Wekanhlanmẹ de sọn Hagbẹ Anademẹtọ Dè

Mẹvivẹ He Yiwanna Jehovah lẹ Emi:

“Mìwlẹ nasọ yọ́n nugbo, nugbo lọ nasọ hẹn mì jẹ mẹdekannu,” wẹ Jesu dọ. (Johanu 8:32) Lehe ohó ehelẹ namẹ tuli do sọ! Mọwẹ, a sọgan yọ́n nugbo lọ, etlẹ yin to ‘azán godo’ tọn ojlẹ awusinyẹn tọn ehelẹ mẹ whenue lalo gbayipe. (2 Timoti 3:1) Be a flin whenue a mọnukunnujẹ nugbo lọ mẹ to tintan whenu dile e yin zẹẹmẹ basina to Ohó Jiwheyẹwhe tọn mẹ do ya? Lehe enẹ hẹn we gọ́ na ayajẹ do sọ!

Ṣigba, kẹdẹdile e yin nujọnu nado tindo oyọnẹn he pegan nugbo lọ tọn bo nọ má ẹn hẹ mẹdevo lẹ to gbesisọ mẹ do, mọ wẹ e sọ yin onú titengbe nado nọ yinuwa sọgbe hẹ nugbo lọ do niyẹn. Nado wà enẹ, mí dona hẹn míde do owanyi Jiwheyẹwhe tọn mẹ. Etẹwẹ ehe bẹhẹn? Nuhe Jesu dọ to ozán he jẹnukọnna okú etọn na gblọndo kanbiọ ehe tọn. E dọna apọsteli nugbonọ etọn lẹ dọmọ: “Eyin mì nọ yìn gbedide ṣie lẹ, mì na gbọṣi owanyi ṣie mẹ, kẹdẹdile yẹn ko yìn gbedide Otọ́ ṣie tọn lẹ bo gbọṣi owanyi etọn mẹ do.”—Johanu 15:10, NW.

Doayi e go dọ Jesu gbọṣi owanyi Jiwheyẹwhe tọn mẹ gbọn gbedide Otọ́ etọn tọn lẹ yìnyìn dali. Onú dopolọ wẹ e yin to egbehe. Nado gbọṣi owanyi Jiwheyẹwhe tọn mẹ, mí dona nọ yinuwa sọgbe hẹ nugbo lọ egbesọegbesọ. To whèjai enẹ dopolọ, Jesu dọmọ: “Eyin mì yọ́n onú helẹ, donanọ wẹ mì eyin mì basi yé.”—Johanu 13:17.

Todido mítọn wẹ yindọ owe ehe na gọalọna we nado to nuyiwa sọgbe hẹ nugbo lọ zọnmii bo gbọnmọ dali gbọṣi “owanyi Jiwheyẹwhe tọn mẹ . . . to todido mẹ na ogbẹ̀ madopodo.”—Juda 21, NW.