DEUTELONOMI

1 Ohó he Mose dọna Islaeli pete to lẹdo Jọdani tọn mẹ to danfafa ji lẹ die, yèdọ to dankló he pannukọn Sufi lọ ji, to Palani, Tofeli, Labani, Hazelọti po Dizahabi po ṣẹnṣẹn. 2 Azán 11 wẹ sọn Holẹbi yì Kadẹṣi-balnea+ gbọn aliho Osó Seili tọn ji. 3 To owhe 40tọ mẹ,+ to azán tintan osun 11tọ tọn gbè, Mose dọhona Islaelivi* lẹ sọgbe hẹ nuhe Jehovah ko na ẹn anademẹ nado dọna yé lẹpo. 4 Ehe jọ to whenue e ko gbawhàn Sihọni,+ ahọlu Amolinu lẹ tọn he nọ nọ̀ Hẹṣbọni tọn godo, podọ Ogi,+ ahọlu Baṣani tọn, mẹhe nọ nọ̀ Aṣtalọti to Edlẹi.+ 5 To lẹdo Jọdani tọn mẹ, to aigba Moabi tọn ji, Mose jẹ zẹẹmẹ Osẹ́n+ ehe tọn basi ji dọmọ:

6 “Jehovah Jiwheyẹwhe mítọn dọna mí to Holẹbi dọ, ‘Fihe mì nọ lẹdo osó tọn ehe mẹ jẹ ko pé.+ 7 Mì lilẹ́ bo dedo lẹdo osó tọn Amolinu+ lẹ tọn mẹ podọ yì awà akọta he to lẹdo yetọn mẹ lẹpo tọn ji to Alaba,+ to lẹdo osó tọn lọ mẹ, to Ṣefela, to Negẹb po lẹdo ohù tọn lọ po mẹ,+ to aigba Kenaninu lẹ tọn ji podọ to Lẹbanọni*+ kaka yì tọ̀sisa daho lọ, yèdọ tọ̀sisa Euflate+ kọ̀n. 8 Mì pọ́n, yẹn ko ze aigba lọ donukọnna mì. Mì yì e ji bo yí aigba lọ he Jehovah ko whlé na tọgbo mìtọn lẹ, yèdọ Ablaham, Isaki+ po Jakọbu+ po nado na yewlẹ po kúnkan* yetọn he na jẹgodona yé lẹ po.’+

9 “Yẹn sọ dọna mì to ojlẹ enẹ mẹ dọ, ‘Yẹn ṣo ma sọgan hẹn agbàn mìtọn.+ 10 Jehovah Jiwheyẹwhe mìtọn ko hẹn mì sudeji, bọ to egbé mì ko sù taidi sunwhlẹvu olọn tọn lẹ.+ 11 Na Jehovah, Jiwheyẹwhe tọgbo mìtọn lẹ tọn, ni hẹn mì sudeji+ whla fọtọ́n hú lehe mì ko sù do, podọ na ewọ ni dona mì kẹdẹdile e ko dopagbe etọn na mì do.+ 12 Nawẹ yẹn ṣo sọgan hẹn agbàn pinpẹn mìtọn bo doakọnna mìwlẹ po whẹgbè mìtọn lẹ po do?+ 13 Mì de sunnu nuyọnẹntọ, wuntuntunnọ podọ numimọnọ lẹ to hẹnnu mìtọn lẹ mẹ, na yẹn nido de yé taidi tatọ́ lẹ do mì ji.’+ 14 Mìwlẹ gblọnna mi dọ, ‘Nuhe hiẹ dọna mí nado wà lọ yọ́n.’ 15 Enẹwutu, yẹn de nukọntọ hẹnnu mìtọn lẹ tọn, yèdọ sunnu nuyọnẹntọ podọ numimọnọ lẹ taidi tatọ́ lẹ do mì ji, di ogán omẹ fọtọ́n lẹ tọn, ogán omẹ kanweko lẹ tọn, ogán omẹ kandeao lẹ tọn, ogán omẹ ao lẹ tọn podọ di anademẹtọ lẹ to hẹnnu mìtọn lẹ mẹ.+

16 “To ojlẹ enẹ mẹ, yẹn na anademẹ whẹdatọ mìtọn lẹ dọ, ‘Eyin mì sè dọ whẹho de to ṣẹnṣẹn na mẹmẹsunnu mìtọn lẹ, mì dona nọ yí dodo do dawhẹ+ to sunnu de po mẹmẹsunnu etọn kavi mẹhe to jonọ-gbéji de po ṣẹnṣẹn.+ 17 Mìwlẹ ma dona nọ homẹnukuntapọn to whẹdida mẹ.+ Mì dona nọ dotoaina omẹ paa lẹ kẹdẹdile mì nọ wà na omẹ nukundeji lẹ do.+ Mì ma dona nọ dibuna gbẹtọ,+ na Jiwheyẹwhe tọn wẹ whẹdida;+ podọ eyin whẹho de sinyẹn gbau na mì, mì dona nọ hẹn ẹn wá nukọn ṣie, na yẹn nido sè e.’+ 18 To whenẹnu, yẹn na mì anademẹ lẹ gando nuhe mì dona wà lẹpo go.

19 “Enẹgodo, mí sẹtẹn sọn Holẹbi bo zinzọnlin gbọn danfafa daho he dobu enẹ pete ji,+ ehe mì mọ to whenue mì gbọn aliho lẹdo osó tọn Amolinu lẹ tọn ji,+ kẹdẹdile Jehovah Jiwheyẹwhe mítọn ko degbe etọn na mí do, podọ to godo mẹ, mí jẹ Kadẹṣi-balnea.+ 20 Yẹn sọ dọna mì dọ, ‘Mìwlẹ ko wá lẹdo osó tọn Amolinu lẹ tọn he Jehovah Jiwheyẹwhe mítọn jlo na na mí lọ mẹ. 21 Mì pọ́n, Jehovah Jiwheyẹwhe mìtọn ko na mì aigba lọ. Mì hẹji yì bo yí i kẹdẹdile Jehovah, Jiwheyẹwhe tọgbo mìtọn lẹ tọn, ko dọna mì do.+ Mì dibu kavi dike ahun mìtọn gbàdo blo.’

22 “Ṣigba, mìmẹpo dọnsẹpọ mi bo dọ dọ, ‘Gbọ mí ni do sunnu delẹ hlan whẹ́ nado yì dindona aigba lọ na mí bo hẹn linlin lẹ wá na mí nado yọ́n aliho he mí dona gbọn podọ tòdaho he nkọ mí na mọ lẹ.’+ 23 Ayinamẹ lọ yọ́n to nukun ṣie mẹ, enẹwutu yẹn de sunnu 12 to mì mẹ, yèdọ mẹdopo sọn hẹnnu dopodopo mẹ.+ 24 Yé dedo bo hẹji yì lẹdo osó tọn lọ mẹ+ bosọ jẹ Agbàdo* Ẹṣkoli tọn mẹ bo bẹ̀ aigba lọ pọ́n. 25 Yé bẹ delẹ to sinsẹ́n aigba lọ tọn lẹ mẹ bo hẹn yé wá na mí, yé sọ hẹn linlin wá na mí dọ, ‘Aigba dagbe de wẹ Jehovah Jiwheyẹwhe mítọn jlo na na mí.’+ 26 Ṣigba, mìwlẹ gbẹ́ nado hẹji yì, mì sọ ṣiatẹ sọta gbedide Jehovah Jiwheyẹwhe mìtọn tọn.+ 27 Mìwlẹ to nuhlundọ mapote to gòhọ mìtọn lẹ mẹ bo to didọ dọ, ‘Na Jehovah gbẹwanna mí wutu wẹ e do plan mí jẹgbonu sọn aigba Egipti tọn ji nado jo mí do alọmẹ na Amolinu lẹ nado hù mí sudo. 28 Fitẹ dódó wẹ mí jei? Nọvisunnu mítọn lẹ ko gbàhundona mí*+ gbọn didọ dali dọ, “Gbẹtọ lọ lẹ dohuhlọn bo tọ́nalùn hugan mí, podọ tòdaho yetọn lẹ klo bọ hihọ́ yetọn yiaga jẹ olọn,*+ mí sọ mọ visunnu Anakimi+ tọn lẹ to finẹ.”’

29 “Enẹwutu, yẹn dọna mì dọ, ‘Mì dike ahun mìtọn gbàdo kavi mì dibu, na yetọn wutu blo.+ 30 Jehovah Jiwheyẹwhe mìtọn na nọ nukọnna mì yì bo nasọ hoavùn na mì+ kẹdẹdile e ko basi to Egipti to nukun mìtọn mẹ do.+ 31 Mìwlẹ sọ mọ to danfafa lọ ji lehe Jehovah Jiwheyẹwhe mìtọn ko ze mì do awà etọn lẹ mẹ do to fidepope he mì to yìyì, kẹdẹdile sunnu de nọ wà na visunnu etọn do, kaka mìwlẹ do wáfi.’ 32 Ṣigba, mahopọnna ehe lẹpo, mì ma do yise hia to Jehovah Jiwheyẹwhe mìtọn mẹ,+ 33 mẹhe to yìyì to nukọn mìtọn to aliho lọ ji, nado bẹ̀ fihe mìwlẹ na dosla do pọ́n. Ewọ nọ sọawuhia gbọn miyọ́n dali to zánmẹ podọ gbọn aslọ de dali to okle nado do aliho he ji mìwlẹ dona zinzọnlin gbọn hia mì.+

34 “To ojlẹ enẹ lẹpo mẹ, Jehovah sè nuhe dọ mì te lẹ, ewọ sọ gblehomẹ bo whlé sinsinyẹn+ dọ, 35 ‘Depope to sunnu whẹndo ylankan ehe tọn lẹ mẹ ma na mọ aigba dagbedagbe he yẹn ko whlé nado na otọ́ mìtọn lẹ,+ 36 adavo Kalẹbi visunnu Jẹfunnẹ tọn. Ewọ na mọ ẹn, podọ aigba he ji e zinzọnlin gbọn lọ, yẹn na na ewọ po visunnu etọn lẹ po, na ewọ ko hodo Jehovah po ahun lẹpo po* wutu.+ 37 (Jehovah tlẹ gblehomẹ do go e, na mìwlẹ tọn wutu, bo dọ dọ, “Hiẹ lọsu ma na yì dọ́n.+ 38 Jọṣua visunnu Nuni tọn, he nọ yilizọn na we+ wẹ na yì aigba lọ ji.+ Hẹn ẹn lodo,*+ na ewọ wẹ na plan Islaeli nado yì dugu aigba lọ tọn.”) 39 Humọ, ovi mìtọn lẹ he mì dọ dọ yé na lẹzun ogblànnu+ podọ visunnu mìtọn lẹ he ma ko yọ́n dagbe gbọnvona oylan to egbehe, yewlẹ wẹ na yì dọ́n bọ yẹn na na yé aigba lọ.+ 40 Ṣigba, na mìwlẹ tọn, mì lẹkọ bo dedo danfafa ji gbọn aliho Ohù Vẹẹ tọn lọ ji.’+

41 “To whenẹnu, mìwlẹ dọna mi dọ, ‘Mí ko waylando do Jehovah. Todin, mí na hẹji yì bo hoavùn, kẹdẹdile Jehovah Jiwheyẹwhe mítọn ko degbena mí do!’ Enẹwutu, dopodopo mìtọn bẹ awhànfunnu etọn lẹ plá bo lẹndọ e na bọawuna mì nado hẹji yì osó lọ ji.+ 42 Ṣigba, Jehovah dọna mi dọ, ‘Dọna yé dọmọ: “Mì hẹji yì nado yì hoavùn blo, na yẹn ma na tin hẹ mì.+ Eyin mì wàmọ, mìwlẹ na ṣíawhàn to kẹntọ mìtọn lẹ nukọn.”’ 43 Enẹwutu, yẹn dọhona mì, ṣogan mì ma dotoai. Kakatimọ, mì ṣiatẹ sọta gbedide Jehovah tọn bo gbọn sakla dali tẹnpọn nado hẹji yì osó lọ ji. 44 To whenẹnu, Amolinu lẹ he nọ nọ̀ osó enẹ ji tọ́n pé mì bo yàn mì dogbé dile owín lẹ nọ wà do, yé sọ vúnvún mì pé to Seili kakajẹ Họlma. 45 Enẹwutu, mìwlẹ lẹkọwa bo jẹ avivi ji to Jehovah nukọn, ṣigba Jehovah ma dotoaina mì kavi tlẹ kẹnù demẹ na mì. 46 Enẹ wẹ zọ́n bọ mìwlẹ do gbọṣi Kadẹṣi dẹn sọmọ.

2 “To whenẹnu, mí lilẹ́ bo dedo danfafa ji gbọn aliho Ohù Vẹẹ tọn lọ ji, kẹdẹdile Jehovah ko dọna mi do,+ mí sọ zingbejizọnlin na azán susu lẹdo Osó Seili tọn pé. 2 To godo mẹ, Jehovah dọna mi dọ, 3 ‘Fihe mì lilẹdo osó ehe jẹ ko pé. Todin, mì lẹhlan agewaji. 4 Humọ, na gbedide ehe gbẹtọ lọ lẹ dọmọ: “Mì na gbọn dogbó nọvisunnu mìtọn lẹ tọn ji, enẹ wẹ kúnkan Esau tọn lẹ,+ he nọ nọ̀ Seili,+ yewlẹ nasọ dibuna mì,+ amọ́ mì dona họ́ mìde taun. 5 Mì tọ́navùn* yé blo, na yẹn ma to na na mì apadewhe aigba yetọn tọn, etlẹ yin afọpapa dopo tata, na yẹn ko na Osó Seili tọn Esau taidi nutindo etọn.+ 6 Mì dona suahọ yé na núdùdù yetọn he mì na dù, podọ mì dona suahọ yé na osin yetọn he mì na nù.+ 7 Na Jehovah Jiwheyẹwhe mìtọn ko dona mì to nuhe mì wà lẹpo mẹ. Ewọ yọnẹn ganji dogbọn gbejizọnlin mìtọn to danfafa daho ehe ji dali. Jehovah Jiwheyẹwhe mìtọn ko tin hẹ mì to owhe 40 ehe lẹpo gblamẹ bọ mì ma jẹdò nudepope tọn.”’+ 8 Enẹwutu, mí gbọn nọvisunnu mítọn lẹ pá wayi, yèdọ kúnkan Esau tọn lẹ,+ he nọ nọ̀ Seili, bosọ gbọn olá na aliho Alaba tọn, podọ na Elati po Ezioni-gebeli po.+

“Enẹgodo, mí lilẹ́ bo zingbejizọnlin gbọn aliho danfafa Moabi tọn ji.+ 9 Jehovah sọ dọna mi dọ, ‘A tọ́navùn kavi tọ́nawhàn Moabi blo, na yẹn ma to na na we apadewhe aigba etọn tọn taidi nutindo de gba, na yẹn ko yí Al na kúnkan Lọti tọn lẹ taidi nutindo de.+ 10 (Emimi+ lẹ wẹ nọ nọ̀ finẹ dai, yèdọ gbẹtọ he dohuhlọn lẹ bo sù bosọ tọ́nalùn taidi Anakimi lẹ. 11 Lefaimi+ lẹ lọsu nọ yin pinpọnhlan taidi Anakimi+ lẹ, bọ Moabinu lẹ nọ ylọ yé dọ Emimi. 12 Holinu+ lẹ wẹ nọ nọ̀ Seili dai, ṣigba kúnkan Esau tọn lẹ ko yàn yé sẹ̀ bo hù yé sudo bosọ yí otẹn yetọn+ kẹdẹdile Islaeli na basi na aigba he yin nutindo yetọn, he Jehovah na na yé dandan lọ do.) 13 Todin, mì yì bo dasá Agbàdo Zeledi tọn.’ Enẹwutu, mí dasá Agbàdo* Zeledi tọn.+ 14 Ojlẹ he mí yí do zinzọnlin sọn Kadẹṣi-balnea kakajẹ whenue mí dasá Agbàdo* Zeledi tọn yin owhe 38, yèdọ kakajẹ whenue sunnu awhànfuntọ lẹpo pete ko kú vọ̀ sọn osla lọ mẹ kẹdẹdile Jehovah ko whlé na yé do.+ 15 Alọ Jehovah tọn tin jẹagọdo yé nado sán yé sẹ̀ sọn osla lọ mẹ kakajẹ whenue yé kú vọ̀.+

16 “Tlolo he sunnu awhànfuntọ lọ lẹpo ko kú sẹ̀ sọn gbẹtọ lọ lẹ mẹ,+ 17 Jehovah sọ vọ́ dọhona mi dọ, 18 ‘To egbé hiẹ na gbọn aigba Moabi tọn ji, enẹ wẹ Al. 19 Eyin hiẹ sẹpọ Amọninu lẹ, a yangbé yetọn kavi tọ́navùn yé blo, na yẹn ma to na na we apadewhe aigba Amọninu lẹ tọn taidi nutindo de gba, na yẹn ko yí i na kúnkan Lọti tọn lẹ taidi nutindo yetọn.+ 20 Ehe lọsu nọ yin pinpọnhlan dai taidi aigba Lefaimi+ lẹ tọn. (Lefaimi lẹ wẹ nọ nọ̀ finẹ dai bọ Amọninu lẹ nọ ylọ yé dọ Zamzumimi. 21 Yé yin gbẹtọ huhlọnnọ lẹ bo sù bosọ tọ́nalùn taidi Anakimi+ lẹ; ṣigba Jehovah hù yé sudo sọn nukọnna Amọninu lẹ, bọ yé yàn akọta lọ sẹ̀ bo nọ nọ̀ otẹn yetọn mẹ. 22 Nuhe ewọ wà do kúnkan Esau tọn he nọ nọ̀ Seili+ todin lẹ tamẹ niyẹn, to whenue e hù Holinu+ lẹ sudo sọn nukọnna yé, na yewlẹ nido yàn yé sẹ̀ bo nọ nọ̀ otẹn yetọn mẹ kakajẹ egbé. 23 Na nuhe dù Avimi lẹ, yé nọ nọ̀ gbétatò lẹ mẹ dai kaka yì Gaza,+ ṣigba Kaftolimi+ lẹ he wá sọn Kaftoli* hù yé sudo bosọ jẹ otẹn yetọn mẹ.)

24 “‘Mì fọ́n bo dasá Agbàdo* Alnọni tọn+ yì. Mì pọ́n, yẹn ko jo Sihọni,+ yèdọ ahọlu Hẹṣbọni tọn he yin Amolinu lọ do alọ mìtọn mẹ. Enẹwutu, mì jẹ aigba etọn yí ji, bo tọ́nawhàn ẹn. 25 Bẹsọn egbé, yẹn na hẹn mẹhe nọ nọ̀ olọn glọ bo sè linlin towe lẹpo nado tin to sijọsijọ po obu po ji na hiẹ tọn wutu. Yé na biọ bẹwlu mẹ bo na to sisọsisọ,* na hiẹ tọn wutu.’+

26 “To whenẹnu, yẹn do wẹnsagun lẹ hlan sọn danfafa Kedemọti+ tọn ji yì Ahọlu Sihọni Hẹṣbọni tọn dè, po owẹ̀n jijọho tọn+ ehe po dọ, 27 ‘Dike yẹn ni gbọn aigba towe ji wayi. Yẹn na gbọn aliho lọ ji wayi bo ma na lẹhlan adusi kavi amiyọn.+ 28 Núdùdù po osin he hiẹ na sà na mi po kẹdẹ wẹ yẹn na dù bo nù. Saa dike yẹn ni zinzọnlin gbọn finẹ wayi poun 29 —nuhe kúnkan Esau tọn lẹ he nọ nọ̀ Seili po Moabinu lẹ he nọ nọ̀ Al po wà na mi niyẹn—kaka yẹn nado dasá Jọdani bo yì aigba he Jehovah Jiwheyẹwhe mítọn jlo na na mí lọ ji.’ 30 Ṣigba, Ahọlu Sihọni Hẹṣbọni tọn ma dike mí ni gbọn finẹ wayi, na Jehovah Jiwheyẹwhe mìtọn dike bọ ewọ lẹzun tasinyẹntọ+ bo hẹn ahun edetiti tọn sinyẹn, na e nido jo e do alọ mìtọn mẹ dile e jọ do todin.+

31 “To whenẹnu, Jehovah dọna mi dọ, ‘Pọ́n, yẹn ko to Sihọni po aigba etọn po jodo alọ towe mẹ. Jẹ aigba etọn yí ji.’+ 32 To whenue Sihọni tọ́njẹgbonu po omẹ etọn lẹpo po nado funawhàn hẹ mi to Jahazi,+ 33 Jehovah Jiwheyẹwhe mítọn jo e do alọ mítọn mẹ bọ mí gbawhàn ewọ po visunnu etọn lẹ po tọn gọna omẹ etọn lẹpo. 34 Mí yí tòdaho etọn lẹpo to ojlẹ enẹ mẹ bo và tòdaho lọ lẹpo, gọna sunnu lẹ, yọnnu lẹ po yọpọvu lẹ po sudo. Mí ma dike mẹdepope ni luntọ́n.+ 35 Kanlin-yìnyìn lẹ po ogblànnu lẹ po kẹdẹ wẹ mí bẹ wayi sọn tòdaho he mí yí lọ lẹ mẹ. 36 Tòpẹvi depope ma pò he mí ma yí, sọn Aloeli+ he tin to Agbàdo* Alnọni tọn tó (gọna tòdaho he tin to agbàdo lọ mẹ), kaka yì Giliadi. Jehovah Jiwheyẹwhe mítọn jo yemẹpo do alọ mítọn mẹ.+ 37 Ṣigba, hiẹ ma dọnsẹpọ aigba Amọninu lẹ tọn,+ yèdọ Agbàdo* Jabọki tọn lọ pete+ tó po tòdaho he tin to lẹdo osó tọn lọ mẹ lẹ po, kavi fidevo depope he Jehovah Jiwheyẹwhe mítọn ko dosẹ́n etọn na mí.

3 “Enẹgodo, mí lẹ́ bo hẹji dedo gbọn aliho Baṣani tọn ji. Ogi, ahọlu Baṣani tọn sọ tọ́n wá pé mí po omẹ etọn lẹpo po nado funawhàn hẹ mí to Edlẹi.+ 2 Enẹwutu, Jehovah dọna mi dọ, ‘A dibuna ẹn blo, na yẹn na jo ewọ, omẹ etọn lẹpo, po aigba etọn po do alọ towe mẹ, bọ hiẹ na wà na ẹn kẹdẹdile hiẹ ko wà na Sihọni ahọlu Amolinu lẹ tọn he nọ nọ̀ Hẹṣbọni do.’ 3 Enẹwutu, Jehovah Jiwheyẹwhe mítọn jo Ahọlu Ogi Baṣani tọn po omẹ etọn lẹpo po do alọ mítọn mẹ bọ mí hù yé, sọmọ bọ depope to omẹ etọn lẹ mẹ ma pò. 4 Enẹgodo, mí yí tòdaho etọn lẹpo. Tòpẹvi depope ma pò he mí ma yí sọn yé si—yèdọ tòdaho 60, agbegbe Algobi tọn pete, ahọluduta Ogi tọn to Baṣani.+ 5 Tòdaho ehe lẹpo wẹ yè yí adó he yiaga lẹ, họngbo lẹ po dòtin lẹ po do basi hihọ́na, gọna tòpẹvi susu. 6 Etomọṣo, mí và yé sudo+ kẹdẹdile mí ko wà na Ahọlu Sihọni Hẹṣbọni tọn do bo và tòdaho lọ lẹpo, gọna sunnu lẹ, yọnnu lẹ po yọpọvu lẹ po sudo.+ 7 Mí sọ bẹ kanlin-yìnyìn po ogblànnu tòdaho lọ lẹ tọn lẹpo po wayi.

8 “To ojlẹ enẹ mẹ, mí yí aigba ahọlu awe Amolinu lẹ tọn+ he tin to lẹdo Jọdani tọn mẹ lẹ tọn, yèdọ sọn Agbàdo* Alnọni tọn mẹ kaka yì Osó Hẹlmọni+ kọ̀n 9 (osó he Sidoninu lẹ nọ ylọdọ Silioni dai bọ Amolinu lẹ nọ ylọdọ Senili), 10 tòdaho he tin to aigba flala* ji lọ lẹpo, gọna Giliadi pete po Baṣani pete po kaka yì Saleka po Edlẹi+ po, he yin tòdaho ahọluduta Ogi tọn lẹ to Baṣani. 11 Na Ahọlu Ogi Baṣani tọn wẹ yin omẹ godo tọn to Lefaimi lẹ mẹ. Gànyuu wẹ yè yí do basi apotinjan* etọn podọ ehe gbẹ́ pò to Laba Amọninu lẹ tọn. Tedidi etọn yin awagbà* ṣinẹnẹ bọ gbigblo etọn yin awagbà ẹnẹ. 12 To ojlẹ enẹ mẹ, mí yí aigba ehe: sọn Aloeli+ he tin to Agbàdo* Alnọni tọn tó gọna mado-awe lẹdo osó tọn Giliadi tọn, podọ yẹn ko yí tòdaho etọn lẹ na Leubẹninu lẹ po Gadinu lẹ po.+ 13 Yẹn ko sọ yí pipotọ Giliadi tọn po Baṣani pete he tin to ahọluduta Ogi tọn glọ po na mado-awe hẹnnu Manasse tọn.+ Agbegbe Algobi tọn pete he tin to Baṣani yin yinyọnẹn taidi aigba Lefaimi lẹ tọn.

14 “Jaili+ visunnu Manasse tọn yí agbegbe Algobi+ tọn pete kaka yì dogbó Gẹṣulinu lẹ po Maakatinu lẹ po tọn+ ji bo yí yinkọ edetiti tọn do ylọ gbétatò Baṣani tọn enẹlẹ dọ Havọti-jaili*+ kakajẹ egbehe. 15 Yẹn ko sọ yí Giliadi na Makili.+ 16 Podọ na nuhe dù Leubẹninu lẹ po Gadinu+ lẹ po, yẹn ko na yé bẹsọn Giliadi jẹ Agbàdo* Alnọni tọn kọ̀n, bọ agbàdo lọ ṣẹnṣẹn yin dogbó, podọ kaka yì Jabọki, yèdọ agbàdo lọ he yin dogbó Amọninu lẹ tọn, 17 gọna Alaba, yèdọ tọ̀sisa Jọdani po agé etọn po, sọn Kinnelẹti yì Ohù Alaba tọn tó, enẹ wẹ Ohù Ojẹ̀ tọn* lọ, to dòdòmẹ pete Pisga tọn hlan whèzẹtẹn-waji.+

18 “To whenẹnu, yẹn na mì gbedide ehe dọmọ: ‘Jehovah Jiwheyẹwhe mìtọn ko na mì aigba ehe nado lẹzun nutindo mìtọn. Sunnu adọgbotọ mìtọn lẹpo na sọawhànnu bo dasá yì dọ́n to nọvisunnu mìtọn lẹ, yèdọ Islaelivi lẹ nukọn.+ 19 Asi mìtọn lẹ, ovi mìtọn lẹ po kanlin-yìnyìn mìtọn lẹ po kẹdẹ (yẹn yọnẹn ganji dọ mìwlẹ tindo kanlin-yìnyìn susugege lẹ) wẹ na gbọṣi tòdaho he yẹn ko na mì lọ lẹ mẹ, 20 kakajẹ whenue Jehovah na na gbọjẹ nọvisunnu mìtọn lẹ dile e wà na mìwlẹ do, bọ yelọsu na ko yí aigba he Jehovah Jiwheyẹwhe mìtọn na na yé to Jọdani godo lọ. Enẹgodo, mìwlẹ na lẹkọ, yèdọ mẹdopodopo do nutindo etọn he yẹn ko na mì lọ kọ̀n.’+

21 “To ojlẹ enẹ mẹ, yẹn na gbedide ehe Jọṣua+ dọmọ: ‘Hiẹ ko yí nukun towe titi do mọ nuhe Jehovah Jiwheyẹwhe towe ko wà na ahọlu awe ehelẹ. Jehovah na wà nudopolọ na ahọluduta he mẹ hiẹ na dasá yì lẹpo.+ 22 Mìwlẹ ma dona dibuna yé, na Jehovah Jiwheyẹwhe mìtọn wẹ mẹlọ he to avùnho na mì.’+

23 “To ojlẹ enẹ mẹ, yẹn vẹ̀ Jehovah dọ, 24 ‘Oklunọ Nupojipetọ Jehovah E, hiẹ ko jẹ kiklo-yinyin towe po awà huhlọnnọ towe po+ dohia devizọnwatọ towe ji, na yẹwhe tẹwẹ to olọn mẹ kavi to aigba ji he penugo nado wazọ́n huhlọnnọ mọnkọtọn lẹ taidi hiẹ?+ 25 Jaale, dike yẹn ni dasá yì dọ́n nado mọ aigba dagbedagbe he tin to Jọdani godo lọ, yèdọ lẹdo osó tọn dagbedagbe ehe po Lẹbanọni po.’+ 26 Ṣigba, Jehovah gbẹ́ pò to homẹgble sinsinyẹn do go e na mìwlẹ tọn wutu,+ bo ma dotoaina mi. Kakatimọ, Jehovah dọna mi dọ, ‘E pé! Hiẹ sọ dọhona mi gando whẹho ehe go gbede ba blo. 27 Hẹji yì Pisga ji aga+ bo pọnhlan whèyihọ-waji, agewaji, hùwaji po whèzẹtẹn-waji po bosọ yí nukun towe lẹ do pọ́n aigba lọ hlan, na hiẹ ma na dasá Jọdani ehe gba.+ 28 Deazọ́nna Jọṣua+ bo na ẹn tuli bosọ hẹn ẹn lodo, na ewọ wẹ na nọ nukọnna omẹ ehelẹ nado hẹn yé dasá yì dọ́n,+ podọ ewọ wẹ na plan yé nado yì dugu aigba he hiẹ na mọ lọ tọn.’ 29 Onú ehe lẹpo jọ to whenue mí tin to agbàdo lọ mẹ pannukọn Bẹti-peọli.+

4 “Todin, Islaeli E, dotoaina aṣẹdai po nudide whẹdida tọn lẹ po he yẹn to pinplọn mì nado nọ setonuna, na mìwlẹ nido sọgan nọgbẹ̀+ bo yì aigba he Jehovah Jiwheyẹwhe tọgbo mìtọn lẹ tọn to nina mì lọ ji bosọ yí i. 2 Mìwlẹ ma dona yidogọna gbedide he yẹn to nina mì lẹ, mọjanwẹ mì ma dona depò sọn yé mẹ do niyẹn,+ na mì nido nọ yìn gbedide Jehovah Jiwheyẹwhe mìtọn tọn he yẹn to nina mì lẹ.

