose yí sọn amì mẹdide tọn+ lọ mẹ podọ sọn ohùn he to agbà lọ ji mẹ bo mimí yé do Aalọn po awù etọn lẹ po go podọ do visunnu etọn he tin to e dè lẹ po awù yetọn lẹ po go. Gbọnmọ dali, e hẹn Aalọn po awù etọn lẹ po gọna visunnu etọn lẹ+ po awù yetọn lẹ po zun wiwe.+

31 Mose sọ dọna Aalọn po visunnu etọn lẹ po dọmọ: “Mì sọakusìn+ olàn lọ to họntonu gòhọ opli tọn lọ tọn, mì nasọ dù i po akla he tin to ohà aṣẹ-ninamẹ tọn lọ mẹ po to finẹ, kẹdẹdile yè ko degbe etọn na mi do dọ, ‘Aalọn po visunnu etọn lẹ po wẹ na dù i.’+ 32 Olàn po akla he pò po wẹ mì na fiọ.+ 33 Mì ma dona tọ́n sọn họntonu gòhọ opli tọn lọ tọn na azán ṣinawe, kakajẹ whenue azán aṣẹ-ninamẹ tọn mìtọn na wá vivọnu, na e na yí azán ṣinawe nado na aṣẹ mì* taidi yẹwhenọ lẹ.+ 34 Jehovah wẹ degbe dọ mí ni wà nuhe mí wà to egbé nado sọgan basi ovẹsè do ota mìtọn mẹ.+ 35 Mì na gbọṣi họntonu gòhọ opli tọn lọ tọn to okle po ozán po na azán ṣinawe+ bo nasọ nọ setonuna nubiọtomẹsi Jehovah tọn lẹ,+ na mì nikaa kú; enẹ wẹ gbedide he yin nina mi.”

36 Aalọn po visunnu etọn lẹ po sọ wà nuhe Jehovah ko degbe etọn gbọn Mose gblamẹ lẹpo.

9 To azán ṣinatọ̀ntọ gbè,+ Mose ylọ Aalọn po visunnu etọn lẹ po gọna mẹho Islaeli tọn lẹ. 2 E sọ dọna Aalọn dọmọ: “Hiẹ ni yí oyìnvu de na avọ́nunina ylando tọn,+ agbò de na avọ́nunina mimẹ̀, yèdọ ehe to gángán lẹ bo hẹn yé wá Jehovah nukọn. 3 Ṣigba, hiẹ na dọna Islaelivi lẹ dọ, ‘Mì yí gbọgbọẹ asu de na avọ́nunina ylando tọn podọ oyìnvu de po agbò winyanwinyan de po he dopodopo yetọn tindo owhe dopo, yèdọ ehe to gángán lẹ na avọ́nunina mimẹ̀, 4 podọ oyìnsú de po agbò de po na avọ́sinsan jijọho tọn+ nado yí yé do sanvọ́ to Jehovah nukọn, podọ avọ́nunina jinukun-lili+ he yè yí amì do yàn tọn, na egbé wẹ Jehovah na sọawuhia mì.’”+

5 Enẹwutu, yé hẹn nuhe Mose ko degbe etọn lẹ wá gòhọ opli tọn lọ nukọn. Agun pipli lọ blebu sọ wá bo ṣite to Jehovah nukọn. 6 Mose sọ dọmọ: “Ehe wẹ nuhe Jehovah ko degbe etọn na mì nado wà, na Jehovah nido sọgan do gigo etọn hia mì.”+ 7 Mose sọ dọna Aalọn dọmọ: “Dọnsẹpọ agbà lọ bo na avọ́nunina ylando tọn+ towe po avọ́nunina mimẹ̀ towe po bosọ basi ovẹsè do ota towe mẹ+ podọ do ota whédo towe tọn mẹ; hiẹ nisọ na avọ́nunina mẹlọ lẹ tọn+ bo basi ovẹsè do ota yetọn mẹ,+ kẹdẹdile Jehovah ko degbe etọn do.”

8 To afọdopolọji, Aalọn dọnsẹpọ agbà lọ bo hù oyìnvu avọ́nunina ylando tọn etọn.+ 9 Visunnu Aalọn tọn lẹ sọ ze ohùn+ lọ wá e dè bọ e ylọn alọvi etọn do ohùn lọ mẹ bo yí i do azò agbà lọ tọn lẹ ji, e sọ kọ̀n ohùn he pò do agbà lọ kọ̀n to kọmẹ.+ 10 E sọ hẹn ojó lọ, ayi lọ lẹ po ojó he to otù ji he yin didesọn avọ́nunina ylando tọn lọ mẹ po nado to azọ̀ti to agbà lọ ji, kẹdẹdile Jehovah ko degbe etọn na Mose do.+ 11 E sọ fiọ olàn lọ po ayú lọ po to gbonu osla lọ tọn.+

12 Enẹgodo, e hù avọ́nunina mimẹ̀ lọ bọ visunnu Aalọn tọn lẹ hẹn ohùn lọ wá e dè, e sọ húnhún in do adà agbà lọ tọn lẹpo ji.+ 13 Yé sọ hẹn avọ́nunina mimẹ̀ he yin jijá lọ lẹ wá e dè po ota lọ po, e sọ hẹn yé nado to azọ̀ti to agbà lọ ji. 14 Humọ, e klọ́ adọ̀vi lọ lẹ po afọ lọ lẹ po bo hẹn yé nado to azọ̀ti to aga na avọ́nunina mimẹ̀ lọ to agbà lọ ji.

15 E sọ hẹn avọ́nunina mẹlọ lẹ tọn wá bo yí gbọgbọẹ avọ́nunina ylando tọn mẹlọ lẹ tọn bo hù i bosọ yí i do basi avọ́nunina ylando tọn taidi tintan tọn. 16 E sọ hẹn avọ́nunina mimẹ̀ lọ wá bo basi i dile e ko nọ yin bibasi do.+

17 Enẹgodo, e hẹn avọ́nunina jinukun-lili tọn+ lọ wá, e sọ ba ẹ gọ́ alọ etọn bosọ hẹn ẹn nado to azọ̀ti to agbà lọ ji to pọmẹ hẹ avọ́nunina mimẹ̀ afọnnu tọn lọ.+

18 Enẹgodo, e hù oyìnsú po agbò avọ́sinsan jijọho tọn mẹlọ lẹ tọn po. Visunnu Aalọn tọn lẹ sọ ze ohùn lọ wá e dè bọ e húnhún in do adà agbà lọ tọn lẹpo ji.+ 19 Na nuhe dù ojó oyìnsú lọ tọn lẹ,+ osi he dojó agbò lọ tọn, ojó he ṣinyọ́n homẹnú lẹ ji, ayi lẹ, ojó he to otù ji,+ 20 yé sọ ze ojó enẹ lẹpo do akọ́nnu lọ lẹ ji, podọ to enẹgodo e hẹn ojó lọ lẹ nado to azọ̀ti to agbà lọ ji.+ 21 Ṣigba, akọ́nnu lọ lẹ po asá adusi tọn lọ po wẹ Aalọn mimí yigodo yinukọn taidi avọ́nunina he yè mimí de to Jehovah nukọn, kẹdẹdile Mose ko degbe etọn do.+

22 Aalọn sọ ze alọ etọn lẹ daga hlan mẹlọ lẹ bo dona yé,+ e sọ jẹte to whenue e ko basi avọ́nunina ylando tọn lọ, avọ́nunina mimẹ̀ lọ po avọ́sinsan jijọho tọn lọ po godo. 23 Enẹgodo, Mose po Aalọn po biọ gòhọ opli tọn lọ mẹ bosọ tọ́njẹgbonu bo dona mẹlọ lẹ.+

Todin, gigo Jehovah tọn sọawuhia mẹlọ lẹpo,+ 24 miyọ́n sọ tọ́n sọn Jehovah dè+ bo jẹ avọ́nunina mimẹ̀ lọ po ojó he to agbà lọ ji lẹ po fiọ ji. To whenue mẹlọ lẹpo mọ ẹn, yé dabobo bosọ ṣinyọ́n nukunmẹ yetọn ai.+

10 Enẹgodo, visunnu Aalọn tọn lẹ Nadabi po Abihu po+ ze miyọ́n-hẹnnú yetọn bo de miyọ́n do e mẹ bosọ yí nuyọnwan+ do e ji. Yé sọ jẹ avọ́nunina he ma yin alọkẹyi+ de na ji to Jehovah nukọn, yèdọ ehe ewọ ma degbe etọn na yé. 2 To whenẹnu, miyọ́n de tọ́n sọn Jehovah dè bo fiọ yé,+ yé sọ kú to Jehovah nukọn.+ 3 Mose sọ dọna Aalọn dọmọ: “Nuhe Jehovah dọ die, ‘Yẹn na yin hinhẹn zun wiwe to mẹhe sẹpọ mi lẹ ṣẹnṣẹn,+ podọ yẹn na yin gigopana to gbẹtọ lẹpo nukọn.’” Aalọn sọ gbọṣi abọẹ.

4 Enẹwutu, Mose ylọ Miṣaẹli po Ẹlzafani po he yin visunnu Uziẹli+ tọn lẹ, mẹhe yin tavẹ Aalọn tọn, bo dọna yé dọmọ: “Mì wáfi, mì ze nọvisunnu mìtọn lẹ sọn ofi wiwe lọ nukọn yì gbonu osla lọ tọn.” 5 Yé sọ wá bo ze sunnu lọ lẹ to tewu yetọn lẹ mẹ yì gbonu osla lọ tọn, kẹdẹdile Mose ko dọna yé do.

6 Mose sọ dọna Aalọn po visunnu etọn he pò lẹ po, yèdọ Eleazali po Itamali po dọmọ: “Mì dovọ́na ota mìtọn kavi vún awù mìtọn lẹ blo,+ na mì nikaa kú podọ na Jiwheyẹwhe nikaa gblehomẹ do agun pipli lọ blebu go. Nọvisunnu mìtọn lẹ, yèdọ whédo Islaeli tọn blebu wẹ na ví mẹhe Jehovah yí miyọ́n do hù lọ lẹ. 7 Mì ma dona tọ́n sọn họntonu gòhọ opli tọn lọ tọn na mì nikaa kú, na yè ko yí amì mẹdide tọn Jehovah tọn do de mì wutu.”+ Enẹwutu, yé basi kẹdẹdile Mose dọna yé do.

8 Enẹgodo, Jehovah dọna Aalọn dọmọ: 9 “Hiẹ ma dona nù ovẹn kavi ahàn sinsinyẹn devo de, yèdọ hiẹ po visunnu towe lẹ po, to whenue mì ja gòhọ opli tọn lọ mẹ,+ na mì nikaa kú. Osẹ́ndoai tẹgbẹ tọn de wẹ e yin sọn whẹndo de ji jẹ whẹndo de ji. 10 Ehe na do vogbingbọn hia to onú wiwe po nuhe yin hinhẹnflu po ṣẹnṣẹn podọ to onú mawé po onú wiwe po ṣẹnṣẹn,+ 11 podọ nado plọn Islaelivi lẹ nunọwhinnusẹ́n he Jehovah ko na yé gbọn Mose gblamẹ lẹpo.”+

12 Mose sọ dọna Aalọn gọna Eleazali po Itamali po he yin visunnu etọn he pò lẹ dọmọ: “Mì ze avọ́nunina jinukun-lili tọn he pò to avọ́nunina he yin bibasi gbọn miyọ́n dali hlan Jehovah lẹ mẹ bo dù i taidi akla madotọ́n to agbà lọ kọ̀n,+ na onú wiwe gbaugbau de wẹ.+ 13 Mì dona dù i to ofi wiwe de,+ na mimá mìtọn po visunnu mìtọn lẹ po tọn wẹ e yin sọn avọ́nunina he yin bibasi gbọn miyọ́n dali hlan Jehovah lẹ mẹ, na enẹ wẹ yin gbedide he yè ko na mi. 14 Mì nasọ dù akọ́nnu avọ́nunina he yè mimí lọ tọn po asá mimá wiwe lọ tọn po+ to ofi he wé de, yèdọ mìwlẹ po visunnu mìtọn lẹ po gọna viyọnnu mìtọn lẹ,+ na onú ehelẹ ko yin nina taidi mimá mìtọn po mimá visunnu mìtọn lẹ tọn po sọn avọ́sinsan jijọho tọn Islaelivi lẹ tọn mẹ. 15 Yé na hẹn asá mimá wiwe lọ tọn po akọ́nnu avọ́nunina he yè mimí lọ tọn po wá gọna ojó he yin nina gbọn miyọ́n dali lọ lẹ, na yè nido mimí avọ́nunina lọ yigodo yinukọn to Jehovah nukọn; e nasọ yin mimá tẹgbẹ tọn de na mìwlẹ po visunnu mìtọn lẹ po,+ kẹdẹdile Jehovah ko degbe etọn do.”

16 Mose sọ yí sọwhiwhe do dín gbọgbọẹ avọ́nunina ylando tọn lọ tọn+ bo mọdọ e ko yin fifiọ. Enẹwutu, e gblehomẹ do Eleazali po Itamali po go, yèdọ visunnu Aalọn tọn he pò lẹ, e sọ dọmọ: 17 “Naegbọn mì ma do dù avọ́nunina ylando tọn lọ to ofi wiwe lọ,+ to whenue e yindọ onú wiwe gbaugbau de wẹ e yin bọ e ko sọ na mì, na mìwlẹ nido hẹn nuṣiwa agun pipli lọ tọn bosọ basi ovẹsè do ota yetọn mẹ to Jehovah nukọn? 18 Mì pọ́n! Ohùn etọn ma yin hinhẹnwa ofi wiwe lọ mẹ.+ Dandan wẹ dọ mì dona ko dù i to ofi wiwe lọ, kẹdẹdile yè ko degbe etọn na mi do.” 19 Aalọn sọ gblọnna Mose dọmọ: “Pọ́n! Egbé wẹ yé na avọ́nunina ylando tọn yetọn po avọ́nunina mimẹ̀ yetọn po to Jehovah nukọn,+ ṣogan onú ehelẹ jọ do go e. Eyin yẹn ko sọ dù avọ́nunina ylando tọn lọ to egbé wẹ, be enẹ na ko hẹn homẹ Jehovah tọn hùn ya?” 20 To whenue Mose sè enẹ, homẹ etọn hùn.

11 Jehovah sọ dọna Mose po Aalọn po dọmọ: 2 “Mì dọna Islaelivi lẹ dọ, ‘Nudida gbẹ̀te* aigba ji tọn he mì sọgan nọ dù lẹ die:+ 3 Kanlin depope he zẹ̀ ofẹ̀n bọ ofẹ̀n etọn lẹ zẹ̀ pete bo nọ dù dùkọ́ wẹ mì sọgan nọ dù.

4 “‘Ṣigba, mì ma dona dù kanlin ehelẹ he nọ dù dùkọ́ kavi he zẹ̀ ofẹ̀n: kanklosọ́ he nọ dù dùkọ́, ṣigba bo ma zẹ̀ ofẹ̀n. Onú mawé de wẹ e yin na mì.+ 5 Podọ agidipanun,+ na e nọ dù dùkọ́, ṣigba bo ma zẹ̀ ofẹ̀n wutu. Onú mawé de wẹ e yin na mì. 6 Azui lọsu, na e nọ dù dùkọ́, ṣigba bo ma zẹ̀ ofẹ̀n wutu. Onú mawé de wẹ e yin na mì. 7 Podọ ohàn,+ na e zẹ̀ ofẹ̀n bọ ofẹ̀n etọn lẹ zẹ̀ pete, ṣigba bo ma nọ dù dùkọ́ wutu. Onú mawé de wẹ e yin na mì. 8 Mì ma dona dù depope to olàn yetọn lẹ mẹ kavi doalọ oṣiọ yetọn go. Onú mawé de wẹ yé yin na mì.+

9 “‘Nuhe mì na nọ dù to nuhe nọ nọ̀ osin mẹ lẹpo mẹ lẹ die: Nudepope he nọ nọ̀ osin mẹ bo tindo ajà po ofló lẹ po, vlavo to hùmẹ kavi to tọ̀sisa lẹ mẹ, enẹlẹ wẹ mì sọgan dù.+ 10 Ṣigba, nudepope he nọ nọ̀ ohù kavi tọ̀sisa lẹ mẹ bo ma tindo ajà po ofló lẹ po, to nudida flinflin he nọ doawhàn zọnpọ po nudida* gbẹ̀te devo he nọ nọ̀ osin mẹ lẹpo po mẹ, awuhiọnu de wẹ yé yin na mì. 11 Mọwẹ, yé dona yin awuhiọnu na mì, podọ mì ma dona nọ dù depope to olàn yetọn lẹ mẹ,+ awuhiọnu wẹ oṣiọ yetọn lẹ dona yin na mì. 12 Awuhiọnu wẹ nudepope he nọ nọ̀ osin mẹ bo ma tindo ajà po ofló lẹ po dona yin na mì.

13 “‘Ehelẹ wẹ nudida he nọ zlọn bo dona yin awuhiọnu na mì; yé ma dona nọ yin dùdù na awuhiọnu de wẹ yé yin: yèdọ akùn,+ gàngàn tọ̀tó tọn, aklasu yuu,+ 14 gàngàn vẹẹ po gàngàn yuu wunmẹ lẹpo po, 15 ohọ́n wunmẹ lẹpo, 16 ogongo, ajankusu, odòkloe huto tọn, gàngàn wunmẹ lẹpo, 17 ajankusu pẹvi, tọ̀pápá, ajankusu otó-gbónọ, 18 tọ̀pápá-kọ̀gaa, tọ̀pápá-bẹ́gaa, aklasu, 19 adọwé, adọwé gbàmẹ tọn wunmẹ lẹpo, ahlinhán po toké po. 20 Nudida flinflin awànọ he nọ doawhàn zọnpọ bo* nọ gbọn afọ ẹnẹ lẹ ji lẹpo wẹ na yin awuhiọnu na mì.

21 “‘To nudida flinflin awànọ he nọ doawhàn zọnpọ bo nọ gbọn afọ ẹnẹ lẹ ji lẹpo mẹ, dehe tindo asá he yé na nọ yí do lọ́n gbọn aigba to afọ yetọn lẹ ji kẹdẹ wẹ mì sọgan dù. 22 Nuhe mì sọgan dù lẹ die: owẹ̀n he whẹ́n ganji wunmẹ voovo lẹ, owẹ̀n paa devo lẹ,+ bọ̀sakle lẹ po obọ̀ lẹ po. 23 Nudida flinflin awànọ devo he nọ doawhàn zọnpọ bo tindo afọ ẹnẹ lẹpo wẹ dona yin awuhiọnu de na mì. 24 Onú ehelẹ na hẹn mì zun mawé. Mẹdepope he doalọ oṣiọ yetọn go na yin mawé kakajẹ whèjai.+ 25 Mẹdepope he ze depope to oṣiọ yetọn lẹ mẹ dona yàn awù etọn lẹ;+ ewọ na yin mawé kakajẹ whèjai.

26 “‘Kanlin depope he zẹ̀ ofẹ́n, ṣigba bọ ofẹ̀n etọn ma zẹ̀ pete bo masọ nọ dù dùkọ́ yin onú mawé de na mì. Mẹdepope he doalọ yé go na yin mawé.+ 27 Onú mawé wẹ nudida gbẹ̀te depope he nọ zinzọnlin gbọn afọhomẹ etọn lẹ ji to nudida he nọ gbọn afọ ẹnẹ lẹ ji mẹ lẹ na yin na mì. Mẹdepope he doalọ oṣiọ yetọn go na yin mawé kakajẹ whèjai. 28 Mẹhe ze oṣiọ yetọn dona yàn awù etọn lẹ,+ ewọ nasọ yin mawé kakajẹ whèjai.+ Onú mawé wẹ yé yin na mì.

29 “‘Nudida flinflin he nọ nọ̀ aigba ji he yin mawé na mì lẹ die: gbéjaka, oṣọ̀n,+ alọtlọ wunmẹ lẹpo, 30 họmẹsi, alọtlọ daho, alọtlọ tọ̀tó tọn, alọtlọ yẹnkẹn mẹ tọn po agànma po. 31 Nudida flinflin ehelẹ dona yin mawé na mì.+ Mẹdepope he doalọ oṣiọ yetọn go na yin mawé kakajẹ whèjai.+

32 “‘Todin, nudepope he ji yé flẹ jẹ eyin yé kú na yin mawé, vlavo eyin núzinzan owhlẹ tọn, awù de, ayú de, kavi odẹ́vọ̀ de. Núzinzan depope he yin yiyizan dona yin yinylọ́n do osin mẹ, e nasọ yin mawé kakajẹ whèjai; enẹgodo e na yin wiwe. 33 Eyin yé flẹ jẹ núzinzan okọ́ tọn de mẹ, mì dona gbà ẹ hányán, podọ nudepope he tin to e mẹ na yin mawé.+ 34 Núdùdù wunmẹ depope he go osin he tọ́n sọn núzinzan mọnkọtọn mẹ jẹ na yin mawé, podọ onú nùnù depope he tin to núzinzan mọnkọtọn mẹ na yin mawé. 35 Nudepope he ji oṣiọ yetọn flẹ jẹ na yin mawé. Vlavo adò kavi adògbẹ́, e dona yin gbigbà hányán. Onú mawé wẹ yé yin bo na gbẹsọ yin mawé na mì. 36 Asisa osin tọn po osindò de po kẹdẹ wẹ na gbẹsọ yin wiwe, ṣigba mẹdepope he doalọ nuhe kú do yé mẹ go na yin mawé. 37 Eyin oṣiọ lọ lẹ flẹ jẹ okún he na yin dido de ji, e na gbẹsọ yin wiwe. 38 Ṣigba, eyin osin yin kinkọ̀n do okún de ji, bọ apadewhe oṣiọ yetọn tọn flẹ jẹ e ji, okún lọ na yin mawé na mì.

