JELEMIA
1 Ehelẹ wẹ ohó Jelemia* visunnu Hilkia tọn, he yin dopo to yẹwhenọ lẹ mẹ to Anatọti+ to aigba Bẹnjamini tọn ji. 2 Ohó Jehovah tọn wá e dè to azán Josia+ visunnu Amọni+ tọn he yin ahọlu Juda tọn lẹ tọn gbè to owhe 13tọ gandudu etọn tọn whenu. 3 E sọ wá e dè to azán Jehoiakimi+ visunnu Josia tọn he yin ahọlu Juda tọn lẹ tọn gbè, kakajẹ vivọnu owhe 11tọ Zedekia+ visunnu Josia tọn he yin ahọlu Juda tọn lẹ tọn gbè, yèdọ kakajẹ whenue Jelusalẹm yì kanlinmọgbenu to osun atọ́ntọ mẹ.+
4 Ohó Jehovah tọn wá dè e dọmọ:
Yẹn sọ hẹn we zun yẹwhegán de na akọta lẹ.”
6 Ṣigba yẹn dọmọ: “Ṣo, Oklunọ Nupojipetọ Jehovah E!
Yẹn ma yọ́n hodọ,+ na yọpọ sunnu* de poun wẹ yẹn.”+
7 Whenẹnu wẹ Jehovah dọna mi dọmọ:
“A ylọ dewe dọ, ‘Yọpọ sunnu de poun’ blo.
Na hiẹ dona yì mẹhe dè yẹn do we hlan lẹpo dè,
Hiẹ nasọ dọ nuhe yẹn degbe etọn na we lẹpo.+
9 Whenẹnu wẹ Jehovah dlẹnalọ etọn jẹgbonu bo doalọ onù ṣie go.+ Jehovah sọ dọna mi dọmọ: “Yẹn ko yí ohó ṣie lẹ do onù towe mẹ.+ 10 Pọ́n, yẹn ko deazọ́nna we to egbé do akọta lẹ ji podọ do ahọluduta lẹ ji, nado họ̀nadọna podọ nado sisẹ́ liai, nado vasudo podọ nado gídí, nado gbá podọ nado donú.”+
11 Ohó Jehovah tọn sọ vọ́ wá dè e dọmọ: “Jelemia, etẹwẹ hiẹ mọ?” Yẹn sọ gblọn dọmọ: “Yẹn mọ alà atin almọndi tọn de.”*
12 Jehovah sọ dọna mi dọmọ: “Nuhe hiẹ mọ sọgbe, na yẹn gbọṣi nukle gando ohó ṣie go nado sọgan hẹn ẹn di.”
13 Ohó Jehovah tọn sọ vọ́ wá dè e whla awetọ dọmọ: “Etẹwẹ hiẹ mọ?” Yẹn sọ gblọn dọmọ: “Yẹn mọ nudàzẹ́n* de to adò ji,* onù etọn sọ dẹ́ sọn agewaji pànta hùwaji.” 14 Whenẹnu wẹ Jehovah dọna mi dọmọ:
“Nugbajẹmẹji de na gbajẹgbonu sọn agewaji
Wá mẹhe nọ nọ̀ aigba lọ ji lẹpo ji.+
15 Na ‘Yẹn to whẹndo ahọluduta he to agewaji tọn lẹpo tọn bẹpli,’ wẹ Jehovah dọ,+
‘Yé nasọ wá; dopodopo yetọn nasọ do ofìn etọn ai
To họngbo Jelusalẹm tọn lẹ nù,+
Sọta adó etọn lẹ lẹdo pé
Podọ sọta tòdaho Juda tọn lẹpo.+
16 Yẹn nasọ lá whẹdida whẹgbledomẹ tọn ṣie lẹ sọta yé gando oylan he yé wà lẹpo go,
Na yé ko gbẹ́ mi dai wutu,+
Yé sọ to avọ́sinsan mimẹ̀ lẹ basi hlan yẹwhe devo lẹ+
Bo nọ dẹ́ do odò hlan azọ́n alọ yetọn titi lẹ tọn.’+
17 Ṣigba, hiẹ dona wleawu nado yinuwa,*
Hiẹ nasọ fọ́n bo na dọ nuhe yẹn degbe etọn na we lẹpo na yé.
A dibuna yé blo,+
Na yẹn nikaa dobuna we to nukọn yetọn.
18 Na yẹn ko yí we do basi tòdaho huhlọnnọ de to egbehe,
Yèdọ dòtin gànyuu tọn de, podọ adó gànvẹẹ tọn lẹ sọta aigba lọ lẹpo,+
To ahọlu Juda tọn lẹ po ahọvi etọn lẹ po nukọn,
To yẹwhenọ etọn lẹ po mẹhe nọ nọ̀ aigba lọ ji lẹ po nukọn.+
19 E họnwun dọ yé na hoavùn sọta we,
Ṣigba, yé ma na duto ji we,*
Na ‘Yẹn tin po hiẹ po,’+ wẹ Jehovah dọ, ‘nado whlẹn we.’”
2 Ohó Jehovah tọn wá dè e dọmọ: 2 “Yì bo lá do otó omẹ Jelusalẹm tọn lẹ tọn mẹ dọ, ‘Nuhe Jehovah dọ die:
“Yẹn flin mẹdezejo* jọja whenu towe tọn ganji,+
Owanyi he hiẹ dohia to whenue a jlo na wlealọ,+
Lehe hiẹ hodo mi to danfafa ji do,
To aigba he ji yè ma do okún do.+
3 Wiwe wẹ Islaeli yin na Jehovah,+ yèdọ sinsẹ́n tintan jibẹwawhé etọn tọn lẹ.”’
‘Mẹdepope he jlo na và ẹ sudo na hùwhẹ.
Nugbajẹmẹji na wá yé ji,’ wẹ Jehovah dọ.”+
4 Mì owhé Jakọbu tọn lẹ emi, mì sè ohó Jehovah tọn,
Podọ mì mẹhe yin whẹndo owhé Islaeli tọn lẹpo.
5 Nuhe Jehovah dọ die:
“Owhẹ̀ tẹwẹ yẹn hù do tọgbo mìtọn lẹ,+
Bọ yé do danbú yì sọn dè e sọmọ,
Yé sọ zinzọnlin to boṣiọ ovọ́ yetọn lẹ godo+ bosọ hẹn yedelẹ zun nuvọ́?+
6 Yé ma kanse dọ, ‘Fie wẹ Jehovah te,
Mẹhe hẹn mí tọ́njẹgbonu sọn aigba Egipti tọn ji,+
He plan mí gbọn danfafa ji,
Gbọn aigba he yin danfafa+ bo gọ́ na odò lẹ ji,
Gbọn aigba akú tọn+ he ji zinvlu titli ṣinyọ́n de ji,
Gbọn aigba he ji mẹde ma ko zingbejizọnlin gbọn de ji
Podọ fie gbẹtọvi depope ma nọ nọ̀?’
7 Whenẹnu wẹ yẹn hẹn mì wá aigba he yọ́n na jinukun de ji,
Nado nọ dù sinsẹ́n etọn lẹ po nudagbe etọn lẹ po.+
Ṣigba, mìwlẹ wá aigba ṣie ji bo hẹn ẹn flu;
Mì hẹn ogú ṣie zun osùnú de.+
8 Yẹwhenọ lẹ ma kanse dọ, ‘Fie wẹ Jehovah te?’+
Mẹhe nọ plọnmẹ Osẹ́n lẹ ma yọ́n mi,
Lẹngbọhọtọ lẹ ṣiatẹ sọta mi,+
Yẹwhegán lẹ dọ dọdai gbọn Baali gblamẹ,+
Yé sọ hodo mẹhe ma sọgan hẹn ale depope wá lẹ.
9 ‘Enẹwutu wẹ yẹn na hoavùn hẹ mì,’+ wẹ Jehovah dọ,
‘Yẹn nasọ hoavùn hẹ ovivi mìtọn lẹ.’
10 ‘Ṣigba, mì dasá yì awà huto tọn* Kitimi tọn lẹ ji+ bo pọ́n.
Mọwẹ, mì domẹhlan Kẹdali+ bo yí sọwhiwhe do gbadopọnna;
Mì pọ́n eyin onú ehe nkọ depope ko jọ pọ́n.
11 Be akọta de ko yí nuhe ma yin yẹwhe lẹ do diọ yẹwhe etọn lẹ pọ́n wẹ ya?
Ṣigba, omẹ ṣie titi lẹ ko yí onú ovọ́ do diọ gigo ṣie.+
12 Mì olọn lẹ emi, mì pọ́n ehe po nupaṣamẹ po;
Mì dibu bo sisọ,’ wẹ Jehovah dọ,
13 ‘Na omẹ ṣie lẹ ko wà nuylankan awe:
Yé ko gbẹ́ mi dai, yèdọ asisa osin ogbẹ̀ tọn lọ,+
Podọ yé kùn* dotọ̀ lẹ na yede,
Dotọ̀ gbigbà lẹ, he ma sọgan hẹn osin.’
14 ‘Be devizọnwatọ de wẹ Islaeli, kavi afanumẹ he yin jiji to whédo de mẹ?
To whenẹnu, naegbọn ewọ do yin zizejo taidi ogblànnu?
15 Kinnikinni winyanwinyan lẹ to lìlì sọta ẹ;+
Yé ze ogbè yetọn daga.
Yé sọ hẹn aigba etọn zun nudobu.
Tòdaho etọn lẹ wẹ yè ko domiyọ́n, na mẹde nikaa nọ yé mẹ.
16 Omẹ Nofi*+ po Tahapanesi+ tọn po lẹ lùn oda sọn ota towe.
17 Be e ma yin hiẹ lọsu wẹ hẹn ehe wá dewe ji
Na a gbẹ́ Jehovah Jiwheyẹwhe towe dai+
To whenue ewọ to anadena we to aliji ya?
19 Kanyinylan towe na vọ́ we jlado,
Nugbonọ-mayin towe titi wẹ nasọ wọhẹ we.
Yọnẹn bo doayi e go dọ e ylan bosọ sinyẹn taun+
Nado gbẹ́ Jehovah Jiwheyẹwhe towe dai;
Hiẹ ma tindo budisi depope na mi,’+ wẹ Oklunọ Nupojipetọ Jehovah awhànpa lẹ tọn dọ.
20 ‘Sọn whenu dindẹn die wẹ yẹn ko wẹ́n zẹgẹ towe+
Bosọ ṣùn gẹdẹ towe lẹ.
Ṣigba, hiẹ dọmọ: “Yẹn ma na sẹ̀n we,”
Na to okọ́ta he yiaga lẹpo ji podọ to atin he vùn ganji lẹpo sá+
Wẹ a nọ mlọn owẹ̀n te nado to galọ.+
21 To whenue e yindọ yẹn ko do we taidi ovẹn vẹẹ dagbedagbe de,+ yèdọ okún jọ okún kẹdẹ;
Naegbọn hiẹ do diọ zun ovẹn gbigble vẹntin wunmẹ devo tọn to nukọn ṣie?’+
22 ‘Eyin dọ hiẹ tlẹ yí soda po adí susu po do lawu,
To nukun ṣie mẹ, hiẹ na gbẹ́ kudiho na whẹhuhu towe wutu,’+ wẹ Oklunọ Nupojipetọ Jehovah dọ.
23 Naegbọn hiẹ nado dọ dọ, ‘Yẹn ma ko hẹn dee flu.
Yẹn ma ko hodo Baali lẹ’?
Pọ́n nuyiwa towe to agbàdo lọ mẹ.
Lẹnnupọndo nuhe hiẹ ko wà ji.
A taidi kanklosọ́ asi winyanwinyan awuyatọ de,
He to wezunhọ̀n yigodo yinukọn matin yanwle depope,
24 Kẹtẹkẹtẹ gbémẹ tọn de he ko jẹakọ hẹ danfafa,
He to owán whlẹn to wantuntun etọn mẹ.*
Mẹnu wẹ sọgan glọnalina ẹn to whenue e to asu dín?
Depope to mẹhe to dindin in lẹ mẹ ma na jẹtukla.
Yé na mọ ẹn to ojlẹ* etọn mẹ.
25 A zọ̀n afọ-vọ́ blo
Podọ a dike nugbla hù we blo.
Ṣigba, hiẹ dọ dọ, ‘Todido de ma tin!+
26 Kẹdẹdile winyan nọ hù ajotọ he yin wiwle de do,
Mọ wẹ owhé Islaeli tọn ko yin winyando do niyẹn,
Yewlẹ, ahọlu yetọn lẹ po ahọvi yetọn lẹ po,
Yẹwhenọ yetọn lẹ po yẹwhegán yetọn lẹ po.+
27 Yé dọna atin dọ, ‘Hiẹ wẹ otọ́ ṣie,’+
Podọ na zannu dọ, ‘Hiẹ wẹ ji mi.’
Ṣigba, yé lẹ́ godo yetọn do mi kakati nido yin nukunmẹ yetọn.+
Podọ to ojlẹ nugbajẹmẹji tọn yetọn whenu, yé na dọ dọ,
‘Fọ́n bo whlẹn mí!’+
28 Todin, fie wẹ yẹwhe he mì basi na mìde lẹ te?+
Mì gbọ yé ni ṣite eyin yé sọgan whlẹn mì to ojlẹ nugbajẹmẹji tọn whenu,
Na yẹwhe towe lẹ ko sù sọ tòdaho towe lẹ, hiẹ Juda E.+
29 ‘Naegbọn hiẹ do to agọjẹdo mi?
Naegbọn mìmẹpo do ṣiatẹ sọta mi?’+ wẹ Jehovah dọ.
30 Yẹn ko linú visunnu mìtọn lẹ to ovọ́ mẹ.+
Yé ma na kẹalọyi nuplọnmẹ;+
Ovi mìtọn titi lẹ wẹ hù yẹwhegán mìtọn lẹ sudo,+
Taidi kinnikinni he to adán ji de.
31 Hiẹ whẹndo ehe E, hiẹ lọsu ni lẹnnupọndo ohó Jehovah tọn ji.
Be yẹn ko taidi danfafa de na Islaeli wẹ
Kavi aigba zinvlu gọ́ngọ́n tọn de?
Naegbọn omẹ ṣie ehelẹ ko dọ dọ, ‘Mí na dánpe yì fie jlo mí.
Mí ma nasọ lẹkọwa dè we ba’?+
32 Be awhli de sọgan wọn aṣọ́donu etọn lẹ,
Bọ asiyọyọ de na wọn anọ́bẹ́ etọn* lẹ wẹ ya?
Ṣogan, omẹ ṣie titi lẹ ko wọn mi na ojlẹ susu.+
33 Hiẹ yọnnu E, lehe a yí azọ́nyinyọnẹn do doafọna owanyi do sọ!
Hiẹ ko plọnazọ́n dewe to aliho kanyinylan tọn mẹ.+
34 Ohùn homẹvọnọ tọn, yèdọ wamọnọ lẹ tọn* tlẹ ko jẹ yẹli towe lẹ lọsu go,+
Dile etlẹ yindọ yẹn ma mọ omẹ enẹlẹ to tintẹnpọn nado biọ owhé towe gbè;
Ohùn yetọn tin to yẹli towe lẹpo go.+
35 Ṣigba, hiẹ dọ dọ, ‘Homẹvọnọ wẹ yẹn.
E họnwun dọ ewọ masọ to homẹgble do go e ba.’
Todin, yẹn na hẹn whẹdida wá ji we
Na hiẹ dọ dọ, ‘Yẹn ma waylando’ wutu.
36 Naegbọn hiẹ nọ yí nukunpẹvi do pọ́n aliho nuyiwa tọn towe he go yè ma sọgan dejido?
37 Na whẹwhinwhẹ́n ehe dopolọ wutu, hiẹ na bẹ alọ towe lẹ plá ota nado tọ́nyi,+
Na Jehovah ko gbẹ́ mẹhe go hiẹ dejido lẹ dai wutu;
Yé ma na hẹn we tindo kọdetọn dagbe.”
3 Gbẹtọ lẹ nọ kanse dọmọ: “Eyin sunnu de yàn asi etọn bọ e yì bosọ lẹzun asi mẹdevo tọn, be ewọ nasọ gọ̀ yọnnu lọ yí wẹ ya?”
Be aigba enẹ ma ko yin hinhẹnflu pete wẹ ya?+
“Mì ko lọga hẹ mẹsusu,+
Todin, be mì nasọ lẹkọwa dè e wẹ ya?” wẹ Jehovah dọ.
2 “Mì ze nukun mìtọn lẹ daga bo pọ́n okọ́ta he to agbá lẹ hlan.
Fie wẹ mì ma ko yin zinzanhẹ gánnugánnu te?
Mì sinai to alitó nado nọtepọn yé,
Taidi mẹhe nọ to dindanpe* gbọn danfafa ji.
Mì sọ to aigba lọ hẹnflu mapote
Gbọn galilọ po kanyinylan mìtọn po dali.+
3 Enẹ wẹ zọ́n bọ jikun ma do ja,+
Bọ jikun amakikọ-whenu tọn ma ja.
4 Ṣigba todin, hiẹ dawhá ylọ mi,
‘Otọ́ ṣie, hiẹ wẹ yin họntọn ṣie to jọja whenu!+
5 Be yè na hẹnmẹdohomẹ kakadoi wẹ,
Kavi to okẹ̀n do mẹ mapote?’
Nuhe hiẹ dọ niyẹn,
Ṣigba hiẹ zindonukọn to oylan towe lẹpo mẹ.”+
6 To azán Ahọlu Josia tọn lẹ gbè,+ Jehovah dọna mi dọmọ: “‘Be hiẹ mọ nuhe Islaeli he ma yin nugbonọ lọ ko wà ya? E ko hẹji yì osó he yiaga lẹpo ji bo ko sọ yì atin he vùn lẹpo sá nado lọga.+ 7 To whenue e tlẹ ko wà onú ehe lẹpo godo, yẹn gbẹ́ to bibiọ to e si nado lẹkọwa dè e,+ ṣigba e ma lẹkọ; podọ Juda to nọviyọnnu yẹdoklọmẹtọ etọn pọ́n.+ 8 To whenue yẹn mọ enẹ, yẹn yàn Islaeli he ma yin nugbonọ lọ po gbedewema gbẹdai tọn de po+ na ayọdide etọn wutu.+ Ṣigba, Juda he yin nọviyọnnu yẹdoklọmẹtọ etọn lọ ma dibu; ewọ lọsu tọ́nyi bo jẹ galọ ji.+ 9 E nọ yí nukunpẹvi do pọ́n galilọ etọn bo nọ to aigba lọ hẹnflu mapote bosọ nọ to ayọde hẹ zannu lẹ po atin lẹ po.+ 10 Mahopọnna ehe lẹpo, Juda he yin nọviyọnnu yẹdoklọmẹtọ etọn lọ ma lẹkọwa dè e po ahun lẹpo po, adavo to nukunta,’ wẹ Jehovah dọ.”
11 Jehovah sọ dọna mi dọmọ: “Islaeli he ma yin nugbonọ lọ ko do ede* hia taidi dodonọ hú Juda yẹdoklọmẹtọ lọ.+ 12 Yì bo lá ohó ehelẹ hlan agewaji:+
“‘“Islaeli atẹṣitọ E, lẹkọ,” wẹ Jehovah dọ.’+ ‘“Yẹn ma na gblehomẹ* do gowe ba,+ na nugbonọ wẹ yẹn,” wẹ Jehovah dọ.’ ‘“Yẹn ma na hẹnmẹdohomẹ kakadoi. 13 Yigbe whẹhuhu towe tọn poun, na hiẹ ko ṣiatẹ sọta Jehovah Jiwheyẹwhe towe. Hiẹ sọ nọ jo dewe* na jonọ* lẹ to atin he vùn lẹpo sá, ṣigba hiẹ ma setonuna ogbè ṣie,” wẹ Jehovah dọ.’”
14 “Mì lẹkọ, mì visunnu atẹṣitọ lẹ emi,” wẹ Jehovah dọ. “Na yẹn ko lẹzun klunọ* jọnun mìtọn; yẹn nasọ de mì, yèdọ mẹdopo sọn tòdaho de mẹ podọ omẹ awe sọn whẹndo de mẹ bo na plan mì wá Ziọni.+ 15 Yẹn nasọ na mì lẹngbọhọtọ he ahun ṣie kẹalọyi lẹ,+ yé nasọ yí oyọnẹn po zinzin po do yìn mì. 16 Mì na sudeji bo na sẹ́n to aigba lọ ji to azán enẹlẹ gbè,” wẹ Jehovah dọ.+ “Yé ma nasọ dọ dọ, ‘Apotin alẹnu tọn Jehovah tọn!’ E ma nasọ wá ayiha mẹ ba, mọjanwẹ yé ma nasọ flin in kavi jẹdò etọn do niyẹn, podọ e ma na yin vivọbasi. 17 To ojlẹ enẹ mẹ, yé na ylọ Jelusalẹm dọ ofìn Jehovah tọn;+ akọta lẹpo nasọ nọ yin bibẹpli to oyín Jehovah tọn mẹ to Jelusalẹm,+ yé ma nasọ yí tasinsinyẹn do yinuwa sọgbe hẹ ahun ylankan yetọn lẹ ba.”
18 “To azán enẹlẹ gbè, yé na zinzọnlin to pọmẹ, yèdọ owhé Juda tọn po owhé Islaeli tọn po,+ yé nasọ zọnpọ sọn aigba he to agewaji lọ ji wá aigba he yẹn na tọgbo yetọn lẹ taidi ogú de lọ ji.+ 19 Yẹn sọ dọ dọ, ‘Lehe e yọ́n do sọ dọ yẹn ze mì do visunnu lẹ ṣẹnṣẹn bo na mì aigba dagbe hugan, yèdọ ogú he yin whanpẹnọ hugan to akọta lẹ ṣẹnṣẹn!’*+ Yẹn sọ lẹndọ mìwlẹ na ylọ mi dọ, ‘Otọ́ ṣie!’ podọ dọ mìwlẹ ma na lẹkọ sọn hihodo mi mẹ. 20 ‘Na nugbo tọn, dile asi yẹdoklọmẹtọ de nọ jo asu* etọn do dó, mọ wẹ hiẹ lọsu, yèdọ owhé Islaeli tọn, ko yinuwa hẹ mi po oklọ po do niyẹn,’+ wẹ Jehovah dọ.”
21 Ogbè de yin sisè sọn okọ́ta he to agbá lẹ ji,
Omẹ Islaeli tọn lẹ to avivi bo to vẹvẹ,
Na yé ko hẹn aliho yetọn gblezọn wutu;
Yé ko wọn Jehovah Jiwheyẹwhe yetọn.+
22 “Mì lẹkọ, mì visunnu atẹṣitọ lẹ emi.
Yẹn nasọ doalọtena atẹṣiṣi mìtọn.”+
“Míwlẹ die! Mí ko wá dè we,
Na hiẹ, Jehovah E, wẹ Jiwheyẹwhe mítọn.+
23 Na nugbo tọn, yẹdoklọmẹnu de wẹ okọ́ta lẹ po bẹwlu he to osó lẹ ji po.+
Na nugbo tọn, Jehovah Jiwheyẹwhe mítọn wẹ na na whlẹngán Islaeli.+
24 Ṣigba, sọn jọja whenu mítọn gbọ́n wẹ winyandomẹnu* lọ ko bẹ nuhe tọgbo mítọn lẹ jẹtukla na lẹpo yì,+
Yèdọ lẹngbọpa po kanlinpa yetọn lẹ po,
Visunnu po viyọnnu yetọn lẹ po.
25 Mì gbọ mí ni ṣinyọ́n nukunmẹ ai to winyan mítọn mẹ,
Mì sọ gbọ winyan mítọn ni ṣinyọnyẹ mí ji,
Na mí ko waylando do Jehovah Jiwheyẹwhe mítọn,+
Míwlẹ po tọgbo mítọn lẹ po sọn jọja whenu mítọn kakajẹ egbé,+
Podọ mí masọ setonuna ogbè Jehovah Jiwheyẹwhe mítọn tọn.”
4 “Islaeli E, eyin hiẹ lẹkọ,” wẹ Jehovah dọ,
“Eyin hiẹ lẹkọwa dè e
Podọ eyin hiẹ de boṣiọ hiọawu towe lẹ sọn nukọn ṣie,
To whenẹnu, hiẹ ma na yin gbéjinọtọ.+
2 Eyin hiẹ whlé dọ,
‘Dile Jehovah togbẹ̀!’ to nugbo, whẹdida dodo po dodowiwa po mẹ,
Whenẹnu wẹ akọta lẹ na mọ dona de yí na yede gbọn ewọ gblamẹ,
Yé nasọ nọ doawagun to ewọ mẹ.”+
3 Na nuhe Jehovah dọna omẹ Juda po Jelusalẹm po tọn lẹ die:
“Mì jlo aigba he na yọ́n na jinukun na mìde,
Mì sọ do jinukun do owùn lẹ ṣẹnṣẹn ba blo.+
4 Mì gboadà na mìde hlan Jehovah,
Mì sọ de ayú tintan ahun mìtọn lẹ tọn sẹ̀,+
Mì omẹ Juda tọn po tòmẹnu Jelusalẹm tọn lẹ po,
Na adi ṣie nikaa jizò taidi miyọ́n
Bo nasọ jimiyọ́n sọmọ bọ mẹde ma na penugo nado ṣí i,
Na oylan he mì wà lẹ wutu.”+
5 Dọ ẹ to Juda bo lá ẹ to Jelusalẹm.
Dawhá bo kún opẹ̀n gbọn aigba lọ pete ji.+
Yí ogbè lélé do dawhá bo dọmọ: “Mì pli dopọ,
Bo gbọ mí ni họnyi tòdaho gángán lẹ mẹ.+
6 Mì ze ohia* de daga hlan Ziọni.
Mì dín fibẹtado bo ma nọte guun blo,”
Na yẹn na hẹn nugbajẹmẹji wá sọn agewaji,+ yèdọ gbakija daho de.
E ko tọ́n sọn nọtẹn etọn nado hẹn aigba mìtọn zun fie dobu de.
Tòdaho mìtọn lẹ na yin gbigbakija, bọ mẹdepope ma na nọ nọ̀ yé mẹ ba.+
8 Enẹwutu, mì ze odẹ́vọ̀ do,+
Mì nọ aluẹmẹ* bo doavihàn,
Na adi zogbe Jehovah tọn ma ko lẹ́ sọn mí ji.
9 “To azán enẹ gbè,” wẹ Jehovah dọ, “ahun* ahọlu lọ tọn na ṣùn,+
Podọ ahun* ahọvi lẹ tọn ga;
Obu na jẹ yẹwhenọ lẹ ji, awú nasọ ji yẹwhegán lẹ.”+
10 Whenẹnu wẹ yẹn dọmọ: “Ojé, Oklunọ Nupojipetọ Jehovah E! Na nugbo tọn, hiẹ ko doyẹklọ omẹ ehelẹ+ po Jelusalẹm po tlala, na hiẹ dọ dọ, ‘Mì na tindo jijọho,’+ to whenuena e yindọ ohí wẹ tin to vẹ́go mítọn lẹ ji.”*
11 To ojlẹ enẹ mẹ, e na yin didọna omẹ ehelẹ po Jelusalẹm po dọmọ:
“Akú jẹhọn de sọn okọ́ta he to agbá to danfafa ji lẹ
Na plọ́ viyọnnu omẹ ṣie lẹ tọn yì;*
E ma ja nado fú kavi nado klọ́we gba.
12 Yẹn wẹ hẹn jẹhọn sinsinyẹn ehe wá sọn nọtẹn ehelẹ.
Todin, yẹn na dawhẹna yé.
13 Pọ́n! E na wá taidi aslọ he súyu,
Osọ́-kẹkẹ etọn taidi jẹhọn-ahizi de.+
Osọ́ etọn lẹ nọ yawu hú akùn lẹ.+
Dindọn wẹ na míwlẹ, na mí ko yin hinhẹn jẹ agbá!
14 Jelusalẹm E, lẹ̀ ahun towe wé sọn kanyinylan mẹ nado yin whinwhlẹngán.+
Nawẹ e na dẹnsọ bọ hiẹ na to linlẹn ylankan lẹ lẹn to ayiha towe mẹ?
15 Na ogbè de wẹ hẹn linlin lọ wá sọn Dani,+
E sọ lá nugbajẹmẹji sọn osó Eflaimi tọn lẹ ji.
16 Na linlin etọn, mọwẹ, hlan akọta lẹ;
Lá ẹ sọta Jelusalẹm.”
“Nuhọ́tọ* lẹ ja sọn aigba dindẹn de ji,
Yé nasọ ze ogbè yetọn lẹ daga sọta tòdaho Juda tọn lẹ.
18 “Hiẹ na jiya aliho towe titi lẹ tọn po nuyiwa towe lẹ po tọn.+
Lehe nugbajẹmẹji towe sinyẹn do sọ,
Na e yì jẹ ahun towe mẹ tlọlọ!”
19 Ṣo, awufiẹsa ṣie,* awufiẹsa ṣie!
Yẹn tindo awufiẹsa sinsinyẹn to ahun ṣie mẹ.*
Ahun ṣie sọ to hihò to ohò ṣie mẹ.
20 Linlin nugbajẹmẹji lẹ tọn ko yin nina debọdo-dego,
Na aigba lọ blebu ko yin vivasudo wutu.
To ajiji mẹ, gòhọ ṣie titi lẹ yin vivasudo,
To ojlẹ kleun de mẹ, avọ̀ gòhọ ṣie tọn lẹ lọsu ga.+
22 “Na gugutọ wẹ omẹ ṣie lẹ;+
Yé ma na mi ayidonugo depope.
Visunnu nulunọ lẹ wẹ yé, he ma tindo nukunnumọjẹnumẹ.
Yé nọ bikan* taun to ylanwiwa mẹ,
Ṣigba yé ma yọ́n lehe yè nọ wà dagbe do.”
23 Yẹn mọ aigba lọ, podọ pọ́n! e jẹvọ́ bo gbọgbé.+
Yẹn pọ́n olọn lẹ, hinhọ́n yetọn masọ tin ba.+
24 Yẹn mọ osó lẹ, podọ pọ́n! yé to whinwhàn,
Okọ́ta lẹ sọ nọ to sisọsisọ.+
25 Yẹn mọ, podọ pọ́n! mẹde ma tin to finẹ,
Podọ ohẹ̀ agahomẹ tọn lẹpo ko zlọn yì.+
26 Yẹn mọ, podọ pọ́n! aigba he yọ́n na jinukun lọ ko lẹzun danfafa de,
Tòdaho etọn lẹpo ko sọ yin hihọliai.+
Jehovah wẹ hẹn ehe wá e ji,
Na adi zogbe etọn wutu.
29 To nudidọ osọ́nọ po ogádetọ lẹ po tọn whenu,
Tòdaho lọ blebu họ̀n.+
Yé biọ zungbo lẹ mẹ,
Yé sọ hẹ osé lẹ ji.+
Tòdaho lẹpo wẹ yin jijodo,
Mẹdepope masọ nọ nọ̀ yé mẹ ba.”
30 Todin he hiẹ ko yin vivasudo, etẹwẹ a na wà?
Hiẹ ko nọ yí avọ̀ vẹẹ ṣẹ́ṣẹ́ do doaṣọ́na dewe,
Bo nọ do kọnú sika tọn lẹ do okọ̀,
A sọ nọ và onú yuu do nukunmẹ.
Ṣigba, to ovọ́ mẹ wẹ hiẹ doaṣọ́na dewe te,+
Na mẹhe nọ túnwán hodo we lẹ ko gbẹ́ we dai;
31 Na yẹn ko sè nudidọ lọ he taidi ogbè yọnnu awutunọ de tọn,
Awufiẹsa lọ taidi yọnnu he to ovi etọn tintan ji tọn,
Ogbè viyọnnu Ziọni tọn he agbọ́ to whiwhè do.
Dile e to alọ etọn lẹ dlẹn wẹ e to didọ dọmọ:+
“Dindọn na mi, na mẹhutọ lẹ ko hẹn nuṣikọna mi!”*
5 Dánpe gbọn tòhomẹ-liho Jelusalẹm tọn lẹ ji.
Pọnnu lẹdo pé bo doayi e go.
Dindona ali plitẹn etọn lẹ nado pọ́n
Eyin vlavo hiẹ na mọ mẹde he nọ yinuwa po dodowiwa po,+
Mẹde he nọ jlo nado yin nugbonọ,
Yẹn nasọ jona tòdaho ehe.
2 Eyin yé tlẹ dọmọ: “Dile Jehovah togbẹ̀!”
Whiwhle lalo tọn whlé wẹ yé gbẹ́ te.+
3 Jehovah E, be e ma yin nugbonọ lẹ dín wẹ nukun towe lẹ te ya?+
Hiẹ linú yé, ṣigba e ma yinuwado yé ji.*
Hiẹ dibla sukúndona yé, ṣigba yé gbẹ́ nado kẹalọyi mẹplọnlọ.+
4 Ṣigba, yẹn dọna dee dọmọ: “E họnwun dọ agbátọnọ wẹ omẹ ehelẹ.
Yé nọ yinuwa taidi nulunọ, na yé ma yọ́n aliho Jehovah tọn,
Yèdọ whẹdida Jiwheyẹwhe yetọn tọn.
5 Yẹn na yì sunnu nukundeji lẹ dè bo na dọho hẹ yé,
Na yé dona ko doayi aliho Jehovah tọn go,
Yèdọ whẹdida Jiwheyẹwhe yetọn tọn.+
Ṣigba, yemẹpo wẹ ko wẹ́n zẹgẹ lọ
Yé ko sọ ṣùn gẹdẹ* lọ lẹ.”
6 Enẹ wẹ zọ́n bọ kinnikinni zungbo mẹ tọn do yangbé yetọn,
Ohla danfafa ji tọn de sọ to yé husudo,
Opọ̀ de gbọṣi nukle to tòdaho yetọn lẹ mẹ.
Mẹdepope he jlo na tọ́n sọn yé mẹ nọ yin tintlẹ́n do flinflin.
Na sẹ́nhẹngba yetọn lẹ sù tlala;
Nuyiwa nugbonọ-mayin tọn yetọn sọ yin susugege.+
7 Nawẹ yẹn sọgan jo ehe na mì gbọn?
Visunnu mìtọn lẹ ko gbẹ́ mi dai,
Podọ yé sọ nọ yí nuhe ma yin Jiwheyẹwhe do whlé.+
Yẹn hẹn pekọ wá na nuhudo yetọn,
Ṣigba, yé to ayọde mapote,
Yé sọ nọ doawhàn biọ owhé galọtọ de tọn gbè.
8 Yé taidi osọ́ lẹ he nọ yí zohunhun po ojlo zogbe po do hẹ asi,
Dopodopo yetọn sọ nọ to winwàn to asi mẹdevo tọn godo.+
9 “Be yẹn ma na hẹn yé nado dogbè onú ehelẹ tọn ya?” wẹ Jehovah dọ.
“Be yẹn* ma na yiahọsu na dee to akọta mọnkọtọn go ya?”+
10 “Fọ́n bo diọnukunsọ vẹngle etọn lẹ bosọ hẹn yé gble,
Ṣigba, a sukúndona yé blo.+
Bẹ amà etọn he vùn lẹ yì,
Na yé ma yin Jehovah tọn wutu.
11 Na owhé Islaeli tọn po owhé Juda tọn po
Ko yí oklọ do yinuwa hẹ mi sinsinyẹn,” wẹ Jehovah dọ.+
Nugbajẹmẹji depope ma na wá mí ji;
Ohí kavi huvẹ ma na wá mí ji.’+
13 Jẹhọn wẹ gọ́ ohò yẹwhegán lẹ tọn mẹ,
Ohó* lọ masọ tin to ohò yetọn mẹ.
Dike ehe ni jọ do yé go!”
14 Enẹwutu, nuhe Jehovah Jiwheyẹwhe awhànpa lẹ tọn dọ die:
“Na omẹ ehelẹ to ehe dọ wutu,
Todin, yẹn na hẹn ohó ṣie lẹ zun miyọ́n to onù towe mẹ,+
Omẹ ehelẹ nasọ taidi nake,
Podọ e nasọ fiọ yé.”+
15 “Hiẹ owhé Islaeli tọn E, pọ́n, yẹn na hẹn akọta de wá ji we sọn fidindẹn,”+ wẹ Jehovah dọ.
“Akọta he ko dẹn to aimẹ de wẹ.
16 Ogába-hẹnnu yetọn taidi yọdò he to nùvo de;
Yemẹpo wẹ sọ yin awhànfuntọ lẹ.
17 Yé na và jibẹwawhé po núdùdù towe po sudo.+
Yé na hù visunnu towe lẹ po viyọnnu towe lẹ po sudo.
Yé na hù lẹngbọpa towe lẹ po kanlinpa towe lẹ po sudo.
Yé na hù vẹntin po ovòtin towe lẹ po sudo.
Yé na yí ohí do và tòdaho gángán he go hiẹ dejido lẹ sudo.”
18 “Ṣigba, etlẹ yin to azán enẹlẹ gbè, yẹn ma na sukúndona we pete gba,”+ wẹ Jehovah dọ. 19 Podọ, eyin yé kanse dọ, ‘Naegbọn Jehovah Jiwheyẹwhe mítọn do wà onú ehe lẹpo hẹ mí?’ hiẹ na gblọnna yé dọ, ‘Kẹdẹdile mìwlẹ gbẹ́ mi dai bo sẹ̀n yẹwhe jonọ de to aigba mìtọn ji, mọ wẹ mìwlẹ na sẹ̀n jonọ lẹ to aigba he ma yin mìtọn de ji do.’”+
20 Dọ ehe to owhé Jakọbu tọn gbè,
Podọ lá ẹ to Juda, dọmọ:
21 “Mì sè ehe, mì omẹ nulunọ po gugutọ lẹ po emi:*+
22 ‘Be mì ma nọ dibusi mi wẹ ya?’ wẹ Jehovah dọ,
‘Be mìwlẹ ma na sisọ to nukọn ṣie wẹ ya?
Yẹn wẹ yí tọkẹ́n do basi dogbó ohù tọn,
Aṣẹdai tẹgbẹ tọn de he ma sọgan diọ.
Dile etlẹ yindọ agbówhẹn etọn lẹ nọ to hihò, yé ma sọgan duto e ji;
Eyin agbówhẹn etọn lẹ tlẹ hò zingidi, yé ma sọgan zẹ̀ e go.+
23 Ṣigba, omẹ ehelẹ tindo ahun tasinsinyẹn po atẹṣiṣi tọn de po;
Yé ko lẹ́ jẹ apadopo bo hodo aliho yetọn titi.+
24 Yé masọ nọ dọ to ahun yetọn mẹ dọ:
“Todin, mì gbọ mí ni dibusi Jehovah Jiwheyẹwhe mítọn,
Yèdọ Mẹhe nọ na mí jikun to ojlẹ etọn mẹ,
Enẹ wẹ jikun afò-whenu tọn po amakikọ-whenu tọn po,
Mẹhe nọ hẹn ẹn diun dọ osẹ dide jibẹwawhé tọn lẹ ma gblá.”+
25 Nuṣiwa mìtọn titi lẹ wẹ ko glọnalina onú ehelẹ ma nado wá aimẹ;
Ylando mìtọn titi lẹ wẹ ko hò nudagbe lẹ yí sọn mì si.+
26 Na mẹylankan lẹ tin to omẹ ṣie lẹ mẹ.
Yé nọ to omẹ ṣọ́, taidi hẹ̀hùtọ he tọ̀pọwu lẹ.
Yé wleawuna fẹ́ṣà mẹhusudo tọn de dai.
Gbẹtọ lẹ wẹ yé sọ nọ wle.
27 Taidi ajà he mẹ ohẹ̀ lẹ gọ́,
Mọ wẹ owhé yetọn lẹ gọ́ na oklọ do niyẹn.+
Enẹwutu wẹ yé do lẹzun huhlọnnọ bosọ jẹ adọkun.
28 Yé ko dojó bosọ to sisẹ́;
Yé ko tlọ biọ oylan mẹ pete.
Yé ma nọ nọgodona whẹdida dodo tọṣiọvi lẹ tọn,+
Na yé nido sọgan duto e ji;
Yé sọ nọ tẹ̀ whẹdida dodo wamọnọ lẹ.’”+
29 “Be yẹn ma na hẹn yé nado dogbè onú ehelẹ tọn ya?” wẹ Jehovah dọ.
“Be yẹn* ma na yiahọsu na dee to akọta mọnkọtọn go ya?
30 Nudobu mẹhẹnjọsi tọn de ko wá aimẹ to aigba lọ ji:
31 Yẹwhegán lẹ to dọdai lalo tọn dọ,+
Yẹwhenọ lẹ sọ nọ paṣẹ yedetiti tọn.
Podọ omẹ ṣie lẹ yiwanna domọ.+
Ṣigba etẹwẹ mì na wà to whenue opodo lọ na wá?”
6 Visunnu Bẹnjamini tọn lẹ emi, mì yì dín fibẹtado to olá na Jelusalẹm.
Na nugbajẹmẹji de to dindọnsẹpọ sọn agewaji, yèdọ nuvasudo daho de.+
2 Viyọnnu Ziọni tọn taidi yọnnu whanpẹnọ he yè nọ kẹ́ de.+
3 Lẹngbọhọtọ lẹ po kanlin yetọn lẹ po na wá.
4 “Wleawuna awhàn* sọta ẹ!
Fọ́n, bo gbọ mí ni tọ́nawhàn ẹn to owhè ṣádada mẹ!”
“Dindọn wẹ na mí, na owhè ko to họyì,
Na zinvlu whèjai tọn to dindẹn to aimẹ!”
5 “Fọ́n, bo gbọ mí ni tọ́nawhàn ẹn to zánmẹ
Podọ nado và atọ̀họ̀ gángán etọn lẹ sudo.”+
6 Na nuhe Jehovah awhànpa lẹ tọn dọ die:
“Sán atin bo dosla lẹdo Jelusalẹm.+
Tòdaho he dona dogbè de wẹ ewọ;
Nude ma tin to e mẹ adavo kọgbidinamẹ kẹdẹ.+
7 Kẹdẹdile dotọ̀ de nọ yin asisa osin fifá* tọn do,
Mọ wẹ tòdaho ehe yin asisa ylanwiwa tọn de do niyẹn.
Danuwiwa po nuvasudo po yin sisè to e mẹ;+
Azọ̀n po azọ̀nylankan po to nukọn ṣie to whepoponu.
8 Jelusalẹm E, kẹalọyi avase, eyin e ma yinmọ yẹn* na gbẹ́ we dai taidi awuhiọnu de;+
Yẹn na hẹn we jẹvọ́, yèdọ aigba he ji mẹde ma na nọ.”+
9 Nuhe Jehovah awhànpa lẹ tọn dọ die:
“Yé na wéwélu pipotọ Islaeli tọn mlẹnmlẹn taidi sinsẹ́n godo tọn lẹ to vẹntin de ji.
Mì yìn alọ gbọn e mẹ whladopo dogọ taidi mẹhe to ovẹn sinsẹ́n lẹ bẹpli sọn vẹntin lẹ ji.”
10 “Mẹnu wẹ yẹn na dọhona bo na avase?
Mẹnu wẹ na dotoai?
Pọ́n! Otó yetọn lẹ ko sú,* sọmọ bọ yé ma sọgan dotoai.+
Pọ́n! Ohó Jehovah tọn ko lẹzun nude he yé nọ vlẹko;+
Yé ma nọ mọ awuvivi depope to e mẹ.
11 Enẹwutu, yẹn gọ́ na adi Jehovah tọn,
Podọ agbọ́ ko pé mi nado hẹn ẹn do homẹ.”+
“Kọ̀n ẹn jẹgbonu do yọpọvu de ji to tòhomẹ-liho ji,+
Yèdọ do dẹpẹ he bẹ yede pli lẹ ji.
12 Owhé yetọn lẹ na yin zizejo na mẹdevo lẹ,
To pọmẹ hẹ ogle yetọn lẹ po asi yetọn lẹ po.+
Na yẹn na dlẹnalọ ṣie jẹgbonu sọta mẹhe nọ nọ̀ aigba lọ ji lẹ,” wẹ Jehovah dọ.
13 “Na sọn omẹ pẹvi ji jẹ daho ji, dopodopo yetọn wẹ to mẹhodu;+
Sọn yẹwhegán ji jẹ yẹwhenọ ji, dopodopo yetọn wẹ to nuyiwa po oklọ po.+
14 Yé sọ nọ tẹnpọn nado hẹnazọ̀ngbọna omẹ ṣie lẹ to aliho mọmọ tọn mẹ,* bo nọ dọ dọ,
‘Jijọho tin! Jijọho tin!’
To whenuena jijọho de ma tin.+
15 Be winyan nọ hù yé na osùnú he yé ko wà lẹ wutu ya?
Winyan ma nọ hù yé paali!
Yé ma tlẹ yọ́n nuhe yin winyan lọsu!+
Enẹwutu, yé na jai jẹ mẹhe ko jai lẹ mẹ.
To whenue yẹn na hẹn yasanamẹ wá yé ji, yé na dahli,” wẹ Jehovah dọ.
16 Nuhe Jehovah dọ die:
“Ṣite to ali plitẹn lẹ bo pọ́n.
Kanhose gando ali hoho tọn lẹ go,
Kàn ali dagbe lọ biọ bosọ zinzọnlin gbọn e ji,+
Podọ mì mọ gbọjẹ na mìdelẹ.”*
Ṣigba, yé dọmọ: “Mí ma na zinzọnlin gbọn e ji.”+
Ṣigba, yé dọmọ: “Mí ma na dotoai.”+
18 “Enẹwutu, akọta lẹ emi, mì sè!
Podọ, mì mẹplidopọ lẹ, mì yọnẹn,
Yèdọ nuhe na jọ do yé go.
19 Aigba E, dotoai!
Yẹn na hẹn nugbajẹmẹji de wá omẹ ehelẹ ji+
Taidi sinsẹ́n ayikinkan yetọn titi lẹ tọn,
Na yé ma payi ohó ṣie lẹ go paali
Yé sọ gbẹ́ osẹ́n* ṣie dai.”
20 “Etẹwẹ enẹ yin na mi, eyin mì hẹn nuyọnwan gblingblin wá sọn Ṣeba
Podọ ofán owán gblingblinnọ lẹ sọn otò dindẹn de mẹ?
Avọ́nunina mimẹ̀ blebu mìtọn ma yin alọkẹyi,
Podọ avọ́sinsan mìtọn lẹ masọ nọ hẹn homẹhun mi.”+
21 Enẹwutu, nuhe Jehovah dọ die:
“Todin, yẹn na ze zannu ahlida tọn donukọnna omẹ ehelẹ,
Yé nasọ dahli jẹ yé ji,
Otọ́ lẹ po visunnu lẹ po to pọmẹ,
Kọmẹnu de po hatọ etọn po,
Yemẹpo nasọ dọ̀n.”+
22 Nuhe Jehovah dọ die:
“Pọ́n! Akọta de ja sọn agewaji,
Akọta daho de nasọ fọ́n sọn fie dẹn hugan aigba tọn lẹ.+
23 Yé na ze ogá po owhán po.
Kanylantọ wẹ yé bọ yé masọ tindo lẹblanu.
Ogbè yetọn na dọnú di ohù,
Yé sọ hẹ osọ́ lẹ ji.+
Yé na tọ́nawhàn we taidi sunnu awhànfuntọ de, hiẹ viyọnnu Ziọni tọn E.”
24 Mí ko sè linlin gando e go.
25 A tọ́nyi danji blo,
A sọ zinzọnlin gbọn aliho lọ ji blo,
Na ohí to alọnu na kẹntọ lọ;
Na mẹlẹpo to obu ji.
26 Hiẹ viyọnnu omẹ ṣie lẹ tọn E,
Ze odẹ́vọ̀ do+ bo bli gbọn afín mẹ.
Yí avihàn sinsinyẹn do nọ aluẹmẹ taidi na visunnu dopo gee de,+
Na mẹvasudotọ lọ na wá mí ji to ajiji mẹ.+
27 “Yẹn ko yí we* do basi gànkọ̀ntọ de to omẹ ṣie lẹ ṣẹnṣẹn,
Yèdọ mẹde he nọ gbejenupọn kitokito;
Hiẹ dona doayinugo bo dindona aliho yetọn.
Yé taidi gànvẹẹ po gànyuu po;
Yemẹpo wẹ ko gblezọn.
29 Wọhún ayáwatọ lẹ tọn ko fiọ.
Sunmí wẹ nọ tọ́n sọn miyọ́n yetọn mẹ.
30 E họnwun dọ fataka he yè ko gbẹdai wẹ gbẹtọ lẹ na nọ ylọ yé dọ,
Na Jehovah ko gbẹ́ yé dai wutu.”+
7 Ohó he Jehovah dọna Jelemia die: 2 “Ṣite to họngbo owhé Jehovah tọn nù bo lá owẹ̀n ehe to finẹ dọ, ‘Mì sè ohó Jehovah tọn, mì omẹ Juda tọn lẹpo emi, he nọ biọ họngbo ehelẹ mẹ nado dẹ́ do odò na Jehovah. 3 Nuhe Jehovah awhànpa lẹ tọn, yèdọ Jiwheyẹwhe Islaeli tọn dọ die: “Mì vọ́ aliho po nuyiwa mìtọn lẹ po jlado, yẹn nasọ dike mì ni gbọṣi nọtẹn ehe mẹ.+ 4 Mì dejido ohó oklọ tọn lẹ go blo, gbọn didọ dali dọ, ‘Tẹmpli Jehovah tọn, tẹmpli Jehovah tọn, yèdọ tẹmpli Jehovah tọn wẹ ehe!’*+ 5 Na eyin mì vọ́ aliho po nuyiwa mìtọn lẹ po jlado nugbonugbo; eyin mì nọ dawhẹ dodo to mẹde po kọmẹnu etọn po ṣẹnṣẹn;+ 6 eyin mì ma gbidikọna mẹhe to jonọ-gbéji lẹ, tọṣiọvi lẹ po asuṣiọsi lẹ po;+ eyin mì masọ sọ̀n ohùn homẹvọnọ tọn dai to nọtẹn ehe mẹ; podọ eyin mì ma hodo yẹwhe devo lẹ nado hẹn awugble mìdelẹ;+ 7 whenẹnu wẹ yẹn na dike mì ni gbọṣi nọtẹn ehe mẹ, yèdọ to aigba he yẹn ko na tọgbo mìtọn lẹ kakadoi* lọ ji.”’”
8 “Ṣigba, mìwlẹ to jidedo ohó oklọ tọn lẹ go+—e họnwun dọ enẹ ma na hẹn ale depope wá na mì. 9 Be mìwlẹ na nọ fìnnú,+ hùhlọ̀n, deayọ, whlé whiwhle lalo tọn,+ basi avọ́sinsan* lẹ na Baali,+ bosọ hodo yẹwhe he mì ma ko yọnẹn lẹ, 10 podọ, enẹgodo bo wá ṣite to nukọn ṣie to ohọ̀ ehe mẹ, he go yinkọ ṣie nọ yin yiylọ do bo na dọ dọ, ‘Míwlẹ na yin whinwhlẹngán,’ mahopọnna osùnú ehe lẹpo he mì to wiwà wẹ ya? 11 Be ohọ̀ ehe he go yinkọ ṣie nọ yin yiylọ do ko lẹzun odò jaguda lẹ tọn to nukun mìtọn mẹ wẹ ya?+ Yẹnlọsu wẹ ko mọ ehe todin,” wẹ Jehovah dọ.
12 “‘Ṣigba, todin mì yì nọtẹn ṣie to Ṣilo,+ fie yẹn hẹn oyín ṣie nado nọ to tintan whenu+ bo pọ́n nuhe yẹn wà hẹ ẹ na ylanwiwa omẹ ṣie he yin Islaelivi lẹ tọn wutu.+ 13 Ṣigba, mìwlẹ zindonukọn bo to onú ehe lẹpo wà,’ wẹ Jehovah dọ, ‘podọ dile etlẹ yindọ yẹn dọhona mì whlasusu,* mìwlẹ ma sè.+ Yẹn to yiylọ mì mapote, ṣigba mì ma gblọn.+ 14 Enẹwutu, yẹn na wà nudopolọ na ohọ̀ he go yinkọ ṣie nọ yin yiylọ do lọ,+ ehe go mìwlẹ dejido,+ podọ na nọtẹn ehe he yẹn na mìwlẹ po tọgbo mìtọn lẹ po, kẹdẹdile yẹn ko wà na Ṣilo do.+ 15 Yẹn na ze mì dlan sọn nukọn ṣie, kẹdẹdile yẹn ze nọvisunnu mìtọn lẹpo dlan do, yèdọ kúnkan Eflaimi tọn lẹpo.’+
16 “Na hiẹ tọn, a hodẹ̀ do omẹ ehelẹ tamẹ blo. A ze ogbè daga kavi hodẹ̀ kavi vẹvẹ do ota yetọn mẹ blo,+ na yẹn ma na dotoaina we.+ 17 Be hiẹ ma mọ nuhe wà yé te to tòdaho Juda tọn lẹ mẹ podọ to tòhomẹ-liho Jelusalẹm tọn lẹ ji wẹ ya? 18 Visunnu lẹ to nake ṣinyan pli, otọ́ lẹ to miyọ́n flọ, podọ asi lẹ to linfin yàn nado basi akla hìhì avọ́sinsan tọn lẹ hlan Ahọsi Olọn tọn,*+ yé sọ to avọ́nunina nùnù lẹ kọ̀n jẹgbonu hlan yẹwhe devo lẹ nado hẹn homẹgble mi.+ 19 ‘Ṣigba be yẹn wẹ yé to awuhẹngblena* ya?’ wẹ Jehovah dọ. ‘Be e ma yin yedelẹ wẹ, nado dowinyan yede ya?’+ 20 Enẹwutu, nuhe Oklunọ Nupojipetọ Jehovah dọ die, ‘Pọ́n! Homẹgble ṣie po adi ṣie po na yin kinkọnjẹgbonu do nọtẹn ehe ji,+ yèdọ do gbẹtọ po kanlin po ji, do atin danji tọn lẹ po sinsẹ́n aigba lọ tọn lẹ po ji; e na jizò bo ma na yin ṣíṣí.’+
21 “Nuhe Jehovah awhànpa lẹ tọn, yèdọ Jiwheyẹwhe Islaeli tọn dọ die, ‘Mì zindonukọn, mì yí avọ́nunina mimẹ̀ blebu mìtọn lẹ dogọ avọ́sannu devo lẹ bosọ dù olàn yetọn lẹ na mìde.+ 22 Na to azán he gbè yẹn de tọgbo mìtọn lẹ sọn aigba Egipti tọn ji, yẹn ma dọho hẹ yé kavi degbena yé gando avọ́nunina mimẹ̀ blebu po avọ́sinsan lẹ po go gba.+ 23 Ṣigba, yẹn na yé gbedide ehe dọmọ: “Mì setonuna ogbè ṣie, yẹn nasọ lẹzun Jiwheyẹwhe mìtọn bọ mìwlẹ na lẹzun omẹ ṣie lẹ.+ Mì dona zinzọnlin to aliho he yẹn degbe etọn na mì lẹpo ji, na e nido yin dagbe na mì.”’+ 24 Ṣigba, yé ma dotoai kavi sè;+ kakatimọ, yé zinzọnlin to ayikinkan* yetọn titi lẹ mẹ bo yí tasinsinyẹn do hodo ahun ylankan yetọn+ bosọ joagọyigodo kakati nado yinukọn, 25 sọn gbeegbe tọgbo mìtọn lẹ tọ́n sọn aigba Egipti tọn ji kakajẹ egbé.+ Enẹwutu, yẹn to yẹwhegán he yin devizọnwatọ ṣie lẹ dohlan mì mapote, yèdọ egbesọegbesọ, whlasusu.*+ 26 Ṣigba yé gbẹ́ nado dotoaina mi, yé masọ tuntoai.+ Kakatimọ, yé sinyẹnta* bo yinuwa to aliho he ylanhu tọgbo yetọn lẹ tọn mẹ!