3 “Nukun mìtọn titi lẹ ko mọ nuhe Jehovah wà to whẹho Baali Peọli tọn mẹ; Jehovah Jiwheyẹwhe mìtọn hù mẹhe hodo Baali Peọli tọn lẹpo sudo sọn ṣẹnṣẹn mìtọn.+ 4 Ṣigba, mì mẹhe tẹdo Jehovah Jiwheyẹwhe mìtọn go lẹpo wẹ pò togbẹ̀ to egbé. 5 Pọ́n, yẹn ko plọn mì aṣẹdai po nudide whẹdida tọn lẹ po+ kẹdẹdile Jehovah Jiwheyẹwhe ṣie ko degbe etọn na mi do, na mìwlẹ nido nọ setonuna yé to aigba he mì na yí lọ ji. 6 Mì dona nọ yí sọwhiwhe do hodo yé,+ na ehe na dohia akọta he sè dogbọn aṣẹdai ehe lẹpo dali lẹ dọ mì yin nuyọnẹntọ+ po zinzintọ+ po, bọ yé na dọ dọ, ‘Matin ayihaawe, omẹ akọta daho ehe tọn lẹ yin nuyọnẹntọ po zinzintọ po.’+ 7 Na akọta daho tẹwẹ tindo yẹwhe lẹ he dọnsẹpọ ẹ kẹdẹdile Jehovah Jiwheyẹwhe mítọn nọ dọnsẹpọ mí do to whedepopenu he mí dawhá ylọ ẹ?+ 8 Podọ akọta daho tẹwẹ tindo aṣẹdai dodo tọn lẹ po nudide whẹdida tọn lẹ po he taidi Osẹ́n ehe pete he yẹn to zizedonukọnna mì to egbé?+

9 “Saa to aṣeji bo payi dewe go ganji* to gbẹninọ towe lẹpo whenu, na hiẹ nikaa wọn nuhe nukun towe ko mọ lẹ bọ yé na gbọnmọ dali busẹ sọn ahun towe mẹ. Hiẹ dona sọ hẹn yé zun yinyọnẹn na ovi towe lẹ po ovivi towe lẹ po.+ 10 To azán he gbè hiẹ ṣite to Jehovah Jiwheyẹwhe towe nukọn to Holẹbi, Jehovah dọna mi dọ, ‘Bẹ gbẹtọ lọ lẹ pli na mi, na yẹn nido hẹn yé sè ohó ṣie lẹ,+ na yé nido sọgan plọn nado nọ dibusi mi+ to azán he yé na yí do nọgbẹ̀ to aigba ji lẹpo whenu podọ na yé nido plọn ovi yetọn lẹ.’+

11 “Enẹwutu, mìwlẹ dọnsẹpọ bo ṣite to osó lọ kọ̀n, osó lọ sọ yí miyọ́n do to jiji kaka yì olọn;* zinvlu, aslọ po zinvlu gọ́ngọ́n po sọ tin.+ 12 Jehovah sọ jẹ hodọna mì ji sọn miyọ́n lọ mẹ.+ Mìwlẹ sè ogbè de to hodọ, ṣigba mì ma mọ nudepope to miyọ́n lọ mẹ+—ogbè lọ kẹdẹ wẹ mì sè.+ 13 Ewọ sọ hẹn alẹnu etọn zun yinyọnẹn na mì,+ ehe e degbena mì nado nọ yìn—yèdọ Gbedide Ao lẹ.*+ Enẹgodo, e wlan yé do wekan-zannu awe ji.+ 14 To ojlẹ enẹ mẹ, Jehovah degbena mi nado plọn mì aṣẹdai po nudide whẹdida tọn lẹ po he mì na nọ setonuna to aigba he ji mì jei nado yí lọ ji.

15 “Enẹwutu, mì payi mìde go ganji*—na to whenuena e yindọ mì ma mọ nudepope to miyọ́n lọ mẹ to azán he gbè Jehovah dọhona mì sọn miyọ́n lọ ṣẹnṣẹn to Holẹbi— 16 mìwlẹ nikaa yinuwa to aliho he gblezọn mẹ gbọn boṣiọ pipà de he na tindo ohia nudepope tọn bibasi dali, yèdọ apajlẹ sunnu kavi yọnnu de tọn,+ 17 apajlẹ kanlin he nọ nọ̀ aigba ji depope tọn, kavi ohẹ̀ he nọ zlọn to agahomẹ depope tọn,+ 18 apajlẹ nudepope he nọ lìn to aigba ji tọn, kavi apajlẹ whèvi he nọ nọ̀ osin mẹ to aigba ji depope tọn.+ 19 Podọ eyin hiẹ ze nukun towe lẹ daga hlan olọn bo mọ owhè, osun po sunwhlẹvu lẹ po—yèdọ awhànpa olọn tọn lẹpo⁠—a dike ehelẹ yinuwado ji we bọ hiẹ na dẹ́ do odò na yé bo sẹ̀n yé blo.+ Jehovah Jiwheyẹwhe towe ko yí yé na mẹhe tin to olọn glọ lẹpo. 20 Ṣigba, mìwlẹ wẹ Jehovah de bo hẹn jẹgbonu sọn zòhọ gànkọ̀ntọ tọn mẹ, enẹ wẹ sọn Egipti, nado lẹzun akọta he yin nutindo etọn titi,*+ dile hiẹ yin do to egbé.

21 “Jehovah gblehomẹ do go e na mìwlẹ tọn wutu+ bo whlé dọ yẹn ma na dasá Jọdani kavi yì aigba dagbedagbe he Jehovah Jiwheyẹwhe towe jlo na na we taidi ogú lọ ji gba.+ 22 Na yẹn na kú to aigba ehe ji tofi; yẹn ma na dasá Jọdani gba,+ ṣigba mìwlẹ na dasá yì dọ́n bo yí aigba dagbedagbe ehe. 23 Mì to aṣeji na mìwlẹ nikaa wọn alẹnu he Jehovah Jiwheyẹwhe mìtọn ko basi hẹ mì lọ,+ podọ mì basi boṣiọ pipà de, yèdọ ohia nudepope he Jehovah Jiwheyẹwhe ko dosẹ́n etọn+ na mì tọn blo. 24 Na miyọ́n nuvasudotọ de wẹ Jehovah Jiwheyẹwhe towe,+ yèdọ Jiwheyẹwhe de he nọ biọ mẹdezejo mlẹnmlẹn.+

25 “Eyin hiẹ wá tindo ovi lẹ po ovivi lẹ po bọ mìwlẹ ko nọ aigba lọ ji dẹn ṣogan bo wá yinuwa to aliho he nọ hẹn vasudo wá de mẹ gbọn boṣiọ pipà+ wunmẹ depope bibasi dali bosọ wà nuhe ylan to nukun Jehovah Jiwheyẹwhe mìtọn tọn mẹ nado hẹn homẹgble e,+ 26 yẹn yí olọn po aigba po do basi kunnudetọ lẹ sọta mì to egbé dọ mìwlẹ na busẹ plaun sọn aigba he mì jlo na dasá Jọdani nado yí lọ ji dandan. Mì ma na dẹn to e ji, ṣigba mì na yin huhusudo pete.+ 27 Jehovah na vúnvún mì pé gbọn akọta lẹ ṣẹnṣẹn,+ bọ vude poun to mì mẹ wẹ na gán+ to akọta he mẹ Jehovah na ko yàn mì yì lọ lẹ ṣẹnṣẹn. 28 To dọ́n, mìwlẹ na to dandannu glọ nado sẹ̀n yẹwhe atin po zannu po tọn he alọ gbẹtọ tọn basi lẹ,+ yèdọ yẹwhe he ma sọgan mọnú kavi sènu, kavi dùnú, kavi sewán lẹ.

29 “Eyin mìwlẹ dín Jehovah Jiwheyẹwhe mìtọn sọn dọ́n, matin ayihaawe mì na mọ ẹn,+ eyin mì yí ahun mìtọn lẹpo po alindọn* mìtọn lẹpo po do dín in.+ 30 To whenue mì na wá tin to ayimajai sinsinyẹn mẹ, bọ onú ehe lẹpo na ko jọ do mì go to nukọn mẹ, to whenẹnu mì na lẹhlan Jehovah Jiwheyẹwhe mìtọn bo dotoaina ogbè etọn.+ 31 Na Jiwheyẹwhe lẹblanunọ+ de wẹ Jehovah Jiwheyẹwhe mìtọn. Ewọ ma na jo mì do, kavi hù mì sudo, kavi wọnji alẹnu he e whlé na tọgbo mìtọn lẹ go gba.+

32 “Todin, kanhose gando ojlẹ he jẹnukọnna ojlẹ towe lẹ go, yèdọ sọn azán he gbè Jiwheyẹwhe ko dá gbẹtọ do aigba ji; dindona sọn opodo olọn tọn de jẹ opodo olọn tọn devo. Be onú vonọtaun mọnkọtọn de ko jọ pọ́n ya kavi be nuhe taidi enẹ nkọtọn de ko yin sisè pọ́n gbede ya?+ 33 Be akọta devo de ko sè ogbè Jiwheyẹwhe tọn to hodọ sọn miyọ́n de mẹ to aliho he mẹ mìwlẹ sè te, ṣogan bo pò togbẹ̀ ya?+ 34 Kavi be Jiwheyẹwhe ko tẹnpọn gbede nado de akọta de na ede sọn akọta devo ṣẹnṣẹn gbọn whẹdida* lẹ, ohia lẹ, azọ́njiawu+ lẹ, awhàn,+ alọ huhlọnnọ+ etọn, awà dindlẹn etọn, po azọ́n he dobu+ lẹ bibasi po dali, dile Jehovah Jiwheyẹwhe mìtọn basi na mì to nukun mìtọn titi lẹ mẹ to Egipti do wẹ ya? 35 Onú ehelẹ ko yin didohia mìwlẹ na mì nido yọnẹn dọ Jehovah wẹ Jiwheyẹwhe nugbo lọ;+ devo depope ma tin gbọnvona ewọ.+ 36 Ewọ hẹn we nado sè ogbè etọn sọn olọn nado wọhẹ we, e sọ hẹn we nado mọ miyọ́n daho etọn to aigba ji, bọ hiẹ sọ sè ohó etọn lẹ sọn miyọ́n lọ mẹ.+

37 “Na ewọ yiwanna tọgbo towe lẹ bo ko de kúnkan* yetọn lẹ wutu,+ hiẹ yin pinplan jẹgbonu sọn Egipti to nukun etọn mẹ gbọn huhlọn daho etọn dali. 38 Ewọ yàn akọta he klo bosọ yin huhlọnnọ hugan we lẹ sẹ̀ sọn nukọn towe bo hẹn we wá bosọ na we aigba yetọn taidi ogú, dile e yin do to egbé.+ 39 Enẹwutu, yọnẹn to egbé bosọ hẹn do ahun mẹ dọ Jehovah wẹ Jiwheyẹwhe nugbo lọ to olọn mẹ aga podọ to aigba ji to odò.+ Devo de masọ tin.+ 40 Hiẹ dona nọ yìn aṣẹdai etọn lẹ po gbedide etọn lẹ po he yẹn to nina we to egbé, na e nido yin dagbe na hiẹ po ovi towe lẹ po, na hiẹ nido nọ aigba he Jehovah Jiwheyẹwhe towe to nina we lọ ji+ dẹn.”

41 To ojlẹ enẹ mẹ, Mose de tòdaho atọ̀n dovo to whèzẹtẹn-waji Jọdani tọn.+ 42 Eyin hlọnhutọ depope hù gbẹtọ hatọ etọn to mayọnẹn mẹ bọ e ma yindọ ewọ ko gbẹwanna ẹn dai wẹ,+ e dona họnyi dopo to tòdaho ehelẹ mẹ nado gán.+ 43 Tòdaho lọ lẹ wẹ Bezẹli+ he tin to danfafa ji to aigba flala* lọ ji na Leubẹninu lẹ, Lamọti+ he tin to Giliadi na Gadinu lẹ, podọ Golani+ he tin to Baṣani na Manassenu lẹ.+

44 Todin, Osẹ́n+ he Mose zedonukọnna omẹ Islaeli tọn lẹ die. 45 Ehelẹ wẹ nuflinmẹ, aṣẹdai po nudide whẹdida tọn lọ lẹ po he Mose na Islaelivi lẹ to whenue yé ko tọ́njẹgbonu sọn Egipti godo,+ 46 to lẹdo Jọdani tọn mẹ, to agbàdo he pannukọn Bẹti-peọli+ mẹ, to aigba Ahọlu Sihọni Amolinu lẹ tọn he nọ nọ̀ Hẹṣbọni+ lọ tọn ji, mẹhe Mose po Islaelivi lẹ po ko gbawhàn etọn to tintọ́njẹgbonu yetọn sọn Egipti godo.+ 47 Yé sọ yí aigba ewọ tọn po aigba Ahọlu Ogi+ Baṣani tọn po, yèdọ ahọlu awe Amolinu lẹ tọn he nọ nọ̀ lẹdo whèzẹtẹn-waji Jọdani tọn mẹ, 48 sọn Aloeli+ he tin to Agbàdo* Alnọni tọn tó, kaka yì Osó Sioni, yèdọ Hẹlmọni+ ji, 49 gọna Alaba pete to lẹdo whèzẹtẹn-waji Jọdani tọn mẹ, podọ kaka yì Ohù Alaba tọn* tó, to dòdòmẹ pete Pisga+ tọn.

5 Enẹgodo, Mose ylọ Islaeli pete pli bo dọna yé dọmọ: “Islaeli E, sè aṣẹdai po nudide whẹdida tọn lẹ po he yẹn to lilá na mì to egbé, mìwlẹ sọ dona plọn yé bo nọ yí sọwhiwhe do setonuna yé. 2 Jehovah Jiwheyẹwhe mítọn basi alẹnu de hẹ mí to Holẹbi.+ 3 E ma yin tọgbo mítọn lẹ wẹ Jehovah basi alẹnu ehe hẹ gba, ṣigba hẹ míwlẹ, yèdọ mí mẹhe togbẹ̀ tofi to egbé lẹpo. 4 Jehovah dọho hẹ mì nukun sọ nukun to osó lọ kọ̀n, yèdọ sọn miyọ́n lọ mẹ.+ 5 To ojlẹ enẹ mẹ, yẹn ṣite to Jehovah po mìwlẹ po ṣẹnṣẹn+ nado nọ dọ ohó he Jehovah dọ lẹ na mì, na mìwlẹ to budi na miyọ́n lọ tọn wutu bo ma hẹji yì osó lọ ji.+ Ewọ dọmọ:

6 “‘Yẹn wẹ Jehovah Jiwheyẹwhe towe, he plan we sọn aigba Egipti tọn ji, yèdọ sọn kanlinmọgbenu.+ 7 Hiẹ ma dona tindo yẹwhe devo depope gbọnvona yẹn* gbede.+

8 “‘Hiẹ ma dona basi boṣiọ pipà+ de kavi ohia* nudepope he tin to olọn mẹ aga kavi to aigba ji to odò kavi to osin mẹ to aigba ji tọn. 9 Hiẹ ma dona dẹ́ do odò na yé kavi yin kiklọ nado sẹ̀n yé,+ na yẹn Jehovah Jiwheyẹwhe towe yin Jiwheyẹwhe de he nọ biọ mẹdezejo mlẹnmlẹn+ bo nọ hẹn yasanamẹ nuṣiwa otọ́ lẹ tọn wá ovi lẹ ji, yèdọ wá whẹndo atọ̀ntọ podọ wá whẹndo ẹnẹtọ mẹhe gbẹwanna mi lẹ tọn ji,+ 10 ṣigba bo nọ do owanyi nugbo* hia kakajẹ whẹndo fọtọ́ntọ mẹhe yiwanna mi bo nọ yìn gbedide ṣie lẹ tọn ji.

11 “‘Hiẹ ma dona nọ yí oyín Jehovah Jiwheyẹwhe towe tọn zan to ovọ́ mẹ,+ na Jehovah ma na nọma sayana mẹdepope he nọ yí oyín etọn zan to ovọ́ mẹ.+

12 “‘Nọ yìn Gbọjẹzan lọ nado nọ hẹn ẹn do wiweji, kẹdẹdile Jehovah Jiwheyẹwhe towe degbe etọn na we do.+ 13 Hiẹ na nọ jẹtukla bo nọ wazọ́n towe lẹpo to azán ṣidopo gblamẹ,+ 14 ṣigba gbọjẹzan de wẹ azán ṣinawetọ lọ yin na Jehovah Jiwheyẹwhe towe.+ Hiẹ ma dona wazọ́n depope,+ yèdọ hiẹ, visunnu towe, viyọnnu towe, afanumẹ sunnu towe, afanumẹ yọnnu towe, oyìnsú towe, kẹtẹkẹtẹ towe kavi kanlin whégbè tọn towe depope, kavi mẹdepope he to jonọ-gbéji bo nọ nọ̀ tòdaho* towe lẹ mẹ,+ na afanumẹ sunnu towe po afanumẹ yọnnu towe po nido nọ gbọjẹ dile hiẹ lọsu nọ wà do.+ 15 Flindọ hiẹ lọsu ko lẹzun afanumẹ pọ́n to aigba Egipti tọn ji bọ Jehovah Jiwheyẹwhe towe gbọn alọ huhlọnnọ po awà dindlẹn etọn po gblamẹ plan we tọ́njẹgbonu sọn finẹ.+ Enẹwutu wẹ Jehovah Jiwheyẹwhe towe do degbena we nado nọ yìn Gbọjẹzan lọ.

16 “‘Gbògbéna otọ́ towe po onọ̀ towe po+ kẹdẹdile Jehovah Jiwheyẹwhe towe ko degbena we do, na hiẹ nido nọgbẹ̀ dẹn podọ na hiẹ nido tindo kọdetọn dagbe* to aigba he Jehovah Jiwheyẹwhe towe jlo na na we ji.+

17 “‘Hiẹ ma dona hùhlọ̀n.+

18 “‘Hiẹ ma dona deayọ.+

19 “‘Hiẹ ma dona fìnnú.+

20 “‘Hiẹ ma dona dekunnu lalo sọta gbẹtọ hatọ towe.+

21 “‘Hiẹ ma dona donukunkẹn gando asi gbẹtọ hatọ towe tọn go.+ Hiẹ ma dona donukunkẹn gando owhé gbẹtọ hatọ towe tọn, kavi ogle etọn, kavi afanumẹ sunnu etọn, kavi afanumẹ yọnnu etọn, kavi oyìnsú etọn, kavi kẹtẹkẹtẹ etọn, kavi nudepope he yin gbẹtọ hatọ towe tọn go.’+

22 “Gbedide* ehelẹ wẹ Jehovah yí ogbè lélé do lá na mì gbẹtọgun lọ pete to osó lọ kọ̀n, sọn miyọ́n lọ, aslọ lọ po zinvlu gọ́ngọ́n lọ po mẹ,+ podọ ewọ ma yí nudevo de dogọ; enẹgodo ewọ wlan yé do wekan-zannu awe ji bo yí yé na mi.+

23 “Ṣigba, tlolo he mìwlẹ sè ogbè lọ sọn zinvlu lọ mẹ, dile osó lọ yí miyọ́n do to jiji,+ nukọntọ hẹnnu mìtọn lẹ tọn po mẹho lẹpo po dọnsẹpọ mi. 24 To whenẹnu, mìwlẹ dọ dọ, ‘Todin, Jehovah Jiwheyẹwhe mítọn ko do gigo etọn po kiklo-yinyin etọn po hia mí, bọ mí ko sè ogbè etọn sọn miyọ́n lọ mẹ.+ Míwlẹ ko mọ to egbé dọ Jiwheyẹwhe sọgan dọho hẹ gbẹtọ, ṣogan bọ mẹlọ na pò togbẹ̀.+ 25 Todin, naegbọn míwlẹ nado kú? Na miyọ́n daho ehe sọgan fiọ mí. Eyin mí zindonukọn nado to ogbè Jehovah Jiwheyẹwhe mítọn tọn sè, be mí na kú janwẹ. 26 Na mẹnu to gbẹtọvi lẹ mẹ wẹ ko sè ogbè Jiwheyẹwhe ogbẹ̀nọ lọ tọn bọ e to hodọ sọn miyọ́n mẹ dile míwlẹ sè do, ṣogan bo gbẹ́ pò togbẹ̀? 27 Hiẹ wẹ na nọ dọnsẹpọ Jehovah Jiwheyẹwhe mítọn nado sè nuhe e jlo na dọ lẹpo, enẹgodo hiẹ na nọ dọ nuhe Jehovah Jiwheyẹwhe mítọn ko dọna we lẹpo na mí bọ míwlẹ na nọ dotoai bo na nọ wà ẹ.’+

28 “Enẹwutu, Jehovah sè ohó he mìwlẹ dọna mi lẹ, Jehovah sọ dọna mi dọ, ‘Yẹn ko sè ohó he omẹ ehelẹ dọna we lẹ. Nuhe yé dọ lẹpo wẹ yọ́n.+ 29 Eyin yé ko gbẹ́ tindo ahun he na nọ dibusi mi+ bo nọ yìn gbedide ṣie lẹpo to whepoponu;+ to whenẹnu, e na nọ yin dagbe na yewlẹ po visunnu yetọn lẹ po kakadoi!+ 30 Yì bo dọna yé dọmọ: “Mì lẹkọyi gòhọ mìtọn lẹ mẹ.” 31 Ṣigba, hiẹ ni nọte to dè e fi, bo gbọ yẹn ni dọ gbedide, aṣẹdai po nudide whẹdida tọn lọ lẹpo po na we, ehe hiẹ dona plọn yé bọ yé na nọ setonuna to aigba he yẹn to nina yé nado yí lọ ji.’ 32 Todin, mìwlẹ dona nọ yí sọwhiwhe do basi kẹdẹdile Jehovah Jiwheyẹwhe mìtọn ko degbe etọn na mì do.+ Mì ma dona lẹhlan adusi kavi hlan amiyọn.+ 33 Mìwlẹ dona nọ zinzọnlin gbọn aliho he Jehovah Jiwheyẹwhe mìtọn ko degbe etọn na mì lẹpo ji,+ na mì nido nọgbẹ̀ bo tindo kọdetọn dagbe bosọ nọgbẹ̀ dẹn to aigba he mì jlo na yí lọ ji.+

6 “Todin, ehelẹ wẹ gbedide, aṣẹdai po nudide whẹdida tọn lẹ po he Jehovah Jiwheyẹwhe mìtọn ko na nado plọn mì, na mìwlẹ nido nọ setonuna yé to whenuena mì na dasá yì aigba he mì jlo na yí lọ ji, 2 na hiẹ nido nọ dibusi Jehovah Jiwheyẹwhe towe bo nọ setonuna osẹ́ndoai po gbedide etọn lẹpo po he yẹn to nina we—yèdọ hiẹ, ovi towe lẹ, po ovivi towe lẹ po+—to gbẹninọ towe lẹpo whenu, na hiẹ nido nọgbẹ̀ dẹn.+ 3 Podọ Islaeli E, hiẹ dona dotoai bo nọ yí sọwhiwhe do setonuna yé, na hiẹ nido tindo kọdetọn dagbe bo lẹzun susugege to aigba he ji anọ́sin po owín po to sisà te lọ ji, kẹdẹdile Jehovah Jiwheyẹwhe tọgbo towe lẹ tọn ko dopagbe etọn na we do.

4 “Islaeli E, dotoai: Jehovah Jiwheyẹwhe mítọn, Jehovah dopo wẹ.+ 5 Hiẹ dona yí ahun towe lẹpo, alindọn* towe lẹpo,+ podọ huhlọn* towe lẹpo+ do yiwanna Jehovah Jiwheyẹwhe towe. 6 Ohó ehelẹ he yẹn degbena we to egbé dona tin to ahun towe mẹ, 7 podọ hiẹ dona nọ yí sọwhiwhe do plọn yé* ovi towe lẹ+ bo na nọ dọho gando yé go to whenue hiẹ sinai to owhé towe gbè, to whenue hiẹ to zọnlinzin to aliji, to whenue hiẹ mlọnai podọ to whenue hiẹ fọ́n.+ 8 Sìn yé do alọ towe go taidi nuflinmẹ de, podọ yé dona taidi ota-blanú de to nukọn towe.*+ 9 Kàn yé do dòtin ohọ̀n ohọ̀ towe tọn lẹ go podọ do họngbo towe lẹ go.

10 “To whenue Jehovah Jiwheyẹwhe towe na ko plan we jẹ aigba he ewọ ko whlé na tọgbo towe Ablaham, Isaki, po Jakọbu po nado na we lọ ji+—yèdọ tòdaho he klo bosọ yọnwhanpẹ he hiẹ ma gbá lẹ,+ 11 owhé he gọ́ na onú dagbedagbe wunmẹ lẹpo he hiẹ ma wazọ́n na, osindò he hiẹ ma kùn lẹ gọna vẹngle lẹ po atin olivie tọn lẹ po he hiẹ ma do—podọ to whenue hiẹ na ko dùnú bo gọ́ho+ godo, 12 hiẹ dona to aṣeji ma nado wọn Jehovah,+ mẹhe plan we jẹgbonu sọn aigba Egipti tọn ji, yèdọ sọn kanlinmọgbenu. 13 Jehovah Jiwheyẹwhe towe wẹ hiẹ dona nọ dibusi,+ ewọ wẹ hiẹ dona nọ sẹ̀n,+ podọ gbọn oyín etọn dali wẹ hiẹ dona nọ whlé.+ 14 Mìwlẹ ma dona nọ hodo yẹwhe devo lẹ, yèdọ yẹwhe akọta he lẹdo mì pé lẹ tọn depope,+ 15 na Jehovah Jiwheyẹwhe towe he tin to ṣẹnṣẹn mìtọn yin Jiwheyẹwhe de he nọ biọ mẹdezejo mlẹnmlẹn.+ Eyin e ma yinmọ, Jehovah Jiwheyẹwhe towe na gblehomẹ sinsinyẹn do gowe+ bo na hù we sudo sọn nukunmẹ aigba tọn ji.+

16 “Mìwlẹ ma dona whlé Jehovah Jiwheyẹwhe mìtọn pọ́n+ dile mì whlé e pọ́n to Masa do.+ 17 Mì dona nọ yí sọwhiwhe do setonuna gbedide Jehovah Jiwheyẹwhe mìtọn tọn gọna nuflinmẹ etọn po aṣẹdai etọn lẹ po he ewọ ko degbena mì nado nọ setonuna. 18 Hiẹ dona nọ wà nuhe sọgbe bosọ yin dagbe to nukun Jehovah tọn mẹ lẹ, na hiẹ nido tindo kọdetọn dagbe podọ na hiẹ nido yì dọ́n bo yí aigba dagbedagbe lọ he Jehovah ko whlé na tọgbo towe lẹ,+ 19 gbọn kẹntọ towe lẹpo yinyan sẹ̀ sọn nukọn towe dali, kẹdẹdile Jehovah ko dopagbe etọn do.+

20 “To sọgodo, eyin visunnu towe kanse we dọ, ‘Etẹwẹ nuflinmẹ, aṣẹdai po nudide whẹdida tọn lọ lẹ po he Jehovah Jiwheyẹwhe mítọn ko degbe etọn na mì lẹ zẹẹmẹdo?’ 21 to whenẹnu, hiẹ na dọna visunnu towe dọ, ‘Mí lẹzun afanumẹ na Falo to Egipti, ṣigba Jehovah yí alọ huhlọnnọ etọn do plan mí jẹgbonu sọn Egipti. 22 Na Jehovah to ohia po azọ́njiawu lẹ po, he yin daho po mẹvasudotọ lẹ po dohlan Egipti,+ podọ hlan Falo po whédo etọn lẹpo+ po ji to nukun mítọn lẹ mẹ. 23 Ewọ sọ plan mí jẹgbonu sọn finẹ nado hẹn mí wáfi nado na mí aigba lọ he e ko whlé na tọgbo mítọn lẹ.+ 24 Enẹgodo, Jehovah degbena mí nado nọ setonuna aṣẹdai ehe lẹpo podọ nado nọ dibusi Jehovah Jiwheyẹwhe mítọn, na e nido yin dagbe na mí kakadoi,+ podọ na mí nido nọgbẹ̀ zọnmii+ dile mí te do to egbé. 25 Eyin mí nọ yí sọwhiwhe do yìn gbedide ehe lẹpo nado nọ setonuna Jehovah Jiwheyẹwhe mítọn kẹdẹdile e ko degbe etọn na mí do,+ míwlẹ na nọ yin pinpọnhlan di dodonọ.’

7 “To whenue Jehovah Jiwheyẹwhe towe na plan we jẹ aigba he ji hiẹ jei nado yí to madẹnmẹ lọ ji,+ ewọ nasọ gbidi akọta he mẹ gbẹtọ sù te taun lẹ sẹ̀ sọn nukọn towe:+ enẹ wẹ Hetinu lẹ, Gilgaṣinu lẹ, Amolinu+ lẹ, Kenaninu lẹ, Pelizinu lẹ, Hivinu lẹ po Jẹbusinu+ lẹ po, yèdọ akọta ṣinawe he mẹ gbẹtọ sù te taun bosọ yin huhlọnnọ hú we.+ 2 Jehovah Jiwheyẹwhe towe na jo yé do alọ towe mẹ bọ hiẹ na gbawhàn yetọn.+ Hiẹ dona và yé sudo dandan.+ Hiẹ ma dona basi alẹnu depope hẹ yé kavi do nukundagbe depope hia yé.+ 3 Hiẹ ma dona biọ kanṣiṣa alọwle tọn depope mẹ hẹ yé. A na viyọnnu towe lẹ visunnu yetọn lẹ taidi asi kavi yí viyọnnu yetọn lẹ na visunnu towe lẹ taidi asi blo.+ 4 Na yé na lilẹ́ visunnu towe lẹ sọn hihodo mi mẹ nado yì sẹ̀n yẹwhe devo lẹ;+ to whenẹnu Jehovah na gblehomẹ do mì go sinsinyẹn bo na hù we sudo plaun.+

5 “Kakatimọ, nuhe mìwlẹ dona wà na yé die: Mì họ́ agbà yetọn lẹ liai, gbà dòtin wiwe zannu tọn+ yetọn lẹ hányán, sán dòtin wiwe*+ yetọn lẹ liai bo mẹ̀ boṣiọ pipà+ yetọn lẹ. 6 Na akọta wiwe de wẹ hiẹ yin na Jehovah Jiwheyẹwhe towe, podọ Jehovah Jiwheyẹwhe towe ko de we nado lẹzun akọta etọn, yèdọ nutindo vonọtaun* etọn sọn akọta he tin to nukunmẹ aigba tọn ji lẹpo mẹ.+

7 “E ma yin na mìwlẹ wẹ sù hugan to akọta lẹpo mẹ wutu wẹ Jehovah do dó owanyi hia mì bo de mì gba,+ na mìwlẹ wẹ whè to sọha mẹ hugan to akọta lẹpo mẹ.+ 8 Kakatimọ, na owanyi he Jehovah tindo na mì wutu wẹ, podọ na ewọ yin nugbonọ na whiwhle he ewọ ko whlé na tọgbo mìtọn lẹ+ wutu wẹ Jehovah do yí alọ huhlọnnọ etọn do plan mì jẹgbonu nado fli mì gọ̀ sọn kanlinmọgbenu,+ yèdọ sọn alọ Falo ahọlu Egipti tọn mẹ. 9 Hiẹ yọnẹn ganji dọ Jehovah Jiwheyẹwhe towe wẹ Jiwheyẹwhe nugbo lọ, yèdọ Jiwheyẹwhe nugbonọ lọ, he nọ yin nugbonọ na alẹnu etọn bo nọ do owanyi nugbo hia kakajẹ whẹndo fọtọ́ntọ mẹhe yiwanna ẹn bosọ nọ yìn gbedide etọn lẹ tọn ji.+ 10 Ṣigba, ewọ na yiahọsu to mẹhe gbẹwanna ẹn lẹ go tlọlọ gbọn viva yé sudo dali.+ E ma na whleawu nado sayana mẹhe gbẹwanna ẹn lẹ; e na yiahọsu to yé go tlọlọ. 11 Enẹwutu, hiẹ ni to aṣeji nado nọ setonuna gbedide, aṣẹdai po nudide whẹdida tọn lọ lẹ po he yẹn to nina we to egbé, gbọn yìnyìn yé dali.

