Be Ahundoponọ-Yinyin Kẹdẹ Ko Pé Wẹ Ya?

Be ahundoponọ-yinyin yin nujọnu to gbẹzan egbesọ tọn mítọn mẹ wẹ ya? Nado yin ahundoponọ zẹẹmẹdo vivo sọn yẹnuwiwa si; nugbonọ; ahunjijlọnọ. E họnwun dọ, jẹhẹnu ehe yin alenu to haṣinṣan dagbe de tintindo mẹ hẹ mẹdevo lẹ. Apọsteli Paulu dotuhomẹnamẹ dọmọ: “Mì setonuna mẹmẹnu mìtọn lẹ hlan agbasalan to onú popo mẹ: e mayin yè mọ mẹnukunta do sẹ̀n, di wahianọ lẹ gba; ṣigba gbọn [ahun] dopo mẹ to osi Jiwheyẹwhe tọn mẹ.” (Kọlọsinu lẹ 3:22) Mẹnu wẹ ma na jlo dọ ahundoponọ mọnkọtọn de ni nọ wazọ́n na emi? To egbehe, e sọgan bọawuna ahundoponọ lẹ nado mọ agbasazọ́n bosọ hẹn e go.

Ṣigba, nuhewutu ahundoponọ-yinyin do yin nujọnu hugan lọ wẹ lehe e nọ yinuwado haṣinṣan mítọn hẹ Jiwheyẹwhe ji do. Islaelivi hohowhenu tọn lẹ nọ mọ dona Jiwheyẹwhe tọn eyin yé yí sọwhiwhe do payi osẹ́n lẹ po hùnwhẹ lẹ po go. To hodidọ do wiwejininọ agun tọn go mẹ, Paulu dotuhomẹna Klistiani lẹ dọmọ: “Mì gbọ mí ni wà hùnwhẹ lọ, e mayin po otọ́n hoho po gba, kavi po otọ́n okẹ̀n tọn po po kanyinylan po tọn gba; ṣigba po akla madotọ́nnọ homẹwiwe po nugbo tọn po.” (1 Kọlintinu lẹ 5:8) Na Jiwheyẹwhe nido kẹalọyi sinsẹ̀n-bibasi mítọn, e mayin dọ ahundoponọ-yinyin yin nujọnu kẹdẹ wẹ gba ṣigba e sọ yin dandannu. Etomọṣo, nado yin ahundoponọ kẹdẹ ma ko pé gba. Nugbo dona zọnpọ hẹ ẹ.

Mẹhe ján bato Titanic tọn po mẹhe dó e lẹ po sọgan ko yise po ahundopo po dọ e ma sọgan siọ gba. Ṣigba, to gbejizọnlin tintan etọn whenu to 1912, e gbà do osin-agó de go bọ gbẹtọ 1 517 sọ kú. Ju owhe kanweko tintan tọn delẹ sọgan ko yise po ahundopo po to aliho he mẹ yé to Jiwheyẹwhe sẹ̀n te mẹ, ṣigba vivẹnu yetọn “ma gbọ̀n aliho oyọnẹn tọn gba.” (Lomunu lẹ 10:2) Na Jiwheyẹwhe nido kẹalọyi mí, nuhe mí yise taun lẹ dona sinai do nudọnamẹ he sọgbe lẹ ji. Homẹ Kunnudetọ Jehovah tọn he tin to lẹdo towe mẹ lẹ tọn na hùn nado gọalọna we nado gbadopọnna nuhe Jiwheyẹwhe sinsẹ̀n to ahundopo po nugbo po mẹ bẹhẹn.