NẸHEMIA

1 Ohó Nẹhemia,*+ visunnu Hakalia tọn lẹ die: To osun Kislẹvi* tọn mẹ, to owhe 20tọ mẹ, Ṣuṣani*+ figángán* lọ wẹ n’tin te to whenẹnu. 2 To ojlẹ enẹ mẹ, Hanani,+ yèdọ dopo to nọvisunnu ṣie lẹ mẹ wá sọn Juda po sunnu devo lẹ po, bọ n’kanhose yé gando pipotọ Ju he họ̀ngán sọn kanlinmọgbenu+ lọ lẹ tọn go podọ gando Jelusalẹm lọsu go. 3 Yé gblọn dọmọ: “Mẹhe pò to agbegbe* lọ mẹ finẹ bo họ̀ngán sọn kanlinmọgbenu lẹ tin to ninọmẹ he ylan taun bosọ huwinyan de mẹ.+ Adó Jelusalẹm tọn lẹ ko yin hihọliai+ bọ yè ko yí miyọ́n do fiọ họngbo etọn lẹ.”+

4 Tlolo he n’sè ohó ehelẹ, n’sinai bo jẹ avivi ji bosọ nọ aluẹmẹ na azán susu, podọ n’to nùbla+ bo to dẹ̀ho to Jiwheyẹwhe olọn tọn nukọn. 5 N’sọ dọmọ: “Jehovah E, Jiwheyẹwhe olọn tọn, yèdọ Jiwheyẹwhe he klo bo dobu, he nọ yin nugbonọ na alẹnu etọn bo nọ do owanyi nugbo hia mẹhe yiwanna ẹn bo nọ yìn gbedide etọn lẹ,+ 6 jaale gbọ otó towe po nukun towe lẹ po ni hùn hlan odẹ̀ he yẹn devizọnwatọ towe to hihò hlan we to egbé, to okle po ozán po,+ gando devizọnwatọ towe Islaelivi lẹ go, sọn whenue n’ko to gbeyina ylando he omẹ Islaeli tọn lẹ ko wà sọta we lẹ. Mí ko waylando, yèdọ yẹn po owhé otọ́ ṣie tọn po.+ 7 Na nugbo tọn, mí ko yinuwa to aliho he gblezọn mẹ sọta we,+ na mí ma setonuna gbedide, aṣẹdai gọna nudide whẹdida tọn he hiẹ na devizọnwatọ towe Mose+ lẹ wutu.

8 “Jaale, flin nuhe hiẹ degbe etọn* na devizọnwatọ towe Mose dọmọ: ‘Eyin mì yinuwa po nugbonọ-mayin po, yẹn na vúnvún mì pé gbọn akọta lẹ mẹ.+ 9 Ṣigba, eyin mì lẹkọwa dè e bo nọ yìn gbedide ṣie lẹ bosọ nọ setonuna yé, eyin omẹ mìtọn he ko vúnvún pé lẹ tlẹ tin to opodo olọn tọn, yẹn na bẹ yé pli+ sọn dọ́n bo na plan yé wá fie n’ko de nado ze oyín ṣie doai do.’+ 10 Devizọnwatọ towe lẹ podọ omẹ towe lẹ wẹ yé, yèdọ mẹhe hiẹ ko fligọ gbọn huhlọn daho towe po alọ huhlọnnọ towe po dali lẹ.+ 11 Jehovah E, jaale hùn otó towe hlan odẹ̀ devizọnwatọ towe tọn podọ hlan odẹ̀ devizọnwatọ towe he nọ hùnhomẹ nado dibusi oyín towe lẹ tọn, mọdopolọ jaale bo hẹn devizọnwatọ towe tindo kọdetọn dagbe to egbé, na dawe ehe ni do awuvẹmẹ hia mi.”+

Ahànjinọtọ wẹ n’yin na ahọlu to whenẹnu.+

2 To osun Nisan* tọn mẹ, to owhe 20tọ+ gandudu Ahọlu Altakẹlikesi+ tọn mẹ, ovẹn to nukọn etọn, bọ dile e ko yin aṣa ṣie do, n’ze ovẹn lọ bo na ahọlu.+ Ṣigba, nukunmẹ ṣie ma ko kúṣiọ pọ́n to nukọn etọn. 2 Enẹwutu, ahọlu dọna mi dọmọ: “Naegbọn nukunmẹ towe do kúṣiọ sọmọ to whenuena e yindọ a ma to azọ̀njẹ? E họnwun dọ nude wẹ to ahunmẹduna we.” Obu sọ jẹ ji e taun to whenue n’sè ehe.

3 Whenẹnu wẹ n’dọna ahọlu dọmọ: “Ogbẹ̀ gaa wẹ n’biọ na ahọlu! Naegbọn nukunmẹ ṣie ma na kúṣiọ to whenue tòdaho lọ, fie tọgbo ṣie lẹ yin dìdì do, gbọgbé bọ yè ko yí miyọ́n do fiọ họngbo etọn lẹ?”+ 4 To whenẹnu, ahọlu dọna mi dọmọ: “Etẹwẹ yin obiọ towe?” To afọdopolọji, n’hodẹ̀ hlan Jiwheyẹwhe olọn tọn.+ 5 Enẹgodo, n’dọna ahọlu dọmọ: “Eyin e yọ́n to nukun ahọlu tọn mẹ podọ eyin devizọnwatọ towe ko mọ nukundagbe towe, do mi hlan Juda, yì tòdaho he mẹ tọgbo ṣie lẹ yin dìdì do, na yẹn nido vọ́ ẹ gbá.”+ 6 Whenẹnu wẹ ahọlu he ahọsi etọn to aisinsin to apá na ẹn dọna mi dọmọ: “Ojlẹ nẹmu wẹ gbejizọnlin lọ na biọ podọ whetẹnu wẹ a na lẹkọwa?” Enẹwutu, e yọ́n to nukun ahọlu tọn mẹ nado do mi hlan,+ yẹn sọ na ẹn ojlẹ tangan de.+

7 Enẹgodo, n’dọna ahọlu dọmọ: “Eyin e yọ́n to nukun ahọlu tọn mẹ, gbọ wekanhlanmẹ lẹ ni yin nina mi na ayimatẹn-gán lẹdo he tin to Tọ̀sisa lọ Godo* tọn lẹ,+ na yé nido dike yẹn ni jugbọn finẹ awuyẹyẹ-afọyẹyẹ kakajẹ Juda, 8 gọna wekanhlanmẹ de na Asafi, mẹhe nọ penukundo Jipa Ahọlu tọn* go, na ewọ nido na mi atin lẹ na owhlẹ họngbo Figángán+ Ohọ̀* lọ tọn lẹ, podọ na adó tòdaho lọ tọn lẹ+ po owhé he gbè yẹn jei lọ po.” Enẹwutu, ahọlu na mi wekanhlanmẹ lọ lẹ,+ na alọ dagbe Jiwheyẹwhe ṣie tọn tin to ji e wutu.+

9 To ojlẹ vude godo, n’jẹ ayimatẹn-gán lẹdo he to Tọ̀sisa lọ Godo tọn lẹ dè bo ze wekanhlanmẹ ahọlu tọn lẹ na yé. Ahọlu sọ do awhàngán po osọ́nọ lẹ po hlan nado zọnhẹ mi yì. 10 Whenue Sanbalati+ Holọninu lọ po Tobia+ ahọluzọnwatọ* Amọninu+ lọ po sè gando ehe go, homẹ yetọn ma hùn paali dọ mẹde ko wá nado wà nudagbe de na omẹ Islaeli tọn lẹ.

11 Enẹgodo, n’wá Jelusalẹm bo nọ finẹ na azán atọ̀n. 12 N’fọ́n to zánmẹ, yẹn po sunnu vude po, n’masọ dọ nuhe Jiwheyẹwhe ṣie ko yí do ahun ṣie mẹ nado wà na Jelusalẹm na mẹdepope, podọ kanlin depope ma to dè e adavo dehe ji n’hẹ. 13 N’sọ tọ́n to zánmẹ gbọn Họngbo Agbàdo tọn lọ nù+ bo gbọn Asisa Odàn Daho tọn lọ nukọn jẹ Họngbo Ogbó-Fiọtẹn tọn kọ̀n,+ n’sọ pọ́n lehe adó Jelusalẹm tọn lẹ ko yin hihọliai bọ yè ko yí miyọ́n do fiọ họngbo etọn lẹ do.+ 14 Podọ n’dlí yì Họngbo Asisa tọn+ lọ po Osindò Ahọlu tọn po kọ̀n bọ otẹn he to finẹ ma pé na kanlin he ji n’hẹ lọ nido wayi. 15 Ṣigba, n’zindonukọn bo hẹji gbọn agbàdo*+ lọ kọ̀n to zánmẹ bo to ninọmẹ adó lọ tọn pọ́n, whenẹnu wẹ n’lẹkọ bo gbọn Họngbo Agbàdo tọn lọ nù biọ e mẹ, enẹgodo n’lẹkọ.

16 Ogán nukunpedonugotọ+ lẹ ma yọ́n fie n’yì po nuhe n’to wiwà po, na n’ma ko dọ nudepope na Ju lẹ, yẹwhenọ lẹ, omẹ nukundeji lẹ, ogán nukunpedonugotọ lẹ po azọ́nwatọ he pò lẹ po. 17 To godo mẹ, n’dọna yé dọmọ: “Mì pọ́n ninọmẹ awubla tọn he mẹ mí tin te, lehe Jelusalẹm gbọgbé bọ yè ko yí miyọ́n do fiọ họngbo etọn lẹ do. Mì wá bo dike mí ni vọ́ adó Jelusalẹm tọn lẹ do, na winyan ehe nikaa zindonukọn.” 18 N’sọ dọ lehe alọ dagbe Jiwheyẹwhe ṣie tọn tin to ji e do+ po nuhe ahọlu ko dọna mi lẹ po na yé.+ Whenẹnu wẹ yé dọmọ: “Mì gbọ mí ni fọ́n bo do adó lọ.” Yé sọ na huhlọn yedelẹ* nado wazọ́n dagbe lọ.+

19 Todin, to whenue Sanbalati Holọninu lọ, Tobia+ ahọluzọnwatọ* Amọninu+ lọ po Geṣẹmi Alabianu+ lọ po sè gando ehe go, yé jẹ mí ṣanko ji+ bo nọ yí mí do davlẹ dọmọ: “Etẹ wà wẹ mì te? Mì jlo na ṣiatẹ sọta ahọlu wẹ ya?”+ 20 Ṣigba, n’gblọn dọmọ: “Jiwheyẹwhe olọn tọn wẹ Mẹlọ he na hẹn mí tindo kọdetọn dagbe+ bọ mí mẹhe yin devizọnwatọ etọn lẹ na fọ́n bo na do adó lọ; amọ́ mìwlẹ ma tindo mimá, jlọjẹ kavi oflin* depope to Jelusalẹm.”+

3 Eliaṣibi+ yẹwhenọ daho po nọvisunnu etọn he yin yẹwhenọ lẹ po, fọ́n bo do Họngbo Lẹngbọ lẹ tọn.+ Yé hẹn ẹn zun wiwe*+ bo do ohọ̀n etọn lẹ; yé hẹn ẹn zun wiwe kaka yì Atọ̀họ̀ Mea tọn kọ̀n,+ kaka yì Atọ̀họ̀ Hananẹli tọn kọ̀n.+ 2 To apá yetọn, omẹ Jẹliko tọn lẹ+ to adó lọ vọ́ jlado; podọ Zakuli visunnu Imli tọn to adó lọ vọ́ jlado to apá yetọn.

3 Visunnu Hasenaa tọn lẹ do Họngbo Whèvi tọn lọ;+ yé whè owhlẹ etọn lẹ+ bo do ohọ̀n etọn lẹ, gọna aṣígbè etọn lẹ po dòtin etọn lẹ po. 4 To apá yetọn, Melemọti+ visunnu Ulija tọn, visunnu Hakọzi tọn tindo mahẹ to azọ́n adó lọ vivọjlado tọn mẹ, podọ to apá yetọn, Meṣulami+ visunnu Belekia tọn, visunnu Meṣezabẹli tọn tindo mahẹ to azọ́n adó lọ vivọjlado tọn mẹ bọ to apá yetọn, Zadọki visunnu Baana tọn tindo mahẹ to azọ́n adó lọ vivọjlado tọn mẹ. 5 Podọ to apá yetọn, Tekoanu+ lẹ tindo mahẹ to azọ́n adó lọ vivọjlado tọn mẹ, ṣigba sunnu nukundeji yetọn lẹ ma ze yede whè nado wà sinsẹ̀nzọn* na ogán yetọn lẹ.

6 Joiada visunnu Pasea tọn po Meṣulami visunnu Besodeia tọn po vọ́ Họngbo Tòdaho Hoho lọ Tọn+ jlado; yé whè owhlẹ etọn lẹ bo do ohọ̀n etọn lẹ, gọna aṣígbè etọn lẹ po dòtin etọn lẹ po. 7 To apá yetọn, Melatia Gibeọninu+ lọ po Jadoni Mẹlonotinu lọ po tindo mahẹ to azọ́n adó lọ vivọjlado tọn mẹ, yèdọ sunnu Gibeọni po Mizpa+ po tọn lẹ he tin to aṣẹpipa* ayimatẹn-gán lẹdo he tin to Tọ̀sisa lọ Godo tọn glọ.+ 8 To apá yetọn, Uziẹli visunnu Halhaia tọn he yin dopo to ayátọ sika tọn lẹ mẹ tindo mahẹ to azọ́n adó lọ vivọjlado tọn mẹ, bọ to apá etọn, Hanania he yin dopo to mẹhe nọ wleawuna amì owán gblingblinnọ lẹ mẹ tindo mahẹ to azọ́n adó lọ vivọjlado tọn mẹ; yé sọ tẹ́ zannu do kọmẹ to* Jelusalẹm kaka yì Adó Gbigblo kọ̀n.+ 9 To apá yetọn, Lefaia visunnu Huuli tọn he yin ahọvi de na mado-awe agbegbe Jelusalẹm tọn tindo mahẹ to azọ́n adó lọ vivọjlado tọn mẹ. 10 To apá yetọn, Jedaia visunnu Halumafi tọn tindo mahẹ to azọ́n adó lọ vivọjlado tọn mẹ to owhé etọn titi nukọn, podọ to apá etọn, Hatuṣi visunnu Haṣabneia tọn tindo mahẹ to azọ́n adó lọ vivọjlado tọn mẹ.