12 “Eyin mì zindonukọn nado nọ dotoaina nudide whẹdida tọn ehelẹ bo nọ setonuna yé bosọ nọ yìn yé, Jehovah Jiwheyẹwhe towe na yin nugbonọ gando alẹnu po owanyi nugbo etọn po he e ko whlé na tọgbo towe lẹ go. 13 Ewọ na yiwanna we bo na dona we bosọ hẹn we sudeji. Mọwẹ, ewọ na yí ovi susu do dona we*+ bo na hẹn sinsẹ́n aigba towe tọn, likun towe, ovẹn yọyọ towe, amì towe,+ oyìnvu he to kanlinpa towe mẹ lẹ po lẹngbọvu he to lẹngbọpa towe mẹ lẹ po sudeji to aigba he ewọ ko whlé na tọgbo towe lẹ nado na we lọ ji.+ 14 Hiẹ na lẹzun donanọ hugan to akọta lẹpo mẹ;+ sunnu kavi yọnnu de to hiẹ mẹ ma na nọma jivi, mọjanwẹ kanlin-yìnyìn towe lẹ ma na nọma tindo ovi lẹ do niyẹn.+ 15 Jehovah na de azọ̀njijẹ lẹpo sẹ̀ sọn dè we, ewọ ma nasọ hẹn awutu ylankan he hiẹ ko yọnẹn to Egipti lẹ depope wá ji we.+ Kakatimọ, ewọ na hẹn yé wá mẹhe gbẹwanna we lẹpo ji. 16 Hiẹ dona và mẹhe Jehovah Jiwheyẹwhe towe ko jo do alọ towe mẹ lẹpo sudo.+ Hiẹ* ma dona wàlẹblanuna yé,+ podọ hiẹ ma dona sẹ̀n yẹwhe yetọn lẹ,+ na omọ̀ de wẹ enẹ na yin na we.+

17 “Eyin hiẹ dọ to ahun towe mẹ dọ, ‘Akọta ehelẹ sù hú mí. Nawẹ yẹn sọgan yàn yé sẹ̀ gbọn?’+ 18 hiẹ ma dona dibuna yé.+ Hiẹ dona tẹnpọn nado flin nuhe Jehovah Jiwheyẹwhe towe ko wà na Falo po Egipti pete po,+ 19 yèdọ whẹdida* dahodaho he nukun towe mọ lẹ, ohia lẹ po azọ́njiawu lẹ po+ gọna alọ huhlọnnọ po awà dindlẹn Jehovah Jiwheyẹwhe towe tọn po he e yí do plan we jẹgbonu.+ Nuhe Jehovah Jiwheyẹwhe towe na wà na akọta he hiẹ to budina lẹpo niyẹn.+ 20 Jehovah Jiwheyẹwhe towe na hẹn numọtolanmẹ flumẹjijẹ* tọn wá yé ji kakajẹ whenue mẹhe pò+ bo to yedelẹ ze whlá do we lẹ na dọ̀n. 21 A dike ahun towe gbàdo na yewlẹ tọn wutu blo, na Jehovah Jiwheyẹwhe towe tin hẹ we,+ yèdọ Jiwheyẹwhe huhlọnnọ de he sọ dobu.+

22 “Ayihaawe ma tin dọ Jehovah Jiwheyẹwhe towe na yàn akọta ehelẹ sẹ̀ sọn nukọn towe vudevude.+ Dotẹnmẹ ma na yin nina we nado và yé sudo po awuyiya po, na gbekanlin he na gbleawuna we lẹ nikaa jideji. 23 Jehovah Jiwheyẹwhe towe na jo yé do alọ towe mẹ bo na gbawhàn yetọn mlẹnmlẹn kaka yé nado yin huhusudo.+ 24 Ewọ na jo ahọlu yetọn lẹ do alọmẹ na we+ bọ hiẹ na súnsún yinkọ yetọn lẹ sẹ̀ sọn olọn glọ.+ Mẹdepope ma na nọte to nukọn towe+ kaka hiẹ nado sukúndona yé.+ 25 Mìwlẹ dona mẹ̀ boṣiọ pipà yẹwhe yetọn lẹ tọn lẹ to miyọ́n mẹ.+ A do ojlo hia to fataka po sika po he tin to yé go lẹ mẹ kavi bẹ yé na dewe blo,+ na hiẹ nikaa yin yẹdoklọ gbọn yé dali, na osùnú de wẹ yé yin na Jehovah Jiwheyẹwhe towe.+ 26 Hiẹ ma dona hẹn osùnú de biọ owhé towe gbè bo gbọnmọ dali lẹzun nuhe dona yin vivasudo de dile nulọ lọsu yin do gba. Hiẹ dona gbẹwanna ẹn sinsinyẹn bo nọ pọ́n ẹn di osùnú tlala de, na nuhe dona yin vivasudo de wẹ e yin wutu.

8 “Hiẹ dona payi nado nọ setonuna gbedide he yẹn to nina we to egbé lẹpo, na mìwlẹ nido nọgbẹ̀ zọnmii+ bo sudeji bosọ yì dọ́n nado yí aigba lọ he Jehovah ko whlé na tọgbo mìtọn lẹ.+ 2 Flin aliho dindẹn lọ he ji Jehovah Jiwheyẹwhe towe hẹn we zinzọnlin gbọn na owhe 40 ehelẹ to danfafa ji,+ nado whiwhẹ we bo whlé we pọ́n,+ na ewọ nido sọgan yọ́n nuhe to ahun towe mẹ,+ vlavo hiẹ na yìn gbedide etọn lẹ kavi lala. 3 Enẹwutu, ewọ whiwhẹ we bo dike bọ huvẹ hù we+ bosọ yí manna do yìn we,+ yèdọ nude he hiẹ kavi otọ́ towe lẹ ma yọnẹn, na ewọ nido sọgan hẹn we yọnẹn dọ gbẹtọ ma nọ nọgbẹ̀ gbọn núdùdù kẹdẹ dali gba, ṣigba gbọn ohó he nọ tọ́n sọn onù Jehovah tọn mẹ lẹpo dali wẹ gbẹtọ nọ nọgbẹ̀.+ 4 Avọ̀ he hiẹ do ma dohó, mọjanwẹ afọ towe lẹ ma jí to owhe 40 ehelẹ gblamẹ do niyẹn.+ 5 Hiẹ yọnẹn ganji to ahun towe mẹ dọ kẹdẹdile mẹde nọ wọhẹ visunnu etọn do, mọ wẹ Jehovah Jiwheyẹwhe towe to wiwọhẹ we do.+

6 “Todin, hiẹ dona nọ yìn gbedide Jehovah Jiwheyẹwhe towe tọn lẹ gbọn zọnlinzinzin to aliho etọn lẹ ji dali podọ gbọn budisi i dali. 7 Na aigba dagbedagbe+ de ji wẹ Jehovah Jiwheyẹwhe towe plan we jei, aigba de he ji tọ̀sisa* lẹ tin te, bọ asisa osin tọn* lẹ nọ to sisà to dankló ji podọ to lẹdo osó tọn mẹ, 8 aigba he gọ́ na likun, balekun, ovẹn sinsẹ́n lẹ, ovòtin lẹ po pomeglanate*+ lẹ po, aigba he gọ́ na amì olivie tọn po owín po,+ 9 aigba he ji núdùdù ma na hán bọ hiẹ ma na jẹdò nudepope tọn te, podọ aigba he ji gànyuu tin to zannu lẹ mẹ bọ hiẹ sọgan nọ kùn gànvẹẹ sọn osó etọn lẹ ji te.

10 “To whenue hiẹ na ko dùnú bo gọ́ho, hiẹ dona nọ pà Jehovah Jiwheyẹwhe towe na aigba dagbedagbe he ewọ ko na we lọ wutu.+ 11 Payi ma nado wọn Jehovah Jiwheyẹwhe towe gbọn awugbopo nado nọ setonuna gbedide etọn, nudide whẹdida tọn etọn po osẹ́ndoai etọn lẹ po he yẹn to nina we to egbé dali. 12 To whenue hiẹ dùnú bo gọ́ho bosọ gbá ohọ̀ whanpẹnọ lẹ bo nọ nọ̀ yé mẹ,+ 13 whenue kanlinpa towe po lẹngbọpa towe lẹ po jideji, bọ fataka po sika towe lẹ po sudeji, bọ hiẹ tindo susugege nulẹpo tọn, 14 a dike ahun towe lẹzun goyitọ+ bo hẹn we nado wọn Jehovah Jiwheyẹwhe towe blo, yèdọ mẹhe plan we jẹgbonu sọn aigba Egipti tọn ji, sọn kanlinmọgbenu,+ 15 mẹhe plan we nado zinzọnlin gbọn danfafa daho he dobu enẹ ji,+ fihe gọ́ na odàn adínọ lẹ po aklekle lẹ po, bo yin aigba-klo he ma tindo osin. Ewọ hẹn osin nado sà jẹgbonu sọn osé gángán mẹ+ 16 bo yí manna do yìn we+ to danfafa ji, yèdọ nude he otọ́ towe lẹ ma yọnẹn, na ewọ nido sọgan whiwhẹ we+ bo whlé we pọ́n nado hẹn ale wá na we to sọgodo.+ 17 Eyin hiẹ dọ to ahun towe mẹ dọ, ‘Huhlọn ṣie titi po hlọnhlọn alọ ṣie titi tọn po wẹ hẹn mi jẹ adọkun dole,’+ 18 flindọ Jehovah Jiwheyẹwhe towe wẹ na we huhlọn nado jẹ adọkun,+ na ewọ nido sọgan hẹn alẹnu etọn he e ko whlé na tọgbo towe lẹ di, dile e yin do to egbé.+

19 “Eyin hiẹ wọn Jehovah Jiwheyẹwhe towe gbede bo hodo yẹwhe devo lẹ nado nọ sẹ̀n yé bosọ nọ dẹ́ do odò na yé, yẹn dekunnu sọta mì to egbé dọ mìwlẹ na dọ̀n dandan.+ 20 Kẹdẹdi akọta he Jehovah to vivasudo sọn nukọn mìtọn lẹ, mọ wẹ mìlọsu na dọ̀n do, na mì ma dotoaina ogbè Jehovah Jiwheyẹwhe mìtọn tọn wutu.+

9 “Sè, hiẹ Islaeli E, hiẹ jlo na dasá Jọdani yì dọ́n to egbé+ nado yàn akọta he klo bosọ yin huhlọnnọ hugan we lẹ sẹ̀,+ yèdọ tòdaho he klo bọ hihọ́ yetọn yiaga jẹ olọn,*+ 2 mẹhe dohuhlọn bo tọ́nalùn lẹ, visunnu Anakimi+ tọn lẹ, mẹhe hiẹ yọnẹn bo ko sọ sè bọ e yin didọ gando yé go dọ, ‘Mẹnu wẹ sọgan nọte to visunnu Anaki tọn lẹ nukọn?’ 3 Enẹwutu, hiẹ dona yọnẹn to egbé dọ Jehovah Jiwheyẹwhe towe na dasá to nukọnna we yì dọ́n.+ Miyọ́n nuvasudotọ de wẹ ewọ,+ ewọ nasọ hù yé sudo. E na duto yé ji to nukun towe mẹ, na hiẹ nido sọgan yàn yé sẹ̀ bleun bo và yé sudo, kẹdẹdile Jehovah ko dopagbe etọn na we do.+

4 “To whenue Jehovah Jiwheyẹwhe towe na ko yàn yé sẹ̀ sọn nukọn towe, a dọ to ahun towe mẹ dọ, ‘Na dodowiwa ṣie wutu wẹ Jehovah ko hẹn mi wáfi nado yí aigba ehe’ blo.+ Kakatimọ, na kanyinylan akọta ehelẹ+ tọn wutu wẹ Jehovah do to yinyan yé sẹ̀ sọn nukọn towe. 5 E ma yin na dodowiwa towe kavi nugbonọ-yinyin towe to ahun mẹ wutu wẹ hiẹ do jei dọ́n nado yí aigba yetọn gba. Kakatimọ, na kanyinylan akọta ehelẹ tọn wutu wẹ Jehovah Jiwheyẹwhe towe do to yinyan yé sẹ̀ sọn nukọn towe,+ podọ na Jehovah nido sọgan hẹn ohó he e ko whlé na tọgbo towe, Ablaham,+ Isaki+ po Jakọbu+ po di wutu wẹ. 6 Enẹwutu, yọnẹn dọ e ma yin na dodowiwa towe wutu wẹ Jehovah Jiwheyẹwhe towe do to aigba dagbedagbe ehe na we nado yí gba, na akọta tasinyẹntọ* de wẹ hiẹ.+

7 “Flin—a wọn gbede blo⁠—​lehe hiẹ hẹn homẹgble Jehovah Jiwheyẹwhe towe to danfafa ji do.+ Sọn azán he gbè mìwlẹ tọ́n sọn aigba Egipti tọn ji gbọ́n wẹ mì ko to atẹṣi sọta Jehovah kakajẹ whenue mì wáfi.+ 8 Mìwlẹ hẹn homẹgble Jehovah, etlẹ yin to Holẹbi bọ Jehovah gblehomẹ do mì go sọmọ bọ ewọ ko jlo na hù mì sudo.+ 9 To whenue yẹn hẹji yì osó lọ ji nado yí wekan-zannu+ lọ lẹ, yèdọ wekan-zannu alẹnu he Jehovah basi hẹ mì+ lọ tọn lẹ, yẹn gbọṣi osó lọ ji na okle 40 ozán 40+ bo ma dùnú kavi nùsin. 10 Enẹgodo, Jehovah bẹ wekan-zannu awe he ji Jiwheyẹwhe yí alọvi etọn do kannu do lẹ na mi, podọ ohó he Jehovah ko dọna mì to osó lọ ji sọn miyọ́n lọ mẹ to azán he gbè mì pli dopọ to finẹ lọ lẹpo wẹ tin to yé ji.+ 11 To whenue okle 40 ozán 40 lọ lẹ pé, Jehovah bẹ wekan-zannu awe lọ lẹ na mi, yèdọ wekan-zannu alẹnu tọn lọ lẹ, 12 Jehovah sọ dọna mi dọ, ‘Fọ́n bo yawu jẹte yì sọn fi, na omẹ towe lẹ he hiẹ plan jẹgbonu sọn Egipti ko yinuwa to aliho he gblezọn mẹ.+ Yé ko lẹhlan apadopo sọn aliho he yẹn degbena yé nado hodo lọ ji po awuyiya po. Yé ko basi boṣiọ kinkọ̀n de na yede.’+ 13 To whenẹnu, Jehovah dọna mi dọ, ‘Yẹn ko mọ akọta ehe, podọ pọ́n! akọta tasinyẹntọ*+ de wẹ. 14 Jo mi do, bo gbọ yẹn ni hù yé sudo bo súnsún yinkọ yetọn sẹ̀ sọn olọn glọ, bosọ gbọ yẹn ni yí we do basi akọta de he na dohuhlọn bo sù to sọha mẹ hú yewlẹ.’+

15 “Enẹgodo, yẹn lilẹ́ bo jẹte sọn osó lọ ji, dile osó lọ yí miyọ́n do to jiji,+ wekan-zannu alẹnu tọn awe lẹ sọ tin to alọ ṣie awe lẹ mẹ.+ 16 To whenẹnu, yẹn pọ́n bo mọdọ mìwlẹ ko waylando do Jehovah Jiwheyẹwhe mìtọn! Mì ko basi boṣiọ kinkọ̀n oyìnvu tọn de na mìde. Mì ko lẹkọ sọn ali he Jehovah ko degbena mì nado hodo lọ ji po awuyiya po.+ 17 Enẹwutu, yẹn hẹn wekan-zannu awe lọ lẹ go bo yí alọ ṣie awe lẹ do dlan yé do kọmẹ bosọ gbà yé hányán to nukun mìtọn mẹ.+ 18 Whenẹnu, yẹn ṣinyọ́n nukunmẹ ai to Jehovah nukọn taidi tintan whenu tọn, na okle 40 ozán 40. Yẹn ma dùnú kavi nùsin,+ na ylando he mì ko wà lọ lẹpo wutu, to whenue mì wà nuhe ylan to nukun Jehovah tọn mẹ bo hẹn homẹgble e. 19 Na ahun ṣie gbàdo, na Jehovah ko gblehomẹ sinsinyẹn do mì go,+ bọ ewọ ko jlo na hù mì sudo wutu. Ṣigba, Jehovah dotoaina mi to ojlẹ enẹ mẹ ga.+

20 “Jehovah sọ gblehomẹ do Aalọn go sinsinyẹn sọmọ bọ e jlo na hù i sudo,+ ṣigba n’vẹvẹ do ota Aalọn tọn mẹ to ojlẹ enẹ mẹ ga. 21 To whenẹnu, yẹn ze oyìnvu he mìwlẹ gbọn ylando wiwà dali basi lọ+ bo mẹ̀ ẹn to miyọ́n mẹ; yẹn gídí i bo lì i pọ́dọ́pọ́dọ́ kaka e do taidi kọ́gudu, bọ yẹn kọ̀n ẹn do tọ̀sisa he nọ sà sọn osó lọ ji mẹ.+

22 “Humọ, mìwlẹ sọ vọ́ hẹn homẹgble Jehovah sinsinyẹn to Tabela,+ to Masa,+ podọ to Kiblọti-hataava.+ 23 To whenue Jehovah do mì hlan sọn Kadẹṣi-balnea+ bo dọ dọ, ‘Mì hẹji yì dọ́n bo yí aigba lọ he yẹn na na mì dandan!’ mìwlẹ sọ ṣiatẹ sọta gbedide Jehovah Jiwheyẹwhe mìtọn tọn,+ podọ mì ma do yise+ hia to ewọ mẹ bo ma setonuna ẹn. 24 Sọn whenue yẹn ko yọ́n mì gbọ́n wẹ mì ko to atẹṣi sọta Jehovah.

25 “Enẹwutu, yẹn to nukunmẹ ṣinyọ́n ai mapote to Jehovah nukọn na okle 40 ozán 40,+ na Jehovah dọ dọ emi na hù mì sudo wutu wẹ yẹn do ṣinyọ́n nukunmẹ ai domọ. 26 Yẹn jẹ vẹvẹna Jehovah ji dọ, ‘Oklunọ Nupojipetọ Jehovah E, a hù omẹ towe lẹ sudo blo. Nutindo towe titi* wẹ yé yin,+ ehe hiẹ ko gbọn kiklo-yinyin towe gblamẹ fligọ bo yí alọ huhlọnnọ+ towe do plan jẹgbonu sọn Egipti. 27 Flin devizọnwatọ towe, Ablaham, Isaki po Jakọbu po.+ A na ayidonugo tasinsinyẹn omẹ ehelẹ tọn, kanyinylan yetọn po ylando+ yetọn po blo. 28 Eyin e ma yinmọ, mẹhe tin to aigba he ji hiẹ plan mí jẹgbonu sọn lẹ sọgan dọmọ: “Jehovah ma penugo nado plan yé yì aigba he e ko dopagbe etọn na yé lọ ji, podọ na e gbẹwanna yé wutu wẹ e do plan yé tọ́njẹgbonu nado hù yé to danfafa ji.”+ 29 Na omẹ towe lẹ wẹ yé yin podọ nutindo towe titi*+ he hiẹ ko yí huhlọn daho towe po awà dindlẹn towe po+ do plan jẹgbonu.’

10 “To ojlẹ enẹ mẹ, Jehovah dọna mi dọ, ‘Pà wekan-zannu awe he taidi tintan tọn lẹ+ bo hẹji wá dè e to osó lọ ji; hiẹ sọ dona yí owhlẹ do basi apotin de. 2 Yẹn nasọ kàn ohó he tin to wekan-zannu tintan he hiẹ ko gbà hányán ji lẹ do wekan-zannu ehelẹ ji, bọ hiẹ dona bẹ yé do apotin lọ mẹ.’ 3 Enẹwutu, yẹn yí owhlẹ akasia tọn do basi apotin de bo pà wekan-zannu awe he taidi tintan tọn lẹ bosọ hẹji yì osó lọ ji po wekan-zannu awe lọ lẹ po to alọmẹ.+ 4 To whenẹnu, ewọ kàn ohó he e ko kàn dai+ lẹ do wekan-zannu lọ lẹ ji, yèdọ Gbedide Ao lẹ,*+ he Jehovah ko na mì to osó lọ ji sọn miyọ́n lọ mẹ+ to azán he gbè mì pli dopọ to finẹ;+ Jehovah sọ bẹ yé na mi. 5 Enẹgodo, yẹn lilẹ́ bo jẹte sọn osó lọ+ ji bosọ bẹ wekan-zannu lọ lẹ do apotin he yẹn ko basi lọ mẹ, bọ yé gbọṣi finẹ, kẹdẹdile Jehovah ko degbe etọn na mi do.

6 “To whenẹnu, Islaelivi lẹ sẹtẹn sọn Beẹlọti Bene-jaakani yì Mọsela. Finẹ wẹ Aalọn kú bo yin dìdì do,+ visunnu etọn Eleazali sọ jẹ devizọnwa ji taidi yẹwhenọ do otẹn etọn mẹ.+ 7 Sọn finẹ, yé sẹtẹn yì Gudgoda, podọ sọn Gudgoda yì Jọtbata,+ yèdọ aigba de he ji asisa osin tọn* lẹ to sisà te.

8 “To ojlẹ enẹ mẹ, Jehovah de hẹnnu Levi tọn+ dovo nado nọ ze apotin alẹnu Jehovah tọn lọ,+ podọ nado nọ ṣite to Jehovah nukọn nado sọgan nọ yilizọn na ẹn bo nọ donamẹ to oyín etọn mẹ,+ dile yé to wiwà do kakajẹ egbehe. 9 Enẹwutu wẹ mimá kavi ogú depope ma yin nina Levi to nọvisunnu etọn lẹ ṣẹnṣẹn. Jehovah wẹ ogú etọn, kẹdẹdile Jehovah Jiwheyẹwhe towe ko dọna ẹn do.+ 10 Yẹn sọ nọ osó lọ ji na okle 40 ozán 40+ dile yẹn ko basi do to tintan whenu, bọ Jehovah sọ dotoaina mi to nujijọ enẹ whenu ga.+ Enẹwutu, Jehovah masọ jlo nado và we sudo ba. 11 Enẹgodo, Jehovah dọna mi dọ, ‘Nọ nukọnna gbẹtọ lọ lẹ bo wleawu nado sẹtẹn, na yé nido yì dọ́n bo yí aigba lọ he yẹn ko whlé na tọgbo yetọn lẹ nado na yé.’+

12 “Todin, Islaeli E, etẹwẹ Jehovah Jiwheyẹwhe towe to bibiọ sọn hiẹ si?+ Nulọ poun die: nado nọ dibusi Jehovah Jiwheyẹwhe towe,+ nado nọ zinzọnlin gbọn aliho etọn lẹpo ji,+ nado yiwanna ẹn, nado yí ahun towe lẹpo po alindọn* towe lẹpo po do nọ sẹ̀n Jehovah Jiwheyẹwhe towe,+ 13 podọ nado nọ yìn gbedide po osẹ́ndoai Jehovah tọn lẹ po he yẹn to nina we to egbé, na e nido yin dagbe na we.+ 14 Pọ́n, Jehovah Jiwheyẹwhe towe tọn wẹ olọn lẹ, yèdọ olọn olọn lẹ tọn* gọna aigba po nuhe tin to e ji lẹpo po.+ 15 Ṣigba, tọgbo towe lẹ kẹdẹ wẹ Jehovah dọnsẹpọ bo do owanyi etọn hia, ewọ ko sọ de mìwlẹ, he yin kúnkan yetọn,+ sọn gbẹtọ lẹpo mẹ, dile e yin do na mì to egbé. 16 Todin, mì dona klọ́ ahun mìtọn wé*+ bo gbọ tasinyẹn sọmọ.*+ 17 Na Jehovah Jiwheyẹwhe mìtọn wẹ Jiwheyẹwhe he yiaga hugan yẹwhe lẹpo,+ podọ Oklunọ oklunọ lẹ tọn, yèdọ Jiwheyẹwhe he klo bo dohuhlọn bosọ dobu, he ma nọ yinuwa hẹ mẹdepope po mẹnukuntahihopọn po+ bo masọ nọ kẹalọyi alọgodo-kuẹ. 18 Ewọ nọ dawhẹ dodo do tọṣiọvi po asuṣiọsi po tamẹ+ bo nọ do owanyi hia mẹhe to jonọ-gbéji+ bosọ nọ na ẹn núdùdù po avọ̀ po. 19 Mìlọsu dona nọ do owanyi hia mẹhe to jonọ-gbéji, na mìlọsu ko nọ jonọ-gbéji pọ́n to aigba Egipti tọn ji.+

20 “Jehovah Jiwheyẹwhe towe wẹ hiẹ dona nọ dibusi, ewọ wẹ hiẹ dona nọ sẹ̀n,+ ewọ go wẹ hiẹ dona tẹdo gligli, podọ gbọn oyín etọn dali wẹ hiẹ dona nọ whlé. 21 Ewọ wẹ hiẹ dona nọ pà.+ Ewọ wẹ Jiwheyẹwhe towe, he ko basi onú daho po nujiawu ehe lẹpo po na we, ehe nukun towe titi lẹ ko mọ.+ 22 To whenue tọgbo towe lẹ jẹte yì Egipti,+ yé omẹ* 70 wẹ, todin Jehovah Jiwheyẹwhe towe ko hẹn we sudeji taidi sunwhlẹvu olọn tọn lẹ.+

11 “Hiẹ dona yiwanna Jehovah Jiwheyẹwhe towe+ bo na nọ setonuna nubiọtomẹsi etọn lẹ to whepoponu, gọna osẹ́ndoai, nudide whẹdida tọn po gbedide etọn lẹ po. 2 Mì yọnẹn dọ mìwlẹ wẹ yẹn to hodọna to egbé, e ma yin visunnu mìtọn lẹ he ma ko yọ́n kavi mọ mẹplọnlọ Jehovah Jiwheyẹwhe mìtọn tọn,+ kiklo-yinyin etọn,+ alọ huhlọnnọ etọn+ po awà dindlẹn etọn po. 3 Yewlẹ ma mọ ohia etọn lẹ po nuyiwa etọn lẹ po to Egipti sọta Falo ahọlu Egipti tọn po otò etọn pete po;+ 4 kavi nuhe ewọ wà na awhànpa Egipti tọn lẹ, osọ́ po osọ́-kẹkẹ awhàn tọn Falo tọn lẹ po, ehe yin sisiọ do osin Ohù Vẹẹ tọn mẹ to whenue yé dómọna mì bọ Jehovah và yé sudo mlẹnmlẹn.*+ 5 Yewlẹ ma mọ nuhe ewọ wà na* mì to danfafa ji kakajẹ whenue mì wáfi, 6 kavi nuhe e wà na Datani po Abilami po, he yin visunnu Eliabi visunnu Leubẹni tọn lẹ to whenue aigba kẹnù bo bẹ yewlẹ po whédo yetọn lẹ po mì, gọna gòhọ yetọn lẹ po nutogbẹ̀ depope he nọgodona yé po, bọ ehe jọ to nukun Islaeli pete tọn mẹ.+ 7 Mìwlẹ ko yí nukun mìtọn titi do mọ azọ́njiawu he Jehovah wà lẹpo.

8 “Mìwlẹ dona nọ yìn gbedide he yẹn to nina mì to egbehe lẹpo, na mì nido sọgan lẹzun huhlọnnọ nado dasá yì aigba lọ ji bo yí i, 9 podọ na mì nido sọgan nọgbẹ̀ dẹn+ to aigba he Jehovah ko whlé nado na tọgbo mìtọn lẹ po kúnkan* yetọn lẹ po lọ ji,+ yèdọ aigba he ji anọ́sin po owín po to sisà te.+

10 “Aigba he hiẹ jei yíyí gbé lọ ma taidi aigba Egipti tọn, fihe mì tọ́n sọn, yèdọ fihe hiẹ nọ do jinukun towe te bo nọ jẹtukla susu nado húsinna taidi jipa omá tọn de nkọ. 11 Ṣigba, aigba he ji mìwlẹ jlo na dasá yì dọ́n nado yí to madẹnmẹ lọ yin aigba osó po dankló lẹ po tọn.+ E nọ nù osin he ja do e ji sọn olọn mẹ;+ 12 aigba de wẹ he Jehovah Jiwheyẹwhe towe to nukunpedego. Nukun Jehovah Jiwheyẹwhe towe tọn nọ tin to e ji to whepoponu, sọn bẹjẹeji kakajẹ vivọnu owhe tọn.

13 “Podọ eyin mìwlẹ nọ yí sọwhiwhe do setonuna gbedide he yẹn to nina mì to egbehe lẹ bo yiwanna Jehovah Jiwheyẹwhe mìtọn bosọ yí ahun mìtọn lẹpo po alindọn* mìtọn lẹpo po do nọ sẹ̀n ẹn,+ 14 yẹn na nọ hẹn jikun ja do aigba mìtọn ji to osaa sisọ mẹ, yèdọ jikun afò-whenu tọn po amakikọ-whenu tọn po, bọ hiẹ na nọ bẹ jinukun towe lẹ pli, gọna ovẹn yọyọ towe po amì towe po.+ 15 Yẹn nasọ hẹn omá lẹ wú to ogle towe lẹ mẹ na kanlin-yìnyìn towe lẹ, podọ hiẹ na dù bo gọ́ho.+ 16 Mì payi ma nado dike ahun mìtọn ni yin yẹdoklọ nado danbú bo sẹ̀n yẹwhe devo lẹ bosọ dẹ́ do odò na yé.+ 17 Eyin e ma yinmọ, Jehovah na gblehomẹ do mì go sinsinyẹn, ewọ nasọ sú olọn lẹ bọ jikun ma na ja+ podọ aigba ma na de sinsẹ́n etọn tọ́n, mìwlẹ nasọ busẹ plaun sọn aigba dagbedagbe he Jehovah to nina mì lọ ji.+

18 “Mìwlẹ dona zín ohó ṣie ehelẹ do ahun po alindọn* mìtọn po mẹ bo sìn yé do alọ mìtọn go taidi nuflinmẹ de podọ yé dona taidi ota-blanú de to nukọn mìtọn.*+ 19 Mì nọ plọn yé ovi mìtọn lẹ, bo nọ dọho gando yé go to whenue hiẹ sinai to owhé towe gbè, to whenue hiẹ to zọnlinzin to aliji, to whenue hiẹ mlọnai podọ to whenue hiẹ fọ́n.+ 20 Kàn yé do dòtin ohọ̀n ohọ̀ towe tọn lẹ go podọ do họngbo towe lẹ go, 21 na mìwlẹ po visunnu mìtọn lẹ po nido nọgbẹ̀ dẹn+ to aigba lọ he Jehovah ko whlé nado na tọgbo mìtọn lẹ ji,+ dile e na dẹnsọ bọ olọn na to aga na aigba.

