Nuhe Nọ Hù Atin Sudo Lẹ

TO OJLẸ he mẹ Biblu yin kinkàn te, atin nọ yin pinpọnhlan taidi onú họakuẹ. Di apajlẹ, to whenuena Ablaham họ̀ ṣiọditẹn de na Sala, asi yiwanna etọn, atin lẹ tin to nuhe yin sislẹ to gbemima aigba yíyí tọn mẹ.—Gẹnẹsisi 23:15-18.

Mọdopolọ to egbehe, atin họakuẹ taun, podọ ayidonugo akọjọpli tọn susu wẹ yin zizedo hihọ́ bibasi na zungbo lẹ ji. Owe State of the World 1998 dọmọ: “To whenuena susu mẹhe nọ nọ̀ otò yozò tọn mẹ lẹ nọ yin ahunmẹduna dogbọn zungbo lẹ dali, yé sọgan gọ̀n ma yọnẹn dọ zungbo he tin to otò yetọn mẹ lẹ lọsu ko yin mimá do flinflin bo to yinyin vivasudo gbọn nuhe nọ và zungbo wunmẹ lẹpo sudo hugan lẹ dali.” Etẹwẹ to dagbemẹ-ninọ zungbo lẹ tọn zedo owù mẹ to otò agewaji Europe po Agewaji Amelika tọn lẹ po mẹ? Mẹsusu nọ dlẹnalọdo zungbo vivasudo, ṣigba onú devo lẹ tin he nọ hù atin lẹ sudo to nuglọ vudevude. Etẹlẹ wẹ? Jẹhọn hinhẹnflu po jikun adínọ lẹ po. Dihónu ehelẹ sọgan hù atin lẹ vudevude, bo hùn yé do nùvo na owánvu po awutu po.

Na owhe susu, mẹhe lẹdo nọ duahunmẹna po tovi lẹnpọn dagbenọ devo lẹ po ko na avase gando nuhudo nado basi hihọ́na lẹdo mítọn po nuhe tin to e mẹ lẹ po go. To owhe 1980 lẹ gblamẹ, to whenuena lẹnunnuyọnẹntọ Allemagne tọn lẹ ko dindona nugandomẹgo he jẹhọn hinhẹnflu po jikun adínọ po nọ tindo do lẹdo ji po godo, yé dotana dọ: ‘Eyin nudepope mayin wiwà, to nudi owhe 2000 mẹ, fọto po sinemọto po kẹdẹ mẹ wẹ gbẹtọ na nọ mọ whanpẹ zungbo tọn te.’ Eyin homẹhunnu dọ, aigba tindo huhlọn sọmọ nado vọ́ atin lẹ wú jẹgbonu bọ kakajẹ din zungbo ko penugo nado doakọnna suhugan nuhe nọ và atin lẹ sudo heyin hodọdeji jẹnukọn wayi lẹ.

Nalete, to madẹnmẹ, Jiwheyẹwhe wẹ na wà nususu nado basi hihọ́na lẹdo mítọn po nuhe tin to e mẹ lẹ po. “Ewọ to sinhú osó lẹ sọn abò etọn mẹ” bosọ “hẹn ogbé wú na kanlin lẹ, omá na sinsẹ̀n gbẹtọ tọn.” Podọ e ko dopagbe ‘nado hù yé he to aihọn husudo lẹ sudo.’ (Psalm 104:13, 14; Osọhia 11:18) Lehe e na jiawu do sọ to whenuena mẹhe tin to aigba ji lẹ na penugo nado duvivi aihọn he mayin hinhẹnflu de tọn kakadoi!—Psalm 37:9-11.