27 “Hiẹ na dọho ehe lẹpo na yé,+ ṣigba yé ma na dotoaina we; hiẹ na ylọ yé, ṣigba yé ma na siọ we. 28 Hiẹ nasọ dọna yé dọ, ‘Ehe wẹ akọta lọ he ma setonuna ogbè Jehovah Jiwheyẹwhe yetọn tọn bosọ gbẹ́ nado kẹalọyi mẹplọnlọ. Nugbonọ-yinyin ko busẹ bo ma tlẹ sọ nọ yin nùdego to ṣẹnṣẹn yetọn ba.’*+
29 “Whlẹ́ oda he gọ́* ota towe bo bẹ dlan, podọ ké avihàn* de to okọ́ta he to agbá lẹ ji, na Jehovah ko gbẹ́ whẹndo ehe he ko doadihomẹna ẹn dai bo nasọ gbẹkọ e go. 30 ‘Na omẹ Juda tọn lẹ ko wà nuhe ylan to nukun ṣie mẹ,’ wẹ Jehovah dọ. ‘Yé ko do boṣiọ hiọawu yetọn lẹ ai to ohọ̀ he go yinkọ ṣie nọ yin yiylọ do lọ mẹ, nado hẹn ẹn flu.+ 31 Yé ko do ofi yiaga lẹ na Tofẹti to Agbàdo Visunnu Hinọmi tọn* mẹ,+ nado sọgan nọ fiọ visunnu po viyọnnu yetọn lẹ po to miyọ́n mẹ,+ yèdọ nude he yẹn ma degbe etọn, ehe ma tlẹ ko wá ayiha ṣie mẹ pọ́n.’*+
32 “‘Enẹwutu pọ́n! azán lẹ ja,’ wẹ Jehovah dọ, ‘whenue e ma nasọ nọ yin yiylọdọ Tofẹti kavi Agbàdo Visunnu Hinọmi tọn* ba, ṣigba Agbàdo Mẹhuhu tọn. Yé na to oṣiọ lẹ dì do Tofẹti kaka bọ otẹn ma na tin ba.+ 33 Podọ oṣiọ omẹ ehelẹ tọn na lẹzun núdùdù na ohẹ̀ agahomẹ tọn lẹ podọ na kanlin aigba lọ tọn lẹ, bọ mẹde ma na yàn yé.+ 34 Yẹn na hẹn nudidọ aglinjijẹ tọn po nudidọ ayajẹ tọn lọ po wá opodo, yèdọ ogbè asisunọ yọyọ lọ tọn po ogbè asiyọyọ lọ tọn+ po to tòdaho Juda tọn lẹ mẹ podọ to tòhomẹ-liho Jelusalẹm tọn lẹ ji, na otò lọ na yin gbigbakija wutu.’”+
8 Jehovah dọmọ: “To ojlẹ enẹ mẹ, ohú ahọlu Juda tọn lẹ tọn, ohú ahọvi etọn lẹ tọn, ohú yẹwhenọ lẹ tọn, ohú yẹwhegán lẹ tọn po ohú mẹhe nọ nọ̀ Jelusalẹm lẹ tọn po na yin bibẹ sọn yọdò yetọn lẹ mẹ. 2 Yé na yin titẹ́ do owhè nù, do osun nù, podọ do awhànpa olọn tọn lẹpo nukọn, ehe yé ko yiwanna bo sẹ̀n bosọ hodo bo doafọna bosọ litaina lẹ.+ Yé ma na yin bibẹpli, mọjanwẹ yé ma na yin dìdì. Yé na taidi ogbó to aigba nukunmẹ.”+
3 “Podọ pipotọ whẹndo ylankan ehe tọn he luntọ́n lẹ na mọdọ e pọnte dọ yé ni kú hugan dọ yé ni togbẹ̀ to fie yẹn na vúnvún yé pé gbọn lẹpo,” wẹ Jehovah awhànpa lẹ tọn dọ.
4 “Hiẹ nasọ dọna yé dọ, ‘Nuhe Jehovah dọ die:
“Be yé na jai bo ma nasọ fọ́n wẹ ya?
Eyin mẹde lẹkọ, be omẹ awetọ ma na lẹkọ ga ya?
5 Naegbọn omẹ Jelusalẹm tọn ehelẹ do peve to nugbonọ-mayin yetọn mẹ?
Yé yí oklọ do dó aṣa;
Yé gbẹ́ nado lẹkọ.+
6 Yẹn dotoai, yẹn sọ to sisè, ṣigba aliho he mẹ yé to hodọ te ma sọgbe.
Mẹdopo tata ma lẹnvọjọ sọn kanyinylan etọn mẹ kavi kanse dọ, ‘Etẹwẹ yẹn wà?’+
Dopodopo yetọn wẹ nọ to kọlẹyi aliho paa yetọn lẹ ji, taidi osọ́ he yí awuyiya do dlí biọ awhàn mẹ.
7 Adọwé lọsu to agahomẹ tlẹ nọ yọ́n ojlẹ etọn lẹ;*
Owhlé, agadawhlé po owhlẹ́n po nọ yọ́n whenue yé na lẹkọ.*
Ṣigba omẹ ṣie titi lẹ ma mọnukunnujẹ whẹdida Jehovah tọn mẹ.”’+
8 ‘Naegbọn mìwlẹ nado dọ dọ: “Míwlẹ yin nuyọnẹntọ bo tindo osẹ́n* Jehovah tọn”?
To whenuena e yindọ na nugbo tọn,+ wekantin lalo tọn wekantọ lẹ tọn ko yin yiyizan na lalodido kẹdẹ.
9 Nuyọnẹntọ lẹ ko yin winyando.+
Yé ko yin budona bo nasọ yin wiwle.
Pọ́n! Yé ko gbẹ́ ohó Jehovah tọn dai,
Nuyọnẹn tẹwẹ yé tindo lo?
10 Enẹwutu, sunnu devo lẹ wẹ yẹn na ze asi yetọn lẹ jo na,
Ogle yetọn lẹ na mẹdevo lẹ taidi nutindo;+
Na sọn omẹ pẹvi ji jẹ daho ji, dopodopo yetọn wẹ to mẹhodu;+
Sọn yẹwhegán ji jẹ yẹwhenọ ji, dopodopo yetọn wẹ to nuyiwa po oklọ po.+
11 Yé sọ nọ tẹnpọn nado hẹnazọ̀ngbọna viyọnnu omẹ ṣie lẹ tọn to aliho mọmọ tọn mẹ,* bo nọ dọ dọ,
“Jijọho tin! Jijọho tin!”
To whenuena jijọho de ma tin.+
12 Be winyan nọ hù yé na osùnú he yé ko wà lẹ wutu ya?
Winyan ma nọ hù yé paali!
Yé ma tlẹ yọ́n nuhe yin winyan lọsu!+
Enẹwutu, yé na jai jẹ mẹhe ko jai lẹ mẹ.
To whenue yẹn na hẹn yasanamẹ wá yé ji, yé na dahli,’+ wẹ Jehovah dọ.
13 ‘To whenue yẹn na bẹ yé pli, yẹn na hẹn opodo wá yé ji,’ wẹ Jehovah dọ.
‘Ovẹn sinsẹ́n de ma na pò to vẹntin ji, ovò sinsẹ́n de ma nasọ pò to ovòtin ji, podọ amà lẹ na hú.
Yé nasọ hẹn nuhe yẹn na yé bu.’”
14 “Naegbọn mí do sinai dofi?
Mì gbọ mí ni pli dopọ bo biọ tòdaho gángán lọ lẹ mẹ+ bosọ dọ̀n do finẹ.
Na Jehovah Jiwheyẹwhe mítọn na hù mí sudo,
E sọ na mí osin adínọ nado nù,+
Na mí ko waylando do Jehovah wutu.
15 Yè donukun jijọho, ṣigba nudagbe depope ma wá aimẹ,
Yè sọ donukun ojlẹ pọngbọ tọn, ṣigba nugbajẹmẹji wẹ wá!+
16 Nudidọ gbigbọ osọ́ etọn lẹ tọn yin sisè sọn Dani.
To whenue nudidọ awhágbe osọ́ asu etọn lẹ tọn wá aimẹ,
Aigba lọ blebu wẹ sisọ.
Yé wá bo và aigba lọ sudo po nuhe tin to e ji lẹpo po,
Yèdọ tòdaho lọ po mẹhe tin to e mẹ lẹ po.”
17 “Na yẹn na do odàn lẹ hlan ṣẹnṣẹn mìtọn,
Yèdọ odàn adínọ he yè ma sọgan hù aṣẹ na lẹ,
E họnwun dọ yé nasọ hẹ̀nadu mì,” wẹ Jehovah dọ.
18 Awubla ṣie ma sọgan gbọ;
Ahun ṣie to azọ̀njẹ.
19 Awhágbe he to alọgọ biọ de wá sọn aigba dindẹn de ji
Yèdọ sọn viyọnnu omẹ ṣie lẹ tọn dè:
“Be Jehovah ma tin to Ziọni wẹ?
Kavi be ahọlu etọn ma to e mẹ wẹ ya?”
“Naegbọn yé do yí boṣiọ pipà yetọn lẹ do hẹn homẹgble mi,
Yèdọ po yẹwhe jonọ ovọ́ yetọn lẹ po?”
20 “Ojlẹ jibẹwawhé tọn ko juwayi, alunlun ko wá vivọnu,
Ṣogan, mí ma ko yin whinwhlẹngán!”
21 Yẹn ko jẹflumẹ na awugble viyọnnu omẹ ṣie lẹ tọn tọn wutu;+
Yẹn to awubla sinsinyẹn mẹ.
Obu ko sọ jẹ ji e.
22 Be balsami* de ma tin to Giliadi wẹ ya?+
Kavi azọ̀nhẹngbọtọ* de ma tin to finẹ wẹ?+
Naegbọn viyọnnu omẹ ṣie lẹ tọn ma ko yin hinhẹn jẹgangan?+
9 Ṣo, eyin ota ṣie ko yin osin wẹ,
Bọ nukun ṣie lẹ yin asisa dasin tọn!+
Whenẹnu, yẹn na viavi to okle po ozán po
Na oṣiọ omẹ ṣie lẹ tọn wutu.
2 Ṣo, eyin yẹn ko tindo adọtẹn gbejizọnlinzintọ tọn de to danfafa ji wẹ!
Whenẹnu, yẹn na jo omẹ ṣie lẹ do bo yì sọn yé dè,
Na yemẹpo wẹ yin ayọdetọ lẹ,+
Yèdọ pipli mẹklọtọ lẹ tọn de.
3 Yé nọ dẹ́ odẹ́ yetọn taidi ogá de;
Lalo wẹ pavava do aigba lọ ji kakati nido yin nugbonọ-yinyin.+
“Yé peve to oylan mẹ,
Yé masọ nọ dotoaina mi paali,”+ wẹ Jehovah dọ.
4 “Mẹlẹpo ni to aṣeji gando kọmẹnu yetọn go,
Mì sọ dejido mẹhe tlẹ yin nọvisunnu mìtọn go blo.
5 Mẹdopodopo nọ to kọmẹnu etọn hòdu,
Mẹdepope masọ nọ dọ nugbo.
Yé ko plọn odẹ́ yetọn nado nọ dolalo.+
Yé hẹn agbọ́ pé yede gbọn nuhe ylan wiwà dali.
6 Oklọ mẹ wẹ mì to gbẹnọ te.
To oklọ yetọn mẹ, yé gbẹ́ nado yọ́n mi,” wẹ Jehovah dọ.
7 Enẹwutu, nuhe Jehovah awhànpa lẹ tọn dọ die:
“Yẹn na hẹn yé yọ́ bosọ tẹ́n yé pọ́n,+
Na nudevo tẹwẹ yẹn sọ sọgan wà na viyọnnu omẹ ṣie lẹ tọn?
8 Ogá mẹhusudo tọn de he nọ doyẹklọmẹ wẹ odẹ́ yetọn.
Mẹde nọ yí onù etọn do to ohó jijọho tọn dọ hẹ kọmẹnu etọn,
Ṣigba, nọ to pọ̀wutọna ẹn to ohò etọn mẹ.”
9 “Be yẹn ma na hẹn yé nado dogbè onú ehelẹ tọn ya?” wẹ Jehovah dọ.
“Be yẹn* ma na yiahọsu na dee to akọta mọnkọtọn go ya?+
10 Yẹn na viavi bosọ doavigbè do osó lẹ ji
Yẹn nasọ ké avihàn* de do kanlindugbo danfafa tọn lẹ ji,
Na yé ko fiọ sọmọ bọ mẹde ma sọgan gbọn finẹ wayi,
Podọ nudidọ kanlin-yìnyìn lẹ tọn ma yin sisè.
Ohẹ̀ agahomẹ tọn lẹ po kanlin lẹ po ko họnyi; yé ko yì.+
11 Yẹn na hẹn Jelusalẹm zun okiti zannu tọn,+ yèdọ adọ́ avún gbémẹ tọn lẹ tọn,+
Yẹn nasọ hẹn tòdaho Juda tọn lẹ gbọgbé, bọ mẹdepope ma na nọ nọ̀ yé mẹ.+
12 Mẹnu wẹ yin nuyọnẹntọ sọmọ nado mọnukunnujẹ ehe mẹ?
Mẹnu wẹ Jehovah ko yí onù etọn do dọhona, na ewọ nido lá ẹ?
Naegbọn aigba lọ do yin huhusudo?
Naegbọn e ko fiọ taidi danfafa,
Sọmọ bọ mẹdepope ma to jujugbọn e ji?”
13 Jehovah gblọn dọmọ: “Na yé gbẹ́ osẹ́n* ṣie he yẹn na yé lẹ dai, podọ na yé ma hodo yé, bo masọ setonuna ogbè ṣie wutu wẹ. 14 Kakatimọ, yé yí tasinsinyẹn do yinuwa sọgbe hẹ ahun yetọn titi lẹ,+ yé sọ hodo boṣiọ Baali tọn lẹ, dile otọ́ yetọn lẹ ko plọn yé nado nọ wà do.+ 15 Enẹwutu, nuhe Jehovah awhànpa lẹ tọn, yèdọ Jiwheyẹwhe Islaeli tọn dọ die, ‘Yẹn na hẹn omẹ ehelẹ nado dù vivẹ́, yẹn nasọ hẹn yé nado nù osin adínọ.+ 16 Yẹn na vúnvún yé pé gbọn akọta he yewlẹ po otọ́ yetọn lẹ po ma yọnẹn lẹ mẹ,+ yẹn nasọ hẹn ohí de nado jẹgodona yé kakajẹ whenue yẹn na sukúndona yé.’+
17 Nuhe Jehovah awhànpa lẹ tọn dọ die,
‘Mì yinuwa po nuyọnẹn po.
Mì bẹ yọnnu he nọ ji avihàn* lẹ pli,+
Mì sọ basi oylọna yọnnu azọ́nyọnẹntọ lẹ nado wá,
18 Na yé nido yawu bo do avi na mí,
Na nukun mítọn lẹ nido gọ́ na dasin
Podọ na nukundama mítọn lẹ nido yọ̀n.+
19 Na avigbè ko yin sisè sọn Ziọni:+
“Lehe mí ko yin vivasudo do sọ!
Lehe winyan mítọn yin daho do sọ!
Na mí ko jo aigba lọ do, yé ko sọ họ́ owhé mítọn lẹ liai.”+
20 Mì yọnnu lẹ emi, mì sè ohó Jehovah tọn.
Na otó mìtọn ni sè ohó he tọ́n sọn onù etọn mẹ.
21 Na okú ko wá mí ji gbọn fleṣe mítọn lẹ nù;
E ko biọ atọ̀họ̀ gángán mítọn lẹ mẹ
Nado bẹ ovi lẹ yì sọn tòhomẹ-liho lẹ ji
Podọ dẹpẹ lẹ sọn tòplitẹn lẹ.’+
22 Dọna yé dọ, ‘Nuhe Jehovah dọ die:
“Oṣiọ omẹ ṣie lẹ tọn na flẹ taidi ogbó to aigba nukunmẹ,
Taidi jinukun he ṣẹṣẹ yin sinsánliai bo yin bibẹdo gọnu-gọnu to gbingbẹ̀ntọ godo,
Mẹdepope ma nasọ tin nado bẹ yé pli.”’”+
23 Nuhe Jehovah dọ die:
“Nuyọnẹntọ ni ma doawagun na nuyọnẹn etọn wutu blo;+
Hlọnhlọnnọ ni ma doawagun na hlọnhlọn etọn wutu blo;
Podọ adọkunnọ ni ma doawagun na adọkun etọn lẹ wutu blo.”+
24 “Ṣigba, mì gbọ mẹhe to awagundo, ni doawagun gando ehe go:
Dọ ewọ tindo zinzin bo tindo oyọnẹn gando go e,+
Dọ yẹn wẹ Jehovah, Mẹhe nọ do owanyi nugbo, whẹdida dodo po dodowiwa po hia to aigba ji,+
Na to onú ehelẹ mẹ wẹ yẹn nọ mọ homẹhunhun te,”+ wẹ Jehovah dọ.
25 “Pọ́n! Azán lẹ ja,” wẹ Jehovah dọ, “bọ yẹn na biọ to mẹdepope he gboadà, ṣogan bo gbẹ́ yin adàmagbonọ si nado dogbè,+ 26 yèdọ Egipti,+ Juda,+ Edomi,+ Amọninu lẹ,+ Moabi+ po mẹhe whlẹ́ topá yetọn lẹpo po he nọ nọ̀ danfafa ji;+ na akọta lọ lẹpo wẹ yin adàmagbonọ, podọ owhé Islaeli tọn lẹpo wẹ ma gboadà to ahun mẹ.”+
10 Hiẹ owhé Islaeli tọn E, sè ohó he Jehovah ko dọ sọta we. 2 Nuhe Jehovah dọ die:
“A plọn aliho akọta lẹ tọn blo,+
A sọ dike ohia olọn tọn lẹ dobuna we blo
Na yé nọ dobuna akọta lẹ wutu.+
3 Na yẹdoklọmẹnu* de wẹ aṣa akọta lẹ tọn.
Atin zungbo mẹ tọn he yin sinsánliai de poun wẹ e yin,
4 Yé yí fataka po sika po do doaṣọ́na ẹn+
Yé sọ yí ṣówhènú po oṣó po do ján ẹn sọmọ bọ e ma sọgan flẹ.+
5 Taidi yẹblẹ de to ogle kukumbeli tọn mẹ, yé ma sọgan dọho;+
Yé dona nọ yin zize, na yé ma sọgan zinzọnlin.+
A dibuna yé blo, na yé ma sọgan gbleawunamẹ,
Mọjanwẹ yé ma sọgan wà dagbe depope do niyẹn.”+
6 Mẹdepope ma taidi hiẹ, Jehovah E.+
Hiẹ klo, podọ oyín towe sọ yin daho bosọ yin hlọnhlọnnọ.
7 Mẹnu wẹ ma na dibusi we, hiẹ Ahọlu akọta lẹ tọn E,+ na hiẹ wẹ jẹ;
Na to mẹhe yin nuyọnẹntọ lẹpo to akọta lẹ mẹ, podọ to ahọluduta yetọn lẹpo mẹ,
Mẹdepope ma tin taidi hiẹ to aliho depope mẹ.+
8 Yemẹpo wẹ yin wunvinọ bosọ yin nulunọ.+
Yẹdoklọmẹnu* de poun wẹ anademẹ sọn atin de dè yin.+
9 Agbánvla fataka tọn lẹ nọ yin hinhẹnwa sọn Talṣiṣi+ podọ sika sọn Ufazi,
Alọnuzọ́n anazọ́nwatọ de tọn, he gànkọ̀ntọ de yí alọ etọn lẹ do basi.
Sekan juju po sekan sopẹ́-sinmẹnọ po wẹ yè yí do basi avọ̀ yetọn.
Onú ehe lẹpo wẹ yin bibasi gbọn anazọ́nwatọ azọ́nyọnẹntọ lẹ dali.
10 Ṣigba, Jiwheyẹwhe wẹ Jehovah yin nugbonugbo.
Ewọ wẹ Jiwheyẹwhe ogbẹ̀nọ+ lọ podọ Ahọlu madopodo.+
Aigba na sisọ na homẹgble etọn wutu,+
Akọta depope ma sọgan nọte pehẹ whẹgbledomẹ etọn.
11 * Nuhe hiẹ na dọna yé die:
“Yẹwhe he ma basi olọn po aigba po lẹ
Na busẹ sọn aigba ji podọ sọn olọn ehelẹ glọ.”+
12 Ewọ wẹ Mẹhe basi aigba gbọn huhlọn etọn dali,
Mẹhe do aigba he nọ yọ́n na jinukun ai gbọn nuyọnẹn etọn gblamẹ+
Podọ mẹhe dlẹn olọn gbọn nukunnumọjẹnumẹ etọn gblamẹ.+
13 Eyin ogbè etọn yin sisè,
Osin he to olọn mẹ lẹ nọ jẹ zingidi hò ji,+
14 Mẹlẹpo to nuyiwa matin lẹnpọn dagbe po oyọnẹn po.
15 Yẹdoklọmẹnu,* yèdọ aṣagbọ́nu de wẹ yé.+
To azán nulẹnjo tọn gbè, yé na dọ̀n.
Jehovah awhànpa lẹ tọn wẹ e nọ yin.+
17 Ṣinyan agbàn towe lẹ pli sọn kọmẹ,
Hiẹ yọnnu he yè dosla lẹdo E.
18 Na nuhe Jehovah dọ die:
“Yẹn na dlan mẹhe nọ nọ̀ aigba lọ ji lẹ tọ́n sọn e ji to ojlẹ ehe mẹ,+
Yẹn nasọ hẹn awufiẹsa wá yé ji.”
19 Dindọn na mi, na awugble ṣie* wutu!+
Apà ṣie ma sọgan kú.
Yẹn sọ dọmọ: “E họnwun dọ azọ̀n ṣie die, yẹn sọ dona doakọnna ẹn.
20 Gòhọ ṣie ko yin vivasudo, okàn gòhọ ṣie tọn lẹpo ko sọ yin winwẹ́n.+
Visunnu ṣie lẹ ko jo mi do bo masọ tin ba.+
Depope to yé mẹ ma yin jijodo nado vlọ́n gòhọ ṣie kavi kẹ́ avọ̀ gòhọ ṣie tọn lẹ.
Enẹ wẹ zọ́n bọ yé ma yinuwa po zinzin po,
Lẹngbọpa yetọn lẹpo ko sọ yin gbigbà pé.”+
22 Dotó! Linlin de! E ja!
Nudidọ sinsinyẹn de ja sọn aigba he to agewaji ji,+
Nado hẹn tòdaho Juda tọn lẹ gbọgbé, yèdọ nado hẹn ẹn zun adọ́ avún gbémẹ tọn lẹ tọn.+
23 Jehovah E, yẹn yọnẹn ganji, dọ aliho gbẹtọ tọn ma tin to alọ edetiti tọn mẹ.
E ma tin to huhlọn mẹhe to zọnlinzin tọn mẹ nado deanana afọdide etọn lẹ.+
24 Jehovah E, yí whẹdida towe do wọhẹ mi,
Ṣigba, e ni ma yin to adi towe mẹ blo,+ na hiẹ nikaa hù mi sudo.+
25 Kọ̀n homẹgble towe do akọta he gbẹ́ we dai lẹ ji,+
Podọ do whẹndo he ma nọ ylọ oyín towe lẹ ji.
Na yé ko tlẹ́n Jakọbu dù.+
Mọwẹ, yé ko tlẹ́n ẹn dù bo ko dibla sukúndona ẹn,+
Yé ko sọ hẹn aigba etọn jẹvọ́.+
11 Ohó he Jehovah dọna Jelemia die: 2 “Mì omẹ ehelẹ, mì sè ohó alẹnu ehe tọn lẹ!
“Dọ* yé na omẹ Juda tọn lẹ po tòmẹnu Jelusalẹm tọn lẹ po 3 bo dọna yé dọ, ‘Nuhe Jehovah Jiwheyẹwhe Islaeli tọn dọ die: “Mẹhodẹ̀do wẹ mẹlọ he ma setonuna ohó alẹnu ehe tọn lẹ,+ 4 he yẹn degbe etọn na tọgbo mìtọn lẹ to azán he gbè yẹn de yé tọ́n sọn aigba Egipti tọn ji,+ yèdọ sọn zòhọ gànkọ̀ntọ tọn lọ mẹ,+ dọmọ, ‘Mì setonuna ogbè ṣie, mì sọ wà nuhe yẹn degbe etọn na mì lẹpo; mìwlẹ nasọ lẹzun omẹ ṣie lẹ, yẹn nasọ lẹzun Jiwheyẹwhe mìtọn,+ 5 na yẹn nido hẹn whiwhle he yẹn whlé na tọgbo mìtọn lẹ di, yèdọ nado na yé aigba he ji anọ́sin po owín po to sisà te lọ,+ dile e yin do to egbé.’”’”
Yẹn sọ gblọn dọmọ: “Jehovah E, Niṣẹ.”*
6 Whenẹnu wẹ Jehovah dọna mi dọmọ: “Lá ohó ehe lẹpo to tòdaho Juda tọn lẹ mẹ, podọ to tòhomẹ-liho Jelusalẹm tọn lẹ ji dọmọ: ‘Mì sè ohó alẹnu ehe tọn lẹ bo setonuna yé. 7 Na yẹn dotuhomẹna tọgbo mìtọn lẹ sinsinyẹn to azán he gbè yẹn de yé tọ́n sọn aigba Egipti tọn ji kakajẹ egbehe, bosọ nọ to tudohomẹna yé gbọzangbọzan* dọmọ: “Mì setonuna ogbè ṣie.”+ 8 Ṣigba, yé ma dotoai kavi tuntoai; kakatimọ, dopodopo yetọn yí tasinsinyẹn do to nuyiwa sọgbe hẹ ahun ylankan yetọn.+ Enẹwutu wẹ yẹn hẹn ohó alẹnu ehe tọn he yẹn degbe etọn na yé nado nọ yìn lẹpo wá oflin mẹ na yé, ṣigba yé gbẹ́ nado setonuna.’”
9 Jehovah sọ dọna mi dọmọ: “Sébibla de tin to omẹ Juda tọn lẹ po tòmẹnu Jelusalẹm tọn lẹ po ṣẹnṣẹn. 10 Yé ko lẹkọyi nuṣiwa tọgbo hohowhenu tọn yetọn lẹ tọn kọ̀n, yèdọ mẹhe gbẹ́ nado setonuna ohó ṣie lẹ.+ Yelọsu lẹ ga ko hodo yẹwhe devo lẹ bosọ sẹ̀n yé.+ Owhé Islaeli tọn po owhé Juda tọn po ko gbà alẹnu ṣie he yẹn basi hẹ tọgbo yetọn lẹ.+ 11 Enẹwutu, nuhe Jehovah dọ die, ‘Todin, yẹn na hẹn nugbajẹmẹji+ he mẹ yé ma sọgan họ̀ngán sọn de wá yé ji. Eyin yé dawhá ylọ mi na alọgọ, yẹn ma na dotoaina yé.+ 12 To whenẹnu, tòdaho Juda tọn lẹ po tòmẹnu Jelusalẹm tọn lẹ po na yì yẹwhe he yé nọ to avọ́san* hlan lẹ dè bo na biọ alọgọ,+ ṣigba yẹwhe lọ lẹ ma na whlẹn yé to aliho depope mẹ to whenue nugbajẹmẹji na wá yé ji. 13 Juda E, yẹwhe towe lẹ ko sù sọ tòdaho towe lẹ, sọha agbà he hiẹ ko doai hlan winyandomẹnu* lọ tọn lẹ sọ sù sọ tòhomẹ-liho Jelusalẹm tọn lẹ, yèdọ agbà lẹ nado basi avọ́sinsan lẹ hlan Baali.’+
14 “Na hiẹ* tọn, a hodẹ̀ do omẹ ehelẹ tamẹ blo. A sọ dawhá do ota yetọn mẹ kavi hodẹ̀ na yé blo,+ na yẹn ma na dotoaina yé whenue yé na dawhá ylọ mi na nugbajẹmẹji he na wá yé ji wutu.
15 Jlọjẹ tẹwẹ mẹyiwanna ṣie tindo nado tin to ohọ̀ ṣie mẹ
To whenue susu yetọn ko kàn ayiha ylankan lẹ?
Be yé na yí olàn wiwe* do glọnalina nugbajẹmẹji to whenue e na wá mì ji wẹ ya?
Be mì na jẹaglin to ojlẹ enẹ mẹ wẹ ya?
16 Jehovah ylọ mìwlẹ to ojlẹ de mẹ dọ atin olivie tọn he vùn,
Bo yọnwhanpẹ bosọ tindo sinsẹ́n dagbedagbe lẹ.
Po nudidọ zingidi daho de tọn po wẹ e yí do dó e zò,
Yé ko sọ wẹ́n alà etọn lẹ.
17 “Jehovah awhànpa lẹ tọn, yèdọ Didotọ towe,+ ko dọ dọ nugbajẹmẹji de na wá hiẹ ji na oylan he owhé Islaeli tọn po owhé Juda tọn po ko wà nado hẹn homẹgble mi gbọn avọ́sinsan lẹ bibasi hlan Baali dali wutu.”+
18 Jehovah ko hẹn ẹn zun yinyọnẹn na mi na yẹn nido yọnẹn;
To ojlẹ enẹ mẹ, hiẹ do nuhe wà yé te hia mi.
19 Yẹn taidi lẹngbọvu abọẹ-abọẹ de he yè plan jei hùhùtẹn.
Yẹn ma yọnẹn dọ yé to ayiha ylankan kàn do go e:+
“Gbọ mí ni và atin lọ po sinsẹ́n etọn lẹ po sudo,
Podọ dike mí ni sán ẹn sẹ̀ sọn aigba mẹhe togbẹ̀ lẹ tọn ji,
Bọ yinkọ etọn ma nado yin finflin gbede ba.”
Dike yẹn ni mọ ahọsuyi towe do yé ji,
Na yẹn ko ze owhẹ̀ ṣie do alọ towe mẹ.
21 Enẹwutu, ehe wẹ nuhe Jehovah dọ gando omẹ Anatọti tọn lẹ+ he to dindin nado yí ogbẹ̀* towe go he nọ dọ dọ: “Hiẹ ma dona dọ dọdai to oyín Jehovah tọn mẹ,+ eyin e ma yinmọ, hiẹ na kú to alọ mítọn mẹ”; 22 enẹwutu nuhe Jehovah awhànpa lẹ tọn dọ die: “Yẹn na hẹn yé nado dogbè. Dẹpẹ lẹ na kú gbọn ohí dali,+ visunnu yetọn lẹ po viyọnnu yetọn lẹ po nasọ kú gbọn huvẹ dali.+ 23 Mẹdepope ma na yin pipò dai na yé, na yẹn na hẹn nugbajẹmẹji wá omẹ Anatọti tọn lẹ ji,+ to owhe he mẹ e na yin bibiọ to yé si nado dogbè te.”
12 Jehovah E, dodonọ wẹ hiẹ+ to whenue yẹn hẹn ahunmẹdunamẹnu ṣie lẹ wá dè we,
To whenue yẹn dọho hẹ we gando whẹho whẹdida tọn lẹ go.
Ṣigba, naegbọn mẹylankan lẹ do to kọdetọn dagbe tindo,+
Podọ naegbọn mẹklọtọ lẹ do to fẹẹmẹ?
2 Hiẹ do yé, yé ko sọ doadọ̀do.
Yé ko whẹ́n bo sẹ́n.
Hiẹ tin to nùflo yetọn ji, ṣigba a dẹn do linlẹn yetọn he whlá lẹ.*+
3 Ṣigba Jehovah E, hiẹ yọ́n mi ganji,+ a sọ mọ mi;
A ko gbeje ahun ṣie pọ́n bosọ mọdọ e tin to kọndopọ mẹ hẹ we.+
Ṣinyan yé dovo taidi lẹngbọ he jei hùhùtẹn lẹ,
Sọ de yé dovo na azán hùhù tọn.
4 Nawẹ akú na do to aigba lọ ji dẹnsọ
Bọ ogbé danji tọn lẹpo nasọ hú?+
Na oylan mẹhe nọ nọ̀ e ji lẹ tọn wutu,
Kanlin lẹ po ohẹ̀ lẹ po ko yin zizasẹ sọn e ji.
Na yé ko dọmọ: “Ewọ ma mọ nuhe na jọ do mí go.”
5 Eyin wezunhinhọ̀n hẹ gbẹtọ he yí afọ do to wezunhọ̀n lẹ hẹn agbọ́ pé we,
Nawẹ hiẹ sọgan họ̀nwezun hẹ osọ́ lẹ gbọn?+
Eyin a tlẹ dejido aigba jijọho tọn lọ go,
Nawẹ hiẹ na yinuwa to zungbo titli he to Jọdani pá lẹ mẹ gbọn?
6 Na nọvisunnu towe titi lẹ lọsu, yèdọ whédo otọ́ towe titi tọn,
Ko yinuwa hẹ we po oklọ po.+
Yé ko dawhá do ota na we.
A yí yé sè blo,
Eyin yé tlẹ dọho vivi lẹ na we.
7 “Yẹn ko gbẹ́ owhé ṣie dai;+ yẹn ko gbẹkọ ogú ṣie go.+
Yẹn ko jo mẹvivẹ ṣie* do alọmẹ na kẹntọ lẹ.+
8 Ogú ṣie ko taidi kinnikinni zungbo mẹ tọn de na mi.
E ko lì sọta ẹ.
Enẹwutu, yẹn ko gbẹwanna ẹn.
9 Ogú ṣie taidi ohẹ̀ nuwledutọ he tindo sinmẹ susu* de na mi;
Ohẹ̀ nuwledutọ devo lẹ lẹdo e bo tọ́nawhàn ẹn.+
Mì kanlin danji tọn lẹpo emi, mì wá, mì pli dopọ,
Mì wá dùnú.+
Yé ko hẹn mimá aigba tọn ṣie dagbedagbe lọ zun danfafa he jẹvọ́ de.
11 E ko lẹzun aigba he jẹvọ́ de.
Aigba lọ blebu ko yin hinhẹn jẹvọ́,
Ṣigba, enẹ ma duahunmẹna mẹdepope.+
12 Mẹvasudotọ lẹ ko gbọn ali gbigble danfafa tọn lẹpo ji wá,
Na ohí Jehovah tọn to mẹhusudo sọn adà dopo aigba lọ tọn ji jẹ adà awetọ aigba lọ tọn ji.+
Jijọho masọ tin na mẹdepope.*
13 Likun wẹ yé do, ṣigba owùn lẹ wẹ yé gbẹ̀n.+
Yé ko hẹn agbọ́ pé yede, ṣigba matin ale depope.
Sinsẹ́n yetọn lẹ na dowinyan yé
Na adi zogbe Jehovah tọn wutu.”
14 Nuhe Jehovah dọ sọta kọmẹnu kanylantọ ṣie lẹpo, he to alọdo ogú he yẹn hẹn omẹ ṣie Islaelivi lẹ nado tindo go die:+ “Yẹn na họ̀n yé sẹ̀ sọn aigba yetọn ji,+ yẹn nasọ họ̀n owhé Juda tọn sẹ̀ sọn ṣẹnṣẹn yetọn. 15 Ṣigba, to whenue yẹn na ko họ̀n yé sẹ̀ godo, yẹn nasọ wàlẹblanuna yé bo na hẹn dopodopo yetọn gọwá ogú yetọn ji, podọ aigba yetọn ji.”
16 “Eyin yé sọ magbe nado plọn aliho omẹ ṣie lẹ tọn podọ nado whlé gbọn oyín ṣie dali dọ, ‘Dile Jehovah togbẹ̀!’ kẹdẹdile yé plọn omẹ ṣie lẹ nado nọ whlé gbọn Baali dali do, to whenẹnu, yé na yin hinhẹn lodo to omẹ ṣie lẹ mẹ. 17 Ṣigba, eyin yé gbẹ́ nado setonu, yẹn nasọ họ̀n akọta enẹ lọsu sẹ̀, yẹn na họ̀n ẹn sẹ̀ bo nasọ và ẹ sudo,”+ wẹ Jehovah dọ.
13 Nuhe Jehovah dọna mi die: “Yì bo họ̀ gbànnú alavọ tọn de bo blá ẹ do alinkàn, ṣigba a ylọn ẹn do osin mẹ blo.” 2 Enẹwutu, yẹn họ̀ gbànnú de sọgbe hẹ ohó Jehovah tọn bosọ blá ẹ do alinkàn. 3 Jehovah sọ dọna mi whla awetọ dọmọ: 4 “Ze gbànnú he a họ̀ bo nọ do lọ bo fọnṣite bosọ dedo Euflate bo whlá ẹ do finẹ to osé-slo mẹ.” 5 Enẹwutu, yẹn yì bo whlá ẹ do Euflate tó kẹdẹdile Jehovah ko degbe etọn na mi do.
6 Ṣigba to azán susu lẹ godo, Jehovah dọna mi dọmọ: “Fọnṣite, bo yì Euflate kọ̀n bosọ ze gbànnú he yẹn degbena we nado whlá do finẹ lọ sẹ̀.” 7 Yẹn sọ yì Euflate kọ̀n bo kùn gbànnú lọ tọ́n sọn fie yẹn whlá ẹ do, yẹn sọ mọdọ gbànnú lọ ko gble; e masọ yọ́n-na-yizan to aliho depope mẹ ba.
8 Whenẹnu wẹ Jehovah dọna mi dọmọ: 9 “Nuhe Jehovah dọ die, ‘To aliho dopolọ mẹ, yẹn na và goyiyi Juda tọn po glòlò-jijlá Jelusalẹm tọn po sudo.+ 10 Mẹylankan ehelẹ he nọ gbẹ́ nado setonuna ohó ṣie lẹ+ bo nọ yí tasinsinyẹn do yinuwa sọgbe hẹ ahun yetọn titi,+ bo nọ hodo yẹwhe devo lẹ bo nọ sẹ̀n yé bosọ nọ litaina yé, na taidi gbànnú ehe he masọ yọ́n-na-yizan to aliho depope mẹ ba.’ 11 ‘Na kẹdẹdile sunnu de nọ sìn gbànnú do alinkàn do, mọ wẹ yẹn sìn owhé Islaeli tọn blebu po owhé Juda tọn blebu po do dee go do niyẹn,’ wẹ Jehovah dọ, ‘nado lẹzun akọta de,+ oyín de,+ pipà de po onú whanpẹnọ de po hlan mi. Ṣigba, yé ma setonu.’+
12 “Hiẹ nasọ do owẹ̀n ehe na yé dọmọ, ‘Nuhe Jehovah Jiwheyẹwhe Islaeli tọn dọ die: “Ovẹn dona yin hinhẹn gọ́ ozẹ́n daho lẹpo mẹ.”’ Yé nasọ gblọnna we dọ, ‘Be míwlẹ ma ko yọnẹn dọ ovẹn dona yin hinhẹn gọ́ ozẹ́n daho lẹpo mẹ wẹ ya?’ 13 Whenẹnu, dọna yé dọ, ‘Nuhe Jehovah dọ die: “Yẹn na hẹn mẹhe nọ nọ̀ aigba lọ ji lẹpo nado nùahànmú,+ yèdọ ahọlu he sinai do ofìn Davidi tọn ji lẹ, yẹwhenọ lẹ po yẹwhegán lẹ po, gọna mẹhe nọ nọ̀ Jelusalẹm lẹpo. 14 Yẹn nasọ hò ota otọ́ lẹ po visunnu lẹ po tọn do yede go,” wẹ Jehovah dọ.+ “Yẹn ma na do awuvẹmẹ hia kavi blawu kavi do lẹblanu hia yé to aliho depope mẹ; nudepope ma nasọ glọnalina mi nado và yé sudo.”’+
15 Mì sè bosọ dotoai.
Mì yin saklanọ blo, na Jehovah ko dọho.
16 Mì pagigona Jehovah Jiwheyẹwhe mìtọn
Whẹpo ewọ nido hẹn zinvlu wá
Podọ whẹpo afọ mìtọn lẹ nido dahli to osó lẹ ji to whèjai.
17 Podọ eyin mì gbẹ́ nado setonu,
Yẹn* na viavi to nuglọ na goyiyi mìtọn wutu.
Yẹn na kùn dasin susu, nukun ṣie lẹ nasọ yọ̀n,+
Na lẹngbọpa Jehovah tọn+ ko yin hinhẹn yì kanlinmọgbenu wutu.
18 Dọna ahọlu po onọ̀ ahọlu tọn po dọ,+ ‘Mì sinai to ofi he yìdo,
Na jẹgbakun whanpẹnọ mìtọn na flẹ sọn ota mìtọn.’
19 Họngbo tòdaho hùwaji tọn lẹ tọn ko yin súsú,* mẹde masọ tin nado hùn yé.
Mẹhe nọ nọ̀ Juda lẹpo ko yin bibẹ yì kanlinmọgbenu, yé ko yin bibẹ yì kanlinmọgbenu petepete.+
20 Ze nukun towe lẹ daga bo pọ́n mẹhe ja sọn agewaji lẹ.+
Fie wẹ lẹngbọpa he yè na we lọ te, yèdọ lẹngbọ whanpẹnọ towe lẹ?+
21 Etẹwẹ hiẹ na dọ to whenue yasanamẹ towe na wá
Sọn họntọn vivẹ́ towe he hiẹ ko tindo sọn bẹjẹeji lẹ dè?+
Be awufiẹsa ajipanu tọn lẹ ma na wá ji we taidi awufiẹsa yọnnu he to viji de tọn ya?+
22 Podọ, eyin hiẹ dọ to ahun towe mẹ dọ, ‘Naegbọn onú ehelẹ do wá ji e?’+
Na nuṣiwa sinsinyẹn towe wutu wẹ avọ̀ towe lẹ do yin didesẹ sọn gowe+
Bọ afọgbẹn towe lẹ do yin hinhẹn nado sè awuvẹ.
23 Be Kuṣinu* de sọgan diọ ayú etọn, kavi opọ̀ de sọgan diọ sinmẹ etọn wẹ ya?+
Eyin enẹ sọgan jọ wẹ, mì na ko penugo nado wà dagbe,
Mì mẹhe ko yin azọ́nplọn nado nọ wà oylan lẹ.
24 Enẹwutu, yẹn na vúnvún yé pé taidi núyọ he yin fúfú gbọn jẹhọn danfafa tọn dali.+
25 Adà mìtọn niyẹn, yèdọ mimá he yẹn ko jlẹ na mì,” wẹ Jehovah dọ,
26 Enẹwutu, yẹn na klọ́n avọ̀ mìtọn bo de mì jẹmẹ́,
Podọ winyan mìtọn na yin mimọ,+
27 Podọ walọ ayọdide tọn mìtọn+ po winwàn to wantuntun godo mìtọn po,
Galilọ gblezọn* mìtọn.
To okọ́ta lẹ ji, podọ to danji,
Yẹn ko mọ walọyizan he hiọawu mìtọn.+
Dindọn na we, Jelusalẹm E!
Nawẹ hiẹ na yin mawé dẹnsọ?”+
14 Nuhe Jehovah dọna Jelemia gando akúdido lọ go die:+
2 Juda to aluẹmẹ+ bọ họngbo etọn lẹ ko jẹkò.
Yé ko gble bo tlọ biọ kọmẹ,
Awhágbe de sọ hẹji sọn Jelusalẹm.
3 Klunọ yetọn lẹ sọ do devizọnwatọ* yetọn lẹ hlan nado yì dà osin.
Yé yì osindò* lẹ tó bo ma mọ osin depope.
Yé lẹkọ po ozẹ́n yetọn he to agbá lẹ po.
Winyan hù yé bọ yé sọ jẹflumẹ,
Yé sọ ṣinyọnnudo ota yetọn.
4 Na aigba lọ ko zẹ̀ wutu,
To whenuena e yindọ jikun ma ja do aigba lọ ji,+
Glesi lẹ jẹflumẹ bo ṣinyọnnudo ota yetọn.
5 Agbanlin asi danji tọn lọsu tlẹ ko gbẹkọ viyẹyẹ etọn go
Na ogbé-mú ma tin wutu.
6 Kẹtẹkẹtẹ gbémẹ tọn lẹ ṣite to okọ́ta he to agbá lẹ ji.
Yé to jẹhọn gbọ́n taidi avún gbémẹ tọn lẹ;
Nukun yetọn lẹ ma mọnú ganji na amamú ma tin wutu.+
7 Dile etlẹ yindọ nuṣiwa mítọn titi lẹ dekunnu sọta mí,
Jehovah E, yinuwa na oyín towe tọn wutu.+
Na nugbonọ-mayin mítọn ko sù,+
Podọ hiẹ wẹ mí ko wà oylan do.
8 Todido Islaeli tọn E, yèdọ Whlẹngántọ etọn+ to ojlẹ ayimajai tọn mẹ,
Naegbọn hiẹ do taidi jonọ to aigba lọ ji,
Taidi gbejizọnlinzintọ he nọte nado damlọn to zánmẹ poun?
9 Naegbọn hiẹ do taidi sunnu he ahun etọn gbàdo,
Taidi sunnu hlọnhlọnnọ de he ma sọgan whlẹnmẹ?
A gbẹ́ mí dai blo.
10 Nuhe Jehovah dọ gando omẹ ehelẹ go die: “Yé nọ jlo nado nọ to fuflupé;+ yé ma ko sọ payi afọdide yetọn lẹ go.+ Enẹwutu, homẹ Jehovah tọn ma hùn do yé go.+ Todin, ewọ na flin nuṣiwa yetọn bo nasọ hẹn yé nado dogbè ylando yetọn lẹ tọn.”+
11 To whenẹnu, Jehovah dọna mi dọmọ: “A hodẹ̀ nudagbe tọn na omẹ ehelẹ blo.+ 12 Eyin yé blanù, yẹn ma nọ dotoaina ovẹvivẹ yetọn lẹ,+ podọ eyin yé na avọ́nunina mimẹ̀ blebu lẹ po avọ́nunina jinukun-lili tọn po, homẹ ṣie ma nọ hùn do yé go,+ na yẹn na yí ohí, huvẹ po azọ̀nylankan* po do và yé sudo.”+
13 Whenẹnu wẹ yẹn dọmọ: “Ojé, Oklunọ Nupojipetọ Jehovah E! Yẹwhegán lẹ to didọna yé dọ, ‘Ohí ma ja mì ji, podọ huvẹ ma na wá mì ji, ṣigba jijọho nujọnu tọn wẹ yẹn na na mì tofi.’”+
14 Whenẹnu wẹ Jehovah dọna mi dọmọ: “Yẹwhegán lẹ to dọdai lalo tọn dọ to oyín ṣie mẹ.+ Yẹn ma do yé hlan kavi degbena yé kavi dọhona yé gba.+ Numimọ lalo tọn, dọṣẹdidọ ovọ́ po yẹdoklọmẹ ahun yetọn titi mẹ tọn lẹ po wẹ nuhe yé to dọdai etọn dọ hlan mì lẹ.+ 15 Enẹwutu, nuhe Jehovah dọ gando yẹwhegán lẹ he to dọdai dọ to oyín ṣie mẹ, dile etlẹ yindọ yẹn ma do yé hlan bosọ nọ to didọ dọ ohí de kavi huvẹ ma na wá aigba lọ ji go die: ‘Yẹwhegán enẹlẹ na dọ̀n gbọn ohí po huvẹ po dali.+ 16 Podọ mẹhe go dọdai lọ gando lẹ na yin dindlan do tòhomẹ-liho Jelusalẹm tọn lẹ ji na huvẹ lọ po ohí lọ po wutu bọ mẹdepope ma na tin nado dì oṣiọ yetọn+—yèdọ yewlẹ, asi yetọn lẹ, visunnu yetọn lẹ kavi viyọnnu yetọn lẹ—na yẹn na hẹn nugbajẹmẹji he yé jẹna lọ wá yé ji.’+
17 “Ohó he hiẹ na dọna yé die,
‘Gbọ dasin ni to sisà sọn nukun ṣie lẹ mẹ to okle po ozán po, a dike e doalọte blo,+
Na yè ko gídí viyọnnu omẹ ṣie lẹ tọn he to alọji lọ pete,+
Awugble etọn sọ yin daho taun.
18 Eyin yẹn tọ́nyi danji bo pọ́n,
Mẹhe yin hùhù gbọn ohí dali lẹ wẹ yẹn nọ mọ!+
Eyin yẹn sọ wá tòdaho lọ mẹ,
Yẹn nọ mọ mẹhe huvẹ ko doazọ̀n lẹ!+
Na yẹwhegán lọ po yẹwhenọ lọ po ko lẹdo aigba he yé ma yọnẹn pọ́n de.’”+
19 Be hiẹ ko gbẹ́ Juda dai pete wẹ ya, kavi be a* ko gbẹwanna Ziọni petepete wẹ?+
Naegbọn hiẹ do linú mí bọ mí masọ sọgan yin hinhẹn jẹgangan ba?+
Yè donukun jijọho, ṣigba nudagbe depope ma wá aimẹ,
Yè sọ donukun ojlẹ pọngbọ tọn, ṣigba nugbajẹmẹji wẹ wá!+
20 Jehovah E, mí yigbe kanyinylan mítọn tọn,
Po nuṣiwa tọgbo mítọn lẹ tọn po,
Na mí ko waylando do we wutu.+
21 Na oyín towe tọn wutu, a gbẹ́ mí dai blo;+
A vlẹ ofìn gigonọ towe blo.
Flin, bo ma gbà alẹnu he a basi hẹ mí blo.+
22 Be boṣiọ ovọ́ akọta lẹ tọn depope sọgan na jikun ya,
Kavi be olọn lẹ tlẹ sọgan ja jikun na yede wẹ ya?
Jehovah Jiwheyẹwhe mítọn E, be e ma yin Hiẹ kẹdẹ wẹ sọgan wàmọ ya?+
Mí ko ze todido do hiẹ mẹ,
Na hiẹ kẹdẹ wẹ ko wà onú ehe lẹpo.
15 Jehovah sọ dọna mi dọmọ: “Eyin Mose po Samuẹli po tlẹ ṣite to nukọn ṣie,+ yẹn ma na do lẹblanu hia* omẹ ehelẹ. Yàn yé sọn nukọn ṣie. Gbọ yé ni yì. 2 Eyin yé sọ dọna we dọ, ‘Fie wẹ mí na yì?’ hiẹ dona dọna yé dọ, ‘Nuhe Jehovah dọ die:
“Mẹdepope he jẹna okú azọ̀nylankan tọn, gbọ azọ̀nylankan ni hù i!
Mẹdepope he jẹna okú ohí tọn, gbọ ohí ni hù i!+
Mẹdepope he jẹna okú huvẹ tọn, gbọ huvẹ ni hù i!
Podọ mẹdepope he jẹna kanlinmọgbenu, gbọ e ni yì kanlinmọgbenu!”’+
3 “‘Podọ yẹn nasọ hẹn nugbajẹmẹji ẹnẹ* wá yé ji,’+ wẹ Jehovah dọ, ‘ohí lọ nado hù yé, avún lẹ nado dọ̀n yé yì, podọ ohẹ̀ agahomẹ tọn lẹ po kanlin aigba ji tọn lẹ po nado tlẹ́n yé dù bo và yé sudo.+ 4 Yẹn nasọ hẹn yé zun nudobu de na ahọluduta aigba ji tọn lẹpo+ na nuhe Manasse visunnu Hẹzekia tọn, yèdọ ahọlu Juda tọn wà to Jelusalẹm wutu.+
5 Jelusalẹm E, mẹnu wẹ na vẹawu we,
Mẹnu wẹ onú towe na biọlanmẹna,
Podọ mẹnu wẹ na nọte nado kàn dagbemẹninọ towe sè?’
6 ‘Hiẹ ko gbẹ́ mi dai,’ wẹ Jehovah dọ.+
‘Hiẹ ko sọ lẹgodo towe do mi.*+
Enẹwutu, yẹn na dlẹnalọ ṣie jẹgbonu sọta we bo na và we sudo.+
Agbọ́ ko pé mi nado to lẹblanu dohia we.*
7 Yẹn nasọ yí fẹli-fẹ̀nnọ de do fú yé to tòdaho* aigba lọ tọn lẹ mẹ.
Yẹn na hù ovi yetọn lẹ.+
Yẹn na và omẹ ṣie lẹ sudo,
To whenuena e yindọ yé gbẹ́ nado lẹkọ sọn aliho yetọn lẹ ji.+
8 Asuṣiọsi yetọn lẹ na sù to nukọn ṣie hú tọkẹ́n ohù tọn lẹ.
Yẹn na hẹn mẹvasudotọ de wá yé ji to owhè ṣádada mẹ, yèdọ sọta onọ̀ lẹ po dẹpẹ lẹ po.
Yẹn na hẹn flumẹjijẹ po obu po wá yé ji to ajiji mẹ.
9 Yọnnu he jivi ṣinawe ko bu do ede;
Agbọ́ to whiwhè do e.*
Owhè ko yihọ do e to okle,
Ehe sọ hẹn winyan po mẹdèpo po wá.’*
‘Podọ omẹ vude he pò to yé mẹ lẹ
Wẹ yẹn na jo hlan ohí kẹntọ yetọn lẹ tọn,’ wẹ Jehovah dọ.”+
10 Onọ̀ ṣie E, dindọn wẹ na mi, na hiẹ ji mi wutu,+
Yèdọ dawe de he pò na wiwọ́ po avùn po hẹ aigba lọ blebu.