39 “‘Todin, eyin kanlin he mì nọ dù de kú, mẹdepope he doalọ oṣiọ etọn go na yin mawé kakajẹ whèjai.+ 40 Mẹdepope he dù sọn kanlin kúkú lọ mẹ dona yàn awù etọn lẹ bo nasọ yin mawé kakajẹ whèjai.+ Mẹdepope he sọ ze oṣiọ etọn sẹ̀ dona yàn awù etọn lẹ bo nasọ yin mawé kakajẹ whèjai. 41 Nudida flinflin he nọ doawhàn zọnpọ bo nọ nọ̀ aigba ji lẹpo wẹ na yin awuhiọnu de na mì.+ E ma dona yin dùdù. 42 Mì ma dona dù nudida depope he nọ lìn gbọn hòtò etọn ji, nudida depope he nọ gbọn afọ ẹnẹ lẹ ji, kavi nudida flinflin he nọ doawhàn zọnpọ bo tindo afọ susu bosọ nọ nọ̀ aigba ji lẹ, na awuhiọnu de wẹ yé yin wutu.+ 43 Mì hẹn mìde* zun awuhiọnu gbọn depope to nudida flinflin ehelẹ mẹ dali blo podọ mì sọ hẹn mìde flu bo lẹzun mawé gbọn yé dali blo.+ 44 Na yẹn wẹ Jehovah Jiwheyẹwhe mìtọn,+ podọ mì dona klan mìde do wiwe bo lẹzun wiwe,+ na wiwe wẹ yẹn.+ Enẹwutu, mì ma dona hẹn mìde* zun mawé gbọn depope to nudida flinflin he nọ sẹtẹn to aigba ji lẹ mẹ dali. 45 Na yẹn wẹ Jehovah he plan mì tọ́n sọn aigba Egipti tọn ji nado dohia dọ yẹn wẹ Jiwheyẹwhe mìtọn,+ mìwlẹ nasọ yin wiwe,+ na wiwe wẹ yẹn.+

46 “‘Ehe wẹ osẹ́n gando kanlin lẹ, nudida he nọ zlọn lẹ, nudida* gbẹ̀te lẹpo he nọ sẹtẹn gbọn otọ̀ mẹ go podọ gando nudida* he nọ lìn to aigba ji lẹpo go, 47 nado do vogbingbọn hia to onú mawé po onú wiwe po ṣẹnṣẹn podọ to nudida gbẹ̀te he sọgan yin dùdù po dehe ma sọgan yin dùdù lẹ po ṣẹnṣẹn.’”+

12 Jehovah sọ dọna Mose dogọ dọmọ: 2 “Dọna Islaelivi lẹ dọ, ‘Eyin yọnnu de mọhò* bo ji visunnu de, ewọ na yin mawé na azán ṣinawe, kẹdẹdile ewọ ko nọ yin mawé do to ojlẹ lajijẹ tọn etọn whenu.+ 3 To azán ṣinatọ̀ntọ gbè, visunnu lọ na yin adàgbona.+ 4 Yọnnu lọ na zindonukọn nado to ohùn lọ klọ́ sọn ede go na azán 33 he bọdego lẹ. E ma dona doalọ onú wiwe depope go, podọ e ma dona wá ofi wiwe lọ kakajẹ whenue azán lẹ̀wé tọn etọn lẹ na pé.

5 “‘Eyin viyọnnu de wẹ e ji, whenẹnu e na yin mawé na azán 14, kẹdẹdile ewọ ko nọ te do to lajijẹ etọn whenu. E na zindonukọn nado to ohùn lọ klọ́ sọn ede go na azán 66 he bọdego lẹ. 6 Eyin azán lẹ̀wé tọn etọn lẹ pé na visunnu de kavi na viyọnnu de, ewọ na hẹn agbò winyanwinyan owhe dopo mẹ tọn de wá na avọ́nunina mimẹ̀,+ podọ awhànnẹvu kavi owhlé de wá na avọ́nunina ylando tọn to họntonu gòhọ opli tọn lọ tọn bo na ze e jo na yẹwhenọ lọ. 7 Yẹwhenọ lọ nasọ hẹn ẹn wá Jehovah nukọn bo na basi ovẹsè do ota yọnnu lọ tọn mẹ, ewọ nasọ yin hinhẹn zun wiwe sọn hùndidi etọn mẹ. Enẹ wẹ yin osẹ́n he gando yọnnu he ji vlavo visunnu de kavi viyọnnu de go. 8 Ṣigba, eyin ewọ ma penugo nado na lẹngbọ de, whenẹnu e na hẹn owhlé awe kavi awhànnẹvu awe wá,+ yèdọ dopo na avọ́nunina mimẹ̀ podọ awetọ na avọ́nunina ylando tọn, yẹwhenọ lọ nasọ basi ovẹsè do ota etọn mẹ, ewọ nasọ yin hinhẹn zun wiwe.’”

13 Jehovah sọ zindonukọn to hodidọ na Mose po Aalọn po mẹ dọmọ: 2 “Eyin fide jí kavi jo ofló kavi sẹ́n to agbasa mẹde tọn go* bọ e sọgan lẹzun pòzọ̀n*+ do agbasa etọn go, e dona yin hinhẹnwa Aalọn yẹwhenọ lọ dè kavi wá dopo to visunnu etọn lẹ mẹ he yin yẹwhenọ lẹ dè.+ 3 Yẹwhenọ lọ nasọ pọ́n ohia azọ̀n tọn he sọawuhia to agbasa go na ẹn lọ. Eyin ofún he tin to e mẹ lẹ wé bọ apà lọ sọ siso hú fihe pò to agbasa lọ go lẹ, pòzọ̀n wẹ. Yẹwhenọ lọ nasọ gbeje azọ̀n lọ pọ́n bo na lá mẹlọ dọ mawé. 4 Ṣigba, eyin nusinsẹ́n he to agbasa etọn go wé bọ filọ ma siso hú fihe pò to agbasa lọ go lẹ bọ ofún lọ lẹ masọ wé, whenẹnu yẹwhenọ lọ na ze mẹhe go onú sẹ́n do lọ whlá do họmẹ na azán ṣinawe.+ 5 Enẹgodo, yẹwhenọ lọ nasọ gbeje e pọ́n to azán ṣinawetọ gbè, podọ eyin nusinsẹ́n lọ ko doalọte bo ma gbàpe gbọn agbasa lọ go, yẹwhenọ lọ nasọ ze e whlá do họmẹ na azán ṣinawe devo.

6 “Yẹwhenọ lọ nasọ gbeje e pọ́n whladopo dogọ to azán ṣinawetọ gbè, podọ eyin nusinsẹ́n lọ ko fiọ pò bo ma gbàpe gbọn agbasa lọ go, yẹwhenọ lọ na lá ẹ dọ ewọ yin wiwe;+ filọ jo ofló poun wẹ. Enẹgodo, mẹlọ na yàn awù etọn lẹ bo nasọ yin wiwe. 7 Ṣigba, eyin ofló* lọ ko gbàpe pete gbọn agbasa lọ go to whenue ewọ ko sọawuhia to yẹwhenọ lọ nukọn na lẹ̀wé etọn godo, whenẹnu ewọ nasọ sọawuhia to yẹwhenọ lọ nukọn whladopo dogọ.* 8 Yẹwhenọ lọ nasọ gbeje e pọ́n, podọ eyin agbasa lọ pete ko jo ofló, whenẹnu yẹwhenọ lọ na lá ẹ dọ mawé. Pòzọ̀n de wẹ.+

9 “Eyin pòzọ̀n lọ sọawuhia to mẹde go, ewọ dona yin hinhẹnwa yẹwhenọ lọ dè, 10 yẹwhenọ lọ nasọ gbeje e pọ́n.+ Eyin fihe jí to agbasa lọ go lẹ wé bo ko hẹn ofún lọ lẹ wé bọ fihe jí lọ lẹ ko lẹzun apà,+ 11 pòzọ̀n sinsinyẹn de wẹ ko kọnyin agbasa etọn go; yẹwhenọ lọ nasọ lá ẹ dọ mawé. E ma dona ze e whlá do họmẹ,+ na e ko yin mawé wutu. 12 Todin, eyin pòzọ̀n lọ ko gbàpe gbọn agbasa lọ pete go bọ pòzọ̀n lọ ko kọnyin mẹlọ go sọn ota jẹ afọ, yèdọ jẹ fie yẹwhenọ lọ sọgan mọnú jẹ, 13 podọ eyin yẹwhenọ lọ ko gbeje e pọ́n bo mọdọ pòzọ̀n lọ ko gbàpe gbọn agbasa etọn pete go, whenẹnu e na lá awutunọ lọ dọ e ko yin wiwe.* Popolẹpo ko wé, ewọ ko sọ yin wiwe. 14 Ṣigba, whedepopenu he apà sọawuhia to agbasa lọ go, ewọ na yin mawé. 15 Eyin yẹwhenọ lọ mọ apà lọ, e na lá ẹ dọ mawé.+ Apà lọ yin mawé. Pòzọ̀n de wẹ.+ 16 Ṣigba, eyin apà lọ wé whladopo dogọ, whenẹnu ewọ na wá yẹwhenọ lọ dè. 17 Yẹwhenọ lọ na gbeje e pọ́n,+ podọ eyin apà lọ ko wé, whenẹnu yẹwhenọ lọ na lá awutunọ lọ dọ e ko yin wiwe. Ewọ ko yin wiwe.

18 “Eyin onú tẹ̀ mẹde do agbasa go bo ko sọ gbọ, 19 ṣigba bọ fihe tẹ̀ dai lọ jí bo wé kavi nusinsẹ́n he hlá ohùn bo wé de sọawuhia, whenẹnu ewọ dona wá do ede hia yẹwhenọ lọ. 20 Yẹwhenọ lọ nasọ gbeje nuhe sọawuhia to e go lọ pọ́n,+ podọ eyin e siso hú fihe pò to agbasa lọ go lẹ bọ ofún he to filọ lẹ ko wé, whenẹnu yẹwhenọ lọ na lá ẹ dọ mawé. Pòzọ̀n de wẹ ko sọawuhia to nutitẹ̀ lọ mẹ. 21 Ṣigba, eyin yẹwhenọ lọ gbeje e pọ́n bo mọdọ ofún he to e mẹ lẹ ma wé bọ e ma siso hú fihe pò to agbasa lọ go lẹ bo ko sọ fiọ pò, whenẹnu yẹwhenọ lọ na ze e whlá do họmẹ na azán ṣinawe.+ 22 Eyin e ko gbàpe gbọn agbasa lọ go pete, whenẹnu yẹwhenọ lọ na lá mẹlọ dọ mawé. Azọ̀n de wẹ. 23 Ṣigba, eyin nusinsẹ́n lọ gbọṣi fidopo bo ma gbàpe, bọ e yindọ nutitẹ̀ lọ wẹ jí poun, yẹwhenọ lọ na lá ẹ dọ ewọ yin wiwe.+

24 “Kavi eyin miyọ́n-pà tin to mẹde go, bọ nusinsẹ́n he hlá ohùn bo wé de sọawuhia to apàdomẹ lọ mẹ kavi bọ filọ wé, 25 whenẹnu yẹwhenọ lọ na gbeje e pọ́n. Eyin ofún he tin to nusinsẹ́n lọ mẹ lẹ ko wé bọ e sọ siso hú fihe pò to agbasa lọ go lẹ, pòzọ̀n de wẹ ko sọawuhia to apàdomẹ lọ mẹ, yẹwhenọ lọ nasọ lá mẹlọ dọ mawé. Pòzọ̀n de wẹ. 26 Ṣigba, eyin yẹwhenọ lọ gbeje nusinsẹ́n lọ pọ́n bo mọdọ ofún he tin to e mẹ lẹ ma wé bọ e masọ siso hú fihe pò to agbasa lọ go lẹ bo ko sọ fiọ pò, whenẹnu yẹwhenọ lọ na ze e whlá do họmẹ na azán ṣinawe.+ 27 Yẹwhenọ lọ na gbeje e pọ́n to azán ṣinawetọ gbè podọ eyin e ko gbàpe gbọn agbasa lọ go pete, whenẹnu yẹwhenọ lọ na lá ẹ dọ mawé. Pòzọ̀n de wẹ. 28 Ṣigba, eyin nusinsẹ́n lọ gbọṣi fidopo bo ma ko gbàpe gbọn agbasa lọ go bo ko sọ fiọ pò, bọ e yindọ apàdomẹ lọ wẹ ko jí poun, yẹwhenọ lọ na lá mẹlọ dọ e yin wiwe, na apàdomẹ lọ wẹ ko jí wutu.

29 “Eyin ohia azọ̀n tọn de sọawuhia to ota kavi agbakọ na sunnu de kavi yọnnu de, 30 whenẹnu yẹwhenọ lọ na gbeje ohia lọ pọ́n.+ Eyin e siso hú fihe pò to agbasa lọ go lẹ bọ ofún he tin to filọ lẹ yin sinmẹ koklo-jonọ bosọ to tlẹ́lẹ, whenẹnu yẹwhenọ lọ na lá omẹ mọnkọtọn dọ mawé; ohia azọ̀n he nọ mọ́n ahọ̀n kavi ogbì tọn de wẹ. Pòzọ̀n ota tọn kavi agbakọ tọn de wẹ. 31 Ṣigba, eyin yẹwhenọ lọ mọdọ filọ ma siso hú fihe pò to agbasa lọ go lẹ bọ ofún yuu depope masọ to e mẹ, yẹwhenọ lọ dona ze awutunọ lọ whlá do họmẹ na azán ṣinawe.+ 32 Yẹwhenọ lọ na gbeje ohia azọ̀n tọn lọ pọ́n to azán ṣinawetọ gbè, podọ eyin ohia azọ̀n tọn lọ ma ko gbàpe gbọn agbasa lọ go, bọ ofún he tindo sinmẹ koklo-jonọ depope ma ko sọawuhia to e mẹ, bọ fihe ohia azọ̀n tọn lọ te ma siso hú fihe pò to agbasa lọ go lẹ, 33 mẹlọ dona whlẹ́ ota kavi agbakọ, ṣigba e ma na whlẹ́ fihe ohia azọ̀n tọn lọ te. Enẹgodo, yẹwhenọ lọ na ze awutunọ lọ whlá do họmẹ na azán ṣinawe.

34 “Yẹwhenọ lọ nasọ gbeje fihe ohia azọ̀n tọn lọ te pọ́n whladopo dogọ to azán ṣinawetọ gbè, podọ eyin ohia azọ̀n he nọ mọ́n ahọ̀n po agbakọ po tọn lọ ma ko gbàpe gbọn agbasa lọ go bọ e masọ siso hú fihe pò to agbasa lọ go lẹ, whenẹnu yẹwhenọ lọ dona lá ẹ dọ ewọ ko yin wiwe, ewọ nasọ yàn awù etọn lẹ bosọ yin wiwe. 35 Ṣigba, eyin ohia azọ̀n tọn lọ ko gbàpe gbọn agbasa lọ go pete to lẹ̀wé etọn godo, 36 yẹwhenọ lọ na gbeje ewọ pọ́n, podọ eyin ohia azọ̀n tọn lọ ko gbàpe gbọn agbasa lọ go, nuhudo ma tin na yẹwhenọ lọ nado dín ofún he tindo sinmẹ koklo-jonọ lẹ ba; omẹ enẹ yin mawé. 37 Ṣigba, eyin omẹ gbigbejepọn lọ dohia dọ ohia azọ̀n tọn lọ ma ko gbàpe bọ ofún yuu lẹ ko wú do e mẹ, azọ̀n lọ ko gbọ. Ewọ ko yin wiwe, yẹwhenọ lọ nasọ lá ẹ dọ e yin wiwe.+

38 “Eyin nusinsẹ́n lẹ sọawuhia to agbasa* sunnu de kavi yọnnu de tọn go bọ nusinsẹ́n lọ lẹ wé, 39 yẹwhenọ lọ na gbeje yé pọ́n.+ Eyin nusinsẹ́n lọ lẹ ko fiọ pò, nusinsẹ́n he ma nọ hẹn awugble wá lẹ wẹ ko sọawuhia to agbasa lọ go. Omẹ enẹ yin wiwe.

40 “Eyin oda wayi sọn ota na sunnu de bọ ota etọn mọ́n, ewọ yin wiwe. 41 Eyin oda he to nukọn lẹ wẹ wayi sọn ota na ẹn bọ finẹ sọ mọ́n, ewọ yin wiwe. 42 Ṣigba, eyin apà he tindo sinmẹ koklo-jonọ bo wé de sọawuhia to fie ahọ̀n etọn mọ́n te kavi to ota etọn nukọn, pòzọ̀n de wẹ ko sọawuhia to ahọ̀n etọn mẹ kavi to ota etọn nukọn. 43 Yẹwhenọ lọ na gbeje ewọ pọ́n, podọ eyin fihe jí to fie ahọ̀n etọn mọ́n te kavi to ota etọn nukọn lọ hlá ohùn bo wé, bọ e sọawuhia taidi pòzọ̀n to agbasa go na ẹn, 44 pòtọnọ wẹ ewọ. Ewọ yin mawé, yẹwhenọ lọ dona sọ lá ẹ dọ mawé, na azọ̀n he tin to ota na ẹn wutu. 45 Na nuhe dù mẹhe tindo pòzọ̀n lọ, awù etọn lẹ dona yin tintlẹ́n, podọ ewọ ma dona pà oda etọn lẹ, e nasọ bu núdo atán etọn aga tọn lẹ bo na nọ dawhá dọ, ‘Mawé, mawé!’ 46 Ewọ na yin mawé dile azọ̀n lọ na gbẹ́ pò to e go dẹnsọ. Na e yin mawé wutu, e dona nọ nọla. Gbonu osla lọ tọn wẹ ewọ na nọ nọ̀.+

47 “Eyin pòzọ̀n bẹpla awù de, vlavo awù kanlin-fún tọn de kavi alavọ tọn de, 48 kavi eyin e sọawuhia to avọ̀lọn-kàn kavi sekan kavi kanlin-fún de go, kavi to ayú de kavi nuyizan ayú tọn depope go, 49 podọ eyin ohia azọ̀n lọ tọn he tindo sinmẹ koklo-jonọ po amamú tọn po kavi he hlá ohùn de bẹpla awù, ayú, avọ̀lọn-kàn, sekan, kavi nuyizan ayú tọn depope, pòzọ̀n wẹ ko bẹpla ẹ, podọ e dona yin didohia yẹwhenọ lọ. 50 Yẹwhenọ lọ na gbeje azọ̀n lọ pọ́n, podọ e dona ze nuhe go azọ̀n lọ te whlá do họmẹ na azán ṣinawe.+ 51 Eyin e gbeje azọ̀n lọ pọ́n to azán ṣinawetọ gbè bo mọdọ e ko gbàpe gbọn awù lọ mẹ, gbọn avọ̀lọn-kàn lọ go, gbọn sekan lọ go kavi to ayú de go (mahopọnna nuhe ayú lọ nọ yin yiyizan na), pòzọ̀n sinsinyẹn de wẹ podọ nulọ sọ yin mawé.+ 52 Ewọ dona fiọ awù lọ kavi avọ̀lọn-kàn lọ kavi sekan he to kanlin-fún lọ go lẹ kavi to alavọ lọ go lẹ, kavi nuyizan ayú tọn depope he go azọ̀n lọ sọawuhia te, na pòzọ̀n sinsinyẹn de wẹ. E dona yin fifiọ.

53 “Ṣigba, eyin yẹwhenọ lọ gbeje nulọ lẹ pọ́n bọ azọ̀n lọ ma ko gbàpe gbọn awù lọ mẹ kavi gbọn avọ̀lọn-kàn lọ go kavi gbọn sekan lọ go kavi to nuyizan ayú tọn depope go, 54 whenẹnu yẹwhenọ lọ na degbe dọ yé ni yàn nuyizan he yin bibẹpla lọ, podọ ewọ nasọ ze nuyizan lọ whlá do họmẹ na azán ṣinawe devo. 55 Enẹgodo, yẹwhenọ lọ na gbeje nuyizan he yin bibẹpla lọ pọ́n to whenue e ko yin yinyan po sọwhiwhe po godo. Eyin ohia azọ̀n tọn lọ ma ko diọ, eyin azọ̀n lọ ma tlẹ ko gbàpe, mawé wẹ nuyizan lọ. Hiẹ dona fiọ ẹ, na e ko dù vlavo to yonu kavi to gbonu wutu.

56 “Ṣigba, eyin yẹwhenọ lọ ko gbeje e pọ́n bọ ohia azọ̀n tọn lọ ko depò to whenue e yin yinyan po sọwhiwhe po godo, whenẹnu ewọ na vún filọ sọn awù lọ go kavi sọn ayú lọ go kavi sọn avọ̀lọn-kàn lọ go kavi sọn sekan lọ go. 57 Etomọṣo, eyin ohia azọ̀n tọn lọ gbẹ́ sọawuhia to fidevo to awù lọ go kavi to avọ̀lọn-kàn lọ go kavi to nuyizan ayú tọn depope go, gbigbà pé wẹ e te, podọ hiẹ dona fiọ nuyizan he yin bibẹpla depope to miyọ́n mẹ.+ 58 Ṣigba, eyin ohia azọ̀n tọn lọ ko busẹ sọn awù lọ go kavi sọn avọ̀lọn-kàn lọ go kavi sọn sekan lọ go kavi sọn nuyizan ayú tọn depope he hiẹ ko yàn go, whenẹnu e dona yin yinyan whla awetọ, podọ e nasọ yin wiwe.

59 “Enẹ wẹ yin osẹ́n he gando pòzọ̀n go eyin e bẹpla awù kanlin-fún tọn kavi alavọ tọn, kavi avọ̀lọn-kàn kavi sekan, kavi nuyizan ayú tọn depope, na e nido yin lilá di wiwe kavi mawé.”

