SỌHA LẸ
1 To tintọ́njẹgbonu sọn aigba Egipti tọn ji godo, Jehovah dọhona Mose to danfafa Sinai tọn ji,+ to gòhọ opli tọn lọ mẹ,+ to azán tintan osun awetọ tọn gbè, to owhe awetọ mẹ.+ E dọmọ: 2 “Hia Islaelivi* lẹpo pete,+ yèdọ mẹdopodopo* sọgbe hẹ whẹndo yetọn lẹ, sọgbe hẹ whédo otọ́ yetọn tọn lẹ, bo basi todohukanji sunnu lẹpo tọn sọgbe hẹ yinkọ yetọn lẹ. 3 Hiẹ po Aalọn po ni basi todohukanji yinkọ mẹhe tindo owhe 20 podọ humọ+ bo sọgan yì awhàn to Islaeli lẹpo tọn sọgbe hẹ awhàngọnu* yetọn lẹ.
4 “De sunnu dopo sọn hẹnnu dopodopo mẹ dogọ dewe; dopodopo yetọn dona yin nukọntọ whédo otọ́ etọn tọn.+ 5 Yinkọ sunnu he na gọalọna we lẹ tọn die: sọn hẹnnu Leubẹni tọn mẹ, Elizuli+ visunnu Ṣedeuli tọn; 6 sọn hẹnnu Simeoni tọn mẹ, Ṣelumiẹli+ visunnu Zuliṣadai tọn; 7 sọn hẹnnu Juda tọn mẹ, Naṣọni+ visunnu Aminadabi tọn; 8 sọn hẹnnu Isakali tọn mẹ, Netanẹli+ visunnu Zuali tọn; 9 sọn hẹnnu Zebuluni tọn mẹ, Eliabi+ visunnu Helọni tọn; 10 sọn visunnu Josẹfu tọn lẹ mẹ: sọn hẹnnu Eflaimi+ tọn mẹ, Eliṣama visunnu Amihudi tọn; sọn hẹnnu Manasse tọn mẹ, Gamalieli visunnu Pedazuli tọn; 11 sọn hẹnnu Bẹnjamini tọn mẹ, Abidani+ visunnu Gideọni tọn; 12 sọn hẹnnu Dani tọn mẹ, Ahiezeli+ visunnu Amiṣadai tọn; 13 sọn hẹnnu Aṣeli tọn mẹ, Pagiẹli+ visunnu Oklani tọn; 14 sọn hẹnnu Gad tọn mẹ, Eliasafi+ visunnu Deuẹli tọn; 15 sọn hẹnnu Naftali tọn mẹ, Ahila+ visunnu Enani tọn. 16 Omẹ ehelẹ wẹ yin yiylọ sọn pipli lọ mẹ. Yewlẹ wẹ ahọvi+ hẹnnu otọ́ yetọn lẹ tọn, yèdọ nukọntọ pipli omẹ fọtọ́n Islaeli tọn lẹ.”+
17 Enẹwutu, Mose po Aalọn po ylọ sunnu he oyín yetọn ko yin sislẹ ehelẹ. 18 Yé sọ bẹ gbẹtọ lọ lẹpo pli to azán tintan osun awetọ tọn gbè, na dopodopo yetọn nido sọgan yin titodohukanji sọgbe hẹ yinkọ yetọn, whẹndo yetọn, podọ whédo otọ́ yetọn tọn lẹ, yèdọ mẹhe tindo owhe 20 podọ humọ+ lẹ, 19 kẹdẹdile Jehovah ko degbena Mose do. Enẹwutu, e basi todohukanji yinkọ yetọn lẹ tọn to danfafa Sinai tọn ji.+
20 Visunnu Leubẹni tọn lẹ, yèdọ kúnkan plọnji Islaeli tọn+ lọ tọn lẹ, yin titodohukanji sọgbe hẹ yinkọ yetọn, whẹndo yetọn, podọ whédo otọ́ yetọn tọn lẹ. Dopodopo sunnu he tindo owhe 20 podọ humọ bo sọgan yì awhàn lẹ tọn yin hihia, 21 bọ sọha mẹhe ze yinkọ dai to hẹnnu Leubẹni tọn mẹ lẹ tọn yin 46 500.
22 Kúnkan Simeoni+ tọn lẹ yin titodohukanji sọgbe hẹ yinkọ yetọn, whẹndo yetọn, podọ whédo otọ́ yetọn tọn lẹ. Dopodopo sunnu he tindo owhe 20 podọ humọ bo sọgan yì awhàn lẹ tọn yin hihia, 23 bọ sọha mẹhe ze yinkọ dai to hẹnnu Simeoni tọn mẹ lẹ tọn yin 59 300.
24 Kúnkan Gad+ tọn lẹ yin titodohukanji sọgbe hẹ yinkọ yetọn, whẹndo yetọn, podọ whédo otọ́ yetọn tọn lẹ. Sunnu he tindo owhe 20 podọ humọ bo sọgan yì awhàn lẹpo yin hihia, 25 bọ sọha mẹhe ze yinkọ dai to hẹnnu Gad tọn mẹ lẹ tọn yin 45 650.
26 Kúnkan Juda+ tọn lẹ yin titodohukanji sọgbe hẹ yinkọ yetọn, whẹndo yetọn, podọ whédo otọ́ yetọn tọn lẹ. Sunnu he tindo owhe 20 podọ humọ bo sọgan yì awhàn lẹpo yin hihia, 27 bọ sọha mẹhe ze yinkọ dai to hẹnnu Juda tọn mẹ lẹ tọn yin 74 600.
28 Kúnkan Isakali+ tọn lẹ yin titodohukanji sọgbe hẹ yinkọ yetọn, whẹndo yetọn, podọ whédo otọ́ yetọn tọn lẹ. Sunnu he tindo owhe 20 podọ humọ bo sọgan yì awhàn lẹpo yin hihia, 29 bọ sọha mẹhe ze yinkọ dai to hẹnnu Isakali tọn mẹ lẹ tọn yin 54 400.
30 Kúnkan Zebuluni+ tọn lẹ yin titodohukanji sọgbe hẹ yinkọ yetọn, whẹndo yetọn, podọ whédo otọ́ yetọn tọn lẹ. Sunnu he tindo owhe 20 podọ humọ bo sọgan yì awhàn lẹpo yin hihia, 31 bọ sọha mẹhe ze yinkọ dai to hẹnnu Zebuluni tọn mẹ lẹ tọn yin 57 400.
32 Kúnkan Josẹfu tọn lẹ gbọn Eflaimi+ gblamẹ yin titodohukanji sọgbe hẹ yinkọ yetọn, whẹndo yetọn, podọ whédo otọ́ yetọn tọn lẹ. Sunnu he tindo owhe 20 podọ humọ bo sọgan yì awhàn lẹpo yin hihia, 33 bọ sọha mẹhe ze yinkọ dai to hẹnnu Eflaimi tọn mẹ lẹ tọn yin 40 500.
34 Kúnkan Manasse+ tọn lẹ yin titodohukanji sọgbe hẹ yinkọ yetọn, whẹndo yetọn, podọ whédo otọ́ yetọn tọn lẹ. Sunnu he tindo owhe 20 podọ humọ bo sọgan yì awhàn lẹpo yin hihia, 35 bọ sọha mẹhe ze yinkọ dai to hẹnnu Manasse tọn mẹ lẹ tọn yin 32 200.
36 Kúnkan Bẹnjamini+ tọn lẹ yin titodohukanji sọgbe hẹ yinkọ yetọn, whẹndo yetọn, podọ whédo otọ́ yetọn tọn lẹ. Sunnu he tindo owhe 20 podọ humọ bo sọgan yì awhàn lẹpo yin hihia, 37 bọ sọha mẹhe ze yinkọ dai to hẹnnu Bẹnjamini tọn mẹ lẹ tọn yin 35 400.
38 Kúnkan Dani+ tọn lẹ yin titodohukanji sọgbe hẹ yinkọ yetọn, whẹndo yetọn, podọ whédo otọ́ yetọn tọn lẹ. Sunnu he tindo owhe 20 podọ humọ bo sọgan yì awhàn lẹpo yin hihia, 39 bọ sọha mẹhe ze yinkọ dai to hẹnnu Dani tọn mẹ lẹ tọn yin 62 700.
40 Kúnkan Aṣeli+ tọn lẹ yin titodohukanji sọgbe hẹ yinkọ yetọn, whẹndo yetọn, podọ whédo otọ́ yetọn tọn lẹ. Sunnu he tindo owhe 20 podọ humọ bo sọgan yì awhàn lẹpo yin hihia, 41 bọ sọha mẹhe ze yinkọ dai to hẹnnu Aṣeli tọn mẹ lẹ tọn yin 41 500.
42 Kúnkan Naftali+ tọn lẹ yin titodohukanji sọgbe hẹ yinkọ yetọn, whẹndo yetọn, podọ whédo otọ́ yetọn tọn lẹ. Sunnu he tindo owhe 20 podọ humọ bo sọgan yì awhàn lẹpo yin hihia, 43 bọ sọha mẹhe ze yinkọ dai to hẹnnu Naftali tọn mẹ lẹ tọn yin 53 400.
44 Omẹ ehelẹ wẹ yin titodohukanji gbọn Mose dali, to pọmẹ hẹ Aalọn po ahọvi 12 Islaeli tọn lẹ po, he dopodopo yetọn ze afọ whédo otọ́ yetọn tọn dai. 45 Islaelivi he tindo owhe 20 podọ humọ bo sọgan yì awhàn to Islaeli lẹpo sin yinkọ wẹ yin titodohukanji sọgbe hẹ whédo otọ́ yetọn tọn, 46 bọ lẹndopọ mẹhe ze yinkọ dai lẹ tọn yin 603 550.+
47 Ṣigba, yinkọ Levinu+ lẹ tọn ma yin titodohukanji sọgbe hẹ hẹnnu otọ́ yetọn lẹ tọn to pọmẹ hẹ mẹhe pò lẹ tọn.+ 48 Enẹwutu, Jehovah dọna Mose dọmọ: 49 “Hẹnnu Levi tọn kẹdẹ wẹ hiẹ ma na basi todohukanji yinkọ yetọn tọn, podọ hiẹ ma dona yí sọha yetọn dogọ Islaelivi he pò lẹ gba.+ 50 Hiẹ dona deazọ́nna Levinu lẹ nado nọ penukundo gòhọtúntún Kunnudenu+ tọn lọ, nuyizan etọn lẹpo gọna nuhe gando e go lẹpo go.+ Yewlẹ wẹ na nọ hẹn gòhọtúntún lọ po nuyizan etọn lẹpo+ po bo na nọ wadevizọn to e mẹ+ bosọ nọ dosla lẹdo gòhọtúntún lọ.+ 51 Whedepopenu he gòhọtúntún lọ dona yin tẹnsẹna, Levinu lẹ wẹ na nọ tún in;+ podọ eyin gòhọtúntún lọ na yin vivọ́ pẹ́n, Levinu lẹ wẹ dona nọ pẹ́n ẹn; mẹdevo depope* he sẹpọ ẹ dona yin hùhù.+
52 “Dopodopo Islaelivi lẹ tọn dona nọ pẹ́n gòhọ etọn do osla he yin didena ẹn mẹ, yèdọ sunnu dopodopo sọgbe hẹ mimá hẹnnu atọ̀n-atọ̀n tọn+ etọn* podọ sọgbe hẹ pipli* yetọn lẹ. 53 Levinu lẹ dona nọ dosla lẹdo gòhọtúntún Kunnudenu tọn lọ, na homẹgble nikaa wá pipli Islaelivi lẹ tọn ji;+ podọ Levinu lẹ wẹ dona nọ penukundo* gòhọtúntún Kunnudenu tọn lọ go.”+
54 Omẹ Islaeli tọn lẹ wà nuhe Jehovah ko degbe etọn na Mose lẹpo. Yé wà domọ pẹpẹ.
2 Todin, Jehovah dọhona Mose po Aalọn po dọmọ: 2 “Islaelivi lẹ dona nọ dosla do fihe yin didena mimá hẹnnu atọ̀n-atọ̀n tọn yetọn,+ yèdọ mẹdopodopo sẹpọ ohia whédo otọ́ etọn tọn. Yé dona nọ dosla pannukọn gòhọ opli tọn lọ lẹdo pé.
3 “Mimá hẹnnu atọ̀n-atọ̀n tọn Juda tọn wẹ na nọ dosla do fihe owhè nọ zẹ̀ sọn to whèzẹtẹn-waji sọgbe hẹ pipli* yetọn; ahọvi visunnu Juda tọn lẹ tọn wẹ Naṣọni+ visunnu Aminadabi tọn. 4 Sọha mẹhe ze yinkọ dai to awhànpa etọn mẹ lẹ tọn wẹ 74 600.+ 5 Hẹnnu Isakali tọn wẹ na nọ dosla do apá na ẹn; ahọvi visunnu Isakali tọn lẹ tọn wẹ Netanẹli+ visunnu Zuali tọn. 6 Sọha mẹhe ze yinkọ dai to awhànpa etọn mẹ lẹ tọn wẹ 54 400.+ 7 Hẹnnu Zebuluni tọn wẹ na bọdego; ahọvi visunnu Zebuluni tọn lẹ tọn wẹ Eliabi+ visunnu Helọni tọn. 8 Sọha mẹhe ze yinkọ dai to awhànpa etọn mẹ lẹ tọn wẹ 57 400.+
9 “To osla Juda tọn mẹ, sọha mẹhe ze yinkọ dai to awhànpa lọ lẹ mẹ lẹpo tọn wẹ 186 400. Eyin Islaelivi lẹ jlo na sẹtẹn yì fidevo, yewlẹ wẹ dona yin mimá tintan he na sẹtẹn.+
10 “Mimá hẹnnu atọ̀n-atọ̀n tọn Leubẹni tọn+ wẹ na nọ dosla do hùwaji sọgbe hẹ awhàngọnu* yetọn; ahọvi visunnu Leubẹni tọn lẹ tọn wẹ Elizuli+ visunnu Ṣedeuli tọn. 11 Sọha mẹhe ze yinkọ dai to awhànpa etọn mẹ lẹ tọn wẹ 46 500.+ 12 Hẹnnu Simeoni tọn wẹ na nọ dosla do apá na ẹn; ahọvi visunnu Simeoni tọn lẹ tọn wẹ Ṣelumiẹli+ visunnu Zuliṣadai tọn. 13 Sọha mẹhe ze yinkọ dai to awhànpa etọn mẹ lẹ tọn wẹ 59 300.+ 14 Hẹnnu Gad tọn wẹ na bọdego; ahọvi visunnu Gad tọn lẹ tọn wẹ Eliasafi+ visunnu Leuẹli tọn. 15 Sọha mẹhe ze yinkọ dai to awhànpa etọn mẹ lẹ tọn wẹ 45 650.+
16 “To osla Leubẹni tọn mẹ, sọha mẹhe ze yinkọ dai to awhànpa lọ lẹ mẹ lẹpo tọn wẹ 151 450, podọ eyin Islaelivi lẹ jlo na sẹtẹn yì fidevo, yewlẹ wẹ dona yin mimá awetọ he na sẹtẹn.+
17 “To whenue gòhọ opli tọn to yinyin tẹnsẹna,+ osla Levinu lẹ tọn wẹ dona tin to ṣẹnṣẹn osla he pò lẹ tọn.
“Yé dona nọ zingbejizọnlin to aliho gọnu-gọnu tọn mẹ kẹdẹdile yé dosla do,+ yèdọ dopodopo yetọn to otẹn etọn mẹ, sọgbe hẹ mimá hẹnnu atọ̀n-atọ̀n tọn yetọn.
18 “Mimá hẹnnu atọ̀n-atọ̀n tọn Eflaimi tọn wẹ na nọ dosla do whèyihọ-waji sọgbe hẹ awhàngọnu* yetọn; ahọvi visunnu Eflaimi tọn lẹ tọn wẹ Eliṣama+ visunnu Amihudi tọn. 19 Sọha mẹhe ze yinkọ dai to awhànpa etọn mẹ lẹ tọn wẹ 40 500.+ 20 Hẹnnu Manasse+ tọn wẹ na bọdego; ahọvi visunnu Manasse tọn lẹ tọn wẹ Gamalieli+ visunnu Pedazuli tọn. 21 Sọha mẹhe ze yinkọ dai to awhànpa etọn mẹ lẹ tọn wẹ 32 200.+ 22 Hẹnnu Bẹnjamini tọn wẹ na bọdego; ahọvi visunnu Bẹnjamini tọn lẹ tọn wẹ Abidani+ visunnu Gideọni tọn. 23 Sọha mẹhe ze yinkọ dai to awhànpa etọn mẹ lẹ tọn wẹ 35 400.+
24 “To osla Eflaimi tọn mẹ, sọha mẹhe ze yinkọ dai to awhànpa lọ lẹ mẹ lẹpo tọn wẹ 108 100, podọ eyin Islaelivi lẹ jlo na sẹtẹn yì fidevo, yewlẹ wẹ dona yin mimá atọ̀ntọ he na sẹtẹn.+
25 “Mimá hẹnnu atọ̀n-atọ̀n tọn Dani tọn wẹ na nọ dosla do agewaji sọgbe hẹ awhàngọnu* yetọn; ahọvi visunnu Dani tọn lẹ tọn wẹ Ahiezeli+ visunnu Amiṣadai tọn. 26 Sọha mẹhe ze yinkọ dai to awhànpa etọn mẹ lẹ tọn wẹ 62 700.+ 27 Hẹnnu Aṣeli tọn wẹ na nọ dosla do apá na ẹn; ahọvi visunnu Aṣeli tọn lẹ tọn wẹ Pagiẹli+ visunnu Oklani tọn. 28 Sọha mẹhe ze yinkọ dai to awhànpa etọn mẹ lẹ tọn wẹ 41 500.+ 29 Hẹnnu Naftali tọn wẹ na bọdego; ahọvi visunnu Naftali tọn lẹ tọn wẹ Ahila+ visunnu Enani tọn. 30 Sọha mẹhe ze yinkọ dai to awhànpa etọn mẹ lẹ tọn wẹ 53 400.+
31 “To osla Dani tọn mẹ, sọha mẹhe ze yinkọ dai lẹpo tọn wẹ 157 600. Eyin Islaelivi lẹ jlo na sẹtẹn yì fidevo, yewlẹ wẹ dona yin mimá godo tọn he na sẹtẹn,+ yèdọ sọgbe hẹ mimá hẹnnu atọ̀n-atọ̀n tọn yetọn.”
32 Islaelivi he ze yinkọ dai sọgbe hẹ whédo otọ́ yetọn tọn lẹ niyẹn; lẹndopọ mẹhe ze yinkọ dai na awhàn to osla lọ lẹ mẹ lẹ tọn wẹ 603 550.+ 33 Ṣigba, yinkọ Levinu lẹ tọn ma yin titodohukanji+ to pọmẹ hẹ Islaelivi he pò lẹ,+ yèdọ kẹdẹdile Jehovah ko degbena Mose do. 34 Islaelivi lẹ wà nuhe Jehovah ko degbe etọn na Mose lẹpo. Lehe yé nọ dosla do niyẹn sọgbe hẹ mimá hẹnnu atọ̀n-atọ̀n tọn yetọn+ podọ lehe yé nọ sẹtẹn do niyẹn,+ yèdọ whẹndo dopodopo sọgbe hẹ whédo otọ́ yetọn tọn lẹ.
3 Todin, ehelẹ wẹ hukan whẹndo Aalọn po Mose po tọn to azán he gbè Jehovah dọhona Mose to Osó Sinai tọn ji.+ 2 Yinkọ visunnu Aalọn tọn lẹ tọn die: Nadabi wẹ visunnu plọnji, enẹgodo Abihu,+ Eleazali+ po Itamali+ po. 3 Yinkọ visunnu Aalọn tọn lẹ tọn niyẹn, yèdọ yẹwhenọ yiamisisadode he yin azọ́ndena* nado wadevizọn taidi yẹwhenọ lẹ.+ 4 Ṣigba, Nadabi po Abihu po kú to Jehovah nukọn to danfafa Sinai tọn ji to whenue yé basi avọ́nunina mimẹ̀ de he ma yin alọkẹyi to Jehovah nukọn,+ podọ yé ma tindo visunnu depope. Etomọṣo, Eleazali+ po Itamali+ po zindonukọn nado to sinsẹ̀nzọn wà taidi yẹwhenọ lẹ to pọmẹ hẹ Aalọn otọ́ yetọn.
5 Enẹgodo, Jehovah dọna Mose dọmọ: 6 “Plan hẹnnu Levi tọn+ wá bo biọ to yé si nado ṣite to Aalọn yẹwhenọ lọ nukọn, yé nasọ nọ yilizọn+ na ẹn. 7 Yé nasọ nọ hẹn azọngban yetọn lẹ di dohlan ewọ podọ dohlan pipli lọ pete to gòhọ opli tọn lọ nukọn gbọn devizọn yetọn wiwà to kọndopọ mẹ hẹ gòhọtúntún lọ gblamẹ. 8 Yewlẹ wẹ na nọ penukundo nuyizan+ gòhọ opli tọn lọ tọn lẹpo go bo nasọ hẹn azọngban yetọn lẹ di dohlan Islaelivi lẹ gbọn nukunpipedo azọ́n he gando gòhọtúntún lọ go lẹ dali.+ 9 Hiẹ na yí Levinu lẹ na Aalọn po visunnu etọn lẹ po. Yewlẹ wẹ yin nunina lẹ he ko yin nina ẹn sọn Islaelivi lẹ mẹ.+ 10 Hiẹ dona de Aalọn po visunnu etọn lẹ po bọ yé na nọ hẹn azọngban yẹwhenọduta tọn yetọn lẹ di,+ podọ mẹdevo depope* he sẹpọ fiwiwe lọ dona yin hùhù.”+
11 Jehovah zindonukọn nado dọhona Mose dọmọ: 12 “Na yẹn tọn, pọ́n! yẹn ko de Levinu lẹ sọn Islaelivi lẹ ṣẹnṣẹn do otẹn viplọnji* Islaelivi lẹ tọn lẹpo tọn mẹ,+ podọ Levinu lẹ na lẹzun nutindo ṣie. 13 Na viplọnji lẹpo wẹ yin nutindo ṣie.+ Sọn azán he gbè yẹn hù viplọnji lẹpo to aigba Egipti tọn ji+ wẹ yẹn ko klan viplọnji lẹpo do wiwe na dee to Islaeli, yèdọ sọn gbẹtọ ji jẹ kanlin ji.+ Yé dona lẹzun nutindo ṣie. Yẹn wẹ Jehovah.”
14 Jehovah sọ zindonukọn nado dọhona Mose to danfafa Sinai tọn ji+ dọmọ: 15 “Basi todohukanji yinkọ visunnu Levi tọn lẹ tọn sọgbe hẹ whédo otọ́ yetọn tọn lẹ, podọ sọgbe hẹ whẹndo yetọn lẹ. Hiẹ dona basi todohukanji sunnu he tindo osun dopo podọ humọ lẹpo tọn.”+ 16 Enẹwutu, Mose basi todohukanji yinkọ yetọn lẹ tọn dile Jehovah dọ do, podọ kẹdẹdile e ko degbe etọn do. 17 Yinkọ visunnu Levi tọn lẹ tọn die: Gẹlṣọni, Kohati po Melali po.+
18 Todin, yinkọ visunnu Gẹlṣọni tọn lẹ tọn die, sọgbe hẹ whẹndo yetọn lẹ: Libni po Ṣimei po.+
19 Visunnu Kohati tọn lẹ sọgbe hẹ whẹndo yetọn lẹ wẹ Amlami, Izhali, Heblọni po Uziẹli po.+
20 Visunnu Melali tọn lẹ sọgbe hẹ whẹndo yetọn lẹ wẹ Mahli+ po Muṣi+ po.
Whẹndo Levinu lẹ tọn lẹ niyẹn sọgbe hẹ whédo otọ́ yetọn tọn lẹ.
21 Whẹndo he jọ sọn Gẹlṣọni mẹ lẹ wẹ whẹndo Libninu+ lẹ tọn po whẹndo Ṣimeinu lẹ tọn po. Whẹndo Gẹlṣọninu lẹ tọn lẹ niyẹn. 22 Sọha sunnu he tindo osun dopo podọ humọ to yé mẹ bo yin titodohukanji lẹpo tọn yin 7 500.+ 23 Whẹndo Gẹlṣọninu lẹ tọn nọ dosla do gòhọtúntún lọ godo+ to whèyihọ-waji. 24 Ahọvi whédo otọ́ Gẹlṣọninu lẹ tọn wẹ Eliasafi visunnu Laẹli tọn. 25 Azọngban visunnu Gẹlṣọni tọn lẹ tọn+ to gòhọ opli tọn lọ mẹ wẹ nado nọ penukundo gòhọtúntún lọ go,+ gọna onú voovo he wleawuna họta etọn to homẹ po gbonu po lẹ,+ avọ̀* he yin dido do họntonu gòhọ opli tọn lọ tọn,+ 26 avọ̀ he yin dido lẹdo awánu lọ pé lẹ,+ avọ̀*+ he to họngbo awánu he lẹdo gòhọtúntún lọ po agbà lọ po tọn nù, okàn gòhọ tọn etọn lẹ podọ azọ́n devo depope he tin to kọndopọ mẹ hẹ onú ehelẹ.
27 Whẹndo he jọ sọn Kohati mẹ lẹ wẹ whẹndo Amlaminu lẹ tọn, whẹndo Izhalinu lẹ tọn, whẹndo Heblọninu lẹ tọn po whẹndo Uziẹlinu lẹ tọn po. Whẹndo Kohatinu+ lẹ tọn lẹ niyẹn. 28 Sọha sunnu he tindo osun dopo podọ humọ he yin titodohukanji lẹpo tọn yin 8 600; azọngban yetọn wẹ nado nọ penukundo ofi wiwe lọ go.+ 29 Whẹndo visunnu Kohati tọn lẹ tọn wẹ nọ dosla do hùwaji gòhọtúntún lọ tọn.+ 30 Ahọvi whédo otọ́ whẹndo Kohatinu lẹ tọn wẹ Elizafani visunnu Uziẹli+ tọn. 31 Azọngban yetọn wẹ nado nọ penukundo Apotin+ lọ go, gọna tafo+ lọ, miyọ́ngbán-tin+ lọ, agbà+ lẹ, nuyizan+ lẹ he nọ yin yíyí do wadevizọn to ofi wiwe lọ, avọ̀ he gbò ofi wiwe lọ*+ podọ azọ́n devo depope he tin to kọndopọ mẹ hẹ onú ehelẹ.+
32 Nukọntọ ahọvi Levinu lẹ tọn wẹ Eleazali+ visunnu Aalọn yẹwhenọ lọ tọn, ewọ wẹ nọ deanana mẹhe nọ penukundo azọngban lẹ go to ofi wiwe lọ mẹ lẹ.
33 Whẹndo he jọ sọn Melali mẹ lẹ wẹ whẹndo Mahlinu lẹ tọn po whẹndo Muṣinu lẹ tọn po. Whẹndo Melali+ tọn lẹ niyẹn. 34 Sọha sunnu he tindo osun dopo podọ humọ he yin titodohukanji lẹpo tọn yin 6 200.+ 35 Ahọvi whédo otọ́ whẹndo Melali tọn lẹ tọn wẹ Zuliẹli visunnu Abihaili tọn. Yewlẹ wẹ nọ dosla do agewaji gòhọtúntún lọ tọn.+ 36 Azọngban visunnu Melali tọn lẹ tọn wẹ nado nọ penukundo owhlẹ ote tọn+ gòhọtúntún lọ tọn lẹ go, gọna atin etọn lẹ,+ dòtin etọn lẹ,+ oslò dodonu tọn etọn lẹ, nuyizan etọn lẹpo+ podọ azọ́n devo depope he tin to kọndopọ mẹ hẹ onú ehelẹ,+ 37 gọna dòtin he lẹdo awánu lọ lẹpo po oslò dodonu tọn yetọn lẹ po,+ opò tlọ́ntlọ́n gòhọ tọn yetọn lẹ po okàn gòhọ tọn yetọn lẹ po.
38 Mose, Aalọn po visunnu etọn lẹ po wẹ nọ dosla do gòhọtúntún lọ nukọn to whèzẹtẹn-waji, yèdọ to gòhọ opli tọn lọ nukọn to fihe owhè nọ zẹ̀ sọn. Azọngban yetọn wẹ nado nọ penukundo fiwiwe lọ go do Islaelivi lẹ tamẹ. Mẹdevo depope* he sẹpọ fiwiwe lọ dona yin hùhù.+
39 Sọha sunnu he yin Levinu lẹpo tọn he tindo osun dopo podọ humọ, he Mose po Aalọn po basi todohukanji yinkọ yetọn tọn sọgbe hẹ whẹndo yetọn lẹ dile Jehovah degbe etọn do yin 22 000.
40 Enẹgodo, Jehovah dọna Mose dọmọ: “Yí yinkọ visunnu plọnji Islaelivi lẹ tọn lẹpo he tindo osun dopo podọ humọ tọn dai,+ bo hia yé bosọ basi todohukanji yinkọ yetọn tọn. 41 Hiẹ dona yí Levinu lẹ na mi do otẹn viplọnji Islaelivi lẹ tọn lẹpo tọn mẹ,+ podọ yí kanlin whégbè tọn Levinu lẹ tọn do otẹn plọnji kanlin whégbè tọn Islaelivi lẹ tọn lẹpo tọn mẹ.+ Yẹn wẹ Jehovah.” 42 To whenẹnu, Mose basi todohukanji viplọnji he tin to Islaelivi lẹ ṣẹnṣẹn lẹpo tọn, kẹdẹdile Jehovah ko degbe etọn na ẹn do. 43 Sọha visunnu plọnji he tindo osun dopo podọ humọ he yin titodohukanji lẹpo tọn yin 22 273.
44 Humọ, Jehovah sọ dọhona Mose dọmọ: 45 “Yí Levinu lẹ do otẹn viplọnji he tin to Islaelivi lẹ ṣẹnṣẹn lẹpo tọn mẹ, podọ yí kanlin whégbè tọn Levinu lẹ tọn lẹ do otẹn kanlin whégbè tọn yetọn lẹ tọn mẹ, podọ Levinu lẹ dona lẹzun nutindo ṣie. Yẹn wẹ Jehovah. 46 Taidi ofligọ-kuẹ+ na viplọnji 273 he lán bọ Islaelivi lẹ yí do sù hú Levinu lẹ tọn,+ 47 hiẹ dona yí ṣekẹli* atọ́n do dopodopo yetọn tamẹ,+ sọgbe hẹ ojlẹnu ṣekẹli tọn he yin ofi wiwe lọ tọn.* Ṣekẹli dopo sọzẹn hẹ gela* 20.+ 48 Hiẹ dona bẹ akuẹ lọ na Aalọn po visunnu etọn lẹ po taidi ofligọ-kuẹ do mẹhe lán lọ lẹ tamẹ.” 49 Enẹwutu, Mose yí mẹfligọ-kuẹ lọ nado fli mẹhe lán to sọha Levinu lẹ tọn ji lọ lẹ gọ̀. 50 E yí akuẹ lọ sọn viplọnji Islaelivi lẹ tọn si, yèdọ ṣekẹli 1 365, sọgbe hẹ ojlẹnu ṣekẹli tọn he yin ofi wiwe lọ tọn. 51 Enẹgodo, Mose bẹ ofligọ-kuẹ lọ na Aalọn po visunnu etọn lẹ po dile Jehovah ko dọ do, podọ kẹdẹdile Jehovah ko degbe etọn na Mose do.
4 Todin, Jehovah dọhona Mose po Aalọn po dọmọ: 2 “Visunnu Kohati tọn lẹ+ dona yin hihia to visunnu Levi tọn lẹ ṣẹnṣẹn sọgbe hẹ whẹndo yetọn lẹ, podọ sọgbe hẹ whédo otọ́ yetọn tọn lẹ, 3 yèdọ mẹhe tindo owhe 30+ jẹ 50+ bo tin to pipli he yin azọ́ndena nado nọ wazọ́n to gòhọ opli tọn lọ mẹ lẹpo.+
4 “Devizọn he visunnu Kohati tọn lẹ na nọ wà to gòhọ opli tọn lọ mẹ die.+ Onú wiwe gbaugbau de wẹ: 5 Eyin akọta lọ jlo na sẹtẹn yì fidevo, Aalọn po visunnu etọn lẹ po wẹ na nọ biọ họmẹ yì bo de avọ̀ he gbò ofi wiwe lọ+ jẹte bosọ yí i do ṣinyọ́n apotin+ Kunnudenu tọn lọ ji. 6 Yé na nọ yí kanlin-yú* de ṣinyọ́n e ji bo tẹ́ avọ̀ juju petepete de do e ji bosọ gọ̀ opò+ he yè do nọ ze e lẹ whè do otẹn yetọn mẹ.
7 “Yé nasọ nọ tẹ́ avọ̀ juju petepete de do tafo akla sọhia tọn+ lọ ji bo bẹ agbánvla lẹ, kọfo lẹ, agbán lẹ po tọ̀zẹ́n avọ́nunina nùnù tọn lẹ po+ do e ji; avọ́nunina akla tọn+ he nọ yin bibasi to gbesisọ mẹ dona gbọṣi e ji. 8 Yé nasọ nọ tẹ́ avọ̀ vẹẹ ṣẹ́ṣẹ́ de do yé ji bo yí kanlin-yú de ṣinyọ́n e ji bosọ gọ̀ opò he yè do nọ ze e lẹ+ whè do otẹn yetọn mẹ. 9 Enẹgodo, yé na nọ yí avọ̀ juju de do ṣinyọ́n miyọ́ngbán-tin+ he nọ na hinhọ́n lọ ji gọna miyọ́ngbán+ etọn lẹ, miyọ́n-denú etọn lẹ, miyọ́n-hẹnnú etọn lẹ+ podọ nuhẹnnú etọn lẹpo he mẹ amì he nọ yin kinkọ̀n do miyọ́ngbán lẹ mẹ nọ nọ̀. 10 Yé na nọ yí kanlin-yú de do bu i po nuyizan etọn lẹpo po bo ze e do atin he yè na yí do ze e ji. 11 Yé nasọ nọ tẹ́ avọ̀ juju de do agbà sika tọn+ lọ ji bo yí kanlin-yú de ṣinyọ́n e ji bosọ gọ̀ opò+ he yè do nọ ze e lẹ whè do otẹn yetọn mẹ. 12 Enẹgodo, yé na nọ bẹ nuyizan+ he yé do nọ wadevizọn to gbesisọ mẹ to ofi wiwe lọ mẹ lẹpo do avọ̀ juju de mẹ bo yí kanlin-yú de ṣinyọ́n yé ji bosọ bẹ yé do atin he yè na yí do ze yé ji.
13 “Yé dona nọ bẹ afín* sẹ̀ sọn agbà lọ ji+ bo tẹ́ sopẹ́-vọ̀ de do e ji. 14 Yé nasọ nọ bẹ nuyizan he yé nọ yí do wadevizọn to agbà lọ kọ̀n lẹpo do e ji: enẹ wẹ miyọ́n-hẹnnú lẹ, ṣivi-fẹ̀nnọ lẹ, fẹli lẹ po agbán lẹ po, yèdọ nuyizan agbà lọ tọn lẹpo;+ yé sọ dona nọ yí kanlin-yú de ṣinyọ́n e ji bo gọ̀ opò+ he yè do nọ ze e lẹ whè do otẹn yetọn mẹ.
15 “Eyin akọta lọ jlo na sẹtẹn yì fidevo, Aalọn po visunnu etọn lẹ po dona nọ ṣinyọnnudo onú ofi wiwe lọ tọn lẹ+ gọna nuyizan ofi wiwe lọ tọn lẹpo whẹ́. Enẹgodo, visunnu Kohati tọn lẹ na biọ họmẹ yì bo bẹ yé,+ ṣigba yé ma dona doalọ onú ofi wiwe lọ tọn lẹ go, na yé nikaa kú.+ Azọngban* visunnu Kohati tọn lẹ tọn to kọndopọ mẹ hẹ gòhọ opli tọn lọ niyẹn.
16 “Eleazali+ visunnu Aalọn yẹwhenọ lọ tọn wẹ na nọ deanana nukunpipedo amì he yè nọ yí do na hinhọ́n go,+ gọna nuyọnwan owán gblingblinnọ,+ avọ́nunina jinukun-lili tọn he nọ yin bibasi to gbesisọ mẹ po amì mẹdide tọn+ po. Ewọ wẹ na nọ deanana nukunpipedo gòhọtúntún lọ blebu po nuhe to e mẹ lẹpo po go gọna ofi wiwe lọ po nuyizan etọn lẹ po.”
17 Jehovah sọ zindonukọn nado dọhona Mose po Aalọn po dọmọ: 18 “Mì dike hẹnnu whẹndo Kohatinu+ lẹ tọn yin sinsánsẹ sọn Levinu lẹ ṣẹnṣẹn blo. 19 Ṣigba, na yé nikaa dọnsẹpọ onú wiwe gbaugbau lẹ+ bo kú, nuhe mì na wà na yé bọ yé nado gbọṣi ogbẹ̀ die. Aalọn po visunnu etọn lẹ po wẹ na nọ biọ họmẹ yì bo de devizọn he dopodopo yetọn dona wà po nuhe yé dona ze lẹ po na yé. 20 Yewlẹ ma dona biọ họmẹ yì bo sọnukunmọ onú wiwe lẹ, etlẹ yin fliun dopo poun, na yé nikaa kú.”+
21 Enẹgodo, Jehovah dọhona Mose dọmọ: 22 “Visunnu Gẹlṣọni tọn lẹ+ dona yin hihia sọgbe hẹ whédo otọ́ yetọn tọn lẹ, podọ sọgbe hẹ whẹndo yetọn lẹ. 23 Hiẹ dona basi todohukanji yinkọ mẹhe tindo owhe 30 jẹ 50 bo tin to pipli he yin azọ́ndena nado nọ wadevizọn to gòhọ opli tọn lọ mẹ lẹpo tọn. 24 Nuhe whẹndo Gẹlṣọninu lẹ tọn yin azọ́ndena nado nọ penukundego podọ nado nọ ze lẹ die:+ 25 Yewlẹ wẹ dona nọ hẹn avọ̀ gòhọtúntún lọ tọn lẹ,+ avọ̀ gòhọ opli tọn lọ tọn, kanlin-yú gòhọ lọ tọn po avọ̀ gòhọ tọn he tin to oglọ etọn po.+ Yewlẹ wẹ nasọ nọ hẹn avọ̀* he nọ yin dido do họntonu gòhọ opli tọn lọ tọn,+ 26 avọ̀ he nọ yin dido lẹdo awánu lọ lẹ,+ avọ̀* he tin to họngbo awánu he lẹdo gòhọtúntún lọ po agbà lọ po tọn nù,+ okàn gòhọ tọn yetọn lẹ po nuyizan yetọn lẹpo po gọna nuhe nọ yin yíyí do wadevizọn lẹpo. Azọ́ndenamẹ yetọn niyẹn. 27 Aalọn po visunnu etọn lẹ po wẹ dona nọ deanana devizọn Gẹlṣọninu+ lẹ tọn po agbàn he yé na nọ hẹn lẹ po; hiẹ na de agbàn ehe lẹpo na yé taidi azọngban yetọn. 28 Devizọn he whẹndo Gẹlṣọninu lẹ tọn dona nọ wà to gòhọ opli tọn lọ mẹ niyẹn,+ podọ Itamali+ visunnu Aalọn yẹwhenọ lọ tọn wẹ na nọ deanana azọngban yetọn lẹ.
29 “Na nuhe dù visunnu Melali tọn lẹ,+ hiẹ na basi todohukanji yinkọ yetọn tọn sọgbe hẹ whẹndo yetọn, podọ sọgbe hẹ whédo otọ́ yetọn tọn. 30 Hiẹ na basi todohukanji yinkọ mẹhe tindo owhe 30 jẹ 50 to yé mẹ lẹ tọn, yèdọ mẹhe tin to pipli he yin azọ́ndena nado nọ wadevizọn to gòhọ opli tọn lọ mẹ lẹpo. 31 Nuhe yé yin azọ́ndena nado nọ ze+ to kọndopọ mẹ hẹ devizọn yetọn to gòhọ opli tọn lọ mẹ lẹ die: owhlẹ ote tọn+ gòhọtúntún lọ tọn lẹ, atin etọn lẹ,+ dòtin etọn lẹ,+ oslò dodonu tọn etọn lẹ;+ 32 dòtin+ he lẹdo awánu lọ pé lẹ, oslò dodonu tọn yetọn lẹ,+ opò tlọ́ntlọ́n gòhọ tọn yetọn lẹ,+ okàn gòhọ tọn yetọn lẹ gọna nuyizan yetọn lẹpo podọ azọ́n devo depope he tin to kọndopọ mẹ hẹ onú ehelẹ. Hiẹ na de nuyizan he dopodopo yetọn na nọ ze na yé. 33 Lehe whẹndo visunnu Melali+ tọn lẹ na nọ wadevizọn to gòhọ opli tọn lọ mẹ do niyẹn, to anademẹ Itamali visunnu Aalọn yẹwhenọ lọ tọn glọ.”+
34 To whenẹnu, Mose po Aalọn po gọna ahọvi+ pipli lọ tọn lẹ basi todohukanji yinkọ visunnu Kohatinu+ lẹ tọn sọgbe hẹ whẹndo yetọn lẹ, podọ sọgbe hẹ whédo otọ́ yetọn tọn, 35 yèdọ mẹhe tindo owhe 30 jẹ 50 bo tin to pipli he yin azọ́ndena nado nọ wadevizọn to gòhọ opli tọn lọ mẹ lẹpo.+ 36 Lẹndopọ mẹhe yinkọ yetọn yin titodohukanji sọgbe hẹ whẹndo yetọn lẹ tọn yin 2 750.+ 37 Yinkọ omẹ ehelẹ tọn wẹ yin titodohukanji sọn whẹndo Kohatinu lẹ tọn mẹ, yèdọ mẹhe nọ wadevizọn to gòhọ opli tọn lọ mẹ lẹpo. Mose po Aalọn po basi todohukanji yinkọ yetọn lẹ tọn dile Jehovah ko degbe etọn gbọn Mose gblamẹ do.+
38 Yinkọ visunnu Gẹlṣọni tọn lẹ+ tọn yin titodohukanji sọgbe hẹ whẹndo yetọn lẹ, podọ sọgbe hẹ whédo otọ́ yetọn tọn, 39 yèdọ mẹhe tindo owhe 30 jẹ 50 bo tin to pipli he yin azọ́ndena nado nọ wadevizọn to gòhọ opli tọn lọ mẹ lẹpo. 40 Lẹndopọ mẹhe yinkọ yetọn yin titodohukanji sọgbe hẹ whẹndo yetọn lẹ, podọ sọgbe hẹ whédo otọ́ yetọn tọn yin 2 630.+ 41 Todohukanji whẹndo visunnu Gẹlṣọni tọn lẹ tọn niyẹn, yèdọ mẹhe nọ wadevizọn to gòhọ opli tọn lọ mẹ lẹpo. Mose po Aalọn po basi todohukanji yinkọ yetọn lẹ tọn dile Jehovah ko degbe etọn do.+
42 Yinkọ visunnu Melali tọn lẹ tọn yin titodohukanji sọgbe hẹ whẹndo yetọn lẹ, podọ sọgbe hẹ whédo otọ́ yetọn tọn, 43 yèdọ mẹhe tindo owhe 30 jẹ 50 bo tin to pipli he yin azọ́ndena nado nọ wadevizọn to gòhọ opli tọn lọ mẹ lẹpo.+ 44 Lẹndopọ mẹhe yinkọ yetọn yin titodohukanji to yé mẹ sọgbe hẹ whẹndo yetọn lẹ tọn yin 3 200.+ 45 Todohukanji whẹndo visunnu Melali tọn lẹ tọn niyẹn, yèdọ mẹhe Mose po Aalọn po basi todohukanji yinkọ yetọn lẹ tọn dile Jehovah ko degbe etọn gbọn Mose gblamẹ do.+
46 Mose po Aalọn po gọna ahọvi Islaeli tọn lẹ basi todohukanji yinkọ Levinu ehe lẹpo tọn sọgbe hẹ whẹndo yetọn lẹ, podọ sọgbe hẹ whédo otọ́ yetọn tọn lẹ; 47 yé tindo owhe 30 jẹ 50, yemẹpo wẹ sọ yin azọ́ndena nado nọ wadevizọn podọ nado nọ hẹn agbàn lẹ to kọndopọ mẹ hẹ gòhọ opli tọn lọ.+ 48 Lẹndopọ mẹhe yinkọ yetọn yin titodohukanji lẹ tọn yin 8 580.+ 49 Yinkọ yetọn yin titodohukanji dile Jehovah degbe etọn gbọn Mose gblamẹ do, yèdọ mẹdopodopo sọgbe hẹ devizọn he yin didena ẹn po agbàn etọn po; yinkọ yetọn yin titodohukanji kẹdẹdile Jehovah ko degbe etọn na Mose do.