Yẹn ma yàn namẹ mọjanwẹ yẹn masọ yàn to mẹde si;
Ṣigba, yemẹpo to dẹ̀hodo mi.
11 Jehovah dọmọ: “E họnwun dọ yẹn na yilizọn nudagbe tọn na we;
Na nugbo tọn, yẹn na yinuwado ota towe mẹ to nugbajẹmẹji whenu,
To ojlẹ ayimajai tọn mẹ sọn kẹntọ lọ si.
12 Be mẹde sọgan gbà gànyuu he wá sọn agewaji,
Po gànvẹẹ po do flinflin wẹ ya?
13 Nutindo towe lẹ po adọkunnu towe lẹ po wẹ yẹn na na taidi ogblànnu,+
Hiẹ ma nasọ mọ ahọsumẹ de yí, ṣigba ehe na jọ na ylando he a wà gbọn aigba towe lẹpo ji wutu.
14 Yẹn na jo yé na kẹntọ towe lẹ
Nado bẹ yé yì aigba he hiẹ ma yọnẹn de ji.+
Na miyọ́n de ko yin fiflọ gbọn adi ṣie dali,
E sọ to jiji do ji we.”+
15 Jehovah E, hiẹ yọnẹn,
Flin mi bosọ lẹ́ ayidonugo towe hlan mi.
Yiahọsu na mi do homẹkẹndomẹtọ ṣie lẹ ji.+
A dike yẹn dọ̀n,* na awuwhiwhle towe nado gblehomẹ wutu blo.
Yọnẹn dọ na hiẹ tọn wutu wẹ yẹn do to oyà vlẹko ehe tọn ji.+
16 Yẹn mọ ohó towe lẹ bosọ dù yé;+
Ohó towe ko sọ hẹn aglinjijẹ po ayajẹ po wá na ahun ṣie,
Na yẹn ko tindo oyín towe to ota, Jehovah Jiwheyẹwhe awhànpa lẹ tọn E.
17 Yẹn ma sinai hẹ fànfúnnọ lẹ nado jaya.+
18 Naegbọn awufiẹsa ṣie do sinyẹn bọ apà ṣie ma sọgan kú?
E gbẹ́ nado kú.
Be hiẹ na taidi asisa osin tọn oklọ tọn de na mi
He ma sọgan yin jidedego wẹ ya?
19 Enẹwutu, nuhe Jehovah dọ die:
“Eyin hiẹ lẹkọ, yẹn na gọ̀ we do otẹn towe mẹ,
Hiẹ nasọ nọte to nukọn ṣie.
Eyin hiẹ klan nuhọakuẹ dovo na onú ovọ́,
Hiẹ na taidi onù* ṣie titi.
Yé nasọ lẹhlan we,
Ṣigba, hiẹ ma na lẹhlan yé.”
20 “Yẹn to hinhẹn we zun adó gángán gànvẹẹ tọn de na omẹ ehelẹ.+
E họnwun dọ yé na hoavùn hẹ we,
Na yẹn tin po hiẹ po nado basi hihọ́na we podọ nado whlẹn we,” wẹ Jehovah dọ.
21 “Yẹn nasọ whlẹn we sọn alọ mẹylankan lọ tọn mẹ
Bo na fli we gọ̀ sọn alọ kanylantọ lọ tọn mẹ.”
16 Jehovah sọ dọna mi whladopo dogọ dọmọ: 2 “Hiẹ ma dona dà asi, podọ hiẹ ma dona ji visunnu po viyọnnu lẹ po tofi. 3 Na nuhe Jehovah dọ gando visunnu po viyọnnu he yin jiji dofi lẹ po, gọna onọ̀ he ji yé lẹ po otọ́ he do ohò yetọn to aigba ehe ji lẹ po go die: 4 ‘Yé na kú gbọn azọ̀nylankan dali,+ ṣigba mẹdepope ma na nọ aluẹmẹ na yé kavi diṣiọ yetọn; yé na taidi ogbó to aigba lọ nukunmẹ.+ Yé na kú gbọn ohí po huvẹ po dali,+ oṣiọ yetọn lẹ nasọ yin núdùdù na ohẹ̀ agahomẹ tọn lẹ po kanlin aigba ji tọn lẹ po.’
5 Na nuhe Jehovah dọ die,
‘A biọ owhé he gbè hùnwhẹ aluẹmẹninọ tọn to yinyin bibasi te blo,
A sọ yì nado doavihàn kavi vẹawumẹ blo.’+
‘Na yẹn ko de jijọho ṣie sọn omẹ ehelẹ dè,’ wẹ Jehovah dọ,
‘Gọna owanyi nugbo po lẹblanu ṣie po.+
6 Omẹ daho po omẹ pẹvi po na kú to aigba ehe ji.
Yé ma na yin dìdì,
Mẹdepope ma na nọ aluẹmẹ na yé,
Mọjanwẹ mẹde ma na gbleawuna ede kavi whlẹ́ ota etọn na yetọn wutu.*
7 Mẹde ma nasọ wleawuna núdùdù na mẹhe to aluẹmẹ lẹ,
Nado miọnhomẹna yé na mẹhe kú do yé lẹ wutu;
Mọjanwẹ mẹdepope ma na na yé kọfo homẹmimiọn tọn
Nado nù na otọ́ yetọn kavi onọ̀ yetọn he yé hẹnbu wutu.
8 A sọ biọ owhé he gbè hùnwhẹ to yinyin bibasi te
Nado sinai hẹ yé bo dù bosọ nù blo.’
9 “Na nuhe Jehovah awhànpa lẹ tọn, yèdọ Jiwheyẹwhe Islaeli tọn dọ die, ‘Tofi, to azán mìtọn lẹ gbè, podọ to nukun mìtọn titi lẹ mẹ, yẹn na hẹn nudidọ aglinjijẹ po ayajẹ tọn lẹ po wá opodo, yèdọ ogbè asisunọ yọyọ lọ tọn po asiyọyọ lọ tọn po.’+
10 “To whenuena hiẹ na dọ ohó ehe lẹpo na omẹ ehelẹ, yé na kanse we dọ, ‘Naegbọn Jehovah do dọ dọ emi na hẹn nugbajẹmẹji daho ehe lẹpo wá mí ji? Nuṣiwa po ylando tẹ po wẹ mí ko wà do Jehovah Jiwheyẹwhe mítọn?’+ 11 Hiẹ nasọ gblọnna yé dọ, ‘“Na tọgbo mìtọn lẹ ko gbẹ́ mi dai wutu wẹ,”+ wẹ Jehovah dọ, “yé sọ to yẹwhe devo lẹ hodo bo to yé sẹ̀n bosọ to didẹ́ do odò na yé.+ Ṣigba yẹn wẹ yé gbẹdai, yé masọ setonuna osẹ́n ṣie.+ 12 Podọ mìwlẹ ko sọ yinuwa to aliho he ylan tlala hú tọgbo mìtọn lẹ tọn mẹ,+ dopodopo mìtọn sọ nọ yí tasinsinyẹn do yinuwa sọgbe hẹ ahun ylankan etọn kakati nado setonuna mi.+ 13 Enẹwutu, yẹn na dlan mì sọn aigba ehe ji yì aigba de he mìwlẹ po tọgbo mìtọn lẹ po ma ko yọnẹn ji,+ podọ to finẹ mì na to dandannu glọ nado nọ sẹ̀n yẹwhe devo lẹ to okle po ozán po,+ na yẹn ma na do nukundagbe hia mì wutu.”’
14 “‘Ṣigba, azán lẹ ja,’ wẹ Jehovah dọ, ‘whenue yé ma nasọ nọ dọ dọ: “Dile Jehovah togbẹ̀, yèdọ mẹhe hẹn omẹ Islaeli tọn lẹ tọ́n sọn aigba Egipti tọn ji!”+ 15 kakatimọ yé na nọ dọmọ: “Dile Jehovah togbẹ̀, yèdọ mẹhe plan omẹ Islaeli tọn lẹ sọn aigba agewaji tọn ji podọ sọn aigba he ji ewọ ko vúnvún yé pé gbọn lẹpo!” podọ yẹn nasọ hẹn yé gọwá aigba yetọn ji, yèdọ aigba he yẹn na tọgbo yetọn lẹ.’+
16 ‘Todin, yẹn na basi oylọna whèhutọ susu,’ wẹ Jehovah dọ,
‘Yé nasọ wle yé taidi whèvi lẹ.
Enẹgodo, yẹn na basi oylọna gbéyantọ susu,
Yé na yangbé yetọn to osó lẹpo ji podọ to okọ́ta lẹpo ji
Podọ to osé-slo lẹ mẹ.
17 Na nukun ṣie lẹ to nuhe wà yé te lẹpo ji.*
Yé ma ko yin whiwhla sọn nukọn ṣie,
Mọjanwẹ nuṣiwa yetọn lẹ ma yin whiwhla do mi do niyẹn.
18 Tintan, yẹn na suahọ yé to gigọ́ mẹ na nuṣiwa po ylando yetọn lẹ po wutu,+
Na yé ko yí boṣiọ hiọawu yetọn he ma tin togbẹ̀ lẹ* do hẹn aigba ṣie flu
Bo ko sọ hẹn osùnú yetọn lẹ gọ́ ogú-yigba ṣie ji.’”+
19 Jehovah E, huhlọn ṣie po figángán ṣie po,
Fihe yẹn na họnyi to azán ayimajai tọn gbè,+
Akọta lẹ na wá dè we sọn opodo aigba tọn lẹ,
Yé nasọ dọmọ: “Tọgbo mítọn lẹ dugu lalo kẹdẹ,
Onú ovọ́ po onú tata he ma doale lẹ po tọn.”+
20 Be mẹde sọgan basi yẹwhe lẹ na ede
To whenuena e yindọ yé ma yin yẹwhe nujọnu tọn lẹ ya?+
21 “Enẹwutu, yẹn na hẹn ẹn zun yinyọnẹn na yé,
To ojlẹ ehe mẹ, yẹn na hẹn huhlọn po hlọnhlọn ṣie po zun yinyọnẹn na yé,
Yé nasọ yọnẹn dọ oyín ṣie wẹ Jehovah.”
17 “Ylando Juda tọn yin kinkandai po wekantin ogànnọ de po.
Wekantin he bẹ́nu etọn yin diamọndi wẹ yè yí do kàn ẹn do wekan-zannu ahun yetọn lẹ tọn ji
Podọ do azò agbà yetọn lẹ tọn ji,
2 Dile visunnu yetọn lẹ to finflin agbà yetọn lẹ po dòtin wiwe* yetọn lẹ po+
He to apá na atin he vùn de, to okọ́ta he yiaga lẹ ji,+
3 To osó he to danji lẹ ji.
Nutindo towe lẹ, yèdọ adọkunnu towe lẹpo, wẹ yẹn na na taidi ogblànnu+
—Mọwẹ, yèdọ ofi yiaga towe lẹ na ylando he hiẹ ko wà gbọn aigba towe lẹpo ji wutu.+
4 Hiẹ na jo ogú-yigba he yẹn na we lọ do sọn ojlo mẹ wá.+
Yẹn nasọ hẹn we nado sẹ̀n kẹntọ towe lẹ to aigba he hiẹ ma yọnẹn de ji,+
E nasọ to jiji kakadoi.”
5 Nuhe Jehovah dọ die:
“Mẹhodẹ̀do wẹ mẹlọ* he dejido gbẹtọvi tata lẹ go,+
He ganjẹ huhlọn gbẹtọvi tọn go,*+
Bọ ahun etọn sọ lẹ́ sọn Jehovah dè.
6 Ewọ na taidi atin he to olá to danfafa ji.
E ma na mọ whenue nudagbe na wá,
Ṣigba, e na nọ nọ̀ ofi húhú lẹ to danfafa ji,
To aigba ojẹ̀ tọn de ji, fie mẹdepope ma nọ nọ̀.
8 Ewọ na taidi atin de he yin dido do tọ̀tó,
He yìn adọ̀ etọn lẹ hlan asisa osin tọn lẹ mẹ.
E ma na mọ yozò to yozò whenu,
Ṣigba, amà etọn lẹ na nọ vùn to whepoponu.+
Podọ to owhe akúdido tọn mẹ, e ma na jẹflumẹ,
Mọjanwẹ sinsẹ́n etọn lẹ ma na doalọte.
9 Ahun nọ klọmẹ* hú nulẹpo bosọ yin owùnu.*+
Mẹnu wẹ sọgan yọnẹn?
10 Yẹn, Jehovah, nọ dindona ahun,+
Bo nọ gbeje linlẹn he whlá lẹ* pọ́n,
Nado na mẹdopodopo sọgbe hẹ aliho etọn lẹ,
Sọgbe hẹ sinsẹ́n azọ́n etọn lẹ tọn.+
11 Taidi asọkle he bẹ azìn
he e ma do lẹ pli,
Mọ wẹ mẹlọ he bẹ adọkunnu pli to aliho mawadodo tọn mẹ* te do.+
Yé na jo e do to ojlẹ vude godo,
Podọ to godo mẹ, ewọ na yin mimọ taidi gugutọ.”
12 Ofìn gigonọ de, he yin zizedaga sọn bẹjẹeji,
Wẹ yin nọtẹn fiwiwe mítọn tọn.+
13 Jehovah E, yèdọ todido Islaeli tọn,
Mẹhe gbẹ́ we dai lẹpo na yin winyando.
Oyín mẹhe ṣiatẹ sọta we* lẹ tọn na yin winwlan do kọ́gudu mẹ,+
Na yé ko gbẹ́ Jehovah, yèdọ asisa osin ogbẹ̀ tọn lọ dai wutu.+
14 Jehovah E, hẹnazọ̀ngbọna mi, podọ yẹn nasọ yin hinhẹn jẹgangan.
Whlẹn mi, podọ yẹn na yin whinwhlẹngán,+
Na hiẹ wẹ yẹn na nọ pà.
15 Pọ́n! Mẹdelẹ to didọna mi dọmọ:
“Fie wẹ ohó Jehovah tọn te?+
Jaale, dike e ni wá!”
16 Ṣigba na yẹn tọn, yẹn ma doalọte sọn hihodo we taidi lẹngbọhọtọ de mẹ,
Mọjanwẹ yẹn ma tindo ojlo vẹkuvẹku na azán nugbajẹmẹji tọn.
Hiẹ yọ́n nuhe nùflo ṣie ko dọ lẹpo ganji;
Popolẹpo wẹ wá aimẹ to nukọn towe!
17 A dobuna mi blo.
Hiẹ wẹ fibẹtado ṣie to azán nugbajẹmẹji tọn gbè.
18 Dike homẹkẹndomẹtọ ṣie lẹ ni yin winyando,+
Ṣigba, a dowinyan mi blo.
Dike obu ni jẹ yé ji,
Ṣigba, a dike obu jẹ ji e blo.
19 Nuhe Jehovah dọna mi die: “Yì bo ṣite to họngbo visunnu omẹ ṣie lẹ tọn ji, to fie ahọlu Juda tọn lẹ nọ gbọn biọ tòdaho lọ mẹ bosọ nọ tọ́nyi gbọn, podọ to họngbo Jelusalẹm tọn lẹpo ji.+ 20 Hiẹ dona dọna yé dọmọ, ‘Mì sè ohó Jehovah tọn, mì ahọlu Juda tọn lẹ, omẹ Juda tọn lẹpo po tòmẹnu Jelusalẹm tọn lẹpo po, he nọ biọ tòdaho lọ mẹ gbọn họngbo ehelẹ nù. 21 Nuhe Jehovah dọ die: “Mì payi mìde go,* bo ma hẹn agbàn depope to Gbọjẹzangbe kavi hẹn ẹn biọ Jelusalẹm gbọn họngbo lọ lẹ nù blo.+ 22 Mì ma dona hẹn agbàn depope wá sọn owhé mìtọn lẹ gbè to Gbọjẹzangbe; podọ mì ma dona wazọ́n to aliho depope mẹ.+ Mì hẹn Gbọjẹzan lọ do wiwe, kẹdẹdile yẹn ko degbe etọn na tọgbo mìtọn lẹ do.+ 23 Ṣigba, yé ma dotoai kavi tuntoai, yé sọ yí tasinsinyẹn do gbẹ́* nado setonu kavi kẹalọyi mẹplọnlọ.”’+
24 “‘“Ṣigba, eyin mìwlẹ setonuna mi mlẹnmlẹn,” wẹ Jehovah dọ, “bọ mì ma hẹn agbàn de gbọn họngbo tòdaho ehe tọn lẹ nù to Gbọjẹzangbe, bọ mì sọ hẹn Gbọjẹzan lọ do wiwe bo ma wazọ́n depope to azán enẹ gbè,+ 25 to whenẹnu ahọlu po ahọvi he nọ sinai do ofìn Davidi tọn ji lẹ po+ na nọ gbọn họngbo lọ lẹ nù biọ tòdaho ehe mẹ, to osọ́-kẹkẹ po osọ́ lẹ po ji, yèdọ yewlẹ po ahọvi yetọn lẹ po, omẹ Juda tọn lẹ po tòmẹnu Jelusalẹm tọn lẹ po;+ gbẹtọ nasọ nọ nọ̀ tòdaho ehe mẹ kakadoi. 26 Gbẹtọ lẹ nasọ wá sọn tòdaho Juda tọn lẹ mẹ, sọn lẹdo Jelusalẹm tọn lẹ mẹ, sọn aigba Bẹnjamini tọn ji,+ sọn agbàdo mẹ,+ sọn lẹdo osó tọn lẹ mẹ podọ sọn Negẹb* bo na hẹn avọ́nunina mimẹ̀ blebu lẹ,+ avọ́sannu lẹ,+ avọ́nunina jinukun-lili tọn lẹ,+ nuyọnwan gblingblin po avọ́sannu pẹdido tọn lẹ po wá ohọ̀ Jehovah tọn mẹ.+
27 “‘“Ṣigba, eyin mì ma setonuna mi nado hẹn Gbọjẹzan do wiwe podọ eyin mì hẹn agbàn biọ tòdaho Jelusalẹm tọn mẹ gbọn họngbo etọn lẹ nù to Gbọjẹzangbe, yẹn na dozò họngbo etọn lẹ, e sọ họnwun dọ miyọ́n na fiọ atọ̀họ̀ gángán Jelusalẹm tọn lẹ,+ bo ma na yin ṣíṣí.”’”+
18 Ohó he Jehovah dọna Jelemia die: 2 “Fọ́n bo yì owhé zẹ́ndotọ tọn gbè,+ finẹ wẹ yẹn na hẹn we nado sè ohó ṣie lẹ te.”
3 Yẹn sọ yì owhé zẹ́ndotọ tọn gbè bọ ewọ to ozẹ́n de do. 4 Ṣigba, ozẹ́n he zẹ́ndotọ lọ yí okò do to bibasi lọ gble do e. Enẹwutu, zẹ́ndotọ lọ yí i do basi núzinzan devo, kẹdẹdile ewọ jlo do.*
5 Whenẹnu wẹ Jehovah dọna mi dọmọ: 6 “‘Owhé Islaeli tọn E, be yẹn ma sọgan yinuwa hẹ we kẹdẹdile zẹ́ndotọ ehe wà do wẹ ya?’ wẹ Jehovah dọ. ‘Pọ́n! Owhé Islaeli tọn E, taidi okò to alọ zẹ́ndotọ tọn mẹ, mọ wẹ hiẹ te do to alọ ṣie mẹ.+ 7 Whedepopenu he yẹn na dọho gando akọta de kavi ahọluduta de go nado yin adọ̀ họ̀nna kavi na e nido yin sisẹsisẹ liai kavi yin vivasudo,+ 8 bọ akọta lọ gbẹ́ kanyinylan he go yẹn dọho gando lọ dai, yẹn na diọlinlẹn ṣie gando nugbajẹmẹji he yẹn lẹn nado hẹnwa e ji lọ go.*+ 9 Ṣigba, whedepopenu he yẹn dọ dọ akọta de kavi ahọluduta de ni yin hinhẹn lodo kavi ni yin didoai, 10 bọ e wà nuhe ylan to nukun ṣie mẹ bo masọ setonuna ogbè ṣie, yẹn na diọlinlẹn ṣie gando dagbe he yẹn lẹn nado wà na ẹn lọ go.’*
11 “Todin, jaale, dọna sunnu Juda tọn lẹ po tòmẹnu Jelusalẹm tọn lẹ po dọ, ‘Nuhe Jehovah dọ die: “Todin, yẹn to awuwlena nugbajẹmẹji de bosọ to ayiha de kàn sọta mì. Yẹn vẹ̀ mì, mì lẹ́ sọn aliho ylankan mìtọn lẹ ji, bo vọ́ aliho po nuyiwa mìtọn lẹ po jlado.”’”+
12 Ṣigba, yé dọmọ: “Nude ma na diọ!+ Na míwlẹ na zinzọnlin sọgbe hẹ linlẹn mítọn titi lẹ, dopodopo mítọn nasọ yí tasinsinyẹn do yinuwa sọgbe hẹ ahun ylankan mítọn.”+
13 Enẹwutu, nuhe Jehovah dọ die:
“Yẹn vẹ̀ mì, mìlọsu ni kanse to akọta lẹ ṣẹnṣẹn.
Mẹnu wẹ ko sè onú ehe nkọ pọ́n?
Yọnnu Islaeli tọn he to alọji ko wà nuhe hẹnmẹjọsi taun de.+
14 Be osin-agó Lẹbanọni tọn na busẹ sọn osé lẹ ji aga wẹ ya?
Kavi be osin fifá he to sisà sọn fidindẹn lẹ na hú wẹ ya?
15 Ṣigba, omẹ ṣie lẹ ko wọnji go e.+
Na yé nọ basi avọ́sinsan* lẹ hlan onú ovọ́,+
Podọ yé nọ hẹn gbẹtọ lẹ dahli to aliho hohowhenu tọn yetọn lẹ ji,+
Nado nọ zinzọnlin to aliho dai tọn he ma mẹ́ bo masọ jlọ* lẹ ji,
16 Nado hẹn aigba yetọn zun nudobu de+
Podọ nude he na nọ hẹnmẹ kẹ̀hẹli kakadoi.+
Mẹdepope he gbọn finẹ wá jei bo mọ ẹn na jọsi bo nasọ mimí ota.+
17 Taidi jẹhọn whèzẹtẹn tọn, yẹn na gbà yé do to kẹntọ lọ nukọn.
Yẹn na dogodo yé, kakati nado pannukọn yé, to azán nugbajẹmẹji tọn gbè.”+
18 Yé sọ dọmọ: “Mì wá, bo dike mí ni blasé gando Jelemia go,+ na osẹ́n* ma na busẹ sọn onù yẹwhenọ mítọn lẹ tọn mẹ kavi ayinamẹ sọn nuyọnẹntọ lẹ dè kavi ohó sọn yẹwhegán lẹ dè. Mì wá bo gbọ mí ni dọho jẹagọdo e* bo ma na ayidonugo nuhe dọ e te lẹ blo.”
19 Jehovah E, doayi go e,
Bo sè nuhe agọjẹdomẹtọ ṣie lẹ to didọ.
20 Be yè na yí oylan do suahọ dagbe tọn wẹ ya?
Na yé ko kùn odò de dai na ogbẹ̀* ṣie.+
Flin lehe yẹn ṣite to nukọn towe nado dọho yetọn dagbe do,
Dọ hiẹ ni lẹ́ homẹgble towe sọn yé ji.
21 Enẹwutu, jo visunnu yetọn lẹ hlan huvẹ,
Bosọ jo yé hlan huhlọn ohí lọ tọn.+
Na asi yetọn lẹ ni jẹ agbá ovi tọn bosọ lẹzun asuṣiọsi.+
Na sunnu yetọn lẹ ni yin hùhù gbọn azọ̀nylankan dali,
Yè ni yí ohí do hù dẹpẹ yetọn lẹ to awhàn mẹ.+
22 Dike awhágbe de ni yin sisè sọn owhé yetọn lẹ gbè
To whenue hiẹ na hẹn jaguda lẹ wá yé ji to ajiji mẹ.
Na yé ko kùn odò de dai nado wle mi
Bo ko sọ do omọ̀ lẹ dai na afọ ṣie lẹ.+
23 Ṣigba, hiẹ Jehovah E,
A yọ́n ayiha he kàn yé te gando go e nado hù mi ganji.+
A ṣinyọnnudo nuṣiwa yetọn blo,
A sọ súnsún ylando yetọn sẹ̀ sọn nukọn towe blo.
19 Nuhe Jehovah dọ die: “Yì bo họ̀ okòzẹ́n de to zẹ́ndotọ de dè.+ Plan delẹ to mẹho mẹlọ lẹ tọn po mẹho yẹwhenọ lẹ tọn po mẹ, 2 bo tọ́nyi Agbàdo Visunnu Hinọmi tọn mẹ,+ yì Họngbo Zẹ́nkla lẹ tọn ji. Hiẹ nasọ lá ohó he yẹn dọna we lẹ to finẹ. 3 Hiẹ na dọ dọ, ‘Mì sè ohó Jehovah tọn, mì ahọlu Juda tọn po tòmẹnu Jelusalẹm tọn lẹ po. Nuhe Jehovah awhànpa lẹ tọn, yèdọ Jiwheyẹwhe Islaeli tọn dọ die:
“‘“Yẹn na hẹn nugbajẹmẹji de wá nọtẹn ehe ji, podọ mẹdepope he sè nuhe jọ lọ na jọsi.* 4 Na yé gbẹ́ mi dai+ bo ko diọwunmẹ na nọtẹn ehe wutu.+ Podọ to finẹ, yé ko sanvọ́ hlan yẹwhe devo lẹ he yewlẹ, tọgbo yetọn lẹ po ahọlu Juda tọn lẹ po ma ko yọnẹn, yé ko sọ hẹn ohùn homẹvọnọ lẹ tọn gọ́ nọtẹn ehe.+ 5 Yé do ofi yiaga lẹ na Baali nado sọgan nọ fiọ visunnu yetọn lẹ to miyọ́n mẹ taidi avọ́nunina mimẹ̀ blebu na Baali,+ yèdọ nude he yẹn ma degbe etọn kavi biọ to yé si, podọ ehe ma tlẹ ko wá ayiha ṣie mẹ pọ́n.”’*+
6 “‘“Enẹwutu, pọ́n! azán lẹ ja,” wẹ Jehovah dọ, “whenue nọtẹn ehe ma nasọ nọ yin yiylọdọ Tofẹti kavi Agbàdo Visunnu Hinọmi tọn ba, ṣigba Agbàdo Mẹhuhu tọn.+ 7 Yẹn na hẹn ayikinkan Juda po Jelusalẹm po tọn lẹ to nọtẹn ehe zun ovọ́, yẹn nasọ hẹn yé nado jai gbọn ohí dali to kẹntọ yetọn lẹ nukọn podọ to alọ mẹhe to dindin nado yí ogbẹ̀* yetọn lẹ tọn mẹ. Yẹn nasọ na oṣiọ yetọn lẹ taidi núdùdù na ohẹ̀ agahomẹ tọn lẹ po kanlin aigba ji tọn lẹ po.+ 8 Yẹn nasọ hẹn tòdaho ehe zun nudobu de podọ nude he na nọ hẹnmẹ kẹ̀hẹli. Mẹdepope he gbọn finẹ wá jei na jọsi bo na kẹ̀hẹli na azọ̀nylankan he wá e ji lẹpo wutu.+ 9 Yẹn nasọ hẹn yé nado dù olàn visunnu po viyọnnu yetọn lẹ po tọn, dopodopo yetọn nasọ dù olàn gbẹtọ hatọ etọn tọn, na osla he yin dido lẹdo yé po flumẹjijẹ yetọn po wutu to whenue yé na yin ginglọn gbọn kẹntọ yetọn po mẹhe to dindin nado yí ogbẹ̀* yetọn lẹ po dali.”’+
10 “Enẹwutu, gbà okòzẹ́n lọ to nukun sunnu he zọnhẹ we lẹ tọn mẹ, 11 bo dọna yé dọ, ‘Nuhe Jehovah awhànpa lẹ tọn dọ die: “Lehe yẹn na gbà omẹ ehelẹ po tòdaho ehe po do niyẹn, yèdọ taidi mẹhe gbà núzinzan zẹ́ndotọ tọn de bọ e ma sọgan yin vivọjlado gbede ba; yé nasọ to oṣiọ lẹ dì do Tofẹti kaka bọ otẹn ma na tin nado dì yé ba.”’+
12 “‘Nuhe yẹn na wà na nọtẹn ehe niyẹn,’ wẹ Jehovah dọ, ‘podọ na mẹhe nọ nọ̀ e mẹ lẹ, nado hẹn tòdaho ehe tin taidi Tofẹti. 13 Owhé Jelusalẹm tọn lẹ po owhé ahọlu Juda tọn lẹ tọn po nasọ lẹzun mawé taidi nọtẹn ehe, enẹ wẹ Tofẹti,+ mọwẹ, yèdọ họta he ji yé nọ basi avọ́sinsan lẹ hlan awhànpa olọn tọn lẹpo+ podọ fie yé nọ kọ̀n avọ́nunina nùnù lẹ jẹgbonu hlan yẹwhe devo lẹ te.’”+
14 To whenue Jelemia lẹkọ sọn Tofẹti, fie Jehovah do e hlan nado dọ dọdai te, e nọte to awánu ohọ̀ Jehovah tọn mẹ bo dọna mẹlọ lẹpo dọmọ: 15 “Nuhe Jehovah awhànpa lẹ tọn, yèdọ Jiwheyẹwhe Islaeli tọn dọ die, ‘Yẹn na hẹn nugbajẹmẹji he yẹn ko dopà etọn lọ lẹpo wá tòdaho ehe po tòhò etọn lẹpo po ji, na yé ko yí tasinsinyẹn do gbẹ́ nado* setonuna ohó ṣie lẹ wutu.’”+
20 Todin, Paṣuli yẹwhenọ lọ he yin visunnu Imẹli tọn, he sọ yin nukọntọ anadenanutọ lẹ tọn to ohọ̀ Jehovah tọn mẹ, to todoai to whenue Jelemia to dọdai onú ehelẹ tọn dọ. 2 To whenẹnu, Paṣuli linú Jelemia yẹwhegán lọ bo ze e do osópò+ he tin to Họngbo Aga tọn Bẹnjamini tọn kọ̀n lẹ mẹ, ehe tin to ohọ̀ Jehovah tọn mẹ. 3 Ṣigba, to aihọngbè, whenue Paṣuli tún Jelemia dote sọn osópò lẹ mẹ, Jelemia dọna ẹn dọmọ:
“Jehovah ko ylọ oyín towe dọ Obu to Filẹpo, kakati nido yin Paṣuli.+ 4 Na nuhe Jehovah dọ die, ‘Yẹn na hẹn we zun nudobu de hlan dewe po họntọn towe lẹpo po, yé nasọ jai gbọn ohí dali to alọ kẹntọ yetọn lẹ tọn mẹ to nukun towe mẹ;+ yẹn nasọ jo mẹhe nọ nọ̀ Juda lẹpo do alọ ahọlu Babilọni tọn mẹ, ewọ nasọ bẹ yé yì kanlinmọgbenu to Babilọni bo na yí ohí do hù yé.+ 5 Yẹn nasọ jo adọkun tòdaho ehe tọn lẹpo, nutindo etọn lẹpo, nuhọakuẹ etọn lẹpo po adọkunnu ahọlu Juda tọn lẹ tọn lẹpo po do alọmẹ na kẹntọ yetọn lẹ.+ Podọ yé na hò yé yí bo na bẹ yé taidi ogblànnu de yì Babilọni.+ 6 Podọ hiẹ Paṣuli po mẹhe nọ nọ̀ owhé towe gbè lẹpo po, mì na yì kanlinmọgbenu. Mì na yì Babilọni bo nasọ kú do finẹ, hiẹ po họntọn towe lẹpo po nasọ yin dìdì do finẹ, na hiẹ ko dọ dọdai lalo tọn lẹ na yé wutu.’”+
7 Jehovah E, hiẹ ko blẹ mi, bọ yẹn ko sọ yin biblẹ.
Hiẹ ko yí huhlọn towe zan sọta mi, bosọ duto e ji.+
Yẹn ko lẹzun aṣagbọ́nu de to azán lẹpo ji;
Mẹlẹpo wẹ nọ ṣàn mi kò.+
8 Whedepopenu he yẹn na kẹnù, yẹn dona dawhá bo lá dọ,
“Danuwiwa po vasudo po!”
Na ohó Jehovah tọn wẹ zọ́n bọ yè nọ to zunzun mi bo nọ to ṣinṣàn mi kò to azán lẹpo ji.+
Ṣigba, ohó etọn taidi miyọ́n de he to jiji to ahun ṣie mẹ bosọ yin ginglọndo ohú ṣie lẹ mẹ,
Agbọ́ ko pé mi nado hẹn ẹn do homẹ;
Yẹn ma sọgan gbọṣi abọẹ ba.+
10 Na yẹn ko sè nuhlundọ ylankan susu;
Obu sọ lẹdo mi pé.+
“De e gbà; dike míwlẹ ni de ewọ gbà!”
Mẹhe to odẹ̀ jijọho tọn hò na mi lẹpo wẹ nọ to aijijẹ ṣie din:+
“Vlavo ewọ na gbọn nulú dali ṣì nude wà,
Míwlẹ nasọ duto e ji bo víhlọ̀n to ewọ go.”
11 Ṣigba, Jehovah tin hẹ mi taidi awhànfuntọ asuka de.+
Enẹwutu wẹ mẹhe to homẹkẹndo mi lẹ na dahli bo ma na duto e ji.+
Yé na mọ winyan tlala, na yé ma na tindo kọdetọn dagbe.
Winyan yetọn na gbọṣi aimẹ kakadoi.+
12 Ṣigba, Jehovah awhànpa lẹ tọn E, hiẹ to dodonọ gbeje pọ́n;
13 Mì jihàn hlan Jehovah! Mì pagigona Jehovah!
Na ewọ ko whlẹn wamọnọ* sọn alọ ylanwatọ lẹ tọn mẹ.
14 Dẹ̀hodo wẹ azán he gbè yẹn yin jiji te!
Na azán he gbè onọ̀ ṣie ji mi te ni ma yin didona blo!+
15 Mẹhodẹ̀do wẹ dawe lọ he hẹn owẹ̀n dagbe wá na otọ́ ṣie dọmọ:
“Ovi de ko yin jiji na we, yèdọ visunnu de!”
Bo hẹn ẹn jaya tlala.
16 Na dawe enẹ ni tin taidi tòdaho he Jehovah họliai bọ e ma vẹna ẹn lẹ.
Na ewọ ni sè awhágbe de to afọnnu podọ ogbè opẹ̀n tọn to owhè ṣádada mẹ.
17 Naegbọn ewọ ma do hù mi to ohò onọ̀ ṣie tọn mẹ,
Na onọ̀ ṣie nido yin yọdò ṣie
Bọ ewọ nasọ tin to ohò to whepoponu?+
18 Naegbọn yẹn do tọ́njẹgbonu sọn adọ̀mẹ
Nado mọ tukla po awubla po,
Nado hẹn azán ṣie lẹ wá opodo to winyan mẹ?+
21 Ohó Jehovah tọn sọ wá Jelemia dè to whenue ahọlu Zedekia+ do Paṣuli+ visunnu Malkija tọn po Zefania+ yẹwhenọ lọ he yin visunnu Maaseia tọn po hlan e dè nado biọ to e si dọmọ: 2 “Jaale bo kanhose Jehovah do ota mítọn mẹ, na Ahọlu Nẹbukadnẹzali* Babilọni tọn to awhànfun sọta mí.+ Vlavo Jehovah na wà ode to azọ́njiawu etọn lẹ mẹ do ota mítọn mẹ, na ewọ nido joagọ sọn mí dè.”+
3 Jelemia dọna yé dọmọ: “Nuhe mì na dọna Zedekia die, 4 ‘Nuhe Jehovah Jiwheyẹwhe Islaeli tọn dọ die: “Yẹn na lilẹ́ awhànfunnu he tin to alọ mìtọn titi mẹ lẹ pannukọn mì,* yèdọ awhànfunnu he mì yí do to awhànfun hẹ ahọlu Babilọni tọn+ po Kaldeanu he tin to gbonu adó lọ tọn bo dosla lẹdo mì lẹ po. Yẹn nasọ bẹ yé pli do tòdaho ehe ṣẹnṣẹn. 5 Yẹnlọsu nasọ dlẹnalọ bo yí awà hlọnhlọnnọ de do hoavùn hẹ mì,+ to adi po homẹgble sinsinyẹn ṣie po mẹ.+ 6 Yẹn na linú mẹhe nọ nọ̀ tòdaho ehe mẹ lẹ, yèdọ gbẹtọ po kanlin po. Yé nasọ kú gbọn azọ̀nylankan* sinsinyẹn de dali.”’+
7 Jehovah sọ dọmọ: “‘“Enẹgodo, yẹn na ze Ahọlu Zedekia Juda tọn po devizọnwatọ etọn lẹ po gọna mẹhe tin to tòdaho ehe mẹ lẹ—yèdọ mẹhe na lùn azọ̀nylankan, ohí po huvẹ po tọ́n lẹ—do alọmẹ na Ahọlu Nẹbukadnẹzali* Babilọni tọn, yèdọ do alọmẹ na kẹntọ yetọn lẹ, podọ do alọ mẹhe to dindin nado yí ogbẹ̀* yetọn lẹ tọn mẹ.+ Ewọ na yí ohí do hù yé. E ma na blawu na yetọn wutu, mọjanwẹ e ma nasọ vẹawu yé kavi wàlẹblanuna yé.”’+
8 “Hiẹ nasọ dọna omẹ ehelẹ dọ, ‘Nuhe Jehovah dọ die: “Todin, yẹn ze aliho ogbẹ̀ po okú po tọn donukọnna mì. 9 Mẹhe gbọṣi tòdaho ehe mẹ lẹ na kú gbọn ohí, huvẹ po azọ̀nylankan po dali. Ṣigba mẹdepope he na tọ́n bo na ze ede jo na Kaldeanu he dosla lẹdo mì lẹ na nọgbẹ̀, ewọ nasọ whlẹn ogbẹ̀* ede tọn.”’*+
10 “‘“Na yẹn ko diọnukunsọ tòdaho ehe nado hẹn nugbajẹmẹji wá e ji kakati nido yin nudagbe,”+ wẹ Jehovah dọ. “E na yin jijodo alọmẹ na ahọlu Babilọni tọn+ bọ ewọ nasọ yí miyọ́n do fiọ ẹ.”+
11 “‘Mì mẹhe tin to whédo ahọlu Juda tọn mẹ lẹ emi: Mì sè ohó Jehovah tọn. 12 Owhé Davidi tọn E, nuhe Jehovah dọ die:
“Mì nọ dawhẹ dodo egbesọegbesọ,
Bo nọ whlẹn mẹhe yè to hihodu sọn mẹhodutọ lọ si,+
Na adi ṣie nikaa jizò do mì ji taidi miyọ́n de+
Bo na ji sọmọ bọ mẹde ma na penugo nado ṣí i
Na nuylankan he wà mì te lẹ wutu.”’+
13 ‘Hiẹ mẹhe nọ nọ̀ agbàdo lọ mẹ E, yẹn na diọnukunsọ we,
Hiẹ osé he tin to aigba mimẹ́ de ji,’ wẹ Jehovah dọ.
‘Na nuhe dù hiẹ he nọ dọ dọ: “Mẹnu wẹ na tọ́nawhàn mí?
Podọ mẹnu wẹ na yangbé fininọ mítọn lẹ tọn?”
14 Yẹn na biọ to hiẹ si nado dogbè
Sọgbe hẹ walọ towe lẹ,’+ wẹ Jehovah dọ.
‘Yẹn nasọ dozò zungbo etọn,
Bọ e nasọ fiọ nuhe lẹdo e lẹpo.’”+
22 Nuhe Jehovah dọ die: “Jẹte yì owhé* ahọlu Juda tọn gbè bo dowẹn ehe. 2 Hiẹ na dọ dọ, ‘Sè ohó Jehovah tọn, hiẹ ahọlu Juda tọn he sin ofìn Davidi tọn ji E, yèdọ hiẹ po devizọnwatọ towe lẹ po gọna omẹ towe lẹ he nọ gbọn họngbo ehelẹ nù biọ whégbè. 3 Nuhe Jehovah dọ die: “Mì nọ yí whẹdida dodo po dodowiwa po do dawhẹ. Mì nọ whlẹn mẹhe yè to hihodu sọn mẹhodutọ lọ si. Mì sayana mẹhe to jonọ-gbéji depope blo, podọ mì hẹn awugble tọṣiọvi kavi asuṣiọsi depope blo.+ Mì sọ sọ̀n ohùn homẹvọnọ depope tọn dai to nọtẹn ehe blo.+ 4 Na eyin mì yí sọwhiwhe do setonuna ohó ehe, whenẹnu wẹ ahọlu he sinai to ofìn Davidi tọn ji lẹ+ na nọ biọ owhé ehe gbè gbọn họngbo lọ lẹ nù, to osọ́-kẹkẹ po osọ́ lẹ po ji, yèdọ yewlẹ, devizọnwatọ yetọn lẹ po omẹ yetọn lẹ po.”’+
5 “‘Ṣigba, eyin mì ma setonuna ohó ehelẹ, yẹn yí dee do whlé,’ wẹ Jehovah dọ, ‘dọ owhé ehe na yin vivasudo.’+
6 “Na nuhe Jehovah dọ gando owhé ahọlu Juda tọn go die,
‘Hiẹ taidi Giliadi hlan mi,
Taidi aganu boboe Lẹbanọni tọn.
Ṣogan, yẹn na hẹn we zun danfafa de;
Mẹdepope ma na nọ dopo tata to tòdaho towe lẹ mẹ.+
Yé na sán kedali dagbe hugan towe lẹ liai
Bo nasọ hẹn yé nado jai jẹ miyọ́n mẹ.+
8 “‘Akọta susu nasọ nọ jugbọn tòdaho ehe mẹ bo na nọ dọna ode awetọ dọmọ: “Naegbọn Jehovah do wà ehe na tòdaho ehe?”+ 9 Yé nasọ nọ gblọn dọmọ: “Na yé gbẹkọ alẹnu Jehovah Jiwheyẹwhe yetọn tọn go bo dẹ́ do odò hlan yẹwhe devo lẹ bosọ sẹ̀n yé wutu wẹ.”’+
10 A viavi na mẹhe kú lọ blo,
A sọ vẹawu i blo.
Kakatimọ, viavi vivẹvivẹ na mẹhe jei kanlinmọgbenu,
Na ewọ ma na lẹkọwa nado mọ aigba he ji e yin jiji te ba.
11 “Na nuhe Jehovah dọ gando Ṣalumi*+ visunnu Josia tọn, yèdọ ahọlu Juda tọn he to gandu to otẹn Josia+ otọ́ etọn tọn mẹ bo ko yì sọn nọtẹn ehe go die: ‘Ewọ ma na lẹkọyi finẹ ba. 12 Na ewọ na kú do fihe yé ko hẹn ẹn yì kanlinmọgbenu te, podọ e ma na mọ aigba ehe ba.’+
13 Dindọn wẹ na mẹhe gbá owhé etọn to mawadodo mẹ
Podọ abò aga tọn etọn lẹ to whẹdida mawadodo mẹ,
He nọ hẹn gbẹtọ hatọ etọn nado wazọ́n na ẹn vọnu,
He nọ gbẹ́ ma nado sú i azọ́nkuẹ etọn lẹ;+
14 Mẹhe nọ dọ dọ, ‘Yẹn na gbá ohọ̀ daho de
Po abò aga tọn gblagada lẹ po.
Yẹn na basi fleṣe lẹ do e go
Bo na whè owhlẹ kedali tọn lẹ do e go, bo nasọ sá osẹ̀n vẹẹ ṣẹṣẹ do e go.’
15 Be hiẹ na zindonukọn nado to gandu na a hú mẹdevo lẹ gbọn kedali yiyizan dali wẹ ya?
Otọ́ towe lọsu dù bo nù,
Ṣigba, ewọ yí whẹdida dodo po dodowiwa po do dawhẹ,+
Bọ e sọ yin dagbe na ẹn.
16 E yiavùnlọna owhẹ̀ agbátọnọ po wamọnọ po tọn,
Bọ nulẹ sọ yì ganji.
‘Be e ma yin nuhe e zẹẹmẹdo nado yọ́n mi niyẹn ya?’ wẹ Jehovah dọ.
17 ‘Ṣigba, nukun towe lẹ po ahun towe po nọ tin to ale mawadodo tọn kẹdẹ ji,
To ohùn homẹvọnọ tọn sinsọndai ji,
Podọ to mẹhodu po alọslonamẹ po ji.’
18 “Enẹwutu, nuhe Jehovah dọ gando Jehoiakimi+ visunnu Josia tọn he yin ahọlu Juda tọn go die,
‘Yé ma na nọ aluẹmẹ na ẹn dọmọ:
“Ojé, nọvisunnu ṣie! Ojé, nọviyọnnu ṣie!”
Yé ma na nọ aluẹmẹ na ẹn dọmọ:
“Ojé, klunọ E! Ojé, gigo etọn ko busẹ!”
19 Ewọ na yin dìdì taidi kẹtẹkẹtẹ de,+
Bo na yin dindọn pé bosọ yin zizedlan,
Do gbonu họngbo Jelusalẹm tọn lẹ tọn.’+
20 Hẹji yì Lẹbanọni bo dawhá dọ,
Mì ze ogbè daga to Baṣani,
Bosọ dawhá sọn Abalimi,+
Na yè ko gídí mẹhe tindo owanyi zogbe na we lẹpo.+
21 Yẹn dọhona we to whenue hiẹ tin to vivomẹ.
Ṣigba, hiẹ dọ dọ, ‘Yẹn ma na setonu.’+
Lehe hiẹ nọ yinuwa do sọn jọja whenu niyẹn,
Na hiẹ ma setonuna ogbè ṣie.+
22 Jẹhọn de na yìn do lẹngbọhọtọ towe lẹpo ji,+
Mẹhe tindo owanyi zogbe na we lẹ na yì kanlinmọgbenu.
Whenẹnu, hiẹ na yin winyando bo nasọ yin didepo na nugbajẹmẹji he na wá ji we lẹpo wutu.
23 Hiẹ he nọ nọ̀ Lẹbanọni E,+
He sawhé do kedali lẹ ṣẹnṣẹn,+
Lehe hunwinwẹn towe na sù do sọ to whenue awufiẹsa sinsinyẹn lẹ na wá ji we,
Yèdọ awufiẹsa he taidi yọnnu he to ajidònu de tọn!”+
24 “‘Dile yẹn togbẹ̀,’ wẹ Jehovah dọ, ‘eyin Konia*+ visunnu Jehoiakimi+ tọn, he yin ahọlu Juda tọn, wẹ tlẹ yin alọkẹ hiadonugo tọn to adusilọ ṣie go, yẹn na sisẹ́ mì dlan sọn finẹ! 25 Yẹn na ze mì do alọmẹ na mẹhe to dindin nado yí ogbẹ̀* mìtọn lẹ, yèdọ do alọ mẹhe mì nọ dibuna lẹ tọn mẹ, do alọ Ahọlu Nẹbukadnẹzali* Babilọni tọn mẹ, podọ do alọ Kaldeanu lẹ tọn mẹ.+ 26 Podọ yẹn na dlan mìwlẹ po onọ̀ he ji mì po do aigba devo ji, yèdọ fie mì ma yin jiji te, finẹ wẹ mì nasọ kú do. 27 Yé ma nasọ lẹkọwa aigba he yé ko tindo ojlo vẹkuvẹku na* lọ ji ba.+
28 Be dawe ehe, yèdọ Konia wẹ ko lẹzun ozẹ́n gbigbà he yin kọgbẹ́ e go de poun,
Yèdọ núzinzan de he mẹde ma tindo ojlo na ya?
Naegbọn ewọ po kúnkan etọn po do yin dindọn wá odò
Bo yin zizedlan aigba de he yé ma yọnẹn ji?’+
29 Aigba,* aigba, yèdọ aigba E, sè ohó Jehovah tọn.
30 Nuhe Jehovah dọ die,
‘Wlan yinkọ dawe ehe tọn dai taidi mẹhe ma tindo ovi,
Taidi mẹde he ma na tindo kọdetọn dagbe to gbẹwhenu etọn,*
Na depope to kúnkan etọn lẹ mẹ ma na tindo kọdetọn dagbe
Nado wá sinai do ofìn Davidi tọn ji bo duahọlu whladopo dogọ to Juda.’”+
23 “Dindọn na lẹngbọhọtọ lẹ he to lẹngbọ kanlindugbo ṣie tọn lẹ vasudo bo to yé vúnvún pé!” wẹ Jehovah dọ.+
2 Enẹwutu, nuhe Jehovah Jiwheyẹwhe Islaeli tọn dọ sọta lẹngbọhọtọ he to omẹ ṣie lẹ yìn lẹ die: “Mì ko gbà lẹngbọ ṣie lẹ do; mì sọ to yé vúnvún pé, podọ mì ma lẹ́ ayidonugo mìtọn hlan yé.”+
“Enẹwutu, yẹn na lẹ́ ayidonugo ṣie hlan mì na nuylankan he wà mì te lẹ wutu,” wẹ Jehovah dọ.
3 “Enẹgodo, yẹn na bẹ pipotọ lẹngbọ ṣie lẹ tọn pli sọn aigba he ji yẹn ko vúnvún yé pé gbọn lẹpo ji,+ yẹn nasọ hẹn yé gọwá kanlindugbo yetọn kọ̀n,+ yé nasọ yin sinsẹ́nnọ bo sudeji.+ 4 Yẹn nasọ de lẹngbọhọtọ he na yìn yé nugbonugbo lẹ do yé ji.+ Yé ma nasọ dibu kavi to sijọsijọ ji ba, podọ ode to yé mẹ ma na bu,” wẹ Jehovah dọ.
5 “Pọ́n! Azán lẹ ja,” wẹ Jehovah dọ, “to whenue yẹn na hẹn dodonọ de tọ́nkun* sọn kúnkan Davidi tọn mẹ.+ Podọ ahọlu de na dugán+ bo na do wuntuntun hia bo nasọ yí whẹdida dodo po dodowiwa po do dawhẹ to aigba lọ ji.+ 6 To azán etọn lẹ gbè, Juda na yin whinwhlẹngán,+ Islaeli nasọ nọ nọ̀ hihọ́ mẹ.+ Podọ oyín etọn na nọ yin yiylọdọ: Jehovah Wẹ Asisa Dodowiwa Mítọn Tọn.”+
7 “Ṣigba, azán lẹ ja,” wẹ Jehovah dọ, “whenue yé ma nasọ nọ dọ dọ, ‘Dile Jehovah togbẹ̀, yèdọ mẹhe hẹn omẹ Islaeli tọn lẹ tọ́n sọn aigba Egipti tọn ji!’+ 8 kakatimọ yé na nọ dọ dọ, ‘Dile Jehovah togbẹ̀, yèdọ mẹhe plan kúnkan owhé Islaeli tọn lẹ tọn sọn aigba agewaji tọn ji podọ sọn aigba he ji yẹn ko vúnvún yé pé gbọn lẹpo ji,’ yé nasọ nọ aigba yetọn titi ji.”+
9 Na nuhe dù yẹwhegán lẹ:
Ahun ṣie gbàdo.
Ohú ṣie lẹpo sọ to sisọsisọ.
Yẹn taidi dawe ahànnumunọ de
Yèdọ taidi dawe de he ko nùahànmú,
Na Jehovah tọn wutu, podọ na ohó wiwe etọn lẹ tọn wutu.
Podọ kanlindugbo danfafa tọn lẹ ko hú.+
Oylan wẹ aliho yetọn, yé sọ nọ ṣì huhlọn yetọn zan.
11 “Yẹwhegán lọ po yẹwhenọ lọ po ko yin hinhẹnflu.*+
Yẹn tlẹ ko mọ kanyinylan yetọn to ohọ̀ ṣie titi mẹ,”+ wẹ Jehovah dọ.
12 “Enẹwutu, aliho yetọn na dídí bo nasọ dózin;+
Yé na yin sisẹsisẹ bo na jai.
Na yẹn na hẹn nugbajẹmẹji wá yé ji
To owhe lẹnjo tọn mẹ,” wẹ Jehovah dọ.
13 “Yẹn ko mọ nuhe hiọawu de to yẹwhegán Samalia+ tọn lẹ dè.
Yé dọ dọdai yetọn lẹ gbọn Baali dali,
Yé sọ hẹn omẹ ṣie Islaelivi lẹ buali.
14 Yẹn ko sọ mọ nuhe hẹnmẹjọsi lẹ to yẹwhegán Jelusalẹm tọn lẹ dè.
Yé nọ deayọ+ bo nọ zinzọnlin to lalo mẹ;+
Yé nọ na tuli* ylanwatọ lẹ,
Yé masọ nọ dealọ sọn kanyinylan yetọn mẹ.
15 Enẹwutu, nuhe Jehovah awhànpa lẹ tọn dọ sọta yẹwhegán lẹ die:
“Yẹn na hẹn yé nado dù vivẹ́
Bo nasọ na yé osin adínọ nado nù.+
Na yẹwhegán Jelusalẹm tọn lẹ ko hẹn atẹṣiṣi gbayipe gbọn aigba lọ blebu ji.”
16 Nuhe Jehovah awhànpa lẹ tọn dọ die:
“Mì dotó ohó yẹwhegán he to dọdai dọna mì lẹ tọn blo.+
Kiklọ mì wẹ yé te.*
17 Yé nọ to didọ mapote na mẹhe ma nọ do sisi hia mi lẹ dọ,
‘Jehovah ko dọmọ: “Mì na duvivi jijọho tọn.”’+
Podọ na mẹdepope he nọ yí tasinsinyẹn do yinuwa sọgbe hẹ ahun etọn titi dọ,
‘Nugbajẹmẹji depope ma na wá mì ji.’+
18 Na mẹnu wẹ ko ṣite to họntọn vivẹ́ Jehovah tọn lẹ ṣẹnṣẹn
Nado mọ bosọ sè ohó etọn?
Mẹnu wẹ ko na ayidonugo ohó etọn nado sọgan sè?