14 Jehovah sọ dọhona Mose yinukọn dogọ dọmọ: 2 “Ehe wẹ osẹ́n he na gando pòtọnọ de go to azán he gbè lẹ̀wé etọn yin tadona, whenue e na yin hinhẹnwa yẹwhenọ lọ dè.+ 3 Yẹwhenọ lọ na tọ́nyi gbonu osla lọ tọn bo na gbeje ewọ pọ́n. Eyin pòzọ̀n lọ ko gbọ na pòtọnọ lọ, 4 yẹwhenọ lọ na degbena ẹn nado hẹn ohẹ̀ wiwe gbẹ̀te awe, atin kedali tọn, sekan vẹẹ ṣẹ́ṣẹ́ po hisọpu po wá na klọ́we etọn.+ 5 Yẹwhenọ lọ na degbe dọ dopo to ohẹ̀ lọ lẹ mẹ ni yin hùhù to osin tọ̀sisa tọn he tin to núzinzan okọ́ tọn de mẹ lọ ji. 6 Ṣigba, ewọ na yí ohẹ̀ gbẹ̀te lọ gọna atin kedali tọn lọ, sekan vẹẹ ṣẹ́ṣẹ́ lọ po hisọpu lọ po bo na ylọn yé do ohùn ohẹ̀ he yin hùhù to osin tọ̀sisa tọn ji lọ tọn mẹ. 7 Enẹgodo, e na mimí ohùn lọ whla ṣinawe do mẹhe to ede klọ́we sọn pòzọ̀n mẹ lọ go, e nasọ lá ẹ dọ e yin wiwe podọ e na tún ohẹ̀ gbẹ̀te lọ dote nado yì danji.+

8 “Mẹhe to ede klọ́we lọ dona yàn awù etọn lẹ bo whlẹ́ oda po ofún he to e go lẹpo po bosọ lawu to osin mẹ, ewọ nasọ yin wiwe. Enẹgodo, e sọgan wá osla lọ mẹ, ṣigba e na nọ gbonu gòhọ etọn tọn na azán ṣinawe. 9 To azán ṣinawetọ gbè, e dona whlẹ́ oda he tin to ota na ẹn podọ ogbì he tin to agbakọ na ẹn po nukundama etọn lẹpo po. To whenue e na ko whlẹ́ oda po ofún etọn lẹpo po godo, e dona yàn awù etọn lẹ bo lawu to osin mẹ, ewọ nasọ yin wiwe.

10 “To azán ṣinatọ̀ntọ gbè, ewọ na hẹn agbò winyanwinyan he to gángán awe, lẹngbọvu asi owhe dopo mẹ tọn he to gángán+ dopo, linfin dagbedagbe mado-ao ojlẹnu efa tọn atọ̀n* he yè yí amì do yàn wá taidi avọ́nunina jinukun-lili tọn+ po amì ojlẹnu lọgi* tọn dopo po;+ 11 podọ yẹwhenọ he lá mẹhe to ede klọ́we lọ dọ e yin wiwe na hẹn mẹlọ po avọ́nunina etọn lẹ po wá Jehovah nukọn to họntonu gòhọ opli tọn lọ tọn. 12 Yẹwhenọ lọ na yí dopo to agbò winyanwinyan lọ lẹ mẹ bo na yí i do basi avọ́nunina whẹhuhu tọn+ gọna amì ojlẹnu lọgi tọn lọ, ewọ nasọ mimí yé yigodo yinukọn taidi avọ́nunina he yè mimí de to Jehovah nukọn.+ 13 Enẹgodo, e na hù agbò winyanwinyan lọ to fie avọ́nunina ylando tọn po avọ́nunina mimẹ̀ po nọ saba yin hùhù te,+ yèdọ to ofi wiwe de, na taidi avọ́nunina ylando tọn lọ, yẹwhenọ lọ tọn wẹ avọ́nunina whẹhuhu tọn lọ.+ Onú wiwe gbaugbau de wẹ.+

14 “Enẹgodo, yẹwhenọ lọ na yí sọn ohùn avọ́nunina whẹhuhu tọn lọ tọn mẹ, bo nasọ yí i do otó adusi tọn mẹhe to ede klọ́we lọ tọn go podọ do alọsu adusi tọn po afọsu adusi tọn etọn po ji. 15 Podọ yẹwhenọ lọ na yí sọn amì ojlẹnu lọgi tọn+ lọ mẹ bo na kọ̀n ẹn do alọpapa amiyọn tọn etọn titi mẹ. 16 Enẹgodo, yẹwhenọ lọ na ylọn alọvi adusi tọn etọn do amì he tin to alọpapa amiyọn tọn etọn mẹ lọ mẹ bo na yí alọvi etọn do húnhún vude sọn amì lọ mẹ whla ṣinawe to Jehovah nukọn. 17 Yẹwhenọ lọ nasọ yí sọn amì he pò to alọpapa etọn mẹ lọ mẹ do otó adusi tọn mẹhe to ede klọ́we lọ tọn go podọ do alọsu adusi tọn po afọsu adusi tọn etọn po go to ohùn avọ́nunina whẹhuhu tọn lọ tọn ji. 18 Yẹwhenọ lọ nasọ yí amì he pò to alọpapa etọn mẹ do ota na mẹhe to ede klọ́we lọ, yẹwhenọ lọ nasọ basi ovẹsè do ota etọn mẹ to Jehovah nukọn.+

19 “Yẹwhenọ lọ na yí avọ́nunina ylando tọn+ lọ do sanvọ́ bo na basi ovẹsè do ota mẹhe to ede klọ́we sọn ninọmẹ mawé tọn mẹ lọ tọn mẹ, enẹgodo ewọ na hù avọ́nunina mimẹ̀ lọ. 20 Yẹwhenọ lọ nasọ yí avọ́nunina mimẹ̀ lọ po avọ́nunina jinukun-lili tọn+ lọ po do sanvọ́ to agbà lọ ji, yẹwhenọ lọ nasọ basi ovẹsè do ota etọn mẹ,+ ewọ nasọ yin wiwe.+

21 “Ṣigba, eyin wamọnọ de wẹ ewọ bọ e masọ tindo nude sọmọ, whenẹnu e na yí agbò winyanwinyan dopo taidi avọ́nunina whẹhuhu tọn nado basi avọ́nunina he yè mimí na ovẹsè nido yin bibasi do ota ede tọn mẹ, gọna linfin dagbedagbe mado-ao efa dopo tọn* he yè yí amì do yàn taidi avọ́nunina jinukun-lili tọn, gọna amì ojlẹnu lọgi tọn, 22 gọna owhlé awe kavi awhànnẹvu awe, sọgbe hẹ nugopipe etọn. Dopo na yin yiyizan taidi avọ́nunina ylando tọn podọ awetọ taidi avọ́nunina mimẹ̀.+ 23 To azán ṣinatọ̀ntọ gbè,+ ewọ na hẹn yé wá nado dotana lẹ̀wé etọn to yẹwhenọ lọ dè to họntonu gòhọ opli tọn lọ tọn to Jehovah nukọn.+

24 “Yẹwhenọ lọ na yí agbò winyanwinyan avọ́nunina whẹhuhu tọn lọ tọn+ po amì ojlẹnu lọgi tọn lọ po, yẹwhenọ lọ nasọ mimí yé yigodo yinukọn taidi avọ́nunina he yè mimí de to Jehovah nukọn.+ 25 Enẹgodo, e na hù agbò winyanwinyan avọ́nunina whẹhuhu tọn lọ tọn, yẹwhenọ lọ nasọ yí sọn ohùn avọ́nunina whẹhuhu tọn lọ tọn mẹ do otó adusi tọn mẹhe to ede klọ́we lọ tọn go podọ do alọsu adusi tọn etọn po afọsu adusi tọn etọn po ji.+ 26 Yẹwhenọ lọ na kọ̀n vude sọn amì lọ mẹ do alọpapa amiyọn tọn etọn titi mẹ,+ 27 enẹgodo e na yí alọvi adusi tọn etọn do húnhún sọn amì he tin to alọpapa amiyọn tọn etọn mẹ lọ mẹ whla ṣinawe to Jehovah nukọn. 28 Yẹwhenọ lọ nasọ yí sọn amì he tin to alọpapa etọn mẹ lọ mẹ do otó adusi tọn mẹhe to ede klọ́we lọ tọn go podọ do alọsu adusi tọn etọn po afọsu adusi tọn etọn po ji do fidopo lọ lẹ he e yí ohùn avọ́nunina whẹhuhu tọn lọ tọn do dai. 29 Enẹgodo, yẹwhenọ lọ na yí amì he pò to alọpapa etọn mẹ do ota na mẹhe to ede klọ́we lọ nado basi ovẹsè do ota etọn mẹ to Jehovah nukọn.

30 “E na na dopo to owhlé kavi dopo to awhànnẹvu lọ lẹ mẹ sọgbe hẹ nugopipe etọn,+ 31 yèdọ dehe go e pé nado na taidi avọ́nunina ylando tọn podọ awetọ taidi avọ́nunina mimẹ̀+ gọna avọ́nunina jinukun-lili tọn; yẹwhenọ lọ nasọ basi ovẹsè do ota mẹhe to ede klọ́we lọ tọn mẹ to Jehovah nukọn.+

32 “Ehe wẹ yin osẹ́n he gando mẹhe to pòzọ̀n jẹ go, ṣigba bo ma tindo nude to whenue e to tadona lẹ̀wé etọn.”

33 Jehovah sọ dọna Mose po Aalọn po dọmọ: 34 “To whenue mì na wá aigba Kenani+ tọn he yẹn na na mì taidi nutindo+ de lọ ji bọ yẹn na bẹ pòzọ̀n plá ohọ̀ de to aigba mìtọn ji,+ 35 whenẹnu mẹhe tọn ohọ̀ lọ yin dona wá bo dọna yẹwhenọ lọ dọ, ‘Azọ̀n bẹplamẹ wunmẹ de sọawuhia to ohọ̀ ṣie mẹ.’ 36 Yẹwhenọ lọ nasọ degbe dọ nulẹpo ni yin bibẹ sẹ̀ sọn ohọ̀ lọ mẹ whẹpo ewọ nado wá pọ́n azọ̀n bẹplamẹ lọ, na e nikaa lá nuhe tin to ohọ̀ lọ mẹ lẹpo dọ mawé; enẹgodo yẹwhenọ lọ na wá ohọ̀ lọ mẹ nado pọ́n ninọmẹ ohọ̀ lọ tọn. 37 Ewọ na dindona fie ohia azọ̀n tọn lọ te, podọ eyin adó ohọ̀ lọ tọn lẹ tindo ohia sinmẹ koklo-jonọ po amamú tọn po kavi vẹẹ bọ fie ohia lọ te lẹ siso hú fihe pò to adó lọ go lẹ, 38 whenẹnu yẹwhenọ lọ na tọ́n sọn ohọ̀ lọ mẹ jẹ họntonu ohọ̀ lọ tọn bo na sú ohọ̀ lọ na azán ṣinawe.+

39 “Yẹwhenọ lọ nasọ lẹkọwa to azán ṣinawetọ gbè bo na dindona ohọ̀ lọ. Eyin ohia azọ̀n tọn lọ lẹ ko gbàpe gbọn adó ohọ̀ lọ tọn go, 40 whenẹnu yẹwhenọ lọ na degbe bọ zannu he yin bibẹpla lọ lẹ na yin didesẹ bo na yin bibẹ dlan gbonu tòdaho lọ tọn do nọtẹn mawé de. 41 Enẹgodo, ewọ na hẹn ẹn diun dọ ohọ̀ lọ mẹ yin whiwhlẹ́ po sọwhiwhe po, podọ nutlẹ́nu po okò he yin didesẹ lọ lẹ po na yin bibẹ dlan gbonu tòdaho lọ tọn do nọtẹn mawé de. 42 Enẹgodo, yé na to zannu devo lẹ do otẹn zannu he yé desẹ lọ lẹ tọn mẹ, podọ ewọ nasọ yí okò devo zan bosọ hẹn ẹn diun dọ ohọ̀ lọ yin titlẹ́.

43 “Ṣigba, eyin ohia azọ̀n tọn gbẹsọ wá sọawuhia whladopo dogọ to ohọ̀ lọ mẹ to whenue zannu lọ lẹ ko yin didesẹ bọ ohọ̀ lọ ko yin whiwhlẹ́ bo ko sọ yin vivọ́ tlẹ́ godo, 44 whenẹnu yẹwhenọ lọ na yì ohọ̀ lọ mẹ bo na yì pọ́n ninọmẹ etọn. Eyin ohia azọ̀n tọn lọ ko gbàpe gbọn ohọ̀ lọ mẹ, be pòzọ̀n sinsinyẹn+ de wẹ ko bẹpla ohọ̀ lọ. Ohọ̀ lọ ko yin mawé. 45 To whenẹnu, e na hẹn ẹn diun dọ ohọ̀ lọ yin hihọliai—yèdọ zannu etọn lẹ, owhlẹ etọn lẹ gọna nutlẹ́nu po okò ohọ̀ lọ tọn lẹpo po—bọ yé nasọ yin bibẹ yì gbonu tòdaho lọ tọn do nọtẹn mawé de.+ 46 Ṣigba, mẹdepope he biọ ohọ̀ lọ mẹ to whenue ohọ̀ lọ yin súsú+ na yin mawé kakajẹ whèjai;+ 47 podọ mẹdepope he mlọnai do ohọ̀ lọ mẹ dona yàn awù etọn lẹ, mẹdepope he sọ dùnú to ohọ̀ lọ mẹ dona yàn awù etọn lẹ.

48 “Ṣigba, eyin yẹwhenọ lọ wá bo mọdọ ohia azọ̀n tọn lọ ma ko gbàpe gbọn ohọ̀ lọ mẹ to whenue ohọ̀ lọ ko yin vivọ́ tlẹ́ godo, whenẹnu yẹwhenọ lọ na lá ohọ̀ lọ dọ e yin wiwe, na ohia azọ̀n tọn lọ ko busẹ wutu. 49 Nado sọgan lẹ̀ ohọ̀ lọ wé sọn ninọmẹ mawé tọn* etọn mẹ, ewọ na yí ohẹ̀ awe, atin kedali tọn, sekan vẹẹ ṣẹ́ṣẹ́ po hisọpu po.+ 50 E nasọ hù dopo to ohẹ̀ lọ lẹ mẹ to osin tọ̀sisa tọn he tin to núzinzan okọ́ tọn de mẹ lọ ji. 51 Enẹgodo, e na yí atin kedali tọn lọ, hisọpu lọ, sekan vẹẹ ṣẹ́ṣẹ́ lọ po ohẹ̀ gbẹ̀te lọ po bo na ylọn yé do ohùn ohẹ̀ he yin hùhù lọ tọn mẹ podọ do osin tọ̀sisa tọn lọ mẹ, e nasọ mimí in do ohọ̀ lọ go whla ṣinawe.+ 52 Podọ e na yí ohùn ohẹ̀ lọ tọn, osin tọ̀sisa tọn lọ, ohẹ̀ gbẹ̀te lọ, atin kedali tọn lọ, hisọpu lọ po sekan vẹẹ ṣẹ́ṣẹ́ lọ po do lẹ̀ ohọ̀ lọ wé sọn ninọmẹ mawé tọn* etọn mẹ. 53 Enẹgodo, e na tún ohẹ̀ gbẹ̀te lọ dote to gbonu tòdaho lọ tọn bọ e na yì danji, ewọ nasọ basi ovẹsè do ota ohọ̀ lọ tọn mẹ, e nasọ yin wiwe.

54 “Ehe wẹ yin osẹ́n he gando pòzọ̀n wunmẹ depope go, azọ̀n he nọ mọ́n ahọ̀n kavi ogbì,+ 55 eyin pòzọ̀n bẹpla awù+ kavi ohọ̀,+ 56 podọ eyin fide jí bo jo ofló bosọ sẹ́n,+ 57 nado yọnẹn eyin nude yin mawé podọ eyin nude yin wiwe.+ Ehe wẹ yin osẹ́n he gando pòzọ̀n go.”+

15 Jehovah sọ dọna Mose po Aalọn po yinukọn dogọ dọmọ: 2 “Dọna Islaelivi lẹ dọ, ‘Eyin onú mawé de sà jẹgbonu sọn vijinu* sunnu de tọn mẹ, ehe na hẹn ẹn zun mawé.+ 3 E na yin mawé na onú mawé he sà jẹgbonu sọn ewọ go lọ wutu, vlavo onú mawé lọ zindonukọn nado to sisà jẹgbonu sọn vijinu etọn mẹ kavi súali na ẹn, ewọ gbẹsọ yin mawé.

4 “‘Adọzan depope he ji mẹhe go onú mawé sà jẹgbonu sọn lọ mlọnai do na yin mawé, podọ nudepope he ji e sinai do na yin mawé. 5 Mẹdepope he doalọ adọzan etọn go dona yàn awù etọn lẹ, podọ e dona lawu bo nasọ yin mawé kakajẹ whèjai.+ 6 Mẹdepope he sinai do nuhe ji mẹhe go onú mawé de sà jẹgbonu sọn lọ sinai do dona yàn awù etọn lẹ bo lawu bo nasọ yin mawé kakajẹ whèjai. 7 Mẹdepope he doalọ mẹhe go onú mawé de sà jẹgbonu sọn lọ go dona yàn awù etọn lẹ bo lawu bo nasọ yin mawé kakajẹ whèjai. 8 Eyin mẹhe go onú mawé de sà jẹgbonu sọn lọ túntán do mẹhe yin wiwe de go, omẹ enẹ dona yàn awù etọn lẹ bo lawu bo nasọ yin mawé kakajẹ whèjai. 9 Aisinnu he nọ nọ̀ kanlin ji depope he ji mẹhe go onú mawé de sà jẹgbonu sọn lọ sinai do na yin mawé. 10 Mẹdepope he doalọ nudepope he ji ewọ sinai do go na yin mawé kakajẹ whèjai, podọ mẹdepope he ze onú enẹlẹ dona yàn awù etọn lẹ bo lawu bo nasọ yin mawé kakajẹ whèjai. 11 Eyin mẹhe go onú mawé de sà jẹgbonu+ sọn lọ ma ko klọ́ alọ etọn lẹ to osin mẹ whẹpo do doalọ mẹde go, whenẹnu omẹ enẹ dona yàn awù etọn lẹ bo lawu bo nasọ yin mawé kakajẹ whèjai. 12 Núzinzan okọ́ tọn he go mẹhe go onú mawé de sà jẹgbonu sọn lọ doalọ dona yin gbigbà hányán, podọ núzinzan owhlẹ tọn depope he go e doalọ dona yin kiklọ́ to osin mẹ.+

13 “‘Eyin onú mawé lọ ko doalọte bọ azọ̀n lọ ko gbọ sọn mẹlọ go, whenẹnu ewọ na hia azán ṣinawe to enẹgodo na lẹ̀wé etọn, podọ e dona yàn awù etọn lẹ bo lawu to tọ̀sisa mẹ bo nasọ yin wiwe.+ 14 To azán ṣinatọ̀ntọ gbè, ewọ na yí owhlé awe kavi awhànnẹvu+ awe bo na wá Jehovah nukọn to họntonu gòhọ opli tọn lọ tọn bo nasọ ze yé jo na yẹwhenọ lọ. 15 Yẹwhenọ lọ nasọ yí yé do sanvọ́, dopo na yin yiyizan taidi avọ́nunina ylando tọn podọ awetọ taidi avọ́nunina mimẹ̀, yẹwhenọ lọ nasọ basi ovẹsè do ota etọn mẹ to Jehovah nukọn gando onú mawé he sà jẹgbonu sọn ewọ go lọ go.

16 “‘Todin, eyin vísin sà jẹgbonu sọn sunnu de go, ewọ dona lẹ̀ agbasa etọn blebu to osin mẹ bo nasọ yin mawé kakajẹ whèjai.+ 17 E sọ dona yàn awù depope po núzinzan ayú tọn depope he go vísin lọ jẹ po, podọ nulọ na yin mawé kakajẹ whèjai.

18 “‘Eyin sunnu de mlọnai dopọ hẹ yọnnu de bọ vísin sà jẹgbonu sọn e go, yé dona lawu bo nasọ yin mawé kakajẹ whèjai.+

19 “‘Eyin yọnnu de to hùndi, ewọ na zindonukọn to mawé lajijẹ tọn etọn mẹ na azán ṣinawe.+ Mẹdepope he doalọ ewọ go nasọ yin mawé kakajẹ whèjai.+ 20 Nudepope he ji e mlọnai do to ojlẹ mawé lajijẹ tọn etọn whenu na yin mawé, podọ nudepope he ji e sinai do na yin mawé.+ 21 Mẹdepope he doalọ adọzan yọnnu lọ tọn go dona yàn awù etọn lẹ bo lawu bo nasọ yin mawé kakajẹ whèjai. 22 Mẹdepope he doalọ nudepope he ji e sinai do go dona yàn awù etọn lẹ bo lawu bo nasọ yin mawé kakajẹ whèjai. 23 Eyin yọnnu lọ sinai do adọzan de ji kavi nudevo de ji, mẹhe doalọ nulọ go na yin mawé kakajẹ whèjai.+ 24 Podọ eyin sunnu de mlọnai dopọ hẹ ẹ bọ ohùn lajijẹ tọn etọn jẹ e go,+ whenẹnu sunnu lọ na yin mawé na azán ṣinawe, podọ adọzan depope he ji ewọ mlọnai do na yin mawé.

25 “‘Eyin yọnnu de to hùndi na azán susu+ bọ e ma yin ojlẹ lajijẹ tọn etọn, kavi eyin ewọ to hùndi zẹ̀ ojlẹ lajijẹ tọn etọn go,+ ewọ na yin mawé na azán he e dihùn na lẹpo, dile e nọ yin do to ojlẹ mawé lajijẹ tọn etọn whenu. 26 Adọzan depope he ji e mlọnai do to hùndidi etọn whenu na yin nudopolọ po adọzan he ji e nọ mlọnai do to mawé lajijẹ tọn etọn whenu po,+ podọ nudepope he ji e sinai do na yin mawé dile e nọ yin do to mawé lajijẹ tọn etọn whenu. 27 Mẹdepope he doalọ onú enẹlẹ go na yin mawé, podọ ewọ dona yàn awù etọn lẹ bo lawu bo nasọ yin mawé kakajẹ whèjai.+

28 “‘Ṣigba, eyin hùndidi etọn ko doalọte, ewọ na hia azán ṣinawe na ede, podọ enẹgodo ewọ na yin wiwe.+ 29 To azán ṣinatọ̀ntọ gbè, yọnnu lọ na yí owhlé awe kavi awhànnẹvu awe+ bo na hẹn yé wá na yẹwhenọ lọ to họntonu gòhọ opli tọn lọ tọn.+ 30 Yẹwhenọ lọ nasọ yí dopo zan taidi avọ́nunina ylando tọn podọ awetọ taidi avọ́nunina mimẹ̀, yẹwhenọ lọ nasọ basi ovẹsè do ota etọn mẹ to Jehovah nukọn gando hùndidi etọn he hẹn ẹn zun mawé lọ go.+

31 “‘Gbọnmọ dali, mì dona gọalọna Islaelivi lẹ nado tọ́n sọn ninọmẹ mawé tọn yetọn mẹ, na yé nikaa kú to ninọmẹ mawé tọn yetọn mẹ gbọn gòhọtúntún ṣie he tin to ṣẹnṣẹn yetọn hinhẹnflu dali.+

32 “‘Ehe wẹ yin osẹ́n he gando sunnu he go onú mawé de sà jẹgbonu sọn de go, podọ sunnu he yin mawé na vísin sà jẹgbonu sọn e go wutu,+ 33 podọ yọnnu he tin to ojlẹ mawé lajijẹ tọn etọn mẹ,+ podọ sunnu kavi yọnnu depope he go nude to sisà jẹgbonu sọn,+ podọ gando sunnu he mlọnai dopọ hẹ yọnnu mawé de go.’”