5 Jehovah zindonukọn nado dọhona Mose dọmọ: 2 “Degbena Islaelivi lẹ nado de pòtọnọ lẹpo jẹgbonu sọn osla lọ mẹ+ gọna mẹdepope he onú mawé de to sisà jẹgbonu sọn vijinu etọn mẹ+ po mẹdepope he ko yin hinhẹn zun mawé gbọn alọdido oṣiọ* de go dali po.+ 3 Vlavo yé yin sunnu kavi yọnnu, mì dona de yé jẹgbonu. Mì dona de yé jẹgbonu osla lọ tọn, na yé nikaa bẹpla+ mẹhe tin to osla lọ mẹ lẹ pete, yèdọ mì mẹhe ṣẹnṣẹn yẹn nọ nọ̀.”*+ 4 Enẹwutu, Islaelivi lẹ wàmọ bo de yé jẹgbonu osla lọ tọn. Kẹdẹdile Jehovah degbe etọn na Mose do, mọ wẹ Islaelivi lẹ wà do.
5 Jehovah sọ zindonukọn nado dọhona Mose dọmọ: 6 “Dọna Islaelivi lẹ dọ, ‘Eyin sunnu kavi yọnnu de wà ylando he gbẹtọvi lẹ nọ saba wà depope, bo ma yin nugbonọ na Jehovah, ewọ* ko hùwhẹ.+ 7 Ewọ* dona yigbe+ ylando he e* ko wà lọ tọn bo na gọ̀ nuhe na suahọ owhẹ̀ he e hù lọ tọn jo bo nasọ yí mado-atọ́ntọ etọn dogọ;+ ewọ dona yí i jo na mẹhe e hùwhẹ do lọ. 8 Ṣigba, eyin mẹhe e hùwhẹ do lọ ko kú bo ma tindo hẹnnumẹ sẹpọmẹ de he na yí nuhe yin gigọjo lọ, e dona yin gigọjo na Jehovah bo na lẹzun yẹwhenọ lọ tọn, adavo agbò ovẹsè tọn lọ he yẹwhenọ lọ na yí do basi ovẹsè do ota etọn mẹ.+
9 “‘Nunina wiwe+ depope he Islaelivi lẹ hẹnwa yẹwhenọ lọ nukọn dona lẹzun ewọ tọn.+ 10 Onú wiwe he mẹdopodopo hẹnwa na yin ewọ tọn. Nudepope he mẹdepope na yẹwhenọ na lẹzun yẹwhenọ lọ tọn.’”
11 Jehovah sọ zindonukọn nado dọhona Mose dọmọ: 12 “Dọhona Islaelivi lẹ bo dọna yé dọ, ‘Nuhe dona nọ yin wiwà die eyin asi sunnu de tọn doafọgbé bo ma yin nugbonọ na ẹn 13 bọ sunnu devo tindo kọndopọ zanhẹmẹ tọn hẹ ẹ,+ ṣigba bọ asu etọn ma yọnẹn podọ mẹdepope ma mọdona, bọ e ko hẹn ede flu ṣogan kunnudetọ depope ma tin sọta ẹ podọ mẹdepope ma gbò e do: 14 Vlavo asu etọn jẹ awuwhàn ji bo vẹnudo e dọ e ma yin nugbonọ na emi ṣigba bọ ewọ ko hẹn ede flu, kavi asu etọn whànwu bo vẹnudo e dọ e ma yin nugbonọ na emi ṣigba bọ ewọ ma ko hẹn ede flu, 15 sunnu lọ dona plan asi etọn wá yẹwhenọ lọ dè po avọ́nunina de po na yọnnu lọ, yèdọ mado-ao linfin balekun efa dopo tọn.* Ewọ ma dona kọ̀n amì do e ji kavi yí nuyọnwan gblingblin do e ji, na avọ́nunina jinukun-lili awuwhàn tọn de wẹ, yèdọ avọ́nunina jinukun-lili tọn de he nọ hẹn whẹhuhu wá oflin mẹ.
16 “‘Yẹwhenọ lọ na hẹn yọnnu lọ wá bo biọ to e si nado ṣite to Jehovah nukọn.+ 17 Yẹwhenọ lọ nasọ ba osin wiwe do núzinzan okọ́ tọn de mẹ, yẹwhenọ lọ nasọ ba kọ́gudu vude sọn aigba to gòhọtúntún lọ mẹ bo kọ̀n ẹn do osin lọ mẹ. 18 Podọ yẹwhenọ lọ na biọ to yọnnu lọ si nado ṣite to Jehovah nukọn bo tún oda yọnnu lọ tọn bosọ ze avọ́nunina jinukun-lili oflin tọn lọ do alọmẹ na ẹn, enẹ wẹ avọ́nunina jinukun-lili awuwhàn tọn,+ bọ osin vivẹ́ he nọ hẹn dẹ̀hodo wá lọ na tin to alọ yẹwhenọ lọ tọn mẹ.+
19 “‘Enẹgodo, yẹwhenọ lọ na biọ to yọnnu lọ si nado whlé gbọn didọna yọnnu lọ dali dọmọ: “Eyin sunnu devo depope ma ko tindo kọndopọ zanhẹmẹ tọn hẹ we to whenue hiẹ gbẹ́ pò to aṣẹpipa asu towe tọn glọ+ podọ eyin hiẹ ma ko doafọgbé bo ko hẹn dewe flu, na osin vivẹ́ he nọ hẹn dẹ̀hodo wá ehe ni ma wà oylan depope na we blo. 20 Ṣigba, eyin hiẹ ko doafọgbé to whenue hiẹ gbẹ́ pò to aṣẹpipa asu towe tọn glọ gbọn dewe hinhẹnflu dali, podọ eyin hiẹ ko tindo kọndopọ zanhẹmẹ tọn hẹ sunnu devo+ gbọnvona asu towe—” 21 To whenẹnu, yẹwhenọ lọ na biọ to yọnnu lọ si nado basi whiwhle he bẹ dẹ̀hodo hẹn de, podọ yẹwhenọ lọ na dọna yọnnu lọ dọmọ: “Na Jehovah ni hẹn we zun mẹhodẹ̀do podọ mẹhe ji whiwhle tin te to omẹ towe lẹ ṣẹnṣẹn, dile Jehovah na hẹn asapada* towe nado ja kọnyinai* bo hẹn adọ̀go towe nado jí. 22 Osin he nọ hẹn dẹ̀hodo wá ehe na biọ adọ̀ towe lẹ mẹ nado hẹn adọ̀go towe jí bo hẹn asapada* towe nado ja kọnyinai.”* To whenẹnu, yọnnu lọ dona dọmọ: “Niṣẹ! Niṣẹ!”*
23 “‘Enẹgodo, yẹwhenọ lọ dona kàn dẹ̀hodo ehelẹ do owe lọ mẹ bo klọ́ yé sẹ̀ do osin vivẹ́ lọ mẹ. 24 To whenẹnu, e na biọ to yọnnu lọ si nado nù osin vivẹ́ he nọ hẹn dẹ̀hodo wá lọ, osin he nọ hẹn dẹ̀hodo wá lọ nasọ biọ ohò etọn mẹ bo hẹn kọdetọn vẹadi wá. 25 Podọ yẹwhenọ lọ dona yí avọ́nunina jinukun-lili awuwhàn tọn+ lọ sọn alọ yọnnu lọ tọn mẹ bo mimí avọ́nunina jinukun-lili tọn lọ yigodo yinukọn to Jehovah nukọn bo nasọ hẹn ẹn sẹpọ agbà lọ. 26 Yẹwhenọ lọ na yí avọ́nunina jinukun-lili tọn alọgogo dopo taidi avọ́nunina ohia tọn de bo mẹ̀ ẹn to agbà lọ ji,+ enẹgodo e na biọ to yọnnu lọ si nado nù osin lọ. 27 To whenue e ko biọ to e si nado nù osin lọ godo, eyin ewọ ko hẹn ede flu bo ma yin nugbonọ na asu etọn, to whenẹnu osin he nọ hẹn dẹ̀hodo wá lọ na biọ ohò etọn mẹ bo hẹn kọdetọn vẹadi wá, adọ̀go etọn nasọ jí bọ asapada* etọn nasọ ja kọnyinai,* podọ ewọ na lẹzun mẹhodẹ̀do to omẹ etọn lẹ ṣẹnṣẹn. 28 Ṣigba, eyin yọnnu lọ ma ko hẹn ede flu bo gbẹ́ pò to wiweji, to whenẹnu ewọ ma na jiya yasanamẹ enẹ tọn, ewọ nasọ penugo nado mọhò bo jivi.
29 “‘Osẹ́n he gando awuwhàn go niyẹn,+ eyin yọnnu de doafọgbé bo hẹn ede flu to whenue ewọ gbẹ́ pò to aṣẹpipa asu etọn tọn glọ, 30 kavi eyin asu de jẹ awuwhàn ji bo vẹnudo asi etọn dọ ewọ ma yin nugbonọ na emi; sunnu lọ dona biọ to asi etọn si nado ṣite to Jehovah nukọn, bọ yẹwhenọ lọ dona hẹn nuhe tin to osẹ́n ehe mẹ lẹpo di gando yọnnu lọ go. 31 Owhẹ̀ de ma na to okọ̀ na sunnu lọ, ṣigba asi etọn na dogbè owhẹ̀ he e hù tọn.’”
6 Jehovah zindonukọn nado dọhona Mose dọmọ: 2 “Dọhona Islaelivi lẹ bo dọna yé dọ, ‘Eyin sunnu kavi yọnnu de basi pàdido vonọtaun de nado nọgbẹ̀ taidi Nazili*+ de na Jehovah, 3 ewọ dona nọ nọla na ovẹn po ahàn sinsinyẹn devo lẹ po. E ma dona nọ nù ovẹn vẹsin kavi ahàn sinsinyẹn he vẹsin depope.+ E masọ dona nọ nù nudepope he wá sọn ovẹn sinsẹ́n mẹ, kavi dù ovẹn sinsẹ́n, vlavo e yin pọpọ kavi húhú. 4 To azán Nazili-yinyin etọn tọn lẹpo whenu, e ma dona nọ dù nudepope he wá sọn vẹntin mẹ, yèdọ sọn ovẹn sinsẹ́n agló ji jẹ apà etọn ji.
5 “‘To azán pàdido Nazili-yinyin etọn tọn lẹpo whenu, oda etọn ma dona yin pipà gbede.+ E dona gbọṣi wiweji bo dike oda he to ota na ẹn ni to wúwú kakajẹ whenue azán he e yí do klan ede dovo na Jehovah lẹpo na ko wá vivọnu. 6 To azán he e ko klan ede dovo na Jehovah lẹpo gblamẹ, e ma dona sẹpọ oṣiọ* de. 7 Eyin otọ́ etọn, onọ̀ etọn, nọvisunnu etọn kavi nọviyọnnu etọn tlẹ kú, e ma sọgan hẹn ede flu,+ na ohia Nazili-yinyin tọn etọn na Jiwheyẹwhe etọn tin to ota na ẹn wutu.
8 “‘Wiwe wẹ ewọ na yin na Jehovah to azán Nazili-yinyin etọn tọn lẹpo whenu. 9 Ṣigba, eyin mẹde kú to apá etọn to ajiji mẹ+ bọ ewọ hẹn oda he nọtena kinklandovo etọn na Jiwheyẹwhe flu,* e dona whlẹ́ ota etọn+ to azán he gbè e lẹ̀ ede wé. E dona whlẹ́ ota to azán ṣinawetọ gbè. 10 Podọ to azán ṣinatọ̀ntọ gbè, e dona hẹn owhlé awe kavi awhànnẹvu awe wá na yẹwhenọ lọ to họntonu gòhọ opli tọn lọ tọn. 11 Yẹwhenọ lọ na yí dopo do basi avọ́nunina ylando tọn podọ awetọ taidi avọ́nunina mimẹ̀ de bo basi ovẹsè do ota etọn mẹ na ylando+ he e wà gbọn dindọnsẹpọ oṣiọ* lọ dali. Enẹgodo, ewọ dona klan ota ede tọn do wiwe to azán enẹ gbè. 12 Ewọ sọ dona vọ́ ede klandovo na Jehovah nado gọ̀ azán Nazili-yinyin etọn tọn bẹjẹeji whladopo dogọ, e nasọ hẹn agbò winyanwinyan owhe dopo mẹ tọn wá taidi avọ́nunina whẹhuhu tọn. Ṣigba, azán he ko wayi lẹ ma na yin hihia na ẹn, na e ko hẹn Nazili-yinyin etọn flu wutu.
13 “‘Todin, osẹ́n he gando Nazili lọ go die: To whenue azán Nazili-yinyin etọn tọn lẹ wá vivọnu,+ ewọ na yin hinhẹnwa họntonu gòhọ opli tọn lọ tọn. 14 Nuhe e na hẹnwa finẹ taidi avọ́nunina etọn na Jehovah die: agbò winyanwinyan owhe dopo mẹ tọn he to gángán de taidi avọ́nunina mimẹ̀,+ lẹngbọvu asi owhe dopo mẹ tọn he to gángán de taidi avọ́nunina ylando tọn,+ agbò he to gángán de taidi avọ́sinsan jijọho tọn,+ 15 ohà dopo akla madotọ́n loboto he yè yí linfin dagbedagbe po amì po do basi tọn, akla madotọ́n wọ́dọ́wọ́dọ́ he yè sá amì do lẹ gọna avọ́nunina jinukun-lili tọn+ po avọ́nunina nùnù+ he nọ zọnpọ hẹ yé lẹ po. 16 Yẹwhenọ lọ na ze yé donukọnna Jehovah bo na basi avọ́nunina ylando tọn po avọ́nunina mimẹ̀ po do ota etọn mẹ. 17 E na yí agbò lọ po ohà akla madotọ́n lọ lẹ tọn po do basi avọ́sinsan jijọho tọn hlan Jehovah, yẹwhenọ lọ nasọ basi avọ́nunina jinukun-lili tọn+ po avọ́nunina nùnù he nọ zọnpọ hẹ ẹ lẹ po.
18 “‘Enẹgodo, Nazili lọ dona whlẹ́ oda he to ota na ẹn*+ he ma ko yin pipà pọ́n lọ to họntonu gòhọ opli tọn lọ tọn, e nasọ bẹ oda he wú do ota na ẹn to Nazili-yinyin etọn whenu lọ lẹ do miyọ́n he to oglọ na avọ́sinsan jijọho tọn lọ mẹ. 19 Yẹwhenọ lọ sọ dona yí abọ́ agbò lọ tọn de he yè sọakusìn,+ akla madotọ́n loboto dopo sọn ohà lọ mẹ, gọna akla madotọ́n wọ́dọ́wọ́dọ́ dopo bo bẹ yé do alọ Nazili lọ tọn lẹ mẹ to whenue ohia Nazili-yinyin tọn etọn ko yin whiwhlẹ́ sẹ̀ godo. 20 Podọ yẹwhenọ lọ dona mimí yé yigodo yinukọn taidi avọ́nunina he yè mimí de to Jehovah nukọn.+ Onú wiwe de wẹ ehe yin na yẹwhenọ lọ, to pọmẹ hẹ akọ́nnu avọ́nunina he yè mimí lọ tọn po asá lọ po taidi nunina de.+ To enẹgodo, Nazili lọ sọgan nù ovẹn.
21 “‘Osẹ́n he gando Nazili+ he basi pàdido de go die: Eyin e dopà bo penugo nado basi avọ́nunina de na Jehovah zẹ̀ nubiọtomẹsi Nazili-yinyin etọn tọn lẹ go, e dona hẹn opà etọn di na osẹ́n Nazili-yinyin etọn tọn wutu.’”
22 To enẹgodo, Jehovah dọna Mose dọmọ: 23 “Dọna Aalọn po visunnu etọn lẹ po dọ, ‘Lehe mì na nọ dona+ omẹ Islaeli tọn lẹ do die. Mì nọ dọna yé dọmọ:
24 “Na Jehovah ni dona we+ bo basi hihọ́na we.
25 Na Jehovah ni hẹn nukunmẹ etọn sẹ́ do ji we+ podọ ewọ ni do nukundagbe hia we.
26 Na Jehovah ni ze nukunmẹ etọn daga hlan we bo na we jijọho.”’+
27 Yé sọ dona nọ ylọ oyín ṣie do omẹ Islaeli tọn lẹ ji+ na yẹn nido dona yé.”+
7 To azán he gbè Mose pẹ́n gòhọtúntún lọ fó,+ e yiamisisadode e+ bo klan ẹn do wiwe, to pọmẹ hẹ núzinzan etọn lẹpo, gọna agbà lọ po nuyizan etọn lẹpo po.+ To whenue e ko yiamisisadode onú ehelẹ bo ko klan yé do wiwe godo,+ 2 ahọvi Islaeli tọn lẹ,+ yèdọ nukọntọ whédo otọ́ yetọn lẹ tọn lẹ, basi avọ́nunina de. Ahọvi hẹnnu lọ lẹ tọn ehelẹ, yèdọ mẹhe ko penukundo yinkọ zizedai go lẹ 3 hẹn avọ́nunina yetọn wá Jehovah nukọn, enẹ wẹ agbàn-kẹkẹ ṣidopo he tindo họta po oyìnsú 12 po, agbàn-kẹkẹ dopo na ahọvi awe podọ oyìnsú* dopo na ahọvi dopodopo; yé sọ hẹn yé wá gòhọtúntún lọ nukọn. 4 Jehovah dọna Mose dọmọ: 5 “Kẹalọyi onú ehelẹ sọn yé si, na yé na yin yiyizan na sinsẹ̀nzọn gòhọ opli tọn lọ tọn, podọ hiẹ dona bẹ yé na Levinu lẹ, yèdọ na mẹdopodopo dile e tindo nuhudo etọn na azọ́ndenamẹ etọn lẹ do.”
6 Enẹwutu, Mose kẹalọyi agbàn-kẹkẹ lọ lẹ po oyìn lọ lẹ po bo bẹ yé na Levinu lẹ. 7 E bẹ agbàn-kẹkẹ awe po oyìnsú ẹnẹ po na visunnu Gẹlṣọni tọn lẹ, dile yé tindo nuhudo etọn na azọ́ndenamẹ+ yetọn lẹ do; 8 podọ e bẹ agbàn-kẹkẹ ẹnẹ po oyìnsú ṣinatọ̀n po na visunnu Melali tọn lẹ, dile yé tindo nuhudo etọn na azọ́ndenamẹ yetọn lẹ do, to anademẹ Itamali visunnu Aalọn yẹwhenọ lọ tọn glọ.+ 9 Ṣigba, e ma na depope visunnu Kohati tọn lẹ, na azọ́ndenamẹ yetọn lẹ gando sinsẹ̀nzọn ofi wiwe lọ tọn+ go wutu, podọ abọ́ yetọn lẹ wẹ yé nọ yí do hẹn onú wiwe lẹ.+
10 Todin, ahọvi lọ lẹ basi avọ́nunina yetọn to klandowiwe+ agbà lọ tọn whenu, to ojlẹ he mẹ yè yiamisisadode e. To whenue ahọvi lọ lẹ basi avọ́nunina yetọn to agbà lọ nukọn, 11 Jehovah dọna Mose dọmọ: “To azán dopodopo gbè, ahọvi dopo na nọ basi avọ́nunina etọn na klandowiwe agbà lọ tọn.”
12 Mẹhe basi avọ́nunina etọn to azán tintan gbè wẹ Naṣọni,+ visunnu Aminadabi tọn, sọn hẹnnu Juda tọn mẹ. 13 Avọ́nunina etọn wẹ agbánvla fataka tọn dopo he zínpinpẹn etọn yin ṣekẹli* 130 gọna agbán fataka tọn dopo he zínpinpẹn etọn yin ṣekẹli 70 sọgbe hẹ ojlẹnu ṣekẹli tọn he yin ofi wiwe lọ tọn,*+ bọ linfin dagbedagbe he yè yí amì do yàn gọ́ awe lẹpo mẹ, na avọ́nunina jinukun-lili tọn;+ 14 kọfo sika tọn* dopo he zínpinpẹn etọn yin ṣekẹli 10, bọ nuyọnwan gọ́ e mẹ; 15 oyìnsú winyanwinyan dopo, agbò dopo po lẹngbọvu asu owhe dopo mẹ tọn dopo po, na avọ́nunina mimẹ̀;+ 16 gbọgbọẹvu dopo, na avọ́nunina ylando tọn;+ 17 podọ na avọ́sinsan jijọho tọn,+ oyìn awe, agbò atọ́n, gbọgbọẹ asu atọ́n, po lẹngbọvu asu atọ́n po, he dopodopo yetọn yin owhe dopo mẹ tọn. Avọ́nunina Naṣọni visunnu Aminadabi+ tọn niyẹn.
18 To azán awetọ gbè, Netanẹli+ visunnu Zuali tọn, yèdọ ahọvi hẹnnu Isakali tọn wẹ basi avọ́nunina. 19 Avọ́nunina he e basi wẹ agbánvla fataka tọn dopo he zínpinpẹn etọn yin ṣekẹli 130 gọna agbán fataka tọn dopo he zínpinpẹn etọn yin ṣekẹli 70 sọgbe hẹ ojlẹnu ṣekẹli tọn he yin ofi wiwe lọ tọn,+ bọ linfin dagbedagbe he yè yí amì do yàn gọ́ awe lẹpo mẹ, na avọ́nunina jinukun-lili tọn;+ 20 kọfo sika tọn dopo he zínpinpẹn etọn yin ṣekẹli 10, bọ nuyọnwan gọ́ e mẹ; 21 oyìnsú winyanwinyan dopo, agbò dopo po lẹngbọvu asu owhe dopo mẹ tọn dopo po, na avọ́nunina mimẹ̀;+ 22 gbọgbọẹvu dopo, na avọ́nunina ylando tọn;+ 23 podọ na avọ́sinsan jijọho tọn,+ oyìn awe, agbò atọ́n, gbọgbọẹ asu atọ́n, po lẹngbọvu asu atọ́n po, he dopodopo yetọn yin owhe dopo mẹ tọn. Avọ́nunina Netanẹli visunnu Zuali tọn niyẹn.
24 To azán atọ̀ntọ gbè, ahọvi visunnu Zebuluni tọn lẹ tọn, yèdọ Eliabi+ visunnu Helọni tọn 25 wẹ basi avọ́nunina etọn, enẹ wẹ agbánvla fataka tọn dopo he zínpinpẹn etọn yin ṣekẹli 130 gọna agbán fataka tọn dopo he zínpinpẹn etọn yin ṣekẹli 70 sọgbe hẹ ojlẹnu ṣekẹli tọn he yin ofi wiwe lọ tọn,+ bọ linfin dagbedagbe he yè yí amì do yàn gọ́ awe lẹpo mẹ, na avọ́nunina jinukun-lili tọn;+ 26 kọfo sika tọn dopo he zínpinpẹn etọn yin ṣekẹli 10, bọ nuyọnwan gọ́ e mẹ; 27 oyìnsú winyanwinyan dopo, agbò dopo po lẹngbọvu asu owhe dopo mẹ tọn dopo po, na avọ́nunina mimẹ̀;+ 28 gbọgbọẹvu dopo, na avọ́nunina ylando tọn;+ 29 podọ na avọ́sinsan jijọho tọn,+ oyìn awe, agbò atọ́n, gbọgbọẹ asu atọ́n, po lẹngbọvu asu atọ́n po, he dopodopo yetọn yin owhe dopo mẹ tọn. Avọ́nunina Eliabi+ visunnu Helọni tọn niyẹn.
30 To azán ẹnẹtọ gbè, ahọvi visunnu Leubẹni tọn lẹ tọn, yèdọ Elizuli+ visunnu Ṣedeuli tọn 31 wẹ basi avọ́nunina etọn, enẹ wẹ agbánvla fataka tọn dopo he zínpinpẹn etọn yin ṣekẹli 130 gọna agbán fataka tọn dopo he zínpinpẹn etọn yin ṣekẹli 70 sọgbe hẹ ojlẹnu ṣekẹli tọn he yin ofi wiwe lọ tọn,+ bọ linfin dagbedagbe he yè yí amì do yàn gọ́ awe lẹpo mẹ, na avọ́nunina jinukun-lili tọn;+ 32 kọfo sika tọn dopo he zínpinpẹn etọn yin ṣekẹli 10, bọ nuyọnwan gọ́ e mẹ; 33 oyìnsú winyanwinyan dopo, agbò dopo po lẹngbọvu asu owhe dopo mẹ tọn dopo po, na avọ́nunina mimẹ̀;+ 34 gbọgbọẹvu dopo, na avọ́nunina ylando tọn;+ 35 podọ na avọ́sinsan jijọho tọn,+ oyìn awe, agbò atọ́n, gbọgbọẹ asu atọ́n, po lẹngbọvu asu atọ́n po, he dopodopo yetọn yin owhe dopo mẹ tọn. Avọ́nunina Elizuli+ visunnu Ṣedeuli tọn niyẹn.
36 To azán atọ́ntọ gbè, ahọvi visunnu Simeoni tọn lẹ tọn, yèdọ Ṣelumiẹli+ visunnu Zuliṣadai tọn 37 wẹ basi avọ́nunina etọn, enẹ wẹ agbánvla fataka tọn dopo he zínpinpẹn etọn yin ṣekẹli 130 gọna agbán fataka tọn dopo he zínpinpẹn etọn yin ṣekẹli 70 sọgbe hẹ ojlẹnu ṣekẹli tọn he yin ofi wiwe lọ tọn,+ bọ linfin dagbedagbe he yè yí amì do yàn gọ́ awe lẹpo mẹ, na avọ́nunina jinukun-lili tọn;+ 38 kọfo sika tọn dopo he zínpinpẹn etọn yin ṣekẹli 10, bọ nuyọnwan gọ́ e mẹ; 39 oyìnsú winyanwinyan dopo, agbò dopo po lẹngbọvu asu owhe dopo mẹ tọn dopo po, na avọ́nunina mimẹ̀;+ 40 gbọgbọẹvu dopo, na avọ́nunina ylando tọn;+ 41 podọ na avọ́sinsan jijọho tọn,+ oyìn awe, agbò atọ́n, gbọgbọẹ asu atọ́n, po lẹngbọvu asu atọ́n po, he dopodopo yetọn yin owhe dopo mẹ tọn. Avọ́nunina Ṣelumiẹli+ visunnu Zuliṣadai tọn niyẹn.
42 To azán ṣidopotọ gbè, ahọvi visunnu Gad tọn lẹ tọn, yèdọ Eliasafi+ visunnu Deuẹli tọn 43 wẹ basi avọ́nunina etọn, enẹ wẹ agbánvla fataka tọn dopo he zínpinpẹn etọn yin ṣekẹli 130 gọna agbán fataka tọn dopo he zínpinpẹn etọn yin ṣekẹli 70 sọgbe hẹ ojlẹnu ṣekẹli tọn he yin ofi wiwe lọ tọn,+ bọ linfin dagbedagbe he yè yí amì do yàn gọ́ awe lẹpo mẹ, na avọ́nunina jinukun-lili tọn;+ 44 kọfo sika tọn dopo he zínpinpẹn etọn yin ṣekẹli 10, bọ nuyọnwan gọ́ e mẹ; 45 oyìnsú winyanwinyan dopo, agbò dopo po lẹngbọvu asu owhe dopo mẹ tọn dopo po, na avọ́nunina mimẹ̀;+ 46 gbọgbọẹvu dopo, na avọ́nunina ylando tọn;+ 47 podọ na avọ́sinsan jijọho tọn,+ oyìn awe, agbò atọ́n, gbọgbọẹ asu atọ́n, po lẹngbọvu asu atọ́n po, he dopodopo yetọn yin owhe dopo mẹ tọn. Avọ́nunina Eliasafi+ visunnu Deuẹli tọn niyẹn.
48 To azán ṣinawetọ gbè, ahọvi visunnu Eflaimi tọn lẹ tọn, yèdọ Eliṣama+ visunnu Amihudi tọn 49 wẹ basi avọ́nunina etọn, enẹ wẹ agbánvla fataka tọn dopo he zínpinpẹn etọn yin ṣekẹli 130 gọna agbán fataka tọn dopo he zínpinpẹn etọn yin ṣekẹli 70 sọgbe hẹ ojlẹnu ṣekẹli tọn he yin ofi wiwe lọ tọn,+ bọ linfin dagbedagbe he yè yí amì do yàn gọ́ awe lẹpo mẹ, na avọ́nunina jinukun-lili tọn;+ 50 kọfo sika tọn dopo he zínpinpẹn etọn yin ṣekẹli 10, bọ nuyọnwan gọ́ e mẹ; 51 oyìnsú winyanwinyan dopo, agbò dopo po lẹngbọvu asu owhe dopo mẹ tọn dopo po, na avọ́nunina mimẹ̀;+ 52 gbọgbọẹvu dopo, na avọ́nunina ylando tọn;+ 53 podọ na avọ́sinsan jijọho tọn,+ oyìn awe, agbò atọ́n, gbọgbọẹ asu atọ́n, po lẹngbọvu asu atọ́n po, he dopodopo yetọn yin owhe dopo mẹ tọn. Avọ́nunina Eliṣama+ visunnu Amihudi tọn niyẹn.
54 To azán ṣinatọ̀ntọ gbè, ahọvi visunnu Manasse tọn lẹ tọn, yèdọ Gamalieli+ visunnu Pedazuli tọn 55 wẹ basi avọ́nunina etọn, enẹ wẹ agbánvla fataka tọn dopo he zínpinpẹn etọn yin ṣekẹli 130 gọna agbán fataka tọn dopo he zínpinpẹn etọn yin ṣekẹli 70 sọgbe hẹ ojlẹnu ṣekẹli tọn he yin ofi wiwe lọ tọn,+ bọ linfin dagbedagbe he yè yí amì do yàn gọ́ awe lẹpo mẹ, na avọ́nunina jinukun-lili tọn;+ 56 kọfo sika tọn dopo he zínpinpẹn etọn yin ṣekẹli 10, bọ nuyọnwan gọ́ e mẹ; 57 oyìnsú winyanwinyan dopo, agbò dopo po lẹngbọvu asu owhe dopo mẹ tọn dopo po, na avọ́nunina mimẹ̀;+ 58 gbọgbọẹvu dopo, na avọ́nunina ylando tọn;+ 59 podọ na avọ́sinsan jijọho tọn,+ oyìn awe, agbò atọ́n, gbọgbọẹ asu atọ́n, po lẹngbọvu asu atọ́n po, he dopodopo yetọn yin owhe dopo mẹ tọn. Avọ́nunina Gamalieli+ visunnu Pedazuli tọn niyẹn.
60 To azán ṣinẹnẹtọ gbè, ahọvi+ visunnu Bẹnjamini tọn lẹ tọn, yèdọ Abidani+ visunnu Gideọni tọn 61 wẹ basi avọ́nunina etọn, enẹ wẹ agbánvla fataka tọn dopo he zínpinpẹn etọn yin ṣekẹli 130 gọna agbán fataka tọn dopo he zínpinpẹn etọn yin ṣekẹli 70 sọgbe hẹ ojlẹnu ṣekẹli tọn he yin ofi wiwe lọ tọn,+ bọ linfin dagbedagbe he yè yí amì do yàn gọ́ awe lẹpo mẹ, na avọ́nunina jinukun-lili tọn;+ 62 kọfo sika tọn dopo he zínpinpẹn etọn yin ṣekẹli 10, bọ nuyọnwan gọ́ e mẹ; 63 oyìnsú winyanwinyan dopo, agbò dopo po lẹngbọvu asu owhe dopo mẹ tọn dopo po, na avọ́nunina mimẹ̀;+ 64 gbọgbọẹvu dopo, na avọ́nunina ylando tọn;+ 65 podọ na avọ́sinsan jijọho tọn,+ oyìn awe, agbò atọ́n, gbọgbọẹ asu atọ́n, po lẹngbọvu asu atọ́n po, he dopodopo yetọn yin owhe dopo mẹ tọn. Avọ́nunina Abidani+ visunnu Gideọni tọn niyẹn.
66 To azán aotọ gbè, ahọvi visunnu Dani tọn lẹ tọn, yèdọ Ahiezeli+ visunnu Amiṣadai tọn 67 wẹ basi avọ́nunina etọn, enẹ wẹ agbánvla fataka tọn dopo he zínpinpẹn etọn yin ṣekẹli 130 gọna agbán fataka tọn dopo he zínpinpẹn etọn yin ṣekẹli 70 sọgbe hẹ ojlẹnu ṣekẹli tọn he yin ofi wiwe lọ tọn,+ bọ linfin dagbedagbe he yè yí amì do yàn gọ́ awe lẹpo mẹ, na avọ́nunina jinukun-lili tọn;+ 68 kọfo sika tọn dopo he zínpinpẹn etọn yin ṣekẹli 10, bọ nuyọnwan gọ́ e mẹ; 69 oyìnsú winyanwinyan dopo, agbò dopo po lẹngbọvu asu owhe dopo mẹ tọn dopo po, na avọ́nunina mimẹ̀;+ 70 gbọgbọẹvu dopo, na avọ́nunina ylando tọn;+ 71 podọ na avọ́sinsan jijọho tọn,+ oyìn awe, agbò atọ́n, gbọgbọẹ asu atọ́n, po lẹngbọvu asu atọ́n po, he dopodopo yetọn yin owhe dopo mẹ tọn. Avọ́nunina Ahiezeli+ visunnu Amiṣadai tọn niyẹn.
72 To azán 11tọ gbè, ahọvi visunnu Aṣeli tọn lẹ tọn, yèdọ Pagiẹli+ visunnu Oklani tọn 73 wẹ basi avọ́nunina etọn, enẹ wẹ agbánvla fataka tọn dopo he zínpinpẹn etọn yin ṣekẹli 130 gọna agbán fataka tọn dopo he zínpinpẹn etọn yin ṣekẹli 70 sọgbe hẹ ojlẹnu ṣekẹli tọn he yin ofi wiwe lọ tọn,+ bọ linfin dagbedagbe he yè yí amì do yàn gọ́ awe lẹpo mẹ, na avọ́nunina jinukun-lili tọn;+ 74 kọfo sika tọn dopo he zínpinpẹn etọn yin ṣekẹli 10, bọ nuyọnwan gọ́ e mẹ; 75 oyìnsú winyanwinyan dopo, agbò dopo po lẹngbọvu asu owhe dopo mẹ tọn dopo po, na avọ́nunina mimẹ̀;+ 76 gbọgbọẹvu dopo, na avọ́nunina ylando tọn;+ 77 podọ na avọ́sinsan jijọho tọn,+ oyìn awe, agbò atọ́n, gbọgbọẹ asu atọ́n, po lẹngbọvu asu atọ́n po, he dopodopo yetọn yin owhe dopo mẹ tọn. Avọ́nunina Pagiẹli+ visunnu Oklani tọn niyẹn.
78 To azán 12tọ gbè, ahọvi visunnu Naftali tọn lẹ tọn, yèdọ Ahila+ visunnu Enani tọn 79 wẹ basi avọ́nunina etọn, enẹ wẹ agbánvla fataka tọn dopo he zínpinpẹn etọn yin ṣekẹli 130 gọna agbán fataka tọn dopo he zínpinpẹn etọn yin ṣekẹli 70 sọgbe hẹ ojlẹnu ṣekẹli tọn he yin ofi wiwe lọ tọn,+ bọ linfin dagbedagbe he yè yí amì do yàn gọ́ awe lẹpo mẹ, na avọ́nunina jinukun-lili tọn;+ 80 kọfo sika tọn dopo he zínpinpẹn etọn yin ṣekẹli 10, bọ nuyọnwan gọ́ e mẹ; 81 oyìnsú winyanwinyan dopo, agbò dopo po lẹngbọvu asu owhe dopo mẹ tọn dopo po, na avọ́nunina mimẹ̀;+ 82 gbọgbọẹvu dopo, na avọ́nunina ylando tọn;+ 83 podọ na avọ́sinsan jijọho tọn,+ oyìn awe, agbò atọ́n, gbọgbọẹ asu atọ́n, po lẹngbọvu asu atọ́n po, he dopodopo yetọn yin owhe dopo mẹ tọn. Avọ́nunina Ahila+ visunnu Enani tọn niyẹn.
84 Avọ́nunina klandowiwe agbà lọ tọn+ he ahọvi Islaeli tọn lẹ basi to ojlẹ he mẹ yè yiamisisadode agbà lọ die: agbánvla fataka tọn 12, agbán fataka tọn 12 po kọfo sika tọn 12 po;+ 85 zínpinpẹn agbánvla fataka tọn dopodopo tọn yin ṣekẹli 130 podọ zínpinpẹn agbán fataka tọn dopodopo tọn yin ṣekẹli 70, bọ lẹndopọ zínpinpẹn núzinzan fataka tọn lọ lẹpo tọn yin ṣekẹli 2 400 sọgbe hẹ ojlẹnu ṣekẹli tọn he yin ofi wiwe lọ tọn;+ 86 zínpinpẹn kọfo sika tọn 12 he gọ́ na nuyọnwan lọ lẹ dopodopo tọn yin ṣekẹli 10 sọgbe hẹ ojlẹnu ṣekẹli tọn he yin ofi wiwe lọ tọn, bọ lẹndopọ zínpinpẹn kọfo sika tọn lọ lẹpo tọn yin ṣekẹli 120. 87 Kanlin he yin yiyizan na avọ́nunina mimẹ̀ lọ lẹpo wẹ oyìnsú 12, agbò 12, po lẹngbọvu asu 12 po, he dopodopo yetọn yin owhe dopo mẹ tọn, gọna avọ́nunina jinukun-lili tọn yetọn lẹ, po gbọgbọẹ asu 12 po, na avọ́nunina ylando tọn; 88 podọ lẹndopọ kanlin he yin yiyizan na avọ́sinsan jijọho tọn lọ lẹpo tọn wẹ oyìnsú 24, agbò 60, gbọgbọẹ asu 60, po lẹngbọvu asu 60 po, he dopodopo yetọn yin owhe dopo mẹ tọn. Avọ́nunina klandowiwe agbà lọ tọn+ to whenue yè ko yiamisisadode e+ godo niyẹn.
89 Whedepopenu he Mose biọ gòhọ opli tọn lọ mẹ nado dọho hẹ Jiwheyẹwhe,*+ e nọ sè ogbè he to hodọ hẹ ẹ lọ sọn nùsu+ apotin Kunnudenu tọn lọ tọn ji, to kelubimi awe lọ lẹ ṣẹnṣẹn;+ Jiwheyẹwhe sọ nọ dọhona ẹn.
8 Jehovah dọhona Mose dọmọ: 2 “Dọhona Aalọn bo dọna ẹn dọ, ‘Eyin hiẹ tá miyọ́ngbán lọ lẹ, miyọ́ngbán ṣinawe lọ lẹ dona nọ tá hinhọ́n do lẹdo he pannukọn miyọ́ngbán-tin lọ ji.’”+ 3 Enẹwutu, Aalọn wàmọ: E tá miyọ́ngbán lọ lẹ nado hẹn lẹdo he pannukọn miyọ́ngbán-tin+ lọ họ́n, kẹdẹdile Jehovah ko degbe etọn na Mose do. 4 Lehe miyọ́ngbán-tin lọ yin awuwlena do die: E yin tùntùn sọn sika mẹ; sọn gotò etọn ji jẹ osẹ́ etọn lẹ ji, e yin tùntùn sọn sika mẹ.+ Miyọ́ngbán-tin lọ yin awuwlena sọgbe hẹ numimọ+ he Jehovah ko dohia Mose.