19 Pọ́n! Yujẹhọn Jehovah tọn na gbajẹgbonu to adi etọn mẹ;
Taidi jẹhọn-ahizi de, e na gbaṣinyọ́n ota mẹylankan lẹ tọn.+
20 Homẹgble Jehovah tọn ma na doalọte
Kakajẹ whenue ewọ na yinuwa sọgbe hẹ linlẹn ahun etọn mẹ tọn lẹ bo hẹn yé di.
Mìwlẹ na wá mọnukunnujẹ ehe mẹ to azán godo tọn lẹ mẹ to gigọ́ mẹ.
21 Yẹn ma do yẹwhegán lọ lẹ hlan, ṣogan yé họ̀nwezun.
Yẹn ma dọhona yé, ṣogan yé dọ dọdai.+
22 Ṣigba, eyin yé ko ṣite to họntọn vivẹ́ ṣie lẹ ṣẹnṣẹn wẹ,
Yé na ko hẹn omẹ ṣie lẹ nado sè ohó ṣie lẹ
Bo na ko sọ hẹn yé nado lẹkọ sọn aliho ylankan yetọn ji podọ sọn nuylankan he wà yé te lẹ kọ̀n.”+
23 “Be yẹn yin Jiwheyẹwhe to yakẹ poun wẹ ya,” wẹ Jehovah dọ, “bọ yẹn ma yin Jiwheyẹwhe sọn olá wẹ ya?”
24 “Be mẹde sọgan whlá ede do nuglọ fide bọ yẹn ma na mọ ẹn wẹ ya?”+ wẹ Jehovah dọ.
“Be nude sọgan whlá do mi to olọn mẹ kavi to aigba ji wẹ ya?”+ wẹ Jehovah dọ.
25 “Yẹn ko sè ohó yẹwhegán he to dọdai lalo dọ to oyín ṣie mẹ lẹ tọn bo nọ dọ dọ, ‘Yẹn kudlọ de! Yẹn kudlọ de!’+ 26 Kakajẹ whetẹnu wẹ ehe na zindonukọn to ahun yẹwhegán lẹ tọn mẹ, bọ yé na to dọdai lalo dọ? Yẹwhegán he nọ yí ahun yetọn titi do klọmẹ lẹ wẹ yé.+ 27 Linlẹn yetọn wẹ nado hẹn omẹ ṣie lẹ nado wọnji oyín ṣie go gbọn odlọ he yé nọ to didọna ode awetọ lẹ dali, kẹdẹdile otọ́ yetọn lẹ wọnji oyín ṣie go na Baali wutu do.+ 28 Gbọ yẹwhegán he kudlọ de ni dọ odlọ lọ, ṣigba mẹhe tindo ohó ṣie ni dọ ohó ṣie po nugbonọ-yinyin po.”
“Etẹwẹ núyọ tindo to kọndopọ mẹ hẹ okún?” wẹ Jehovah dọ.
29 “Be ohó ṣie ma taidi miyọ́n de,”+ wẹ Jehovah dọ, “podọ taidi ṣówhènú he nọ gbà osé hányán de ya?”+
30 “Enẹwutu, yẹn na diọnukunsọ yẹwhegán lẹ,” wẹ Jehovah dọ, “mẹhe nọ slokọna ohó ṣie lẹ bo nọ dọ nuhe jlo yé lẹ na mẹdevo lẹ.”+
31 “Yẹn na diọnukunsọ yẹwhegán lẹ,” wẹ Jehovah dọ, “mẹhe nọ yí odẹ́ yetọn do dọ dọ, ‘Ewọ lá dọmọ!’”+
32 “Yẹn na diọnukunsọ yẹwhegán he nọ kudlọ lalo tọn lẹ,” wẹ Jehovah dọ, “bo nọ dọ yé bosọ nọ hẹn omẹ ṣie lẹ buali na lalo yetọn lẹ po glòlò-jijlá yetọn po wutu.”+
“Ṣigba, yẹn ma do yé hlan kavi degbena yé. Enẹwutu, yé ma na hẹn ale wá na omẹ ehelẹ to aliho depope mẹ,”+ wẹ Jehovah dọ.
33 “Podọ eyin omẹ ehelẹ kavi yẹwhegán de kavi yẹwhenọ de kanse we dọ, ‘Etẹwẹ yin agbànpẹnmẹnu* lọ sọn Jehovah dè?’ hiẹ na gblọnna yé dọ, ‘“Mìwlẹ wẹ yin agbànpẹnmẹnu lọ! Yẹn nasọ sisẹ́ mì dlan,”+ wẹ Jehovah dọ.’ 34 Na nuhe dù yẹwhegán lọ kavi yẹwhenọ lọ kavi mẹlọ lẹ he nọ dọ dọ, ‘Ehe wẹ yin agbànpẹnmẹnu* lọ sọn Jehovah dè!’ Yẹn na lẹ́ ayidonugo ṣie hlan dawe enẹ po whédo etọn po. 35 Nuhe dopodopo mìtọn to didọna hatọ etọn podọ na nọvisunnu etọn die, ‘Gblọndo tẹwẹ Jehovah ko na? Podọ etẹwẹ Jehovah ko dọ?’ 36 Ṣigba, mì masọ dona donù nuhe yin agbànpẹnmẹnu* lọ sọn Jehovah dè go ba, na ohó dopodopo mìtọn tọn wẹ yin agbànpẹnmẹnu* lọ, mì ko sọ diọ ohó Jiwheyẹwhe ogbẹ̀nọ lọ tọn lẹ, yèdọ Jehovah awhànpa lẹ tọn he yin Jiwheyẹwhe mítọn.
37 “Nuhe hiẹ na dọna yẹwhegán lọ die, ‘Gblọndo tẹwẹ Jehovah ko na we? Podọ etẹwẹ Jehovah ko dọ? 38 Eyin hiẹ sọ to didọ dọ, “Nuhe yin agbànpẹnmẹnu* lọ sọn Jehovah dè!” nuhe Jehovah dọ die: “Na nuhe dọ a te wutu dọ, ‘Ohó ehe wẹ yin agbànpẹnmẹnu* lọ sọn Jehovah dè,’ to whenue yẹn ko dọna we dọ, ‘Hiẹ ma dona dọ dọ: “Nuhe yin agbànpẹnmẹnu* lọ sọn Jehovah dè!”’ 39 pọ́n! Yẹn na ze we daga bo ze we dlan sọn nukọn ṣie, yèdọ hiẹ to pọmẹ hẹ tòdaho lọ he yẹn na hiẹ po tọgbo towe lẹ po. 40 Yẹn nasọ hẹn vlẹko po winyan madopodo po he ma na yin winwọn wá ji we.”’”+
24 Jehovah sọ do ohà awe hia mi, he mẹ ovò sinsẹ́n lẹ tin te to tẹmpli Jehovah tọn nukọn, to whenue Ahọlu Nẹbukadnẹzali* Babilọni tọn ko hẹn Jẹkonia*+ visunnu Jehoiakimi+ tọn he yin ahọlu Juda tọn, gọna ahọvi Juda tọn lẹ, anazọ́nwatọ lẹ po gànkọ̀ntọ* lẹ po yì kanlinmọgbenu; e bẹ yé sọn Jelusalẹm yì Babilọni.+ 2 Ovò sinsẹ́n dagbedagbe lẹ he taidi sinsẹ́n tintan lẹ tin to ohà dopo mẹ, ṣigba ovò sinsẹ́n gbigble, he gble sọmọ bọ yè ma sọgan dù lẹ tin to ohà awetọ mẹ.
3 Whenẹnu wẹ Jehovah kanse mi dọmọ: “Jelemia, etẹwẹ hiẹ mọ?” Yẹn sọ gblọn dọmọ: “Ovò sinsẹ́n lẹ; ovò sinsẹ́n dagbe lọ lẹ yọ́n taun, ṣigba dehe gble lọ lẹ gble taun, yé gble sọmọ bọ yè ma sọgan dù.”+
4 Jehovah sọ dọna mi dọmọ: 5 “Nuhe Jehovah Jiwheyẹwhe Islaeli tọn dọ die, ‘Taidi ovò sinsẹ́n dagbe ehelẹ, mọ wẹ yẹn na yí nukundagbe do pọ́n omẹ Juda tọn he yì kanlinmọgbenu lẹ do, yèdọ mẹhe yẹn ko dohlan sọn nọtẹn ehe yì aigba Kaldeanu lẹ tọn ji. 6 Yẹn na ze nukun do yé ji na dagbe yetọn, yẹn nasọ hẹn yé nado lẹkọwa aigba ehe ji.+ Yẹn na jlọ yé dote, yẹn ma nasọ họliai; yẹn na do yé, yẹn ma nasọ họ̀nadọna yé.+ 7 Yẹn nasọ na yé ahun de nado yọ́n mi, dọ yẹn wẹ Jehovah.+ Yé na lẹzun omẹ ṣie lẹ, yẹn nasọ lẹzun Jiwheyẹwhe yetọn,+ na yé na lẹkọwa dè e po ahun yetọn lẹpo po.+
8 “‘Ṣigba, na nuhe dù ovò sinsẹ́n gbigble lọ lẹ he gble sọmọ bọ mẹde ma sọgan dù,+ nuhe Jehovah dọ die: “Mọ wẹ yẹn na pọ́n Ahọlu Zedekia+ Juda tọn, ahọvi etọn lẹ, omẹ Jelusalẹm tọn he yin jijodo aigba ehe ji lẹ po mẹhe nọ nọ̀ aigba Egipti tọn ji lẹ po do.+ 9 Yẹn na hẹn yé zun nudobu de po nugbajẹmẹji de po na ahọluduta aigba ji tọn lẹpo,+ podọ vlẹko de, aṣagbe de, aṣagbọ́nu de po dẹ̀hodo+ de po to fie yẹn na vúnvún yé pé gbọn lẹpo.+ 10 Yẹn nasọ do ohí,+ huvẹ po azọ̀nylankan*+ po hlan yé, kaka yé nado dọ̀n sọn aigba he yẹn na yewlẹ po tọgbo yetọn lẹ po ji.”’”
25 Ohó ehe wẹ wá Jelemia dè gando omẹ Juda tọn lẹpo go to owhe ẹnẹtọ Jehoiakimi+ visunnu Josia tọn, yèdọ ahọlu Juda tọn mẹ, he yin owhe tintan Ahọlu Nẹbukadnẹzali* Babilọni tọn. 2 Nuhe Jelemia yẹwhegán lọ dọ gando* omẹ Juda tọn lẹpo po mẹhe nọ nọ̀ Jelusalẹm lẹpo po go die:
3 “Sọn owhe 13tọ Josia+ visunnu Amọni tọn, he yin ahọlu Juda tọn mẹ, kakajẹ egbehe, yèdọ owhe 23 ehelẹ, ohó Jehovah tọn wá dè e bọ yẹn fọ́n bo to didọna mì mapote,* ṣigba mì ma sè.+ 4 Jehovah sọ do devizọnwatọ etọn he yin yẹwhegán lẹpo hlan mì, bo nọ to yé dohlan mapote,* ṣigba mì ma dotoai kavi tuntoai hlan yé.+ 5 Yé nọ dọ dọ, ‘Dopodopo mìtọn ni jaale bo lẹkọ sọn aliho ylankan mìtọn lẹ ji podọ sọn nuylankan he wà mì te lẹ kọ̀n;+ mì nasọ nọ aigba lọ ji dẹn, yèdọ aigba he Jehovah na mìwlẹ po tọgbo mìtọn lẹ po sọn ojlẹ dindẹn die. 6 Mì ma hodo yẹwhe devo lẹ nado sẹ̀n yé bo dẹ́ do odò na yé blo, nado yí azọ́n alọ mìtọn lẹ tọn do hẹn homẹgble mi; eyin e ma yinmọ, yẹn na hẹn nugbajẹmẹji wá mì ji.’
7 “‘Ṣigba, mì ma dotoaina mi,’ wẹ Jehovah dọ. ‘Kakatimọ, mì yí azọ́n alọ mìtọn lẹ tọn do hẹn homẹgble mi, bo hẹn nugbajẹmẹji wá mìde titi ji.’+
8 “Enẹwutu, nuhe Jehovah awhànpa lẹ tọn dọ die, ‘“Na mì ma setonuna ohó ṣie lẹ wutu, 9 yẹn na basi oylọna whẹndo agewaji tọn lẹpo,”+ wẹ Jehovah dọ, “yẹn na ylọ Ahọlu Nẹbukadnẹzali* Babilọni tọn, yèdọ devizọnwatọ ṣie,+ yẹn nasọ hẹn yé wá sọta aigba ehe,+ sọta mẹhe nọ nọ̀ e ji lẹ podọ sọta akọta he lẹdo e ehe lẹpo.+ Yẹn na jo yé hlan vasudo bo na hẹn yé zun nudobu de podọ nude he na nọ hẹnmẹ kẹ̀hẹli po gbakija tẹgbẹ tọn de po. 10 Yẹn na hẹn awhágbe aglinjijẹ tọn po awhágbe ayajẹ tọn yetọn po wá opodo,+ yèdọ ogbè asisunọ yọyọ lọ tọn po ogbè asiyọyọ lọ tọn po,+ gọna nudidọ gilisé tọn po hinhọ́n miyọ́ngbán tọn po. 11 Aigba ehe lẹpo nasọ yin gbigbakija bo na lẹzun nudobu de, akọta ehelẹ nasọ sẹ̀n ahọlu Babilọni tọn na owhe 70.”’+
12 “‘Ṣigba, whenue owhe 70 lọ lẹ na wá vivọnu,+ yẹn na hẹn ahọlu Babilọni tọn po akọta enẹ po nado dogbè nuṣiwa yetọn tọn,’*+ wẹ Jehovah dọ, ‘yẹn nasọ hẹn aigba Kaldeanu lẹ tọn zun nọtẹn he gbọgbé de kakadoi.+ 13 Yẹn na hẹn ohó ṣie lẹpo he yẹn ko dọ sọta aigba enẹ wá e ji, yèdọ ohó he ko yin kinkan do owe ehe mẹ lẹpo he Jelemia dọ dọdai etọn sọta akọta lọ lẹpo. 14 Na akọta susu po ahọlu daho lẹ po+ na hẹn yé zun afanumẹ lẹ,+ yẹn nasọ suahọ yé sọgbe hẹ walọ yetọn lẹ po azọ́n alọ yetọn titi tọn lẹ po.’”+
15 Na nuhe Jehovah Jiwheyẹwhe Islaeli tọn dọna mi die: “Yí kọfo ovẹn homẹgble tọn ehe sọn alọ ṣie mẹ, bo hẹn akọta he dè yẹn do we hlan lẹpo nado nù in. 16 Yé nasọ nù bo to sàmù bo nasọ yinuwa taidi tadunọ lẹ, na ohí he yẹn na dohlan ṣẹnṣẹn yetọn wutu.”+
17 Yẹn sọ yí kọfo lọ sọn alọ Jehovah tọn mẹ bosọ hẹn akọta he dè Jehovah do mi hlan lẹpo nado nù in:+ 18 bẹsọn Jelusalẹm po tòdaho Juda tọn lẹ po ji,+ ahọlu etọn lẹ po ahọvi etọn lẹ po, nado hẹn yé zun gbakija de, nudobu de, nude he na nọ hẹnmẹ kúnwhé podọ dẹ̀hodo de,+ dile e te do to azán ehe gbè; 19 podọ Falo ahọlu Egipti tọn po devizọnwatọ etọn lẹ po, gọna ahọvi etọn lẹ po omẹ etọn lẹpo po,+ 20 podọ gbẹtọgun flusọ́ yetọn lẹpo; ahọlu aigba Uzi tọn lẹpo; ahọlu aigba Filistinu+ lẹ tọn lẹpo, Aṣikelọni,+ Gaza, Eklọni po omẹ Aṣidọdi tọn he pò lẹ po; 21 Edomi,+ Moabi+ po Amọninu+ lẹ po; 22 ahọlu Tile tọn lẹpo, ahọlu Sidoni tọn lẹpo+ po ahọlu lopo he tin to ohú ji tọn lẹ po; 23 Dedani,+ Tema, Buz po mẹhe whlẹ́ topá yetọn lẹpo po;+ 24 ahọlu Alabianu+ lẹ tọn lẹpo po ahọlu gbẹtọgun flusọ́ he nọ nọ̀ danfafa ji tọn lẹpo po; 25 ahọlu Zimli tọn lẹpo, ahọlu Elami+ tọn lẹpo po ahọlu Media tọn lẹpo po;+ 26 podọ ahọlu agewaji he to yakẹ po dehe dẹn tọn lẹpo po, yèdọ debọdo-dego, po ahọluduta aigba ji tọn he pò to aigba nukunmẹ lẹpo po; ahọlu Ṣeṣaki*+ tọn nasọ nù bọdo yé go.
27 “Hiẹ nasọ dọna yé dọ, ‘Nuhe Jehovah awhànpa lẹ tọn, yèdọ Jiwheyẹwhe Islaeli tọn dọ die: “Mì nù bo mú bosọ slú bo jai bọ mì ma na penugo nado fọ́n+ na ohí he yẹn na dohlan ṣẹnṣẹn mìtọn lọ wutu.”’ 28 Podọ eyin yé gbẹ́ nado yí kọfo lọ sọn alọ towe mẹ nado nù in, dọna yé dọ, ‘Nuhe Jehovah awhànpa lẹ tọn dọ die: “Mì dona nù in! 29 Mì pọ́n! eyin yẹn na hẹn nugbajẹmẹji wá tòdaho he tindo oyín ṣie to ota lọ ji jẹnukọn,+ be mìwlẹ na yin jijodo matin yasanamẹ wẹ ya?”’+
“‘Mì ma na nọma yin yasana, na yẹn na hẹn ohí de wá mẹhe nọ nọ̀ aigba ji lẹpo ji,’ wẹ Jehovah awhànpa lẹ tọn dọ.
30 “Hiẹ nasọ dọ dọdai ohó ehe lẹpo tọn na yé bo dọna yé dọ,
‘Sọn oji aga wẹ Jehovah na lì taidi kinnikinni de sọn,
Podọ sọn nọtẹn wiwe etọn mẹ wẹ e na hẹn ogbè etọn nado yin sisè sọn.
E na yí ogbè lélé do lì sọta nọtẹn tẹgbẹ tọn etọn.
E na ze ogbè daga taidi mẹhe to ovẹn sinsẹ́n tùn to ovẹn-finyọ́ndo de mẹ,
E nasọ jihàn awhàngbigba tọn sọta mẹhe nọ nọ̀ aigba ji lẹpo.’
31 ‘Awhágbe de na dọnú yì opodo aigba tọn lẹ,
Na Jehovah tindo nudindọn de hẹ akọta lẹ.
Ewọ lọsu wẹ na dawhẹna gbẹtọvi lẹpo.*+
E nasọ jo mẹylankan lẹ hlan ohí,’ wẹ Jehovah dọ.
32 Nuhe Jehovah awhànpa lẹ tọn dọ die:
‘Mì pọ́n! Nugbajẹmẹji de to kandlẹn sọn akọta de ji jẹ akọta devo ji,+
Jẹhọn-ahizi de nasọ yin tuntundote sọn awà he dẹn hugan aigba tọn lẹ ji.+
33 “‘Podọ mẹhe yin hùhù gbọn Jehovah dali to azán enẹ gbè lẹ na tin sọn opodo aigba tọn de ji kakajẹ opodo awetọ aigba tọn ji. Yè ma na nọ aluẹmẹ na yé, mọjanwẹ yè ma na bẹ yé pli kavi diṣiọ yetọn do niyẹn. Yé na taidi ogbó to aigba nukunmẹ.’
34 Mì doavihàn, mì lẹngbọhọtọ lẹ, mì ze ogbè daga!
Mì bli mìde gbọn kọmẹ, mì omẹ nukundeji lẹngbọpa lọ tọn lẹ,
Na ojlẹ nado hù mì po ojlẹ nado vúnvún mì pé po tọn ko wá,
Mì nasọ jai taidi núzinzan họakuẹ de!
35 Lẹngbọhọtọ lẹ ma tindo fide nado họnyi,
Podọ fihe omẹ nukundeji lẹngbọpa lọ tọn lẹ na họ̀n whlá do de ma tin.
36 Mì dotó! Awhágbe lẹngbọhọtọ lẹ tọn
Po avigbè omẹ nukundeji lẹngbọpa lọ tọn lẹ tọn po,
Na Jehovah to kanlindugbo yetọn vasudo.
37 Podọ nọtẹn jijọho tọn yetọn lẹ ko yin hinhẹn jẹvọ́
Na adi zogbe Jehovah tọn wutu.
38 E ko tọ́n sọn odò etọn mẹ taidi kinnikinni winyanwinyan de,+
Na aigba yetọn ko lẹzun nudobu de
Na ohí didá mlanmlan lọ wutu
Podọ na adi zogbe etọn tọn wutu.”
26 To bẹjẹeji gandudu Jehoiakimi+ visunnu Josia tọn, he yin ahọlu Juda tọn, ohó ehe wẹ Jehovah dọ dọmọ: 2 “Nuhe Jehovah dọ die, ‘Ṣite to awánu ohọ̀ Jehovah tọn mẹ bo dọho gando* omẹ tòdaho Juda tọn lẹ he nọ wá ohọ̀ Jehovah tọn mẹ nado basi sinsẹ̀n* lẹpo go. Dọ nuhe yẹn degbe etọn na we lẹpo na yé; a de ohó de sọn e mẹ blo. 3 Vlavo yé na dotoai bọ dopodopo yetọn na lẹ́ sọn nuylankan he wà yé te lẹ kọ̀n, yẹn nasọ diọlinlẹn gando nugbajẹmẹji he yẹn lẹn nado hẹnwa yé ji, na nuylankan he wà yé te lẹ wutu go.*+ 4 Dọna yé dọmọ: “Nuhe Jehovah dọ die, ‘Eyin mì ma na dotoaina mi gbọn tonusisena osẹ́n* ṣie he yẹn zedonukọnna mì lọ dali, 5 gbọn todidoai na ohó devizọnwatọ ṣie he yin yẹwhegán lẹ tọn dali, yèdọ mẹhe yẹn ko dohlan mì pludopludo lẹ,* he mì ma ko dotoaina,+ 6 to whenẹnu, yẹn na hẹn ohọ̀ ehe tin taidi Ṣilo,+ yẹn nasọ hẹn tòdaho ehe zun nuhe yin dẹ̀hodo de na akọta aigba ji tọn lẹpo.’”’”+
7 Yẹwhenọ lẹ, yẹwhegán lẹ po mẹlọ lẹpo po sọ sè bọ Jelemia to ohó ehelẹ dọ to ohọ̀ Jehovah tọn mẹ.+ 8 Enẹwutu, whenue Jelemia ko dotana nuhe Jehovah degbe etọn na ẹn nado dọna mẹlọ lẹpo godo, yẹwhenọ lẹ, yẹwhegán lẹ po mẹlọ lẹpo po sọ wle e bo dọmọ: “Hiẹ na kú dandan. 9 Naegbọn hiẹ do dọ dọdai to oyín Jehovah tọn mẹ bo dọ dọ, ‘Ohọ̀ ehe na tin taidi Ṣilo, bọ tòdaho ehe na yin vivasudo bọ mẹde ma nasọ nọ nọ̀ e mẹ’?” Mẹlọ lẹpo sọ pli bo lẹdo Jelemia to ohọ̀ Jehovah tọn mẹ.
10 To whenue ahọvi Juda tọn lẹ sè ohó ehelẹ, yé hẹji wá sọn owhé* ahọlu tọn gbè wá ohọ̀ Jehovah tọn mẹ bo sinai to họngbo yọyọ ohọ̀ Jehovah tọn ji.+ 11 Yẹwhenọ lẹ po yẹwhegán lẹ po sọ dọna ahọvi lọ lẹ po mẹlọ lẹpo po dọmọ: “Dawe ehe jẹna okú,+ na ewọ ko dọ dọdai sọta tòdaho ehe kẹdẹdile mì ko yí otó mìtọn titi lẹ do sè do.”+
12 Whenẹnu wẹ Jelemia dọna ahọvi lọ lẹpo po mẹlọ lẹpo po dọmọ: “Jehovah wẹ do mi hlan nado dọ dọdai ohó he mì ko sè lọ lẹpo tọn sọta ohọ̀ ehe podọ sọta tòdaho ehe.+ 13 Enẹwutu todin, mì diọ aliho mìtọn lẹ po nuyiwa mìtọn lẹ po bo setonuna ogbè Jehovah Jiwheyẹwhe mìtọn tọn, Jehovah nasọ diọlinlẹn gando nugbajẹmẹji he ewọ ko dọ emi na hẹnwa mì ji lọ go.*+ 14 Ṣigba na yẹn tọn, yẹn tin to alọ mìtọn mẹ. Nudepope he mì mọdọ e jlọ bo yin dagbe wẹ mì ni wà na mi. 15 E ni họnwun na mì poun dọ eyin mì hù mi, ohùn homẹvọnọ tọn wẹ mì na hẹnwa mìde, tòdaho ehe po mẹhe nọ nọ̀ e mẹ lẹ po ji, na desọn nugbo de mẹ, Jehovah wẹ do mi hlan mì dè nado dọ ohó ehe lẹpo do otó mìtọn lẹ mẹ.”
16 Whenẹnu wẹ ahọvi lọ lẹ po mẹlọ lẹpo po dọna yẹwhenọ lọ lẹ po yẹwhegán lọ lẹ po dọmọ: “Dawe ehe ma jẹna okú, na oyín Jehovah Jiwheyẹwhe mítọn tọn mẹ wẹ e dọhona mí te.”
17 Humọ, delẹ to mẹho aigba lọ tọn lẹ mẹ fọ́n bo jẹ didọna gbẹtọgun lọ pete ji dọmọ: 18 “Mika+ Molẹṣẹti tọn dọ dọdai to azán Ahọlu Hẹzekia+ Juda tọn lẹ gbè bo dọna omẹ Juda tọn lẹpo dọ, ‘Nuhe Jehovah awhànpa lẹ tọn dọ die:
“Ziọni na yin jijlo taidi ogle de,
Jelusalẹm na lẹzun okiti gbakija tọn lẹ,+
Osó Ohọ̀* lọ tọn nasọ wá taidi ofi yiaga lẹ to zungbo mẹ.”’*+
19 “Be Ahọlu Hẹzekia Juda tọn po omẹ Juda tọn lẹ po hù i to whenẹnu wẹ ya? Be ewọ ma dibusi Jehovah bo biọ nukundagbe Jehovah tọn,* sọmọ bọ Jehovah diọlinlẹn gando nugbajẹmẹji he ewọ ko dọ emi na hẹnwa yé ji lọ go* ya?+ Enẹwutu, nugbajẹmẹji daho de wẹ mí jlo na hẹnwa míde* ji.
20 “Dawe devo sọ to dọdai dọ to oyín Jehovah tọn mẹ, enẹ wẹ Ulija visunnu Ṣemaia tọn sọn Kiliati-jealimi,+ mẹhe yí ohó he taidi Jelemia tọn lẹ do dọ dọdai sọta tòdaho ehe podọ sọta aigba ehe. 21 Ahọlu Jehoiakimi+ po sunnu hlọnhlọnnọ etọn lẹpo po gọna ahọvi lọ lẹpo sè ohó ehelẹ, ahọlu lọ sọ jlo na hù i.+ To whenue Ulija sè ehe, e dibu to afọdopolọji bo họnyi Egipti. 22 Whenẹnu wẹ Ahọlu Jehoiakimi do Ẹlnatani+ visunnu Akbọli tọn gọna sunnu devo lẹ hlan Egipti. 23 Yé plan Ulija sọn Egipti bo hẹn ẹn wá Ahọlu Jehoiakimi dè, ewọ sọ yí ohí do hù i+ bo dlan oṣiọ etọn do yọdò omẹ paa lẹ tọn mẹ.”
24 Ṣigba Ahikami+ visunnu Ṣafani+ tọn nọgodona Jelemia, sọmọ bọ e ma yin jijodo alọmẹ na mẹlọ lẹ nado hù i.+
27 Ohó he wá na Jelemia sọn Jehovah dè to bẹjẹeji gandudu Jehoiakimi visunnu Josia tọn, yèdọ ahọlu Juda tọn die: 2 “Nuhe Jehovah dọna mi die, ‘Basi ajákẹn lẹ po opò zẹgẹ tọn lẹ po, bo ze yé do okọ̀ towe. 3 Enẹgodo, do yé hlan ahọlu Edomi tọn,+ ahọlu Moabi tọn,+ ahọlu Amọninu lẹ tọn,+ ahọlu Tile tọn+ po ahọlu Sidoni tọn+ po gbọn alọ wẹnsagun he wá Ahọlu Zedekia Juda tọn dè to Jelusalẹm lẹ tọn mẹ. 4 Dọ gbedide ehe na yé na yé nido dọna klunọ yetọn lẹ dọmọ:
“‘“Nuhe Jehovah awhànpa lẹ tọn, yèdọ Jiwheyẹwhe Islaeli tọn dọ die; nuhe mì na dọna klunọ mìtọn lẹ die, 5 ‘Yẹn wẹ dlẹnalọ ṣie jẹgbonu bo yí huhlọn daho ṣie do basi aigba, gbẹtọvi lẹ po kanlin he tin to aigba nukunmẹ lẹ po; yẹn ko sọ na mẹdepope he yẹn jlo.*+ 6 Podọ todin, yẹn ko ze aigba ehe lẹpo do alọmẹ na devizọnwatọ ṣie he yin Ahọlu Nẹbukadnẹzali+ Babilọni tọn; yẹn tlẹ ko na ewọ gbekanlin danji tọn lẹ lọsu nado nọ sẹ̀n ẹn. 7 Akọta lẹpo na sẹ̀n ewọ, visunnu etọn po ovivi etọn po kakajẹ whenue ojlẹ na sọ̀ na aigba ewọ lọsu tọn,+ to whenue akọta susu po ahọlu daho lẹ po na hẹn ẹn zun afanumẹ yetọn.’+
8 “‘“‘Eyin akọta kavi ahọluduta depope gbẹ́ nado sẹ̀n Ahọlu Nẹbukadnẹzali Babilọni tọn kavi gbẹ́ nado ze okọ̀ etọn do zẹgẹ ahọlu Babilọni tọn glọ, yẹn na yí ohí,+ huvẹ po azọ̀nylankan* po do sayana akọta enẹ,’ wẹ Jehovah dọ, ‘kakajẹ whenue yẹn na và yé sudo gbọn alọ etọn mẹ.’
9 “‘“‘Enẹwutu, mì dotoaina yẹwhegán mìtọn lẹ, dọṣẹdọtọ mìtọn lẹ, odlọ-kútọ mìtọn lẹ, nujlẹtọ mìtọn lẹ po owọ́ntọ mìtọn lẹ po blo, mẹhe nọ to didọna mì dọmọ: “Mì ma na sẹ̀n ahọlu Babilọni tọn.” 10 Na dọdai lalo dọna mì wẹ yé te, na mì nido yin hinhẹn yì fidindẹn sọn aigba mìtọn ji bọ yẹn nasọ vúnvún mì pé bọ mì na dọ̀n.
11 “‘“‘Ṣigba, akọta he na ze okọ̀ etọn do zẹgẹ ahọlu Babilọni tọn glọ bo na sẹ̀n ẹn wẹ yẹn na na dotẹnmẹ nado gbọṣi* aigba etọn ji,’ wẹ Jehovah dọ, ‘nado nọ pọ̀ ẹ bo nọ nọ̀ e ji.’”’”
12 Yẹn sọ dọhona Ahọlu Zedekia+ Juda tọn lọsu to aliho dopolọ mẹ dọmọ: “Ze okọ̀ towe wá zẹgẹ ahọlu Babilọni tọn glọ bo sẹ̀n ewọ po omẹ etọn lẹ po, hiẹ nasọ nọgbẹ̀.+ 13 Naegbọn hiẹ po omẹ towe lẹ po nado kú gbọn ohí,+ huvẹ+ po azọ̀nylankan+ po dali, dile Jehovah ko dọ do gando akọta he ma jlo na sẹ̀n ahọlu Babilọni tọn lẹ go? 14 Mì dotoaina ohó yẹwhegán he nọ to didọna mì dọ, ‘Mì ma na sẹ̀n ahọlu Babilọni tọn’ lẹ tọn blo,+ na dọdai lalo dọna mì wẹ yé te.+
15 “‘Na yẹn ma do yé hlan,’ wẹ Jehovah dọ, ‘ṣigba dọdai lalo dọna mì wẹ yé te to oyín ṣie mẹ, bọ kọdetọn etọn na yindọ yẹn na vúnvún mì pé bọ mì na dọ̀n, yèdọ mìwlẹ po yẹwhegán he to dọdai dọna mì lẹ po.’”+
16 Yẹn sọ dọna yẹwhenọ lẹ po omẹ ehe lẹpo po dọmọ: “Nuhe Jehovah dọ die, ‘Mì dotoaina ohó yẹwhegán mìtọn he to dọdai dọna mì lẹ tọn blo, dọmọ: “Mì pọ́n! Nuyizan he to ohọ̀ Jehovah tọn mẹ lẹ na yin hinhẹngọwa sọn Babilọni to madẹnmẹ!”+ na dọdai lalo dọna mì wẹ yé te.+ 17 Mì dotoaina yé blo. Mì sẹ̀n ahọlu Babilọni tọn bọ mì nasọ nọgbẹ̀.+ Naegbọn tòdaho ehe nado yin gbigbakija? 18 Ṣigba, eyin yẹwhegán lẹ wẹ yé bọ ohó Jehovah tọn tin po yé po, mì jaale bo dike yé ni vẹ̀ Jehovah awhànpa lẹ tọn na nuyizan he pò to ohọ̀ Jehovah tọn mẹ lẹ, podọ to owhé* ahọlu Juda tọn gbè lẹ, podọ to Jelusalẹm lẹ ni ma yin bibẹ yì Babilọni blo.’
19 “Na ehe wẹ Jehovah awhànpa lẹ tọn dọ gando dòtin lẹ,+ Ohù lọ,*+ agbàn-kẹkẹ lẹ+ po nuyizan he yin pipò dai to tòdaho ehe mẹ lẹ po go, 20 he Ahọlu Nẹbukadnẹzali Babilọni tọn ma bẹ to whenue e hẹn Jẹkonia visunnu Jehoiakimi tọn, yèdọ ahọlu Juda tọn yì kanlinmọgbenu sọn Jelusalẹm yì Babilọni, to pọmẹ hẹ omẹ nukundeji Juda po Jelusalẹm po tọn lẹpo;+ 21 mọwẹ, nuhe Jehovah awhànpa lẹ tọn, yèdọ Jiwheyẹwhe Islaeli tọn dọ gando nuyizan he yin pipò dai to ohọ̀ Jehovah tọn mẹ lẹ, podọ to owhé* ahọlu Juda tọn gbè lẹ podọ to Jelusalẹm lẹ go die: 22 ‘“Babilọni wẹ yé na yin hinhẹn yì,+ yé nasọ gbọṣi finẹ kakajẹ azán he gbè yẹn na lẹ́ ayidonugo ṣie hlan yé,” wẹ Jehovah dọ. “Yẹn nasọ hẹn yé lẹkọwa bo na gọ̀ yé do nọtẹn ehe.”’”+
28 To owhe dopolọ mẹ, to bẹjẹeji gandudu Ahọlu Zedekia+ Juda tọn, to osun atọ́ntọ owhe ẹnẹtọ tọn mẹ, yẹwhegán Hanania visunnu Azuli tọn sọn Gibeọni+ dọna mi to ohọ̀ Jehovah tọn mẹ to yẹwhenọ lẹ po mẹlọ lẹpo po nukọn dọmọ: 2 “Nuhe Jehovah awhànpa lẹ tọn, yèdọ Jiwheyẹwhe Islaeli tọn dọ die, ‘Yẹn na wẹ́n zẹgẹ ahọlu Babilọni tọn.+ 3 To owhe* awe gblamẹ, yẹn na gọ̀ nuyizan ohọ̀ Jehovah tọn mẹ tọn lẹpo he Ahọlu Nẹbukadnẹzali Babilọni tọn bẹ sọn fi yì Babilọni lẹkọ wáfi.’”+ 4 “‘Yẹn nasọ hẹn Jẹkonia+ visunnu Jehoiakimi+ tọn, yèdọ ahọlu Juda tọn, po omẹ Juda tọn he yì kanlinmọgbenu to Babilọni lẹpo po gọ̀ wáfi,’+ wẹ Jehovah dọ, ‘na yẹn na wẹ́n zẹgẹ ahọlu Babilọni tọn.’”
5 Whenẹnu wẹ Jelemia yẹwhegán lọ dọhona Hanania yẹwhegán lọ to yẹwhenọ lẹ po mẹhe ṣite to ohọ̀ Jehovah tọn mẹ lẹpo po nukọn. 6 Jelemia yẹwhegán lọ dọmọ: “Niṣẹ!* Na Jehovah ni basi ehe! Na Jehovah ni hẹn ohó towe he hiẹ ko dọ dọdai etọn lẹ di gbọn nuyizan ohọ̀ Jehovah tọn mẹ tọn lẹ po mẹhe yì kanlinmọgbenu lẹpo po hinhẹngọwa sọn Babilọni wáfi dali! 7 Ṣigba, yẹn vẹ̀ we, dotó owẹ̀n ehe he yẹn to dido do otó towe lẹ mẹ podọ do otó mẹlọ lẹpo tọn mẹ. 8 Sọn ojlẹ dindẹn die, yẹwhegán he jẹnukọnna yẹn po hiẹ po lẹ nọ saba dọ dọdai gando aigba susu po ahọluduta daho lẹ po go, podọ gando awhàn, nugbajẹmẹji po azọ̀nylankan po go. 9 Eyin yẹwhegán de dọ dọdai gando jijọho go bọ ohó yẹwhegán lọ tọn mọ hẹndi, to whenẹnu yè na yọnẹn dọ Jehovah wẹ do yẹwhegán enẹ hlan nugbonugbo.”
10 Enẹwutu, Hanania yẹwhegán lọ de opò zẹgẹ tọn lọ sọn okọ̀ na yẹwhegán Jelemia bosọ wẹ́n ẹn.+ 11 Whenẹnu wẹ Hanania dọ to mẹlọ lẹpo nukọn dọmọ: “Nuhe Jehovah dọ die, ‘To aliho ehe mẹ wẹ yẹn na wẹ́n zẹgẹ Ahọlu Nẹbukadnẹzali Babilọni tọn sẹ̀ sọn okọ̀ na akọta lẹpo te to owhe awe gblamẹ.’”+ Jelemia yẹwhegán lọ sọ wleali dedo.
12 To whenue Hanania yẹwhegán lọ ko wẹ́n opò zẹgẹ tọn lọ sẹ̀ sọn okọ̀ na yẹwhegán Jelemia godo, Jehovah sọ do owẹ̀n ehe Jelemia dọmọ: 13 “Yì bo dọna Hanania dọ, ‘Nuhe Jehovah dọ die: “Hiẹ ko wẹ́n zẹgẹ he opò etọn yin owhlẹ tọn lẹ,+ ṣigba zẹgẹ he opò etọn yin gànyuu tọn lẹ wẹ hiẹ na basi.” 14 Na nuhe Jehovah awhànpa lẹ tọn, yèdọ Jiwheyẹwhe Islaeli tọn dọ die: “Zẹgẹ he opò etọn yin gànyuu tọn wẹ yẹn na zedo okọ̀ na akọta ehe lẹpo na yé nido sẹ̀n Ahọlu Nẹbukadnẹzali Babilọni tọn, podọ yé nasọ nọ sẹ̀n ẹn.+ Yẹn nasọ na ẹn gbekanlin danji tọn lẹ lọsu.”’”+
15 Whenẹnu wẹ Jelemia yẹwhegán lọ dọna Hanania+ yẹwhegán lọ dọmọ: “Hanania E, jaale dotó! Jehovah ma ko do we hlan, ṣigba hiẹ ko hẹn omẹ ehelẹ nado dejido lalo go.+ 16 Enẹwutu, nuhe Jehovah dọ die, ‘Pọ́n! Yẹn na de we sẹ̀ sọn aigba nukunmẹ. Hiẹ na kú to owhe ehe mẹ, na hiẹ ko fọ́n atẹṣiṣi dote sọta Jehovah wutu.’”+
17 Hanania yẹwhegán lọ sọ kú to owhe enẹ mẹ, to osun ṣinawetọ mẹ.
29 Ohó he bọdego ehelẹ wẹ tin to wekanhlanmẹ he Jelemia yẹwhegán lọ dohlan sọn Jelusalẹm mẹ hlan mẹho he pò to mẹhe tin to kanlinmọgbenu lẹ mẹ, podọ hlan yẹwhenọ lẹ, yẹwhegán lẹ po mẹlọ lẹpo po, yèdọ mẹhe Nẹbukadnẹzali ko bẹ sọn Jelusalẹm yì kanlinmọgbenu to Babilọni lẹ, 2 to whenue Ahọlu Jẹkonia,+ onọ̀ ahọlu tọn,+ ahọluzọnwatọ họ̀nmẹ tọn lẹ, ahọvi Juda po Jelusalẹm po tọn lẹ, anazọ́nwatọ lẹ po gànkọ̀ntọ* lẹ po ko tọ́n sọn Jelusalẹm godo.+ 3 E do wekanhlanmẹ lọ hlan gbọn alọ Elasa visunnu Ṣafani+ tọn po Gemalia visunnu Hilkia tọn po mẹ, yèdọ mẹhe Ahọlu Zedekia+ Juda tọn dohlan Ahọlu Nẹbukadnẹzali Babilọni tọn dè to Babilọni lẹ. Nuhe e bẹhẹn die:
4 “Nuhe Jehovah awhànpa lẹ tọn, yèdọ Jiwheyẹwhe Islaeli tọn dọna mẹhe tin to kanlinmọgbenu lẹpo, enẹ wẹ mẹhe yẹn ko hẹn nado yì kanlinmọgbenu sọn Jelusalẹm yì Babilọni lẹ die, 5 ‘Mì gbá ohọ̀ lẹ bo nọ yé mẹ. Mì wleawuna jipa lẹ bo dù sinsẹ́n yetọn. 6 Mì dà asi lẹ bo ji visunnu lẹ po viyọnnu lẹ po; mì dà asi na visunnu mìtọn lẹ bosọ dike viyọnnu mìtọn lẹ ni wlealọ, na yelọsu lẹ nido ji visunnu lẹ po viyọnnu lẹ po. Mì sudeji to finẹ, mì dike sọha mìtọn depò blo. 7 Mì dín jijọho na tòdaho he mẹ yẹn hẹn mì yì kanlinmọgbenu te lọ bo hodẹ̀ hlan Jehovah do ota etọn mẹ, na gbọn jijọho etọn gblamẹ wẹ mì na mọ jijọho te.+ 8 Na nuhe Jehovah awhànpa lẹ tọn, yèdọ Jiwheyẹwhe Islaeli tọn dọ die: “Mì dike yẹwhegán lẹ po dọṣẹdọtọ he to ṣẹnṣẹn mìtọn lẹ po klọ mì blo,+ mì sọ dotoaina odlọ he kú yé te lẹ blo. 9 Na ‘dọdai lalo dọna mì wẹ yé te to oyín ṣie mẹ. Yẹn ma do yé hlan,’+ wẹ Jehovah dọ.”’”
10 “Na nuhe Jehovah dọ die, ‘To whenue owhe 70 lọ lẹ to Babilọni na ko wá vivọnu, yẹn na lẹ́ ayidonugo ṣie hlan mì+ bo na hẹn opagbe ṣie di gbọn hinhẹn mì gọ̀ wáfi dali.’+
11 “‘Na yẹn yọ́n nuhe lẹn n’te gando mì go lẹ ganji,’ wẹ Jehovah dọ, ‘yèdọ linlẹn jijọho tọn lẹ bọ e ma yin nugbajẹmẹji tọn lẹ,+ na mìwlẹ nido tindo sọgodo dagbe de po todido de po.+ 12 Podọ mì na ylọ mi bo na wá bo na hodẹ̀ hlan mi, yẹn nasọ dotoaina mì.’+
13 “‘Mì na dín mi bo nasọ mọ mi,+ na mì na dín mi po ahun mìtọn lẹpo po wutu.+ 14 Yẹn na kẹalọyi mì,’+ wẹ Jehovah dọ. ‘Yẹn nasọ bẹ kanlinmọ mìtọn lẹ pli bo na ṣinyan mì pli sọn akọta lẹpo mẹ podọ sọn fie yẹn ko vúnvún mì pé gbọn lẹpo,’+ wẹ Jehovah dọ. ‘Yẹn nasọ hẹn mì gọwá fihe yẹn ko hẹn mì nado tọ́nyi kanlinmọgbenu sọn lọ.’+
15 “Ṣigba, mì ko dọmọ, ‘Jehovah ko na mí yẹwhegán lẹ to Babilọni.’
16 “Na nuhe Jehovah dọna ahọlu he sinai do ofìn Davidi tọn ji+ podọ na mẹhe nọ nọ̀ tòdaho ehe mẹ lẹpo, yèdọ na nọvisunnu mìtọn he ma yì kanlinmọgbenu hẹ mì lẹ die, 17 ‘Nuhe Jehovah awhànpa lẹ tọn dọ die: “Yẹn na do ohí, huvẹ po azọ̀nylankan po hlan ṣẹnṣẹn yetọn,+ yẹn nasọ hẹn yé tin taidi ovò sinsẹ́n gbigble* he gble sọmọ bọ mẹde ma sọgan dù lẹ.”’+
18 “‘Yẹn nasọ yí ohí,+ huvẹ po azọ̀nylankan po do dómọna yé, podọ yẹn na hẹn yé zun nudobu de na ahọluduta aigba ji tọn lẹpo, podọ dẹ̀hodo de,+ nuhe na nọ hẹnmẹjọsi de, nude he na nọ hẹnmẹ kẹ̀hẹli+ podọ vlẹko de to akọta he mẹ yẹn na vúnvún yé pé gbọn lẹpo,+ 19 na yé ma dotoaina ohó ṣie lẹ he yẹn dọhlan yé gbọn devizọnwatọ ṣie yẹwhegán lẹ gblamẹ,’ wẹ Jehovah dọ, ‘yèdọ mẹhe yẹn dohlan whlasusu lẹ.’*+
“‘Ṣigba mì ma dotoai,’+ wẹ Jehovah dọ.
20 “Enẹwutu, mì sè ohó Jehovah tọn, mì mẹhe tin to kanlinmọgbenu lẹpo he yẹn bẹ sọn Jelusalẹm yì Babilọni. 21 Nuhe Jehovah awhànpa lẹ tọn, yèdọ Jiwheyẹwhe Islaeli tọn dọ gando Ahabi visunnu Kolaia tọn podọ gando Zedekia visunnu Maaseia tọn, yèdọ mẹhe to dọdai lalo dọna mì to oyín ṣie mẹ lẹ+ go die, ‘Yẹn na jo yé do alọmẹ na Ahọlu Nẹbukadnẹzali* Babilọni tọn, ewọ nasọ hù yé to nukun mìtọn lẹ mẹ. 22 Nuhe jọ do yé go nasọ lẹzun dẹ̀hodo de he omẹ Juda tọn he tin to kanlinmọgbenu to Babilọni lẹpo na nọ dọho etọn dọmọ: “Na Jehovah ni hẹn we tin taidi Zedekia podọ taidi Ahabi, mẹhe ahọlu Babilọni tọn hì to miyọ́n mẹ lẹ!” 23 na yé ko wà winyandomẹnu lẹ to Islaeli,+ bo deayọ hẹ asi kọmẹnu yetọn lẹ tọn bosọ dolalo to oyín ṣie mẹ, yèdọ nuhe yẹn ma ko degbe etọn na yé lẹ.+
“‘“Yẹn wẹ Mẹlọ he yọ́n ehe, podọ yẹn wẹ kunnudetọ etọn,”+ wẹ Jehovah dọ.’”
24 “Hiẹ nasọ dọna Ṣemaia+ Nehelami tọn dọ, 25 ‘Nuhe Jehovah awhànpa lẹ tọn, yèdọ Jiwheyẹwhe Islaeli tọn dọ die: “Na hiẹ do wekanhlanmẹ lẹ hlan mẹhe tin to Jelusalẹm lẹpo, podọ hlan Zefania+ visunnu Maaseia tọn, yèdọ yẹwhenọ lọ podọ hlan yẹwhenọ lọ lẹpo dọ, 26 ‘Jehovah ko hẹn we zun yẹwhenọ de to otẹn Jehoiada yẹwhenọ lọ tọn mẹ na hiẹ nido lẹzun nugopọntọ na ohọ̀ Jehovah tọn, nado nọ penukundo nulunọ depope he yinuwa taidi yẹwhegán de go bo nọ ze e do osópò lẹ mẹ podọ do okọ̀-gàn lẹ mẹ;+ 27 to whelọnu lo, naegbọn hiẹ ma ko gbẹnuna Jelemia Anatọti+ tọn he yinuwa taidi yẹwhegán de na we?+ 28 Na ewọ tlẹ dowẹn hlan mí to Babilọni dọmọ: “Mì na nọ kanlinmọgbenu na ojlẹ dindẹn! Mì gbá ohọ̀ lẹ bo nọ yé mẹ. Mì wleawuna jipa lẹ bo dù sinsẹ́n yetọn,+—”’”’”
29 To whenue Zefania+ yẹwhenọ lọ hia wekanhlanmẹ ehe do otó Jelemia yẹwhegán lọ tọn mẹ, 30 Jehovah dọna Jelemia dọmọ: 31 “Dowẹn hlan mẹhe tin to kanlinmọgbenu lẹpo dọmọ, ‘Nuhe Jehovah dọ gando Ṣemaia Nehelami tọn go die: “Na Ṣemaia dọ dọdai na mì, dile etlẹ yindọ yẹn ma do e hlan bọ e sọ tẹnpọn nado hẹn mì dejido lalo lẹ go,+ 32 enẹwutu nuhe Jehovah dọ die, ‘Yẹn na lẹ́ ayidonugo ṣie hlan Ṣemaia Nehelami tọn po kúnkan etọn po. Omẹ etọn dopo tata ma na luntọ́n to omẹ ehelẹ mẹ, podọ ewọ ma na mọ dagbe he yẹn na wà na omẹ ṣie lẹ,’ wẹ Jehovah dọ, ‘na ewọ ko fọ́n atẹṣiṣi dote sọta Jehovah wutu.’”’”
30 Ohó he wá na Jelemia sọn Jehovah dè die: 2 “Nuhe Jehovah Jiwheyẹwhe Islaeli tọn dọ die, ‘Kàn ohó he yẹn na dọna we lẹpo dai do owe de mẹ. 3 Na “pọ́n! azán lẹ ja,” wẹ Jehovah dọ, “to whenue yẹn na bẹ omẹ ṣie he yin kanlinmọ lẹ pli, enẹ wẹ Islaeli po Juda po,”+ wẹ Jehovah dọ, “yẹn nasọ hẹn yé gọwá aigba he yẹn na tọgbo yetọn lẹ lọ ji, e nasọ yin nutindo yetọn whladopo dogọ.”’”+
4 Ohó ehelẹ wẹ Jehovah dọna Islaeli po Juda po.
5 Nuhe Jehovah dọ die:
“Mí ko sè ogbè mẹhe to sijọsijọ ji lẹ tọn;
Obu wẹ tin, e ma yin jijọho.
6 Jaale bo kanse eyin sunnu de sọgan jivi.
To whelọnu lo, naegbọn yẹn do mọ bọ sunnu glegbenu lẹpo ze alọ yetọn do adọ̀go ji*
Taidi yọnnu de to ajidònu?+
Naegbọn nukunmẹ lẹpo do kúṣiọ?
7 Ojé! Azán he dobu* de wẹ azán enẹ.+
Devo ma tin taidi i,
Ojlẹ ayimajai tọn de na Jakọbu.
Ṣigba, ewọ na yin whinwhlẹn sọn e mẹ.”
8 “Podọ to azán enẹ gbè,” wẹ Jehovah awhànpa lẹ tọn dọ, “yẹn na wẹ́n zẹgẹ lọ sọn okọ̀ towe, yẹn nasọ tlẹ́n ajákẹn* he to zẹgẹ towe go do awe; jonọ lẹ ma nasọ hẹn ewọ* zun afanumẹ yetọn ba. 9 Yé na wadevizọn na Jehovah Jiwheyẹwhe yetọn po Davidi ahọlu yetọn po, yèdọ mẹhe yẹn na de do yé ji.”+
10 “Podọ hiẹ Jakọbu devizọnwatọ ṣie, a dibu blo,” wẹ Jehovah dọ,
“Islaeli E, a dike ahun towe gbàdo blo.+
Na yẹn na whlẹn we sọn fidindẹn
Podọ kúnkan towe sọn aigba kanlinmọgbenu tọn etọn ji.+
Jakọbu na lẹkọ bo na nọ nọ̀ fẹẹmẹ bo ma nasọ yin tuklado,
Bọ mẹde ma na nọ dobuna ẹn.”+
11 “Na yẹn tin po hiẹ po,” wẹ Jehovah dọ, “nado whlẹn we.
12 Na nuhe Jehovah dọ die:
“Awugble towe ma tindo pọngbọ.+
Apà towe ma sọgan kú.
13 Mẹde ma tin nado vẹvẹ do ota towe mẹ,
Aliho de ma tin nado hù agàdá towe.
Hiẹ ma na yin azọ̀nhẹngbọna.
14 Mẹhe tindo owanyi zogbe na we lẹpo ko wọnji gowe.+
Yé masọ nọ doafọna we ba.
Na yẹn ko yí opò kẹntọ de tọn do linú we,+
Yèdọ yasanamẹ omẹ kanylantọ de tọn,
Na whẹhuhu towe klo bọ ylando towe lẹ sọ sù wutu.+
15 Naegbọn hiẹ to awhádo na awugble towe wutu?
Awufiẹsa towe ma tindo pọngbọ!
Na whẹhuhu towe klo bọ ylando towe lẹ sọ sù wutu+
Yẹn ko wà ehe hẹ we.
16 Enẹwutu, mẹhe to tintlẹ́n we dù lẹpo na yin tintlẹ́n dù,+
Podọ kẹntọ towe lẹpo wẹ na yì kanlinmọgbenu.+
Yè na tọ́nawhàn mẹhe fọ́n do ji we lẹ,
Yẹn nasọ ze nutindo mẹhe to onú towe bẹ taidi ogblànnu lẹ tọn jo taidi ogblànnu de.”+
17 “Ṣigba, yẹn na hẹn we jẹgangan bo na hù apà towe lẹ,”+ wẹ Jehovah dọ,
“Dile etlẹ yindọ yé nọ ylọ we dọ gbéjinú de:
‘Ziọni, he mẹde ma nọ dín ba.’”+
18 Nuhe Jehovah dọ die:
“Yẹn na bẹ kanlinmọ gòhọ Jakọbu tọn lẹ tọn pli,+
Yẹn nasọ wàlẹblanuna gòhọtúntún etọn lẹ.
