“Jehovah Ko Yin Dagbe Hlan Mi Tlala!”
TO WHÈJAI awuvivi tọn de to mars 1985, sunnu po yọnnu po he tin to Azọ́nwatẹn Wekinkan tọn to tatọ́-tẹnnọ Kunnudetọ Jehovah tọn lẹ to New York, États-Unis, doayi nujijọ ayidego tọn de go. Karl F. Klein ko sẹ̀n na owhe 60 to sinsẹ̀nzọn whenu-gigọ́ tọn mẹ to whenẹnu. Po zohunhun po, Mẹmẹsunnu Klein dọmọ: “Jehovah ko yin dagbe hlan mi tlala!” E doayi e go dọ Psalm 37:4 yin wefọ Biblu tọn he emi yiwanna tlala de. To godo mẹ, e hẹn mẹlẹpo jaya gbọn (violoncelle) hànjinu etọn hihò dali.
Na owhe 15 he bọdego lẹ, Mẹmẹsunnu Klein zindonukọn nado to azọ́nwa taidi dopo to hagbẹ azọ́nwatẹn wekinkan tọn lẹ mẹ bosọ to sinsẹ̀nzọnwa to Hagbẹ Anademẹtọ Kunnudetọ Jehovah tọn lẹ tọn mẹ. Ṣigba, to 3 janvier 2001, to owhe 95 dido mẹ, Karl Klein dotana gbẹzan aigba ji tọn etọn po nugbonọ-yinyin po.
Karl yin jiji to Allemagne. Whẹndo etọn sẹtẹn yì États-Unis, bọ Karl whẹ́n to lẹdo Chicago, Illinois tọn de mẹ. Karl po nọvisunnu etọn Ted po tindo ojlo sisosiso to Biblu mẹ to whenue yé gbẹ́ pò to jọja mẹ. Karl yin bibaptizi to 1918, podọ ojlofọndotenamẹnu he e sè to plidopọ agbegbe Biblu Plọntọ lẹ tọn de ji to 1922 fọ́n ojlo lizọnyizọn kunnudegbe tọn dote to ewọ mẹ na pipòtọ gbẹzan etọn tọn. E ma nọ jlo dọ osẹ de ni juwayi he emi ma na tindo mahẹ to azọ́n yẹwhehodidọ tọn mẹ gba, bo tlẹ sọ wàmọ to osẹ godo tọn gbẹzan etọn tọn lẹ mẹ.
Karl lẹzun dopo to azọ́nwatọgbẹ́ tatọ́-tẹnnọ tọn lẹ mẹ to 1925, bo wazọ́n to wezintẹn to tintan whenu. E tindo ojlo sinsinyẹn na húnhiho, podọ na owhe sọha delẹ e hò violoncelle to hànjigbẹ́ de mẹ he nọ sọawuhia to azọ́nwatẹn ladio Klistiani tọn ji. To enẹgodo, e wazọ́n to Azọ́nwatẹn Sinsẹ̀nzọn tọn, bo duvivi gbẹdido etọn hẹ T. J. Sullivan heyin nukunpedonugotọ etọn tọn tlala. To ojlẹ enẹ mẹ, Ted wlealọ hẹ asi etọn Doris, yé biọ sinsẹ̀nzọn mẹdehlan tọn mẹ to Porto Rico.
Na owhe kandeao, Karl Klein wazọ́n to Azọ́nwatẹn Wekinkan tọn, to fie e gọalọ te na taun tọn na e yiwanna nado nọ basi dodinnanu lẹ bosọ tindo oyọnẹn sisosiso Biblu tọn wutu. To 1963, Karl wlealọ hẹ Margareta, yèdọ mẹdehlan Allemagne tọn de he to sinsẹ̀nzọnwa to Bolivie. Po godonọnamẹ owanyinọ etọn po, na taun tọn to whenuena asu etọn to nuhahun agbasalilo tọn tindo, e penugo nado to azọ́n sinsẹ́nnọ wà zẹ̀ owhe he mẹ mẹsusu nọ doazọ́n te mẹ go. Jijọ hodidọ tlọlọ Karl tọn, to pọmẹ hẹ zohunhun húnhiho tọn etọn, yidogọna hodidọ ayidego tọn lẹ to agun lẹ mẹ podọ to plidopọ lẹ ji. Ojlẹ kleun de jẹnukọnna okú etọn, e deanana oplọn egbesọ tọn na whẹndo daho Bẹtẹli New York tọn, he hẹn homẹhun po alemọyi po wá na mẹlẹpo.
Susu mẹhe nọ hia Atọ̀họ̀-Nuhihọ́ Lọ Tọn to gbesisọmẹ lẹ na flin otàn gbẹzan Mẹmẹsunnu Klein tọn, yèdọ kandai awuvivi tọn numimọ etọn lẹ tọn heyin zinzinjẹgbonu to zinjẹgbonu [flansegbe] 1er mai 1985 tọn mẹ. Hiẹ na duvivi hihia kavi vọhia kandai enẹ tọn, bo hẹn do ayiha mẹ dọ mẹhe kàn ẹn sọ yí owhe fọtọ̀n devo zan taidi Klistiani nugbonọ po mẹdezejotọ de po.
Taidi dopo to mẹyiamisisadode Oklunọ tọn lẹ mẹ, Mẹmẹsunnu Klein jlo po ahun etọn lẹpo po nado dugán hẹ Klisti to olọn mẹ. Mí tindo whẹwhinwhẹ́n lẹpo nado yise dọ Jehovah ko hẹn ojlo enẹ di todin.—Luku 22:28-30.
[Yẹdide to weda 31]
Karl to 1943 hẹ T. J. Sullivan po Ted po gọna Doris
[Yẹdide to weda 31]
Karl po Margareta po, octobre 2000