5 Jehovah sọ dọhona Mose dọmọ: 6 “De Levinu lẹ sọn ṣẹnṣẹn Islaelivi lẹ tọn bo klọ́ yé wé.+ 7 Lehe hiẹ dona klọ́ yé wé do die: Húnhún osin he nọ klọ́ ylando sẹ̀ do yé ji, podọ yé dona whlẹ́ ofún he to agbasa go na yé lẹpo sẹ̀ bo yàn avọ̀ yetọn lẹ bosọ klọ́ yede wé.+ 8 Enẹgodo, yé na yí oyìnsú winyanwinyan+ de gọna avọ́nunina jinukun-lili tọn+ etọn, yèdọ linfin dagbedagbe he yè yí amì do yàn, bọ hiẹ na yí oyìnsú winyanwinyan devo na avọ́nunina ylando tọn.+ 9 Hiẹ sọ dona hẹn Levinu lẹ wá gòhọ opli tọn lọ nukọn bo bẹ Islaelivi lẹpo pete pli.+ 10 Whenue hiẹ hẹn Levinu lẹ wá Jehovah nukọn, Islaelivi lẹ dona ze alọ yetọn lẹ do Levinu lẹ ji.+ 11 Aalọn sọ dona ze Levinu lẹ jo* to Jehovah nukọn taidi avọ́nunina he yè mimí+ de sọn Islaelivi lẹ dè, bọ yé na nọ wà sinsẹ̀nzọn Jehovah tọn.+
12 “Levinu lẹ nasọ ze alọ yetọn lẹ do ota na oyìnsú lọ lẹ.+ Enẹgodo, dopo na yin yíyí do basi avọ́nunina ylando tọn, podọ awetọ taidi avọ́nunina mimẹ̀ de hlan Jehovah nado basi ovẹsè+ na Levinu lẹ. 13 Hiẹ nasọ biọ to Levinu lẹ si nado ṣite to Aalọn po visunnu etọn lẹ po nukọn bọ hiẹ na ze yé jo* na Jehovah taidi avọ́nunina he yè mimí de. 14 Hiẹ dona klan Levinu lẹ dovo sọn Islaelivi lẹ ṣẹnṣẹn, bọ Levinu lẹ na lẹzun nutindo ṣie.+ 15 Enẹgodo, Levinu lẹ na biọ họmẹ yì nado wadevizọn to gòhọ opli tọn lọ mẹ. Lehe hiẹ dona klọ́ yé wé bo ze yé jo* taidi avọ́nunina he yè mimí de do niyẹn. 16 Na yewlẹ wẹ yin nunina lẹ he ko yin nina mi sọn Islaelivi lẹ mẹ. Yẹn na yí yé taidi nutindo ṣie titi do otẹn viplọnji* Islaelivi lẹ tọn lẹpo tọn mẹ.+ 17 Na viplọnji lẹpo wẹ yin nutindo ṣie to Islaelivi lẹ ṣẹnṣẹn, yèdọ sọn gbẹtọ ji jẹ kanlin ji.+ Sọn azán he gbè yẹn hù viplọnji lẹpo to aigba Egipti tọn ji wẹ yẹn ko klan yé do wiwe na dee.+ 18 Yẹn na de Levinu lẹ do otẹn viplọnji lẹpo tọn mẹ to Islaelivi lẹ ṣẹnṣẹn. 19 Yẹn na yí Levinu lẹ na Aalọn po visunnu etọn lẹ po taidi nunina lẹ sọn Islaelivi lẹ mẹ nado nọ wà sinsẹ̀nzọn do ota Islaelivi lẹ tọn mẹ to gòhọ opli tọn lọ mẹ+ podọ nado nọ basi ovẹsè na Islaelivi lẹ, na omẹ Islaeli tọn lẹ nikaa dọnsẹpọ ofi wiwe lọ bọ azọ̀nylankan de na wá Islaelivi lẹ ji.”+
20 Nuhe Mose po Aalọn po gọna pipli Islaelivi lẹ tọn pete wà na Levinu lẹ niyẹn. Kẹdẹdile Jehovah ko degbe etọn na Mose gando Levinu lẹ go do, mọ wẹ Islaelivi lẹ wà na yé do. 21 Enẹwutu, Levinu lẹ lẹ̀ yede wé bo yàn avọ̀ yetọn lẹ,+ podọ to enẹgodo, Aalọn ze yé jo* taidi avọ́nunina he yè mimí de to Jehovah nukọn.+ Whenẹnu, Aalọn basi ovẹsè na yé bo klọ́ yé wé.+ 22 Enẹgodo, Levinu lẹ biọ họmẹ yì nado wà sinsẹ̀nzọn yetọn to gòhọ opli tọn lọ mẹ to Aalọn po visunnu etọn lẹ po nukọn. Kẹdẹdile Jehovah ko degbe etọn na Mose gando Levinu lẹ go do, mọ wẹ e yin wiwà na yé do.
23 Todin, Jehovah dọhona Mose dọmọ: 24 “Anademẹ he gando Levinu lẹ go die: Sunnu he tindo owhe 25 podọ humọ lẹ wẹ na nọ kọnawudopọ hẹ pipli mẹhe nọ wà sinsẹ̀nzọn to gòhọ opli tọn lọ mẹ lẹ tọn. 25 Ṣigba, eyin owhe mẹde tọn zẹ̀ 50 go, e na yí gbọjẹ sọn pipli he nọ wà sinsẹ̀nzọn lọ mẹ bo ma nasọ nọ wà sinsẹ̀nzọn ba. 26 E sọgan nọ yilizọn na mẹmẹsunnu etọn he nọ penukundo azọngban lẹ go to gòhọ opli tọn lọ mẹ lẹ, ṣigba ewọ ma dona nọ wà sinsẹ̀nzọn to finẹ. Nuhe hiẹ dona wà gando Levinu lẹ po azọngban yetọn lẹ po go niyẹn.”+
9 To tintọ́njẹgbonu sọn aigba Egipti tọn ji godo, Jehovah dọhona Mose to danfafa Sinai tọn ji to osun tintan+ owhe awetọ tọn mẹ dọmọ: 2 “Islaelivi lẹ dona wleawuna avọ́sinsan Juwayi tọn+ to ojlẹ dide etọn mẹ.+ 3 To whèjai plẹplẹ* azán 14tọ osun ehe tọn wẹ mì dona wleawuna ẹn to ojlẹ dide etọn mẹ. Mì dona wleawuna ẹn sọgbe hẹ osẹ́ndoai etọn lẹpo gọna aliho nuyiwa tọn etọn lẹpo.”+
4 Enẹwutu, Mose dọna Islaelivi lẹ nado wleawuna avọ́sinsan Juwayi tọn. 5 To whenẹnu, yé wleawuna avọ́sinsan Juwayi tọn to whèjai plẹplẹ* azán 14tọ osun tintan tọn to danfafa Sinai tọn ji. Kẹdẹdile Jehovah ko degbe onú ehe lẹpo tọn na Mose do, mọ wẹ Islaelivi lẹ wà do.
6 Todin, sunnu delẹ tin to finẹ he ko yin hinhẹn zun mawé gbọn alọdido oṣiọ de go dali,*+ bọ yé ma penugo nado wleawuna avọ́sinsan Juwayi tọn to azán enẹ gbè. Enẹwutu, sunnu enẹlẹ wá Mose po Aalọn po nukọn to azán enẹ gbè+ 7 bo dọna ẹn dọmọ: “Míwlẹ ko yin hinhẹn zun mawé, na mí doalọ oṣiọ de go wutu.* Naegbọn mí na yin aliglọnna nado basi avọ́nunina hlan Jehovah to ojlẹ dide etọn mẹ to Islaelivi lẹ ṣẹnṣẹn?”+ 8 To whenẹnu, Mose dọna yé dọmọ: “Mì nọte to finẹ whẹ́ bo dike ma sè gbedide he Jehovah na na gando mì go.”+
9 Enẹgodo, Jehovah dọna Mose dọmọ: 10 “Dọna Islaelivi lẹ dọ, ‘Eyin sunnu depope to ṣẹnṣẹn mìtọn kavi to kúnkan mìtọn lẹ mẹ tlẹ yin hinhẹn zun mawé gbọn alọdido oṣiọ de go dali*+ kavi tọ́nwhẹ̀n yì fidindẹn de, ewọ gbẹ́ dona wleawuna avọ́sinsan Juwayi tọn na Jehovah. 11 Yé dona wleawuna ẹn to whèjai plẹplẹ* azán 14tọ osun awetọ tọn.+ Yé dona yí akla madotọ́n po amà vivẹ́ lẹ po do dù i.+ 12 Yé ma dona pò depope dai jẹ afọnnu,+ podọ yé ma dona wẹ́n ohú etọn depope.+ Yé dona wleawuna ẹn sọgbe hẹ osẹ́ndoai he gando Juwayi go lẹpo. 13 Ṣigba, eyin sunnu de tin to wiweji kavi ma tọ́nwhẹ̀n ganṣo bo dovọ́na awuwiwlena avọ́sinsan Juwayi tọn, ewọ* dona yin sinsánsẹ* sọn omẹ etọn lẹ ṣẹnṣẹn,+ na e ma basi avọ́nunina na Jehovah to ojlẹ dide etọn mẹ wutu. Sunnu enẹ na dogbè ylando etọn tọn.
14 “‘Podọ eyin mẹhe to jonọ-gbéji de tin to ṣẹnṣẹn mìtọn, ewọ lọsu dona wleawuna avọ́sinsan Juwayi tọn na Jehovah.+ Ewọ dona wàmọ sọgbe hẹ osẹ́ndoai Juwayi tọn po aliho nuyiwa tọn etọn po.+ Osẹ́ndoai dopolọ wẹ mì dona nọ hodo, yèdọ mẹhe to jonọ-gbéji po mẹhe yin tòvi-jiji po.’”+
15 Todin, to azán he gbè gòhọtúntún lọ yin pinpẹ́n,+ aslọ ṣinyọ́n gòhọtúntún lọ, yèdọ gòhọ Kunnudenu tọn lọ ji, ṣigba to whèjai, nuhe sọawuhia taidi miyọ́n de gbọṣi gòhọtúntún lọ ji kakajẹ afọnnu.+ 16 Lehe nulẹ nọ yì do die: Aslọ lọ nọ ṣinyọ́n e ji to okle bọ nuhe taidi miyọ́n lọ nọ sọawuhia to zánmẹ.+ 17 Whedepopenu he aslọ lọ sẹtẹn sọn gòhọ lọ ji, Islaelivi lẹ nọ sẹtẹn to afọdopolọji,+ podọ fihe aslọ lọ nọte do, finẹ wẹ Islaelivi lẹ nọ dosla do.+ 18 Eyin Jehovah degbe, Islaelivi lẹ nọ sẹtẹn podọ eyin Jehovah degbe, yé nọ dosla.+ Lehe aslọ lọ gbọṣi gòhọtúntún lọ ji dẹnsọ, mọ wẹ yé nọ gbọṣi osla lọ mẹ do niyẹn. 19 Eyin aslọ lọ gbọṣi gòhọtúntún lọ ji na azán susu, Islaelivi lẹ nọ setonuna Jehovah bo ma nọ sẹtẹn.+ 20 To whedelẹnu, aslọ lọ nọ gbọṣi gòhọtúntún lọ ji na azán vude poun. Eyin Jehovah degbe, yé nọ gbọṣi osla lọ mẹ podọ eyin Jehovah degbe, yé nọ sẹtẹn. 21 To whedelẹnu, aslọ lọ nọ gbọṣi e ji sọn whèjai jẹ afọnnu poun podọ eyin aslọ lọ sẹtẹn to afọnnu, yé nọ sẹtẹn. Eyin aslọ lọ sẹtẹn to okle kavi to zánmẹ, yé nọ sẹtẹn.+ 22 Lehe aslọ lọ gbọṣi gòhọtúntún lọ ji dẹnsọ, vlavo e yin na azán awe, osun dopo kavi humọ, mọ wẹ Islaelivi lẹ nọ gbọṣi osla lọ mẹ do niyẹn bo ma nọ sẹtẹn. Ṣigba, eyin e sẹtẹn, yé nọ sẹtẹn. 23 Eyin Jehovah degbe, yé nọ dosla podọ eyin Jehovah degbe, yé nọ sẹtẹn. Yé setonuna Jehovah kẹdẹdile Jehovah ko degbe etọn gbọn Mose gblamẹ do.
10 Enẹgodo, Jehovah dọna Mose dọmọ: 2 “Basi opẹ̀n+ awe na dewe; fataka wẹ hiẹ ni yí do tùn yé, bo nọ yí yé do ylọ gbẹtọgun lọ pli podọ nado nọ dohia dọ ojlẹ tẹnsisẹ tọn sọ̀. 3 Eyin awe lẹ yin kúnkún, gbẹtọgun lọ lẹpo wẹ dona nọ wá pli do dè we to họntonu gòhọ opli tọn lọ tọn.+ 4 Eyin dopo gee wẹ yin kúnkún, ahọvi lẹ po nukọntọ pipli omẹ fọtọ́n Islaeli tọn lẹ po kẹdẹ wẹ na nọ wá pli do dè we.+
5 “Eyin hiẹ kún opẹ̀n lọ lẹ pludopludo, mẹhe tin to osla whèzẹtẹn-waji+ tọn lẹ mẹ lẹ wẹ dona nọ sẹtẹn. 6 Eyin hiẹ kún opẹ̀n lọ lẹ pludopludo whla awetọ, mẹhe tin to osla hùwaji+ tọn lẹ mẹ lẹ wẹ dona nọ sẹtẹn. Yé dona nọ kún opẹ̀n lọ lẹ to aliho ehe mẹ to whedepopenu he dopo to mimá lọ lẹ mẹ dona sẹtẹn.
7 “Todin, eyin hiẹ jlo na ylọ gbẹtọgun lọ pli, hiẹ dona nọ kún opẹ̀n lọ lẹ,+ ṣigba e ma dona yin pludopludo. 8 Visunnu Aalọn tọn lẹ, yèdọ yẹwhenọ lẹ wẹ dona nọ kún opẹ̀n lọ lẹ,+ podọ yizan yetọn na yin osẹ́ndoai he na dẹn-to-aimẹ de na mì sọn whẹndo de ji jẹ whẹndo de ji.
9 “Eyin mì jlo na funawhàn to aigba mìtọn ji sọta kọgbidinamẹtọ de he to ogbé mìtọn yàn, mì dona kún opẹ́n lọ lẹ nado ylọ gbẹtọ lẹ pli na awhàn,+ Jehovah Jiwheyẹwhe mìtọn nasọ flin mì bo whlẹn mì sọn alọ kẹntọ mìtọn lẹ tọn mẹ.
10 “Humọ, to nujijọ ayajẹ tọn mìtọn lẹ whenu+—yèdọ to hùnwhẹ mìtọn lẹ whenu+ podọ to bẹjẹeji osun lẹ tọn—mì dona nọ kún opẹ̀n lọ lẹ do avọ́nunina mimẹ̀+ mìtọn lẹ po avọ́sinsan jijọho tọn+ mìtọn lẹ po ji; yé na yin nuflinmẹ de na mì to Jiwheyẹwhe mìtọn nukọn. Yẹn wẹ Jehovah Jiwheyẹwhe mìtọn.”+
11 Todin, to osun awetọ owhe awetọ tọn mẹ, to azán 20tọ osun lọ tọn gbè,+ aslọ lọ sẹtẹn sọn gòhọtúntún Kunnudenu tọn lọ ji.+ 12 Enẹwutu, Islaelivi lẹ sẹtẹn sọn danfafa Sinai tọn ji bo dedo sọgbe hẹ tito he ko yin zizedai na tẹnsisẹ yetọn+ bọ aslọ lọ wá nọte do danfafa Palani tọn ji.+ 13 Whla tintan he yé sẹtẹn sọgbe hẹ tito he Jehovah ko zedai gbọn Mose gblamẹ lọ niyẹn.+
14 Enẹwutu, mimá hẹnnu atọ̀n-atọ̀n tọn visunnu Juda tọn lẹ tọn wẹ sẹtẹn jẹnukọn sọgbe hẹ awhàngọnu* yetọn, podọ Naṣọni+ visunnu Aminadabi tọn wẹ yin nukọntọ na awhàngọnu etọn. 15 Netanẹli+ visunnu Zuali tọn wẹ yin nukọntọ na awhàngọnu hẹnnu visunnu Isakali tọn lẹ tọn. 16 Eliabi+ visunnu Helọni tọn wẹ yin nukọntọ na awhàngọnu hẹnnu visunnu Zebuluni tọn lẹ tọn.
17 To whenue gòhọtúntún lọ ko yin túntún godo,+ mẹhe nọ hẹn gòhọtúntún lọ lẹ, yèdọ visunnu Gẹlṣọni+ tọn lẹ po visunnu Melali+ tọn lẹ po wẹ sẹtẹn.
18 Enẹgodo, mimá hẹnnu atọ̀n-atọ̀n tọn Leubẹni tọn wẹ sẹtẹn sọgbe hẹ awhàngọnu* yetọn, podọ Elizuli+ visunnu Ṣedeuli tọn wẹ yin nukọntọ na awhàngọnu etọn. 19 Ṣelumiẹli+ visunnu Zuliṣadai tọn wẹ yin nukọntọ na awhàngọnu hẹnnu visunnu Simeoni tọn lẹ tọn. 20 Eliasafi+ visunnu Deuẹli tọn wẹ yin nukọntọ na awhàngọnu hẹnnu visunnu Gad tọn lẹ tọn.
21 Enẹgodo, Kohatinu lẹ he nọ hẹn núzinzan fiwiwe lọ tọn lẹ+ wẹ sẹtẹn. Gòhọtúntún lọ dona ko yin pinpẹ́n to whenue yé na jẹ dọ́n.
22 Enẹgodo, mimá hẹnnu atọ̀n-atọ̀n tọn visunnu Eflaimi tọn lẹ tọn wẹ sẹtẹn sọgbe hẹ awhàngọnu* yetọn, podọ Eliṣama+ visunnu Amihudi tọn wẹ yin nukọntọ na awhàngọnu etọn. 23 Gamalieli+ visunnu Pedazuli tọn wẹ yin nukọntọ na awhàngọnu hẹnnu visunnu Manasse tọn lẹ tọn. 24 Abidani+ visunnu Gideọni tọn wẹ yin nukọntọ na awhàngọnu hẹnnu visunnu Bẹnjamini tọn lẹ tọn.
25 Enẹgodo, mimá hẹnnu atọ̀n-atọ̀n tọn visunnu Dani tọn lẹ tọn wẹ sẹtẹn sọgbe hẹ awhàngọnu* yetọn, taidi hihọ́tọ to godo na hẹnnu lọ lẹpo, podọ Ahiezeli+ visunnu Amiṣadai tọn wẹ yin nukọntọ na awhàngọnu etọn. 26 Pagiẹli+ visunnu Oklani tọn wẹ yin nukọntọ na awhàngọnu hẹnnu visunnu Aṣeli tọn lẹ tọn. 27 Ahila+ visunnu Enani tọn wẹ yin nukọntọ na awhàngọnu hẹnnu visunnu Naftali tọn lẹ tọn. 28 Tito tẹnsisẹ tọn he Islaelivi lẹ po awhàngọnu yetọn po nọ hodo* to whenue yé jlo na sẹtẹn niyẹn.+
29 To whenẹnu, Mose dọna Hobabi, visunnu Leuẹli*+ Midianinu he yin asi-tọ́ Mose tọn lọ tọn dọmọ: “Mí jlo na sẹtẹn yì fihe Jehovah ko dọho etọn na mí dọ, ‘Yẹn na na ẹn mì.’+ Hodo mí,+ míwlẹ nasọ wà dagbe na we, na Jehovah ko dopagbe nudagbe lẹ tọn na Islaeli.”+ 30 Ṣigba, ewọ dọna ẹn dọmọ: “Yẹn ma na yì gba. Yẹn na lẹkọyi otò ṣie titi mẹ, podọ yì hẹnnumẹ ṣie lẹ dè.” 31 Enẹwutu, Mose dọmọ: “Jaale, a jo mí do blo, na hiẹ yọ́n fie mí dona dosla do to danfafa lọ ji, podọ hiẹ sọgan yin alihiamẹtọ* mítọn. 32 Eyin hiẹ sọ hodo mí,+ dagbe depope he Jehovah na wà na mí, mílọsu na wà na we dandan.”
33 Enẹwutu, yé dedo sọn osó Jehovah tọn+ kọ̀n na gbejizọnlin azán atọ̀n tọn, bọ apotin+ alẹnu Jehovah tọn to yìyì to nukọn yetọn na gbejizọnlin azán atọ̀n tọn lọ nado dín gbọjẹtẹn de na yé.+ 34 Aslọ Jehovah tọn+ sọ tin to yé ji to okle to whenue yé dedo sọn osla lọ mẹ.
35 Whedepopenu he Apotin lọ yin tẹnsẹna, Mose nọ dọmọ: “Jehovah E,+ fọ́n bo dike kẹntọ towe lẹ ni gbàdo, bosọ gbọ mẹhe gbẹwanna we lẹ ni họnyi sọn nukọn towe.” 36 Eyin Apotin lọ sọ nọte, e nọ dọmọ: “Jehovah E, lẹkọwa omẹ fọtọ́n madosọha* Islaeli tọn lẹ dè.”+
11 Todin, gbẹtọ lọ lẹ jẹ lewu ji sinsinyẹn to Jehovah nukọn. To whenue Jehovah sè ehe, homẹgble etọn jizò, bọ miyọ́n de wá sọn Jehovah dè bo jẹ delẹ to yé mẹ fiọ ji to tónu osla lọ tọn. 2 To whenue gbẹtọ lọ lẹ jẹ awhádo ylọ Mose ji, ewọ vẹ̀ Jehovah,+ miyọ́n lọ sọ ṣí. 3 Enẹwutu, oyín filọ tọn yin yiylọdọ Tabela,* na miyọ́n de sọn Jehovah dè ko fiọ yé wutu.+
4 Enẹgodo, gbẹtọgun he flusọ́ hẹ yé lẹ*+ jẹ ojlo ṣejannabi tọn+ dohia ji bọ Islaelivi lẹ lọsu sọ vọ́ jẹ avivi ji bo dọmọ: “Mẹnu wẹ na na mí olàn nado dù?+ 5 Lehe míwlẹ gbẹ́ nọ yí homẹhunhun do flin whèvi he mí nọ dù vọnu to Egipti, gọna kukumbeli, opẹ̀, omá, alùbasa po ayò lẹ po do sọ!+ 6 Ṣigba todin, mí* to gohú poun. Mí ma nọ mọ nudevo depope adavo manna ehe.”+
7 Nalete, manna+ taidi okún wewe pẹvi de+ podọ e sọ taidi gọmu atin tọn. 8 Gbẹtọ lọ lẹ nọ gbàpe nado ṣinyan ẹn bo nọ lì i to osé ji kavi só e to odó de mẹ. Enẹgodo, yé nọ sọakusìn in to nudàzẹ́n lẹ mẹ kavi yí i do basi akla loboto lẹ,+ bọ e nọ dotọ́n taidi akla hìhì vivi he yè yí amì do basi. 9 Eyin ahun ja do osla lọ mẹ to zánmẹ, manna lọsu nọ ja do e mẹ.+
10 Mose sè bọ gbẹtọ lọ lẹ to avivi, yèdọ whẹndo lọ lẹ debọdo-dego podọ mẹdopodopo to họntonu gòhọ etọn tọn. Homẹ sọ gble Jehovah taun,+ podọ homẹ Mose lọsu tọn ma hùn depope. 11 To whenẹnu, Mose dọna Jehovah dọmọ: “Naegbọn hiẹ do sayana devizọnwatọ towe? Naegbọn yẹn ma do mọ nukundagbe towe bọ hiẹ bẹ agbàn omẹ ehe lẹpo tọn do ji e?+ 12 Be yẹn wẹ mọhò omẹ ehe lẹpo tọn ya? Be yẹn wẹ ji yé ya, bọ hiẹ do dọna mi dọ, ‘Hẹn yé do akọ́n towe nù, kẹdẹdile devizọnwatọ* de nọ hẹn ovi to anọ́nù de do,’ nado plan yé yì aigba he hiẹ whlé nado na tọgbo yetọn lẹ ji?+ 13 Fie wẹ yẹn na hẹn olàn sọn nado na omẹ ehe lẹpo? Na yé to avivi mapote to nukọn ṣie bo to didọ dọ, ‘Na mí olàn nado dù!’ 14 Yẹn doponọ ma penugo nado hẹn omẹ ehe lẹpo; e ko hú agbọ́ mi.+ 15 Eyin mọ wẹ hiẹ na yinuwa hẹ mi do, jaale kúkú gbọ bo hù mi hadopo.+ Eyin yẹn ko mọ nukundagbe towe, a sọ hẹn mi mọ nugbajẹmẹji ba blo.”
16 Jehovah gblọnna Mose dọmọ: “Bẹ sunnu 70 pli sọn mẹho Islaeli tọn lẹ mẹ, yèdọ sunnu he hiẹ yọnẹn nado yin mẹho podọ omẹ nukundeji to gbẹtọ lọ lẹ ṣẹnṣẹn+ bo plan yé yì gòhọ opli tọn lọ kọ̀n bosọ biọ to yé si nado ṣite to finẹ hẹ we. 17 Yẹn na jẹte wá+ bo na dọho hẹ we to finẹ,+ yẹn nasọ yí apadewhe gbigbọ+ he tin to hiẹ ji tọn bo na yí i do yé ji bọ yé na nọ gọalọna we nado hẹn agbàn gbẹtọ lọ lẹ tọn, na e nikaa yindọ hiẹ doponọ wẹ na nọ hẹn ẹn.+ 18 Hiẹ dona dọna gbẹtọ lọ lẹ dọ, ‘Mì klan mìde do wiwe na osọ,+ na mìwlẹ na dù olàn nugbonugbo, na mì ko viavi to Jehovah nukọn wutu+ bo ko sọ dọmọ: “Mẹnu wẹ na na mí olàn nado dù? Ninọmẹ mítọn pọnte taun to Egipti.”+ Todin, Jehovah na na mì olàn bọ mì na dù.+ 19 Mìwlẹ na dù, e ma yin na azán dopo kavi azán 2 kavi azán 3 kavi azán 10, mọjanwẹ e ma na yin na azán 20 do niyẹn, 20 ṣigba na osun dopo blebu, kakajẹ whenue e na tọ́n sọn awọntin mẹ na mì bo na lẹzun awuhiọnu na mì,+ na mì ko gbẹ́ Jehovah he tin to ṣẹnṣẹn mìtọn dai wutu bọ mì sọ to avivi to nukọn etọn bo to didọmọ: “Naegbọn mí do tọ́n sọn Egipti?”’”+
21 To whenẹnu, Mose dọmọ: “Sọha gbẹtọ he ṣẹnṣẹn yẹn tin te lẹ tọn yin sunnu 600 000,+ ṣogan hiẹ ko dọ dọ, ‘Yẹn na na yé olàn bọ yé na dù gọ́ho na osun dopo blebu’! 22 Eyin lẹngbọpa lẹ po kanlinpa lẹ po pete tlẹ yin hùhù, be e na pé yé ya? Kavi eyin whèvi he to hùmẹ lẹpo tlẹ yin hùhù, be e na pé yé ya?”
23 To whenẹnu, Jehovah dọna Mose dọmọ: “Be alọ Jehovah tọn whete wẹ?+ Todin, hiẹ na mọ eyin nuhe yẹn dọ na jọ domọ kavi lala.”
24 Enẹwutu, Mose tọ́nyi bo dọ nuhe Jehovah ko dọna ẹn lẹ na gbẹtọ lọ lẹ. E sọ bẹ sunnu 70 pli sọn mẹho he tin to gbẹtọ lọ lẹ ṣẹnṣẹn lẹ mẹ bo biọ to yé si nado ṣite lẹdo gòhọ lọ.+ 25 To whenẹnu, Jehovah jẹte wá to aslọ de mẹ+ bo dọhona ẹn+ bosọ yí apadewhe gbigbọ+ he tin to ewọ ji tọn bo yí i do mẹho 70 lọ lẹ dopodopo ji. Podọ tlolo he gbigbọ lọ jẹ do yé ji, yé jẹ nuyiwa ji taidi yẹwhegán lẹ,*+ ṣigba yé masọ vọ́ wàmọ ba.
26 Sunnu awe delẹ to mẹho lọ lẹ mẹ gbẹ́ pò to osla lọ mẹ. Yinkọ yetọn wẹ Ẹldadi po Mẹdadi po. Gbigbọ lọ sọ jẹ do yé ji, na yé tin to mẹhe sin yinkọ ko yin kinkandai lẹ mẹ, ṣigba yewlẹ ma ko tọ́nyi gòhọ lọ kọ̀n. Enẹwutu, yé jẹ nuyiwa ji taidi yẹwhegán lẹ to osla lọ mẹ. 27 Dẹpẹ de sọ dowezun bo yì dọna Mose dọmọ: “Ẹldadi po Mẹdadi po to nuyiwa taidi yẹwhegán lẹ to osla lọ mẹ!” 28 To whenẹnu, Jọṣua+ visunnu Nuni tọn he ko yin lizọnyitọ Mose tọn sọn jọja whenu etọn gbọ́n gblọn bo dọmọ: “Mose oklunọ ṣie, glọnalina yé!”+ 29 Ṣigba, Mose dọna ẹn dọmọ: “Be hiẹ to awuwhàn do ota ṣie mẹ wẹ? Lala, ojlo ṣie wẹ yindọ omẹ Jehovah tọn lẹpo ni yin yẹwhegán lẹ bọ Jehovah na yí gbigbọ etọn do yé ji!” 30 To godo mẹ, Mose lẹkọyi osla lọ mẹ to pọmẹ hẹ mẹho Islaeli tọn lọ lẹ.
31 Enẹgodo, jẹhọn de fọ́n sọn Jehovah dè bo jẹ asọkle lẹ bẹ wá ji sọn ohù ji bo nọ hẹn yé nado flẹ jẹ lẹdo osla lọ tọn mẹ,+ yèdọ nudi gbejizọnlin azán dopo tọn to awà osla lọ tọn ehe ji podọ gbejizọnlin azán dopo tọn to awà awetọ ji, lẹdo osla lọ pé, podọ e nọ hẹn yé zlọn gbọn odò na nudi awagbà* awe do kọmẹ to osla lọ mẹ. 32 Enẹwutu, to azán enẹ blebu gbè, to ozán lọ blebu mẹ podọ to azán he bọdego blebu gbè, gbẹtọ lọ lẹ gbọṣi nukle bo bẹ asọkle lẹ pli. Mẹdepope ma bẹpli whè hú homẹli* ao, podọ yé nọ to titẹ́ yé mapote lẹdo osla lọ pé. 33 Ṣigba, dile yé gbẹ́ pò to olàn lọ dù to nùmẹ, yèdọ whẹpo yé nado dù i fó, Jehovah gblehomẹ sinsinyẹn do gbẹtọ lọ lẹ go, bọ Jehovah jẹ yé hù ji badabada.+
34 Enẹwutu, yé ylọ oyín filọ tọn dọ Kiblọti-hataava,*+ na finẹ wẹ yé dì mẹhe do ojlo sinsinyẹn ṣejannabi tọn+ hia lọ lẹ do. 35 Akọta lọ sẹtẹn sọn Kiblọti-hataava bo yì Hazelọti, yé sọ gbọṣi Hazelọti.+
12 Todin, Miliami po Aalọn po jẹ homọdọdo Mose go ji na asi Kuṣinu he e dà lọ tọn wutu, na Kuṣinu de wẹ ewọ dà di asi.+ 2 Yé to didọmọ: “Be Mose kẹdẹ gblamẹ wẹ Jehovah ko dọho gbọn ya? Be ewọ ma ko dọho gbọn míwlẹ gblamẹ ga ya?”+ Jehovah sọ to sisè.+ 3 Nalete, Mose wẹ yin homẹmimiọnnọ hugan+ to mẹhe* tin to aigba nukunmẹ lẹpo mẹ.
4 Jehovah dọna Mose, Aalọn po Miliami po to ajiji mẹ dọmọ: “Mì omẹ atọ̀n lẹ, mì tọ́nyi gòhọ opli tọn lọ kọ̀n.” Enẹwutu, yé omẹ atọ̀n lẹ tọ́nyi. 5 Jehovah sọ jẹte wá to dòtin aslọ+ tọn lọ mẹ bo ṣite to họntonu gòhọ opli tọn lọ tọn bosọ ylọ Aalọn po Miliami po. Yé omẹ awe lẹ sẹwá nukọn. 6 To whenẹnu, e dọmọ: “Mì jaale bo sè ohó ṣie. Eyin yẹwhegán Jehovah tọn de tin to ṣẹnṣẹn mìtọn, yẹn na hẹn dee zun yinyọnẹn na ẹn to numimọ de mẹ,+ podọ yẹn na dọhona ẹn to odlọ de mẹ.+ 7 Ṣigba, e ma yinmọ na devizọnwatọ ṣie Mose gba! Owhé ṣie pete ko yin zizedo alọmẹ na ẹn.*+ 8 Yẹn nọ dọho hẹ ẹ nukun sọ nukun,*+ to aliho he họnwun mẹ, e ma yin gbọn oló lẹ dali gba; podọ ewọ nọ mọ awusọhia Jehovah tọn. To whelọnu lo, naegbọn mìwlẹ ma do dibu nado mọhodọdo devizọnwatọ ṣie Mose go?”
9 Enẹwutu, Jehovah gblehomẹ sinsinyẹn do yé go bo yì sọn yé dè. 10 Aslọ lọ sọ sẹtẹn sọn gòhọ lọ ji, podọ pọ́n! Miliami bẹ pòzọ̀n he hẹn ẹn wé taidi osin-agó.+ To whenẹnu, Aalọn lẹkọ pọ́n Miliami bo mọdọ ewọ ko bẹ pòzọ̀n.+ 11 To afọdopolọji, Aalọn dọna Mose dọmọ: “Yẹn vẹ̀ we, oklunọ ṣie! Jaale, a hia ylando ehe dokọna mí blo! Mí ko yinuwa po nulú po to nuhe mí wà lọ mẹ. 12 Jaale, a dike ewọ zindonukọn domọ taidi mẹhe ko kú de, yèdọ di ovi he agbasalan etọn ko yọ̀n jẹ daa to jiji whenu de blo!” 13 Mose sọ jẹ awhádo ylọ Jehovah ji dọmọ: “Jiwheyẹwhe E, jaale hẹnazọ̀ngbọna ẹn! Jaale!”+
14 Jehovah gblọnna Mose dọmọ: “Eyin otọ́ etọn túntán do nukunmẹ na ẹn tlọlọ, be ewọ ma na yin winyando na azán ṣinawe ya? Gbọ ewọ ni yin ginglọndo gbonu osla lọ tọn na azán ṣinawe,+ bọ to enẹgodo e sọgan yin hinhẹn lẹkọwa.” 15 Enẹwutu, Miliami yin ginglọndo gbonu osla lọ tọn na azán ṣinawe,+ akọta lọ masọ sẹtẹn yì fidevo kakajẹ whenue Miliami yin hinhẹn lẹkọwa. 16 Enẹgodo, akọta lọ sẹtẹn sọn Hazelọti+ bo dosla do danfafa Palani tọn ji.+
13 Todin, Jehovah dọhona Mose dọmọ: 2 “Do sunnu lẹ hlan nado yì bẹ̀* aigba Kenani tọn he yẹn jlo na na Islaelivi lẹ pọ́n. Hiẹ dona do sunnu dopo hlan sọn hẹnnu tọgbo yetọn lẹ tọn dopodopo mẹ, podọ dopodopo yetọn dona yin ahọvi+ de to ṣẹnṣẹn omẹ etọn lẹ tọn.”+
3 Enẹwutu, Mose do yé hlan sọn danfafa Palani tọn ji+ kẹdẹdile Jehovah ko degbe etọn do. Sunnu lọ lẹpo wẹ yin nukọntọ lẹ na Islaelivi lẹ. 4 Yinkọ yetọn lẹ die: sọn hẹnnu Leubẹni tọn mẹ, Ṣamua visunnu Zakuli tọn; 5 sọn hẹnnu Simeoni tọn mẹ, Ṣafati visunnu Holi tọn; 6 sọn hẹnnu Juda tọn mẹ, Kalẹbi+ visunnu Jẹfunnẹ tọn; 7 sọn hẹnnu Isakali tọn mẹ, Igali visunnu Josẹfu tọn; 8 sọn hẹnnu Eflaimi tọn mẹ, Hoṣea+ visunnu Nuni tọn; 9 sọn hẹnnu Bẹnjamini tọn mẹ, Palti visunnu Lafu tọn; 10 sọn hẹnnu Zebuluni tọn mẹ, Gadiẹli visunnu Sodi tọn; 11 sọn hẹnnu Josẹfu tọn mẹ,+ na hẹnnu Manasse tọn,+ Gaddi visunnu Susi tọn; 12 sọn hẹnnu Dani tọn mẹ, Amiẹli visunnu Gemali tọn; 13 sọn hẹnnu Aṣeli tọn mẹ, Sẹtuli visunnu Mikaẹli tọn; 14 sọn hẹnnu Naftali tọn mẹ, Nabi visunnu Vọfsi tọn; 15 sọn hẹnnu Gad tọn mẹ, Geuẹli visunnu Maki tọn. 16 Yinkọ sunnu he Mose dohlan nado yì bẹ̀ aigba lọ pọ́n lẹ tọn niyẹn. Mose sọ do yinkọ na Hoṣea visunnu Nuni tọn dọ Jọṣua.*+
17 To whenue Mose to dido yé hlan nado yì bẹ̀ aigba Kenani tọn pọ́n, e dọna yé dọmọ: “Mì hẹji yì dọ́n bo biọ Negẹb, podọ to enẹgodo mì hẹji yì lẹdo osó tọn lọ mẹ.+ 18 Mì dona dindona aigba he nkọ e yin,+ podọ eyin mẹhe nọ nọ̀ finẹ lẹ yin huhlọnnọ kavi madogánnọ, podọ eyin yé whè kavi sù, 19 podọ eyin aigba lọ yin dagbe kavi ylankan, podọ eyin tòdaho he mẹ yé nọ nọ̀ lẹ yin osla lẹ kavi figángán lẹ. 20 Mì sọ dindona eyin aigba lọ nọ de sinsẹ́n tọ́n* kavi e ma nọ de sinsẹ́n tọ́n,*+ podọ eyin atin lẹ tin to e ji kavi lala. Mìwlẹ dona yin adọgbotọ+ bo yí delẹ to sinsẹ́n aigba lọ tọn lẹ mẹ.” Nalete, ojlẹ he mẹ ovẹn sinsẹ́n tintan lẹ nọ bia te wẹ.+
21 Enẹwutu, yé hẹji yì bo bẹ̀ aigba lọ pọ́n sọn danfafa Zini tọn+ ji jẹ Lehobi+ sẹpọ Lebo-Hamati.*+ 22 To whenue yé hẹji yì Negẹb, yé jẹ Heblọni+ fie Ahimani, Ṣeṣai po Talmai po,+ yèdọ Anakimi+ lẹ nọ nọ̀. Nalete, Heblọni ko yin didoai owhe ṣinawe jẹnukọnna Zoani Egipti tọn. 23 To whenue yé jẹ Agbàdo* Ẹṣkoli tọn mẹ,+ yé sán atinlà de he ji ovẹn sinsẹ́n ohín dopo tin te, bọ awe to sunnu lọ lẹ mẹ yí opò de do ze e, gọna pomeglanate* lẹ po ovò sinsẹ́n delẹ po.+ 24 Yé ylọ oyín filọ tọn dọ Agbàdo* Ẹṣkoli* tọn,+ na ohín he Islaelivi lẹ sán sọn finẹ lọ tọn wutu.
25 To azán 40 godo,+ yé lẹkọ sọn aigba lọ bibẹ̀ pọ́n gbé. 26 Enẹwutu, yé wá Mose, Aalọn po pipli Islaelivi lẹ tọn pete po dè to danfafa Palani tọn ji, to Kadẹṣi.+ Yé hẹn linlin wá na pipli lọ pete bo do sinsẹ́n aigba lọ tọn lẹ hia yé. 27 Linlin he yé na Mose die: “Mí yì aigba he ji hiẹ do mí hlan lọ ji, bọ anọ́sin po owín po to sisà to e ji nugbonugbo,+ podọ sinsẹ́n etọn lẹ die.+ 28 Ṣigba, mẹhe nọ nọ̀ aigba lọ ji lẹ yin huhlọnnọ lẹ, podọ tòdaho gángán lọ lẹ klo taun. Mí sọ mọ Anakimi lẹ to finẹ.+ 29 Amalẹkinu+ lẹ wẹ nọ nọ̀ aigba Negẹb+ tọn ji, podọ Hetinu lẹ, Jẹbusinu lẹ+ po Amolinu lẹ+ po wẹ nọ nọ̀ lẹdo osó tọn lọ mẹ, bọ Kenaninu lẹ+ nọ nọ̀ ohù lọ tó+ podọ Jọdani tó.”
30 To whenẹnu, Kalẹbi tẹnpọn nado hòhuwhẹ gbẹtọ lẹ dile yé ṣite to Mose nukọn, gbọn didọ dali dọmọ: “Mì gbọ mí ni hẹji yì to afọdopolọji, na mí kudeji dọ mí na yí tòdaho lọ, na e họnwun dọ mí sọgan gbawhàn etọn.”+ 31 Ṣigba, sunnu he hẹji yì hẹ ẹ lẹ dọmọ: “Mí ma sọgan hẹji yì hoavùn sọta mẹlọ lẹ, na yé dohuhlọn hú mí.”+ 32 Yé sọ zindonukọn nado to linlin ylankan+ na Islaelivi lẹ gando aigba he yé yì bẹ̀ pọ́n lọ go dọmọ: “Aigba he ji mí jugbọn nado bẹ̀ pọ́n lọ yin aigba de he nọ dù tòmẹnu etọn lẹ sudo, podọ mẹhe mí mọ to e ji lẹpo yin sunnu he tọ́nalùn tlala lẹ.+ 33 Mí sọ mọ Nẹfilimi lẹ to finẹ, yèdọ visunnu Anaki+ tọn lẹ he wá sọn* Nẹfilimi lẹ mẹ, míwlẹ sọ taidi obọ̀ lẹ to nukọn yetọn, yèdọ to nukun mítọn mẹ podọ to nukun yetọn mẹ.”