16 Jehovah sọ dọhona Mose to okú visunnu Aalọn tọn awe lẹ tọn godo, yèdọ yé mẹhe kú na yé dọnsẹpọ Jehovah wutu.+ 2 Jehovah sọ dọna Mose dọmọ: “Dọna Aalọn nọvisunnu towe dọ ewọ ma dona nọ wá ofi wiwe+ lọ to họmẹgbòvọ̀+ lọ godo, to nùsu he to Apotin lọ nù nukọn to whedepopenu poun gba, na e nikaa kú,+ na yẹn na nọ sọawuhia to aslọ+ de mẹ to nùsu+ lọ ji.

3 “Nuhe Aalọn dona nọ hẹn to whenue e ja ofi wiwe lọ lẹ die: oyìnsú winyanwinyan de na avọ́nunina ylando tọn+ podọ agbò de na avọ́nunina mimẹ̀.+ 4 Ewọ dona do tewu wiwe alavọ tọn lọ,+ podọ ṣokoto gli* alavọ tọn lọ lẹ+ dona sú omẹ́ etọn,* ewọ dona sọ sìn homẹblanu alavọ tọn+ lọ bo ze tabla vonọtaun alavọ tọn+ lọ do ota. Onú wiwe lẹ wẹ yé yin.+ Ewọ na lawu to osin mẹ+ bo do yé.

5 “Ewọ nasọ yí gbọgbọẹ asu winyanwinyan awe na avọ́nunina ylando tọn po agbò dopo po na avọ́nunina mimẹ̀ sọn agun pipli Islaelivi lẹ tọn+ si.

6 “Enẹgodo, Aalọn na hẹn oyìnsú avọ́nunina ylando tọn he yin ewọ lọsu tọn lọ wá, e nasọ basi ovẹsè do ota edetiti tọn mẹ+ podọ do whédo etọn tọn mẹ.

7 “Enẹgodo, ewọ na yí gbọgbọẹ awe bo hẹn yé wá Jehovah nukọn to họntonu gòhọ opli tọn lọ tọn. 8 Aalọn nasọ de ovò do gbọgbọẹ awe lọ lẹ ji, yèdọ dopo na Jehovah podọ awetọ na Azazẹli.* 9 Aalọn na hẹn gbọgbọẹ he yin dide gbọn ovò+ dali na Jehovah lọ wá bo na yí i do basi avọ́nunina ylando tọn. 10 Ṣigba, gbọgbọẹ he yin dide gbọn ovò dali na Azazẹli lọ dona yin hinhẹn gbẹ̀te wá Jehovah nukọn, na yè nido basi ovẹsè do e ji, na e nido yin didohlan danfafa ji taidi Azazẹli.+

11 “Aalọn na hẹn oyìnsú avọ́nunina ylando tọn he yin ewọ lọsu tọn lọ wá bo na basi ovẹsè do ota edetiti tọn mẹ podọ do whédo etọn tọn mẹ; to enẹgodo, e na hù oyìnsú avọ́nunina ylando tọn lọ he yin ewọ lọsu tọn.+

12 “Enẹgodo, ewọ na ze miyọ́n-hẹnnú+ he mẹ akán miyọ́nawu gọ́ lọ sọn agbà+ he tin to Jehovah nukọn lọ ji, gọna nuyọnwan owán gblingblinnọ+ alọgogo awe, ewọ nasọ hẹn yé wá họmẹgbòvọ̀+ lọ godo. 13 Ewọ nasọ yí nuyọnwan lọ do miyọ́n lọ mẹ to Jehovah nukọn+ bọ azọ̀ nuyọnwan lọ tọn na tì lẹdo nùsu Apotin lọ tọn+ he tin to Kunnudenu+ lọ ji, na e nikaa kú.

14 “E nasọ yí sọn ohùn oyìnsú lọ tọn+ mẹ bo yí alọvi etọn do húnhún in pannukọn nùsu lọ to whèzẹtẹn, ewọ nasọ yí alọvi etọn do húnhún sọn ohùn lọ mẹ whla ṣinawe to nùsu lọ nukọn.+

15 “Enẹgodo, ewọ na hù gbọgbọẹ avọ́nunina ylando tọn lọ he yin mẹlọ lẹ tọn+ bo na hẹn ohùn etọn wá họmẹgbòvọ̀ lọ godo+ bo nasọ yí ohùn lọ+ do wà nudopolọ he e yí ohùn oyìnsú lọ tọn do wà; e na húnhún in sẹpọ nùsu lọ podọ to nùsu lọ nukọn.

16 “Ewọ dona basi ovẹsè do ota ofi wiwe lọ tọn mẹ gando walọ mawé Islaelivi lẹ tọn go podọ gando sẹ́nhẹngba po ylando yetọn lẹ po go,+ nudopolọ wẹ ewọ nasọ wà na gòhọ opli tọn lọ he tin to yé dè to ṣẹnṣẹn yetọn to fihe yé nọ zan walọ mawé lẹ te.

17 “Mẹdevo depope ma dona tin to gòhọ opli tọn lọ mẹ bẹsọn whenue ewọ yì nado basi ovẹsè to ofi wiwe lọ kakajẹ whenue e na tọ́njẹgbonu. Ewọ nasọ basi ovẹsè do ota edetiti tọn mẹ podọ do whédo etọn tọn mẹ+ podọ do ota agun Islaeli tọn lẹpo tọn mẹ.+

18 “Enẹgodo, ewọ na tọ́njẹgbonu wá agbà+ he tin to Jehovah nukọn lọ kọ̀n bo na basi ovẹsè do ota etọn mẹ podọ e na yí sọn ohùn oyìnsú lọ tọn mẹ podọ sọn ohùn gbọgbọẹ lọ tọn mẹ bo na yí i do azò agbà lọ tọn lẹ ji gbọn filẹpo. 19 Ewọ nasọ yí alọvi etọn do húnhún sọn ohùn lọ mẹ whla ṣinawe do e ji bo na klọ́ ẹ wé bo nasọ lẹ̀ ẹ wé sọn walọ mawé Islaelivi lẹ tọn mẹ.

20 “To whenue ewọ na ko dotana ovẹsè+ bibasi do ota ofi wiwe lọ tọn mẹ podọ do gòhọ opli tọn lọ po agbà lọ po tamẹ+ godo, e nasọ hẹn gbọgbọẹ gbẹ̀te lọ+ wá. 21 Aalọn na bẹ alọ etọn awe lẹ do ota na gbọgbọẹ gbẹ̀te lọ bo na yigbe nuṣiwa Islaelivi lẹ tọn lẹpo do e ji, gọna sẹ́nhẹngba yetọn lẹpo po ylando yetọn lẹpo po, ewọ na bẹ yé do ota na gbọgbọẹ lọ+ bo na do e hlan danfafa ji gbọn alọ sunnu he ko yin dide* nado wà ehe lọ tọn mẹ. 22 Gbọgbọẹ lọ na bẹ nuṣiwa+ yetọn lẹpo yì danfafa ji,+ ewọ nasọ do gbọgbọẹ lọ hlan danfafa ji.+

23 “Enẹgodo, Aalọn na biọ gòhọ opli tọn lọ mẹ bo na de awù alavọ tọn he e do lẹ to whenue e jei ofi wiwe lọ, ewọ nasọ bẹ yé do finẹ. 24 E nasọ lawu to osin mẹ+ to ofi wiwe de bo do awù etọn lẹ;+ enẹgodo e na tọ́njẹgbonu bo nasọ na avọ́nunina mimẹ̀ etọn+ po avọ́nunina mimẹ̀ mẹlọ lẹ tọn+ po, ewọ nasọ basi ovẹsè do ota edetiti tọn mẹ podọ do ota mẹlọ lẹ tọn+ mẹ. 25 Ewọ nasọ hẹn ojó avọ́nunina ylando tọn lọ tọn nado to azọ̀ti to agbà lọ ji.

26 “Sunnu he do gbọgbọẹ lọ hlan taidi Azazẹli+ dona yàn awù etọn lẹ bo lawu to osin mẹ, podọ enẹgodo e sọgan wá osla lọ mẹ.

27 “Podọ oyìnsú avọ́nunina ylando tọn lọ tọn po gbọgbọẹ avọ́nunina ylando tọn lọ tọn po he ohùn yetọn yin hinhẹnwa ofi wiwe lọ nado basi ovẹsè na yin hinhẹn yì gbonu osla lọ tọn, bọ ayú yetọn lẹ po olàn yetọn lẹ po gọna omí yetọn na yin fifiọ.+ 28 Mẹhe fiọ yé lọ dona yàn awù etọn lẹ bo lawu, podọ enẹgodo e sọgan wá osla lọ mẹ.

29 “Ehe na yin osẹ́ndoai dẹn-to-aimẹ de na mì: To osun ṣinawetọ mẹ to azán aotọ osun lọ tọn, mìwlẹ dona sayana mìde* podọ mì ma dona wazọ́n depope,+ vlavo tòvi kavi jonọ he nọ nọ̀ ṣẹnṣẹn mìtọn lẹ. 30 To azán ehe gbè wẹ ovẹsè+ na yin bibasi do ota mìtọn mẹ nado lá dọ mì yin wiwe. Mìwlẹ nasọ wé sọn ylando mìtọn lẹpo mẹ to Jehovah nukọn.+ 31 Gbọjẹzan gbọjẹ mlẹnmlẹn de tọn wẹ azán ehe yin na mì podọ mì dona sayana mìde.*+ Osẹ́ndoai dẹn-to-aimẹ de wẹ e yin.

32 “Yẹwhenọ he yin dide+ bo yin aṣẹ na* nado sẹ̀n taidi yẹwhenọ+ to otẹn otọ́ etọn+ tọn mẹ lọ na basi ovẹsè bo nasọ do awù alavọ tọn lọ lẹ,+ yèdọ awù wiwe lọ lẹ.+ 33 Ewọ na basi ovẹsè do ota fiwiwe lọ tọn mẹ,+ podọ do ota gòhọ opli tọn+ po agbà lọ po tọn mẹ;+ podọ e na basi ovẹsè do ota yẹwhenọ lẹ tọn mẹ podọ do ota agun lọ pete tọn mẹ.+ 34 Ehe na yin osẹ́ndoai dẹn-to-aimẹ de na mì,+ nado basi ovẹsè do ota Islaelivi lẹ tọn mẹ gando ylando yetọn lẹpo go whladopo to whemẹ.”+

Ewọ sọ basi kẹdẹdile Jehovah ko degbe etọn na Mose do.

17 Jehovah sọ dọna Mose yinukọn dogọ dọmọ: 2 “Dọho hẹ Aalọn po visunnu etọn lẹ po gọna Islaelivi lẹpo bo dọna yé dọ, ‘Nuhe Jehovah ko degbe etọn die:

3 “‘“Eyin mẹdepope sọn whédo Islaeli tọn mẹ hù oyìnsú de kavi agbò winyanwinyan de kavi gbọgbọẹ de to osla lọ mẹ kavi eyin e hù i to gbonu osla lọ tọn 4 kakati nado hẹn ẹn wá họntonu gòhọ opli tọn lọ tọn nado ze e jo taidi avọ́nunina de hlan Jehovah to gòhọtúntún Jehovah tọn nukọn, omẹ enẹ na duhùnhọ. Ewọ ko sọ̀n ohùn dai, podọ ewọ dona yin sinsánsẹ* sọn omẹ etọn lẹ mẹ. 5 Ehe yinmọ, na Islaelivi lẹ nido hẹn avọ́sinsan he yé basi todin to danji lẹ wá na Jehovah, to họntonu gòhọ opli tọn lọ tọn to yẹwhenọ lọ dè. Yé na nọ basi avọ́sinsan ehelẹ taidi avọ́sinsan jijọho tọn lẹ hlan Jehovah.+ 6 Yẹwhenọ lọ nasọ húnhún ohùn lọ do agbà Jehovah tọn ji to họntonu gòhọ opli tọn lọ tọn bo nasọ hẹn ojó lọ nado to azọ̀ti taidi owán gblingblin* de hlan Jehovah.+ 7 Enẹwutu, yé ma dona nọ sanvọ́ hlan aovi he tindo awusọhia gbọgbọẹ tọn*+ he yé nọ lọga hẹ+ lẹ ba. Ehe na yin osẹ́ndoai dẹn-to-aimẹ de na mì sọn whẹndo de ji jẹ whẹndo de ji.”’

8 “Hiẹ na dọna yé dọ, ‘Mẹdepope to whédo Islaeli tọn mẹ kavi mẹdepope to jonọ he nọ nọ̀ ṣẹnṣẹn mìtọn lẹ mẹ he jlo na na avọ́nunina mimẹ̀ kavi basi avọ́sinsan de 9 bo ma hẹn ẹn wá họntonu gòhọ opli tọn lọ tọn nado yí i do sanvọ́ hlan Jehovah dona yin sinsánsẹ* sọn omẹ etọn lẹ mẹ.+

10 “‘Eyin mẹdepope to whédo Islaeli tọn mẹ kavi mẹdepope to jonọ he nọ nọ̀ ṣẹnṣẹn mìtọn lẹ mẹ dù ohùn wunmẹ depope,+ na nugbo tọn, yẹn na diọnukunsọ mẹhe* dù ohùn lọ bo nasọ sán ẹn sẹ̀* sọn omẹ etọn lẹ mẹ. 11 Na ogbẹ̀* nutogbẹ̀ de tọn tin to ohùn etọn mẹ,+ podọ yẹn ko yí i na mì do agbà lọ ji+ na mì nido nọ basi ovẹsè do ota mìtọn titi* mẹ, na ohùn wẹ nọ basi ovẹsè,+ na ogbẹ̀* lọ tin to e mẹ wutu. 12 Enẹwutu wẹ yẹn ko dọna Islaelivi lẹ dọ: “Mẹdepope* to mì mẹ ma dona dù ohùn podọ jonọ depope he nọ nọ̀ ṣẹnṣẹn mìtọn+ ma dona dù ohùn.”+

13 “‘Eyin Islaelivi de kavi jonọ depope he nọ nọ̀ ṣẹnṣẹn mìtọn to gbéyàn bo wle gbekanlin de kavi ohẹ̀ de he sọgan yin dùdù, e dona sọ̀n ohùn etọn dai+ bo yí kọ́gudu do sú i. 14 Na ogbẹ̀* nutogbẹ̀ wunmẹ depope tọn wẹ ohùn etọn, na ohùn lọ mẹ wẹ ogbẹ̀* lọ tin te wutu. Enẹwutu wẹ yẹn dọna Islaelivi lẹ dọmọ: “Mì ma dona dù ohùn olàn depope tọn, na ogbẹ̀* nutogbẹ̀ wunmẹ lẹpo tọn tin to ohùn etọn mẹ wutu. Mẹdepope he dù i na yin sinsánsẹ.”+ 15 Eyin mẹdepope,* vlavo tòvi kavi jonọ de dù kanlin he kú difà kavi he yin tintlẹ́n gbọn kanlin de dali,+ whenẹnu ewọ dona yàn awù etọn lẹ bo lawu to osin mẹ bo nasọ yin mawé kakajẹ whèjai;+ ewọ nasọ yin wiwe. 16 Ṣigba, eyin ewọ ma yàn awù lọ lẹ bo masọ lawu, ewọ na jiya nuṣiwa etọn tọn.’”+

18 Jehovah sọ dọna Mose yinukọn dogọ dọmọ: 2 “Dọho hẹ Islaelivi lẹ bo dọna yé dọ, ‘Yẹn wẹ Jehovah Jiwheyẹwhe mìtọn.+ 3 Mìwlẹ ma dona yinuwa dile mẹhe nọ nọ̀ aigba Egipti tọn ji to fihe mì nọ nọ̀ dai lọ lẹ wà do gba, podọ mì ma dona wà nuhe yé nọ wà to aigba Kenani tọn ji, yèdọ fihe yẹn plan mì jei+ lọ gba. Mì masọ dona zinzọnlin sọgbe hẹ osẹ́ndoai yetọn lẹ gba. 4 Mì dona nọ setonuna nudide whẹdida tọn ṣie lẹ, podọ mì dona nọ yìn osẹ́ndoai ṣie lẹ bosọ nọ zinzọnlin sọgbe hẹ yé.+ Yẹn wẹ Jehovah Jiwheyẹwhe mìtọn. 5 Mì dona nọ yìn osẹ́ndoai ṣie lẹ bo nọ setonuna nudide whẹdida tọn ṣie lẹ; podọ mẹdepope he nọ wàmọ na nọgbẹ̀ gbọn yé dali.+ Yẹn wẹ Jehovah.

6 “‘Mẹdepope to mì mẹ ma dona dọnsẹpọ hẹnnumẹ sẹpọmẹ etọn depope nado tindo kọndopọ zanhẹmẹ tọn hẹ ẹ.*+ Yẹn wẹ Jehovah. 7 Hiẹ ma dona tindo kọndopọ zanhẹmẹ tọn hẹ otọ́ towe, podọ hiẹ ma dona tindo kọndopọ zanhẹmẹ tọn hẹ onọ̀ towe. Onọ̀ towe wẹ, podọ hiẹ ma dona tindo kọndopọ zanhẹmẹ tọn hẹ ẹ.

8 “‘Hiẹ ma dona tindo kọndopọ zanhẹmẹ tọn hẹ asi otọ́ towe tọn.+ Winyan* otọ́ towe tọn wẹ.

9 “‘Hiẹ ma dona tindo kọndopọ zanhẹmẹ tọn hẹ nọviyọnnu towe, vlavo e yin viyọnnu otọ́ towe tọn kavi viyọnnu onọ̀ towe tọn, vlavo ewọ yin jiji to whédo dopolọ mẹ hẹ we kavi to fidevo.+

10 “‘Hiẹ ma dona tindo kọndopọ zanhẹmẹ tọn hẹ viyọnnu visunnu towe tọn kavi viyọnnu viyọnnu towe tọn, na winyan hiẹ lọsu tọn wẹ.

11 “‘Hiẹ ma dona tindo kọndopọ zanhẹmẹ tọn hẹ viyọnnu asi otọ́ towe tọn, yèdọ ovi otọ́ towe tọn, na nọviyọnnu towe wẹ.

12 “‘Hiẹ ma dona tindo kọndopọ zanhẹmẹ tọn hẹ nọviyọnnu otọ́ towe tọn. Na hẹnnumẹ he yin ohùn dopolọ hẹ otọ́ towe wẹ ewọ yin.+

13 “‘Hiẹ ma dona tindo kọndopọ zanhẹmẹ tọn hẹ nọviyọnnu onọ̀ towe tọn, na hẹnnumẹ he yin ohùn dopolọ hẹ onọ̀ towe wẹ ewọ yin.

14 “‘Hiẹ ma dona dowinyan* nọvisunnu otọ́ towe tọn gbọn kọndopọ zanhẹmẹ tọn tintindo hẹ asi etọn dali. Na yao towe wẹ.+

15 “‘Hiẹ ma dona tindo kọndopọ zanhẹmẹ tọn hẹ ovisi towe.+ Asi visunnu towe tọn wẹ, podọ hiẹ ma dona tindo kọndopọ zanhẹmẹ tọn hẹ ẹ.

16 “‘Hiẹ ma dona tindo kọndopọ zanhẹmẹ tọn hẹ asi nọvisunnu towe tọn,+ na winyan* nọvisunnu towe tọn wẹ.

17 “‘Hiẹ ma dona tindo kọndopọ zanhẹmẹ tọn hẹ yọnnu de po viyọnnu etọn po.+ Hiẹ ma dona yí viyọnnu visunnu etọn tọn po viyọnnu viyọnnu etọn tọn po nado tindo kọndopọ zanhẹmẹ tọn hẹ yé. Hẹnnumẹ sẹpọmẹ etọn wẹ yé yin; walọ gblezọn* wẹ enẹ yin.

18 “‘Hiẹ ma dona yí nọviyọnnu asi towe tọn taidi asisi+ etọn bosọ tindo kọndopọ zanhẹmẹ tọn hẹ ẹ to whenue asi towe gbẹ́ pò togbẹ̀.

19 “‘Hiẹ ma dona dọnsẹpọ yọnnu de to ojlẹ mawé lajijẹ tọn etọn mẹ nado tindo kọndopọ zanhẹmẹ tọn hẹ ẹ.+

20 “‘Hiẹ ma dona tindo kọndopọ zanhẹmẹ tọn hẹ asi hatọ* towe tọn, bo hẹn dewe zun mawé.+

21 “‘Hiẹ ma dona dike depope to ovi towe lẹ mẹ ni yin zizejo* na Molẹki.+ Hiẹ ma dona hẹn oyín Jiwheyẹwhe towe tọn flu to aliho enẹ mẹ.+ Yẹn wẹ Jehovah.

22 “‘Hiẹ ma dona dọ́ sunnu de dè taidi yọnnu de.+ Osùnú de wẹ.

23 “‘Sunnu de ma dona tindo kọndopọ zanhẹmẹ tọn hẹ kanlin de bo hẹn ede zun mawé gbọn enẹ dali gba; mọjanwẹ yọnnu de ma dona ze ede jo na kanlin de nado tindo kọndopọ zanhẹmẹ tọn hẹ ẹ+ do niyẹn. Ehe jẹagọdo nuhe yin jọwamọ.