Tòdaho lọ na yin vivọgbá do pópló etọn ji,+
Atọ̀họ̀ gángán lọ na yin tùntùnte to otẹn he jẹ na ẹn mẹ.
19 Podọ pẹdido po ogbè nukiko tọn po na nọ wá sọn yé dè.+
Yé ma nasọ yin gbẹ́gọ́nu de.+
20 Visunnu etọn lẹ na tin taidi ojlẹ he wayi tọn,
Podọ gbẹtọgun etọn na hẹnai gligli to nukọn ṣie.+
Yẹn na diọnukunsọ kọgbidinamẹtọ etọn lẹpo.+
21 Omẹ nukundeji etọn nasọ yin dopo to omẹ etọn titi lẹ mẹ,
Podọ ṣẹnṣẹn etọn wẹ gandutọ etọn na wá sọn.
Yẹn na hẹn ẹn dọnsẹpọ, ewọ nasọ dọnsẹpọ mi.”
“Na eyin e ma yinmọ, mẹnu wẹ na gboadọ* bo na dọnsẹpọ mi?” wẹ Jehovah dọ.
22 “Mìwlẹ nasọ lẹzun omẹ ṣie lẹ+ bọ yẹn na yin Jiwheyẹwhe mìtọn.”+
23 Pọ́n! Yujẹhọn Jehovah tọn na gbajẹgbonu to adi etọn mẹ,+
Yèdọ jẹhọn-ahizi de he na gbaṣinyọ́n ota mẹylankan lẹ tọn.
24 Homẹgble sinsinyẹn Jehovah tọn ma na doalọte
Kakajẹ whenue ewọ na yinuwa sọgbe hẹ linlẹn ahun etọn mẹ tọn lẹ bo hẹn yé di.+
Mìwlẹ na wá mọnukunnujẹ ehe mẹ to azán godo tọn lẹ mẹ.+
31 “To ojlẹ enẹ mẹ, yẹn na lẹzun Jiwheyẹwhe na whẹndo Islaeli tọn lẹpo, yé nasọ lẹzun omẹ ṣie lẹ,” wẹ Jehovah dọ.+
2 Nuhe Jehovah dọ die:
“Mẹhe lùn ohí lọ tọ́n lẹ mọ nukundagbe to danfafa ji
To whenue Islaeli to zọnlinzin jei gbọjẹtẹn etọn.”
3 Jehovah ko sọawuhia mi sọn fidindẹn bo dọmọ:
“Yẹn ko yí owanyi madopodo de do yiwanna we.
Enẹ wẹ zọ́n bọ yẹn ko yí owanyi nugbo do dọ̀n we dogo.*+
4 Ṣogan, yẹn na vọ́ we doai na hiẹ nido yin vivọ́ doai.+
5 Hiẹ na pọ̀ vẹngle lẹ whladopo dogọ to osó Samalia tọn lẹ ji;+
Nudotọ lẹ na donú bo na dù sinsẹ́n yetọn.+
6 Na azán lọ ja whenue nuhọ́tọ he to osó Eflaimi tọn ji lẹ na dawhá bo dọ:
‘Mì fọ́n, mì dike mí ni hẹji yì Ziọni, yì Jehovah Jiwheyẹwhe mítọn dè.’”+
7 Na nuhe Jehovah dọ die:
“Mì dawhá hlan Jakọbu po ayajẹ po.
Mì yí ogbè lélé do jaya na mì yiaga hú akọta lẹ wutu.+
Mì lá ẹ; mì na gigo ewọ bo dọ dọ,
‘Jehovah E, whlẹn omẹ towe lẹ, yèdọ pipotọ Islaeli tọn.’+
8 Yẹn na hẹn yé gọwá sọn aigba agewaji tọn ji.+
Yẹn na bẹ yé pli sọn awà he dẹn hugan aigba tọn lẹ ji.+
Nukuntọ́nnọ po sẹkunọ po na tin to ṣẹnṣẹn yetọn,+
Yọnnu hohonọ po mẹhe to ajidònu po na tin to yé mẹ.
Yé na lẹkọ wáfi taidi gbẹtọgun daho de.+
9 Yé na wá po avi po.+
Yẹn nasọ deanana yé dile yé na to nukundagbe biọ.
Na Otọ́ de wẹ yẹn yin na Islaeli, podọ Eflaimi wẹ yin viplọnji ṣie.”+
10 Mì sè ohó Jehovah tọn, mì akọta lẹ emi,
Mì sọ lá ẹ to lopo he to fidindẹn lẹ ji:+
“Mẹlọ he vúnvún Islaeli pé na bẹ ẹ pli.
Ewọ na penukundo e go dile lẹngbọhọtọ de nọ wà na lẹngbọpa etọn do.+
11 Na Jehovah na fli Jakọbu gọ̀+
Ewọ nasọ whlẹn ẹn* sọn alọ mẹhe dohuhlọn hú i tọn mẹ.+
12 Yé na wá bo na jaya po ogbè lélé po to Ziọni ji aga+
Yé nasọ to sisẹ́ na dagbewà* Jehovah tọn wutu,
Na jinukun, ovẹn yọyọ+ po amì lọ po wutu,
Podọ na kanlin winyanwinyan lẹngbọpa po kanlinpa lọ po tọn wutu.+
13 “To ojlẹ enẹ mẹ, yọnnu alọji lọ na dúwe po ayajẹ po,
To pọmẹ hẹ dẹpẹ lẹ po sunnu mẹhomẹ lẹ po.+
Yẹn na diọ aluẹmẹninọ yetọn zun aglinjijẹ.+
Yẹn na miọnhomẹna yé bo na na yé ayajẹ do awubla tẹnmẹ.+
14 Yẹn na yí onú susugege* do hẹn pekọ wá na yẹwhenọ lẹ,*
Dagbewà ṣie nasọ hẹn pekọ wá na omẹ ṣie lẹ,”+ wẹ Jehovah dọ.
15 “Nuhe Jehovah dọ die:
‘Ogbè de yin sisè to Lama,+ yèdọ avigbè po avi vivẹvivẹ po:
Laheli wẹ to visunnu* etọn lẹ ví.+
E sọ gbẹ́ nado yin homẹmiọnna na visunnu etọn lẹ wutu,
Na yé ma tin ba wutu.’”+
16 Nuhe Jehovah dọ die:
“‘A sọ viavi ba blo podọ súnsún dasin sọn nukun towe lẹ mẹ,
Na ale de tin na azọ́n towe,’ wẹ Jehovah dọ.
‘Yé na lẹkọ sọn aigba kẹntọ tọn ji.’+
17 ‘Todido sọ tin na sọgodo towe,’+ wẹ Jehovah dọ.
‘Visunnu towe lẹ na lẹkọ do aigba yetọn titi ji.’”+
18 “Na nugbo tọn, yẹn ko sè hunwinwẹn Eflaimi tọn,
‘Hiẹ ko wọhẹ mi bọ yẹn ko basi vọjlado,
Taidi oyìnvu he yè ma ko plọnazọ́n.
Gọkọna mi, podọ e họnwun dọ yẹn na lẹkọ,
Na hiẹ wẹ Jehovah Jiwheyẹwhe ṣie.
19 To whenue yẹn lẹkọ godo, yẹn blawu;+
Podọ to whenue yẹn kẹalọyi oplọn godo, yẹn linú asapada ṣie na awubla.
Winyan hù mi, yẹn sọ tindo numọtolanmẹ mẹdèpo tọn,+
Na yẹn ko hẹn ovlẹ ovu whenu ṣie tọn.’”
20 “Be e ma yin visunnu vivẹ́, yèdọ ovi yiwanna de wẹ Eflaimi yin na mi ya?+
Na dile yẹn na dọho jẹagọdo e sù sọ, mọ wẹ yẹn na nọ flin in do niyẹn.
Enẹwutu wẹ onú etọn do biọlanmẹna mi sinsinyẹn.*+
E sọ họnwun dọ yẹn na wàlẹblanuna ẹn,” wẹ Jehovah dọ.+
21 “Yí zannu lẹ do dohiagona ali towe,
Bosọ yí dòtin lẹ do basi ohia lẹ.+
Na ayidonugo alihogbó lọ, yèdọ aliho he ji hiẹ jlo na gbọn.+
Lẹkọ, hiẹ viyọnnu alọji Islaeli tọn E, lẹkọwa tòdaho towe ehelẹ mẹ.
22 Nawẹ e na dẹnsọ bọ hiẹ nado to ayihaawe tindo, hiẹ viyọnnu he ma yin nugbonọ E?
Na Jehovah ko dá onú yọyọ de to aigba ji:
Yọnnu de na yí ojlo zogbe do doafọna sunnu de.”
23 Nuhe Jehovah awhànpa lẹ tọn, yèdọ Jiwheyẹwhe Islaeli tọn dọ die: “Yé na vọ́ ohó ehelẹ dọ to aigba Juda tọn ji podọ to tòdaho etọn lẹ mẹ to whenue yẹn na bẹ omẹ yetọn he to kanlinmọgbenu lẹ pli dọmọ: ‘Na Jehovah ni dona we, hiẹ nọtẹn dodowiwa tọn E,+ yèdọ hiẹ osó wiwe E.’+ 24 Podọ mẹhe nọ nọ̀ tòdaho Juda tọn mẹ lẹ, glesi lẹ po lẹngbọhọtọ lẹ po na nọ nọpọ́ to jijọho mẹ.+ 25 Yẹn nasọ vọ́ huhlọnna mẹhe* agbọ́ pé bo na hẹn mẹhe* nuṣikọna lodo.”+
26 Whenẹnu wẹ yẹn fọ́n bo hùn nukun ṣie lẹ, amlọn ṣie ko sọ yin awuvivinu de na mi.
27 “Mì pọ́n! Azán lẹ ja,” wẹ Jehovah dọ, “to whenue yẹn na do okún* gbẹtọ po kanlin-yìnyìn po tọn do owhé Islaeli tọn po owhé Juda tọn po gbè.”+
28 “Podọ kẹdẹdile yẹn na ayidonugo yé nado họ̀nadọna yé, sisẹ́ yé liai, họ́ yé liai, và yé sudo bosọ hẹn awugble wá na yé do,+ mọ wẹ yẹn na na ayidonugo yé nado jlọ yé dote podọ nado do yé do niyẹn,”+ wẹ Jehovah dọ. 29 “To azán enẹlẹ gbè, yé ma nasọ dọ ba dọ, ‘Otọ́ lẹ wẹ dù ovẹn sinsẹ́n he vẹsin bọ e wá wle adú na visunnu lẹ.’*+ 30 Ṣigba to whenẹnu, mẹdopodopo wẹ na kú na nuṣiwa etọn titi wutu. Podọ adú mẹhe dù ovẹn sinsẹ́n he vẹsin tọn wẹ na wle.”
31 “Mì pọ́n! Azán lẹ ja,” wẹ Jehovah dọ, “to whenue yẹn na basi alẹnu yọyọ de hẹ owhé Islaeli tọn podọ hẹ owhé Juda tọn.+ 32 E ma na taidi alẹnu he yẹn basi hẹ tọgbo yetọn lẹ to azán he gbè yẹn hẹn alọ yetọn go bo plan yé tọ́n sọn aigba Egipti tọn ji,+ ‘yèdọ alẹnu ṣie he yé gbà,+ dile etlẹ yindọ yẹn wẹ klunọ* jọnun yetọn,’ wẹ Jehovah dọ.”
33 “Na ehe wẹ alẹnu he yẹn na basi hẹ owhé Islaeli tọn to azán enẹlẹ godo,” wẹ Jehovah dọ. “Yẹn na yí osẹ́n ṣie do ohò yetọn mẹ,+ podọ ahun yetọn mẹ wẹ yẹn na kàn ẹn do.+ Yẹn nasọ lẹzun Jiwheyẹwhe yetọn, bọ yewlẹ na lẹzun omẹ ṣie lẹ.”+
34 “Podọ dopodopo yetọn ma nasọ nọ plọn kọmẹnu etọn, mọ dopodopo yetọn ma nasọ nọ plọn nọvisunnu etọn ba dọmọ, ‘Yọ́n Jehovah!’+ na yemẹpo wẹ na yọ́n mi, yèdọ sọn omẹ pẹvi ji jẹ daho yetọn ji,”+ wẹ Jehovah dọ. “Na yẹn na jona nuṣiwa yetọn, yẹn ma nasọ flin ylando yetọn ba.”+
35 Nuhe Jehovah dọ die,
Yèdọ mẹhe nọ hẹn owhè nado na hinhọ́n to okle,
Bo na osẹ́n* lẹ osun po sunwhlẹvu lẹ po nado na hinhọ́n to zánmẹ,
He nọ wlu ohù bo nọ hẹn agbówhẹn etọn lẹ fọnadán,
Mẹhe nọ yin Jehovah awhànpa lẹ tọn:+
36 “‘Eyin aṣẹdai ehelẹ sọgan gboawupo wẹ,’ wẹ Jehovah dọ,
‘Whenẹnu kẹdẹ wẹ kúnkan Islaeli tọn ma nasọ yin akọta de to whepoponu to nukọn ṣie ba.’”+
37 Nuhe Jehovah dọ die: “‘Eyin olọn lẹ to oji aga sọgan yin jijlẹ bọ yè sọgan mọdona dodonu aigba tọn lẹ to odò wẹ, whenẹnu kẹdẹ wẹ yẹn na gbẹ́ kúnkan Islaeli tọn pete dai na nuhe yé ko wà lẹpo wutu,’ wẹ Jehovah dọ.”+
38 “Mì pọ́n! Azán lẹ ja,” wẹ Jehovah dọ, “to whenue tòdaho lọ na yin gbigbá+ na Jehovah sọn Atọ̀họ̀ Hananẹli tọn kọ̀n+ yì Họngbo Lọnglọnẹnmẹ tọn lọ kọ̀n.+ 39 Podọ nujlẹkàn+ lọ na yin dindlẹn yì okọ́ta Galẹbi tọn ji tlọlọ bo nasọ lẹ́ pànta Goa. 40 Agbàdo he mẹ onú kúkú po afín* lẹ po te lọ pete gọna vẹngle lẹpo kakajẹ Agbàdo Kidlọni tọn kọ̀n,+ yì jẹ agosu Họngbo Osọ́ tọn+ kọ̀n pànta whèzẹtẹn, na yin onú wiwe Jehovah tọn.+ E ma nasọ yin adọ̀ họ̀nna kavi yin hihọliai gbede ba.”
32 Ohó ehe wẹ wá na Jelemia sọn Jehovah dè to owhe 10tọ gandudu Ahọlu Zedekia Juda tọn whenu, enẹ wẹ to owhe 18tọ gandudu Nẹbukadnẹzali* tọn whenu.+ 2 To ojlẹ enẹ mẹ, awhànpa ahọlu Babilọni tọn lẹ dosla lẹdo Jelusalẹm bọ Jelemia yẹwhegán lọ yin ginglọndo Awánu Nuhọ́tọ lẹ tọn+ mẹ to owhé* ahọlu Juda tọn gbè. 3 Na Ahọlu Zedekia Juda tọn ko wle e+ bo dọ dọ, “Naegbọn hiẹ do to dọdai ehe nkọ dọ? Hiẹ dọ dọ, ‘Nuhe Jehovah dọ die: “Yẹn na jo tòdaho ehe do alọ ahọlu Babilọni tọn mẹ, ewọ nasọ gbawhàn etọn,+ 4 podọ Ahọlu Zedekia Juda tọn ma na luntọ́n sọn alọ Kaldeanu lẹ tọn mẹ, na e họnwun dọ ewọ na yin jijodo alọmẹ na ahọlu Babilọni tọn bọ e na dọho hẹ ẹ tlọlọ bo nasọ mọ ẹn nukun sọ nukun.”’+ 5 ‘Ewọ na ze Zedekia yì Babilọni, podọ finẹ wẹ e na gbọṣi kakajẹ whenue yẹn na lẹ́ ayidonugo ṣie hlan ẹn,’ wẹ Jehovah dọ. ‘Dile etlẹ yindọ hiẹ to awhànfun sọta Kaldeanu lẹ, a ma na duto e ji.’”+
6 Jelemia dọmọ: “Jehovah ko dọna mi dọ, 7 ‘Hanamẹli visunnu Ṣalumi tavẹ towe tọn na wá dè we bo nasọ dọmọ: “Họ̀ ogle ṣie he tin to Anatọti,+ na hiẹ wẹ yin omẹ tintan he tindo jlọjẹ nado fli i gọ̀ wutu.”’”+
8 Hanamẹli visunnu tavẹ ṣie tọn sọ wá dè e kẹdẹdile Jehovah ko dọ do, yèdọ wá Awánu Nuhọ́tọ lẹ tọn lọ mẹ bo dọna mi dọmọ: “Jaale bo họ̀ ogle ṣie he tin to Anatọti to aigba Bẹnjamini tọn ji, na hiẹ tindo jlọjẹ nado yí i bo fli i gọ̀ wutu. Hiẹ wẹ na họ̀ ẹ.” Enẹwutu, yẹn yọnẹn dọ ohó Jehovah tọn wẹ hẹn ehe yọnbasi.
9 Enẹwutu, yẹn họ̀ ogle he tin to Anatọti lọ sọn Hanamẹli visunnu tavẹ ṣie tọn lọ si. Yẹn sọ jlẹ sọha akuẹ lọ tọn+ na ẹn, yèdọ ṣekẹli* ṣinawe po fataka-kuẹ ao po. 10 Yẹn sọ basi kandai etọn do owe de mẹ+ bo yí hiadonu do tlẹ́ ẹ bosọ ylọ kunnudetọ lẹ wá+ bo jlẹ akuẹ lọ to nujlẹgàn ji. 11 Yẹn ze owe nuhihọ tọn lọ, yèdọ dehe yè yí hiadonu do tlẹ́ sọgbe hẹ gbedide lọ po nubiọtomẹsi osẹ́n tọn lẹ po, gọna dehe yè ma yí hiadonu do tlẹ́ lọ, 12 podọ yẹn ze owe nuhihọ tọn lọ na Baluki+ visunnu Nelia+ tọn he yin visunnu Mahseia tọn, to Hanamẹli visunnu tavẹ ṣie tọn, kunnudetọ he doalọ owe nuhihọ tọn lọ mẹ lẹ po Ju he sinai to Awánu Nuhọ́tọ lẹ tọn+ lọ mẹ lẹpo po nukọn.
13 Yẹn sọ degbena Baluki to nukun yetọn mẹ dọmọ: 14 “Nuhe Jehovah awhànpa lẹ tọn, yèdọ Jiwheyẹwhe Islaeli tọn dọ die, ‘Ze owe ehelẹ, yèdọ owe nuhihọ tọn ehelẹ, dehe yè yí hiadonu do tlẹ́ po dehe yè ma yí hiadonu do tlẹ́ lọ po bo ze yé do núzinzan okọ́ tọn de mẹ, na yé nido gbọṣi aimẹ na ojlẹ dindẹn.’ 15 Na nuhe Jehovah awhànpa lẹ tọn, yèdọ Jiwheyẹwhe Islaeli tọn dọ die, ‘Owhé lẹ, ogle lẹ po vẹngle lẹ po na yin hihọ̀ whladopo dogọ to aigba ehe ji.’”+
16 Yẹn sọ hodẹ̀ hlan Jehovah to whenue yẹn ko ze owe nuhihọ tọn lọ na Baluki visunnu Nelia tọn godo, dọmọ: 17 “Ojé, Oklunọ Nupojipetọ Jehovah E! Pọ́n! Hiẹ wẹ dlẹnalọ towe bo yí huhlọn daho towe do basi olọn po aigba po.+ Nude masọ jiawu zẹjlẹgo na we, 18 yèdọ Mẹlọ he nọ do owanyi nugbo hia gbẹtọ fọtọ́n susu lẹ, ṣigba he nọ yiahọsu nuṣiwa otọ́ lẹ tọn to* visunnu yetọn lẹ go to godo mẹ,+ yèdọ Jiwheyẹwhe nugbo lọ he klo bosọ yin Omẹ hlọnhlọnnọ de, hiẹ mẹhe nọ yin Jehovah awhànpa lẹ tọn. 19 Lẹndai towe jiawu* bọ hiẹ sọ yin hlọnhlọnnọ to nuyiwa mẹ,+ hiẹ mẹhe nukun towe lẹ nọ to aliho gbẹtọ tọn lẹ pọ́n+ nado na mẹdopodopo sọgbe hẹ aliho etọn lẹ podọ sọgbe hẹ nuyiwa etọn lẹ.+ 20 Hiẹ ko basi ohia lẹ po azọ́njiawu lẹ po to aigba Egipti tọn ji, yèdọ nuhe yin yinyọnẹn kakajẹ egbehe lẹ, podọ hiẹ ko gbọnmọ dali wleawuna oyín de na dewe to Islaeli podọ to gbẹtọvi lẹ ṣẹnṣẹn,+ dile e te do to egbé. 21 Hiẹ sọ dlẹnalọ hlọnhlọnnọ towe jẹgbonu bo yí ohia lẹ, azọ́njiawu lẹ po nuyiwa budonamẹ tọn lẹ po do hẹn omẹ towe Islaelivi lẹ tọ́n sọn aigba Egipti tọn ji.+
22 “Enẹgodo, hiẹ na yé aigba lọ he hiẹ ko whlé nado na tọgbo yetọn lẹ,+ yèdọ aigba de he ji anọ́sin po owín po to sisà te.+ 23 Yé sọ wá bo yí aigba lọ taidi nutindo de, ṣigba yé ma setonuna ogbè towe kavi yìn osẹ́n towe lẹ. Yé ma wà nuhe hiẹ degbe etọn na yé lẹ depope, he zọ́n bọ hiẹ hẹn nugbajẹmẹji ehe lẹpo wá yé ji.+ 24 Pọ́n! Sunnu lẹ ko dosla lẹdo tòdaho lọ nado gbawhàn etọn,+ podọ e họnwun dọ tòdaho lọ na jai jẹ alọ Kaldeanu he to awhànfun sọta ẹ lẹ tọn mẹ na ohí,+ huvẹ+ po azọ̀nylankan po wutu; nuhe hiẹ dọ lẹpo ko jọ, dile hiẹ to mimọ do todin. 25 Ṣigba, Oklunọ Nupojipetọ Jehovah E, hiẹ ko dọna mi dọ, ‘Yí akuẹ do họ̀ ogle de bosọ ylọ kunnudetọ lẹ wá,’ dile etlẹ họnwun dọ tòdaho lọ na yin jijodo alọmẹ na Kaldeanu lẹ.”26 Whenẹnu wẹ Jehovah dọna Jelemia dọmọ: 27 “Yẹn die, yèdọ Jehovah Jiwheyẹwhe gbẹtọvi* lẹpo tọn. Be nude jiawu zẹjlẹgo na mi wẹ ya? 28 Enẹwutu, nuhe Jehovah dọ die, ‘Yẹn na jo tòdaho ehe do alọmẹ na Kaldeanu lẹ podọ do alọmẹ na Ahọlu Nẹbukadnẹzali* Babilọni tọn, ewọ nasọ gbawhàn etọn.+ 29 Kaldeanu he to awhànfun sọta tòdaho ehe lẹ nasọ biọ e mẹ bo na dozò tòdaho ehe bo nasọ fiọ ẹ+ to pọmẹ hẹ ohọ̀ he ta mẹlọ lẹ nọ basi avọ́sinsan lẹ hlan Baali te lẹ bo nọ kọ̀n avọ́nunina nùnù lẹ jẹgbonu hlan yẹwhe devo lẹ nado hẹn homẹgble mi.’+
30 “‘Na omẹ Islaeli tọn lẹ po Juda tọn lẹ po ko wà nuhe ylan kẹdẹ to nukun ṣie mẹ, yèdọ sọn jọja whenu yetọn gbọ́n;+ omẹ Islaeli tọn lẹ nọ to homẹhẹngblena mi gbọn azọ́n alọ yetọn lẹ tọn dali,’ wẹ Jehovah dọ. 31 ‘Na sọn whenue tòdaho ehe ko yin didoai kakajẹ egbé, nudevo ma nọ yin wiwà to e mẹ hugan nado to homẹhẹngblena mi bo to adi do homẹ na mi,+ enẹ wẹ zọ́n bọ e dona yin didesẹ sọn nukọn ṣie,+ 32 na oylan he omẹ Islaeli tọn lẹ po Juda tọn lẹ po ko wà nado hẹn homẹgblena mi lẹpo wutu—yèdọ yewlẹ, ahọlu yetọn lẹ,+ ahọvi yetọn lẹ,+ yẹwhenọ yetọn lẹ, yẹwhegán yetọn lẹ+ po omẹ Juda tọn lẹ po, gọna mẹhe nọ nọ̀ Jelusalẹm lẹ. 33 Yé nọ to godo yetọn lẹhlan mi mapote kakati nido yin nukunmẹ yetọn lẹ;+ dile etlẹ yindọ yẹn tẹnpọn nado plọn yé whlasusu,* depope to yé mẹ ma dotoai nado kẹalọyi mẹplọnlọ.+ 34 Yé sọ ze boṣiọ hiọawu yetọn lẹ do ohọ̀ he go yinkọ ṣie nọ yin yiylọ do lọ mẹ nado hẹn ẹn flu.+ 35 Humọ, yé do ofi yiaga lẹ na Baali to Agbàdo Visunnu Hinọmi tọn*+ mẹ, nado sọgan nọ hẹn visunnu yetọn lẹ po viyọnnu yetọn lẹ po jugbọn miyọ́n mẹ hlan Molẹki,+ yèdọ nude he yẹn ma degbe etọn na yé+ podọ e ma ko wá ayiha* ṣie mẹ pọ́n nado wà onú hiọawu mọnkọtọn, bo hẹn Juda nado waylando.’
36 “Enẹwutu, nuhe Jehovah Jiwheyẹwhe Islaeli tọn dọ gando tòdaho ehe he mì to didọ dọ e na yin jijodo alọmẹ na ahọlu Babilọni tọn gbọn ohí, huvẹ po azọ̀nylankan po dali go die, 37 ‘Yẹn na bẹ yé pli sọn aigba he ji yẹn vúnvún yé pé gbọn lẹpo to homẹgble ṣie mẹ, to adi ṣie mẹ, podọ to homẹgble sinsinyẹn ṣie mẹ,+ yẹn nasọ hẹn yé lẹkọ wáfi bo na dike yé ni nọ hihọ́ mẹ.+ 38 Yé na yin omẹ ṣie lẹ bọ yẹn nasọ yin Jiwheyẹwhe yetọn.+ 39 Yẹn nasọ na yé ahun dopo+ po aliho dopo po na yé nido nọ dibusi mi to whepoponu, na dagbe yetọn titi po dagbe ovi yetọn lẹ tọn po to godo mẹ.+ 40 Yẹn nasọ basi alẹnu madopodo de hẹ yé,+ he na zọ́n bọ yẹn ma na doalọtena dagbe wiwà na yé;+ podọ yẹn na yí budisi ṣie do ahun yetọn lẹ mẹ bọ yé ma nado lẹkọ sọn dè e.+ 41 Yẹn na jaya to dagbe wiwà na yé mẹ,+ yẹn nasọ yí ahun ṣie lẹpo po alindọn* ṣie lẹpo po do hẹn yé lodo gligli to aigba ehe ji.’”+
42 “Na nuhe Jehovah dọ die, ‘Kẹdẹdile yẹn ko hẹn nugbajẹmẹji daho ehe lẹpo wá omẹ ehelẹ ji do, mọ wẹ yẹn nasọ wà dagbe* he yẹn dopà etọn na yé lẹpo do niyẹn.+ 43 Ogle lẹ nasọ yin hihọ̀ whladopo dogọ to aigba ehe ji,+ dile etlẹ yindọ mì to didọmọ: “Aigba gbọgbé de wẹ he ji gbẹtọ po kanlin po ma tin te, podọ e ko yin jijodo alọmẹ na Kaldeanu lẹ.”’
44 “‘Yè na yí akuẹ do họ̀ ogle lẹ bo na basi kandai do owe nuhihọ tọn lẹ mẹ bo nasọ yí hiadonu do tlẹ́ yé bọ kunnudetọ lẹ nasọ yin yiylọ wá to aigba Bẹnjamini tọn ji,+ to lẹdo Jelusalẹm tọn lẹ mẹ,+ to tòdaho Juda tọn lẹ mẹ, to tòdaho he tin to lẹdo osó tọn mẹ lẹ mẹ, to tòdaho he to agbàdo mẹ lẹ mẹ+ podọ to tòdaho hùwaji tọn lẹ mẹ, na yẹn na hẹn omẹ yetọn he to kanlinmọgbenu lẹ lẹkọwa wutu,’+ wẹ Jehovah dọ.”
33 Jehovah sọ dọna Jelemia whla awetọ to whenue e gbẹ́ yin ginglọndo Awánu Nuhọ́tọ lẹ tọn+ mẹ, dọmọ: 2 “Nuhe Jehovah Basitọ aigba tọn, yèdọ Jehovah he wleawuna ẹn bosọ hẹn ẹn lodo gligli dọ die; Jehovah wẹ e nọ yin, 3 ‘Mì ylọ mi, yẹn nasọ gblọnna mì bo na dọ nujiawu po nuhe gẹdẹ he mìwlẹ ma ko yọnẹn lẹ po na mì sọn ojlo mẹ wá.’”+
4 “Na ehe wẹ Jehovah Jiwheyẹwhe Islaeli tọn dọ gando owhé tòdaho ehe tọn lẹ tọn go podọ gando owhé ahọlu Juda tọn lẹ tọn he yin hihọliai na dòkọ́ he yin dido lẹdo yé po ohí lọ po wutu go,+ 5 podọ gando mẹhe ja nado wá funawhàn hẹ Kaldeanu lẹ go, nado hẹn oṣiọ mẹhe yẹn hù to homẹgble po adi ṣie po mẹ lẹ tọn gọ́ nọtẹn ehelẹ mẹ, yèdọ mẹhe oylan yetọn ko hẹn mi nado whlá nukunmẹ ṣie do tòdaho ehe: 6 ‘Yẹn na hẹn ẹn gọwá bo na hẹn ẹn jẹgangan,+ yẹn nasọ hẹnazọ̀ngbọna yé bo na na yé jijọho po nugbonọ-yinyin po susugege.+ 7 Yẹn nasọ hẹn omẹ Juda tọn po omẹ Islaeli tọn he to kanlinmọgbenu lẹ po gọwá,+ yẹn nasọ hẹn yé lodo dile yẹn wà do to bẹjẹeji.+ 8 Podọ yẹn na lẹ̀ yé wé sọn owhẹ̀ he ylando yetọn lẹ hẹn yé nado hù do mi lẹpo mẹ,+ yẹn nasọ jona owhẹ̀ he ylando yetọn lẹ po sẹ́nhẹngba yetọn lẹ po hẹn yé nado hù do mi lẹpo.+ 9 Ewọ nasọ lẹzun oyín aglinjijẹ tọn de, pipà de po onú whanpẹnọ de po na mi to akọta aigba tọn lẹpo he na sè dogbọn dagbe he yẹn na wà na yé lẹpo dali nukọn.+ Yé nasọ dibu bo jọsi+ na dagbe po jijọho he yẹn na hẹnwa ewọ ji lẹpo po wutu.’”+
10 “Nuhe Jehovah dọ die: ‘To nọtẹn ehe he mì na dọ dọ e yin aigba gbọgbé de mẹ, fie gbẹtọ kavi kanlin-yìnyìn ma tin te to tòdaho Juda tọn lẹ mẹ podọ to tòhomẹ-liho Jelusalẹm tọn he ko jẹvọ́ lẹ ji, fie gbẹtọ kavi tòmẹnu kavi kanlin-yìnyìn ma tin te, ogbè de nasọ yin sisè whladopo dogọ 11 yèdọ ogbè aglinjijẹ tọn po ogbè ayajẹ tọn po,+ ogbè asisunọ yọyọ po ogbè asiyọyọ tọn po, ogbè yé he to didọ dọmọ: “Mì nọ dopẹna Jehovah awhànpa lẹ tọn, na Jehovah yọ́n;+ owanyi nugbo etọn na gbọṣi aimẹ kakadoi!” lẹ tọn.’+“‘Yé na hẹn avọ́nunina pẹdido tọn lẹ wá ohọ̀ Jehovah tọn mẹ,+ na yẹn na hẹn omẹ aigba lọ tọn he to kanlinmọgbenu lẹ gọwá, dile e te do to bẹjẹeji,’ wẹ Jehovah dọ.”
12 “Nuhe Jehovah awhànpa lẹ tọn dọ die: ‘To aigba gbọgbé ehe ji, fie gbẹtọ kavi kanlin-yìnyìn ma tin te, podọ to tòdaho etọn lẹpo mẹ, kanlindugbo lẹ nasọ tin whladopo dogọ fie lẹngbọhọtọ lẹ na nọ hẹn lẹngbọpa yetọn lẹ nado gbọjẹ te.’+
13 “‘To tòdaho he to lẹdo osó tọn mẹ lẹ, to tòdaho he to agbàdo mẹ lẹ, to tòdaho he to hùwaji lẹ mẹ, to aigba Bẹnjamini tọn ji, to lẹdo Jelusalẹm tọn lẹ mẹ+ podọ to tòdaho Juda tọn lẹ mẹ,+ lẹngbọhọtọ lẹ na gbẹ́ wá hia lẹngbọ yetọn lẹ whladopo dogọ,’ wẹ Jehovah dọ.”
14 “‘Pọ́n! Azán lẹ ja,’ wẹ Jehovah dọ, ‘to whenue yẹn na hẹn opagbe dagbe he yẹn ko do na owhé Islaeli tọn po owhé Juda tọn po di.+ 15 To azán enẹlẹ gbè podọ to ojlẹ enẹ mẹ, yẹn na hẹn dodonọ de tọ́nkun* sọn kúnkan Davidi tọn mẹ,+ ewọ nasọ yí whẹdida dodo po dodowiwa po do dawhẹ to aigba lọ ji.+ 16 To azán enẹlẹ gbè, Juda na yin whinwhlẹngán,+ Jelusalẹm nasọ nọ nọ̀ hihọ́ mẹ.+ Podọ oyín etọn na nọ yin yiylọdọ: Jehovah Wẹ Asisa Dodowiwa Mítọn Tọn.’”+
17 “Na nuhe Jehovah dọ die: ‘Sunnu he na wá sọn kúnkan Davidi tọn mẹ nado sinai to ofìn owhé Islaeli tọn ji ma na hán gbede,+ 18 mọjanwẹ sunnu he na nọ ṣite to nukọn ṣie nado na avọ́nunina mimẹ̀ blebu lẹ, nado fiọ avọ́nunina jinukun-lili tọn lẹ podọ nado basi avọ́sinsan lẹ ma na hán to yẹwhenọ Levinu lẹ mẹ gbede do niyẹn.’”
19 Jehovah sọ dọna Jelemia whladopo dogọ dọmọ: 20 “Nuhe Jehovah dọ die, ‘Eyin mìwlẹ sọgan doalọtena alẹnu ṣie gando okle go podọ alẹnu ṣie gando ozán go bo glọnalina okle po ozán po ma nado wá to ojlẹ sisọ yetọn mẹ wẹ,+ 21 whenẹnu kẹdẹ wẹ alẹnu ṣie hẹ devizọnwatọ ṣie Davidi sọgan yin aliglọnna+ bọ ewọ ma nado tindo visunnu de he na dugán taidi ahọlu to ofìn etọn ji,+ podọ nudopolọ wẹ gando alẹnu ṣie hẹ yẹwhenọ Levinu lẹ, yèdọ lizọnyizọnwatọ ṣie lẹ go.+ 22 Kẹdẹdile awhànpa olọn tọn lẹ ma sọgan yin hihia bọ tọkẹ́n ohù tọn lẹ ma sọgan yin jijlẹ do, mọ wẹ yẹn na hẹn kúnkan* devizọnwatọ ṣie Davidi tọn po Levinu he to lizọnyi to nukọn ṣie lẹ po sudeji do.’”
23 Jehovah sọ dọna Jelemia whladopo dogọ dọmọ: 24 “Be hiẹ ma ko doayi nuhe omẹ ehelẹ to didọ go dọmọ, ‘Be Jehovah na gbẹ́ whẹndo awe he e de lọ lẹ dai wẹ ya’? Yé sọ to nuyiwa hẹ omẹ ṣie titi lẹ po sisi matindo po, yé masọ nọ pọ́n yé hlan taidi akọta de ba.
25 “Nuhe Jehovah dọ die: ‘Na nugbo tọn, kẹdẹdile yẹn ko hẹn alẹnu ṣie gando okle po ozán po go+ gọna osẹ́n* ṣie lẹ gando olọn po aigba po go lodo do,+ 26 mọ wẹ yẹn ma na gbẹ́ kúnkan* Jakọbu tọn po devizọnwatọ ṣie Davidi tọn po dai gbede do niyẹn, bo ma na doalọtena gandutọ lẹ didesọn kúnkan* etọn mẹ do kúnkan* Ablaham, Isaki po Jakọbu tọn lẹ po ji. Na yẹn na gọ̀ omẹ yetọn he to kanlinmọgbenu lẹ bẹpli+ bo nasọ wàlẹblanuna yé.’”+
34 Jehovah dọna Jelemia to whenue Ahọlu Nẹbukadnẹzali* Babilọni tọn po awhànpa etọn lẹpo po gọna ahọluduta aigba ji tọn he to gandudu etọn glọ lẹpo to awhànfun sọta Jelusalẹm po tòdaho etọn lẹpo po,+ dọmọ:
2 “Nuhe Jehovah Jiwheyẹwhe Islaeli tọn dọ die, ‘Yì bo dọhona Ahọlu Zedekia+ Juda tọn bo dọna ẹn dọmọ: “Nuhe Jehovah dọ die, ‘Yẹn na jo tòdaho ehe do alọmẹ na ahọlu Babilọni tọn, ewọ nasọ yí miyọ́n do fiọ ẹ.+ 3 Hiẹ ma nasọ luntọ́n sọn alọ etọn mẹ, na e họnwun dọ hiẹ na yin wiwle bo na yin zizejo na ewọ.+ Podọ hiẹ na mọ ahọlu Babilọni tọn nukun sọ nukun, ewọ nasọ dọho hẹ we tlọlọ bọ hiẹ na yin hinhẹn yì Babilọni.’+ 4 Ṣigba, hiẹ Ahọlu Zedekia Juda tọn E, sè ohó Jehovah tọn, ‘Nuhe Jehovah dọ gando gowe die: “Hiẹ ma na kú gbọn ohí dali. 5 Hiẹ na kú to jijọho mẹ,+ yé nasọ mẹ̀ nuwhẹ́nkun owán gblingblinnọ lẹ na we dile yè wà do na otọ́ towe lẹ, yèdọ ahọlu he ko jẹnukọnna we lẹ, podọ yé na nọ aluẹmẹ na we dọmọ, ‘Ojé, klunọ E!’ na ‘yẹn ko dọ ohó lọ,’ wẹ Jehovah dọ.”’”’”
6 Whenẹnu wẹ Jelemia yẹwhegán lọ dọ ohó ehe lẹpo na Ahọlu Zedekia Juda tọn to Jelusalẹm, 7 to whenue awhànpa ahọlu Babilọni tọn lẹ to awhànfun sọta Jelusalẹm podọ sọta tòdaho Juda tọn he gbẹ́ pò lẹpo,+ sọta Lakiṣi+ podọ sọta Azeka;+ na tòdaho gángán ehelẹ kẹdẹ wẹ yin tòdaho he pò to Juda.
8 Ohó ehe wẹ Jehovah dọna Jelemia to whenue Ahọlu Zedekia ko basi alẹnu de hẹ mẹhe to Jelusalẹm lẹpo nado lá tundote hlan yé,+ 9 dọ mẹlẹpo dona tún afanumẹ yetọn he yin Heblu lẹ dote, yèdọ sunnu po yọnnu po, bọ mẹdepope ma nado hẹn Ju hatọ etọn go taidi afanumẹ. 10 Ahọvi lọ lẹpo po mẹlọ lẹpo po sọ setonu. Yé ko biọ alẹnu de mẹ dọ mẹlẹpo dona tún afanumẹ yetọn lẹ he yin sunnu kavi yọnnu dote bo ma na hẹn yé go taidi afanumẹ lẹ ba. Yé sọ setonu bo jo yé do nado yì. 11 Ṣigba, yé sọ hẹn afanumẹ sunnu kavi yọnnu he yé ko tundote lọ lẹ lẹkọwa, bosọ hẹn yé zun afanumẹ gánnugánnu whladopo dogọ. 12 Enẹwutu, ohó Jehovah tọn wá na Jelemia sọn Jehovah dè dọmọ:
13 “Nuhe Jehovah Jiwheyẹwhe Islaeli tọn dọ die, ‘Yẹn basi alẹnu de hẹ tọgbo mìtọn lẹ+ to azán he gbè yẹn hẹn yé tọ́n sọn aigba Egipti tọn ji, yèdọ sọn kanlinmọgbenu,+ dọmọ: 14 “To vivọnu owhe ṣinawe lẹ tọn, dopodopo mìtọn dona nọ tún nọvisunnu etọn he yin Heblu bo yin sisà na ẹn bo ko sẹ̀n ẹn na owhe ṣidopo dote; mì dona tún in dote.”+ Ṣigba, tọgbo mìtọn lẹ ma dotoai kavi tuntoai hlan mi. 15 Podọ to agọe,* mìlọsu lẹ ko basi diọdo bo ko wà nuhe sọgbe to nukun ṣie mẹ gbọn tundote lilá na hatọ mìtọn lẹ dali, podọ mì basi alẹnu de to nukọn ṣie to ohọ̀ he go yinkọ ṣie nọ yin yiylọ do lọ mẹ. 16 Ṣigba, mìwlẹ ko diọ bo ko hẹn oyín ṣie flu+ gbọn afanumẹ mìtọn sunnu po yọnnu lẹ po he mì tundote sọgbe hẹ ojlo* yetọn hinhẹngọwa dali, mì sọ hẹn yé zun afanumẹ gánnugánnu whladopo dogọ.’
17 “Enẹwutu, nuhe Jehovah dọ die: ‘Mì ma setonuna mi to whenue mì lá tundote, yèdọ mẹdopodopo na nọvisunnu etọn podọ na hatọ etọn.+ Enẹwutu, tundote he yẹn to lilá na mì die,’ wẹ Jehovah dọ, ‘mìwlẹ na kú gbọn ohí, azọ̀nylankan po huvẹ po dali,+ yẹn nasọ hẹn mì zun nudobu de na ahọluduta aigba ji tọn lẹpo.+ 18 Podọ, ehe wẹ na jọ do yé he gbà alẹnu ṣie lẹ go, gbọn tonumase na ohó alẹnu lọ tọn lẹ he yé basi to nukọn ṣie dali to whenue yé zẹ̀ oyìnvu lọ do awe bo gbọn ṣẹnṣẹn na mimá etọn lẹ,+ 19 yèdọ ahọvi Juda tọn lẹ, ahọvi Jelusalẹm tọn lẹ, ahọluzọnwatọ họ̀nmẹ tọn lẹ, yẹwhenọ lẹ po mẹhe nọ nọ̀ aigba lọ ji lẹpo po he gbọn mimá oyìnvu lọ tọn lẹ ṣẹnṣẹn: 20 Yẹn na jo yé hlan kẹntọ yetọn lẹ podọ na mẹhe to ogbẹ̀* yetọn dín lẹ, oṣiọ yetọn lẹ nasọ lẹzun núdùdù na ohẹ̀ agahomẹ tọn lẹ po kanlin aigba ji tọn lẹ po.+ 21 Yẹn nasọ jo Ahọlu Zedekia Juda tọn po ahọvi etọn lẹ po do alọmẹ na kẹntọ yetọn lẹ podọ do alọmẹ na mẹhe to ogbẹ̀* yetọn dín lẹ, podọ do alọmẹ na awhànpa ahọlu Babilọni tọn lẹ tọn,+ he to agọjoyigodo sọn mì dè lẹ.’+
22 “‘Yẹn na degbe,’ wẹ Jehovah dọ, ‘yẹn nasọ hẹn yé gọwá tòdaho ehe mẹ, podọ yé na funawhàn sọta ẹ bo na gbawhàn etọn bo nasọ yí miyọ́n do fiọ ẹ;+ yẹn na hẹn tòdaho Juda tọn lẹ zun aigba gbọgbé de, mẹde ma nasọ nọ nọ̀ yé mẹ.’”+
35 Ohó he Jehovah dọna Jelemia to azán Jehoiakimi+ visunnu Josia, yèdọ ahọlu Juda tọn lẹ gbè die: 2 “Yì owhé Lekabinu+ lẹ tọn gbè bo dọho hẹ yé bosọ plan yé wá ohọ̀ Jehovah tọn mẹ, yèdọ wá dopo to abò núdùdù tọn lẹ mẹ; enẹgodo, na yé ovẹn nado nù.”
3 Enẹwutu, yẹn plan Jaazania visunnu Jelemia he yin visunnu Habazinia tọn, nọvisunnu etọn lẹ, visunnu etọn lẹpo po whédo Lekabinu lẹ tọn blebu po 4 wá ohọ̀ Jehovah tọn mẹ. Yẹn plan yé wá abò núdùdù tọn visunnu Hanan he yin visunnu Igdalia tọn lẹ tọn mẹ, yèdọ omẹ Jiwheyẹwhe nugbo lọ tọn, enẹ wẹ abò he bọdo abò núdùdù tọn ahọvi lẹ tọn he tin to aga na abò núdùdù tọn Maaseia visunnu Ṣalumi họ̀njinọtọ lọ tọn go. 5 Yẹn sọ ze kọfo po sinnù-gbán he mẹ ovẹn gọ́ lẹ po do sunnu he tin to whédo Lekabinu lẹ tọn mẹ lọ lẹ nukọn bo dọna yé dọmọ: “Mì nù ovẹn.”
6 Ṣigba, yé dọmọ: “Mí ma na nù ovẹn, na Jehonadabi*+ visunnu Lekabi tọn, yèdọ tọgbo mítọn na mí gbedide ehe dọ, ‘Mìwlẹ po visunnu mìtọn lẹ po ma dona nù ovẹn gbede. 7 Mì masọ dona gbá ohọ̀, do jinukun kavi pọ̀gle kavi tindo vẹngle de. Kakatimọ, mì dona nọ nọ̀ gòhọ lẹ mẹ to whepoponu, na mìwlẹ nido nọgbẹ̀ dẹn to aigba he ji mì to ninọ taidi jonọ lẹ lọ ji.’ 8 Enẹ wẹ zọ́n bọ mí zindonukọn nado to tonusena ogbè Jehonadabi visunnu tọgbo mítọn Lekabi tọn to nuhe ewọ degbe etọn na mí lẹpo mẹ, bo ma nọ nù ovẹn gbede—yèdọ míwlẹ, asi mítọn lẹ, visunnu mítọn lẹ po viyọnnu mítọn lẹ po. 9 Mí masọ nọ gbá ohọ̀ nado nọ nọ̀ e mẹ, mọjanwẹ mí ma nọ tindo vẹngle kavi ogle kavi jinukun lẹ do niyẹn. 10 Mí nọ nọ̀ gòhọ lẹ mẹ bo nọ setonuna nuhe Jehonadabi* tọgbo mítọn degbe etọn na mí lẹpo. 11 Ṣigba, to whenue Ahọlu Nẹbukadnẹzali* Babilọni tọn diọnukunsọ aigba lọ,+ mí dọ dọ, ‘Mì wá, mì gbọ mí ni yì Jelusalẹm nado luntọ́n sọn alọ awhànpa Kaldeanu lẹ po Silianu lẹ po tọn mẹ,’ podọ Jelusalẹm wẹ mí nọ nọ̀ todin.”
12 Jehovah sọ dọna Jelemia dọmọ: 13 “Nuhe Jehovah awhànpa lẹ tọn, yèdọ Jiwheyẹwhe Islaeli tọn dọ die, ‘Yì bo dọna omẹ Juda tọn lẹ po mẹhe nọ nọ̀ Jelusalẹm lẹ po dọmọ: “Be mìwlẹ ma ko yin tudohomẹna pludopludo nado setonuna ohó ṣie lẹ ya?”+ wẹ Jehovah dọ. 14 “Jehonadabi visunnu Lekabi tọn degbena kúnkan etọn ma nado nù ovẹn, yé sọ setonuna ohó etọn lẹ bo ma nọ nù ovẹn kakajẹ egbé bosọ gbọnmọ dali setonuna gbedide tọgbo yetọn tọn.+ Ṣigba, yẹn ko dọhona mì pludopludo,* amọ́ mìwlẹ ma setonuna mi.+ 15 Yẹn sọ to devizọnwatọ ṣie lẹpo he yin yẹwhegán lẹ dohlan mì mapote, bo do yé hlan pludopludo*+ bo nọ dọ dọ, ‘Yẹn vẹ̀ mì, mì lẹkọ, yèdọ dopodopo mìtọn sọn aliho ylankan mìtọn lẹ ji,+ bo wà nuhe sọgbe! Mì zinzọnlin hodo yẹwhe devo lẹ blo, mì sọ sẹ̀n yé blo. Whenẹnu wẹ mìwlẹ na nọ nọ̀ aigba he yẹn na mìwlẹ po tọgbo mìtọn lẹ po ji zọnmii.’+ Ṣigba, mì ma tuntoai kavi dotoai hlan mi. 16 Kúnkan Jehonadabi visunnu Lekabi tọn lẹ tọn ko setonuna gbedide he tọgbo yetọn na yé,+ ṣigba omẹ ehelẹ ma ko dotoaina mi.”’”
17 “Enẹwutu, nuhe Jehovah yèdọ Jiwheyẹwhe awhànpa lẹ tọn he yin Jiwheyẹwhe Islaeli tọn dọ die: ‘Yẹn na hẹn nugbajẹmẹji lẹpo he go yẹn ko na avase Juda po mẹhe nọ nọ̀ Jelusalẹm lẹpo po gando wá yé ji,+ na yẹn ko dọhona yé, ṣigba yé ma dotoai, yẹn sọ to yé ylọ mapote, ṣigba yé ma gblọn.’”+
18 Jelemia sọ dọna whédo Lekabinu lẹ tọn dọmọ: “Nuhe Jehovah awhànpa lẹ tọn, yèdọ Jiwheyẹwhe Islaeli tọn dọ die, ‘Na mìwlẹ ko setonuna gbedide he tọgbo mìtọn Jehonadabi na mì bosọ zindonukọn nado to gbedide etọn lẹpo hodo bo nọ wà nuhe e degbe etọn na mì lẹ pẹpẹ wutu, 19 nuhe Jehovah awhànpa lẹ tọn, yèdọ Jiwheyẹwhe Islaeli tọn dọ die: “Kúnkan Jehonadabi* visunnu Lekabi tọn de ma na nọma tin nado nọ sẹ̀n to nukọn ṣie gbede.”’”
36 Todin, to owhe ẹnẹtọ gandudu Jehoiakimi+ visunnu Josia tọn he yin ahọlu Juda tọn tọn mẹ, ohó he Jehovah dọna Jelemia die: 2 “Ze owe-hihá de bo wlan ohó he yẹn ko dọna we sọta Islaeli, Juda+ po akọta lọ lẹpo po do e mẹ,+ yèdọ sọn azán tintan he gbè yẹn ko dọhona we to azán Josia tọn lẹ gbè kakajẹ egbé.+ 3 Vlavo to whenue mẹhe tin to owhé Juda tọn gbè lẹ na sè nugbajẹmẹji he yẹn lẹn nado hẹnwa yé ji lẹpo, yé sọgan lẹkọ sọn aliho ylankan yetọn lẹ ji, na yẹn nido jona nuṣiwa yetọn po ylando yetọn po.”+
4 Whenẹnu wẹ Jelemia ylọ Baluki+ visunnu Nelia tọn, Jelemia sọ dọ ohó he Jehovah ko dọna ẹn lẹpo na ewọ, Baluki sọ kàn yé do owe-hihá lọ mẹ.+ 5 Enẹgodo, Jelemia degbena Baluki dọmọ: “Yẹn yin ginglọn bo ma penugo nado yì ohọ̀ Jehovah tọn mẹ. 6 Enẹwutu, hiẹ wẹ dona yì bo na yí ogbè lélé do hia ohó Jehovah tọn he yẹn dọna we bọ a wlan do owe-hihá lọ mẹ lẹ. Hia yé do otó mẹlọ lẹ tọn mẹ to ohọ̀ Jehovah tọn mẹ to azán nùbibla tọn gbè; gbọnmọ dali, hiẹ na hia yé na omẹ Juda tọn he na wá sọn tòdaho yetọn mẹ lẹpo. 7 Vlavo Jehovah na sè obiọ yetọn bọ dopodopo yetọn nasọ diọ sọn aliho ylankan yetọn ji, na homẹgble podọ adi he Jehovah ko lá sọta omẹ ehelẹ sinyẹn taun.”
8 Enẹwutu, Baluki visunnu Nelia tọn wà nuhe Jelemia yẹwhegán lọ degbe etọn na ẹn lẹpo; e yí ogbè lélé do hia ohó Jehovah tọn lẹ sọn owe-hihá lọ mẹ to ohọ̀ Jehovah tọn mẹ.+
9 Podọ to owhe atọ́ntọ gandudu Jehoiakimi+ visunnu Josia tọn, yèdọ ahọlu Juda tọn tọn mẹ, to osun ṣinẹnẹtọ mẹ, omẹ Jelusalẹm tọn lẹpo podọ mẹhe wá Jelusalẹm sọn tòdaho Juda tọn lẹ mẹ lẹpo lá nùbibla de to Jehovah nukọn.+ 10 Whenẹnu wẹ Baluki yí ogbè lélé do hia ohó Jelemia tọn lẹ sọn owe-hihá lọ mẹ do otó mẹlọ lẹpo tọn mẹ to ohọ̀ Jehovah tọn mẹ, to abò* Gemalia+ visunnu Ṣafani+ wekantọ lọ tọn mẹ, to awánu aga tọn lọ mẹ, to họngbo yọyọ ohọ̀ Jehovah tọn kọ̀n.+
11 To whenue Mikaia visunnu Gemalia tọn he yin visunnu Ṣafani tọn sè ohó Jehovah tọn lẹpo sọn owe-hihá lọ mẹ, 12 e jẹte yì owhé* ahọlu tọn gbè, yì abò wekantọ tọn mẹ. Ahọvi* lọ lẹpo sọ sinai to finẹ: yèdọ Eliṣama+ wekantọ lọ, Delaia visunnu Ṣemaia tọn, Ẹlnatani+ visunnu Akbọli tọn,+ Gemalia visunnu Ṣafani tọn, Zedekia visunnu Hanania tọn po ahọvi he pò lẹpo po. 13 Mikaia sọ dọ ohó he ewọ ko sè lẹpo to whenue Baluki hia owe-hihá lọ do otó mẹlọ lẹpo tọn mẹ na yé.
