‘Otẹgbọẹ Whanpẹnọ Osó Ji Tọn De’
WHANPẸ mayin hogbe hókọyọ́n tọn de he suhugan mítọn na yizan nado basi zẹẹmẹ ogbọ́ de tọn gba. Mí sọgan lẹnnupọn do ogbọ́ lẹ ji taidi kanlin he yọn-na-yizan lẹ he nọ dù dibla yin onú wunmẹ depope bosọ nọ wleawu olàn vivi po anọ́sin hunsindagbe tọn po na mí—ṣigba e na sinyẹnawu dọ mí ni ylọ yé dọ whanpẹnọ.
Etomọṣo, Biblu basi zẹẹmẹ asi de tọn taidi “agbanlin asi de, podọ di [otẹgbọẹ asi whanpẹnọ osó ji, NW ] tọn de.” (Howhinwhẹn lẹ 5:18, 19) Sọlọmọni, kinkàntọ owe Howhinwhẹn lẹ tọn de, yin mẹhe nọ doayi gbekanlin Islaeli tọn lẹ go tlala, enẹwutu matin ayihaawe e tindo whẹwhinwhẹ́n dagbe na hogbe nunọnutẹnmẹ tọn ehe yiyizan. (1 Ahọlu lẹ 4:30-33) Vlavo, taidi otọ́ etọn Davidi, e ko nọ doayi otẹgbọẹ osó ji tọn he nọ wá daihun to lẹdo Ẹn-gẹdi tọn ji lẹ go, sẹpọ otọ̀-tó Ohù Kúkú tọn.
Pipli kleun otẹgbọẹ osó ji tọn lẹ tọn he nọ nọ̀ Danfafa Judé tọn he tin to yakẹ ji lẹ nọ basi dlapọn na osinwhín Ẹn-gẹdi tọn to gbesisọmẹ. To whenuena e yindọ asisa osin tọn dejidego dopo akàn lọ niyẹn to lẹdo enẹ mẹ, Ẹn-gẹdi ko yin nọtẹn dagbe osin tọn de na otẹgbọẹ osó ji tọn lẹ na owhe kanweko susu. Na taun tọn yinkọ lọ Ẹn-gẹdi vlavo zẹẹmẹdo “osinwhín ogbọ́-vi lẹ tọn,” yèdọ kunnudenu de na tintin to finẹ to gbesisọmẹ ogbọ́-vi lẹ tọn. Ahọlu Davidi dín fibẹtado to finẹ sọn homẹkẹndomẹ Ahọlu Sauli tọn si, dile etlẹ yindọ ewọ dona nọgbẹ̀ taidi fibẹtado-dintọ de “to osé otẹgbọẹ lẹ tọn lẹ ji.”—1 Samuẹli 24:1, 2.
To Ẹn-gẹdi hiẹ sọgan gbẹsọ mọ lehe ogbọ́ asi gbémẹ tọn de, kavi otẹgbọẹ osó ji tọn de, nọ yí sọwhiwhe do hodo osinwhín osó ji tọn dile e hodo ogbọ́ asu de hlan osin lọ kọ̀n. To whenẹnu hiẹ sọgan jẹ nukunnumọjẹ nuyijlẹdonugo lọ mẹ ji heyin ogbọ́ asi gbémẹ tọn de yiyijlẹdo asi nugbonọ de go tọn mẹ. Jijọ whii-ninọ po whanpẹ etọn po sọ do nususu hia gando jẹhẹnu yọnnnu tọn lẹ go. E họnwun dọ hogbe lọ “whanpẹ” basi alọdlẹndonu he mayin tlọlọ tọn hlan lẹblanu po awusọhia whanpẹnọ otẹgbọẹ osó ji tọn po.a
Ogbọ́ asi dona penugo nado doakọnna ninọmẹ sinsinyẹn lẹ bo yin lẹblanunọ ga. Dile Jehovah dọna Job do, otẹgbọẹ osó ji tọn nọ jivi do osókla lẹ mẹ, to osó ṣẹnṣẹn, fihe ma nọ bọawu nado yì, he núdùdù ma nọ tin te bọ yozò sọ nọ sinyẹn te taun lẹ. (Job 39:1) Mahopọnna ninọmẹ sinsinyẹn ehelẹ, e nọ penukundo ovi etọn lẹ go bo nọ plọn yé nado hẹaga bo lọ́n to osó lẹ ṣẹnṣẹn po kànbibi po dile ewọ nọ basi do. Ogbọ́ asi lọ sọ nọ yí adọgbigbo do basi hihọ́na ovi etọn lẹ sọn nuwledutọ lẹ si. Ayidonugotọ de mọ otẹgbọẹ osó ji tọn de he to akùn de yàn dola na nukunwhiwhe gbàn, dile ovi etọn mlọnai do oglọ etọn na hihọ́.
Klistiani asi po onọ̀ po lẹ dona nọ saba pọ́n ovi yetọn lẹ go whẹ́n to ninọmẹ ylankan lẹ glọ. Taidi otẹgbọẹ osó ji tọn lọ, yé nọ do mẹdezejo po ṣejannabi matindo po hia to nukunpipedo azọ́ndenamẹ Jiwheyẹwhe tọn ehe go mẹ. Podọ yé nọ yí adọgbigbo do vánkan nado basi hihọ́na ovi yetọn lẹ sọn owù gbigbọmẹ tọn lẹ mẹ. Enẹwutu, kakati nado yí hogbe nunọnutẹnmẹ tọn ehe zan nado de yọnnu lẹ pò, Sọlọmọni to ayidonugo dọ̀n wá lẹblanu po whanpẹ yọnnu lẹ tọn po ji wẹ na taun tọn—yèdọ jẹhẹnu gbigbọmẹ tọn lẹ he nọ to sisẹ́ etlẹ yin to lẹdo awusinyẹnnamẹ tọn taun mẹ.
[Nudọnamẹ Odò Tọn]
a Sọgbe hẹ The New Brown-Driver-Briggs-Gesenius Hebrew and English Lexicon, to lẹdo hodidọ ehe tọn mẹ hogbe Heblu tọn chen, heyin lilẹdogbedevomẹ do “whanpẹ,” zẹẹmẹdo ‘lẹblanu kavi awusọhia whanpẹnọ.’
[Yẹdide to weda 30]
Klistiani asi po onọ̀ de po nọ do jẹhẹnu whanpẹnọ gbigbọmẹ tọn lẹ hia to azọ́ndenamẹ Jiwheyẹwhe tọn etọn lẹ hinhẹndi whenu