24 “‘Mì hẹn mìde zun mawé gbọn depope to onú ehelẹ mẹ bibasi dali blo, na gbọn onú ehe lẹpo wiwà dali wẹ akọta he yẹn to yinyan sọn nukọn mìtọn lẹ ko hẹn yede zun mawé.+ 25 Enẹwutu, aigba lọ ko yin mawé, podọ yẹn na sayana mẹhe nọ nọ̀ aigba lọ ji lẹ na nuṣiwa yetọn wutu, aigba lọ nasọ slú yé jẹgbonu.+ 26 Ṣigba, mìwlẹ dona nọ setonuna osẹ́ndoai ṣie lẹ po nudide whẹdida tọn ṣie lẹ po,+ mì masọ dona wà depope to osùnú ehelẹ mẹ, vlavo tòvi kavi jonọ he nọ nọ̀ ṣẹnṣẹn mìtọn lẹ.+ 27 Na mẹhe nọ aigba lọ ji jẹnukọnna mì lẹ ko wà osùnú ehe lẹpo,+ podọ aigba lọ ko yin mawé todin. 28 Whenẹnu, aigba lọ ma na slú mì jẹgbonu na mì hẹn ẹn flu wutu, kẹdẹdile e na slú akọta he nọ e ji jẹnukọnna mì lẹ jẹgbonu do. 29 Eyin mẹdepope wà depope to osùnú ehelẹ mẹ, mẹhe* to ehe wà lẹpo na yin sinsánsẹ* sọn omẹ yetọn lẹ mẹ. 30 Mìwlẹ dona setonuna nubiọtomẹsi ṣie lẹ gbọn laninọ na aṣa he yin osùnú he ko yin bibasi jẹnukọnna mì lẹ dali,+ na mì nikaa hẹn mìde zun mawé gbọn yé dali. Yẹn wẹ Jehovah Jiwheyẹwhe mìtọn.’”

19 Jehovah sọ dọna Mose yinukọn dogọ dọmọ: 2 “Dọho hẹ Islaelivi lẹpo bo dọna yé dọ, ‘Mìwlẹ dona yin wiwe, na wiwe wẹ yẹn Jehovah Jiwheyẹwhe mìtọn.+

3 “‘Mì dona nọ na sisi* onọ̀ mìtọn po otọ́ mìtọn lẹ po,+ podọ mì dona nọ yìn gbọjẹzan ṣie lẹ.+ Yẹn wẹ Jehovah Jiwheyẹwhe mìtọn. 4 Mì lẹhlan yẹwhe ovọ́+ lẹ dè kavi basi yẹwhe boṣiọ kinkọ̀n tọn lẹ+ na mìde blo. Yẹn wẹ Jehovah Jiwheyẹwhe mìtọn.

5 “‘Todin, eyin hiẹ jlo na basi avọ́sinsan jijọho tọn de hlan Jehovah,+ hiẹ dona basi i to aliho de mẹ na hiẹ nido yin alọkẹyi.+ 6 Avọ́sannu lọ dona nọ yin dùdù to azán he gbè avọ́sinsan lọ yin bibasi te podọ to azán he bọdego gbè, ṣigba eyin e pò jẹ azán atọ̀ntọ gbè, e dona yin fifiọ.+ 7 Podọ eyin depope to avọ́sannu lọ mẹ yin dùdù to azán atọ̀ntọ gbè, whẹhuhu de wẹ, e ma na yin alọkẹyi. 8 Mẹhe sọ dù i na jiya nuṣiwa etọn tọn, na ewọ ko hẹn onú wiwe Jehovah tọn flu, podọ omẹ* enẹ dona yin sinsánsẹ* sọn omẹ etọn lẹ mẹ.

9 “‘Eyin hiẹ gbẹ̀n jinukun towe lẹ to ogle towe lẹ mẹ, hiẹ ma dona gbẹ̀n jinukun he tin to tónu ogle towe tọn lẹpo pete gba, podọ hiẹ ma dona ṣinyan jinukun he pò na wélu-wiwe lẹ.*+ 10 Mọdopolọ, hiẹ ma dona bẹ nuhe pò to vẹngle towe mẹ lẹ pli kavi ṣinyan ovẹn sinsẹ́n he gbàpe gbọn vẹngle towe mẹ lẹ gba. Hiẹ dona jo yé do na wamọnọ*+ po mẹhe to jonọ-gbéji po. Yẹn wẹ Jehovah Jiwheyẹwhe towe.

11 “‘Hiẹ ma dona fìnnú,+ hiẹ ma dona klọmẹ,+ podọ hiẹ ma dona yinuwa hẹ hatọ towe po oklọ po. 12 Hiẹ ma dona nọ yí lalo do whlé to oyín ṣie mẹ+ bo gbọnmọ dali hẹn oyín Jiwheyẹwhe towe tọn flu. Yẹn wẹ Jehovah. 13 Hiẹ ma dona hò gbẹtọ hatọ towe dù,+ podọ hiẹ ma dona tafumẹ.+ Hiẹ ma dona hẹn azọ́nkuẹ pakanọ de tọn go to ozán blebu mẹ kakajẹ afọnnu.+

14 “‘Hiẹ ma dona donù* tókunọ de kavi ze ahlidanu de donukọnna nukuntọ́nnọ de,+ podọ hiẹ dona nọ dibusi Jiwheyẹwhe towe.+ Yẹn wẹ Jehovah.

15 “‘Hiẹ ma dona nọ yin mawadodonọ to whẹdida towe mẹ. Hiẹ ma dona do mẹnukuntahopọn hia wamọnọ kavi do nukundagbe hia adọkunnọ.+ Hiẹ dona nọ yí dodowiwa do dawhẹ gbẹtọ hatọ towe tọn.

16 “‘Hiẹ ma dona to yìyì pé to omẹ towe lẹ ṣẹnṣẹn nado to mẹhẹngble.+ Hiẹ ma dona yangbé ogbẹ̀* gbẹtọ hatọ towe tọn.*+ Yẹn wẹ Jehovah.

17 “‘Hiẹ ma dona gbẹwanna nọvisunnu towe to ahun towe mẹ.+ Hiẹ dona nọ wọhẹ gbẹtọ hatọ towe,+ na a nikaa tindo mahẹ to ylando etọn mẹ.

18 “‘Hiẹ ma dona yiahọsu+ kavi hẹn omẹ towe lẹ do homẹ, podọ hiẹ dona yiwanna gbẹtọ hatọ towe di dewe.+ Yẹn wẹ Jehovah.

19 “‘Hiẹ dona nọ yìn osẹ́ndoai ṣie lẹ: Hiẹ ma dona hẹn kanlin whégbè tọn wunmẹ awe nado hẹ yede. Hiẹ ma dona do okún wunmẹ voovo awe do ogle towe mẹ,+ podọ hiẹ ma dona do awù he yè ṣá sekan wunmẹ voovo awe dopọ nado basi de gba.+

20 “‘Todin, eyin sunnu de mlọnai dopọ hẹ yọnnu de bo tindo kọndopọ zanhẹmẹ tọn hẹ ẹ bọ yọnnu lọ sọ yin deviyọnnu sunnu devo tọn, ṣigba bọ yọnnu lọ ma ko yin fifligọ kavi ma ko mọ mẹdekannujẹ yí, to whenẹnu yè dona sayana yé. Etomọṣo, yé ma dona yin hùhù, na yọnnu lọ ma ko mọ mẹdekannujẹ yí wutu. 21 Ewọ dona hẹn agbò avọ́nunina whẹhuhu tọn etọn+ wá na Jehovah to họntonu gòhọ opli tọn lọ tọn. 22 Yẹwhenọ lọ nasọ yí agbò avọ́nunina whẹhuhu tọn lọ do basi ovẹsè do ota etọn mẹ to Jehovah nukọn, na ylando he ewọ ko wà wutu, ylando he e ko wà nasọ yin jijona ẹn.

23 “‘Eyin mì wá aigba lọ ji bo do atin depope na dùdù, to bẹjẹeji, mì dona pọ́n sinsẹ́n etọn hlan taidi mawé podọ osùnú.* Owhe atọ̀n wẹ e na yin osùnú* na mì na. E ma dona yin dùdù. 24 Ṣigba, to owhe ẹnẹtọ mẹ, sinsẹ́n etọn lẹpo na yin wiwe bo na yin yiyizan nado jaya to Jehovah nukọn.+ 25 Enẹgodo, to owhe atọ́ntọ mẹ, mì sọgan dù sinsẹ́n etọn bo nasọ bẹ ojijẹ susu pli. Yẹn wẹ Jehovah Jiwheyẹwhe mìtọn.

26 “‘Mì ma dona dù nudepope he mẹ ohùn tin te.+

“‘Mì ma dona dọ dọṣẹ kavi jlẹ obó.+

27 “‘Mì ma dona whlẹ́ oda* lẹdo pé bo jo oda ahọ̀n mẹ tọn mìtọn do* mọdopolọ mì ma dona whlẹ́ tónu ogbì mìtọn lẹ tọn kẹdẹ gba.*+

28 “‘Mì ma dona gbowhẹ do agbasa mìtọn go na oṣiọ* de wutu,+ podọ mì ma dona kannu do agbasa mìtọn go gba. Yẹn wẹ Jehovah.

29 “‘Mì ma dona de yẹyi sọn viyọnnu mìtọn go gbọn hinhẹn ẹn zun galọtọ de dali,+ na galilọ nikaa gbayipe to aigba lọ ji bọ walọ gblezọn nasọ gọ́ e ji.+

30 “‘Mìwlẹ dona nọ yìn gbọjẹzan ṣie lẹ,+ podọ mì dona nọ tindo sisi sisosiso na* fiwiwe ṣie. Yẹn wẹ Jehovah.

31 “‘Mì ma dona lẹhlan afinyọnnọ lẹ dè,+ podọ mì ma dona yì mẹhe nọ dọ dọṣẹ lẹ dè,+ na mì nikaa yin hinhẹnflu gbọn yé dali. Yẹn wẹ Jehovah Jiwheyẹwhe mìtọn.

32 “‘Mì dona nọ fọnṣite to mẹhe tindo owhà nukọn,+ podọ mì dona nọ gbògbéna mẹhe yin mẹhomẹ,+ podọ mì dona nọ dibusi Jiwheyẹwhe mìtọn.+ Yẹn wẹ Jehovah.

33 “‘Eyin jonọ de nọ nọ̀ mì dè to aigba mìtọn ji, mì ma dona ylanhùn do e go.+ 34 Jonọ he nọ nọ̀ mì dè lọ dona tin taidi tòvi de to ṣẹnṣẹn mìtọn;+ podọ mì dona yiwanna ẹn di mìde, na mìlọsu ko nọ jonọ-gbéji to aigba Egipti tọn ji pọ́n.+ Yẹn wẹ Jehovah Jiwheyẹwhe mìtọn.

35 “‘Mìwlẹ ma dona yí nujlẹnu oklọ tọn lẹ zan to tedidi, zínpinpẹn, kavi kiklo nude tọn jijlẹ whenu.+ 36 Mìwlẹ dona nọ yí ojlẹnu pipé lẹ, ojlẹnu zínpinpẹn tọn pipé lẹ, ojlẹnu onú húhú tọn pipé* lẹ po ojlẹnu osin tọn pipé* lẹ po zan.+ Yẹn wẹ Jehovah Jiwheyẹwhe mìtọn he plan mì tọ́n sọn aigba Egipti tọn ji. 37 Enẹwutu, mì dona nọ yìn osẹ́ndoai ṣie lẹpo bo nọ setonuna nudide whẹdida tọn ṣie lẹpo, mì sọ dona nọ hodo yé.+ Yẹn wẹ Jehovah.’”

20 Jehovah sọ dọhona Mose dogọ dọmọ: 2 “Dọna Islaelivi lẹ dọ, ‘Mẹdepope to Islaelivi lẹ mẹ kavi to jonọ he nọ nọ̀ Islaeli lẹ mẹ he ze depope to ovi etọn lẹ mẹ jo na Molẹki dona yin hùhù dandan.+ Mẹhe tin to aigba lọ ji lẹ dona dlan zannu do e hù. 3 Yẹnlọsu wẹ na diọnukunsọ omẹ enẹ, yẹn nasọ sán ẹn* sẹ̀ sọn omẹ etọn lẹ mẹ, na ewọ ko ze delẹ to ovi etọn lẹ mẹ jo na Molẹki bo ko hẹn ofi wiwe ṣie flu+ bo ko sọ kọnmasin do oyín wiwe ṣie go. 4 Eyin mẹhe tin to aigba lọ ji lẹ desọn ojlo mẹ bo miọnnukundo nuhe omẹ enẹ wà to whenue e ze ovi etọn jo na Molẹki bọ yé masọ hù i,+ 5 to whenẹnu, e họnwun dọ yẹnlọsu na diọnukunsọ omẹ enẹ po whẹndo etọn po.+ Yẹn nasọ sán* omẹ enẹ po mẹhe kọnawudopọ hẹ ẹ to galilọ hẹ Molẹki mẹ lẹpo po sẹ̀ sọn omẹ yetọn lẹ mẹ.

6 “‘Na nuhe dù mẹhe* lẹhlan afinyọnnọ+ lẹ po dọṣẹdọtọ+ lẹ po dè nado lọga hẹ yé to gbigbọ-liho, e họnwun dọ yẹn na diọnukunsọ omẹ* enẹ bo na sán ẹn* sẹ̀ sọn omẹ etọn lẹ mẹ.+

7 “‘Mìwlẹ dona hẹn mìde zun wiwe bosọ yin wiwe,+ na yẹn wẹ Jehovah Jiwheyẹwhe mìtọn. 8 Podọ mì dona nọ yìn osẹ́ndoai ṣie lẹ bo nọ hẹn yé di.+ Yẹn wẹ Jehovah he to mì hẹn zun wiwe.+

9 “‘Eyin mẹde donù* otọ́ etọn kavi onọ̀ etọn, e dona yin hùhù dandan.+ Na otọ́ etọn kavi onọ̀ etọn wẹ e donù wutu, ohùn edetiti tọn na tin to okọ̀ na ẹn.

10 “‘Todin, eyin sunnu de deayọ hẹ asi sunnu devo tọn: Mẹhe deayọ hẹ asi gbẹtọ hatọ etọn tọn dona yin hùhù dandan, yèdọ sunnu ayọdetọ lọ po yọnnu ayọdetọ lọ po.+ 11 Sunnu he dọ́ asi otọ́ etọn tọn dè ko dowinyan* otọ́ etọn.+ Yé omẹ awe lẹ dona yin hùhù dandan. Ohùn yetọn nasọ tin to okọ̀ na yé. 12 Eyin sunnu de dọ́ ovisi etọn dè, yé omẹ awe lẹ dona yin hùhù dandan. Yé ko wanu jẹagọdo jọwamọ. Ohùn yetọn nasọ tin to okọ̀ na yé.+

13 “‘Eyin sunnu de dọ́ sunnu devo dè taidi yọnnu de, yé omẹ awe lẹ ko wà osùnú de.+ Yé dona yin hùhù dandan. Ohùn yetọn nasọ tin to okọ̀ na yé.

14 “‘Eyin sunnu de dà yọnnu de po onọ̀ etọn po, walọ gblezọn* wẹ enẹ yin.+ Sunnu lọ po yé omẹ awe lẹ po dona yin fifiọ+ bọ walọ gblezọn ma nado zindonukọn to ṣẹnṣẹn mìtọn.

15 “‘Eyin sunnu de dọ́ kanlin de dè, ewọ dona yin hùhù dandan, mì sọ dona hù kanlin lọ.+ 16 Eyin yọnnu de dọnsẹpọ kanlin de nado tindo kọndopọ zanhẹmẹ tọn hẹ ẹ,+ mì dona hù yọnnu lọ po kanlin lọ po. Yé dona yin hùhù dandan. Ohùn yetọn nasọ tin to okọ̀ na yé.

17 “‘Eyin sunnu de tindo kọndopọ zanhẹmẹ tọn hẹ nọviyọnnu etọn, yèdọ viyọnnu otọ́ etọn tọn kavi viyọnnu onọ̀ etọn tọn bọ e mọ omẹ́ nọviyọnnu lọ tọn podọ nọviyọnnu lọ sọ mọ omẹ́ ewọ lọsu tọn, winyan wẹ.+ Yé dona yin sinsánsẹ* to nukun omẹ yetọn lẹ tọn mẹ. Ewọ ko dowinyan* nọviyọnnu etọn. E dona jiya nuṣiwa etọn tọn.

18 “‘Eyin sunnu de mlọnai dopọ hẹ yọnnu he to ojlẹ lajijẹ tọn etọn mẹ bo tindo kọndopọ zanhẹmẹ tọn hẹ ẹ, yé omẹ awe lẹ ma do sisi hia na wiwe-yinyin ohùn tọn.+ Yé omẹ awe lẹ dona yin sinsánsẹ* sọn omẹ yetọn lẹ mẹ.

19 “‘Hiẹ ma dona tindo kọndopọ zanhẹmẹ tọn hẹ nọviyọnnu onọ̀ towe tọn kavi nọviyọnnu otọ́ towe tọn, na enẹ na dowinyan hẹnnumẹ he yin ohùn dopolọ hẹ we.+ Yé dona jiya nuṣiwa yetọn tọn. 20 Sunnu he dọ́ asi tavẹ etọn tọn dè ko dowinyan* tavẹ etọn.+ Yé dona jiya ylando yetọn tọn. Yé dona kú matin ovi. 21 Eyin sunnu de yí asi nọvisunnu etọn tọn, awuhiọnu de wẹ e wà.+ Ewọ ko dowinyan* nọvisunnu etọn. Yé na lẹzun wẹnsinọ.

22 “‘Mì dona nọ yìn osẹ́ndoai ṣie lẹpo bo nọ setonuna nudide whẹdida tọn ṣie lẹpo+ bosọ nọ hẹn yé di,+ na aigba he ji yẹn plan mì jei nado yì nọ lọ ma nado slú mì jẹgbonu.+ 23 Mìwlẹ ma dona zinzọnlin sọgbe hẹ osẹ́ndoai akọta he yẹn to yinyan sọn nukọn mìtọn lẹ tọn gba;+ na onú ehe lẹpo wẹ yé ko wà bọ yẹn sọ gbẹwanna yé sinsinyẹn.+ 24 Enẹ wẹ zọ́n bọ yẹn dọna mì dọmọ: “Mìwlẹ na yí aigba yetọn taidi nutindo de, yẹn nasọ na mì aigba lọ taidi nutindo mìtọn, yèdọ aigba de he ji anọ́sin po owín po to sisà te.+ Yẹn wẹ Jehovah Jiwheyẹwhe mìtọn, mẹhe ko de mì dovo sọn akọta lẹ mẹ.”+ 25 Mì dona yọ́n vogbingbọn to kanlin wiwe po mawé po ṣẹnṣẹn podọ to ohẹ̀ mawé po wiwe po ṣẹnṣẹn;+ mìwlẹ ma dona hẹn mìde* zun awuhiọnu gbọn kanlin de kavi ohẹ̀ de kavi nuhe nọ lìn to aigba ji he ko yin didedovo nado nọ yin pinpọnhlan di onú mawé lẹ dali.+ 26 Mì dona yin wiwe hlan mi, na wiwe wẹ yẹn Jehovah,+ podọ yẹn to mì de dovo sọn akọta lẹ mẹ na mì nido lẹzun omẹ ṣie lẹ.+

27 “‘Sunnu kavi yọnnu depope he yinuwa taidi afinyọnnọ kavi he tindo gbigbọ dọṣẹdidọ* tọn dona yin hùhù dandan.+ Mẹlọ lẹ dona dlan zannu do yé hù. Ohùn yetọn nasọ tin to okọ̀ na yé.’”

21 Jehovah sọ dọhona Mose yinukọn dogọ dọmọ: “Dọho hẹ yẹwhenọ lẹ, yèdọ visunnu Aalọn tọn lẹ bo dọna yé dọ, ‘Mẹdepope ma dona hẹn ede flu na oṣiọ* omẹ etọn lẹ tọn de.+ 2 Ṣigba, ewọ sọgan wàmọ na hẹnnumẹ sẹpọmẹ he yin ohùn dopolọ hẹ ẹ, yèdọ na onọ̀ etọn, otọ́ etọn, visunnu etọn, viyọnnu etọn, nọvisunnu etọn, 3 podọ ewọ sọgan hẹn ede flu na nọviyọnnu etọn, eyin yọnnu he to alọji de wẹ e yin he sẹpọ ẹ bo ma ko wlealọ. 4 Ewọ ma sọgan hẹn ede flu bo lẹzun mawé na yọnnu de he yin asi sunnu devo tọn to omẹ etọn lẹ mẹ. 5 Yé ma dona whlẹ́ ota+ kavi pà ogbì yetọn pò kavi gbowhẹ do agbasa yetọn go.+ 6 Yé dona yin wiwe hlan Jiwheyẹwhe yetọn,+ yé masọ dona hẹn oyín Jiwheyẹwhe yetọn tọn flu,+ na yewlẹ wẹ nọ na avọ́nunina lẹ gbọn miyọ́n dali hlan Jehovah, yèdọ akla* Jiwheyẹwhe yetọn tọn lẹ, yé dona yin wiwe.+ 7 Yé ma dona dà galọtọ de,+ yọnnu he ko yin hinhẹnflu de kavi yọnnu he ko gbẹ́ asu etọn,+ na omẹ wiwe de wẹ yẹwhenọ yin hlan Jiwheyẹwhe. 8 Hiẹ dona nọ pọ́n ẹn hlan di omẹ wiwe,+ na ewọ wẹ nọ ze akla Jiwheyẹwhe towe tọn donukọnna ẹn. Hiẹ dona nọ pọ́n ẹn hlan di omẹ wiwe, na wiwe wẹ yẹn Jehovah,+ mẹlọ he to mìwlẹ hẹn zun wiwe.