11 Malkija visunnu Halimi+ tọn po Haṣubi visunnu Pahati-moabi+ tọn po vọ́ adà devo* jlado, gọna Atọ̀họ̀ Adò lẹ tọn.+ 12 To apá yetọn, Ṣalumi visunnu Halohẹṣi tọn he yin ahọvi de na mado-awe agbegbe Jelusalẹm tọn tindo mahẹ to azọ́n adó lọ vivọjlado tọn mẹ, to pọmẹ hẹ viyọnnu etọn lẹ.

13 Hanuni po tòmẹnu Zanoa+ tọn lẹ po vọ́ Họngbo Agbàdo tọn+ jlado; yé do e bo do ohọ̀n etọn lẹ, gọna aṣígbè etọn lẹ po dòtin etọn lẹ po, podọ yé vọ́ adó lọ jlado kaka yì Họngbo Ogbó-Fiọtẹn tọn kọ̀n,+ yèdọ awagbà 1 000.* 14 Malkija visunnu Lekabi tọn he yin ahọvi agbegbe Bẹti-hakelẹmi+ tọn de vọ́ Họngbo Ogbó-Fiọtẹn tọn lọ jlado; e do e bo do ohọ̀n etọn lẹ, gọna aṣígbè etọn lẹ po dòtin etọn lẹ po.

15 Ṣaluni visunnu Kọlihozẹ tọn he yin ahọvi agbegbe Mizpa+ tọn de vọ́ Họngbo Asisa tọn+ jlado; e do e bo gbá họta etọn bosọ do ohọ̀n etọn lẹ, gọna aṣígbè etọn lẹ po dòtin etọn lẹ po, podọ e vọ́ adó Osindò+ Ali he yì Jipa Ahọlu tọn mẹ+ tọn jlado kaka yì Pèkán+ he jẹte sọn Tòdaho Davidi tọn+ mẹ kọ̀n.

16 Bọdo ewọ go, Nẹhemia visunnu Azibuki tọn he yin ahọvi de na mado-awe agbegbe Bẹti-zuli+ tọn tindo mahẹ to azọ́n adó lọ vivọjlado tọn mẹ sọn Ṣiọditẹn Davidi+ tọn lẹ nukọn kaka yì osindò+ he yin kùnkùn lọ kọ̀n podọ kaka yì Owhé Huhlọnnọ lẹ tọn kọ̀n.

17 Bọdo ewọ go, Levinu lẹ vọ́ adó lọ jlado: Lehumi visunnu Bani tọn; podọ to apá etọn, Haṣabia he yin ahọvi de na mado-awe agbegbe Keila+ tọn tindo mahẹ to azọ́n adó agbegbe etọn tọn vivọjlado tọn mẹ. 18 Bọdo ewọ go, nọvisunnu yetọn lẹ tindo mahẹ to azọ́n adó lọ vivọjlado tọn mẹ: Bavvai visunnu Henadadi tọn he yin ahọvi de na mado-awe agbegbe Keila tọn.

19 To apá etọn, Ezeli visunnu Jeṣua+ tọn, ahọvi Mizpa tọn de, to adà devo vọ́ jlado pannukọn aliho he hẹji yì Awhànfunnu Bẹdotẹn to Azò lọ ji.+

20 Bọdo ewọ go, Baluki visunnu Zabai+ tọn wazọ́n po zohunhun po bo vọ́ adà devo jlado, sọn Azò lọ ji kaka yì họntonu owhé Eliaṣibi+ yẹwhenọ daho tọn kọ̀n.

21 Bọdo ewọ go, Melemọti+ visunnu Ulija tọn, visunnu Hakọzi tọn vọ́ adà devo jlado, sọn họntonu owhé Eliaṣibi tọn kọ̀n kaka yì vivọnu owhé Eliaṣibi tọn.

22 Bọdo ewọ go, yẹwhenọ lẹ, yèdọ sunnu agbegbe Jọdani tọn*+ tọn lẹ tindo mahẹ to azọ́n adó lọ vivọjlado tọn mẹ. 23 Bọdo yewlẹ go, Bẹnjamini po Haṣubi po tindo mahẹ to azọ́n adó lọ vivọjlado tọn mẹ to owhé yetọn titi nukọn. Bọdo yewlẹ go, Azalia visunnu Maaseia tọn, visunnu Anania tọn tindo mahẹ to azọ́n adó lọ vivọjlado tọn mẹ sẹpọ owhé etọn titi. 24 Bọdo ewọ go, Binnui visunnu Henadadi tọn vọ́ adà devo jlado, sọn owhé Azalia tọn kọ̀n kaka yì Azò lọ ji+ podọ yì agosu lọ mẹ.

25 Bọdo ewọ go, Palali visunnu Uzai tọn tindo mahẹ to azọ́n adó lọ vivọjlado tọn mẹ sọn Azò lọ ji po atọ̀họ̀ he tọ́n sọn Owhé Ahọlu tọn gbè*+ po nukọn, yèdọ aga tọn lọ he to apá na Awánu Nuhọ́tọ lẹ tọn.+ Bọdo ewọ go wẹ Pedaia visunnu Paloṣi tọn te.+

26 Podọ devizọnwatọ tẹmpli mẹ tọn lẹ*+ he nọ nọ̀ Ofẹli+ tindo mahẹ to azọ́n adó lọ vivọjlado tọn mẹ kaka yì Họngbo Osin tọn+ nukọn to whèzẹtẹn gọna atọ̀họ̀ he tọ́nta lọ nukọn.

27 Bọdo yewlẹ go, Tekoanu+ lẹ vọ́ adà devo jlado, sọn atọ̀họ̀ daho he tọ́nta lọ nukọn kaka yì adó Ofẹli tọn kọ̀n.

28 Yẹwhenọ lẹ tindo mahẹ to azọ́n adó lọ vivọjlado tọn mẹ to aga Họngbo Osọ́ tọn+ lọ tọn, yèdọ mẹdopodopo to owhé etọn titi nukọn.

29 Bọdo yewlẹ go, Zadọki+ visunnu Imẹli tọn tindo mahẹ to azọ́n adó lọ vivọjlado tọn mẹ to owhé etọn titi nukọn.

Podọ bọdo ewọ go, Ṣemaia visunnu Ṣekania tọn he yin họ̀njinọtọ Họngbo Whèzẹtẹn tọn+ lọ tọn tindo mahẹ to azọ́n adó lọ vivọjlado tọn mẹ.

30 Bọdo ewọ go, Hanania visunnu Ṣelemia tọn po Hanuni visunnu ṣidopotọ Zalafi tọn po vọ́ adà devo jlado.

Bọdo ewọ go, Meṣulami+ visunnu Belekia tọn tindo mahẹ to azọ́n adó lọ vivọjlado tọn mẹ to ohọ̀ etọn titi nukọn.

31 Bọdo ewọ go, Malkija he yin hagbẹ ogbẹ́ ayátọ sika tọn lẹ tọn de, tindo mahẹ to azọ́n adó lọ vivọjlado tọn mẹ kaka yì owhé devizọnwatọ tẹmpli mẹ tọn lẹ*+ po ajọwatọ lẹ po tọn kọ̀n, to Họngbo Dlapọn tọn nukọn kakajẹ họta abò agosu mẹ tọn lọ tọn kọ̀n.

32 Podọ to họta abò agosu mẹ tọn lọ tọn po Họngbo Lẹngbọ lẹ tọn+ po ṣẹnṣẹn, ayátọ sika tọn lẹ po ajọwatọ lẹ po tindo mahẹ to azọ́n adó lọ vivọjlado tọn mẹ.

4 Todin, tlolo he Sanbalati+ sè dọ mí to adó lọ vọ́ do, homẹgble e bọ e jẹ adidu ji bo to Ju lẹ vlẹko mapote. 2 Ewọ sọ dọ to nọvisunnu etọn lẹ po awhànpa Samalia tọn po nukọn dọmọ: “Etẹwẹ Ju madogánnọ ehelẹ to wiwà? Be yé na penugo nado wà ehe yedeṣo wẹ ya? Be yé na basi avọ́sinsan lẹ wẹ ya? Be yé na fó e to gbèdopo wẹ ya? Be yé na wleawuna zannu he yọ́n-na-yizan lẹ sọn okiti gbakija tọn lẹ mẹ wẹ ya?”+

3 Todin, Tobia+ Amọninu+ lọ he ṣite to apá na ẹn dọmọ: “Eyin owọ̀ tata hẹ adó zannu tọn he do yé te ji, e na họ́ ẹ liai.”

4 Jiwheyẹwhe mítọn E, sè bo hẹn vlẹko yetọn gọwá ota yetọn titi ji+ bosọ jo yé do nado yin bibẹ yì aigba kanlinmọgbenu tọn ji taidi ogblànnu, na yé to nuyiwa hẹ mí po wangbẹna po wutu.+ 5 A ṣinyọnnudo whẹhuhu yetọn blo kavi a dike ylando yetọn yin súnsúnsún sẹ̀ sọn nukọn towe blo,+ na yé ko zun họ̀dotọ lọ lẹ wutu.

6 Enẹwutu, mí zindonukọn nado to adó lọ do bo pé adó lọ pete dopọ lẹdo pé, bọ adó lọ yin dido yiaga jẹ odaa, gbẹtọ lọ lẹ sọ zindonukọn bo to ahundopo yí do to azọ́n lọ wà.

7 Todin, tlolo he Sanbalati, Tobia,+ Alabianu+ lẹ, Amọninu lẹ po Aṣidọdinu+ lẹ po sè dọ azọ́n adó Jelusalẹm tọn lẹ vivọjlado tọn to nukọnzindo bọ fie nùvo te lẹ jẹ yinyin súsú ji, yé gblehomẹ tlala. 8 Yé blasé nado zọnpọ wá hoavùn hẹ Jelusalẹm bosọ fọ́n hunyanhunyan dote to e mẹ. 9 Ṣigba, mí hodẹ̀ hlan Jiwheyẹwhe mítọn bo nọ de nuhọ́tọ de do finẹ to okle po ozán po nado nọ basi hihọ́na mí sọn yé si.

10 Amọ́, omẹ Juda tọn lẹ to didọmọ: “Huhlọn azọ́nwatọ* lẹ tọn ko depò, bọ zannu gbigbà lẹ gbẹ́ pò susu; mí ma na penugo nado do adó lọ gbede.”

11 Kẹntọ mítọn lẹ sọ nọ to didọmọ: “Whẹpo yé nado yọnẹn kavi mọ mí, mí na ko wá ṣẹnṣẹn yetọn bo na hù yé bosọ doalọtena azọ́n lọ.”

12 Whedepopenu he Ju he nọ nọ̀ lẹdo yetọn mẹ lẹ wá, yé nọ to didọna mí mapote* dọmọ: “Awà lẹpo ji wẹ yé na wá mí ji sọn.”

13 Enẹwutu, n’de sunnu nuhọ́tọ lẹ do awà he yìdo hugan to adó lọ godo to fie to owù mẹ lẹ bo de yé do finẹ sọgbe hẹ whẹndo yetọn lẹ bọ ohí, owhán po ogá yetọn lẹ po to yé si. 14 To whenue n’mọdọ yé to budi, n’fọ́n to afọdopolọji bo dọna omẹ nukundeji lẹ,+ ogán nukunpedonugotọ lẹ po mẹhe pò lẹpo po dọmọ: “Mì dibuna yé blo.+ Mì flin Jehovah, yèdọ mẹhe klo bo dobu lọ;+ podọ mì hoavùn na nọvisunnu mìtọn lẹ, gọna visunnu po viyọnnu mìtọn lẹ po, asi po owhé mìtọn lẹ po.”

15 Todin, to whenue kẹntọ mítọn lẹ sè dọ mí ko yọ́n sébibla yetọn podọ dọ Jiwheyẹwhe nugbo lọ ko hẹn tito yetọn gble, mímẹpo lẹkọyi azọ́n adó lọ dido tọn kọ̀n. 16 Sọn gbenẹgbe sọyi, mado-awe to sunnu ṣie lẹ mẹ nọ to azọ́nwa+ bọ mado-awe he pò nọ hẹn owhán, awọ̀yinu, ogá po gbaja lẹ po. Ahọvi+ lẹ sọ nọgodona owhé Juda tọn pete 17 he to adó lọ do. Mẹhe to agbàn bẹ lẹ nọ yí alọ dopo do to azọ́nwa bọ adánwanu* nọ to alọ diẹ mẹ. 18 Podọ họ̀dotọ dopodopo nọ sìn ohí etọn do alinkàn dile e to azọ́nwa, bọ mẹhe na kún opẹ̀n+ lọ ṣite to apá ṣie.