14 To whenẹnu, ahọvi lọ lẹpo do Jehudi visunnu Netania visunnu Ṣelemia tọn he yin visunnu Kuuṣi tọn hlan Baluki dọmọ: “Wá bo hẹn owe-hihá he hiẹ hia do otó mẹlọ lẹ tọn mẹ wá.” Baluki visunnu Nelia tọn sọ hẹn owe-hihá lọ do alọmẹ bo yì yé dè. 15 Yé dọna ẹn dọmọ: “Jaale bo sinai, bo yí ogbè lélé do hia ẹ na mí.” Baluki sọ hia ẹ na yé.
16 Todin, tlolo he yé sè ohó lọ lẹpo, yé dibu bo pọ́n ode awetọ bosọ dọna Baluki dọmọ: “Na nugbo tọn, mí dona dọ ohó ehe lẹpo na ahọlu.” 17 Yé sọ kanse Baluki dọmọ: “Jaale, dọ lehe hiẹ wagbọn do kàn ohó ehe lẹpo na mí. Ewọ wẹ dọ yé na we ya?” 18 Baluki gblọnna yé dọmọ: “Ewọ dọ ohó ehe lẹpo na mi bọ yẹn sọ yí wesin do kàn yé dai do owe-hihá ehe mẹ.” 19 Ahọvi lọ lẹ dọna Baluki dọmọ: “Mì yì bo whlá mìde, yèdọ hiẹ po Jelemia po, mì sọ dike mẹdepope yọ́n fie mì te blo.”+
20 Whenẹnu wẹ yé yì ahọlu dè to awánu lọ mẹ, bo ze owe-hihá lọ do abò Eliṣama wekantọ lọ tọn mẹ, yé sọ dọ nuhe yé ko sè lẹpo na ahọlu.
21 Enẹwutu, ahọlu do Jehudi+ hlan nado yì ze owe-hihá lọ wá, ewọ sọ hẹn ẹn wá sọn abò Eliṣama wekantọ lọ tọn mẹ. Jehudi jẹ hihia ẹ ji do otó ahọlu po ahọvi he ṣite to ahọlu pá lẹpo po tọn mẹ. 22 Ahọlu sinai to abò avivọ-whenu tọn mẹ, to osun ṣinẹnẹtọ* mẹ bọ miyọ́n to jiji to adògbẹ́ de mẹ to nukọn etọn. 23 Eyin Jehudi hia weda atọ̀n kavi ẹnẹ, ahọlu nọ yí ohí wekantọ tọn do sán adà enẹ sẹ̀ bo nọ ze e dlan miyọ́n he to jiji to adògbẹ́ mẹ lọ mẹ, kaka bọ owe-hihá lọ blebu do yin fifiọ to adògbẹ́ lọ mẹ. 24 Yé masọ dibu; podọ ahọlu lọ kavi devizọnwatọ etọn lẹpo he sè ohó ehe lẹpo ma tlẹ́n awugbó yetọn lẹ. 25 Dile etlẹ yindọ Ẹlnatani,+ Delaia+ po Gemalia+ po vẹ̀ ahọlu ma nado fiọ owe-hihá lọ, ewọ ma dotoaina yé. 26 Humọ, ahọlu lọ degbena Jelameẹli visunnu ahọlu tọn, Selaia visunnu Azliẹli tọn po Ṣelemia visunnu Abdeẹli tọn po nado wle Baluki wekantọ lọ po Jelemia yẹwhegán lọ po, ṣigba Jehovah whlá yé.+
27 To whenue ahọlu ko fiọ owe-hihá he mẹ ohó he Jelemia ko dọna Baluki bọ ewọ kàn lẹ tin te lọ godo, Jehovah dọna Jelemia whladopo dogọ+ dọmọ: 28 “Ze owe-hihá devo bo wlan ohó he to owe-hihá tintan lọ mẹ lẹpo pẹpẹ do e mẹ, yèdọ owe-hihá he Ahọlu Jehoiakimi Juda tọn ko fiọ lọ.+ 29 Hiẹ nasọ dọ sọta Ahọlu Jehoiakimi Juda tọn dọ, ‘Nuhe Jehovah dọ die: “Hiẹ ko fiọ owe-hihá ehe bo dọ dọ, ‘Naegbọn hiẹ do wlan do e mẹ dọ: “Na nugbo tọn, ahọlu Babilọni tọn na wá bo na và aigba ehe sudo bọ gbẹtọ po kanlin po ma na nọ e ji ba”?’+ 30 Enẹwutu, nuhe Jehovah dọ sọta Ahọlu Jehoiakimi Juda tọn die, ‘Ewọ ma na tindo mẹde he na sinai do ofìn Davidi tọn ji,+ oṣiọ etọn nasọ yin jijodo yozò nù to okle, podọ fifá nù to zánmẹ.+ 31 Yẹn na hẹn ewọ, kúnkan* etọn po devizọnwatọ etọn lẹ po nado dogbè nuṣiwa yetọn tọn, podọ yẹn na hẹn nugbajẹmẹji he yẹn ko dọho etọn sọta yé bọ yé ma dotoaina lọ lẹpo wá yewlẹ,+ mẹhe nọ nọ̀ Jelusalẹm lẹ po omẹ Juda tọn lẹ po ji.’”’”+
32 Whenẹnu wẹ Jelemia yí owe-hihá devo bo ze e jo na Baluki visunnu Nelia tọn, yèdọ wekantọ lọ,+ Jelemia sọ dọ ohó he to owe-hihá he Ahọlu Jehoiakimi Juda tọn ko yí miyọ́n do fiọ lọ mẹ lẹpo na ẹn bọ ewọ wlan yé do e mẹ.+ Ohó susu devo he taidi tintan lọ lẹ sọ yin yiyidogọ.
37 Ahọlu Zedekia+ visunnu Josia tọn jẹ gandu ji to otẹn Konia*+ visunnu Jehoiakimi tọn mẹ, na Ahọlu Nẹbukadnẹzali* Babilọni tọn ko yí i do basi ahọlu to aigba Juda tọn ji.+ 2 Ṣigba ewọ, devizọnwatọ etọn lẹ po omẹ aigba lọ tọn lẹ po ma dotoaina ohó he Jehovah dọ gbọn Jelemia yẹwhegán lọ gblamẹ lẹ.
3 Ahọlu Zedekia sọ do Jehukali+ visunnu Ṣelemia tọn po Zefania+ visunnu Maaseia yẹwhenọ lọ tọn po hlan Jelemia yẹwhegán lọ bo dọmọ: “Jaale bo hodẹ̀ do ota mítọn mẹ hlan Jehovah Jiwheyẹwhe mítọn.” 4 Jelemia gbẹ́ pò to yigọyigọ basi po awuvivo po to mẹlọ lẹ ṣẹnṣẹn, na yé ma ko wle e do gànpamẹ wutu.+ 5 Todin, awhànpa Falo tọn ko doawhàn sọn Egipti,+ Kaldeanu he dosla lẹdo Jelusalẹm lẹ sọ sè linlin gando yé go. Yé sọ joagọyigodo sọn Jelusalẹm.+ 6 Whenẹnu wẹ Jehovah dọna Jelemia yẹwhegán lọ dọmọ: 7 “Nuhe Jehovah Jiwheyẹwhe Islaeli tọn dọ die, ‘Hiẹ na dọna ahọlu Juda tọn he do we hlan nado wá kanhose mi dọmọ: “Pọ́n! Awhànpa Falo tọn he ja nado wá gọalọna we dona lẹkọyi aigba etọn ji to Egipti.+ 8 Podọ Kaldeanu lẹ na lẹkọwa bo hoavùn sọta tòdaho ehe bo na gbawhàn etọn bo nasọ yí miyọ́n do fiọ ẹ.”+ 9 Nuhe Jehovah dọ die, “Mì klọ mìde* blo gbọn didọ dali dọmọ, ‘E họnwun dọ Kaldeanu lẹ na joagọyigodo sọn mí dè,’ na yé ma na lẹkọyi godo. 10 Eyin mìwlẹ tlẹ duto awhànpa Kaldeanu lẹ tọn pete he to avùnho sọta mì ji bọ sunnu yetọn he ko gbleawu lẹ kẹdẹ wẹ pò, yé na gbẹ́ fọnṣite sọn gòhọ yetọn lẹ mẹ bo na yí miyọ́n do fiọ tòdaho ehe.”’”+
11 To whenue awhànpa Kaldeanu lẹ tọn ko joagọyigodo sọn Jelusalẹm na awhànpa Falo tọn wutu,+ 12 Jelemia tọ́n sọn Jelusalẹm jei aigba Bẹnjamini tọn ji+ nado mọ mimá etọn yí to omẹ etọn lẹ ṣẹnṣẹn. 13 Ṣigba, to whenue e jẹ Họngbo Bẹnjamini tọn kọ̀n, ogán nuhọ́tọ lẹ tọn he nọ yin Ilija visunnu Ṣelemia visunnu Hanania tọn wle Jelemia yẹwhegán lọ bo dọmọ: “Kaldeanu lẹ dè wẹ hiẹ họ̀n jei!” 14 Ṣigba Jelemia dọmọ: “Lalo wẹ! Yẹn ma họ̀n jei Kaldeanu lẹ dè.” Ṣigba, ewọ ma dotoaina ẹn. Enẹwutu Ilija wle Jelemia bo plan ẹn wá ahọvi lẹ dè. 15 Ahọvi lọ lẹ duadi do Jelemia go+ bo hò e bosọ ze e do gànpamẹ*+ to owhé Jehonatani wekantọ lọ tọn gbè, fie ko yin awuwlena taidi gànpa de. 16 Jelemia yin zizedo gànpa dòglọ tọn mẹ,* to abò gànpa lọ tọn lẹ mẹ, ewọ sọ gbọṣi finẹ na azán susu.
17 Ahọlu Zedekia sọ biọ dọ ewọ ni yin pinplan wá bọ ahọlu lọ kanhose e to nuglọ to owhé* etọn gbè.+ E kanse e dọ, “Be ohó de tin sọn Jehovah dè ya?” Jelemia dọmọ, “Ohó tin!” ewọ sọ zindonukọn dọ, “Hiẹ na yin zizedo alọmẹ na ahọlu Babilọni tọn!”+
18 Jelemia sọ dọna Ahọlu Zedekia dọmọ: “Ylando tẹwẹ yẹn ko wà do hiẹ, do devizọnwatọ towe lẹ podọ do omẹ ehelẹ bọ mìwlẹ do ze mi do gànpamẹ? 19 Todin, fie wẹ yẹwhegán towe he dọ dọdai na we dọ, ‘Ahọlu Babilọni tọn ma na wá sọta we podọ sọta aigba ehe’ lẹ tin te?+ 20 Todin, klunọ ṣie ahọlu E, jaale bo dotó. Yẹn vẹ̀ we dọ hiẹ ni kẹalọyi obiọ ṣie. A lẹkọna mi yì owhé Jehonatani+ wekantọ lọ tọn gbè blo, eyin e ma yinmọ, yẹn na kú do finẹ.”+ 21 Enẹwutu, Ahọlu Zedekia degbe dọ Jelemia ni yin zizedo gànmẹ to Awánu Nuhọ́tọ lẹ tọn+ mẹ, podọ akla plẹ́bẹ́ nùdo dopo nọ yin hinhẹnwa na ẹn egbesọegbesọ sọn tòhomẹ-liho akladatọ lẹ tọn ji+ kakajẹ whenue akla lẹpo vọ̀ sọn tòdaho lọ mẹ.+ Jelemia sọ gbọṣi Awánu Nuhọ́tọ lẹ tọn mẹ.
38 Todin, Ṣefatia visunnu Matani tọn, Gedalia visunnu Paṣuli tọn, Jukali+ visunnu Ṣelemia tọn po Paṣuli+ visunnu Malkija tọn po sè ohó he Jelemia to didọna mẹlọ lẹpo dọmọ: 2 “Nuhe Jehovah dọ die, ‘Mẹhe gbọṣi tòdaho ehe mẹ na kú gbọn ohí, huvẹ po azọ̀nylankan po dali.+ Ṣigba, mẹhe ze ede jo* na Kaldeanu lẹ na gbọṣi ogbẹ̀ bo na whlẹn ogbẹ̀* ede tọn bo nasọ nọgbẹ̀.’+ 3 Nuhe Jehovah dọ die, ‘Na nugbo tọn, tòdaho ehe na yin jijodo alọmẹ na awhànpa ahọlu Babilọni tọn, ewọ nasọ gbawhàn etọn.’”+
4 Ahọvi lọ lẹ sọ dọna ahọlu dọmọ: “Jaale bo dike dawe ehe ni yin hùhù,+ na ewọ to awhànfuntọ* he pò to tòdaho ehe mẹ lẹ hẹn gbọjọ, gọna mẹlọ lẹpo, gbọn ohó mọnkọtọn lẹ didọna yé dali. Na dawe ehe ma to jijọho omẹ ehelẹ tọn dín, ṣigba nugbajẹmẹji yetọn.” 5 Ahọlu Zedekia sọ gblọn dọmọ: “Mì pọ́n! Ewọ tin to alọ mìtọn mẹ, na ahọlu ma sọgan wà nudepope nado glọnalina mì.”
6 Enẹwutu, yé plan Jelemia bo ze e dlan osindò Malkija visunnu ahọlu tọn tọn mẹ, he tin to Awánu Nuhọ́tọ lẹ tọn+ mẹ. Yé yí okàn do ze Jelemia do e mẹ. Osin depope masọ tin to osindò lọ mẹ, ṣigba ogbọ̀n kẹdẹ, podọ Jelemia jẹ titlọ biọ ogbọ̀n lọ mẹ ji.
7 Ebẹdi-melẹki+ Etiopianu lọ he yin ojọ̀* de to owhé* ahọlu tọn gbè sè dọ yé ko ze Jelemia do osindò lọ mẹ. Podọ ahọlu to aisinsin to Họngbo Bẹnjamini tọn kọ̀n,+ 8 Ebẹdi-melẹki sọ tọ́n sọn owhé* ahọlu tọn gbè bo yì dọna ahọlu dọmọ: 9 “Klunọ ṣie ahọlu E, nuylankan wẹ omẹ ehelẹ ko wà do Jelemia yẹwhegán lọ! Yé ko ze ewọ dlan osindò mẹ, ewọ nasọ kú do finẹ na huvẹ wutu, na akla depope ma pò to tòdaho lọ mẹ.”+
10 Whenẹnu wẹ ahọlu degbena Ebẹdi-melẹki Etiopianu lọ dọmọ: “Plan sunnu 30 hẹn sọn fi, bo yì dọ̀n Jelemia yẹwhegán lọ tọ́n sọn osindò lọ mẹ whẹpo e nido kú.” 11 Enẹwutu, Ebẹdi-melẹki plan sunnu lọ lẹ bo yì owhé* ahọlu tọn gbè, yì fide he to adọkunnu sẹdotẹn lọ glọ,+ podọ yé yí avọ̀nu hoho po avọ̀kija delẹ po sọn finẹ bosọ yí okàn lẹ do hẹn yé yì Jelemia dè to osindò lọ mẹ. 12 Whenẹnu wẹ Ebẹdi-melẹki Etiopianu lọ dọna Jelemia dọmọ: “Jaale bo ze avọ̀nu hoho po avọ̀kija lọ lẹ po do awàdá towe lẹ mẹ to okàn lọ lẹ go.” Jelemia sọ wàmọ, 13 yé sọ yí okàn lọ lẹ do dọ̀n Jelemia tọ́n sọn osindò lọ mẹ. Jelemia sọ gbọṣi Awánu Nuhọ́tọ lẹ tọn+ mẹ.
14 Ahọlu Zedekia sọ dowẹn hlan Jelemia yẹwhegán lọ nado wá e dè to họntonu atọ̀ntọ lọ kọ̀n, he tin to ohọ̀ Jehovah tọn mẹ, ahọlu sọ dọna Jelemia dọmọ: “Yẹn jlo na kàn ohó de sè we. A whlá nudepope do mi blo.” 15 Whenẹnu wẹ Jelemia dọna Zedekia dọmọ: “Eyin yẹn dọna we, e họnwun dọ hiẹ na hù mi. Eyin yẹn sọ na we ayinamẹ, hiẹ ma na dotoaina mi.” 16 Enẹwutu, Ahọlu Zedekia whlé na Jelemia to nuglọ dọmọ: “Dile Jehovah togbẹ̀, yèdọ mẹhe na mí ogbẹ̀,* yẹn ma na hù we, yẹn ma nasọ ze we do alọmẹ na omẹ ehelẹ he to dindin nado yí ogbẹ̀* towe.”
17 Whenẹnu wẹ Jelemia dọna Zedekia dọmọ: “Nuhe Jehovah, Jiwheyẹwhe awhànpa lẹ tọn, yèdọ Jiwheyẹwhe Islaeli tọn dọ die, ‘Eyin hiẹ ze dewe jo* na ahọvi ahọlu Babilọni tọn tọn lẹ, ogbẹ̀ towe na yin whinwhlẹngán,* yè ma nasọ yí miyọ́n do fiọ tòdaho ehe, podọ hiẹ po whédo towe po na yin whinwhlẹngán.+ 18 Ṣigba, eyin hiẹ ma ze dewe jo* na ahọvi ahọlu Babilọni tọn tọn lẹ, tòdaho ehe na yin jijodo alọmẹ na Kaldeanu lẹ, yé nasọ yí miyọ́n do fiọ ẹ,+ podọ hiẹ ma na họ̀ngán sọn alọ yetọn mẹ.’”+
19 Whenẹnu wẹ Ahọlu Zedekia dọna Jelemia dọmọ: “Yẹn to budina Ju he ko họnyi Kaldeanu lẹ dè lẹ, na eyin yẹn yin zizedo alọmẹ na yé, yé sọgan yinuwa hẹ mi po kanyinylan po.” 20 Ṣigba Jelemia dọmọ: “Hiẹ ma na yin jijodo alọmẹ na yé. Yẹn vẹ̀ we, setonuna ogbè Jehovah tọn gando nuhe yẹn dọna we lẹ go, nulẹ nasọ yì ganji na we bọ hiẹ* na gbọṣi ogbẹ̀. 21 Ṣigba, eyin hiẹ gbẹ́ nado ze dewe jo,* nuhe Jehovah ko dehia mi die: 22 Pọ́n! Yọnnu he pò to owhé* ahọlu Juda tọn gbè lẹpo to yinyin hinhẹn yì ahọvi ahọlu Babilọni tọn tọn lẹ dè,+ yé sọ to didọ dọ,
Yé ko hẹn afọ towe nado tlọ do ogbọ̀n mẹ.
Yé ko sọ họ̀n jo we do todin.’
23 Podọ asi towe po visunnu towe lẹpo po wẹ yé to pinplan yì Kaldeanu lẹ dè, hiẹ ma nasọ họ̀ngán sọn alọ yetọn mẹ, ṣigba ahọlu Babilọni tọn na wle we,+ podọ na hiẹ tọn wutu, yè na yí miyọ́n do fiọ tòdaho ehe.”+
24 Whenẹnu wẹ Zedekia dọna Jelemia dọmọ: “A dike mẹdepope yọnẹn gando onú ehelẹ go blo, na hiẹ nikaa kú. 25 Podọ eyin ahọvi lọ lẹ sè dọ yẹn ko dọho hẹ we bọ yé sọ wá dè we bo dọna we dọ, ‘Jaale bo dọ nuhe hiẹ dọna ahọlu na mí. A whlá nudepope do mí blo, podọ mí ma na hù we.+ Etẹwẹ ahọlu dọna we?’ 26 hiẹ dona dọna yé dọ, ‘Nude biọ ahọlu wẹ yẹn te, dọ ewọ ni ma lẹkọna mi yì owhé Jehonatani tọn gbè nado kú do finẹ blo.’”+
27 To ojlẹ vude godo, ahọvi lọ lẹpo wá Jelemia dè bo kanhose e. Ewọ sọ dọ nuhe ahọlu ko degbe etọn na ẹn nado dọ lẹpo na yé. Enẹwutu, yé masọ dọ ohó de na ẹn dogọ ba, na mẹdepope ma sè nuhe yé dọ lẹ wutu. 28 Kakajẹ azán he gbè yè gbawhàn Jelusalẹm tọn, Jelemia gbọṣi Awánu Nuhọ́tọ lẹ tọn+ mẹ; ewọ gbẹ́ tin to finẹ to whenue yè gbawhàn Jelusalẹm tọn.+
39 To owhe ṣinẹnẹtọ gandudu Ahọlu Zedekia Juda tọn mẹ, Ahọlu Nẹbukadnẹzali* Babilọni tọn po awhànpa etọn lẹpo po wá Jelusalẹm to osun aotọ mẹ bo dosla lẹdo e.+
2 To owhe 11tọ gandudu Zedekia tọn mẹ, to azán ṣinẹnẹtọ gbè to osun ẹnẹtọ mẹ, yé gbà adó tòdaho lọ tọn bo biọ e mẹ.+ 3 Ahọvi ahọlu Babilọni tọn lẹpo sọ biọ e mẹ bo sinai to Họngbo Ṣẹnṣẹn tọn lọ kọ̀n,+ enẹ wẹ Nẹlgali-ṣalezeli Samgali lọ, Nebo-salsekimi Labsalisi lọ,* Nẹlgali-ṣalezeli Labmagi* lọ po ahọvi ahọlu Babilọni tọn he pò lẹpo po.
4 To whenue Ahọlu Zedekia Juda tọn po awhànfuntọ lọ lẹpo po mọ yé,+ yé họ̀n bo tọ́n sọn tòdaho lọ mẹ to zánmẹ gbọn aliho jipa ahọlu tọn ji, gbọn họngbo he to adó awe lẹ ṣẹnṣẹn nù, yé sọ zindonukọn gbọn aliho Alaba tọn ji.+ 5 Ṣigba, awhànpa Kaldeanu lẹ tọn dómọna yé, yé sọ plá Zedekia to danfafa Jẹliko tọn ji.+ Yé wle e bo hẹn ẹn hẹji wá Ahọlu Nẹbukadnẹzali* Babilọni tọn dè to Libla+ to aigba Hamati tọn ji,+ fie ewọ dawhẹna ẹn te. 6 Ahọlu Babilọni tọn sọ hù visunnu Zedekia tọn lẹ to nukun etọn mẹ to Libla, podọ ahọlu Babilọni tọn sọ hù omẹ nukundeji Juda tọn lẹpo.+ 7 E sọ tọ́nnukunna Zedekia, enẹgodo e yí gẹdẹ gànvẹẹ tọn lẹ do blá ẹ nado hẹn ẹn yì Babilọni.+
8 Whenẹnu wẹ Kaldeanu lẹ dozò owhé* ahọlu tọn po owhé mẹlọ lẹ tọn po,+ yé sọ họ́ adó Jelusalẹm tọn lẹ liai.+ 9 Nẹbuzaladani+ ogán nuhọ́tọ lẹ tọn lọ plan mẹhe pò to mẹhe yin jijodo tòdaho lọ mẹ lẹ mẹ, mẹhe ko họnyi e dè lẹ po mẹhe pò lẹpo po yì kanlinmọgbenu to Babilọni.
10 Ṣigba, Nẹbuzaladani ogán nuhọ́tọ lẹ tọn lọ jo mẹhe yin hẹntọnọ klókló delẹ do aigba Juda tọn ji, yèdọ mẹhe ma tindo nudepope lẹ. Podọ to azán enẹ gbè, e sọ na yé vẹngle lẹ po ogle lẹ po nado nọ pọ̀.*+
11 Todin, Ahọlu Nẹbukadnẹzali* Babilọni tọn na gbedide ehelẹ Nẹbuzaladani ogán nuhọ́tọ lẹ tọn lọ gando Jelemia go dọmọ: 12 “Plan ẹn bo penukundo e go; a wà danú depope do e blo bosọ na ẹn nudepope he e na biọ we.”+
13 Enẹwutu, Nẹbuzaladani ogán nuhọ́tọ lẹ tọn lọ, Nẹbuṣazebani Labsalisi lọ,* Nẹlgali-ṣalezeli Labmagi lọ* po omẹ nukundeji ahọlu Babilọni tọn lẹpo po domẹhlan 14 bọ yè sọ plan Jelemia tọ́n sọn Awánu Nuhọ́tọ lẹ tọn+ mẹ bo ze e do alọmẹ na Gedalia+ visunnu Ahikami+ visunnu Ṣafani+ tọn na e nido yin pinplan yì owhé etọn gbè. Ewọ sọ nọ nọ̀ mẹlọ lẹ ṣẹnṣẹn.
15 To whenue Jelemia gbẹ́ yin ginglọndo Awánu Nuhọ́tọ lẹ tọn+ mẹ, ohó Jehovah tọn wá e dè dọmọ: 16 “Yì bo dọna Ebẹdi-melẹki+ Etiopianu lọ dọ, ‘Nuhe Jehovah awhànpa lẹ tọn, yèdọ Jiwheyẹwhe Islaeli tọn dọ die: “Yẹn na hẹn ohó ṣie lẹ di do tòdaho ehe ji nado hẹn nugbajẹmẹji wá e ji kakati nido yin nudagbe, to azán enẹ gbè, hiẹ na mọ bọ nujijọ lọ na wá aimẹ.”’
17 “‘Ṣigba, yẹn na whlẹn we to gbenẹgbe,’ wẹ Jehovah dọ, ‘hiẹ ma nasọ yin zizedo alọmẹ na mẹhe hiẹ to budina lẹ.’
18 “‘Na e họnwun dọ yẹn na whlẹn we, hiẹ ma nasọ jai gbọn ohí lọ dali. Ogbẹ̀* towe na yin whinwhlẹngán,+ na hiẹ dejido go e wutu,’+ wẹ Jehovah dọ.”
40 Ohó ehe wẹ Jehovah dọna Jelemia to whenue Nẹbuzaladani+ ogán nuhọ́tọ lẹ tọn lọ tún in dote nado yì sọn Lama+ godo. E ko do gẹdẹ alọ na ẹn bo hẹn ẹn yì dọ́n, podọ ewọ tin to omẹ Jelusalẹm po Juda po tọn lẹpo he yè bẹ jei kanlinmọgbenu to Babilọni lẹ mẹ. 2 Whenẹnu wẹ ogán nuhọ́tọ lẹ tọn lọ plan Jelemia bo dọna ẹn dọmọ: “Jehovah Jiwheyẹwhe towe dọ dọdai nugbajẹmẹji ehe tọn sọta nọtẹn ehe, 3 podọ Jehovah ko hẹn ẹn di kẹdẹdile ewọ ko dọ do, na mìwlẹ waylando do Jehovah bo masọ setonuna ogbè etọn wutu. Enẹ wẹ zọ́n bọ ehe do jọ do mì go.+ 4 Todin, yẹn to gẹdẹ he to alọ towe go lẹ tún to egbé. Eyin e yọ́n to nukun towe mẹ nado hodo mi yì Babilọni, wá mí ni yì, yẹn nasọ penukundo gowe. Ṣigba, eyin hiẹ ma jlo na hodo mi yì Babilọni, bo ma hodo mi blo. Pọ́n! Aigba lọ blebu tin to nukọn towe. Yì fidepope he jlo we.”+
5 To whenue Jelemia ma ko lẹkọ, Nẹbuzaladani dọmọ: “Lẹkọyi Gedalia+ visunnu Ahikami+ visunnu Ṣafani+ tọn dè, yèdọ mẹhe ahọlu Babilọni tọn ko de do tòdaho Juda tọn lẹ ji, bosọ gbọṣi e dè to mẹlọ lẹ ṣẹnṣẹn; kavi yì fidepope he jlo we.”
Ogán nuhọ́tọ lẹ tọn lọ sọ na ẹn núdùdù vude po nunina de po bo jo e do nado yì. 6 Enẹwutu, Jelemia yì Gedalia visunnu Ahikami tọn dè to Mizpa+ bo gbọṣi e dè to mẹhe yin jijodo aigba lọ ji lẹ ṣẹnṣẹn.
7 To ojlẹ vude godo, awhàngán he to danji lẹpo po sunnu yetọn lẹ po sè dọ ahọlu Babilọni tọn ko de Gedalia visunnu Ahikami tọn do aigba lọ ji, podọ dọ ewọ ko de e do sunnu, yọnnu po ovi lẹ po ji, yèdọ do wamọnọ he pò to aigba lọ ji bo ma yin bibẹ yì Babilọni lẹ ji.+ 8 Yé sọ wá Gedalia dè to Mizpa.+ Omẹ ehelẹ wẹ Iṣmaeli+ visunnu Netania tọn, Johanani+ po Jonatani po, visunnu Kalea tọn lẹ, Selaia visunnu Tanhumẹti tọn, visunnu Efai Netofanu lọ tọn lẹ po Jezania+ visunnu Maakatinu lọ tọn po, to pọmẹ hẹ sunnu yetọn lẹ. 9 Gedalia visunnu Ahikami visunnu Ṣafani tọn sọ whlé na mẹlọ lẹ po sunnu yetọn lẹ po dọmọ: “Mì dibu nado sẹ̀n Kaldeanu lẹ blo. Mì nọ aigba lọ ji bo sẹ̀n ahọlu Babilọni tọn, nulẹ nasọ yì ganji na mì.+ 10 Na yẹn tọn, yẹn na nọ Mizpa nado ze afọ mìtọn dai* to Kaldeanu he na wá mí dè lẹ nukọn. Ṣigba, mìwlẹ ni bẹ ovẹn, sinsẹ́n alunlun mẹ tọn lẹ po amì po pli do onú mìtọn lẹ mẹ bosọ sawhé do tòdaho he mì ko yí lọ lẹ mẹ.”+
11 Ju he to Moabi, Amọni po Edomi po lẹpo gọna yé he tin to fidevo lẹpo sọ sè dọ ahọlu Babilọni tọn ko jo pipotọ de do nado nọ Juda, podọ dọ ewọ ko de Gedalia visunnu Ahikami visunnu Ṣafani tọn do yé ji. 12 Enẹwutu, Ju lọ lẹpo jẹ kọlẹwá ji sọn fie yè ko vúnvún yé pé gbọn lẹpo, yé sọ wá aigba Juda tọn ji, wá Gedalia dè to Mizpa. Yé sọ bẹ ovẹn po sinsẹ́n alunlun mẹ tọn lẹ po pli susugege.
13 Johanani visunnu Kalea tọn po awhàngán he to danji lọ lẹpo po wá Gedalia dè to Mizpa. 14 Yé sọ dọna ẹn dọmọ: “Be hiẹ ma yọnẹn dọ Baalisi ahọlu Amọninu lẹ+ tọn ko do Iṣmaeli visunnu Netania tọn hlan nado hù we wẹ ya?”*+ Ṣigba, Gedalia visunnu Ahikami tọn ma yí yé sè.
15 Whenẹnu wẹ Johanani visunnu Kalea tọn dọna Gedalia to nuglọ to Mizpa dọmọ: “Yẹn jlo na yì hù Iṣmaeli visunnu Netania tọn bọ mẹdepope ma na yọnẹn. Naegbọn ewọ nado hù we,* podọ naegbọn yè nado vúnvún omẹ Juda tọn he ko bẹ yede pli do dè we lẹpo pé bọ pipotọ Juda tọn nasọ dọ̀n?” 16 Ṣigba, Gedalia+ visunnu Ahikami tọn dọna Johanani visunnu Kalea tọn dọmọ: “A wàmọ blo, na lalodo wẹ hiẹ te gando Iṣmaeli go.”
41 To osun ṣinawetọ mẹ, Iṣmaeli+ visunnu Netania visunnu Eliṣama tọn he wá sọn kúnkan ahọlu tọn* mẹ bosọ yin dopo to omẹ nukundeji ahọlu tọn lẹ mẹ, wá Gedalia visunnu Ahikami tọn dè to Mizpa po sunnu ao devo lẹ po.+ Dile yé to núdù dopọ to Mizpa, 2 Iṣmaeli visunnu Netania tọn po sunnu ao he zọnhẹ ẹ lọ lẹ po fọnṣite bo yí ohí do hù Gedalia visunnu Ahikami visunnu Ṣafani tọn. Gbọnmọ dali, ewọ hù mẹhe ahọlu Babilọni tọn ko de do aigba lọ ji. 3 Iṣmaeli sọ hù Ju he topọ hẹ Gedalia to Mizpa lẹpo, gọna awhànfuntọ Kaldeanu he to finẹ lẹ.
4 To azán awetọ gbè, to whenue Gedalia ko yin hùhù godo, bọ mẹdepope ma ko yọnẹn, 5 sunnu 80 wá sọn Ṣekẹmi,+ sọn Ṣilo,+ podọ sọn Samalia.+ Ogbì yetọn lẹ yin whiwhlẹ́ bọ awù yetọn lẹ yin tintlẹ́n, yé ko sọ gbleawuna yedelẹ+ bọ yé hẹn avọ́nunina jinukun-lili tọn lẹ po nuyọnwan gblingblin po+ to alọ yetọn lẹ mẹ jei ohọ̀ Jehovah tọn mẹ. 6 Iṣmaeli visunnu Netania tọn sọ dedo sọn Mizpa nado yì pé yé, bo to avivi dile e to yìyì. To whenuena e pé yé, e dọna yé dọmọ: “Mì wá Gedalia visunnu Ahikami tọn dè.” 7 Ṣigba, to whenue yé biọ tòdaho lọ mẹ, Iṣmaeli visunnu Netania tọn po sunnu etọn lẹ po hù yé bo bẹ yé dlan osindò mẹ.
8 Ṣigba, sunnu ao to yé mẹ dọna Iṣmaeli dọmọ: “A hù mí blo, na míwlẹ whlá likun, balekun, amì po owín po do glemẹ.” Enẹwutu, ewọ ma hù yé to pọmẹ hẹ nọvisunnu yetọn lẹ. 9 Todin, Iṣmaeli bẹ oṣiọ mẹhe ewọ ko hù lẹ tọn lẹpo dlan osindò daho de mẹ, yèdọ dehe Ahọlu Asa ko kùn na Ahọlu Baaṣa Islaeli tọn wutu.+ Osindò enẹ mẹ wẹ Iṣmaeli visunnu Netania tọn bẹ sunnu he yin hùhù lọ lẹ dlan do.
10 Iṣmaeli sọ wle mẹhe pò to Mizpa+ lẹpo taidi kanlinmọ, gọna viyọnnu ahọlu tọn lẹ po mẹhe pò to Mizpa lẹpo po, he Nẹbuzaladani ogán nuhọ́tọ lẹ tọn lọ ko zedo alọmẹ na Gedalia+ visunnu Ahikami tọn. Iṣmaeli visunnu Netania tọn wle yé taidi kanlinmọ lẹ bo wleali dedo Amọninu lẹ dè.+
11 To whenue Johanani+ visunnu Kalea tọn po awhàngán he topọ hẹ ẹ lẹpo po sè nuylankan he Iṣmaeli visunnu Netania tọn ko wà lẹpo, 12 yé plan sunnu lọ lẹpo bo dedo nado yì hoavùn hẹ Iṣmaeli visunnu Netania tọn, yé sọ mọ ẹn to osin susu* he to Gibeọni lẹ kọ̀n.
13 Mẹhe topọ hẹ Iṣmaeli lẹpo jaya to whenue yé mọ Johanani visunnu Kalea tọn po awhàngán he zọnhẹ ẹ lẹpo po. 14 Whenẹnu wẹ mẹhe Iṣmaeli ko wle taidi kanlinmọ sọn Mizpa+ lẹpo lẹkọ bo hodo Johanani visunnu Kalea tọn. 15 Ṣigba, Iṣmaeli visunnu Netania tọn po ṣinatọ̀n to sunnu etọn lẹ mẹ po họ̀ngán sọn alọ Johanani tọn mẹ bo yì Amọninu lẹ dè.
16 Johanani visunnu Kalea tọn po awhàngán he zọnhẹ ẹ lẹpo po sọ plan pipotọ mẹhe tọ́n sọn Mizpa lọ lẹ tọn, yèdọ mẹhe yé ko whlẹn sọn alọ Iṣmaeli visunnu Netania tọn mẹ to whenue ewọ ko hù Gedalia+ visunnu Ahikami tọn godo lẹ. Yé plan sunnu lọ lẹ, awhànfuntọ lọ lẹ, yọnnu lọ lẹ, ovi lọ lẹ po ahọluzọnwatọ họ̀nmẹ tọn lọ lẹ po gọwá sọn Gibeọni. 17 Yé sọ yì gbọṣi adọtẹn Kimhami tọn mẹ sẹpọ Bẹtlẹhẹm,+ bo to linlẹn nado yì Egipti+ 18 na Kaldeanu lẹ tọn wutu. Na yé ko jẹ budi na yé ji, to whenuena e yindọ Iṣmaeli visunnu Netania tọn ko hù Gedalia visunnu Ahikami tọn he ahọlu Babilọni tọn de do aigba lọ ji.+
42 To whenẹnu, awhàngán lọ lẹpo, Johanani+ visunnu Kalea tọn, Jezania visunnu Hoṣaia tọn po mẹlọ lẹpo po, sọn omẹ pẹvi ji jẹ daho ji, dọnsẹpọ 2 bo dọna Jelemia yẹwhegán lọ dọmọ: “Jaale, dotó obiọ mítọn, bo hodẹ̀ hlan Jehovah Jiwheyẹwhe towe do ota mítọn mẹ, podọ do ota mẹhe pò ehe lẹpo tọn mẹ, na omẹ vude poun wẹ pò to gbẹtọgun he yin jijodo lọ mẹ,+ dile hiẹ to mimọ do. 3 Na Jehovah Jiwheyẹwhe towe ni dọ ali he ji mí dona gbọn po nuhe mí dona wà po na mí.”
4 Jelemia yẹwhegán lọ sọ gblọnna yé dọmọ: “Yẹn ko sè nuhe mì dọ, yẹn nasọ hodẹ̀ hlan Jehovah Jiwheyẹwhe mìtọn sọgbe hẹ obiọ mìtọn; podọ nuhe Jehovah na gblọnna mì lẹpo wẹ yẹn na dọna mì. Yẹn ma na whlá ohó depope do mì.”
5 Yé sọ gblọnna Jelemia dọmọ: “Na Jehovah ni yin kunnudetọ nugbo podọ nugbonọ de sọta mí eyin míwlẹ ma wà pẹpẹ kẹdẹdile Jehovah Jiwheyẹwhe towe na na mí anademẹ etọn gbọn hiẹ gblamẹ do. 6 Vlavo e yin dagbe kavi oylan, míwlẹ na setonuna ogbè Jehovah Jiwheyẹwhe mítọn tọn, yèdọ mẹhe dè míwlẹ to dido we hlan, na nulẹ nido yì ganji na mí na mí setonuna ogbè Jehovah Jiwheyẹwhe mítọn tọn wutu.”
7 To azán ao godo, ohó Jehovah tọn sọ wá na Jelemia. 8 Enẹwutu, ewọ ylọ Johanani visunnu Kalea tọn po awhàngán he topọ hẹ ẹ lẹpo po gọna mẹlọ lẹpo, sọn omẹ pẹvi ji jẹ daho ji.+ 9 Ewọ sọ dọna yé dọmọ: “Nuhe Jehovah Jiwheyẹwhe Islaeli tọn, yèdọ mẹhe dè mìwlẹ do mi hlan nado yì ze obiọ mìtọn donukọnna, dọ die: 10 ‘Na nugbo tọn, eyin mìwlẹ gbọṣi aigba ehe ji, yẹn na jlọ mì dote, yẹn ma nasọ họ́ mì liai, yẹn na do mì bo ma na họ̀nadọna mì, na e na vẹna mi* dọ yẹn hẹn nugbajẹmẹji wá mì ji.+ 11 Mì dibuna ahọlu Babilọni tọn he mìwlẹ to budina lọ blo.’+
“‘Mì dibuna ewọ tọn wutu blo,’ wẹ Jehovah dọ, ‘na yẹn tin po mì po nado basi hihọ́na mì podọ nado whlẹn mì sọn alọ etọn mẹ. 12 Yẹn nasọ do lẹblanu hia mì,+ podọ ewọ na wàlẹblanuna mì bo na gọ̀ mì do aigba mìtọn titi ji.
13 “‘Ṣigba, eyin mìwlẹ dọ dọ, “Lala, míwlẹ ma na gbọṣi aigba ehe ji!” bo vẹtolina ogbè Jehovah Jiwheyẹwhe mìtọn tọn 14 gbọn didọ dali dọ, “Lala, kakatimọ mí na yì aigba Egipti tọn ji,+ fie míwlẹ ma na mọ awhàn kavi sè nudidọ opẹ̀n tọn kavi nọ huvẹ te; finẹ wẹ míwlẹ na nọ,” 15 whenẹnu, mì bo sè ohó Jehovah tọn, mì mẹhe yin pipotọ Juda tọn Emi. Nuhe Jehovah awhànpa lẹ tọn, yèdọ Jiwheyẹwhe Islaeli tọn dọ die: “Eyin mìwlẹ magbe sinsinyẹn nado yì Egipti bọ mìwlẹ sọ yì nọ finẹ,* 16 whenẹnu, ohí he mì to budina lọ na wá mì ji to finẹ to aigba Egipti tọn ji, podọ huvẹ he mì to budina lọ nasọ hodo mì yì Egipti, mìwlẹ nasọ kú do finẹ.+ 17 Mẹhe magbe nado yì nọ Egipti lẹpo nasọ kú gbọn ohí, huvẹ po azọ̀nylankan po dali. Ode to yé mẹ ma na luntọ́n kavi họ̀ngán sọn nugbajẹmẹji he yẹn na hẹnwa yé ji lọ mẹ.”’
18 “Na nuhe Jehovah awhànpa lẹ tọn, yèdọ Jiwheyẹwhe Islaeli tọn dọ die: ‘Kẹdẹdile homẹgble ṣie po adi ṣie po yin kinkọnjẹgbonu do mẹhe nọ nọ̀ Jelusalẹm lẹ ji do,+ mọ wẹ homẹgble ṣie na yin kinkọnjẹgbonu do mì ji eyin mì yì Egipti do niyẹn, mìwlẹ nasọ lẹzun dẹ̀hodo de, nudobu de, aṣagbọ́nu de podọ vlẹko de,+ mìwlẹ ma nasọ mọ nọtẹn ehe gbede ba.’
19 “Pipotọ Juda tọn E, Jehovah ko dọho sọta we. A yì Egipti blo. Mì nisọ hẹn do ayiha mẹ gligli dọ yẹn ko na mì avase to egbé 20 dọ mìwlẹ na hẹn ogbẹ̀* mìtọn bu na nuṣiwa mìtọn wutu. Na mìwlẹ do mi hlan Jehovah Jiwheyẹwhe mìtọn dè dọ, ‘Hodẹ̀ do ota mítọn mẹ hlan Jehovah Jiwheyẹwhe mítọn, bosọ dọ nuhe Jehovah Jiwheyẹwhe mítọn dọ lẹpo na mí, míwlẹ nasọ wà ẹ.’+ 21 Yẹn sọ dọ ẹ na mì to egbé, ṣigba mìwlẹ ma jlo na setonuna ogbè Jehovah Jiwheyẹwhe mìtọn tọn kavi wà nudepope he ewọ do mi hlan nado dọna mì.+ 22 Enẹwutu, e ni họnwun na mì dọ mìwlẹ na kú gbọn ohí, huvẹ po azọ̀nylankan po dali to fie mì jlo na yì nọ lọ.”+
43 To whenue Jelemia ko dọhona mẹlọ lẹpo gando ohó ehe lẹpo he wá sọn Jehovah Jiwheyẹwhe yetọn dè go godo, yèdọ ohó he Jehovah Jiwheyẹwhe yetọn ko do ewọ hlan nado dọna yé lẹpo, 2 Azaliahu visunnu Hoṣaia tọn, Johanani+ visunnu Kalea tọn po sunnu saklanọ lọ lẹpo po dọna Jelemia dọmọ: “Lalo wẹ nuhe hiẹ to didọ lẹ! Jehovah Jiwheyẹwhe mítọn ma ko do we hlan nado dọ dọ, ‘Mì ma yì Egipti nado nọ finẹ blo.’ 3 Ṣigba, Baluki+ visunnu Nelia tọn wẹ to sisẹsisẹ we do mí ji nado ze mí do alọmẹ na Kaldeanu lẹ, na yé nido hù mí kavi bẹ mí yì kanlinmọgbenu to Babilọni.”+
4 Enẹwutu, Johanani visunnu Kalea tọn, awhàngán lọ lẹpo po mẹlọ lẹpo po vẹtolina ogbè Jehovah tọn nado gbọṣi aigba Juda tọn ji. 5 Kakatimọ, Johanani visunnu Kalea tọn po awhàngán lọ lẹpo po plan pipotọ Juda tọn lẹpo he ko lẹkọ sọn akọta he mẹ yè ko vúnvún yé pé gbọn lẹpo nado wá nọ aigba Juda tọn ji.+ 6 Yé plan sunnu lọ lẹ, yọnnu lọ lẹ, ovi lọ lẹ, viyọnnu ahọlu tọn lẹ po mẹhe* Nẹbuzaladani+ ogán nuhọ́tọ lẹ tọn lọ ko jodo Gedalia+ visunnu Ahikami+ visunnu Ṣafani+ tọn dè lẹpo po, gọna Jelemia yẹwhegán lọ po Baluki visunnu Nelia tọn po. 7 Yé sọ yì aigba Egipti tọn ji, na yé ma setonuna ogbè Jehovah tọn, yé sọ yì kaka yì jẹ Tahapanhẹsi.+
8 Whenẹnu wẹ Jehovah dọna Jelemia to Tahapanhẹsi dọmọ: 9 “Bẹ zannu daho lẹ hẹn do alọmẹ bo whlá yé do nutlẹ́nu lọ mẹ to fie yè yí bliki do tlẹ́ to họntonu owhé Falo tọn to Tahapanhẹsi, to nukun sunnu Ju lọ lẹ tọn mẹ. 10 Hiẹ nasọ dọna yé dọ, ‘Nuhe Jehovah awhànpa lẹ tọn, yèdọ Jiwheyẹwhe Islaeli tọn dọ die: “Yẹn na ylọ Nẹbukadnẹzali* ahọlu Babilọni tọn, yèdọ devizọnwatọ ṣie,+ yẹn nasọ ze ofìn etọn do zannu ehelẹ he yẹn ko whlá lẹ ji tlọlọ, podọ ewọ na dlẹn gòhọ ahọlu tọn etọn do yé ji.+ 11 Ewọ nasọ wá bo na linú aigba Egipti tọn.+ Mẹdepope he jẹna okú azọ̀nylankan tọn na yin hùhù gbọn azọ̀nylankan dali, mẹdepope he jẹna kanlinmọgbenu na yì kanlinmọgbenu, mẹdepope he sọ jẹna okú ohí tọn na yin hùhù gbọn ohí dali.+ 12 Podọ yẹn na dozò ohọ̀* yẹwhe Egipti tọn lẹ tọn,+ ewọ na fiọ yé bo na hẹn yé yì kanlinmọgbenu. E na ze aigba Egipti tọn ṣinyọnna ede kẹdẹdile lẹngbọhọtọ de nọ ze awù etọn ṣinyọ́n do, ewọ nasọ yì sọn finẹ to jijọho mẹ.* 13 Ewọ nasọ gbà dòtin Bẹti-ṣemẹṣi* tọn lẹ do flinflin to aigba Egipti tọn ji, e nasọ yí miyọ́n do fiọ ohọ̀* yẹwhe Egipti tọn lẹ tọn.”’”
44 Ohó ehe wẹ wá Jelemia dè na Ju he nọ nọ̀ aigba Egipti tọn ji lẹpo,+ yèdọ mẹhe nọ nọ̀ Migdoli,+ Tahapanhẹsi,+ Nofi*+ po aigba Patlosi+ tọn ji lẹ po: 2 “Nuhe Jehovah awhànpa lẹ tọn, yèdọ Jiwheyẹwhe Islaeli tọn dọ die, ‘Mìwlẹ ko mọ nugbajẹmẹji he yẹn hẹnwa Jelusalẹm+ po tòdaho Juda tọn lẹpo po ji, podọ to egbehe yé ko lẹzun fie gbakija bọ mẹdepope ma nọ nọ̀.+ 3 Na nuylankan he yé wà lẹ nado hẹn homẹgblena mi wutu gbọn hihodo yẹwhe devo lẹ he yewlẹ, kavi mìwlẹ kavi tọgbo mìtọn lẹ ma yọnẹn dali, nado basi avọ́sinsan lẹ hlan yé+ podọ nado sẹ̀n yé.+ 4 Yẹn sọ to devizọnwatọ ṣie he yin yẹwhegán lẹ dohlan mì mapote, bo nọ do yé hlan pludopludo* dọmọ: “Yẹn vẹ̀ mì, mì wà osùnú ehe he yẹn gbẹwanna blo.”+ 5 Ṣigba, yé ma dotoai kavi tuntoai nado diọ sọn nuylankan he wà yé te lẹ kọ̀n gbọn alọdidotena avọ́sinsan bibasi hlan yẹwhe devo lẹ dali.+ 6 Enẹwutu, homẹgble ṣie po adi ṣie po yin kinkọnjẹgbonu bo jimiyọ́n to tòdaho Juda tọn lẹ mẹ podọ to tòhomẹ-liho Jelusalẹm tọn lẹ ji, yé sọ lẹzun fie gbakija de podọ aigba gbọgbé de, dile yé te do to egbé.’+
7 “Todin, nuhe Jehovah Jiwheyẹwhe awhànpa lẹ tọn, yèdọ Jiwheyẹwhe Islaeli tọn dọ die, ‘Naegbọn mì do to nugbajẹmẹji daho ehe hẹnwa mìdelẹ* ji, bọ sunnu, yọnnu, ovi po ovivu lẹpo po na dọ̀n to Juda, bọ pipotọ depope ma na pò to mì mẹ? 8 Naegbọn mìwlẹ nado yí azọ́n alọ mìtọn lẹ tọn do hẹn homẹgblena mi gbọn avọ́sinsan hlan yẹwhe devo lẹ to aigba Egipti tọn he ji mìwlẹ ko yì nado nọ lọ ji dali? Mì na dọ̀n bo na lẹzun nuhe yin dẹ̀hodo de po vlẹko de po to akọta aigba ji tọn lẹpo ṣẹnṣẹn.+ 9 Be mìwlẹ ko wọn nuylankan he tọgbo mìtọn lẹ wà, nuylankan he ahọlu Juda tọn lẹ+ po asi yetọn lẹ po wà,+ gọna nuylankan he mìlọsu po asi mìtọn lẹ po wà,+ yèdọ nuhe yin wiwà to aigba Juda tọn ji podọ to tòhomẹ-liho Jelusalẹm tọn lẹ ji wẹ ya? 10 Yé ma whiwhẹ yede* kakajẹ egbé, yé ma do budisi hia,+ mọjanwẹ yé ma setonuna osẹ́n ṣie po osẹ́ndoai ṣie lẹ po he yẹn zedonukọnna mìwlẹ po tọgbo mìtọn lẹ po.’+
11 “Enẹwutu, nuhe Jehovah awhànpa lẹ tọn, yèdọ Jiwheyẹwhe Islaeli tọn dọ die, ‘Todin, yẹn ko magbe nado hẹn nugbajẹmẹji wá mì ji, yèdọ nado và Juda pete sudo. 12 Yẹn nasọ wle pipotọ Juda tọn he magbe nado yì aigba Egipti tọn ji nado yì nọ finẹ lẹ, yemẹpo nasọ dọ̀n to aigba Egipti tọn ji.+ Yé na jai gbọn ohí dali bo na dọ̀n gbọn huvẹ dali; sọn omẹ pẹvi ji jẹ daho ji, yé na kú gbọn ohí po huvẹ po dali. Yé nasọ lẹzun dẹ̀hodo de, nudobu de, aṣagbọ́nu de podọ vlẹko de.+ 13 Yẹn na yí ohí, huvẹ po azọ̀nylankan po do sayana mẹhe nọ nọ̀ aigba Egipti tọn ji lẹ kẹdẹdile yẹn sayana Jelusalẹm do.+ 14 Pipotọ Juda tọn he yì nado nọ aigba Egipti tọn ji ma na họ̀ngán kavi luntọ́n nado lẹkọwa aigba Juda tọn ji. Yé na tindo ojlo vẹkuvẹku* nado lẹkọwa nọ finẹ, ṣigba yé ma na lẹkọ, adavo omẹ vude he na luntọ́n.’”
15 Sunnu he yọnẹn dọ asi yetọn lẹ to avọ́sinsan basi hlan yẹwhe devo lẹ lẹpo podọ asi he ṣite to finẹ lẹpo, he yin gbẹtọgun de, po mẹhe nọ nọ̀ aigba Egipti tọn ji+ to Patlosi+ lẹpo po gblọnna Jelemia dọmọ: 16 “Mí ma na dotoaina ohó he hiẹ ko dọna mí to oyín Jehovah tọn mẹ. 17 Kakatimọ, e họnwun dọ míwlẹ na yinuwa sọgbe hẹ ohó he mí yí onù mítọn do dọ lẹpo, nado nọ basi avọ́sinsan lẹ hlan Ahọsi Olọn tọn* bosọ nọ kọ̀n avọ́nunina nùnù lẹ jẹgbonu hlan ẹn,+ kẹdẹdile míwlẹ, tọgbo mítọn lẹ, ahọlu mítọn lẹ po ahọvi mítọn lẹ po wà to tòdaho Juda tọn lẹ mẹ podọ to tòhomẹ-liho Jelusalẹm tọn lẹ ji do, to whenue mí nọ dùnú gọ́ho bo tindo susugege, whenue nugbajẹmẹji depope ma wá mí ji. 18 Sọn whenue gbọ́n míwlẹ doalọtena avọ́sinsan bibasi hlan Ahọsi Olọn tọn* po avọ́nunina nùnù lẹ kinkọnjẹgbonu hlan ẹn po, mí ko gbọagba nulẹpo tọn bo ko sọ dọ̀n gbọn ohí po huvẹ po dali.”