14 To whenẹnu, pipli lọ pete ze ogbè daga, bọ akọta lọ zindonukọn nado to awhádo bo to avivi to ozán enẹ blebu mẹ.+ 2 Islaelivi lẹpo jẹ hùnhlún do Mose po Aalọn po go ji,+ pipli lọ pete sọ mọhodọdo yé go dọmọ: “E na ko pọnte na mí eyin mí ko kú to aigba Egipti tọn ji, kavi eyin mí ko kú to danfafa ehe ji! 3 Naegbọn Jehovah do plan mí jei aigba ehe ji na mí nido jai gbọn ohí dali?+ Asi mítọn lẹ po ovi mítọn lẹ po na lẹzun ogblànnu.+ Be e ma pọnte hugan dọ mí ni lẹkọyi Egipti ya?”+ 4 Yé tlẹ to didọna ode awetọ dọmọ: “Mì gbọ mí ni de nukọntọ de bo lẹkọyi Egipti!”+
5 Enẹwutu, Mose po Aalọn po ṣinyọ́n nukunmẹ yetọn ai to gbẹtọgun Islaelivi lẹ tọn he pli do finẹ lọ pete nukọn. 6 Jọṣua+ visunnu Nuni tọn po Kalẹbi+ visunnu Jẹfunnẹ tọn po he tin to mẹhe yì bẹ̀ aigba lọ pọ́n lẹ mẹ tlẹ́n awù yetọn lẹ, 7 yé sọ dọna pipli Islaelivi lẹ tọn pete dọmọ: “Aigba he ji mí jugbọn nado bẹ̀ pọ́n lọ, aigba dagbe tlala de wẹ.+ 8 Eyin homẹ Jehovah tọn hùn do mí go, ayihaawe ma tin dọ e na plan mí yì aigba ehe ji bo yí i na mí, yèdọ aigba de he ji anọ́sin po owín po to sisà te.+ 9 Ṣigba, mì ṣiatẹ sọta Jehovah blo, podọ mì dibuna mẹhe nọ nọ̀ aigba lọ ji lẹ blo,+ na mí na hù yé sudo.* Hihọ́ yetọn ma tin to yé ji ba podọ Jehovah tin hẹ mí.+ Mì dibuna yé blo.”
10 Etomọṣo, pipli lọ pete dọho gando zannu dindlan do yé go.+ Ṣigba, gigo Jehovah tọn sọawuhia omẹ Islaeli tọn lẹpo to gòhọ opli tọn lọ ji.+
11 To whenẹnu, Jehovah dọna Mose dọmọ: “Nawẹ e na dẹnsọ bọ akọta ehe na to nuyiwa hẹ mi po mẹmasi po,+ podọ nawẹ e na dẹnsọ bọ yé ma na tindo yise to yẹn mẹ mahopọnna ohia he yẹn ko basi to ṣẹnṣẹn yetọn lẹpo?+ 12 Gbọ yẹn ni yí azọ̀nylankan do hò yé bo sukúndona yé, podọ gbọ yẹn ni yí we do basi akọta de he klo bosọ dohuhlọn hugan yewlẹ.”+
13 Ṣigba, Mose dọna Jehovah dọmọ: “To whenẹnu, Egiptinu lẹ, mẹhe ṣẹnṣẹn hiẹ yí huhlọn towe do plan omẹ ehelẹ jẹgbonu sọn, na sè+ 14 bo nasọ dọho etọn na mẹhe nọ nọ̀ aigba ehe ji lẹ. Yewlẹ lọsu ko sè dọ hiẹ, Jehovah, tin to omẹ ehelẹ ṣẹnṣẹn+ bo ko sọawuhia yé nukun sọ nukun.+ Hiẹ wẹ Jehovah, podọ aslọ towe nọ nọte do yé ji, hiẹ sọ to yìyì to nukọn yetọn to dòtin aslọ tọn lọ mẹ to okle, podọ to dòtin miyọ́n tọn lọ mẹ to zánmẹ.+ 15 Eyin hiẹ hù omẹ ehe lẹpo dopọ,* akọta he ko sè dogbọn yindidi towe dali lẹ na dọmọ: 16 ‘Jehovah ma penugo nado plan omẹ ehelẹ yì aigba he e whlé nado na yé lọ ji, enẹwutu wẹ e do hù yé to danfafa ji.’+ 17 Todin, jaale Jehovah, dike kiklo-yinyin huhlọn towe tọn ni sọawuhia, dile hiẹ ko dopagbe etọn do to whenue a dọmọ: 18 ‘Jehovah, mẹhe nọ whleawu nado gblehomẹ bosọ gọ́ na owanyi nugbo,*+ mẹhe nọ jo nuṣiwa po sẹ́nhẹngba po namẹ, ṣigba bo ma na dike whẹhutọ ni nọma yin yasana gbede, yèdọ mẹhe nọ hẹn yasanamẹ nuṣiwa otọ́ lẹ tọn wá visunnu lẹ ji, wá whẹndo atọ̀ntọ ji podọ wá whẹndo ẹnẹtọ ji.’+ 19 Jaale, jo nuṣiwa omẹ ehelẹ tọn na yé sọgbe hẹ owanyi nugbo daho towe, kẹdẹdile hiẹ ko jona omẹ ehelẹ sọn Egipti kakajẹ din do.”+
20 To whenẹnu, Jehovah dọmọ: “Yẹn jona yé kẹdẹdile hiẹ dọ do.+ 21 Amọ́ to alọ devo mẹ, dile yẹn togbẹ̀, aigba lẹpo wẹ na gọ́ na gigo Jehovah tọn.+ 22 Ṣigba, depope to sunnu lọ lẹ mẹ he ko mọ gigo ṣie gọna ohia ṣie lẹ+ he yẹn basi to Egipti podọ to danfafa lọ ji ganṣo bo zindonukọn nado to whiwhle mi pọ́n+ whla ao ehelẹ bo ma ko dotoaina ogbè ṣie+ 23 ma na mọ aigba lọ he yẹn ko whlé nado na tọgbo yetọn lẹ gbede. Lala, depope to mẹhe to nuyiwa hẹ mi po mẹmasi po lẹ mẹ ma na mọ ẹn.+ 24 Ṣigba, na devizọnwatọ ṣie Kalẹbi+ ko do gbigbọ he gbọnvo de hia bo zindonukọn nado to hihodo mi po ahun lẹpo po wutu, yẹn na plan ẹn yì aigba he ji ewọ ko yì lọ ji dandan, kúnkan etọn nasọ yí i.+ 25 To whenuena e yindọ Amalẹkinu lẹ po Kenaninu lẹ po+ wẹ nọ nọ̀ agbàdo lọ mẹ, mìwlẹ dona lẹkọ to osọ bo dedo danfafa lọ ji gbọn aliho Ohù Vẹẹ tọn ji.”+
26 To whenẹnu, Jehovah dọna Mose po Aalọn po dọmọ: 27 “Nawẹ e na dẹnsọ bọ gbẹtọgun ylankan ehe na zindonukọn to nuhlundọ ehe mẹ gando go e?+ Yẹn ko sè nuhe Islaelivi lẹ to hùnhlún dọ do go e.+ 28 Dọna yé dọ, ‘“Dile yẹn togbẹ̀,” mọ wẹ Jehovah dọ, “nuhe yẹn ko sè bọ mì dọ lọ pẹpẹ wẹ yẹn na wà na mì!+ 29 Mìwlẹ na kú do danfafa ehe ji,+ mọwẹ, mì mẹhe tindo owhe 20 podọ humọ bọ yinkọ mìtọn yin titodohukanji lẹpo pete, yèdọ mì mẹhe ko hlunnudọ do go e lẹpo.+ 30 Depope to mì mẹ ma na yì aigba he yẹn ko whlé* nado hẹn mì nado nọ nọ̀ e ji lọ ji,+ adavo Kalẹbi visunnu Jẹfunnẹ tọn po Jọṣua visunnu Nuni tọn po.+
31 “‘“Ovi mìtọn lẹ wẹ yẹn na plan yì, yèdọ mẹhe mìwlẹ dọ dọ yé na lẹzun ogblànnu,+ yewlẹ wẹ nasọ mọ aigba lọ he mìwlẹ ko gbẹdai.+ 32 Ṣigba, mìwlẹ na kú do danfafa ehe ji. 33 Todin, visunnu mìtọn lẹ na lẹzun lẹngbọhọtọ lẹ to danfafa lọ ji na owhe 40,+ yé nasọ jiya na nuyiwa nugbonọ-mayin* tọn mìtọn lẹ wutu kakajẹ whenue omẹ godo tọn to mì mẹ na kú do danfafa ji.+ 34 Sọgbe hẹ sọha azán he mì yí do bẹ̀ aigba lọ pọ́n lẹ tọn, enẹ wẹ azán 40,+ yèdọ azán dopo na owhe dopo, azán dopo na owhe dopo, mọ wẹ mìwlẹ na jiya nuṣiwa mìtọn lẹ tọn do na owhe 40,+ na mì na mọ nuhe e zẹẹmẹdo nado diọnukunsọ mi.*
35 “‘“Yẹn, Jehovah, ko dọho. Nuhe yẹn na wà na gbẹtọgun ylankan ehe lẹpo, yèdọ mẹhe ko bẹ yede pli sọta mi lẹ die: Danfafa ehe ji wẹ yé na sudo te, podọ file wẹ yé na kú do.+ 36 Sunnu he Mose dohlan nado yì bẹ̀ aigba lọ pọ́n bọ yé hẹn pipli lọ pete nado hlunnudọ do ewọ go to whenue yé lẹkọwa po linlin ylankan de po gando aigba lọ go lẹ,+ 37 mọwẹ, sunnu he hẹn linlin ylankan wá gando aigba lọ go lẹ na yin hùhù to Jehovah nukọn.+ 38 Ṣigba na nugbo tọn, Jọṣua visunnu Nuni tọn po Kalẹbi visunnu Jẹfunnẹ tọn po he tin to mẹhe yì bẹ̀ aigba lọ pọ́n lẹ mẹ na to gbẹnọ zọnmii.”’”+
39 To whenue Mose dọ ohó ehelẹ na Islaelivi lẹpo, yé biọ aluẹmẹ sinsinyẹn. 40 Humọ, yé fọ́n to afọnnu fuu bo tẹnpọn nado hẹji yì osó lọ ji bosọ dọmọ: “Todin, mí ko wleawufo nado hẹji yì fihe Jehovah ko dọho etọn lọ, na mí ko waylando.”+ 41 Ṣigba, Mose dọmọ: “Naegbọn mìwlẹ do to nuyiwa sọta gbedide Jehovah tọn? Mì ma na tindo kọdetọn dagbe. 42 Mì hẹji yì blo, na Jehovah ma tin hẹ mì; mìwlẹ nasọ ṣíawhàn to kẹntọ mìtọn lẹ nukọn.+ 43 Na Amalẹkinu lẹ po Kenaninu lẹ po to tepọn mì to finẹ nado diọnukunsọ mì,+ mìwlẹ nasọ jai gbọn ohí dali. Na mì lẹkọ sọn hihodo Jehovah mẹ wutu, Jehovah ma na tin hẹ mì.”+
44 Etomọṣo, yé gbọn sakla dali hẹji dedo osó lọ ji,+ ṣigba apotin alẹnu Jehovah tọn po Mose po ma sẹtẹn sọn osla lọ ṣẹnṣẹn.+ 45 To whenẹnu, Amalẹkinu po Kenaninu he nọ nọ̀ osó enẹ ji lẹ po jẹte wá bo gbawhàn yetọn, bosọ vúnvún yé pé kakajẹ Họlma.+
15 Jehovah zindonukọn nado dọhona Mose dọmọ: 2 “Dọhona Islaelivi lẹ bo dọna yé dọmọ, ‘Eyin mì wá jẹ aigba he yẹn to nina mì nado nọ nọ̀ e ji lọ ji+ 3 bọ mì basi avọ́nunina gbọn miyọ́n dali de na Jehovah sọn kanlinpa kavi lẹngbọpa mìtọn mẹ—vlavo avọ́nunina mimẹ̀+ de kavi avọ́sinsan de nado basi pàdido vonọtaun de kavi avọ́nunina sọn ojlo mẹ wá+ de kavi avọ́nunina de to hùnwhẹ vonọtaun mìtọn lẹ whenu,+ nado sọgan wleawuna owán gblingblin* de hlan Jehovah+— 4 mẹhe hẹn avọ́nunina etọn wá lọ sọ dona nọ hẹn avọ́nunina jinukun-lili tọn+ de wá na Jehovah, yèdọ mado-ao linfin dagbedagbe efa dopo tọn* he yè yí mado-ẹnẹ amì hini* dopo tọn do yàn. 5 Mì sọ dona nọ na ovẹn taidi avọ́nunina nùnù de, yèdọ mado-ẹnẹ hini dopo tọn, to pọmẹ hẹ avọ́nunina mimẹ̀+ lọ kavi na avọ́sinsan lẹngbọvu asu dopodopo tọn. 6 Kavi eyin agbò de wẹ, mì dona nọ basi avọ́nunina jinukun-lili tọn de, yèdọ mado-ao ojlẹnu efa linfin dagbedagbe tọn awe he yè yí mado-atọ̀n amì hini dopo tọn do yàn. 7 Mìwlẹ sọ dona nọ hẹn ovẹn wá taidi avọ́nunina nùnù de, yèdọ mado-atọ̀n hini dopo tọn, taidi owán gblingblin* de hlan Jehovah.
8 “‘Ṣigba, eyin kanlin asu de wẹ mì yí do sanvọ́ sọn kanlinpa lọ mẹ taidi avọ́nunina mimẹ̀+ de kavi avọ́sinsan de nado basi pàdido+ vonọtaun de kavi avọ́sinsan jijọho tọn lẹ hlan Jehovah,+ 9 mì sọ dona nọ hẹn avọ́nunina jinukun-lili tọn+ de wá, yèdọ mado-ao ojlẹnu efa linfin dagbedagbe tọn atọ̀n he yè yí amì hini daa do yàn, to pọmẹ hẹ kanlin asu lọ he yin nina sọn kanlinpa lọ mẹ. 10 Mì sọ dona nọ hẹn ovẹn wá taidi avọ́nunina nùnù+ de, yèdọ hini daa, taidi avọ́nunina gbọn miyọ́n dali de, yèdọ taidi owán gblingblin* de hlan Jehovah. 11 Nuhe dona nọ zọ̀n oyìnsú dopodopo kavi agbò dopodopo kavi lẹngbọvu asu dopodopo kavi gbọgbọẹ lẹ ji niyẹn. 12 Mahopọnna sọha he mìwlẹ na, nuhe dona nọ zọ̀n dopodopo yetọn ji niyẹn, yèdọ sọgbe hẹ sọha yetọn. 13 Lehe Islaelivi he yin tòvi-jiji lẹpo dona nọ basi avọ́nunina gbọn miyọ́n dali do niyẹn, yèdọ taidi owán gblingblin* de hlan Jehovah.
14 “‘Eyin jonọ he nọ nọ̀ ṣẹnṣẹn mìtọn kavi mẹhe ko tin to ṣẹnṣẹn mìtọn na owhe susu de dona basi avọ́nunina gbọn miyọ́n dali, taidi owán gblingblin* de hlan Jehovah, ewọ lọsu dona nọ basi kẹdẹdile mìwlẹ nọ basi do.+ 15 Osẹ́ndoai dopolọ wẹ mìwlẹ he yin apadewhe agun lọ tọn po jonọ he nọ nọ̀ ṣẹnṣẹn mìtọn lẹ po na nọ hodo. E na yin osẹ́ndoai he na dẹn-to-aimẹ de na whẹndo mìtọn lẹpo. Nudopolọ wẹ mẹhe to jonọ-gbéji lẹ po mìwlẹ po dona yin to Jehovah nukọn.+ 16 Osẹ́n dopolọ podọ nudide whẹdida tọn dopolọ wẹ dona tin na mìwlẹ po jonọ he nọ nọ̀ ṣẹnṣẹn mìtọn lẹ po.’”
17 Jehovah sọ zindonukọn nado dọhona Mose dọmọ: 18 “Dọhona Islaelivi lẹ bo dọna yé dọ, ‘Eyin mì jẹ aigba he ji yẹn plan mì jei lọ ji 19 bọ mìwlẹ dù depope to núdùdù aigba lọ tọn lẹ mẹ,+ mì dona basi nunina de na Jehovah. 20 Mìwlẹ dona nọ basi nunina sinsẹ́n tintan+ jinukun-lili mìtọn tọn taidi akla loboto lẹ. Kẹdẹdi nunina likun-flétẹn tọn de, mọ wẹ mì dona nọ basi nunina etọn do. 21 Mì dona nọ na delẹ to sinsẹ́n tintan jinukun-lili mìtọn tọn lẹ mẹ taidi nunina de na Jehovah to whẹndo mìtọn lẹpo mẹ kakadoi.
22 “‘Todin, eyin mìwlẹ ṣinuwa bo gboawupo nado yìn gbedide ehe lẹpo he Jehovah ko na Mose, 23 yèdọ nuhe Jehovah ko degbe etọn na mì gbọn Mose gblamẹ lẹpo sọn azán he gbè Jehovah ko degbe etọn podọ kaka sọyi na whẹndo mìtọn lẹ, 24 podọ eyin gbọn nuṣiwa dali wẹ pipli lọ wà nulọ to mayọnẹn mẹ, pipli lọ pete dona na oyìnsú winyanwinyan dopo taidi avọ́nunina mimẹ̀ de nado wleawuna owán gblingblin* de hlan Jehovah, to pọmẹ hẹ avọ́nunina jinukun-lili tọn etọn po avọ́nunina nùnù etọn po sọgbe hẹ aliho nuyiwa tọn lọ,+ gọna gbọgbọẹvu dopo taidi avọ́nunina ylando tọn.+ 25 Yẹwhenọ na basi ovẹsè na pipli Islaelivi lẹ tọn pete, bọ e na yin jijona yé,+ na nuṣiwa de wẹ e yin, bọ yewlẹ ko hẹn avọ́nunina gbọn miyọ́n dali de wá na Jehovah taidi avọ́nunina yetọn gọna avọ́nunina ylando tọn yetọn to Jehovah nukọn na nuṣiwa yetọn. 26 E na yin jijona pipli Islaelivi lẹ tọn pete gọna jonọ he nọ nọ̀ ṣẹnṣẹn yetọn lẹ, na nuṣiwa akọta lọ pete tọn wẹ.
27 “‘Eyin mẹdepope* waylando gbọn nuṣiwa dali, to whenẹnu ewọ dona hẹn gbọgbọẹ asi owhe dopo mẹ tọn dopo wá na avọ́nunina ylando tọn.+ 28 Yẹwhenọ nasọ basi ovẹsè na mẹhe* gbọn nuṣiwa dali waylando to mayọnẹn mẹ to Jehovah nukọn lọ, na e nido basi ovẹsè na ẹn bọ e na yin jijona ẹn.+ 29 Osẹ́n dopolọ wẹ dona tin na tòvi-jiji he to Islaelivi lẹ ṣẹnṣẹn po jonọ he nọ nọ̀ ṣẹnṣẹn yetọn lẹ po na nuhe dù ylando he yin wiwà to mayọnẹn mẹ lẹ.+
30 “‘Ṣigba, eyin mẹde* waylando sọn ojlo mẹ wá,+ vlavo mẹlọ yin tòvi-jiji kavi mẹhe to jonọ-gbéji de, be nùzan do Jehovah go wẹ e te bo dona yin sinsánsẹ* sọn omẹ etọn lẹ ṣẹnṣẹn. 31 Na omẹ enẹ ko vlẹ ohó Jehovah tọn bo ko tùnafọ gbedide etọn ji wutu, e* dona yin sinsánsẹ dandan.+ Ewọ na dogbè nuṣiwa etọn tọn.’”+
32 Dile Islaelivi lẹ tin to danfafa ji, yé mọ dawe de he to nake ṣinyan to Gbọjẹzangbe.+ 33 Mẹhe mọ ẹn bọ e to nake ṣinyan lẹ plan ẹn wá Mose, Aalọn po pipli lọ pete po nukọn. 34 Yé sọ wle e sú,+ na nuhe dona yin wiwà na ẹn ma ko yin hinhẹn zun yinyọnẹn.
35 Jehovah sọ dọna Mose dọmọ: “Dawe lọ dona yin hùhù dandan,+ pipli lọ pete dona dlan zannu do e hù to gbonu osla lọ tọn.”+ 36 Enẹwutu, pipli lọ pete plan ẹn jẹgbonu osla lọ tọn bo dlan zannu do e hù, kẹdẹdile Jehovah ko degbe etọn na Mose do.
37 Jehovah zindonukọn bo dọna Mose dọmọ: 38 “Dọhona Islaelivi lẹ bo dọna yé dọ yé dona nọ basi okẹ̀yẹ̀ lẹ do tónu na awù yetọn lẹ to whẹndo yetọn lẹpo mẹ kakadoi, podọ yé dona nọ basi okàn juju de do aga na okẹ̀yẹ̀ he to tónu lọ lẹ.+ 39 ‘Mìwlẹ dona nọ basi okẹ̀yẹ̀ ehe, na mì nido nọ mọ ẹn bo nọ flin gbedide Jehovah tọn lẹpo bosọ nọ yìn yé.+ Mì ma dona nọ hodo ahun po nukun mìtọn titi lẹ po, he nọ to dindọn mì biọ galilọ gbigbọmẹ tọn mẹ.+ 40 Ehe na gọalọna mì nado nọ flin gbedide ṣie lẹpo, bọ mì na nọ yìn yé bo yin wiwe na Jiwheyẹwhe mìtọn.+ 41 Yẹn wẹ Jehovah Jiwheyẹwhe mìtọn, he plan mì sọn aigba Egipti tọn ji nado do dee hia di Jiwheyẹwhe mìtọn.+ Yẹn wẹ Jehovah Jiwheyẹwhe mìtọn.’”+
16 To whenẹnu, Kola+ visunnu Izhali+ tọn, visunnu Kohati+ tọn, visunnu Levi+ tọn kọ̀n ede dopọ hẹ Datani po Abilami po, yèdọ visunnu Eliabi+ tọn lẹ, gọna Oni visunnu Pelẹti tọn he wá sọn visunnu Leubẹni+ tọn lẹ mẹ. 2 Yé fọ́n do Mose ji to pọmẹ hẹ Islaelivi sunnu 250, yèdọ ahọvi pipli lọ tọn lẹ, omẹ dide gbẹtọgun lọ tọn lẹ, podọ sunnu nukundeji lẹ. 3 Enẹwutu, yé bẹ yede pli dopọ sọta+ Mose po Aalọn po bo dọna yé dọmọ: “Agbọ́ mìtọn ko pé mí! Pipli lọ pete wẹ yin wiwe,+ yèdọ yemẹpo, podọ Jehovah tin to ṣẹnṣẹn yetọn.+ To whelọnu lo, naegbọn mìwlẹ do to mìde ze daga do agun Jehovah tọn ji?”
4 To whenue Mose sè ehe, e ṣinyọ́n nukunmẹ ai to afọdopolọji. 5 Enẹgodo, e dọna Kola po godonọnamẹtọ etọn lẹpo po dọmọ: “To afọnnu, Jehovah na do mẹhe yin etọn+ podọ mẹhe yin wiwe bo dona nọ dọnsẹpọ ẹ hia,+ podọ mẹdepope he ewọ de+ wẹ na nọ dọnsẹpọ ẹ. 6 Nuhe mì na wà die: Hiẹ Kola po godonọnamẹtọ+ towe lẹpo po ni ze miyọ́n-hẹnnú+ lẹ, 7 bo de miyọ́n do yé mẹ bosọ yí nuyọnwan do yé ji to Jehovah nukọn to osọ, podọ mẹhe Jehovah na de,+ ewọ lọ wẹ yin wiwe. Mì visunnu Levi+ tọn lẹ tọn gbẹ́gbẹ́!”
8 To whenẹnu, Mose dọna Kola dọmọ: “Mì dotoaina mi, mì visunnu Levi tọn lẹ. 9 Be onú tata de wẹ e yin to nukun mìtọn mẹ dọ Jiwheyẹwhe Islaeli tọn ko klan mì dovo sọn pipli Islaeli tọn mẹ+ bo ko na mì dotẹnmẹ nado nọ dọnsẹpọ ẹ nado wadevizọn to gòhọtúntún Jehovah tọn mẹ podọ nado nọ ṣite to pipli lọ nukọn nado yilizọn na yé,+ 10 bọ ewọ ko sọ hẹn we nado nọ dọnsẹpọ ẹ to pọmẹ hẹ nọvisunnu towe lẹpo, yèdọ visunnu Levi tọn lẹ ya? Be mìwlẹ sọ dona tẹnpọn nado hò otẹn yẹwhenọduta tọn yí wẹ?+ 11 Na ehe wutu, Jehovah wẹ hiẹ po godonọnamẹtọ towe he to pipli dopọ hẹ we lẹpo po to agọjẹdo. Na nuhe dù Aalọn, mẹnu wẹ ewọ yin bọ mìwlẹ do to hùnhlún do e go?”+
12 To godo mẹ, Mose dowẹn hlan Datani po Abilami po,+ yèdọ visunnu Eliabi tọn lẹ, ṣigba yewlẹ dọmọ: “Míwlẹ ma to na wá gba! 13 Be onú tata de wẹ e yin dọ hiẹ ko plan mí tọ́n sọn aigba he ji anọ́sin po owín po to sisà te de ji nado wá hù mí to danfafa ji ya?+ Todin, be hiẹ sọ jlo na yí dewe do basi ogán do mí ji petepete* wẹ ya? 14 Na nugbo tọn, hiẹ ma ko plan mí wá aigba he ji anọ́sin po owín po to sisà te de ji+ kavi na mí aigba po vẹngle po taidi ogú de gba. Be hiẹ jlo na sún nukun omẹ ehelẹ tọn sẹ̀ wẹ?* Míwlẹ ma to na wá gba!”
15 Enẹwutu, Mose gblehomẹ sinsinyẹn bo dọna Jehovah dọmọ: “A lẹkọ pọ́n avọ́nunina jinukun-lili tọn yetọn blo. Yẹn ma yí kẹtẹkẹtẹ dopo tata sọn yé si, mọjanwẹ yẹn ma gbleawuna ode to yé mẹ do niyẹn.”+
16 To whenẹnu, Mose dọna Kola dọmọ: “Hiẹ po godonọnamẹtọ towe lẹpo po ni sọawuhia to Jehovah nukọn to osọ, yèdọ hiẹ po yewlẹ po gọna Aalọn. 17 Dopodopo mìtọn dona ze miyọ́n-hẹnnú etọn bo yí nuyọnwan do e ji, podọ mẹdopodopo na ze miyọ́n-hẹnnú etọn wá Jehovah nukọn, enẹ wẹ miyọ́n-hẹnnú 250, to pọmẹ hẹ hiẹ po Aalọn po, yèdọ mẹdopodopo po miyọ́n-hẹnnú etọn po.” 18 Enẹwutu, dopodopo yetọn ze miyọ́n-hẹnnú etọn bo de miyọ́n po nuyọnwan po do yé ji bosọ ṣite to họntonu gòhọ opli tọn lọ tọn to pọmẹ hẹ Mose po Aalọn po. 19 To whenue Kola ko bẹ godonọnamẹtọ etọn lẹ pli+ sọta yé to họntonu gòhọ opli tọn lọ tọn, gigo Jehovah tọn sọawuhia pipli lọ pete.+
20 Todin, Jehovah dọna Mose po Aalọn po dọmọ: 21 “Mì klan mìde dovo sọn pipli ehe ṣẹnṣẹn, na yẹn nido và yé sudo to afọdopolọji.”+ 22 Enẹwutu, yé ṣinyọ́n nukunmẹ ai bo dọmọ: “Jiwheyẹwhe E, Jiwheyẹwhe he nọ nagbẹ̀ mẹlẹpo,*+ be ylando mẹdopo tọn na hẹn we nado gblehomẹ do pipli lọ pete go wẹ?”+
23 To whenẹnu, Jehovah dọna Mose dọmọ: 24 “Dọhona pipli lọ bo dọna yé dọ, ‘Mì sẹ̀ jẹla na gòhọ Kola, Datani po Abilami po tọn lẹ!’”+
25 Enẹgodo, Mose fọ́n bo yì Datani po Abilami po dè, mẹho+ Islaeli tọn lẹ sọ hodo e. 26 E sọ dọna pipli lọ dọmọ: “Mì jaale, mì sẹ̀ jẹla na gòhọ mẹylankan ehelẹ tọn lẹ bo ma doalọ nudepope he yin yetọn go blo, na mìwlẹ nikaa yin vivasudo na ylando yetọn wutu.” 27 To afọdopolọji, yé sẹ̀ jẹla na gòhọ Kola, Datani po Abilami po tọn lẹ, yèdọ sọn adà lẹpo ji, Datani po Abilami po sọ tọ́njẹgbonu bo ṣite to họntonu gòhọ yetọn lẹ tọn to pọmẹ hẹ asi yetọn lẹ, visunnu yetọn lẹ po ovi pẹvi yetọn lẹ po.
28 To whenẹnu, Mose dọmọ: “Gbọn ehe gblamẹ, mìwlẹ na yọnẹn dọ Jehovah wẹ do mi hlan nado wà onú ehe lẹpo, bọ e ma yin sọn ojlo ṣie titi mẹ: 29 Eyin omẹ ehelẹ kú okú jọwamọ tọn he gbẹtọ lẹpo nọ kú to paa mẹ podọ eyin yasanamẹ yetọn yin dopolọ taidi gbẹtọvi lẹpo tọn, be to whenẹnu, e ma yin Jehovah wẹ do mi hlan.+ 30 Ṣigba, eyin Jehovah wà nujiawu de na yé bọ aigba kẹ̀ onù etọn bo bẹ yewlẹ po nuhe yé tindo lẹpo po mì, bọ yé jẹte yì Yọdò* mẹ gbẹ̀te, mìwlẹ na yọnẹn na taun tọn dọ omẹ ehelẹ ko yinuwa hẹ Jehovah po mẹmasi po.”
31 Tlolo he e dotana nuhe dọ e te, aigba he ji yé ṣite do lọ zẹ̀ do awe.+ 32 Aigba sọ kẹnù bo bẹ yewlẹ po whédo yetọn lẹ po mì, gọna mẹdepope he gando Kola go+ po nutindo yetọn lẹpo po. 33 Gbọnmọ dali, yewlẹ po mẹhe gando yé go lẹpo po jẹte yì Yọdò* mẹ gbẹ̀te, bọ aigba bọnùdo yé, sọmọ bọ yé yin vivasudo sọn gbẹtọgun lọ ṣẹnṣẹn.+ 34 Islaelivi he lẹdo yé lẹpo họnyi to whenuena yé sè awhágbe yetọn, na yé dọmọ: “Mí to budi dọ aigba nikaa ze mílọsu mì!” 35 To whenẹnu, miyọ́n de wá sọn Jehovah dè+ bo fiọ sunnu 250 he to nuyọnwan mẹ̀ lọ lẹ.+
36 Todin, Jehovah dọna Mose dọmọ: 37 “Dọna Eleazali visunnu Aalọn yẹwhenọ lọ tọn nado bẹ miyọ́n-hẹnnú+ lọ lẹ sọn miyọ́n lọ mẹ, na onú wiwe wẹ yé. Humọ, dọna ẹn nado vúnvún miyọ́n lọ pé jẹ obá de mẹ. 38 Miyọ́n-hẹnnú sunnu he waylando bo hẹn ogbẹ̀ yetọn bu* lọ lẹ tọn lẹ dona yin yíyí do tùn ogàn flẹ́lẹ́ he na yin yíyí do ṣinyọ́n agbà+ lọ go, na yé ko hẹn yé wá Jehovah nukọn bọ yé lẹzun onú wiwe wutu. Yé sọ dona yin ohia de na Islaelivi lẹ.”+ 39 Enẹwutu, Eleazali yẹwhenọ lọ yí miyọ́n-hẹnnú gànvẹẹ tọn he mẹhe yin fifiọ lọ lẹ hẹnwa lẹ bo yí yé do tùn nuhe na yin ṣinṣinyọn do agbà lọ go, 40 kẹdẹdile Jehovah ko dọna ẹn gbọn Mose gblamẹ do. Ehe yin nuflinmẹ de na Islaelivi lẹ dọ mẹdevo* depope he ma wá sọn kúnkan Aalọn tọn mẹ ma dona nọ dọnsẹpọ nado mẹ̀ nuyọnwan to Jehovah nukọn+ podọ mẹdepope ma dona wá taidi Kola po godonọnamẹtọ etọn lẹ po.+
41 To wunkẹngbe tlolo, pipli Islaelivi lẹ tọn pete jẹ hùnhlún do Mose po Aalọn po go ji+ dọmọ: “Mì omẹ awe lẹ ko hù omẹ Jehovah tọn lẹ.” 42 To whenue gbẹtọgun lọ ko bẹ yede pli dopọ sọta Mose po Aalọn po, to whenẹnu yemẹpo lilẹ́ pannukọn gòhọ opli tọn lọ, podọ pọ́n! aslọ lọ ṣinyọ́n e ji bọ gigo Jehovah tọn jẹ awusọhia ji.+
43 Mose po Aalọn po yì gòhọ opli tọn lọ nukọn,+ 44 bọ Jehovah dọna Mose dọmọ: 45 “Mì tọ́n sọn ṣẹnṣẹn pipli ehe tọn, na yẹn nido và yé sudo to afọdopolọji.”+ To whenẹnu, yé ṣinyọ́n nukunmẹ ai.+ 46 Enẹgodo, Mose dọna Aalọn dọmọ: “Ze miyọ́n-hẹnnú lọ bo de miyọ́n do e mẹ sọn agbà lọ ji+ bosọ yí nuyọnwan do e ji, podọ yawu yì pipli lọ mẹ bo basi ovẹsè na yé,+ na Jehovah ko gblehomẹ wutu. Azọ̀nylankan ko bẹjẹeji!” 47 To afọdopolọji, Aalọn ze e kẹdẹdile Mose ko dọ do bo dowezun yì gbẹtọgun lọ ṣẹnṣẹn, podọ pọ́n! azọ̀nylankan ko bẹjẹeji to gbẹtọ lọ lẹ ṣẹnṣẹn. Enẹwutu, e yí nuyọnwan do miyọ́n-hẹnnú lọ ji bo jẹ ovẹsè basi na gbẹtọ lọ lẹ ji. 48 Ewọ gbọṣi ote to mẹhe ko kú lẹ po mẹhe togbẹ̀ lẹ po ṣẹnṣẹn, bọ azọ̀nylankan lọ wá doalọte to godo mẹ. 49 Sọha mẹhe azọ̀nylankan lọ hù lẹ tọn yin 14 700, gbọnvona mẹhe kú na Kola tọn wutu lẹ. 50 To godo mẹ, to whenue Aalọn lẹkọyi Mose dè to họntonu gòhọ opli tọn lọ tọn, azọ̀nylankan lọ ko yin hinhẹn doalọte.
17 Todin, Jehovah dọna Mose dọmọ: 2 “Dọhona Islaelivi lẹ bo yí opò dopo sọn whédo otọ́ yetọn lẹ tọn dopodopo si, enẹ wẹ sọn ahọvi whédo otọ́ yetọn lẹ tọn dopodopo si,+ yèdọ opò 12 to lẹndopọ mẹ. Kàn oyín mẹdopodopo tọn do opò etọn ji. 3 Hiẹ dona kàn oyín Aalọn tọn do opò Levi tọn ji, na opò dopo wẹ na yin yíyí sọn nukọntọ whédo otọ́ yetọn lẹ tọn dopodopo si. 4 Bẹ opò lọ lẹ do gòhọ opli tọn lọ mẹ to Apotin Kunnudenu+ tọn lọ nukọn, fie yẹn nọ sọawuhia mì to gbesisọ mẹ te.+ 5 Opò sunnu he yẹn de+ lọ tọn nasọ jọ amà, bọ yẹn na doalọtena hùnhlún Islaelivi lẹ tọn sọta mi,+ yèdọ hùnhlún yetọn sọta mìwlẹ.”+
6 Enẹwutu, Mose dọhona Islaelivi lẹ, bọ ahọvi yetọn lẹpo bẹ opò lẹ na ẹn—enẹ wẹ opò dopo na ahọvi whédo otọ́ yetọn lẹ tọn dopodopo, yèdọ opò 12—opò Aalọn tọn sọ tin to opò yetọn lẹ mẹ. 7 Enẹgodo, Mose bẹ opò lọ lẹ do Jehovah nukọn to gòhọ Kunnudenu tọn lọ mẹ.
8 To azán awetọ gbè, to whenue Mose biọ gòhọ Kunnudenu tọn lọ mẹ, pọ́n! opò Aalọn tọn na whédo Levi tọn ko jọ amà bo to amà lẹ detọ́n, podọ e ko sọ gbàsẹ́ bo to sinsẹ́n almọndi tọn he bia lẹ detọ́n. 9 To whenẹnu, Mose bẹ opò lọ lẹpo tọ́njẹgbonu sọn Jehovah nukọn wá omẹ Islaeli tọn lẹpo dè. Yé sọ pọ́n yé bọ sunnu dopodopo yí opò etọn titi.
10 Enẹgodo, Jehovah dọna Mose dọmọ: “Gọ̀ opò Aalọn tọn+ do Apotin Kunnudenu tọn lọ nukọn, na e nido yin sisẹdo taidi ohia de+ na visunnu atẹṣitọ lẹ,+ na hùnhlún yetọn sọta mi nido doalọte podọ na yé nikaa kú.” 11 To afọdopolọji, Mose wà kẹdẹdile Jehovah ko degbe etọn na ẹn do. Mọpẹpẹ wẹ e wà do.
12 To whenẹnu, Islaelivi lẹ dọna Mose dọmọ: “Todin, kúkú gbé wẹ mí ja, mí na dọ̀n janwẹ, mímẹpo wẹ na dọ̀n! 13 Mẹdepope he dọnsẹpọ gòhọtúntún Jehovah tọn poun na kú!+ Be mọjanwẹ míwlẹ na kú do ya?”+
18 Whenẹnu, Jehovah dọna Aalọn dọmọ: “Hiẹ po visunnu towe lẹ po gọna whédo otọ́ towe tọn wẹ na nọ dogbè na nuṣiwa depope he gando fiwiwe lọ go,+ podọ hiẹ po visunnu towe lẹ po wẹ na nọ dogbè na nuṣiwa depope he gando yẹwhenọduta mìtọn go.+ 2 Humọ, plan nọvisunnu towe lẹ sọn hẹnnu Levi tọn, yèdọ hẹnnu tọgbo towe tọn mẹ wá, na yé nido kọnawudopọ hẹ we bo nọ yilizọn na hiẹ+ po visunnu towe lẹ po to gòhọ Kunnudenu tọn lọ nukọn.+ 3 Yé dona nọ hẹn azọngban yetọn lẹ di dohlan we podọ dohlan gòhọ lọ pete.+ Ṣigba, yé ma dona nọ sẹpọ nuyizan ofi wiwe lọ tọn lẹ po agbà lọ po gba, na yewlẹ kavi hiẹ nikaa kú.+ 4 Yé na nọ kọnawudopọ hẹ we bo nọ hẹn azọngban yetọn lẹ di gando gòhọ opli tọn lọ po sinsẹ̀nzọn gòhọ lọ tọn lẹpo po go, podọ mẹdevo depope* ma dona dọnsẹpọ mì.+ 5 Mìwlẹ dona nọ hẹn azọngban mìtọn di dohlan ofi wiwe+ lọ po agbà+ lọ po, na homẹgble+ devo nikaa wá omẹ Islaeli tọn lẹ ji. 6 Yẹnlọsu ko yí nọvisunnu mìtọn lẹ, yèdọ Levinu lẹ na mì taidi nunina de sọn Islaelivi lẹ ṣẹnṣẹn.+ Yé ko yin nina Jehovah nado nọ penukundo sinsẹ̀nzọn gòhọ opli tọn lọ tọn go.+ 7 Hiẹ po visunnu towe lẹ po na nọ penukundo azọngban yẹwhenọ tọn mìtọn lẹ go gando agbà lọ po nuhe tin to godo na avọ̀ he gbò fiwiwe lọ po go,+ podọ mìwlẹ wẹ na nọ wà sinsẹ̀nzọn ehe.+ Yẹn ko na sinsẹ̀nzọn yẹwhenọduta tọn mìwlẹ taidi nunina de, podọ mẹdevo depope* he sẹpọ fiwiwe lọ dona yin hùhù.”+
8 Jehovah zindonukọn nado dọhona Aalọn dọmọ: “Yẹn ko de we do nunina he nọ yin bibasi na mi lẹ ji.+ Apadewhe onú wiwe he Islaelivi lẹ nọ basi nunina etọn lẹpo tọn wẹ yẹn ko na hiẹ po visunnu towe lẹ po taidi ahọsumẹ tẹgbẹ tọn de.+ 9 Nuhe na nọ yin towe to avọ́nunina wiwe hugan he yin bibasi gbọn miyọ́n dali lẹ mẹ die: avọ́nunina he yé basi lẹpo, gọna avọ́nunina jinukun-lili tọn+ yetọn lẹ, avọ́nunina ylando tọn+ yetọn lẹ po avọ́nunina whẹhuhu tọn+ he yé nọ hẹnwa na mi lẹ po. Onú wiwe gbaugbau de wẹ ehe yin na hiẹ po visunnu towe lẹ po. 10 Fihe wé hugan de wẹ hiẹ dona nọ dù sọn e mẹ te.+ Sunnu lẹpo wẹ sọgan nọ dù sọn e mẹ. Onú wiwe de wẹ e na nọ yin na we.+ 11 Nudevo he nasọ nọ yin towe die: nunina+ he Islaelivi lẹ nọ basi lẹ gọna avọ́nunina he yè mimí+ lẹpo he yé nọ basi. Yẹn ko na yé hiẹ po visunnu towe lẹ po gọna viyọnnu towe lẹ taidi ahọsumẹ tẹgbẹ tọn de.+ Mẹdepope he yin wiwe to owhé towe gbè sọgan nọ dù sọn e mẹ.+
12 “Adà dagbe hugan amì lọ tọn lẹpo gọna adà dagbe hugan ovẹn yọyọ po likun po tọn lẹpo, yèdọ sinsẹ́n tintan+ yetọn lẹ he yé nọ na Jehovah wẹ yẹn na we.+ 13 Sinsẹ́n bibia tintan nuhe aigba yetọn detọ́n lẹpo tọn, ehe yé na hẹnwa na Jehovah na nọ lẹzun towe.+ Mẹdepope he yin wiwe to owhé towe gbè sọgan nọ dù sọn e mẹ.
