Weta 38

Be Johanu Ma Tindo Yise Wẹ Ya?

JOHANU Baptizitọ, he ko tin to ganpamẹ na nudi owhe dopo nkọtọn todin, sè linlin lọ dogbọn fọnsọnku visunnu asuṣiọsi Naini tọn lọ dali. Ṣigba Johanu jlo na yọ́n nuhe onú ehe zẹẹmẹdo sọn Jesu dè tlọlọ, enẹwutu e do awe to devi etọn lẹ mẹ hlan nado kanse dọmọ: “Be hiẹ wẹ mẹhe ja. Kavi mí ni to nukundo mẹdevo?”

Enẹ sọgan taidi kanbiọ he bajonọmẹ de, titengbe to whenuena e yindọ Johanu mọ gbigbọ Jiwheyẹwhe tọn jẹte do Jesu ji bosọ sè ogbè alọkẹyi Jiwheyẹwhe tọn to whenuena e to bibaptizi Jesu to nudi owhe awe die jẹnukọn. Kanbiọ Johanu tọn sọgan hẹn mẹdelẹ nado wá tadona lọ kọ̀n dọ yise etọn ko gbọjọ. Ṣigba ehe mayin mọ gba. Eyin Johanu ko jẹ ayihaawe tindo ji wẹ, Jesu ma na ko dọ dagbe etọn sọmọ, ehe e basi to nujijọ ehe whenu. To whelọnu lo, naegbọn Johanu kàn kanbiọ ehe sè?

Johanu sọgan ko jlo mẹhẹn-deji de sọn Jesu dè poun dọ Ewọ wẹ yin Mẹssia lọ. Ehe na hẹn Johanu lodo taun dile e yindọ ewọ to awufiẹsa mẹ to ganpamẹ. Ṣigba e họnwun dọ kanbiọ Johanu tọn bẹ nususu hẹn hugan enẹ. Kunnudenu dohia dọ e jlo na yọnẹn eyin mẹdevo de nasọ wá, yèdọ mẹjẹmẹtẹnmẹ de, dile e sọgan yin didọ do, he na dotana hẹndi onú lẹpo tọn heyin didọdai nado yin wiwadotana gbọn Mẹssia lọ dali lẹ.

Sọgbe hẹ dọdai Biblu tọn he Johanu jẹakọ hẹ lẹ, Mẹyiamisisadode Jiwheyẹwhe tọn lọ na yin ahọlu de, yèdọ mẹwhlẹngantọ de. Etomọṣo, Johanu gbẹsọ yin hinhẹn taidi gantọ de, yèdọ osun susu lẹ jẹgodona baptẹm Jesu tọn. Enẹwutu kunnudenu dohia dọ Johanu to kinkanse Jesu dọ: ‘Be hiẹ wẹ yin omẹ lọ he na ze Ahọluduta Jiwheyẹwhe tọn dai to huhlọn gbonu tọn mẹ nugbonugbo ya, kavi be mẹdevo de sọ tin wẹ, yèdọ mẹjẹmẹtẹnmẹ de, ehe mí dona nọte pọ́n nado hẹn dọdai jiawu lẹpo gando gigo Mẹssia tọn lẹ go di wẹ?’

Kakati nado dọna devi Johanu tọn lẹ dọ, ‘Yẹn wẹ yin omẹ lọ he ja na nugbo tọn!’ To ganhiho enẹ pẹpẹ mẹ Jesu basi wadohia onú ayidego tọn de gbọn mẹsusu hinhẹn jẹgangan dali, bo hẹnazọngbọna wunmẹ awutuzọ̀n po madogán yetọn tọn lẹpo po. Enẹgodo e dọna devi lọ lẹ dọmọ: “Mì yì, bo dọho onú he mì mọ, po ehe mì sè po tọn hlan Johanu; nukuntọ́nnọ lẹ to numọ, sẹkunọ lẹ to zọnlinzin, yè hẹn pòtọnọ lẹ zun wiwe, tókunọ lẹ to núsè, yè to oṣiọ lẹ fọ́n do ogbẹ̀, podọ hlan wamọnọ lẹ wẹ yè to wẹndagbe yẹwheho tọn dọ.”

To hogbe devo mẹ, kanbiọ Johanu tọn sọgan zẹẹmẹdo nukundido de dọ Jesu na wà nususu hugan dehe e to wiwà podọ vlavo na hẹn Johanu lọsu jẹ mẹdekannu. Ṣigba, Jesu to didọna Johanu ma nado donukun hugan azọ́njiawu he Jesu to wiwà lẹ gba.

To whenuena devi Johanu tọn lẹ ko yì, Jesu lẹhlan gbẹtọgun lẹ bo dọna yé dọ Johanu wẹ yin “wẹnsagun” Jehovah tọn heyin dọdai dọ gandego to Malaki 3:1 mẹ podọ ewọ wẹ sọ yin yẹwhegán Elija heyin dọdai dọ gandego to Malaki 4:5, 6 mẹ. Gbọnmọ dali ewọ ze Johanu daga nado sọzẹn hẹ yẹwhegán depope he ko nọgbẹ̀ jẹnukọnna ẹn lẹ, bo basi zẹẹmẹ dọmọ: “Nugbo yẹn dọ hlan mì, To yé he yè ji sọn yọnnu mẹ lẹ mẹ, mẹde ma fọ́n he klohu Johanu Baptizi: ṣigba mẹhe whè gbahu to ahọludu olọn tọn mẹ klo hú i. Sọn Johanu Baptizi whenu kakajẹ dinvie, [ahọludu olọn tọn wẹ yin yanwle gbẹtọ lẹ tọn, NW ].”

Tofi Jesu to didohia dọ Johanu ma na tin to Ahọluduta olọn tọn mẹ gba, na mẹhe whè hugan to finẹ klo hugan Johanu. Johanu wleawu aliho lọ tọn dai na Jesu ṣigba kú whẹpo Klisti do tlẹ́ alẹnu, kavi gbekọndopọ lọ, hẹ devi etọn lẹ, na yewlẹ nado yin ganduhẹmẹtọ hẹ ewọ to Ahọluduta etọn mẹ. Enẹwutu wẹ Jesu dọ dọ Johanu ma na tin to Ahọluduta olọn tọn mẹ gba. Kakatimọ Johanu na yin mẹjidugando aigba ji Ahọluduta Jiwheyẹwhe tọn tọn. Luku 7:18-30; Matiu 11:2-15.

▪ Naegbọn Johanu kanse eyin Jesu wẹ Omẹ he Ja lọ kavi vlavo eyin mẹdevo de dona yin nukundo?

▪ Dọdai tẹlẹ wẹ Jesu dọ dọ Johanu hẹndi?

▪ Naegbọn Johanu Baptizitọ ma na tin to olọn mẹ hẹ Jesu?