19 Yọnnu lọ lẹ sọ yidogọ dọmọ: “Podọ to whenue mí nọ basi avọ́sinsan hlan Ahọsi Olọn tọn* bo nọ kọ̀n avọ́nunina nùnù lẹ jẹgbonu hlan ẹn, be e ma yin asu mítọn lẹ wẹ na mí gbè nado basi akla hìhì avọ́sinsan tọn lẹ taidi boṣiọ etọn bosọ kọ̀n avọ́nunina nùnù lẹ jẹgbonu hlan ẹn ya?”
20 Whenẹnu wẹ Jelemia dọna mẹlọ lẹpo, sunnu lọ lẹ po asi yetọn lẹ po podọ na mẹhe to hodọ hẹ ẹ lẹpo dọmọ: 21 “Avọ́sinsan he mìwlẹ, tọgbo mìtọn lẹ, ahọlu mìtọn lẹ, ahọvi mìtọn lẹ po mẹhe nọ nọ̀ aigba lọ ji lẹ po basi to tòdaho Juda tọn lẹ mẹ podọ to tòhomẹ-liho Jelusalẹm tọn lẹ ji lẹ+—Jehovah flin yé podọ yé sọ wá ayiha etọn mẹ! 22 To godo mẹ, Jehovah masọ sọgan doakọnna walọ ylankan mìtọn lẹ po osùnú he mì ko wà lẹ po ba, aigba mìtọn sọ lẹzun fie jẹvọ́ de, nudobu de podọ nuhe yin dẹ̀hodo de, yèdọ fie mẹdepope ma nọ nọ̀, dile e te do to egbé.+ 23 Na mìwlẹ ko basi avọ́sinsan ehelẹ podọ na mì waylando do Jehovah bo ma setonuna ogbè Jehovah tọn bo masọ hodo osẹ́n etọn, osẹ́ndoai etọn lẹ po nuflinmẹ etọn lẹ po wẹ zọ́n bọ nugbajẹmẹji ehe do wá mì ji, dile e te do to egbé.”+
24 Jelemia sọ zindonukọn bo dọna mẹlọ lẹpo po yọnnu lọ lẹpo po dọmọ: “Mì sè ohó Jehovah tọn, mì omẹ Juda tọn he tin to aigba Egipti tọn ji lẹpo emi. 25 Nuhe Jehovah awhànpa lẹ tọn, yèdọ Jiwheyẹwhe Islaeli tọn dọ die, ‘Nuhe mìwlẹ po asi mìtọn lẹ po ko yí onù mìtọn lẹ do dọ wẹ mì yí alọ mìtọn lẹ do hẹndi, na mì dọmọ: “E họnwun dọ míwlẹ na de opà mítọn lẹ nado nọ basi avọ́sinsan hlan Ahọsi Olọn tọn* bosọ nọ kọ̀n avọ́nunina nùnù lẹ jẹgbonu hlan ẹn.”+ Mì yọnnu lẹ emi, e họnwun dọ mìwlẹ na de opà mìtọn lẹ bo nasọ wà kẹdẹdi opà mìtọn lẹ.’
26 “Enẹwutu, mì omẹ Juda tọn he nọ nọ̀ aigba Egipti tọn ji lẹpo emi, mì sè ohó Jehovah tọn: ‘“Yẹn yí oyín daho ṣie titi do whlé,” wẹ Jehovah, “dọ omẹ Juda tọn depope he tin to aigba Egipti tọn blebu ji ma nasọ nọ yí oyín ṣie do whlé ba+ dọ, ‘Dile e na dẹnsọ bọ Oklunọ Nupojipetọ Jehovah togbẹ̀!’+ 27 Todin, yẹn to ayidonugo na yé nado hẹn nugbajẹmẹji wá yé ji kakati nido yin nudagbe;+ omẹ Juda tọn he tin to aigba Egipti tọn ji lẹpo na dọ̀n gbọn ohí po huvẹ po dali, kakajẹ whenue yé na vọ̀.+ 28 Omẹ vude poun wẹ na họ̀ngán sọn ohí lọ nù bo na lẹkọ sọn aigba Egipti tọn ji wá aigba Juda tọn ji.+ Whenẹnu wẹ pipotọ Juda tọn he wá aigba Egipti tọn ji nado nọ finẹ lẹ na yọ́n ohó mẹhe tọn wẹ yin hinhẹndi, ṣie kavi yewlẹ tọn!”’”
29 “‘Podọ ohia ehe wẹ yẹn na mì,’ wẹ Jehovah dọ, ‘dọ yẹn na sayana mì to nọtẹn ehe, bọ mì nado yọnẹn dọ ohó he yẹn dọdai dọ yẹn na hẹn nugbajẹmẹji wá mì ji lẹ na yin hinhẹndi dandan. 30 Nuhe Jehovah dọ die: “Yẹn na jo Falo Họfla tọn, yèdọ ahọlu Egipti tọn do alọmẹ na kẹntọ etọn lẹ po mẹhe to ogbẹ̀* etọn dín lẹ po, kẹdẹdile yẹn jo Ahọlu Zedekia Juda tọn do alọmẹ na Ahọlu Nẹbukadnẹzali* Babilọni tọn do, yèdọ mẹhe yin kẹntọ etọn bosọ dín ogbẹ̀* etọn.”’”+
45 Nuhe Jelemia yẹwhegán lọ dọna Baluki+ visunnu Nelia tọn to whenue ewọ kàn ohó he Jelemia dọ lọ lẹ do owe de mẹ+ to owhe ẹnẹtọ gandudu Jehoiakimi visunnu Josia tọn,+ he yin ahọlu Juda tọn mẹ die:
2 “Nuhe Jehovah Jiwheyẹwhe Islaeli tọn dọ gando hiẹ Baluki go die, 3 ‘Hiẹ ko dọ dọ: “Dindọn wẹ na mi, na Jehovah ko yí awubla dogọ awufiẹsa ṣie! Azọ̀nwinwẹn ṣie ko húagbọ́ mi, yẹn masọ mọ gbọjẹtẹn de.”’
4 “Hiẹ ni dọna ẹn dọ, ‘Nuhe Jehovah dọ die: “Pọ́n! Yẹn jlo na họ́ nuhe yẹn jlọ dote lọ liai, podọ yẹn jlo na họ̀nadọna nuhe yẹn do lọ—yèdọ aigba lọ blebu.+ 5 Ṣigba, hiẹ to onú daho lẹ dín* na dewe. A sọ dín onú mọnkọtọn lẹ ba blo.”’
“‘Na yẹn jlo na hẹn nugbajẹmẹji de wá agbasalan* lẹpo ji,’+ wẹ Jehovah dọ, ‘podọ mahopọnna fidepope he hiẹ sọgan yì, yẹn na whlẹn ogbẹ̀* towe.’”+
46 Ohó he Jehovah dọna Jelemia yẹwhegán lọ gando akọta lẹ go die:+ 2 Hlan Egipti,+ gando awhànpa Falo Neko+ ahọlu Egipti tọn go, yèdọ mẹhe to Tọ̀sisa Euflate pá bọ Ahọlu Nẹbukadnẹzali* Babilọni tọn gbawhàn etọn to Kalkemiṣi to owhe ẹnẹtọ gandudu Jehoiakimi+ visunnu Josia tọn he yin ahọlu Juda tọn mẹ:
3 “Mì wleawuna gaglo* po awọ̀yinu daho mìtọn lẹ po,
Mì tọ́nyi nado funawhàn.
4 Mì osọ́nọ lẹ emi, mì wleawuna osọ́ lẹ bo hẹ yé ji.
Mì to mìde bo ṣinyọ́n ogangbakun mìtọn lẹ.
Mì gàn owhán lẹ bo blagbajana mìde.
5 ‘Naegbọn yẹn do mọ bọ ahun yetọn gbàdo?
Yé to agọjoyigodo, yè ko gídí awhànfuntọ yetọn lẹ.
Obu ko jẹ yé ji bọ yé họ̀n, awhànfuntọ yetọn lẹ ma lẹgodo.
Obu ko jẹ mẹlẹpo ji,’ wẹ Jehovah dọ.
6 ‘Mẹhe yin awuyatọ lẹ ma sọgan họ̀n, podọ awhànfuntọ lẹ ma sọgan họ̀ngán.
To agewaji, to Tọ̀sisa Euflate tó,
Yé ko dahli bo jai.’+
7 Mẹnu wẹ ehe he hẹji ja taidi Tọ̀sisa Nile tọn,
Taidi agbówhẹn osin tọn lẹ he to sisà?
8 Egipti hẹji taidi Tọ̀sisa Nile tọn,+
Taidi agbówhẹn osin tọn lẹ he to sisà,
E sọ dọ dọ, ‘Yẹn na hẹji yì bo na ṣinyọ́n aigba ji.
Yẹn na và tòdaho lọ po mẹhe nọ nọ̀ e mẹ lẹ po sudo.’
9 Mì osọ́ lẹ emi, mì hẹji yì!
Mì osọ́-kẹkẹ lẹ emi, mì kùn kẹkẹ po huhlọn mìtọn lẹpo po!
Dike awhànfuntọ lẹ ni dọnsẹpọ,
Enẹ wẹ Kuṣinu po Putinu lẹ po, yèdọ mẹhe nọ hẹn awọ̀yinu lẹ,+
10 “Oklunọ Nupojipetọ Jehovah awhànpa lẹ tọn tọn wẹ azán enẹ, yèdọ azán ahọsuyi tọn, nado yiahọsu to kẹntọ etọn lẹ go. Ohí lọ na và yé sudo bo na hẹn pekọ wá na ede bo nasọ gọ́ po ohùn yetọn po, na Oklunọ Nupojipetọ Jehovah awhànpa lẹ tọn tindo avọ́sinsan* de to aigba agewaji tọn ji sẹpọ Tọ̀sisa Euflate.+
11 Hẹji yì Giliadi nado dín balsami,*+
Hiẹ viyọnnu alọji Egipti tọn E.
Ovọ́ mẹ wẹ hiẹ ko dín amasin susu te,
Na hiẹ ma na yin azọ̀nhẹngbọna.+
12 Akọta lẹ ko sè dogbọn winyan towe dali,+
Avigbè towe ko sọ gbayipe gbọn aigba lọ ji.
Na awhànfuntọ de dahli jẹ awetọ etọn ji,
Yé omẹ awe lẹ sọ jai dopọ.”
13 Nuhe Jehovah dọna Jelemia yẹwhegán lọ gando wiwá Ahọlu Nẹbukadnẹzali* Babilọni tọn nado wá linú aigba Egipti tọn go die:+
14 “Dọ ẹ to Egipti, lá ẹ to Migdoli.+
Lá ẹ to Nofi* podọ to Tahapanhẹsi.+
Dọna yé dọ, ‘Mì to mìde bo wleawudai,
Na ohí de na và nulẹpo sudo lẹdo mì pé.
15 Naegbọn sunnu huhlọnnọ towe lẹ do yin zizasẹ?
Yé ma gbọṣi otẹn yetọn mẹ,
Na Jehovah ko sisẹ́ yé liai wutu.
16 Mẹsusu to yé mẹ to ahlida bo to aijẹ.
Yé to didọna ode awetọ dọmọ:
“Fọnṣite! Gbọ mí ni lẹkọyi omẹ mítọn lẹ dè podọ yì owhé mítọn lẹ gbè
Na ohí didá mlanmlan lọ wutu.”’
17 Yé ko lá to finẹ dọ,
‘Nùgoyitọ tata de poun wẹ Falo ahọlu Egipti tọn
18 ‘Dile yẹn togbẹ̀,’ wẹ Ahọlu lọ, yèdọ mẹhe nọ yin Jehovah awhànpa lẹ tọn dọ,
‘Ewọ* na wá taidi Taboli+ to osó lẹ ṣẹnṣẹn
Podọ taidi Kalmẹli+ to huto.
19 Wleawuna agbàn towe nado yì kanlinmọgbenu,
Hiẹ viyọnnu he nọ nọ̀ Egipti E.
20 Egipti taidi oyìn asiwhe he yọ́npọ́n de,
Ṣigba, supọ̀ adínọ lẹ na wá sọta ẹ sọn agewaji.
21 Awhànfuntọ etọn he tlẹ yin hihaya to ṣẹnṣẹn etọn lẹ tin taidi oyìnvu he dojó lẹ,
Ṣigba, yelọsu lẹ ko lẹgodo bo họnyi dopọ.
Yé ma sọgan gbọṣi otẹn yetọn mẹ,+
Na azán nugbajẹmẹji tọn yetọn ko wá yé ji,
Yèdọ ojlẹ lẹnjo tọn yetọn.’
22 ‘Nudidọ etọn taidi odàn he to lìnlìn de tọn,
Na yé yí asiọvi lẹ do dómọna ẹn po huhlọn po,
Taidi sunnu he to atin sán liai lẹ.*
23 Yé na sán zungbo etọn liai,’ wẹ Jehovah dọ, ‘dile e tlẹ taidi nuhe mẹ yè ma sọgan biọ.
Na yé sù hú owẹ̀n lẹ, yè ma sọgan hia yé.
24 Viyọnnu Egipti tọn na yin winyando.
Ewọ na yin zizedo alọmẹ na omẹ agewaji tọn lẹ.’+
25 “Jehovah awhànpa lẹ tọn, yèdọ Jiwheyẹwhe Islaeli tọn dọmọ: ‘Todin, yẹn na lẹ́ ayidonugo ṣie hlan Amọni+ sọn No,*+ hlan Falo, hlan Egipti, hlan yẹwhe etọn lẹ+ podọ hlan ahọlu etọn lẹ—mọwẹ, yèdọ hlan Falo po mẹhe dejido ewọ go lẹpo po.’+
26 “‘Yẹn nasọ jo yé do alọmẹ na mẹhe to ogbẹ̀* yetọn dín lẹ, enẹ wẹ Ahọlu Nẹbukadnẹzali* Babilọni tọn+ po devizọnwatọ etọn lẹ po. Ṣigba to godo mẹ, gbẹtọ lẹ na nọ e mẹ taidi to ojlẹ hohowhenu tọn lẹ mẹ,’ wẹ Jehovah dọ.+
27 ‘Na nuhe dù hiẹ, yèdọ Jakọbu devizọnwatọ ṣie, a dibu blo,
Islaeli E, a dike ahun towe gbàdo blo.+
Jakọbu na lẹkọ bo na nọ fẹẹmẹ bo ma nasọ yin tuklado,
Bọ mẹde ma na nọ dobuna ẹn.+
28 Enẹwutu, a dibu blo, yèdọ Jakọbu devizọnwatọ ṣie,’ wẹ Jehovah dọ, ‘na yẹn tin po hiẹ po.
47 Ohó ehe wẹ Jehovah dọna Jelemia yẹwhegán lọ gando Filistinu lẹ go,+ whẹpo Falo do gbawhàn Gaza tọn. 2 Nuhe Jehovah dọ die:
“Pọ́n! Osin lẹ ja sọn agewaji.
Yé na lẹzun tọ̀sisa he gọfla de.
Yé nasọ gbaṣinyọ́n aigba lọ po nuhe tin to e ji lẹpo po,
Podọ tòdaho lọ po mẹhe nọ nọ̀ e mẹ lẹ po.
Sunnu lẹ na viavi,
Mẹhe nọ nọ̀ aigba lọ ji lẹpo nasọ doavihàn.
3 Na nudidọ ofẹ̀n osọ́ asu etọn lẹ tọn he na to aigba jlo wutu,
Na nudidọ osọ́-kẹkẹ awhàn tọn etọn lẹ tọn wutu
Podọ na hùnhlún kẹkẹfọ etọn lẹ tọn wutu,
Otọ́ lẹ ma tlẹ na lẹkọ pọ́n godo na visunnu yetọn lẹ tọn wutu,
Na alọ yetọn lẹ na kuyẹ̀,
4 Na to azán he ja lọ gbè, Filistinu lẹpo wẹ na yin vivasudo;+
Mẹhe pò bo kọngbedopọ hẹ yé to Tile+ po Sidoni+ po lẹpo nasọ yin sinsánsẹ.
5 Ota Gaza tọn na mọ́n.*
Yè ko bọnùdo na Aṣikelọni.+
Mì mẹhe pò to agbàdo yetọn mẹ lẹ emi,
Nawẹ mì na to awuhẹngblena mìde dẹnsọ?+
6 Ojé! Ohí Jehovah tọn!+
Nawẹ e na dẹnsọ whẹpo hiẹ nido doalọte?
Gọyì apà towe mẹ.
Yì gbọjẹ bo nọ whii.
7 Naegbọn e nado doalọte
To whenuena e yindọ Jehovah ko degbe?
Sọta Aṣikelọni po lẹdo ohù tọn lọ po,+
Finẹ wẹ ewọ ko dena ẹn.”
48 Nuhe Jehovah awhànpa lẹ tọn, yèdọ Jiwheyẹwhe Islaeli tọn dọna Moabi+ die:
“Dindọn na Nebo,+ na e ko yin vivasudo!
Kiliataimi+ ko duwinyan bo ko yin wiwle.
Fibẹtado hihọ́ tọn* lọ ko yin winyando bo ko yin gbigbà hányán.+
2 Yé masọ nọ pà Moabi ba.
To Hẹṣbọni,+ yé ko blasé gando aijijẹ etọn go:
‘Mì wá, bo dike mí ni hẹn ẹn wá opodo bọ e ma nado yin akọta de ba.’
Madmeni E, hiẹ lọsu dona gbọṣi abọẹ,
Na ohí lọ to hihodo we.
3 Avigbè de yin sisè sọn Holonaimi,+
Yèdọ avigbè vasudo po aijijẹ daho de po tọn.
4 Moabi ko yin hihọliai.
Omẹ pẹvi etọn lẹ viavi.
5 Yé to avivi mapote dile yé hẹji jei Luhiti.
Podọ dile yé to tejẹ sọn Holonaimi ji, yé sè awhágbe awubla tọn na nugbajẹmẹji lọ wutu.+
6 Mì họ̀n, mì họ̀ngán na ogbẹ̀* mìtọn wutu!
Mì dona tin taidi atin junipeli tọn de to danfafa ji.
7 Na mì dejido azọ́n mìtọn lẹ po adọkun mìtọn lẹ po go wutu,
Mì na yin wiwle.
Kemọṣi+ na yì kanlinmọgbenu,
To pọmẹ hẹ yẹwhenọ etọn lẹ po ahọvi etọn lẹ po.
8 Mẹhusudotọ lọ na wá tòdaho lẹpo mẹ,
Tòdaho depope ma nasọ họ̀ngán.+
Agbàdo lọ na dọ̀n,
Podọ aigba jijlọ lọ na yin vivasudo, kẹdẹdile Jehovah ko dọ do.
9 Mì ze ohia de dote na Moabi,
Na mẹhe to e mẹ lẹ na họ̀n to whenue e na yin gbigbakija,
Tòdaho etọn lẹ nasọ lẹzun nudobu de,
Mẹdepope ma nasọ nọ nọ̀ yé mẹ.+
10 Mẹhodẹ̀do wẹ mẹlọ he yí vọdonanu do hẹn azọ́ndenamẹ Jehovah tọn di!
Mẹhodẹ̀do wẹ mẹlọ he dọ̀n alọ ohí tọn dogodo ma nado sọ̀n ohùn dai!
11 Moabinu lẹ ma ko yin tuklado sọn jọja whenu yetọn,
Taidi ovẹn to whàwhá etọn ji.
Yé ma ko yin kinkọ̀n sọn núzinzan de mẹ do devo mẹ,
Yé ma ko sọ yì kanlinmọgbenu pọ́n gbede.
Enẹ wẹ zọ́n bọ otọ́n yetọn ma ko diọ,
Bọ owán yetọn lọsu masọ diọ.
12 “‘Enẹwutu, pọ́n! azán lẹ ja,’ wẹ Jehovah dọ, ‘to whenue yẹn na do sunnu lẹ hlan nado diọ yé kọnyinai. Yé na diọ yé kọnyinai bo nasọ hẹn núzinzan he mẹ yé tin te lẹ jẹvọ́, podọ yé na gbà ozẹ́n daho yetọn lẹ hányán. 13 Winyan nasọ hù Moabinu lẹ na Kemọṣi tọn wutu, kẹdẹdile winyan hù owhé Islaeli tọn na Bẹtẹli tọn wutu do, yèdọ fie yé ze jidide yetọn do.+
14 Etẹwẹ hẹn we gboadọ bọ hiẹ do dọmọ: “Awhànfuntọ hlọnhlọnnọ lẹ wẹ mí, yèdọ mẹhe ko wleawufo na awhàn lẹ”?’+
15 ‘Moabi ko yin vivasudo,
Yè ko tọ́nawhàn tòdaho etọn lẹ,+
Dẹpẹ dagbe hugan yetọn lẹ ko sọ yin hùhù,’+
Wẹ Ahọlu lọ, mẹhe nọ yin Jehovah awhànpa lẹ tọn dọ.+
16 Nugbajẹmẹji lọ na wá Moabinu lẹ ji to madẹnmẹ,
Podọ aijijẹ yetọn to dindọnsẹpọ po awuyiya po.+
17 Mẹhe lẹdo yé lẹpo wẹ na vẹawu yé,
Yèdọ mẹhe yọ́n yinkọ yetọn lẹpo.
Dọna yé dọ: ‘Lehe opò hlọnhlọnnọ lọ ko yin winwẹ́n do, yèdọ aglọpò whanpẹ tọn lọ!’
Na mẹhusudotọ Moabi tọn ko wá sọta we,
Ewọ nasọ gbà figángán towe lẹ kija.+
19 Ṣite to alitó bo pọ́n, hiẹ mẹhe nọ nọ̀ Aloeli.+
Kanse sunnu he to hinhọ̀n po yọnnu he to hinhọngán lẹ po dọ, ‘Etẹwẹ jọ?’
20 Moabi ko yin winyando bo ko yin budona.
Mì doavihàn bosọ ze ogbè daga.
Mì lá to Alnọni+ dọ Moabi ko yin vivasudo.
21 “Whẹdida ko wá sọta aigba jijlọ lọ,+ yèdọ sọta Holọni, Jahazi+ po Mẹfaati po;+ 22 sọta Dibọni,+ Nebo+ po Bẹti-diblataimi po; 23 sọta Kiliataimi,+ Bẹti-gamuli po Bẹti-meọni+ po; 24 sọta Keliọti+ po Bozla po; podọ sọta tòdaho he tin to aigba Moabi tọn ji lẹpo, yèdọ dehe to fidindẹn po dehe to yakẹ lẹ po.
25 ‘Huhlọn* Moabi tọn ko yin sinsánliai;
Awà etọn ko yin winwẹ́n,’ wẹ Jehovah dọ.
26 ‘Hẹn ẹn nado nùahànmú,+ na ewọ ko ze ede daga sọta Jehovah wutu.+
Moabi to bibli to oslú etọn mẹ,
Ewọ ko sọ lẹzun aṣagbọ́nu de.
27 Be Islaeli ma ko lẹzun aṣagbọ́nu de na we wayi ya?+
Be ewọ yin mimọ to ajotọ lẹ ṣẹnṣẹn,
Wẹ zọ́n bọ hiẹ nado mimí ota bo dọho jẹagọdo e ya?
28 Mì tòmẹnu Moabi tọn lẹ emi, mì tọ́n sọn tòdaho lẹ mẹ bo yì nọ osó ji,
Podọ mì ni taidi apoe he nọ do adọ́ etọn lẹ do núgo to odò homẹ.’”
29 “Mí ko sè dogbọn goyiyi Moabi tọn dali—ewọ yin saklanọ taun—
Podọ dogbọn glòlò-jijlá etọn, goyiyi etọn, sakla etọn po awagundido ahun etọn mẹ tọn po dali.”+
30 “‘Yẹn yọ́n adi etọn,’ wẹ Jehovah dọ,
‘Ṣigba, nùgoyiyi etọn na dekọtọn do ovọ́ mẹ.
Yé ma na wà nudepope.
31 Enẹ wẹ zọ́n bọ yẹn na doavihàn do Moabi ji,
Yẹn na viavi na Moabi pete wutu
Yẹn nasọ nọ aluẹmẹ na sunnu Kili-helẹsi+ tọn lẹ wutu.
Alà towe he vùn lẹ ko dasá ohù.
Yé ko yì jẹ ohù lọ kọ̀n, jẹ Jazẹli.
Sinsẹ́n alunlun mẹ tọn towe po ovẹn sinsẹ́n towe he yin gbingbẹ̀n lẹ po
Ji wẹ mẹhusudotọ lọ ko wá.+
33 Ayajijẹ po aglinjijẹ po ko yin didesẹ sọn aigba he yọ́n na jinukun lọ ji
Podọ sọn aigba Moabi tọn ji.+
Yẹn ko hẹn sisà ovẹn tọn nado doalọte sọn ovẹn-finyọ́ndo mẹ.
Mẹdepope ma na ze ogbè daga po ayajẹ po dile e na to ovẹn tùn.
Awhágbe lọ na gbọnvo.’”+
34 “‘Avigbè de yin sisè sọn Hẹṣbọni+ jẹ Eleale.+
Osin Nimlimi tọn lẹ lọsu na tlẹ jẹvọ́.+
35 Yẹn na sukúndona yé sọn Moabi,’ wẹ Jehovah dọ,
‘Yèdọ mẹhe nọ hẹn avọ́nunina yì ofi yiaga lọ ji
Po mẹhe to avọ́sinsan basi hlan yẹwhe etọn po.
36 Enẹwutu wẹ ahun ṣie na nọ aluẹmẹ* na Moabi taidi ován* de,+
Ahun ṣie nasọ nọ aluẹmẹ* na sunnu Kili-helẹsi tọn lẹ taidi ován* de.
Na adọkun he yé ko wleawuna lọ na dọ̀n.
37 Na ota lẹpo yin whiwhlẹ́,+
Ogbì lẹpo sọ yin pipà yìdo.
38 “‘To họta Moabi tọn lẹpo
Podọ to tòplitẹn etọn lẹpo,
Nudevo de ma tin adavo avihàn.
Na yẹn ko gbà Moabi
Taidi ozẹ́n he yin kọgbẹ́ e go de wutu,’ wẹ Jehovah dọ.
39 ‘Obu nankọ die he jẹ ewọ ji! Mì doavihàn!
Lehe Moabi ko lẹgodo etọn po winyan po do sọ!
Moabi ko lẹzun aṣagbọ́nu de,
Nudobu de na mẹhe lẹdo e lẹpo.’”
40 “Na nuhe Jehovah dọ die:
‘Pọ́n! Kẹdẹdile akùn de nọ zlọn wá odò to ajiji mẹ do,+
Mọ wẹ ewọ na dlẹn awà etọn lẹ do Moabi ji do niyẹn.+
41 Tòpẹvi etọn lẹ na yin yíyí,
Figángán etọn lẹ nasọ yin hihòyi.
To azán enẹ gbè, ahun awhànfuntọ Moabi tọn lẹ tọn
Na taidi ahun yọnnu de he to ajidònu tọn.’”
43 Obu, odò po omọ̀ po wẹ tin to nukọn towe,
Hiẹ mẹhe nọ nọ̀ Moabi E,’ wẹ Jehovah dọ.
44 ‘Mẹdepope he to hinhọ̀nna obu na jai jẹ odò mẹ,
Podọ mẹdepope he to tintọ́n sọn odò lọ mẹ na yin wiwle do omọ̀ mẹ.’
‘Na yẹn na hẹn owhe yasanamẹ tọn wá Moabi ji,’ wẹ Jehovah dọ.
45 ‘Mẹhe to hinhọ̀n lẹ ṣite to oyẹ̀ Hẹṣbọni tọn glọ bo masọ tindo huhlọn depope.
Na miyọ́n de na tọ́n sọn Hẹṣbọni
Podọ miyọ́n he to jiji de sọn Sihọni.+
E na fiọ nukọn Moabi tọn
Podọ taká visunnu zingidinọ lẹ tọn.’+
46 ‘Moabi E, dindọn wẹ na we!
Omẹ Kemọṣi+ tọn lẹ ko dọ̀n.
Na visunnu towe lẹ ko yin wiwle taidi kanlinmọ,
Viyọnnu towe lẹ ko sọ yì kanlinmọgbenu.+
47 Ṣigba yẹn na bẹ kanlinmọ Moabi tọn lẹ pli to ojlẹ godo tọn azán godo tọn lẹ tọn mẹ,’ wẹ Jehovah dọ.
‘Ehe wẹ yin tadona whẹdida Moabi tọn.’”+
49 Nuhe Jehovah dọna Amọninu+ lẹ die:
“Be Islaeli ma tindo visunnu lẹ wẹ ya?
Be ewọ ma tindo gudutọ de wẹ ya?
Naegbọn Malkami+ do yí Gad taidi nutindo de?+
Podọ naegbọn omẹ etọn lẹ do nọ nọ̀ tòdaho Islaeli tọn lẹ mẹ?”
2 “‘Enẹwutu, pọ́n! azán lẹ ja,’ wẹ Jehovah dọ,
‘Whenue yẹn na hẹn ohia awhàn tọn* de nado yin sisè sọta Laba+ Amọninu lẹ tọn.+
E na lẹzun pópló he gbọgbé de,
Yè nasọ dozò tòpẹvi he to oglọ na ẹn* lẹ.’
‘Podọ Islaeli na yí onú mẹhe yí onú etọn lẹ tọn,’+ wẹ Jehovah dọ.
3 ‘Hẹṣbọni E, doavihàn, na Ai ko yin vivasudo wutu!
Mì viavi, mì tòpẹvi he to oglọ na Laba lẹ emi.
Mì ze odẹ́vọ̀ do.
Mì doavihàn bo flu pé gbọn apó he yè yí zannu do dó lẹ* mẹ,
Na Malkami na yì kanlinmọgbenu,
To pọmẹ hẹ yẹwhenọ etọn lẹ po ahọvi etọn lẹ po.+
4 Naegbọn hiẹ do nọ kla gando agbàdo lọ lẹ go,
Yèdọ gando agbàdo he mẹ osin nọ sà te ganji lọ go, hiẹ viyọnnu he ma yin nugbonọ E,
Mẹhe dejido adọkunnu etọn lẹ go
Bosọ nọ dọ dọ: “Mẹnu wẹ na wá sọta mi?”’”
5 “‘Yẹn na hẹn nudobu de wá ji we,’ wẹ Oklunọ Nupojipetọ Jehovah awhànpa lẹ tọn dọ,
‘Sọn mẹhe lẹdo we lẹpo dè.
Yè na vúnvún we pé hlan awà lẹpo ji,
Mẹde ma nasọ bẹ mẹhe họ̀n lẹ pli.’”
6 “‘Ṣigba, to godo mẹ, yẹn na bẹ Amọninu he yin kanlinmọ lẹ pli,’ wẹ Jehovah dọ.”
7 Nuhe Jehovah awhànpa lẹ tọn dọna Edomi die:
“Be nuyọnẹn depope ma pò to Temani wẹ ya?+
Be mẹhe tindo nukunnumọjẹnumẹ lẹ masọ tindo ayinamẹ dagbe depope ba wẹ ya?
Be nuyọnẹn yetọn ko yọ̀n wẹ ya?
8 Mì họ̀n, mì lẹgodo!
Mì yì bo nọ odò lẹ mẹ, mì mẹhe nọ nọ̀ Dedani+ lẹ emi!
Na yẹn na hẹn nugbajẹmẹji wá Esau ji
To whenue ojlẹ na sọ̀ nado lẹ́ ayidonugo ṣie hlan ẹn.
9 Eyin mẹhe nọ bẹ ovẹn sinsẹ́n pli lẹ wá hiẹ mẹ,
Be yé ma na pò delẹ dai na wélu-wiwe ya?
Eyin ajotọ lẹ wá to zánmẹ,
Yewlẹ na hẹnnugble dile e jlo yé do.+
10 Ṣigba, yẹn na de Esau jẹ gbangba.
Yẹn na hùngona fiwhiwhlá etọn lẹ,
Bọ e ma nasọ penugo nado whlá ba.
11 Mì jo tọṣiọvi mìtọn lẹ do,
Yẹn nasọ hẹn yé dogbẹ̀,
Gọna asuṣiọsi mìtọn he dejido go e lẹ.”
12 Na nuhe Jehovah dọ die: “Pọ́n! Eyin mẹhe ma yin whẹdana nado nù kọfo lọ lẹ dona nù in, be mìwlẹ na yin jijodo matin yasanamẹ depope wẹ ya? Mìwlẹ ma na yin jijodo matin yasanamẹ, na mì dona nù in wutu.”+
13 “Na yẹn yí dee do whlé,” wẹ Jehovah dọ, “dọ Bozla na lẹzun nudobu de,+ vlẹko de, fie yin vivasudo de po dẹ̀hodo de po; tòdaho etọn lẹpo nasọ yin gbakija tẹgbẹ tọn de.”+
14 Yẹn ko sè linlin de sọn Jehovah dè,
Dẹ́mẹnu de ko yin didohlan akọta lẹ ṣẹnṣẹn nado dọmọ:
“Mì bẹ mìde pli bo wá sọta ẹ;
Mì wleawudaina awhàn.”+
15 “Na pọ́n! N’ko hẹn we zun gbẹ́gọ́nu de to akọta lẹ ṣẹnṣẹn,
Yèdọ mẹhe sunnu lẹ gbẹwanna.+
16 Sijọsijọ he hiẹ nọ hẹnwa wẹ ko klọ we,
Yèdọ sakla ahun towe mẹ tọn,
Hiẹ mẹhe nọ nọ̀ oslò mẹ E,
He nọ nọ̀ okọ́ta he yiaga hugan ji.
Dile etlẹ yindọ hiẹ do adọ́ towe do aga pete taidi akùn de,
Yẹn na hẹn we wá odò sọn finẹ,” wẹ Jehovah dọ.
17 “Podọ Edomi dona lẹzun nudobu de.+ Obu nasọ jẹ mẹhe juwajei lẹpo ji bọ yé na nọ kẹ̀hẹli gando azọ̀nylankan he ko wá e ji lẹpo go. 18 Kẹdẹdile Sodọmi, Gomọla po tòpẹvi he lẹdo yé lẹ po yin hihọliai do,”+ wẹ Jehovah dọ, “mẹde ma na nọ nọ̀ finẹ, mẹdepope ma nasọ sawhé do finẹ.+
19 “Pọ́n! Mẹde na hẹji wá sọta kanlindugbo he tin to hihọ́ mẹ lọ lẹ taidi kinnikinni de+ sọn zungbo etọn he to Jọdani pá lọ mẹ, ṣigba to ojlẹ kleun de godo, yẹn na hẹn ewọ nado họnyi sọn e dè. Yẹn nasọ de mẹdide lọ do ewọ ji. Na mẹnu wẹ tin taidi yẹn, podọ mẹnu wẹ na whlẹnagbà hẹ yẹn? Lẹngbọhọtọ tẹwẹ sọgan ṣite to nukọn ṣie?+ 20 Enẹwutu, mì sunnu lẹ emi, mì sè nudide* he Jehovah ko basi sọta Edomi, podọ nuhe ewọ ko lẹn sọta mẹhe nọ nọ̀ Temani lẹ:+
E họnwun dọ omẹ pẹvi apó lọ tọn lẹ na yin dindọn yì.
Ewọ na hẹn nọtẹn yetọn jẹvọ́ na yetọn wutu.+
21 Nudidọ aijijẹ yetọn tọn ko hẹn aigba sisọ.
Avigbè de yin sisè!
Nudidọ lọ ko yin sisè yì fidindẹn, yèdọ jẹ Ohù Vẹẹ kọ̀n.+
To azán enẹ gbè, ahun awhànfuntọ Edomi tọn lẹ tọn
Na taidi ahun yọnnu de tọn to ajidònu.”
23 Na Damasku:+
“Hamati+ po Alpadi po ko yin winyando,
Na yé ko sè linlin ylankan de wutu.
Yé yọ́ na obu wutu.
Ohù lọ to zingidi ji bo ma penugo nado nọ whii.
24 Damasku ko hẹn adọgbigbo bu.
E ko lẹgodo nado họ̀n, ṣigba obu ko jẹ e ji.
Ayimajai po awubla po ko wá e ji,
Taidi yọnnu de to ajidònu.
25 Naegbọn tòdaho he nọ yin pipà lọ ma ko yin kọgbẹ́ e go,
Yèdọ tòdaho aglinjijẹ tọn lọ?
26 Na dẹpẹ etọn lẹ na jai to tòplitẹn etọn lẹ,
Awhànfuntọ etọn lẹpo nasọ dọ̀n to azán enẹ gbè,” wẹ Jehovah awhànpa lẹ tọn dọ.
27 “Yẹn na dozò adó Damasku tọn,
E nasọ fiọ atọ̀họ̀ gángán Bẹni-hadadi tọn lẹ.”+
28 Na Kẹdali+ po ahọluduta Hazọli tọn lẹ po, he ji Ahọlu Nẹbukadnẹzali* Babilọni tọn dù te lẹ, nuhe Jehovah dọ die:
“Mì fọ́n bo hẹji yì Kẹdali,
Bosọ và visunnu Whèzẹtẹn tọn lẹ sudo.
29 Gòhọ yetọn lẹ po lẹngbọpa yetọn lẹ po na yin yíyí,
Yèdọ avọ̀ gòhọ tọn yetọn lẹ po onú yetọn lẹpo po.
Kanklosọ́ yetọn lẹ na yin bibẹ yì,
Yé nasọ viavi na yetọn wutu dọ, ‘Obu ko jẹ mẹlẹpo ji!’”
30 “Mì họ̀n, mì yì fidindẹn!
Mì yì bo nọ odò lẹ mẹ, mì mẹhe nọ nọ̀ Hazọli lẹ emi,” wẹ Jehovah dọ.
“Na Ahọlu Nẹbukadnẹzali* Babilọni tọn ko kàn ayiha de gando mì go,
Ewọ ko basi tito de sọta mì.”
31 “Fọ́n bo hẹji yì sọta akọta he nọ nọ̀ jijọho mẹ lọ,
Yèdọ ewọ he nọ nọ̀ hihọ́ mẹ lọ!” wẹ Jehovah dọ.
“E ma tindo ohọ̀n kavi dòtin lẹ; yé nọ nọ̀ yedeṣo.
32 Kanklosọ́ yetọn lẹ na lẹzun ogblànnu,
Kanlin-yìnyìn susugege yetọn lẹ nasọ lẹzun ogblànnu.
Yẹn na vúnvún yé pé yì awà lẹpo ji,
Yèdọ mẹhe whlẹ́ topá yetọn lẹ,+
Yẹn nasọ hẹn nugbajẹmẹji yetọn wá sọn awà lẹpo ji,” wẹ Jehovah dọ.
33 “Hazọli nasọ lẹzun adọ́ avún gbémẹ tọn lẹ tọn,
E na yin hinhẹn jẹvọ́ kakadoi.
Mẹde ma na nọ nọ̀ finẹ,
Mẹdepope ma nasọ sawhé do e mẹ.”
34 Ohó he Jehovah dọna Jelemia yẹwhegán lọ gando Elami+ go to bẹjẹeji gandudu Ahọlu Zedekia+ Juda tọn go die: 35 “Nuhe Jehovah awhànpa lẹ tọn dọ die, ‘Yẹn na wẹ́n ogá Elami+ tọn, yèdọ asisa* hlọnhlọn yetọn tọn. 36 Yẹn na hẹn jẹhọn ẹnẹ lẹ wá Elami ji sọn agosu ẹnẹ olọn tọn lẹ mẹ, yẹn nasọ vúnvún yé pé hlan jẹhọn ehe lẹpo. Akọta de ma na tin he mẹ omẹ Elami tọn he yè vúnvún pé lẹ ma na yì.’”
37 “Yẹn na gbà Elaminu lẹ do flinflin to kẹntọ yetọn lẹ nukọn podọ to mẹhe to ogbẹ̀* yetọn dín lẹ nukọn; yẹn nasọ hẹn nugbajẹmẹji wá yé ji, yèdọ homẹgble sinsinyẹn ṣie,” wẹ Jehovah dọ. “Yẹn nasọ do ohí lọ hlan nado jẹgodona yé kakajẹ whenue yẹn na sukúndona yé.”
38 “Podọ, yẹn na ze ofìn ṣie dai do Elami,+ yẹn nasọ và ahọlu lọ po ahọvi lẹ po sudo sọn finẹ,” wẹ Jehovah dọ.
39 “Ṣigba to ojlẹ godo tọn azán godo tọn lẹ tọn mẹ, yẹn na bẹ omẹ Elami tọn he yin kanlinmọ lẹ pli,” wẹ Jehovah dọ.
50 Ohó he Jehovah dọ gando Babilọni go,+ yèdọ gando aigba Kaldeanu lẹ tọn go gbọn Jelemia yẹwhegán lọ gblamẹ die:
2 “Dọ ẹ to akọta lẹ ṣẹnṣẹn bo lá ẹ.
Ze ohia* de daga bo lá ẹ.
A whlá nudepope blo!
Dọ, ‘Babilọni ko yin wiwle.+
Bẹli ko yin winyando.+
Obu ko jẹ Mẹlodaki ji.
Boṣiọ etọn lẹ ko yin winyando.
Obu ko jẹ boṣiọ hiọawu* etọn lẹ ji.’
3 Na akọta de ko wá sọta ẹ sọn agewaji.+
E ko hẹn aigba etọn zun nudobu de;
Mẹde masọ nọ nọ̀ e mẹ ba.
Gbẹtọ po kanlin po ko doge-wezun mẹ;
Yé ko họnyi.”
4 “To azán enẹlẹ gbè podọ to ojlẹ enẹ mẹ,” wẹ Jehovah dọ, “omẹ Islaeli tọn lẹ po omẹ Juda tọn lẹ po na lẹkọwa dopọ.+ Yé na to avivi dile yé to zọnlinzin,+ podọ yé na dín Jehovah Jiwheyẹwhe yetọn to pọmẹ.+ 5 Yé na kàn aliho Ziọni tọn biọ bo na lẹ́ pànta finẹ+ dọmọ, ‘Mì wá bo gbọ mí ni kọnawudopọ hẹ Jehovah to alẹnu madopodo de mẹ he ma na yin winwọn.’+ 6 Omẹ ṣie lẹ ko lẹzun lẹngbọpa he mẹ lẹngbọ lẹ bu te.+ Lẹngbọhọtọ yetọn titi lẹ ko hẹn yé danbú.+ Yé deanana yé yì osó lẹ ji, yé sọ nọ to fuflupé sọn osó ji jẹ okọ́ta ji. Yé ko wọn gbọjẹtẹn yetọn. 7 Mẹhe to dindin yé lẹpo ko tlẹ́n yé dù,+ kẹntọ yetọn lẹ ko sọ dọ dọ, ‘Míwlẹ ma hùwhẹ, na yé waylando do Jehovah, yèdọ do nọtẹn dodowiwa tọn yetọn po todido tọgbo yetọn lẹ tọn po, yèdọ Jehovah.’”
8 “Mì họnyi sọn Babilọni,
Mì tọ́n sọn aigba Kaldeanu lẹ tọn ji,+
Podọ mì ni taidi kanlin he nọ to nukọnna apó lẹ.
9 Na yẹn na fọ́n ẹn bo na hẹn ẹn wá sọta Babilọni
Yèdọ pipli akọta daho lẹ tọn sọn aigba agewaji tọn ji.+
Yé na wá sọta ẹ bo na to kannukannu di awhànfuntọ lẹ;
Ewọ nasọ yin wiwle sọn finẹ.
Ogá yetọn lẹ taidi awhànfuntọ de tọn lẹ
Bo nọ hù ovi na mẹjitọ lẹ;+
Yé ma nọ lẹkọ agbá.
10 Kaldeanu lẹ na lẹzun ogblànnu de.+
Mẹhe to ogblànnu bẹ sọn ewọ mẹ lẹpo wẹ na yin pekọhẹnwana,”+ wẹ Jehovah dọ.
11 “Na hiẹ to ayajẹ,+ hiẹ sọ to aglinjẹ
To whenue hiẹ tọ́nawhàn ogú-yigba ṣie titi.+
Na hiẹ tùnafọ e ji taidi oyìn asiwhe de to ogbé mẹ,
Hiẹ sọ dawhá taidi osọ́ asu lẹ.
12 Onọ̀ towe ko yin winyando.+
Mẹhe ji we ko yin hinhẹn jẹflumẹ.
Pọ́n! Ewọ wẹ omẹ pẹvi pete to akọta lẹ mẹ,
Yèdọ aigba húhú de po danfafa de po.+
Obu nasọ jẹ mẹdepope he juwajei gbọn Babilọni ji
Ewọ nasọ kẹ̀hẹli na azọ̀nylankan he wá e ji lẹpo wutu.+
14 Mì to kannukannu di awhànfuntọ lẹ bo wá sọta Babilọni sọn awà lẹpo ji,
Mì ogádetọ lẹpo emi.
15 Mì dawhá awhàn tọn sọta ẹ sọn awà lẹpo ji.
E ko jogbe.*
Mì yiahọsu to ewọ go.
Mì wà hẹ ẹ kẹdẹdile ewọ lọsu ko wà do.+
16 Mì sán nudotọ lọ sẹ̀ sọn Babilọni
Gọna mẹhe nọ yí agbogọdọẹ zan to jibẹwawhé whenu.+
Na ohí didá mlanmlan lọ wutu, mẹdopodopo na lẹkọyi omẹ etọn titi lẹ dè,
Mẹdopodopo na họnyi aigba etọn titi ji.+
17 “Omẹ Islaeli tọn lẹ ko yin lẹngbọ he yè vúnvún pé lẹ.+ Kinnikinni lẹ ko vúnvún yé pé.+ Tintan, ahọlu Asilia tọn tlẹ́n yé dù;+ enẹgodo Ahọlu Nẹbukadnẹzali* Babilọni tọn gbà ohú yetọn lẹ.+ 18 Enẹwutu, nuhe Jehovah awhànpa lẹ tọn, yèdọ Jiwheyẹwhe Islaeli tọn dọ die: ‘Yẹn na sayana ahọlu Babilọni tọn po aigba etọn po to aliho dopolọ he mẹ yẹn sayana ahọlu Asilia tọn te.+ 19 Yẹn nasọ hẹn Islaeli gọwá kanlindugbo etọn lẹ kọ̀n,+ ewọ nasọ dù amà to Kalmẹli po Baṣani po ji,+ podọ to osó Eflaimi+ tọn lẹ po Giliadi+ tọn lẹ po ji, ewọ* na dùnú gọ́ho.’”
20 “To azán enẹlẹ gbè podọ to ojlẹ enẹ mẹ,” wẹ Jehovah dọ,
“Whẹhuhu Islaeli tọn na yin dindin pọ́n,
Ṣigba depope ma na tin,
Podọ ylando Juda tọn lẹ ma na yin mimọ,
Na yẹn na jona mẹhe yẹn pò dai lẹ.”+
21 “Mì hẹji wá sọta aigba Mẹlataimi tọn podọ sọta mẹhe nọ nọ̀ Pekodi lẹ.+
Mì hù yé bo và yé sudo mlẹnmlẹn,”* wẹ Jehovah dọ.
“Mì wà nuhe yẹn ko degbe etọn na mì lẹpo.
22 Nudidọ awhàn tọn tin to aigba lọ ji,
Yèdọ nugbajẹmẹji daho de.
23 Lehe ṣówhènú he nọ gídí akọta aigba ji tọn lẹpo ko yin sinsánliai bo yin winwẹ́n do sọ!+
Lehe Babilọni ko lẹzun nudobu de to akọta lẹ ṣẹnṣẹn do sọ!+
24 Hiẹ Babilọni E, yẹn ko do omọ̀ de na we, hiẹ ko sọ yin wiwle,
Hiẹ masọ yọnẹn.
Hiẹ yin mimọ bo yin wiwle,+
Na Jehovah wẹ a diọnukunsọ.
25 Jehovah ko hùn agbànhọ etọn lẹ,
Ewọ ko sọ de adánwanu homẹgble tọn etọn lẹ tọ́n.+
Na Oklunọ Nupojipetọ Jehovah awhànpa lẹ tọn tindo azọ́n de
To aigba Kaldeanu lẹ tọn ji.
26 Mì wá sọta ẹ sọn fidindẹn lẹ.+
Mì hùn agbànhọ etọn lẹ.+
Mì bẹ ẹ pli taidi jinukun he yin bibẹpli do gọnu-gọnu.
Na mẹdepope ni ma pò to e mẹ blo.
27 Mì hù oyìnsú winyanwinyan etọn lẹpo;+
Mì gbọ yé ni jẹte yì hùhùtẹn.
Dindọn wẹ na mì, na azán yetọn ko wá,
Yèdọ ojlẹ lẹnjo tọn yetọn!
28 Nudidọ mẹhe to hinhọ̀n lẹ tọn de yin sisè,
Yèdọ mẹhe to hinhọngán sọn aigba Babilọni tọn ji lẹ,
Nado lá ahọsuyiyi Jehovah Jiwheyẹwhe mítọn tọn to Ziọni mẹ,
Yèdọ ahọsuyiyi tẹmpli etọn tọn.+
29 Basi oylọna ogádetọ lẹ sọta Babilọni,
Yèdọ mẹhe nọ de ogá lẹpo.+
Mìmẹpo ni dosla lẹdo e; mì dike mẹde họ̀ngán blo.
Mì suahọ ẹ sọgbe hẹ azọ́n etọn.+
Mì wà hẹ ẹ kẹdẹdile ewọ ko wà do.+
Na ewọ ko yí sakla do yinuwa sọta Jehovah,
Yèdọ sọta Omẹ Wiwe Islaeli tọn.+
30 Enẹwutu, dẹpẹ etọn lẹ na jai to tòplitẹn etọn lẹ,+
Awhànfuntọ etọn lẹpo nasọ dọ̀n* to azán enẹ gbè,” wẹ Jehovah dọ.
31 “Pọ́n! Hiẹ saklanọ E,+ yẹn na diọnukunsọ we,”+ wẹ Oklunọ Nupojipetọ Jehovah awhànpa lẹ tọn dọ,
“Na azán towe dona wá, yèdọ ojlẹ he mẹ yẹn na hẹn we nado dogbè te.
32 Saklanọ E, hiẹ na dahli bo na jai,
Mẹdepope ma nasọ tin nado ze we ṣite.+
Yẹn nasọ dozò tòdaho towe lẹ,
E nasọ fiọ nuhe lẹdo we lẹpo.”
33 Nuhe Jehovah awhànpa lẹ tọn dọ die:
“Omẹ Islaeli tọn lẹ po omẹ Juda tọn lẹpo po yin kọgbidina,
Mẹhe wle yé taidi kanlinmọ lẹ ko sọ ṣí yé ji.+
Yé ko gbẹ́ nado tún yé dote.+
34 Ṣigba, Mẹflitọ yetọn dohuhlọn.+
Jehovah awhànpa lẹ tọn wẹ e nọ yin.+
Podọ nado hẹn hunyanhunyan wá na mẹhe nọ nọ̀ Babilọni lẹ.”+
35 “Ohí de tin sọta Kaldeanu lẹ,” wẹ Jehovah dọ,
“Yèdọ sọta mẹhe nọ nọ̀ Babilọni lẹ, sọta ahọvi etọn lẹ podọ sọta nuyọnẹntọ etọn lẹ.+
36 Ohí de tin sọta nùgoyitọ lẹ,* yé nasọ yí nulú do yinuwa.
Ohí de tin sọta awhànfuntọ etọn lẹ, obu nasọ jẹ yé ji.+
37 Ohí de tin sọta osọ́ etọn lẹ po osọ́-kẹkẹ awhàn tọn etọn lẹ po,
Podọ sọta gbẹtọgun flusọ́ he to ṣẹnṣẹn etọn lẹ,
Yé nasọ tin taidi yọnnu lẹ.+
Ohí de tin sọta adọkunnu etọn lẹ, podọ yé na yin bibẹ yì taidi ogblànnu.+
38 Vasudo tin to osin etọn lẹ ji, yé nasọ hú.+
Na aigba boṣiọ pipà tọn de wẹ,+
Podọ na numimọ budonamẹ tọn yetọn lẹ wutu, yé nọ to nuyiwa taidi tadunọ.
39 Enẹwutu, nudida danfafa ji tọn lẹ na nọpọ́ hẹ kanlin he nọ gbó lẹ,
Podọ to ewọ mẹ wẹ ogongo lẹ na nọ nọ̀.+
Mẹde ma nasọ nọ nọ̀ e mẹ gbede ba,
Mọjanwẹ e ma nasọ yin fie yè sọgan nọ de ba sọn whẹndo de ji jẹ whẹndo de ji.”+
40 “Kẹdẹdile Jiwheyẹwhe họ́ Sodọmi, Gomọla+ po tòpẹvi he lẹdo yé lẹ po liai do,”+ wẹ Jehovah dọ, “mẹde ma na nọ nọ̀ finẹ, mẹdepope ma nasọ sawhé do finẹ.+
41 Pọ́n! Akọta de ja sọn agewaji;
Akọta daho de po ahọlu daho lẹ+ po na yin whinwhàn
Sọn awà he dẹn hugan aigba tọn lẹ ji.+
42 Yé nọ yí ogá po owhán po zan.+
Kanylantọ lẹ wẹ yé, yé masọ tindo lẹblanu.+
Nudidọ yetọn taidi ohù he to zingidi ji de tọn,+
Dile yé to osọ́ yetọn lẹ kùn.
Yé na to yede kannukannu di awhànfuntọ lẹ sọta we taidi sunnu dopo, hiẹ viyọnnu Babilọni tọn E.+
E mọ awufiẹsa,
Yèdọ awufiẹsa taidi yọnnu he to ajidònu de tọn.
44 “Pọ́n! Mẹde na hẹji wá sọta kanlindugbo he tin to hihọ́ mẹ lọ lẹ taidi kinnikinni de sọn zungbo etọn he to Jọdani pá lọ mẹ, ṣigba to ojlẹ kleun de godo, yẹn na hẹn yé nado họnyi sọn e dè. Yẹn nasọ de mẹdide lọ do ewọ ji.+ Na mẹnu wẹ tin taidi yẹn, podọ mẹnu wẹ na whlẹnagbà hẹ yẹn? Lẹngbọhọtọ tẹwẹ sọgan ṣite to nukọn ṣie?+ 45 Enẹwutu, mì sunnu lẹ emi, mì sè nudide* he Jehovah ko basi sọta Babilọni,+ podọ nuhe ewọ ko lẹn sọta aigba Kaldeanu lẹ tọn.
E họnwun dọ omẹ pẹvi apó lọ tọn lẹ na yin dindọn yì.
