Daniẹli to Odò Kinnikinni lẹ Tọn Mẹ

Ahọlu devo he dugán do Babilọni ji wẹ Daliusi Medianu lọ. Daliusi mọdọ omẹ vonọtaun de wẹ Daniẹli yin. Enẹwutu, e ze Daniẹli daga do omẹ nukundeji aigba lọ tọn lẹ ji. Omẹ enẹlẹ wá jẹ awuwhàn Daniẹli ji bo jlo na hù i. Yé yọnẹn dọ Daniẹli nọ hodẹ̀ hlan Jehovah whla atọ̀n to gbèdopo, enẹwutu yé dọna Daliusi dọmọ: ‘Ahọlu E, osẹ́n de dona yin didetọn dọ hiẹ kẹdẹ wẹ mẹlẹpo dona nọ hodẹ̀ hlan. Mẹdepope he vẹtolina osẹ́n lọ na yin zizedlan odò kinnikinni lẹ tọn mẹ.’ Linlẹn lọ yọ́n to nukun Daliusi tọn mẹ, bọ e doalọ osẹ́n lọ mẹ.

Tlolo he Daniẹli sèhó gando osẹ́n yọyọ lọ go, e yì owhé etọn gbè. E sọ jẹklo to fleṣe he to hùnhùn de nù bo hodẹ̀ hlan Jehovah. Mẹhe to awuwhàn ẹn lẹ biọ owhé etọn gbè po zingidi po bo mọdọ e to dẹ̀ho. Yé sọ họ̀nwezun yì Daliusi dè bo dọmọ: ‘Daniẹli to tolivẹ na we. E nọ hodẹ̀ hlan Jiwheyẹwhe etọn whla atọ̀n to gbèdopo.’ Daliusi yiwanna Daniẹli bo ma jlo dọ ni kú. To azán lọ blebu ji, e to nulẹnpọn nado dín aliho he mẹ e gán whlẹn Daniẹli te. Ṣigba, ahọlu lọ lọsu ma gán diọ osẹ́n he mẹ e ko doalọ. E gbọ bo degbena omẹ etọn lẹ nado ze Daniẹli dlan odò kinnikinni he to adán ji lọ lẹ tọn mẹ.

To ozán enẹ mẹ, onú Daniẹli tọn to ahunmẹduna Daliusi sọmọ bọ e ma gán damlọn. To aihọngbè, e họ̀nwezun wá odò lọ kọ̀n bo dawhá ylọ Daniẹli dọmọ: ‘Be Jiwheyẹwhe towe whlẹn we ya?’

Daliusi sè ogbè de. Ogbè Daniẹli tọn wẹ! E dawhá hlan Daliusi dọmọ: ‘Angẹli Jehovah tọn ko bọnùdo na kinnikinni lọ lẹ. Yé ma tlẹ gbleawuna mi.’ Homẹ Daliusi tọn hùn taun! E degbe dọ Daniẹli ni yin didetọn sọn odò lọ mẹ. Apà depope ma tlẹ to Daniẹli go. Enẹgodo, ahọlu lọ degbe dọmọ: ‘Mì ze mẹhe sawhẹdokọna Daniẹli lẹ dlan odò lọ mẹ.’ Whenue yé yin dindlan do odò lọ mẹ, kinnikinni lọ lẹ tlẹ́n yé dù.

Daliusi de gbèta de tọ́n na omẹ etọn lẹpo dọmọ: ‘Jiwheyẹwhe Daniẹli tọn wẹ mẹlẹpo dona nọ dibusi. Na e whlẹn Daniẹli sọn onù kinnikinni lẹ tọn mẹ.’

Be a nọ hodẹ̀ hlan Jehovah egbesọegbesọ taidi Daniẹli ya?