Azọ́n Dagbe lẹ Nọ Hẹn Gigo Wá Na Jiwheyẹwhe — WESẸDOTẸN INTẸNẸT JI TỌN Watchtower Tọn

Azọ́n Dagbe lẹ Nọ Hẹn Gigo Wá Na Jiwheyẹwhe

MẸHE yiwanna Jiwheyẹwhe lẹ nọ dovivẹnu nado do hinhọ́n gbigbọmẹ tọn hia sọn Ohó etọn, Biblu mẹ. To aliho ehe mẹ, yé nọ hodo gbedide Jesu tọn dọmọ: “Mọkẹdẹ wẹ mì ni gbọ hinhọ́n mìtọn ni họnwun to gbẹtọ lẹ nukọn do, na yé nido mọ azọ́n dagbe mìtọn lẹ bo pagigona Otọ́ mìtọn he tin to olọn mẹ.” (Matiu 5:16) Hodidọ po walọyizan dagbe po sọgan hẹn gigo wá na Jiwheyẹwhe.

Kunnudetọ Jehovah tọn lẹ nọ dín nado hẹn homẹhun Jiwheyẹwhe gbọn nuyiwa to kọndopọmẹ hẹ Biblu dali podọ gbọn vivẹnudido nado gọalọna mẹdevo lẹ to gbigbọ-liho dali. Yé nọ wàmọ etlẹ yin to aigba fie lizọnyizọn gbangba tọn yetọn ma ko yin yinyọnẹn sọgbe hẹ osẹ́n te lẹ. To dopo to tòdaho tatọ́-tònọ otò ehelẹ tọn mẹ, Kunnudetọ lẹ ko to plidopọ whemẹwhemẹ tọn lẹ basi he gbẹtọ sọn 6 000 jẹ 9 000 nọ wá. Na pipli mọnkọtọn lẹ, yé ko haya piplitẹn daho lẹ to fie nudohia lẹ nọ wá aimẹ te. Dile yé tindo to owhe he wayi lẹ mẹ do, jẹnukọnna plidopọ yetọn to 1999, kanweko susu Kunnudetọ lẹ tọn wazọ́n sinsinyẹn nado hẹn owhé lọ lẹ do wiweji bosọ wleawuna nuyizan he nọ ze ogbèyiaga lẹ po oján fọtọ́n susu lẹ po.

Awuwiwle ehe lẹpo yin ayidego. Pipli azọ́nwatọ he nọ penukundo nọtẹn lọ go lẹ tọn doayi nuwiwa ehelẹ go. Yé sọ mọdọ, dile etlẹ yindọ mẹplidopọ lẹ yiaga jẹ 15 666, nulẹpo yì whinnuwhinnu podọ Kunnudetọ lọ lẹ tin to titoji tlala. Azọ́nwatọ lọ lẹ sọ yin nuyiwadeji gbọn onú lẹ hinhẹn do wiweji mlẹnmlẹn to godo mẹ dali.

Anadenanutọ lọ lẹ do pinpẹn-nutọn-yinyọnẹn hia na ehe lẹpo gbọn zize Kunnudetọ lẹ do otẹn nukundeji lọ mẹ na yé nido tindo dotẹnmẹ hundote tintan nado haya owhé lọ to owhe he na bọdego lọ mẹ. Ṣigba anadenanutọ lọ lẹ tlẹ wà hugan mọ. To 15 juillet 1999, yé na onú pinpẹn-nutọn-yinyọnẹn didohia tọn de wedegbẹ́ plidopọ lọ tọn. Hogbe he yin kinkàn po aṣọdonanu po do owhlẹ lọ go lẹ wẹ “agun Kunnudetọ Jehovah tọn lẹ tọn”—yèdọ nude he mayin nukundo to otò de mẹ fie azọ́n mẹpinplọn Biblu tọn yetọn tin to alọhẹndote glọ te.

Lẹdo aihọn pé to 2000/2001, livi susu yin nukundo nado yì kanweko susu plidopọ “Basitọ Ohó Jiwheyẹwhe Tọn Lẹ” tọn heyin Kunnudetọ Jehovah tọn lẹ tọn. Gbọn tintin to finẹ dali, hiẹ sọgan mọ na dewe lehe mẹhe nọ dovivẹnu vẹkuvẹku nado wà nuhe yin didọ to Biblu mẹ lẹ to mahẹ tindo to azọ́n dagbe he nọ hẹn gigo wá na Jiwheyẹwhe lẹ mẹ do.