22 “Eyin mìwlẹ yí sọwhiwhe do nọ yìn gbedide he yẹn to nina mì ehe bo nọ payi e go, nado yiwanna Jehovah Jiwheyẹwhe mìtọn,+ nado nọ zinzọnlin gbọn aliho etọn lẹpo ji bosọ nọ tẹdo ewọ go gligli,+ 23 Jehovah na yàn akọta ehe lẹpo sẹ̀ sọn nukọn mìtọn,+ bọ mìwlẹ na yàn akọta he dohuhlọn bosọ sù to sọha mẹ taun hugan mì lẹ sẹ̀.+ 24 Fidepope he mì ze afọ mìtọn do na nọ lẹzun mìtọn.+ Sọn danfafa ji kaka yì Lẹbanọni, sọn Tọ̀sisa lọ, yèdọ tọ̀sisa Euflate kọ̀n kaka yì ohù whèyihọ-waji tọn* kọ̀n na lẹzun dogbó mìtọn.+ 25 Mẹdepope ma na nọte to nukọn mìtọn.+ Jehovah Jiwheyẹwhe mìtọn na hẹn mẹhe nọ nọ̀ aigba he ji mìwlẹ na zinzọnlin gbọn lẹpo tin to sijọsijọ po obu po ji na mìtọn wutu,+ kẹdẹdile ewọ ko dopagbe etọn na mì do.

26 “Mì pọ́n, yẹn to dona po dẹ̀hodo po zedonukọnna mì to egbé:+ 27 mì na mọ dona eyin mì setonuna gbedide Jehovah Jiwheyẹwhe mìtọn tọn lẹ he yẹn to nina mì to egbé,+ 28 podọ dẹ̀hodo eyin mì ma setonuna gbedide Jehovah Jiwheyẹwhe mìtọn tọn lẹ+ bo lẹkọ sọn aliho he yẹn to gbedena mì to egbehe nado nọ hodo lọ ji bosọ hodo yẹwhe he mì ma ko yọnẹn lẹ.

29 “To whenue Jehovah Jiwheyẹwhe towe na ko plan we yì aigba he hiẹ jlo na yí lọ ji, hiẹ dona lá* dona lọ to Osó Gelizimi ji podọ dẹ̀hodo lọ to Osó Ebali ji.+ 30 Be e ma yin awà awetọ Jọdani tọn ji wẹ yé te, yèdọ hlan whèyihọ-waji, to aigba Kenaninu lẹ he nọ nọ̀ Alaba tọn ji, pannukọn Gilgali sẹpọ atin daho Molẹ tọn lẹ ya?+ 31 Na mìwlẹ jlo na dasá Jọdani nado yì dọ́n bo yí aigba he Jehovah Jiwheyẹwhe mìtọn to nina mì lọ.+ To whenue mì na ko yí aigba lọ bo to ninọ e ji, 32 mì dona payi nado nọ setonuna aṣẹdai po nudide whẹdida tọn po he yẹn to zizedonukọnna mì to egbehe lẹpo.+

12 “Ehelẹ wẹ aṣẹdai po nudide whẹdida tọn lẹ po he mì dona payi nado nọ setonuna to azán he mì na yí do nọgbẹ̀ lẹpo whenu to aigba he Jehovah Jiwheyẹwhe tọgbo towe lẹ tọn na na we nado yí lọ ji. 2 Mì dona gbà fihe akọta he mìwlẹ na yàn sẹ̀ lẹ ko nọ sẹ̀n yẹwhe yetọn lẹ te lẹpo kija mlẹnmlẹn,+ vlavo osó he yiaga lẹ ji, kavi to okọ́ta lẹ ji, kavi to atin he vùn ganji depope glọ. 3 Mì dona họ́ agbà yetọn lẹ liai, gídí dòtin wiwe zannu tọn yetọn lẹ, mẹ̀ dòtin wiwe*+ yetọn lẹ to miyọ́n mẹ, bo sán boṣiọ pipà he yin yẹwhe yetọn+ lẹ liai bosọ súnsún yinkọ yetọn lẹ sẹ̀ sọn otẹn enẹ mẹ mlẹnmlẹn.+

4 “Mìwlẹ ma dona nọ sẹ̀n Jehovah Jiwheyẹwhe mìtọn to aliho enẹ mẹ.+ 5 Kakatimọ, mì dona nọ dín Jehovah Jiwheyẹwhe mìtọn to fidepope he ewọ de nado ze oyín etọn doai do podọ fihe ewọ yí do basi fininọ etọn to hẹnnu mìtọn lẹpo ṣẹnṣẹn, finẹ wẹ mì ni nọ yì.+ 6 Finẹ wẹ mì dona nọ hẹn avọ́nunina mimẹ̀+ mìtọn lẹ yì, gọna avọ́sinsan mìtọn lẹ, mado-ao+ mìtọn lẹ, nunina he wá sọn alọ mìtọn mẹ,+ avọ́nunina pàdido tọn mìtọn lẹ, avọ́nunina sọn ojlo mẹ wá+ mìtọn lẹ podọ plọnji kanlinpa po lẹngbọpa mìtọn lẹ tọn po.+ 7 Mìwlẹ po whédo mìtọn lẹ po dona nọ dù to finẹ to Jehovah Jiwheyẹwhe mìtọn nukọn+ bo nọ jaya to nuwiwa mìtọn lẹpo mẹ,+ na Jehovah Jiwheyẹwhe towe ko dona we wutu.

8 “Mìwlẹ ma dona nọ yinuwa dile mí to wiwà do tofi to egbehe, bọ mẹdopodopo to nuhe sọgbe to nukun etọn mẹ* lẹ wà, 9 na mì ma ko jẹ gbọjẹtẹn+ lọ bo mọ ogú he Jehovah Jiwheyẹwhe towe to nina we lọ yí wutu. 10 To whenue mìwlẹ na ko dasá Jọdani+ bo nọ nọ̀ aigba he Jehovah Jiwheyẹwhe mìtọn to nina mì nado yí lọ ji, matin ayihaawe, ewọ na na mì gbọjẹ sọn alọ kẹntọ mìtọn he lẹdo mì pé lẹpo tọn mẹ bọ mìwlẹ na tin to hihọ́ mẹ.+ 11 Mì na nọ hẹn nuhe yẹn degbe etọn na mì lẹpo yì fihe Jehovah Jiwheyẹwhe mìtọn ko de nado ze oyín etọn doai do lọ+—yèdọ avọ́nunina mimẹ̀ mìtọn lẹ,+ avọ́sinsan mìtọn lẹ, mado-ao mìtọn lẹ, nunina he wá sọn alọ mìtọn mẹ po avọ́nunina pàdido tọn depope he mì ko dopà etọn na Jehovah po. 12 Mì na nọ jaya to Jehovah Jiwheyẹwhe mìtọn nukọn,+ yèdọ mìwlẹ, visunnu mìtọn lẹ, viyọnnu mìtọn lẹ, afanumẹ mìtọn sunnu po yọnnu po lẹ, gọna Levinu he tin to tòdaho* mìtọn lẹ mẹ, na ewọ ma tindo mimá de kavi ogú de hẹ mì wutu.+ 13 Payi ma nado nọ basi avọ́nunina mimẹ̀ towe to fidevo depope.+ 14 Fihe Jehovah ko de to dopo to aigba hẹnnu towe tọn lẹ mẹ, finẹ kẹdẹ wẹ hiẹ dona nọ basi avọ́nunina mimẹ̀ towe lẹ te, podọ finẹ wẹ hiẹ dona nọ basi nuhe yẹn degbe etọn na we lẹpo te.+

15 “Ṣigba, to whedepopenu he e jlo we,* hiẹ sọgan hù kanlin de bo dù olàn etọn,+ sọgbe hẹ lehe Jehovah Jiwheyẹwhe towe ko dona we do to tòdaho* towe lẹpo mẹ. Mẹhe yin mawé po mẹhe to wiweji po sọgan nọ dù sọn e mẹ, dile hiẹ na dù otẹgbọẹ kavi agbanlin de do. 16 Ṣigba, mìwlẹ ma dona nọ dù ohùn;+ hiẹ dona nọ kọ̀n ẹn do kọmẹ taidi osin.+ 17 Hiẹ ma na yin dotẹnmẹ jodona nado dù sọn mado-ao onú ehelẹ tọn mẹ to tòdaho* towe lẹ mẹ, enẹ wẹ jinukun towe lẹ, ovẹn yọyọ towe, amì towe, plọnji kanlinpa po lẹngbọpa towe po tọn,+ avọ́nunina pàdido tọn depope he hiẹ ko dopà etọn, avọ́nunina sọn ojlo mẹ wá towe lẹ, kavi nunina he wá sọn alọ towe mẹ. 18 Hiẹ dona nọ dù sọn onú ehelẹ mẹ to Jehovah Jiwheyẹwhe towe nukọn, to fihe Jehovah Jiwheyẹwhe towe na de+—yèdọ hiẹ, visunnu towe, viyọnnu towe, devisunnu towe po deviyọnnu towe po, gọna Levinu he tin to tòdaho* towe lẹ mẹ; hiẹ nasọ nọ jaya to nuwiwa towe lẹpo mẹ to Jehovah Jiwheyẹwhe towe nukọn. 19 Payi ma nado gbẹkọ Levinu lọ go+ dile e na dẹnsọ bọ hiẹ na togbẹ̀ to aigba towe ji.

20 “To whenue Jehovah Jiwheyẹwhe towe na ko hẹn dogbó aigba towe tọn gblodeji,+ kẹdẹdile e ko dopagbe etọn na we do,+ bọ hiẹ na dọ dọ, ‘N’jlo na dù olàn,’ na olàn dùdù wẹ jlo we* wutu, hiẹ sọgan dù olàn to whedepopenu he e jlo we.*+ 21 Eyin fihe Jehovah Jiwheyẹwhe towe ko de nado ze oyín etọn doai do lọ+ dẹn do we, to whenẹnu hiẹ dona hù kanlin depope sọn kanlinpa kavi lẹngbọpa towe he Jehovah ko na we lọ mẹ kẹdẹdile yẹn ko degbe etọn na we do, bọ hiẹ na dù to tòdaho* towe lẹ mẹ to whedepopenu he e jlo we.* 22 Hiẹ sọgan nọ dù sọn e mẹ dile hiẹ na dù otẹgbọẹ po agbanlin po do;+ mẹhe yin mawé po mẹhe to wiweji po sọgan nọ dù sọn e mẹ. 23 Saa magbe sinsinyẹn ma nado dù ohùn,+ na ohùn wẹ ogbẹ̀,*+ podọ hiẹ ma dona dù ogbẹ̀* po olàn lọ po. 24 Hiẹ ma dona dù i gba. Hiẹ dona nọ kọ̀n ẹn do kọmẹ taidi osin.+ 25 Hiẹ ma dona dù i, na e nido yin dagbe na hiẹ po ovi towe lẹ po, na hiẹ to nuhe sọgbe to nukun Jehovah tọn mẹ lẹ wà wutu. 26 Onú wiwe he yin towe lẹ po avọ́nunina pàdido tọn towe lẹ po kẹdẹ wẹ hiẹ dona hẹnwa to whenue hiẹ ja fihe Jehovah na de lọ. 27 Hiẹ na basi avọ́nunina mimẹ̀ towe lẹ to finẹ, yèdọ olàn lọ po ohùn lọ po,+ to agbà Jehovah Jiwheyẹwhe towe tọn ji, podọ ohùn avọ́sinsan towe lẹ tọn dona yin kinkọ̀n do agbà+ Jehovah Jiwheyẹwhe towe tọn go, ṣigba hiẹ sọgan dù olàn lọ.

28 “Payi nado nọ setonuna gbedide he yẹn to nina we ehe lẹpo, na e nido yin dagbe na hiẹ po visunnu towe lẹ po to whepoponu, na hiẹ to nuhe yọ́n bo sọgbe to nukun Jehovah Jiwheyẹwhe towe tọn mẹ lẹ wà wutu.

29 “To whenue Jehovah Jiwheyẹwhe towe na ko hù akọta he hiẹ jlo na yàn sẹ̀ lẹ sudo,+ bọ hiẹ na ko to aigba yetọn ji nọ, 30 payi ma nado yin wiwle do omọ̀ mẹ to whenue yewlẹ na ko yin huhusudo sọn nukọn towe pó godo. A kannubiọ gando yẹwhe yetọn lẹ go blo, dọ, ‘Nawẹ akọta ehelẹ nọ sẹ̀n yẹwhe yetọn lẹ gbọn? Yẹnlọsu na wà nudopolọ.’+ 31 Hiẹ ma dona wà ehe na Jehovah Jiwheyẹwhe towe, na osùnú wunmẹ lẹpo he Jehovah gbẹwanna wẹ yewlẹ nọ basi na yẹwhe yetọn lẹ, bo tlẹ nọ mẹ̀ visunnu po viyọnnu yetọn lẹ po to miyọ́n mẹ na yẹwhe yetọn lẹ.+ 32 Gbedide he yẹn to nina mì lẹpo wẹ mì dona payi nado nọ yìn.+ Mì ma dona yidogọna mọjanwẹ mì ma dona depò sọn e mẹ+ do niyẹn.

13 “Eyin yẹwhegán de kavi mẹhe nọ dọ dọdai gbọn odlọ lẹ dali de fọ́n to ṣẹnṣẹn mìtọn bo na we ohia kavi nujiawu de, 2 bọ ohia lọ kavi nujiawu lọ he e dọho etọn na we mọ hẹndi bọ ewọ jẹ didọ ji dọ, ‘Gbọ mí ni zinzọnlin hodo yẹwhe devo lẹ, yèdọ yẹwhe he hiẹ ma yọnẹn lẹ, bo gbọ mí ni nọ sẹ̀n yé,’ 3 hiẹ ma dona dotoaina ohó yẹwhegán enẹ kavi odlọ-kútọ enẹ tọn,+ na Jehovah Jiwheyẹwhe mìtọn to mì whlé pọ́n+ nado yọnẹn eyin mì yí ahun mìtọn lẹpo po alindọn* mìtọn lẹpo po do yiwanna Jehovah Jiwheyẹwhe mìtọn nugbonugbo.+ 4 Jehovah Jiwheyẹwhe mìtọn wẹ mìwlẹ dona nọ hodo, ewọ wẹ mì dona nọ dibusi, gbedide etọn lẹ wẹ mì dona nọ yìn, ogbè etọn wẹ mì dona nọ dotoaina; ewọ wẹ mì dona nọ sẹ̀n, podọ ewọ go wẹ mì dona tẹdo gligli.+ 5 Ṣigba, yẹwhegán enẹ kavi odlọ-kútọ enẹ dona yin hùhù,+ na ewọ tẹnpọn nado fọ́n atẹṣiṣi dote sọta Jehovah Jiwheyẹwhe mìtọn, nado lẹkọna mì sọn aliho he Jehovah Jiwheyẹwhe towe he plan mì jẹgbonu sọn Egipti bo fli we gọ̀ sọn kanlinmọgbenu ko degbena we nado hodo lọ ji wutu. Hiẹ sọ dona de oylan lọ sẹ̀ sọn ṣẹnṣẹn mìtọn.+

6 “Eyin nọvisunnu towe, yèdọ visunnu onọ̀ towe tọn, kavi visunnu towe kavi viyọnnu towe kavi asi yiwanna towe kavi họntọn vivẹ́ towe* de tẹnpọn nado doyẹklọ we to nuglọ dọmọ, ‘Gbọ mí ni yì sẹ̀n yẹwhe devo lẹ,’+ yèdọ yẹwhe he hiẹ kavi tọgbo towe lẹ ma yọnẹn lẹ, 7 sọn yẹwhe akọta he lẹdo mì pé lẹpo tọn mẹ, vlavo dehe sẹpọ mì wẹo kavi dehe dẹn do mì taun lẹ, sọn opodo aigba lọ tọn de jẹ opodo aigba lọ tọn devo, 8 hiẹ ma dona yigbe kavi dotoaina ẹn,+ mọjanwẹ hiẹ ma dona wàlẹblanuna ẹn kavi do awuvẹmẹ hia ẹ kavi basi hihọ́na ẹn do niyẹn; 9 kakatimọ hiẹ dona hù i dandan.+ Alọ towe wẹ dona yin zizedaga do e ji jẹnukọn nado hù i, enẹgodo alọ mẹhe pò lẹpo tọn.+ 10 Hiẹ dona dlan zannu do e hù,+ na ewọ ko tẹnpọn nado lẹkọna we sọn Jehovah Jiwheyẹwhe towe godo, mẹhe plan we jẹgbonu sọn aigba Egipti tọn ji, sọn kanlinmọgbenu. 11 To whenẹnu, Islaeli pete na sè bo dibu, bọ yé ma na vọ́ wà nuylankan mọnkọtọn devo depope to ṣẹnṣẹn mìtọn gbede ba.+

12 “Eyin hiẹ sè bọ e yin didọ to dopo to tòdaho towe he Jehovah Jiwheyẹwhe towe ko na we nado nọ nọ̀ e mẹ lẹ mẹ dọ, 13 ‘Sunnu nuvọ́nọ delẹ ko fọ́n to ṣẹnṣẹn mìtọn nado lẹkọna mẹhe nọ nọ̀ tòdaho yetọn mẹ lẹ gbọn didọ dali dọmọ: “Mì gbọ mí ni yì sẹ̀n yẹwhe devo lẹ,” yèdọ yẹwhe he mìwlẹ ma yọnẹn lẹ,’ 14 hiẹ dona dindona whẹho lọ, bo gbadopọnna ganji bosọ gbeje e pọ́n kitokito;+ podọ eyin e họnwun dọ nugbo wẹ dọ osùnú ehe ko yin wiwà to ṣẹnṣẹn mìtọn, 15 hiẹ dona yí ohí do hù mẹhe nọ nọ̀ tòdaho enẹ mẹ lẹ dandan.+ Hiẹ dona yí ohí do và ẹ po nuhe tin to e mẹ lẹpo po sudo,+ gọna kanlin-yìnyìn etọn lẹ. 16 Enẹgodo, hiẹ dona bẹ ogblànnu etọn lẹpo pli dopọ do tòplitẹn tòdaho lọ tọn bo yí miyọ́n do mẹ̀ tòdaho lọ, ogblànnu etọn lẹ nasọ yin yíyí do basi avọ́nunina blebu na Jehovah Jiwheyẹwhe towe. E na lẹzun okiti gbakija tọn tẹgbẹ tọn de. E ma dona yin vivọ́ gbá gbede. 17 Hiẹ ma dona ze depope to nuhe ko yin kinklandovo na vasudo* lẹ mẹ,+ na Jehovah nido jo homẹgble sinsinyẹn etọn do bo do lẹblanu po awuvẹmẹ po hia we bosọ hẹn we sudeji kẹdẹdile e ko whlé na tọgbo towe lẹ do.+ 18 Na hiẹ dona nọ setonuna* Jehovah Jiwheyẹwhe towe gbọn gbedide etọn he yẹn to nina we to egbehe lẹpo yìnyìn dali, bo gbọnmọ dali nọ wà nuhe sọgbe to nukun Jehovah Jiwheyẹwhe towe tọn mẹ.+

14 “Visunnu Jehovah Jiwheyẹwhe mìtọn tọn lẹ wẹ mì. Mì gbleawuna mìde+ kavi whlẹ́ ota mìtọn nukọn,* na mẹhe kú de wutu blo.+ 2 Na akọta wiwe de wẹ hiẹ yin+ na Jehovah Jiwheyẹwhe towe, podọ Jehovah ko de we nado lẹzun akọta etọn, yèdọ nutindo vonọtaun* etọn, sọn akọta he tin to nukunmẹ aigba tọn ji lẹpo mẹ.+

3 “Hiẹ ma dona dù nudepope he yin osùnú.+ 4 Kanlin he hiẹ sọgan dù lẹ die:+ oyìnsú, lẹngbọ, gbọgbọẹ, 5 agbanlin, otẹgbọẹ, olùwa, gbọgbọẹ gbémẹ tọn, owhín, lẹngbọ gbémẹ tọn po lẹngbọ osó ji tọn po. 6 Mì sọgan dù kanlin depope he ofẹ̀n etọn zẹ̀ do awe bo nọ dù dùkọ́. 7 Ṣigba, mì ma dona dù kanlin he bọdego ehelẹ he nọ dù dùkọ́ kavi he ofẹ̀n yetọn zẹ̀: kanklosọ́, azui po agidipanun po, na yé nọ dù dùkọ́, amọ́ ofẹ̀n yetọn ma zẹ̀. Enẹwutu, yé yin mawé na mì.+ 8 Ohàn lọsu, na ofẹ̀n etọn zẹ̀, ṣigba e ma nọ dù dùkọ́. Enẹwutu, e yin mawé na mì. Mìwlẹ ma dona dù olàn yetọn kavi doalọ oṣiọ yetọn go.

9 “Sọn nuhe nọ nọ̀ osin mẹ lẹpo mẹ, dehe mì sọgan dù lẹ die: Nudepope he tindo ajà po ofló po to agbasa go wẹ mì sọgan dù.+ 10 Ṣigba, mì ma dona dù nudepope he ma tindo ajà po ofló po to agbasa go. Mawé wẹ yé yin na mì.

11 “Mì sọgan dù ohẹ̀ depope he yin wiwe. 12 Ṣigba, dehe mì ma dona dù lẹ die: akùn, gàngàn tọ̀tó tọn, aklasu yuu,+ 13 gàngàn vẹẹ, gàngàn yuu, gàngàn wunmẹ devo depope, 14 ohọ́n wunmẹ lẹpo, 15 ogongo, ajankusu, odòkloe huto tọn, gàngàn-gbó wunmẹ lẹpo, 16 ajankusu pẹvi, ajankusu otó-gbónọ, tọ̀pápá-kọ̀gaa, 17 tọ̀pápá-bẹ́gaa, aklasu, tọ̀pápá, 18 adọwé, adọwé gbàmẹ tọn wunmẹ lẹpo, ahlinhán po toké po. 19 Humọ, nudida awànọ he nọ doawhàn zọnpọ* lẹpo wẹ yin mawé na mì. Yé ma dona yin dùdù. 20 Mì sọgan dù nudida he nọ zlọn depope he yin wiwe.

21 “Mìwlẹ ma dona dù kanlin depope he mì mọ bọ e ko kú.+ Hiẹ sọgan na ẹn mẹhe to jonọ-gbéji de he nọ nọ̀ tòdaho* towe lẹ mẹ, bọ ewọ sọgan dù i, kavi e sọgan yin sisà na jonọ de. Na akọta wiwe de wẹ hiẹ yin na Jehovah Jiwheyẹwhe towe.

“Hiẹ ma dona sọakusìn gbọgbọẹvu de to anọ́sin onọ̀ etọn tọn mẹ.+

22 “Hiẹ dona nọ na mado-ao jinukun he ogle towe detọ́n lẹpo tọn dandan to whemẹwhemẹ.+ 23 Hiẹ na nọ dù sọn mado-ao onú ehelẹ tọn mẹ, enẹ wẹ jinukun towe lẹ, ovẹn yọyọ towe, amì towe, gọna plọnji kanlinpa po lẹngbọpa towe lẹ tọn po to Jehovah Jiwheyẹwhe towe nukọn to fihe ewọ ko de nado ze oyín etọn doai do,+ na hiẹ nido sọgan plọn nado nọ dibusi Jehovah Jiwheyẹwhe towe to whepoponu.+

24 “Ṣigba, eyin gbejizọnlin lọ dẹn gbau na we bọ hiẹ ma sọgan bẹ popolẹpo yì fihe Jehovah Jiwheyẹwhe towe ko de nado ze oyín etọn doai do,+ na filọ dẹn gbau na we wutu (na Jehovah Jiwheyẹwhe towe na dona we), 25 to whenẹnu hiẹ sọgan sà yé bo zingbejizọnlin po akuẹ lọ po yì fihe Jehovah Jiwheyẹwhe towe na de. 26 Enẹgodo, hiẹ sọgan yí akuẹ lọ do họ̀ nudepope he jlo we*—oyìn, lẹngbọ, gbọgbọẹ, ovẹn po ahàn sinsinyẹn devo lẹ po, gọna nudevo depope he jlo we;* hiẹ nasọ dù yé to finẹ to Jehovah Jiwheyẹwhe towe nukọn bo jaya, yèdọ hiẹ po whédo towe po.+ 27 Humọ, hiẹ gbẹkọ Levinu he nọ nọ̀ tòdaho towe lẹ mẹ go blo,+ na e ma tindo mimá kavi ogú de hẹ we.+

28 “To vivọnu owhe atọ̀n lẹpo tọn, hiẹ dona nọ bẹ mado-ao jinukun he a mọ to owhe enẹ mẹ lẹpo tọn tọ́njẹgbonu bo bẹ yé do tòdaho towe lẹ mẹ.+ 29 Enẹgodo, Levinu he ma tindo mimá kavi ogú de hẹ we, mẹhe to jonọ-gbéji lẹ, tọṣiọvi lẹ po asuṣiọsi lẹ po he tin to tòdaho towe lẹ mẹ na wá bo dù gọ́ho,+ na Jehovah Jiwheyẹwhe towe nido dona we to nuhe a to wiwà lẹpo mẹ.+

15 “To vivọnu owhe ṣinawe lẹpo tọn, hiẹ dona nọ basi tundote.+ 2 Lehe tundote lọ na nọ yin bibasi do die: Mẹdepope he yàn namẹ na nọ jo ahọ́ he kọmẹnu etọn dù do e na ẹn. E ma dona biọ ahọ́ kọmẹnu kavi nọvisunnu etọn gba, na tundote de na yin lilá to Jehovah nukọn.+ 3 Hiẹ sọgan biọ ahọ́ mẹhe yin jonọ,+ ṣigba hiẹ dona basi tundote na nọvisunnu towe sọn nudepope he e duahọ etọn do we mẹ. 4 Etomọṣo, mẹdepope to mì mẹ ma na lẹzun wamọnọ, na e họnwun dọ Jehovah na dona we+ to aigba he Jehovah Jiwheyẹwhe towe to nina we nado yí taidi ogú lọ ji, 5 kiki eyin hiẹ setonuna ogbè Jehovah Jiwheyẹwhe towe tọn mlẹnmlẹn bo nọ yí sọwhiwhe do yìn gbedide ehe lẹpo he yẹn to nina we to egbé.+ 6 Na Jehovah Jiwheyẹwhe towe na dona we kẹdẹdile e ko dopagbe etọn na we do, bọ hiẹ na nọ yàn na akọta susu, ṣigba hiẹ ma na tindo nuhudo nado yàn sọn mẹdevo si;+ podọ hiẹ na dugán do akọta susu ji, ṣigba yewlẹ ma na dugán do ji we.+

7 “Eyin dopo to nọvisunnu towe lẹ mẹ lẹzun wamọnọ to dopo to tòdaho towe lẹ mẹ to aigba he Jehovah Jiwheyẹwhe towe to nina we lọ ji, a hẹn ahun towe sinyẹn kavi sinyẹn-fẹ̀n do nọvisunnu wamọnọ towe blo.+ 8 Na hiẹ dona nọ gbọn alọtútlú dali hùn alọ towe na ẹn+ bo dona nọ yàn nudepope he sin nuhudo ewọ tindo kavi he whèdo e na ẹn. 9 Payi ma nado tindo linlẹn ylankan ehe to ahun towe mẹ dọ, ‘Owhe ṣinawetọ, he yin owhe tundote tọn, ko sẹpọ,’+ bọ hiẹ na doalọtena alọtútlú towe dohlan nọvisunnu towe he yin wamọnọ bo ma na na ẹn nudepope. Eyin ewọ dawhá ylọ Jehovah sọta we, e na lẹzun ylando de dokọna we.+ 10 Hiẹ dona yí alọtútlú do na ẹn,+ podọ hiẹ* ma dona na ẹn po awuwhiwhle po, na enẹ wẹ na zọ́n bọ Jehovah Jiwheyẹwhe towe na dona we to azọ́n po nuwiwa towe lẹpo po mẹ.+ 11 Na wamọnọ lẹ ma na hán to aigba lọ ji gbede.+ Enẹwutu wẹ yẹn do to gbedena we dọ, ‘Hiẹ dona nọ gbọn alọtútlú dali hùn alọ towe na nọvisunnu towe agbátọnọ lẹ po wamọnọ lẹ po to aigba towe ji.’+

12 “Eyin dopo to nọvisunnu towe lẹ mẹ, yèdọ Heblu sunnu kavi yọnnu de, yin sisà na we bọ ewọ ko sẹ̀n we na owhe ṣidopo, to whenẹnu hiẹ dona na ẹn tundote to owhe ṣinawetọ mẹ.+ 13 Podọ eyin hiẹ na ẹn tundote, a do e hlan asigbá-alọgbá blo. 14 Hiẹ dona gbọn alọtútlú dali na ẹn nude sọn lẹngbọpa towe mẹ, sọn likun-flétẹn towe, podọ sọn amì po ovẹn towe he yin finfinyọ́n po mẹ. Dile Jehovah Jiwheyẹwhe towe ko dona we do, mọ wẹ hiẹ dona na ẹn do. 15 Flindọ hiẹ lọsu ko lẹzun afanumẹ pọ́n to aigba Egipti tọn ji bọ Jehovah Jiwheyẹwhe towe fli we gọ̀. Enẹwutu wẹ yẹn do to gbedena we to egbé nado nọ wà ehe.

16 “Ṣigba, eyin ewọ dọna we dọ, ‘Yẹn ma jlo na yì sọn dè we!’ na ewọ yiwanna hiẹ po whédo towe po wutu, na ewọ tindo ayajẹ sọn whenue gbọ́n e to dè we,+ 17 whenẹnu hiẹ na hẹn ẹn wá ohọ̀n lọ kọ̀n bo na yí nútọ́nnú de do tọ́n otó etọn luntọ́n, bọ ewọ na lẹzun afanumẹ towe to gbẹzan etọn lẹpo mẹ. Nudopolọ wẹ hiẹ dona wà na afanumẹ yọnnu towe ga. 18 Hiẹ pọ́n ẹn di nuhe vẹawu to whenue hiẹ to tundote na ẹn bọ ewọ na jo we do blo, na owhe ṣidopo he ewọ yí do sẹ̀n we ko sọ̀ azọ́n pakanọ de tọn whla awe, bọ Jehovah Jiwheyẹwhe towe ko sọ dona we to nudepope he hiẹ to wiwà mẹ.