19 Whenẹnu wẹ n’dọna omẹ nukundeji lẹ, ogán nukunpedonugotọ lẹ po mẹhe pò lẹ po dọmọ: “Azọ́n lọ sù bo gbloada, bọ míwlẹ sọ gbàpe gbọn adó lọ kọ̀n bo dẹn do ode awetọ. 20 Eyin mì sè nudidọ azò lọ tọn, mì pli dopọ do fie mí tin te. Jiwheyẹwhe mítọn na hoavùn na mí.”+

21 Enẹwutu, mí nọ to azọ́nwa madoalọte bọ mado-awe he pò lẹ nọ hẹn owhán lẹ, sọn whenue ai họ́n kakajẹ whenue sunwhlẹvu lẹ tọ́n. 22 Whenẹnu wẹ n’dọna mẹlọ lẹ dọmọ: “Mì gbọ sunnu lẹ dopodopo, to pọmẹ hẹ devizọnwatọ yetọn, ni nọ dọ́ Jelusalẹm, yé nasọ nọ họ́ mí to zánmẹ bo na nọ wazọ́n to okle.” 23 Enẹwutu, yẹn, nọvisunnu ṣie lẹ, devizọnwatọ ṣie lẹ+ po nuhọ́tọ he hodo mi lẹ po ma de awù mítọn lẹ gbede, podọ dopodopo mítọn wẹ hẹn adánwanu to adusilọ mẹ.

5 Ṣigba, gbẹtọ lọ lẹ po asi yetọn lẹ po jẹ lewu ji sinsinyẹn gando nọvisunnu yetọn Ju lẹ go.+ 2 Mẹdelẹ to didọmọ: “Míwlẹ, visunnu mítọn lẹ po viyọnnu mítọn lẹ po sù. Mí dona mọ jinukun he mí sọgan dù nado nọgbẹ̀.” 3 Mẹdevo lẹ to didọmọ: “Míwlẹ to ogle, vẹngle po owhé mítọn lẹ po zejo taidi afàsúnú nado mọ jinukun yí to núdùdù whèdomẹ whenu.” 4 Mẹdevo lẹ sọ to didọmọ: “Mí ko yí ogle po vẹngle mítọn lẹ po do yàn akuẹ nado sú takuẹ ahọlu tọn.+ 5 Todin, agbasalan po ohùn dopolọ po wẹ míwlẹ yin hẹ nọvisunnu mítọn lẹ,* podọ ovi mítọn lẹ taidi ovi yetọn lẹ; ṣogan mí to dandannu glọ nado hẹn visunnu po viyọnnu mítọn lẹ po zun afanumẹ, podọ delẹ to viyọnnu mítọn lẹ mẹ tlẹ ko lẹzun afanumẹ.+ Ṣigba, mí ma sọgan doalọtena ehe, na ogle po vẹngle mítọn lẹ po ko lẹzun mẹdevo lẹ tọn.”

6 Homẹgble mi tlala to whenue n’sè lewuwu po hogbe yetọn ehelẹ po. 7 Enẹwutu, n’lẹnnupọndo onú ehelẹ ji to ahun ṣie mẹ bo gblewhẹdo omẹ nukundeji po ogán nukunpedonugotọ lẹ po bo dọna yé dọmọ: “Dopodopo mìtọn nọ to ale* biọ sọn nọvisunnu etọn titi si.”+

Humọ, n’ylọ plidopọ daho de, na yewlẹ tọn wutu. 8 Podọ n’dọna yé dọmọ: “Mí ko fli nọvisunnu mítọn Ju he yin sisà na akọta lẹ gọ̀ jẹ obá de mẹ; ṣigba todin, be mìwlẹ na sà nọvisunnu mìtọn titi lẹ+ bọ yé nasọ wá yin vivọ́ sà na mí wẹ ya?” Yé masọ kẹnù, na nude ma tin he yé sọgan gblọn. 9 To whenẹnu, n’dọmọ: “Nuhe wà mì te ma yọ́n. Be e ma jẹ dọ mìwlẹ ni nọ zinzọnlin to budisi Jiwheyẹwhe mẹ,+ na akọta he yin kẹntọ mítọn lẹ nikaa vlẹ mí kò ya? 10 Humọ, yẹn, nọvisunnu ṣie lẹ po devizọnwatọ ṣie lẹ po nọ yàn akuẹ po jinukun po na yé. Mì jaale, mì gbọ mí ni ma nọ yàn nude namẹ bo donukun ale ba blo.+ 11 Mì jaale bo gọ̀ ogle,+ vẹngle, olivie-gle po owhé yetọn lẹ po jo na yé to egbé, bosọ gọ̀ mado kanweko* akuẹ, jinukun, ovẹn yọyọ po amì po tọn he mì to yíyí to yé si taidi ale lẹ jo na yé.”

12 Yé sọ gblọn dọmọ: “Mí na gọ̀ onú ehelẹ jo na yé bo ma na biọ nudepope sọn yé si. Míwlẹ na wà pẹpẹ dile a dọ do.” Enẹwutu, n’ylọ yẹwhenọ lẹ bo hẹn sunnu enẹlẹ nado whlé dọ yé na depà ehe. 13 N’sọ húnhún yinyẹ́n awù ṣie tọn* bo dọmọ: “Aliho ehe mẹ wẹ Jiwheyẹwhe nugbo lọ na húnhún sunnu depope he ma depà etọn sẹ̀ sọn owhé etọn gbè podọ sọn nutindo etọn lẹ kọ̀n te, bọ ewọ na yin húnhúnhún sẹ̀ to aliho ehe mẹ bo na yin hinhẹn jẹvọ́.” Agun lọ pete sọ gblọn dọmọ: “Niṣẹ!”* Podọ yé pagigona Jehovah bọ mẹlọ lẹ sọ wà dile yé ko dopà etọn do.

14 Humọ, sọn gbeegbe Ahọlu Altakẹlikesi deazọ́nna mi nado yin ayimatẹn-gán yetọn+ to aigba Juda tọn ji, sọn owhe 20tọ+ jẹ 32tọ+ gandudu etọn+ tọn mẹ, yèdọ to owhe 12 gblamẹ, yẹn kavi nọvisunnu ṣie lẹ ma nọ dù núdùdù he ayimatẹn-gán tindo jlọjẹ na.+ 15 Ṣigba, ayimatẹn-gán he jẹnukọnna mi lẹ ko doagban pinpẹn na mẹlọ lẹ bo nọ yí ṣekẹli* fataka tọn 40 sọn yé si na akla po ovẹn po egbesọegbesọ. Podọ devizọnwatọ yetọn lẹ ko gbidikọna mẹlọ lẹ. Ṣigba, yẹn ma wàmọ,+ na n’dibusi Jiwheyẹwhe wutu.+

16 Humọ, n’tindo mahẹ to azọ́n adó lọ vivọjlado tọn mẹ, mí masọ họ̀ ogle dopo tata;+ devizọnwatọ ṣie lẹpo wẹ pli do finẹ na azọ́n lọ. 17 Ju po ogán nukunpedonugotọ 150 po wẹ nọ dùnú to tafo ṣie kọ̀n, gọna mẹhe wá mí dè sọn akọta lẹ mẹ lẹ. 18 Oyìnsú dopo, lẹngbọ dagbedagbe ṣidopo po ohẹ̀ lẹ po wẹ nọ yin awú etọn wle na mi* egbesọegbesọ, podọ whladopo to azán ao gblamẹ, ovẹn wunmẹwunmẹ lẹpo wẹ nọ tin susugege. Mahopọnna ehe lẹpo, n’ma nọ biọ núdùdù he dona yin nina ayimatẹn-gán, na sinsẹ̀nzọn mẹlọ lẹ tọn ko yin agbàn pinpẹn na yé wutu. 19 Jiwheyẹwhe ṣie E, flin mi to aliho dagbe mẹ,* na nuhe n’ko wà do omẹ ehelẹ tamẹ lẹpo wutu.+

6 Tlolo he Sanbalati, Tobia,+ Geṣẹmi Alabianu+ lọ po kẹntọ mítọn he pò lẹ po sè dọ n’ko vọ́ adó lọ do+ bọ nùvo depope ma pò to e mẹ ba (dile etlẹ yindọ kakajẹ whenẹnu, n’ma ko do ohọ̀n lẹ do họngbo lọ lẹ nù),+ 2 Sanbalati po Geṣẹmi po dowẹn ehe hlan mi to afọdopolọji dọmọ: “Wá bo dike mí ni de ojlẹ de nado pé to gbétatò he to Dankló Ono+ tọn ji lẹ mẹ.” Ṣigba, ayiha kàn wẹ yé te nado wà danú do mi. 3 Enẹwutu, n’do wẹnsagun lẹ hlan yé dọmọ: “Azọ́n daho de wà wẹ n’te, n’ma nasọ penugo nado jẹte wá. Naegbọn n’nado wá mì dè bọ azọ́n lọ nado doalọte?” 4 Whla ẹnẹ wẹ yé dowẹn dopolọ hlan mi bọ n’sọ na yé gblọndo dopolọ.

5 Enẹgodo, Sanbalati do devizọnwatọ etọn hlan mi po owẹ̀n dopolọ po whla atọ́ntọ, bọ e hẹn wekanhlanmẹ he to nùvo de to alọmẹ. 6 Nuhe yin kinkan do e mẹ die: “E ko yin sisè to akọta lẹ mẹ, bọ Geṣẹmi+ lọsu to didọ ẹ, dọ ayiha kàn wẹ hiẹ po Ju lẹ po te nado ṣiatẹ.+ Enẹ wẹ zọ́n bọ hiẹ do to adó lọ do; podọ sọgbe hẹ linlin ehelẹ, hiẹ jlo na lẹzun ahọlu yetọn. 7 Humọ, a ko de yẹwhegán lẹ nado lá gando dewe go gbọn Jelusalẹm pé dọ, ‘Ahọlu de tin to Juda!’ Todin, ahọlu na wá sè onú ehelẹ. Enẹwutu, wá bo gbọ mí ni dọhodopọ do ehe ji.”

8 Ṣigba, yẹn do gblọndo ehe hlan ẹn dọmọ: “Dopo tata to nuhe a to didọ lẹ mẹ ma yin nugbo; hiẹ lọsu wẹ to yé pà dọ sọn tamẹ.”* 9 Na yemẹpo wẹ to tintẹnpọn nado gbàhundona mí dọmọ: “Alọ yetọn lẹ na kuyẹ̀ to azọ́n lọ kọ̀n bọ e ma na yin wiwà.”+ Todin, n’to dẹ̀ho, hẹn alọ ṣie lẹ lodo.+

10 Enẹgodo, n’yì owhé Ṣemaia visunnu Delaia tọn visunnu Mẹhetabeli tọn gbè to whenue ewọ yin ginglọndo finẹ. Ewọ sọ dọmọ: “Gbọ mí ni de ojlẹ de nado pé to ohọ̀ Jiwheyẹwhe nugbo lọ tọn mẹ, yèdọ to tẹmpli mẹ bo dike mí ni sú ohọ̀n tẹmpli lọ tọn lẹ, na yé ja nado wá hù we. Yé ja nado wá hù we to zánmẹ.” 11 Ṣigba, n’dọmọ: “Be sunnu taidi yẹn nkọ na họ̀n wẹ ya? Be sunnu taidi yẹn nkọ na yì tẹmpli mẹ bo gán wẹ ya?+ Yẹn ma na yì!” 12 Whenẹnu wẹ n’doayi e go dọ e ma yin Jiwheyẹwhe wẹ do e hlan, ṣigba dọ Tobia po Sanbalati po+ wẹ haya ẹ nado dọ dọdai ehe sọta mi. 13 Ewọ yin hihaya nado gbàhundona mi bo hẹn mi nado waylando, na yé nido tindo whẹwhinwhẹ́n lẹ nado kọnmasin do go e nado sọgan gblewhẹdo mi.

14 Jiwheyẹwhe ṣie E, flin Tobia+ po Sanbalati po gọna walọ yetọn ehelẹ podọ flin Noadia yẹwhegán-yọnnu lọ po yẹwhegán he pò bo to tintẹnpọn nado gbàhundona mi mapote lẹ po ga.

15 Enẹwutu, adó lọ yin tadona to azán 25tọ Eluli* tọn gbè, yèdọ to azán 52 gblamẹ.

16 Tlolo he kẹntọ mítọn lẹpo sè ehe bọ akọta he lẹdo mí pé lẹpo mọ ẹn, winyan hù yé tlala*+ bọ yé mọdọ Jiwheyẹwhe mítọn wẹ gọalọna mí bọ azọ́n ehe do yin wiwà. 17 To ojlẹ enẹ mẹ, omẹ nukundeji+ Juda tọn lẹ nọ to wekanhlanmẹ dohlan Tobia mapote bọ Tobia sọ nọ to gblọndo etọn dohlan yé. 18 Mẹsusu to Juda whlé nado yin nugbonọ na ẹn, na ovisu Ṣekania visunnu Alahi+ tọn wẹ e yin, podọ visunnu etọn Jehohanani ko dà viyọnnu Meṣulami+ visunnu Belekia tọn. 19 Humọ, yé nọ to dagbe etọn dọna mi mapote bo nọ to linlin nuhe n’gblọn lẹ tọn na ẹn. Enẹgodo, Tobia nọ do wekanhlanmẹ lẹ hlan nado gbàhundona mi.+

7 Tlolo he adó lọ ko yin vivọ́ do,+ n’do ohọ̀n lẹ;+ enẹgodo họ̀njinọtọ lẹ,+ hànjitọ lẹ+ po Levinu lẹ+ po yin dide. 2 Whenẹnu wẹ n’de nọvisunnu ṣie Hanani+ taidi nukọntọ to Jelusalẹm, to pọmẹ hẹ Hanania ogán Figángán+ lọ tọn, na ewọ yin sunnu dejidego de bosọ nọ dibusi Jiwheyẹwhe nugbo lọ+ hú mẹsusu devo lẹ. 3 N’sọ dọna yé dọmọ: “Họngbo Jelusalẹm tọn lẹ ma dona nọ yin hùnhùn kakajẹ owhè ṣádada mẹ, podọ to whenue họ̀njinọtọ lọ lẹ to ote to hihọ́tẹn yetọn, yé dona nọ sú ohọ̀n lọ lẹ bo dogàn yé ji. Mì sọ de nuhọ́tọ lẹ to mẹhe nọ nọ̀ Jelusalẹm lẹ mẹ, mẹdopodopo do hihọ́tẹn etọn podọ mẹdopodopo do owhé etọn titi nukọn.” 4 Todin, tòdaho lọ gblo bosọ klo taun, amọ́ gbẹtọ vude wẹ tin to e mẹ,+ podọ ohọ̀ lẹ ma ko yin vivọgbá.