9 “‘Todin, eyin viyọnnu yẹwhenọ de tọn hẹn ede flu gbọn galilọ dali, ewọ ko hẹn otọ́ etọn flu. Viyọnnu lọ dona yin fifiọ.+

10 “‘Mẹhe yin yẹwhenọ daho to nọvisunnu etọn lẹ ṣẹnṣẹn, yèdọ mẹhe ji amì mẹdide tọn lọ yin kinkọ̀n do+ bo yin aṣẹ na* nado do awù yẹwhenọ tọn lẹ+ ma dona nọ dovọ́na ota etọn kavi tlẹ́n awù etọn lẹ.+ 11 Ewọ ma dona dọnsẹpọ oṣiọ mẹdepope tọn;*+ e ma sọgan hẹn ede flu etlẹ yin na otọ́ etọn kavi na onọ̀ etọn. 12 Ewọ ma dona tọ́n sọn fiwiwe lọ podọ ewọ ma dona hẹn fiwiwe Jiwheyẹwhe etọn tọn flu,+ na ohia klandowiwe tọn lọ, yèdọ amì mẹdide tọn Jiwheyẹwhe etọn tọn+ tin to ewọ ji wutu. Yẹn wẹ Jehovah.

13 “‘Yọnnu he to alọji de wẹ e dona dà.+ 14 Ewọ ma sọgan dà asuṣiọsi de, yọnnu he gbẹ́ asu etọn de, yọnnu he ko hẹn ede flu kavi galọtọ de gba; ṣigba yọnnu he to alọji de wẹ ewọ dona dà sọn omẹ etọn lẹ mẹ. 15 Ewọ ma dona hẹn kúnkan* etọn flu to omẹ etọn lẹ mẹ,+ na yẹn wẹ Jehovah he to hinhẹn ẹn zun wiwe.’”

16 Jehovah sọ dọho yinukọn dogọ na Mose dọmọ: 17 “Dọna Aalọn dọ, ‘Sunnu depope to kúnkan* towe mẹ sọn whẹndo de ji jẹ whẹndo de ji he tindo oblọ de ma dona dọnsẹpọ nado ze akla Jiwheyẹwhe etọn tọn donukọnna ẹn. 18 Eyin sunnu depope tindo oblọ de, ewọ ma sọgan dọnsẹpọ: yèdọ sunnu he yin nukuntọ́nnọ kavi sẹkunọ kavi he nukunmẹ etọn tindo oblọ* kavi mẹhe afọ kavi alọ etọn dopo dite hú awetọ, 19 sunnu he wẹ́n afọ kavi alọ, 20 mẹhe tindo opó kavi gbẹtọ kẹtẹ* kavi mẹhe tindo oblọ nukun tọn de kavi ogùn kavi aklì kavi mẹhe onẹ́-zìn etọn lẹ gble.+ 21 Sunnu depope to kúnkan* Aalọn yẹwhenọ lọ tọn mẹ he tindo oblọ de ma sọgan dọnsẹpọ nado na avọ́nunina lẹ gbọn miyọ́n dali hlan Jehovah. Na ewọ tindo oblọ de wutu, ewọ ma sọgan dọnsẹpọ nado ze akla Jiwheyẹwhe etọn tọn donukọnna ẹn. 22 Ewọ sọgan dù akla Jiwheyẹwhe etọn tọn sọn onú wiwe gbaugbau lẹ mẹ+ podọ sọn nuhe wé lẹ mẹ.+ 23 Etomọṣo, ewọ ma sọgan biọ họmẹ yì họmẹgbòvọ̀ lọ kọ̀n,+ podọ ewọ ma sọgan dọnsẹpọ agbà lọ,+ na oblọ de to ewọ go wutu; podọ ewọ ma dona hẹn fiwiwe ṣie flu,+ na yẹn wẹ Jehovah he to yé hẹn zun wiwe.’”+

24 Enẹwutu, Mose dọhona Aalọn po visunnu etọn lẹ po gọna Islaelivi lẹpo.

22 Jehovah sọ dọhona Mose yinukọn dogọ dọmọ: 2 “Dọna Aalọn po visunnu etọn lẹ po dọ yé dona payi lehe yé nọ yinuwa hẹ* onú wiwe Islaelivi lẹ tọn do go podọ yé ma dona hẹn oyín wiwe ṣie flu+ gando nuhe yé to hinhẹn zun wiwe hlan mi lẹ go.+ Yẹn wẹ Jehovah. 3 Dọna yé dọ, ‘Sọn whẹndo de ji jẹ whẹndo de ji, eyin depope to kúnkan mìtọn lẹ mẹ dọnsẹpọ onú wiwe lẹ he Islaelivi lẹ to hinhẹn zun wiwe hlan Jehovah, to whenue ewọ yin mawé, omẹ* enẹ dona yin sinsánsẹ* sọn nukọn ṣie.+ Yẹn wẹ Jehovah. 4 Mẹdepope to kúnkan Aalọn tọn mẹ he tindo pòzọ̀n+ kavi he onú mawé de+ sà jẹgbonu sọn e go ma sọgan dù sọn onú wiwe lẹ mẹ+ kakajẹ whenue ewọ na yin wiwe, podọ nudopolọ wẹ sọ gando mẹhe doalọ mẹde he yin hinhẹn zun mawé gbọn oṣiọ gbẹtọ tọn* de dali+ kavi sunnu he vísin sà jẹgbonu sọn e go de go,+ 5 kavi mẹhe doalọ nudida flinflin mawé lẹ go+ kavi he doalọ mẹhe yin mawé de go na whẹwhinwhẹ́n depope wutu, podọ mẹhe sọgan hẹn ẹn zun mawé de go.+ 6 Mẹdepope he doalọ onú ehelẹ depope go na yin mawé kakajẹ whèjai podọ ewọ ma sọgan dù sọn depope to onú wiwe lẹ mẹ, ṣigba e dona lawu.+ 7 Eyin owhè ko yihọ, ewọ na yin wiwe, podọ enẹgodo e sọgan dù sọn onú wiwe lẹ mẹ, na núdùdù etọn wẹ wutu.+ 8 Podọ ewọ ma dona dù kanlin depope he kú difà kavi nudepope he yin tintlẹ́n gbọn gbekanlin lẹ dali bo lẹzun mawé gbọn dali etọn.+ Yẹn wẹ Jehovah.

9 “‘Yé dona nọ setonuna nubiọtomẹsi ṣie lẹ, na yé nikaa jẹ ylando mẹ bo na kú na ehe wutu, na yé ko hẹn ẹn flu wutu. Yẹn wẹ Jehovah he to yé hẹn zun wiwe.

10 “‘Mẹhe ma jẹ depope* ma sọgan dù onú wiwe depope.+ Mẹhe yin jonọ yẹwhenọ tọn kavi pakanọ depope ma sọgan dù onú wiwe depope. 11 Ṣigba, eyin yẹwhenọ de yí akuẹ etọn titi do họ̀ mẹde,* omẹ enẹ sọgan dù sọn e mẹ. Afanumẹ he yin jiji to owhé etọn gbè lẹ sọgan dù sọn núdùdù etọn mẹ ga.+ 12 Eyin viyọnnu yẹwhenọ de tọn dà mẹhe ma yin yẹwhenọ,* ewọ ma sọgan dù sọn nunina he yin onú wiwe lẹ mẹ. 13 Ṣigba, eyin viyọnnu yẹwhenọ de tọn lẹzun asuṣiọsi de kavi asu etọn gbẹ́ ẹ dai bọ ewọ ma tindo ovi bosọ lẹkọyi owhé otọ́ etọn tọn gbè taidi to jọja whenu etọn, ewọ sọgan dù sọn núdùdù otọ́ etọn tọn mẹ;+ ṣigba mẹhe ma jẹ depope* ma sọgan dù i.

14 “‘Todin, eyin mẹde dù onú wiwe de to mayọnẹn mẹ, whenẹnu ewọ dona gọ̀ onú wiwe lọ po mado-atọ́n etọn po jo na yẹwhenọ taidi avọ́nunina wiwe.+ 15 Yé ma dona hẹn onú wiwe Islaelivi lẹ tọn he yé nọ yí do basi nunina lẹ hlan Jehovah flu+ 16 bo nasọ hẹn yasanamẹ wá yé ji, na yé hùwhẹ onú wiwe yetọn lẹ dùdù tọn wutu; na yẹn wẹ Jehovah he to yé hẹn zun wiwe.’”

17 Jehovah sọ dọhona Mose yinukọn dogọ dọmọ: 18 “Dọho hẹ Aalọn po visunnu etọn lẹ po gọna Islaelivi lẹpo bo dọna yé dọ, ‘Eyin Islaelivi de kavi mẹhe to jonọ-gbéji to Islaeli de jlo na na avọ́nunina mimẹ̀+ de hlan Jehovah nado de opà etọn lẹ kavi nado basi nunina sọn ojlo mẹ wá de,+ 19 ewọ dona hẹn kanlin asu he to gángán de+ wá sọn kanlinpa lọ mẹ, sọn agbò winyanwinyan lẹ mẹ kavi sọn gbọgbọẹ lẹ mẹ, na e nido yin alọkẹyi. 20 Mìwlẹ ma dona na nudepope he tindo oblọ,+ na e ma na gọalọna mì nado yin alọkẹyi.

21 “‘Eyin mẹde jlo na basi avọ́sinsan jijọho tọn+ de na Jehovah nado de opà de kavi taidi nunina sọn ojlo mẹ wá de, e dona yin kanlin he to gángán de sọn kanlinpa kavi lẹngbọpa lọ mẹ, na e nido yin alọkẹyi. Oblọ depope ma dona tin to e go. 22 Nudepope he mì na na taidi avọ́nunina ma dona yin nukuntọ́nnọ, wẹ́n ohú sọn fide, gbleawu sọn fide, onú ma dona sẹ́n do e go, e ma dona jo ofló sọn fide kavi tindo aklì; mìwlẹ ma dona na depope to onú ehelẹ mẹ hlan Jehovah kavi basi avọ́nunina mọnkọtọn to agbà lọ ji na Jehovah. 23 Hiẹ sọgan na oyìnsú de kavi lẹngbọ de he asá etọn dopo dite hú awetọ kavi whè hú awetọ taidi avọ́nunina sọn ojlo mẹ wá de, ṣigba e ma na yin alọkẹyi taidi avọ́nunina pàdido tọn de. 24 Mìwlẹ ma dona hẹn dehe onẹ́-zìn etọn lẹ ko gble kavi yin hinhẹngble kavi yin didesẹ kavi yin sinsánsẹ de wá na Jehovah, podọ mì masọ dona yí kanlin mọnkọtọn lẹ do sanvọ́ to aigba mìtọn ji. 25 Mì masọ dona hẹn depope to onú ehe lẹpo mẹ wá sọn jonọ de si taidi akla Jiwheyẹwhe mìtọn tọn, na yé ko gblezọn bosọ tindo oblọ wutu. Yé ma na yin alọkẹyi sọn mì si.’”

26 Jehovah sọ dọhona Mose yinukọn dogọ dọmọ: 27 “Eyin oyìnsú de kavi agbò de kavi gbọgbọẹ de yin jiji, e na nọ onọ̀ etọn dè na azán ṣinawe,+ ṣigba bẹsọn azán ṣinatọ̀ntọ gbè sọyi, e na yin alọkẹyi taidi avọ́nunina, yèdọ avọ́nunina he yin bibasi gbọn miyọ́n dali hlan Jehovah. 28 Na nuhe dù oyìnsú de kavi lẹngbọ de, mì ma dona hù i po ovi etọn po to azán dopolọ gbè.+

29 “Eyin mìwlẹ basi avọ́sinsan pẹdido tọn de hlan Jehovah,+ mì dona basi i nado yin alọkẹyi. 30 E dona yin dùdù to azán lọ gbè. Mì ma dona pò depope to e mẹ dai jẹ afọnnu.+ Yẹn wẹ Jehovah.

31 “Mì dona nọ yìn gbedide ṣie lẹ bo nọ hẹn yé di.+ Yẹn wẹ Jehovah. 32 Mì ma dona hẹn oyín wiwe ṣie flu,+ podọ yẹn dona yin hinhẹn zun wiwe to Islaelivi lẹ ṣẹnṣẹn.+ Yẹn wẹ Jehovah he to mì hẹn zun wiwe,+ 33 yèdọ mẹlọ he plan mì tọ́njẹgbonu sọn aigba Egipti tọn ji nado do dee hia taidi Jiwheyẹwhe hlan mì.+ Yẹn wẹ Jehovah.”

23 Jehovah sọ dọhona Mose yinukọn dogọ dọmọ: 2 “Dọho hẹ Islaelivi lẹ bo dọna yé dọ, ‘Hùnwhẹ+ Jehovah tọn he mì dona nọ lá+ lẹ wẹ plidopọ wiwe lẹ. Hùnwhẹ ṣie lẹ die:

3 “‘Azán ṣidopo wẹ mì na nọ wazọ́n na, ṣigba azán ṣinawetọ na yin gbọjẹzan gbọjẹ mlẹnmlẹn tọn de,+ yèdọ plidopọ wiwe de. Hiẹ ma sọgan wazọ́n wunmẹ depope. E dona yin gbọjẹzan de hlan Jehovah to fidepope he mì nọ nọ̀.+

4 “‘Hùnwhẹ Jehovah tọn, yèdọ plidopọ wiwe he mì dona nọ lá to ojlẹ dide yetọn mẹ lẹ die: 5 To osun tintan mẹ, to azán 14tọ osun lọ tọn,+ Juwayi+ na yin bibasi hlan Jehovah to whèjai plẹplẹ.*

6 “‘To azán 15tọ osun ehe tọn, Hùnwhẹ Akla Madotọ́n tọn na yin bibasi hlan Jehovah.+ Azán ṣinawe wẹ mì dona dù akla madotọ́n lẹ na.+ 7 To azán tintan gbè, mì na nọ basi plidopọ wiwe de.+ Mì ma dona wazọ́n sinsinyẹn depope. 8 Ṣigba, mì na basi avọ́nunina de gbọn miyọ́n dali hlan Jehovah na azán ṣinawe. To azán ṣinawetọ gbè, plidopọ wiwe de na yin bibasi. Mì ma dona wazọ́n sinsinyẹn depope.’”

9 Jehovah sọ dọhona Mose yinukọn dogọ dọmọ: 10 “Dọho hẹ Islaelivi lẹ bo dọna yé dọ, ‘Eyin mì jẹ aigba he yẹn na na mì lọ ji bọ mì gbẹ̀n ojijẹ etọn, mì dona nọ hẹn okọ̀ dopo sinsẹ́n tintan+ ojijẹ mìtọn tọn wá yẹwhenọ lọ dè.+ 11 Ewọ nasọ mimí okọ̀ lọ yigodo yinukọn to Jehovah nukọn, na mì nido yin alọkẹyi. Yẹwhenọ lọ dona mimí i to azán he bọdo Gbọjẹzan lọ go gbè. 12 To azán he gbè yè mimí okọ̀ lọ, mì dona na agbò winyanwinyan owhe dopo mẹ tọn he to gángán de taidi avọ́nunina mimẹ̀ de hlan Jehovah. 13 Avọ́nunina jinukun-lili tọn etọn na yin bibasi po linfin dagbedagbe mado-ao ojlẹnu efa tọn awe* po he yè yí amì do yàn taidi avọ́nunina he yin bibasi gbọn miyọ́n dali hlan Jehovah nado wleawuna owán gblingblin* de. Avọ́nunina nùnù etọn na yin mado-ẹnẹ ovẹn hini* dopo tọn. 14 Mì ma dona dù akla depope, jinukun sisọ lẹ kavi okún yọyọ depope kakajẹ azán ehe gbè, yèdọ kakajẹ whenue mì na hẹn avọ́nunina Jiwheyẹwhe mìtọn tọn wá. Osẹ́ndoai dẹn-to-aimẹ de wẹ ehe yin sọn whẹndo de ji jẹ whẹndo de ji to fidepope he mì nọ nọ̀.

15 “‘Mìwlẹ na hia gbọjẹzan ṣinawe bẹsọn azán he bọdo Gbọjẹzan lọ go ji, yèdọ azán he gbè mì hẹn okọ̀ avọ́nunina he yè mimí lọ tọn wá.+ Yé dona yin osẹ he pé lẹ. 16 Mìwlẹ na hia azán 50+ kakajẹ azán he bọdo Gbọjẹzan ṣinawetọ lọ go ji, podọ enẹgodo mì dona hẹn avọ́nunina jinukun-lili tọn yọyọ de wá na Jehovah.+ 17 Mìwlẹ na hẹn akla awe wá sọn fihe mì nọ nọ̀ lẹ taidi avọ́nunina he yè mimí de. Ehelẹ dona yin bibasi po linfin dagbedagbe mado-ao ojlẹnu efa tọn awe* po. Yé dona yin sisọ po otọ́n po,+ taidi sinsẹ́n bibia tintan lẹ hlan Jehovah.+ 18 Podọ mì dona hẹn lẹngbọvu asu owhe dopo mẹ tọn he to gángán ṣinawe po oyìnsú winyanwinyan dopo po gọna agbò awe wá dopọ hẹ akla lọ lẹ.+ Yé na yin yiyizan taidi avọ́nunina mimẹ̀ de hlan Jehovah gọna avọ́nunina jinukun-lili tọn po avọ́nunina nùnù lọ lẹ po taidi avọ́nunina he yin bibasi gbọn miyọ́n dali nado wleawuna owán gblingblin* de hlan Jehovah. 19 Podọ mìwlẹ dona na gbọgbọẹvu de taidi avọ́nunina ylando tọn+ po lẹngbọvu asu awe owhe dopo mẹ tọn po taidi avọ́sinsan jijọho tọn+ de. 20 Yẹwhenọ lọ na mimí yé yigodo yinukọn po akla sinsẹ́n bibia tintan lọ lẹ tọn po, taidi avọ́nunina he yè mimí to Jehovah nukọn dopọ hẹ lẹngbọvu asu awe lọ lẹ. Yé dona yin yiyizan taidi onú wiwe de hlan Jehovah bo na lẹzun yẹwhenọ lọ tọn.+ 21 To azán ehe gbè, mìwlẹ na basi nulila+ de na plidopọ wiwe de. Mì ma sọgan wazọ́n sinsinyẹn depope. Osẹ́ndoai dẹn-to-aimẹ de wẹ ehe yin to fihe mì nọ nọ̀ lẹpo sọn whẹndo de ji jẹ whẹndo de ji.

22 “‘Eyin mì gbẹ̀n jinukun mìtọn lẹ to ogle mìtọn lẹ mẹ, mì ma dona gbẹ̀n jinukun he tin to tónu ogle mìtọn tọn lẹpo pete gba, podọ mì ma dona ṣinyan nuhe yin jijodo glemẹ sọn ojijẹ mìtọn mẹ lẹ.+ Mì dona jo e do na wamọnọ*+ po mẹhe to jonọ-gbéji+ po. Yẹn wẹ Jehovah Jiwheyẹwhe mìtọn.’”

23 Jehovah sọ dọhona Mose yinukọn dogọ dọmọ: 24 “Dọna Islaelivi lẹ dọ, ‘To osun ṣinawetọ mẹ, to azán tintan osun lọ tọn, mì dona nọ gbọjẹ mlẹnmlẹn, yèdọ oflin de he na nọ yin lilá gbọn opẹ̀n kúnkún+ dali, enẹ wẹ plidopọ wiwe de. 25 Mì ma sọgan wazọ́n sinsinyẹn depope, podọ mì na na avọ́nunina he yin bibasi gbọn miyọ́n dali de hlan Jehovah.’”

26 Jehovah sọ dọhona Mose yinukọn dogọ dọmọ: 27 “Etomọṣo, azán aotọ osun ṣinawetọ ehe tọn na yin Azán Ovẹsè tọn.+ Mì dona basi plidopọ wiwe de podọ mì dona sayana mìde*+ bo na avọ́nunina he yin bibasi gbọn miyọ́n dali hlan Jehovah. 28 Mìwlẹ ma dona wazọ́n wunmẹ depope to azán vonọtaun ehe gbè, na azán ovẹsè tọn he gbè ovẹsè+ na yin bibasi do ota mìtọn mẹ to Jehovah Jiwheyẹwhe mìtọn nukọn de wẹ e yin. 29 Mẹdepope* he ma sayana ede* to azán ehe gbè na yin sinsánsẹ* sọn omẹ etọn lẹ mẹ.+ 30 Podọ yẹn na và mẹhe* na wazọ́n wunmẹ depope to azán ehe gbè sudo sọn omẹ etọn lẹ mẹ. 31 Mì ma dona wazọ́n wunmẹ depope. Osẹ́ndoai dẹn-to-aimẹ de wẹ ehe yin sọn whẹndo de ji jẹ whẹndo de ji to fidepope he mì nọ nọ̀. 32 Gbọjẹzan gbọjẹ mlẹnmlẹn tọn de wẹ ehe yin na mì, mìwlẹ nasọ sayana mìde*+ to whèjai azán ṣinẹnẹtọ osun lọ tọn. Mì dona nọ yìn gbọjẹzan mìtọn sọn whèjai de jẹ whèjai he bọdego.”

33 Jehovah sọ dọhona Mose yinukọn dogọ dọmọ: 34 “Dọna Islaelivi lẹ dọ, ‘To azán 15tọ osun ṣinawetọ lọ tọn gbè, Hùnwhẹ Gòhọtúntún* lẹ tọn na yin bibasi na azán ṣinawe hlan Jehovah.+ 35 Plidopọ wiwe de na yin bibasi to azán tintan gbè, podọ mì ma dona wazọ́n sinsinyẹn depope. 36 Mìwlẹ dona na avọ́nunina he yin bibasi gbọn miyọ́n dali hlan Jehovah na azán ṣinawe. To azán ṣinatọ̀ntọ gbè, mì na nọ basi plidopọ wiwe+ de bo nasọ na avọ́nunina he yin bibasi gbọn miyọ́n dali de hlan Jehovah. Opli vonọtaun de wẹ e yin. Mì ma sọgan wazọ́n sinsinyẹn depope.