14 “Nuhe yin kinklandowiwe* to Islaeli lẹpo dona nọ lẹzun towe.+
15 “Plọnji nutogbẹ̀* lẹpo tọn,+ he yé na nọ hẹnwa Jehovah nukọn, vlavo e yin gbẹtọ kavi kanlin, dona nọ lẹzun towe. Ṣigba, hiẹ dona nọ fli plọnji gbẹtọ tọn gọ̀ dandan,+ podọ hiẹ dona nọ fli plọnji kanlin mawé lẹ tọn gọ̀.+ 16 Hiẹ dona nọ yí mẹfligọ-kuẹ he sọzẹn lọ he yin ṣekẹli* fataka tọn atọ́n do fli i gọ̀ to whenue e tindo osun dopo podọ humọ,+ sọgbe hẹ ojlẹnu ṣekẹli tọn he yin ofi wiwe lọ tọn.* Enẹ wẹ gela* 20. 17 Oyìnsú he yin plọnji kavi lẹngbọvu asu he yin plọnji kavi gbọgbọẹ he yin plọnji kẹdẹ wẹ hiẹ ma dona nọ fligọ.+ Onú wiwe de wẹ yé yin. Hiẹ dona nọ húnhún ohùn yetọn do agbà lọ ji+ podọ hiẹ dona nọ mẹ̀ ojó yetọn taidi avọ́nunina he yin bibasi gbọn miyọ́n dali de nado wleawuna owán gblingblin* de hlan Jehovah.+ 18 Podọ olàn yetọn dona nọ lẹzun towe. E dona lẹzun towe kẹdẹdi akọ́nnu avọ́nunina he yè mimí lọ tọn podọ kẹdẹdi asá adusiwhé tọn etọn.+ 19 Nunina wiwe he Islaelivi lẹ na nọ na Jehovah lẹpo+ wẹ yẹn ko na hiẹ po visunnu towe lẹ po gọna viyọnnu towe lẹ taidi ahọsumẹ tẹgbẹ tọn de.+ Alẹnu ojẹ̀ tọn he na dẹn-to-aimẹ* de wẹ ehe yin to Jehovah nukọn na hiẹ po kúnkan towe po.”
20 Jehovah zindonukọn nado dọna Aalọn dọmọ: “Hiẹ ma na tindo ogú de to aigba Islaeli tọn ji gba, podọ mimá aigba lọ tọn de ma na lẹzun towe to ṣẹnṣẹn yetọn gba.+ Yẹn wẹ yin mimá towe podọ ogú towe to Islaelivi lẹ ṣẹnṣẹn.+
21 “Todin, doayi e go dọ yẹn ko na mado-ao lẹpo+ visunnu Levi tọn lẹ taidi ogú de to Islaeli, na sinsẹ̀nzọn he yé to wiwà wutu, yèdọ sinsẹ̀nzọn gòhọ opli tọn lọ tọn. 22 Omẹ Islaeli tọn lẹ ma sọgan sọ dọnsẹpọ gòhọ opli tọn lọ ba, eyin e ma yinmọ yé na hùwhẹ ylando tọn bo na kú. 23 Levinu lẹ wẹ na nọ penukundo sinsẹ̀nzọn gòhọ opli tọn lọ tọn go, podọ yewlẹ wẹ na nọ dogbè na nuṣiwa yetọn.+ Osẹ́ndoai he na dẹn-to-aimẹ de wẹ ehe yin na mì sọn whẹndo de ji jẹ whẹndo de ji dọ yé ma dona mọ nutindo de yí taidi ogú to Islaelivi lẹ ṣẹnṣẹn.+ 24 Na mado-ao he omẹ Islaeli tọn lẹ nọ na, yèdọ ehe yé na nọ yí do basi nunina hlan Jehovah wẹ yẹn ko na Levinu lẹ taidi ogú de. Enẹwutu wẹ yẹn do dọna yé dọ, ‘Yé ma dona mọ nutindo de yí taidi ogú to Islaelivi lẹ ṣẹnṣẹn.’”+
25 Enẹgodo, Jehovah dọna Mose dọmọ: 26 “Hiẹ dona dọna Levinu lẹ dọ, ‘Mìwlẹ na nọ mọ mado-ao he yẹn ko na mì yí sọn Islaelivi lẹ si taidi ogú mìtọn,+ podọ mì dona nọ basi nunina sọn e mẹ, yèdọ mado-ao mado-ao lọ tọn taidi nunina de hlan Jehovah.+ 27 E nasọ nọ yin pinpọnhlan di nunina mìtọn, yèdọ taidi likun he wá sọn likun-flétẹn+ mìtọn titi kavi taidi sinsẹ́n gigọ́ ovẹn kavi amì mìtọn titi he yin finfinyọ́n tọn. 28 Gbọnmọ dali, mìlọsu na nọ basi nunina de hlan Jehovah sọn mado-ao he mì mọyi sọn Islaelivi lẹ si lẹpo mẹ, podọ ehelẹ mẹ wẹ mìwlẹ na nọ desọn nado basi nunina hlan Jehovah gbọn Aalọn yẹwhenọ lọ gblamẹ. 29 Mì na nọ basi nunina wunmẹ lẹpo hlan Jehovah sọn adà dagbe tlala hugan nunina he yin nina mì lẹpo tọn+ mẹ taidi onú wiwe de.’
30 “Podọ hiẹ dona dọna yé dọ, ‘Eyin mìwlẹ yí adà dagbe hugan he to e mẹ lẹ do basi nunina, to whenẹnu, e na nọ yin pinpọnhlan taidi Levinu lẹ tọn, yèdọ taidi likun he wá sọn likun-flétẹn mìtọn titi podọ taidi sinsẹ́n ovẹn kavi amì mìtọn titi he yin finfinyọ́n tọn. 31 Mìwlẹ po whédo mìtọn po sọgan nọ dù sọn e mẹ to fidepope, na ahọsumẹ mìtọn wẹ e yin, na sinsẹ̀nzọn mìtọn to gòhọ opli tọn lọ mẹ wutu.+ 32 Mì ma na hùwhẹ ylando tọn to ehe mẹ, dile e na dẹnsọ bọ mì na nọ yí adà dagbe hugan he to e mẹ lẹ do basi nunina, podọ mìwlẹ ma dona nọ hẹn onú wiwe Islaelivi lẹ tọn lẹ flu, na mì nikaa kú.’”+
19 Jehovah sọ dọhona Mose po Aalọn po dọmọ: 2 “Osẹ́n de die he Jehovah ko degbe etọn, ‘Dọna Islaelivi lẹ dọ yé dona hẹn oyìnsi vẹẹ he to gángán de he ma tindo oblọ depope+ bọ zẹgẹ ma ko jẹ okọ̀ na ẹn pọ́n wá na we. 3 Mìwlẹ dona ze e na Eleazali yẹwhenọ lọ, ewọ nasọ hẹn ẹn jẹgbonu osla lọ tọn, bọ e na yin hùhù to nukọn etọn. 4 To whenẹnu, Eleazali yẹwhenọ lọ na yí alọviyẹyẹ etọn do yí vude to ohùn kanlin lọ tọn mẹ bo mimí ohùn lọ whla ṣinawe dohlan gòhọ opli tọn lọ nukọn tlọlọ.+ 5 Enẹgodo, oyìnsi lọ na yin mimẹ̀ to nukun etọn mẹ. Ayú etọn, olàn etọn po ohùn etọn po gọna omí etọn na yin mimẹ̀.+ 6 Yẹwhenọ lọ nasọ yí atin kedali tọn, hisọpu+ po avọ̀ vẹẹ ṣẹ́ṣẹ́ po bo bẹ yé dlan miyọ́n lọ he mẹ oyìnsi lọ to yinyin mimẹ̀ te. 7 To whenẹnu, yẹwhenọ lọ na yàn avọ̀ etọn lẹ bo lawu to osin mẹ, podọ to enẹgodo ewọ sọgan biọ osla lọ mẹ; ṣigba yẹwhenọ lọ na yin mawé kakajẹ whèjai.
8 “‘Mẹhe mẹ̀ oyìnsi lọ na yàn avọ̀ etọn lẹ to osin mẹ bo lawu to osin mẹ, ewọ nasọ yin mawé kakajẹ whèjai.
9 “‘Sunnu he tin to wiweji de na bẹ afín oyìnsi lọ tọn lẹ+ bo kọ̀n yé do fihe wé de to gbonu osla lọ tọn, pipli Islaelivi lẹ tọn nasọ hlá yé dai nado nọ yí yé do wleawuna osin he na nọ yin yiyizan na klọ́we.+ Avọ́nunina ylando tọn de wẹ. 10 Mẹhe bẹ afín oyìnsi lọ tọn lẹ pli na yàn avọ̀ etọn lẹ bo na yin mawé kakajẹ whèjai.
“‘Ehe na yin osẹ́ndoai he na dẹn-to-aimẹ de na Islaelivi lẹ po jonọ he nọ nọ̀ ṣẹnṣẹn yetọn lẹ po.+ 11 Mẹdepope he doalọ mẹkúkú depope* go na lẹzun mawé na azán ṣinawe.+ 12 Omẹ mọnkọtọn dona yí osin lọ do lẹ̀ ede wé to azán atọ̀ntọ gbè bo na lẹzun wiwe to azán ṣinawetọ gbè. Ṣigba, eyin e ma lẹ̀ ede wé to azán atọ̀ntọ gbè, e ma na lẹzun wiwe to azán ṣinawetọ gbè. 13 Mẹdepope he doalọ mẹkúkú depope* go bo ma lẹ̀ ede wé ko hẹn gòhọtúntún Jehovah tọn flu,+ podọ omẹ* enẹ dona yin sinsánsẹ* sọn Islaeli.+ Na osin klọ́we tọn+ lọ ma ko yin húnhúnhún do e ji wutu, ewọ gbẹ́ yin mawé. Mawé etọn gbẹ́ pò to okọ̀ na ẹn.
14 “‘Osẹ́n he na yin hihodo eyin mẹde kú to gòhọ de mẹ die: Mẹdepope he biọ gòhọ lọ mẹ podọ mẹdepope he ko tin to gòhọ lọ mẹ na lẹzun mawé na azán ṣinawe. 15 Nuhẹnnú depope he to hùnhùn bọ nùsu etọn ma yin biblá do onù na ẹn lẹzun mawé.+ 16 Mẹdepope he doalọ mẹhe yin hùhù gbọn ohí dali de kavi oṣiọ de kavi ohú mẹkúkú de tọn kavi yọdò de go to gbonu na lẹzun mawé na azán ṣinawe.+ 17 Na mẹhe yin mawé lọ, yé dona yí afín avọ́nunina ylando tọn he yin mimẹ̀ lọ tọn vude bo kọ̀n osin tọ̀sisa mẹ tọn do e ji to nuhẹnnú de mẹ. 18 To whenẹnu, sunnu he to wiweji+ de na yí hisọpu+ bo ylọn ẹn do osin lọ mẹ bosọ mimí in do gòhọ lọ ji, do nuhẹnnú lọ lẹpo ji, do mẹhe* tin to finẹ to whenue mẹlọ kú lẹ ji podọ do mẹhe doalọ ohú kavi mẹhe yin hùhù kavi oṣiọ kavi yọdò go lọ ji. 19 Mẹhe to wiweji lọ na mimí in do mẹhe lẹzun mawé lọ ji to azán atọ̀ntọ gbè, podọ to azán ṣinawetọ gbè bo na lẹ̀ ẹ wé sọn ylando mẹ to azán ṣinawetọ gbè;+ enẹgodo e na yàn avọ̀ etọn lẹ bo lawu to osin mẹ, podọ e na lẹzun wiwe to whèjai.
20 “‘Ṣigba, eyin sunnu de lẹzun mawé bo ma lẹ̀ ede wé, ewọ* dona yin sinsánsẹ* sọn pipli lọ mẹ,+ na e ko hẹn fiwiwe Jehovah tọn flu wutu. Na osin klọ́we tọn lọ ma yin húnhúnhún do ewọ ji wutu, ewọ gbẹ́ yin mawé.
21 “‘Nuhe na yin osẹ́ndoai he na dẹn-to-aimẹ de na yewlẹ die: Mẹhe mimí osin klọ́we tọn+ lọ dona yàn avọ̀ etọn lẹ, podọ mẹhe doalọ osin klọ́we tọn lọ go na lẹzun mawé kakajẹ whèjai. 22 Nudepope he go mẹhe yin mawé lọ doalọ na lẹzun mawé, podọ mẹhe* doalọ nulọ go na lẹzun mawé kakajẹ whèjai.’”+
20 To osun tintan mẹ, pipli Islaelivi lẹ tọn pete wá danfafa Zini tọn ji, bọ gbẹtọ lọ lẹ nọ nọ̀ Kadẹṣi.+ Finẹ wẹ Miliami+ kú bo yin dìdì do.
2 Todin, osin ma tin na pipli lọ,+ yé sọ bẹ yede pli dopọ sọta Mose po Aalọn po. 3 Gbẹtọ lọ lẹ sọ do whẹgbè hẹ Mose+ dọmọ: “E na ko pọnte na mí eyin mí ko kú to whenue nọvisunnu mítọn lẹ kú to Jehovah nukọn! 4 Naegbọn mìwlẹ do plan agun Jehovah tọn wá danfafa ehe ji, na míwlẹ po kanlin-yìnyìn mítọn lẹ po nido kú dofi?+ 5 Podọ naegbọn mìwlẹ do plan mí tọ́njẹgbonu sọn Egipti nado hẹn mí wá nọtẹn ylankan ehe?+ E ma yin nọtẹn de he yọ́n na jinukun, ovò sinsẹ́n, ovẹn sinsẹ́n po pomeglanate* lẹ po, podọ osin ma tin nado nù.”+ 6 To whenẹnu, Mose po Aalọn po tọ́n sọn agun lọ nukọn bo wá họntonu gòhọ opli tọn lọ tọn bo ṣinyọ́n nukunmẹ ai, gigo Jehovah tọn sọ jẹ awusọhia yé ji.+
7 Todin, Jehovah dọna Mose dọmọ: 8 “Ze opò lọ bo ylọ gbẹtọ lọ lẹ pli, yèdọ hiẹ po Aalọn nọvisunnu towe po, na mì ni dọhona osé lọ to nukun yetọn mẹ na e nido de osin tọ́n, hiẹ nasọ hẹn osin tọ́njẹgbonu na yé sọn osé lọ mẹ bo na pipli lọ po kanlin-yìnyìn yetọn lẹ po nado nù.”+
9 Enẹwutu, Mose ze opò lọ sọn Jehovah nukọn,+ kẹdẹdile Ewọ ko degbe etọn na ẹn do. 10 Enẹgodo, Mose po Aalọn po ylọ gbẹtọgun lọ pli do osé lọ kọ̀n, ewọ sọ dọna yé dọmọ: “Todin, mì dotoai, mì atẹṣitọ lẹ! Be míwlẹ ni hẹn osin tọ́njẹgbonu na mì sọn osé ehe mẹ wẹ?”+ 11 To whenẹnu, Mose ze alọ etọn daga bo yí opò etọn do linú osé lọ whla awe, osin susu sọ jẹ kinkọnjẹgbonu ji bọ pipli lọ po kanlin-yìnyìn yetọn lẹ po jẹ nùnù ji.+
12 To godo mẹ, Jehovah dọna Mose po Aalọn po dọmọ: “Na mìwlẹ ma do yise hia to yẹn mẹ bo klan mi do wiwe to nukun Islaelivi lẹ tọn mẹ wutu, mì ma na plan gbẹtọgun ehe yì aigba he yẹn to na na yé lọ ji gba.”+ 13 Osin Mẹliba* tọn lẹ niyẹn,+ yèdọ fihe Islaelivi lẹ do whẹgbè hẹ Jehovah te bọ ewọ yin kinklandowiwe to ṣẹnṣẹn yetọn.
14 Enẹgodo, Mose do wẹnsagun lẹ hlan sọn Kadẹṣi yì ahọlu Edomi tọn dè+ nado dọna ẹn dọmọ: “Nuhe nọvisunnu towe Islaeli+ dọ die, ‘Hiẹ yọ́n ninọmẹ sinsinyẹn he mẹ mí ko jugbọn lẹpo ganji. 15 Tọgbo mítọn lẹ yì Egipti+ bọ mí nọ Egipti na owhe* susu,+ Egiptinu lẹ sọ doyana míwlẹ po tọgbo mítọn lẹ po.+ 16 To godo mẹ, mí dawhá ylọ Jehovah,+ bọ ewọ sè awhágbe mítọn bo do angẹli de hlan+ bosọ plan mí tọ́njẹgbonu sọn Egipti, todin míwlẹ to Kadẹṣi tofi, yèdọ tòdaho de he pé dogbó hẹ aigba towe. 17 Jaale, dike mí ni gbọn aigba towe ji wayi. Mí ma na gbọn ogle kavi vẹngle depope mẹ gba, podọ mí ma na nù osin dotọ̀ depope tọn. Mí na gbọn Aliho Ahọlu tọn ji bo ma na lẹhlan adusi kavi amiyọn kaka mí nado gbọn aigba towe ji wayi.’”+
18 Ṣigba, Edomi dọna ẹn dọmọ: “Hiẹ ma hà bo gbọn aigba mítọn ji wayi. E ma yinmọ, yẹn na tọ́n pé we po ohí po.” 19 Islaelivi lẹ sọ gblọnna ẹn dọmọ: “Alihogbó lọ ji wẹ mí na gbọn hẹji yì, podọ eyin míwlẹ po kanlin-yìnyìn mítọn lẹ po nù osin towe, mí na suahọ etọn.+ Mí ma to nudevo de biọ hú nado zinzọnlin gbọn finẹ wayi poun.”+ 20 Etomọṣo, ewọ dọmọ: “Hiẹ ma hà bo gbọn fi wayi.”+ To whenẹnu, Edomi tọ́n po gbẹtọgun daho de po gọna awhànpa* huhlọnnọ de nado wá pé e. 21 Gbọnmọ dali, Edomi ma dike Islaeli ni gbọn aigba etọn ji wayi; enẹwutu, Islaeli lẹ́ sọn e dè.”+
22 Omẹ Islaeli tọn lẹ, yèdọ pipli lọ pete sẹtẹn sọn Kadẹṣi bo wá Osó Họli kọ̀n.+ 23 To whenẹnu, Jehovah dọna Mose po Aalọn po to Osó Họli kọ̀n to dogbó aigba Edomi tọn ji dọmọ: 24 “Aalọn na yin dìdì taidi tọgbo etọn lẹ.*+ Ewọ ma na yì aigba lọ he yẹn to na na Islaelivi lẹ ji gba, na mì omẹ awe lẹ ṣiatẹ sọta gbedide ṣie gando osin Mẹliba tọn lẹ go.+ 25 Plan Aalọn po visunnu etọn Eleazali po bo hẹn yé hẹji wá Osó Họli ji. 26 De awù Aalọn tọn lẹ+ sọn okọ̀ na ẹn bo do yé na Eleazali+ visunnu etọn, Aalọn nasọ kú to finẹ.”
27 Enẹwutu, Mose wà kẹdẹdile Jehovah ko degbe etọn do, yé sọ hẹji yì Osó Họli ji to nukun pipli lọ pete tọn mẹ. 28 To whenẹnu, Mose de awù Aalọn tọn lẹ sọn okọ̀ na ẹn bo do yé na Eleazali visunnu etọn. Enẹgodo, Aalọn kú to finẹ to osó lọ ji.+ Mose po Eleazali po sọ jẹte sọn osó lọ ji. 29 To whenue pipli lọ pete mọdọ Aalọn ko kú, whédo Islaeli tọn blebu ví Aalọn na azán 30.+
21 To whenue Kenaninu lọ, yèdọ ahọlu Aladi tọn+ he nọ nọ̀ Negẹb sè dọ Islaeli ko gbọn aliho Atalimi tọn wá, e tọ́navùn Islaeli bo wle delẹ to yé mẹ taidi kanlinmọ. 2 Enẹwutu, Islaeli dopà na Jehovah dọmọ: “Eyin hiẹ jo omẹ ehelẹ do alọ ṣie mẹ, na nugbo tọn, yẹn na và tòdaho yetọn lẹ sudo.” 3 To whenẹnu, Jehovah dotoaina ogbè Islaeli tọn bo jo Kenaninu lẹ do alọ yetọn mẹ bọ yé và yewlẹ po tòdaho yetọn lẹ po sudo. Enẹwutu, yé ylọ oyín filọ tọn dọ Họlma.*+
4 Dile yé zindonukọn to gbejizọnlin yetọn mẹ sọn Osó Họli kọ̀n+ bo gbọn aliho Ohù Vẹẹ tọn lọ ma nado gbọn aigba Edomi tọn ji,+ agbọ́pe gbẹtọ lọ lẹ* na gbejizọnlin lọ wutu. 5 Gbẹtọ lọ lẹ sọ jẹ homọdọdo Jiwheyẹwhe po Mose po go ji+ dọmọ: “Naegbọn mìwlẹ do plan mí tọ́njẹgbonu sọn Egipti nado wá kú to danfafa ji? Núdùdù po osin po ma tin tofi,+ podọ akla madota ehe ko ṣì mí* pete.+ 6 Enẹwutu, Jehovah do odàn adínọ* lẹ hlan gbẹtọ lọ lẹ ṣẹnṣẹn bọ yé jẹ adúhẹn gbẹtọ lọ lẹ ji, sọmọ bọ Islaelivi susu wẹ kú.+
7 To whenẹnu, gbẹtọ lọ lẹ wá Mose dè bo dọmọ: “Mí ko waylando to whenuena mí mọhodọdo Jehovah go podọ do hiẹ go.+ Vẹvẹna Jehovah do ota mítọn mẹ, na ewọ nido de odàn lọ lẹ sẹ̀ sọn ṣẹnṣẹn mítọn.” Mose sọ vẹvẹ do ota gbẹtọ lọ lẹ tọn mẹ.+ 8 Enẹgodo, Jehovah dọna Mose dọmọ: “Basi yẹblẹ odàn adínọ* tọn de bo ze e plá do pòtin de go. To whenẹnu, eyin odàn lọ lẹ dù mẹde, mẹlọ dona pọ́n ẹn hlan nado nọgbẹ̀.” 9 To afọdopolọji, Mose basi odàn gànvẹẹ tọn+ de bo ze e plá do pòtin lọ go,+ bọ eyin odàn de dù mẹde bọ mẹlọ pọ́n odàn gànvẹẹ tọn lọ hlan, ewọ nọ gán.+
10 Enẹgodo, Islaelivi lẹ sẹtẹn sọn finẹ bo yì dosla do Oboti.+ 11 To godo mẹ, yé sẹtẹn sọn Oboti bo yì dosla do Iye-abalimi,+ to danfafa he pannukọn Moabi ji, to whèzẹtẹn-waji. 12 Sọn finẹ, yé sẹtẹn bo yì dosla do Agbàdo* Zeledi tọn tó.+ 13 Sọn finẹ, yé sẹtẹn bo yì dosla do agbegbe Alnọni tọn ji,+ ehe tin to danfafa he dlẹnkan sọn dogbó Amolinu lẹ tọn ji, na Alnọni wẹ yin dogbó Moabi tọn, to Moabi po Amolinu lẹ po ṣẹnṣẹn. 14 Enẹwutu wẹ owe Awhàn Jehovah tọn lẹ tọn do dlẹnalọdo “Vahẹbi he to Sufa po agbàdo* Alnọni tọn lẹ po, 15 gọna dòdòmẹ* agbàdo* lọ lẹ tọn, he dlẹnkan yì lẹdo Al tọn mẹ bo pé do dogbó Moabi tọn nù.”
16 Enẹgodo, yé sẹtẹn yì Beẹli. Ehe wẹ dotọ̀ he Jehovah dọho etọn na Mose dọmọ: “Bẹ gbẹtọ lọ lẹ pli, bo gbọ yẹn ni na osin yé.”
17 To ojlẹ enẹ mẹ, Islaeli jihàn ehe dọmọ:
“Túntún jẹgbonu, hiẹ dotọ̀ E!—Mì yihàn na ẹn!
18 Dotọ̀ lọ he ahọvi lẹ kùn, bọ omẹ nukundeji gbẹtọgun lọ tọn lẹ sọ kùn,
Gbọn opò gbedide tọn de po opò yetọn titi lẹ po yiyizan gblamẹ.”
To whenẹnu, yé sẹtẹn sọn danfafa lọ ji yì Matana, 19 sọn Matana yì Nahalieli, podọ sọn Nahalieli yì Bamoti.+ 20 Yé sẹtẹn sọn Bamoti yì agbàdo he tin to aigba* Moabi tọn ji,+ to aga Pisga tọn,+ fie yè sọgan mọ Jeṣimọni* hlan dòdòmẹ te.+
21 Todin, Islaeli do wẹnsagun lẹ hlan Sihọni, ahọlu Amolinu lẹ tọn dọmọ:+ 22 “Dike mí ni gbọn aigba towe ji wayi. Mí ma na lẹhlan ogle kavi vẹngle depope mẹ gba. Mí ma na nù osin dotọ̀ depope tọn. Mí na gbọn Aliho Ahọlu tọn kaka mí nado gbọn aigba towe ji wayi.”+ 23 Ṣigba, Sihọni ma dike Islaeli ni gbọn aigba etọn ji wayi. Kakatimọ, Sihọni bẹ omẹ etọn lẹpo pli dopọ bo tọ́nyi nado tọ́nawhàn Islaeli to danfafa ji, ewọ sọ wá Jahazi bo jẹ avùnho hẹ Islaeli ji.+ 24 Ṣigba, Islaeli yí ohí do gbawhàn etọn+ bo yí aigba etọn+ sọn Alnọni+ jẹ Jabọki,+ sẹpọ Amọninu lẹ, na Jazẹli+ wẹ yin dogbó aigba Amọninu lẹ tọn.+
25 Gbọnmọ dali, Islaeli yí tòdaho ehe lẹpo, yé sọ nọ nọ̀ tòdaho Amolinu lẹ tọn lẹpo mẹ,+ to Hẹṣbọni po tòpẹvi he to oglọ na ẹn* lẹpo po. 26 Na Hẹṣbọni wẹ yin tòdaho Sihọni, ahọlu Amolinu lẹ tọn tọn, mẹhe ko hoavùn hẹ ahọlu Moabi tọn bo ko yí aigba etọn lẹpo kaka yì Alnọni. 27 Enẹ wẹ hẹn hogbe milomilo mẹṣanko tọn lọ wá dọmọ:
“Wá Hẹṣbọni.
Gbọ tòdaho Sihọni tọn ni yin didoai bo hẹnai gligli.
28 Na miyọ́n de tọ́n sọn Hẹṣbọni, yèdọ miyọ́n he to jiji de sọn tòpẹvi Sihọni tọn mẹ.
E ko fiọ Al Moabi tọn, yèdọ omẹ nukundeji he nọ nọ̀ ofi yiaga Alnọni tọn lẹ.
29 Dindọn hlan we, Moabi! Mì na yin vivasudo, mì omẹ Kemọṣi+ tọn lẹ emi!
E hẹn visunnu etọn lẹ zun mẹhe họ̀njẹgbé podọ viyọnnu etọn lẹ zun kanlinmọ Sihọni, ahọlu Amolinu lẹ tọn.
30 Gbọ mí ni tọ́navùn yé;
Hẹṣbọni na yin vivasudo kaka yì Dibọni;+
Gbọ mí ni hẹn ẹn jẹvọ́ kaka yì Nofa;
Miyọ́n na dlẹnkan kaka yì Medeba.”+
31 Enẹwutu, Islaeli nọ nọ̀ aigba Amolinu lẹ tọn ji. 32 To whenẹnu, Mose do sunnu delẹ hlan nado yì bẹ̀ Jazẹli+ pọ́n. Yé sọ yí tòpẹvi he to oglọ na ẹn* lẹ bo yàn Amolinu he nọ nọ̀ finẹ lẹ sẹ̀. 33 Enẹgodo, yé lẹ́ bo hẹji dedo gbọn aliho Baṣani tọn ji. Ogi+ ahọlu Baṣani tọn sọ tọ́n wá pé yé po omẹ etọn lẹpo po nado funawhàn hẹ yé to Edlẹi.+ 34 Jehovah sọ dọna Mose dọmọ: “A dibuna ẹn blo,+ na yẹn na jo ewọ, omẹ etọn lẹpo, po aigba etọn po do alọ towe mẹ,+ bọ hiẹ na wà na ẹn kẹdẹdile hiẹ ko wà na Sihọni ahọlu Amolinu lẹ tọn he nọ nọ̀ Hẹṣbọni do.”+ 35 Enẹwutu, yé hù ewọ po visunnu etọn lẹ po gọna omẹ etọn lẹpo, sọmọ bọ depope to omẹ etọn lẹ mẹ ma pò,+ bọ yé sọ yí aigba etọn.+
22 Enẹgodo, Islaelivi lẹ sẹtẹn bo yì dosla do danfafa Moabi tọn ji to Jọdani godo pannukọn Jẹliko.+ 2 Todin, Balaki+ visunnu Zipọli tọn mọ nulọ lẹpo he Islaeli ko wà na Amolinu lẹ, 3 obu sọ jẹ Moabi ji sinsinyẹn na gbẹtọ lọ lẹ tọn wutu, na yé sù taun; na nugbo tọn, Moabi jẹ sisọsisọ ji na Islaelivi lẹ tọn wutu.+ 4 Enẹwutu, Moabi dọna mẹho Midiani+ tọn lẹ dọmọ: “Todin, gbẹtọgun ehe na gbidi lẹdo mítọn pete sẹ̀, kẹdẹdile oyìnsú de nọ gbidi ogbé sẹ̀ to danji do.”
Balaki visunnu Zipọli tọn wẹ yin ahọlu Moabi tọn to ojlẹ enẹ mẹ. 5 Ewọ sọ do wẹnsagun lẹ hlan Balaami visunnu Beoli tọn to Petoli,+ he ma dẹn do Tọ̀sisa* he tin to otò he mẹ e yin jiji te. E dowẹn hlan ẹn dọmọ: “Pọ́n! Akọta de wá sọn Egipti. Pọ́n! Yé ko gọ́ nukunmẹ aigba tọn ji,+ podọ nukọn ṣie fi wẹ yé nọ nọ̀. 6 Todin, jaale wá bo hodẹ̀do omẹ ehelẹ na mi,+ na yé yin huhlọnnọ hú mi. Vlavo yẹn sọgan gbawhàn yetọn bo yàn yé sọn aigba lọ ji, na yẹn yọnẹn ganji dọ mẹhe hiẹ dona nọ yin didona podọ mẹhe hiẹ hodẹ̀do nọ yin dẹ̀hodo.”
7 Enẹwutu, mẹho Moabi tọn lẹ po mẹho Midiani tọn lẹ po zingbejizọnlin yì Balaami+ dè bo hẹn nuhe yé na yí do suahọ dọṣẹdidọ lọ tọn lẹ bosọ do owẹ̀n Balaki tọn na ẹn. 8 To whenẹnu, ewọ dọna yé dọmọ: “Mì dọ́ fi, yẹn nasọ hẹn nudepope he Jehovah dọna mi zun yinyọnẹn na mì.” Enẹwutu, ahọvi Moabi tọn lẹ nọ Balaami dè.
9 Enẹgodo, Jiwheyẹwhe wá Balaami dè bo dọmọ:+ “Mẹnu wẹ sunnu he tin to dè we ehelẹ?” 10 Balaami dọna Jiwheyẹwhe nugbo lọ dọmọ: “Balaki visunnu Zipọli tọn, yèdọ ahọlu Moabi tọn wẹ dowẹn hlan mi dọ, 11 ‘Pọ́n! Akọta de wá sọn Egipti bo gọ́ nukunmẹ aigba tọn ji. Todin, wá bo hodẹ̀do yé na mi.+ Vlavo yẹn na penugo nado hoavùn hẹ yé bo yàn yé sẹ̀.’” 12 Ṣigba, Jiwheyẹwhe dọna Balaami dọmọ: “Hiẹ ma dona hodo yé yì. Hiẹ masọ dona hodẹ̀do mẹlọ lẹ, na yé ko yin didona.”+
13 Balaami sọ fọ́n to afọnnu bo dọna ahọvi Balaki tọn lẹ dọmọ: “Mì lẹkọyi otò mìtọn mẹ, na Jehovah ko gbẹ́ na mi nado hodo mì yì.” 14 Enẹwutu, ahọvi Moabi tọn lẹ dedo bo lẹkọyi Balaki dè bosọ dọmọ: “Balaami gbẹ́ nado hodo mí wá.”
15 Ṣigba, Balaki sọ vọ́ do ahọvi devo lẹ hlan, bọ yé sù bo diyin taun hú pipli tintan tọn. 16 Yé wá Balaami dè bo dọna ẹn dọmọ: “Nuhe Balaki visunnu Zipọli tọn dọ die, ‘Jaale, a dike nudepope glọnalina we nado wá dè e blo, 17 na yẹn na doyẹyigona we taun, podọ yẹn na wà nudepope he hiẹ na biọ dọ yẹn ni wà. Enẹwutu, jaale wá bo hodẹ̀do omẹ ehelẹ na mi.’” 18 Ṣigba, Balaami gblọnna devi Balaki tọn lẹ dọmọ: “Eyin Balaki tlẹ na mi owhé etọn titi bọ fataka po sika po gọ́ e mẹ, yẹn ma sọgan wà nudepope zẹ̀ gbedide Jehovah Jiwheyẹwhe ṣie tọn go, vlavo onú pẹvi kavi daho.+ 19 Ṣigba, mì jaale, mìlọsu ni nọfi to ozán ehe mẹ, na yẹn nido sè nudevo he Jehovah na dọna mi.”+
20 To whenẹnu, Jiwheyẹwhe wá Balaami dè to zánmẹ bo dọna ẹn dọmọ: “Eyin yiylọ we gbé wẹ sunnu ehelẹ wá, hodo yé yì. Ṣigba, nuhe yẹn dọna we nado dọ lẹ kẹdẹ wẹ hiẹ dona dọ.”+ 21 Enẹwutu, Balaami fọ́n to afọnnu bo wleawuna kẹtẹkẹtẹ* etọn bosọ hodo ahọvi Moabi tọn lọ lẹ.+
22 Ṣigba, Jiwheyẹwhe gblehomẹ sinsinyẹn, na ewọ dedo wutu, angẹli Jehovah tọn sọ ṣite to aliho lọ ji nado glọnalina ẹn. Nalete, Balaami to kẹtẹkẹtẹ etọn ji bọ awe to devizọnwatọ etọn lẹ mẹ zọnhẹ ẹ. 23 Podọ to whenue kẹtẹkẹtẹ lọ mọdọ angẹli Jehovah tọn ṣite to aliho lọ ji bo ko dọ̀n ohí etọn sún do alọmẹ, e tẹnpọn nado zẹ̀ sọn aliho lọ ji biọ glemẹ. Ṣigba, Balaami jẹ nuli kẹtẹkẹtẹ lọ ji nado gọkọna ẹn wá aliji. 24 Enẹgodo, angẹli Jehovah tọn ṣite to aliho bibó he tin to vẹngle awe ṣẹnṣẹn ji, bọ adó zannu tọn tin to awà dopodopo ji. 25 To whenue kẹtẹkẹtẹ lọ mọ angẹli Jehovah tọn, e jẹ ede tintlin do adó lọ go ji bosọ finyọ́n afọ Balaami tọn do adó lọ go, Balaami sọ vọ́ jẹ nuli i ji.
26 Todin, angẹli Jehovah tọn sọ yinukọn pẹẹde bo ṣite to ofi bibó de, fihe aliho depope ma tin te nado lẹhlan adusi kavi amiyọn. 27 To whenue kẹtẹkẹtẹ lọ mọ angẹli Jehovah tọn, e họ́ mlọnai to oglọ na Balaami, enẹwutu Balaami biọ adi mẹ sinsinyẹn bo yí opò etọn do to nuli kẹtẹkẹtẹ lọ mapote. 28 To godo mẹ, Jehovah hẹn kẹtẹkẹtẹ lọ nado dọho,*+ bọ e dọna Balaami dọmọ: “Etẹwẹ yẹn wà na we bọ a do linú mi whla atọ̀n ehelẹ?”+ 29 Balaami gblọnna kẹtẹkẹtẹ lọ dọmọ: “Na hiẹ ko yí mi do davlẹ wutu wẹ. Eyin ohí de ko to alọmẹ na mi wẹ, yẹn na ko hù we!” 30 Kẹtẹkẹtẹ lọ sọ dọna Balaami dọmọ: “Be e ma yin kẹtẹkẹtẹ towe he hiẹ ko kùn to gbẹzan towe lẹpo mẹ kakajẹ egbé wẹ yẹn yin ya? Be yẹn ko yinuwa hẹ we domọ pọ́n wẹ ya?” Ewọ gblọnna ẹn dọmọ: “Lala!” 31 Jehovah sọ hùn nukun Balaami tọn lẹ+ bọ e mọ angẹli Jehovah tọn ṣite to aliho lọ ji bo ko dọ̀n ohí etọn sún do alọmẹ. To afọdopolọji, e dẹ́ do odò bo ṣinyọ́n nukunmẹ ai.
32 To whenẹnu, angẹli Jehovah tọn dọna ẹn dọmọ: “Naegbọn hiẹ do linú kẹtẹkẹtẹ towe whla atọ̀n ehelẹ? Pọ́n! Yẹnlọsu wẹ tọ́n wá nado glọnalina we, na aliho towe jẹagọdo ojlo ṣie wutu.+ 33 Kẹtẹkẹtẹ lọ mọ mi bo tẹnpọn nado zẹ̀ sọn dè e whla atọ̀n ehelẹ.+ Mí ni dọ dọ e ma ko zẹ̀ sọn dè e wẹ! Yẹn na ko hù we bo pò kẹtẹkẹtẹ lọ dogbẹ̀.” 34 Balaami sọ dọna angẹli Jehovah tọn dọmọ: “Yẹn ko waylando, na yẹn ma yọnẹn dọ hiẹ wẹ ṣite to aliho lọ ji nado pé mi. Todin, eyin e ma sọgbe to nukun towe mẹ, yẹn na gọ̀dogodo.” 35 Ṣigba, angẹli Jehovah tọn dọna Balaami dọmọ: “Hodo dawe lọ lẹ yì, amọ́ nuhe yẹn dọna we lẹ kẹdẹ wẹ hiẹ dona dọ.” Enẹwutu, Balaami zindonukọn po ahọvi Balaki tọn lọ lẹ po.
36 To whenue Balaki sè dọ Balaami ko wá, e tọ́nyi to afọdopolọji nado yì pé e to tòdaho Moabi tọn mẹ, ehe tin to Alnọni tó to dogbó aigba lọ tọn ji. 37 Balaki sọ dọna Balaami dọmọ: “Be e ma yin yẹn wẹ dowẹn hlan we ya? Naegbọn hiẹ ma do wá dè e? Be hiẹ lẹndọ yẹn ma penugo nado doyẹyigona we taun wẹ?”+ 38 Balaami gblọnna Balaki dọmọ: “Eyọn, n’ko wá dè we todin. Ṣigba, be dotẹnmẹ na yin nina mi nado dọ nudepope ya? Nuhe Jiwheyẹwhe zedo nùmẹ na mi lẹ kẹdẹ wẹ yẹn sọgan dọ.”+
39 Enẹwutu, Balaami hodo Balaki, bọ yé yì Kiliati-huzọti. 40 Balaki yí oyìn lẹ po lẹngbọ lẹ po do sanvọ́ bo do apadewhe yetọn hlan Balaami po ahọvi he tin to e dè lẹ po. 41 To afọnnu, Balaki plan Balaami bo hẹn ẹn hẹji yì Bamoti-baali; sọn finẹ, ewọ sọgan mọ gbẹtọ lọ lẹpo hlan.+
23 Whenẹnu, Balaami dọna Balaki dọmọ: “Do agbà ṣinawe ai dofi,+ bo wleawu oyìnsú ṣinawe po agbò ṣinawe po tọn na mi.” 2 To afọdopolọji, Balaki basi kẹdẹdile Balaami ko dọ do. Balaki po Balaami po sọ yí oyìnsú dopo po agbò dopo po do sanvọ́ to agbà lọ lẹ dopodopo ji.+ 3 Balaami sọ dọna Balaki dọmọ: “Gbọṣi avọ́nunina mimẹ̀ towe kọ̀n tofi, na yẹn ni yì dọ́n. Vlavo Jehovah na sọawuhia mi. Nudepope he ewọ na dọna mi, yẹn na dọna we.” Enẹwutu, ewọ yì okọ́ta gbọgbé de ji.
4 Whenẹnu, Jiwheyẹwhe sọawuhia Balaami+ bọ ewọ dọna Ẹn dọmọ: “Yẹn ko wleawuna agbà ṣinawe lọ lẹ to aliho debọdo-dego tọn mẹ, podọ yẹn ko yí oyìnsú dopo po agbò dopo po do sanvọ́ to agbà lọ lẹ dopodopo ji.” 5 Jehovah sọ ze ohó ehe do nùmẹ na Balaami dọmọ:+ “Lẹkọyi Balaki dè, podọ nuhe hiẹ dona dọna ẹn die.” 6 Ewọ sọ lẹkọyi bo mọdọ Balaki po ahọvi Moabi tọn lẹpo po to ote to avọ́nunina mimẹ̀ etọn kọ̀n. 7 Whenẹnu, e dọ ohó milomilo ehe dọmọ:+
“Balaki ahọlu Moabi tọn plan mi wá sọn Alami,+
Sọn osó whèzẹtẹn tọn lẹ ji dọ:
‘Wá hodẹ̀do Jakọbu na mi.
Mọwẹ, wá donù Islaeli.’+
8 Nawẹ yẹn sọgan hodẹ̀do mẹhe Jiwheyẹwhe ma hodẹ̀do lẹ gbọn?
Podọ nawẹ yẹn sọgan donù mẹhe Jehovah ma donù lẹ gbọn?+
9 Osé lẹ ji aga wẹ yẹn to mimọ yé hlan sọn,
Podọ okọ́ta lẹ ji wẹ yẹn to mimọ yé hlan sọn.