19 “Hiẹ dona nọ klan kanlin asu plọnji lẹpo to kanlinpa po lẹngbọpa towe lẹ po mẹ do wiwe na Jehovah Jiwheyẹwhe towe.+ Hiẹ ma dona nọ yí plọnji he to kanlinpa* towe mẹ lẹ do wazọ́n depope kavi pà ofún na plọnji he to lẹngbọpa towe mẹ lẹ. 20 Hiẹ po whédo towe po wẹ dona nọ dù i to Jehovah Jiwheyẹwhe towe nukọn to whemẹwhemẹ to fihe Jehovah na de.+ 21 Ṣigba, eyin e tindo oblọ de—vlavo e yin sẹkunọ, nukuntọ́nnọ, kavi tindo oblọ sinsinyẹn devo depope—hiẹ ma dona yí i do sanvọ́ na Jehovah Jiwheyẹwhe towe.+ 22 Hiẹ dona dù i to tòdaho* towe lẹ mẹ, yèdọ mẹhe yin mawé po mẹhe to wiweji po sọgan dù i, kẹdẹdi otẹgbọẹ kavi agbanlin de.+ 23 Ṣigba, hiẹ ma dona nọ dù ohùn etọn;+ hiẹ dona nọ kọ̀n ẹn do kọmẹ taidi osin.+

16 “Nọ payi osun Abibi* tọn go, bo nọ basi hùnwhẹ Juwayi tọn hlan Jehovah Jiwheyẹwhe towe,+ na osun Abibi tọn mẹ wẹ Jehovah Jiwheyẹwhe towe plan we jẹgbonu sọn Egipti to zánmẹ.+ 2 Podọ hiẹ dona nọ basi avọ́sinsan Juwayi tọn hlan Jehovah Jiwheyẹwhe towe,+ sọn lẹngbọpa po kanlinpa towe po mẹ,+ to fihe Jehovah na de nado ze oyín etọn doai do.+ 3 Hiẹ ma dona yí nudepope he mẹ otọ́n yin dido do dù i;+ hiẹ dona dù akla madotọ́n, yèdọ akla yajiji tọn lọ na azán ṣinawe, na whlẹndo ji wẹ hiẹ zọ̀n do tọ́njẹgbonu sọn aigba Egipti tọn ji wutu.+ Dile hiẹ na togbẹ̀ dẹnsọ, nọ wà ehe na hiẹ nido sọgan nọ flin azán he gbè hiẹ tọ́njẹgbonu sọn aigba Egipti tọn ji.+ 4 Linfin he mẹ otọ́n yin dido depope ma dona yin mimọ to aigba towe lẹpo ji na azán ṣinawe,+ mọdopolọ depope to olàn he hiẹ na yí do sanvọ́ to whèjai azán tintan lọ tọn lẹ mẹ ma dona dlọ́ jẹ wunkẹngbe.+ 5 Dotẹnmẹ ma na yin nina we nado nọ basi avọ́sinsan Juwayi tọn lọ to depope poun to tòdaho he Jehovah Jiwheyẹwhe towe to nina we lẹ mẹ gba. 6 Ṣigba, e dona nọ yin bibasi to fihe Jehovah Jiwheyẹwhe towe na de nado ze oyín etọn doai do. Hiẹ dona basi avọ́sinsan Juwayi tọn lọ tlolo he owhè ko jai,+ yèdọ ojlẹ dide lọ he mẹ hiẹ tọ́njẹgbonu sọn Egipti. 7 Hiẹ dona hì i bo dù i+ to fihe Jehovah Jiwheyẹwhe towe na de,+ bọ hiẹ sọgan lẹkọyi gòhọ towe titi mẹ to wunkẹngbe afọnnu. 8 Azán ṣidopo wẹ hiẹ dona dù akla madotọ́n na, bọ to azán ṣinawetọ gbè, opli vonọtaun de na yin bibasi hlan Jehovah Jiwheyẹwhe towe. Hiẹ ma dona wazọ́n depope to azán enẹ gbè.+

9 “Hiẹ dona hia osẹ ṣinawe. A dona bẹ osẹ ṣinawe lọ lẹ hihia sọn ojlẹ he mẹ hiẹ zín agbogọdọẹ do jinukun he to ote to glemẹ lẹ mẹ.+ 10 Enẹgodo, hiẹ dona basi Hùnwhẹ Osẹ lẹ tọn hlan Jehovah Jiwheyẹwhe towe+ gbọn avọ́nunina sọn ojlo mẹ wá de nina dali, sọgbe hẹ lehe Jehovah Jiwheyẹwhe towe ko dona we do.+ 11 Podọ hiẹ dona jaya to Jehovah Jiwheyẹwhe towe nukọn to fihe Jehovah Jiwheyẹwhe towe ko de nado ze oyín etọn doai do, yèdọ hiẹ, visunnu towe, viyọnnu towe, afanumẹ sunnu towe, afanumẹ yọnnu towe, gọna Levinu he tin to tòdaho* towe lẹ mẹ, mẹhe to jonọ-gbéji lẹ, tọṣiọvi lẹ po asuṣiọsi lẹ po he nọ nọ̀ ṣẹnṣẹn mìtọn.+ 12 Flindọ hiẹ lọsu ko lẹzun afanumẹ pọ́n to Egipti,+ hiẹ sọ dona nọ payi bo nọ setonuna aṣẹdai ehelẹ.

13 “Hiẹ dona nọ basi Hùnwhẹ Gòhọtúntún*+ lẹ tọn na azán ṣinawe to whenue hiẹ bẹpli sọn likun-flétẹn towe podọ sọn amì po ovẹn towe he yin finfinyọ́n po mẹ. 14 Nọ jaya to hùnwhẹ towe whenu,+ yèdọ hiẹ, visunnu towe, viyọnnu towe, afanumẹ sunnu towe, afanumẹ yọnnu towe, gọna Levinu lẹ, mẹhe to jonọ-gbéji lẹ, tọṣiọvi lẹ po asuṣiọsi lẹ po he tin to tòdaho towe lẹ mẹ. 15 Azán ṣinawe wẹ hiẹ na yí do basi hùnwhẹ+ lọ hlan Jehovah Jiwheyẹwhe towe to fihe Jehovah na de, na Jehovah Jiwheyẹwhe towe na dona jinukun towe lẹpo+ po nuhe hiẹ to wiwà lẹpo po, bọ hiẹ na gọ́ na ayajẹ susu.+

16 “Sunnu lẹpo dona nọ sọawuhia to Jehovah Jiwheyẹwhe towe nukọn whla atọ̀n to whemẹwhemẹ to fihe ewọ na de: yèdọ to Hùnwhẹ Akla Madotọ́n tọn+ whenu, to Hùnwhẹ Osẹ lẹ tọn+ whenu, podọ to Hùnwhẹ Gòhọtúntún* lẹ tọn+ whenu, bọ depope to yé mẹ ma dona nọ sọawuhia to Jehovah nukọn asigbá-alọgbá. 17 Nunina he mẹdopodopo na hẹnwa dona sọgbe hẹ lehe Jehovah Jiwheyẹwhe etọn ko dona ẹn do.+

18 “Hiẹ dona de whẹdatọ+ lẹ po anademẹtọ lẹ po na hẹnnu dopodopo to tòdaho* he Jehovah Jiwheyẹwhe towe to nina we lẹpo mẹ, bọ yewlẹ dona nọ yí dodo do dawhẹna gbẹtọ lẹ. 19 Hiẹ ma dona sọtadona whẹdida dodo,+ homẹnukuntapọn,+ kavi kẹalọyi alọgodo-kuẹ, na alọgodo-kuẹ nọ tọ́nnukunna nuyọnẹntọ+ bo nọ wlu ohó do onù na dodonọ. 20 Whẹdida dodo—whẹdida dodo wẹ hiẹ dona nọ doafọna,+ na hiẹ nido sọgan to gbẹnọ zọnmii bo yí aigba lọ he Jehovah Jiwheyẹwhe towe to nina we.

21 “Hiẹ ma dona tùn atin wunmẹ depope dote taidi dòtin wiwe*+ sẹpọ agbà Jehovah Jiwheyẹwhe towe tọn he hiẹ basi.

22 “Mọdopolọ, hiẹ ma dona ze dòtin wiwe zannu tọn de doai na dewe,+ yèdọ nude he Jehovah Jiwheyẹwhe towe gbẹwanna.

17 “Hiẹ ma dona yí oyìnsú kavi lẹngbọ he tindo oblọ de kavi he nude jẹdò to e go do sanvọ́ hlan Jehovah Jiwheyẹwhe towe gba, na osùnú de wẹ e na yin na Jehovah Jiwheyẹwhe towe.+

2 “Mí ni dọ dọ sunnu kavi yọnnu de yin mimọ to mì mẹ, to depope to tòdaho he Jehovah Jiwheyẹwhe towe to nina we lẹ mẹ, he nọ wà nuhe ylan to nukun Jehovah Jiwheyẹwhe towe tọn mẹ lẹ bo nọ tùnafọ alẹnu etọn ji,+ 3 bọ ewọ lẹhlan apadopo nado nọ sẹ̀n yẹwhe devo lẹ bo nọ dẹ́ do odò na yé kavi na owhè kavi osun kavi awhànpa olọn tọn lẹpo,+ yèdọ nude he yẹn ma ko degbe etọn.+ 4 Eyin yè jẹwhẹ etọn na we kavi eyin hiẹ sè gandego, to whenẹnu hiẹ dona dindona whẹho lọ kitokito. Eyin e họnwun dọ nugbo wẹ+ dọ osùnú mọnkọtọn ko yin wiwà to Islaeli, 5 hiẹ dona plan sunnu kavi yọnnu he ko wà nuylankan mọnkọtọn tọ́n jẹ họngbo tòdaho lọ tọn lẹ kọ̀n, bọ sunnu kavi yọnnu lọ dona yin zannu dlan do hù.+ 6 Dodonu kunnudide kunnudetọ awe kavi kunnudetọ atọ̀n+ tọn ji wẹ mẹhe dona kú lọ dona yin hùhù do. E ma dona yin hùhù to dodonu kunnudide kunnudetọ dopo poun+ tọn ji gba. 7 Alọ kunnudetọ lọ lẹ tọn wẹ dona yin zizedaga do e ji jẹnukọn nado hù i, enẹgodo alọ mẹhe pò lẹpo tọn. Hiẹ dona de oylan lọ sẹ̀ sọn ṣẹnṣẹn mìtọn.+

8 “Eyin whẹho de fọ́n to dopo to tòdaho towe lẹ mẹ bo sinyẹn gbau na we nado dawhẹ etọn, vlavo whẹho he gando hùnsọndai go de wẹ,+ kavi whẹsadokọnamẹ de wẹ yin finfọndote, kavi walọ danuwiwa tọn de wẹ ko yin zinzan, kavi whẹho nudindọn tọn devo lẹ, hiẹ dona fọ́n bo yì fihe Jehovah Jiwheyẹwhe towe ko de lọ.+ 9 Yì yẹwhenọ Levinu lẹ po whẹdatọ+ lọ he to whẹda to azán enẹlẹ gbè po dè bo kanbiọ yé, yewlẹ nasọ dọ nudide lọ na we.+ 10 Enẹgodo, hiẹ dona yinuwa sọgbe hẹ nudide he yewlẹ dọna we to fihe Jehovah ko de lọ. Payi nado yinuwa sọgbe hẹ anademẹ he yé na we lẹpo. 11 Hiẹ dona yinuwa sọgbe hẹ osẹ́n he yé dohia we podọ sọgbe hẹ nudide lọ he yé lá na we.+ A lẹhlan apadopo sọn nudide he yé na dọna we lọ ji, vlavo hlan adusiwhé kavi hlan amiyọnwhé blo.+ 12 Sunnu lọ he yinuwa po sakla po bo ma setonuna yẹwhenọ kavi whẹdatọ lọ he to sinsẹ̀nzọnwa hlan Jehovah Jiwheyẹwhe towe to ojlẹ lọ mẹ dona kú.+ Hiẹ dona de oylan lọ sẹ̀ sọn Islaeli.+ 13 To whenẹnu, gbẹtọ lọ lẹpo na sè bo dibu, bọ yé ma na nọ yinuwa po sakla po ba.+

14 “To whenue hiẹ na ko yì aigba he Jehovah Jiwheyẹwhe towe to nina we lọ ji bo na ko yí i bosọ to ninọ e ji, eyin hiẹ wá dọ dọ, ‘Gbọ yẹn ni de ahọlu de do ji e kẹdẹdi akọta he lẹdo mi pé lẹpo,’+ 15 to whenẹnu, mẹhe Jehovah Jiwheyẹwhe towe de lọ wẹ hiẹ dona de+ di ahọlu. Nọvisunnu towe lẹ ṣẹnṣẹn wẹ hiẹ dona de ahọlu sọn. Hiẹ ma hà bo de jonọ de he ma yin nọvisunnu towe nado dugán do ji we. 16 Ṣigba, ewọ ma dona bẹ osọ́ lẹ pli na ede+ kavi plan akọta lọ lẹkọyi Egipti nado bẹ osọ́ susu pli dogọ+ gba, na Jehovah ko dọna mì dọ, ‘Mìwlẹ ma dona lẹkọyi dọ́n pọ́n gbede ba.’ 17 Mọdopolọ, ewọ ma dona bẹ asi lẹ pli na ede, na ahun etọn nikaa lẹhlan apadopo sọn dè e;+ mọjanwẹ ewọ ma dona bẹ fataka po sika susugege po pli na ede do niyẹn.+ 18 To whenuena ewọ hẹ ofìn ahọluduta etọn tọn ji, e dona basi vọkan Osẹ́n ehe tọn de do owe* de mẹ na ede, sọn dehe nọ nọ̀ yẹwhenọ Levinu lẹ si lọ mẹ.+

19 “Vọkan lọ dona gbọṣi ewọ si, bọ e dona nọ hia apadewhe etọn to gbẹzan etọn lẹpo mẹ,+ na ewọ nido sọgan plọn nado nọ dibusi Jehovah Jiwheyẹwhe etọn bo nọ payi ohó he tin to Osẹ́n ehe mẹ lẹpo po aṣẹdai ehelẹ po go gbọn nuyiwa sọgbe hẹ yé dali.+ 20 Gbọnmọ dali, ahun etọn ma na nọ ze ede daga do mẹmẹsunnu etọn lẹ ji podọ ewọ ma na lẹhlan apadopo sọn gbedide lọ kọ̀n, vlavo hlan adusiwhé kavi hlan amiyọnwhé, na ewọ nido sọgan dugán na ojlẹ dindẹn do ahọluduta etọn ji, yèdọ ewọ po visunnu etọn lẹ po to Islaeli ṣẹnṣẹn.

18 “Yẹwhenọ Levinu lẹ, podọ na taun tọn hẹnnu Levi tọn pete ma na tindo mimá kavi ogú depope to Islaeli. Yewlẹ na nọ dù sọn avọ́nunina gbọn miyọ́n dali he yin bibasi hlan Jehovah, ehe yin ogú etọn lẹ mẹ.+ 2 Enẹwutu, yewlẹ ma dona tindo ogú de to nọvisunnu yetọn lẹ ṣẹnṣẹn. Jehovah wẹ ogú yetọn, kẹdẹdile e ko dọna yé do.

3 “Todin, nuhe na yin jlọjẹ yẹwhenọ lẹ tọn sọn gbẹtọ lẹ dè die: Mẹdepope he basi avọ́sinsan de, vlavo oyìnsú tọn kavi lẹngbọ tọn, dona nọ yí abọ́ etọn, aglàn etọn po adọgbo etọn po na yẹwhenọ lọ. 4 Hiẹ sọ dona nọ na ẹn sinsẹ́n tintan jinukun towe, ovẹn yọyọ towe po amì towe po tọn lẹ, gọna ofún tintan he hiẹ pà sọn lẹngbọpa towe mẹ.+ 5 Jehovah Jiwheyẹwhe towe ko de ewọ po visunnu etọn lẹ po sọn hẹnnu towe lẹpo mẹ nado nọ yilizọn to oyín Jehovah tọn mẹ to whepoponu.+

6 “Ṣigba, eyin Levinu de tọ́n sọn tòdaho Islaeli tọn de he mẹ e nọ nọ̀,+ bọ ewọ* jlo nado yì fihe Jehovah de,*+ 7 ewọ sọgan nọ yilizọn to dọ́n to oyín Jehovah Jiwheyẹwhe etọn tọn mẹ kẹdẹdi nọvisunnu etọn Levinu lẹpo, he nọ wà sinsẹ̀nzọn to Jehovah nukọn+ to dọ́n. 8 Ewọ na nọ mọ mimá núdùdù tọn dopolọ yí hẹ yé,+ gbọnvona ale he e na mọyi sọn nutindo tọgbo etọn lẹ tọn sisà mẹ.

9 “To whenue hiẹ na ko jẹ aigba he Jehovah Jiwheyẹwhe towe to nina we lọ ji, hiẹ ma dona plọn nado nọ hodo apajlẹ osùnú he akọta enẹlẹ to wiwà lẹ tọn.+ 10 Mẹdepope ma dona yin mimọ to mì mẹ he nọ hẹn visunnu etọn kavi viyọnnu etọn jugbọn miyọ́n mẹ,+ kavi mẹdepope he yin dọṣẹdọtọ,+ mẹdepope he yin bojlẹtọ,+ mẹdepope he yin fákantọ,+ owọ́ntọ+ de, 11 mẹdepope he yin aṣẹtúndomẹtọ, mẹdepope he nọ kannubiọ sọn afinyọnnọ de+ kavi mẹhe nọ mọnú namẹ de dè,+ kavi mẹdepope he nọ kannubiọ sọn oṣiọ lẹ dè.+ 12 Na osùnú de wẹ mẹdepope he nọ wà onú ehelẹ yin na Jehovah, podọ na osùnú ehelẹ wutu wẹ Jehovah Jiwheyẹwhe towe do to akọta ehelẹ yàn sọn nukọn towe. 13 Hiẹ dona yin madoblọnọ to Jehovah Jiwheyẹwhe towe nukọn.+

14 “Na akọta he hiẹ to yinyan sẹ̀ ehelẹ ko nọ saba dotoaina bojlẹtọ+ po dọṣẹdọtọ+ lẹ po dai, ṣigba Jehovah Jiwheyẹwhe towe ma kẹalọyi dọ hiẹ ni wà onú mọnkọtọn depope. 15 Jehovah Jiwheyẹwhe towe na ze yẹwhegán he taidi yẹn nkọ de daga na we sọn mẹmẹsunnu towe lẹ mẹ. Mì dona nọ dotoaina ẹn.+ 16 Ehe wẹ yin gblọndo na nuhe hiẹ biọ Jehovah Jiwheyẹwhe towe to Holẹbi to azán he gbè mì pli dopọ+ bo dọmọ, ‘A dike yẹn sè ogbè Jehovah Jiwheyẹwhe ṣie tọn kavi mọ miyọ́n daho ehe ba blo, na yẹn nikaa kú.’+ 17 Enẹgodo, Jehovah dọna mi dọ, ‘Nuhe yé dọ lọ yọ́n. 18 Yẹn na ze yẹwhegán he taidi hiẹ nkọ de daga na yé sọn mẹmẹsunnu yetọn lẹ ṣẹnṣẹn,+ yẹn nasọ ze ohó ṣie do onù etọn mẹ,+ bọ ewọ na nọ dọ nuhe yẹn degbe etọn na ẹn lẹpo+ na yé. 19 Na nugbo tọn, yẹn na biọ to mẹhe ma na dotoaina ohó ṣie he ewọ na dọ to oyín ṣie mẹ lẹ si nado dogbè.+

20 “‘Eyin yẹwhegán depope gbọn sakla dali dọ ohó de to oyín ṣie mẹ to whenuena yẹn ma degbena ẹn nado wàmọ kavi eyin e dọho to oyín yẹwhe devo lẹ tọn mẹ, yẹwhegán enẹ dona kú.+ 21 Etomọṣo, hiẹ sọgan dọ to ahun towe mẹ dọmọ: “Nawẹ mí na wagbọn do yọnẹn dọ e ma yin Jehovah wẹ dọ ohó lọ?” 22 Eyin yẹwhegán de dọho to oyín Jehovah tọn mẹ bọ ohó lọ ma mọ hẹndi kavi jọ domọ, to whenẹnu e ma yin Jehovah wẹ dọ ohó lọ. Yẹwhegán lọ gbọn sakla dali dọ ẹ poun wẹ. Hiẹ ma dona dibusi ewọ.’

19 “To whenue Jehovah Jiwheyẹwhe towe na ko và akọta he sin aigba Jehovah Jiwheyẹwhe towe to nina we lẹ sudo, bọ hiẹ na ko yàn yé sẹ̀ bo nọ nọ̀ tòdaho yetọn lẹ mẹ podọ owhé yetọn lẹ gbè,+ 2 hiẹ dona de tòdaho atọ̀n dovo to aigba towe he Jehovah Jiwheyẹwhe towe to nina we nado yí lọ ji.+ 3 Hiẹ dona má aigba he Jehovah Jiwheyẹwhe towe to nina we nado yí lọ do atọ̀n, bo wleawuna aliho lẹ, na hlọnhutọ depope nido sọgan họnyi dopo to tòdaho enẹlẹ mẹ.

4 “Todin, nuhe dona nọ yin wiwà gando hlọnhutọ he họnyi finẹ nado gán lọ go die: To whenue e hù gbẹtọ hatọ etọn de to mayọnẹn mẹ bọ e ma yindọ ewọ ko gbẹwanna ẹn dai;+ 5 vlavo eyin ewọ po gbẹtọ hatọ etọn de po yì zunmẹ nado yì dà nake, bọ ewọ ze alọ etọn daga nado yí asiọvi do sán atin, ṣigba bọ ogàn asiọvi lọ tọn sún bo jẹ hatọ etọn go bọ e kú, hlọnhutọ lọ dona họnyi dopo to tòdaho ehelẹ mẹ nado gán.+ 6 Eyin e ma yinmọ, ahọsuyitọ ohùn tọn lọ,+ na adi sinsinyẹn etọn wutu,* sọgan dómọna hlọnhutọ lọ, bo plá ẹ bosọ hù i, na tòdaho lọ dẹn gbau wutu. Ṣigba, e ma jẹna okú, to whenuena e yindọ ewọ ma ko gbẹwanna hatọ etọn lọ dai.+ 7 Enẹwutu wẹ yẹn do to gbedena we dọ: ‘De tòdaho atọ̀n dovo.’

8 “Eyin Jehovah Jiwheyẹwhe towe hẹn aigba towe gblodeji dile ewọ whlé na tọgbo towe lẹ do,+ bọ ewọ ko na we aigba lọ lẹpo he e ko dopagbe etọn na tọgbo towe lẹ+ 9 —eyin hiẹ ko gbẹ́ yin nugbonọ to gbedide he yẹn to nina we to egbehe lẹpo yìnyìn mẹ, nado nọ yiwanna Jehovah Jiwheyẹwhe towe bo nọ zinzọnlin gbọn aliho etọn lẹ ji to whepoponu+—to whenẹnu hiẹ dona yí tòdaho atọ̀n devo lẹ dogọ tòdaho atọ̀n ehelẹ.+ 10 Gbọnmọ dali, ohùn homẹvọnọ de tọn ma na yin sinsọndai+ to aigba towe he Jehovah Jiwheyẹwhe towe to nina we di ogú lọ ji, podọ hiẹ ma na duhùnhọ depope.+

11 “Ṣigba, eyin mẹde ko gbẹwanna hatọ etọn dai,+ bo tọ̀pọwuna ẹn nado linú in, eyin ewọ gbleawuna ẹn* sinsinyẹn bọ e kú, bọ ewọ sọ họnyi dopo to tòdaho ehelẹ mẹ, 12 to whenẹnu mẹho tòdaho etọn mẹ tọn lẹ dona ylọ ẹ lẹkọwa sọn dọ́n bo ze e do alọmẹ na ahọsuyitọ ohùn tọn lọ, bọ ewọ dona yin hùhù.+ 13 Hiẹ* ma dona wàlẹblanuna ẹn, podọ hiẹ dona de hùnhọ́ homẹvọnọ lọ tọn sọn Islaeli,+ na e nido yin dagbe na we.

14 “Eyin hiẹ mọ ogú towe yí to aigba he Jehovah Jiwheyẹwhe towe jlo na na we ji, hiẹ ma dona sẹtẹnna ohia dogbó kọmẹnu towe tọn+ sọn fihe tọgbo lẹ ko tùn dogbó lẹ do gba.

15 “Kunnudetọ dopo poun ma sọgan gblewhẹdo* mẹdevo na nuṣiwa kavi ylando depope he mẹlọ sọgan ko wà gba.+ To dodonu kunnudide* kunnudetọ awe kavi atọ̀n tọn ji wẹ whẹho de dona yin hinhẹn lodo te.+ 16 Eyin kunnudetọ de gbọn nuvẹun sinsinyẹn dali dekunnu sọta mẹde bo sawhẹ ylanwiwa de tọn dokọna ẹn,+ 17 yé omẹ awe he ṣẹnṣẹn nudindọn lọ tin te lẹ na ṣite to Jehovah, yẹwhenọ lẹ po whẹdatọ he to sinsẹ̀nzọnwa to azán enẹlẹ gbè lẹ po nukọn.+ 18 Whẹdatọ lọ lẹ na dindona whẹho lọ kitokito,+ podọ eyin e họnwun dọ mẹhe dekunnu lọ yin kunnudetọ lalonọ bọ owhẹ̀ lalo de wẹ e sadokọna nọvisunnu etọn, 19 mìwlẹ dona wà na ẹn kẹdẹdi nuhe ewọ ko kàn ayiha gigẹdẹ nado wà na nọvisunnu etọn,+ podọ mì dona de oylan lọ sẹ̀ sọn ṣẹnṣẹn mìtọn.+ 20 Mẹhe pò lẹ nasọ sè bo dibu, bọ yé ma na vọ́ wà nuylankan mọnkọtọn devo depope to ṣẹnṣẹn mìtọn gbede ba.+ 21 Hiẹ* ma dona wàlẹblanuna ẹn:+ Ogbẹ̀* na yì na ogbẹ̀,* nukun na nukun, adú na adú, alọ na alọ podọ afọ na afọ.+

20 “Eyin hiẹ yì awhànfun hẹ kẹntọ towe lẹ gbé bo mọdọ osọ́, osọ́-kẹkẹ po awhànfuntọ yetọn lẹ po sù hú towe, a dibuna yé blo, na Jehovah Jiwheyẹwhe towe he plan we jẹgbonu sọn aigba Egipti tọn ji tin hẹ we.+ 2 To whenuena mì wleawufo nado yì awhàn, yẹwhenọ lọ dona dọnsẹpọ bo dọhona gbẹtọ lẹ.+ 3 E dona dọna yé dọmọ, ‘Sè, hiẹ Islaeli E, mì ko wleawufo nado yì funawhàn hẹ kẹntọ mìtọn lẹ. Ahun mìtọn ni ma gbàdo blo. Mì dibu, jẹflumẹ kavi jẹ sisọsisọ ji na yewlẹ tọn wutu blo, 4 na Jehovah Jiwheyẹwhe mìtọn to yìyì hẹ mì nado hoavùn na mì sọta kẹntọ mìtọn lẹ podọ nado whlẹn mì gán.’+

5 “Anademẹtọ lẹ sọ dona kanse gbẹtọ lẹ dọ, ‘Mẹnu to mì mẹ wẹ ko gbá ohọ̀ yọyọ de bo ma ko hùn in? Gbọ ewọ ni lẹkọyi owhé etọn gbè. Eyin e ma yinmọ, ewọ sọgan kú to awhàngbenu bọ sunnu devo wẹ na hùn in. 6 Podọ mẹnu to mì mẹ wẹ ko do vẹngle de bo ma ko jẹ sinsẹ́n etọn gbẹ̀n ji? Gbọ ewọ ni lẹkọ bo yì owhé etọn gbè. Eyin e ma yinmọ, ewọ sọgan kú to awhàngbenu bọ sunnu devo wẹ na jẹ sinsẹ́n etọn gbẹ̀n ji. 7 Podọ mẹnu to mì mẹ wẹ ko dopà alọwle tọn na yọnnu de bo ma ko dà ẹ? Gbọ ewọ ni lẹkọ bo yì owhé etọn gbè.+ Eyin e ma yinmọ, ewọ sọgan kú to awhàngbenu bọ sunnu devo wẹ na dà yọnnu lọ.’ 8 Anademẹtọ lọ lẹ sọ dona kanse gbẹtọ lọ lẹ dọ, ‘Mẹnu wẹ to budi bọ ahun etọn to gbigbàdo to mì mẹ?+ Ewọ ni lẹkọyi owhé etọn gbè, na e nikaa wá hẹn ahun nọvisunnu etọn lẹ tọn gbàdo taidi ewọ tọn nkọ.’*+ 9 To whenue anademẹtọ lẹ ko dọhona gbẹtọ lẹ pó godo, yé dona de ogán awhànpa lọ lẹ tọn lẹ nado deanana gbẹtọ lọ lẹ.

10 “Eyin a dọnsẹpọ tòdaho de nado funawhàn hẹ ẹ, hiẹ dona lá nubiọtomẹsi jijọho tọn lẹ na ẹn whẹ́.+ 11 Eyin e kọngbedopọ hẹ we do nubiọtomẹsi jijọho tọn lọ lẹ ji bo hùndonuvo hlan we, mẹhe yin mimọ to finẹ lẹpo na lẹzun nutindo towe bo na nọ yin hinhẹn nado wazọ́n sinsinyẹn lẹ, bọ yé na nọ sẹ̀n we.+ 12 Ṣigba, eyin e gbẹ́ nado basi jijọho hẹ we bọ kakatimọ e pé awhàn hẹ we, hiẹ ni dosla lẹdo e, 13 matin ayihaawe Jehovah Jiwheyẹwhe towe na jo e do alọ towe mẹ, podọ hiẹ dona yí ohí do hù sunnu he tin to e mẹ lẹpo. 14 Ṣigba, yọnnu lẹ, yọpọvu lẹ, kanlin-yìnyìn lẹ po nuhe tin to tòdaho lọ mẹ lẹpo po, yèdọ ogblànnu etọn lẹpo, wẹ hiẹ sọgan bẹ na dewe,+ hiẹ nasọ dù ogblànnu kẹntọ towe lẹ tọn lẹ, mẹhe Jehovah Jiwheyẹwhe towe ko jodo alọ towe mẹ.+

15 “Nuhe hiẹ na wà na tòdaho he dẹn do we taun lẹpo bo ma yin apadewhe tòdaho akọta he sẹpọ we ehelẹ tọn niyẹn. 16 Ṣigba, to tòdaho akọta ehelẹ he Jehovah Jiwheyẹwhe towe to nina we taidi ogú lẹ tọn mẹ, hiẹ ma dona pò nuhe tindo gbọfufu depope dogbẹ̀.+ 17 Kakatimọ, hiẹ dona và yé sudo mlẹnmlẹn, yèdọ Hetinu lẹ, Amolinu lẹ, Kenaninu lẹ, Pelizinu lẹ, Hivinu lẹ po Jẹbusinu lẹ po,+ kẹdẹdile Jehovah Jiwheyẹwhe towe ko degbena we do; 18 na yé nikaa plọn mì nado nọ doalọ to osùnú he wà yé te lẹ mẹ, ehe yé ko wà na yẹwhe yetọn lẹ, bo gbọnmọ dali hẹn we waylando sọta Jehovah Jiwheyẹwhe mìtọn.+

19 “Eyin hiẹ dosla lẹdo tòdaho de bo yí i to avùnhiho sọta ẹ na azán susu godo, hiẹ ma dona hù atin etọn lẹ sudo gbọn asiọvi yíyí do sán yé liai dali gba. Hiẹ sọgan dù sọn sinsẹ́n yetọn mẹ, ṣigba hiẹ ma dona sán yé liai.+ Na be hiẹ na dosla lẹdo atin danji tọn dile hiẹ na basi na gbẹtọ de do wẹ ya? 20 Atin he hiẹ yọnẹn dọ e ma yọ́n na dùdù kẹdẹ wẹ hiẹ sọgan husudo. Hiẹ sọgan sán ẹn liai bo dosla lẹdo tòdaho he to awhànfun hẹ we lọ kaka e nado jai.