37 “‘Ehelẹ wẹ yin hùnwhẹ+ Jehovah tọn lẹ he mì dona nọ lá taidi plidopọ wiwe+ lẹ nado nọ na avọ́nunina he yin bibasi gbọn miyọ́n dali hlan Jehovah: avọ́nunina mimẹ̀+ lọ po avọ́nunina jinukun-lili tọn+ avọ́sinsan lọ tọn po gọna avọ́nunina nùnù+ lọ lẹ sọgbe hẹ tito azán dopodopo tọn. 38 Gbọnvona nuhe nọ yin nina to gbọjẹzan Jehovah tọn lẹ+ gbè, mìwlẹ sọ dona nọ na nunina mìtọn lẹ,+ avọ́nunina pàdido tọn+ mìtọn lẹ po avọ́nunina sọn ojlo mẹ wá+ mìtọn lẹ po hlan Jehovah. 39 Etomọṣo, to azán 15tọ osun ṣinawetọ lọ tọn gbè, to whenue mì ko bẹ ojijẹ aigba mìtọn tọn lẹ pli, mìwlẹ dona basi hùnwhẹ hlan Jehovah na azán ṣinawe.+ Azán gbọjẹ mlẹnmlẹn tọn wẹ azán tintan na yin, podọ azán ṣinatọ̀ntọ nasọ yin azán gbọjẹ mlẹnmlẹn+ tọn de ga. 40 To azán tintan gbè, mìwlẹ na yí sinsẹ́n atingbó whanpẹnọ lẹ tọn, yèdọ ohín odétin lẹ tọn,+ alà atin he vùn lẹ tọn po atin pọpila agbàdo* mẹ tọn lẹ po, mìwlẹ nasọ jaya+ to Jehovah Jiwheyẹwhe mìtọn nukọn na azán ṣinawe.+ 41 Podọ mì dona basi hùnwhẹ etọn hlan Jehovah na azán ṣinawe to whemẹ.+ Mì dona nọ basi hùnwhẹ etọn to osun ṣinawetọ mẹ taidi osẹ́ndoai dẹn-to-aimẹ de sọn whẹndo de ji jẹ whẹndo de ji. 42 Mì dona nọ nọ̀ gòhọtúntún lẹ mẹ na azán ṣinawe.+ Islaelivi jiji lẹpo wẹ dona nọ nọ̀ gòhọtúntún lẹ mẹ, 43 na whẹndo mìtọn he na bọdego lẹ nido yọnẹn+ dọ gòhọtúntún lẹ mẹ wẹ yẹn hẹn Islaelivi lẹ nado nọ nọ̀ to whenue yẹn plan yé tọ́njẹgbonu sọn aigba Egipti tọn ji.+ Yẹn wẹ Jehovah Jiwheyẹwhe mìtọn.’”

44 Enẹwutu, Mose dọho hẹ Islaelivi lẹ gando hùnwhẹ Jehovah tọn lọ lẹ go.

24 Jehovah sọ zindonukọn to hodidọ hẹ Mose mẹ dọmọ: 2 “Degbena Islaelivi lẹ nado hẹn amì olivie tọn akú wá na miyọ́ngbán lọ lẹ, na miyọ́n lọ lẹ nido nọ to titá to whepoponu.+ 3 To họmẹgbòvọ̀ Kunnudenu tọn lọ nukọn to gòhọ opli tọn lọ mẹ, Aalọn dona basi tito nado nọ hẹn miyọ́ngbán lọ lẹ do titá sọn whèjai jẹ afọnnu to Jehovah nukọn to whepoponu. Osẹ́ndoai dẹn-to-aimẹ de wẹ ehe yin sọn whẹndo de ji jẹ whẹndo de ji. 4 Ewọ dona to miyọ́ngbán lọ lẹ do miyọ́ngbán-tin+ sika akú tọn lọ ji to Jehovah nukọn to whepoponu.

5 “Hiẹ na yí linfin dagbedagbe bo na basi akla loboto 12. Mado-ao ojlẹnu efa tọn awe* wẹ dona yin yiyizan na akla dopodopo. 6 Hiẹ na to yé do gọnu awe ji, gọnu dopo na tindo akla ṣidopo+ to tafo sika akú tọn lọ ji to Jehovah nukọn.+ 7 Hiẹ dona yí nuyọnwan gblingblin akú do gọnu dopodopo ji, podọ akla lọ lẹ na yin yiyizan taidi avọ́nunina ohia tọn de*+ he yin bibasi gbọn miyọ́n dali hlan Jehovah. 8 To Gbọjẹzan dopodopo gbè, ewọ dona nọ to e to gbesisọ mẹ to Jehovah nukọn.+ Alẹnu dẹn-to-aimẹ de wẹ ehe yin hẹ Islaelivi lẹ. 9 E na lẹzun Aalọn po visunnu etọn lẹ po tọn,+ yé nasọ nọ dù i to ofi wiwe de,+ na onú wiwe gbaugbau de wẹ e yin na ewọ sọn avọ́nunina he yin bibasi gbọn miyọ́n dali hlan Jehovah lẹ mẹ taidi aṣẹdai dẹn-to-aimẹ de.”

10 Todin, visunnu nawe Islaelivi de po dawe Egiptinu+ de po tọn tin to Islaelivi lẹ ṣẹnṣẹn bọ avùn de wá aimẹ to ewọ po sunnu Islaelivi de po ṣẹnṣẹn to osla lọ mẹ. 11 Visunnu nawe Islaelivi lọ tọn sọ jẹ nùzan do Oyín lọ* go ji bosọ donù in.*+ Enẹwutu, yé hẹn ẹn wá Mose nukọn.+ Podọ onọ̀ etọn nọ yin Ṣelomiti, he yin viyọnnu Dibli tọn sọn hẹnnu Dani tọn mẹ. 12 Yé sọ wle e bo hẹn e go kakajẹ whenue nudide Jehovah tọn yin hinhẹn họnwun na yé.+

13 Enẹgodo, Jehovah dọna Mose dọmọ: 14 “Plan mẹhe donù mẹlọ jẹ gbonu osla lọ tọn, mẹhe sè whenue e donù mẹlọ lẹpo nasọ bẹ alọ yetọn lẹ do ota na ẹn, enẹgodo agun pipli lọ pete dona dlan zannu do e hù.+ 15 Hiẹ nasọ dọna Islaelivi lẹ dọ, ‘Eyin mẹdepope donù Jiwheyẹwhe etọn, ewọ na jiya ylando etọn tọn. 16 Enẹwutu, mẹhe zánnu do oyín Jehovah tọn go dona yin hùhù dandan.+ Agun pipli lọ pete dona dlan zannu do e hù dandan. Mẹhe to jonọ-gbéji dona yin hùhù dile tòvi de na yin hùhù do, na e zánnu do oyín Jiwheyẹwhe tọn go wutu.

17 “‘Eyin mẹde hù gbẹtọ,* ewọ dona yin hùhù dandan.+ 18 Mẹdepope he linú kanlin whégbè tọn de bo hù i* dona suahọ etọn, yèdọ ogbẹ̀ na ogbẹ̀.* 19 Eyin mẹde gbleawuna gbẹtọ hatọ etọn, whenẹnu nuhe e wà dona yin wiwà hẹ ẹ.+ 20 Ohú na ohú, nukun na nukun, adú na adú, awugble wunmẹ dopolọ he e hẹnwa mẹde ji wẹ dona yin hinhẹnwa ewọ lọsu ji.+ 21 Mẹhe linú kanlin de bọ e kú dona suahọ etọn,+ ṣigba mẹhe linú gbẹtọ bọ e kú dona yin hùhù.+

22 “‘Nudide whẹdida tọn dopolọ wẹ na nọ yin yiyizan na mì, vlavo mẹhe to jonọ-gbéji kavi tòvi,+ na yẹn wẹ Jehovah Jiwheyẹwhe mìtọn.’”

23 Enẹgodo, Mose dọho hẹ Islaelivi lẹ bọ yé sọ plan mẹhe donù mẹlọ jẹ gbonu osla lọ tọn bo dlan zannu do e hù.+ Gbọnmọ dali, Islaelivi lẹ basi kẹdẹdile Jehovah ko degbe etọn na Mose do.

25 Jehovah sọ dọhona Mose yinukọn dogọ to Osó Sinai tọn ji dọmọ: 2 “Dọho hẹ Islaelivi lẹ bo dọna yé dọ, ‘Eyin mì jẹ aigba he yẹn na na mì lọ ji,+ mì dona nọ yìn osẹ́n Jehovah tọn gando gbọjẹzan go bo ma dona pọ̀ aigba lọ.+ 3 Owhe ṣidopo wẹ mì na do jinukun do ogle mìtọn mẹ na, podọ owhe ṣidopo wẹ mì na de alà na vẹntin mìtọn lẹ na, mì nasọ bẹ sinsẹ́n aigba lọ tọn lẹ pli.+ 4 Ṣigba, to owhe ṣinawetọ mẹ, gbọjẹzan gbọjẹ mlẹnmlẹn tọn de dona tin to aigba lọ ji, yèdọ gbọjẹzan de hlan Jehovah. Mì ma dona do jinukun do ogle mìtọn mẹ kavi de alà na vẹntin mìtọn lẹ. 5 Mì ma dona gbẹ̀n nuhe sẹ́n na ede sọn okún he yin jijodo to jibẹwawhé whenu lẹ mẹ, podọ mì ma dona bẹ sinsẹ́n vẹntin mìtọn he yè ma de alà na lẹ tọn pli gba. Gbọjẹ owhe dopo blebu tọn wẹ dona tin to aigba lọ ji. 6 Etomọṣo, mì sọgan dù nuhe sẹ́n to aigba lọ ji to gbọjẹzan etọn whenu lẹ; hiẹ, afanumẹ sunnu po afanumẹ yọnnu towe lẹ po, pakanọ towe po gbéjinọtọ he nọ nọ̀ dè we lẹ po sọgan dù i, 7 gọna kanlin whégbè tọn po gbekanlin he tin to aigba towe ji lẹ po. Nuhe sẹ́n to aigba lọ ji lẹpo sọgan yin dùdù.

8 “‘Mì na hia owhe gbọjẹzan tọn ṣinawe, owhe ṣinawe donu ṣinawe, podọ sọha owhe gbọjẹzan tọn ṣinawe lọ lẹ tọn na yin owhe 49. 9 To whenẹnu, mì na kún opẹ̀n lọ gángán to osun ṣinawetọ, to azán aotọ osun lọ tọn mẹ; to Azán Ovẹsè tọn gbè,+ mìwlẹ dona hẹn nudidọ opẹ̀n lọ tọn nado yin sisè to aigba mìtọn pete ji. 10 Mì dona klan owhe 50tọ do wiwe bo lá mẹdekannujẹ to aigba lọ ji na mẹhe nọ nọ̀ e ji lẹpo.+ Ehe na lẹzun Jubile* de na mì bọ dopodopo mìtọn na lẹkọyi aigba mìtọn lẹ ji, podọ yì whẹndo mìtọn lẹ mẹ.+ 11 Jubile wẹ owhe 50tọ na yin na mì. Mìwlẹ ma dona do jinukun kavi gbẹ̀n nuhe sẹ́n na ede sọn okún he yin jijodo lẹ mẹ, mọdopolọ mì ma dona bẹ ovẹn sinsẹ́n vẹntin he yè ma de alà na lẹ tọn pli.+ 12 Na Jubile wẹ. E nasọ yin wiwe na mì. Sinsẹ́n he aigba lọ detọ́n na ede lẹ kẹdẹ wẹ mì sọgan dù.+

13 “‘To owhe Jubile tọn ehe mẹ, dopodopo mìtọn dona lẹkọyi aigba mìtọn lẹ ji.+ 14 Eyin mìwlẹ sà nudepope na gbẹtọ hatọ mìtọn, kavi eyin mì họ̀ nude to e si, mì tafu ode awetọ mìtọn blo.+ 15 Eyin mì jlo na họ̀ nude to gbẹtọ hatọ mìtọn si, mì dona hẹn owhe he pò whẹpo Jubile nado wá lọ do ayiha mẹ, podọ ewọ dona sà nulọ na mì sọgbe hẹ owhe he pò na jibẹwawhé.+ 16 Eyin owhe susu wẹ pò, ewọ sọgan do akuẹ nuhe e jlo na sà lọ ji, podọ eyin owhe vude wẹ pò, ewọ dona de akuẹ nuhe e jlo na sà lọ tọn pò, na sọha ojijẹ he na yin bibẹpli lọ tọn sà na mì wẹ e te. 17 Mẹdepope to mì mẹ ma dona tafu gbẹtọ hatọ etọn+ podọ mì dona nọ dibusi Jiwheyẹwhe mìtọn,+ na yẹn wẹ Jehovah Jiwheyẹwhe mìtọn.+ 18 Eyin mì nọ yìn osẹ́ndoai ṣie lẹ bo nọ setonuna nudide whẹdida tọn ṣie lẹ, mìwlẹ na nọ jijọho mẹ to aigba lọ ji.+ 19 Aigba lọ na nọ de sinsẹ́n etọn tọn,+ podọ mìwlẹ na nọ dù gọ́ho bo nasọ nọ nọ̀ e ji to jijọho mẹ.+

20 “‘Ṣigba, eyin mìwlẹ na kanse dọmọ: “Etẹwẹ mí na dù to owhe ṣinawetọ mẹ eyin mí ma do jinukun kavi bẹ ojijẹ lẹ pli?”+ 21 Yẹn na dona mì to owhe ṣidopotọ mẹ bọ aigba lọ nasọ de sinsẹ́n he na pé na owhe atọ̀n tọ́n.+ 22 To whenẹnu, mìwlẹ na do jinukun to owhe ṣinatọ̀ntọ mẹ bo nasọ dù sọn jinukun he mì ko bẹpli wayi lẹ mẹ kakajẹ owhe ṣinẹnẹtọ mẹ. Jinukun he mì ko bẹpli lẹ mẹ wẹ mì na nọ dù sọn kakajẹ whenue aigba lọ na de sinsẹ́n devo lẹ tọ́n.

23 “‘Aigba lọ ma dona nọ yin sisà na e nido lẹzun nutindo mẹhe họ̀ ẹ lọ tọn kakadoi gba,+ na ṣie wẹ aigba lọ.+ Na mẹhe to jonọ-gbéji po gbéjinọtọ lẹ po wẹ mì yin na mi to aigba lọ ji.+ 24 To aigba he yin nutindo mìtọn lọ pete ji, mìwlẹ dona hẹn jlọjẹ nado nọ fli aigba lẹ gọ̀ lọ go.

25 “‘Eyin nọvisunnu mìtọn lẹzun wamọnọ bo dona sà delẹ to nutindo etọn lẹ mẹ, mẹflitọ he yin hẹnnumẹ etọn de dona wá bo fli nuhe nọvisunnu etọn sà lọ lẹ gọ̀.+ 26 Eyin mẹde ma tindo mẹflitọ depope, ṣigba bọ ewọ lọsu ko jẹ adọkun bo tindo nuhe e na yí do fli nulọ lẹ gọ̀, 27 ewọ dona lẹn akuẹ yetọn sọn owhe he mẹ e ko sà nulọ lẹ bo nasọ suahọ he pò lọ na mẹhe e sà yé na lọ. Whenẹnu, e sọgan lẹkọyi nutindo etọn lẹ kọ̀n.+

28 “‘Ṣigba, eyin ewọ ma penugo nado fli i gọ̀ sọn e si, nuhe e sà lọ na gbọṣi mẹhe họ̀ ẹ si kakajẹ owhe Jubile tọn mẹ;+ podọ e nasọ gọ̀ ẹ jo na ẹn to Jubile whenu, ewọ nasọ lẹkọyi nutindo etọn lẹ kọ̀n.+

29 “‘Todin, eyin mẹde sà owhé de to tòdaho he adó lẹdo de mẹ, ewọ na tindo jlọjẹ nado fli i gọ̀ kakajẹ vivọnu owhe lọ tọn sọn whenue ewọ ko sà ẹ; owhe dopo blebu wẹ e na tindo jlọjẹ na nado fli i gọ̀.+ 30 Ṣigba, eyin e ma yin fifligọ kakajẹ vivọnu owhe dopo blebu tọn, owhé he tin to tòdaho he adó lẹdo lọ mẹ na lẹzun nutindo tẹgbẹ tọn mẹhe họ̀ ẹ lọ tọn sọn whẹndo de ji jẹ whẹndo de ji. E ma dona yin gigọjo to Jubile whenu. 31 Ṣigba, owhé he tin to osla he ma tindo adó lẹ mẹ dona nọ yin pinpọnhlan taidi lẹdo otò lọ tọn. Jlọjẹ lọ nado fli yé gọ̀ dona gbọṣi aimẹ, podọ yé dona yin gigọjo to Jubile whenu.

32 “‘Na nuhe dù owhé Levinu lẹ tọn he tin to tòdaho yetọn lẹ mẹ lẹ,+ Levinu lẹ na tindo jlọjẹ tẹgbẹ tọn nado nọ fli yé gọ̀. 33 Eyin nutindo Levinu lẹ tọn ma yin fifligọ, owhé he yin sisà to tòdaho he yin yetọn lọ mẹ na yin gigọjo to Jubile whenu,+ na nutindo Levinu lẹ tọn to Islaelivi lẹ ṣẹnṣẹn wẹ owhé he tin to tòdaho yetọn lẹ mẹ lẹ yin.+ 34 Humọ, kanlindugbo+ he lẹdo tòdaho yetọn lẹ ma dona yin sisà, na nutindo tẹgbẹ tọn yetọn wẹ.

35 “‘Eyin nọvisunnu mìtọn he nọ nọ̀ apá mìtọn lẹzun wamọnọ bo ma sọgan penukundo ede go,+ mì dona gọalọna ẹn dile mì na wà na mẹhe to jonọ-gbéji po gbéjinọtọ de po do,+ na e nido togbẹ̀ to apá mìtọn. 36 Mì ma dona yí akuẹvi kavi duale to e ji.*+ Mì dona nọ dibusi Jiwheyẹwhe mìtọn,+ bọ nọvisunnu mìtọn na togbẹ̀ to apá mìtọn. 37 Mì ma dona yàn akuẹ na ẹn bo donukun akuẹvi+ kavi yí núdùdù mìtọn na ẹn bo duale to e ji. 38 Yẹn wẹ Jehovah Jiwheyẹwhe mìtọn, mẹhe plan mì tọ́n sọn aigba Egipti tọn ji+ nado na mì aigba Kenani tọn bo do dee hia taidi Jiwheyẹwhe mìtọn.+

39 “‘Eyin nọvisunnu mìtọn he nọ nọ̀ apá mìtọn lẹzun wamọnọ bo sà ede na mì,+ mì ma dona hẹn ẹn nado nọ wazọ́n sinsinyẹn di afanumẹ.+ 40 Ewọ dona nọ yin nuyiwa hẹ taidi pakanọ de,+ podọ taidi gbéjinọtọ de. Ewọ na sẹ̀n mì kakajẹ owhe Jubile tọn whenu. 41 Enẹgodo, e na tọ́n sọn mì dè, yèdọ ewọ po ovi* etọn lẹ po bo na lẹkọyi whẹndo etọn mẹ. Ewọ dona lẹkọyi nutindo tọgbo etọn lẹ tọn kọ̀n.+ 42 Na afanumẹ ṣie he yẹn hẹn tọ́njẹgbonu sọn aigba Egipti tọn ji lẹ wẹ yé yin.+ Yé ma dona sà yede dile afanumẹ de nọ yin sisà do. 43 Mì ma dona yinuwa hẹ ẹ po kanyinylan po,+ podọ mì dona nọ dibusi Jiwheyẹwhe mìtọn.+ 44 Mìwlẹ sọgan nọ mọ afanumẹ sunnu po afanumẹ yọnnu lẹ po sọn akọta he lẹdo mì lẹ mẹ, mì sọgan nọ họ̀ afanumẹ sunnu kavi afanumẹ yọnnu lẹ sọn yé mẹ. 45 Humọ, mìwlẹ sọgan họ̀ afanumẹ lẹ sọn ovi gbéjinọtọ lẹ tọn he nọ nọ̀ mì dè lẹ mẹ,+ podọ sọn ovi he yin jiji to whẹndo yetọn lẹ mẹ to aigba mìtọn ji lẹ mẹ; yé nasọ lẹzun nutindo mìtọn. 46 Afanumẹ lọ lẹ sọgan lẹzun ogú tẹgbẹ tọn ovi mìtọn lẹ tọn to godo mìtọn. Mìwlẹ sọgan nọ yí yé zan taidi azọ́nwatọ lẹ, ṣigba mì ma dona nọ yinuwa po kanyinylan po hẹ nọvisunnu mìtọn lẹ, yèdọ Islaelivi lẹ.+

47 “‘Ṣigba, eyin mẹhe to jonọ-gbéji kavi gbéjinọtọ he to ṣẹnṣẹn mìtọn de lẹzun adọkunnọ bọ nọvisunnu towe lẹzun wamọnọ to apá na ẹn bo dona sà ede na mẹhe to jonọ-gbéji kavi gbéjinọtọ he nọ nọ̀ ṣẹnṣẹn mìtọn lọ, kavi na dopo to hagbẹ whẹndo tọn mẹhe to jonọ-gbéji lọ tọn lẹ mẹ, 48 ewọ na gbẹsọ tindo jlọjẹ mẹfligọ tọn to whenue e ko sà ede godo. Dopo to nọvisunnu etọn lẹ mẹ sọgan fli i gọ̀,+ 49 mọdopolọ tavẹ etọn kavi visunnu tavẹ etọn tọn sọgan fli i gọ̀, kavi hẹnnumẹ sẹpọmẹ* depope sọn whẹndo etọn mẹ sọgan fli i gọ̀.

“‘Kavi eyin ewọ lọsu jẹ adọkun, e sọgan fli ede gọ̀.+ 50 E dona lẹn ojlẹ he bẹsọn owhe he mẹ e sà ede te kakajẹ owhe Jubile tọn whenu+ hẹ mẹhe họ̀ ẹ lọ, podọ akuẹ he yè yí do sà ẹ lọ na sọgbe hẹ sọha owhe lọ lẹ tọn.+ To ojlẹ enẹ gblamẹ, azọ́nkuẹ etọn na nọ yin linlẹn to azán dopodopo ji taidi pakanọ de tọn.+ 51 Eyin owhe susu wẹ pò, ewọ dona sú mẹflikuẹ etọn sọgbe hẹ owhe he pò lẹ. 52 Ṣigba, eyin owhe vude poun wẹ pò whẹpo owhe Jubile tọn nado wá, whenẹnu e dona lẹn sọha yetọn na ede bo sú mẹflikuẹ etọn sọgbe hẹ owhe he pò lẹ. 53 E dona zindonukọn nado to sinsẹ̀n ẹn sọn owhe de mẹ jẹ devo mẹ taidi pakanọ de; podọ mì dona hẹn ẹn diun dọ ewọ ma to nuyiwa hẹ ẹ po kanyinylan po.+ 54 Etomọṣo, eyin ewọ ma sọgan fli ede gọ̀ sọgbe hẹ anademẹ ehelẹ, whenẹnu e na jẹ mẹdekannu to owhe Jubile tọn mẹ,+ yèdọ ewọ po ovi* etọn lẹ po.