5 Ṣigba, Jiwheyẹwhe ṣie yí do ahun ṣie mẹ nado bẹ omẹ nukundeji lẹ, ogán nukunpedonugotọ lẹ po mẹlọ lẹ po pli dopọ nado yin titodohukanji sọgbe hẹ kúnkan yetọn lẹ.+ Whenẹnu wẹ n’mọ owe he mẹ todohukanji kúnkan mẹhe hẹji wá jẹnukọn lẹ tọn tin te, podọ nuhe n’mọ to e mẹ die:

6 Podọ ehelẹ wẹ mẹhe tin to agbegbe* lọ mẹ bo hẹji yì sọn kanlinmọ he tin to kanlinmọgbenu lọ lẹ mẹ, enẹ wẹ mẹhe Ahọlu Nẹbukadnẹzali+ Babilọni tọn ko bẹ yì kanlinmọgbenu+ bọ yé wá lẹkọyi Jelusalẹm po Juda po to godo mẹ, yèdọ mẹdopodopo yì tòdaho etọn titi mẹ,+ 7 yé mẹhe lẹkọwa hẹ Zelubabẹli,+ Jeṣua,+ Nẹhemia, Azalia, Laamia, Nahamani, Mọldekai, Bilṣani, Mispelẹti, Bigivai, Nẹhumi po Baanahi po.

Sọha Islaelivi sunnu lọ lẹ tọn die:+ 8 visunnu Paloṣi tọn lẹ, 2 172; 9 visunnu Ṣefatia tọn lẹ, 372; 10 visunnu Alahi+ tọn lẹ, 652; 11 visunnu Pahati-moabi+ tọn lẹ, sọn visunnu Jeṣua po Joabi+ po tọn lẹ mẹ, 2 818; 12 visunnu Elami+ tọn lẹ, 1 254; 13 visunnu Zatu tọn lẹ, 845; 14 visunnu Zakai tọn lẹ, 760; 15 visunnu Binnui tọn lẹ, 648; 16 visunnu Bebai tọn lẹ, 628; 17 visunnu Azgadi tọn lẹ, 2 322; 18 visunnu Adonikami tọn lẹ, 667; 19 visunnu Bigivai tọn lẹ, 2 067; 20 visunnu Adini tọn lẹ, 655; 21 visunnu Ateli tọn lẹ, sọn whédo Hẹzekia tọn mẹ, 98; 22 visunnu Haṣumi tọn lẹ, 328; 23 visunnu Bezai tọn lẹ, 324; 24 visunnu Halifi tọn lẹ, 112; 25 visunnu Gibeọni+ tọn lẹ, 95; 26 sunnu Bẹtlẹhẹm po Netofa po tọn lẹ, 188; 27 sunnu Anatọti+ tọn lẹ, 128; 28 sunnu Bẹti-azmavẹti tọn lẹ, 42; 29 sunnu Kiliati-jealimi,+ Kefila po Beẹlọti+ po tọn lẹ, 743; 30 sunnu Lama po Geba+ po tọn lẹ, 621; 31 sunnu Mikmasi+ tọn lẹ, 122; 32 sunnu Bẹtẹli+ po Ai+ po tọn lẹ, 123; 33 sunnu Nebo diẹ tọn lẹ, 52; 34 visunnu Elami diẹ tọn lẹ, 1 254; 35 visunnu Halimi tọn lẹ, 320; 36 visunnu Jẹliko tọn lẹ, 345; 37 visunnu Lọdi, Hadidi po Ono+ po tọn lẹ, 721; 38 visunnu Sena tọn lẹ, 3 930.

39 Yẹwhenọ lẹ:+ visunnu Jedaia tọn lẹ, sọn whédo Jeṣua tọn mẹ, 973; 40 visunnu Imẹli tọn lẹ, 1 052; 41 visunnu Paṣuli+ tọn lẹ, 1 247; 42 visunnu Halimi+ tọn lẹ, 1 017.

43 Levinu lẹ:+ visunnu Jeṣua tọn lẹ, sọn whédo Kadmiẹli+ tọn mẹ, sọn visunnu Hodevia tọn lẹ mẹ, 74. 44 Hànjitọ lẹ:+ visunnu Asafi+ tọn lẹ, 148. 45 Họ̀njinọtọ lẹ:+ visunnu Ṣalumi tọn lẹ, visunnu Ateli tọn lẹ, visunnu Talmọni tọn lẹ, visunnu Akubi+ tọn lẹ, visunnu Hatita tọn lẹ, visunnu Ṣobai tọn lẹ, 138.

46 Devizọnwatọ tẹmpli mẹ tọn lẹ:*+ visunnu Ziha tọn lẹ, visunnu Hasufa tọn lẹ, visunnu Tabaoti tọn lẹ, 47 visunnu Kelosi tọn lẹ, visunnu Sia tọn lẹ, visunnu Padọni tọn lẹ, 48 visunnu Lẹbana tọn lẹ, visunnu Hagaba tọn lẹ, visunnu Salmai tọn lẹ, 49 visunnu Hanan tọn lẹ, visunnu Gidẹli tọn lẹ, visunnu Gahali tọn lẹ, 50 visunnu Leaia tọn lẹ, visunnu Lezini tọn lẹ, visunnu Nekoda tọn lẹ, 51 visunnu Gazami tọn lẹ, visunnu Uzza tọn lẹ, visunnu Pasea tọn lẹ, 52 visunnu Besai tọn lẹ, visunnu Mẹunimi tọn lẹ, visunnu Nefuṣẹsimi tọn lẹ, 53 visunnu Bakibuki tọn lẹ, visunnu Hakufa tọn lẹ, visunnu Halhuli tọn lẹ, 54 visunnu Bazliti tọn lẹ, visunnu Mẹhida tọn lẹ, visunnu Halṣa tọn lẹ, 55 visunnu Balkosi tọn lẹ, visunnu Sisela tọn lẹ, visunnu Tema tọn lẹ, 56 visunnu Nezia tọn lẹ, visunnu Hatifa tọn lẹ.

57 Visunnu devizọnwatọ Sọlomọni tọn lẹ tọn:+ visunnu Sotai tọn lẹ, visunnu Sofelẹti tọn lẹ, visunnu Pelida tọn lẹ, 58 visunnu Jaala tọn lẹ, visunnu Dalkọni tọn lẹ, visunnu Gidẹli tọn lẹ, 59 visunnu Ṣefatia tọn lẹ, visunnu Hatili tọn lẹ, visunnu Pọkeleti-hazebaimi tọn lẹ, visunnu Amọni tọn lẹ. 60 Devizọnwatọ tẹmpli mẹ tọn lẹ*+ gọna visunnu devizọnwatọ Sọlomọni tọn lẹ tọn lẹpo yin 392.

61 Podọ mẹhe bọdego ehelẹ wẹ hẹji wá sọn Tẹli-mela, Tẹli-halṣa, Kelubimi, Adoni po Imẹli po, ṣigba yé ma penugo nado yọ́n whédo otọ́ yetọn tọn po fie yé wá sọn po, vlavo eyin Islaelivi lẹ wẹ yé yin kavi lala:+ 62 visunnu Delaia tọn lẹ, visunnu Tobia tọn lẹ, visunnu Nekoda tọn lẹ 642. 63 Podọ sọn yẹwhenọ lẹ mẹ: visunnu Habaia tọn lẹ, visunnu Hakọzi+ tọn lẹ, visunnu Balzilai tọn lẹ, mẹhe dà asi sọn viyọnnu Balzilai+ Giliadinu lọ tọn lẹ mẹ bo nọ yin yiylọ gbọn oyín yetọn dali. 64 Omẹ ehelẹ dín kandai yetọn lẹ nado yọ́n kúnkan whẹndo tọn yetọn, ṣigba yé ma mọ kandai lọ lẹ, enẹwutu yé yin didesẹ sọn yẹwhenọduta mẹ.*+ 65 Ayimatẹn-gán*+ lọ dọna yé dọ yé ma dona dù sọn onú wiwe gbaugbau lẹ mẹ+ kaka yẹwhenọ de nado tin he sọgan dindona gbọn Ulimi po Tumimi* po gblamẹ.+

66 Lẹndopọ sọha agun pipli lọ blebu tọn wẹ 42 360,+ 67 gbọnvona afanumẹ sunnu po afanumẹ yọnnu yetọn lẹ po,+ he yin 7 337; yé sọ tindo hànjitọ sunnu po yọnnu po 245.+ 68 Osọ́ yetọn lẹ yin 736, otlò* yetọn lẹ yin 245, 69 kanklosọ́ yetọn lẹ yin 435, kẹtẹkẹtẹ yetọn lẹ yin 6 720.

70 Delẹ to nukọntọ whédo otọ́ lẹ tọn mẹ basi nunina nado nọgodona azọ́n lọ.+ Ayimatẹn-gán* lọ basi nunina dlakma sika tọn* 1 000, agbán 50 po tewu yẹwhenọ tọn 530 po tọn do adọkunnu sẹdotẹn lọ mẹ.+ 71 Podọ delẹ to nukọntọ whédo otọ́ lẹ tọn mẹ basi nunina lẹ do adọkunnu sẹdotẹn lọ mẹ nado nọgodona azọ́n lọ, enẹ wẹ dlakma sika tọn 20 000 po mina fataka tọn* 2 200 po. 72 Podọ mẹhe pò lẹ basi nunina dlakma sika tọn 20 000 tọn, gọna mina fataka tọn 2 000 po tewu yẹwhenọ tọn 67 po.

73 Podọ yẹwhenọ lẹ, Levinu lẹ, họ̀njinọtọ lẹ, hànjitọ lẹ,+ delẹ sọn gbẹtọ lọ lẹ mẹ, devizọnwatọ tẹmpli mẹ tọn lẹ* po Islaelivi he pò lẹpo* po nọ nọ̀ tòdaho yetọn lẹ mẹ.+ To whenue osun ṣinawetọ bẹjẹeji,+ Islaelivi lẹ ko nọ nọ̀ tòdaho yetọn lẹ mẹ.+

8 Enẹgodo, mẹlọ lẹpo bẹ yede pli dopọ do tòplitẹn to Họngbo Osin tọn+ nukọn bo dọna Ẹzla+ vọkan-basitọ* lọ nado hẹn owe Osẹ́n Mose tọn,+ he Jehovah ko degbe etọn na Islaeli lọ wá.+ 2 Enẹwutu, Ẹzla yẹwhenọ lọ hẹn owe Osẹ́n lọ tọn wá agun pipli lọ nukọn,+ yèdọ agun pipli he bẹ sunnu lẹ, yọnnu lẹ po mẹhe sọgan dotoai bo mọnukunnujẹnumẹ lẹpo po hẹn, to azán tintan osun ṣinawetọ tọn gbè.+ 3 E sọ hia ẹ+ po ogbè lélé po na sunnu lẹ, yọnnu lẹ po mẹhe sọgan mọnukunnujẹnumẹ lẹpo po to tòplitẹn Họngbo Osin tọn lọ tọn nukọn, sọn afọnnu fliflimẹ kakajẹ owhè ṣádada mẹ; mẹlọ lẹ sọ yí sọwhiwhe do dotoaina+ owe Osẹ́n tọn lọ. 4 Ẹzla vọkan-basitọ* lọ sọ ṣite to oplò owhlẹ tọn he yin awuwlena na opli lọ ji; Matitia, Ṣema, Anaia, Ulia, Hilkia po Maaseia po sọ ṣite to apá na ẹn to adusiwhé; podọ Pedaia, Miṣaẹli, Malkija,+ Haṣumi, Haṣ-badana, Zekalia po Meṣulami po ṣite to amiyọnwhé na ẹn.

