Yẹwhehodidọ Osó ji Tọn Lọ

To whenue Jesu ko de apọsteli 12 lẹ godo, e jẹte sọn osó lọ ji yì fihe gbẹtọgun daho de pli do. Mẹlẹ wá sọn Galili, Jude, Tile, Sidoni, Silia podọ sọn awà awetọ Jọdani tọn ji. Yé hẹn mẹhe to azọ̀njẹ lẹ po mẹhe aovi to tuklado lẹ po wá. Jesu hẹnazọ̀ngbọna yemẹpo. Enẹgodo, e sinai to adà osó lọ tọn de ji bo jẹ hodọ ji. E dọho gando nuhe mí dona wà nado yin họntọn Jiwheyẹwhe tọn lẹ go. Mí dona yọnẹn dọ mí tindo nuhudo Jehovah tọn bo plọn nado yiwanna ẹn. Ṣigba, mí ma gán yiwanna Jiwheyẹwhe, eyin mí ma yiwanna hatọ mítọn. Mí dona nọ jọmẹ hẹ mẹlẹpo bo nọ wà dagbe na yé, etlẹ yin kẹntọ mítọn lẹ lọsu.

Jesu dọmọ: ‘E ma ko pé nado yiwanna họntọn towe lẹ poun. A sọ dona yiwanna kẹntọ towe lẹ bo nọ jona mẹlẹ sọn ahun mẹ wá. Eyin mẹde gblehomẹ do gowe, yì e dè to afọdopolọji bo vẹvẹna ẹn. Nọ yinuwa hẹ mẹdevo lẹ dile a jlo dọ yé ni nọ yinuwa hẹ we do.’

Jesu sọ namẹ ayinamẹ dagbe gando agbasanu lẹ go. E dọmọ: ‘E pọnte nado yin họntọn Jehovah tọn hú nado tindo akuẹ susu. Ajotọ gán fìn akuẹ towe, amọ́ mẹde ma gán fìn haṣinṣan he a tindo hẹ Jehovah. Ma nọ hànu gando nuhe a na dù, nuhe a na nù kavi nuhe a na do go blo. Pọ́n ohẹ̀ lẹ. Jiwheyẹwhe nọ hẹn ẹn diun to whelẹponu dọ yé dùnú bo gọ́ho. Nuhiha ma na zọ́n bọ gbẹninọ towe na dite na azán dopo dogọ. Nọ flindọ Jehovah yọ́n nuhudo towe lẹ.’

Gbẹtọgun lọ ma ko sè bọ mẹde dọho dile Jesu wà do pọ́n. Sinsẹ̀ngán yetọn lẹ ma nọ plọn yé onú mọnkọtọn lẹ. Naegbọn Jesu do yin mẹplọntọ daho mọnkọ? Na Jehovah dè wẹ nuplọnmẹ etọn lẹpo nọ wá sọn wutu wẹ.