Whlẹngán sọn Egipti jẹ Ahọlu Tintan Islaeli Tọn Whenu

Mose plan Islaelivi lẹ sọn kanlinmọgbenu Egipti tọn yì Osó Sinai kọ̀n, fie Jiwheyẹwhe na yé osẹ́n etọn lẹ te. To nukọn mẹ, Mose do sunnu 12 hlan nado yì bẹ̀ aigba Kenani tọn pọ́n. Ṣigba 10 to yé mẹ lẹkọwa po linlin ylankan po. Yé gbọnmọ dali hẹn Islaelivi lẹ tindo ojlo nado lẹkọyi Egipti. Na yise matindo yetọn wutu, Jiwheyẹwhe domẹplọnlọ Islaelivi lẹ go gbọn hinhẹn yé dánpe to zungbo mẹ na owhe 40 dali.

To godo mẹ, Jọṣua yin dide nado plan Islaelivi lẹ yì aigba Kenani tọn ji. Jehovah wà azọ́njiawu susu nado gọalọna yé nado yí aigba lọ. E hẹn Tọ̀sisa Jọdani doalọte, họ́ adó Jẹliko tọn lẹ, bosọ hẹn owhè nado nọte guun na azán dopo blebu. To owhe ṣidopo godo, yé yí aigba lọ sọn Kenaninu lẹ si.

Bẹsọn Jọṣua ji, whẹdatọ lẹ dugán do Islaeli ji na owhe 356. Mí na plọnnu gando susu yetọn go taidi Balaki, Gideoni, Jẹfta, Samsọni po Samuẹli po. Mí na plọnnu gando yọnnu delẹ go taidi Lahabi, Debola, Jaeli, Luti, Naomi po Dẹlila po. To lẹndopọ mẹ, nujijọ he otàn Adà ATỌ̀NTỌ tọn bẹhẹn lẹ wá aimẹ to owhe 396 gblamẹ.