Ewọ na hẹn nọtẹn yetọn jẹvọ́ na yetọn wutu.+
46 Aigba na sisọ to nudidọ wiwle Babilọni tọn tọn whenu,
Avigbè de nasọ yin sisè to akọta lẹ ṣẹnṣẹn.”+
51 Nuhe Jehovah dọ die:
2 Yẹn na do nufútọ́ lẹ hlan Babilọni,
Bọ yé na fú i bo nasọ hẹn aigba etọn jẹvọ́;
Yé na wá sọta ẹ to awà lẹpo ji to azán nugbajẹmẹji tọn gbè.+
3 A dike ogádetọ dlẹn ogá etọn* blo.
A sọ dike mẹde ṣite to gbaja etọn mẹ blo.
A vẹawu jọja sunnu etọn lẹ blo.+
Và awhànpa etọn lẹpo sudo.
4 Podọ yé na yin hùhù to aigba Kaldeanu lẹ tọn ji,
Yè na sọnú yé luntọ́n to tòhomẹ-liho etọn lẹ ji.+
5 Na Islaeli po Juda po ma yin asuṣiọsi Jiwheyẹwhe yetọn, yèdọ Jehovah awhànpa lẹ tọn tọn gba.+
Ṣigba aigba* yetọn gọ́ na whẹhuhu to nukun Omẹ Wiwe Islaeli tọn lọ tọn mẹ.
Mì dọ̀n na nuṣiwa etọn wutu blo.
Na ojlẹ ahọsuyiyi tọn Jehovah tọn wẹ.
Ewọ to ahọsu i na nuhe e ko wà wutu.+
7 Babilọni ko yin kọfo sika tọn de to alọ Jehovah tọn mẹ;
Ewọ hẹn aigba lẹpo nùmú.
8 To ajiji mẹ, Babilọni ko jai bo gbà.+
Mì doavihàn do e ji!+
Mì dín balsami* na awufiẹsa etọn; vlavo ewọ sọgan yin azọ̀nhẹngbọna.”
9 “Mí tẹnpọn nado hẹnazọ̀ngbọna Babilọni, ṣigba ewọ ma sọgan yin azọ̀nhẹngbọna.
Mì jo e do bo gbọ mí ni yì, yèdọ mẹdopodopo yì aigba etọn titi ji.+
Na whẹdida etọn ko yì jẹ olọn;
E ko yì sọ́ aslọ lẹ.+
10 Jehovah ko dawhẹ dodo na mí.+
Mì wá, mì gbọ mí ni dọho azọ́n Jehovah Jiwheyẹwhe mítọn tọn lẹ to Ziọni.”+
11 “Mì gàn ogá lẹ;+ mì ze awọ̀yinu loboto lẹ.*
Jehovah ko whàn ayiha ahọlu Media tọn lẹ tọn,+
Na ewọ jlo na gbà Babilọni kija.
Na ehe wẹ ahọsuyiyi Jehovah tọn, yèdọ ahọsuyiyi na tẹmpli etọn tọn wutu.
12 Mì ze ohia*+ de daga sọta adó Babilọni tọn lẹ.
Mì hẹn nuhọ́tọ lẹ lodo, mì ze nuṣọ́tọ lẹ do otẹn yetọn mẹ.
Mì hẹn mẹhe tọ̀pọwu lẹ nado wleawudai.
Na Jehovah ko wleawuna linlẹn lọ,
Ewọ nasọ hẹn nuhe e ko dopà etọn sọta mẹhe nọ nọ̀ Babilọni lẹ di.”+
13 “Hiẹ yọnnu he nọ nọ̀ osin susu lẹ ji E,+
He tindo adọkunnu susugege lẹ,+
Opodo towe ko wá, yèdọ jlẹka ale he hiẹ nọ mọ lẹ tọn ko gọ́.+
14 Jehovah awhànpa lẹ tọn ko yí edetiti* do whlé,
‘Yẹn na hẹn sunnu lẹ gọ́ hiẹ mẹ susugege taidi owẹ̀n lẹ,
Yé nasọ dawhá awhàngbigba tọn do ji we.’+
15 Ewọ wẹ Mẹhe basi aigba gbọn huhlọn etọn dali,
Mẹhe do aigba he nọ yọ́n na jinukun ai gbọn nuyọnẹn etọn gblamẹ+
Podọ mẹhe dlẹn olọn gbọn nukunnumọjẹnumẹ etọn gblamẹ.+
16 Eyin ogbè etọn yin sisè,
Osin he to olọn mẹ lẹ nọ jẹ zingidi hò ji,
Ewọ sọ nọ hẹn aslọ* lẹ hẹji sọn opodo aigba tọn lẹ.
Ewọ wẹ nọ hẹn abì zẹ̀ to jikun whenu,*
Podọ ewọ wẹ nọ hẹn jẹhọn tọ́njẹgbonu sọn agbànhọ etọn lẹ mẹ.+
17 Mẹlẹpo to nuyiwa matin lẹnpọn dagbe po oyọnẹn po.
18 Yẹdoklọmẹnu,*+ yèdọ aṣagbọ́nu de wẹ yé.
To azán nulẹnjo tọn gbè, yé na dọ̀n.
Jehovah awhànpa lẹ tọn wẹ e nọ yin.”+
20 “Pipli awhàn tọn de wẹ hiẹ yin na mi, yèdọ adánwanu de na awhànfunfun,
Na yẹn na yí we do gbà akọta lẹ hányán.
Yẹn na yí we do gbà ahọluduta lẹ kija.
21 Yẹn na yí we do gbà osọ́ po kùnkùntọ etọn po hányán.
Yẹn na yí we do gbà osọ́-kẹkẹ awhàn tọn po kùnkùntọ etọn po hányán.
22 Yẹn na yí we do gbà sunnu po yọnnu po hányán.
Yẹn na yí we do gbà sunnu mẹhomẹ po visunnu po hányán.
Yẹn na yí we do gbà sunnu po yọnnu jọja po hányán.
23 Yẹn na yí we do gbà lẹngbọhọtọ po lẹngbọpa etọn po hányán.
Yẹn na yí we do gbà glesi po ogbẹ́ kanlin tọn he e nọ yí do pọ̀gle lẹ po hányán.
Yẹn na yí we do gbà ayimatẹn-gán lẹ po ogán nukunpedonugotọ lẹ po hányán.
24 Yẹn nasọ suahọ Babilọni po mẹhe nọ nọ̀ Kaldea lẹ po
Na oylan he yé ko wà to Ziọni to nukun towe lẹ mẹ lẹpo wutu,”+ wẹ Jehovah dọ.
Yẹn na dealọ ṣie tọ́njẹgbonu sọta we bo na bli we wá odò sọn osé lẹ ji
Yẹn nasọ hẹn we zun osó fifiọ de.”
26 “Akọta lẹ ma na ze zannu họ̀gosu tọn de kavi zannu dodonu tọn de sọn hiẹ mẹ,
Na hiẹ na yin gbigbakija kakadoi,”+ wẹ Jehovah dọ.
27 “Mì ze ohia* de daga to aigba lọ ji.+
Mì kún opẹ́n de to akọta lẹ ṣẹnṣẹn.
Mì de akọta lẹ* do e ji.
Mì bẹ ahọluduta Alalati,+ Minni po Aṣkenazi+ tọn po pli sọta ẹ.
Mì deazọ́nna awhàngán azọ́nmẹyimẹdotọ de sọta ẹ.
Mì hẹn osọ́ lẹ hẹji wá taidi owẹ̀n susugege.
28 Mì de akọta lẹ* sọta ẹ,
Ahọlu Media tọn lẹ,+ ayimatẹn-gán etọn lẹ po ogán nukunpedonugotọ etọn lẹpo po
Gọna aigba he ji yé dugán do lẹ.
29 Aigba nasọ sisọ bo húnhún,
Na linlẹn Jehovah tọn lẹ sọta Babilọni na yin hinhẹndi
Yèdọ nado hẹn aigba Babilọni tọn zun nudobu de, fie mẹde ma nọ nọ̀.+
30 Awhànfuntọ Babilọni tọn lẹ ko doalọtena awhànfunfun.
Yé sinai to figángán yetọn lẹ mẹ.
Hlọnhlọn yetọn ko vọ̀.+
Yé ko taidi yọnnu lẹ.+
Yè ko dozò owhé etọn lẹ.
Dòtin etọn lẹ ko yin winwẹ́n.+
31 Wezundotọ de họ̀nwezun yì pé wezundotọ devo,
Wẹnsagun de sọ yì pé wẹnsagun devo,
Nado yì na linlin ahọlu Babilọni tọn dọ tòdaho etọn ko yin yíyí to awà lẹpo ji,+
32 Dọ yè ko gbòali to fie tọ̀sisa lẹ ma siso te,+
Dọ yè ko yí miyọ́n do fiọ tọjihun papilus tọn lẹ,
Podọ dọ ahun awhànfuntọ lọ lẹ tọn ko gbàdo.”
33 Na nuhe Jehovah awhànpa lẹ tọn, yèdọ Jiwheyẹwhe Islaeli tọn dọ die:
“Viyọnnu Babilọni tọn taidi likun-flétẹn de.
Ojlẹ lọ die nado tùn in pete.
To madẹnmẹ, ojlẹ jibẹwawhé tọn na wá na ẹn.”
E ko ze mi dai taidi núzinzan he jẹvọ́ de.
E ko ze mi mì taidi odàn daho de;+
E ko hẹn nudagbe ṣie lẹ gọ́ ohò ede tọn mẹ.
E ko klọ́ mi kọnyinai.
35 ‘Na danú he yin wiwà do mi ni wá Babilọni ji!’ wẹ mẹhe nọ nọ̀ Ziọni dọ.+
‘Podọ gbọ ohùn ṣie ni wá mẹhe nọ nọ̀ Kaldea lẹ ji!’ wẹ Jelusalẹm dọ.”
36 Enẹwutu, nuhe Jehovah dọ die:
Yẹn na hú ohù etọn bo nasọ hẹn dotọ̀ etọn lẹ hú.+
37 Babilọni nasọ lẹzun okiti zannu tọn,+
Yèdọ adọ́ avún gbémẹ tọn lẹ tọn,+
Nudobu de podọ nude he na nọ hẹnmẹ kẹ̀hẹli,
Mẹdepope ma nasọ nọ nọ̀ e mẹ.+
38 Yemẹpo na nọ lì to pọmẹ taidi kinnikinni winyanwinyan lẹ.
Yé na nọ hlún taidi kinnikinni-vu lẹ.”
39 “To whenue apàpà na to sisọ yé, yẹn na wleawuna hùnwhẹ yetọn bo na hẹn yé nado nùmú,
Na yé nido jẹaglin;+
Enẹgodo, yé na damlọn madopodo de,
Ehe mẹ yé ma na fọ́n sọn,”+ wẹ Jehovah dọ.
40 “Yẹn na hẹn yé wá odò taidi lẹngbọ he jei hùhùtẹn lẹ,
Taidi agbò po gbọgbọẹ lẹ po.”
Lehe Babilọni ko lẹzun nudobu de to akọta lẹ ṣẹnṣẹn do!
42 Ohù ko gbaṣinyọ́n Babilọni.
Agbówhẹn susugege etọn lẹ ko ṣinyọ́n e ji.
43 Tòdaho etọn lẹ ko lẹzun nudobu de, yèdọ aigba húhú de podọ danfafa de.
Aigba he ji mẹde ma na nọ bọ mẹde ma nasọ jugbọn.+
44 Yẹn na lẹ́ ayidonugo ṣie hlan Bẹli+ to Babilọni,
Yẹn nasọ de nuhe e ko ze mì lọ tọ́n sọn onù etọn mẹ.+
Akọta lẹ ma nasọ wọ̀ yì e dè ba,
Adó Babilọni tọn nasọ jai.+
45 Mì tọ́n sọn ṣẹnṣẹn etọn, mì omẹ ṣie lẹ emi!+
Mì họ̀ngán+ sọn adi zogbe Jehovah tọn+ nù na ogbẹ̀* mìtọn!
46 Ahun mìtọn gbàdo blo kavi mì dibu, na linlin he na yin sisè to aigba lọ ji wutu blo.
To owhe dopo mẹ, linlin lọ na wá,
Podọ to owhe he bọdego mẹ, linlin devo,
Yèdọ linlin danuwiwa tọn to aigba lọ ji podọ gandutọ de sọta gandutọ devo tọn.
47 Enẹwutu pọ́n! azán lẹ ja
To whenue yẹn na lẹ́ ayidonugo ṣie hlan boṣiọ pipà Babilọni tọn lẹ.
Aigba etọn pete na yin winyando,
Omẹ etọn lẹpo nasọ yin hùhù to ṣẹnṣẹn etọn.+
48 Olọn po aigba po gọna nuhe tin to yé mẹ lẹpo
Na jaya do Babilọni ji,+
Na mẹhusudotọ lẹ na wá e ji sọn agewaji,”+ wẹ Jehovah dọ.
49 “E ma yin omẹ Islaeli tọn lẹ kẹdẹ wẹ Babilọni hù gba+
Ṣigba omẹ aigba lẹpo tọn ko sọ yin hùhù to Babilọni ga.
50 Hiẹ mẹhe họ̀ngán sọn ohí lọ nù, to yìyì, a nọte guun blo!+
Flin Jehovah sọn fidindẹn,
Podọ na Jelusalẹm ni wá ayiha towe mẹ.”+
51 “Mí ko yin winyando, na mí ko sè mẹṣanko lẹ.
Winyan ko hù mí pete,
Na jonọ lẹ ko wá sọta ofi wiwe ohọ̀ Jehovah tọn tọn lẹ.”+
52 “Enẹwutu pọ́n! azán lẹ ja,” wẹ Jehovah dọ,
“Whenue yẹn na lẹ́ ayidonugo ṣie hlan boṣiọ pipà etọn lẹ,
Bọ to aigba etọn lẹpo ji, mẹhe gbleawu lẹ nasọ wẹnhun.”+
53 “Eyin Babilọni tlẹ hẹji yì olọn,+
Eyin ewọ tlẹ hẹn atọ̀họ̀ gángán etọn lẹ lodo,
Mẹvasudotọ etọn lẹ na wá sọn dè e,”+ wẹ Jehovah dọ.
54 “Dotó! Awhágbe de tọ́n sọn Babilọni,+
Yèdọ nudidọ nugbajẹmẹji daho de tọn sọn aigba Kaldeanu lẹ tọn ji,+
55 Na Jehovah wẹ to Babilọni vasudo,
Ewọ na doalọtena ogbè daho etọn,
Agbówhẹn yetọn lẹ na hò zingidi taidi osin susu lẹ.
Ogbè yetọn na yin sisè.
56 Na mẹvasudotọ lọ na wá Babilọni ji;+
Awhànfuntọ etọn lẹ na yin wiwle,+
Ogá yetọn lẹ na yin gbigbà hányán,
Na Jiwheyẹwhe ahọsuyiyi tọn de wẹ Jehovah.+
E họnwun dọ ewọ na yiahọsu.+
57 Yẹn na hẹn ahọvi etọn lẹ po sunnu nuyọnẹntọ etọn lẹ po nùmú,+
Ayimatẹn-gán etọn lẹ po ogán nukunpedonugotọ etọn lẹ po gọna awhànfuntọ etọn lẹ,
Yé nasọ damlọn madopodo de,+
Ehe mẹ yé ma na fọ́n sọn,” wẹ Ahọlu lọ, yèdọ mẹhe nọ yin Jehovah awhànpa lẹ tọn dọ.
58 Nuhe Jehovah awhànpa lẹ tọn dọ die:
“Adó Babilọni tọn, dile e tlẹ gblo sọ, na yin hihọliai pete,+
Yè na dozò họngbo etọn lẹ, dile yé tlẹ yiaga sọ.
Gbẹtọ lẹ na jẹtukla tata;
Akọta lẹ na hẹn agbọ́ pé yede na nake bibẹ do miyọ́n lọ mẹ poun wutu.”+
59 Ehe wẹ ohó he Jelemia yẹwhegán lọ dọ taidi gbedide na Selaia visunnu Nelia+ visunnu Mahseia tọn to whenue ewọ yì Babilọni hẹ Ahọlu Zedekia Juda tọn to owhe ẹnẹtọ gandudu etọn tọn mẹ; Selaia wẹ nukunpedo nutindo ahọlu tọn lẹ go tọ́. 60 Jelemia kàn nugbajẹmẹji he na wá Babilọni ji lẹpo do owe de mẹ, enẹ wẹ ohó ehe lẹpo he yin kinkan sọta Babilọni. 61 Humọ, Jelemia dọna Selaia dọmọ: “Eyin hiẹ jẹ Babilọni bo mọ tòdaho lọ, hiẹ dona yí ogbè lélé do hia ohó ehe lẹpo. 62 Enẹgodo dọ, ‘Jehovah E, hiẹ ko dọ sọta nọtẹn ehe dọ e na yin vivasudo bọ mẹde ma nasọ nọ nọ̀ e mẹ, yèdọ gbẹtọ kavi kanlin, dọ e nasọ yin gbigbakija kakadoi.’+ 63 Podọ eyin hiẹ dotana owe ehe hihia, blá zannu de do e go bo ze e dlan ṣẹnṣẹn Euflate tọn. 64 Enẹgodo dọ, ‘Lehe Babilọni na siọ bo ma nasọ fọ́n gbede ba do niyẹn+ na nugbajẹmẹji he yẹn na hẹnwa e ji wutu; yé na hẹn agbọ́ pé yede.’”+
Ehe wẹ yin tadona ohó Jelemia tọn lẹ tọn.
52 Owhe 21 wẹ Zedekia+ tindo to whenue e duahọlu, e sọ dugán to Jelusalẹm na owhe 11. Oyín onọ̀ etọn tọn wẹ Hamutali+ viyọnnu Jelemia Libna tọn. 2 E sọ zindonukọn nado to nuhe ylan to nukun Jehovah tọn mẹ lẹ wà, sọgbe hẹ nuhe Jehoiakimi ko wà lẹpo.+ 3 Na homẹgble Jehovah tọn wutu wẹ onú ehelẹ do jọ do Jelusalẹm po Juda po go, kaka ewọ do tùn yé dlan sọn nukọn etọn.+ Zedekia sọ ṣiatẹ sọta ahọlu Babilọni tọn.+ 4 To owhe ṣinẹnẹtọ gandudu Zedekia tọn mẹ, to osun aotọ mẹ to azán aotọ gbè, Ahọlu Nẹbukadnẹzali* Babilọni tọn po awhànpa etọn lẹpo po tọ́nawhàn Jelusalẹm. Yé dosla lẹdo e bosọ do adó osla tọn lẹdo e.+ 5 Podọ yè dosla lẹdo tòdaho lọ kakajẹ owhe 11tọ gandudu Ahọlu Zedekia tọn mẹ.
6 To azán ṣinẹnẹtọ gbè to osun ẹnẹtọ mẹ,+ huvẹ sinyẹn taun to tòdaho lọ mẹ, núdùdù depope masọ tin na mẹhe to aigba lọ ji lẹ.+ 7 To godo mẹ, yè gbà adó biọ tòdaho lọ mẹ, awhànfuntọ lọ lẹpo sọ họnyi sọn tòdaho lọ mẹ to zánmẹ gbọn họngbo he to adó awe lẹ ṣẹnṣẹn nù sẹpọ jipa ahọlu tọn, to whenue Kaldeanu lẹ dosla lẹdo tòdaho lọ; yé sọ zindonukọn gbọn aliho Alaba tọn ji.+ 8 Ṣigba, awhànpa Kaldeanu lẹ tọn dómọna ahọlu lọ, yé sọ plá Zedekia+ to danfafa Jẹliko tọn ji, awhànfuntọ etọn lẹpo sọ họ̀n jo e do. 9 Whenẹnu wẹ yé wle ahọlu lọ bo hẹn ẹn hẹji wá ahọlu Babilọni tọn dè to Libla to aigba Hamati tọn ji, ewọ sọ dawhẹna ẹn. 10 Podọ ahọlu Babilọni tọn hù visunnu Zedekia tọn lẹ to nukun etọn mẹ, ewọ sọ hù ahọvi Juda tọn lẹpo to Libla. 11 Whenẹnu wẹ ahọlu Babilọni tọn tọ́nnukunna Zedekia,+ yí gẹdẹ gànvẹẹ tọn lẹ do blá ẹ bo hẹn ẹn yì Babilọni bosọ hẹn ẹn do gànmẹ kakajẹ azán he gbè e kú.
12 To azán aotọ gbè to osun atọ́ntọ mẹ, enẹ wẹ to owhe 19tọ gandudu Ahọlu Nẹbukadnẹzali* he yin ahọlu Babilọni tọn mẹ, Nẹbuzaladani ogán nuhọ́tọ lẹ tọn lọ, yèdọ mẹhe yin devizọnwatọ ahọlu Babilọni tọn de, wá Jelusalẹm.+ 13 Ewọ fiọ ohọ̀ Jehovah tọn,+ owhé* ahọlu tọn po owhé he tin to Jelusalẹm lẹpo po; e sọ fiọ owhé dahodaho lẹpo ga. 14 Awhànpa Kaldeanu lẹ tọn lẹpo he topọ hẹ ogán nuhọ́tọ lẹ tọn lọ sọ họ́ adó he lẹdo Jelusalẹm lẹ.+
15 Nẹbuzaladani ogán nuhọ́tọ lẹ tọn lọ plan delẹ to agbátọnọ he to mẹlọ lẹ mẹ po mẹhe pò to mẹhe yin jijodo tòdaho lọ mẹ lẹ mẹ po yì kanlinmọgbenu. E sọ plan mẹhe ko họnyi ahọlu Babilọni tọn dè lẹ gọna mẹhe pò to anazọ́nwatọ azọ́nyọnẹntọ lẹ mẹ lẹ ga.+ 16 Ṣigba, Nẹbuzaladani ogán nuhọ́tọ lẹ tọn lọ jo mẹhe yin hẹntọnọ klókló delẹ do aigba lọ ji nado nọ pọ̀ vẹngle lẹ bo nọ wazọ́n dandan tọn lẹ.+
17 Kaldeanu lẹ sọ gbà dòtin gànvẹẹ tọn+ he to ohọ̀ Jehovah tọn mẹ lẹ, agbàn-kẹkẹ+ lọ lẹ po Ohù gànvẹẹ tọn+ he to ohọ̀ Jehovah tọn mẹ po do flinflin, yé sọ bẹ gànvẹẹ lọ lẹpo yì Babilọni.+ 18 Podọ yé bẹ panu lọ lẹ, fẹli lọ lẹ, miyọ́n-ṣínu lọ lẹ, agbán lọ lẹ,+ kọfo lọ lẹ+ po nuyizan gànvẹẹ tọn he nọ yin yiyizan na sinsẹ̀nzọn tẹmpli mẹ tọn lọ lẹpo po. 19 Ogán nuhọ́tọ lẹ tọn lọ bẹ basia lọ lẹ,+ miyọ́n-hẹnnú lọ lẹ, agbán lọ lẹ, panu lọ lẹ, miyọ́ngbán-tin lọ lẹ,+ kọfo lọ lẹ gọna agbán he yè yí sika po fataka akú po do basi lọ lẹ.+ 20 Na nuhe dù dòtin awe lọ lẹ, Ohù lọ, oyìnsú gànvẹẹ tọn 12+ he to Ohù lọ glọ lẹ po agbàn-kẹkẹ he Ahọlu Sọlomọni ko basi na ohọ̀ Jehovah tọn lọ lẹ po, gànvẹẹ he yè yizan na nuyizan ehelẹ ma sọgan yin jijlẹ.
21 Na nuhe dù dòtin lọ lẹ, dòtin dopodopo yiji na awagbà* 18, nujlẹkàn awagbà 12 tọn de sọgan lẹdo e;+ titli etọn sọ gbigblo alọvi ẹnẹ topọ tọn,* e sọ tindo odò to homẹ. 22 Podọ gànvẹẹ wẹ yè yí do basi ota he to e ji; podọ jiyiyi ota dopo tọn yin awagbà atọ́n;+ gànvẹẹ wẹ yè sọ yí do basi agbájẹ́ lọ po pomeglanate* he lẹdo ota lọ pete lẹpo po. Dòtin awetọ lọ yin nudopolọ pẹẹ, podọ pomeglanate* lọ lẹ lọsu. 23 Pomeglanate* 96 tin to adà lọ lẹ mẹ; to blebu mẹ, pomeglanate* 100 wẹ lẹdo agbájẹ́ lọ.+
24 Ogán nuhọ́tọ lẹ tọn lọ sọ plan Selaia+ yẹwhenọgán lọ, Zefania+ yẹwhenọ awetọ po họ̀njinọtọ atọ̀n lọ lẹ po.+ 25 E sọ plan ahọluzọnwatọ de he yin anadenanutọ awhànfuntọ lẹ tọn sọn tòdaho lọ mẹ, họntọn vivẹ́ ahọlu tọn ṣinawe he yin mimọ to tòdaho lọ mẹ lẹ, gọna wekantọ awhàngán lọ tọn, yèdọ mẹhe nọ pli mẹhe tin to aigba lọ ji lẹ po sunnu 60 to omẹ paa aigba lọ tọn lẹ he gbẹ́ yin mimọ to tòdaho lọ mẹ lẹ po mẹ. 26 Nẹbuzaladani ogán nuhọ́tọ lẹ tọn lọ plan yé bo hẹn yé wá ahọlu Babilọni tọn dè to Libla. 27 Ahọlu Babilọni tọn linú yé bo hù yé to Libla+ to aigba Hamati tọn ji. Gbọnmọ dali, Juda yì kanlinmọgbenu sọn aigba etọn ji.+
28 Omẹ ehelẹ wẹ Nẹbukadnẹzali* plan yì kanlinmọgbenu: to owhe ṣinawetọ lọ mẹ, yèdọ Ju 3 023.+
29 To owhe 18tọ gandudu Nẹbukadnẹzali* tọn mẹ,+ gbẹtọ* 832 wẹ yin pinplan sọn Jelusalẹm.
30 To owhe 23tọ gandudu Nẹbukadnẹzali* tọn mẹ, Nẹbuzaladani ogán nuhọ́tọ lẹ tọn lọ plan Ju lẹ yì kanlinmọgbenu, yèdọ gbẹtọ* 745.+
To blebu mẹ, gbẹtọ* 4 600 wẹ yin pinplan yì kanlinmọgbenu.
31 Enẹgodo, to owhe 37tọ kanlinmọgbenu-yìyì Ahọlu Jehoiakini+ Juda tọn tọn mẹ, to azán 25tọ gbè to osun 12tọ mẹ, Ahọlu Evili-mẹlodaki Babilọni tọn tún Ahọlu Jehoiakini Juda tọn dote* bo de e tọ́n sọn gànpamẹ, to owhe he mẹ e lẹzun ahọlu te.+ 32 E dọho hẹ ẹ po homẹdagbe po bo ze ofìn etọn yiaga hú ofìn ahọlu he pò topọ hẹ ewọ to Babilọni lẹ tọn. 33 Enẹwutu, Jehoiakini de awù gàntọ tọn etọn lẹ bo nọ dùnú to nukọn etọn egbesọegbesọ to gbẹzan etọn lẹpo mẹ. 34 Núdùdù nọ yin nina ẹn sọn ahọlu Babilọni tọn dè to gbesisọ mẹ, yèdọ egbesọegbesọ to gbẹzan etọn lẹpo mẹ kakajẹ gbeegbe ewọ kú.
Vlavo zẹẹmẹdo “Jehovah Nọ Zedaga.”
Kavi “de.”
To paa mẹ, “do tọ́n sọn adọ̀ mẹ.”
Kavi “ko de we dovo.”
Kavi “jọja.”
To paa mẹ, “atin he to nukle de tọn.”
Kavi “nudàzẹ́n he onù etọn to gblagada.”
To paa mẹ, “de he yè to miyọ́n flọ do oglọ na.”
To paa mẹ, “dona blanú do alinkàn.”
Kavi “ma na pé gowe.”
Kavi “owanyi nugbo.”
Kavi “lopo.”
Kavi “pà,” vlavo do osé mẹ.
Kavi “Mẹmfisi.”
Enẹ wẹ, alà Tọ̀sisa Nile tọn de.
Enẹ wẹ, Euflate.
Kavi “whlẹn, na ojlo zogbe alindọn etọn tọn wutu.”
To paa mẹ, “osun.”
Kavi “yẹwhe jonọ lẹ.”
Kavi “homẹblanu alọwle tọn etọn.”
Kavi “alindọn wamọnọ lẹ tọn.”
To paa mẹ, “Alabianu de.”
To paa mẹ, “Nukọn.”
Kavi “alindọn ede tọn.”
To paa mẹ, “ma na ze nukunmẹ ṣie.”
To paa mẹ, “aliho towe lẹ.”
Kavi “yẹwhe jonọ.”
Kavi vlavo, “asu.”
To paa mẹ, “na awhànpa akọta lẹ tọn.”
To paa mẹ, “hatọ.”
Kavi “yẹwhe winyandomẹ tọn.”
Kavi “opò ohia tọn.”
Kavi “linú akọ́nnu.”
Kavi “adọgbigbo.”
Kavi “adọgbigbo.”
Kavi “ohí ko plá alindọn mítọn.”
Hogbe milomilo de wẹ ehe yin, vlavo nado do lẹblanu kavi awuvẹmẹ hia.
To paa mẹ, “Amẹ́,” enẹ wẹ mẹhe to tòdaho lọ bẹ̀ pọ́n nado yọ́n whenue yè na tọ́nawhàn ẹn lẹ.
To paa mẹ, “adọ̀vi ṣie lẹ.”
To paa mẹ, “to opá ahun ṣie tọn lẹ mẹ.”
Kavi “alindọn ṣie.”
Kavi vlavo, “awhágbe awhàn tọn.”
Kavi “opò ohia tọn.”
Kavi “yọnnuin.”
Kavi “e ma na vẹna mi.”
Kavi “alindọn.”
Kavi “alindọn ṣie.”
To paa mẹ, “agbọ́ ma pé yé.”
To paa mẹ, “okàn.”
Kavi “alindọn ṣie.”
Kavi vlavo, “Ewọ ma tin.”
Enẹ wẹ, Ohó Jiwheyẹwhe tọn.
To paa mẹ, “nulunọ he ma tindo ahun lẹ.”
Kavi “alindọn ṣie.”
To paa mẹ, “Hẹn awhàn zun wiwe.”
Kavi “he wé.”
Kavi “alindọn ṣie.”
To paa mẹ, “Otó yetọn lẹ yin adàmagbonọ.”
To paa mẹ, “mẹhe gọ́ na azán lẹ.”
Kavi “to nukunta.”
Kavi “alindọn mìtọn lẹ.”
Kavi “anademẹ.”
To paa mẹ, “Awufiẹsa ajipanu tọn.”
Enẹ wẹ, Jelemia.
To paa mẹ, “wẹ yé yin,” nado dlẹnalọdo ohọ̀ tẹmpli lọ tọn lẹpo.
Kavi “sọn madopodo jẹ madopodo.”
Kavi “avọ́sinsan mimẹ̀.”
To paa mẹ, “yẹn nọ yawu fọ́n bo nọ to didọ.”
Tẹnmẹ-yinkọ yẹwhe-yọnnu de tọn he Islaelivi atẹṣitọ lẹ nọ sẹ̀n; vlavo yẹwhe-yọnnu vijiji tọn de.
Kavi “to homẹhẹngblena; to adán do nukun na.”
Kavi “ayinamẹ.”
To paa mẹ, “yẹn nọ yawu fọ́n bo nọ do yẹwhegán lẹ hlan mì egbesọegbesọ.”
To paa mẹ, “hẹn okọ̀ yetọn sinyẹn.”
To paa mẹ, “ko yin sinsánsẹ sọn onù yetọn mẹ.”
Kavi “he yin kinklandowiwe to.”
Kavi “ohàn aluẹmẹninọ tọn.”
Pọ́n Zẹm., “Gẹhẹnna.”
Kavi “ma ko biọ linlẹn ṣie lẹ mẹ pọ́n.”
Pọ́n Zẹm., “Gẹhẹnna.”
Kavi “ojlẹ dide lẹ.”
Kavi “zingbejizọnlin.”
Kavi “anademẹ.”
Kavi “to nukunta.”
Kavi “atin-sin he nọ de awufiẹsa pò.” Pọ́n Zẹm.
Kavi “dotozọ́nwatọ.”
Kavi “alindọn ṣie.”
Kavi “ohàn aluẹmẹninọ tọn.”
Kavi “anademẹ.”
Kavi “ohàn aluẹmẹninọ tọn.”
Kavi “ohàn aluẹmẹninọ tọn.”
Kavi “onú ovọ́.”
Kavi “agbogọdọẹ.”
Kavi “Onú ovọ́.”
Wf 11tọ yin kinkan do Alamaikigbe mẹ to dowhenu.
Kavi “azọ̀.”
Kavi vlavo, “nọ de osinwhín na jikun.”
Kavi “boṣiọ tùntùn.”
Kavi “gbọfufu.”
Kavi “Onú ovọ́.”
Kavi “na mi, na fihe wẹ́n to ogo e.”
Jelemia wẹ ehe na ko yin didọna.
Kavi “Amẹn” to Heblugbe mẹ.
To paa mẹ, “nọ yawu fọ́n bo nọ to tudohomẹna yé.”
Kavi “avọ́sinsan mimẹ̀ lẹ basi.”
Kavi “yẹwhe winyandomẹ tọn.”
Enẹ wẹ, Jelemia.
Enẹ wẹ, avọ́sinsan he nọ yin bibasi to tẹmpli mẹ lẹ.
Kavi “numọtolanmẹ sisosiso lẹ.” To paa mẹ, “ayi lẹ.”
Kavi “alindọn.”
Kavi “numọtolanmẹ sisosiso yetọn lẹ.” To paa mẹ, “ayi lẹ.”
Kavi “mẹhe alindọn ṣie yiwanna.”
Kavi “wlanwlan.”
Kavi vlavo, “E to aluẹmẹ.”
To paa mẹ, “agbasalan depope.”
Kavi “Alindọn ṣie.”
Kavi “yin osla do lẹdo.”
Kavi “Etiopianu.”
Kavi “winyandomẹ tọn.”
Kavi “omẹ pẹvi.”
Kavi “osinwhín; dotọ̀.”
Kavi “azọ̀n.”
Kavi “alindọn towe.”
Kavi “alindọn ṣie ma na na ayidonugo.”
Kavi vlavo, “whẹdida wunmẹ ẹnẹ.” To paa mẹ, “whẹndo ẹnẹ.”
Kavi vlavo, “ko sọ to zọnlinzin yigodo.”
Kavi “to linlẹn diọ.”
To paa mẹ, “họngbo.”
Kavi “alindọn etọn.”
Kavi vlavo, “Winyan ko hù i bọ e ko jẹflumẹ.”
To paa mẹ, “A de mi sẹ̀.”
Kavi “owẹ̀n whẹgbledomẹ tọn de.”
Kavi “na lẹzun hoyidọtọ.”
Kavi “na pé gowe.”
Aṣa aluẹmẹninọ tọn kosi lẹ tọn he na ko nọ yin hihodo to akọta Islaeli tọn atẹṣitọ lọ mẹ.
To paa mẹ, “to aliho yetọn lẹpo ji.”
To paa mẹ, “he yin oṣiọ lẹ.”
Pọ́n Zẹm.
Kavi vlavo, “ko flọ adi ṣie.”
Kavi “sunnu glegbenu lọ.”
To paa mẹ, “He yí agbasalan do basi awà etọn.”
Kavi “sunnu glegbenu lọ.”
Kavi “doyẹklọmẹ.”
Kavi vlavo, “bo ma sọgan yin kọgọna.”
Kavi “numọtolanmẹ sisosiso lẹ.” To paa mẹ, “ayi lẹ.”
Kavi “ṣigba bọ e ma yin po whẹdida dodo po.”
To paa mẹ, “sọta mi,” ehe na ko to alọdlẹndo Jehovah.
Kavi “và yé sudo whla awe.”
Kavi “alindọn mìtọn lẹ go.”
To paa mẹ, “yé ko sọ hẹn okọ̀ yetọn sinyẹn ma.”
Kavi “hùwaji.”
To paa mẹ, “dile e sọgbe to nukun zẹ́ndotọ lọ tọn mẹ nado basi do.”
Kavi “nugbajẹmẹji he yẹn lẹn nado hẹnwa e ji lọ na vẹna mi.”
Kavi “dagbe he yẹn lẹn nado wà na ẹn lọ na vẹna mi.”
Kavi “avọ́sinsan mimẹ̀.”
Kavi “he ma yin titẹ́.”
Kavi “anademẹ.”
To paa mẹ, “mí ni yí odẹ́ do linú in.”
Kavi “alindọn.”
To paa mẹ, “otó etọn na suhọ̀n.”
Kavi “ehe ma ko biọ linlẹn ṣie lẹ mẹ pọ́n.”
Kavi “alindọn.”
Kavi “alindọn.”
To paa mẹ, “yé ko hẹn okọ̀ yetọn sinyẹn ma nado.”
Kavi “numọtolanmẹ sisosiso lẹ.” To paa mẹ, “ayi lẹ.”
Kavi “alindọn wamọnọ tọn.”
To paa mẹ, “Nẹbukadlẹzali,” wunmẹ yinkọ lọ tọn devo.
Kavi “sọta mì.”
Kavi “azọ̀n.”
To paa mẹ, “Nẹbukadlẹzali,” wunmẹ yinkọ lọ tọn devo.
Kavi “alindọn.”
Kavi “alindọn.”
Kavi “nasọ họ̀ngán po ogbẹ̀ ede tọn po.”
Kavi “họ̀nmẹ.”
To paa mẹ, “klan mẹhusudotọ lẹ do wiwe.”
Sọ nọ yin yiylọdọ Jehoahazi.
Sọ nọ yin yiylọdọ Jehoiakini po Jẹkonia po.
Kavi “alindọn.”
To paa mẹ, “Nẹbukadlẹzali,” wunmẹ yinkọ lọ tọn devo.
Kavi “aigba he yé ze alindọn yetọn daga hlan.”
Kavi “Otò.”
To paa mẹ, “azán etọn lẹ mẹ.”
Kavi “ze gudutọ dodonọ de daga.”
Kavi “atẹṣitọ.”
To paa mẹ, “nọ hẹn alọ lẹ lodo na.”
Kavi “Yé nọ hẹn mì tindo todido ovọ́ lẹ.”
Kavi “owẹ̀n he pẹnagbànmẹ.” Hogbe Heblugbe tọn lọ tindo zẹẹmẹ awe: “owẹ̀n Jiwheyẹwhe tọn he pẹnagbànmẹ” kavi “nude he pẹnagbànmẹ.”
Kavi “owẹ̀n he pẹnagbànmẹ.”
Kavi “owẹ̀n he pẹnagbànmẹ.”
Kavi “owẹ̀n he pẹnagbànmẹ.”
Kavi “Owẹ̀n he pẹnagbànmẹ.”
Kavi “owẹ̀n he pẹnagbànmẹ.”
Kavi “Owẹ̀n he pẹnagbànmẹ.”
To paa mẹ, “Nẹbukadlẹzali,” wunmẹ yinkọ lọ tọn devo.
Sọ nọ yin yiylọdọ Jehoiakini po Konia po.
Kavi vlavo, “mẹhe nọ gbá figángán.”
Kavi “azọ̀n.”
To paa mẹ, “Nẹbukadlẹzali,” wunmẹ yinkọ lọ tọn devo.
Kavi “hlan.”
To paa mẹ, “yẹn nọ yawu fọ́n bo nọ to didọ.”
To paa mẹ, “nọ yawu fọ́n bo nọ do yé hlan.”
To paa mẹ, “Nẹbukadlẹzali,” wunmẹ yinkọ lọ tọn devo.
Kavi “yẹn na sayana ahọlu Babilọni tọn po akọta enẹ po na nuṣiwa yetọn.”
E taidi dọ yinkọ aṣli tọn Babẹli (Babilọni) tọn de wẹ ehe yin.
To paa mẹ, “agbasalan lẹpo.”
Kavi “hlan.”
Kavi “dẹ́ do odò.”
Kavi “nugbajẹmẹji he yẹn lẹn nado hẹnwa yé ji, na nuylankan he wà yé te lẹ wutu na vẹna mi.”
Kavi “anademẹ.”
To paa mẹ, “yẹn nọ yawu fọ́n bo nọ dohlan mì lẹ.”
Kavi “họ̀nmẹ.”
Kavi “nugbajẹmẹji he Jehovah ko dọ emi na hẹnwa mì ji lọ nasọ vẹna ẹn.”
Kavi “Osó tẹmpli tọn.”
Kavi “taidi okọ́ta he gọ́ na atin.”
Kavi “bo tẹnpọn nado hẹn nukunmẹ Jehovah tọn bọ̀.”
Kavi “sọmọ bọ nugbajẹmẹji he Jehovah ko dọ emi na hẹnwa yé ji lọ do vẹna ẹn.”
Kavi “alindọn mítọn lẹ.”
To paa mẹ, “na mẹhe jẹ to nukun ṣie mẹ.”
Kavi “azọ̀n.”
To paa mẹ, “gbọjẹ to.”
Kavi “họ̀nmẹ.”
Enẹ wẹ, Ohù gànvẹẹ tọn tẹmpli lọ tọn.
Kavi “họ̀nmẹ.”
To paa mẹ, “owhe azán lẹ tọn.”
Kavi “Amẹn” to Heblugbe mẹ.
Kavi vlavo, “mẹhe nọ gbá figángán.”
Kavi vlavo, “he ko là.”
To paa mẹ, “yẹn nọ yawu fọ́n bo nọ dohlan lẹ.”
To paa mẹ, “Nẹbukadlẹzali,” wunmẹ yinkọ lọ tọn devo.
Kavi “alinkàn.”
To paa mẹ, “daho.”
To paa mẹ, “okàn.”
Kavi “yé.”
Kavi “na wọhẹ we.”
Kavi vlavo, “mẹhe yin gbégbòna.”
To paa mẹ, “na yí ahun etọn do súafà.”
Kavi “ko zindonukọn nado to owanyi nugbo dohia we.”
Kavi “wedu hẹ mẹhe to nuko lẹ.”
Kavi “agbàdo tọ̀sisa tọn.” Pọ́n Zẹm.
Kavi “hò e yí.”
Kavi “na onú dagbe lẹ sọn.”
Kavi “Alindọn yetọn.”
To paa mẹ, “onú dojó.”
Kavi “na alindọn yẹwhenọ lẹ tọn.”
Kavi “ovi.”
To paa mẹ, “wẹ adọ̀vi ṣie lẹ do wlu na etọn wutu.”
Kavi “alindọn he.”
Kavi “alindọn he.”
Kavi “kúnkan.”
To paa mẹ, “bọ adú visunnu lẹ tọn masọ dá ba.”
Kavi vlavo, “asu.”
Kavi “osẹ́ndoai.”
Kavi “afín he gọ́ na ojó,” enẹ wẹ, afín he ojó avọ́sinsan lẹ tọn ko hẹn yọ̀n.
To paa mẹ, “Nẹbukadlẹzali,” wunmẹ yinkọ lọ tọn devo.
Kavi “họ̀nmẹ.”
Ṣekẹli dopo sọzẹn hẹ g 11,4. Pọ́n Nud. B14.
To paa mẹ, “to akọ́nnu.”
Kavi “Hiẹ jiawu na nuhe dù lẹndai towe lẹ.”
To paa mẹ, “agbasalan.”
To paa mẹ, “Nẹbukadlẹzali,” wunmẹ yinkọ lọ tọn devo.
To paa mẹ, “yẹn nọ yawu fọ́n bo nọ to mẹplọn.”
Pọ́n Zẹm., “Gẹhẹnna.”
Kavi “e ma ko biọ linlẹn.”
Pọ́n Zẹm.
Kavi “onú dagbe.”
Kavi “ze gudutọ dodonọ de daga.”
To paa mẹ, “okún.”
Kavi “osẹ́ndoai.”
To paa mẹ, “okún.”
To paa mẹ, “okún.”
To paa mẹ, “okún.”
To paa mẹ, “Nẹbukadlẹzali,” wunmẹ yinkọ lọ tọn devo.
To paa mẹ, “to egbehe.”
Kavi “alindọn.”
Kavi “alindọn.”
Kavi “alindọn.”
To paa mẹ, “Jonadabi,” sándogli yinkọ Jehonadabi tọn.
To paa mẹ, “Jonadabi,” sándogli yinkọ Jehonadabi tọn.
To paa mẹ, “Nẹbukadlẹzali,” wunmẹ yinkọ lọ tọn devo.
To paa mẹ, “yẹn nọ yawu fọ́n bo nọ to didọna mì.”
To paa mẹ, “yẹn nọ yawu fọ́n bo nọ do yé hlan mì.”
To paa mẹ, “Jonadabi,” sándogli yinkọ Jehonadabi tọn.
Kavi “abò núdùdù tọn.”
Kavi “họ̀nmẹ.”
Kavi “Ahọluzọnwatọ họ̀nmẹ tọn.”
Azán fọtọ̀n godo tọn osun novembre tọn lẹ po azán fọtọ̀n tintan osun décembre tọn lẹ po. Pọ́n Nud. B15.
To paa mẹ, “okún.”
Sọ nọ yin yiylọdọ Jehoiakini po Jẹkonia po.
To paa mẹ, “Nẹbukadlẹzali,” wunmẹ yinkọ lọ tọn devo.
Kavi “alindọn mìtọn.”
To paa mẹ, “ohọ̀ he mẹ gẹdẹ lẹ tin te.”
To paa mẹ, “ohọ̀ osindò tọn mẹ.”
Kavi “họ̀nmẹ.”
To paa mẹ, “tọ́nyi.”
Kavi “alindọn.”
To paa mẹ, “alọ awhànfuntọ.”
Kavi “ahọluzọnwatọ họ̀nmẹ tọn.”
Kavi “họ̀nmẹ.”
Kavi “họ̀nmẹ.”
Kavi “họ̀nmẹ.”
Kavi “basi alindọn ehe na mí.”
Kavi “alindọn.”
To paa mẹ, “tọ́nyi.”
Kavi “alindọn towe na gbọṣi ogbẹ̀.”
To paa mẹ, “ma tọ́nyi.”
Kavi “alindọn towe.”
To paa mẹ, “tọ́nyi.”
Kavi “họ̀nmẹ.”
To paa mẹ, “Sunnu he to jijọho mẹ hẹ we.”
To paa mẹ, “Nẹbukadlẹzali,” wunmẹ yinkọ lọ tọn devo.
Kavi sọgbe hẹ mimá hogbe Heblugbe tọn devo, “Nẹlgali-ṣalezeli, Samgali-nebo, Salsekimi, Labsalisi.”
Kavi “ogán nujlẹtọ (sunwhlẹvu-pọntọ) lẹ tọn.”
To paa mẹ, “Nẹbukadlẹzali,” wunmẹ yinkọ lọ tọn devo.
Kavi “họ̀nmẹ.”
Kavi vlavo, “na yé azọ́n dandan tọn lẹ.”
To paa mẹ, “Nẹbukadlẹzali,” wunmẹ yinkọ lọ tọn devo.
Kavi “ahọluzọnwatọ-gán họ̀nmẹ tọn lọ.”
Kavi “ogán nujlẹtọ (sunwhlẹvu-pọntọ) lẹ tọn.”
Kavi “Alindọn.”
To paa mẹ, “nado ṣite.”
Kavi “nado linú alindọn towe wẹ ya?”
Kavi “nado linú alindọn towe.”
To paa mẹ, “okún ahọluduta lọ tọn.”
Kavi vlavo, “osindò daho.”
Kavi “yẹn na biọ aluẹmẹ.”
Kavi “nọ finẹ na ojlẹ de.”
Kavi “alindọn.”
Kavi “alindọn he.”
To paa mẹ, “Nẹbukadlẹzali,” wunmẹ yinkọ lọ tọn devo.
Kavi “tẹmpli.”
Kavi “matin awugble.”
Kavi “Ohọ̀ (Tẹmpli) Owhè tọn,” enẹ wẹ Heliopolisi.
Kavi “tẹmpli.”
Kavi “Mẹmfisi.”
To paa mẹ, “yẹn nọ yawu fọ́n bo nọ do yé hlan.”
Kavi “alindọn mìtọn lẹ.”
Kavi “ma blawu.”
Kavi “na ze alindọn yetọn daga.”
Tẹnmẹ-yinkọ yẹwhe-yọnnu de tọn he Islaelivi atẹṣitọ lẹ nọ sẹ̀n; vlavo yẹwhe-yọnnu vijiji tọn de.
Tẹnmẹ-yinkọ yẹwhe-yọnnu de tọn he Islaelivi atẹṣitọ lẹ nọ sẹ̀n; vlavo yẹwhe-yọnnu vijiji tọn de.
Tẹnmẹ-yinkọ yẹwhe-yọnnu de tọn he Islaelivi atẹṣitọ lẹ nọ sẹ̀n; vlavo yẹwhe-yọnnu vijiji tọn de.
Tẹnmẹ-yinkọ yẹwhe-yọnnu de tọn he Islaelivi atẹṣitọ lẹ nọ sẹ̀n; vlavo yẹwhe-yọnnu vijiji tọn de.
Kavi “alindọn.”
To paa mẹ, “Nẹbukadlẹzali,” wunmẹ yinkọ lọ tọn devo.
Kavi “alindọn.”
Kavi “to nukundo onú daho lẹ.”
Kavi “gbẹtọ.”
Kavi “alindọn.”
To paa mẹ, “Nẹbukadlẹzali,” wunmẹ yinkọ lọ tọn devo.
Awọ̀yinu pẹvi he ogádetọ lẹ nọ saba hẹn.
Kavi “mẹhuhu.”
Pọ́n Zẹm.
To paa mẹ, “Nẹbukadlẹzali,” wunmẹ yinkọ lọ tọn devo.
Kavi “Mẹmfisi.”
To paa mẹ, “ojlẹ sisọ.”
Enẹ wẹ, Mẹhe na gbawhàn Egipti tọn.
Kavi “Mẹmfisi.”
Kavi vlavo, “na hẹn ẹn zun aigba gbọgbé de.”
Kavi “to nake bẹpli lẹ.”
Enẹ wẹ, Tebẹsi.
Kavi “alindọn.”
To paa mẹ, “Nẹbukadlẹzali,” wunmẹ yinkọ lọ tọn devo.
To paa mẹ, “okún.”
Kavi “wọhẹ we.”
Enẹ wẹ, Klete.
Enẹ wẹ, yé na whlẹ́ ota yetọn, na aluẹmẹninọ po winyan po wutu.
Kavi “Ofi yiaga hihọ́ tọn.”
Kavi “alindọn.”
Kavi vlavo, “sinai do aigba húhú ji.”
To paa mẹ, “Azò.”
Kavi “na nọ hò.”
Enẹ wẹ, ován de he nọ yin kúnkún to whenue yè to ohàn aluẹmẹ tọn ji to ṣiọhumẹ.
Kavi “na nọ hò.”
Enẹ wẹ, ován de he nọ yin kúnkún to whenue yè to ohàn aluẹmẹ tọn ji to ṣiọhumẹ.
Kavi vlavo, “awhágbe awhàn tọn.”
Kavi “he lẹdo e pé.”
Kavi “apó lẹngbọ tọn lẹ.”
Kavi “ayinamẹ.”
To paa mẹ, “Nẹbukadlẹzali,” wunmẹ yinkọ lọ tọn devo.
To paa mẹ, “Nẹbukadlẹzali,” wunmẹ yinkọ lọ tọn devo.
To paa mẹ, “bẹjẹeji.”
Kavi “alindọn.”
Kavi “opò ohia tọn.”
Hogbe Heblugbe tọn lọ sọgan tindo kanṣiṣa hẹ hogbe he nọ dlẹnalọdo “omí” podọ e nọ yin yiyizan taidi hogbe vlẹko tọn.
To paa mẹ, “ko ze alọ etọn jo.”
To paa mẹ, “Nẹbukadlẹzali,” wunmẹ yinkọ lọ tọn devo.
Kavi “alindọn etọn.”
Kavi “bo de yé dovo na vasudo.”
Kavi “Mì de e dovo na vasudo.”
To paa mẹ, “nasọ yin nùbọdo na.”
Kavi “yẹwhegán lalo lẹ.”
Kavi “ayinamẹ.”
E taidi dọ yinkọ aṣli tọn Kaldea tọn de wẹ ehe yin.
To paa mẹ, “tùnafọ ogá etọn ji.”
Enẹ wẹ, aigba Kaldeanu lẹ tọn.
Kavi “alindọn.”
Pọ́n Zẹm.
Kavi vlavo, “mì hẹn ogába-hẹnnu lẹ gọ́.”
Kavi “opò ohia tọn.”
Kavi “alindọn ede tọn.”
Kavi “azọ̀.”
Kavi vlavo, “nọ de osinwhín na jikun.”
Kavi “boṣiọ tùntùn.”
Kavi “gbọfufu.”
Kavi “Onú ovọ́.”
Kavi “opò ohia tọn.”
To paa mẹ, “Mì klan akọta lẹ do wiwe.”
To paa mẹ, “Mì klan akọta lẹ do wiwe.”
To paa mẹ, “Nẹbukadlẹzali,” wunmẹ yinkọ lọ tọn devo.
E taidi dọ yinkọ aṣli tọn Babẹli (Babilọni) tọn de wẹ ehe yin.
Kavi “alindọn.”
To paa mẹ, “Nẹbukadlẹzali,” wunmẹ yinkọ lọ tọn devo.
To paa mẹ, “Nẹbukadlẹzali,” wunmẹ yinkọ lọ tọn devo.
Kavi “họ̀nmẹ.”
Awagbà dopo sọzẹn hẹ cm 44,5. Pọ́n Nud. B14.
Gbigblo alọvi dopo tọn sọzẹn hẹ cm 1,85. Pọ́n Nud. B14.
Atin-sinsẹ́n de he nọ tindo sinmẹ taidi vẹẹ bo nọ di pọmu. Pọ́n Zẹm.
Atin-sinsẹ́n de he nọ tindo sinmẹ taidi vẹẹ bo nọ di pọmu. Pọ́n Zẹm.
Atin-sinsẹ́n de he nọ tindo sinmẹ taidi vẹẹ bo nọ di pọmu. Pọ́n Zẹm.
Atin-sinsẹ́n de he nọ tindo sinmẹ taidi vẹẹ bo nọ di pọmu. Pọ́n Zẹm.
To paa mẹ, “Nẹbukadlẹzali,” wunmẹ yinkọ lọ tọn devo.
To paa mẹ, “Nẹbukadlẹzali,” wunmẹ yinkọ lọ tọn devo.
Kavi “alindọn.”
To paa mẹ, “Nẹbukadlẹzali,” wunmẹ yinkọ lọ tọn devo.
Kavi “alindọn.”
Kavi “alindọn.”
To paa mẹ, “ze ota Ahọlu Jehoiakini Juda tọn daga.”