A Lẹzun Ajotọ Gbede Blo!

BE MẸDE ko fìn onú towe de pọ́n ya?⁠— Etẹwẹ yin numọtolanmẹ towe?⁠— Ajotọ wẹ mẹhe fìn nulọ yin, podọ mẹdepope ma nọ yiwanna ajotọ gba. Be a yọ́n lehe mẹde nọ lẹzun ajotọ gbọn ya? Be a lẹndọ mẹde nọ yin jiji di ajotọ wẹ ya?⁠—

Mí ṣẹṣẹ plọn wayi dọ gbẹtọ nọ yin jiji po ylando po. Enẹwutu mímẹpo wẹ yin mapenọ. Ṣigba mẹdepope ma nọ yin jiji taidi ajotọ gba. Ajotọ de sọgan wá sọn whẹndo dagbe de mẹ. Mẹjitọ etọn lẹ, nọvisunnu po nọviyọnnu etọn lẹ po sọgan yin nugbodọtọ. Ṣigba owanyi mẹlọ lọsu tọn na akuẹ po nuhe akuẹ sọgan họ̀ lẹ po sọgan hẹn ẹn nado lẹzun ajotọ.

Mẹnu wẹ hiẹ yọnẹn dọ e yin ajotọ tintan?⁠— Gbọ mí ni lẹnnupọndeji. To whenuena Mẹplọntọ Daho lọ tin to olọn mẹ, e yọ́n mẹlọ. Ajotọ tintan lọ yin angẹli de. Ṣigba to whenuena e yindọ angẹli he Jiwheyẹwhe dá lẹpo wẹ yin pipé, nawẹ angẹli enẹ wagbọn do lẹzun ajotọ?⁠— Na taun tọn, dile mí plọn to Weta 8tọ owe ehe tọn mẹ do, angẹli lọ jlo nude he ma yin etọn. Be a gbẹ́ flin nulọ ya?⁠—

To whenuena Jiwheyẹwhe dá sunnu po yọnnu tintan po, angẹli enẹ jlo dọ yé ni nọ sẹ̀n emi. E ma tindo jlọjẹ depope nado mọ sinsẹ̀n-bibasi yetọn yí gba. Jiwheyẹwhe wẹ yé dona sẹ̀n. Ṣigba e fìn in yí! Angẹli lọ lẹzun ajotọ, na e klọ Adam po Evi po nado sẹ̀n ẹn wutu. Gbọnmọ dali, e lẹzun Satani Lẹgba.

Etẹwẹ nọ hẹn mẹde nado lẹzun ajotọ?⁠— Jijlo nuhe ma yin mẹtọn. Ojlo ehe sọgan lẹzun nuhe sinyẹn sọmọ bọ e tlẹ sọgan hẹn mẹhe yin mẹdagbe nado waylan. Delẹ to mẹhe lẹzun ajotọ lẹ mẹ ma nọ lẹnvọjọ nado jẹ nuhe yin dagbe wà ji gbede gba. Dopo to yé mẹ wẹ apọsteli Jesu tọn de. E nọ yin Juda Iskaliọti.

Juda yọnẹn ganji dọ ylando wẹ e yin nado jẹajo, na e ko plọn Osẹ́n Jiwheyẹwhe tọn sọn ovu-whenu gbọ́n. E yọnẹn dọ Jiwheyẹwhe lọsu tlẹ ko dọho sọn olọn mẹ pọ́n hlan omẹ etọn lẹ dọmọ: “Hiẹ ma na finnuyí.” (Eksọdusi 20:15) Whenuena Juda sọ whẹ́n mẹho, e dukosọhẹ Mẹplọntọ Daho lọ bo lẹzun dopo to devi etọn lẹ mẹ. To godo mẹ, Jesu tlẹ de Juda taidi dopo to apọsteli etọn 12 lẹ mẹ.

