Weta 8

Hinhọngán sọn Kanylantọ de Si

JOSẸFU fọ́n Malia nado na ẹn linlin niyaniya tọn lẹ. Angẹli Jehovah tọn ṣẹṣẹ sọawuhia ẹ, bo to didọmọ: “Fọ́n bo ze ovi lọ po onọ̀ etọn po, bo họnyi Egipti, na hiẹ ni sọ nọ̀ finẹ kaka yẹn na do dọhó hlan we, na Hẹlodi na din ovi lọ nado hù i súdo.”

To niyaniya mẹ, yé omẹ atọ̀n lẹ họngán. Podọ ehe wá do ganmẹ na Hẹlodi ko yọnẹn dọ sunwhlẹvuplọntọ lọ lẹ ko klọ ẹ bo ko tọ́n sọn otò lọ mẹ. Flindọ, yé yin nukundo nado wá dogbè na ẹn to whenuena yé mọ Jesu. Adi Hẹlodi tọn jizò. Enẹwutu to vivẹnudido mẹ nado hù Jesu, e degbe dọ visunnu Bẹtlẹhẹm po agbegbe etọn mẹ tọn lẹpo he tindo owhe awe kavi he whè humọ ni yin hùhù. E ze nulinlẹn owhe tọn ehe sinai do nudọnamẹ he e ko mọyi dai sọn sunwhlẹvuplọntọ he wá sọn Whèzẹtẹn lẹ dè ji.

Viyẹyẹ sunnu lẹpo hùhù yin onú dobunamẹ de nado mọ! Awhànfuntọ Hẹlodi tọn lẹ gbà biọ owhé de gbè jẹ devo gbè. Podọ to whenuena yé mọ viyẹyẹ sunnu de, yé nọ hò e yí sọn awà onọ̀ etọn tọn mẹ. Mí ma yọ́n ovivu nẹmu he yé hù gba, ṣigba dasìn plẹ̀plẹ̀ po avi awubla ovinọ lẹ tọn po hẹn dọdai de di to Biblu mẹ gbọn yẹwhegan Jiwheyẹwhe tọn Jẹlemia dali.

To ojlẹ lọ mẹ, Josẹfu po whẹndo etọn po ko zin gbejizọnlin yì Egipti to jijọho mẹ, podọ finẹ wẹ yé nọ nọ̀ todin. Ṣigba to zanmẹ gbedopo angẹli Jehovah tọn sọ sọawuhia Josẹfu to odlọ mẹ. Angẹli lọ dọmọ: “Fọ́n, bo yí ovi lọ po onọ̀ etọn po, bo yì aigba Islaeli tọn ji: na yé mẹhe to ogbẹ̀ ovi lọ tọn din ko kú.” Enẹwutu to hẹndi dọdai Biblu tọn devo mẹ he dọ dọ Visunnu Jiwheyẹwhe tọn na yin yiylọ sọn Egipti jẹgbonu wá, whẹndo lọ lẹkọyi otò yetọn mẹ.

E họnwun dọ Josẹfu jlo nado gbọṣi Judé, fie yé tin te to tòdaho Bẹtlẹhẹm tọn mẹ whẹpo yé do họnyi Egipti. Ṣigba e sè dọ visunnu kanylantọ Hẹlodi tọn he nọ yin Alkẹlausi wẹ yin ahọlu Judé tọn todin, podọ to odlọ devo mẹ e yin avase na gando owù lọ go gbọn Jehovah dali. Enẹwutu Josẹfu po whẹndo etọn po zin gbejizọnlin yì agewaji bo gbọṣi tòdaho Nazalẹti tọn mẹ to Galili. Tofi to otò ehe mẹ, to olá na ahọ́nkan gbẹzan sinsẹ̀nnọ Ju lẹ tọn mẹ, wẹ Jesu whẹ́n te. Matiu 2:13-23; Jẹlemia 31:15; Hosea 11:1.

▪ To whenuena sunwhlẹvuplọntọ lọ lẹ ma lẹkọ, onú dobunamẹ tẹwẹ Ahọlu Hẹlodi wà, ṣigba nawẹ Jesu yin hihọ́-basina gbọn?

▪ To kọlilẹ sọn Egipti godo, naegbọn Josẹfu ma nọ Bẹtlẹhẹm bà?

▪ Dọdai Biblu tọn tẹlẹ wẹ yin hinhẹndi to gblagbla ojlẹ ehe tọn mẹ?