5 Ẹzla hùn owe lọ to mẹlọ lẹpo sin nukunmẹ, na fie e ṣite te yiaga hú yemẹpo. To whenue e hùn in, mẹlọ lẹpo fọnṣite. 6 To whenẹnu, Ẹzla pagigona Jehovah Jiwheyẹwhe nugbo lọ, yèdọ Mẹlọ he klohugan bọ gbẹtọ lọ lẹpo gblọn dọ, “Niṣẹ!* Niṣẹ!”+ bo dlẹnalọ yetọn lẹ daga. Enẹgodo, yé dẹ́ yìdo bo litai bosọ ṣinyọ́n nukunmẹ ai to Jehovah nukọn. 7 Podọ Jeṣua, Bani, Ṣelebia,+ Jamini, Akubi, Ṣabetai, Hodia, Maaseia, Kelita, Azalia, Jozabadi,+ Hanan po Pelaia po he yin Levinu lẹ to zẹẹmẹ Osẹ́n lọ tọn basi na gbẹtọ lọ lẹ+ bọ mẹlọ lẹ gbọṣi ote. 8 Yé sọ zindonukọn bo to owe lọ, enẹ wẹ Osẹ́n Jiwheyẹwhe nugbo lọ tọn hia bosọ to zẹẹmẹ basi do e ji bo nọ hẹn ẹn họnwun; yé gbọnmọ dali gọalọna mẹlọ lẹ nado mọnukunnujẹ nuhe to yinyin hihia lọ mẹ.*+

9 Nẹhemia, he yin ayimatẹn-gán* lọ to whenẹnu, Ẹzla+ yẹwhenọ podọ vọkan-basitọ* lọ, gọna Levinu lẹ he to mẹlọ lẹ plọn dọna gbẹtọ lọ lẹpo dọmọ: “Azán wiwe de wẹ ehe yin na Jehovah Jiwheyẹwhe mìtọn.+ Mì nọ aluẹmẹ kavi viavi blo.” Na mẹlọ lẹpo wẹ to avivi to whenue yé sè ohó Osẹ́n lọ tọn lẹ. 10 E dọna yé dọmọ: “Mì yì bo dù onú dagbedagbe* lẹ bosọ nù onú vivi lẹ, mì sọ do mimá núdùdù tọn lẹ hlan+ mẹhe ma wleawuna nude lẹ; na azán wiwe de wẹ ehe yin na Oklunọ mítọn, mì sọ blawu blo, na ayajẹ Jehovah tọn wẹ figángán* mìtọn.” 11 Levinu lẹ sọ to mẹlọ lẹpo vẹ̀ dọmọ: “Mì nabọẹ! na azán wiwe de wẹ azán egbé tọn yin, mì sọ blawu blo.” 12 Enẹwutu, mẹlọ lẹpo dedo nado dù bo nù bosọ do mimá núdùdù tọn lẹ hlan mẹdevo lẹ, yé sọ to aglinjẹ mapote,+ na yé mọnukunnujẹ ohó he ko yin lilá na yé lẹ mẹ wutu.+

13 To azán awetọ gbè, nukọntọ whédo otọ́ lẹ tọn lẹpo, yẹwhenọ lẹ po Levinu lẹ po bẹ yede pli lẹdo Ẹzla vọkan-basitọ* lọ nado mọnukunnujẹ ohó Osẹ́n lọ tọn lẹ mẹ dogọ. 14 Whenẹnu wẹ yé mọdọ e ko yin kinkan do Osẹ́n lọ mẹ dọ Jehovah ko degbena Mose dọ Islaelivi lẹ dona nọ nọ̀ gòhọtúntún* lẹ mẹ to hùnwhẹ lọ whenu to osun ṣinawetọ mẹ,+ 15 podọ yé dona basi nulila de+ bo lá gbọn tòdaho yetọn lẹpo po Jelusalẹm pete po mẹ dọmọ: “Mì tọ́nyi lẹdo osó tọn lẹ mẹ bo hẹn atinlà he tindo amà lẹ wá sọn atin olivie tọn, atin amìnọ, atin mitile tọn po odétin lẹ po ji, gọna atinlà he tindo amà lẹ sọn atin devo lẹ ji nado basi gòhọtúntún lẹ, sọgbe hẹ nuhe yin kinkandai.”

16 Enẹwutu, mẹlọ lẹ tọ́nyi bo hẹn atinlà lọ lẹ wá nado basi gòhọtúntún lẹ na yede, yèdọ mẹdopodopo do ohọ̀ etọn ta, podọ do awánu yetọn lẹ mẹ, do awánu ohọ̀ Jiwheyẹwhe nugbo lọ tọn lẹ mẹ,+ do tòplitẹn Họngbo Osin tọn lọ tọn,+ podọ do tòplitẹn Họngbo Eflaimi tọn.+ 17 Gbọnmọ dali, mẹhe wá sọn kanlinmọgbenu bo tin to gbẹtọgun lọ mẹ lẹpo basi gòhọtúntún lẹ bo nọ nọ̀ gòhọtúntún lẹ mẹ, na Islaelivi lẹ ma ko basi hùnwhẹ lọ to aliho ehe mẹ sọn azán Jọṣua+ visunnu Nuni tọn gbè kakajẹ azán ehe gbè, sọmọ bọ ehe yin aglinjijẹ daho de.+ 18 Podọ adà de nọ yin hihia sọn owe Osẹ́n Jiwheyẹwhe nugbo lọ tọn mẹ egbesọegbesọ,+ sọn azán tintan gbè jẹ azán godo tọn gbè. Yé sọ basi hùnwhẹ lọ na azán ṣinawe, bọ opli vonọtaun de yin bibasi to azán ṣinatọ̀ntọ gbè, sọgbe hẹ nubiọtomẹsi lọ.+

9 To azán 24tọ osun ehe tọn gbè, Islaelivi lẹ pli dopọ; yé to nùbla to odẹ́vọ̀ mẹ bo húnhún afín do ota.+ 2 To whenẹnu, mẹhe wá sọn kúnkan Islaeli tọn mẹ lẹ klan yede dovo na jonọ lẹpo,+ yé sọ ṣite bo yigbe ylando yetọn titi lẹ po nuṣiwa otọ́ yetọn lẹ po tọn.+ 3 Enẹgodo, yé fọnṣite to otẹn yetọn mẹ bo yí ogbè lélé do hia owe Osẹ́n+ Jehovah Jiwheyẹwhe yetọn tọn na mado-ẹnẹ azán lọ tọn;* podọ yé sọ to gbeyina ylando lẹ bo to didẹ́ do odò to Jehovah Jiwheyẹwhe yetọn nukọn na mado-ẹnẹ azán lọ tọn devo.

4 Jeṣua, Bani, Kadmiẹli, Ṣebania, Bunni, Ṣelebia,+ Bani po Kẹnani po ṣite to oplò Levinu lẹ tọn he yiji lọ ji+ bosọ yí ogbè lélé do dawhá hlan Jehovah Jiwheyẹwhe yetọn. 5 Jeṣua, Kadmiẹli, Bani, Haṣabneia, Ṣelebia, Hodia, Ṣebania po Petahia po he yin Levinu lẹ sọ dọmọ: “Mì fọ́n bo pà Jehovah Jiwheyẹwhe mìtọn kaka sọyi mavọmavọ.*+ Podọ Jiwheyẹwhe E, dike yé ni pà oyín gigonọ towe, he yiaga hú dona po pipà lẹpo po.

6 “Hiẹ dopo kẹdẹ wẹ Jehovah;+ hiẹ wẹ basi olọn, mọwẹ, olọn olọn lẹ tọn po awhànpa yetọn lẹpo po, aigba po nuhe tin to e ji lẹpo po, gọna ohù lẹ po nuhe tin to yé mẹ lẹpo po. Hiẹ wẹ sọ hẹn yemẹpo dogbẹ̀ bọ awhànpa olọn tọn to didẹ́ do odò na we. 7 Hiẹ wẹ Jehovah, Jiwheyẹwhe nugbo lọ, he de Ablam+ bo plan ẹn tọ́n sọn Uli+ Kaldeanu lẹ tọn bosọ na ẹn oyín lọ, Ablaham.+ 8 Hiẹ mọdọ ahun etọn yin nugbonọ to nukọn towe,+ enẹwutu a basi alẹnu de hẹ ẹ nado na ẹn aigba Kenaninu lẹ, Hetinu lẹ, Amolinu lẹ, Pelizinu lẹ, Jẹbusinu lẹ, po Gilgaṣinu lẹ po tọn, nado yí i na kúnkan* etọn;+ hiẹ sọ hẹn opagbe towe lẹ di, na dodonọ wẹ hiẹ.

9 “Podọ hiẹ mọ yajiji tọgbo mítọn lẹ tọn to Egipti,+ hiẹ sọ sè awhágbe yetọn to Ohù Vẹẹ kọ̀n. 10 Whenẹnu, hiẹ basi ohia po azọ́njiawu lẹ po sọta Falo, devizọnwatọ etọn lẹpo po mẹhe nọ nọ̀ aigba etọn ji lẹpo po,+ na hiẹ yọnẹn dọ sakla wẹ yé yí do yinuwa hẹ yé.+ Hiẹ basi oyín de na dewe, ehe gbọṣi aimẹ kakajẹ egbé.+ 11 Hiẹ sọ má ohù to nukọn yetọn bọ yé jugbọn ohù lọ mẹ luntọ́n to aigba húhú ji,+ bọ hiẹ dọ̀n mẹhe dómọna yé lẹ dlan hùzànmẹ taidi zannu he yin dindlan do osin he to zingidi ji lẹ mẹ.+ 12 Hiẹ nọ yí dòtin aslọ tọn do deanana yé to okle bo nọ yí dòtin miyọ́n tọn do deanana yé to zánmẹ, nado tá hinhọ́n do aliho he yé dona gbọn ji.+ 13 Hiẹ sọ jẹte wá Osó Sinai tọn ji+ bo dọho hẹ yé sọn olọn+ bosọ na yé whẹdida dodo lẹ, osẹ́n nugbo tọn lẹ,* gọna aṣẹdai po gbedide dagbe lẹ po.+ 14 Hiẹ hẹn Gbọjẹzan+ wiwe towe zun yinyọnẹn na yé bo na yé gbedide lẹ, aṣẹdai lẹ po osẹ́n de po gbọn devizọnwatọ towe Mose gblamẹ. 15 Hiẹ na yé akla sọn olọn to whenue huvẹ hù yé+ bo hẹn osin tọ́n sọn osé mẹ to whenue nugbla hù yé,+ hiẹ sọ dọna yé nado yì bo yí aigba he hiẹ ko whlé* nado na yé taidi nutindo lọ.

16 “Ṣigba, yewlẹ, enẹ wẹ tọgbo mítọn lẹ yinuwa po sakla po+ bo lẹzun tasinyẹntọ*+ bo masọ nọ dotoaina gbedide towe lẹ. 17 Yé gbẹ́ nado dotoai,+ yé masọ flin nujiawu he a wà to ṣẹnṣẹn yetọn lẹ, ṣigba yé lẹzun tasinyẹntọ* bo de nukọntọ de nado lẹkọyi kanlinmọgbenu to Egipti.+ Ṣigba, hiẹ yin Jiwheyẹwhe de he wleawufo nado jonamẹ,* mẹhe nọ do awuvẹmẹ* po lẹblanu po hia, bo nọ whleawu nado gblehomẹ bosọ sù to owanyi nugbo* mẹ,+ hiẹ masọ gbẹ́ yé dai.+ 18 To whenue yé tlẹ basi boṣiọ kinkọ̀n oyìnvu tọn de bo jẹ didọ ji dọ, ‘Jiwheyẹwhe towe he plan we tọ́n sọn Egipti lọ die,’+ bo yinuwa po mẹmasi daho po, 19 etlẹ yin to whenẹnu, to lẹblanu daho towe mẹ, hiẹ ma gbẹ́ yé dai to danfafa ji.+ Dòtin aslọ tọn lọ he nọ deanana yé to aliho lọ ji to okle ma yì sọn yé ji, mọjanwẹ dòtin miyọ́n tọn he nọ tá hinhọ́n na yé to aliho he ji yé dona gbọn to zánmẹ lọ masọ yì do niyẹn.+ 20 Hiẹ sọ na yé gbigbọ dagbe towe nado na yé wuntuntun,+ hiẹ masọ yí manna towe sọn onù na yé,+ podọ a na yé osin to whenue nugbla hù yé.+ 21 A na yé núdùdù na owhe 40 to danfafa ji.+ Yé ma jẹdò nudepope tọn. Avọ̀ yetọn lẹ masọ ṣá,+ podọ afọ yetọn lẹ ma jí.

22 “Hiẹ na yé ahọluduta lẹ po akọta lẹ po bo má aigba yetọn do flinflin,+ bọ yewlẹ yí aigba Sihọni tọn,+ enẹ wẹ aigba ahọlu Hẹṣbọni tọn,+ gọna aigba Ogi+ ahọlu Baṣani tọn. 23 Hiẹ sọ hẹn visunnu yetọn lẹ sù taidi sunwhlẹvu olọn tọn lẹ.+ Enẹgodo, hiẹ hẹn yé wá aigba he hiẹ ko dopà etọn na tọgbo yetọn lẹ dọ yé na yì bo yí lọ ji.+ 24 Enẹwutu, visunnu yetọn lẹ yì aigba lọ ji bo yí i taidi nutindo de,+ hiẹ sọ hẹn yé nado gbawhàn Kenaninu lẹ tọn,+ enẹ wẹ mẹhe nọ nọ̀ aigba lọ ji lẹ bọ hiẹ jo yé do alọ yetọn mẹ, yèdọ ahọlu yetọn lẹ po omẹ aigba lọ tọn lẹ po, nado yinuwa hẹ yé dile e jlo yé do. 25 Podọ yé yí tòdaho gángán lẹ+ po aigba he yọ́n na jinukun* de po,+ yé sọ yí ohọ̀ he gọ́ na nudagbe wunmẹ lẹpo taidi nutindo de, gọna osindò he ko yin kùnkùn lẹ, vẹngle lẹ, olivie-gle lẹ+ po atin he nọ sẹ́n lẹ po susugege. Enẹwutu, yé dù bo gọ́ho bosọ dojó, podọ yé duvivi dagbewà susugege towe tọn.