21 “Eyin mẹhe yin hùhù de yin mimọ to danji to aigba he Jehovah Jiwheyẹwhe towe to nina we nado yí lọ ji bọ mẹhe hù i ma yin yinyọnẹn, 2 mẹho po whẹdatọ+ towe lẹ po dona tọ́nyi bo jlẹ lehe fihe oṣiọ lọ te dẹn do tòdaho he to lẹdo lọ mẹ lẹ sọ. 3 Enẹgodo, mẹho tòdaho he sẹpọ oṣiọ lọ hugan lọ tọn lẹ dona yí oyìnsi winyanwinyan de he ma ko yin yíyí do wazọ́n pọ́n, podọ ehe zẹgẹ ma ko jẹ okọ̀ na pọ́n, sọn kanlinpa yetọn mẹ, 4 bọ mẹho tòdaho enẹ tọn lẹ dona plan oyìnsi winyanwinyan lọ jẹte yì agbàdo tọ̀sisa tọn de kọ̀n fihe aigba lọ ma ko yin jijlo kavi jinukun ma ko yin dido do, yé nasọ linú okọ̀ na oyìnsi winyanwinyan lọ nado hù i to agbàdo lọ mẹ finẹ.+

5 “Yẹwhenọ lẹ, yèdọ Levinu lẹ nasọ dọnsẹpọ, na Jehovah Jiwheyẹwhe towe ko de yé nado nọ yilizọn na ẹn,+ bo nọ lá dona lẹ to oyín Jehovah tọn mẹ wutu.+ Yewlẹ wẹ na nọ dọ lehe nudindọn he bẹ danuwiwa hẹn lẹpo dona nọ yin didọgbò do.+ 6 Enẹgodo, mẹho tòdaho he sẹpọ oṣiọ lọ hugan lọ tọn lẹpo dona klọ́ alọ yetọn lẹ+ do oyìnsi winyanwinyan he yè linú okọ̀ na nado hù to agbàdo lọ mẹ ji, 7 yé nasọ dọmọ, ‘E ma yin alọ mítọn wẹ sọ̀n ohùn ehe dai gba, mọdopolọ nukun mítọn ma mọ whenue e to yinyin sinsọndai. 8 Jehovah E, a hia ehe dokọna Islaeli, omẹ towe lẹ he hiẹ fligọ blo,+ podọ a dike hùnhọ́ homẹvọnọ de tọn gbọṣi Islaeli, omẹ towe lẹ ji blo.’+ To whenẹnu, hùnhọ́ lọ ma na yin hihia dokọna yé. 9 Gbọnmọ dali, hiẹ na de hùnhọ́ homẹvọnọ lọ tọn sọn ṣẹnṣẹn mìtọn gbọn nuhe sọgbe to nukun Jehovah tọn mẹ wiwà dali.

10 “Eyin hiẹ yì awhànfun gbé hẹ kẹntọ towe lẹ bọ Jehovah Jiwheyẹwhe towe gbawhàn yetọn na we bọ hiẹ wle yé di kanlinmọ,+ 11 eyin hiẹ mọ yọnnu whanpẹnọ de to kanlinmọ lọ lẹ ṣẹnṣẹn bo yiwanna ẹn bosọ jlo nado yí i taidi asi towe, 12 hiẹ sọgan plan yọnnu lọ wá owhé towe gbè. Enẹgodo, ewọ dona whlẹ́ ota bo penukundo ofẹ̀n etọn lẹ go, 13 bosọ de avọ̀ kanlinmọgbenu tọn etọn dai, bo na nọ nọ̀ owhé towe gbè. Yọnnu lọ na ví otọ́ etọn po onọ̀ etọn po na osun dopo blebu,+ bọ to enẹgodo hiẹ sọgan tindo kọndopọ zanhẹmẹ tọn hẹ ẹ; hiẹ na lẹzun asu etọn bọ ewọ na lẹzun asi towe. 14 Ṣigba, eyin homẹ towe ma hùn do e go, to whenẹnu hiẹ dona jo e do nado yì+ fidepope he jlo e.* Amọ́, hiẹ ma dona sà ẹ kavi yinuwa hẹ ẹ po kanyinylan po, to whenue hiẹ ko dowinyan ẹn godo.

15 “Eyin sunnu de tindo asi awe bo yiwanna dopo hú awetọ* bọ yé omẹ awe lẹ ko sọ ji visunnu lẹ na ẹn bọ dehe e ma yiwanna lọ wẹ ji visunnu plọnji lọ,+ 16 to gbeegbe e na má ogú na visunnu etọn lẹ, dotẹnmẹ ma na yin nina ẹn nado yinuwa hẹ visunnu asi he e yiwanna lọ tọn taidi visunnu plọnji do otẹn visunnu asi he e ma yiwanna, yèdọ mẹhe yin plọnji lọ tọn mẹ gba. 17 Visunnu asi he e ma yiwanna lọ tọn wẹ e dona na jlọjẹ plọnji tọn, gbọn mimá awe nuhe e tindo lẹpo tọn nina ẹn dali, na ewọ wẹ yin bẹjẹeji huhlọn vijiji etọn tọn. Ewọ wẹ tindo jlọjẹ viplọnji tọn.+

18 “Eyin sunnu de tindo visunnu he yin tasinyẹntọ podọ atẹṣitọ de bo ma nọ setonuna otọ́ etọn kavi onọ̀ etọn,+ bọ yé ko tẹnpọn nado gọalọna ẹn nado diọ ṣigba ewọ gbẹ́ nado dotoaina yé,+ 19 otọ́ etọn po onọ̀ etọn po dona plan ẹn bo hẹn ẹn wá mẹho lẹ nukọn to họngbo tòdaho etọn tọn kọ̀n 20 bosọ dọna mẹho tòdaho etọn tọn lẹ dọ, ‘Tasinyẹntọ podọ atẹṣitọ de wẹ visunnu mítọn ehe, podọ ewọ gbẹ́ nado setonuna mí. Adọ̀whẹnnọ+ podọ ahànnumunọ+ de wẹ ewọ.’ 21 To whenẹnu, sunnu tòdaho etọn tọn lẹpo dona dlan zannu do e hù. Gbọnmọ dali, hiẹ dona de oylan lọ sẹ̀ sọn ṣẹnṣẹn mìtọn, Islaeli pete nasọ sè bo dibu.+

22 “Eyin sunnu de waylando de he jẹna owhẹ̀ okú tọn bọ ewọ ko yin hùhù+ bo yin zizepla do pòtin de go,+ 23 oṣiọ etọn ma dona gbọṣi pòtin lọ go to ozán lọ blebu mẹ gba.+ Kakatimọ, hiẹ dona mọdọ ewọ yin dìdì to azán enẹ gbè, na mẹhodẹ̀do sọn Jiwheyẹwhe dè wẹ mẹhe yin zizepla do núgo de yin,+ podọ hiẹ ma dona hẹn aigba towe he Jehovah Jiwheyẹwhe towe to nina we di ogú lọ flu.+

22 “Eyin hiẹ mọ oyìnsú kavi lẹngbọ nọvisunnu towe tọn to dindanbu, a gbẹkọ e go sọn ojlo mẹ wá blo.+ Hiẹ dona plan ẹn lẹkọyi na nọvisunnu towe dandan. 2 Ṣigba, eyin fie nọvisunnu towe nọ nọ̀ ma sẹpọ we kavi eyin hiẹ ma yọ́n ewọ, a dona plan kanlin lọ wá owhé towe gbè, bọ e na gbọṣi dè we kakajẹ whenue nọvisunnu towe to dindin in. To whenẹnu, hiẹ dona gọ̀ ẹ jo na ẹn.+ 3 Nuhe hiẹ dona wà na kẹtẹkẹtẹ etọn, avọ̀ etọn, podọ nudepope he nọvisunnu towe hẹnbu bọ hiẹ mọ niyẹn. Hiẹ ma dona gbẹkọ e go.

4 “Eyin hiẹ mọ kẹtẹkẹtẹ nọvisunnu towe tọn kavi oyìnsú etọn jai to aliji, a ma dona gbẹkọ e go sọn ojlo mẹ wá. A dona gọalọna ẹn dandan nado fọ́n kanlin lọ ṣite.+

5 “Yọnnu ma dona do avọ̀ sunnu tọn, mọjanwẹ sunnu ma dona do avọ̀ yọnnu tọn do niyẹn. Na osùnú de wẹ mẹdepope he nọ wàmọ yin na Jehovah Jiwheyẹwhe towe.

6 “Eyin hiẹ mọ ohẹ̀-dọ́ de to alitó bọ hẹ̀ví lẹ kavi azìn lẹ to e mẹ, vlavo to atin de ji kavi to kọmẹ, bọ onọ̀ lọ mlọn hẹ̀ví lọ lẹ kavi azìn lọ lẹ ji, hiẹ ma dona wle onọ̀ lọ po ovi etọn lẹ po.+ 7 Hẹn ẹn diun dọ a jo onọ̀ lọ do nado yì, ṣigba hiẹ sọgan bẹ hẹ̀ví lọ lẹ. Mọ wẹ a dona nọ wà do, na e nido yin dagbe na we podọ na hiẹ nido nọgbẹ̀ dẹn.

8 “Eyin hiẹ gbá ohọ̀ yọyọ de, a dona sọ basi oglọ́n de lẹdo họta towe,+ na mẹde nikaa flẹ jai sọn e ji bọ whédo towe na duhùnhọ.

9 “Hiẹ ma dona do okún wunmẹ voovo awe do vẹngle towe mẹ.+ Eyin e ma yinmọ, nuhe okún he a do lọ lẹ detọ́n lẹpo gọna sinsẹ́n vẹngle towe tọn lẹ na lẹzun fiwiwe lọ tọn.

10 “Hiẹ ma dona yí oyìnsú po kẹtẹkẹtẹ de po do jlo aigba dopọ.+

11 “Hiẹ ma dona do avọ̀ he yè ṣaka kanlin-fún po alavọ po dopọ nado lọ̀n gba.+

12 “Hiẹ dona nọ basi agó okẹ̀yẹ̀ tọn do tónu ẹnẹ avọ̀ he hiẹ nọ do lẹ tọn.+

13 “Eyin sunnu de dà asi bo ko tindo kọndopọ zanhẹmẹ tọn hẹ ẹ, ṣigba to enẹgodo wá gbẹwanna yọnnu lọ* 14 bọ ewọ sawhẹ walọ gbigble de tọn dokọna yọnnu lọ bo hẹn yinkọ gble na ẹn gbọn didọ dali dọ: ‘Yẹn dà yọnnu ehe, ṣigba to whenue yẹn tindo kọndopọ zanhẹmẹ tọn hẹ ẹ, yẹn ma mọ kunnudenu de dọ e to alọji,’ 15 otọ́ po onọ̀ viyọnnu lọ tọn po dona de kunnudenu alọji-ninọ viyọnnu yetọn tọn tọ́n na mẹho lẹ to họngbo tòdaho lọ tọn kọ̀n. 16 Otọ́ viyọnnu lọ tọn dona dọna mẹho lọ lẹ dọ, ‘Yẹn na viyọnnu ṣie dawe ehe taidi asi, ṣigba dawe lọ gbẹwanna ẹn* 17 bosọ to owhẹ̀ walọ gbigble tọn sadokọna ẹn gbọn didọ dali dọmọ: “Yẹn doayi e go dọ viyọnnu towe ma tindo kunnudenu alọji-ninọ tọn.” Todin, kunnudenu alọji-ninọ viyọnnu ṣie tọn die.’ Enẹgodo, yé na vlọ́n avọ̀ lọ to mẹho tòdaho lọ tọn lẹ nukọn. 18 Mẹho tòdaho lọ tọn+ lẹ na plan sunnu lọ bo domẹplọnlọ e go.+ 19 Yé na gbò ṣekẹli* fataka tọn 100 na ẹn bo na bẹ ẹ na otọ́ viyọnnu lọ tọn, na sunnu lọ hẹn yinkọ gble na awhli Islaeli tọn de wutu,+ viyọnnu lọ nasọ zindonukọn nado to asi etọn yin. Dotẹnmẹ ma na yin nina sunnu lọ nado gbẹ́ ẹ dai dile e na togbẹ̀ dẹnsọ.

20 “Ṣigba, eyin whẹsadokọnamẹ lọ yin nugbo, bọ kunnudenu depope ma tin dọ viyọnnu lọ to alọji, 21 yé dona plan viyọnnu lọ tọ́n wá họntonu owhé otọ́ etọn tọn, bọ sunnu tòdaho etọn tọn lẹ dona dlan zannu do e hù, na ewọ ko wà nuhe huwinyan+ de to Islaeli gbọn walọ fẹnnuwiwa zanhẹmẹ tọn zinzan* to owhé otọ́ etọn+ tọn gbè dali. Gbọnmọ dali, hiẹ dona de oylan lọ sẹ̀ sọn ṣẹnṣẹn mìtọn.+

22 “Eyin yè mọ sunnu de bọ e zanhẹ yọnnu de he yin asi sunnu devo tọn, yé omẹ awe lẹpo dona kú, yèdọ sunnu he zanhẹ yọnnu lọ po yọnnu lọ lọsu po.+ Gbọnmọ dali, hiẹ dona de oylan lọ sẹ̀ sọn Islaeli.

23 “Eyin awhli de ko dopà alọwle tọn na sunnu de, bọ sunnu devo mọ ẹn to tòdaho lọ mẹ bo zanhẹ ẹ, 24 mì dona plan yé omẹ awe lẹ tọ́n wá họngbo tòdaho enẹ tọn kọ̀n bo dlan zannu do yé hù, na yọnnu lọ ma dawhá to tòdaho lọ mẹ wutu podọ na sunnu lọ dowinyan asi sunnu hatọ etọn tọn wutu.+ Gbọnmọ dali, hiẹ dona de oylan lọ sẹ̀ sọn ṣẹnṣẹn mìtọn.

25 “Ṣigba, eyin glemẹ wẹ sunnu lọ mọ viyọnnu lọ he ko dopà alọwle tọn na mẹde te bọ huhlọn sunnu lọ tọn hugan yọnnu lọ tọn bọ e zanhẹ ẹ, sunnu he zanhẹ ẹ lọ kẹdẹ wẹ dona kú, 26 podọ hiẹ ma dona wà nudepope na viyọnnu lọ. Viyọnnu lọ ma waylando depope he jẹna okú. Whẹho ehe taidi whenue sunnu de fọ́n do sunnu hatọ etọn ji bo hù i.*+ 27 Na glemẹ wẹ sunnu lọ mọ ẹn te, bọ e dawhá, ṣigba mẹde ma sẹpọ finẹ nado whlẹn ẹn.

28 “Eyin sunnu de mọ awhli de he ma ko dopà alọwle tọn na mẹde bo wle e bosọ zanhẹ ẹ bọ yè mọ yé,+ 29 sunnu he zanhẹ ẹ lọ dona sú ṣekẹli fataka tọn 50 na otọ́ viyọnnu lọ tọn, bọ viyọnnu lọ na lẹzun asi etọn.+ Na ewọ ko dowinyan viyọnnu lọ wutu, dotẹnmẹ ma na yin nina ẹn nado gbẹ́ ẹ dai dile e na togbẹ̀ dẹnsọ.

30 “Sunnu de ma dona yí asi otọ́ etọn tọn, na ewọ nikaa dowinyan otọ́ etọn.*+

23 “Sunnu de he ko yin sisá gbọn onẹ́-zìn etọn lẹ hinhẹngble dali kavi mẹhe awutugonu sunnu-yinyin tọn etọn ko yin sinsánsẹ ma sọgan lẹzun apadewhe agun Jehovah tọn.+

2 “Ayọvi de ma sọgan lẹzun apadewhe agun Jehovah tọn.+ Depope to kúnkan etọn lẹ mẹ, etlẹ yin kakajẹ whẹndo aotọ ji ma sọgan lẹzun apadewhe agun Jehovah tọn.

3 “Amọninu de kavi Moabinu de ma sọgan lẹzun apadewhe agun Jehovah tọn.+ Depope to kúnkan yetọn lẹ mẹ, etlẹ yin kakajẹ whẹndo aotọ ji ma sọgan lẹzun apadewhe agun Jehovah tọn gbede, 4 na yé ma gọalọna mì gbọn núdùdù po osin po nina mì dali to whenue mì tọ́n wá jei sọn Egipti,+ podọ na yé dà Balaami visunnu Beoli tọn sọn Petoli Mẹsopotamia tọn nado hodẹ̀do we* wutu.+ 5 Ṣigba, Jehovah Jiwheyẹwhe towe gbẹ́ nado dotoaina Balaami.+ Kakatimọ, Jehovah Jiwheyẹwhe towe diọ dẹ̀hodo lọ zun dona de na we,+ na Jehovah Jiwheyẹwhe towe yiwanna we wutu.+ 6 Hiẹ ma dona dín dagbemẹninọ kavi kọdetọn dagbe yetọn pọ́n gbede to gbẹzan towe lẹpo mẹ.+

7 “Hiẹ ma dona gbẹwanna Edominu de, na nọvisunnu towe wẹ ewọ.+

“Hiẹ ma dona gbẹwanna Egiptinu de, na hiẹ ko nọ jonọ-gbéji to otò etọn mẹ pọ́n.+ 8 Whẹndo atọ̀ntọ ovi he yin jiji na yé lẹ tọn sọgan lẹzun apadewhe agun Jehovah tọn.

9 “To whenue hiẹ dosla nado hoavùn sọta kẹntọ towe lẹ, hiẹ dona dapana nuylankan* lẹpo.+ 10 Eyin sunnu de lẹzun mawé, na vísin wayi do e to zánmẹ wutu,+ ewọ dona tọ́njẹgbonu osla lọ tọn bo ma na gọ̀ biọ e mẹ. 11 To whèjai, e dona yí osin do lawu bọ to enẹgodo e sọgan lẹkọwa osla lọ mẹ to whenue owhè yihọ.+ 12 Otẹn nuglọ tọn* de dona yin kinklandovo nado nọ yin yiyizan to gbonu osla lọ tọn, bọ finẹ wẹ hiẹ ni nọ yì. 13 Dòkunnu de dona tin to azọ́nwanu towe lẹ mẹ. To whenuena hiẹ yì afọdai gbé to gbonu, a dona nọ yí i do kùndò, podọ to enẹgodo ṣinyọnnudo afọdai towe. 14 Na Jehovah Jiwheyẹwhe towe nọ to zọnlinzin gbọn osla towe mẹ+ nado whlẹn we podọ nado jo kẹntọ towe lẹ do alọ towe mẹ, osla towe mẹ dona yin wiwe,+ na ewọ nikaa mọ nuhe ma jẹ de to hiẹ mẹ bo na lẹkọ sọn hihodo we mẹ.

15 “To whenuena afanumẹ de họ̀n sọn klunọ etọn dè bo wá dè we, hiẹ ma dona gọ̀ ẹ jo na klunọ etọn gba. 16 Ewọ sọgan nọ ṣẹnṣẹn mìtọn to fidepope he jlo e to dopo to tòdaho mìtọn lẹ mẹ, yèdọ fidepope he e yiwanna. Hiẹ ma dona ylanhùn do e go.+

17 “Depope to viyọnnu Islaeli tọn lẹ mẹ ma sọgan lẹzun galọtọ tẹmpli mẹ tọn,+ mọjanwẹ depope to visunnu Islaeli tọn lẹ mẹ ma sọgan lẹzun galọtọ tẹmpli mẹ tọn+ do niyẹn. 18 Hiẹ ma dona hẹn akuẹ he yin yíyí do suahọ yọnnu galọtọ de kavi akuẹ he yin yíyí do suahọ* sunnu galọtọ* de wá ohọ̀ Jehovah Jiwheyẹwhe towe tọn mẹ nado depà de gba, na osùnú de wẹ awe lẹpo yin na Jehovah Jiwheyẹwhe towe.

19 “Hiẹ ma dona nọ yí akuẹvi to nọvisunnu towe si,+ vlavo akuẹvi do akuẹ, núdùdù, kavi nudepope he ji akuẹvi sọgan yin yíyí te ji. 20 Hiẹ sọgan nọ yí akuẹvi to mẹhe yin jonọ de si,+ ṣigba hiẹ ma dona nọ yí akuẹvi to nọvisunnu towe si,+ na Jehovah Jiwheyẹwhe towe nido dona we to nuwiwa towe lẹpo mẹ to aigba he hiẹ jlo na yí lọ ji.+

21 “Eyin hiẹ dopà de na Jehovah Jiwheyẹwhe towe,+ a dọngbàn nado de e blo.+ Na Jehovah Jiwheyẹwhe towe na biọ ẹ sọn asi we dandan; eyin e ma yinmọ, e na lẹzun ylando de dokọna we.+ 22 Ṣigba, eyin hiẹ ma dopà, e ma na yin ylando de dokọna we.+ 23 Hiẹ dona hẹn nuhe nùflo towe dọ lẹ di,+ podọ a dona hẹn nuhe onù towe titi ko dopà etọn taidi avọ́nunina sọn ojlo mẹ wá de na Jehovah Jiwheyẹwhe towe di.+

24 “Eyin hiẹ biọ vẹngle kọmẹnu towe tọn mẹ, hiẹ sọgan dù ovẹn sinsẹ́n he na gọ́ho na we,* ṣigba hiẹ ma dona bẹ depope do aglò towe mẹ.+

25 “Eyin hiẹ biọ jinukun he to ote to ogle kọmẹnu towe tọn mẹ, a sọgan yí alọ do wẹ́n jinukun he ko bia lẹ, ṣigba hiẹ ma dona zín agbogọdọẹ do jinukun kọmẹnu towe tọn mẹ gba.+

24 “Eyin sunnu de dà yọnnu de, ṣigba bọ onú yọnnu lọ tọn ma jẹ etọn ji ba, na e mọ nuhe ma jẹ de to yọnnu lọ mẹ wutu, e dona kàn owe gbẹdai tọn na ẹn+ bo zedo alọmẹ na ẹn bosọ de e tọ́n sọn owhé etọn gbè.+ 2 To whenuena yọnnu lọ tọ́n sọn owhé etọn gbè, e sọgan yì bo lẹzun asi sunnu devo tọn.+ 3 Eyin sunnu awetọ lọ sọ gbẹwanna ẹn* bo kàn owe gbẹdai tọn na ẹn, bo zedo alọmẹ na ẹn bosọ de e tọ́n sọn owhé etọn gbè, kavi eyin sunnu awetọ he dà ẹ lọ kú, 4 dotẹnmẹ ma na yin nina asu etọn tintan he ko de e tọ́n lọ nado gọ̀ ẹ yí taidi asi etọn to whenuena yọnnu lọ ko yin hinhẹnflu godo gba, na osùnú de wẹ enẹ yin na Jehovah. Hiẹ ma dona hẹn ylando wá aigba he Jehovah Jiwheyẹwhe towe to nina we taidi ogú lọ ji.

5 “Eyin sunnu de ṣẹṣẹ dà asi, ewọ ma dona yì awhàn, mọjanwẹ azọngban devo depope ma dona yin didena ẹn do niyẹn. E dona vò na owhe dopo bo nọ whégbè nado hẹn ayajẹ wá na asi etọn.+

6 “Mẹdepope ma dona hò osé kavi sénukọnvi yí sọn mẹde si taidi afàsúnú gba,+ na enẹ na zẹẹmẹdo ogbẹ̀ mẹlọ tọn yíyí* taidi afàsúnú.

7 “Eyin yè mọ mẹde bọ e fìn dopo* to nọvisunnu etọn Islaelivi lẹ mẹ bo ylanhùn do e go bosọ sà ẹ,+ mẹfintọ lọ dona kú.+ Hiẹ dona de oylan lọ sẹ̀ sọn ṣẹnṣẹn mìtọn.+

8 “Eyin pòzọ̀n* gbajẹgbonu, mì payi nado nọ yí sọwhiwhe do yinuwa sọgbe hẹ anademẹ he yẹwhenọ Levinu lẹ na na mì lẹpo.+ Mì payi nado nọ wà pẹpẹ dile yẹn ko degbe etọn na yé do. 9 Mì flin nuhe Jehovah Jiwheyẹwhe mìtọn wà na Miliami to whenue mì tọ́njẹgbonu sọn Egipti bo to aliji ja.+

10 “Eyin hiẹ yàn nudepope na kọmẹnu towe,+ a ma dona biọ ohọ̀ etọn mẹ nado hò nuhe e yí do súafà lọ yí gba. 11 Gbonu wẹ a dona nọte do, bọ mẹhe a yàn na lọ dona de nuhe ewọ to yíyí do súafà lọ tọ́njẹgbonu na we. 12 Podọ eyin mẹlọ to nuhudo mẹ, hiẹ ma dona yihọ to whenue nuhe ewọ yí do súafà lọ gbẹ́ pò to asi we.+ 13 Tlolo he owhè yihọ, hiẹ dona gọ̀ nuhe e ko yí do súafà lọ jo na ẹn dandan, na ewọ nido yihọ po avọ̀ etọn po+ bo dona we; e nasọ yin hihia na we di dodowiwa to Jehovah Jiwheyẹwhe towe nukọn.

14 “Hiẹ ma dona hò pakanọ he to nuhudo mẹ bo yin wamọnọ de dù gba, vlavo ewọ yin nọvisunnu towe kavi mẹhe to jonọ-gbéji to aigba towe ji, to tòdaho* towe lẹ mẹ de.+ 15 Hiẹ dona sú i azọ́nkuẹ etọn to azán dopolọ gbè,+ whẹpo owhè nido yihọ, na ewọ tin to nuhudo mẹ bọ ogbẹ̀* etọn sinai do azọ́nkuẹ etọn ji wutu. Eyin e ma yinmọ, ewọ na dawhá ylọ Jehovah sọta we, bọ e na yin ylando dokọna we.+

16 “Otọ́ lẹ ma dona yin hùhù na ylando ovi yetọn lẹ tọn, podọ ovi lẹ ma dona yin hùhù na ylando otọ́ yetọn lẹ tọn.+ Mẹdopodopo wẹ dona yin hùhù na ylando etọn titi.+

17 “Hiẹ ma dona sọtadona whẹdida mẹhe to jonọ-gbéji kavi tọṣiọvi de tọn,+ podọ hiẹ ma dona hò avọ̀ asuṣiọsi de tọn yí taidi afàsúnú.+ 18 Flindọ hiẹ lọsu ko lẹzun afanumẹ pọ́n to Egipti bọ Jehovah Jiwheyẹwhe towe fli we gọ̀ sọn dọ́n.+ Enẹwutu wẹ yẹn do to gbedena we nado nọ wà ehe.

19 “Eyin hiẹ gbẹ̀n ojijẹ towe sọn ogle towe mẹ bo wọn okọ̀ dopo do glemẹ, a lẹkọyi ze e blo. E dona yin jijodo na mẹhe to jonọ-gbéji lẹ, tọṣiọvi lẹ po asuṣiọsi lẹ po,+ na Jehovah Jiwheyẹwhe towe nido dona we to nuhe wà a te lẹpo mẹ.+

20 “Eyin hiẹ gbẹ̀n sinsẹ́n sọn atin olivie tọn towe ji, a ma dona vọ́ nudopolọ wà to alà etọn lẹ ji. Dehe pò to e ji lẹ dona yin jijodo na mẹhe to jonọ-gbéji lẹ, tọṣiọvi lẹ po asuṣiọsi lẹ po.+

21 “Eyin hiẹ bẹ sinsẹ́n vẹngle towe mẹ tọn lẹ pli, a ma dona lẹkọyi bẹ pipotọ lẹ pli ba. Yé dona yin jijodo na mẹhe to jonọ-gbéji lẹ, tọṣiọvi lẹ po asuṣiọsi lẹ po. 22 Flindọ hiẹ lọsu ko lẹzun afanumẹ pọ́n to aigba Egipti tọn ji. Enẹwutu wẹ yẹn do to gbedena we nado nọ wà ehe.

25 “Eyin nudindọn de fọ́n to omẹ awe ṣẹnṣẹn, yé sọgan yì whẹdatọ lẹ nukọn+ bọ yé na dawhẹna yé bo na lá mẹhe yin dodonọ di homẹvọnọ bosọ lá mẹhe yin mẹylankan di whẹhutọ.+ 2 Eyin mẹhe yin mẹylankan lọ jẹna hihò,+ whẹdatọ lọ na biọ to e si nado ṣinyọ́n akọ́nnu ai, bọ ewọ na yin hihò to nukun etọn mẹ. Sọha obá he e na dù tọn dona sọgbe hẹ lehe nuhe e wà lọ ylan sọ. 3 E sọgan yí obá do hò e whla 40,+ ṣigba e ma dona humọ. Eyin e zindonukọn nado to hihò e humọ, nọvisunnu towe na yin winyando to nukun towe mẹ.

4 “Hiẹ ma dona doajànuna oyìnsú de to whenue e to likun tùn.+

5 “Eyin nọvisunnu lẹ topọ bọ dopo to yé mẹ ma tindo visunnu depope whẹpo do kú, asi mẹhe kú lọ tọn ma dona dà mẹdevo to gbonu whẹndo lọ tọn. Nọvisunnu asu etọn tọn dona wá e dè bo sọ́n asi nọvisunnu etọn tọn bosọ dà ẹ di asi.+ 6 Oyín nọvisunnu etọn he ko kú lọ tọn wẹ na tin to ota na viplọnji he yọnnu lọ na ji,+ na oyín mẹhe kú lọ tọn ma nado yin súnsúnsún sẹ̀ to Islaeli.+

7 “Ṣigba, eyin nọvisunnu lọ gbẹ́ nado sọ́n asuṣiọsi nọvisunnu etọn tọn, to whenẹnu asuṣiọsi lọ dona yì mẹho lẹ dè to họngbo tòdaho lọ tọn kọ̀n bo dọmọ, ‘Nọvisunnu asu ṣie tọn gbẹ́ nado hlá oyín nọvisunnu etọn tọn dote to Islaeli. Ewọ ma yigbe nado sọ́n mi taidi asi.’ 8 Mẹho tòdaho etọn tọn lẹ dona ylọ ẹ bo dọho hẹ ẹ. Eyin ewọ gbẹ́ tẹkudeji janwẹ dọ, ‘Yẹn ma jlo na dà ẹ,’ 9 to whenẹnu asuṣiọsi nọvisunnu etọn tọn dona dọnsẹpọ ẹ to mẹho lọ lẹ nukọn, bo na de afọpa sọn afọ na ẹn,+ túntán do nukunmẹ na ẹn bosọ dọmọ, ‘Nuhe dona yin wiwà na sunnu he ma jlo na hẹn whédo nọvisunnu etọn tọn dote niyẹn.’ 10 Enẹgodo, oyín whẹndo etọn tọn* na nọ yin yinyọnẹn to Islaeli taidi, ‘Owhé mẹhe yè de afọpa na lọ tọn.’

11 “Eyin sunnu awe to avùnho hẹ ode awetọ bọ asi dopo to yé mẹ tọn dademẹ nado whlẹn asu etọn sọn alọ mẹhe to hihò e tọn mẹ bo dlẹnalọ etọn bosọ wle vijinu sunnu awetọ lọ tọn hẹn, 12 a dona sán alọ yọnnu lọ tọn sẹ̀. Hiẹ* ma dona wàlẹblanuna ẹn.