Jesu po apọsteli etọn lẹ po zọnpọ yì ofi susu lẹ. Yé dùnú dopọ. Podọ akuẹ he pipli lọ tindo lẹpo nọ yin bibẹ do apotin pẹvi de mẹ. Jesu ze apotin lọ na Juda nado nọ penukundego. E họnwun dọ, akuẹ he to apotin lọ mẹ lẹ ma yin Juda tọn. Ṣigba be a yọ́n nuhe Juda jẹ wiwà ji to godo mẹ ya?⁠—

Juda jẹ akuẹ fìn ji sọn apotin lọ mẹ. E nọ desọn akuẹ lọ mẹ to whenuena mẹdevo lẹ ma to pinpọ́n ẹn, podọ e tlẹ tẹnpọn nado dín aliho lẹ nado nọ mọ akuẹ susu fìn dogọ. E jẹ nulẹnpọn ji dogbọn akuẹ dali to whelẹponu. Gbọ mí ni pọ́n nuhe mẹ ojlo ylankan ehe dekọtọn do na ẹn to azán vude poun jẹnukọnna hùhù Mẹplọntọ Daho lọ tọn.

Malia, nọviyọnnu Lazalọsi he yin họntọn Jesu tọn, yí amì akuẹgegenu tọn de bo kọ̀n ẹn do afọ Jesu tọn go. Ṣigba Juda mọhodọ dego. Be a yọ́n nuhewutu wẹ?⁠— E dọ dọ amì lọ dona ko yin sisà bọ akuẹ etọn dona ko yin nina wamọnọ lẹ. Ṣigba na taun tọn, e jlo dọ akuẹ susu ni biọ apotin lọ mẹ na ewọ nido sọgan fìn sọn e mẹ.⁠—Johanu 12:1-6.

Jesu dọna Juda ma nado gblewhẹdo Malia, mẹhe do homẹdagbe hia jẹ obá enẹ mẹ. Homẹ Juda tọn ma hùn to whenuena Jesu dọmọ na ẹn gba. Enẹwutu e yì ogán yẹwhenọ lẹ tọn, he yin kẹntọ Jesu tọn lẹ dè. Yewlẹ ko jlo na wle Jesu, ṣigba zánmẹ wẹ yé to linlẹn nado wle e, na gbẹtọ lẹ ma nado mọ yé.

Juda dọna yẹwhenọ lẹ dọmọ: ‘Yẹn na dọ lehe mì sọgan wle Jesu gbọn na mì, eyin mì sọgan na mi akuẹ. Nẹmu wẹ mì na na mi?’

Yẹwhenọ lẹ yigbe dọ, ‘Mí na na we fataka-kuẹ ogbàn.’⁠—Matiu 26:14-16.

Juda yí akuẹ lọ. E taidi dọ e sà Mẹplọntọ Daho lọ na dawe enẹlẹ wẹ! Be a lẹndọ gbẹtọ sọgan wà onú ylankan mọnkọtọn ya?⁠— E blawu dọ, nuhe mẹ e nọ dekọtọn do niyẹn eyin mẹde lẹzun ajotọ bo nọ fìn akuẹ. E nọ yiwanna akuẹ hú lehe e yiwanna gbẹtọ lẹ kavi Jiwheyẹwhe do.

Vlavo hiẹ sọgan dọ dọ, ‘Yẹn ma na yiwanna nudevo depope hú Jehovah Jiwheyẹwhe pọ́n gbede.’ E yọ́n dọ a lẹnnupọn to aliho enẹ mẹ. To whenuena Jesu de Juda taidi apọsteli de, vlavo Juda lọsu sọgan ko lẹn nudopolọ. Mẹdevo lẹ he lẹzun ajotọ sọgan ko lẹn nudopolọ ga. Gbọ mí ni dọho gando delẹ to yé mẹ go.

Dopo to yé mẹ yin devizọnwatọ Jiwheyẹwhe tọn de he nọ yin yiylọdọ Akani, mẹhe nọgbẹ̀ to ojlẹ dindẹn die jẹnukọn whẹpo Mẹplọntọ Daho lọ do yin jiji di gbẹtọvi de. Akani mọ awugbó whanpẹnọ de, susugege sika tọn, po fataka lẹ po. Onú lọ lẹ ma yin etọn. Biblu dọ dọ Jehovah tọn wẹ onú lọ lẹ yin, na yé yin bibẹ sọn kẹntọ omẹ Jiwheyẹwhe tọn lẹ tọn si wutu. Ṣigba onú lọ lẹ biọ nukunmẹ na Akani sọmọ bọ e fìn yé.⁠—Jọṣua 6:​19; 7:​11, 20-​22.