10 Mẹnu wẹ sọgan hia gbẹtọgun Jakọbu tọn he sù di kọ́gudu+
Kavi tlẹ hia mado-ẹnẹ Islaeli tọn?
Gbọ yẹn* ni kú okú nugbonọ tọn,
Bosọ gbọ opodo ṣie ni taidi yewlẹ tọn.”
11 Whenẹnu, Balaki dọna Balaami dọmọ: “Etẹ die he hiẹ wà do mi? Yẹn plan we wá nado hodẹ̀do kẹntọ ṣie lẹ, ṣigba hiẹ ma wà nudevo hú nado dona yé.”+ 12 Ewọ gblọn dọmọ: “Be e ma yin nudepope he Jehovah zedo nùmẹ na mi wẹ yẹn dona dọ ya?”+
13 Balaki dọna ẹn dọmọ: “Jaale, hodo mi yì fidevo he hiẹ sọgan mọ yé hlan te. Hiẹ na mọ vude poun to yé mẹ; hiẹ ma na mọ yemẹpo gba. Hodẹ̀do yé na mi sọn finẹ.”+ 14 Enẹwutu, e plan ẹn yì aigba Zofimi tọn ji, to aga Pisga tọn,+ bo do agbà ṣinawe ai bosọ yí oyìnsú dopo po agbò dopo po do sanvọ́ to agbà lọ lẹ dopodopo ji.+ 15 Whenẹnu, Balaami dọna Balaki dọmọ: “Gbọṣi avọ́nunina mimẹ̀ towe kọ̀n tofi, na yẹn ni yì dọho hẹ Ewọ to dọ́n.” 16 Jehovah sọ sọawuhia Balaami bo ze ohó ehe do nùmẹ na ẹn dọmọ:+ Lẹkọyi Balaki dè, podọ nuhe hiẹ dona dọna ẹn die.” 17 E sọ yì e dè bo mọdọ ewọ to ote to avọ́nunina mimẹ̀ etọn kọ̀n, bọ ahọvi Moabi tọn lẹ tin to e dè. Balaki sọ kanse e dọmọ: “Etẹwẹ Jehovah dọ?” 18 To whenẹnu, e dọ ohó milomilo ehe dọmọ:+
“Fọnṣite, Balaki, bo dotoai.
Sè ohó ṣie, hiẹ visunnu Zipọli tọn E.
Eyin ewọ dọ nude, be e ma na wà ẹ wẹ?
Eyin ewọ dọho, be e ma na hẹn ẹn di wẹ?+
21 Ewọ ma nọ na dotẹnmẹ huhlọn nujijlẹ tọn depope sọta Jakọbu,
Podọ e ma nọ dike tukla depope ni wá Islaeli ji.
Jehovah Jiwheyẹwhe etọn tin hẹ yé,+
Podọ ewọ nọ yin pipà po ogbè lélé po taidi ahọlu to ṣẹnṣẹn yetọn.
22 Jiwheyẹwhe wẹ to pinplan yé tọ́njẹgbonu sọn Egipti.+
Ewọ taidi azò oyìnsú gbémẹ tọn de tọn lẹ na yé.+
To ojlẹ ehe mẹ, e sọgan yin didọ gando Jakọbu po Islaeli po go dọ:
‘Pọ́n nuhe Jiwheyẹwhe ko wà!’
24 Akọta de die he na fọ́n taidi kinnikinni de,
E nasọ ze ede daga taidi kinnikinni.+
E ma na mlọnai kaka e nado dù nuhe e wle
Bosọ nù ohùn mẹhe yin hùhù lẹ tọn.”
25 Enẹgodo, Balaki dọna Balaami dọmọ: “Eyin hiẹ ma sọgan hodẹ̀do e to alọ de mẹ, be to alọ devo mẹ, mọjanwẹ hiẹ ma dona sọ dona ẹn do niyẹn.” 26 Balaami gblọnna Balaki dọmọ: “Be yẹn ma ko dọna we dọ, ‘Nuhe Jehovah dọ lẹpo wẹ yẹn na wà’ ya?”+
27 Balaki sọ dọna Balaami dọmọ: “Jaale, wá bo gbọ yẹn nisọ plan we yì fidevo. Vlavo e na sọgbe to nukun Jiwheyẹwhe nugbo lọ tọn mẹ dọ hiẹ ni hodẹ̀do e na mi sọn finẹ.”+ 28 Enẹwutu, Balaki plan Balaami yiaga Peọli tọn, fihe pannukọn Jeṣimọni.*+ 29 Whenẹnu, Balaami dọna Balaki dọmọ: “Do agbà ṣinawe ai dofi, bo wleawu oyìnsú ṣinawe po agbò ṣinawe po tọn na mi.”+ 30 Balaki sọ basi kẹdẹdile Balaami ko dọ do, podọ ewọ yí oyìnsú dopo po agbò dopo po do sanvọ́ to agbà lọ lẹ dopodopo ji.
24 To whenue Balaami mọdọ homẹhun Jehovah* nado dona Islaeli, e masọ lẹkọyi nado dín dọṣẹ ylankan lẹ ba,+ ṣigba e lilẹ́ pànta danfafa ji. 2 To whenue Balaami ze nukun etọn lẹ daga bo mọ Islaeli dosla sọgbe hẹ hẹnnu etọn lẹ,+ to whenẹnu gbigbọ Jiwheyẹwhe tọn wá e ji.+ 3 Ewọ sọ dọ ohó milomilo ehe dọmọ:+
“Ohó Balaami visunnu Beoli tọn,
Podọ ohó dawe de, he nukun etọn lẹ ko yin hùnhùn tọn,
4 Ohó mẹlọ he to ohó Jiwheyẹwhe tọn sè tọn,
Mẹhe mọ numimọ Ganhunupotọ lọ tọn,
Mẹhe dẹ̀ do odò bọ nukun etọn lẹ to hùnhùn:+
5 Lehe gòhọ towe lẹ yọnwhanpẹ do sọ, hiẹ Jakọbu E,
Podọ gòhọtúntún towe lẹ, hiẹ Islaeli E!+
6 Yé dlẹnkan yinukọn taun taidi agbàdo* lẹ,+
Taidi jipa lẹ to tọ̀sisa tó,
Taidi atin aloẹsi tọn lẹ he Jehovah ko do,
Taidi kedali lẹ to osin tó.
7 Osin nọ to kùnkùn sọn sindànu ayúnọ etọn awe lẹ mẹ,
8 Jiwheyẹwhe wẹ to pinplan ẹn tọ́njẹgbonu sọn Egipti;
Ewọ taidi azò oyìnsú gbémẹ tọn de tọn lẹ na yé.
Ewọ na dù akọta lẹ sudo, yèdọ kọgbidinamẹtọ etọn lẹ,+
Podọ ohú yetọn lẹ wẹ e na gbà, e nasọ yí ogá etọn lẹ do gbà yé hányán.
9 Ewọ ko fẹ̀ yìdo, e ko mlọnai taidi kinnikinni,
Podọ taidi kinnikinni de, mẹnu wẹ na gboadọ bo na fọ́n ẹn?
Donanọ wẹ mẹhe dona we lẹ,
Podọ mẹhodẹ̀do wẹ mẹhe hodẹ̀do we lẹ.”+
10 Whenẹnu, Balaki gblehomẹ sinsinyẹn do Balaami go. Balaki sọ gbọn mẹṣanko dali hopẹ́ bo dọna Balaami dọmọ: “Nado hodẹ̀do kẹntọ ṣie lẹ wutu wẹ yẹn do ylọ we,+ ṣigba todin hiẹ ma wà nudevo hú nado dona yé whla atọ̀n ehelẹ. 11 Eya, yawu lẹkọyi whé. Yẹn lẹn nado doyẹyigona we taun dai,+ ṣigba pọ́n! Jehovah ko tẹ̀ yẹyi we.”
12 Balaami sọ gblọnna Balaki dọmọ: “Be yẹn ma ko dọna wẹnsagun he hiẹ dohlan lẹ dọ, 13 ‘Eyin Balaki tlẹ na mi owhé etọn bọ fataka po sika po gọ́ e mẹ, yẹn ma sọgan wà nudepope sọn ojlo* ṣie titi mẹ zẹ̀ gbedide Jehovah tọn go, vlavo nudagbe kavi ylankan. Nuhe Jehovah na dọna mi kẹdẹ wẹ yẹn na dọ’ ya?+ 14 Todin, yẹn jei omẹ ṣie lẹ dè. Wá ma fìn nuhe omẹ ehelẹ na wà na omẹ towe lẹ to sọgodo* dọna we.” 15 Enẹwutu, e dọ ohó milomilo ehe dọmọ:+
“Ohó Balaami visunnu Beoli tọn,
Podọ ohó dawe de, he nukun etọn lẹ ko yin hùnhùn tọn,+
16 Ohó mẹlọ he to ohó Jiwheyẹwhe tọn sè tọn,
Podọ mẹlọ he tindo oyọnẹn Gigogán lọ tọn,
Ewọ mọ numimọ Ganhunupotọ lọ tọn
Dile ewọ dẹ́ do odò bọ nukun etọn lẹ to hùnhùn:
17 Yẹn na mọ ẹn, ṣigba e ma yin todin;
Yẹn na mọ ẹn, ṣigba e ma yin to madẹnmẹ.
Ewọ nasọ gbà nukọn ota Moabi tọn* hányán dandan+
Podọ taká visunnu zingidi tọn lẹpo tọn.
18 Edomi nasọ lẹzun nutindo de,+
Mọwẹ, Seili+ na lẹzun nutindo kẹntọ etọn lẹ tọn,+
To whenue Islaeli na to adọgbigbo etọn dohia.
19 Podọ mẹde na wá sọn Jakọbu mẹ he na to awhàngba zọnmii,+
Ewọ nasọ và mẹdepope he luntọ́n sọn tòdaho lọ mẹ sudo.”
20 Whenue e mọ Amalẹki, e zindonukọn to ohó milomilo etọn mẹ dọmọ:
21 Whenue e mọ Keninu+ lẹ, e zindonukọn to ohó milomilo etọn mẹ dọmọ:
“Hihọ́tẹn de wẹ nọtẹn towe, podọ osé ji wẹ fininọ towe yin didoai do.
22 Ṣigba, mẹde na fiọ Kaeni mlẹnmlẹn.
Nawẹ e na dẹnsọ whẹpo Asilia nado bẹ we yì kanlinmọgbenu?”
23 E sọ zindonukọn to ohó milomilo etọn mẹ dọmọ:
“Dindọn! Mẹnu wẹ na luntọ́n to whenue Jiwheyẹwhe na wà ehe?
Ṣigba, ewọ lọsu na dọ̀n pete.”
25 Enẹgodo, Balaami+ fọ́n dedo bosọ lẹkọyi nọtẹn etọn. Balaki lọsu sọ wleali etọn dedo.
25 To whenue Islaeli nọ nọ̀ Ṣitimi,+ gbẹtọ lọ lẹ jẹ kọndopọ zanhẹmẹ tọn tindo hẹ viyọnnu Moabi tọn lẹ ji.+ 2 Yọnnu lọ lẹ basi oylọna gbẹtọ lọ lẹ yì hùnwhẹ avọ́sinsan yẹwhe yetọn lẹ tọn tẹnmẹ,+ yewlẹ sọ jẹ dùdù ji bo jẹ didẹ́ do odò na yẹwhe yetọn lẹ ji.+ 3 Gbọnmọ dali, Islaeli kọnawudopọ hẹ yé to sinsẹ̀n-bibasi hlan* Baali Peọli tọn mẹ,+ homẹ sọ gble Jehovah tlala do Islaeli go. 4 Jehovah dọna Mose dọmọ: “Bẹ nukọntọ* omẹ ehelẹ tọn lẹpo pli bo ze yé plá do núgo to Jehovah nukọn to kléwhète,* na homẹgble sinsinyẹn Jehovah tọn nido lẹkọ sọn Islaeli ji.” 5 To whenẹnu, Mose dọna whẹdatọ Islaeli tọn lẹ+ dọmọ: “Dopodopo mìtọn ni hù omẹ etọn he kọnawudopọ to sinsẹ̀n-bibasi hlan* Baali Peọli tọn mẹ lẹ.”+
6 Ṣigba, to ojlẹ enẹ mẹ pẹẹ wẹ dopo to Islaelivi lẹ mẹ wá bo hẹn yọnnu Midianinu+ de wá mẹmẹsunnu etọn lẹ ṣẹnṣẹn to nukun Mose po Islaelivi lẹ pete po tọn mẹ, dile yé to avivi to họntonu gòhọ opli tọn lọ tọn. 7 Whenue Finehasi+ visunnu Eleazali, he yin visunnu Aalọn yẹwhenọ lọ tọn mọ ehe, e fọ́n sọn pipli lọ ṣẹnṣẹn to afọdopolọji bo ze owhán de hẹn do alọmẹ. 8 Enẹgodo, e dómọna sunnu Islaelivi lọ biọ gòhọ lọ mẹ bo sọnú yé omẹ awe lẹ luntọ́n, yèdọ sunnu Islaelivi lọ gọna yọnnu lọ gbọn vijinu yọnnu lọ tọn mẹ. Whenẹnu, azọ̀nylankan he wá Islaelivi lẹ ji lọ yin alọhẹndotena.+ 9 Lẹndopọ mẹhe azọ̀nylankan lọ hù lẹ tọn yin 24 000.+
10 Enẹgodo, Jehovah dọna Mose dọmọ: 11 “Finehasi+ visunnu Eleazali, he yin visunnu Aalọn yẹwhenọ lọ tọn ko lẹkọna homẹgble ṣie sọn omẹ Islaeli tọn lẹ ji, na ewọ ma kẹalọyi agbàwhinwhlẹn hẹ mi to aliho depope mẹ to ṣẹnṣẹn yetọn.+ Enẹ wẹ zọ́n bọ yẹn ma ko và Islaelivi lẹ sudo to mẹdezejo mlẹnmlẹn bibiọ ṣie mẹ.+ 12 Enẹwutu, dọna ẹn dọ, ‘Yẹn to alẹnu jijọho tọn de basi hẹ ẹ. 13 E nasọ yin alẹnu yẹwhenọduta tọn he na dẹn-to-aimẹ de na ewọ po kúnkan etọn po to ewọ godo,+ na ewọ ma kẹalọyi agbàwhinwhlẹn depope hẹ Jiwheyẹwhe etọn+ wutu bosọ basi ovẹsè na omẹ Islaeli tọn lẹ.’”
14 Nalete, oyín sunnu Islaelivi he yin hùhù dopọ hẹ yọnnu Midianinu lọ tọn wẹ Zimli visunnu Salu tọn, he yin ahọvi de to whédo otọ́ Simeoninu lẹ tọn mẹ. 15 Oyín yọnnu Midianinu he yin hùhù lọ tọn wẹ Kọzbi viyọnnu Zuli+ tọn; dawe ehe yin nukọntọ de na akọ̀ hẹnnu whédo otọ́ etọn lẹ tọn to Midiani.+
16 To godo mẹ, Jehovah dọna Mose dọmọ: 17 “Mì tọ́ngbé Midianinu lẹ tọn bo hù yé,+ 18 na yewlẹ ko tọ́ngbé mítọn gbọn ayiha gigẹdẹ yíyí do doyẹklọ mì nado waylando to whẹho Peọli tọn mẹ+ dali podọ gbọn Kọzbi viyọnnu ahọvi Midiani tọn lọ dali, yèdọ nọviyọnnu yetọn he yin hùhù+ to azán he gbè azọ̀nylankan wá mì ji to whẹho Peọli tọn mẹ.”+
26 To azọ̀nylankan lọ godo,+ Jehovah dọna Mose po Eleazali visunnu Aalọn yẹwhenọ lọ tọn po dọmọ: 2 “Mì hia Islaelivi lẹpo pete he ko tindo owhe 20 podọ humọ, sọgbe hẹ whédo otọ́ yetọn lẹ tọn, bo basi todohukanji yinkọ mẹhe sọgan yì awhàn to Islaeli lẹpo tọn.”+ 3 Enẹwutu, Mose po Eleazali+ yẹwhenọ lọ po dọhona yé to danfafa Moabi tọn ji+ to Jọdani tó, sẹpọ Jẹliko+ dọmọ: 4 “Mì hia dopodopo yetọn he ko tindo owhe 20 podọ humọ, kẹdẹdile Jehovah ko degbe etọn na Mose do.”+
Todin, visunnu Islaeli tọn he tọ́njẹgbonu sọn aigba Egipti tọn ji lẹ die: 5 Leubẹni,+ he yin plọnji Islaeli tọn; visunnu Leubẹni tọn lẹ+ die: sọn Hanọki mẹ, whẹndo Hanọkinu lẹ tọn; sọn Palu mẹ, whẹndo Palunu lẹ tọn; 6 sọn Hẹzloni mẹ, whẹndo Hẹzloninu lẹ tọn; sọn Kalmi mẹ, whẹndo Kalminu lẹ tọn. 7 Whẹndo Leubẹninu lẹ tọn niyẹn, bọ sọha mẹhe yinkọ yetọn yin titodohukanji lẹpo tọn yin 43 730.+
8 Visunnu Palu tọn wẹ Eliabi. 9 Podọ visunnu Eliabi tọn lẹ wẹ Nemuẹli, Datani po Abilami po. Datani ehe po Abilami ehe po wẹ omẹ dide pipli lọ tọn lẹ he tọ́navùn Mose+ po Aalọn po to pọmẹ hẹ pipli Kola tọn+ to whenue yé tọ́navùn Jehovah.+
10 To whenẹnu, aigba kẹnù bo bẹ yé mì. Amọ́ na nuhe dù Kola, ewọ po godonọnamẹtọ etọn lẹ po kú to whenue miyọ́n fiọ sunnu 250 lọ lẹ.+ Yé sọ lẹzun apajlẹ avase tọn de.+ 11 Ṣigba, visunnu Kola tọn lẹ ma kú.+
12 Visunnu Simeoni+ tọn lẹ sọgbe hẹ whẹndo yetọn lẹ die: sọn Nemuẹli mẹ, whẹndo Nemuẹlinu lẹ tọn; sọn Jamini mẹ, whẹndo Jamininu lẹ tọn; sọn Jakini mẹ, whẹndo Jakininu lẹ tọn; 13 sọn Zela mẹ, whẹndo Zelanu lẹ tọn; sọn Ṣauli mẹ, whẹndo Ṣaulinu lẹ tọn. 14 Whẹndo Simeoninu lẹ tọn niyẹn: omẹ sọha 22 200.+
15 Visunnu Gad+ tọn lẹ sọgbe hẹ whẹndo yetọn lẹ die: sọn Zẹfọni mẹ, whẹndo Zẹfọninu lẹ tọn; sọn Hagi mẹ, whẹndo Haginu lẹ tọn; sọn Ṣuni mẹ, whẹndo Ṣuninu lẹ tọn; 16 sọn Ozni mẹ, whẹndo Ozninu lẹ tọn; sọn Ẹli mẹ, whẹndo Ẹlinu lẹ tọn; 17 sọn Alodi mẹ, whẹndo Alodinu lẹ tọn; sọn Aleli mẹ, whẹndo Alelinu lẹ tọn. 18 Whẹndo visunnu Gad tọn lẹ tọn niyẹn, bọ sọha mẹhe yinkọ yetọn yin titodohukanji lẹ tọn yin 40 500.+
19 Visunnu Juda+ tọn lẹ wẹ Ẹẹli po Onani po.+ Ṣigba, Ẹẹli po Onani po kú to aigba Kenani tọn ji.+ 20 Visunnu Juda tọn lẹ sọgbe hẹ whẹndo yetọn lẹ die: sọn Ṣela+ mẹ, whẹndo Ṣelanu lẹ tọn; sọn Pelẹzi+ mẹ, whẹndo Pelẹzinu lẹ tọn; sọn Zela+ mẹ, whẹndo Zelanu lẹ tọn. 21 Visunnu Pelẹzi tọn lẹ die: sọn Hẹzloni+ mẹ, whẹndo Hẹzloninu lẹ tọn; sọn Hamuli+ mẹ, whẹndo Hamulinu lẹ tọn. 22 Whẹndo Juda tọn lẹ niyẹn, bọ sọha mẹhe yinkọ yetọn yin titodohukanji lẹ tọn yin 76 500.+
23 Visunnu Isakali+ tọn lẹ sọgbe hẹ whẹndo yetọn lẹ die: sọn Tola+ mẹ, whẹndo Tolanu lẹ tọn; sọn Puva mẹ, whẹndo Puvanu lẹ tọn; 24 sọn Jaṣubi mẹ, whẹndo Jaṣubinu lẹ tọn; sọn Ṣimloni mẹ, whẹndo Ṣimloninu lẹ tọn. 25 Whẹndo Isakali tọn lẹ niyẹn, bọ sọha mẹhe yinkọ yetọn yin titodohukanji lẹ tọn yin 64 300.+
26 Visunnu Zebuluni+ tọn lẹ sọgbe hẹ whẹndo yetọn lẹ die: sọn Sẹlẹdi mẹ, whẹndo Sẹlẹdinu lẹ tọn; sọn Elọni mẹ, whẹndo Elọninu lẹ tọn; sọn Jaleẹli mẹ, whẹndo Jaleẹlinu lẹ tọn. 27 Whẹndo Zebuluninu lẹ tọn niyẹn, bọ sọha mẹhe yinkọ yetọn yin titodohukanji lẹ tọn yin 60 500.+
28 Visunnu Josẹfu+ tọn lẹ sọgbe hẹ whẹndo yetọn lẹ die: Manasse po Eflaimi+ po. 29 Visunnu Manasse+ tọn lẹ die: sọn Makili+ mẹ, whẹndo Makilinu lẹ tọn; Makili sọ lẹzun otọ́ Giliadi tọn; sọn Giliadi+ mẹ, whẹndo Giliadinu lẹ tọn. 30 Visunnu Giliadi tọn lẹ die: sọn Iezeli mẹ, whẹndo Iezelinu lẹ tọn; sọn Helẹki mẹ, whẹndo Helẹkinu lẹ tọn; 31 sọn Asliẹli mẹ, whẹndo Asliẹlinu lẹ tọn; sọn Ṣekẹmi mẹ, whẹndo Ṣekẹminu lẹ tọn; 32 sọn Ṣemida mẹ, whẹndo Ṣemidanu lẹ tọn; sọn Hefeli mẹ, whẹndo Hefelinu lẹ tọn. 33 Todin, Zelofehadi visunnu Hefeli tọn ma tindo visunnu depope, adavo viyọnnu lẹ kẹdẹ,+ podọ oyín viyọnnu Zelofehadi tọn lẹ tọn+ wẹ Mahla, Noa, Hogla, Milka po Tilza po. 34 Whẹndo Manasse tọn lẹ niyẹn, bọ sọha mẹhe yinkọ yetọn yin titodohukanji lẹ tọn yin 52 700.+
35 Visunnu Eflaimi+ tọn lẹ sọgbe hẹ whẹndo yetọn lẹ die: sọn Ṣutela+ mẹ, whẹndo Ṣutelanu lẹ tọn; sọn Bekẹli mẹ, whẹndo Bekẹlinu lẹ tọn; sọn Tahani mẹ, whẹndo Tahaninu lẹ tọn. 36 Visunnu Ṣutela tọn lẹ die: sọn Elani mẹ, whẹndo Elaninu lẹ tọn. 37 Whẹndo visunnu Eflaimi tọn lẹ tọn niyẹn, bọ sọha mẹhe yinkọ yetọn yin titodohukanji lẹ tọn yin 32 500.+ Visunnu Josẹfu tọn lẹ niyẹn sọgbe hẹ whẹndo yetọn lẹ.
38 Visunnu Bẹnjamini+ tọn lẹ sọgbe hẹ whẹndo yetọn lẹ die: sọn Bela+ mẹ, whẹndo Belanu lẹ tọn; sọn Aṣbeli mẹ, whẹndo Aṣbelinu lẹ tọn; sọn Ahilami mẹ, whẹndo Ahilaminu lẹ tọn; 39 sọn Ṣefufami mẹ, whẹndo Ṣefufaminu lẹ tọn; sọn Hufami mẹ, whẹndo Hufaminu lẹ tọn. 40 Visunnu Bela tọn lẹ wẹ Aldi po Naamani po:+ sọn Aldi mẹ, whẹndo Aldinu lẹ tọn; sọn Naamani mẹ, whẹndo Naamaninu lẹ tọn. 41 Visunnu Bẹnjamini tọn lẹ sọgbe hẹ whẹndo yetọn lẹ niyẹn, bọ sọha mẹhe yinkọ yetọn yin titodohukanji lẹ tọn yin 45 600.+
42 Visunnu Dani+ tọn lẹ sọgbe hẹ whẹndo yetọn lẹ die: sọn Ṣuhami mẹ, whẹndo Ṣuhaminu lẹ tọn. Whẹndo Dani tọn lẹ niyẹn sọgbe hẹ whẹndo yetọn lẹ. 43 To whẹndo Ṣuhaminu lẹ tọn lẹpo mẹ, sọha mẹhe yinkọ yetọn yin titodohukanji lẹ tọn yin 64 400.+
44 Visunnu Aṣeli+ tọn lẹ sọgbe hẹ whẹndo yetọn lẹ die: sọn Imna mẹ, whẹndo Imnanu lẹ tọn; sọn Iṣvi mẹ, whẹndo Iṣvinu lẹ tọn; sọn Belia mẹ, whẹndo Belianu lẹ tọn; 45 sọn visunnu Belia tọn lẹ mẹ: sọn Hebeli mẹ, whẹndo Hebelinu lẹ tọn; sọn Malkiẹli mẹ, whẹndo Malkiẹlinu lẹ tọn. 46 Oyín viyọnnu Aṣeli tọn wẹ Sela. 47 Whẹndo visunnu Aṣeli tọn lẹ tọn niyẹn, bọ sọha mẹhe yinkọ yetọn yin titodohukanji lẹ tọn yin 53 400.+
48 Visunnu Naftali+ tọn lẹ sọgbe hẹ whẹndo yetọn lẹ die: sọn Jazeẹli mẹ, whẹndo Jazeẹlinu lẹ tọn; sọn Guni mẹ, whẹndo Guninu lẹ tọn; 49 sọn Jezẹli mẹ, whẹndo Jezẹlinu lẹ tọn; sọn Ṣilemi mẹ, whẹndo Ṣileminu lẹ tọn. 50 Whẹndo Naftali tọn lẹ niyẹn sọgbe hẹ whẹndo yetọn lẹ, bọ sọha mẹhe yinkọ yetọn yin titodohukanji lẹ tọn yin 45 400.+
51 Ehe wẹ lẹndopọ mẹhe yinkọ yetọn yin titodohukanji to Islaelivi lẹ mẹ lẹ tọn: omẹ sọha 601 730.+
52 Enẹgodo, Jehovah dọna Mose dọmọ: 53 “Aigba lọ dona yin mimá na omẹ ehelẹ taidi ogú de sọgbe hẹ sọha yinkọ he yin titodohukanji lọ lẹ tọn.+ 54 Na pipli daho lẹ, hiẹ dona hẹn ogú yetọn klo, podọ na pipli pẹvi lẹ, hiẹ dona de ogú yetọn pò.+ Ogú pipli dopodopo tọn dona yin nina ẹn sọgbe hẹ sọha mẹhe yinkọ yetọn yin titodohukanji lọ lẹ tọn. 55 Ṣigba, aigba lọ dona yin mimá gbọn ovò dide dali.+ Yé dona mọ ogú yetọn yí sọgbe hẹ oyín hẹnnu otọ́ yetọn lẹ tọn. 56 Ogú mẹdopodopo tọn na yin yinyọnẹn gbọn ovò dide dali, podọ e na yin mimá na pipli daho lẹ po pẹvi lẹ po.”
57 Todin, Levinu+ he yinkọ yetọn yin titodohukanji sọgbe hẹ whẹndo yetọn lẹ die: sọn Gẹlṣọni mẹ, whẹndo Gẹlṣọninu lẹ tọn; sọn Kohati+ mẹ, whẹndo Kohatinu lẹ tọn; sọn Melali mẹ, whẹndo Melalinu lẹ tọn. 58 Whẹndo Levinu lẹ tọn lẹ die: whẹndo Libninu lẹ tọn,+ whẹndo Heblọninu lẹ tọn,+ whẹndo Mahlinu lẹ tọn,+ whẹndo Muṣinu lẹ tọn+ po whẹndo Kolanu lẹ tọn+ po.
Kohati sọ lẹzun otọ́ Amlami tọn.+ 59 Podọ oyín asi Amlami tọn wẹ Jokebẹdi,+ viyọnnu Levi tọn he asi etọn ji na ẹn to Egipti. Yọnnu ehe sọ ji Aalọn, Mose po Miliami nọviyọnnu yetọn+ po na Amlami. 60 Enẹgodo, Nadabi, Abihu, Eleazali po Itamali po yin jiji na Aalọn.+ 61 Ṣigba, Nadabi po Abihu po kú, na yé basi avọ́nunina mimẹ̀ de he ma yin alọkẹyi to Jehovah nukọn.+
62 Lẹndopọ mẹhe yinkọ yetọn yin titodohukanji lẹ tọn yin 23 000, yèdọ sunnu lẹpo he tindo osun dopo podọ humọ.+ Yinkọ omẹ ehelẹ tọn ma yin titodohukanji to Islaelivi lẹ ṣẹnṣẹn,+ na ogú de ma dona yin nina yé to Islaelivi lẹ ṣẹnṣẹn wutu.+
63 Mẹhe yinkọ yetọn yin titodohukanji gbọn Mose po Eleazali yẹwhenọ lọ po dali lẹ niyẹn, to whenue yé basi todohukanji yinkọ Islaelivi lẹ tọn to danfafa Moabi tọn ji to Jọdani tó, sẹpọ Jẹliko. 64 Ṣigba, mẹhe yinkọ yetọn ko yin titodohukanji gbọn Mose po Aalọn yẹwhenọ lọ po dali to whenue sọha Islaelivi lẹ tọn yin hihia to danfafa Sinai tọn ji lẹ depope ma to yé mẹ.+ 65 Na Jehovah ko dọ gando yewlẹ go dọmọ: “Yé na kú to danfafa lọ ji dandan.”+ Enẹwutu, sunnu dopo tata ma pò togbẹ̀ to yé mẹ adavo Kalẹbi visunnu Jẹfunnẹ tọn po Jọṣua visunnu Nuni tọn po.+
27 Enẹgodo, viyọnnu Zelofehadi+ he yin visunnu Hefeli tọn, visunnu Giliadi tọn, visunnu Makili tọn, visunnu Manasse tọn, sọn whẹndo Manasse visunnu Josẹfu tọn mẹ tọn lẹ dọnsẹpọ. Oyín viyọnnu etọn lẹ tọn wẹ Mahla, Noa, Hogla, Milka po Tilza po. 2 Yé ṣite to Mose, Eleazali yẹwhenọ lọ, ahọvi+ lẹ po pipli lọ pete po nukọn to họntonu gòhọ opli tọn lọ tọn bo dọmọ: 3 “Otọ́ mítọn kú to danfafa ji, ṣigba ewọ ma tin to godonọnamẹtọ Kola tọn lẹ+ he bẹ yedelẹ pli sọta Jehovah mẹ gba, amọ́ ewọ kú na ylando etọn titi wutu bo ma tindo visunnu depope. 4 Naegbọn oyín otọ́ mítọn tọn nado busẹ sọn whẹndo etọn mẹ, na ewọ ma tindo visunnu de wutu? Na mí nutindo de to nọvisunnu otọ́ mítọn tọn lẹ ṣẹnṣẹn.” 5 Enẹwutu, Mose hẹn whẹho yetọn yì Jehovah nukọn.+
6 Jehovah sọ dọna Mose dọmọ: 7 “Owhẹ̀ viyọnnu Zelofehadi tọn lẹ tọn whẹ́n. Hiẹ dona na yé nutindo de taidi ogú to nọvisunnu otọ́ yetọn tọn lẹ ṣẹnṣẹn dandan bosọ ze ogú otọ́ yetọn tọn jo na yé.+ 8 Humọ, dọna Islaelivi lẹ dọ, ‘Eyin sunnu de kú bo ma tindo visunnu de, to whenẹnu mì dona dike ogú etọn ni yin zizejo na viyọnnu etọn. 9 Eyin e masọ tindo viyọnnu de, mì na ze ogú etọn jo na nọvisunnu etọn lẹ. 10 Eyin e masọ tindo nọvisunnu de, mì na ze ogú etọn jo na nọvisunnu otọ́ etọn tọn lẹ. 11 Eyin otọ́ etọn masọ tindo nọvisunnu de, mì na ze ogú etọn jo na hẹnnumẹ sẹpọmẹ hugan lọ to whẹndo etọn mẹ, nutindo lọ nasọ lẹzun ewọ tọn. Ehe na yin osẹ́ndoai gbọn nudide whẹdida tọn dali de na Islaelivi lẹ, kẹdẹdile Jehovah ko degbe etọn na Mose do.’”
12 Enẹgodo, Jehovah dọna Mose dọmọ: “Hẹji yì osó Abalimi tọn ehe ji,+ bo pọ́n aigba lọ he yẹn jlo na na Islaelivi lẹ hlan.+ 13 To whenuena hiẹ ko mọ ẹn pó godo, hiẹ lọsu na yin dìdì taidi tọgbo towe lẹ,*+ kẹdẹdi Aalọn nọvisunnu towe,+ 14 na whenue pipli lọ to whẹgbè do hẹ mi to danfafa Zini tọn ji, mìwlẹ ṣiatẹ sọta gbedide ṣie bo ma klan mi do wiwe to nukọn yetọn to whẹho osin tọn lọ mẹ.+ Osin Mẹliba tọn+ lẹ niyẹn to Kadẹṣi+ to danfafa Zini tọn ji.”+
15 To whenẹnu, Mose dọna Jehovah dọmọ: 16 “Na Jehovah, Jiwheyẹwhe he nọ nagbẹ̀ gbẹtọ lẹpo* ni de sunnu de do pipli lọ nù, 17 mẹhe na nọ deanana yé nado tọ́nyi podọ nado lẹkọwa, podọ mẹhe na nọ plan yé tọ́nyi bosọ plan yé lẹkọwa, na pipli omẹ Jehovah tọn lẹ tọn nikaa wá taidi lẹngbọ lẹ he ma tindo lẹngbọhọtọ de.” 18 Enẹwutu, Jehovah dọna Mose dọmọ: “Plan Jọṣua visunnu Nuni tọn, yèdọ dawe de he tindo gbigbọ dagbe, bo ze alọ towe do e ji.+ 19 Enẹgodo, biọ to e si nado ṣite to Eleazali yẹwhenọ lọ nukọn podọ to pipli lọ pete nukọn, na hiẹ ni deazọ́nna ẹn to nukun yetọn mẹ.+ 20 Hiẹ dona yí apadewhe aṣẹpipa* towe tọn na ẹn,+ na pipli Islaelivi lẹ tọn pete nido nọ dotoaina ẹn.+ 21 Ewọ na nọ ṣite to Eleazali yẹwhenọ lọ nukọn, mẹhe na nọ kannubiọ do ota etọn mẹ gbọn whẹdida Ulimi tọn+ lọ yiyizan dali to Jehovah nukọn. Eyin ewọ degbe, yé na nọ tọ́nyi podọ eyin e degbe, yé na nọ lẹkọwa, yèdọ ewọ po Islaelivi lẹpo po gọna pipli lọ pete.”
22 Enẹwutu, Mose basi kẹdẹdile Jehovah ko degbe etọn na ẹn do. E plan Jọṣua bo biọ to e si nado ṣite to Eleazali yẹwhenọ lọ nukọn podọ to pipli lọ pete nukọn, 23 bosọ ze alọ etọn lẹ do e ji bo deazọ́nna ẹn+ kẹdẹdile Jehovah ko dọ gbọn Mose gblamẹ do.+
28 Jehovah zindonukọn nado dọhona Mose dọmọ: 2 “Degbena Islaelivi lẹ bo dọna yé dọ, ‘Mìwlẹ dona to aṣeji nado nọ hẹn avọ́nunina ṣie wá na mi, yèdọ akla ṣie, enẹ wẹ avọ́nunina gbọn miyọ́n dali ṣie lẹ he na nọ yin bibasi to ojlẹ dide yetọn mẹ, nado wleawuna owán gblingblin* de hlan mi.’+
3 “Humọ, dọna yé dọ, ‘Avọ́nunina gbọn miyọ́n dali he mìwlẹ dona nọ hẹnwa na Jehovah die: lẹngbọvu asu owhe dopo mẹ tọn he to gángán awe to azán dopodopo gbè taidi avọ́nunina mimẹ̀ de to gbesisọ mẹ.+ 4 Hiẹ na nọ yí lẹngbọvu asu dopo do sanvọ́ to afọnnu, bo na nọ yí lẹngbọvu asu awetọ lọ do sanvọ́ to whèjai plẹplẹ,*+ 5 bọ avọ́nunina jinukun-lili tọn de na nọ zọnpọ hẹ dopodopo yetọn, enẹ wẹ mado-ao linfin dagbedagbe efa dopo tọn* he yè yí mado-ẹnẹ amì olivie tọn akú hini* dopo tọn do yàn.+ 6 Avọ́nunina mimẹ̀ gbesisọ mẹ tọn de wẹ,+ ehe yin didoai to Osó Sinai tọn ji nado wleawuna owán gblingblin* de, yèdọ avọ́nunina gbọn miyọ́n dali de hlan Jehovah, 7 to pọmẹ hẹ avọ́nunina nùnù etọn, yèdọ mado-ẹnẹ hini dopo tọn he na nọ zọ̀n lẹngbọvu asu dopodopo ji.+ Hiẹ na kọ̀n ahàn sinsinyẹn lọ do fiwiwe lọ taidi avọ́nunina nùnù de hlan Jehovah. 8 Hiẹ nasọ yí lẹngbọvu asu awetọ lọ do sanvọ́ to whèjai plẹplẹ.* Avọ́nunina jinukun-lili tọn dopolọ taidi dehe yin yíyí do sanvọ́ to afọnnu po avọ́nunina nùnù etọn dopolọ po wẹ hiẹ na yí do sanvọ́ taidi avọ́nunina gbọn miyọ́n dali de, yèdọ taidi owán gblingblin de hlan Jehovah.+
9 “‘Ṣigba, to Gbọjẹzangbe,+ avọ́nunina lọ dona yin lẹngbọvu asu owhe dopo mẹ tọn he to gángán awe po mado-ao ojlẹnu efa linfin dagbedagbe tọn awe he yè yí amì do yàn po taidi avọ́nunina jinukun-lili tọn, to pọmẹ hẹ avọ́nunina nùnù etọn. 10 Avọ́nunina mimẹ̀ Gbọjẹzangbe tọn niyẹn, to pọmẹ hẹ avọ́nunina mimẹ̀ gbesisọ mẹ tọn lọ po avọ́nunina nùnù etọn po.+
11 To bẹjẹeji osun dopodopo tọn,* mìwlẹ na nọ hẹn oyìnsú winyanwinyan awe wá, gọna agbò dopo po lẹngbọvu asu he to gángán ṣinawe po, he dopodopo yetọn yin owhe dopo mẹ tọn taidi avọ́nunina mimẹ̀ de hlan Jehovah,+ 12 podọ mado-ao ojlẹnu linfin dagbedagbe tọn atọ̀n he yè yí amì do yàn na nọ zọ̀n oyìnsú dopodopo ji taidi avọ́nunina jinukun-lili tọn+ bọ mado-ao ojlẹnu linfin dagbedagbe tọn awe he yè yí amì do yàn na nọ zọ̀n agbò lọ ji taidi avọ́nunina jinukun-lili tọn,+ 13 podọ taidi avọ́nunina jinukun-lili tọn, mado-ao ojlẹnu linfin dagbedagbe tọn dopo he yè yí amì do yàn na nọ zọ̀n lẹngbọvu asu dopodopo ji taidi avọ́nunina mimẹ̀ de nado wleawuna owán gblingblin* de,+ yèdọ avọ́nunina gbọn miyọ́n dali de hlan Jehovah. 14 Podọ na avọ́nunina nùnù yetọn, ovẹn hini daa dona nọ zọ̀n oyìnsú dopo ji+ bọ mado-atọ̀n hini dopo tọn na nọ zọ̀n agbò lọ ji,+ podọ mado-ẹnẹ hini dopo tọn na nọ zọ̀n lẹngbọvu asu dopo ji.+ Avọ́nunina mimẹ̀ sunmẹsunmẹ tọn lọ niyẹn na osun dopodopo to owhe lọ gblamẹ. 15 Humọ, gbọgbọẹvu dopo dona nọ yin yíyí do sanvọ́ taidi avọ́nunina ylando tọn hlan Jehovah, gbọnvona avọ́nunina mimẹ̀ gbesisọ mẹ tọn lọ po avọ́nunina nùnù etọn po.