13 “Hiẹ ma dona tindo zannu nujlẹgàn tọn wunmẹ voovo awe,+ yèdọ daho po pẹvi po, to saki towe mẹ. 14 Hiẹ ma dona tindo ojlẹnu wunmẹ voovo awe,*+ yèdọ daho po pẹvi po, to owhé towe gbè. 15 Nujlẹgàn he pé bosọ sọgbe podọ ojlẹnu he pé bosọ sọgbe kẹdẹ wẹ hiẹ dona tindo, na hiẹ nido nọgbẹ̀ dẹn to aigba he Jehovah Jiwheyẹwhe towe to nina we lọ ji.+ 16 Na osùnú de wẹ mẹhe yin nugbomadọtọ bo nọ wà onú mọnkọtọn lẹpo yin na Jehovah Jiwheyẹwhe towe.+

17 “Flin nuhe Amalẹki wà na we to aliji to whenue mì to tintọ́njẹgbonu sọn Egipti,+ 18 lehe ewọ pé we to aliji bo hù mẹhe pò to godo bo to dẹẹdẹ zọ̀n to mì mẹ lẹpo do to whenue agbọ́ ko pé we bọ onú ko ṣikọna we. Ewọ ma dibusi Jiwheyẹwhe. 19 To whenue Jehovah Jiwheyẹwhe towe na ko na we gbọjẹ sọn alọ kẹntọ towe he lẹdo we pé lẹpo tọn mẹ to aigba he Jehovah Jiwheyẹwhe towe to nina we nado yí taidi ogú lọ ji,+ hiẹ dona súnsún yinkọ Amalẹki tọn sẹ̀ sọn olọn glọ.+ A wọn gbede blo.

26 “To godo mẹ, to whenue hiẹ na ko jẹ aigba he Jehovah Jiwheyẹwhe towe to nina we taidi ogú lọ ji bọ hiẹ na ko yí i bo nọ nọ̀ e ji, 2 hiẹ dona yí delẹ to sinsẹ́n tintan jinukun* aigba lọ tọn lẹpo mẹ, ehe hiẹ na bẹpli sọn aigba he Jehovah Jiwheyẹwhe towe to nina we lọ ji bo bẹ yé do ohà de mẹ bo nasọ hẹn ẹn yì fihe Jehovah Jiwheyẹwhe towe na de nado ze oyín etọn doai do.+ 3 Hiẹ dona yì yẹwhenọ he to sinsẹ̀nzọnwa to azán enẹlẹ gbè lọ dè bo dọna ẹn dọ, ‘Yẹn jlo na dogbè na Jehovah Jiwheyẹwhe towe to egbé, dọ yẹn ko wá aigba he Jehovah whlé na tọgbo mítọn lẹ nado na mí lọ ji.’+

4 “To whenẹnu, yẹwhenọ lọ na yí ohà lọ sọn alọmẹ na we bo na ze e dai do agbà Jehovah Jiwheyẹwhe towe tọn nukọn. 5 Enẹgodo, hiẹ na lá to Jehovah Jiwheyẹwhe towe nukọn dọ, ‘Alaminu+ lèlèsàtọ* de wẹ tọgbo ṣie; to whenue ewọ jẹte yì Egipti+ bo nọ nọ̀ finẹ taidi jonọ, omẹ vude poun wẹ whédo etọn bẹhẹn.+ Ṣigba, ewọ lẹzun akọta daho, hlọnhlọnnọ podọ susugege de to dọ́n.+ 6 Egiptinu lẹ sọ doyana mí bo gbidikọna mí bosọ hẹn mí zun afanumẹ gánnugánnu.+ 7 Enẹwutu, mí jẹ awhádo ylọ Jehovah, Jiwheyẹwhe tọgbo mítọn lẹ tọn ji, Jehovah sọ sè awhágbe mítọn bo lẹ́ ayidonugo etọn hlan yajiji mítọn, tukla mítọn po kọgbidinamẹ mítọn po.+ 8 To godo mẹ, Jehovah yí alọ huhlọnnọ etọn po awà dindlẹn etọn+ po gọna azọ́n dobu lẹ, ohia lẹ po azọ́njiawu lẹ po+ do plan mí tọ́njẹgbonu sọn Egipti. 9 Enẹgodo, e plan mí wáfi bo na mí aigba ehe, yèdọ aigba he ji anọ́sin po owín po to sisà te.+ 10 Todin, yẹn hẹn sinsẹ́n tintan jinukun aigba he Jehovah ko na mi lọ tọn lẹ wá.’+

“Hiẹ dona bẹ yé do Jehovah Jiwheyẹwhe towe nukọn bo dẹ́ do odò to Jehovah Jiwheyẹwhe towe nukọn. 11 To whenẹnu, hiẹ na jaya na nudagbe he Jehovah Jiwheyẹwhe towe ko na hiẹ po whédo towe po lẹpo, yèdọ hiẹ po Levinu lẹ po gọna mẹhe to jonọ-gbéji he nọ nọ̀ ṣẹnṣẹn mìtọn lẹ.+

12 “To whenuena hiẹ ko bẹ mado-ao+ jinukun towe lẹpo tọn pli to owhe atọ̀ntọ, yèdọ owhe mado-ao tọn lọ mẹ godo, hiẹ na bẹ yé na Levinu lẹ, mẹhe to jonọ-gbéji lẹ, tọṣiọvi lẹ po asuṣiọsi lẹ po, yewlẹ nasọ dù gọ́ho to tòdaho* towe lẹ mẹ.+ 13 Enẹgodo, hiẹ na dọ to Jehovah Jiwheyẹwhe towe nukọn dọ, ‘Yẹn ko de adà he yin wiwe lọ tọ́n sọn ohọ̀ ṣie mẹ bo ko bẹ ẹ na Levinu lẹ, mẹhe to jonọ-gbéji lẹ, tọṣiọvi lẹ po asuṣiọsi lẹ po+ kẹdẹdile hiẹ ko degbena mi do. Yẹn ma tùnafọ gbedide towe lẹ ji kavi gbẹkọ yé go gba. 14 Yẹn ma dù sọn e mẹ to whenue yẹn to aluẹmẹ, kavi bẹ depope sọn e mẹ to whenue yẹn yin mawé, kavi de depope sọn e mẹ na oṣiọ lẹ. Yẹn ko setonuna ogbè Jehovah Jiwheyẹwhe ṣie tọn bo ko wà nuhe hiẹ degbe etọn na mi lẹpo. 15 Todin, yìnnukunpọn odò sọn fininọ wiwe towe, to olọn bo dona Islaeli, omẹ towe lẹ po aigba he hiẹ ko na mí lọ po,+ kẹdẹdile hiẹ ko whlé na tọgbo mítọn lẹ do,+ yèdọ aigba he ji anọ́sin po owín po to sisà te.’+

16 “Jehovah Jiwheyẹwhe towe to gbedena we to egbé nado nọ setonuna aṣẹdai po nudide whẹdida tọn ehelẹ po. Hiẹ dona yí ahun towe lẹpo po alindọn* towe lẹpo+ po do nọ yìn yé bosọ nọ setonuna yé. 17 Hiẹ ko sè nulila Jehovah tọn to egbé, dọ ewọ na lẹzun Jiwheyẹwhe towe dile e na dẹnsọ bọ hiẹ na to zọnlinzin gbọn aliho etọn lẹ ji bo nọ setonuna aṣẹdai etọn lẹ,+ gbedide etọn lẹ+ po nudide whẹdida tọn etọn lẹ+ po, podọ dile hiẹ to todoaina ogbè etọn. 18 Jehovah ko sọ sè nulila towe to egbé, dọ hiẹ na lẹzun akọta etọn, yèdọ nutindo vonọtaun* etọn,+ kẹdẹdile ewọ ko dopagbe etọn na we do, bọ hiẹ nasọ nọ yìn gbedide etọn lẹpo, 19 podọ ewọ na ze we daga hú akọta he pò lẹpo he ewọ ko basi,+ bo na nọ na we pipà, yindidi po gigo po, kẹdẹdile e ko dopagbe etọn do, dile e na dẹnsọ bọ hiẹ na to dewe dohia di akọta wiwe de na Jehovah Jiwheyẹwhe towe.”+

27 Todin, Mose po mẹho Islaeli tọn lẹ po degbena gbẹtọ lẹ dọmọ: “Mì nọ yìn gbedide he yẹn to nina mì to egbehe lẹpo. 2 Podọ to azán he gbè mìwlẹ na dasá Jọdani yì aigba he Jehovah Jiwheyẹwhe towe to nina we lọ ji, mì ze zannu daho lẹ tùnte bo sánudo* yé.+ 3 Enẹgodo, to whenue hiẹ na ko dasá jẹ dọ́n, kàn ohó he tin to Osẹ́n ehe mẹ lẹpo do yé go, na hiẹ nido sọgan yì aigba he Jehovah Jiwheyẹwhe towe to nina we lọ ji, yèdọ aigba he ji anọ́sin po owín po to sisà te, kẹdẹdile Jehovah Jiwheyẹwhe tọgbo towe lẹ tọn ko dopagbe etọn na we do.+ 4 To whenue mìwlẹ na ko dasá Jọdani jẹ dọ́n, mì dona ze zannu ehelẹ tùnte to Osó Ebali+ ji bo sánudo* yé, kẹdẹdile yẹn to gbedena mì to egbehe do. 5 Hiẹ sọ dona basi agbà de do finẹ na Jehovah Jiwheyẹwhe towe, yèdọ agbà zannu lẹ tọn. Hiẹ ma dona yí azọ́nwanu gànyuu tọn lẹ zan to yé ji.+ 6 Zannu blebu lẹ kẹdẹ wẹ hiẹ dona yí do basi agbà Jehovah Jiwheyẹwhe towe tọn bo nasọ basi avọ́nunina mimẹ̀ lẹ to e ji hlan Jehovah Jiwheyẹwhe towe. 7 Hiẹ dona basi avọ́nunina jijọho tọn+ lẹ bo na dù yé to finẹ,+ bosọ jaya to Jehovah Jiwheyẹwhe towe nukọn.+ 8 Humọ, hiẹ na kàn ohó he tin to Osẹ́n ehe mẹ lẹpo do zannu lọ lẹ ji+ to aliho he họnwun mẹ.”

9 Enẹgodo, Mose po yẹwhenọ Levinu lẹ po dọhona Islaeli pete dọmọ: “Islaeli E, nabọẹ bo dotoai. Hiẹ ko lẹzun akọta Jehovah Jiwheyẹwhe towe tọn to egbé.+ 10 Hiẹ dona nọ dotoaina ogbè Jehovah Jiwheyẹwhe towe tọn bo nọ setonuna gbedide etọn lẹ+ po aṣẹdai etọn lẹ po, he yẹn to nina we to egbé.”

11 To azán enẹ gbè, Mose degbena gbẹtọ lẹ dọmọ: 12 “Hẹnnu he bọdego helẹ na ṣite to Osó Gelizimi+ ji nado dona gbẹtọ lẹ to whenuena mìwlẹ na ko dasá Jọdani godo: Simeoni, Levi, Juda, Isakali, Josẹfu po Bẹnjamini po. 13 Podọ hẹnnu he bọdego helẹ na ṣite to Osó Ebali+ ji nado lá dẹ̀hodo: Leubẹni, Gad, Aṣeli, Zebuluni, Dani po Naftali po. 14 Levinu lẹ nasọ nọ yí ogbè lélé do gblọnna omẹ Islaeli tọn lọ lẹpo+ dọmọ:

15 “‘Mẹhodẹ̀do wẹ dawe lọ he basi boṣiọ pipà+ de kavi boṣiọ kinkọ̀n+ de, yèdọ nuhe yin osùnú de na Jehovah,+ alọnuzọ́n anazọ́nwatọ* de tọn, bosọ ze e whlá.’ (Gbẹtọ lọ lẹpo nasọ gblọn dọ, ‘Niṣẹ!’)*

16 “‘Mẹhodẹ̀do wẹ mẹlọ he yí vlẹko do yinuwa hẹ otọ́ etọn po onọ̀ etọn po.’+ (Gbẹtọ lọ lẹpo nasọ dọ, ‘Niṣẹ!’)

17 “‘Mẹhodẹ̀do wẹ mẹlọ he sẹtẹnna ohia dogbó kọmẹnu etọn tọn.’+ (Gbẹtọ lọ lẹpo nasọ dọ, ‘Niṣẹ!’)

18 “‘Mẹhodẹ̀do wẹ mẹlọ he hẹn nukuntọ́nnọ de buali.’+ (Gbẹtọ lọ lẹpo nasọ dọ, ‘Niṣẹ!’)

19 “‘Mẹhodẹ̀do wẹ mẹlọ he sọtadona whẹdida+ mẹhe to jonọ-gbéji, tọṣiọvi kavi asuṣiọsi de tọn.’+ (Gbẹtọ lọ lẹpo nasọ dọ, ‘Niṣẹ!’)

20 “‘Mẹhodẹ̀do wẹ mẹlọ he tindo kọndopọ zanhẹmẹ tọn hẹ asi otọ́ etọn tọn, na ewọ ko dowinyan otọ́ etọn.’*+ (Gbẹtọ lọ lẹpo nasọ dọ, ‘Niṣẹ!’)

21 “‘Mẹhodẹ̀do wẹ mẹlọ he tindo kọndopọ zanhẹmẹ tọn hẹ kanlin depope.’+ (Gbẹtọ lọ lẹpo nasọ dọ, ‘Niṣẹ!’)

22 “‘Mẹhodẹ̀do wẹ mẹlọ he tindo kọndopọ zanhẹmẹ tọn hẹ nọviyọnnu etọn titi, viyọnnu otọ́ etọn tọn kavi viyọnnu onọ̀ etọn tọn.’+ (Gbẹtọ lọ lẹpo nasọ dọ, ‘Niṣẹ!’)

23 “‘Mẹhodẹ̀do wẹ mẹlọ he tindo kọndopọ zanhẹmẹ tọn hẹ asi-nọ̀ etọn.’+ (Gbẹtọ lọ lẹpo nasọ dọ, ‘Niṣẹ!’)

24 “‘Mẹhodẹ̀do wẹ mẹlọ he tọ̀pọwuna kọmẹnu etọn bo hù i.’+ (Gbẹtọ lọ lẹpo nasọ dọ, ‘Niṣẹ!’)

25 “‘Mẹhodẹ̀do wẹ mẹlọ he kẹalọyi alọgodo-kuẹ nado hù homẹvọnọ* de.’+ (Gbẹtọ lọ lẹpo nasọ dọ, ‘Niṣẹ!’)

26 “‘Mẹhodẹ̀do wẹ mẹlọ he ma na yìn ohó he tin to Osẹ́n ehe mẹ lẹ bo gbọnmọ dali nọma setonuna yé.’+ (Gbẹtọ lọ lẹpo nasọ dọ, ‘Niṣẹ!’)

28 “Eyin hiẹ ma wá gboawupo nado dotoaina ogbè Jehovah Jiwheyẹwhe towe tọn bo yí sọwhiwhe do yìn gbedide etọn he yẹn to nina we to egbé lẹpo, matin ayihaawe Jehovah Jiwheyẹwhe towe na ze we daga hú akọta aigba ji tọn he pò lẹpo.+ 2 Na hiẹ nọ dotoaina ogbè Jehovah Jiwheyẹwhe towe tọn wutu, dona ehe lẹpo na kọndo ji we+ susugege:

3 “Donanọ wẹ hiẹ na yin to tòdaho mẹ, podọ donanọ wẹ hiẹ na yin to glètoho mẹ.+

4 “Donanọ wẹ ovi towe* lẹ na yin,+ gọna sinsẹ́n aigba towe tọn, ovi kanlin-yìnyìn towe lẹ tọn, oyìnvu towe po lẹngbọvu towe lẹ po.+

5 “Donanọ wẹ ohà towe+ na yin po aklahònú towe+ po.

6 “Donanọ wẹ hiẹ na yin to yìyì po gigọ̀ towe lẹ po mẹ.

7 “Jehovah na hẹn kẹntọ towe he fọ́n do ji we lẹ nado ṣíawhàn to nukọn towe.+ Ali dopo wẹ yé na gbọn wá tọ́nawhàn we, ṣigba ali voovo ṣinawe wẹ yé na gbọn nado họnyi sọn dè we.+ 8 Jehovah na hẹn ẹn diun dọ ewọ kọ̀n dona do agbànhọ towe lẹ ji+ podọ do nuwiwa towe lẹpo ji, matin ayihaawe ewọ nasọ dona we to aigba he Jehovah Jiwheyẹwhe towe to nina we lọ ji. 9 Jehovah na hẹn we zun akọta wiwe de na ẹn,+ kẹdẹdile e ko whlé na we do,+ na hiẹ zindonukọn nado to tonusena gbedide Jehovah Jiwheyẹwhe towe tọn lẹ bo nọ zinzọnlin gbọn aliho etọn lẹ ji wutu. 10 Akọta aigba ji tọn lẹpo na wá mọdọ oyín Jehovah tọn tin to hiẹ ji,+ yé nasọ nọ dibuna we.+

11 “Jehovah na hẹn we tindo ovi susugege, kanlin-yìnyìn susu po aigba dojó+ po to aigba he Jehovah ko whlé na tọgbo towe lẹ nado na we lọ ji.+ 12 Jehovah na hùn agbànhọ dagbedagbe etọn na we, enẹ wẹ olọn lẹ, nado nọ hẹn jikun ja do aigba towe ji to osaa etọn mẹ+ podọ nado dona nuhe hiẹ to wiwà lẹpo. Hiẹ na nọ yàn na akọta susu, ṣogan hiẹ ma na tindo nuhudo nado yàn sọn mẹdevo si.+ 13 Jehovah na yí we do basi ota, e ma yin osi; podọ hiẹ wẹ na nọ tin to aga,+ e ma yin to odò, eyin hiẹ nọ setonuna gbedide Jehovah Jiwheyẹwhe towe tọn lẹ he yẹn to nina we to egbé nado nọ yìn bosọ nọ payi yé go. 14 Hiẹ ma dona lẹhlan apadopo sọn gbedide he yẹn to nina mì to egbé lẹpo kọ̀n, vlavo hlan adusiwhé kavi hlan amiyọnwhé,+ nado hodo yẹwhe devo lẹ bo nọ sẹ̀n yé gba.+

15 “Ṣigba, eyin hiẹ ma wá dotoaina ogbè Jehovah Jiwheyẹwhe towe tọn bo masọ yí sọwhiwhe do setonuna gbedide etọn po osẹ́ndoai etọn lẹpo po he yẹn to nina we to egbé, be dẹ̀hodo ehe lẹpo wẹ na kọndo ji we susugege:+

16 “Mẹhodẹ̀do wẹ hiẹ na yin to tòdaho mẹ, podọ mẹhodẹ̀do wẹ hiẹ na yin to glètoho mẹ.+

17 “Dẹ̀hodo wẹ ohà+ towe na yin po aklahònú towe+ po.

18 “Mẹhodẹ̀do wẹ ovi towe*+ lẹ na yin, gọna sinsẹ́n aigba towe tọn, oyìnvu towe po lẹngbọvu towe lẹ+ po.

19 “Mẹhodẹ̀do wẹ hiẹ na yin to yìyì po gigọ̀ towe lẹ po mẹ.

20 “Jehovah na nọ hẹn dẹ̀hodo, bẹwlu po yasanamẹ po wá ji we to nudepope he wà a te mẹ, kakajẹ whenue hiẹ na yin huhusudo bo na busẹ plaun, na walọ ylankan towe lẹ wutu podọ na hiẹ gbẹ́ mi dai wutu.+ 21 Jehovah na hẹn azọ̀n nado tẹdo gowe kakajẹ whenue ewọ na sukúndona we sọn aigba he hiẹ jlo na yí lọ ji.+ 22 Jehovah na yí pẹ́nwe do hò we, gọna agbasa-hùnmiyọ́n sinsinyẹn,+ agbasa jiji, avivọhá, ohí,+ akúdido po azọ̀n jinukun lẹ tọn+ po; yé nasọ dómọna we kaka hiẹ nado dọ̀n. 23 Jiwhé he to aga na we na diọ zun gànvẹẹ, bọ aigba he to oglọ na we na diọ zun gànyuu.+ 24 Jehovah na hẹn okọ́ po kọ́gudu po ja do ji we taidi jikun do aigba towe ji sọn olọn kaka hiẹ nado yin huhusudo. 25 Jehovah na hẹn we ṣíawhàn to kẹntọ towe lẹ nukọn.+ Ali dopo wẹ hiẹ na gbọn yì tọ́nawhàn yé, ṣigba ali voovo ṣinawe wẹ hiẹ na gbọn nado họnyi sọn yé dè; hiẹ nasọ lẹzun nudobu de na ahọluduta aigba ji tọn lẹpo.+ 26 Oṣiọ towe lẹ nasọ lẹzun núdùdù na ohẹ̀ he to agahomẹ lẹpo, podọ na kanlin aigba ji tọn lẹ, bọ mẹde ma na yàn yé sẹ̀.+

27 “Jehovah na yí nutitẹ̀ Egipti tọn lẹ do hò we, gọna zẹntin, aklì, po dogbà-dogbà lẹ po, he pọngbọ ma tin na. 28 Jehovah na yí alẹ̀-hùnhùn, nukuntintọ́n+ po bẹwlu* po do hò we. 29 Hiẹ na nọ to avìdla pé to owhè ṣádada mẹ kẹdẹdile nukuntọ́nnọ de nọ to avìdla pé to zinvlu mẹ+ do, hiẹ ma nasọ nọ tindo kọdetọn dagbe to nudepope he wà a te mẹ; podọ yè na nọ hò we dù bo na nọ jẹajo do we gbọzangbọzan, bọ mẹdepope ma na tin nado whlẹn we.+ 30 Hiẹ na dopà alọwle tọn na yọnnu de, ṣigba sunnu devo na zanhẹ ẹ gánnugánnu. Hiẹ na gbá ohọ̀, ṣigba hiẹ ma na nọ e mẹ.+ Hiẹ na do vẹngle, ṣigba hiẹ ma na dù sinsẹ́n etọn.+ 31 Oyìnsú towe na yin hùhù to nukun towe mẹ, ṣigba hiẹ ma na dù depope sọn e mẹ. Kẹtẹkẹtẹ towe na yin finfin to nukun towe mẹ, ṣigba hiẹ ma na mọ ẹn yí lẹkọ. Lẹngbọ towe lẹ na yin yíyí na kẹntọ towe lẹ, ṣigba hiẹ ma na mọ mẹde nado whlẹn we. 32 Visunnu po viyọnnu towe lẹ po na yin pinplan jo na mẹdevo+ to nukun towe titi mẹ, bọ ajlù yetọn na nọ wle we to whepoponu, ṣigba hiẹ ma na pé nudepope go. 33 Mẹhe hiẹ ma yọnẹn pọ́n lẹ wẹ na nọ dù sinsẹ́n aigba towe tọn lẹ po jinukun towe lẹpo po,+ bọ hiẹ na nọ yin hihodu bo na nọ yin kọgbidina to whepoponu. 34 Nuhe nukun towe to mimọ lẹ na hẹn we hùn-alẹ̀.

35 “Jehovah na yí nutitẹ̀ fifiẹ he ma nọ gbọ lẹ do hò we to kligonu po afọ towe lẹ po go, yèdọ sọn afọpahomẹ towe kaka yì ahọ̀ndòmẹ. 36 Jehovah na yàn hiẹ po ahọlu he a ko de do dewe ji po yì akọta he hiẹ po tọgbo towe lẹ po ma yọnẹn de mẹ,+ bọ hiẹ na nọ sẹ̀n yẹwhe devo lẹ, yèdọ yẹwhe atin po zannu po tọn lẹ to finẹ.+ 37 Hiẹ nasọ lẹzun nudobu podọ aṣagbọ́nu* bo na nọ yin ṣinṣanko to akọta he mẹ Jehovah ko yàn we yì lẹpo ṣẹnṣẹn.+

38 “Hiẹ na do okún susu do glemẹ, ṣigba vude poun wẹ hiẹ na gbẹ̀n,+ na owẹ̀n lẹ wẹ na dù yé vọ̀. 39 Hiẹ na do vẹngle lẹ bo na penukundo yé go, ṣigba hiẹ ma na nù ovẹn depope podọ hiẹ ma na bẹ nudepope pli,+ na owé lẹ wẹ na dù yé vọ̀. 40 Hiẹ na tindo atin olivie tọn lẹ to aigba towe lẹpo ji, ṣigba hiẹ ma na mọ amì depope sá na agbasa towe, na olivie towe lẹ na nọ ja kọnyinai. 41 Hiẹ na ji visunnu po viyọnnu lẹ po, ṣigba yé ma na yin towe zọnmii, na yé na yin bibẹ yì kanlinmọgbenu.+ 42 Wánvú* lẹ na doawhàn gbaṣinyọ́n atin towe lẹ po sinsẹ́n he aigba towe detọ́n lẹpo po. 43 Mẹhe to jonọ-gbéji to ṣẹnṣẹn mìtọn na fọ́n bo to agayi hú we mapote, ṣigba hiẹ na fọ́n bo to doyi mapote. 44 Ewọ na nọ yàn na we, ṣigba hiẹ ma na penugo nado yàn na ẹn.+ Ewọ wẹ na lẹzun ota bọ hiẹ na lẹzun osi.+

45 “Matin ayihaawe, dẹ̀hodo ehe lẹpo+ na wá ji we bo na dómọna we bo nasọ kọndo ji we susugege kakajẹ whenue hiẹ na yin huhusudo,+ na hiẹ ma dotoaina ogbè Jehovah Jiwheyẹwhe towe tọn gbọn tonusisena gbedide po osẹ́ndoai etọn he ewọ ko na we lẹ po dali wutu.+ 46 Yé nasọ zindonukọn nado to yasana hiẹ po kúnkan towe po taidi ohia tẹgbẹ tọn po avase de po,+ 47 na hiẹ ma yí homẹhunhun po ayajẹ ahun mẹ tọn po do sẹ̀n Jehovah Jiwheyẹwhe towe to whenue hiẹ tindo susugege nulẹpo tọn wutu.+ 48 Jehovah na do kẹntọ towe lẹ hlan sọta we bọ hiẹ na nọ sẹ̀n yé+ dile a to huvẹ,+ bọ nugbla to hùhù we, avọ̀ sọ whèdo we bọ hiẹ jẹdò nulẹpo tọn. Ewọ na do zẹgẹ gànyuu tọn okọ̀ na we kaka e nado hù we sudo.

49 “Jehovah na fọ́n akọta he wá sọn fidindẹn de do ji we,+ yèdọ sọn opodo aigba tọn; e nasọ lọ́n jẹ ji we di akùn,+ yèdọ akọta de he sin ogbè hiẹ ma sè,+ 50 akọta he awusọhia etọn dobu de he ma na hò yọnhonọ lẹ tọn pọ́n kavi do nukundagbe hia jọja lẹ.+ 51 Yé na nọ dù ovi kanlin-yìnyìn towe lẹ tọn po sinsẹ́n he aigba towe detọ́n lẹ po kaka hiẹ nado yin huhusudo. Yé ma na nọ pò jinukun, ovẹn yọyọ kavi amì, oyìnvu kavi lẹngbọvu de dai na we kaka yé nado và we sudo.+ 52 Yé na dosla lẹdo we, bo glọn we do tòdaho* towe lẹpo mẹ to aigba towe pete ji kakajẹ whenue adó gángán towe he yiaga bọ hiẹ nọ dejidego lẹ na họliai. Mọwẹ, na nugbo tọn yé na dosla lẹdo we to tòdaho towe lẹpo mẹ to aigba towe he Jehovah Jiwheyẹwhe towe ko na we lọ pete ji.+ 53 To whenẹnu, hiẹ na to dandannu glọ nado dù ovi towe titi lẹ,* yèdọ olàn visunnu towe po viyọnnu towe he Jehovah Jiwheyẹwhe towe ko na we lẹ po+ tọn, na lehe kẹntọ towe lẹ dosla lẹdo we bo to nukunbiana we sinsinyẹn do wutu.

54 “Sunnu he tlẹ yin mẹjọmẹ podọ awuvẹmẹtọ hugan to ṣẹnṣẹn mìtọn ma na wàlẹblanuna nọvisunnu etọn, asi yiwanna etọn, kavi visunnu etọn he pò lẹ, 55 e ma nasọ na yé to olàn visunnu etọn lẹ tọn he dù e te lọ mẹ, na e ma tindo nudevo de nado dù, na lehe kẹntọ towe lẹ dosla lẹdo tòdaho towe lẹ bo to nukunbiana we sinsinyẹn do wutu.+ 56 Mọdopolọ, yọnnu he tlẹ yin mẹjọmẹ podọ awuvẹmẹtọ to ṣẹnṣẹn mìtọn he ma tlẹ sọgan dike afọpahomẹ etọn ni jẹ kọmẹ dai na mẹjọmẹ bibasi etọn wutu,+ ma na do lẹblanu hia asu yiwanna etọn, visunnu etọn kavi viyọnnu etọn, 57 mọjanwẹ e ma tlẹ na wàlẹblanuna kúkàn he tọ́njẹgbonu sọn asá etọn mẹ po visunnu he ewọ lọsu ji lẹ po do niyẹn, na e na dù yé to nuglọ, na lehe kẹntọ towe lẹ dosla lẹdo tòdaho towe lẹ bo to nukunbiana we sinsinyẹn do wutu.

58 “Eyin hiẹ ma wá yí sọwhiwhe do setonuna ohó he tin to Osẹ́n ehe mẹ lẹpo he yin kinkandai do owe ehe mẹ+ bo masọ dibusi oyín gigonọ he dobu ehe,+ enẹ wẹ Jehovah+ Jiwheyẹwhe towe, 59 Jehovah na kọ̀n azọ̀nylankan he vẹadi tlala lẹ do hiẹ po kúnkan towe po ji, yèdọ azọ̀nylankan sinsinyẹn he na dẹn-to-aimẹ lẹ,+ podọ azọ̀n badabada he na gbọṣi aimẹ lẹ. 60 Ewọ na hẹn azọ̀n Egipti tọn he hiẹ ko nọ dibuna dai lẹpo lẹkọwa ji we bọ yé na tẹdo gowe majomajo. 61 Humọ, Jehovah na tlẹ hẹn azọ̀n kavi azọ̀nylankan he ma yin kinkandai do owe Osẹ́n ehe tọn mẹ lẹpo wá ji we, kakajẹ whenue hiẹ na yin huhusudo. 62 Dile etlẹ yindọ mìwlẹ ko lẹzun susugege taidi sunwhlẹvu olọn tọn lẹ,+ sọha vude poun wẹ na pò to mì mẹ,+ na hiẹ ma dotoaina ogbè Jehovah Jiwheyẹwhe towe tọn wutu.

63 “Podọ kẹdẹdile homẹ Jehovah tọn hùn nado hẹn mì yin kọdetọn dagbenọ bo hẹn mì sudeji wayi do, mọjanwẹ homẹ Jehovah tọn nasọ hùn nado và mì sudo bo hù mì sudo do niyẹn; mìwlẹ nasọ yin sinsánsẹ sọn aigba he mì jlo na yí lọ ji.

64 “Jehovah na vúnvún we pé yì akọta lẹpo mẹ, sọn opodo aigba tọn de jẹ opodo aigba tọn devo,+ bọ hiẹ na to dandannu glọ nado nọ sẹ̀n yẹwhe atin po zannu po tọn lẹ to dọ́n, yèdọ yẹwhe he hiẹ po tọgbo towe lẹ po ma yọnẹn lẹ.+ 65 Hiẹ ma na tindo jijọho to akọta enẹlẹ ṣẹnṣẹn,+ mọjanwẹ hiẹ ma na mọ gbọjẹtẹn na afọpahomẹ towe do niyẹn. Kakatimọ, Jehovah na na we ahun magbọjẹ tọn,+ nukun he ma na mọnú ganji lẹ po numọtolanmẹ flumẹjijẹ tọn*+ po to dọ́n. 66 Ogbẹ̀ towe na tin to owù daho mẹ bọ hiẹ na nọ gọ́ na obu to okle po ozán po; podọ hiẹ ma na kudeji eyin a na gán. 67 To afọnnu, hiẹ na nọ dọ dọ, ‘E na ko pọnte eyin whèjai wẹ!’ podọ to whèjai hiẹ na nọ dọ dọ, ‘E na ko pọnte eyin afọnnu wẹ!’ na obu he na gọ́ ahun towe mẹ wutu podọ na nuhe nukun towe lẹ na to mimọ wutu. 68 Na nugbo tọn, Jehovah nasọ plan we lẹkọyi Egipti gbọn tọjihun mẹ, gbọn aliho he yẹn ko dọna we dai dọ, ‘Hiẹ ma nasọ vọ́ ẹ mọ gbede lọ’ ji, bọ hiẹ na to dandannu glọ nado sà dewe na kẹntọ towe lẹ to dọ́n taidi afanumẹ sunnu po afanumẹ yọnnu po, ṣigba hihọ̀tọ de ma na tin.”

