Nuyiwadomẹji Tẹgbẹ̀ Tọn

TO OWHE dopodopo mẹ, Kunnudetọ Jehovah tọn lẹ to otò yetọn titi lẹ mẹ nọ pli dopọ to plidopọ lẹdo tọn po plidopọ agbegbe Klistiani tọn lẹ po ji. Yé nọ wà ehe nado duvivi nudọnamẹ po gbẹdido he nọ jlọmẹdote to gbigbọ-liho lẹ po tọn. Ṣigba adà pipli dopọ yetọn lẹ tọn devo sọgan sọ tindo nuyiwadomẹji tẹgbẹ̀ tọn do dlapọn basitọ lẹ ji.

To juillet 1999, Kunnudetọ fọtọ́n susu plidopọ to Mozambique na azán họakuẹ atọ̀n to Plidopọ Agbegbe “Ohó Dọdai Jiwheyẹwhe Tọn” tọn lẹ ji. Susu mẹhe wá lẹ tọn wẹ yì plidopọ agbegbe tintan yetọn. Yé yin nuyiwadeji e mayin gbọn ohó he yé sè sọn oplò ji lẹ kẹdẹ dali gba ṣigba po nuhe yé mọ lẹdo yedelẹ po ga.

Ayidonugo dopo heyin bibasi to Plitẹnhọ Plidopọ Maputo tọn mẹ dọmọ: “Yẹn ma ko mọ nọtẹn whanpẹnọ mọnkọtọn pọ́n gbede to gbẹzan ṣie lẹpo mẹ gba! Awulẹpa lẹ tindo adí po mẹpọnnu lẹ po, bọ yé tlẹ sọ dewán dagbe. Lẹdo jijọho tọn lẹ tin he ma tindo awhágbe ovi he to avùnho lẹ tọn. Podọ mẹsisisẹ matin gba! Yẹn mọ jọja, ayajẹnọ he to mahẹ tindo to hodọdopọ tulinamẹ tọn mẹ lẹ. Lehe mẹlẹpo doaṣọ ganji do sọ yinuwado yẹn ji ga. To ojlẹ devo mẹ, yẹn na hẹn ovi ṣie lẹ wá bo nasọ hẹn asu ṣie tindo nujikudo dọ mí dona yì plidopọ agbegbe lọ.”

Mọwẹ, nugbodidọ, tenọgligo hinhẹn, po wiwejininọ agbasa tọn Kunnudetọ Jehovah tọn lẹ tọn po nọ yin ayidego. Naegbọn Kunnudetọ lẹ do gbọnvo? Na yé nọ tẹnpọn nado yí nuhe yé plọn sọn Biblu mẹ do yizan mẹ nugbonugbo wutu wẹ. Naegbọn hiẹ ma nado pli dopọ hẹ yé to owhe ehe mẹ to plidopọ daho yetọn lẹ ji kavi to opli sẹmẹsẹmẹ yetọn lẹ to Plitẹnhọ Ahọluduta tọn yetọn mẹ nado mọ na dewe?

[Yẹdide lẹ to weda 32]

ZAMBIE

KENYA

MOZAMBIQUE