16 “‘To osun tintan mẹ, azán 14tọ osun lọ tọn na nọ yin Juwayi Jehovah tọn.+ 17 Podọ to azán 15tọ osun ehe tọn gbè, hùnwhẹ de na nọ yin bibasi. Akla madotọ́n wẹ na nọ yin dùdù na azán ṣinawe.+ 18 Plidopọ wiwe de na nọ yin bibasi to azán tintan gbè. Mìwlẹ ma dona wazọ́n sinsinyẹn depope. 19 Mìwlẹ nasọ nọ hẹn oyìnsú winyanwinyan awe wá, gọna agbò dopo po lẹngbọvu asu ṣinawe po, he dopodopo yetọn yin owhe dopo mẹ tọn taidi avọ́nunina mimẹ̀ gbọn miyọ́n dali de hlan Jehovah. Kanlin he to gángán lẹ wẹ mìwlẹ dona yí do sanvọ́.+ 20 Mì dona nọ hẹn onú ehelẹ wá to pọmẹ hẹ avọ́nunina jinukun-lili tọn yetọn he yin linfin dagbedagbe he yè yí amì do yàn,+ yèdọ mado-ao ojlẹnu tọn atọ̀n na nọ zọ̀n oyìnsú dopo ji podọ mado-ao ojlẹnu tọn awe na nọ zọ̀n agbò lọ ji. 21 Mado-ao ojlẹnu tọn dopo na nọ zọ̀n lẹngbọvu asu ṣinawe lọ lẹ dopodopo ji, 22 gọna gbọgbọẹ dopo taidi avọ́nunina ylando tọn nado basi ovẹsè do ota mìtọn mẹ. 23 Mì na nọ hẹn onú ehelẹ wá, gbọnvona avọ́nunina mimẹ̀ afọnnu afọnnu tọn lọ, he yin avọ́nunina mimẹ̀ gbesisọ mẹ tọn. 24 Mìwlẹ na nọ hẹn nunina ehelẹ wá to aliho dopolọ mẹ taidi núdùdù* de to azán dopodopo ji na azán ṣinawe, yèdọ avọ́nunina gbọn miyọ́n dali de taidi owán gblingblin* de hlan Jehovah. E dona nọ yin hinhẹnwa to pọmẹ hẹ avọ́nunina mimẹ̀ gbesisọ mẹ tọn lọ po avọ́nunina nùnù etọn po. 25 To azán ṣinawetọ gbè, mìwlẹ na nọ basi plidopọ wiwe de.+ Mìwlẹ ma dona wazọ́n sinsinyẹn depope.+
26 “‘To azán sinsẹ́n bibia tintan lẹ tọn gbè,+ to whenue mì nọ hẹn avọ́nunina jinukun-lili yọyọ tọn wá na Jehovah,+ mìwlẹ na nọ basi plidopọ wiwe de to hùnwhẹ osẹ lẹ tọn whenu.+ Mìwlẹ ma dona wazọ́n sinsinyẹn depope.+ 27 Mìwlẹ na nọ hẹn oyìnsú winyanwinyan awe wá, gọna agbò dopo po lẹngbọvu asu ṣinawe po, he dopodopo yetọn yin owhe dopo mẹ tọn taidi avọ́nunina mimẹ̀ de nado wleawuna owán gblingblin* de hlan Jehovah,+ 28 podọ taidi avọ́nunina jinukun-lili tọn yetọn he yin linfin dagbedagbe he yè yí amì do yàn, mado-ao ojlẹnu tọn atọ̀n na nọ zọ̀n oyìnsú dopodopo ji, bọ mado-ao ojlẹnu tọn awe na nọ zọ̀n agbò lọ ji, 29 mado-ao ojlẹnu tọn dopo na nọ zọ̀n lẹngbọvu asu ṣinawe lọ lẹ dopodopo ji, 30 gọna gbọgbọẹvu dopo nado basi ovẹsè do ota mìtọn mẹ.+ 31 Mì na nọ hẹn onú ehelẹ wá, gbọnvona avọ́nunina mimẹ̀ gbesisọ mẹ tọn lọ po avọ́nunina nùnù etọn po. Yé dona yin kanlin he to gángán lẹ,+ to pọmẹ hẹ avọ́nunina nùnù yetọn lẹ.
29 “‘Podọ to osun ṣinawetọ mẹ, to azán tintan osun lọ tọn gbè, mìwlẹ na nọ basi plidopọ wiwe de. Mìwlẹ ma dona wazọ́n sinsinyẹn depope.+ E yin azán de he gbè mì dona nọ kún opẹ̀n.+ 2 Mìwlẹ na nọ yí oyìnsú winyanwinyan dopo, agbò dopo po lẹngbọvu asu ṣinawe po, he dopodopo yetọn yin owhe dopo mẹ tọn bọ yemẹpo sọ to gángán do sanvọ́ taidi avọ́nunina mimẹ̀ de nado wleawuna owán gblingblin* de hlan Jehovah, 3 podọ avọ́nunina jinukun-lili tọn yetọn he yin linfin dagbedagbe he yè yí amì do yàn, yèdọ mado-ao ojlẹnu efa tọn atọ̀n na nọ zọ̀n oyìnsú lọ ji, mado-ao ojlẹnu tọn awe na nọ zọ̀n agbò lọ ji, 4 bọ mado-ao ojlẹnu tọn dopo na nọ zọ̀n lẹngbọvu asu ṣinawe lọ lẹ dopodopo ji, 5 gọna gbọgbọẹvu asu dopo taidi avọ́nunina ylando tọn nado basi ovẹsè do ota mìtọn mẹ. 6 Mì dona nọ hẹn onù ehelẹ wá, gbọnvona avọ́nunina mimẹ̀ sunmẹsunmẹ tọn po avọ́nunina jinukun-lili tọn+ etọn po gọna avọ́nunina mimẹ̀ gbesisọ mẹ tọn lọ po avọ́nunina jinukun-lili tọn etọn po,+ to pọmẹ hẹ avọ́nunina nùnù yetọn lẹ,+ sọgbe hẹ aliho nuyiwa tọn he nọ yin hihodo gando yé go, taidi owán gblingblin* de, yèdọ avọ́nunina gbọn miyọ́n dali de hlan Jehovah.
7 “‘Podọ to azán aotọ osun ṣinawetọ ehe tọn gbè, mìwlẹ na nọ basi plidopọ wiwe de,+ bo nasọ nọ sayana mìde.* Mìwlẹ ma dona wazọ́n sinsinyẹn depope.+ 8 Mìwlẹ nasọ nọ hẹn oyìnsú winyanwinyan dopo wá, gọna agbò dopo po lẹngbọvu asu ṣinawe po, he dopodopo yetọn yin owhe dopo mẹ tọn bọ yemẹpo sọ to gángán, taidi avọ́nunina mimẹ̀ de, yèdọ taidi owán gblingblin* de hlan Jehovah.+ 9 Podọ taidi avọ́nunina jinukun-lili tọn yetọn he yin linfin dagbedagbe he yè yí amì do yàn, mado-ao ojlẹnu tọn atọ̀n na nọ zọ̀n oyìnsú lọ ji, mado-ao ojlẹnu tọn awe na nọ zọ̀n agbò lọ ji, 10 bọ mado-ao ojlẹnu tọn dopo na nọ zọ̀n lẹngbọvu asu ṣinawe lọ lẹ dopodopo ji, 11 gọna gbọgbọẹvu dopo taidi avọ́nunina ylando tọn, gbọnvona avọ́nunina ylando tọn he nọ yin bibasi na ovẹsè lọ,+ avọ́nunina mimẹ̀ gbesisọ mẹ tọn lọ po avọ́nunina jinukun-lili tọn etọn po, to pọmẹ hẹ avọ́nunina nùnù yetọn lẹ.
12 “‘Podọ to azán 15tọ osun ṣinawetọ lọ tọn gbè, mìwlẹ na nọ basi plidopọ wiwe de. Mìwlẹ ma dona wazọ́n sinsinyẹn depope, podọ mì dona nọ basi hùnwhẹ de na Jehovah na azán ṣinawe.+ 13 Mìwlẹ nasọ nọ hẹn oyìnsú winyanwinyan 13 wá, gọna agbò 2 po lẹngbọvu asu 14 po, he dopodopo yetọn yin owhe dopo mẹ tọn bọ yemẹpo sọ to gángán, taidi avọ́nunina mimẹ̀ de,+ yèdọ avọ́nunina gbọn miyọ́n dali de taidi owán gblingblin* de hlan Jehovah.+ 14 Podọ taidi avọ́nunina jinukun-lili tọn yetọn he yin linfin dagbedagbe he yè yí amì do yàn, mado-ao ojlẹnu tọn atọ̀n na nọ zọ̀n oyìnsú 13 lọ lẹ dopodopo ji, mado-ao ojlẹnu tọn awe na nọ zọ̀n agbò 2 lọ lẹ dopodopo ji, 15 bọ mado-ao ojlẹnu tọn dopo na nọ zọ̀n lẹngbọvu asu 14 lọ lẹ dopodopo ji, 16 gọna gbọgbọẹvu dopo taidi avọ́nunina ylando tọn, gbọnvona avọ́nunina mimẹ̀ gbesisọ mẹ tọn lọ, avọ́nunina jinukun-lili tọn etọn po avọ́nunina nùnù etọn po.+
17 “‘Podọ to azán awetọ gbè, oyìnsú winyanwinyan 12, agbò 2 po lẹngbọvu asu 14 po, he dopodopo yetọn yin owhe dopo mẹ tọn bọ yemẹpo sọ to gángán,+ 18 podọ avọ́nunina jinukun-lili tọn yetọn po avọ́nunina nùnù yetọn lẹ po na nọ zọ̀n oyìnsú lọ lẹ, agbò lọ lẹ po lẹngbọvu asu lọ lẹ po ji sọgbe hẹ sọha yetọn podọ to kọndopọ mẹ hẹ aliho nuyiwa tọn lọ, 19 gọna gbọgbọẹvu dopo taidi avọ́nunina ylando tọn, gbọnvona avọ́nunina mimẹ̀ gbesisọ mẹ tọn lọ po avọ́nunina jinukun-lili tọn etọn po, to pọmẹ hẹ avọ́nunina nùnù yetọn lẹ.+
20 “‘Podọ to azán atọ̀ntọ gbè, oyìnsú 11, agbò 2 po lẹngbọvu asu 14 po, he dopodopo yetọn yin owhe dopo mẹ tọn bọ yemẹpo sọ to gángán,+ 21 podọ avọ́nunina jinukun-lili tọn yetọn po avọ́nunina nùnù yetọn lẹ po na nọ zọ̀n oyìnsú lọ lẹ, agbò lọ lẹ po lẹngbọvu asu lọ lẹ po ji sọgbe hẹ sọha yetọn podọ to kọndopọ mẹ hẹ aliho nuyiwa tọn lọ, 22 gọna gbọgbọẹ dopo taidi avọ́nunina ylando tọn, gbọnvona avọ́nunina mimẹ̀ gbesisọ mẹ tọn lọ, avọ́nunina jinukun-lili tọn etọn po avọ́nunina nùnù etọn po.+
23 “‘Podọ to azán ẹnẹtọ gbè, oyìnsú 10, agbò 2 po lẹngbọvu asu 14 po, he dopodopo yetọn yin owhe dopo mẹ tọn bọ yemẹpo sọ to gángán,+ 24 podọ avọ́nunina jinukun-lili tọn yetọn po avọ́nunina nùnù yetọn lẹ po na nọ zọ̀n oyìnsú lọ lẹ, agbò lọ lẹ po lẹngbọvu asu lọ lẹ po ji sọgbe hẹ sọha yetọn podọ to kọndopọ mẹ hẹ aliho nuyiwa tọn lọ, 25 gọna gbọgbọẹvu dopo taidi avọ́nunina ylando tọn, gbọnvona avọ́nunina mimẹ̀ gbesisọ mẹ tọn lọ, avọ́nunina jinukun-lili tọn etọn po avọ́nunina nùnù etọn po.+
26 “‘Podọ to azán atọ́ntọ gbè, oyìnsú 9, agbò 2 po lẹngbọvu asu 14 po, he dopodopo yetọn yin owhe dopo mẹ tọn bọ yemẹpo sọ to gángán,+ 27 podọ avọ́nunina jinukun-lili tọn yetọn po avọ́nunina nùnù yetọn lẹ po na nọ zọ̀n oyìnsú lọ lẹ, agbò lọ lẹ po lẹngbọvu asu lọ lẹ po ji sọgbe hẹ sọha yetọn podọ to kọndopọ mẹ hẹ aliho nuyiwa tọn lọ, 28 gọna gbọgbọẹ dopo taidi avọ́nunina ylando tọn, gbọnvona avọ́nunina mimẹ̀ gbesisọ mẹ tọn lọ, avọ́nunina jinukun-lili tọn etọn po avọ́nunina nùnù etọn po.+
29 “‘Podọ to azán ṣidopotọ gbè, oyìnsú 8, agbò 2 po lẹngbọvu asu 14 po, he dopodopo yetọn yin owhe dopo mẹ tọn bọ yemẹpo sọ to gángán,+ 30 podọ avọ́nunina jinukun-lili tọn yetọn po avọ́nunina nùnù yetọn lẹ po na nọ zọ̀n oyìnsú lọ lẹ, agbò lọ lẹ po lẹngbọvu asu lọ lẹ po ji sọgbe hẹ sọha yetọn podọ to kọndopọ mẹ hẹ aliho nuyiwa tọn lọ, 31 gọna gbọgbọẹ dopo taidi avọ́nunina ylando tọn, gbọnvona avọ́nunina mimẹ̀ gbesisọ mẹ tọn lọ, avọ́nunina jinukun-lili tọn etọn po avọ́nunina nùnù etọn po.+
32 “‘Podọ to azán ṣinawetọ gbè, oyìnsú 7, agbò 2 po lẹngbọvu asu 14 po, he dopodopo yetọn yin owhe dopo mẹ tọn bọ yemẹpo sọ to gángán,+ 33 podọ avọ́nunina jinukun-lili tọn yetọn po avọ́nunina nùnù yetọn lẹ po na nọ zọ̀n oyìnsú lọ lẹ, agbò lọ lẹ po lẹngbọvu asu lọ lẹ po ji sọgbe hẹ sọha yetọn podọ to kọndopọ mẹ hẹ aliho nuyiwa tọn he nọ yin hihodo gando yé go lọ, 34 gọna gbọgbọẹ dopo taidi avọ́nunina ylando tọn, gbọnvona avọ́nunina mimẹ̀ gbesisọ mẹ tọn lọ, avọ́nunina jinukun-lili tọn etọn po avọ́nunina nùnù etọn po.+
35 “‘To azán ṣinatọ̀ntọ gbè, mì dona nọ basi opli vonọtaun de. Mìwlẹ ma dona wazọ́n sinsinyẹn depope.+ 36 Mìwlẹ nasọ nọ hẹn oyìnsú dopo wá, gọna agbò dopo po lẹngbọvu asu ṣinawe po, he dopodopo yetọn yin owhe dopo mẹ tọn bọ yemẹpo sọ to gángán, taidi avọ́nunina mimẹ̀ de, yèdọ avọ́nunina gbọn miyọ́n dali de taidi owán gblingblin* de hlan Jehovah,+ 37 podọ avọ́nunina jinukun-lili tọn yetọn po avọ́nunina nùnù yetọn lẹ po na nọ zọ̀n oyìnsú lọ, agbò lọ po lẹngbọvu asu lọ lẹ po ji sọgbe hẹ sọha yetọn podọ to kọndopọ mẹ hẹ aliho nuyiwa tọn lọ, 38 gọna gbọgbọẹ dopo taidi avọ́nunina ylando tọn, gbọnvona avọ́nunina mimẹ̀ gbesisọ mẹ tọn lọ, avọ́nunina jinukun-lili tọn etọn po avọ́nunina nùnù etọn po.+
39 “‘Avọ́nunina he mì dona nọ basi hlan Jehovah to hùnwhẹ vonọtaun+ mìtọn lẹ whenu niyẹn, gbọnvona avọ́nunina pàdido tọn+ mìtọn lẹ po avọ́nunina sọn ojlo mẹ wá+ mìtọn lẹ po taidi avọ́nunina mimẹ̀+ mìtọn lẹ, avọ́nunina jinukun-lili tọn+ mìtọn lẹ, avọ́nunina nùnù+ mìtọn lẹ po avọ́nunina jijọho tọn+ mìtọn lẹ po.’” 40 Mose sọ dọ nuhe Jehovah ko degbe etọn na ẹn lọ lẹpo na Islaelivi lẹ.
30 Enẹgodo, Mose dọhona nukọntọ + hẹnnu Islaeli tọn lẹ dọmọ: “Nuhe Jehovah ko degbe etọn die: 2 Eyin sunnu de dopà+ de na Jehovah kavi gbọn whiwhle+ de dali yí ede do opà kadaninọ tọn de glọ,* ewọ ma dona hẹn ohó etọn flu gba.+ Nuhe e ko dopà dọ emi na wà lẹpo wẹ e dona wà.+
3 “Podọ eyin yọnnu de dopà de na Jehovah kavi yí ede do opà kadaninọ tọn de glọ to whenue e to jọja mẹ bo gbẹ́ pò to owhé otọ́ etọn tọn gbè 4 bọ otọ́ etọn sè opà he e ko do kavi opà kadaninọ tọn he glọ e ko yí ede* do lọ bo ma jẹagọdo, be opà he e ko do lọ lẹpo na gbọṣi aimẹ, podọ opà kadaninọ tọn he glọ e ko yí ede do lọ lẹpo na gbọṣi aimẹ. 5 Ṣigba, eyin otọ́ etọn gbẹ́ na ẹn to whenue e sè dọ e dopà kavi yí ede do opà kadaninọ tọn lẹ glọ, be opà lọ lẹ ma na gbọṣi aimẹ. Jehovah na jona ẹn, na otọ́ etọn ko gbẹ́ na ẹn wutu.+
6 “Ṣigba, eyin yọnnu lọ dà asu to whenue e tin to opà kavi opagbe sọmawhe tọn etọn glọ 7 bọ asu etọn sè dogbọn ehe dali bo ma jẹagọdo to gbeegbe ewọ sè, be opà yọnnu lọ tọn lẹ kavi opà kadaninọ tọn he glọ e ko yí ede do lọ lẹ na gbọṣi aimẹ. 8 Ṣigba, eyin asu etọn gbẹ́ na ẹn to gbeegbe ewọ sè, ewọ sọgan zẹhudo opà lọ kavi opagbe sọmawhe tọn he glọ yọnnu lọ ko yí ede do lọ ji,+ Jehovah nasọ jona yọnnu lọ.
9 “Ṣigba, eyin asuṣiọsi kavi yọnnu he ko basi gbẹdai de dopà, nuhe glọ ewọ ko yí ede do lọ lẹpo wẹ na gbọṣi aimẹ.
10 “Ṣigba, eyin yọnnu de dopà kavi yí ede do opà kadaninọ tọn de glọ to whenue e tin to ohọ̀ asu etọn tọn mẹ 11 bọ asu etọn sè bo ma jẹagọdo kavi ma glọnalina ẹn, be opà etọn lẹpo kavi opà kadaninọ tọn depope he glọ e ko yí ede do na gbọṣi aimẹ. 12 Ṣigba, eyin asu etọn zẹhudo opà kavi opà kadaninọ tọn depope he glọ e ko gbọn whiwhle dali yí ede do ji petepete to gbeegbe ewọ sè, be yé ma na gbọṣi aimẹ.+ Asu etọn ko zẹhudo yé ji, Jehovah nasọ jona yọnnu lọ. 13 Na nuhe dù opà depope kavi whiwhle depope he gando opà kadaninọ mẹdetiti-mimọ́n tọn go,* asu etọn wẹ dona hẹn ẹn lodo kavi zẹhudo e ji. 14 Ṣigba, eyin asu etọn ma jẹagọdo paali dile azán lẹ to yìyì, be ewọ lọsu ko hẹn opà yọnnu lọ tọn lẹpo kavi opà kadaninọ tọn etọn lẹpo lodo niyẹn. E ko hẹn yé lodo, na e ma jẹagọdo to gbeegbe e sè bọ yọnnu lọ dopà lọ lẹ. 15 Amọ́, eyin ewọ wá zẹhudo yé ji to godo mẹ, yèdọ ojlẹ de to gbeegbe e sè godo, be ewọ wẹ na hẹn agbàn whẹhuhu yọnnu lọ tọn.+
16 “Aṣẹdai he Jehovah degbe etọn na Mose gando asu po asi po go, podọ gando otọ́ po viyọnnu etọn he to jọja mẹ bo gbẹ́ pò to owhé etọn gbè po go lẹ niyẹn.”
31 To whenẹnu, Jehovah dọna Mose dọmọ: 2 “Yiahọsu+ na Islaelivi lẹ to Midianinu lẹ go.+ Enẹgodo, hiẹ na yin dìdì taidi tọgbo towe lẹ.”*+
3 Enẹwutu, Mose dọhona gbẹtọ lọ lẹ dọmọ: “Mì blagbajana sunnu lẹ sọn mì mẹ nado yì funawhàn sọta Midiani podọ nado hẹn ahọsuyi Jehovah tọn wá Midiani ji. 4 Mì dona do sunnu 1 000 hlan awhàn sọn hẹnnu Islaeli tọn lẹ dopodopo mẹ.” 5 Enẹwutu, sọn omẹ fọtọ́n Islaeli tọn lẹ mẹ,+ sunnu 1 000 yin dide sọn hẹnnu dopodopo mẹ, bọ sunnu 12 000 wẹ blagbajana awhàn.
6 To whenẹnu, Mose do yé hlan awhàn, yèdọ sunnu 1 000 sọn hẹnnu dopodopo mẹ, to pọmẹ hẹ Finehasi+ visunnu Eleazali tọn, he yin yẹwhenọ awhànpa lọ tọn, mẹhe tindo nuyizan wiwe lẹ po opẹ̀n+ nulila tọn lẹ po to alọmẹ. 7 Yé funawhàn hẹ Midiani, kẹdẹdile Jehovah ko degbe etọn na Mose do, yé sọ hù sunnu lẹpo. 8 Gbọnvona mẹdevo he yin hùhù lẹ, yé sọ hù ahọlu Midiani tọn lẹ, enẹ wẹ Ẹvi, Lekẹmi, Zuli, Huuli po Leba po, yèdọ ahọlu atọ́n Midiani tọn lẹ. Yé sọ yí ohí do hù Balaami+ visunnu Beoli tọn ga. 9 Ṣigba, Islaelivi lẹ bẹ yọnnu po yọpọvu Midiani tọn lẹ po di kanlinmọ lẹ. Yé sọ bẹ kanlin whégbè tọn yetọn lẹpo, kanlin-yìnyìn yetọn lẹpo, gọna nutindo yetọn lẹpo di ogblànnu lẹ. 10 Yé sọ yí miyọ́n do mẹ̀ tòdaho yetọn he mẹ yé ko sawhé do lẹpo gọna osla* yetọn lẹpo. 11 Yé sọ bẹ ogblànnu lọ lẹpo, yèdọ gbẹtọ lẹ po kanlin lẹ po. 12 Enẹgodo, yé hẹn kanlinmọ lọ lẹ po ogblànnu lọ lẹ po wá Mose, Eleazali yẹwhenọ lọ po pipli Islaelivi lẹ tọn po nukọn, to osla he tin to danfafa Moabi tọn ji+ lọ mẹ to Jọdani tó, sẹpọ Jẹliko.
13 To whenẹnu, Mose, Eleazali yẹwhenọ lọ po ahọvi pipli lọ tọn lẹpo po tọ́njẹgbonu nado yì pé yé to gbonu osla lọ tọn. 14 Ṣigba, Mose gblehomẹ do sunnu dide he tin to awhànpa lọ mẹ lẹ go, yèdọ ogán omẹ fọtọ́n lẹ tọn lẹ po ogán omẹ kanweko lẹ tọn lẹ po he ṣẹṣẹ gọ̀ sọn awhàngbenu. 15 Mose sọ dọna yé dọmọ: “Mìwlẹ pò yọnnu lẹpo dogbẹ̀ wẹ ya? 16 Mì pọ́n! Yewlẹ wẹ gbọn ohó Balaami tọn hihodo dali doyẹklọ Islaelivi lẹ nado yinuwa po nugbonọ-mayin po+ hlan Jehovah to whẹho Peọli tọn mẹ,+ bọ azọ̀nylankan lọ do wá pipli omẹ Jehovah tọn lẹ tọn ji.+ 17 Todin, mì dona hù sunnu he tin to yọpọvu lọ lẹ ṣẹnṣẹn lẹpo bosọ hù yọnnu he ko tindo kọndopọ zanhẹmẹ tọn hẹ sunnu de pọ́n lẹpo. 18 Ṣigba, mì sọgan pò yọnnu jọja he ma ko tindo kọndopọ zanhẹmẹ tọn hẹ sunnu de pọ́n lẹpo dogbẹ̀.+ 19 Podọ mì dona dosla do gbonu osla lọ tọn na azán ṣinawe. Mẹdepope to mì mẹ he ko hùmẹ* podọ mẹdepope he ko doalọ mẹkúkú de go+ to mì mẹ dona lẹ̀ ede wé+ to azán atọ̀ntọ gbè podọ to azán ṣinawetọ gbè, yèdọ mìwlẹ po kanlinmọ mìtọn lẹ po. 20 Mì sọ dona lẹ̀ avọ̀ mìtọn lẹpo wé sọn ylando mẹ, gọna núzinzan ayúnọ lẹpo, nuhe yè yí gbọgbọẹ-fún do basi lẹpo po núzinzan he yè yí owhlẹ do basi lẹpo po.”
21 Enẹgodo, Eleazali yẹwhenọ lọ dọna sunnu awhànfuntọ he ko yì awhàn lọ lẹ dọmọ: “Osẹ́n he Jehovah ko degbe etọn na Mose die, 22 ‘Sika, fataka, gànvẹẹ, gànyuu, panu po sunmí po kẹdẹ, 23 yèdọ nudepope he sọgan gbọn miyọ́n mẹ luntọ́n wẹ mìwlẹ na hẹn nado jugbọn miyọ́n mẹ, na e nido yin kiklọ́we. Ṣigba, yé sọ dona yin lilẹ̀wé po osin klọ́we tọn po.+ Nudepope he ma sọgan gbọn miyọ́n mẹ luntọ́n wẹ mìwlẹ dona klọ́we po osin po. 24 Mìwlẹ dona sọ yàn avọ̀ mìtọn lẹ wé to azán ṣinawetọ gbè nado lẹzun wiwe, podọ to enẹgodo mì sọgan biọ osla lọ mẹ.’”+
25 Jehovah sọ dọna Mose dọmọ: 26 “Basi todohukanji ogblànnu lọ lẹ tọn, bo hia kanlinmọ lọ lẹ, yèdọ gbẹtọ lẹ po kanlin lẹ po; basi ehe to pọmẹ hẹ Eleazali yẹwhenọ lọ po nukọntọ whédo otọ́ pipli lọ tọn lẹ tọn po. 27 Má ogblànnu lọ lẹ do awe, adà dopo na sunnu he yì awhàn lẹ podọ adà awetọ na pipotọ pipli lọ tọn pete.+ 28 Taidi takuẹ de hlan Jehovah, hiẹ dona yí alindọn* dopo to 500 ji sọn awhànfuntọ he yì awhàn lọ lẹ dopodopo si, yèdọ sọn gbẹtọ, kanlinpa, kẹtẹkẹtẹ po lẹngbọpa lọ lẹ po mẹ. 29 Mì dona de e sọn odaa he yin yetọn lọ mẹ bo ze e jo na Eleazali yẹwhenọ lọ taidi nunina Jehovah tọn.+ 30 Sọn odaa he yin nina Islaelivi lẹ mẹ, hiẹ dona yí dopo to 50 ji, yèdọ sọn gbẹtọ, kanlinpa, kẹtẹkẹtẹ, lẹngbọpa po kanlin whégbè tọn wunmẹ lẹpo po mẹ, bo bẹ yé jo na Levinu lẹ,+ he nọ penukundo azọngban he gando gòhọtúntún Jehovah tọn go lẹ go.”+
31 Enẹwutu, Mose po Eleazali yẹwhenọ lọ po basi kẹdẹdile Jehovah ko degbe etọn na Mose do. 32 Lẹndopọ pipotọ ogblànnu he mẹhe yì awhàn lọ lẹ bẹ gọ̀ tọn yin kanlin sọha 675 000 to lẹngbọpa lọ mẹ, 33 kanlin sọha 72 000 to kanlinpa lọ mẹ, 34 podọ kẹtẹkẹtẹ 61 000. 35 Lẹndopọ yọnnu he ma ko tindo kọndopọ zanhẹmẹ tọn hẹ sunnu+ de pọ́n lẹ tọn yin yọnnu* 32 000. 36 Lẹndopọ odaa he yin mimá na mẹhe yì awhàn lọ lẹ tọn yin kanlin sọha 337 500 to lẹngbọpa lọ mẹ. 37 Takuẹ he yin didedovo na Jehovah sọn lẹngbọpa lọ mẹ yin kanlin sọha 675. 38 Podọ kanlin sọha 36 000 wẹ to kanlinpa lọ mẹ, bọ takuẹ he yin didedovo sọn yé mẹ na Jehovah yin kanlin sọha 72. 39 Sọha kẹtẹkẹtẹ lẹ tọn sọ yin 30 500, bọ takuẹ he yin didedovo sọn yé mẹ na Jehovah yin kẹtẹkẹtẹ 61. 40 Podọ sọha gbẹtọ* lọ lẹ tọn yin 16 000, bọ takuẹ he yin didedovo sọn yé mẹ na Jehovah yin gbẹtọ* 32. 41 Enẹgodo, Mose bẹ takuẹ lọ jo na Eleazali yẹwhenọ lọ+ taidi nunina Jehovah tọn, kẹdẹdile Jehovah ko degbe etọn na Mose do.
42 Sọn odaa he yin Islaelivi lẹ tọn lọ mẹ, yèdọ dehe Mose ko má na yé sọn sunnu he yì awhàn lọ lẹ tọn go, 43 odaa lẹngbọpa tọn enẹ yin kanlin sọha 337 500, 44 bọ kanlinpa lọ tọn yin kanlin sọha 36 000, 45 podọ kẹtẹkẹtẹ lẹ tọn yin sọha 30 500, 46 bọ gbẹtọ* lẹ tọn yin sọha 16 000. 47 Mose sọ yí dopo to 50 ji sọn odaa he yin Islaelivi lẹ tọn lọ mẹ, yèdọ sọn gbẹtọ po kanlin lọ lẹ po mẹ, bo bẹ yé jo na Levinu lẹ,+ he nọ penukundo azọngban gòhọtúntún Jehovah tọn lọ tọn go,+ kẹdẹdile Jehovah ko degbe etọn na Mose do.
48 Todin, sunnu dide he tin to mimá awhànfuntọ fọtọ́n tọn lẹ ṣẹnṣẹn lẹ,+ yèdọ ogán omẹ fọtọ́n lẹ tọn lẹ po ogán omẹ kanweko lẹ tọn lẹ po dọnsẹpọ Mose, 49 bo dọna Mose dọmọ: “Devizọnwatọ towe lẹ ko hia sunnu awhànfuntọ he tin to aṣẹpipa mítọn glọ lẹ bọ dopo tata to mí mẹ ma whè.+ 50 Enẹwutu, gbọ dopodopo mítọn ni hẹn nuhe e mọ lẹ wá taidi avọ́nunina Jehovah tọn, yèdọ núzinzan sika tọn lẹ, afọgàn aṣọ́ tọn lẹ, alọgàn lẹ, alọkẹ hiadonugo tọn lẹ, tómẹnu lẹ po aṣọ́donu devo lẹ po, nado sọgan basi ovẹsè na míde* to Jehovah nukọn.”
51 Gbọnmọ dali, Mose po Eleazali yẹwhenọ lọ po kẹalọyi sika lọ lẹ po aṣọ́donu lọ lẹpo po sọn yé si. 52 Lẹndopọ sika he yé yí do basi nunina hlan Jehovah lọ lẹpo tọn yin ṣekẹli* 16 750, sọn ogán omẹ fọtọ́n lẹ tọn lẹ po ogán omẹ kanweko lẹ tọn lẹ po si. 53 Sunnu awhànfuntọ lọ lẹ dopodopo ko mọ ogblànnu lẹ yí. 54 Mose po Eleazali yẹwhenọ lọ po kẹalọyi sika lọ lẹ sọn ogán omẹ fọtọ́n lẹ tọn lẹ po ogán omẹ kanweko lẹ tọn lẹ po si bo bẹ yé yì gòhọ opli tọn lọ mẹ taidi nuflinmẹ* de na omẹ Islaeli tọn lẹ to Jehovah nukọn.
32 Todin, visunnu Leubẹni+ tọn lẹ po visunnu Gad+ tọn lẹ po tindo kanlin-yìnyìn susugege, yé sọ mọdọ aigba Jazẹli+ po Giliadi po tọn lẹ yin agbegbe de he yọ́n na kanlin-yìnyìn. 2 Enẹwutu, visunnu Gad tọn lẹ po visunnu Leubẹni tọn lẹ po dọnsẹpọ Mose, Eleazali yẹwhenọ lọ po ahọvi pipli lọ tọn lẹ po bo dọmọ: 3 “Atalọti, Dibọni, Jazẹli, Nimla, Hẹṣbọni,+ Eleale, Sebami, Nebo+ po Beọni po,+ 4 yèdọ aigba he Jehovah ko gbawhàn etọn to pipli Islaeli tọn nukọn+ yin aigba de he yọ́n na kanlin-yìnyìn, devizọnwatọ towe lẹ sọ tindo kanlin-yìnyìn susu.”+ 5 Yé sọ zindonukọn dọmọ: “Eyin míwlẹ ko mọ nukundagbe towe, gbọ ehe ni yin aigba he na yin nina devizọnwatọ towe lẹ taidi nutindo. A hẹn mí dasá Jọdani blo.”
6 To whenẹnu, Mose dọna visunnu Gad tọn lẹ po visunnu Leubẹni tọn lẹ po dọmọ: “Be nọvisunnu mìtọn lẹ na yì awhàn bọ mìwlẹ na gbọṣi fi wẹ ya? 7 Naegbọn mìwlẹ nado hẹn omẹ Islaeli tọn lẹ gbọjọ ma nado dasá yì aigba he Jehovah ko magbe nado na yé lọ ji? 8 Nuhe otọ́ mìtọn lẹ wà to whenue yẹn do yé hlan sọn Kadẹṣi-balnea nado yì dindona aigba lọ niyẹn.+ 9 To whenue yé hẹji yì Agbàdo* Ẹṣkoli tọn mẹ+ bo mọ aigba lọ, yé hẹn omẹ Islaeli tọn lẹ gbọjọ ma nado yì aigba he Jehovah jlo na na yé lọ ji.+ 10 Jehovah sọ gblehomẹ sinsinyẹn to gbenẹgbe bo whlé dọmọ:+ 11 ‘Sunnu he tọ́njẹgbonu sọn Egipti lẹ, yèdọ mẹhe tindo owhe 20 podọ humọ lẹ ma na mọ aigba lọ+ he yẹn ko whlé na Ablaham, Isaki po Jakọbu po,+ na yé ma hodo mi po ahun lẹpo po wutu— 12 adavo Kalẹbi+ visunnu Jẹfunnẹ Kenizinu lọ tọn po Jọṣua+ visunnu Nuni tọn po, na yewlẹ hodo Jehovah po ahun lẹpo po wutu.’+ 13 Enẹwutu wẹ Jehovah do gblehomẹ do Islaeli go sinsinyẹn bọ e hẹn yé sàlele gbọn danfafa ji na owhe 40,+ kakajẹ whenue whẹndo he to ylanwa to nukun Jehovah tọn mẹ lẹpo sudo.+ 14 Todin, mìlọsu ko sọ fọ́n tofi di otọ́ mìtọn lẹ, yèdọ taidi ovi ylandonọ lẹ tọn, he hẹn homẹgble Jehovah tọn sinyẹn deji sọta Islaeli. 15 Eyin mìwlẹ lẹkọ sọn hihodo e mẹ, ayihaawe ma tin dọ ewọ nasọ vọ́ jo yé do danfafa ji, bọ mì na hẹn vasudo wá omẹ ehe lẹpo ji.”
16 To godo mẹ, yé dọnsẹpọ ẹ bo dọmọ: “Gbọ mí ni yí zannu lẹ do dó apó na kanlin-yìnyìn mítọn lẹ dofi podọ tòdaho lẹ na ovi mítọn lẹ. 17 Ṣigba, mí na gbẹ́ sọawhànnu+ bo nọ nukọnna Islaelivi lẹ kakajẹ whenue mí na ko plan yé jẹ otẹn yetọn lẹ mẹ, amọ́ ovi mítọn lẹ na gbọṣi tòdaho gángán lẹ mẹ bo yin hihọ́-basina sọn mẹhe nọ nọ̀ aigba lọ ji lẹ si. 18 Mí ma na lẹkọwa owhé mítọn lẹ gbè kakajẹ whenue dopodopo Islaelivi lẹ tọn na ko mọ aigba etọn yí taidi ogú de.+ 19 Na míwlẹ ma na mọ ogú de yí po yé po to awà awetọ Jọdani tọn ji podọ sọn finẹ sọyi, na mí ko mọ ogú mítọn yí to whèzẹtẹn-waji Jọdani tọn.”+
20 Mose sọ gblọnna yé dọmọ: “Eyin mìwlẹ na wà ehe: Mì sọawhànnu to Jehovah nukọn;+ 21 podọ eyin dopodopo mìtọn sọawhànnu bo dasá Jọdani to Jehovah nukọn dile ewọ na to kẹntọ etọn lẹ yàn sẹ̀ sọn nukọn etọn+ 22 kakajẹ whenue aigba lọ na ko yin yíyí to Jehovah nukọn,+ enẹgodo mìwlẹ sọgan lẹkọ+ bo ma na hùwhẹ to Jehovah po Islaeli po nukọn. To whenẹnu, aigba ehe na lẹzun nutindo mìtọn to Jehovah nukọn.+ 23 Ṣigba, eyin mì ma wàmọ, be mì ko waylando do Jehovah. To whenẹnu, mì ni yọnẹn dọ mì na hẹn agbàn ylando mìtọn tọn. 24 Enẹwutu, mì sọgan gbá tòdaho lẹ na ovi mìtọn lẹ bo do apó na kanlin-yìnyìn mìtọn lẹ,+ ṣigba mìwlẹ dona wà nuhe mì ko dopà nado wà lọ.”
25 Visunnu Gad tọn lẹ po visunnu Leubẹni tọn lẹ po sọ dọna Mose dọmọ: “Devizọnwatọ towe lẹ na basi kẹdẹdile oklunọ ṣie ko degbe etọn do. 26 Ovi mítọn lẹ, asi mítọn lẹ, kanlin-yìnyìn mítọn lẹ po kanlin whégbè tọn mítọn lẹpo po na gbọṣi finẹ to tòdaho Giliadi tọn lẹ mẹ,+ 27 ṣigba devizọnwatọ towe lẹ na dasá yì, bọ sunnu dopodopo na sọawhànnu nado funawhàn to Jehovah nukọn,+ kẹdẹdile oklunọ ṣie to didọ do.”
28 Enẹwutu, Mose na gbedide de Eleazali yẹwhenọ lọ, Jọṣua visunnu Nuni tọn po nukọntọ whédo otọ́ hẹnnu Islaeli tọn lẹ po gando yewlẹ go. 29 Mose dọna yé dọmọ: “Eyin visunnu Gad tọn lẹ po visunnu Leubẹni tọn lẹ po dasá Jọdani hẹ mì, bọ sunnu yetọn lẹpo sọawhànnu to Jehovah nukọn, bọ mì yí aigba lọ, to whenẹnu mìwlẹ na na yé aigba Giliadi tọn taidi nutindo.+ 30 Ṣigba, eyin yé ma sọawhànnu bo dasá yì dọ́n hẹ mì, to whenẹnu yé na nọ nọ̀ ṣẹnṣẹn mìtọn to aigba Kenani tọn ji.”
31 Enẹwutu, visunnu Gad tọn lẹ po visunnu Leubẹni tọn lẹ po gblọn dọmọ: “Nuhe Jehovah ko dọna devizọnwatọ towe lẹ wẹ míwlẹ na wà. 32 Mí na sọawhànnu bo dasá yì aigba Kenani tọn ji to Jehovah nukọn,+ ṣigba aigba he na lẹzun ogú mítọn lọ na tin to awà Jọdani tọn ehe ji.” 33 Enẹwutu, Mose na yé—enẹ wẹ visunnu Gad tọn lẹ, visunnu Leubẹni tọn lẹ+ po mado-awe hẹnnu Manasse visunnu Josẹfu tọn+ po—ahọluduta Sihọni+ he yin ahọlu Amolinu lẹ tọn po ahọluduta Ogi+ he yin ahọlu Baṣani tọn po, yèdọ aigba tòdaho he tin to agbegbe enẹlẹ ji lẹ tọn po tòdaho aigba he lẹdo pé lẹ tọn po.
34 Visunnu Gad tọn lẹ sọ gbá* Dibọni,+ Atalọti,+ Aloeli,+ 35 Atlọti-ṣofani, Jazẹli,+ Jogbeha,+ 36 Bẹti-nimla+ po Bẹti-halani+ po, yèdọ tòdaho gángán lẹ, yé sọ yí zannu do dó apó na lẹngbọpa lẹ. 37 Visunnu Leubẹni tọn lẹ sọ gbá Hẹṣbọni,+ Eleale,+ Kiliataimi,+ 38 Nebo+ po Baali-meọni+ po—yinkọ tòdaho ehelẹ tọn ko yin didiọ—gọna Sibma ga; yé sọ jẹ yinkọ diọ na tòdaho he yé vọ́ gbá lẹ ji.
39 Visunnu Makili+ he yin visunnu Manasse tọn lẹ tọ́nawhàn Giliadi bo yí i bosọ yàn Amolinu he nọ nọ̀ finẹ lẹ sẹ̀. 40 Enẹwutu, Mose na aigba Giliadi tọn Makili visunnu Manasse tọn, bọ ewọ sọ nọ nọ̀ finẹ.+ 41 Jaili visunnu Manasse tọn sọ tọ́nawhàn yé bo yí gbétatò yetọn he gọ́ na gòhọ lẹ bo diọ yinkọ na yé do Havọti-jaili.*+ 42 Noba sọ tọ́nawhàn Kenati po tòpẹvi he to oglọ na ẹn* lẹ po bo yí yé, e sọ diọ yinkọ na ẹn do Noba sọgbe hẹ oyín edetiti tọn.
