Kunnudetọ Jehovah Tọn Heyin Hùhù lẹ Yin Finflin

To 7 mars 2002, owhlẹ oflin tọn de yin didehia to tòdaho Körmend tọn mẹ to whèyihọ-waji Hongrie tọn. E basi oflin okú Kunnudetọ Jehovah tọn atọ̀n heyin hùhù gbọn Nazi lẹ dali to 1945 tọn.

Owhlẹ lọ yin titẹdo adò tatọ́-tẹnnọ azọ́nwatẹn miyọ́n-ṣítẹn tọn go to Aliho Hunyadi egbehe tọn ji, to fie yé yin hùhù to gbangba te. Owhlẹ lọ yin kinklandovo na oflin ‘Klistiani heyin hùhù na yé gbẹ́ awhàn dai to mars 1945 na ayihadawhẹnamẹnu yetọn wutu lẹ. Antal Hőnisch (1911-1945), Bertalan Szabó (1921-1945), János Zsondor (1923-1945), Kunnudetọ Jehovah tọn lẹ, 2002.’

Yé yin hùhù osun awe poun jẹnukọnna vivọnu Wẹkẹ Whàn II tọn. Etẹwutu yé yin hùhù? Linlinwe Hongrie tọn Vas Népe dọmọ: “To whenuena Hitler dugán do Allemagne ji godo, e mayin Ju lẹ kẹdẹ wẹ yin yanwle tangan homẹkẹn, hihò, opá yasanamẹ tọn, po hùhù po eyin yé ma gbẹ́ nuyise yetọn dai gba, ṣigba Kunnudetọ Jehovah tọn nugbonọ lẹ lọsu ga. . . . To mars 1945, obu mlẹnmlẹn wẹ ṣinyọ́n whèyihọ-waji Hongrie tọn. . . . Apadewhe obu ehe tọn wẹ nado yàn Kunnudetọ Jehovah tọn lẹ sọn otò lọ mẹ bo hù yé.”

Tito-to-whinnu owhlẹ lọ hùnhùn tọn yin mimá do awe. Adà tintan wá aimẹ to aihundatẹn Batthyány Castle tọn, to fie hodọtọ lọ lẹ bẹ Weyọnẹntọ Szabolcs Szita, heyin ogán na Holocaust Documentation Center to Budapest; László Donáth, heyin hagbẹ Wedegbẹ́ Osẹ́n-Doaitọ lẹ Tọn na Jlọjẹ Gbẹtọvi tọn, Whẹho Wamọnọ po Sinsẹ̀n po tọn; gọna Kálmán Komjáthy, he yí nukun do mọ mẹhuhu lọ bosọ yin whenuho-dọtọ tòdaho lọ tọn todin hẹn. Hugan gbẹtọ 500 he wá lẹ zinzọnlin dasá otò lọ na adà awetọ tito-to-whinnu lọ tọn, yèdọ hùnhùn owhlẹ lọ tọn gbọn József Honfi heyin Ogán Körmend tọn dali.

To wekanhlanmẹ e zùn whedenu tọn etọn mẹ, Ján Žondor (János Zsondor) dotuhomẹna mẹmẹsunnu po mẹmẹyọnnu Klistiani tọn etọn lẹ po ma nado blawu. E wlan dọmọ: “Yẹn gbẹ́ flin hogbe Johanu tọn heyin mimọ to Osọhia 2:10 mẹ lẹ to ayiha ṣie mẹ he dọmọ: ‘Yin nugbonọ jẹ okú.’ . . . Mì dọna mẹhe to whégbè lẹ ma nado blawu, na yẹn kú na nugbo lọ bọ e mayin taidi sẹ́nhẹngbatọ de.”

[Yẹdide to weda 32]

Bertalan Szabó

[Yẹdide to weda 32]

Antal Hőnisch

[Yẹdide to weda 32]

Ján Žondor