26 “Etomọṣo, yé vẹtoli bo ṣiatẹ sọta we+ bosọ dogodo Osẹ́n towe.* Yé hù yẹwhegán towe he na avase yé nado hẹn yé lẹkọwa dè we lẹ, yé sọ yinuwa po mẹmasi daho po.+ 27 Enẹ wẹ zọ́n bọ hiẹ jo yé do alọ kẹntọ yetọn lẹ tọn mẹ,+ bọ yé nọ to awusinyẹn hẹnwa yé ji.+ Ṣigba, yé nọ dawhá hlan we to ojlẹ awusinyẹn tọn yetọn mẹ, hiẹ sọ nọ sè sọn olọn; podọ na lẹblanu daho towe wutu, a nọ na yé mẹwhlẹngántọ lẹ nado whlẹn yé sọn alọ kẹntọ yetọn lẹ tọn mẹ.+

28 “Ṣigba, tlolo he yé mọ kọgbọ, yé nọ wà nuhe ylan to nukọn towe,+ hiẹ sọ nọ jo yé do alọ kẹntọ yetọn lẹ tọn mẹ bọ yé nọ dugán do yé ji.*+ Enẹgodo, yé nọ lẹkọ bo nọ dawhá ylọ we na alọgọ,+ bọ hiẹ nọ sè sọn olọn bo nọ whlẹn yé pludopludo, na lẹblanu daho towe wutu.+ 29 Mahopọnna dọ hiẹ nọ na avase yé nado hẹn yé lẹkọwa Osẹ́n towe kọ̀n, yé yinuwa po sakla po bo gbẹ́ nado dotoaina gbedide towe lẹ;+ podọ yé waylando sọta aṣẹdai towe lẹ, ehe nọ hẹn gbẹtọ dogbẹ̀ eyin mẹlọ setonuna yé.+ Ṣigba, yé yí tasinsinyẹn do lẹgodo do we bo whèkọdakun bosọ gbẹ́ nado dotoai. 30 Hiẹ do homẹfa hia yé+ na owhe susu bo yí gbigbọ towe do to avase na yé gbọn yẹwhegán towe lẹ gblamẹ, ṣigba yé gbẹ́ nado dotoai. To godo mẹ, hiẹ jo yé do alọ omẹ aigba lọ tọn lẹ tọn mẹ.+ 31 Podọ to lẹblanu daho towe mẹ, a ma sukúndona yé+ kavi gbẹ́ yé dai, na Jiwheyẹwhe awuvẹmẹtọ* podọ lẹblanunọ de wẹ hiẹ.+

32 “Podọ todin, Jiwheyẹwhe mítọn E, yèdọ Jiwheyẹwhe he klo bo dohuhlọn bosọ dobu, mẹhe ko yinuwa sọgbe hẹ alẹnu etọn bo do owanyi nugbo hia,+ a yí nukunpẹvi do pọ́n awusinyẹnnamẹnu lẹpo he ko wá míwlẹ, ahọlu mítọn lẹ, ahọvi mítọn lẹ,+ yẹwhenọ mítọn lẹ,+ yẹwhegán mítọn lẹ,+ tọgbo mítọn lẹ po omẹ towe lẹpo po ji sọn azán ahọlu Asilia tọn lẹ tọn gbè+ kakajẹ egbé blo. 33 Dodonọ wẹ hiẹ gando nuhe ko wá mí ji lẹpo go, na hiẹ ko yinuwa po nugbonọ-yinyin po; ṣigba míwlẹ wẹ ko yinuwa po kanyinylan po.+ 34 Na nuhe dù ahọlu mítọn lẹ, ahọvi mítọn lẹ, yẹwhenọ mítọn lẹ po tọgbo mítọn lẹ po, yewlẹ ma yìn Osẹ́n towe, mọ yé masọ na ayidonugo gbedide kavi nuflinmẹ* towe he a yí do na avase yé lẹ. 35 To whenue yé tlẹ tin to ahọluduta yetọn mẹ bo to vivi dagbewà susugege he a na yé lẹ tọn dù bosọ tin to aigba gbigblo he yọ́n na jinukun* he hiẹ na yé lọ ji, yé ma sẹ̀n we+ bo masọ lẹkọ sọn walọ ylankan yetọn lẹ mẹ. 36 Enẹwutu, míwlẹ die to egbehe taidi afanumẹ lẹ+—mọwẹ, afanumẹ lẹ to aigba he hiẹ na tọgbo mítọn lẹ nado dù sinsẹ́n etọn po nudagbe etọn lẹ po ji. 37 Sinsẹ́n susugege aigba lọ tọn lẹ nọ lẹzun ahọlu he hiẹ ko de do mí ji lẹ tọn, na ylando mítọn lẹ wutu.+ Yé nọ dugán do míwlẹ po kanlin-yinyin mítọn lẹ po ji dile e jlo yé do, mí sọ tin to awusinyẹn daho mẹ.

38 “Na ehe lẹpo wutu, mí to gbekọndopọ sinsinyẹn de basi+ po kandai po, bọ yè sọ yí hiadonu ahọvi, Levinu po yẹwhenọ mítọn lẹ po tọn do dohiagona ẹn.”+

10 Mẹhe bọdego ehelẹ wẹ yí hiadonu yetọn lẹ do dohiagona ẹn:+

9 Levinu lẹ ga: Jeṣua visunnu Azania tọn, Binnui sọn visunnu Henadadi tọn lẹ mẹ, Kadmiẹli,+ 10 gọna nọvisunnu yetọn lẹ, Ṣebania, Hodia, Kelita, Pelaia, Hanan, 11 Mikka, Lehobi, Haṣabia, 12 Zakuli, Ṣelebia,+ Ṣebania, 13 Hodia, Bani po Bẹninu po.

14 Nukọntọ mẹlọ lẹ tọn lẹ die: Paloṣi, Pahati-moabi,+ Elami, Zatu, Bani, 15 Bunni, Azgadi, Bebai, 16 Adonija, Bigivai, Adini, 17 Ateli, Hẹzekia, Azuli, 18 Hodia, Haṣumi, Bezai, 19 Halifi, Anatọti, Nebai, 20 Magpiaṣi, Meṣulami, Hezili, 21 Meṣezabẹli, Zadọki, Jadua, 22 Pelatia, Hanan, Anaia, 23 Hoṣea, Hanania, Haṣubi, 24 Halohẹṣi, Pilha, Ṣobeki, 25 Lehumi, Haṣabna, Maaseia, 26 Ahija, Hanan, Anan, 27 Maluk, Halimi po Baanahi po.

28 Mẹhe pò lẹ—enẹ wẹ yẹwhenọ lẹ, Levinu lẹ, họ̀njinọtọ lẹ, hànjitọ lẹ, devizọnwatọ tẹmpli mẹ tọn lẹ,* gọna mẹdepope he klan ede dovo na mẹhe nọ nọ̀ aigba lọ ji lẹ nado hodo Osẹ́n Jiwheyẹwhe nugbo lọ tọn,+ to pọmẹ hẹ asi yetọn lẹ, visunnu yetọn lẹ po viyọnnu yetọn lẹ po, yèdọ mẹhe tindo oyọnẹn po nukunnumọjẹnumẹ po* lẹpo— 29 kọnawudopọ hẹ nọvisunnu yetọn lẹ, yèdọ sunnu nukundeji yetọn lẹ bo yí yedelẹ do dẹ̀hodo po whiwhle de po glọ, nado nọ zinzọnlin sọgbe hẹ Osẹ́n Jiwheyẹwhe nugbo lọ tọn, ehe ko yin nina gbọn Mose devizọnwatọ Jiwheyẹwhe nugbo lọ tọn gblamẹ, podọ nado yí sọwhiwhe do yìn gbedide Jehovah Oklunọ mítọn tọn lẹpo, gọna whẹdida po aṣẹdai etọn lẹ po. 30 Mí ma na yí viyọnnu mítọn lẹ na mẹhe nọ nọ̀ aigba lọ ji lẹ kavi yí viyọnnu yetọn lẹ na visunnu mítọn lẹ.+

31 Eyin mẹhe nọ nọ̀ aigba lọ ji lẹ hẹn ajọnu yetọn lẹ po jinukun wunmẹ depope po wá nado sà to Gbọjẹzangbe, mí ma na họ̀ nudepope to yé si to Gbọjẹzangbe+ kavi to azán wiwe de gbè.+ Mí nasọ nọ na gbọjẹ aigba lọ to owhe ṣinawetọ mẹ+ bo na nọ jo ahọ́ he ma ko yin súsú lẹpo do.+

32 Humọ, mí hẹn ẹn zun dandan na dopodopo mítọn nado nọ na mado-atọ̀n ṣekẹli* de tọn to whemẹwhemẹ na sinsẹ̀nzọn ohọ̀* Jiwheyẹwhe mítọn tọn,+ 33 na akla he nọ yin tito do gọnu-gọnu* lẹ,+ avọ́nunina jinukun-lili tọn gbesisọ mẹ tọn,+ avọ́nunina mimẹ̀ gbesisọ mẹ tọn he nọ yin bibasi to Gbọjẹzangbe+ podọ to osun yọyọ lẹ whenu,+ na hùnwhẹ dide lẹ,+ na onú wiwe lẹ, na avọ́nunina ylando tọn lẹ+ nado basi ovẹsè na Islaelivi lẹ, podọ na azọ́n ohọ̀ Jiwheyẹwhe mítọn tọn lẹpo.

34 Mí sọ de ovò gando nake he yẹwhenọ lẹ, Levinu lẹ po gbẹtọ lọ lẹ po dona nọ hẹnwa ohọ̀ Jiwheyẹwhe mítọn tọn mẹ go, yèdọ sọgbe hẹ whédo otọ́ mítọn lẹ tọn, to ojlẹ dide lẹ mẹ, to whemẹwhemẹ, nado nọ yin mimẹ̀ to agbà Jehovah Jiwheyẹwhe mítọn tọn ji, sọgbe hẹ nuhe yin kinkandai to Osẹ́n lọ mẹ.+ 35 Mí nasọ nọ hẹn sinsẹ́n bibia tintan aigba mítọn tọn lẹ gọna sinsẹ́n bibia tintan atin wunmẹ lẹpo he nọ sẹ́n lẹ tọn wá ohọ̀ Jehovah tọn mẹ to whemẹwhemẹ,+ 36 podọ plọnji visunnu mítọn lẹ po kanlin-yìnyìn mítọn lẹ po tọn+—⁠sọgbe hẹ nuhe yin kinkandai to Osẹ́n lọ mẹ⁠—​kakajẹ plọnji kanlinpa po lẹngbọpa mítọn lẹ po tọn ji. Mí na nọ hẹn yé wá ohọ̀ Jiwheyẹwhe mítọn tọn mẹ, yèdọ wá yẹwhenọ he nọ wadevizọn to ohọ̀ Jiwheyẹwhe mítọn tọn mẹ lẹ dè.+ 37 Mí sọ dona nọ hẹn sinsẹ́n tintan jinukun-lili mítọn tọn lẹ,+ nunina mítọn lẹ, sinsẹ́n atin wunmẹ lẹpo tọn,+ ovẹn yọyọ po amì po+ wá yẹwhenọ lẹ dè na agbànhọ* ohọ̀ Jiwheyẹwhe mítọn tọn lẹ,+ podọ mado-ao aigba mítọn lẹ tọn wá Levinu lẹ dè,+ na Levinu lẹ wẹ nọ ṣinyan mado-ao lẹ to glètoho daho mítọn lẹ mẹ.

38 Podọ yẹwhenọ, visunnu Aalọn tọn, dona tin hẹ Levinu lẹ to whenue Levinu lẹ to mado-ao lọ ṣinyan; Levinu lẹ sọ dona na mado-ao mado-ao lọ tọn na ohọ̀ Jiwheyẹwhe mítọn tọn,+ yèdọ na abò* agbànhọ tọn lẹ. 39 Na agbànhọ* lẹ mẹ wẹ Islaelivi lẹ po visunnu Levinu lẹ tọn lẹ po dona nọ hẹn nunina+ jinukun, ovẹn yọyọ po amì po tọn wá,+ podọ finẹ wẹ nuyizan fiwiwe lọ tọn lẹ tin te, gọna yẹwhenọ he nọ wadevizọn lẹ, họ̀njinọtọ lẹ po hànjitọ lẹ po. Mí ma na dovọ́na ohọ̀ Jiwheyẹwhe mítọn tọn.+

11 Todin, Jelusalẹm wẹ ahọvi gbẹtọ lọ lẹ tọn lẹ nọ nọ̀;+ ṣigba pipotọ gbẹtọ lọ lẹ tọn de ovò+ nado yí mẹdopo to omẹ ao mẹ to yé mẹ nado wá nọ Jelusalẹm, yèdọ tòdaho wiwe lọ, bọ omẹ ṣinẹnẹ he pò lẹ gbọṣi tòdaho diẹ lẹ mẹ. 2 Humọ, mẹlọ lẹ dona sunnu he desọn ojlo mẹ nado nọ Jelusalẹm lẹpo.

3 Podọ mẹhe bọdego ehelẹ wẹ yin nukọntọ agbegbe* tọn lẹ he nọ nọ̀ Jelusalẹm. (Islaelivi he pò lẹ, yẹwhenọ lẹ, Levinu lẹ, devizọnwatọ tẹmpli mẹ tọn lẹ*+ po visunnu devizọnwatọ Sọlomọni tọn lẹ tọn po+ nọ nọ̀ tòdaho Juda tọn he pò lẹ mẹ, yèdọ mẹdopodopo to ogú etọn titi ji to tòdaho etọn mẹ.+

4 Podọ delẹ to omẹ Juda po Bẹnjamini po tọn lẹ mẹ nọ nọ̀ Jelusalẹm ga.) Sọn omẹ Juda tọn lẹ mẹ, Ataia visunnu Uzia tọn visunnu Zekalia tọn visunnu Amalia tọn visunnu Ṣefatia tọn visunnu Mahalalẹli tọn sọn visunnu Pelẹzi tọn lẹ mẹ,+ 5 gọna Maaseia visunnu Baluki tọn visunnu Kọlihozẹ tọn visunnu Hazaia tọn visunnu Adaia tọn visunnu Joialibi tọn visunnu Zekalia tọn visunnu Ṣelanu lọ tọn. 6 Visunnu Pelẹzi tọn he nọ nọ̀ Jelusalẹm lẹpo yin sunnu nugopetọ 468.