29 Ehelẹ wẹ ohó alẹnu lọ tọn lẹ he Jehovah degbena Mose nado basi hẹ omẹ Islaeli tọn lẹ to aigba Moabi tọn ji, gbọnvona alẹnu he e basi hẹ yé to Holẹbi.+

2 To whenẹnu, Mose ylọ Islaeli pete pli bo dọna yé dọmọ: “Mìwlẹ ko mọ nulẹpo he Jehovah wà na Falo, devi etọn lẹpo po otò etọn pete po to nukun mìtọn mẹ to aigba Egipti tọn ji,+ 3 yèdọ whẹdida* dahodaho he nukun towe mọ lẹ, ohia po azọ́njiawu daho enẹlẹ po.+ 4 Ṣigba, Jehovah ma ko na mì ahun he sọgan mọnukunnujẹ onú ehelẹ mẹ gọna nukun he sọgan mọnú po otó he sọgan sènu po kakajẹ egbé.+ 5 ‘Dile yẹn to anadena mì na owhe 40 to danfafa ji,+ avọ̀ he to okọ̀ na mì lẹ ma dohó, podọ afọpa he to afọ na mì lẹ ma dohó.+ 6 Hiẹ ma dù akla, mọjanwẹ hiẹ ma nù ovẹn kavi ahàn sinsinyẹn devo depope do niyẹn, ṣogan yẹn penukundo gowe, na mìwlẹ nido yọnẹn dọ yẹn wẹ Jehovah Jiwheyẹwhe mìtọn.’ 7 To godo mẹ, mìwlẹ wáfi bọ Sihọni ahọlu Hẹṣbọni+ tọn po Ogi ahọlu Baṣani+ tọn po tọ́nawhàn mí, ṣigba mí gbawhàn yetọn.+ 8 Enẹgodo, mí yí aigba yetọn bo yí i na Leubẹninu lẹ, Gadinu lẹ po mado-awe hẹnnu Manasse tọn po taidi ogú de.+ 9 Enẹwutu, mì nọ payi ohó alẹnu ehe tọn lẹ go bo nọ setonuna yé, na nuhe wà mì te lẹpo nido nọ tindo kọdetọn dagbe.+

10 “Mìmẹpo wẹ ṣite to Jehovah Jiwheyẹwhe mìtọn nukọn tofi to egbé, yèdọ nukọntọ hẹnnu mìtọn lẹ tọn, mẹho mìtọn lẹ, anademẹtọ mìtọn lẹ, sunnu Islaeli tọn lẹpo, 11 ovi mìtọn lẹ, asi mìtọn lẹ+ po mẹhe to jonọ-gbéji bo nọ nọ̀ osla towe mẹ lẹ+ po, sọn mẹhe nọ dà nake na we lẹ ji jẹ mẹhe nọ dọ̀n osin na we lẹ ji. 12 Hiẹ tin tofi, na hiẹ nido biọ alẹnu mẹ hẹ Jehovah Jiwheyẹwhe towe bo yigbena whiwhle etọn, he Jehovah Jiwheyẹwhe towe to bibasi hẹ we to egbé,+ 13 na ewọ nido hẹn we zun akọta etọn+ to egbé podọ na ewọ nido yin Jiwheyẹwhe towe,+ kẹdẹdile e ko dopagbe etọn na we do podọ kẹdẹdile e ko whlé na tọgbo towe Ablaham,+ Isaki+ po Jakọbu+ po do.

14 “Todin, e ma yin mìwlẹ kẹdẹ wẹ yẹn to alẹnu po whiwhle ehe po basi hẹ gba, 15 ṣigba hẹ mẹhe ṣite tofi hẹ mí to egbé to Jehovah Jiwheyẹwhe mítọn nukọn lẹ po mẹhe ma tofi hẹ mí to egbé lẹ po ga. 16 (Na mìwlẹ yọ́n lehe mí nọ aigba Egipti tọn ji do ganji, podọ lehe mí gbọn akọta voovo lẹ ṣẹnṣẹn wayi to gbejizọnlin mítọn whenu do.+ 17 Mì nọ saba mọ osùnú yetọn lẹ gọna boṣiọ hiọawu* atin po zannu po tọn,+ fataka po sika po tọn yetọn lẹ he tin to ṣẹnṣẹn yetọn.) 18 Mì payi, na sunnu kavi yọnnu, whẹndo kavi hẹnnu de nikaa tin to ṣẹnṣẹn mìtọn finẹ to egbé, ehe ahun etọn na sisẹ́ ẹ nado lẹkọ sọn Jehovah Jiwheyẹwhe mítọn godo nado yì sẹ̀n yẹwhe akọta enẹlẹ tọn lẹ,+ na adọ̀ he nọ de sinsẹ́n adínọ po vivẹ́ po tọ́n de nikaa tin to ṣẹnṣẹn mìtọn.+

19 “Ṣigba, eyin mẹde sè ohó whiwhle ehe tọn lẹ bo doawagun to ahun ede tọn mẹ dọ, ‘Nude ma na jọ do go e, eyin yẹn tlẹ zindonukọn nado to zọnlinzin gbọn aliho he jlo mi lẹ ji,’ nado hù nulẹpo* sudo to ali etọn ji, 20 Jehovah ma na jona ẹn.+ Kakatimọ, Jehovah na gblehomẹ do omẹ enẹ go sinsinyẹn, bọ dẹ̀hodo he yin kinkandai do owe ehe mẹ lẹpo na wá e ji dandan,+ podọ na nugbo tọn, Jehovah na súnsún yinkọ etọn sẹ̀ sọn olọn glọ. 21 Jehovah nasọ de ewọ dovo sọn hẹnnu Islaeli tọn lẹpo mẹ nado jiya nugbajẹmẹji tọn sọgbe hẹ dẹ̀hodo alẹnu lọ tọn lẹpo he yin kinkandai do owe Osẹ́n tọn ehe mẹ.

22 “To whenue whẹndo visunnu mìtọn lẹ tọn he ja to sọgodo po jonọ he wá sọn fidindẹn lẹ po na mọ azọ̀nylankan aigba lọ tọn lẹ, yèdọ awutu he Jehovah ko hẹnwa e ji lẹ— 23 whèmi, ojẹ̀ po miyọ́n jiji po, he zọ̀n bọ jinukun ma na yin dido kavi tọ́nkun to aigba lọ pete ji, bọ ogbé depope ma nasọ wú to e ji, kẹdẹdi vasudo Sodọmi po Gomọla po,+ podọ Adma po Zeboimi po+ tọn, he Jehovah vasudo to homẹgble po adi etọn po mẹ— 24 yewlẹ po akọta lẹpo po na dọmọ, ‘Naegbọn Jehovah do wàmọ na aigba ehe?+ Etẹwẹ hẹn homẹgble sinsinyẹn mọnkọtọn wá?’ 25 To whenẹnu, gbẹtọ lẹ na dọ dọ, ‘Na yé gbẹ́ alẹnu Jehovah, Jiwheyẹwhe tọgbo yetọn lẹ tọn dai,+ ehe e ko basi hẹ yé to whenue ewọ plan yé jẹgbonu sọn aigba Egipti tọn ji wutu wẹ.+ 26 Ṣigba, yé yì sẹ̀n yẹwhe devo lẹ bo dẹ́ do odò na yé, yèdọ yẹwhe he yé ma yọnẹn lẹ he ewọ ma nagbè yé nado nọ sẹ̀n.*+ 27 To whenẹnu, Jehovah gblehomẹ sinsinyẹn do aigba enẹ go bo hẹn dẹ̀hodo he yin kinkandai do owe osẹ́n tọn lọ mẹ lẹpo wá e ji.+ 28 Enẹwutu, Jehovah họ̀nadọna yé sọn aigba yetọn ji to homẹgble+ po adi sinsinyẹn etọn po mẹ, bo bẹ yé jẹ aigba devo ji, fie yé tin te to egbé.’+

29 “Jehovah Jiwheyẹwhe mítọn tọn wẹ onú whiwhla lẹ,+ ṣigba nuhe yin didehia lẹ yin míwlẹ po kúnkan mítọn lẹ po tọn kakadoi, na mí nido nọ setonuna ohó he tin to Osẹ́n ehe mẹ lẹpo.+

30 “To whenue ohó ehe lẹpo na ko ṣẹ do ji we, yèdọ dona po dẹ̀hodo he yẹn zedonukọnna we lọ po,+ bọ hiẹ wá flin yé*+ to akọta he mẹ Jehovah Jiwheyẹwhe towe ko vúnvún we pé gbọn lẹpo,+ 2 bo lẹhlan Jehovah Jiwheyẹwhe towe+ bosọ yí ahun towe lẹpo po alindọn* towe lẹpo po+ do dotoaina ogbè etọn sọgbe hẹ nuhe yẹn degbe etọn na we to egbé lẹpo, yèdọ hiẹ po visunnu towe lẹ po, 3 to whenẹnu Jehovah Jiwheyẹwhe towe na plan kanlinmọ towe lẹ+ lẹkọ bo do lẹblanu hia+ we bosọ vọ́ we bẹpli sọn akọta he mẹ Jehovah Jiwheyẹwhe towe ko vúnvún we pé gbọn lẹpo.+ 4 Eyin omẹ towe lẹ tlẹ ko vúnvún pé yì opodo olọn tọn, Jehovah Jiwheyẹwhe towe na bẹ we pli bo plan we lẹkọ sọn dọ́n.+ 5 Jehovah Jiwheyẹwhe towe na plan we wá aigba he otọ́ towe lẹ ko yí lọ ji, bọ hiẹ na yí i taidi nutindo de; ewọ nasọ hẹn we tindo kọdetọn dagbe bo na hẹn we sudeji hugan otọ́ towe lẹ.+ 6 Jehovah Jiwheyẹwhe towe na klọ́* ahun towe po ahun kúnkan towe tọn po wé,+ na hiẹ nido yí ahun towe lẹpo po alindọn* towe lẹpo po do yiwanna Jehovah Jiwheyẹwhe towe bo nọgbẹ̀.+ 7 Enẹgodo, Jehovah Jiwheyẹwhe towe na hẹn dẹ̀hodo ehe lẹpo wá kẹntọ towe he gbẹwanna we bo dohomẹkẹn we lẹ ji.+

8 “To whenẹnu, hiẹ na lẹhlan Jehovah bo dotoaina ogbè etọn bosọ nọ yìn gbedide etọn he yẹn to nina we to egbé lẹpo. 9 Jehovah Jiwheyẹwhe towe na hẹn we tindo kọdetọn dagbe taun to azọ́n alọ towe tọn lẹpo mẹ,+ bo na hẹn ovi towe lẹ, kanlin-yìnyìn towe po sinsẹ́n aigba towe tọn po sudeji, na Jehovah nasọ vọ́ hùnhomẹ nado hẹn we tindo kọdetọn dagbe, kẹdẹdile e ko hùnhomẹ do tọgbo towe lẹ go do.+ 10 Na to whenẹnu, hiẹ na nọ dotoaina ogbè Jehovah Jiwheyẹwhe towe tọn bo na nọ setonuna gbedide po osẹ́ndoai etọn lẹ po he yin kinkandai do owe Osẹ́n tọn ehe mẹ, podọ hiẹ na yí ahun towe lẹpo po alindọn* towe lẹpo po+ do lẹhlan Jehovah Jiwheyẹwhe towe.

11 “Todin, gbedide ehe, he yẹn to nina we to egbé ma vẹawuna we zẹjlẹgo, mọjanwẹ e ma dẹn do we do niyẹn.+ 12 E ma yin olọn mẹ wẹ e te bọ hiẹ nado dọ dọ, ‘Mẹnu wẹ na hẹji yì olọn mẹ bo hẹn ẹn wá na mí, na mí nido sọgan dotoaina ẹn bo nọ yìn in?’+ 13 Mọjanwẹ e ma to awà awetọ ohù tọn ji do niyẹn bọ hiẹ nado dọ dọ, ‘Mẹnu wẹ na dasá yì awà awetọ ohù tọn ji bo hẹn ẹn wá na mí, na mí nido sọgan dotoaina ẹn bo nọ yìn in?’ 14 Na ohó lọ to dè we tútútú, yèdọ to onù towe titi mẹ podọ to ahun towe titi mẹ,+ na hiẹ nido nọ basi i.+

15 “Pọ́n, yẹn to ogbẹ̀ po dagbe po, podọ okú po oylan po zedonukọnna we to egbé.+ 16 Eyin hiẹ nọ dotoaina gbedide Jehovah Jiwheyẹwhe towe tọn lẹ he yẹn to nina we to egbé, gbọn wanyina Jehovah Jiwheyẹwhe towe+ po zọnlinzinzin to aliho etọn lẹ ji po dali, podọ gbọn tonusisena gbedide, osẹ́ndoai po nudide whẹdida tọn etọn lẹ po dali, to whenẹnu hiẹ na nọgbẹ̀+ bo sudeji, Jehovah Jiwheyẹwhe towe nasọ dona we to aigba he hiẹ jei yíyí gbé lọ ji.+

17 “Ṣigba, eyin ahun towe lẹhlan apadopo+ bọ hiẹ ma dotoai podọ eyin hiẹ yin yẹdoklọ bọ a dẹ́ do odò na yẹwhe devo lẹ bosọ nọ sẹ̀n yé,+ 18 yẹn dọna mì to egbé dọ mì na dọ̀n dandan.+ Mì ma na nọgbẹ̀ dẹn to aigba he hiẹ jlo na dasá Jọdani nado yí lọ ji. 19 Yẹn yí olọn po aigba po do basi kunnudetọ lẹ sọta mì to egbé dọ yẹn ko ze ogbẹ̀ po okú po donukọnna we, dona po dẹ̀hodo po;+ hiẹ sọ dona de ogbẹ̀, na hiẹ nido nọgbẹ̀,+ yèdọ hiẹ po kúnkan towe lẹ po,+ 20 gbọn wanyina Jehovah Jiwheyẹwhe towe,+ todidoai na ogbè etọn po titẹ́ do ewọ go gligli+ po dali, na ewọ wẹ ogbẹ̀ towe podọ gbọn ewọ dali wẹ hiẹ na nọgbẹ̀ dẹn to aigba he Jehovah whlé nado na tọgbo towe Ablaham, Isaki po Jakọbu po lọ ji.”+

31 Enẹgodo, Mose tọ́njẹgbonu bo dọ ohó helẹ na Islaeli pete, 2 bo dọna yé dọmọ: “Yẹn ko tindo owhe 120 to egbé.+ Yẹn masọ sọgan deanana mì* ba, na Jehovah ko dọna mi dọ, ‘Hiẹ ma na dasá Jọdani ehe gba.’+ 3 Jehovah Jiwheyẹwhe towe wẹ to didasa to nukọnna we jei dọ́n, podọ ewọ wẹ na hù akọta ehelẹ sudo to nukọn towe, bọ hiẹ na yàn yé sẹ̀.+ Jọṣua wẹ na deanana we nado dasá yì dọ́n,+ kẹdẹdile Jehovah ko dọ do. 4 Jehovah na wà na yé kẹdẹdile e ko wà na Sihọni+ po Ogi+ po do, yèdọ ahọlu Amolinu lẹ tọn lẹ po aigba yetọn po to whenue e hù yé sudo.+ 5 Jehovah na gbawhàn yetọn na mì, podọ mì dona wà na yé sọgbe hẹ gbedide he yẹn ko na mì lọ pete.+ 6 Mì yin adọgbotọ bo yin huhlọnnọ.+ Mì dibu kavi dike ahun mìtọn gbàdo to nukọn yetọn blo,+ na Jehovah Jiwheyẹwhe towe wẹ to yìyì hẹ we. Ewọ ma na gbẹ́ we dai kavi jo we do.”+

7 To whenẹnu, Mose ylọ Jọṣua bo dọna ẹn to nukun Islaeli pete tọn mẹ dọmọ: “Yin adọgbotọ bo yin huhlọnnọ,+ na hiẹ wẹ na plan akọta ehe yì aigba he Jehovah ko whlé na tọgbo yetọn lẹ nado na yé lọ ji, hiẹ nasọ yí i na yé taidi ogú de.+ 8 Jehovah wẹ to yìyì to nukọn towe, podọ e ma na lẹkọ sọn godo na we.+ Ewọ ma na gbẹ́ we dai kavi jo we do. A dibu kavi dike ahun towe gbàdo blo.”+

9 Enẹgodo, Mose kàn Osẹ́n+ ehe bo ze e jo na yẹwhenọ lẹ, yèdọ Levinu lẹ, he nọ ze apotin alẹnu Jehovah tọn, podọ na mẹho Islaeli tọn lẹpo. 10 Mose degbena yé dọmọ: “To vivọnu owhe ṣinawe lẹpo tọn, to ojlẹ dide lọ mẹ to owhe tundote tọn+ mẹ, to Hùnwhẹ Gòhọtúntún* lẹ tọn+ whenu, 11 to whenue Islaeli pete sọawuhia to Jehovah Jiwheyẹwhe towe nukọn+ to fihe ewọ na de lọ, hiẹ dona nọ hia Osẹ́n ehe na Islaeli pete nido sè e.+ 12 Nọ bẹ gbẹtọ lọ lẹ pli,+ yèdọ sunnu lẹ, yọnnu lẹ, ovi* lẹ po mẹhe to jonọ-gbéji he tin to tòdaho* towe lẹ mẹ lẹ po, na yé nido nọ dotoai bo nọ plọnnu gando Jehovah Jiwheyẹwhe mìtọn go bosọ nọ dibusi i podọ na yé nido nọ payi nado setonuna ohó he tin to Osẹ́n ehe mẹ lẹpo. 13 To whenẹnu, visunnu yetọn lẹ he ma ko yọ́n Osẹ́n ehe na nọ dotoai+ bo na plọn nado nọ dibusi Jehovah Jiwheyẹwhe mìtọn to gbẹninọ mìtọn lẹpo whenu to aigba he mì jlo na dasá Jọdani nado yí lọ ji.”+

14 Enẹgodo, Jehovah dọna Mose dọmọ: “Pọ́n! Okú towe ko sẹpọ.+ Ylọ Jọṣua, na mì ni wá* gòhọ opli tọn lọ kọ̀n, na yẹn nido deazọ́nna ẹn.”+ Enẹwutu, Mose po Jọṣua po yì gòhọ opli tọn lọ kọ̀n. 15 To whenẹnu, Jehovah sọawuhia to gòhọ lọ kọ̀n to dòtin aslọ tọn lọ mẹ, bọ dòtin aslọ tọn lọ nọte to họntonu gòhọ lọ tọn.+

16 Todin, Jehovah dọna Mose dọmọ: “Pọ́n! Hiẹ na kú* to madẹnmẹ, akọta ehe nasọ fọ́n bo na jẹ galọ ji to gbigbọ-liho hẹ yẹwhe jonọ lẹ he lẹdo yé pé to aigba he ji yé jei.+ Yé na gbẹ́ mi+ dai bo gbà alẹnu ṣie he yẹn ko basi hẹ yé.+ 17 To whenẹnu, yẹn na gblehomẹ sinsinyẹn do yé go,+ bo na gbẹ́ yé dai+ bosọ whlá nukunmẹ ṣie do yé+ kakajẹ whenue yé na ko yin huhusudo. Enẹgodo, to whenue nugbajẹmẹji susu na ko wá yé ji+ bọ yé na ko biọ ayimajai mẹ godo, yé na wá dọ dọ, ‘Be e ma yindọ na Jiwheyẹwhe mítọn ma tin to ṣẹnṣẹn mítọn wutu wẹ nugbajẹmẹji ehelẹ do wá mí ji?’+ 18 Ṣigba, yẹn na whlá nukunmẹ ṣie do yé to azán enẹ gbè, na oylan he yé ko wà lẹpo bo lẹhlan yẹwhe devo lẹ wutu.+

19 “Todin, mì kàn ohàn ehe dai na mìde+ bo plọn ẹn Islaelivi lẹ.+ Mì plọn ẹn yé,* na ohàn ehe nido yinuwa di kunnudenu de na mi sọta akọta Islaeli tọn.+ 20 To whenue yẹn na ko plan yé wá aigba lọ he yẹn ko whlé na tọgbo yetọn lẹ ji+—yèdọ aigba he ji anọ́sin po owín po to sisà te+—bọ yé na ko dù gọ́ho bo tindo kọdetọn dagbe,*+ yé na lẹhlan yẹwhe devo lẹ bo na nọ sẹ̀n yé podọ yé nasọ yí mẹmasi do yinuwa hẹ mi bo na gbà alẹnu ṣie.+ 21 To whenue nugbajẹmẹji susu na ko wá yé ji bọ yé na ko biọ ayimajai mẹ,+ ohàn ehe na yinuwa di kunnudenu de sọta yé (na kúnkan yetọn lẹ ma dona wọn ẹn), na yẹn ko yọ́n ayilinlẹn he yé wleawuna,+ yèdọ whẹpo yẹn tlẹ do plan yé wá aigba he yẹn whlé na yé lọ ji.”

22 Enẹwutu, Mose kàn ohàn ehe dai to azán enẹ gbè bosọ plọn ẹn Islaelivi lẹ.

23 Enẹgodo, Ewọ* deazọ́nna Jọṣua+ visunnu Nuni tọn bo dọna ẹn dọmọ: “Yin adọgbotọ bo yin huhlọnnọ,+ na hiẹ wẹ na plan Islaelivi lẹ yì aigba he yẹn ko whlé na yé lọ ji,+ podọ yẹn ma na lẹkọ sọn godo na we.”

24 Tlolo he Mose ko dotana ohó he tin to Osẹ́n ehe mẹ lẹpo pete kinkan do owe de mẹ,+ 25 Mose degbena Levinu lẹ he nọ ze apotin alẹnu Jehovah tọn dọmọ: 26 “Mì yí owe Osẹ́n tọn+ ehe bo ze e do apá na apotin+ alẹnu Jehovah Jiwheyẹwhe mìtọn tọn, bọ e na yinuwa di kunnudenu de sọta we to finẹ. 27 Na yẹnlọsu yọ́n atẹṣiṣi+ towe po tasinsinyẹn*+ towe po. Eyin mìwlẹ ko nọ ṣiatẹ sọta Jehovah sọmọ to whenue yẹn gbẹ́ pò togbẹ̀ to mì dè, nẹmunẹmu wẹ mìwlẹ ma na wàmọ to okú ṣie godo! 28 Mì bẹ mẹho hẹnnu mìtọn lẹ tọn lẹ po anademẹtọ mìtọn lẹpo po pli do dè e, bo gbọ yẹn ni dọ ohó helẹ na yé, bosọ gbọ yẹn ni yí olọn po aigba po do basi kunnudetọ lẹ sọta yé.+ 29 Na yẹn yọnẹn ganji dọ to okú ṣie godo, mìwlẹ na yinuwa po kanyinylan po+ bo na lẹhlan apadopo sọn aliho he yẹn ko degbe etọn na mì lọ ji. Podọ to godo mẹ, nugbajẹmẹji na wá mì ji dandan,+ na mì na nọ wà nuhe ylan to nukun Jehovah tọn mẹ lẹ bọ mì nasọ hẹn homẹgble e gbọn azọ́n alọ mìtọn lẹ tọn dali.”

30 To whenẹnu, Mose hia hogbe ohàn ehe tọn lẹ sọn bibẹ kaka yì vivọnu+ bọ pipli Islaeli tọn pete sè:

 3 Na yẹn na lá oyín Jehovah tọn.+

Mì dọho gando kiklo-yinyin Jiwheyẹwhe mítọn tọn go!+

 5 Yewlẹ wẹ ko yinuwa to aliho gblezọn mẹ.+

Yé ma yin ovi etọn lẹ, yelọsu go wẹ oblọ lọ wá sọn.+

Whẹndo bublunọ podọ jijọ gbíngbánnọ de wẹ yé!+

15 Whenue Jeṣuluni* klo, ewọ gbọn atẹṣiṣi dali gbẹ́ mi dai.

Hiẹ ko klo, bo tọ́nalùn bosọ jí.+

29 Eyin yé ko yọnnuin wẹ!+ Yé na lẹnayihamẹpọn do ehe ji.+

Yé na lẹnnupọndo lehe yé wá lẹ́ jẹ ji.+

Mì gbọ yé ni fọ́n bo gọalọna mì.

Mì gbọ yé ni lẹzun fibẹtado de na mì.

Yẹn wẹ nọ hù, bosọ nọ hẹn dogbẹ̀.+

44 Gbọnmọ dali, Mose wá bo hia hogbe ohàn ehe tọn lẹpo bọ gbẹtọ lọ lẹ sè,+ yèdọ ewọ po Hoṣea*+ visunnu Nuni tọn po. 45 To whenue Mose dotana ohó ehe lẹpo didọna Islaeli pete godo, 46 e dọna yé dọmọ: “Mì hẹn ohó avase tọn he yẹn dọna mì to egbé lẹpo do ayiha mẹ,+ na mì nido degbena visunnu mìtọn lẹ nado yí sọwhiwhe do yinuwa sọgbe hẹ ohó he tin to Osẹ́n ehe mẹ lẹpo.+ 47 Na e ma yin ohó tata de poun na mì gba, ṣigba e zẹẹmẹdo ogbẹ̀ na mì,+ podọ gbọn ohó ehe dali wẹ mìwlẹ sọgan nọgbẹ̀ dẹn to aigba he mì jlo na dasá Jọdani nado yí lọ ji.”

48 Jehovah dọhona Mose to gbenẹgbe dọmọ: 49 “Hẹji yì osó Abalimi+ tọn ehe ji, yèdọ Osó Nebo+ he tin to aigba Moabi tọn ji pannukọn Jẹliko, bo pọ́n aigba Kenani tọn he yẹn jlo na na Islaelivi lẹ taidi nutindo+ lọ hlan. 50 Enẹgodo, hiẹ na kú to osó he ji hiẹ jlo na hẹji yì lọ ji, bọ hiẹ na yin dìdì taidi tọgbo towe lẹ,* kẹdẹdile Aalọn nọvisunnu towe kú to Osó Họli+ ji bo yin dìdì taidi tọgbo etọn lẹ do, 51 na mì omẹ awe lẹ ma yin nugbonọ na mì to Islaelivi lẹ ṣẹnṣẹn to osin Mẹliba+ tọn lẹ kọ̀n to Kadẹṣi to danfafa Zini tọn ji, na mì ma klan mi do wiwe to omẹ Islaeli tọn lẹ nukọn wutu.+ 52 Hiẹ na mọ aigba lọ hlan sọn olá, ṣigba hiẹ ma na yì aigba lọ he yẹn jlo na na omẹ Islaeli tọn lẹ ji gba.”+

33 Todin, dona he Mose omẹ Jiwheyẹwhe nugbo lọ tọn lá do Islaelivi lẹ ji whẹpo do kú lọ die.+ 2 E dọmọ:

 7 Ewọ sọ lá dona ehe do Juda ji+ dọmọ:

 8 Gando Levi go,+ e dọmọ:

12 Gando Bẹnjamini go,+ e dọmọ:

13 Gando Josẹfu go,+ e dọmọ:

18 Gando Zebuluni go,+ e dọmọ:

19 Yé na nọ ylọ gbẹtọ lẹ wá osó ji.

Finẹ wẹ yé na nọ basi avọ́sinsan dodowiwa tọn lẹ te.

20 Gando Gad go,+ e dọmọ:

“Donanọ wẹ mẹlọ he to dogbó Gad tọn lẹ hẹngblodeji.+

Nukọntọ akọta lọ tọn lẹ na pli dopọ.

22 Gando Dani go,+ e dọmọ:

“Kinnikinni-vu de wẹ Dani yin.+

E na lọ́n jẹgbonu sọn Baṣani.”+

23 Gando Naftali go,+ e dọmọ:

Ewọ ni yí whèyihọ-waji po hùwaji po.”

24 Gando Aṣeli go,+ e dọmọ:

“Aṣeli yin didona po visunnu lẹ po.

29 Islaeli E, ayajẹnọ wẹ hiẹ!+

34 Enẹgodo, Mose hẹji sọn danfafa Moabi tọn ji yì Osó Nebo+ ji, to aga Pisga+ tọn he pannukọn Jẹliko.+ Jehovah sọ do aigba lọ pete hia ẹ, sọn Giliadi jẹ Dani,+ 2 gọna Naftali pete, aigba Eflaimi po Manasse po tọn, aigba Juda tọn pete kaka yì ohù whèyihọ-waji tọn* kọ̀n,+ 3 Negẹb+ po Agbegbe Jọdani tọn+ po, dankló Jẹliko tọn, gọna tòdaho odétin lẹ tọn, kaka yì Zoali.+

4 To whenẹnu, Jehovah dọna ẹn dọmọ: “Aigba he yẹn ko whlé na Ablaham, Isaki po Jakọbu po dọ, ‘Kúnkan* towe wẹ yẹn na na’+ lọ die. Yẹn ko dike bọ hiẹ yí nukun towe titi do mọ ẹn, ṣigba hiẹ ma na dasá yì dọ́n gba.”+

5 Enẹgodo, Mose devizọnwatọ Jehovah tọn kú to finẹ to aigba Moabi tọn ji kẹdẹdile Jehovah ko dọ do.+ 6 Ewọ* sọ dì i do agbàdo lọ mẹ to aigba Moabi tọn ji, pannukọn Bẹti-peọli, amọ́ mẹdepope ma yọ́n fie yọdò etọn te kakajẹ egbehe.+ 7 Owhe 120 wẹ Mose tindo to whenue e kú.+ Nukun etọn lẹ ma ko dózin, podọ huhlọn etọn ma ko depò. 8 Omẹ Islaeli tọn lẹ ví Mose to danfafa Moabi tọn ji na azán 30.+ Enẹgodo, azán he yé yí do ví Mose bo nọ aluẹmẹ na ẹn lẹ wá vivọnu.

9 Jọṣua visunnu Nuni tọn gọ́ na gbigbọ nuyọnẹn tọn, na Mose ko ze alọ etọn do e ji wutu;+ Islaelivi lẹ sọ jẹ todoaina ẹn ji, bo nọ basi kẹdẹdile Jehovah ko degbena Mose do.+ 10 Ṣigba, yẹwhegán de ma ko sọ fọ́n to Islaeli gbede he taidi Mose,+ mẹhe Jehovah yọnẹn nukun sọ nukun.+ 11 Ewọ basi ohia po azọ́njiawu lẹpo po he Jehovah ko do e hlan nado basi to aigba Egipti tọn ji sọta Falo, devizọnwatọ etọn lẹpo, po aigba etọn pete po,+ 12 gbọnvona alọ huhlọnnọ po nujiawu he Mose wà to nukun Islaeli pete tọn mẹ lẹ po.+