Apajlẹ devo sọ die. To ojlẹ dindẹn die, Jehovah de Davidi nado yin ahọlu do omẹ Islaeli tọn lẹ ji. To gbèdopo, Davidi jẹ yọnnu whanpẹnọ de he yin Bati-ṣeba pọ́n ji. E zín nukun etọn do Bati-ṣeba ji bo jẹ nulẹnpọn ji nado ylọ ẹ wá whégbè nado nọhẹ ẹ di asi etọn. Ṣigba, asi Ulia tọn wẹ yọnnu lọ yin. Etẹwẹ Davidi dona ko wà?⁠—

Davidi dona ko doalọtena lẹnpọn mọnkọtọn gando Bati-ṣeba go. Ṣigba e ma wàmọ. To godo mẹ, Davidi ylọ ẹ wá whégbè. Podọ to enẹgodo, e basi tito nado mọdọ Ulia yin hùhù. Etẹwutu wẹ Davidi wà onú ylankan ehelẹ?⁠— Na asi mẹdevo tọn to jijlo e wutu wẹ.⁠—2 Samuẹli 11:​2-​27.

Na Davidi lẹnvọjọ wutu, Jehovah ma hù i gba. Ṣigba bẹsọn ojlẹ enẹ mẹ, Davidi pehẹ nuhahun susu. Dopo to nuhe jọ lẹ mẹ wẹ yindọ, visunnu ewọ lọsu tọn Absalọmi jlo nado yí otẹn Davidi tọn taidi ahọlu. Enẹwutu eyin gbẹtọ lẹ wá bo jlo na mọ Davidi, Absalọmi nọ plá-alọ-okọ̀ na yé bo nọ donù-nùgo na yé. Biblu dọmọ: ‘Absalọmi fìn ayiha omẹ Islaeli tọn tọn lẹ.’ E diọlinlẹnna gbẹtọ lẹ bọ yé jlo dọ ewọ ni yin ahọlu kakati ni yin Davidi.⁠—2 Samuẹli 15:​1-​12.

Be nude ko jlo we pọ́n sọmọ dile e basi na Akani, Davidi, po Absalọmi po ya?⁠— Eyin nulọ ma yin towe, bọ a ma biọgbè mẹlọ whẹpo do ze e, be ajojijẹ niyẹn. Be a gbẹsọ flin nuhe ajotọ tintan lọ, Satani jlo ya?⁠— E jlo dọ gbẹtọ lẹ ni nọ sẹ̀n emi kakati ni yin Jiwheyẹwhe. Enẹwutu ajojẹ wẹ Satani te to whenuena e klọ Adam po Evi po nado setonuna ẹn.

Eyin mẹde tindo nude, ewọ wẹ tindo jlọjẹ lọ nado dọ mẹhe sọgan zan nulọ. Di apajlẹ, vlavo hiẹ sọgan yì aihunda gbé to owhé yọpọvu hatọ towe devo lẹ tọn gbè. Be e sọgbe nado ze nude sọn finẹ bo hẹn ẹn wá whégbè ya?⁠— Lala, adavo eyin otọ́ kavi onọ̀ ovi lọ tọn na we nulọ. Eyin a ma biọgbè yé whẹpo do ze onú yetọn de wá whégbè, be ajò wẹ a jẹ.

Etẹwutu wẹ a sọgan yin whiwhlepọn nado jẹajo?⁠— Na hiẹ jlo nude he ma yin towe wutu wẹ. Eyin mẹde ma tlẹ mọ we to whenue a to nulọ ze, mẹnu wẹ mọ we?⁠— Jehovah Jiwheyẹwhe. Podọ mí dona flindọ Jiwheyẹwhe gbẹwanna ajojijẹ. Enẹwutu owanyi na Jiwheyẹwhe po kọmẹnu towe lẹ po na gọalọna we ma nado lẹzun ajotọ gbede.