7 Podọ omẹ Bẹnjamini tọn lẹ die: Sallu+ visunnu Meṣulami tọn visunnu Joẹdi tọn visunnu Pedaia tọn visunnu Kolaia tọn visunnu Maaseia tọn visunnu Itiẹli tọn visunnu Jeṣaia tọn, 8 podọ bọdo ewọ go, Gabai po Sallai po, yèdọ gbẹtọ 928; 9 podọ Joẹli visunnu Zikli tọn wẹ yin nugopọntọ yetọn bọ Juda visunnu Hasenua tọn wẹ bọdo nugopọntọ lọ go to tòdaho lọ mẹ.

10 Sọn yẹwhenọ lẹ mẹ: Jedaia visunnu Joialibi tọn, Jakini,+ 11 Selaia visunnu Hilkia tọn visunnu Meṣulami tọn visunnu Zadọki tọn visunnu Melaiọti he yin visunnu Ahitubi+ tọn, mẹhe yin nukọntọ de to ohọ̀* Jiwheyẹwhe nugbo lọ tọn mẹ, 12 gọna nọvisunnu yetọn he wazọ́n to ohọ̀ lọ go lẹ, 822; podọ Adaia visunnu Jelohami tọn visunnu Pelalia tọn visunnu Amzi tọn visunnu Zekalia tọn visunnu Paṣuli+ tọn visunnu Malkija tọn, 13 gọna nọvisunnu etọn lẹ, nukọntọ whédo otọ́ lẹ tọn lẹ, 242; podọ Amaṣisai visunnu Azalẹli tọn visunnu Ahzai tọn visunnu Meṣilemọti tọn visunnu Imẹli tọn, 14 gọna nọvisunnu yetọn lẹ he yin sunnu huhlọnnọ podọ adọgbotọ lẹ, 128; podọ Zabdiẹli, he wá sọn whẹndo nukundeji de mẹ wẹ yin nugopọntọ yetọn.

15 Sọn Levinu lẹ mẹ: Ṣemaia+ visunnu Haṣubi tọn visunnu Azlikami tọn visunnu Haṣabia tọn visunnu Bunni tọn, 16 gọna Ṣabetai+ po Jozabadi+ po, sọn nukọntọ Levinu lẹ tọn lẹ mẹ, mẹhe nọ penukundo whẹho gbonu tọn he gando ohọ̀ Jiwheyẹwhe nugbo lọ tọn go lẹ; 17 podọ Matania,+ visunnu Mika tọn visunnu Zabdi tọn visunnu Asafi+ tọn, yèdọ mẹhe nọ deanana hànjiji, he nọ deanana pipà lẹ to dẹ̀hiho whenu,+ gọna Bakibukia, omẹ awetọ to nọvisunnu etọn lẹ mẹ, podọ Abda visunnu Ṣamua tọn visunnu Galali tọn visunnu Jedutuni tọn.+ 18 Levinu he to tòdaho wiwe lọ mẹ lẹpo yin 284.

19 Họ̀njinọtọ lọ lẹ wẹ Akubi, Talmọni,+ po nọvisunnu yetọn he nọ họ́ họngbo lọ lẹ po, yèdọ gbẹtọ 172.

20 Islaelivi he pò lẹ, yẹwhenọ lẹ po Levinu lẹ po nọ nọ̀ tòdaho Juda tọn he pò lẹpo mẹ, yèdọ mẹdopodopo to ogú-yigba* etọn titi ji. 21 Devizọnwatọ tẹmpli mẹ tọn lẹ*+ nọ nọ̀ Ofẹli,+ podọ Ziha po Giṣpa po wẹ nọ deanana devizọnwatọ tẹmpli mẹ tọn lẹ.*

22 Nugopọntọ Levinu lẹ tọn to Jelusalẹm wẹ Uzi visunnu Bani tọn visunnu Haṣabia tọn visunnu Matania+ tọn visunnu Mikka tọn, sọn visunnu Asafi tọn he yin hànjitọ lẹ mẹ; ewọ wẹ nọ penukundo azọ́n ohọ̀ Jiwheyẹwhe nugbo lọ tọn go. 23 Na ahọlu ko na gbedide de do ota yetọn mẹ,+ bọ awuwledainanu tangan de nọ yin nina hànjitọ lẹ sọgbe hẹ nuhudo yetọn egbesọegbesọ tọn. 24 Podọ Petahia visunnu Meṣezabẹli tọn sọn visunnu Zela he yin visunnu Juda tọn lẹ mẹ wẹ yin ayinamẹtọ ahọlu tọn* na nuhe dù whẹho he gando gbẹtọ lọ lẹ go lẹpo.

25 Na nuhe dù gbétatò po ogle yetọn lẹ po, delẹ to omẹ Juda tọn lẹ mẹ nọ nọ̀ Kiliati-alba+ po tòpẹvi he to oglọ na ẹn* lẹ po, Dibọni po tòpẹvi he to oglọ na ẹn lẹ po, Jekabzeẹli+ po gbétatò etọn lẹ po mẹ, 26 bọ mẹdelẹ nọ nọ̀ Jeṣua, Molada,+ Bẹti-pelẹti,+ 27 Hazali-ṣuali,+ Beẹli-ṣeba po tòpẹvi he to oglọ na ẹn* lẹ po, 28 Ziklagi,+ Mekona po tòpẹvi he to oglọ na ẹn* lẹ po, 29 Ẹn-limọni,+ Zola,+ po Jalmuti po, 30 Zanoa,+ Adulami po gbétatò yetọn lẹ po, Lakiṣi+ po ogle etọn lẹ po, Azeka+ po tòpẹvi he to oglọ na ẹn* lẹ po. Yé nọ nọ̀* Beẹli-ṣeba kaka yì Agbàdo Hinọmi tọn mẹ.+

31 Podọ omẹ Bẹnjamini tọn lẹ nọ nọ̀ Geba,+ Mikmaṣi, Aija, Bẹtẹli+ po tòpẹvi he to oglọ na ẹn* lẹ po, 32 Anatọti,+ Nobi,+ Anania, 33 Hazọli, Lama,+ Gitaimi, 34 Hadidi, Zeboimi, Nebalati, 35 Lọdi po Ono po,+ agbàdo anazọ́nwatọ lẹ tọn. 36 Podọ apadewhe Levinu lẹ tọn he wá sọn Juda yin dide do Bẹnjamini.

12 Yẹwhenọ po Levinu lẹ po he hẹji yì hẹ Zelubabẹli+ visunnu Ṣealtiẹli+ tọn po Jeṣua+ po die: Selaia, Jelemia, Ẹzla, 2 Amalia, Maluk, Hatuṣi, 3 Ṣekania, Lehumi, Melemọti, 4 Ido, Ginnetọi, Abija, 5 Mijamini, Maadia, Bilga, 6 Ṣemaia, Joialibi, Jedaia, 7 Sallu, Amọki, Hilkia po Jedaia po. Omẹ enẹlẹ wẹ yin nukọntọ yẹwhenọ lẹ po nọvisunnu yetọn lẹ po tọn to azán Jeṣua tọn lẹ gbè.

8 Levinu lẹ wẹ Jeṣua, Binnui, Kadmiẹli,+ Ṣelebia, Juda, gọna Matania,+ yèdọ mẹhe nọ deanana ohàn pẹdido tọn lẹ to pọmẹ hẹ nọvisunnu etọn lẹ. 9 Podọ Bakibukia po Uni po he yin nọvisunnu yetọn lẹ ṣite to awà awetọ ji taidi nuhọ́tọ lẹ.* 10 Jeṣua ji Joiakimi, Joiakimi sọ ji Eliaṣibi+ bọ Eliaṣibi ji Joiada.+ 11 Joiada ji Jonatani bọ Jonatani ji Jadua.

12 To azán Joiakimi tọn lẹ gbè, mẹhe yin yẹwhenọ lẹ, yèdọ nukọntọ whédo otọ́ lẹ tọn lẹ die: na Selaia,+ Melaia; na Jelemia, Hanania; 13 na Ẹzla,+ Meṣulami; na Amalia, Jehohanani; 14 na Maluki, Jonatani; na Ṣebania, Josẹfu; 15 na Halimi,+ Adna; na Melaiọti, Hẹlkai; 16 na Ido, Zekalia; na Ginnetọni, Meṣulami; 17 na Abija,+ Zikli; na Miniamini, . . .;* na Moadia, Piltai; 18 na Bilga,+ Ṣamua; na Ṣemaia, Jehonatani; 19 na Joialibi, Matenai; na Jedaia,+ Uzi; 20 na Sallai, Kalai; na Amọki, Ebeli; 21 na Hilkia, Haṣabia; na Jedaia, Netanẹli.

22 Yinkọ nukọntọ whédo otọ́ Levinu lẹ tọn lẹ to azán Eliaṣibi, Joiada, Johanani po Jadua po+ tọn lẹ gbè yin kinkandai kakajẹ gandudu Daliusi Pẹlsianu lọ tọn whenu kẹdẹdile yẹwhenọ lẹ tọn yin kinkandai do.

23 Yinkọ Levinu he yin nukọntọ whédo otọ́ lẹ tọn lẹ yin kinkan do owe whenuho tọn mẹ, kakajẹ azán Johanani visunnu Eliaṣibi tọn lẹ gbè. 24 Nukọntọ Levinu lẹ tọn lẹ wẹ Haṣabia, Ṣelebia po Jeṣua+ visunnu Kadmiẹli tọn+ po, nọvisunnu yetọn lẹ sọ ṣite to awà awetọ ji nado na pipà bo dopẹ́ sọgbe hẹ anademẹ Davidi,+ omẹ Jiwheyẹwhe nugbo lọ tọn lẹ, bọ ogbẹ́ nuhọ́tọ tọn de to apá na ogbẹ́ nuhọ́tọ tọn devo. 25 Matania,+ Bakibukia, Obadia, Meṣulami, Talmọni po Akubi po+ ṣite to hihọ́tẹn yetọn lẹ taidi họ̀njinọtọ+ lẹ bo to họngbo agbànhọ lẹ tọn lẹ ṣọ́. 26 Omẹ ehelẹ wẹ sẹ̀n to azán Joiakimi visunnu Jeṣua+ tọn he yin visunnu Jozadaki tọn lẹ gbè podọ to azán Nẹhemia ayimatẹn-gán lọ gọna Ẹzla+ yẹwhenọ podọ vọkan-basitọ* lọ tọn lẹ gbè.

27 To klandowiwe adó Jelusalẹm tọn lẹ tọn whenu, yé dín Levinu lẹ bo plan yé wá Jelusalẹm sọn fie yé nọ nọ̀ lẹpo nado yí ayajijẹ, ohàn pẹdido tọn lẹ,+ gọna ajogàn lẹ, hànjinu okànnọ lẹ po ajalẹn lẹ po do basi hùnwhẹ klandowiwe lọ tọn. 28 Visunnu hànjitọ lẹ tọn* lẹ sọ bẹ yede pli sọn agbegbe* lọ mẹ, sọn Jelusalẹm lẹdo pé, sọn gbétatò Netofanu lẹ+ tọn mẹ, 29 sọn Bẹti-gilgali,+ podọ sọn aigba Geba+ po Azmavẹti+ po tọn lẹ ji, na hànjitọ lẹ ko wleawuna fininọ lẹ na yede lẹdo Jelusalẹm pé. 30 Podọ yẹwhenọ lẹ po Levinu lẹ po lẹ̀ yede wé, yé sọ hẹn gbẹtọ lọ lẹ,+ họngbo lẹ+ po adó lọ+ po zun wiwe.

31 Enẹgodo, n’hẹn ahọvi Juda tọn lẹ hẹji yì adó lọ ji. Humọ, n’de hànjigbẹ́ pẹdido tọn daho awe po pipli he na hodo yé lẹ po, bọ dopo to zọnlinzin yì adusiwhé adó lọ tọn pànta Họngbo Ogbó-Fiọtẹn tọn.+ 32 Hoṣaia po mado-awe ahọvi Juda tọn lẹ tọn po zinzọnlin hodo yé, 33 to pọmẹ hẹ Azalia, Ẹzla, Meṣulami, 34 Juda, Bẹnjamini, Ṣemaia po Jelemia po. 35 Delẹ to visunnu yẹwhenọ lẹ tọn lẹ mẹ topọ hẹ yé bo hẹn opẹ̀n lẹ:+ Zekalia visunnu Jonatani tọn visunnu Ṣemaia tọn visunnu Matania tọn visunnu Mikaia tọn visunnu Zakuli tọn visunnu Asafi tọn,+ 36 gọna Ṣemaia, Azalẹli, Milalai, Gilalai, Maai, Netanẹli, Juda po Hanani po he yin nọvisunnu etọn lẹ bọ yé hẹn hànjinu Davidi+ omẹ Jiwheyẹwhe nugbo lọ tọn lẹ; Ẹzla+ vọkan-basitọ* lọ sọ to yìyì to nukọnna yé. 37 Sọn Họngbo Asisa lọ tọn kọ̀n,+ yé hẹji tlọlọ gbọn Pèkán+ Tòdaho Davidi tọn+ ji bo gbọn aga na adó Ohọ̀ Davidi tọn bosọ yì kakajẹ Họngbo Osin tọn+ kọ̀n pànta whèzẹtẹn.

