E Nọ Dọ́jì Hugan Sika Akú
SIKA yin nude he gbẹtọ nọ dín tlala na whanpẹ po jididọ́ etọn po wutu. Nuhewutu yè nọ dín in taun wẹ yindọ sisẹ́ etọn nọ yin na whenu dindẹn. Ehe yinmọ na osin, oxygène, whèmi, podọ diblayin onú devo depope ma nọ hẹn sika kupẹ́ wutu. Nuhe yè yí sika do basi susu heyin mimọ to tọjihun he siọ lẹ mẹ podọ to fidevo lẹ gbẹsọ to sisẹ́ to owhe kanweko susu godo.
Ṣigba, po awuvivi po, Biblu dọ dọ nude tin he sọ nọ dọ́jì bosọ “yọnwhanpẹ hú sika he nọ sudo, eyin e bosọ yin miyọ́n wẹ yè tlẹ yí do to whiwhle e pọ́n.” (1 Pita 1:7) Nujọnu-yinyin sika heyin ‘whiwhlepọn’ kavi kiklọwé to miyọ́n mẹ kavi to aliho devo lẹ mẹ tọn sọgan yiaga jẹ 99,9 to kanweko ji. Etomọṣo, sika heyin kiklọwé gbẹsọ nọ gble, kavi yọ́ to aqua regia mẹ, heyin nuṣakadopọ osin adínọ sinsinyẹn awe tọn. Enẹwutu, Biblu sọgbe to lẹnunnuyọnẹn-liho to whenuena e dọ dọ ‘sika nọ sudo.’
To vogbingbọn mẹ, yise Klistiani nugbonọ de tọn ‘nọ whlẹn alindọn gán.’ (Heblu lẹ 10:39) Gbẹtọ lẹ sọgan hù mẹhe yise etọn sinyẹn taun, dile yé wà na Jesu Klisti do. Ṣigba mẹhe tindo yise he lodo taun lẹ tindo opagbe lọ dọmọ: “Yin nugbonọ jẹ okú, yẹn nasọ na jẹgbakun ogbẹ̀ tọn lọ we.” (Osọhia 2:10) Mẹhe kú to yise mẹ lẹ tin to oflin Jiwheyẹwhe tọn mẹ, podọ e na fọ́n yé sọnku. (Johanu 5:28, 29) Sika sọha depope ma sọgan wà ehe gba. To linlẹn ehe mẹ, yise họakuẹ taun hugan sika. Ṣigba, yise dona yin whiwhlepọn whẹpo e nido sọgan tindo nuhọakuẹ dagbe mọnkọtọn. Na taun tọn, ‘jẹhẹnu yise he ko yin whiwhlepọn tọn’ wẹ Pita dọ dọ e họakuẹ hú sika. Homẹ Kunnudetọ Jehovah tọn lẹ tọn na hùn nado plọn we Biblu na hiẹ nido sọgan wleawuna bosọ tindo yise he lodo de to Jiwheyẹwhe nugbo lọ, yèdọ Jehovah mẹ, po Visunnu etọn, Jesu Klisti po mẹ. Jesu dọ dọ ehe “wẹ ogbẹ̀ madopodo.”—Johanu 17:3.