55 “‘Na afanumẹ ṣie titi lẹ wẹ Islaelivi lẹ yin. Yewlẹ wẹ afanumẹ ṣie he yẹn hẹn tọ́njẹgbonu sọn aigba Egipti tọn ji lẹ.+ Yẹn wẹ Jehovah Jiwheyẹwhe mìtọn.

26 “‘Mìwlẹ ma dona basi yẹwhe ovọ́ lẹ na mìdelẹ,+ podọ mì ma dona tùn boṣiọ pipà+ kavi dòtin wiwe zannu tọn de na mìdelẹ, podọ mì ma dona wleawuna zannu pipà+ he yè doaṣọ́na de do aigba mìtọn ji nado nọ dẹ́ do odò na ẹn;+ na yẹn wẹ Jehovah Jiwheyẹwhe mìtọn. 2 Mì dona nọ yìn gbọjẹzan ṣie lẹ bo nọ tindo sisi sisosiso na* fiwiwe ṣie. Yẹn wẹ Jehovah.

3 “‘Eyin mìwlẹ zindonukọn nado nọ zinzọnlin sọgbe hẹ osẹ́ndoai ṣie lẹ bo nọ yìn gbedide ṣie lẹ bosọ nọ setonuna yé,+ 4 yẹn na nọ hẹn jikun ja to osaa sisọ etọn mẹ+ podọ aigba lọ na yọ́n na jinukun+ bọ atin danji tọn lẹ na nọ de sinsẹ́n yetọn tọ́n. 5 Ojlẹ ovẹn finfinyọ́n tọn mìtọn na dlẹnkan jẹ ojlẹ jibẹwawhé ovẹn sinsẹ́n tọn whenu, podọ ojlẹ jibẹwawhé ovẹn sinsẹ́n tọn na dlẹnkan jẹ ojlẹ jinukun dido tọn whenu; mìwlẹ nasọ nọ dùnú gọ́ho bo nọ nọ̀ jijọho mẹ to aigba mìtọn ji.+ 6 Yẹn na hẹn jijọho tin to aigba lọ ji,+ podọ mìwlẹ na mlọnai bọ mẹde ma nasọ hẹn mì dibu;+ yẹn nasọ de gbekanlin ylankan lẹ sẹ̀ sọn aigba lọ ji, ohí awhàn tọn ma nasọ jugbọn aigba mìtọn ji. 7 Na nugbo tọn, mìwlẹ na dómọna kẹntọ mìtọn lẹ, yé nasọ jai gbọn ohí dali to nukọn mìtọn. 8 Omẹ atọ́n to mì mẹ na dómọna omẹ 100, podọ omẹ 100 to mì mẹ na dómọna omẹ 10 000, kẹntọ mìtọn lẹ nasọ jai gbọn ohí dali to nukọn mìtọn.+

9 “‘Yẹn na lẹ́ nukundagbe ṣie hlan* mì bo na hẹn mì yin sinsẹ́nnọ bo nasọ hẹn mì jideji,+ yẹn nasọ yinuwa sọgbe hẹ alẹnu he yẹn basi hẹ mì.+ 10 To whenue mìwlẹ na gbẹ́ pò to sinsẹ́n hoho owhe he wayi tọn dù, e na biọ dọ mì ni bẹ sinsẹ́n hoho lọ lẹ sẹ̀ na tẹnmẹ nido tin na sinsẹ́n yọyọ lẹ. 11 Yẹn nasọ tùn gòhọtúntún ṣie do ṣẹnṣẹn mìtọn,+ podọ yẹn* ma na gbẹ́ mì dai. 12 Yẹn na nọ zinzọnlin to ṣẹnṣẹn mìtọn bo na yin Jiwheyẹwhe mìtọn,+ podọ mìwlẹ na yin omẹ ṣie lẹ.+ 13 Yẹn wẹ Jehovah Jiwheyẹwhe mìtọn he plan mì tọ́n sọn aigba Egipti tọn ji bọ mì ma nado yin afanumẹ yetọn lẹ ba, podọ yẹn wẹ de mì sẹ̀ sọn zẹgẹ mìtọn glọ bosọ hẹn mì nado to zọnlinzin jijlọ.

14 “‘Ṣigba, eyin mìwlẹ ma dotoaina mi kavi setonuna gbedide ehe lẹpo,+ 15 humọ eyin mì gbẹ́ osẹ́ndoai ṣie lẹ dai+ podọ eyin mì* jẹagọdo nudide whẹdida tọn ṣie lẹ bọ enẹ zọ́n bọ mì ma setonuna gbedide ṣie lẹpo bosọ gbà alẹnu ṣie,+ 16 nuhe bọdego ehelẹ wẹ yẹn na wà hẹ mì: Yẹn na yí awubla, pẹ́nwe po agbasa-hùnmiyọ́n po do sayana mì bọ yé na hẹn nukun mìtọn lẹ dózin bọ mì nasọ hẹn ogbẹ̀* mìtọn bu. Ovọ́ mẹ wẹ mìwlẹ na nọ do jinukun mìtọn te, kẹntọ mìtọn lẹ wẹ nasọ nọ dù i.+ 17 Yẹn na diọnukunsọ mì, kẹntọ mìtọn lẹ nasọ gbawhàn mìtọn;+ podọ mẹhe gbẹwanna mì lẹ na nọ tùnafọ mì ji,+ mìwlẹ nasọ nọ họ̀n to whenue mẹde ma to yinyan mì.+

18 “‘Eyin ehe ma tlẹ hẹn mìwlẹ nado dotoaina mi, yẹn na gbẹ́ sayana mì whla ṣinawe sọgbe hẹ ylando mìtọn lẹ. 19 Yẹn na hù aṣẹ na goyiyi mìtọn bo na hẹn olọn mìtọn nado taidi gànyuu+ podọ aigba mìtọn taidi gànvẹẹ. 20 Ovọ́ mẹ wẹ mì na nọ zan huhlọn mìtọn te, na aigba mìtọn ma na yọ́n na jinukun+ podọ atin he to aigba lọ ji lẹ ma na de sinsẹ́n tọ́n.

21 “‘Ṣigba, eyin mìwlẹ zindonukọn nado to agọjẹdo mi bosọ gbẹ́ nado dotoaina mi, whenẹnu wẹ yẹn na hò mì whla ṣinawe dogọ sọgbe hẹ ylando mìtọn lẹ. 22 Yẹn na do gbekanlin danji tọn lẹ hlan ṣẹnṣẹn mìtọn,+ yé nasọ hù ovi mìtọn lẹ,+ yé nasọ sukúndona kanlin whégbè tọn mìtọn lẹ bo na de sọha mìtọn lẹ pò, podọ alihogbó mìtọn lẹ nasọ jẹvọ́.+

23 “‘Mahopọnna onú ehelẹ, eyin mìwlẹ ma kẹalọyi wọhẹ ṣie+ bo zindonukọn nado to agọjẹdo mi janwẹ, 24 whenẹnu yẹn na diọnukunsọ mì, yẹn nasọ linú mì whla ṣinawe, na ylando mìtọn lẹ wutu. 25 Yẹn na hẹn ohí ahọsuyiyi tọn de wá mì ji, na mì gbà alẹnu lọ wutu.+ Eyin mìwlẹ bẹ mìde pli do tòdaho mìtọn lẹ mẹ, yẹn na nọ do azọ̀n de hlan ṣẹnṣẹn mìtọn+ podọ mìwlẹ na yin jijodo alọ kẹntọ de tọn mẹ.+ 26 Eyin yẹn súali núdùdù tọn mìtọn,*+ yọnnu ao wẹ na nọ hì akla mìtọn lẹ to adò dopo gee mẹ, podọ enẹgodo yé na nọ jlẹ akla lọ lẹ po nujlẹnu po;+ mì nasọ dù ṣigba e ma na gọ́ho na mì.+

27 “‘Mahopọnna ehe, eyin mìwlẹ ma dotoaina mi bo zindonukọn nado to agọjẹdo mi janwẹ, 28 yẹn na yidogọna nukundiọsọmẹ ṣie sọta mì,+ podọ yẹn nasọ sayana mì whla ṣinawe, na ylando mìtọn lẹ wutu. 29 Whenẹnu, mì na dù olàn visunnu mìtọn lẹ tọn, mì nasọ dù olàn viyọnnu mìtọn lẹ tọn.+ 30 Yẹn na sukúndona ofi wiwe yiaga+ mìtọn lẹ bo na sán agbà nuyọnwan tọn mìtọn lẹ liai bo nasọ bẹ oṣiọ mìtọn lẹ pli do boṣiọ hiọawu* mìtọn lẹ ji,+ podọ yẹn* na yí wangbẹna sinsinyẹn do lẹkọ sọn godo mìtọn.+ 31 Yẹn na jo tòdaho mìtọn lẹ do na ohí+ bo nasọ hẹn fiwiwe mìtọn lẹ jẹvọ́, yẹn ma nasọ sè owán gblingblin* avọ́sinsan mìtọn lẹ tọn ba. 32 Yẹn na hẹn aigba lọ jẹvọ́+ podọ kẹntọ mìtọn he na wá nọ e ji lẹ na nọ pọ́n ẹn po nupaṣamẹ po.+ 33 Podọ yẹn na vúnvún mì pé gbọn akọta lẹ mẹ,+ yẹn nasọ sún ohí de nado dómọna mì;+ aigba mìtọn na yin hinhẹn jẹvọ́+ podọ tòdaho mìtọn lẹ na yin vivasudo.

34 “‘Enẹgodo, aigba lọ na suahọ gbọjẹzan etọn lẹ tọn to ojlẹ he mẹ e na jẹvọ́ te lẹpo, to whenue mìwlẹ na tin to aigba kẹntọ mìtọn lẹ tọn ji. To ojlẹ enẹ mẹ, aigba lọ na gbọjẹ,* na e dona suahọ gbọjẹzan etọn lẹ tọn.+ 35 To ojlẹ he mẹ e na jẹvọ́ te lẹpo, e na gbọjẹ, na e ma gbọjẹ to gbọjẹzan mìtọn lẹ whenu to ojlẹ he mẹ mì tin to e ji te wutu.

36 “‘Na nuhe dù mẹhe na luntọ́n lẹ,+ yẹn na yí todido matindo do gọ́ ahun yetọn mẹ to aigba kẹntọ yetọn lẹ tọn ji; podọ nudidọ amà he jẹhọn to whinwhàn de tọn wẹ na nọ yàn yé dogbé, yé nasọ nọ doge-wezun mẹ bo na nọ to aijẹ taidi mẹhe to hinhọ̀n na ohí to whenue mẹde ma to yinyan yé.+ 37 Yé na nọ jai jẹ ode awetọ ji taidi mẹhe to hinhọ̀nna ohí, dile etlẹ yindọ mẹdepope ma to yinyan yé. Mì ma na penugo nado nọavùnte sọta kẹntọ mìtọn lẹ.+ 38 Mì na dọ̀n to akọta lẹ ṣẹnṣẹn,+ podọ aigba kẹntọ mìtọn lẹ tọn wẹ na ze mìwlẹ mì. 39 Mẹhe pò to mì mẹ lẹ na yọ̀n to aigba kẹntọ mìtọn lẹ tọn ji,+ na nuṣiwa mìtọn wutu. Mọwẹ, yé na yọ̀n pete, na nuṣiwa tọgbo yetọn lẹ tọn wutu.+ 40 To whenẹnu, yé na yigbe nuṣiwa yetọn titi lẹ tọn+ podọ nuṣiwa po nugbonọ-mayin tọgbo yetọn lẹ tọn po bo nasọ yigbe dọ yé ko yinuwa po nugbonọ-mayin po, na yé jẹagọdo mi wutu.+ 41 To whenẹnu, yẹn na diọnukunsọ yé+ gbọn hinhẹn yé yì aigba kẹntọ yetọn lẹ tọn ji dali.+

“‘Vlavo to whenẹnu, yè na whiwhẹ ahun adàmagbonọ* yetọn,+ bọ yé nasọ jiya nuṣiwa yetọn lẹ tọn. 42 Yẹn nasọ flin alẹnu ṣie hẹ Jakọbu+ podọ alẹnu ṣie hẹ Isaki,+ yẹn nasọ flin alẹnu ṣie hẹ Ablaham+ bọ yẹn nasọ flin aigba lọ. 43 To whenue yé na gbẹkọ aigba lọ go, e na to ahọ́ gbọjẹzan etọn lẹ tọn sú+ bo na jẹvọ́, bọ yewlẹ na to oyà nuṣiwa yetọn lẹ tọn ji, na yé gbẹ́ nudide whẹdida tọn ṣie lẹ dai, yé* sọ gbẹkọ osẹ́ndoai ṣie lẹ go.+ 44 Ṣigba, mahopọnna ehe lẹpo, to whenue yé na to aigba kẹntọ yetọn lẹ tọn ji, yẹn ma na gbẹ́ yé dai mlẹnmlẹn pọ́n gbede,+ mọjanwẹ yẹn ma na gbẹkọ yé go bọ yé na yin kúnsúdona, yèdọ nude he na gbà alẹnu ṣie+ hẹ yé; na yẹn wẹ Jehovah Jiwheyẹwhe yetọn. 45 Na yetọn wutu, yẹn na flin alẹnu he yẹn basi hẹ tọgbo yetọn lẹ+ he yẹn plan tọ́n sọn aigba Egipti tọn ji to nukun akọta lẹ tọn mẹ,+ nado do dee hia taidi Jiwheyẹwhe yetọn. Yẹn wẹ Jehovah.’”

46 Ehelẹ wẹ aṣẹdai lẹ, nudide whẹdida tọn lẹ po osẹ́n lẹ po he Jehovah doai to ede po Islaelivi lẹ po ṣẹnṣẹn to Osó Sinai tọn ji gbọn Mose gblamẹ.+

27 Jehovah sọ zindonukọn to hodidọ hẹ Mose mẹ dọmọ: 2 “Dọho hẹ Islaelivi lẹ bo dọna yé dọ, ‘Eyin mẹde dopà+ vonọtaun de nado na nunina he sọzẹn hẹ mẹde* hlan Jehovah, 3 nunina he sọzẹn hẹ sunnu de he tindo owhe 20 yì owhe 60 na yin ṣekẹli* fataka tọn 50 sọgbe hẹ ojlẹnu ṣekẹli tọn he yin ofi wiwe lọ tọn.* 4 Ṣigba, eyin yọnnu de wẹ, ṣekẹli 30 wẹ na yin súsú. 5 Eyin sunnu de he tindo owhe 5 yì 20 wẹ, ṣekẹli 20 wẹ na yin súsú, podọ yọnnu de tọn na yin ṣekẹli 10. 6 Eyin sunnu de he tindo osun dopo yì owhe atọ́n wẹ, ṣekẹli fataka tọn atọ́n wẹ na yin súsú podọ yọnnu de tọn na yin ṣekẹli fataka tọn atọ̀n.

7 “‘Eyin sunnu de he tindo owhe 60 kavi humọ wẹ, ṣekẹli 15 wẹ na yin súsú, podọ yọnnu de tọn na yin ṣekẹli 10. 8 Ṣigba, eyin ewọ yin wamọnọ sọmọ bọ e ma sọgan na sọha he sọzẹn lọ,+ e na wá nọte to yẹwhenọ lọ nukọn, podọ yẹwhenọ lọ wẹ na dọ nuhe ewọ dona na. Yẹwhenọ lọ na dọ nunina lọ sọgbe hẹ nugopipe mẹhe dopà lọ tọn.+

9 “‘Eyin pàdido lọ gando kanlin de he yè sọgan yí do basi avọ́nunina hlan Jehovah go, nudepope he sọgan yin nina Jehovah na yin wiwe. 10 Ewọ ma sọgan yí devo do diọ ẹ kavi yí dehe yin dagbe do diọ ylankan kavi yí ylankan do diọ dagbe. Ṣigba, eyin ewọ na yí kanlin de do diọ devo, kanlin tintan lọ po dehe yè diọ lọ po na yin wiwe. 11 Eyin kanlin mawé+ de wẹ he ma sọgan yin yiyizan nado basi avọ́nunina hlan Jehovah, whenẹnu ewọ na hẹn kanlin lọ wá yẹwhenọ lọ nukọn. 12 Yẹwhenọ lọ nasọ dọ sọha he sọzẹn hẹ ẹ, vlavo e yin dagbe kavi ylankan. Nuhe yẹwhenọ lọ dọ wẹ na yin nina. 13 Ṣigba, eyin e wá jọ bọ ewọ jlo na fli i gọ̀, whenẹnu e dona sú mado-atọ́n akuẹ lọ tọn dogọ.+

14 “‘Todin, eyin mẹde ze owhé etọn jo taidi onú wiwe de hlan Jehovah, whenẹnu yẹwhenọ lọ na dọ nuhọakuẹ-yinyin etọn, vlavo e yin dagbe kavi ylankan. Nuhọakuẹ-yinyin owhé lọ tọn na yin sọgbe hẹ nuhe yẹwhenọ lọ na dọ.+ 15 Ṣigba, eyin mẹhe ze owhé etọn jo lọ jlo na fli i gọ̀, whenẹnu ewọ dona sú mado-atọ́n akuẹ lọ tọn dogọ, owhé lọ nasọ lẹzun etọn.

16 “‘Eyin mẹde ze apadewhe ogle etọn tọn jo hlan Jehovah, nuhọakuẹ-yinyin ogle lọ tọn na yin sọgbe hẹ jinukun he dona yin dido do e ji: yèdọ okún bale tọn homẹli* dopo na yin ṣekẹli fataka tọn 50. 17 Eyin owhe Jubile+ tọn* mẹ wẹ e ze ogle etọn jo te, nuhọakuẹ-yinyin etọn ma na diọ. 18 Eyin Jubile godo wẹ e ze ogle lọ jo, yẹwhenọ lọ na lẹn akuẹ etọn na ẹn sọgbe hẹ owhe he pò jẹnukọnna Jubile, podọ akuẹ he sọzẹn hẹ ẹ lọ na yin didesọn e mẹ.+ 19 Ṣigba, eyin e wá jọ bọ mẹhe ze ogle lọ jo jlo na fli i gọ̀, whenẹnu ewọ dona sú mado-atọ́n akuẹ lọ tọn dogọ, bọ e nasọ lẹzun etọn. 20 Todin, eyin ewọ ma fli ogle lọ bọ e yin sisà na mẹdevo, be e ma sọgan yin fifligọ ba. 21 Eyin ogle lọ yin gigọjo to Jubile whenu, e na lẹzun onú wiwe de hlan Jehovah, yèdọ ogle de he yin didedovo hlan ẹn. E na lẹzun nutindo yẹwhenọ lẹ tọn.+

22 “‘Eyin mẹde de ogle de he e họ̀ dovo hlan Jehovah bọ e ma yin apadewhe ogú etọn tọn,+ 23 yẹwhenọ lọ na lẹn akuẹ etọn kakajẹ owhe Jubile tọn whenu na ẹn, podọ ewọ na na sọha etọn to azán enẹ gbè.+ Onú wiwe de wẹ e yin hlan Jehovah. 24 To owhe Jubile tọn mẹ, ogle lọ na yin gigọjo na mẹhe si e họ̀ ẹ te, yèdọ mẹhe tọn aigba lọ yin.+

25 “‘Nulẹpo dona nọ yin linlẹn sọgbe hẹ ojlẹnu ṣekẹli tọn he yin ofi wiwe lọ tọn. Ṣekẹli dopo dona sọzẹn hẹ gela* 20.

26 “‘Etomọṣo, mẹdepope ma dona klan kanlin plọnji de do wiwe, na kanlin plọnji lẹ ko yin Jehovah tọn sọn jiji whenu.+ Vlavo oyìnsú de kavi lẹngbọ de, Jehovah tọn wẹ e ko yin.+ 27 Eyin kanlin mawé de wẹ bọ ewọ fli i gọ̀ sọgbe hẹ akuẹ he sọzẹn hẹ ẹ lọ, e dona sú mado-atọ́n akuẹ lọ tọn dogọ.+ Ṣigba, eyin e ma yin fifligọ, e dona yin sisà sọgbe hẹ nuhọakuẹ-yinyin etọn.

28 “‘Ṣigba, nudepope he mẹde dedovo* mlẹnmlẹn hlan Jehovah sọn nutindo etọn lẹ mẹ ma sọgan yin sisà kavi fifligọ, vlavo gbẹtọ kavi kanlin kavi ogle he ewọ tindo. Onú wiwe gbaugbau de wẹ nuhe yin didedovo lẹpo yin hlan Jehovah.+ 29 Humọ, mẹhe yin whẹgbledo* bo yin kinklandovo na vasudo depope ma sọgan yin fifligọ.+ E dona yin hùhù dandan.+

30 “‘Jehovah tọn wẹ mado-ao+ aigba tọn lẹpo, vlavo ojijẹ glemẹ tọn lẹ kavi atin-sinsẹ́n lẹ tọn. Onú wiwe de wẹ hlan Jehovah. 31 Eyin e wá jọ bọ mẹde jlo na fli mado-ao etọn gọ̀, e dona sú mado-atọ́n etọn dogọ. 32 Na nuhe dù mado-ao kanlinpa kavi lẹngbọpa de tọn, yèdọ nuhe aglọpò lẹngbọhọtọ tọn nọ deanana lẹpo, onú wiwe de wẹ kanlin* aotọ dona yin hlan Jehovah. 33 Ewọ ma dona dindona eyin vlavo nulọ yin dagbe kavi ylankan, mọjanwẹ ewọ ma dona yí devo do diọ ẹ do niyẹn. Ṣigba, eyin e tẹnpọn nado yí devo do diọ ẹ janwẹ, tintan lọ po dehe yè diọ do otẹn etọn mẹ lọ po na lẹzun onú wiwe de.+ E ma sọgan yin fifligọ.’”

34 Ehelẹ wẹ yin gbedide he Jehovah na Islaelivi lẹ gbọn Mose gblamẹ to Osó Sinai tọn ji.+