38 Hànjigbẹ́ pẹdido tọn awetọ dedo awà awetọ ji* bọ n’hodo e po mado-awe mẹlọ lẹ tọn po, gbọn adó he to aga na Atọ̀họ̀ Adò lẹ tọn+ podọ gbọn aga na Adó Gbigblo lọ+ 39 bo hẹji yì Họngbo Eflaimi tọn+ kọ̀n, yì Họngbo Tòdaho Hoho lọ tọn,+ Họngbo Whèvi tọn,+ Atọ̀họ̀ Hananẹli tọn,+ Atọ̀họ̀ Mea tọn po Họngbo Lẹngbọ lẹ tọn+ po kọ̀n; yé sọ wá nọte to Họngbo Nuhọ́tọ lẹ tọn kọ̀n.

40 To godo mẹ, hànjigbẹ́ pẹdido tọn awe lẹ wá ṣite to ohọ̀ Jiwheyẹwhe nugbo lọ tọn nukọn; yẹnlọsu po mado-awe ogán nukunpedonugotọ lẹ tọn po sọ wàmọ ga, 41 gọna Eliakimi, Maaseia, Miniamini, Mikaia, Elioenai, Zekalia po Hanania po he yin yẹwhenọ lẹ bọ yé hẹn opẹ̀n lẹ, 42 gọna Maaseia, Ṣemaia, Eleazali, Uzi, Jehohanani, Malkija, Elami po Ezeli po. Hànjitọ lẹ sọ jihàn po ogbè lélé po to anademẹ Izlahia tọn glọ.

43 To azán enẹ gbè, yé basi avọ́sinsan susu bo jaya,+ na Jiwheyẹwhe nugbo lọ hẹn yé gọ́ na ayajẹ wutu. Yọnnu lẹ po ovi lẹ po jaya ga,+ sọmọ bọ ayajijẹ Jelusalẹm tọn sọgan yin sisè sọn fidindẹn.+

44 To gbenẹgbe, sunnu lẹ yin dide nado nọ penukundo agbànhọ+ nunina lẹ,+ sinsẹ́n tintan lẹ+ po mado-ao lẹ+ po tọn go. Yé dona nọ bẹ mimá he yin bibiọ to Osẹ́n lọ mẹ+ na yẹwhenọ po Levinu lẹ po+ pli sọn ogle tòdaho lọ lẹ tọn mẹ, na ayajijẹ tin to Juda, na yẹwhenọ po Levinu he to devizọnwa lẹ po tọn wutu. 45 Yé sọ jẹ nukunpedo azọngban Jiwheyẹwhe yetọn tọn lẹ po nubiọtomẹsi lẹ̀wé tọn po go ji, dile hànjitọ lẹ po họ̀njinọtọ lẹ po to wiwà do, sọgbe hẹ anademẹ Davidi po visunnu etọn Sọlomọni po tọn lẹ. 46 Na to ojlẹ dindẹn die to azán Davidi po Asafi po tọn lẹ gbè, anadenanutọ* lẹ nọ tin na hànjitọ lẹ podọ na ohàn pipà po pẹdido po tọn lẹ he nọ yin jiji hlan Jiwheyẹwhe.+ 47 Humọ, to azán Zelubabẹli+ tọn lẹ gbè podọ to azán Nẹhemia tọn lẹ gbè, Islaeli pete wẹ nọ na mimá hànjitọ lẹ+ po họ̀njinọtọ lẹ+ po, sọgbe hẹ nuhudo egbesọegbesọ tọn yetọn. Yé sọ nọ de mimá Levinu lẹ+ tọn dovo, podọ Levinu lẹ nọ de mimá kúnkan Aalọn tọn dovo.

13 To azán enẹ gbè, owe Mose tọn yin hihia na gbẹtọ lọ lẹ,+ yé sọ mọ bọ e yin kinkan do e mẹ dọ Amọninu kavi Moabinu+ depope ma dona biọ agun Jiwheyẹwhe nugbo lọ tọn mẹ gbede,+ 2 na yé ma hẹn akla po osin po wá pé Islaelivi lẹ gba, kakatimọ Balaami wẹ yé dà nado hodẹ̀do yé.+ Ṣigba, Jiwheyẹwhe mítọn diọ dẹ̀hodo lọ zun dona de.+ 3 Tlolo he yé sè Osẹ́n lọ, yé jẹ mẹhe wá sọn kúnkan jonọ tọn* mẹ lẹpo klan dovo na Islaelivi lẹ ji.+

4 Todin, jẹnukọnna ehe, Eliaṣibi+ he yin hẹnnumẹ Tobia+ tọn wẹ yin yẹwhenọ he nọ penukundo agbànhọ* ohọ̀* Jiwheyẹwhe mítọn tọn lẹ go.+ 5 E ko hẹn agbànhọ* daho de tin-to-aimẹ na ẹn, yèdọ fie avọ́nunina jinukun-lili tọn, nuyọnwan gblingblin, nuyizan lẹ, mado-ao jinukun, ovẹn yọyọ po amì po+ tọn nọ yin bibẹpli do dai, ehe Levinu lẹ,+ hànjitọ lẹ po họ̀njinọtọ lẹ po tindo jlọjẹ na, to pọmẹ hẹ nunina he yẹwhenọ lẹ nọ mọyi.+

6 Podọ to ojlẹ ehe lẹpo mẹ, yẹn ma tin to Jelusalẹm, na n’yì ahọlu dè to owhe 32tọ+ gandudu Ahọlu Altakẹlikesi+ Babilọni tọn mẹ; podọ to ojlẹ de godo, n’biọgbè ahọlu. 7 Enẹgodo, n’wá Jelusalẹm bo mọ nuylankan he Eliaṣibi+ ko wà, bo hẹn agbànhọ de tin-to-aimẹ na Tobia+ to awánu ohọ̀ Jiwheyẹwhe nugbo lọ tọn mẹ. 8 Ehe doadi na mi taun, enẹwutu n’bẹ núzinzan whégbè tọn Tobia tọn lẹpo dlan sọn agbànhọ* lọ mẹ. 9 Enẹgodo, n’degbe bọ yé klọ́ agbànhọ* lọ lẹ mẹ wé; n’sọ gọ̀ nuyizan ohọ̀ Jiwheyẹwhe nugbo lọ tọn lẹ do finẹ,+ gọna avọ́nunina jinukun-lili tọn po nuyọnwan gblingblin po.+

10 N’sọ doayi e go dọ mimá Levinu lẹ tọn+ lẹ ma nọ yin nina yé,+ bọ Levinu po hànjitọ he nọ wà sinsẹ̀nzọn lẹ po ko yì, yèdọ mẹdopodopo yì ogle etọn titi kọ̀n.+ 11 Enẹwutu, n’gblewhẹdo ogán nukunpedonugotọ+ lẹ dọmọ: “Naegbọn ohọ̀ Jiwheyẹwhe nugbo lọ tọn do yin vọdona?”+ Whenẹnu wẹ n’pli yé dopọ bo gọ̀ yé de do azọ́ntẹn yetọn mẹ. 12 Juda pete sọ hẹn mado-ao+ jinukun, ovẹn yọyọ po amì po tọn yetọn wá agbànhọ lọ lẹ mẹ.+ 13 Whenẹnu, n’de Ṣelemia yẹwhenọ, Zadọki vọkan-basitọ* po Pedaia po sọn Levinu lẹ mẹ nado nọ penukundo agbànhọ lọ lẹ go, bọ Hanan visunnu Zakuli tọn visunnu Matania tọn yin alọgọtọ na yé, na sunnu ehelẹ nọ yin pinpọnhlan di omẹ dejidego lẹ wutu. Azọngban yetọn wẹ nado nọ má nulẹ na nọvisunnu yetọn lẹ.

14 Jiwheyẹwhe ṣie E, flin mi+ na ehe wutu bo ma súnsún nuyiwa owanyi nugbo tọn he n’ko basi do ohọ̀ Jiwheyẹwhe ṣie po sinsẹ̀nzọn* he nọ yin wiwà to finẹ po tọn tamẹ lẹ sẹ̀ blo.+

15 To ojlẹ enẹlẹ mẹ, n’mọ bọ gbẹtọ lẹ to ovẹn sinsẹ́n tùn to ovẹn-finyọ́ndo lẹ mẹ to Gbọjẹzangbe to Juda,+ bo nọ hẹn jinukun biblá kọnu-kọnu lẹ wá bosọ nọ blá yé do kẹtẹkẹtẹ lẹ ji, bo nọ hẹn ovẹn, ovẹn sinsẹ́n, ovò sinsẹ́n po agbàn wunmẹ lẹpo po biọ Jelusalẹm to Gbọjẹzangbe.+ Enẹwutu, n’na yé avase ma nado nọ sànú to azán enẹ gbè.* 16 Podọ Tilenu he nọ nọ̀ tòdaho lọ mẹ lẹ nọ hẹn whèvi po ajọnu wunmẹ lẹpo po wá, bo nọ sà yé na omẹ Juda tọn lẹ to Jelusalẹm to Gbọjẹzangbe.+ 17 Enẹwutu, n’gblewhẹdo omẹ nukundeji Juda tọn lẹ bo dọna yé dọmọ: “Nuylankan tẹ die he mì to wiwà, bo tlẹ to Gbọjẹzan lọ hẹnflu? 18 Be e ma yin nuhe tọgbo mìtọn lẹ wà bọ Jiwheyẹwhe mítọn do hẹn nugbajẹmẹji ehe lẹpo wá míwlẹ po tòdaho ehe po ji niyẹn ya? Todin, mìwlẹ to yiyidogọna homẹgble sinsinyẹn he tin sọta Islaeli gbọn Gbọjẹzan lọ hinhẹnflu dali.”+

19 Enẹwutu, tlolo he owhè jẹ họyì ji do họngbo Jelusalẹm tọn lẹ ji jẹnukọnna Gbọjẹzan lọ, n’degbe dọ họngbo lẹ ni yin súsú. N’sọ degbe dọ yé ni ma hùn yé blo kakajẹ Gbọjẹzangbe godo, podọ n’de delẹ to devizọnwatọ ṣie titi lẹ mẹ do họngbo lọ lẹ ji, na agbàn depope nikaa yin hinhẹn biọ tòdaho lọ mẹ to Gbọjẹzangbe. 20 Enẹwutu, ajọwatọ lẹ po mẹhe nọ sà ajọnu wunmẹ lẹpo po dọ́ gbonu Jelusalẹm tọn whladopo kavi awe. 21 Whenẹnu wẹ n’na avase yé bo dọna yé dọmọ: “Naegbọn mì do nọ dọ́ adó lọ nukọn? Eyin mì sọ vọ́ wàmọ, n’na wà danú do mì.” Sọn gbenẹgbe sọyi, yé masọ wá to Gbọjẹzangbe ba.

22 N’sọ dọna Levinu lẹ dọ yé ni nọ lẹ̀ yede wé gbọzangbọzan bo nọ wá nado họ́ họngbo lọ lẹ nado hẹn Gbọjẹzangbe lọ do wiweji.+ Jiwheyẹwhe ṣie E, flin mi na ehe lọsu wutu, bo do lẹblanu hia mi sọgbe hẹ owanyi nugbo susugege towe.+

23 To ojlẹ enẹlẹ mẹ, n’sọ mọ Ju delẹ he ko dà yọnnu Aṣidọdinu,+ Amọninu po Moabinu+ lẹ po.*+ 24 Mado-awe visunnu yetọn lẹ tọn nọ do Aṣidọdi-gbè po ogbè akọta voovo lẹ tọn po, ṣigba ode to yé mẹ ma sè ogbè Ju lẹ tọn. 25 Enẹwutu, n’gblewhẹdo yé bo hodẹ̀do yé bosọ hò delẹ to sunnu lọ lẹ mẹ+ bo ṣùn oda yetọn bosọ hẹn yé nado whlé gbọn Jiwheyẹwhe dali dọmọ: “Mì ma dona yí viyọnnu mìtọn lẹ na visunnu yetọn lẹ, mọ mì masọ dona yí depope to viyọnnu yetọn lẹ mẹ na visunnu mìtọn lẹ kavi na mìde.+ 26 Be e ma yin ehelẹ wutu wẹ Ahọlu Sọlomọni Islaeli tọn do waylando ya? To akọta susu mẹ, ahọlu de ma tin di ewọ;+ Jiwheyẹwhe etọn sọ yiwanna ẹn,+ sọmọ bọ Jiwheyẹwhe yí i do doahọlu do Islaeli pete ji. Ṣigba, asi jonọ lẹ tlẹ hẹn ewọ lọsu nado waylando.+ 27 Be e ma yin nuhe ma yọ́nsè de wẹ e yin na mì nado wà oylan daho ehe gbọn yọnnu jonọ lẹ didà dali, bo yinuwa po nugbonọ-mayin po sọta Jiwheyẹwhe mítọn ya?”+

28 Dopo to visunnu Joiada+ tọn he yin visunnu Eliaṣibi+ yẹwhenọ daho lọ tọn lẹ mẹ ko lẹzun ovisu Sanbalati+ Holọninu lọ tọn. Enẹwutu, n’yàn ẹn sọn dè e.

29 Jiwheyẹwhe ṣie E, flin yé, na yé ko hẹn yẹwhenọduta lọ, gọna alẹnu yẹwhenọduta+ po Levinu lẹ po tọn+ flu wutu.

30 N’sọ lẹ̀ yé wé sọn hẹnflu jonọ tọn lẹpo mẹ bo deazọ́nna yẹwhenọ lẹ po Levinu lẹ po, yèdọ mẹdopodopo do sinsẹ̀nzọn etọn kọ̀n,+ 31 bosọ basi tito na nake+ nido nọ yin hinhẹnwa to ojlẹ sisọ mẹ gọna sinsẹ́n bibia tintan lẹ.

Jiwheyẹwhe ṣie E, flin mi to aliho dagbe mẹ.*+