33 Whenue omẹ Islaeli tọn lẹ tọ́n sọn aigba Egipti tọn ji+ sọgbe hẹ awhàngọnu*+ yetọn lẹ to anademẹ Mose po Aalọn po tọn glọ,+ lehe yé sẹtẹn sọn fide jẹ fide to gbejizọnlin yetọn whenu do die. 2 Dile Jehovah degbe etọn do, Mose nọ to todohukanji fihe yé sẹtẹn sọn lẹ tọn basi dile yé to yìyì sọn fide jẹ fide to gbejizọnlin yetọn whenu, lehe yé nọ sẹtẹn sọn fide jẹ fidevo do lẹ die:+ 3 Yé sẹtẹn sọn Lamesesi+ to osun tintan mẹ, to azán 15tọ osun lọ tọn gbè.+ To wunkẹngbe Juwayi tọn tlolo,+ Islaelivi lẹ tọ́njẹgbonu po adọgbigbo* po to nukun Egiptinu lẹpo tọn mẹ. 4 To ojlẹ enẹ mẹ, Egiptinu lẹ to viplọnji yetọn lẹpo he Jehovah ko hù to ṣẹnṣẹn yetọn lẹ di,+ na Jehovah ko hẹn whẹdida ṣẹ do yẹwhe yetọn lẹ ji wutu.+
5 Enẹwutu, Islaelivi lẹ sẹtẹn sọn Lamesesi bo dosla do Sukoti.+ 6 Yé sọ sẹtẹn sọn Sukoti bo dosla do Ẹtami,+ he tin to bẹbẹnu danfafa lọ tọn. 7 Enẹgodo, yé sẹtẹn sọn Ẹtami bo lilẹ́ pànta Pihahiloti, he pannukọn Baali-zefoni,+ yé sọ dosla do Migdoli+ nukọn. 8 Yé sọ sẹtẹn sọn Pihahiloti bo jugbọn ohù lọ ṣẹnṣẹn+ jẹ danfafa+ ji bo zingbejizọnlin na azán atọ̀n to danfafa Ẹtami+ tọn ji bosọ dosla do Mala.+
9 Enẹgodo, yé sẹtẹn sọn Mala bo wá Elimi. Todin, asisa osin tọn 12 po odétin 70 po wẹ tin to Elimi finẹ, enẹwutu yé dosla do finẹ.+ 10 Yé sọ sẹtẹn sọn Elimi bo dosla do Ohù Vẹẹ tó. 11 Enẹgodo, yé sẹtẹn sọn Ohù Vẹẹ tó bo dosla do danfafa Sini tọn ji.+ 12 Yé sọ sẹtẹn sọn danfafa Sini tọn ji bo dosla do Dọfka. 13 To godo mẹ, yé sẹtẹn sọn Dọfka bo dosla do Aluṣi. 14 Yé sọ sẹtẹn sọn Aluṣi bo dosla do Lefidimi,+ fihe gbẹtọ lọ lẹ ma mọ osin nado nù te. 15 Enẹgodo, yé sẹtẹn sọn Lefidimi bo dosla do danfafa Sinai tọn ji.+
16 Yé sẹtẹn sọn danfafa Sinai tọn ji bo dosla do Kiblọti-hataava.+ 17 Yé sọ sẹtẹn sọn Kiblọti-hataava bo dosla do Hazelọti.+ 18 Enẹgodo, yé sẹtẹn sọn Hazelọti bo dosla do Litma. 19 Yé sọ sẹtẹn sọn Litma bo dosla do Limọni-pelẹzi. 20 Enẹgodo, yé sẹtẹn sọn Limọni-pelẹzi bo dosla do Libna. 21 Yé sọ sẹtẹn sọn Libna bo dosla do Lisa. 22 Yé sọ sẹtẹn sọn Lisa bo dosla do Kehelata. 23 Enẹgodo, yé sẹtẹn sọn Kehelata bo dosla do Osó Ṣẹfeli kọ̀n.
24 Todin, yé sẹtẹn sọn Osó Ṣẹfeli kọ̀n bo dosla do Halada. 25 Yé sọ sẹtẹn sọn Halada bo dosla do Makhelọti. 26 Enẹgodo, yé sẹtẹn+ sọn Makhelọti bo dosla do Tahati. 27 Yé sọ sẹtẹn sọn Tahati bo dosla do Tela. 28 Yé sọ sẹtẹn sọn Tela bo dosla do Mitka. 29 To godo mẹ, yé sẹtẹn sọn Mitka bo dosla do Haṣmona. 30 Yé sọ sẹtẹn sọn Haṣmona bo dosla do Mọselọti. 31 Enẹgodo, yé sẹtẹn sọn Mọselọti bo dosla do Bene-jaakani.+ 32 Yé sọ sẹtẹn sọn Bene-jaakani bo dosla do Holi-hagidgadi. 33 Yé sọ sẹtẹn sọn Holi-hagidgadi bo dosla do Jọtbata.+ 34 To godo mẹ, yé sẹtẹn sọn Jọtbata bo dosla do Ablona. 35 Yé sọ sẹtẹn sọn Ablona bo dosla do Ezioni-gebeli.+ 36 Yé sọ sẹtẹn sọn Ezioni-gebeli bo dosla do danfafa Zini tọn ji,+ yèdọ Kadẹṣi.
37 Enẹgodo, yé sẹtẹn sọn Kadẹṣi bo dosla do Osó Họli kọ̀n,+ to dogbó aigba Edomi tọn ji. 38 Aalọn yẹwhenọ lọ sọ hẹji yì Osó Họli ji sọgbe hẹ gbedide Jehovah tọn bo kú do finẹ to owhe 40tọ mẹ to whenue Islaelivi lẹ ko tọ́n sọn aigba Egipti tọn ji godo, to osun atọ́ntọ mẹ, to azán tintan osun lọ tọn gbè.+ 39 Owhe 123 wẹ Aalọn tindo to whenue e kú to Osó Họli ji.
40 Todin, ahọlu Aladi tọn,+ yèdọ Kenaninu lọ he nọ nọ̀ Negẹb to aigba Kenani tọn ji sè dogbọn wiwá Islaelivi lẹ tọn dali.
41 To nukọn mẹ, yé sẹtẹn sọn Osó Họli kọ̀n+ bo dosla do Zalmona. 42 Yé sọ sẹtẹn sọn Zalmona bo dosla do Punoni. 43 Enẹgodo, yé sẹtẹn sọn Punoni bo dosla do Oboti.+ 44 Yé sọ sẹtẹn sọn Oboti bo dosla do Iye-abalimi, to dogbó Moabi tọn ji.+ 45 To godo mẹ, yé sẹtẹn sọn Iyimi bo dosla do Dibọni-gadi.+ 46 Yé sọ sẹtẹn sọn Dibọni-gadi bo dosla do Almọni-diblataimi. 47 Enẹgodo, yé sẹtẹn sọn Almọni-diblataimi bo dosla do osó Abalimi tọn lẹ kọ̀n+ to Nebo+ nukọn. 48 Gbọngodo, yé sẹtẹn sọn osó Abalimi tọn lẹ kọ̀n bo dosla do danfafa Moabi tọn ji to Jọdani tó, sẹpọ Jẹliko.+ 49 Yé zindonukọn nado dosla do Jọdani tó, yèdọ sọn Bẹti-jẹṣimọti kaka yì Abẹli-ṣitimi,+ to danfafa Moabi tọn ji.
50 Jehovah dọhona Mose to danfafa Moabi tọn ji to Jọdani tó, sẹpọ Jẹliko dọmọ: 51 “Dọhona Islaelivi lẹ bo dọna yé dọ, ‘Mìwlẹ jlo na dasá Jọdani yì aigba Kenani tọn ji.+ 52 Mì dona yàn mẹhe nọ nọ̀ aigba lọ ji lẹpo sẹ̀ sọn nukọn mìtọn bo gbà boṣiọ yetọn he yè yí zannu pipà+ do basi lẹ po boṣiọ kinkọ̀n+ yetọn lẹpo po hányán, mì sọ dona họ́ ofi wiwe yiaga yetọn lẹpo liai.+ 53 Mìwlẹ nasọ yí aigba lọ bo nọ nọ̀ e ji, na yẹn na yí aigba lọ na mì taidi nutindo de dandan.+ 54 Mì dona gbọn ovò dide+ dali má aigba lọ taidi nutindo de to whẹndo mìtọn lẹ ṣẹnṣẹn. Na pipli daho lẹ, mì dona hẹn ogú yetọn klo, podọ na pipli pẹvi lẹ, mì dona de ogú yetọn pò.+ Fihe ovò dena mẹdopodopo wẹ na yin ogú etọn. Mì na mọ aigba mìtọn yí taidi ogú de sọgbe hẹ hẹnnu otọ́ mìtọn lẹ tọn lẹ.+
55 “‘Ṣigba, eyin mìwlẹ ma yàn mẹhe nọ nọ̀ aigba lọ ji lẹ sẹ̀ sọn nukọn mìtọn,+ mẹhe mì na dotẹnmẹ nado gbọṣi finẹ lẹ na wá taidi onú fifiẹ lẹ to nukun mìtọn lẹ ji podọ taidi owùn lẹ to adà mẹ na mì, yé nasọ nọ yangbé mìtọn to aigba he ji mì na nọ nọ̀.+ 56 Yẹn nasọ wà nuhe yẹn to linlẹn nado wà na yé na mì.’”+
34 Jehovah sọ zindonukọn nado dọhona Mose dọmọ: 2 “Na anademẹ ehelẹ Islaelivi lẹ dọmọ: ‘To whenue mì jẹ aigba Kenani tọn ji,+ aigba he na yin nina mì taidi ogú, yèdọ aigba Kenani tọn po dogbó etọn lẹ po die.+
3 “‘Dogbó mìtọn hùwaji tọn na dlẹnkan sọn danfafa Zini tọn he pannukọn Edomi lọ ji, bọ dogbó mìtọn hùwaji tọn to whèzẹtẹn na bẹsọn vivọnu Ohù Ojẹ̀ tọn* lọ tọn.+ 4 Dogbó mìtọn na lilẹ́ bo gbọn agawaji Aklabimi tọn+ sin hùwaji bo gbọnmọ yì Zini, bo na nọte do hùwaji Kadẹṣi-balnea+ tọn. Enẹgodo, e na dlẹnkan yì Hazali-adali+ bo zindonukọn yì Azmọni. 5 Dogbó lọ na lilẹ́ to Azmọni dedo Agbàdo Tọ̀sisa tọn* Egipti tọn mẹ, bo na nọte do Ohù lọ* kọ̀n.+
6 “‘Dogbó mìtọn to whèyihọ-waji na yin agé Ohù Daho lọ* tọn. Fihe na lẹzun dogbó mìtọn to whèyihọ-waji niyẹn.+
7 “‘Todin, fihe na yin dogbó mìtọn to agewaji die: Mì na de dogbó mìtọn sọn Ohú Daho lọ kọ̀n kaka yì Osó Họli kọ̀n. 8 Podọ sọn Osó Họli kọ̀n, mì na de dogbó mìtọn yì Lebo-Hamati,*+ bọ dogbó lọ na nọte do Zedadi.+ 9 Dogbó lọ nasọ dlẹnkan yì Zifloni bo na nọte do Hazali-enani.+ Fihe na lẹzun dogbó mìtọn to agewaji niyẹn.
10 “‘Enẹgodo, mì dona de dogbó mìtọn to whèzẹtẹn-waji sọn Hazali-enani yì Ṣefami. 11 Dogbó lọ na dlẹnkan sọn Ṣefami yì Libla bo dedo whèzẹtẹn-waji Aini tọn, dogbó lọ nasọ jẹte bo dasá dòdòmẹ he to whèzẹtẹn-waji Ohù Kinnelẹti tọn*+ dedo. 12 Dogbó lọ na dlẹnkan yì Jọdani bo na nọte do Ohú Ojẹ̀ tọn kọ̀n.+ Aigba mìtọn+ po dogbó etọn lẹ po lẹdo pé niyẹn.’”
13 Enẹwutu, Mose na anademẹ Islaelivi lẹ dọmọ: “Aigba he mìwlẹ na má taidi nutindo mìtọn gbọn ovò dide dali+ lọ niyẹn, kẹdẹdile Jehovah ko degbe nado na hẹnnu ṣinẹnẹ daa lọ lẹ do. 14 Na hẹnnu Leubẹninu lẹ tọn, sọgbe hẹ whédo otọ́ yetọn tọn, gọna hẹnnu Gadinu lẹ tọn, sọgbe hẹ whédo otọ́ yetọn tọn po mado-awe hẹnnu Manasse tọn po ko yí ogú yetọn.+ 15 Hẹnnu awe-daa lọ lẹ ko yí ogú yetọn to whèzẹtẹn-waji lẹdo Jọdani tọn sẹpọ Jẹliko, yèdọ hlan fihe owhè nọ zẹ̀ sọn.”+
16 Jehovah zindonukọn nado dọhona Mose dọmọ: 17 “Yinkọ sunnu he na má aigba lọ na mì lẹ tọn die: Eleazali+ yẹwhenọ lọ po Jọṣua+ visunnu Nuni tọn po. 18 Mìwlẹ nasọ de ahọvi dopo sọn hẹnnu dopodopo mẹ nado má aigba lọ na mì taidi ogú.+ 19 Yinkọ sunnu lọ lẹ tọn die: sọn hẹnnu Juda+ tọn mẹ, Kalẹbi+ visunnu Jẹfunnẹ tọn; 20 sọn hẹnnu visunnu Simeoni+ tọn lẹ tọn mẹ, Ṣemuẹli visunnu Amihudi tọn; 21 sọn hẹnnu Bẹnjamini+ tọn mẹ, Elidadi visunnu Kisloni tọn; 22 sọn hẹnnu visunnu Dani+ tọn lẹ tọn mẹ, ahọvi de, yèdọ Buki visunnu Jogli tọn; 23 sọn visunnu Josẹfu+ tọn lẹ mẹ to hẹnnu visunnu Manasse+ tọn lẹ tọn mẹ, ahọvi de, yèdọ Hanniẹli visunnu Efodi tọn; 24 to hẹnnu visunnu Eflaimi+ tọn lẹ tọn mẹ, ahọvi de, yèdọ Kemuẹli visunnu Ṣiftani tọn; 25 sọn hẹnnu visunnu Zebuluni+ tọn lẹ tọn mẹ, ahọvi de, yèdọ Elizafani visunnu Palnaki tọn; 26 sọn hẹnnu visunnu Isakali+ tọn lẹ tọn mẹ, ahọvi de, yèdọ Paltiẹli visunnu Azani tọn; 27 sọn hẹnnu visunnu Aṣeli+ tọn lẹ tọn mẹ, ahọvi de, yèdọ Ahihudi visunnu Ṣelomi tọn; 28 sọn hẹnnu visunnu Naftali+ tọn lẹ tọn mẹ, ahọvi de, yèdọ Pedahẹli visunnu Amihudi tọn.” 29 Omẹ ehelẹ wẹ Jehovah degbena nado má aigba lọ na Islaelivi lẹ to aigba Kenani tọn ji.+
35 Jehovah zindonukọn nado dọhona Mose to danfafa Moabi tọn ji to Jọdani tó,+ sẹpọ Jẹliko dọmọ: 2 “Na anademẹ Islaelivi lẹ dọ sọn ogú he yé na mọyi lẹ mẹ, yé dona na tòdaho lẹ Levinu lẹ nado nọ nọ̀ e mẹ,+ podọ yé dona na kanlindugbo Levinu lẹ lẹdo tòdaho lọ lẹ pé.+ 3 Yewlẹ na nọ nọ̀ tòdaho lọ lẹ mẹ, bọ kanlindugbo lọ lẹ na tin na kanlin-yìnyìn yetọn lẹ, nutindo yetọn lẹ, gọna kanlin yetọn devo lẹpo. 4 Kanlindugbo tòdaho lọ lẹ he mì na na Levinu lẹ tọn lẹ na gblo na awagbà* 1 000 sọn adó tòdaho lọ tọn kọ̀n lẹdo pé. 5 To gbonu tòdaho lọ tọn, mìwlẹ dona jlẹ awagbà 2 000 to whèzẹtẹn-waji, awagbà 2 000 to hùwaji, awagbà 2 000 to whèyihọ-waji, podọ awagbà 2 000 to agewaji, bọ tòdaho lọ na tin to ṣẹnṣẹn. Ehelẹ wẹ na yin kanlindugbo tòdaho yetọn lẹ tọn lẹ.
6 “Tòdaho he mì na na Levinu lẹ na bẹ tòdaho fibẹtado tọn 6 hẹn,+ ehe mẹ hlọnhutọ na nọ họnyi,+ gọna tòdaho 42 devo lẹ. 7 To lẹndopọ mẹ, tòdaho 48 wẹ mì dona na Levinu lẹ, to pọmẹ hẹ kanlindugbo yetọn lẹ.+ 8 Tòdaho he mì na na yé lẹ na yin didesọn nutindo Islaelivi lẹ tọn mẹ.+ Mì na yí susu sọn pipli daho lọ tọn mẹ bo na yí vude sọn pipli pẹvi lọ tọn mẹ.+ Pipli dopodopo na na tòdaho etọn delẹ Levinu lẹ sọgbe hẹ ogú he e mọyi.”
9 Jehovah zindonukọn nado dọhona Mose dọmọ: 10 “Dọhona Islaelivi lẹ bo dọna yé dọ, ‘Mìwlẹ jlo na dasá Jọdani nado yì aigba Kenani tọn ji.+ 11 Mì dona de tòdaho he mẹ e bọawu nado yì lẹ na mìde taidi tòdaho fibẹtado tọn lẹ, ehe mẹ hlọnhutọ he hùmẹ* to mayọnẹn mẹ dona nọ họnyi.+ 12 Tòdaho ehelẹ na yin fibẹtado de na mì sọn alọ ahọsuyitọ ohùn tọn+ lọ tọn mẹ, bọ hlọnhutọ lọ ma nado yin hùhù kakajẹ whenue e na yin whẹdana to pipli lọ nukọn.+ 13 Tòdaho fibẹtado tọn ṣidopo he mì na wleawuna lọ lẹ wẹ na tin na lẹndai ehe. 14 Mì na wleawuna tòdaho atọ̀n to awà Jọdani tọn ehe ji + podọ tòdaho atọ̀n to aigba Kenani tọn ji+ nado yin tòdaho fibẹtado tọn lẹ. 15 Tòdaho ṣidopo ehelẹ na yin fibẹtado de na Islaelivi lẹ, na mẹhe to jonọ-gbéji lẹ podọ na gbéjinọtọ+ he to ṣẹnṣẹn yetọn lẹ, na mẹdepope he hùmẹ* to mayọnẹn mẹ nido nọ họnyi finẹ.+
16 “‘Ṣigba, eyin ewọ yí núzinzan gànyuu tọn de do linú in bọ e kú, be hlọnhutọ de wẹ ewọ. Hlọnhutọ lọ dona yin hùhù dandan.+ 17 Podọ eyin ewọ yí zannu he sọgan hùmẹ de do linú in bọ e kú, be hlọnhutọ de wẹ ewọ. Hlọnhutọ lọ dona yin hùhù dandan. 18 Podọ eyin ewọ yí núzinzan owhlẹ tọn de do linú in bọ e kú, be hlọnhutọ de wẹ ewọ. Hlọnhutọ lọ dona yin hùhù dandan.
19 “‘Ahọsuyitọ ohùn tọn lọ wẹ na hù hlọnhutọ lọ. Eyin e dukosọ hẹ ẹ, ewọ wẹ na hù i. 20 Eyin na wangbẹna wutu wẹ ewọ sisẹ́ ẹ kavi eyin e dlan nude do e po linlẹn ylankan po* bọ e kú,+ 21 kavi eyin na wangbẹna wutu wẹ ewọ yí alọ etọn do linú in bọ e kú, mẹhe linú in lọ na yin hùhù dandan. Hlọnhutọ de wẹ ewọ. Ahọsuyitọ ohùn tọn lọ na hù hlọnhutọ lọ eyin e dukosọ hẹ ẹ.
22 “‘Ṣigba, eyin to mayọnẹn mẹ wẹ ewọ sisẹ́ ẹ kavi dlan nude do e, bọ e ma yin na wangbẹna kavi linlẹn ylankan wutu,*+ 23 kavi eyin ewọ ma mọ ẹn bo hẹn zannu de nado flẹ jẹ e ji, podọ eyin ewọ ma yin kẹntọ etọn kavi ma ko to ylankan etọn dín dai, bọ mẹlọ kú, 24 to whenẹnu pipli lọ dona dawhẹ to mẹhe hùmẹ lọ po ahọsuyitọ ohùn tọn lọ po ṣẹnṣẹn, sọgbe hẹ osẹ́ndoai ehelẹ.+ 25 Gbọnmọ dali, pipli lọ dona whlẹn hlọnhutọ lọ sọn alọ ahọsuyitọ ohùn tọn lọ tọn mẹ bo gọ̀ ẹ dohlan tòdaho fibẹtado tọn etọn he mẹ e ko họnyi lọ mẹ, bọ e dona gbọṣi finẹ kakajẹ whenue yẹwhenọ daho lọ he yè yí amì wiwe do de+ nado kú.
26 “‘Ṣigba, eyin hlọnhutọ lọ dasá dogbó tòdaho fibẹtado tọn etọn he mẹ e ko họnyi lọ tọn 27 bọ ahọsuyitọ ohùn tọn lọ mọ ẹn to gbonu tòdaho fibẹtado tọn lọ tọn bo hù i, ewọ ma duhùnhọ. 28 Na ewọ ma dona tọ́njẹgbonu sọn tòdaho fibẹtado tọn lọ mẹ kakajẹ whenue yẹwhenọ daho lọ nado kú. Ṣigba, to okú yẹwhenọ daho lọ tọn godo, hlọnhutọ lọ sọgan lẹkọyi aigba etọn titi ji.+ 29 Onú ehelẹ dona yin osẹ́ndoai de nado dawhẹ to whẹndo mìtọn lẹpo mẹ to fidepope he mì nọ nọ̀.
30 “‘Mẹdepope he hùmẹ* dona yin hùhù taidi hlọnhutọ+ de eyin kunnudetọ lẹ dekunnu sọta ẹ;+ ṣigba mẹdepope* ma dona yin hùhù to dodonu kunnudide mẹdopo poun tọn ji. 31 Mìwlẹ ma dona yí ofligọ depope do ogbẹ̀* hlọnhutọ he jẹna okú de tọn tamẹ gba, na ewọ dona yin hùhù dandan.+ 32 Mì masọ dona yí ofligọ do mẹhe ko họnyi tòdaho fibẹtado tọn etọn mẹ de tamẹ, bo na ẹn dotẹnmẹ nado lẹkọwa nọ aigba etọn ji jẹnukọnna okú yẹwhenọ daho lọ tọn gba.
33 “‘Mìwlẹ ma dona hẹn aigba he ji mì nọ nọ̀ lọ flu gba, na ohùn nọ hẹn aigba flu,+ podọ ovẹsè devo de ma tin na ohùn he ko yin sinsọndai to aigba lọ ji, adavo ohùn mẹhe sọ̀n ẹn dai lọ tọn.+ 34 Hiẹ ma dona hẹn aigba he ji mì nọ nọ̀ lọ flu, yèdọ aigba he ji yẹn lọsu nọ nọ̀; na yẹn Jehovah nọ nọ̀ omẹ Islaeli tọn lẹ ṣẹnṣẹn.’”+
36 Nukọntọ whẹndo kúnkan Giliadi tọn lẹ, yèdọ visunnu Makili+ he yin visunnu Manasse tọn sọn whẹndo visunnu Josẹfu tọn lẹ tọn mẹ dọnsẹpọ bo dọho to Mose po ahọvi lẹ po, yèdọ nukọntọ whẹndo Islaelivi lẹ tọn lẹ nukọn. 2 Yé dọmọ: “Jehovah degbena oklunọ ṣie nado má aigba lọ na Islaelivi lẹ taidi ogú de gbọn ovò dide dali;+ Jehovah sọ degbena oklunọ ṣie ga nado ze ogú nọvisunnu mítọn Zelofehadi tọn jo na viyọnnu etọn lẹ.+ 3 Eyin yé wlealọ hẹ sunnu he wá sọn hẹnnu Islaeli tọn devo mẹ lẹ, to whenẹnu ogú yọnnu lọ lẹ tọn na yin didesọn ogú otọ́ mítọn lẹ tọn go bo na yin yiyidogọna ogú hẹnnu he dà yé lọ tọn, bọ e na yin didesọn ogú mítọn go. 4 Todin, eyin Jubile*+ wá aimẹ na omẹ Islaeli tọn lẹ, ogú yọnnu lọ lẹ tọn nasọ yin yiyidogọna ogú hẹnnu he dà yé lọ tọn to whenẹnu, gbọnmọ dali ogú yetọn na yin didesọn ogú hẹnnu otọ́ mítọn lẹ tọn go.”
5 To whenẹnu, Mose degbena Islaelivi lẹ dile Jehovah ko degbena ẹn do dọmọ: “Nuhe hẹnnu visunnu Josẹfu tọn lẹ tọn to didọ lọ sọgbe. 6 Nuhe Jehovah dọ gando viyọnnu Zelofehadi tọn lẹ go die: ‘Yé sọgan wlealọ hẹ mẹdepope he jlo yé. Ṣigba, yé dona wlealọ hẹ mẹhe wá sọn whẹndo hẹnnu otọ́ yetọn tọn mẹ. 7 Ogú Islaelivi lẹ tọn depope ma dona tọ́n sọn hẹnnu de mẹ yì hẹnnu devo mẹ, na dopodopo Islaelivi lẹ tọn dona hẹn ogú he yin nina hẹnnu tọgbo yetọn lẹ tọn go. 8 Podọ viyọnnu depope he tindo ogú de to hẹnnu Islaeli tọn lẹ ṣẹnṣẹn dona lẹzun asi na mẹde he wá sọn kúnkan hẹnnu otọ́ etọn tọn mẹ,+ na Islaelivi lẹ nido hẹn ogú he yin nina tọgbo yetọn lẹ lọ go. 9 Ogú depope ma dona tọ́n sọn hẹnnu de mẹ yì hẹnnu devo mẹ, na hẹnnu Islaeli tọn lẹ dopodopo dona hẹn ogú yetọn titi go.’”
10 Viyọnnu Zelofehadi tọn lẹ basi kẹdẹdile Jehovah ko degbena Mose do.+ 11 Enẹwutu, viyọnnu Zelofehadi tọn lẹ,+ yèdọ Mahla, Tilza, Hogla, Milka po Noa po wlealọ hẹ visunnu nọvisunnu otọ́ yetọn tọn lẹ. 12 Yé lẹzun asi na sunnu he wá sọn whẹndo Manasse, visunnu Josẹfu tọn mẹ lẹ, na ogú yetọn nido gbọṣi hẹnnu whẹndo otọ́ yetọn tọn mẹ.
13 Ehelẹ wẹ gbedide po nudide whẹdida tọn lẹ po he Jehovah na Islaelivi lẹ gbọn Mose gblamẹ to danfafa Moabi tọn ji to Jọdani tó, sẹpọ Jẹliko.+
To paa mẹ, “visunnu Islaeli tọn.”
Kavi “ota dopodopo yetọn tọn.”
To paa mẹ, “awhànpa.”
To paa mẹ, “jonọ depope,” enẹ wẹ, mẹhe ma yin Levinu de.
Kavi “yèdọ sunnu dopodopo to ohia etọn kọ̀n.”
To paa mẹ, “awhànpa.”
Kavi “nọ basi hihọ́na; nọ wà sinsẹ̀nzọn to.”
To paa mẹ, “awhànpa.”
To paa mẹ, “awhànpa.”
To paa mẹ, “awhànpa.”
To paa mẹ, “awhànpa.”
To paa mẹ, “he alọ yetọn yin hinhẹn gọ́.”
To paa mẹ, “jonọ depope,” enẹ wẹ, mẹdepope he ma wá sọn whẹndo Aalọn tọn mẹ.
To paa mẹ, “viplọnji he hùn vidọ̀.”
Kavi “họmẹgbòvọ̀.”
Kavi “họmẹgbòvọ̀.”
Kavi “họmẹgbòvọ̀.”
To paa mẹ, “Jonọ depope,” enẹ wẹ, mẹhe ma yin Levinu de.
Ṣekẹli dopo sọzẹn hẹ g 11,4. Pọ́n Nud. B14.
Kavi “sọgbe hẹ ṣekẹli wiwe lọ.”
Gela dopo sọzẹn hẹ g 0,57. Pọ́n Nud. B14.
Enẹ wẹ, ayú kanlin he nọ nọ̀ hùmẹ de tọn.
Kavi “afín he gọ́ na ojó,” enẹ wẹ, afín he ojó avọ́sinsan lẹ tọn ko hẹn yọ̀n.
To paa mẹ, “Agbàn.”
Kavi “họmẹgbòvọ̀.”
Kavi “họmẹgbòvọ̀.”
Kavi “alindọn.” Pọ́n Zẹm.
Kavi “yẹn to gòhọtúntún doai do.”
Kavi “alindọn enẹ.”
To paa mẹ, “Yé.”
To paa mẹ, “yé.”
Mado-ao efa dopo tọn sọzẹn hẹ L 2,2. Pọ́n Nud. B14.
E họnwun dọ ehe to alọdlẹndo vijinu.
Kavi “nado gble.” Ehe sọgan zẹẹmẹdo nugopipe vijiji tọn hinhẹnbu.
E họnwun dọ ehe to alọdlẹndo vijinu.
Kavi “nado gble.” Ehe sọgan zẹẹmẹdo nugopipe vijiji tọn hinhẹnbu.
Kavi “Amẹn” to Heblugbe mẹ.
E họnwun dọ ehe to alọdlẹndo vijinu.
Kavi “nado gble.” Ehe sọgan zẹẹmẹdo nugopipe vijiji tọn hinhẹnbu.
To Heblugbe mẹ, nazir, zẹẹmẹdo, “Mẹhe Yin Didedovo; Mẹhe Yin Kinklandowiwe; Mẹhe Yin Kinklandovo.”
Kavi “alindọn.” Pọ́n Zẹm.
Kavi “hẹn ota Nazili-yinyin etọn tọn flu.”
Kavi “alindọn.” Pọ́n Zẹm.
Kavi “whlẹ́ ota Nazili-yinyin etọn tọn.”
Kavi “oyìnsú sisá.”
Ṣekẹli dopo sọzẹn hẹ g 11,4. Pọ́n Nud. B14.
Kavi “sọgbe hẹ ṣekẹli wiwe lọ.”
Kavi “agbán pẹvi.”
To paa mẹ, “ewọ.”
To paa mẹ, “mimí Levinu lẹ,” enẹ wẹ, nado hẹn yigodo yinukọn.
To paa mẹ, “mimí yé,” enẹ wẹ, nado hẹn yigodo yinukọn.
To paa mẹ, “mimí yé,” enẹ wẹ, nado hẹn yigodo yinukọn.
Kavi “viplọnji he hùn vidọ̀.”
To paa mẹ, “mimí yé,” enẹ wẹ, nado hẹn yigodo yinukọn.
To paa mẹ, “to whèjai awe lẹ ṣẹnṣẹn,” vlavo ehe zẹẹmẹdo bẹsọn whenue owhè ko yihọ jẹ whenue zinvlu do.
To paa mẹ, “to whèjai awe lẹ ṣẹnṣẹn,” vlavo ehe zẹẹmẹdo bẹsọn whenue owhè ko yihọ jẹ whenue zinvlu do.
Kavi “gbọn alindọn gbẹtọ tọn de dali.”
Kavi “na alindọn gbẹtọ tọn de wutu.”
Kavi “gbọn alindọn de dali.”
To paa mẹ, “to whèjai awe lẹ ṣẹnṣẹn,” vlavo ehe zẹẹmẹdo bẹsọn whenue owhè ko yihọ jẹ whenue zinvlu do.
Kavi “alindọn enẹ.”
Kavi “hùhù.”
To paa mẹ, “awhànpa.”
To paa mẹ, “awhànpa.”
To paa mẹ, “awhànpa.”
To paa mẹ, “awhànpa.”
To paa mẹ, “sọgbe hẹ awhànpa yetọn.”
Enẹ wẹ, Jẹtlo.
Kavi “nukun.”
Kavi “omẹ fọtọ́n ao donu fọtọ́n.”
Zẹẹmẹdo “Miyọ́n Jiji,” enẹ wẹ, miyọ́n daho; ozò.
Ehe na ko to alọdlẹndo mẹhe ma yin Islaelivi to ṣẹnṣẹn yetọn lẹ.
Kavi “alindọn mítọn.”
Kavi “sunnu nukunpedomẹgotọ.”
Kavi “jẹ dọdai dọ ji.”
Awagbà dopo sọzẹn hẹ cm 44,5. Pọ́n Nud. B14.
Homẹli dopo sọzẹn hẹ L 220. Pọ́n Nud. B14.
Zẹẹmẹdo “Ṣiọditẹn Mẹhe Do Ojlo Sinsinyẹn Hia lẹ Tọn.”
Kavi “yin whiwhẹnọ (walọmimiọnnọ) taun, yèdọ hugan mẹdevo depope he.”
To paa mẹ, “To owhé ṣie pete gbè, ewọ to ede dohia nado yin nugbonọ.”
To paa mẹ, “onù hlan onù.”
Kavi “dindona.”
Kavi “Jehoṣua,” he zẹẹmẹdo “Jehovah Wẹ Whlẹngán.”
To paa mẹ, “aigba lọ dojó.”
To paa mẹ, “e húgo.”
Kavi “họntonu Hamati tọn.”
Kavi “Agbàdo Tọ̀sisa tọn.” Pọ́n Zẹm.
Atin-sinsẹ́n de he nọ tindo sinmẹ taidi vẹẹ bo nọ di pọmu. Pọ́n Zẹm.
Kavi “Agbàdo Tọ̀sisa tọn.” Pọ́n Zẹm.
Zẹẹmẹdo “Ohín Ovẹn Sinsẹ́n Tọn.”
Kavi “he yin kúnkan.”
To paa mẹ, “na akla wẹ yé yin na mí wutu.”
To paa mẹ, “taidi mẹdopo.”
Kavi “dagbewanyi.”
To paa mẹ, “yẹn ze alọ ṣie daga.”
To paa mẹ, “galilọ.”
Kavi “nado yí mi do basi kẹntọ.”
Kavi “owán dagbe; owán he yọ́nsè.” To paa mẹ, “owán vivi.”
Mado-ao efa dopo tọn sọzẹn hẹ L 2,2. Pọ́n Nud. B14.
Hini dopo sọzẹn hẹ L 3,67. Pọ́n Nud. B14.
Kavi “owán dagbe; owán he yọ́nsè.” To paa mẹ, “owán vivi.”
Kavi “owán dagbe; owán he yọ́nsè.” To paa mẹ, “owán vivi.”
Kavi “owán dagbe; owán he yọ́nsè.” To paa mẹ, “owán vivi.”
Kavi “owán dagbe; owán he yọ́nsè.” To paa mẹ, “owán vivi.”
Kavi “owán dagbe; owán he yọ́nsè.” To paa mẹ, “owán vivi.”
Kavi “alindọn depope.”
Kavi “alindọn he.”
Kavi “alindọn de.”
Kavi “hùhù.”
Kavi “alindọn enẹ.”
Kavi “jlo na duklunọ do mí ji.”
Vlavo nado dohia dọ Mose jlo dọ yé ni to hihodo e gọ̀-gọ̀-gọ̀.
To paa mẹ, “Jiwheyẹwhe gbigbọ agbasalan lẹpo tọn.”
Kavi “Ṣeol,” enẹ wẹ, yọdò paa gbẹtọvi lẹ tọn. Pọ́n Zẹm.
Kavi “Ṣeol,” enẹ wẹ, yọdò paa gbẹtọvi lẹ tọn. Pọ́n Zẹm.
Kavi “waylando sọta alindọn yetọn titi.”
To paa mẹ, “jonọ.”
To paa mẹ, “jonọ depope,” enẹ wẹ, mẹhe ma wá sọn whẹndo Aalọn tọn mẹ.
To paa mẹ, “jonọ depope,” enẹ wẹ, mẹhe ma wá sọn whẹndo Aalọn tọn mẹ.
Enẹ wẹ, nuhe yin hinhẹn zun wiwe na Jiwheyẹwhe gbọn kinklan ẹn do wiwe petepete podọ kakadoi na Jiwheyẹwhe dali.
To paa mẹ, “agbasalan.”
Ṣekẹli dopo sọzẹn hẹ g 11,4. Pọ́n Nud. B14.
Kavi “sọgbe hẹ ṣekẹli wiwe lọ.”
Gela dopo sọzẹn hẹ g 0,57. Pọ́n Nud. B14.
Kavi “owán dagbe; owán he yọ́nsè.” To paa mẹ, “owán vivi.”
Enẹ wẹ, Alẹnu tẹgbẹ tọn he ma sọgan yin didiọ.
Kavi “oṣiọ alindọn mẹdepope tọn.” Pọ́n Zẹm.
Kavi “oṣiọ, yèdọ alindọn gbẹtọvi depope he ko kú tọn.” Pọ́n Zẹm.
Kavi “alindọn.”
Kavi “hùhù.”
Kavi “alindọn he.”
Kavi “alindọn enẹ.”
Kavi “hùhù.”
Kavi “alindọn he.”
Atin-sinsẹ́n de he nọ tindo sinmẹ taidi vẹẹ bo nọ di pọmu. Pọ́n Zẹm.
Zẹẹmẹdo “Whẹgbè Dido.”
To paa mẹ, “azán.”
To paa mẹ, “alọ.”
Hogbe milomilo wẹ hogbe ehelẹ yin na okú.
Zẹẹmẹdo “Nuhe Yin Kinklandovo Na Vasudo.”
Kavi “agbọ́pe alindọn gbẹtọ lọ lẹ tọn.”
Kavi “alindọn mítọn.”
Kavi “miyọ́nnọ.”
Kavi “miyọ́nnọ.”
Kavi “Agbàdo Tọ̀sisa tọn.” Pọ́n Zẹm.
Kavi “agbàdo tọ̀sisa tọn.” Pọ́n Zẹm.
To paa mẹ, “onù.”
Kavi “agbàdo tọ̀sisa tọn.” Pọ́n Zẹm.
To paa mẹ, “ogle.”
Kavi vlavo, “danfafa lọ ji.”
Kavi “he lẹdo e pé.”
Kavi “he lẹdo e pé.”
E họnwun dọ ehe to alọdlẹndo Euflate.
To paa mẹ, “kẹtẹkẹtẹ asi.”
To paa mẹ, “hùn onù kẹtẹkẹtẹ asi lọ tọn.”
Kavi “alindọn ṣie.”
Kavi vlavo, “danfafa lọ.”
To paa mẹ, “mọdọ e yọ́n to nukun Jehovah tọn mẹ.”
Kavi “agbàdo tọ̀sisa tọn.” Pọ́n Zẹm.
Kavi “kúnkan.”
To paa mẹ, “sọn ahun.”
Kavi “to opodo azán lẹ tọn.”
Kavi “gbà topá Moabi tọn lẹ.”
Kavi “Islaeli kọ̀n ede dopọ hẹ.”
To paa mẹ, “tatọ́.”
To paa mẹ, “to owhè nukọn.”
Kavi “he kọ̀n ede dopọ hẹ.”
Hogbe milomilo wẹ hogbe ehelẹ yin na okú.
To paa mẹ, “Jiwheyẹwhe gbigbọ agbasalan lẹpo tọn.”
Kavi “yẹyi.”
Kavi “owán dagbe; owán he yọ́nsè.” To paa mẹ, “owán vivi.”
To paa mẹ, “to whèjai awe lẹ ṣẹnṣẹn,” vlavo ehe zẹẹmẹdo bẹsọn whenue owhè ko yihọ jẹ whenue zinvlu do.
Mado-ao efa dopo tọn sọzẹn hẹ L 2,2. Pọ́n Nud. B14.
Hini dopo sọzẹn hẹ L 3,67. Pọ́n Nud. B14.
Kavi “owán dagbe; owán he yọ́nsè.” To paa mẹ, “owán vivi.”
To paa mẹ, “to whèjai awe lẹ ṣẹnṣẹn,” vlavo ehe zẹẹmẹdo bẹsọn whenue owhè ko yihọ jẹ whenue zinvlu do.
To paa mẹ, “osun mìtọn lẹ tọn.”
Kavi “owán dagbe; owán he yọ́nsè.” To paa mẹ, “owán vivi.”
To paa mẹ, “akla.”
Kavi “owán dagbe; owán he yọ́nsè.” To paa mẹ, “owán vivi.”
Kavi “owán dagbe; owán he yọ́nsè.” To paa mẹ, “owán vivi.”
Kavi “owán dagbe; owán he yọ́nsè.” To paa mẹ, “owán vivi.”
Kavi “owán dagbe; owán he yọ́nsè.” To paa mẹ, “owán vivi.”
Kavi “alindọn mìtọn.” To paa mẹ, nado “sayana mẹdetiti” zẹẹmẹdo mẹdetiti-mimọ́n to aliho voovo lẹ mẹ, ehe bẹ nùbibla hẹn.
Kavi “owán dagbe; owán he yọ́nsè.” To paa mẹ, “owán vivi.”
Kavi “owán dagbe; owán he yọ́nsè.” To paa mẹ, “owán vivi.”
Kavi “owán dagbe; owán he yọ́nsè.” To paa mẹ, “owán vivi.”
Kavi “sìn opà kadaninọ tọn he yin dandan tọn de do alindọn ede tọn ji.”
Kavi “alindọn etọn.”
Kavi “gando opà de nado sayana alindọn go.”
Hogbe milomilo wẹ hogbe ehelẹ yin na okú.
Kavi “osla he adó lẹdo.”
Kavi “hù alindọn de.”
Pọ́n Zẹm.
Kavi “alindọn.”
Kavi “alindọn gbẹtọ tọn.”
Kavi “alindọn.”
Kavi “alindọn gbẹtọ.”
Kavi “alindọn mítọn.”
Ṣekẹli dopo sọzẹn hẹ g 11,4. Pọ́n Nud. B14.
Kavi “oflin.”
Kavi “Agbàdo Tọ̀sisa tọn.” Pọ́n Zẹm.
Kavi “vọ́ gbá.”
Zẹẹmẹdo “Gbétatò Jaili Tọn lẹ He Gọ́ Na Gòhọ.”
Kavi “he lẹdo e pé.”
To paa mẹ, “awhànpa.”
To paa mẹ, “alọ dindlẹn daga.”
Enẹ wẹ, Ohù Kúkú.
Pọ́n Zẹm.
Enẹ wẹ, Ohù Daho lọ, yèdọ Ohù Meditelane tọn.
Enẹ wẹ, Ohù Meditelane tọn.
Kavi “họntonu Hamati tọn.”
Enẹ wẹ, tándo Genezalẹti tọn, kavi Ohù Galili tọn.
Awagbà dopo sọzẹn hẹ cm 44,5. Pọ́n Nud. B14.
Kavi “hù alindọn de.”
Kavi “hù alindọn de.”
To paa mẹ, “dlan nude do e dile e ko tọ̀wu dai.”
To paa mẹ, “gbọn wangbẹna kavi wùtitọ dai dali.”
Kavi “hù alindọn de.”
Kavi “alindọn depope.”
Kavi “alindọn.”
Kavi “Owhe Mẹdekannujẹ tọn.”